मञ्जुश्रीमूलकल्प

अष्टाविंशस्तथा शूलः ऊनत्रिंशश्च मुद्गरः / तोमरं त्रिंशमित्याहुः एकत्रिंशं तु दक्षिणम् // mmk_35.10 //

द्वात्रिंशत् तथा वक्त्रः त्रयस्त्रिंशत् पटमुच्यते / चतुस्त्रिंशस्तथा कुम्भः पञ्चत्रिंशे तु खखरम् // mmk_35.11 //

कलशं षट्त्रिंशतिः प्रोक्तो सप्तत्रिंशे तु मौशलम् / अष्टत्रिंशे तु पर्यङ्कः ऊनचत्वारिंशत् पटहम् // mmk_35.12 //

चत्वारिंशतिमित्याहुः धर्मशङ्खमुदाहृतम् / चत्वारिंशं स एकं च शङ्कला परिकीर्तिता // mmk_35.13 //

द्वितीया बहुमता प्रोक्ता तृतीया समनोरथा / चतुर्त्थी जननी दृष्टा प्रज्ञापारमिता मिता // mmk_35.14 //

पञ्चमं पात्रमित्याहुः सम्बुद्धा द्विपदोत्तमाः / तोरणं षष्ठमित्युक्तः सप्तमं तु सुतोरणम् // mmk_35.15 //

अष्टमं घोषनिर्दिष्टः जपशब्दो नवमः पुनः / पञ्चाशद् भेरिमित्युक्ता धर्मभेरिं तु साधिका // mmk_35.16 //

द्विपञ्चाशद् गजमित्याहुः वरहस्तत्रिकस्तथा / चतुःपञ्चाशमिति ज्ञेयं मुद्रा तद्गतचारिणी // mmk_35.17 //

पञ्चमं केतुमित्याहुः षष्ठं चाशशरस्तथा / सप्तमं परशुनिर्दिष्टं अष्टमं लोकपूजिता // mmk_35.18 //

ऊनषष्टिस्तथा ज्ञेया भिण्डिपालं समासतः / षष्टिश्चैव भवेद्युक्ता लाङ्गलं तु समासतः // mmk_35.19 //

एकपष्टिस्ततः पद्मः द्विषष्टिः वज्रमुच्यते / त्रिषष्टिः कथितं लोके धर्मचक्रं प्रवर्त्तितम् // mmk_35.20 //

चतुःषष्टिस्तथा ज्ञेयः पुण्डरीकं समासतः / पञ्चषष्टिस्तथा विन्द्याद् वरदं मुद्रमुत्तमम् // mmk_35.21 //

षट्षष्टि तथा वध्वा वज्रमुद्रा तु कीर्त्तिता / सप्तषष्टिस्तथा लोके कुन्तमाहुर्मनीषिणः // mmk_35.22 //

अष्टषष्टिस्तथा कुर्याद् वज्रमण्डलमुदाहृतम् / ऊनसप्ततिमेवं स्यात् शतघ्नेति प्रकीर्तिता // mmk_35.23 //

ततः सप्ततिकं विन्द्यान्नादामुद्रं समासतः / एकसप्ततिमित्याहुर्विमानं मुद्रवरं शुभम् // mmk_35.24 //

द्विसप्तत्या समासेन स्यन्दनं स इहोच्यते / शयनं लोकनाथानां त्रिसप्तान्या समासतः // mmk_35.25 //

पञ्चसप्ततिराख्यातश्चतुःसप्ततिकस्तथा / अर्धचन्द्रं च वीणा च उभौ मुद्रावुदाहृतौ // mmk_35.26 //

षट्सप्ततिमं लोके मुद्रा पद्मालया भवेत् / सप्तसप्ततिमः श्रेष्ठः मुद्रा कुवलयोद्भवा // mmk_35.27 //

अष्टसप्ततिमं मुद्रा नमस्कारेति उदाहृता / नवमं नवतिसङ्ख्या तु उभौ मुद्रौ शुभोत्तमौ // mmk_35.28 //

सम्पुटं यमलमुद्रा च सङ्ख्या नवतिमं भवेत् / एकनवतिमित्याहुः पुष्पमुद्रा उदाहृताः // mmk_35.29 //

द्वितीया वलयमुद्रा तु तृतीया धूपयेत् सदा / चतुर्त्था गन्धमुद्रा तु पञ्चमी दीपना स्मृता // mmk_35.30 //

षष्ठ्या साधनं विन्द्यात् सप्तम्या आसने स्मृता / अष्टममाह्वाननं प्रोक्तं नवमं तु विसर्जनम् // mmk_35.31 //

शतपूर्णस्तथा विन्द्यात् मुद्रां सर्वकर्मिकाम् / साधिकं शतमित्याहुर्महामुद्रा इति स्मृताः // mmk_35.32 //

उष्णीषं लोकनाथानां चक्रवर्ति सदा गुरोः / तं मुद्रं प्रथमतः प्रोक्ता द्वितीया सितमुद्भवा // mmk_35.33 //

तृतीया मूलमुद्रा तु मञ्जुघोषस्य दृश्यते / चतुर्त्थी धर्मकोशस्था धर्ममुद्रेति लक्ष्यते // mmk_35.34 //

पञ्चमी सङ्घमित्याहुर्महामुद्रापि सा भवेत् / षष्ठी तु भूतशमनी प्रत्येकार्हमुद्भवा // mmk_35.35 //

सप्तमी बोधिसत्त्वानां दशमी तु प्रवेशिनाम् / मुद्रा पद्ममालेति महामुद्रां तु तां विदुः // mmk_35.36 //

वरदा सर्वमुद्राणां मन्त्राणां च सलौकिकाम् / महाप्रभावां महाश्रेष्ठां ज्येष्ठां त्रैलोक्यपूजिताम् // mmk_35.37 //

अष्टमीं सम्प्रयुञ्जीत मुद्रा त्रिभुवनालयाम् / मुद्राणां कथिता सङ्खया अस्मिं तन्त्रे महोद्भवा // mmk_35.38 //

शतमेक तथा चाष्टं सङ्ख्यामुद्रेषु कल्पिता / एतत्प्रमाणं तु सम्बुद्धैः पुरा गीतं महीतले / निर्नष्टे शासने शास्तुः प्रचरिष्यति देहिनाम् // mmk_35.39 //

आदौ तावत् करे न्यस्तमुभयाग्रां करे स्थितौ / अन्योन्याङ्गुलिमावेष्ट्य सन्मिश्रां च पुनस्ततः / उभौ करौ समायुक्तौ पञ्चचूलासुचिह्नितौ // mmk_35.40 //

विपर्यस्तस्ततस्तेषामङ्गुलीनां तु अग्रतः / मुद्रा पञ्चशिखा ज्ञेया पञ्चचीरकमेव तु // mmk_35.41 //

महामुद्रेति विख्याता बोधिसत्त्वशिरस्तथा / महाप्रभावो मुद्रो ऽयं प्रयुक्तः सर्वकर्मिकः // mmk_35.42 //

मञ्जुश्रियस्य मन्त्रेण हृदयैर्वापि योजयेत् / केशिन्या चैव मन्त्रेण मूलमन्त्रेण वा सदा // mmk_35.43 //

योजयेद् विधिदृष्टेन सर्वमन्त्रेषु वा पुनः / कुर्यात् सर्वाणि कर्माणि अवन्ध्येदं वचनं मुनेः // mmk_35.44 //

तथैव हस्तौ विन्यस्तौ कुर्यात् तत्करसम्पुटम् / तत्रैव त्रिशिखं कुर्यादङ्गुलीभिर्विमिश्रितैः // mmk_35.45 //

उभौ हस्तौ तु यदाङ्गुष्ठौ शून्याकारौ तु निश्रितौ / मध्यमानामिकं चैव विपरीताकारवेणिकौ // mmk_35.46 //

एतत् तत् त्रिशिखं ज्ञेयं त्रिचीराकार इति पुनः / एषा मुद्रा महामुद्रा मञ्जुघोषस्य धीमतः // mmk_35.47 //

कुर्यात् सर्वाणि कर्माणि विधिदृष्टानि यानि वै / मञ्जुश्रियस्य ये मन्त्रास्तेषु सर्वेषु योजयेत् / क्षिप्रं साधयते ह्यर्थां जापिभिर्जन्मनीषितम् // mmk_35.48 //

तदेव हस्तौ विन्यस्तौ कुर्यादेकशिखं तथा / मध्यमाङ्गुलिसंश्लिष्टौ भवेदेकशिखा ध्रुवम् / एषा मुद्रा महामुद्रा सम्बुद्धैस्तु प्रकाशिता // mmk_35.49 //

मन्त्रा कुमारसन्यस्ता ये चान्ये ऽपि सलौकिका / सिद्ध्यन्ते ऽनेन युक्तास्तु क्षिप्रकर्मप्रसाधिका // mmk_35.50 //

अनेन साध्यास्तथा मन्त्रा उत्तमा जिनभाषिता / क्षिप्रं साधयते ह्यर्थां विधिदृष्टेन कर्मणा // mmk_35.51 //

तदेव करसंयुक्तौ विन्यस्तं अङ्गुलीचितम् / उभौ तर्जन्य सङ्कोच्य सूच्यादञ्जलिसादृशम् // mmk_35.52 //

विन्यस्ताङ्गुष्ठयुगले मध्याङ्गुल्यौ प्रसारितौ / अनामिकां वेष्टयित्वा तु उत्पलेति उदाहृतम् // mmk_35.53 //

एषा बोधिसत्त्वस्य मूलमन्त्रेति लक्ष्यते / तदेव सर्वं यत् कर्म निर्दिष्टं पञ्चचीरके // mmk_35.54 //

सर्वं तत् कुर्यात् क्षिप्रं उत्पलेन तु साधयेत् / एषा वरदा मुद्रा क्षिप्रभोगप्रसाधका // mmk_35.55 //

संयुक्ता मूलमन्त्रेण क्षिप्रमर्थकरो भवेत् / उभौ करौ तथा युक्तौ कुर्यादुत्तानकौ सदा / तदेव सम्पुटं कृत्वादङ्गुलीभिः समन्ततः / विन्यस्तं शोभनाकारं स्वस्तिकाकारसम्भवम् // mmk_35.56 //

मध्यमाङ्गुलिमध्ये तु कन्यसी तु समा भवेत् / अङ्गुष्ठयुगलविन्यस्तं मुद्रा स्वस्तिकमुच्यते // mmk_35.57 //

एषा सर्वार्थकरी मुद्रा शान्तिकर्मे प्रयुज्यते / हृदयैः षडक्षरैर्युक्ता सर्वकर्मां करोति वै // mmk_35.58 //

तदेव हस्तौ सम्मिश्र अन्योन्याङ्गुलिमिश्रितम् / पूर्णमुद्रेति मित्याहुर्गतिज्ञानविशेषगाः // mmk_35.59 //

आकोशादञ्जलिं कृत्वा विरलं च समन्ततः / पूर्णमुद्रेति सम्बुद्धाः कथयामास जापिनाम् // mmk_35.60 //

एषा सर्वशमनी दुःखदारिद्रदुःखिताम् / धनाढ्यं कुरुते क्षिप्रं मूलमन्त्रसचोदिता // mmk_35.61 //

अपरं मुद्रमित्याहुः लोकज्ञानसुचेष्टिताः / उभौ हस्तौ तथा कृत्वा वामतर्जनिमाश्रितम् // mmk_35.62 //

दक्षिणं तु करं कृत्वा तस्य मङ्गुलितस्थितम् / तर्जन्या मध्यमा चैव विसृते ध्वजमुच्यते / ध्वजमुद्रा इति ख्याता उच्छ्रिता शक्रधारणी // mmk_35.63 //

अनया मुद्रया कुर्याद् बलिहोमादिकं क्रमम् / सर्वकर्मकरा ह्येषा मूलमन्त्रप्रचोदिता // mmk_35.64 //

तदेव हस्तौ विन्यस्तौ अङ्गुलीकारसम्पुटौ / सम्पुटा सा भवेन्मुद्रा सर्वविघ्नप्रनाशनी / क्रमेण कुरुते कर्म मन्त्रज्ञानसमोदिता // mmk_35.65 //

विधिदृष्टेन मन्त्रा वै क्षिप्रमर्थप्रसाधिका / मन्त्रैर्मञ्जुघोषस्य हृदयस्थानसमुद्भवैः // mmk_35.66 //

संयुक्ता कुरुते कर्मां अशेषां लोकचिह्निताम् / तदेव हस्तौ विन्यस्तौ वामहस्तौपरि स्थितम् // mmk_35.67 //

दक्षिणं तर्जनीं गृह्य वामं तर्जनिमुच्छ्रिता / एषा यष्टिरिति ख्याता मुद्रा शक्रनिवारणी // mmk_35.68 //

सर्वां समयते विघ्नां दारुणानतिभैरवाम् / सर्वदुष्टवधार्थाय निर्दिष्टा मन्त्रजापिनाम् / मूलमन्त्रसमोपेता क्षिप्रमर्थकरा भवेत् // mmk_35.69 //

तदेव हस्तं विन्यस्तं यष्ट्याकारसमुच्छ्रितम् / दक्षिणं तु करं कृत्वा विसृतं छत्रमुच्यते / अनेन मुद्रया कुर्यादात्मरक्षं तु मूर्द्धितः // mmk_35.70 //

सर्वमन्त्रैस्तु कुर्वीत कर्म रक्षाभिधायकम् / शत्रूणां छादयेद् वक्त्रं स्तम्भयेद्वा मनीषितम् // mmk_35.71 //

यथाभिरुचितां दुष्टां कारयेद्वा समानुषाम् / नश्यन्ते सर्वविघ्ना वै दृष्ट्वा मुद्रां सच्छत्रकाम् // mmk_35.72 //

तदेव हस्तौ कुर्वीत विन्यस्ताकारशोभनम् / अङ्गुष्ठाग्रयुक्तं तु मध्यमाङ्गुलिसारितम् // mmk_35.73 //

अनामिकाकुञ्चिताग्रं तु मध्यपर्वे तु मध्यमम् / तदेव शक्तिनिर्दिष्टा सर्वदुष्टनिवारणी // mmk_35.74 //

कथिता लोकनाथैस्तु रक्षा सग्रहनाशनी / विन्यस्ता क्रोधराजेन यमान्तेन तु रोषिणा // mmk_35.75 //

कुर्यात् क्षिप्रतरं लोके दारुणं पापमुद्भवम् / प्राणोपरोधिनं कर्म सर्वबुद्धैस्तु वर्जितम् // mmk_35.76 //

न कुर्यात् कर्ममेवं तु निषिद्धं लोकमुत्तमैः / अतः सर्वगतैर्मन्त्रैः योजयेच्छक्तिमुत्तमम् // mmk_35.77 //

लौकिका ये च मन्त्रा वै तथैव जिनभाषिता / तां प्रयुञ्जीत मुद्रे ऽस्मिं शक्तिना सुसमाहितः // mmk_35.78 //

दृष्ट्वा मुद्रवरं घोरं नश्यन्ते सर्वनैरृता / पिशाचास्तारकप्रेता पूतना सह मातरा // mmk_35.79 //

बालाग्रहविरूपाक्ष बालकानां प्रपीडना / नश्यन्ते सर्वदुष्टा वै ये केचित् क्रूरकर्मिणाः // mmk_35.80 //

तदेव हस्तं विन्यस्तं शक्तिकाकारसम्भवम् / विपरीतसम्पुटाकारं अन्योन्याङ्गुलिमिश्रितम् / तदेव सम्पुटमित्याहुः सम्बुद्धा विगतद्विषः // // mmk_35.81 // अनेन कारयेत् कर्म मन्त्रेणैकाक्षरेण तु / पिथयेत् सर्वविदिशां कृत्स्नां दिशाबन्धं तदुच्यते // mmk_35.82 //

एष मुद्रा महारक्षा सम्पुटीकृत्य तिष्ठति / नश्यन्ते सर्वदुष्टा वै ये चान्ये अहितानि वै // mmk_35.83 //

देहं रक्षयते सर्वं परिवारं चापि गोचरे / अशेषं रक्षते चक्रं यत्र जापी वसेत् सदा // mmk_35.84 //

न तस्य पातकं किञ्चित् अहितं चापि सम्भवेत् / क्षेमं सुभिक्षमारोग्यं परचक्रभयं कुतः // mmk_35.85 //

उभौ करौ समाश्लिष्य विपरीतं तु कारयेत् / दक्षिणं तु अधः कृत्वा वाममुत्तानकः सदा / अन्योन्यमिश्रितौ ह्येतौ फरमित्याहुर्जिनोत्तमाः // mmk_35.86 //

निवारयति दुष्टानामरीणां पापसम्भवम् / उपहृत्याक्षरैर्युक्ता रिद्धि + + + + + + + + // mmk_35.87 //

एकवर्णकैः स मन्त्रैर्युक्तः क्षिप्रमर्त्थकरो ह्ययम् / विचित्रार्त्थां कुरुते कर्मां अरिसम्भवपापकाम् // mmk_35.88 //

भोगिनां विषनाशं च मूलमन्त्रप्रयुक्तिका / अन्यां वा युक्तिकृतां दोषां निर्नाशयति देहिनाम् // mmk_35.89 //

एष मुद्रवरः प्रोक्तः सम्बुद्धैर्द्विपदोत्तमैः / तदेव हस्तौ विन्यस्तौ संश्लिष्टावङ्गुलीभि तत् // mmk_35.90 //

गदाकारं तदा कुर्यान्मूलेनापि वेष्टितम् / उभयोरङ्गुष्ठयोर्मध्ये कन्यसीभि सुवेष्टितम् // mmk_35.91 //

षड्भिरङ्गुलिभिः कुर्यात् शून्याकारं सुशोभनम् / एतन्मुद्रा गदः प्रोक्ता सर्वदानवनाशनी // mmk_35.92 //

दैत्या च दुष्टचित्ताश्च सौम्यचित्ता तु दर्शने / नश्यन्ते उद्यते मुद्रे गदे वापि सुपूजिते // mmk_35.93 //

मूलमन्त्रप्रयुक्तास्तु क्षिप्रमर्त्थकरी शिवा / तथैव खड्गनिर्दिष्टा अनामिकाग्रैः सुकोचितैः // mmk_35.94 //

तथैव हस्तौ कुर्वीत प्रसारिताग्रं तु कुञ्चितम् / शरावाकारसमौ कृत्वा अङ्गुलीभिः समन्ततः / घण्टां तां विदुर्बुद्धाः प्रकाशयामास देहिनाम् // mmk_35.95 //

तदेव हस्तौ सम्मिश्रा उभौ बध्वा तु सम्पुटम् / अन्योन्यं मिश्रयित्वा वै मध्यमाङ्गुलिभिस्तथा / कुर्यात्तन्मण्डलाकारं पाशाकारं तु त भवेत् // mmk_35.96 //

तर्जनीति ततो न्यस्तं मध्यपर्वा सुमिश्रितैः / एष पाशमिति ख्यातः मुद्रो ऽयं बुद्धनिर्मितः // mmk_35.97 //

विनेयार्त्थं तु सत्त्वा बन्धमुक्तो ऽतिदारुणम् / ये च दुष्टा ग्रहाः क्रूरा ये वै सर्वराक्षसाः // mmk_35.98 //

ईषित् प्रचोदिता ह्येषा बध्नातीह समातराम् / बन्ध बन्धेत्यदा ह्युक्ता बध्नातीह सशक्रताम् / किं पुनर्मानुषे लोके क्रव्यादां पिशिताशिनाम् // mmk_35.99 //

तदेव हस्तौ विन्यस्तौ उभौ कृत्वा तु तत्समौ / वामपाणोपरि न्यस्तं दक्षिणं तु करं तथा // mmk_35.100 //

तदेव अङ्कुशाकारं मध्यमाङ्गुलितर्जनी / मध्यमं पर्वमाश्लिष्य तर्जनी कारयेदङ्कुशम् // mmk_35.101 //

मूलमन्त्रप्रयुक्तो ऽयमङ्कुशो ऽयं प्रचोदितः / क्षिप्रं कारयते कर्मां जापिभिर्जन्मनीषितम् / आनयेत् क्षिप्र देवेन्द्रां ब्रह्माद्यां सशक्रकाम् // mmk_35.102 //

प्रयुक्तो मुद्रवरः श्रेष्ठः अङ्कुशाकर्षणं शुभः / तदेव हस्तौ सम्मिश्रविपरीताकारपिण्डिकम् // mmk_35.103 //

मध्यमानामिकौ नाम्य अङ्गुल्यौ वामकरासृतौ / तर्जनी कन्यसां चापि उभौ तर्जन्यदक्षिणा // mmk_35.104 //

दक्षिणा हस्तनिर्दिष्टा मध्यमानामिकनामितौ / विपर्यस्त ततो न्यस्तं श्लिष्टौ अङ्गुष्ठकारितौ // mmk_35.105 //

तद्रेव भद्रपीठं तु कथिता मुद्रवरा शुभा / आसनं सर्वबुद्धानां क्रुद्धशक्रनिवारणम् // mmk_35.106 //

योजिता सर्वमन्त्रैस्तु जिनाग्राणां कुलसम्भवैः / स्थापिता सर्वबुद्धानां बोधिसत्त्वां महर्द्धिकाम् / सदेवकं च लोकं वै सर्वा निश्चलकारिका // mmk_35.107 //

तदेव भद्रपीठं तु मध्यमाङ्गुलिमाश्रिताम् / उपरिस्थानविन्यस्तौ मध्यानामिति शारितौ / तदेव पीठनिर्दिष्टा मुनिसिंहैर्जितारिभिः // mmk_35.108 //

उभौ हस्तौ तथोन्मिश्र अङ्गुलीभिर्विवेष्टयेत् / ततो वेणिसमाधश्च कन्यसाङ्गुलिसूचिकाम् // mmk_35.109 //

सङ्कोच्य मध्यमतः क्षिप्रं पद्मपत्रायतोद्भवाम् / उभयोरङ्गुष्ठयोन्मिश्रः स्थापयेत् स्थितकं सदा // mmk_35.110 //

एतन्मयूरासनं प्रोक्तं सम्बुद्धैर्विगतद्विषैः / एतद् बोधिसत्त्वस्य मञ्जुघोषस्य धीमतः // mmk_35.111 //

आसनं मुनिवरैर्ह्युक्तो बालक्रीडनकं सदा / महाप्रभावा इयं मुद्रा पुरा ह्युक्ता स्वयम्भुभिः // mmk_35.112 //

करोति कर्मवैचित्र्यं मञ्जुमन्त्रप्रचोदिता / विनाशयति दुष्टानां क्रव्यादा पिशिताशिना // mmk_35.113 //

परिपूर्णं तथा विंशन्मुद्राणां तु मतः परम् / कथिता लोकमुख्यैस्तु सम्बुद्धैर्द्विपदोत्तमैः // mmk_35.114 //

अतः परं प्रवक्ष्यामि मुद्राणां विधिसम्भवम् / करैः शुभैस्तथा शुद्धैः निर्मलैर्जलशौचितैः // mmk_35.115 //

श्वेतचन्दनकर्पूरैः कुङ्कुमैर्जलमिश्रितैः / बहुभिर्गन्धविशेषैस्तु उपस्पृश्यानिलशोषितैः // mmk_35.116 //

शुचिभिः करैरभ्यङ्गैरङ्कुशैश्चापि अदहुलैः / तदेव मुद्रां बन्धीयाद् बन्द्याद्यां द्विपदोत्तमाम् // mmk_35.117 //

शालं सङ्कुसुमं चैव अमिताभं रत्नकेतुनम् / अमितायुर्ज्ञानविनिश्चयेन्द्रं लोकनाथं दिवङ्करम् // mmk_35.118 //

क्षेमं लोकनाथं च सुनेत्रं धर्मकेतुनम् / प्रभामालीति विख्यातं ज्येष्ठं श्रेष्ठमितोत्तमम् // mmk_35.119 //

एतेषामन्यतरं बुद्धं वन्दित्वा द्विपदोत्तमम् / शुचिर्भूत्वा शुचिस्थाने बन्धेन्मुद्रां जपान्तिके // mmk_35.120 //

आचार्यां तु यं दृष्ट्वा सन्देहार्थं विमुच्यते / तं तथाचारसम्पन्नो बन्धेन्मुद्रां यथासुखम् // mmk_35.121 //

संशोध्य च विविक्तं वै कृत्वा स्थानाभिमन्त्रितम् / न क्रुद्धो न चोच्छिष्टो न चाक्रुष्टो परेण तु // mmk_35.122 //

नाङ्गारे न भस्मनिर्मध्ये बन्धेन्मुद्रां कदाचन / न सक्तः परदारेषु परद्रव्येषु वै तदा // mmk_35.123 //

न स्थितो न निपन्नश्च बन्धेन्मुद्रां सुखोदयाम् / न दक्षिणामुखमास्थाय नापि पश्चान्मुखोत्थितः // mmk_35.124 //

न चोर्ध्वे नाप्यधश्चैव मुद्राबन्धं तु कारयेत् / उदङ्मुखः पूर्वतश्चापि विदिशेष्वेतेषु तेषु वै // mmk_35.125 //

बन्धयेन्मुद्रमन्त्रज्ञः मन्त्रं स्मृत्वा तु चक्रिणम् / एषा विधिमतः श्रेष्ठा सर्वमुद्रेषु बन्धने // mmk_35.126 //

अत ऊर्ध्वं प्रवक्ष्यामि मुद्रा साधिकविंशमम् / उभौ करौ समायुक्तौ कुर्यादङ्गुलिमिश्रितौ // mmk_35.127 //

मध्यमं तु ततः शून्यं अङ्गुलीभिः समादिशेत् / मध्यपर्वविधिन्यस्तं शून्याग्रं कन्यसीभितम् // mmk_35.128 //

कारयेन्नित्यमन्त्रज्ञो अङ्गुष्ठौ कुञ्चिताश्रितौ / त्रिशूच्याकारसंयुक्तौ पट्टिशं विदुर्बुधाः // mmk_35.129 //

एष मुद्रवरः क्षिप्रं परमन्त्रांसि च्छिन्दिरे / परमुद्रां तथा भिन्द्यात् दुष्टसत्त्वनियोजिता // mmk_35.130 //

त्राशयेत् सर्वभूतानां ग्रहमातरपूतनाम् / करोति कर्मवैचित्र्यं क्षिप्रमानयते शिवम् // mmk_35.131 //

रुद्रेण भाषिता ये मन्त्रा विष्णुना ब्रह्मणा स्वयम् / तां विच्छेद मन्त्रज्ञो विधिदृष्टेन कर्मणा // mmk_35.132 //

मुद्रेणानेनैव युक्तेन पट्टिशेन महात्मना / मन्त्रेण चैव युक्तस्थो जिनवक्त्रसमुद्भवैः // mmk_35.133 //

करोति कर्मवैचित्र्यं छेदभेदक्रियां तथा / परसत्त्वकृतां दुष्टा नाशयेत् तामशेषतः // mmk_35.134 //

तदेव हस्तौ संवेष्ट्य मध्यानामिकमुच्छ्रितौ / उभौ करौ समायुक्तौ लिङ्गाकारसमुद्भवौ / चतुरङ्गुलसंयुक्त लिङ्गमुद्रमिति मतम् // mmk_35.135 //

महेश्वरो देवपुत्रो वै आत्ममन्त्रं च मुद्रिणम् / कथयामास तन्त्रे वै आकृष्टौ मुनिना पुरा // mmk_35.136 //

अन्येषां चात्मनो मन्त्रां मुद्रां चैव सविस्तराम् / प्रकाशयामास आकृष्टः समये ऽस्मिं कल्पमुत्तमे / एतन्मुद्रवरं ह्यग्रं लौकिकेषु प्रकत्थ्यते // mmk_35.137 //

यावन्ति केचिन्मन्त्रा वै रुद्रप्रोक्ता महीतले / तेषामधिपतिर्ह्यग्रो मुद्रो ऽयमेकलिङ्गितः // mmk_35.138 //

बोधिसत्त्वप्रभावेन मञ्जुघोषस्य धीमतः / आनीतो मण्डले + + नौम कर्मप्रसाधकः // mmk_35.139 //

यावन्ति केचिद् दुष्टा वै पर्यटन्ते महीतले / ग्रहाः क्रव्यादपिशिताश्च मातराः कटपूतना // mmk_35.140 //

तेषां निवारणार्थाय रुद्रविघ्नकृतेषु वै / पुनरेतन्मुद्रवरं ह्युक्तं बलिकर्मेषु वै निशा // mmk_35.141 //

करोति सर्वकर्मां वा बुद्धाधिष्ठानऋध्यया / तथैव तद्विधं कृत्वा द्विलिङ्गसमुदाहृतः / तथैव मालमङ्गुल्यै स माला परिकीर्तिता // mmk_35.142 //

तदेव मालां सङ्कोच्य सम्पुटाकारसम्भवम् / तर्जन्यावुभौ श्लिष्य कुर्याद्धनुसन्निभम् / अङ्गुष्ठौ पीडयेन्मुष्टौ धनुर्मुद्रा स लक्ष्यते // mmk_35.143 //

तदेवमङ्कुलिं कुर्याद् दक्षिणाकरनिसृता / वामं तर्जनीं मुष्टौ निष्पीड्यन्ते तु पर्वणि // mmk_35.144 //

नाराचं मुद्रमित्युक्तः समलिङ्गं पुनर्वदे / उभौ हस्तौ ततः कृत्वा अन्योन्या सृतपिण्डितौ // mmk_35.145 //

दक्षिणाकरमङ्गुष्ठं उच्छ्रितां लिङ्गसम्भवम् / समलिङ्गं तं विदुः कल्पे शासने ऽस्मिं विशारदाः // mmk_35.146 //

तदेव हस्तौ उभौ कृत्वा अन्योन्यासृतमङ्गुलम् / उभौ तर्जन्य संयोज्य शूलाकारं तु कारयेत् / एतच्छूलमिति प्रोक्तं सत्त्वदुष्टानुशासनम् // mmk_35.147 //

तदेव हस्तौ निसृत्य मुष्टिं बध्वा उभौ पुनः / अङ्गुष्ठौ स्थितकां कृत्वा मुद्गरं समुदाहृतम् // mmk_35.148 //

तदेव मुद्गरमीषच्चालयेत् करसम्पुटे / तोमरं कथितं ह्यग्रं मुद्रं शक्रनाशनम् // mmk_35.149 //

उत्पलं तु ततो बध्वा अनामिकाङ्गुलिभिस्तदा / अधस्तादङ्गुष्ठयोर्मध्ये विन्यस्तं चाप्रदर्शितम् / एत दंष्ट्रमिति प्रोक्तं विवृते वक्त्रमुच्यते // mmk_35.150 //

समौ कृत्वा ततस्तेषामङ्गुलीनां समन्ततः / उरे दत्वावसव्यं वै क्षिपेत् त्वा पटमुच्यते // mmk_35.151 //

उभौ सम्पुटौ कृत्वा हस्तौ विन्यस्तशोभनौ / अङ्गुलीमङ्गुलीभिश्च अन्योन्याग्रश्लेषितौ // mmk_35.152 //

उत्थितानामिसङ्कोच्य कुम्भमुद्रमुदाहृतम् / तदेव मुष्टि संयोज्य तर्जन्यौ पुनरुच्छ्रितौ // mmk_35.153 //

कुर्यात् खखराकारं वेणिकाकारमुद्भवम् / एतन्मुद्रं समाख्यातं खखरेत्यरिसूदना // mmk_35.154 //

तदेव खखर ईपदवनाम्यं तु शोभनम् / कुर्यादङ्गुष्ठविन्यस्तं कलशं तदिहोच्यते // mmk_35.155 //

उच्छ्रितं तु पुनः कृत्वा तर्जन्यानामिसम्भवम् / चतुर्भिरङ्गुलीभिः कुर्यान्मुशलाकारसम्भवम् // mmk_35.156 //

मुद्रं मुशलमित्याहुः मन्त्रज्ञानसमन्विता / तदेव हस्तौ विन्यस्तौ मध्यमानामिकौ अधः // mmk_35.157 //

उपरिष्टात् तेषु वै नित्यं न्यस्तं दक्षिणावायवेष्टितम् / संवेष्ट्य अङ्गुष्ठयोर्न्यस्तौ कन्यसा तर्जनी तु ताम् // mmk_35.158 //

समन्तात् पर्यङ्कमाकारं मुद्रामाहुस्तथागता / एतत् पर्यङ्कमुद्रेति ख्यातं लोके समन्ततः // mmk_35.159 //

अनया मुद्रया युक्तो मन्त्रयुक्तस्तथा पुनः / सर्वैर्जिनमुक्तैस्तु वज्राब्जकुलमुद्भवैः / एतैर्मन्त्रैः प्रयुक्तो ऽयं सर्वकर्मकरं शिवम् // mmk_35.160 //

ये च मुद्रास्तथा प्रोक्ता मुशलाद्याः शूलसम्भवाः / सर्वे वै क्रोधराजस्य यमान्तस्येह शासने / उग्रा प्रहरणा ह्येते सत्त्ववैनेयनिर्मिता // mmk_35.161 //

बोधिसत्त्वप्रभावेन ऋद्ध्या कुर्वन्ततस्तदा / सर्वं वैनेयदुष्टानां कुम्भाद्या मुद्रभाषिता // mmk_35.162 //

तदेव हस्तं विन्यस्तं पटहाकारसम्भवम् / आबन्धेदङ्गुलिभिर्युक्तं सर्वाभिश्च सवेणिकाम् // mmk_35.163 //

वेणिकां कृत्यमङ्गुष्ठैस्ततो न्यस्य करे पुनः / मध्ये प्रादेशिनी कृत्वा उच्छ्रिताग्रं तु कारयेत् / एतत् पटहनिर्दिष्टं मुद्रा दुष्टनिवारणी // mmk_35.164 //

तदेव हस्तौ विन्यस्तौ अञ्जली सुप्रयोजितौ / उभौ तर्जन्य सङ्कोच्य कुण्डलाकारशोभनौ // mmk_35.165 //

अङ्गुष्ठं ते अधः कृत्वा अङ्गुष्ठौ नामितौ उभौ / प्रविष्टौ मध्यपुटान्तस्थौ शङ्खं भवति शोभनम् / एतद्धर्मसङ्खं वै वरमुद्रं प्रकाशितम् // mmk_35.166 //

मन्त्रैर्मुनिवरोक्तैस्तु संयुक्तः सर्वकार्मिकः / करोति कर्मवैचित्र्यं सर्वदंष्ट्राविषभोगिनाम् // mmk_35.167 //

निर्नाशयति सर्वांस्तां मूलमन्त्रप्रयोजिता / शङ्खमापूरयेज्जप्तं विद्याराजैर्महर्द्धिकैः / निर्विषो ऽपि भवेत् क्षिप्रं यो जन्तुर्विषमूर्च्छितः // mmk_35.168 //

चत्वारिंशति समाख्याता मुंद्रा श्रेष्ठा महर्द्धिका / अतः ऊर्ध्वं प्रवक्ष्यामि मुद्रालक्षणसम्भवम् // mmk_35.169 //

तदेव हस्तौ विन्यस्तौ अङ्गुल्याग्रसवेणिकौ / भूयो दामोटयेद् यत्नादवसव्यं तु कारयेत् / अधस्तात् सर्वतः कृत्वा शङ्कलेति उदाहृता // mmk_35.170 //

एषा मुद्रवरश्रेष्ठाः सर्वदुष्टार्त्थबन्धनी / मन्त्रैस्तैरेभिसंयुक्ता मुनिमुख्यार्त्थभाषितैः / सर्वां बन्धयते भूतां ग्रहमातरकश्मलाम् // mmk_35.171 //

तदेव हस्तौ सङ्कोच्य मुक्त्वा वेणि समुच्छ्रयेत् / तदेव विधिना बध्वा अन्येनाङ्गुष्ठमध्ययोः // mmk_35.172 //

मध्यपर्वे समाश्लिष्य उभयाग्र्यं करं पुनः / दत्वाभिमुखं ह्यग्नेर्वह्निमन्त्रसुयोजितः / आवाहयेच्छिखिनं होमे अग्निकर्मेषु सर्वदा // mmk_35.173 //

क्षिप्रमाह्वयते वह्निः मुद्रेणानेन योजिता / विसर्जयेदनेनैव मन्त्रेण तर्जन्याग्रविमिश्रितैः // mmk_35.174 //

अङ्गुष्ठे नित्यमाश्लिष्टे विशर्ज्यं वह्निदैवतम् / मुद्रा बहुमता ह्येषा अग्निकर्मप्रसाधिका // mmk_35.175 //

आह्वानयति देवानां यदृच्छं मन्त्रजापिनो / एषां बहुमता मुद्रा बध्वाधिष्ठानवर्णिनी / करोति कर्मवैचित्र्यं संयुक्ता मन्त्रमुत्तमैः // mmk_35.176 //

तदेव हस्तौ एकस्थौ सम्पूर्णामङ्गुलिमाश्रितौ / कुर्यादाकोशमञ्जल्या श्लथं वर्तुलसम्भवम् // mmk_35.177 //

परिपूर्णं ततः कृत्वा कुड्मलं पद्मसम्भवम् / मनोरथं तु तं विन्द्या मुद्रां सर्वार्त्थसाधिकाम् // mmk_35.178 //

एषा मुद्रा वरा श्रेष्ठा पुरा गीता तथागतैः / सत्त्वानां हितकाम्यार्त्थं मञ्जुघोषे नियोजिता // mmk_35.179 //

मनसा कांक्षते सत्त्वो यो हितार्त्थं मनोरथम् / तूर्णं तत् साधयते क्षिप्रं मन्त्रैर्युक्ता महर्द्धिकैः / एषा मुद्रा वरा श्रेष्ठा मनोरथेति स उच्यते // mmk_35.180 //

एषा मुद्रवरा श्रेष्ठा सर्वकर्मप्रसाधिका / क्षिप्रं साधयते मन्त्रां द्रव्यां चैव सविस्तराम् // mmk_35.181 //

एषा मुनिचन्द्रेण चन्द्राभा सुप्रवर्त्तिता / चन्द्रा पद्मकुले मन्त्रा तेनायं सुप्रयोजिता / करोति कर्मवैचित्र्यं सितवर्णामृतसम्भवा // mmk_35.182 //

तदेव हस्तौ संशुद्धौ उभौ अङ्गुलिमाश्रितौ / षड्भिरङ्गुलिमाश्लिष्टौ पुस्तकाकारसम्भवौ / उच्छ्रितौ वर्त्तुलौ कृत्वा कन्यसाङ्गुष्ठकौचितौ // mmk_35.183 //

एषा मुद्रा वरा प्रोक्ता प्रज्ञापारमितामिता / जननी सर्वबुद्धानां मोक्षार्त्थं तु नियोजिता / साधयेत् सर्वकर्मं वै शान्तिपुष्ट्यर्त्थयोजिता // mmk_35.184 //

तदेव हस्तौ विन्यस्तौ दक्षिणं वामतोपरि / कृत्वा नाभिदेशे वै कोलस्थं निम्नमुद्भवम् / उभौ हस्तौ तदाश्लिष्य स मुद्रा पात्रमुच्यते // mmk_35.185 //

पात्रं जननी मुद्रौ जिनमन्त्रैः सुयोजितौ / करोति कर्मवैचित्रं यथेष्टं मन्त्रविचक्षणैः // mmk_35.186 //

तदेव हस्तावुद्धृत्य कुर्यात् तर्जनिमुच्छ्रितौ / मध्यमाङ्गुलिमग्रं तु नामितं मीषितोरणम् // mmk_35.187 //

तदेव उच्छ्रितौ कृत्वा कथयामास सुतोरणम् / तदेव बध्वा तदन्योन्यं घोषनिर्दिष्टमष्टमम् // mmk_35.188 //

उच्छ्रितोत्तममङ्गुष्ठौ जपशब्दं विदुर्बुधाः / तदेव उच्छ्रितौ हस्तौ अङ्गुल्याग्रौ सुकुञ्चितौ // mmk_35.189 //

सर्वैरङ्गुलिभिर्मुक्ता विरला केशसम्भवा / भेरी तं विदुर्बुद्धा धर्मभेरीति उच्छ्रितौ // mmk_35.190 //

तदेव हस्ततलं ऊर्ध्वं दक्षिणं वामतोच्छ्रतम् / अधस्तात् कारयित्वा तु गजाकारं सुयोजितम् // mmk_35.191 //

दक्षिणं मध्यमाङ्गुल्यां कराकारं तु कारयेत् / एतद् गजमुद्रं तु निर्दिष्टं संसारपारगैः // mmk_35.192 //

एषा मुद्रा महामुद्रा सम्बुद्धैस्तु प्रकाशिता / करोति कर्मां सर्वांस्तांस्तामशेषां लोकपूजिता // mmk_35.193 //

दक्षिणं हस्तमुद्यम्य अभयदत्तं परिकल्पयेत् / गृहीत्वा मणिबन्धे तु बामहस्तेन मुद्यतम् // mmk_35.194 //

मध्यमां तर्जनी स्पृष्ट्वा अङ्गुष्ठं मध्यतो स्थितम् / मध्यपर्वाश्रितं युक्तं वरहस्तं तदुच्यते // mmk_35.195 //

एतन्मुद्रवरं श्रेष्ठं आदिबुद्धैस्तदोदितम् / अभयं सर्वसत्त्वानां मुद्रां बध्वा ददौ जपी / मन्त्रैर्मुनिमतैर्युक्तः क्षिप्रमर्थप्रसाधकः // mmk_35.196 //

तदेव हस्तौ संयुक्तौ सम्पुटाकारशोभनौ / उच्छतौ मध्यमाङ्गुल्यौ मुद्रा तद्गतचारिणी // mmk_35.197 //

तदेवमङ्गुलिभिर्वेष्ट्य अङ्गुष्ठौ उपरि स्थितौ / न्यस्य पर्वतले न्यस्तं केतुमित्याहु मुद्रिणम् // mmk_35.198 //

तदेव मूर्च्छिताग्रे कं शुभो निर्दिष्टमुद्रिणम् / उभौ तर्जन्यसमायुक्तौ अन्योन्याग्रविमिश्रितौ / सङ्कोच्य पर्वतो ऽङ्गुष्ठाः कन्यसीति समुच्छ्रितौ // mmk_35.199 //

तदेव परशुनिर्दिष्टा मुद्रा सर्वार्थसाधिका / सङ्कोच्य पुनः सर्वा वै सा मुद्रा लोकपूजिता // mmk_35.200 //

तदेवमुच्छ्रतं कुर्यात् तर्जन्याग्रसूचिकम् / भिण्डिपालस्ततो मुद्रा लाङ्गलं चक्रतो गतम् // mmk_35.201 //

तर्जन्यौ वक्रतः कृत्वा लाङ्गलो मुद्रमुत्तमम् / एतत् षष्टिमुद्राणां कथितं विधिना पुनः // mmk_35.202 //

सर्वे ते प्रहरणा मुद्रा संयुक्ता मन्त्रमीरिता / सर्वां विघ्नकृतां दोषां ग्रहकूष्माण्डमातराम् // mmk_35.203 //

सर्वराक्षसमुख्यानां बालसर्वानुत्रासिनाम् / निर्नाशयति सर्वांस्तां मुद्रां प्रहरणोद्भवाम् // mmk_35.204 //

षष्टिमेतं तु मुद्राणां लक्षणं समुदाहृतम् / अतः परं प्रवक्ष्यामि मुद्राणां विधिसम्भवम् // mmk_35.205 //

तदेव हस्तौ विन्यस्तौ पद्माकारसमुच्छ्रितौ / प्रसारिताङ्गुलिभिः सर्वं मुद्रां पद्म इति स्मृतम् // mmk_35.206 //

एषा मुद्रवरा ख्याता सन्यस्ताब्जकुलोद्भवाम् / यावन्त्यब्जकुले मन्त्रा संयुक्ता तैः शुभोदया // mmk_35.207 //

क्षिप्रकर्मकरा ख्याता बुद्धाधिष्ठानमुद्भवा / सर्वां साधयते मन्त्रां यावन्त्यब्जकुलोदया / मुद्राणां पद्ममुद्रेयं मध्यमे समुदाहृता // mmk_35.208 //

उभौ हस्तौ समायुक्तौ तर्जनीभिः समुच्छृतौ / मध्यमाङ्गुलिभिर्युक्तं विन्यस्ताकारसम्भवम् // mmk_35.209 //

अङ्गुष्ठौ न्यस्य वै तत्र मध्यमाङ्गुलिपर्वयोः / तदेव कथितं वज्रं कन्यसं मुद्रमुत्तमम् // mmk_35.210 //

यावन्ति वज्रकुले मन्त्रा ते साध्यानेन मुद्रिता / सिद्ध्यन्ते क्षिप्रतो युक्ता विधिना सम्प्रकीर्त्तिता // mmk_35.211 //

संयुक्तैः साधकं कर्मं यः साध्यं साधयेत् सदा / तस्य सिद्धिर्भवेन्नित्यं उत्तमाधममध्यमा / सर्वे च लौकिका मन्त्राः सिद्ध्यन्ते ह्यविकल्पतः // mmk_35.212 //

उभौ हस्तौ समायुक्तौ मध्यमाङ्गुलिमुच्छ्रितौ / सङ्कोच्यानामिकाङ्गुष्ठौ कन्यसौ सूचिमाश्रितौ // mmk_35.213 //

उभौ तर्जनिसंश्लिष्टौ मध्यपर्वाग्रकुञ्चितौ / मध्यमौ सूचिसमौ न्यस्तौ चक्राकारसमुद्भवौ // mmk_35.214 //

एतत्तु धर्मचक्रं वै मुद्रराजमिहोदितः / धर्मराजैस्तथा ह्युक्तो धर्मचक्रश्च वर्त्तितुम् // mmk_35.215 //

शान्तिचक्रं तदा वव्रे मुनिचन्द्रो ऽथ सप्तमः / त्रिमलां विच्छेदजापेन मुद्रराजेन योजिता // mmk_35.216 //

चक्रिण्यो ये च उष्णीषा लोचनाविद्यमुत्तमा / भ्रुकुटीपद्यकुले तारा मामकी चापि वज्रिणे // mmk_35.217 //

सिध्यन्ते धर्मचक्रेण मुद्राराजेन योजिता / समस्ता लौकिका मन्त्रा विष्णुरीशानभाषिता // mmk_35.218 //

तां विच्छेददृष्ट्वा वै जापिनां मुद्रसंयुताम् / एतन्मुद्रवरं श्रेष्ठं धर्मधातुविनिःसृतम् // mmk_35.219 //

करोति सर्वकर्मं वै सत्त्वानां च यथेप्सितम् / धर्मराजेन शान्त्यर्थं मुद्रेयं सम्प्रभाषितम् // mmk_35.220 //

अस्मिं कल्पवरे श्रेष्ठे सर्वकर्मप्रसाधिका / मुद्रेयं धर्मचक्रेति मञ्जुघोषस्य शासने // mmk_35.221 //

अग्रिमं सर्वमुद्राणां शान्तिकर्मसु योजयेत् / मन्त्रिभिर्लक्षते नित्यं शिवचक्रा तु सम्भवम् // mmk_35.222 //

तदेव विन्यस्तौ हस्तौ सम्पुटाकारमुद्भवौ / श्लथकोशायताङ्गुल्यः उभौ सङ्कुचितौ शुभौ / पुण्डरीकमिति ज्ञेयं मुद्रा सर्वार्थसाधका // mmk_35.223 //

तदेव हस्तं निक्षिप्य त्यज्य मुष्ट्यायताङ्गुलिम् / प्रसारिता कराकारं वरदं मुद्रमुच्यते // mmk_35.224 //

उभौ हस्तौ पुनः कृत्वा अङ्गुलीभिः समन्ततः / बध्वा च वेणिकाकारं मुद्रैषा रज्जुमुच्यते // mmk_35.225 //

पुनः प्रसारयस्तदेकं तु दक्षिणं करमुत्तमम् / कुर्यात् सूचिकाकारं मध्यतर्जनिमङ्गुलौ // mmk_35.226 //

ईषत् सङ्कुचिताग्रं तु अङ्गुलीनां नतोत्तमम् / स्थितिकां कारयेत् तत्र सुन्यस्तं तर्जनी तु तम् // mmk_35.227 //

कुर्यात् संश्लेषिते तत्र अनामिकापर्वनिश्रिता / मुद्रेयं कुन्तनिर्दिष्टा बहुधा लोकनायकैः // mmk_35.228 //

तदेव हस्तौ विन्यस्तौ उभौ तर्जन्यसूचितौ / उभौ मुष्टिसमं कृत्वा अङ्गुलीभिः समं पुनः / तदेव मुद्रसमाख्याता वज्रदण्डं मनीषिभिः // mmk_35.229 //

तदेव हस्तौ संयोज्य सम्पुटाकारकारितम् / विन्यस्तामङ्गुलिमञ्जल्यमन्योन्याश्लेषमाश्रितम् // mmk_35.230 //

उभौ अङ्गुष्ठमाश्रित्य शतघ्नामुद्रमुच्यते / ततः कृत्वा दुभौ हस्तौ समन्तान्निम्नसम्भवौ // mmk_35.231 //

अञ्जलिं तु ततो कृत्वा नाधायानससम्भवम् / मुद्रेयं भेरीति ख्याता त्रिषु लोके हितायिभिः / सन्तारयति भूतानां महासंसारसागरात् // mmk_35.232 //

तदेवाञ्जलिमुत्सृज्य चित्रहस्ततलावुभौ / विमानमुद्रमित्याहुः ऊर्ध्वसत्त्वनयानुगाः // mmk_35.233 //

तदेव हस्तौ सङ्कोच्य स्यन्दनं तदिहोच्यते / त्रियानगमनं श्रेष्ठं रतो ह्युक्तो नुतायिभिः // mmk_35.234 //

नयते सर्वभूतानां जापिनां मन्त्रसम्पदाम् / उत्तमायानमाशृत्य ययुबुर्द्धगतं तु तम् // mmk_35.235 //

तदेव हस्तौ उत्सृज्य उभौ कृत्वा पुनस्ततः / कुर्याच्चित्रतलं शुद्धं वेदिकाकारसम्भवम् // mmk_35.236 //

एतन्मुद्रवरं श्रेष्ठं लोकनाथैः सुपूजितम् / शयनं सर्वबुद्धानां जिनपुत्रैः समुदाहृतम् // mmk_35.237 //

यत्रातीतास्तु सम्बुद्धा शान्तिं जग्मुस्तदाश्रिता / निर्वाणधातुसंन्यस्ता यत्रारूढाशयानुगा / स एषा मुद्रमिति ख्याता शयनं लोकनायकम् // mmk_35.238 //

तदेव हस्तौ विन्यस्तौ संश्लिष्ट्याङ्गुलिभिः समम् / सम्पुटाकोशविन्यस्तं तर्जन्येकं तु दक्षिणम् / कुर्याद् वक्रतो ह्यग्रे अर्धचन्द्रं स उच्यते // mmk_35.239 //

उभौ हस्तौ पुनः कृत्वा दक्षिणाङ्गुष्ठमुष्टितः / वामहस्तासृतौः सर्वैः अङ्गुलीभिः समोचितैः / बध्वा मुष्टि कराग्रे तु दक्षिणाङ्गुष्ठमिश्रितः // mmk_35.240 //

तं दक्षिणैरेव समायुक्तैरङ्गुलीभिः पुटीकृतैः / कन्यसां विसृतां कृत्वा वीणमुद्रा उदाहृता // mmk_35.241 //

उभौ हस्तौ पुनः कृत्वा आकाशौ विरलाङ्गुलौ / उभावङ्गुष्ठयोर्मध्या उभौ तर्जनिमाश्रितौ / एषा पद्मालया मुद्रा सम्बुद्धैः कथिता जगे // mmk_35.242 //

उद्धृताङ्गुष्ठकौ नित्यं पुनः कुवलयोद्भव / मुद्रा च कथिता लोके सम्बुद्धैर्द्विपदोत्तमैः // mmk_35.243 //

तदेवमञ्जलिं कृत्वा प्रणामाकारजगद्गुरुम् / सा नमस्कारमुद्रेयं सर्वलोकेषु विश्रुता // mmk_35.244 //

तदेव मुद्रा विष्टभ्य हस्तौ यमलसम्भवौ / एषा यमलमुद्रेयं त्रिषु लोकेषु विश्रुता // mmk_35.245 //

ईषन्मूलतो हस्तौ अङ्गुष्ठौ च सुपीडितौ / सा भवेत् सम्पुटा मुद्रा शोकायासीवनाशनी // mmk_35.246 //

एता मुद्रास्तु कथिता ये सर्वे प्रहरणोद्भवाः / पुष्पाख्या शयनयाश्च वाद्याद्या ग्रहनामका / सर्वे सर्वकरा युक्ता मन्त्रैः सर्वैस्तु भाषितम् // mmk_35.247 //

न तिथिर्न च नक्षत्रं नोपवासो विधीयते / संयुक्ता मुद्रमन्त्राश्च क्षिप्रं कर्माणि साधयेत् // mmk_35.248 //

जापिनस्तपसा युक्तो जप्तमात्रो विचक्षणः / मुद्रा मन्त्रप्रयुक्ता च असाध्यं किञ्चि न विद्यते // mmk_35.249 //

उभौ हस्तौ पुनः कृत्वा अञ्जल्यान्योन्यसक्तकम् / कन्यसानामिकाङ्गष्ठौ पार्श्वतो न्यस्तौ धूपमुद्रा उदाहृता // mmk_35.250 //

आधाराञ्जलियोगेन तर्जन्यावीषत् कोचयेत् / सामान्या बलिमुद्रा तु उद्भूता लोकतायिभिः // mmk_35.251 //

मध्येषु पुष्पविन्यस्तं यथासम्भवतो विविधैः / दत्तं भवति मन्त्राणां बलिकर्मेषु सर्वसु // mmk_35.252 //

दक्षिणेनाभयं हस्तं कृत्वा च वामकरेण वै / मणिबन्धनयोगेन ग्राह्यं करदक्षिणम् // mmk_35.253 //

एषा ते सर्वमन्त्राणां गन्धमुद्रा उदाहृता / दक्षिणाकरमुष्टौ तौ अङ्गुष्ठौ मध्यमौ सदा // mmk_35.254 //

सूच्याकारं ततः कृत्वा दीपमुद्रा उदाहृता / अनामिकाङ्गुष्ठयोरेव अक्षसूत्रात् संस्थितम् // mmk_35.255 //

कन्यसां प्रसार्यतो नित्यं मध्यमां तस्य पृष्ठतः / तर्जनीं कुञ्चितां न्यस्य अक्षमुद्रेति उच्यते // mmk_35.256 //

गर्भाञ्जल्यास्ततो न्यस्य अक्षसूत्रं स मन्त्रवित् / जपेद् यथेष्टतो मन्त्रं क्षिप्रं सिद्धिवरप्रदम् // mmk_35.257 //

शोभनं सर्वमुद्राणामेष दृष्टविधिः सदा / अग्नेर्दक्षिणहस्तेन अभयाग्रं तु कारयेत् // mmk_35.258 //

अभिमुखं ज्वलने स्थाप्य तर्जनीं कुञ्चयेत् सदा / अङ्गुष्ठं च करे न्यस्य मध्ये कुञ्चितसंस्थितम् // mmk_35.259 //

एतदावाहनं मुद्रं निर्दिष्टं जातवेदसे / कुञ्चितं तर्जन्याग्रं अङ्गुष्ठौ चैकयोजितम् // mmk_35.260 //

विसर्जनं सर्वकर्मेषु ज्वलने सम्प्रदृश्यते / कुर्यात् सर्वमन्त्राणां होमकर्मविचक्षणः // mmk_35.261 //

मुद्रैरेतैर्भिसंयुक्तः मन्त्रमग्नौ सुयोजितः / प्रणामाञ्जलिरन्तरिता अङ्गुलीभिः समन्ततः // mmk_35.262 //

कुर्यात् तं विपरीतं तु अङ्गुष्ठौ च संमिश्रितौ / बहिः सङ्कोच्य तर्जन्यौ मध्यमीभिः समाश्रितौ // mmk_35.263 //

एषा मुद्रवरा ह्युक्ता पूजाकर्मसु योजिता / प्रणामं सर्वमन्त्राणां मन्त्रनाथं जिनोरसाम् // mmk_35.264 //

शोधनं सर्वमन्त्राणामासनं च प्रदापयेत् / असम्भवे ऽपि पुष्पाणां मुद्रं बध्वा तु योजयेत् // mmk_35.265 //

पूजिता विधिना ह्येते मन्त्रा सर्वार्थसाधिका / मुद्राबन्धेन पूजार्थं कृतं भवति शोभनम् // mmk_35.266 //

द्वितीया चित्तपूजा तु यादृशी पुष्पसम्भवा / एष पूजाविधिः प्रोक्ता सम्बुद्धैः द्विपदोत्तमैः // mmk_35.267 //

अभावेन तु पुष्पाणां द्विविधा पूज उच्यते / सर्वमन्त्रप्रसिध्यर्थं सर्वकर्मेषु योजयेत् / सर्वकर्मकरा मुद्रा सर्वबुद्धैस्तु भाषिता // mmk_35.268 //

आसने शयने स्नाने पानानुभोजने / शोभने दीपने मन्त्रे स्थाने मण्डलकारणे // mmk_35.269 //

समयः सर्वमन्त्राणामधिष्ठानार्थं तु मन्त्रिणाम् / कथिता लोकनाथैस्तु मुद्रेयं सर्वकर्मिका / परिपूर्णं शतं प्रोक्तं मुद्राणां नियमादयम् // mmk_35.270 //

अतःपरं प्रवक्ष्यामि मुद्रामष्टमतां गताम् / तदेव हस्तौ विन्यस्तौ उभौ कृत्वा पुनस्ततः // mmk_35.271 //

तयैव प्रदेशिनीं कृत्वा मध्यमा सूचिमिश्रिता / नखस्याधस्तात् तृतीये वै भागे संसक्तकारितौ // mmk_35.272 //

आकोशामुद्भवावेष्ट्य शूच्याकारं तु कारयेत् / एतन्मन्त्राधिपतेर्मुद्रा शक्रिणस्य महात्मनः // mmk_35.273 //

एता एव प्रदेशिन्या सञ्चार्या सममध्यमा / शूच्या नखस्य विन्यस्ता संसक्ता च अनामिका / एष उष्णीषमुद्रा वै जिनेन्द्रैः सम्प्रकाशिता // mmk_35.274 //

तदेव हस्तौ विन्यस्तौ मध्यमाङ्गुलिवेष्टितौ / कन्यसाङ्गुलिसंयुक्तौ मुद्रेयं भितमुद्भवा // mmk_35.275 //

मध्यसूच्या समं कृत्वा संसक्तौ च करोरुहौ / निर्मुक्तः कुण्डलाकारा महामुद्रा स उच्यते // mmk_35.276 //

तामेव प्रदेशिन्याग्राधिभून्तरेल्पसतृकम् / मध्यसूच्यां ततो न्यस्य अधस्तात् संसक्तपाणिना // mmk_35.277 //

पर्वतृतीययोर्न्यस्तौ अङ्गुष्ठौ नखपीडितौ / एषा मुद्रा वरा प्रोक्ता मञ्जुघोषस्य धीमतः // mmk_35.278 //

तदेव हस्तौ विन्यस्तौ अञ्जलीकारसंस्थितौ / मध्यमाङ्गुलिविन्यस्तौ सूच्यग्रानामितः स्थितौ / अङ्गुष्ठौ मध्यमां स्पृश्य अङ्गुलीपर्वसत्रिकम् // mmk_35.279 //

कन्यसाङ्गुलीभिः सूचीं कृत्वानामितमुच्छ्रितौ / एषा मुद्रा वरा श्रेष्ठा धर्मकोशस्थतां गताः // mmk_35.280 //

तदेव हस्तौ विन्यस्तौ विधिदृष्टसमासतौ / तदेवमङ्गुलिभिः सर्वैः आपूर्णं कोशसंस्थितम् // mmk_35.281 //

उभौ हस्तौ विवृण्णीयात् अष्टानाङ्गुलिनावृताः / अष्टां पुरुषतत्त्वज्ञां चत्वारो युगतां गताम् // mmk_35.282 //

तदेव सङ्घमित्याहुः सम्बुद्धा द्विपदोत्तमाः / स एव मुद्रा सङ्घेति कत्थ्यते ह भवालये / एषा मुद्रवरा श्रेष्ठा सर्वकर्मप्रसाधिका // mmk_35.283 //

उभौ हस्तौ पुटीकृत्वा अञ्जल्याकारसंस्थितौ / प्रसार्य तर्जनीमेकां दक्षिणां करनिःसृताम् // mmk_35.284 //

सा एष भूतशमनी निर्दिष्टा तत्त्वदर्शिभिः / एषा मुद्रा वरा ख्याता सर्वकर्मार्थसाधिका // mmk_35.285 //

तदेव हस्तौ विन्यस्तौ वेणिकाग्रावचिह्नितौः / पिण्डस्थौ सम्पुटाकारौ उच्छ्रिताङ्गुष्ठनामितौः / एषा सा पद्ममालेति आदिबुद्धैः प्रचोदिता // mmk_35.286 //

तदेव हस्तावुत्तानौ अङ्गुलीभिः समन्ततः / प्रफुल्लनिर्मिताकारौ अङ्गुष्ठाङ्गुलिसतृकौ // mmk_35.287 //

द्वितीये पर्वतो न्यस्तौ अङ्गुष्ठौ तर्जनि चोभयौ / स एषा मुद्रवरा ख्याता सम्बुद्धैस्त्रिदशालया // mmk_35.288 //

एते मुद्रा महामुद्रा अष्टा ते ते समकर्मिकौ / तुल्यप्रभा महावीर्या संबुद्धैः सम्प्रकाशिता // mmk_35.289 //

षष्टिविम्बरकोट्यस्तु अशीतिः सहमुद्भवैः / अतीतैर्मुनिवरासङ्ख्यैर्मुद्रा ह्येते प्रकाशिता / शतमष्टाधिकं प्रोक्तं मुद्राणां विधिसम्भवम् // mmk_35.290 //

एतैः सर्वैस्तु सर्वाणिं मन्त्रकर्मांश्च साधयेत् / सर्वमन्त्रां तथा कर्मा सर्वान्येव प्रसाधयेत् // mmk_35.291 //

एतन्मुद्रामतं प्रोक्तं सर्वबुद्धैः महर्द्धिकैः / विधिना योजिता ह्येते क्षिप्रमर्त्थप्रसाधिका // mmk_35.292 //

इत्युक्त्वा मुनिनां मुख्यः शाक्यसिंहो नरोत्तमः / मञ्जुघोषं तदा वव्रे बोधिसत्त्वं महर्द्धिकः // mmk_35.293 //

एष मञ्जुश्रियाकल्पे मुद्रासम्भसम्भवः / त्वयैव सम्प्रदत्तो ऽयं रक्षार्त्थं शासने भुवि / युगान्ते वर्त्तमाने वै मयैव परिनिर्वृते // mmk_35.294 //

रक्षार्त्थे शासने मह्यं सर्वेदं कथितं मया / मुद्राणां लक्षणा ह्युक्तं मन्त्राणां च सविस्तरम् / रहस्यं सर्वलोकानां गुह्यं चापि उदीरितम् // mmk_35.295 //

एतत्कल्पाधिपे सूत्रे गुणविस्तारविस्तृतम् / अनेकधा च मन्त्राणां गुणवर्णसमोदयम् // mmk_35.296 //

बहुधा मन्त्रयुक्तिश्च तन्त्रयुक्ति तदाहृता / प्रभावगुणसिद्धान्तं जापिनां हेतुसम्भवम् // mmk_35.297 //

फलोदयशुभो ह्युक्तः सत्त्वानां गतियोनयः / कुमार त्वदीयमन्त्राणां सिद्धिहेतुनियोजिता // mmk_35.298 //

एवमुक्तस्तु मञ्जुश्रीः कुमारो गगनासृतः / प्रणम्य शिरसा सम्बुद्धं लोकनाथं प्रभाकरम् / दीर्घं निश्वस्य करुणार्द्रो रोरुरोद ततः पुनः // mmk_35.299 //

तस्थुरे समीप बुद्धस्य आपृच्छय वरदां वरम् / निर्नष्टे भगवां लोके मन्त्रकोशे महीतले / सत्त्वानां गतिमाहात्म्यं कथं तस्मै भविष्यति // mmk_35.300 //

एवमुक्तस्तु सम्बुद्धो मञ्जुघोषं तदालपेत् / शृणोहि वत्स मञ्जुश्रीः कुमार त्वं यदि पृच्छसि // mmk_35.301 //

मया हि निर्वृते लोके शून्यीभूते महीतले / निर्नष्ठे धर्मकोशे च श्रावकैश्चिरनिर्वृतैः // mmk_35.302 //

शास्तु बिम्बस्तथा रूपं कृत्वा वै द्विपदोत्तमः / पूजां सत्कारतः कृता धूपगन्धविलेपनैः // mmk_35.303 //

विविधैर्वस्त्रवरैश्चान्यैर्मणिकुण्डलभूषणैः / विविधैर्भोज्यभक्षैश्च सन्नियोज्य निवेदनम् / विविधाकारसम्पन्नं यथेष्टाकारकारिणे // mmk_35.304 //

तथै + मन्त्रमावर्त्त्य सत्त्वयोनिगतिः शुभम् / आजहार पुरं श्रेष्ठं उत्तमां गतियोनये / अन्ते बोधिनिम्नस्थः शान्तिं जग्मुः सपश्चिमे // mmk_35.305 //

एवमुक्तस्तु मञ्जुश्रीस्तुष्टो सम्बुद्धचोदितः / सम्प्रतुष्य ततो धीमां बोधिसत्त्वो महर्द्धिकः / एतत् सर्वं पुरा गीतं शुद्धावासोपरि स्थितम् // mmk_35.306 //

बुद्धानां सन्निधौ बुद्धधर्मचक्रप्रवर्त्तकः / मन्त्रचक्रं तदा वव्रे चिरकालानुवर्त्तितम् // mmk_35.307 //

इति //

आर्यमञ्जुश्रियमूलकल्पाद् बोधिसत्त्वपिटकावतंसकाद् महायानवैपुल्यसूत्रात् त्रयः त्रिंशतिमः मुद्राविधिपटलविसरः परिसमाप्तमिति // अथ षट्त्रिंशः पटलविसरः / अथ खलु भगवां शाक्यमुनिः पुनरपि शुद्धावासभवनमवलोक्य मञ्जुश्रियं कुमारभूतमामन्त्रयते स्म / अस्ति मञ्जुश्रीः परमगुह्यतमं त्वदीयं मूलमुद्रासमेत सपरिवारं मुद्रालक्षणं सर्वकर्मेषु चोप योज्यं सर्वसम्पत्तिदायकं सफलं सर्वमन्त्रानुवर्त्तनं सर्वकर्मार्त्थसाधकम् / संक्षेपतः शृणु मञ्जुश्रीः //

आदौ तावत् प्रसृताञ्जलिः, तर्जन्यानामिकामध्यपर्वतानुप्रविष्टा पृथक् पृथक् / सा एषा मञ्जुश्रीस्त्यदीया मूलमुद्रा विख्याता सर्वकर्मिका भवति / तथैव हस्तौ संयम्य, अनामिकासंहता तर्जनी मध्यमास्तथा कनिष्ठिकया ऊर्ध्वरेखास्थिताङ्गुष्ठशीर्षे / अयमपरा मञ्जुश्रीस्त्वदीया वक्त्रमुद्रा उदाहृता / अन्योन्यसक्ताङ्गुलिमुष्टिं कृत्वा, मध्यंमाङ्गुलि विमुच्य, सूचीकृत्वा, तस्य पार्श्वयोर्वलिततर्जनीयुगलमन्ते न्यसे एषा मञ्जुश्रीः त्वदीयमुद्रेयं दंष्ट्रा भवति / मुद्राया अङ्गुष्ठयुगलं पार्श्वयोर्न्यसेत् / एषा मुद्रा साक्षात् त्वं मञ्जुश्रीः तस्मिं स्थाने तस्मिं करपुटे सान्निध्यं समयेनाधितिष्ठसे / अन्योन्यसक्ताङ्गुलिमुष्टयोः प्रदेशिनीं मुक्त्वा, अङ्गुष्ठयुगलं मध्यतः / एषा सा मञ्जुश्रीः त्वदीया अपरा चीरकमुद्रा / प्रसृताञ्जलिपर्वणी कृत्वा, अनामिके तर्जनीं मध्यमान्तरस्थिताग्रे / इयमपरा मञ्जुश्रीः साक्षादेव त्वं मूलमूद्रा उदाहृता / अस्यैव मुद्रायाः प्रसृतां तर्जनीं कृत्वा / एषा सा मञ्जुश्रीस्त्वदीयनेत्रमुद्रा भवति / कन्यसानामिकावेणीकृतकरपुटमध्यस्थिता मध्यमौ बहिः तः तर्जन्युपरि कुञ्चिताग्रे अङ्गुष्ठाग्रसंश्लिष्टाग्रासु / अयमपरा त्वदीया त्वदीया मञ्जुश्रीः वक्त्रमुद्रा भवति सर्वकर्मिका //

एवमनेन क्रमेणैकैकाङ्गुलिमथ मुंच उभौ अङ्गुष्ठसहिता सर्वे अङ्गुलियोगेन एकैकं प्रसारये उच्चीकृतदक्षिणाङ्गुष्ठं त्वदीयं मञ्जुश्री एषा उष्णीषमुद्रा / दक्षिणं सङ्कोच्य वाममुच्छ्रितं ललाटमुद्रा भवति त्वदीया मञ्जुश्रीः / या दृष्ट्वा सर्वे दुष्टग्रहाः प्रपलायन्ते //

एवं श्रवणो ग्रीवा भुजौ हृदयं करौ कण्ठ कटिं नाभिः ऊरू जङ्घां चरणौ नेत्रौ वक्त्रं जिह्वा चेति, एवं दशभिरङ्गुलीभिरनुपूर्वमुच्छ्रितौ अनुपूर्वमुद्रालक्षणं भवति / अनुपूर्वं च कर्म करोति / वक्त्रमुद्रया मुखाबन्धं, दंष्ट्रमुद्रया दुष्टग्रहमोचनं, जिह्वामुद्रया दुष्टवचननिवारणं, हृदयमुद्रया नृपतिकोपनाशनं, अन्यं वा सत्त्वं देवासुरं मानुषामानुषाद्यां विविधां वा गतिनिश्रितां रुपितानां क्रोधनाशनं भवति //

एवमनुपूर्व्या सर्वतः सर्वकर्माणि करोति / एवमसङ्ख्येयानि अनेन क्रमेण मुद्राणि भवन्ति / असङ्ख्येयानि च कर्माणि करोषि त्वं मञ्जुश्रीः सर्वथा सर्वमुद्रेष्वेव सर्वकर्माणि भवन्ति //

बद्धा ता यैः महावीरैः सङ्ख्यातीतैः तथागतैः / महामुद्रा महावीरैर्महाभूमिगतैरपि // mmk_36.1 //

यत्र निम्बरकोद्यानि षट्त्रिंशाशीतिनवपञ्चकैः / षष्टिर्नयुतसङ्ख्याद्यैः सर्वलोकोत्तरोत्तरैः // mmk_36.2 //

सर्वमुद्रान्तर्गताः सर्वे ये चान्या लौकिका क्रिया / एभिरन्यतमैर्मुद्रैः कुर्यात् सर्वार्थसाधनम् // mmk_36.3 //

हस्तद्वयेनावबद्धा वै साधनकाले च मण्डले / पूर्वसेवाभियुक्तेन होमजापेषु वा पुनः / निषण्णः स्थितको वापि यावादिच्छं जपेद् व्रती // mmk_36.4 //

महारक्षाविधानेन आत्मनस्य परस्य वा / कुर्यात् सर्वाणि कर्माणि सर्वमुद्रेषु सर्वदा // mmk_36.5 //

इति //

आर्यमञ्जुश्रियमूलकल्पाद् बोधिसत्त्वपिटकावतंसकाद् महायानवैपुल्यसूत्रात् चतुःत्रिंशतिमः द्वितीयमुद्राविधिपटलविसरः परिसमाप्त इति //

(एतद्ग्रन्थान्ते ऽन्तिमस्य पटलविसरस्य त्रिपञ्चाशत्तमस्य समाप्त्यनन्तरं महामुद्रापटलविसरो नाम कश्चिदपरश्चतुस्त्रिंशत्तमः पटलविसरो लिखित उपलभ्यते / स गतस्य चतुस्त्रिंशत्तमस्यैव प्रकारभेदो भवितुमर्हतीत्यतः कारणादिहैव योज्यते /)

अथ भगवां शाक्यमुनिः पुनरपि शुद्धावासभवनमवलोक्य मञ्जुश्रियं कुमारभूतमामन्त्रयते स्म / सर्वांश्च बोधिसत्त्वां सर्वसत्त्वांश्च पर्षत्सन्निपतितां / शृण्वन्तु भूतगणाः सर्वे देवपुत्राश्च महर्द्धिकाः अस्ति मञ्जुश्रियः कुमारभूतस्य बोधिसत्त्वस्य महासत्त्वस्य कल्पविसरे समुद्रापटलसाधनोपयिकं सर्वमन्त्रतन्त्रचर्यानुप्रविष्टानां सत्त्वानां बोधिसम्भारकारणं / यथा सिध्यन्ति सर्वमन्त्राः क्षिप्रतरमाकृष्यन्ते सर्वकर्माणि सर्वेषां सर्वतः मुद्राणि भवन्ति / यैः मुद्रिताः क्षिप्रतरं वशा भवन्ति / तं शृण्वन्तु भवन्तो / भाषिष्ये ऽहं सर्वसत्त्वानामर्थाय / सर्वमन्त्राणां मुद्राणि भवन्ति //

अथ खलु भगवां शाक्यमुनिः सर्वबुद्धधर्माणां मुद्रालङ्कारतथागतगुणमाहात्म्यसमुद्रमुद्रा नाम समाधिं समापद्यते स्म / समनन्तरसमापन्नस्य भगवतः सर्वतथागताः सर्वमुद्रासमयं भाषते स्म / तस्मात् समाधेरुत्थाय सर्वतथागतमुद्रामुद्रितं महामुद्रापटलविसरं सर्वमन्त्राणां भाषते स्म //

आदौ तावत् सर्वमन्त्रकुलेषु हृदयानि भवन्ति / पूर्वमुच्चारयेद् द्विसप्त एकवाराम् / ततो मुद्रा बन्धितव्या, नान्यथादिति / कतमं च तत् / सर्वतथागतानां हृदयम् / जिनजिक् / एष स मार्षाः सर्वतथागतानां हृदयः सर्वकर्मिकः / तथागतकुले सर्वमुद्रा बन्धितब्या / ततः कर्म समारभेत् / आरोलिकु / अवलोकितस्य हृदयः सर्वकर्मिकः पद्मकुले सर्वमुद्राबन्धयता अयं जप्तव्यः सर्वसाधनोपयिक सर्वकर्मसु / वज्रधृक् / एष स मार्षा वज्रपाणेः हृदयम् / सर्ववज्रकुलेषु च जपता मुद्रा बन्धितव्या / सुरारक् / एष सर्वदेवानां सर्वमुद्राबन्धयता सर्वकर्मसु प्रयोक्तव्यः / सर्वदेवानां हृदयः / यक्षातक् / सर्वयक्षाणां हृदयः / पिनाधृक् / रुद्रस्य हृदयः / ष्ठों / एष स मार्षा एकाक्षरं नाम हृदयम् / सर्वलौकिकलोकोत्तराणां सर्वभूतकूष्माण्डपूतनक्रव्यादादिषु नक्षत्रग्रहमातरकुमारकुमारिकाणां मनुष्यामनुष्यसर्वसङ्ख्यातविद्याधरऋषिप्रभृतीनां सर्वसत्त्वानां सर्वगतिसूत्रकर्मावबद्धानां सर्वभूतानामुक्तानां च वीतरागानां महर्द्धिकामहर्द्धिकाणां तृदोषशमनानां त्रिपङ्कनिमग्नानां सर्वसत्त्वानामर्थाय अयमेकाक्षरो मन्त्रः सर्वेषां हृदयं भवति / सर्वकर्माणि करोति / सर्वमुद्राश्च बन्धितव्या / जपं कुर्वाण अनेनैव हृदयेन जपः कर्तव्यः / सततं बुद्धाधिष्ठितो भवति / महाप्रभावो ऽयं महानुशंसः सर्वकर्मसु मुद्रादिकमण्डलुविधानपटसाधनोपयिकेषु सत्त्वानुपूर्वं प्रयोक्तव्यः / सर्वं साधयति / यन्मनसाभिरुचितं साधकेनेति //

ततो मुद्राणि भवन्ति शतं चाष्टसाधिकम् / उष्णीषमुद्रा प्रथमं कुर्याच्चक्रिणे जिने / ततः परमलोके स पद्ममुद्रेति कथ्यते // mmk_36.6(="1") //

तृतीयं वज्रमुद्रं तु वज्रपाणिसमाविशे / चतुर्थं देवतामुद्रं स्वस्तिकं तु विनिर्दिशेत् // mmk_36.7(="2") //

पञ्चमं खड्गमुद्रा तु राक्षसानामिहोच्यते / षष्ठं गदमुद्रा तु यक्षाणा मे प्रकीर्तिता // mmk_36.8(="3") //

सप्तमं असुराणां तु मन्त्राणां वज्रमुष्टिसमोदिता / अष्टमं शूलमुद्रा तु सर्वक्रोधेषु पठ्यते // mmk_36.9(="4") //

नवमं पुष्पमुद्रा तु यक्षयक्षीषु कीर्त्तिता / दशमं मुद्गरं विन्द्यात् फरमेकादशं परम् // mmk_36.10(="5") //

द्वादशं शक्तिनिर्दिष्टा कार्त्तिकेयस्य बालिशः / मञ्जुघोषस्य विख्यातमुत्पलं तु प्रयोजयेत् / त्रयोदशानां सङ्ख्या निर्दिष्टा मुनिभिः सत्त्वदेशिभिः // mmk_36.11(="6") //

चतुर्दशं तु भवेच्छङ्खो भेरी पञ्चादशा स्मृता / पटहो षोडशा ज्ञेयो दुन्दुभिः सप्तदशो परः // mmk_36.12(="7") //

अष्टादश तथा बद्धमूनविंशत् करणमुच्यते / विंशत् परशु निर्दिष्टा सङ्ख्याया तु प्रमाणतः // mmk_36.13(="8") //

सितपत्रा तथाच्छत्रं उष्णीषाणां प्रकीर्त्तितम् / चीवरं पात्रनिर्दिष्टं खखरं तु मतः परम् // mmk_36.14(="9") //

कृपा मैत्री तथा प्रज्ञा ध्यानशील तथापि च / क्षान्तिदानादिकं षट्कं निर्दिष्टं लोकनायकैः // mmk_36.15(="10") //

बुद्धानां कथिता ह्येते षट् पारमिताश्रवात् / त्रिंशच्चक्रिणे मुद्रा कथिता लोकपुङ्गवैः // mmk_36.16(="11") //

एकाक्षरस्य वीरस्य मन्त्राणामधिपतेर्विभो / लोकेश्वरस्य विद्यानां कथिताष्टविंशति साधिका // mmk_36.17(="12") //

सिताख्या महाश्वेता तथा पण्डरवासिनी / भृकुटी च तथा देवी बुद्धानां हृदयोद्भवा // mmk_36.18(="13") //

ताराया कथ्यते मुद्रा उत्पलं तु नियोजयेत् / हयग्रीवस्य तु भीमस्य मुद्रा वक्त्र इति स्मृता // mmk_36.19(="14") //

वज्रपाणे तथा मुद्रा त्रिंश एक भवन्ति ते / सर्वे प्रहरणा तस्य नानाकारा युधिष्ठिता // mmk_36.20(="15") //

चत्वारो ऽपि महामुद्रा प्रोक्ता मारमण्डले / रुद्रस्य शूलनिर्दिष्टो + + + + + + + + // mmk_36.21(="16") //

ब्रह्मस्याक्षमालं तु विष्णोश्चक्रमितिस्तथा / + + + + + + + + यमदण्डमतः परां // mmk_36.22(="17") //

एतत् सर्वं देवानां सर्वयक्षनराधिपां / सर्वभूतानां तथा मुद्रा सर्वसत्त्वसमाश्रिता // mmk_36.23(="18") //

सरागवीतरागाणां त्रिधा धातु स्थिता परां / सर्वलोकसमावृत्त्यु त्रिधा स्थावरजङ्गमा // mmk_36.24(="19") //

धात्वाख्यामसङ्ख्येयां ये सत्त्वा भूतवादिनः / सर्वेषाणां तु सर्वत्र एकमुद्रादिहोच्यते // mmk_36.25(="20") //

एवमष्टशतं प्रोक्तं शतमेकं साष्टसाधिकम् / तेषां च गुणविस्तारं प्रभावं च इहोच्यते // mmk_36.26(="21") //

यथा मनुष्याणां भवेत् सिद्धिः संयुक्ता मन्त्रयोजिता / करोत्यन्यप्रयोगैश्च अङ्गुलीभिः सशोभिता // mmk_36.27(="22") //

विन्यस्ता करयोर्मध्ये क्षिप्रमर्थकरा परा / तेषामादि वक्ष्ये शृणुध्वं भूतिकांक्षिणः // mmk_36.28(="23") //

आदौ तावच्छुचौ देशे शुक्लवस्त्र शुचाम्बरः / शुचिकर्मसमाचारो शुचौ देशे सदारतः / बन्धयेत् प्राङ्मुखो भूत्वा स्थितो स्तूपस्य चग्रतो // mmk_36.29(="24") //

नाशिष्याय प्रदातव्यं रौद्रकर्मान्तचारिणे / अभय अदाताय समयानुप्रवेशिने // mmk_36.30(="25") //

भक्तो जिनपुत्राणां बुद्धानां चापि शासने / अनुत्पादितचित्तस्य नादेयं मुद्रसम्पदा // mmk_36.31(="26") //

भक्तानां जिनपुत्राणां बोधिसत्त्वानां च धीमताम् / प्रत्येकबुद्धानार्हतानां पूजितानां ददेत् सदा // mmk_36.32(="27") //

सुस्थितो बोधिचर्यायामाचार्यो बहुमतः सदा / सर्वमन्त्रप्रयोगेषु + + + उत्कृष्ट सदा / तेन मुद्रा तदा देया शिष्यस्याविचिकित्सतः // mmk_36.33(="28") //

तथा मन्त्रप्रयोगज्ञः शुचिर्दक्षः कुलान्वितः / आचार्यो धार्मिको धीमां अभिषिक्तो दृष्टमण्डलः // mmk_36.34(="29") //

तेनोपदर्शिता मन्त्राः शिष्यो गृह्येत तन्त्रवित् / शिष्येण कार्यस्तथा प्रेमो बुद्धस्येव गुरोस्तथा / अन्यथा न सिद्धि मन्त्राणां सर्वमुद्रेषु वा सदादिति // mmk_36.35(="30") //

आदौ तावत् शुचिर्भूत्वा प्राङ्मुखो शुक्लचन्दनेन हस्तमुद्वर्त्य, पूर्वं तावत् समयमुद्रा बन्धितव्या / भगवतो उष्णीषस्य मुद्रा / उभौ करौ कृताञ्जलिपुटौ अशुषिरौ ईषिन्कुञ्चितौ कुड्मलाकारौ अकोशपद्माननौ / अयं भगवतो बुद्धस्य समयमुद्रा / तदेव हस्तौ प्रसारितौ सम्पुटावस्थौ पद्मविकसिताकारा अवलोकितस्य मुद्रा / उभौ हस्तौ पूर्ववत् करमावेष्टयित्वा अभ्यन्तरस्थिताभिरङ्गुलीभिः कन्यसः तर्जन्योपरिष्ठा निष्पीडयेत् / इयं मञ्जुश्रियः कुमारभूतस्योत्पलमुद्रा / (वैद्य 303) तदेव कन्यसौ सङ्कोच्य पूर्ववत् तर्जन्याभिः अङ्गुष्ठसमेतौ स्थितिका एव उत्पलकुड्मलाकार दर्शयेत् / सर्वङ्गमानामियं ताराया मुद्रा / तदेव सङ्कोच्य नेत्राकारं कृत्वा, इयं मुद्रा आर्यभृकुट्याः / तदेव ललाटे योजयेत् / इयं देव्यदेव्या नेत्रमुद्रा / पुनरपि तं सङ्कोच्योभौ मध्यमाङ्गुलिभिः सन्दंशाकारं कृत्वा मस्तकोपरि स्थापयेत् / इयं भगवतो चक्रवर्तिनः एकाक्षरस्य महामुद्रा सर्वकर्मिका / तदेव ललाटे स्थापयेद् बुद्धस्य भगवतः हृदयमुद्रा / अक्ष्णौ स्थापयेत् / तदेव चक्रवर्तिनः नेत्रमुद्रा / तदेव मुखे स्थापयेत् / तदेव विद्याधिपतेः चक्रवर्तिन एकाक्षरस्य वक्त्रमुद्रा / एवं याव मन्त्री च भुजौ जानुजङ्घाचरणादिषु विंशत्प्रकारा भवन्ति मुद्रा अष्टौ महामुद्रा भवन्ति / सर्वकर्मसु प्रयोक्तव्या / तदेव करसम्पुटं मध्यमाङ्गुल्यावेष्टितं कृत्वा कन्यसाङ्गुलिसूचीकृतां उभौ अङ्गुष्ठाग्रयवाकारस्थितौ तर्जन्या प्रसारितौ कृतसूच्या कोशीकृतावुभौ निर्मामिकौ वक्रीकृतपर्यन्तौ सुविन्यस्तौ / इयं भगवतां धर्मचक्रमहामुद्रा /

तदेवाङ्गुष्ठौ विनाम्य मध्ये प्रसार्य, इयं बुद्धानां चतुर्मारपराजयमुद्रा / तदेव मुद्रां शिरस्योपरिधाय दर्शयेत् / सर्वबुद्धानां सर्वक्लेशनिषूदनं नाम महामुद्रा / तदेव ललाटे स्थापयेत् / महाकरुणा नाम सर्वबुद्धानां मुद्रा / तदेव हृदये स्थाप्य, सर्वदृष्टिशल्याभ्युद्धरणं नाम महामुद्रा / तदेव मुद्रं उभौ न्यसेत् / सर्वविद्याप्रसाधनं नाम महामुद्रा / तदेव मुद्रा ग्रीवा संन्यसेत् / सर्वानर्थप्रशमनकरी नाम महामुद्रा / तदेव मुद्रा सर्वतः भ्रामयेत् / महारक्षार्थसम्पातनं नाम महामुद्रा / एवमनेन प्रकारेण अष्टौ महामुद्रा भवन्ति सर्वार्थसाधकाः / जयोष्णीषस्य मुद्रा भवन्ति / तदेव करपल्लवो वामहस्तप्रसारितौ दक्षिणतस्तिर्यकं / इयं सितातपत्रस्यच्छत्रमुद्रा / तदेव हस्तौ तथा विन्यस्तौ शिरसि भगवतो जयोष्णीषस्य मुद्रा / उभौ करतलौ सम्पुटीकृत्य मूर्ध्निं स्थापितो उष्णीषाकारो इयं भगवतो अभ्युद्गतोष्णीषस्य मुद्रा / तदेव मुद्रां विकाषयेत् / इयं ज्वालामालिनोष्णीषमहामुद्रा सर्वकर्मिका सर्वभयेषु च प्रयोक्तव्या सर्वकर्मसु / तदेव मुद्रा उरसि स्थापयेत् / सर्वोष्णीषाणामियं महामुद्रा / तदेव हस्तौ आवेष्ट्यावस्थितौ सुदृढौ सर्वतथागतानां महाकवचमुद्रा सर्वविघ्नेषु प्रयोक्तव्या / तदेव हस्तौ उभयाग्रावस्थितौ पुस्तकाकारौ उरोमध्ये न्यसेत् / इयं सा सर्वबुद्धानां जनेत्री प्रज्ञापारमिता महामुद्रा / सर्वसत्त्वानां दर्शयेत् / सर्वविघ्नेषु सर्वानर्थां प्रशमयति / सर्वार्थां सम्पादयति / स्मृतिसञ्जननं कुरुते / तदेव हस्तौ ललाटे न्यसेत् / सर्वबुद्धानामभिषेकः धर्ममहामुद्रा /

सर्वाभिषेकेषु प्रयोक्तव्यः सर्वसत्त्वानाम् / तदेव हस्तौ चित्राकारेण ललाटे न्यसेत् / सर्वमारविद्रापनं नाम महामुद्रा / तदेव हस्तौ सङ्कुचिताकारौ अन्योन्यसङ्कुचितसक्तौ सूच्याकारेण व्यवस्थितौ मध्यमाङ्गुलिप्रसारितौ सूचीकृतचिह्नौ अङ्गुष्ठोद्वन्द्वपरामृष्टौ / इयं भगवतो तेजोराशेर्महामुद्रा / तदेव मुद्रं शिरसोपरि निधाय इयमपरा तथागतोष्णीषस्य तेजोराशेर्महामुद्रा / तदेव हस्तौ ललाटे स्थापयेत् तेनैवाकारेण इयं भगवतो तृतीया नेत्रमुद्रा / तदेव हस्तौ उभयचित्रीकृतौ अन्योन्योपरिस्थितौ दक्षिणार्थमथ वामसम्पुटाकारस्थितौ अन्योन्याङ्गुष्ठकन्यसावेष्टितौ / इयं (वैद्य 304) सर्वबुद्धानां महावज्रासनमूलमुद्रा / तदेव हस्तौ मूर्ध्नि दर्शितौ महाबोधिवृक्षमूलमुद्रा / तदेव हस्तौ सम्पुटितौ पृष्ठीकृतौ सर्वबुद्धानां सर्वमारविध्वंसनकरी नाम मुद्रा / तदेव हस्तौ अन्योन्यावसक्तौ ग्रीवायां न्यसेत् / सर्वभूतवशीकरी नाम मुद्रा / तदेव कण्ठे धारयेत् / सर्वभूतविलोकनी नाम महामुद्रा / तदेव जानुभ्यां न्यसेत् / सर्वदुर्गतिविशोधनी नाम महामुद्रा / तदेवोर्ध्वं चिक्षिपेत् / सर्वदेवोत्पत्तिसन्निचयं नाम महामुद्रा / तदेव हस्तौ अभयाकारं उभौ सर्वभोगविषयं नाम शनिर्नाम महामुद्रा / तदेवाञ्जल्यकारेण मुर्ध्नि स्थापयेत् / सर्वबुद्धक्षेत्राक्रमणी नाम महामुद्रा / तदेव हस्तौ उभौ कर्णे स्थापयेत् / स्फुटाकारेण सर्वनागदमनी नाम महामुद्रा / तदेव हस्तौ उभौ सम्पुटं कृत्वा नासाग्रे धारितव्यः / सर्वबुद्धानामालम्बनं नाम महामुद्रा / तदेव मुद्रं शिरस्योपरि न्यसेत् / सर्वबुद्धाभ्युद्गतोष्णीषो नाम महामुद्रा //

एवमनेनाकारेणासङ्ख्यानि भवन्ति सर्वतथागतोष्णीषाणां मुद्राणि / असङ्ख्येयैः बुद्धैर्भगवद्भिः असङ्ख्येय चक्रवर्तिकुलं असङ्ख्येयाश्चक्रवर्तिनः / तेषामधिपतिः एकाक्षरो चक्रवर्त्ती मन्त्राधिप असङ्ख्येयाश्च तथागतोष्णीषराजानः असङ्ख्येयाश्च सर्वमन्त्रेषु कल्पविसरा / तेषां संक्षेपतः वक्ष्यते मुद्रा चात्र भवत्येक एव सर्वेषां हृदयः एकाक्षरः चक्रवर्त्ती / तस्यैव मूलमुद्रा सा इहैवोच्यते मन्त्रेषु निर्दिष्टा महाप्रभावामितौजसः / यस्याः बन्धनादेव सर्वमन्त्राभिमुखा भवन्ति / सर्वबुद्धाश्च भगवन्तः सिद्धिमनुप्रयच्छन्ते / अधिष्ठिन्ति च विद्यासाधकं चक्रवर्तिस्मरणादेव मन्त्रनाथं एकाक्षरमद्वितीयं दशबुद्धकोटीकुशलमूलार्जितो भवति / चतस्रो ऽपि मूलापत्तयोरापन्नस्य भिक्षा तन्महान्तं नरकोपपत्तिवेदनीयं कर्मक्षयं गच्छति स्मरणादेव / कः पुनर्वादो जपम् / पञ्चानन्तर्याणि च क्षयं गच्छन्ति / कः पुनर्वादो ऽन्ये अकुशलाः स तस्मात् सर्वप्रयत्नेनायं विद्याराजाधिपो एकाक्षरः स्मर्तव्यो जप्तव्यः भावयितव्यो मनसि कर्तव्यः पूजयितव्यः सततमेवाराधयितव्यः / नमः समन्तबुद्धानाम् / भ्रूं / एष स मार्षा सर्वोष्णीषाणां तथागतभाषितानां अयं मूलमन्त्रः / अनेनैव मन्त्राधिपतिना उष्णीषचक्रवर्तिना तथागतमूर्धजेन सर्वकर्माणि कारयेत् / मुद्रोपेतेन सर्वमन्त्रेषु लौकिकलोकोत्तरेषु कल्पविसरेषु नियतं सिध्यति / मुद्रा चात्र भवति / तदेव हस्तौ सम्पुटाकारौ मध्यमाङ्गुलिप्रसारितौ सर्वत्राङ्गुल्याग्राभ्यन्तरस्थितौ कुण्डलाभोगाकार ईषिदूर्ध्वावनतं उष्णीषाकारं शिरस्युपरि धारयेत् /

इमं एकाक्षरचक्रवर्तिने महामूलमुद्रा / अनया सर्वकर्माणि कारयेत् / उत्तमसाधनादिषु योजयेत् / सर्वरक्षावरणगुप्तये च प्रयोक्तव्यः / नाल्पसाधप्रयोगादिषु प्रयुञ्जानः असमयज्ञो भवति / मन्त्राचार्यस्य न सिद्ध्यन्ते / अन्यत्र रक्षाविधाना / शान्त्यर्थे च पापक्षपणार्थं नित्यमेव जप्तव्यः शुचौ देशे पर्वतनदीसरित्पतितटेषु च नान्यस्थानेषु जप्तव्यो यत् कारणं महाप्रभावो ऽयं विद्याराजा नान्यदेशेषु जप्तव्यः / प्रभावोद्गतेन मनसा सर्वसत्त्वानां मैत्र्या स्फुरित्वा जप्तव्यः / मुद्रा चात्र भवति / तदेव हस्तौ करसम्पुटाकारौ आवेणिकाङ्गुलिभिः कृत्वा मध्यमाङ्गुलीनां पर्वभागे तृतीये ईषिदवनामयेत् (वैद्य 305) उष्णीषाकारं कारयेत् / इमं भगवतोष्णीषराजस्य महामुद्रा / तदेव हस्तौ सम्पुटं कृत्वा ईषदवनामयेद्भगवतोष्णीषस्य तृतीया महामुद्रा / ओम् गोदरे वीर स्वाहा / अयं सर्वेषां तथागतानां हृदयः सर्वकर्मिकः सर्वार्थसाधकः सर्वानर्थनिवारकः / इयं स्मरणमात्रेणैव सर्वबुद्धाधिष्ठितो भवति / सर्वपापेभ्यो मुच्यते / सर्वमन्त्राणामुपरि वर्त्तते / बुद्ध एव साक्षाद् द्रष्टव्यः / अनया मुद्र सह प्रयोक्तव्या / सर्वकर्माणि क्षिप्रतर एव करोति / अनेन जप्यमानेन सर्व एव मन्त्रा जप्ता भवन्ति / यथा यथा प्रयुज्यते तथा तथा कर्माणि करोति / जापिनस्येच्छया सर्वकर्मिको भवति / तदेव हस्तौ करसम्पुटावस्थौ शिरसि धारयेत् त्रिसूच्याकारेण / इयं भगवतां बुद्धानां सर्वेषां द्वितीया हृदयमुद्रा / मन्त्रं चात्र भवति / ओम् गेरुरे वीर स्वाहा / इमं सर्वेषां बुद्धानां भगवतां हृदयमुद्रा /

सर्वकर्मिका सर्वानर्थनिवारिका सर्वार्थसम्पादिका महाप्रभावा सर्वमन्त्रकल्पेषु साधनीया / नात्र विचिकित्सा कार्या / यथा यथा प्रयुज्यते तथा तथा सिध्यतीति / पुनरपि तदेव हस्तौ सम्पुटाकारावस्थितौ अभ्यन्तराङ्गुलिभिः गाढमावेष्ट्य उभौ तर्जन्यौ प्रसारितौ ईषदाकुञ्चयेच्छिरस्युपरि निधाय दर्शयेत् / इमं सर्वतथागतोष्णीषाणां महामुद्रा / भवति चात्र मन्त्रः / ओम् ट्रां बन्ध स्वाहा / अयं सर्वोष्णीषाणां मूलमन्त्रः सर्वकर्मिकः दिश दिश सर्वबन्धेषु प्रयोक्तव्यः / सर्वकर्माणि च करोति / साधनजपकाले होमादिषु आत्मरक्षा पररक्षा वा सर्वद्रव्येषु सर्वमन्त्रकल्पेषु च यान्युक्तानि लौकिकलोकोत्तरेषु तान्यशेषतमनेनैव रक्षा कार्या / महारक्षा कृता भवति / सर्वमन्त्रेषु प्रयोक्तव्यः / सर्वकर्मसु सिध्यति / सर्वतथागतोष्णीषाणां महाचक्रवर्तिविद्याधिपतीनां तेजोराशिसितातपत्रजयोष्णीषप्रभृतीनां यानसाधनविसरपटलानि मुद्रामन्त्राणि तान्यशेषतः विस्तरतो प्रयोक्तव्या सर्वाणि च लौकिकलोकोत्तराणि मन्त्रतन्त्रविस्तरपटलविसरां अनन्तानि च मुद्राणि / भवन्ति चात्र मन्त्रः / ओम् ज्वलितोग्रदेह विभिन्द हुं फट स्वाहा / एष भगवतः तेजोराशेर्बुद्धस्य परमहृदयः सर्वमन्त्रेषु सर्वतः सर्वकर्मिकः प्रयोक्तव्यः इति / तदेव हस्तौ यमलिताकारौ मध्यमाङ्गुलिप्रसारितौ तर्जन्या परिवेष्टितौ कटकाकारेण पाशपरिवेष्टितौ उभौ कृतमण्डलाभोगौ / इयं च भगवतो बुद्धस्य खङ्खरमुद्रा / मन्त्रं चात्र भवति / ओम् धुन जितारण हुं / एष भगवतां बुद्धानां खङ्खरकमुद्रामन्त्रः सर्वकर्मसु प्रयोक्तव्यः /

यथाभिरुचितेषु सर्वमन्त्राणां प्रवोधनः सर्वभूतानां वशङ्करः सर्वसत्त्वानां समाश्वासकरः सर्वद्रव्याणां समुत्तेजकः साधकः सर्वपापानां समुच्छोषकः / यथा यथा प्रयुज्यते अयमष्टाक्षरो तथागतमन्त्रः तथा तथा सर्वकर्माणि साधयतीति / तदेव हस्तौ आवेष्टितौ कृत्वा कृतपात्राकारौ / इयं सर्वतथागतानां पात्रमुद्रा तथागतपात्र इत्यवगन्तव्यः / नाभिदेशे धारयेत् सर्वकर्मसमर्था भवति / भवति चात्र मन्त्रः / ओम् लोकपालाधिष्ठित धर धर धारय महानुभाव बुद्धपात्र स्वाहा / एष भगवतां बुद्धानां तथागतपात्रमुद्रामन्त्र अनेन संयुक्तः सर्वकर्मसमर्थकरो भवेत् //

करोति कर्मवैचित्र्यं गतिमाहात्म्यपूजितम् / साधयेत् सर्वकर्माणि सर्वमन्त्रेषु भाषिताम् / साधकस्येच्छया क्षिप्रं करोतीह न संशयः // mmk_36.36(="31") //

ये ऽपि ताथागती मन्त्रा ये चापि अवलोकिते / कुलिशाह्वे मन्त्रमुख्यास्तु नानादेवतपूजिता / ते सर्वे सिद्धिमायान्ति बुद्धपात्रसमोदिता // mmk_36.37(="32") //

विविधा दूतिगणा ह्यग्रा चेटचेटिगणास्तथा / नानाकिङ्करमुख्यास्तु यक्षराक्षसकश्मला // mmk_36.38(="33") //

प्रेष्या सर्वमन्त्रणां सर्वकर्मकरास्तथा / विविधैर्राजमुख्यैस्तु देवगन्धर्वयोनिजैः // mmk_36.39(="34") //

सिद्धविद्याधरैः मन्त्राः लोकपालाश्च महर्द्धिकाः / शक्राद्यैः ब्रह्ममुख्यैस्तु सुरश्रेष्ठैश्च धीमतैः // mmk_36.40(="35") //

मन्त्रा भाषिता ये स्युः सर्वकर्मकरा सदा / किन्नरैर्गरुडैश्चापि + + + + महर्द्धिकैः सर्वे ते सिद्धिमायान्ति बुद्धपात्रसमोदिता // mmk_36.41(="36") //

आकृष्टा सर्वमन्त्राणां गतिमूर्तिसमाश्रिताम् / वशै ता मन्त्रराट् स्वामी प्रभुः श्रेष्ठो महाद्युतिः / अग्र च सर्वमन्त्राणां निर्दिष्टो तत्त्वदर्शिभिः // mmk_36.42(="37") //

स मन्त्रो पात्रभूतस्थः त्रिषु चिन्तामणिस्तथा / करोति कर्मवैचित्र्यं ईप्सितं साधकेच्छया // mmk_36.43(="38") //

विविधागुणमाहात्म्यं प्रभावातिशयापराम् / करोति ऋद्धिदुर्लङ्घ्यं + + + सर्वमन्त्रिभिः / अपात्रो पात्रतां याति मन्त्रस्थे मुनिवर्णिते // mmk_36.44(="39") //

पात्रो मन्त्रप्रयुक्तस्तु मुद्राभिश्च समन्वितः / करोति गुणविस्तारं विचित्रं कर्मसम्भवम् // mmk_36.45(="40") //

हन्युः सर्वतो रोगान् भोगांश्चैव सुपुष्कलाम् / त्रिजन्मगतसत्त्वानां देवदैत्यनराधिपाम् / कुर्यात् सम्पदां क्षिप्रं सर्वकर्मसु योजिता // mmk_36.46(="41") //

इति //

तदेव हस्तौ करसम्पुटाकारौ सविचित्रवेणिकावबद्धौ ललाटदेशे स्थापयेत् / चित्रहस्त तदेव भगवतां बुद्धानां चिन्तामणिरत्नमहामुद्रा / मन्त्रं चात्र भवति / नमः सर्वबुद्धेभ्यः ओम् तेजोज्वाल सर्वार्थसाधक सिध्य सिध्य सिद्धिचिन्तामणिरत्न हुं ।

चिन्तामणिरत्नमन्त्रः सर्वार्थसाधकम् / ईप्सितां साधयेदर्थां मन्त्राश्चापि सविस्तराम् // mmk_36.47(="42") //

करोति गुणमाहात्म्यं चिन्तितं चापि साधयेत् / सम्पदां सफलांश्चापि मन्त्रतन्त्रसुभाषितम् // mmk_36.48(="43") //

नैष्ठिकं साधयेदर्थां बुद्धत्वनियतं तथा / इच्छया कर्मविन्यस्तं करो चैवमजायत // mmk_36.49(="44") //

विविधां सम्पदां सद्यः फलमुद्भवचेष्टिताम् / सर्वाणां मन्त्रतन्त्राणां साधये त्मसाधितम् // mmk_36.50(="45") //

देवत्वमथ शक्रत्वं ब्रह्मत्वं वापि रूपिणम् / आभास्वराणां तथा मूर्तिसदृशानां सुदर्शनाम् // mmk_36.51(="46") //

सुरश्रेष्टां सुरामग्रां बृहत्फलामकनिष्ठाम् / देवभूयिष्ठां मूर्तिमाप्नोति साधनादिति // mmk_36.52(="47") //

चिन्ता मनसो ह्यग्रा कथिता मन्त्रार्थविस्तराम् / मुद्रासु पुष्कलाश्चैव गतिधर्मार्थसाधका // mmk_36.53(="48") //

सर्वधर्मार्थनिःपत्तिं सर्वमन्त्रार्थसाधनम् / सर्वगुणबोध्यर्थं धर्मधातुसमाश्रयम् // mmk_36.54(="49") //

कथितं मन्त्ररूपेण रत्नचिन्ताग्रपूजितम् / विशेषात् प्राप्नुयात् स्वर्गरूपाश्चैव समाश्रयम् / साधनात् प्राप्नुयात् स्वर्गं गतिमन्त्रार्थविस्तरमिति // mmk_36.55(="50") //

तदेव हस्तौ उभौ स्कन्धावसक्तौ अर्धोपरिस्थितौ दक्षिणवामावष्टब्धौ अन्योन्यासक्तौ करमूलसुयोजितौ / इयं सर्वबुद्धानां चीवरमुद्रा / भवति चात्र मन्त्रः / ओम् रक्ष रक्ष सर्वबुद्धाधिष्ठिता मे चीवर स्वाहा / चीवरमन्त्रः / आत्मचीवरमभिमन्त्र्य प्रावरेत् / सर्वभूतानां अधृष्यो भवति / महाराजक्षत्रियेन मूर्ध्नाभिषिक्तेन सर्वप्रश्वासकरेणात्मवस्त्रमभिमन्त्र्य सप्तवारां सङ्ग्राममवतरेत् / सर्वारयः दृष्ट्वा स्तम्भिता भवन्ति / प्रतिनिवर्तन्ते वा / सर्वभूताश्च दृष्टमात्रा वशा भवन्ति / गतमानमदर्प न चास्य काये शस्त्रं निपतति / न चास्य मनुष्यामनुष्यभयं भवति / न विषो न हुताशनः काये निपतति / न चास्य रोगभयं भवति / न चास्यापमृत्युभयं भवति / न चास्य परचक्रेण हन्यते / न डाकिनीभूतपिशाचैश्च यक्षराक्षसगन्धर्वै विचित्रैर्वा भूतगणैः ओजोहारिभिः रौद्रचित्तैः पिशिताशनैः सर्वक्रव्यादैर्वा हिंसकैः परसत्त्वविहेठकैः पापकर्मान्तचारिभिर्वा राजानैर्न शक्यते हिंसयितुं उपघातं कर्त्तुम् / कः पुनर्वादो विना रक्षा वा भेत्तुं सर्वकर्मादिषु सर्वद्रव्येषु जीविता व्यवरोपयितुम् / न हि तद्विद्यते सत्त्वो वा सत्त्वनिकायो वा मन्त्रो वा मुद्रो व विषो वा स्थावरजङ्गमो वा शस्त्रो वा प्रहरणानि वा विविधानि राक्षसो वा राक्षसी वा यक्षा वा यक्षी वा यक्षमहल्लको वा यक्षमहल्लिका वा यक्षपार्षदो वा यक्षपार्षदी वा पेयालं विस्तरेण कर्तव्यं सर्वसत्त्वेभ्यः / नेदं स्थानं विद्यते / अतो न तथागतमुद्राचीवरमन्त्रेण कृतरक्षाविधानेन जापमात्रेण वा स्मरितेन वा नान्यशक्तो भेत्तुं तथागतमन्त्रैर्वा सर्वबुद्धबोधिसत्त्वैश्च भेत्तुम् / वर्जयित्वा तस्यैव साधकस्येच्छया / एवं महाप्रभावो ऽयं मन्त्रः सर्वकर्मिकः (वैद्य 308) सर्वार्थसाधकः सर्वदुष्टविनाशकः सर्वमङ्गलसङ्गतः सर्वार्थपरिपूरकः सर्वदुर्गतिशोधकः सर्वक्लेशनिषूदनो बुद्धधर्मां परिपूरकमिति ।

तदेव हस्तौ पूर्ववत् मध्यमाङ्गुलिमधोनामितौ अनामिकाग्रावस्थितौ अङ्गुष्ठपरिनामितौ तृतीयपर्वमङ्गुष्ठाविश्लेषितौ कन्यसानामितौ चक्राकारौ आराग्रोपेतौ नाभिमण्डलोपेतौ कृत्वा शिरःस्थाने स्थापयेत् / इयं सर्वबुद्धानां धर्मचक्रमुद्रा / मन्त्रं चात्र भवति / ओम् छिन्द छिन्द हन हन दह दह दीप्तचक्र हूं / एष सः सर्वबुद्धानां धर्मचक्रमन्त्रः / सर्वक्लेशनिषूदनः सर्वोपायदुर्गतिविनिपातां छिन्दयति / सर्वबुद्धधर्मां ज्वालयति / सर्वक्लेशान्धकारां आलोकीकरोति / सर्वदुःखां विहेठयति / सर्वकर्मां साधयति / सर्वदुःखेभ्यः प्रमोचयति / सर्वद्रव्यां दीपयति / अयं भगवां धर्मचक्रः परमन्त्रकृतदुष्टसत्त्वोपदेशितप्राणोपहारिणां मन्त्रां हिंसकां रौद्रां विकृतिस्थां छिन्दयति दालयति पाचयति शोषयति उत्सादयति च साधकेच्छया उत्कीलयति मोचयति यथाव्यवस्थायामुपस्थापयति / यथा यथायं भगवां प्रयुज्यते तथा तथा कर्माणि करोति वर्जयित्वाभिचारुकं कामोपसंहितानां च / सर्वशान्तिकर्मसु च प्रयोक्तव्यम् / महारक्षादिभिः सर्वतः सर्वसत्त्वोपकारायैव प्रयोक्तव्यः / सर्वसाधनेषु लौकिकलोकोत्तरेषु मन्त्रमुद्रेषु कल्पोक्तेषु सर्वकर्मसु शान्तिकपौष्टिकेषु महारक्षा अनेनैव प्रयोक्तव्यमिति ।

तदेव हस्तौ प्रहारावर्जितदक्षिणाग्रकरवामहस्ततर्जन्या तर्जयमानं सङ्कोचितक्रकूनिकाग्रन्थान्यप्रयोगावस्थितसन्दशेदोष्ठपुटा जानुभागावस्थितवामचरणविक्षिप्तदक्षिणावनामितौपविष्टकिञ्चित्स्थितकास्थित / इदं भगवत्यापराजिताया महामुद्रा / भवति चात्र मन्त्रः - ओम् हुलु हुलु चण्डालि मातङ्गि स्वाहा / अपराजिताया -

मन्त्रा सर्वबुद्धानां सर्वमारनिषूदनी / सर्वविघ्नप्रशमनी आयुरारोग्यवर्धनी // mmk_36.56(="51") //

श्रेष्ठा सर्वमन्त्राणां रक्षाकर्मविधानता / नरनारीकुमाराणां सौभाग्यजननं परम् // mmk_36.57(="52") //

मनुष्यामनुष्याश्च ये चान्ये दुष्टसत्त्वचेतसा / राक्षसोस्तारका प्रेता स्कन्दापस्मारगुह्यका // mmk_36.58(="53") //

मातृभूतग्रहगणा योगमन्त्रकृतानि च / रुजो रोगो व्याधयश्च नानाधातुसमुद्भवाः // mmk_36.59(="54") //

सर्पमूषिकलूताश्च कीटविष्फोटकानि च / शरीरे न क्रमिष्यन्ति कर्मणान्यत्र पूर्वकात् // mmk_36.60(="55") //

अध्ववादविवादेषु राजचोरोदकाग्निषु / जयं क्षेमं शिवं शान्तिं लप्स्यते नात्र संशयः // mmk_36.61(="56") //

भूर्जपत्रे ऽथवा वस्त्रे लिखित्वान्यत्र वा क्वचित् / शिरसा ग्रीवकट्या वा बाहुना पाणिनाथ वा // mmk_36.62(="57") //

वस्त्रबन्धं शिखाबन्धं कृत्वा ग्रन्थिमालिकाम् / धारयिष्यति यो नित्यं स्वस्ति तस्य भविष्यति // mmk_36.63(="58") //

यश्चेमां प्रातरुत्थाय स्वपंश्च परिवर्तये / सुखं कालक्रियां कृत्वा सप्तजातीं स्मरिष्यति // mmk_36.64(="59") //

रूपवां शीलसम्पन्नो मुखेनोत्पलगन्धिना / प्रियश्चादेयवाक्यश्च जात्यां जात्यां भविष्यति // mmk_36.65(="60") //

भवन्ति चात्र सिद्धानि मन्त्रपदानि मन्त्रसंज्ञानि यथोक्तार्थकराणि तु / तद्यथा -

भञ्जने स्तम्भने धा धा धा धत्स या या या यते हा हा हा हते परकरणि वीर्येवीर्ये गुणतेजभूतकरि भद्रकरि रौद्रकरि कुम्भवति विषकुम्भवति सर्वबले भूतबले रक्ष रक्ष मां सर्वविषेभ्यः सर्वविघ्नेभ्य / तद्यथा - सिद्धकरि सिद्धार्त्थे सिद्धमनोरथे सिद्धकार्ये फुरु नुरूपे स्वस्ते प्रशस्ते सिद्धि सिद्धार्थे धैर्यवति समने तपने शरणे भद्रे भवति शान्ते दान्ते शिवे हुनुनु परि परित्राणं कुरु, परिग्रहं कुरु, परिपालनं कुरु, शान्तिं कुरु, स्वस्त्ययनं कुरु, मम सर्वसत्त्वानां च रक्षां कुरु स्वाहा / अयं हृदयः अपराजितायाः / पूर्वं मूलविद्या / अवश्यं साधकेन कुशलपक्षाभिमुक्तेन भवितव्यम् / त्रिःकालं जप्तव्यम् / पूर्वतरमेव सकृत् पुस्तकवाचिकायां वाचयेदेतदेव कुशलपक्षं भवति / उपहृदयं चात्र भवति - नमः सप्तानां सम्यक्सम्बुद्धानां सश्रावकसङ्घानां सर्ववैरभयातीतानाम्

विपश्चिनस्तेजसा ऋद्ध्या च शिखिनस्तथा / विश्वभुक् प्रज्ञया चैव क्रकुच्छन्दबलेन च // mmk_36.66(="61") //

कनकमुनेः शिक्षायां काश्यपस्य गुणोरपि / शाक्यसिंहस्य वीर्येण शिवं भवतु सदा मम // mmk_36.67(="62") //

तद्यथा - जये विजये अपराजिते मारसैन्यप्रमर्दनीये स्वाहा / सर्वार्थसाधनीये स्वाहा / एषा भगवती सर्वार्थसाधिका यथा यथा प्रयुज्यते, तथा तथा कर्माणि करोति / सर्वत्र च रक्षाविधानेषु प्रयोक्तव्या / अवश्यं साधकेन मनसि कर्त्तव्या / सर्वविघ्नां नाशयति / सर्वमारकर्माणि च विधमयति / सर्वमन्त्राणि चामुखीकरोति / सर्वबुद्धधर्मां परिपूरयति / सर्वलौकिकलोकोत्तराणि च मन्त्रं आकर्षयति / ऊनातिरिक्तं परिपूरयति / सर्वाशां सम्पादयति / सर्वदुष्टां निवारयति / संक्षेपतः साधकस्येच्छया सर्वां करोति / मरणकाले चास्य संमुखं दर्शनं ददाति / सर्वापायदुर्गतिं परिशोषयति / सततजापेन पञ्चानन्तर्याणि क्षपयति / चतस्रो ऽपि मूलापत्तयः तन्वीकरोति / स्मरणमात्रेण जापेनैवोन्मूलयति / सर्वदेवोपपत्तिमनुष्योपपत्तिभ्यो प्रतिष्ठापयति / सर्वबोधिसत्त्वचर्या नियोजयति / सर्वबुद्धधर्मां परिपूरयति / एवमपि भगवती अपरिमितगुणानुशंसा महाप्रभावा सर्वबुद्धानां मुखोद्गीर्णा सर्वमारनिर्नाशनाय भाषिता सर्वतथागतैः सर्वक्लेशशोषणी अप्रतिहता सर्वकर्मसु सर्वरक्षावरणगुप्तयेषु च योजयोतव्या / सर्वबुद्धानां विस्फूर्जितमेतत् / महासिंहनादमेतत् / सर्वचर्यानिश्रयमेतत् / सर्वबुद्धानां बोधिमेतत् / महासमाधिनिष्पन्दितमेतत् / (वैद्य 310) महाप्रातिहार्यऋद्धिमेतत् / सर्वातिशयमेतत् / सर्वशान्तपदमेतत् / सर्वबुद्धास्पदमेतत् / निर्वाणपदमेतत् / स्वस्त्ययनपदमेतत् / अनभिलाप्यपदमेतत् / भूतकोटिपदमेतत् / अभावस्वभावपदमेतत् / यदुत मन्त्रपदं सर्वबुद्धाधिष्ठानपदमिति ।

तदेव हस्तौ करसम्पुटाविन्यस्तौ उभयाङ्गुलिमध्यसूचितौ ललाटदेशे न्यसेत् / एषा अपराजिताया मुद्रा द्वितीया सर्वकर्मिका मूलमन्त्रेण सह विन्यस्ता सर्वाशां परिपूरयति / हृदयस्थाने न्यस्ता हृदयमन्त्रेण संयुक्ता सर्वरक्षोघ्ना सर्वापायदुर्गतींश्च नाशयति / एषा तृतीया भगवत्यापराजितायाः हृदयमुद्रा / तदेव हस्तौ नाभिदेशावलम्बितौ अधोनामितौ करौ / एषा चतुर्था भगवत्यपराजिताया उपहृदयमुद्रा / हृदयमन्त्रेण सर्वकर्माणि करोति / सर्वमङ्गलसंमतानि च सर्वशान्तिः स्वस्त्ययनं च / उदकाभिमन्त्र्य स्नपनं परमसौभाग्यकरणं अलक्ष्म्यापहं लक्ष्मीसञ्जनन श्रिया सम्पत्करणम् / तदेव हस्तौ वक्त्रदेशे स्थापयेत् / इयमपरा महामुद्रा भगवत्यपराजितायाः महामुद्रा पञ्चमं भवति / एवमनेन प्रकारेण असङ्ख्येयानि मुद्राणि भवन्ति / सर्वपराजितमन्त्रेषु च प्रयोक्तव्यमिति / तदेव हस्तं दक्षिणक्षिप्तं ईषिन्मुष्टोपश्लेषितं वामहस्तेन दृढमुष्टिकम् / एषा सर्वबुद्धानां महाशक्तिमुद्रा / मन्त्रं चात्र भवति - ओम् विजये महाशक्ति दुर्धरि हूं फट् विजयिने फट् मङ्गले फट् स्वाहा / तथागतशक्तिमन्त्रा सर्वदुष्टसत्त्वेषु प्रयोक्तव्या / महाभयेषु च प्रत्युपस्थितेषु ग्रामे वा मुद्रोपेता प्रयोक्तव्या सर्वकर्मसु / ग्रहनक्षत्रपीडासु च सर्ववेताडग्रहगृहीतेषु सर्वयक्षराक्षसपिशाचमरुतग्रहब्रह्मराक्षसादिषु गृहीतस्य मुद्रां बध्वा मन्त्राः प्रयोक्तव्याः / तत्क्षणादेव मुच्यति / सर्वमहाश्मशानप्रवेशेषु च प्रयोक्तव्या / सर्वविघ्ना विद्रवन्ति, प्रपलायन्ते सर्वेण सर्वं न भवन्ति / एवंप्रकारान्येकानि सर्वकर्मार्थचित्राणि मन्त्रतन्त्रमाहात्म्यानि साधयति / सर्वरक्षावरणगुप्तिं च करोति / सर्वरक्षोघ्नं च पवित्रं आयुरारोग्यवर्धनमिति ।

तदेव हस्तौ करसम्पुटावस्थौ ईषिन्नामितमध्यमाङ्गुलीयकौ अनामिकावेष्टितकन्यसौ नेत्राकारों उभयाङ्गुष्ठावष्टब्धौ एष भगवतां बुद्धानां तथागतलोचनमहामुद्रा / नेत्रभागे दर्शिता सर्वतथागुणाग्रमात्रा सर्वतथागतानां जनेत्री सर्वविद्यानां प्रभङ्करी सर्वार्थपरिपूरकी सर्वकुदृष्टीनां विशोधनकरी सर्वसत्त्वसम्यग्दृष्टिसञ्जननकरी सर्वतथागतकुलमाता सर्वमन्त्रगोत्रकुलन्धरी सर्वलौकिकलोकोत्तराणां मन्त्राणां परिपूरकी सर्वार्त्थापरिपूरकी समाश्वासिका / भवति चात्र मन्त्रः - ओम् रु रु स्फुरु ज्वल तिष्ठ सिद्धलोचने सर्वार्थसाधनि स्वाहा / तथागतलोचनानामहाविद्या / वचन वचन वचन ओम् बुद्धलोचने स्वाहा / इयं सा विद्या वज्रपाणेः सर्वकर्मिका अस्यैव / तदेव हस्तौ पूर्ववत् सम्पुटाकारं कृत्वा मध्यमाङ्गुलिरवनामितौ कन्यसाप्रसारिताग्रौ ईषिदवनामितौ उभयाङ्गुष्ठौ तर्जन्यपरिवेष्टितौ अनामिकासंश्लिष्टौ ईषत्कुञ्चितौ / इयं भगवतो सर्वबुद्धानां ऊर्णामुद्रा / तदेव हस्तौ उभयाग्रौ ललाटदेशे स्थापयेत् / एष सर्वतथागतानां ऊर्णामुद्रा / तदेव हस्तौ उभयाग्रवेणीकृतौ ललाटदेशे मण्डलाकारेणावेशयेत् / ईष तृतीयं ऊर्णामणिरत्नमुद्रा / तदेव हस्तौ उभयतः कुञ्चीकृतौ कन्यसाङ्गुलिवेष्टितौ उभयाङ्गुष्ठसंश्लिष्टौ / (वैद्य 311) इयं चतुर्था ऊर्णामुद्रा / तदेवाङ्गुष्ठावनतौ ललाटदेशे चित्राकारेण दर्शयेदेष सर्वतथागतानां तथागतोर्णा / एते पञ्च महामुद्रा तुल्यवीर्या तुल्यप्रभावा सर्वकर्मिकानि भवन्ति / भवति चात्र मन्त्रः सर्वेषाम् - नमः सर्वतथागतानीभ्यो ऽर्हद्भ्यः सम्यक् सम्बुद्धेभ्यः /