मञ्जुश्रीमूलकल्प

बोधिसत्त्वपिटकावतंसकान्महायानवैपुल्यसूत्रात् आर्यमञ्जुश्रियमूलकल्पात् सप्तत्रिंशतिमः महाकल्पराजपटलविसराद् उत्तमसाधनोपयिकसर्वकर्मार्थसाधनतत्त्वेषु प्रथमः ध्यानपटलविसरः परिसमाप्त इति // अथ चत्वारिंशः पटलविसरः / अथखलु भगवां शाक्यमुनिः शुद्धावासभवनमवलोक्य मञ्जुश्रियं कुमारभूतमामन्त्रयते स्म / अस्ति मञ्जुश्रीः त्वदीये महाकल्पराजे पटलविसरे ध्यानजे ऽनाश्रवे परमशिवशान्तीभूते अत्यन्तभूतकोटिधर्मधातुप्रविष्टे सर्वतथागतधर्मनेत्रीमनुगते परमनिर्वाणमार्गां सानुप्रविष्टे आर्यपथक्षेमशान्तीभूते महाधर्मनैरात्म्यशून्यतास्वभावमनुप्रविष्टे सर्वलौकिकलोकोत्तरतत्त्वावतारध्यानानुगतमनुप्रविष्टे सर्वमन्त्रचर्यासाधनविधिसमासक्रीडानाटकबालचर्याविस्फूर्यानानुगतसन्तोषणसत्त्वचर्यानुगतैः / कतमं च तत् //

शृणु त्वं मञ्जुरव थ्रीमां सर्वसत्त्वानुवर्तनम् / ध्यानं सर्वज्ञतो ज्ञेयं सर्वमन्त्रार्थसाधनम् // mmk_40.1 //

पूरणं सर्वमन्त्राणां शोधनं पापकर्मिणाम् / यं ध्यात्वा च जनाः सर्वे सिद्धिं प्राप्स्यन्त्यनांविलाम् / सर्वाकारवरोपेतां ध्यानसौख्यमचिन्तिताम् // mmk_40.2 //

बोधित्वं त्रिविधं प्राप्य उत्तमाधममध्यमाः / अतुलां मन्त्रसिद्धिं च अस्तुवन्ति जना भवेत् / सर्वार्थसाधनं लोके यशःकीर्त्तिसुखोदयम् // mmk_40.3 //

दीर्घायुष्कतां लोके ऽस्मिं देवानां च महद्गतिम् / सर्वाशावाप्तितां क्षिप्रं प्राप्नुवन्ति न संशयः // mmk_40.4 //

द्विप्रपञ्चानुत्तरां बोधिं लप्स्यते ध्यानचिन्तकाः / सर्वसत्त्वाहितह्यग्रं सर्वमन्त्रेषु कीर्त्यते // mmk_40.5 //

स्मरणादेव मन्त्रेषु सर्वतन्त्रेषु च पुनः / सिद्धयः सिद्धिहेतूनां क्षिप्रमाशानिबन्धनम् // mmk_40.6 //

आशास्यं भुवि तां मर्त्या पुनर्गच्छन्ति देवता / आजहार पुरं दिव्यं देवतामन्दिरेष्विह // mmk_40.7 //

तिष्ठन्ते मन्त्रराट् सर्वे तन्मुखापिध्यायिने / आगत्य च पुनः सर्वं देवतामन्त्ररूपिणाम् // mmk_40.8 //

कथयन्ति यथातथ्यं शुभाशुभफलोद्भवम् / वाचां प्रबुद्धः स्वप्ने प्रत्यक्षं वाथ जापिने // mmk_40.9 //

शुभोदयं फलं कर्म प्रत्यक्षं वापि देवताम् / पश्यन्ते स्वप्नगताः सर्वे मन्त्रिणा वापि तदन्तरे // mmk_40.10 //

इतरां चापि न पश्यन्ते जापिनो मन्त्रलौकिका / ध्यानेन पापं क्षीयेत जपे चापि सुपुष्कले // mmk_40.11 //

सिध्यन्ते मन्त्रराट् सर्वे अचिरात् तस्य मन्त्रिणः / प्रभावा ध्यानयोगस्य अचिन्त्याद्भुतचेष्टिता // mmk_40.12 //

एवमुक्तस्तु धीरेण शाक्यसिंहेन तापिना / भून्मञ्जुरवस्तूष्णीं शुद्धावासपुरे तदा // mmk_40.13 //

सर्वे देवगणा मुख्या त्रिधा धातुसमाश्रिता / अमुचद् वाक्यवरं शुद्धं सर्वमन्त्रेश्वरं गुरुम् // mmk_40.14 //

साधु साधु महावीर साधु धर्मेश्वरो विभोः / यस्त्वं हि सर्वसत्त्वानां हितार्थं मन्त्रजापिनाम् // mmk_40.15 //

ध्यानां च तत्त्वनिर्दिष्टं पूर्वनिर्दिष्टतामिति / इदानीं तु महावीर + + + + + + + + + + + + // mmk_40.16 //

एवमुक्ताः सुराः स + अग्रा ह्यग्रतमे हिताः / तूष्णीम्भूतास्ततस्तस्मिन् शुद्धावासपुरे पुरे // mmk_40.17 //

इत्युवाच महाधीरो मुनिस्तेजो + + + + + / शुभया वाचाया दिव्यां लोकतत्त्वार्थदर्शनम् // mmk_40.18 //

कथयामास सम्बुद्धः मधुराक्षरघोषजम् / शृणोथ भूतगणाः सर्वे स्थिता त्रिविधालया // mmk_40.19 //

ध्यानं च भवनिर्देशं कथ्यन्तः समाहिताः / अनेकार्थमनानात्वं नैरात्म्यं तत्त्वदर्शनम् // mmk_40.20 //

सर्वमन्त्रार्थरिधिंसार्थं विविधार्थं तु लौकिके / सर्वधर्मेश्वरा लोके येनायान्ति सुचिन्तिता / क्षिप्रं च जापिनां सर्वे आशु मन्त्रार्थसिद्धये // mmk_40.21 //

आदौ ध्यायीत महावीरं रत्नकेतुं तथागतम् / रत्नशैलनिषण्णं तु गुहायां रत्नजोद्यते / पद्मरागमयं दिव्यं महापद्मं महोन्नतम् // mmk_40.22 //

भगवां तत्र निषण्णस्थं पर्यङ्के धर्मदेशितम् / ध्यायन्तं महावीरं पद्मसम्भवमेव तु // mmk_40.23 //

पद्मोत्तरं च सम्बुद्धं पद्माभं चैव बुद्धिमाम् / ध्यायीत मुनिवरां पञ्च रत्नाभं च तथागतम् // mmk_40.24 //

समतः सुप्रतिष्ठिता ज्ञेया गुहेष्वेव पञ्चसु / सर्वां शैलमयां साद्रि पद्मरागमयं क्वचित् // mmk_40.25 //

भिन्नेन्द्रनीलमाभासं क्वचित् स्फटिकसन्निभम् / उच्छ्रयं मरकताभासं प्रमाणं चापि शताष्टकम् // mmk_40.26 //

योजनानां सहस्रं तु लक्षषोडशविस्तरम् / उपरिष्टात्तु सम्बुद्धा अपर्यन्ता नरोत्तमा // mmk_40.27 //

इत्यूर्ध्वमधः सर्वदिग्विदिशश्चापि सर्वतो / प्राप्तं मुनिवरैः सर्वं सम्बुद्धैर्द्विपदोत्तमैः // mmk_40.28 //

चन्द्राभासं च निर्भासैः श्वेतपुण्डरिकासनैः / हंसगोक्षीरनिर्भासैः शङ्खकुन्देन्दुहिमप्रभैः // mmk_40.29 //

सम्बुद्धैः सर्वमिदं व्याप्तं इत्यूर्ध्वमधस्सप्ततिर्यकम् / सद्व्योम्नि पुष्पवर्षाद्यैः सुरमुख्यैः समन्ततः // mmk_40.30 //

अदृश्यकायसारूप्यैः उपरिष्टात् खसमागतैः / अधश्चात्मानं सदा चिन्तेत् पर्यङ्केनोपविष्टकम् // mmk_40.31 //

पद्मपत्रे स्थितं मुख्यं शरीरं चापि निर्मलम् / अभिषिञ्चन्तं सदापश्यन्तं तोयधाराभिः सर्वतः // mmk_40.32 //

असङ्ख्येयैर्मुनिमुनिमुख्यैः सम्बुद्धैः द्विपदोत्तमैः / प्रसृतैर्दक्षिणाग्रकरैः समन्तादङ्गुलिभिः सदा // mmk_40.33 //

शुक्लतोया बहुभिः बहुधाराभिरूर्ध्वतः / समन्तात् सर्वतश्चैव मूर्त्ति चात्मान एव तु // mmk_40.34 //

अष्टाङ्गसलिलधाराभिः सुगन्धैर्लयशीतलैः / अच्छैरनाविलैश्चैव सर्वव्याधिहरैस्तथा // mmk_40.35 //

जरामृत्युविनाशिन्यैः भिन्नस्फटिकसन्निभैः / तादृशैस्तोयधाराभिः आत्मानं चापि चिन्तयेत् // mmk_40.36 //

अभिषिञ्च्यात्मतो चिन्त्या तैश्चाप्यायितमानसः / समन्ताद् वारिधाराभिस्ततो ध्यायी सुखी भवेत् // mmk_40.37 //

सन्तुष्टमानसो धीमां पश्येद् ज्ञानं तदासनम् / चित्ते समाधितां लिप्स्ये पञ्चाभिज्ञासु चिन्त्यधीः // mmk_40.38 //

एवं युक्तः सदा योगी पश्येद् धर्मां तदा स्वयम् / दिव्यं श्रोत्रं तथा ज्ञानं पूर्वजातिमनुस्मरम् // mmk_40.39 //

ऋद्धिविक्रीडितं ज्योतिर्दिव्यं चक्षुरनावृतम् / परचित्तगत्तिं चिन्तां सर्वसत्त्वाश्रयं तम् // mmk_40.40 //

सर्वं ज्ञास्यति योगीशो तदा युक्तेः समाहितः / अनिवर्त्त्यः सदा बोधो अनुत्तरायां न संशयः // mmk_40.41 //

बुद्धभूमिगतां धर्मां प्रथमायामविकल्पतः / प्राप्स्यते ऽसौ सदा जापी अनिवर्त्यो ऽमृते पदे // mmk_40.42 //

अनाभोगेनैव सम्यङ्मन्त्राः सिध्यन्ति सर्वतः / ये च लोकोत्तराः सर्वे अभिमुख्यैः प्रभाषिताः // mmk_40.43 //

बोधिसत्त्वैस्तु सर्वत्र अब्जा वज्रोद्भवाश्च ये / लौकिका ये च मन्त्रा वै ब्रह्मरुद्रेन्द्रभाषिता // mmk_40.44 //

यक्षमुख्यगणैः सर्वैः ........ / मातृभूतग्रहगणैः यक्षराक्षसकिन्नरैः // mmk_40.45 //

देवैर्नागगरुडैश्च सिद्धविद्याधरैस्तदा / कूश्माण्डैर्व्यन्तरैश्चापि कश्मलैः पिशिताशनैः // mmk_40.46 //

परप्राणहरैश्चापि राक्षसैः प्रेतदुःस्वपैः / पिशाचैः भृतयक्षैश्च अनेकाकारजातिजैः // mmk_40.47 //

ये मन्त्रा भाषिता लोके + + + + + / ते तस्य योगिनो यान्ति ईषद् बोधाय बोधिता // mmk_40.48 //

क्षिप्रं सिद्धितां यान्ति मन्त्रा सर्वार्थसाधकाः / वचनं तस्य वै मन्त्रः क्षिप्रं तत्त्वार्थदर्शिने // mmk_40.49 //

ऋषयो ये च वै देवाः मानुषोद्भवाः / प्रसह्य वृत्ता मुख्याश्च स्त्रीपुंसाश्चापुंसकाः // mmk_40.50 //

सर्वे महर्द्धिकाश्चापि उत्तमाधममध्यमाः / सर्वे लौकिका चापि ये मन्त्रा लोकपूजिता // mmk_40.51 //

तैश्चाप्यथ मनैश्च मन्त्रैश्चापि मन्त्रजाः / भाषिता मुनिमुख्यैश्च सर्वे सिद्ध्यन्ति योगिने // mmk_40.52 //

तन्त्रमन्त्रगताश्चापि ओषध्यो मणिभूषणाः / सर्वे मन्त्रवरा तस्य उत्तमाधममध्यमाः // mmk_40.53 //

सर्वाशावाप्तये वापि अक्षरे क्षरते यदा / सिद्ध्यते तस्य बैं युक्तस्य मन्त्रिणे एवं युक्तस्य मन्त्रिणे // mmk_40.54 //

एवमुक्तस्य मन्त्रस्य धीमन्तस्य विशेषतः / प्रथमं चिह्नलिङ्गस्तु मन्त्राणां सिद्धिहेतवः // mmk_40.55 //

शरीरं जायते श्रेष्ठं पद्माभासं सुखोदयम् / गात्रस्य शैत्यता चापि चन्दनेन्दीवरगन्धिता // mmk_40.56 //

कर्पूरागरुसौगन्ध्यं पद्मकिञ्जल्कवर्णतः / वक्त्राद् रोमकूपेभ्यः गन्धो वान्ति सचाम्पकम् // mmk_40.57 //

जातीयूथिकपुन्नागं नागकेसरवकुलम् / धानुष्कारी ससौगन्धी जातिमल्लिककोलजम् // mmk_40.58 //

विविधां धूपमुख्या वा विविधा पुष्पजातयः / विविधा गन्धमुख्याश्च विविधा द्रव्यजातयः / विविधा सर्वगता गन्धाः शुभकर्मसमोचिताः // mmk_40.59 //

तेषां गन्धवरं हृद्यं अभिभूयोभिप्रवर्तते / दिव्यं मान्दारवं गन्धं सकिञ्जल्कं सकोकणम् / सकस्तूर्यकं लोके अभिभूयं तां प्रवायते // mmk_40.60 //

ततश्चिह्नमिमां ज्ञात्वा गात्रे वै चापि शैत्यताम् / चित्तैकाग्रतां चैवं मुखं चैव विवेकजम् // mmk_40.61 //

प्रथमं ध्यानजं चैवं चित्तं ज्ञात्वा तु तीरितम् / सुखदुःखमुपेक्षाय निर्वृते चापि विरागताम् // mmk_40.62 //

उपेक्षं स्मृतिपरिशुद्धिं द्वितीये प्रेरयते जापी / तृतीयं चित्ततो ध्यानं चतुर्थं अश्रयतो व्रती // mmk_40.63 //

यथा मुनिवरोद्दिष्टं ध्यानं सर्वतो शुभम् / तथा मन्त्रगतो जापी ध्यायेदेकाग्रमनोमयम् // mmk_40.64 //

ये निर्दिष्टाद्याबुद्धैस्तु वर्तमानमनागतैः / सम्बुद्धैः श्रावकैश्चापि सूत्रान्ताश्चापि कीर्तिताः // mmk_40.65 //

तेषु योगेषु मन्त्रज्ञाः अनुपूर्व्या ध्यानमाचरेत् / निर्वर्त्त्यं श्रावकी बोधि प्रत्येकजिनमुद्भवाम् // mmk_40.66 //

महाकरुणानुभावीत महामैत्रीं चापि यत्नतः / यद् यद् गोत्रागतं चित्तं तथा चित्तं तु भावयेत् // mmk_40.67 //

परहितचित्तान्मैत्री परदुःखकृपालुता करुणा / परतुष्टिमुदिता परदोषमुपेक्षणमुपेक्षा // mmk_40.68 //

इत्युवाच महाभागा सम्बुद्धा द्विपदोत्तमा / अनित्यदुःखमनात्माशून्य तत्त्वं शिवं पदम् // mmk_40.69 //

क्षेमं शिवं परं स्थानं निर्दिष्टं लोकनायकैः / क्षणिकः सर्वसंस्काराः त्रिविधास्तत्त्वेष्वचेष्टिता // mmk_40.70 //

त एवासंस्कृता धर्मास्त्रिविधा बोधिसंस्थिता / त एव शिवतमा लोके कथिता बोधिपरायणैः // mmk_40.71 //

पुद्गलाभावनैरात्म्यं तीक्ष्णपतनवर्णितम् / तं नास्ति शिवे मार्गे क्षेमे बुद्धोपदेशिते // mmk_40.72 //

अत्यन्तनिष्ठे धर्मे ऽस्मिं भूतकोटिसमाश्रिते / धर्मधातुसमानं ते अस्तिनास्तिविवर्जिते // mmk_40.73 //

शुभे धर्मोदये बोधो त्रिप्रकारसमोदिते / अत्यन्तनिष्ठे मोक्षे च बहुधा भेदमाश्रिते // mmk_40.74 //

सुप्रयुक्ते सुनिर्दिष्टे सर्वबुद्धैः सुदेशिते / मार्गे स्थिते ऽथ मन्त्रज्ञः सर्वपापहरे शिवे // mmk_40.75 //

ये धर्मा मुनिवरैः सर्वैः प्रतीत्योत्पन्ना शुभाशुभाः / सर्वे ते जातिभिर्योगे ध्यातव्या मुनिहेतुभिः // mmk_40.76 //

श्रावकानां तु या शिक्षा अधिशीलानुप्रवर्त्तते / अधिचित्तं च यद् ज्ञानं श्रावण्यफलहेतुकम् // mmk_40.77 //

अनास्वरं सस्वरं ज्ञेयं जापिभिः सर्वदा स्वयम् / ज्ञातव्यं खड्गिणा शिक्षा प्रत्येकार्हसम्भवाम् // mmk_40.78 //

सर्वसत्त्वाख्यसत्त्वैवं सुस्वरं त्रिदिवोदितम् / यथाजिनैश्च निर्दिष्टं मार्गतत्त्वानुगामिनम् // mmk_40.79 //

साश्रवानाश्रवं ध्यानं संवरं च शुभोदयम् / यथावृत्ति यथालिङ्गं तथा शिक्षासु व्यवस्थितम् // mmk_40.80 //

तद्धर्मासेवतो जापी मन्त्रसिद्धि समश्नुते / ध्येयं च ध्यानजं पुण्यं पुण्यं ब्रह्मशुभोदयम् // mmk_40.81 //

तस्य सिद्धि सदा ज्ञेया ध्यानैः पुण्यैश्च बृंहितैः / उपोह्य सर्वतो मन्त्री जपहोमरतो व्रती // mmk_40.82 //

ध्यातव्यः सर्वतो मुख्यः जिनपुत्रो महर्द्धिकः / मञ्जुघोषो महावीरः कुङ्कुमाकारसमत्त्विषः // mmk_40.83 //

ईषिस्मितमुखो देवो सव्यामाभोगमण्डलः / प्रसन्नमूर्त्तिः पद्मस्थः समन्तरश्म्यावभासितः // mmk_40.84 //

पूर्वनिर्दिष्टजे स्थाने स्वमूर्त्त्याभिषेकसेविते / उपरिष्टात् तोयताराणां मध्ये जिनवरालये // mmk_40.85 //

तत्रस्थं तु सुखासीनं ध्यायीतं मञ्जुरवं शुभम् / सर्वबुद्धोर्ध्वकं दृष्टिं सनमस्कारं शुभं प्रभुम् // mmk_40.86 //

वामे करविन्यस्तं नीलोत्पलं शुभम् / दक्षिणेन करे ह्युक्त शुचिस्थाने सदाशुभे // mmk_40.87 //

सनमस्कारं सदा बुद्धं ईषच्छीलासबालिशम् / तं ध्यात्वा मुनिपुत्रे वै सदा मन्त्री पुनः पुनः // mmk_40.88 //

तत्रस्थो ध्यानजो धीमां आतुरायां तु पश्यति / सर्वे ते व्याधिनिर्मुक्ता दृष्टमात्रेण मन्त्रिणा // mmk_40.89 //

अधश्च पश्यत्पातालं सर्वे भूमिगता धना / वशिता सर्वमन्त्रज्ञः नित्योच्चाटनमन्त्रिणाम् // mmk_40.90 //

यदूर्ध्वं समपश्येत् सिद्धां व्योम्नानुगामिनाम् / सर्वं वशयिता लोके सिद्धद्रव्याणि सर्वतः // mmk_40.91 //

अथोत्तरां दिशां पश्येद् यक्षाध्यक्षांश्च सर्वदा / कूष्माण्डा वित्तदाश्चैव वित्तेशश्च महर्द्धिका // mmk_40.92 //

ईशानो भूतपतिश्चैव + + + + + + + + / औषध्यो हमेजाः सर्वे रुद्रश्चैव सहोमया // mmk_40.93 //

किन्नरा मरुगन्धर्वा ऋषयो गरुडस्तथा / सर्वसत्त्वाश्रया ये च तथोत्तरा विदिशे // mmk_40.94 //

विदिक्षु चैव सर्वत्र तथा स्थावरजङ्गमाः / सर्वे स्युर्वशमायान्ति दृष्टमात्रेण जापिने // mmk_40.95 //

एवं पश्चिमतो ज्ञेयं वरुण महर्द्धिकः / महानागैः सदा सर्वं दृष्ट्वा यान्ति सम्मूर्च्छिता // mmk_40.96 //

एवं वैवस्वतां लोकां यमश्चैव महर्द्धिकः / सर्वे ये राक्षसा दुष्टा घोररूपा महर्द्धिका // mmk_40.97 //

ससुता भृत्यवर्गैश्च परप्राणहराः खगाः / पिशिताश्चनरूपाश्च भीमरूपानुगाः सदा // mmk_40.98 //

व्यन्तरा कश्मलाश्चैव प्रेताप्रेतमहर्द्धिका / पिशाचा भूतक्रव्यादा व्यालश्चैव महर्द्धिकाः // mmk_40.99 //

अनेकाकाररूपास्तु अनेकाकारयोनिजाः / रूपा मनोजवाश्चैव सत्त्वा हिण्डन्ति मेदिनीम् // mmk_40.100 //

दारुणा रुधिरगन्धेन समन्ताद् योजनं शतम् / सहस्रं पुनरायान्ति सप्तसप्ते ऽनुगे सदा / मानुषाणां विहेठन्तां पर्यटन्ति महीतले // mmk_40.101 //

आहारार्त्थिनः केचित् केचित् क्रीडानुगामिनः / सर्वे स्युर्वशमायान्ति दृष्टमात्रेण जापिने / एवं पूर्वयां तथा दिक्षि पूर्वाध्यक्षादिशानुगः // mmk_40.102 //

सवितुः सर्वनक्षत्रा सज्योतिग्रहचन्द्रमा / महोत्पादोपग्रहां सत्त्वे विराजाश्चैव दिशां पतिः // mmk_40.103 //

ससुतो सपरिवारो वै शस्त्री वा चापि सर्वतः / सर्वे ते वशमायान्ति ध्यानेनावर्जिते जिता // mmk_40.104 //

विदिक्षुश्चैव सर्वत्र सर्वं सर्वासु दिक्षुषु / सुरश्रेष्ठा सुरश्चैव स्त्रीपुंसादये भुवि // mmk_40.105 //

सर्वसत्त्वा तथा लोके मानुषा अमानुषोद्भवा / सर्वे ते वशमायान्ति ये सत्त्वा त्रिषु स्थावरा // mmk_40.106 //

ये तु धातुजा मुख्या तथा मध्यमकन्यसाः / सर्वे ते वशमायान्ति अदृश्यो दृश्याश्च ध्यायिने // mmk_40.107 //

त्रिविधं ध्यानजं कर्म ज्येष्ठमध्यमकन्यसम् / ज्येष्ठे उत्तमां बोधिं प्राप्य ध्यायी निवर्त्तते // mmk_40.108 //

अनुत्तरं च पदं शान्तं प्रत्येकं मार्गखड्गिणाम् / कन्यसा श्रावकी बोधिः प्राप्यते परनिश्रिता // mmk_40.109 //

प्रतीत्योत्पत्तिकधर्माणां हेतुसम्भूतलक्षणम् / तेषां निरोधधर्माणां एवं वादी नरोत्तमः // mmk_40.110 //

साक्षात्क्रियेन मर्हत्त्वं चतुरो पटलसम्भवाम् / हेत्वाभासविद ज्ञानं शून्यता दुःखसम्भवम् // mmk_40.111 //

नैरात्म्यधर्मतो निष्ठं अत्यन्तं भूतकोटिजम् / निरोधमार्गवद् ज्ञेयनर्हत्वं चापि कन्यसम् // mmk_40.112 //

आलयोद्धातनो वर्त्त्मापर्छेदो वदनात्मताम् / पिपासा प्रतिपच्छोषावर्त्मोपछेदो ऽथ देहिनाम् // mmk_40.113 //

कामनद्यां सहतृष्णां शोकशल्यो ऽथ देहिनाम् / रुध्यन्ते सर्वतो ध्याने मार्गे ऽस्मिं ध्यानजे हिते // mmk_40.114 //

त्रिप्रकारं तथा कर्म अनेकाकारचिह्नितम् / त्रिधा चैव समुख्याणां त्रिविधा बोधिकीर्तिता // mmk_40.115 //

कन्यसं श्रावके बोधिः प्रत्येकार्हखड्गिणाम् / मध्यमे च सदा लोके निर्दिष्टा जिनवरैः पुरा // mmk_40.116 //

उत्तमं तु सदा बोधिं सम्यक् सम्बुद्धतां गतिम् / एवमाद्या प्रयोगेन त्रिधा कर्मक्रियाक्रमम् // mmk_40.117 //

शतधा भिद्यते तत्र सहस्रो ऽथ मसङ्ख्यकम् / व्रीह्यङ्कुरवद् ज्ञेयं पुनः क्षेत्राङ्कुरवत् सदा // mmk_40.118 //

ततो ऽङ्कुराङ्कुरवन्नित्यं सन्तत्या सम्प्रकीर्तिताम् / वीजोषधवत् कर्म शुक्लधर्मसमन्वितः // mmk_40.119 //

सत्त्वविज्ञानसन्तत्या पुनस्तोयतरद् भवत् / प्रवर्तते ध्यानजा धर्मा पुनध्यीयीत बुद्धिमाम् // mmk_40.120 //

यथा ध्यानगता योगी शुद्धिं पश्येत् सर्वतः / त्रिधिधं त्रिप्रकारं तु अनेकाकारसम्भवाम् // mmk_40.121 //

सिद्धिं मन्त्रयुक्तिं च समाधिं चैव कीर्तितम् / धारण्या बोधिसत्त्वानां त्रिविधैव समोदिता // mmk_40.122 //

अनेकाकारवरोपेता मन्त्राश्चैव सुपूजिता / लौकिका लोकमुख्याश्च तथा लोकोत्तरा सदा // mmk_40.123 //

सौगतीवर्त्ममास्थाय ध्यानं ध्यानपरम्परा / सिध्यन्ते सर्वमन्त्रा वै सर्वसत्त्वार्त्थदर्शनाम् // mmk_40.124 //

प्राप्नुवस्तं जनाः सर्वे ध्यायतां सर्वतो हिताम् / यशः कीर्तियथायुष्यं सर्वव्याधिप्रणाशनम् // mmk_40.125 //

मार्गतत्त्वार्थदं ज्ञानं जीवितं चापि सुपुष्कलम् / प्राप्नुवध्वं नराः श्रेष्ठाः नित्यं ध्याने समाहिताः // mmk_40.126 //

एष योगः समासेन निर्दिष्टो मुनिवरैः पुरा / अधुना च मयोक्तेदं विधियोगं समाहितम् // mmk_40.127 //

मयाप्यनुत्तरां बोधिं सम्प्राप्ते मे ऽमृते पदम् / एभिरेव समायोगैः मन्त्रैश्चापि सुपूजिताः // mmk_40.128 //

ध्यानकर्मगतैः दिव्यैः शुभैश्चापि समाधिभिः / प्राप्यमनुत्तरं ज्ञानं बुद्धत्वं भगवानाह // mmk_40.129 //

अपरं तु प्रवक्ष्यामि तन्मे निगदतः शृणु / क्रीडार्थं सर्वमन्त्राणां क्रीडाशतकर्मजम् // mmk_40.130 //

ध्यानजेनैव प्रयोगेण शृणु मञ्जुरवो जनाः / सदा हिताहितं ज्ञेयं मन्त्रिणां च विकुर्वणम् // mmk_40.131 //

ध्यानजेनैव योगेन कुर्याद् बालिशबुद्धिनाम् / आदौ तावद् सदा ध्यायेन्महानागोच्छ्रयं जले // mmk_40.132 //

महोदधिः समन्ताद् वै शैलराजविभूषितम् / रत्नशृङ्गं महोच्चं वै चतुरन्तमयं शुभम् // mmk_40.133 //

तत्रासीनं महात्मानं बुद्धं त्रैलोक्यविश्रुतम् / सुनेत्रं धर्मभूयिष्ठं अमिताभं च जिनोत्तमम् // mmk_40.134 //

जिनपुत्रं सदा श्वेतं लोकेशं च यशस्विनम् / पद्मकेतुं महासत्त्वं महाकरुणजोद्भवम् // mmk_40.135 //

सुनेत्रे मुनिवरे स्थाने कुमारं बालरूपिणम् / सदा मञ्जुरवं विन्द्याद् विचित्रो भूतिलक्षणम् // mmk_40.136 //

इन्दीवरकरं वामे दक्षिणे सुगतानभम् / जले यो ऽत्र महानागो अनन्तो नाम नामतः // mmk_40.137 //

सर्वश्वेतस्तथा नित्यं सप्तशीर्षजैः स्फटैः / तं ध्यात्वा चिन्तयेज्जापी विचित्रालङ्कारभूषितम् // mmk_40.138 //

सुगतात् सम्प्रतीच्छन्तं तन्मुखं चापि चिन्तयेत् / एवं नन्दोपनन्दौ च नागराजौ महर्द्धिकौ // mmk_40.139 //

तत्प्रमाणोच्छ्रितौ वृद्ध्या द्विगुणं चापि सर्वतः / अनन्तकर्कोटकस्तुल्यैः पद्मश्चापि महर्द्धिकः // mmk_40.140 //

कुलिकः शङ्खपालश्च कपिलश्चापि वर्णतः / महापद्मो ऽथ नागेन्द्रः पद्माभश्च लते सदा // mmk_40.141 //

वासुकिस्तक्षकश्चैव ईषित्किञ्जल्कवर्णतः / पद्माभौ सर्वतो ज्ञेयौ विचित्राकारभूषणौ // mmk_40.142 //

शङ्खश्चैव महानागो शुक्लाभो वर्णतः शुभौ / शङ्खपालो मणिर्नागः श्वेताभो ईषि वर्णतः / सागरश्च महानागः मुचिलिन्दश्चैव विश्रुतः // mmk_40.143 //

कृष्णनागो ऽथ सर्वत्र कृष्णवर्णाः प्रकीर्तिताः / सर्वे तुल्यप्रमाणास्तु नन्दोपनन्दो ऽथ सुर्च्छ्रितौ // mmk_40.144 //

एलपत्रो ऽथ नागेन्द्रो भोगवां लोकविश्रुतः / सागरो ह्युरगाध्यक्षः अचिन्त्याद्भुतचेष्टितः // mmk_40.145 //

करोति विविधां कर्मां शुक्लांश्चैव निबोधताम् / मृतकं विषसुप्तां वा सागरे नैव कारयेत् // mmk_40.146 //

वस्त्रेनावृत कृत्वा वै ध्यानयोगेन धीमता / आकृत्य सागरे स्थाने शीघ्रमुत्तिष्ठते मृतः // mmk_40.147 //

विषसुप्तस्य सदा नागो पादेनाक्रम्य चालयेत् / तं न्यसेत् सागरे स्थाने निर्विषो भवति तत्क्षणात् / एवं ज्वरपिशाचांश्च क्रव्यादां व्यन्तरां शुभाम् // mmk_40.148 //

रक्षसां प्रेतकूष्माण्डां पिशाचोरगमातराम् / ग्रहश्चैव सदा लोके परप्राणहरां नराम् // mmk_40.149 //

+ + + + + + + विचित्रा श्रममाश्रिता / मानुषिं तनुमाश्रित्य तिष्ठन्ते भुवि मानुषाम् // mmk_40.150 //

गृह्णन्ते बालिनां सत्त्वां तेषां ध्यानेनानेन चिन्तयेत् / सागरस्य तु नागेन्द्रा चिन्त्यादग्रतोत्थितम् / ध्यायीत मातरं सत्त्वं क्षिप्रं मुञ्चति बालिसम् // mmk_40.151 //

एवं दष्टमदष्टानां कीटलूतोत्थितां नृणाम् / दद्रुकिटिमकुष्ठानां पामाकण्डूविचर्चिकाम् / अन्यां चोत्थितां चैव नित्यं भगन्दररोहिताम् // mmk_40.152 //

प्लीहमेदोदरां चैव तथा पद्मं सुपद्मकम् / यक्षाणां सपद्मकं चैव तथा पद्मोत्तरं कृशम् // mmk_40.153 //

ज्वररोगगतां सर्वां बाध्यन्तां नृजबालिसाम् / सर्वां सागरे स्थाने सन्यसेत् पन्नगोत्तमे // mmk_40.154 //

विविधायासदुःखानां सर्वव्याधिगदर्त्तिनाम् / सन्यसेत् सागरे स्थाने ध्यानचिन्त्याहितेन वै / क्षिप्रं मोचयते नागः सुगताज्ञां प्रतीच्छकः // mmk_40.155 //

एवञ्चमुरगैः सर्वैः सर्वकर्मकरैः शिवैः / उरगाध्यक्षैस्तदा सर्वं व्याप्तमम्भोदतिर्यगम् // mmk_40.156 //

समन्तात् सर्वतो श्रेष्ठा उरगाध्यक्षा महर्द्धिकाः / समयज्ञा मञ्जुघोषस्य आज्ञे दीक्षणतत्पराः / दैवयक्षाश्रिता नित्यं मानुषाणां शुभोदयाः // mmk_40.157 //

व्यतिमिश्रैस्तु कर्मज्ञैर्व्यतिमिश्रफलोदया / काले वर्षधरा नित्यं धार्मिकां वृत्तिमाश्रिताम् // mmk_40.158 //

समन्तात् तोयधाराभिः + + + + + + + / सस्यौषध्ये तथा ब्रीह्यां निष्पन्ने फलति हैतुकम् // mmk_40.159 //

मेघरूपेण माश्लिष्टा पर्यटन्ति महीतले / महर्द्धिका महेशाख्या कल्पस्था महोदया / तेषां भोगवती नाम पुरी अम्भोदमाश्रिता // mmk_40.160 //

यदा धर्मपरा मर्त्त्या जम्बूद्वीपेषु सर्वतः / ततो तिष्ठन्ते महानागाः परिवाराश्च तेषु वै // mmk_40.161 //

तदा देवासुरे युद्धे अनुभूय जयैषिणः / जम्बूवृक्षगता तस्थुः जम्बूद्वीपं च मध्यतः // mmk_40.162 //

पुनः पुनर्नरां भेजे सर्वत्राप्रतिगोचराः / सर्वशुक्लगतां कर्मां तेषु नागेषु योजयेत् // mmk_40.163 //

कुर्वन्ति समये भ्रष्टा ये नागा जलमाश्रिता / कीटवोपद्रुतां सर्वां विषां स्थावरजङ्गमाम् / मुमुचुः सर्वतो नागा आसुरो पक्षमाश्रिताः // mmk_40.164 //

प्रमाथी झलुझलुश्चैव कपर्दी चापि महोदधिः / भीमो भीषणश्चैव दुर्मुखो बहुमुखस्तथा // mmk_40.165 //

एते चान्ये महानागा अतिदर्पाभिमानिनः / कृष्णकर्मे स्थिता नित्यं व्यतिमिश्रेण वा परे // mmk_40.166 //

महेशाख्या भीमरूपाश्च विषोग्रथिजनाजने / अधर्मिष्ठा यदा मर्त्त्या जम्बूद्वीपनिवासिनः // mmk_40.167 //

तदा महाभयं कुर्युर्विषमूर्च्छातिदारुणम् / छर्दिर्भ्रमिश्च जायेत महामार्योपद्रवां बहूम् // mmk_40.168 //

दुष्टशरीसृपां लोके विसृजन्त्यहितोदया / एवं ते च महानागा बहुप्रकारोपद्रवाशुभा // mmk_40.169 //

अनावृष्टि अनावृष्टिं विसृजन्त्यहिते रता / तेषां च दर्पनाशाय इदं ध्यानं समारभेत् // mmk_40.170 //

मञ्जुघोषं महाधीरं बोधिसत्त्वं महर्द्धिकम् / वामोत्पलकरं सव्यं दक्षिणेन वरप्रदम् / भिन्नगोरोचनाभासं हेमकुङ्कुमविद्विषम् // mmk_40.171 //

गरुडं पक्षिराजानं आरूढं सुगतात्मजम् / ध्यायीत मस्तके तेषां दंष्ट्रिणां सर्वविषोत्कटाम् // mmk_40.172 //

ततस्ते भिन्नहृदयाः त्रस्तोद्विग्नमानसाः / पुनर्निवर्त्त्य गच्छन्ते प्रविशन्ते च रुषालयम् // mmk_40.173 //

उत्पातां बहुविधां दृष्ट्वा अशुभांश्चैव सशब्दकाम् / एवं ध्यायीत मन्त्रज्ञ मञ्जुघोषं समाहितः // mmk_40.174 //

बहुप्रकारा मन्त्रज्ञ नागदंष्ट्रां प्रकल्पयेत् / अनेकाकाररूपास्तु अण्डजांश्च प्रदंशिनाम् // mmk_40.175 //

वक्ष्ये सम्यग्बुद्ध्या शास्त्रदृष्टेन कर्मणा / तद्गोत्रजश्च उरगा वै दशन्ते भुवि मानुषाम् // mmk_40.176 //

तेषां विधिदृष्टेन शास्त्रेणैव गरुत्मना / कुर्यात् सर्वाणि कर्माणि पक्षिराजेन देहिनाम् // mmk_40.177 //

कृष्णशुक्लादयो नागा ये नागा भुवि मण्डले / विचरन्ति महीं कृत्स्नां सूर्यरूपेण देहिनाम् // mmk_40.178 //

साध्यासाध्ये ततो ज्ञात्वा विषं च चतुरो हिताम् / पित्तश्लेष्मगतं चैव वायुव्यतिविमिश्रिताम् // mmk_40.179 //

श्लेष्मणा वारुणेत्याहुः शुक्लवर्णो ऽथ मण्डलः / पित्तमज्ञेयजं नाम तृकोणाकारसम्भवाम् // mmk_40.180 //

अग्निवर्ण सदा रक्तमीषद् बाहुभपिङ्गलम् / कुलस्थमिव बन्धान्तं चतुरस्रं व्यतिमिश्रितम् // mmk_40.181 //

माहेन्द्रमिति तं ज्ञेयं कृष्णवर्णं महोन्नतम् / श्लेष्माणां च गजेत्याहुः पित्तजं द्वेषसम्भवम् // mmk_40.182 //

मोहं वायुजं ज्ञेयं व्यतिमिश्रं कृष्णवर्णितम् / तदेव सात्त्विकं विन्द्याच्छेलष्मणं शुक्लवर्णितम् // mmk_40.183 //

राजतं पैत्तिकं ज्ञेयं पीतरक्तावभासितम् / तामसं वातिकं ज्ञेयं व्यतिमिश्रहितोत्वताम् // mmk_40.184 //

व्यन्तरेष्वपि सर्वेषु कीटविस्फोटकादिषु / सरीसृपेषु च सर्वत्र व्यतिमिश्रं लिङ्गमीक्षयेत् // mmk_40.185 //

कृष्णाभं तत्रमुद्यन्तं मञ्जुघोषं सुचिन्तयेत् / गरुत्मस्थं सुखासीनं बालरूपं सुखोदयम् / चिन्तयेद् व्यन्तरैर्दुष्टं मानुषेषादसन्धिषु // mmk_40.186 //

ततो ऽर्द्धं चिन्तयेद् दिव्यं कुमारं बालरूपिणम् / विश्वरूपं महात्मानं गरुत्मत्तोपरिस्थितम् // mmk_40.187 //

तदासीनं महाभागं शरत्काण्डाकारविद्विषम् / ऊसभ्यां चिन्तयेद् धीमान् नाभिस्यादध्योमगम् // mmk_40.188 //

पीताभं चिन्तयेद् ध्यायी उरःस्थाने सुसुप्तिगम् / मञ्जुघोषं महावीर्यं पक्षिराजाग्रवाहनम् // mmk_40.189 //

शिरःस्थाने तथाचिन्त्यः ध्यायीत गरुडध्वजम् / शुक्लाभं वैनतेयस्थं बहिस्थं चाथ चिन्तयेत् // mmk_40.190 //

सात्त्विके विषमूर्च्छा तु श्लेष्मं वमन्ति सर्वतः / लाला च स्रुवते ऽजस्रं निमज्जते च मुहुर्मुहुः / तं विद्यात् सात्त्विकं दष्टं शुक्लपक्षाहितो भवेत् // mmk_40.191 //

भ्रमते कम्पते चैव स्तब्धे क्षोभे सर्वेश्वरः / विषे च पित्तजे मूर्च्छा दाघो जायति दारुणाम् // mmk_40.192 //

राजसे दंष्ट्रिणे दष्ट्रो एतद् भवति चेष्टितम् / तामसे तमसं मोहः मूर्च्छा निद्रा च जायते // mmk_40.193 //

व्यतिमिश्रैर्व्यतिमिश्रं तु चेष्टा भवति दारुणम् / सत्त्वे भवति शुक्लाभः दंष्ट्रे भवति मानुषे // mmk_40.194 //

राजसी पीतवज्ज्ञेयः छविवर्णाश्च किञ्चन / कृष्णवर्णाथ मोहात्मा छविवर्णाथ जायते // mmk_40.195 //

व्यतिमिश्रे धूम्रवर्णस्तु आपाण्डुश्चापि क्वचित्तथा / सात्त्विको राजसश्चैव शुक्लपक्षाहिजोद्भवा // mmk_40.196 //

तामसो मिश्रिणश्चैव अहिजा कृष्णवर्णिनाम् / तत्कुलाकुलिनो ह्येते उरगाध्यक्षेश्वरो सु वे / आसुरं पक्षमाश्लिष्टा विचरन्ति महीतले // mmk_40.197 //

दंशतेषां मानुषां लोके अधर्मिष्ठा नागजातयः / क्रूराः क्रूरतरा लोके आहारार्थपरा सदा // mmk_40.198 //

केचिद् विहेठनार्थाय दंष्ट्रिणो प्राणहरा परे / विषनिर्नाशनार्थाय सर्वदंष्ट्रोपजीविनाम् // mmk_40.199 //

इदं ध्यानवरं मुख्यं यथालिङ्गानुवर्निनम् / सन्न्यसेत् प्राणिनां चिन्त्या क्षिप्रं मुञ्चति तद्विषम् // mmk_40.200 //

सर्वदा सर्वकालं तु सर्वव्याधिषु योजयेत् / सर्वोपद्रवां हन्ति ध्यानेष्वेव प्रतिष्ठिता // mmk_40.201 //

यथा नागा तथा सत्त्वा राक्षसा ग्रहमातरा / परप्राणहराश्चैव दुष्टचित्ताथ मानुषाः / सर्वव्याधिमता लोके लिङ्गेष्वेव तु योजयेत् // mmk_40.202 //

ध्यानं ध्येयं तथा मुक्तिं कर्मं चापि सदा न्यसेत् / कुमाररूपं माङ्गल्यं पवित्रमघनाशनम् // mmk_40.203 //

मञ्जुघोषं महावीरं जिनपुत्रं महर्द्धिकम् / सगरुत्मन्ते सुखासीनं उदयन्ते रविमण्डले // mmk_40.204 //

ध्यायीत सर्वतो मुख्यं मन्त्रनाथेश्वरं विभुम् / सर्वत्र चिन्तितो ध्यानसर्वव्याधिप्रनाशनः // mmk_40.205 //

सर्वकर्माणि कुर्वीत सर्वसत्त्वेषु सर्वदा / सर्वं स्तम्भयते ह्येष सर्वं शोभयते शुभम् // mmk_40.206 //

सर्वमन्त्राश्च लोकानां अस्मिन् ध्याने निबोधिता / सिद्धिं गच्छन्ति ते क्षिप्रं परकल्पे ऽपीहोदिता // mmk_40.207 //

ये च ताथागता मन्त्रा वज्राब्जकुलयोरपि / + + + + + शक्रेन्द्रब्रह्मरुद्रयोः // mmk_40.208 //

आदित्यवसवेन्द्राणां नक्षत्रग्रहज्योतिषाम् / गरुडोरगयक्षाणां ऋषिमुख्या सपूतनाम् / सर्वमन्त्राश्च सिद्ध्यन्ते अस्मिं कल्पे तु ध्यायिने // mmk_40.209 //

परतन्त्रविधाने ऽपि स्वतन्त्रेणाभ्यन्तरेण वा / कुर्यात् कर्मसिद्धिं च क्षिप्रं ध्यानगतेन वै / आदित्यमण्डले ध्यात्वा उदयन्ते विश्वरूपिणम् // mmk_40.210 //

कुमारं बालिशाकारं शिशुभूषणभूषितम् / आरूढमण्डले दीप्तं गरुत्मन्ते ऽथ वैनते // mmk_40.211 //

मीदृशाकारमव्यक्तं मूर्जे चापि सुचिन्तिते / दृष्ट्वा परबलस्तम्भं जायते च मनीषितम् // mmk_40.212 //

सर्वे च दष्टाः स्तभ्यन्ते नृत्यन्ते च परस्परम् / हसन्ते आतुराः सर्वे ग्रहाविष्टाश्च देहिनाम् // mmk_40.213 //

ज्वरार्ता मूर्च्छिता ये च उत्तिष्ठन्ते द्रुतं ततः / क्रन्दन्ते विविधा आर्ता भीमनादं करोति वै // mmk_40.214 //

ग्रहमातरकूष्माण्डैः गृहीतानां भुवि मानुषाम् / एभिर्लिङ्गैस्तदा मन्त्री लक्षयेदेतां समाहितः // mmk_40.215 //

इच्छया मोचयेत् क्षिप्रं विषसङ्क्रमणं तु वै / क्रीडापयति भूतानां तदा योगी रिरिंसया // mmk_40.216 //

आदित्यमण्डले नाडी प्रयोक्तव्या विषमूर्च्छिते / रविनाडीप्रयोगेण सर्वप्राणि स चालयेत् // mmk_40.217 //

निर्विषो भवते सुप्तः विषस्थावरजङ्गमः / ततोत्तिष्ठते क्षिप्रं विषसुप्तो न संशयः // mmk_40.218 //

अन्यश्च वर्द्धते क्षिप्रं विषार्त्तो भुवि भूतले / पुनरन्यो पुनश्चापि अन्यादन्यतरो ऽपि वा // mmk_40.219 //

एवम्प्रकारैः सर्वत्र शतशो ऽथ सहस्रः / यावन्नाडीप्रयोगेण तावद् भूतानि पाचयेत् // mmk_40.220 //

वस्त्रकुद्यस्तथा कुम्भे अस्मतोयहुताशने / क्षणेन चालयेन्नाडीं तत्रस्थं विषमाविषे // mmk_40.221 //

सर्वे ह्यातुराः स्वस्थास्तत्क्षणादेव भूतले / एवमाद्यप्रयोगेण कुर्यात् कर्म शताष्टकम् / असङ्ख्यं च विधिं कुर्यात् परमन्त्रासृतेन वा // mmk_40.222 //

एष प्रयोगः समासेन ध्यानो ह्युक्तो ऽथ जापिनाम् / प्रयोक्तव्यः कल्पनिखिलः परतन्त्रो गरुत्मनः // mmk_40.223 //

मतं सङ्कल्पजं प्रोक्तं शैवं चापि विशेषतः / सर्वे च लौकिका मन्त्रा प्रयोक्तव्या ध्यानविस्तरे // mmk_40.224 //

इह मञ्जुरवे कल्पे ध्यानेनैव विशेषतः / सर्वतन्त्रप्रयोगैश्च मन्त्रैश्चापि सुपूजिते / मतयो ये ऽपि कल्पार्थाः प्रयोक्तव्या इह ते सदा // mmk_40.225 //

योगे ऽस्मिन् ध्यानये दिव्ये कल्पराजोदिते इह / ध्यानेन सर्वे नियोक्तव्या युक्तिहेतुनिरञ्जने // mmk_40.226 //

सूक्ष्मश्चित्तविषये मन्त्रसिद्धिनिबन्धने / मुनिपुत्रोदिते शुद्धे सर्वबुद्धार्थमोदिते / जापिनो ध्यायते नित्यं सर्वसिद्धिसुपुष्कला // mmk_40.227 //

इति बोधिसत्त्वपिटकावतंसकान्महायानवैपुल्यसूत्राद् आर्यमञ्जुश्रियमूलकल्पाद् अष्टत्रिंशतिमः महाकल्पराजपटलविसराद् द्वितीयसर्वलोकतत्त्वार्थतारक्रीडाविधिसाधनोपयिकसर्वकर्मध्यानपटलनिदेशः परिवर्तः समाप्तः // अथ एकचत्वारिंशः पटलविसरः / अथ खलु भगवां शाक्यमुनिः, पुनरपि शुद्धावासभवनमवलोक्य, मञ्जुश्रियं कुमारभूतमामन्त्रयते स्म / अस्ति मञ्जुश्रीः! सर्वबुद्धानुमोदिते त्वदीयमहाकल्पराजमहाविसरे महामन्त्रचर्यानुवर्तके सर्वसमयानुप्रविष्टे महामूलकल्प्रप्रविष्टास्पदभूते पञ्चमसर्वभूतरुतज्ञानाभिज्ञानं सर्वभूतरुतज्ञानाचिन्त्यगोचरं एष ते पक्षिराट् गरुत्मा स्वमन्त्रचर्यानुवर्तनरुतज्ञानाभिज्ञानां सर्वमन्त्राणां सर्वमन्त्राणां सर्वकल्पानां स्वसमयमनुप्रविष्टसर्वलौकिकानाम् एष एव ते भाषिष्यति सर्वतिर्यग्योनिगतानां सर्वपक्षिराजगरुत्मनां सर्वमन्त्रकल्पगोचररुतज्ञानं च चरितं चेति //

अथ खलु तस्मात् पर्षन्मण्डलाद् वैनतेयो गरुत्मा बोधिसत्त्वाधिष्ठानेनानेकैर्गरुडशतसहस्रैः परिवृतः उत्थायासनात् पर्षन्मण्डलं प्रदक्षिणीकृत्य, येन मञ्जुश्रीः, तेनोपसङ्क्रम्य, महाबोधिसत्त्वस्य पादौ कृताञ्जलिपुटः, मञ्जुश्रियमेतदवोचत् - अहं महाबोधिसत्त्व अस्मिं महाकल्पराजे सत्त्वानामर्थाय हिताय सुखाय कर्मान्तरशतं सरहस्यं भाषिष्ये / तत् साधु महाबोधिसत्त्व अनुमोदतु / अथ मञ्जुश्रीर्वैनतेयमेतदवोचत् - भाष भाष महासत्त्व सत्त्वानुकम्पया /

अथ वैनतेयो बुद्धाधिष्ठानेन स्वकीये आसने निषद्य, प्रहृष्टमनसि कर्मोत्तरशतं सरहस्यं भाषति स्म /

नमः समन्तबुद्धानामप्रतिहतशासनानाम् / तद्यथा - ओम् शकुन महाशकुन विततपक्ष सर्वपन्नगनाशक खख खाहि खाहि समयमनुस्मर / हुम् तिष्ठ बोधिसत्त्वो ज्ञापयति स्वाहा / कर्मोत्तरशतं भाषते स्म /

नागाकर्षणं, नागदमनं, नागनिग्रहणं दष्टमदष्टावेशनं, वाचया सर्पमावाहानं, सर्पनिग्रहकरणं विषक्रीडनं, सर्वविषक्रामणं, वाचा मनसा बुद्ध्या वा, पोषधिको त्रिरात्रोषितः, शुक्लद्वादश्यां नदीतीरे शुचौ देशे पञ्चरङ्गिकसूत्रेणाष्टहस्तं मण्डलकं कृत्वा, अष्टपद्मप्रतिष्ठितं, तत्र मध्ये भगवां धर्मं देशयमानः लिखेत् / तस्य दक्षिणेनार्यमञ्जुश्रियं कृताञ्जलिपुटो भगवतो मुखमवलोकयमानं लिखेत् / भगवतो बुद्धस्य वामे नारायणं चतुर्भुजं लिखेत् सर्वप्रहरणहस्तम् / तत्समीपे गरुडं विकृतरूपम् / तदनन्तरं विनताभरणं च लिखेत् / आर्यमञ्जुश्रियस्य पृष्ठतः आर्याक्षयमतिं सुधनं सुभूतिं च लिखेत् कृताञ्जलिपुटा / एवमभ्यन्तरमण्डले लेख्य, पूर्वद्वारे बाह्यतः शुल्कभस्मना वज्रं समालिखेत् दक्षिणेन कृष्णवर्णिकया खड्गम् उत्तरेण पीतवर्णिकया गदं लिखेत् / पश्चिमेन रक्तवर्णं पाशं समालिखेत् //

एवं बाह्यमण्डलेभ्यः मूलमन्त्रेण सर्वदेवाह्वाननं कृत्वा, सर्वपुष्पैः सर्वगन्धैरभ्यर्च्य, गुगुऌउधूपं, त्रिमधूरेण च बलिं दत्त्वा, तेषामग्रतः खदिरसमिद्भिरग्निमुपसमाधाय, सर्वसत्त्वेभ्यः कारुण्यचितमुपस्थाप्य, नागासनोपविष्टः सर्पकण्टकानां दधिमधुघृताक्तानामष्टसहस्रं जुहुयात् / ततः सिद्धिनिमित्तं सर्पा आगच्छन्ति / अर्घ्यो देयः / एवं सिद्धिर्भवति / (वैद्य 358) स्वमन्त्रमावर्त्य वदेत् - मम सिद्धिं विधाय गच्छत / ततो गच्छन्ति / ततो विसर्ज्य मूलमन्त्रेणैव समभ्युक्षयेत् / ततः कर्मं समारभेत् / सर्वं च बलिद्रव्यमप्सु क्षिपेत् / पश्चाद् वाचामात्रेण सर्वविषकर्माणि करोति //

विद्वेषणं कर्तुकामः सर्पास्थीनि विषाक्तामेकविंशत्याहुतिं जुहुयात् / विद्वेषो भवति //

उत्सादयितुकामः सर्पनिर्मोकखण्डानामेकविंशत्याहुतिं जुहुयादुत्सद्यति / काकपक्षाणामेकविंशत्याहुतिं जुहुयात् सद्यः काकवद् भ्रमति / स्त्रीपुरुषवशीकरणे सर्षपाणां घृताक्तानामेकविंशत्याहुतिं जुहुयाद् वश्या भवन्ति / राजानं राजमात्रं वशीकरणे परमान्नस्य घृताक्तस्य एकविंशत्याहुति जुहुयाद् वशो भवति / लोष्टकमभिमन्त्र्य, अग्नौ प्रक्षिपेत् न तपति / तृणेन मोक्षः / उक्तेन मत्स्या न बध्यन्ति / चेतनमचेतनं वा सत्त्वं छोटिकया आकर्षयति / सर्वव्याधिने उदकाभिषेचनेन स्वस्थो भवति / दण्डमभिमन्त्र्य द्वारमाहरेत्, अपावृतं भवति / तमेव दण्डं नीलपटप्रावृतं गृह्य सङ्ग्रामे गच्छेत्, परसैन्यं दर्शनाद् भिद्यति / स्वशाटके ग्रन्थिबन्धनेन सर्वमन्त्राः स्तम्भिता भवन्ति / मुक्ते मोक्षः / सर्पवदनं भस्मना पूरयेत् / यस्य नामं गृह्य करोति, स मूको भवति / गण्डविषं सकृज्जप्तेन उदकेन हनेत् / गण्डं सङ्कुचति / पतति च परविद्या / अनेन बध्नीत / तथैव मोक्षयति / इष्टकमभिमन्त्र्य मावर्त्त्य जपेत् / परबद्धग्रन्थिं स्तोभयति / एवं वर्षापयितुकामः पूर्वोक्तं मण्डलकं लेख्य, पूजां कृत्वा, अग्निमुपसमाधाय, वरुणसमिधानामष्टसहस्रं जुहुयात्; आढकं वर्षति / एवं यावद्दशाढकं वर्षति / पिप्पलामभिमन्त्र्य हस्तेन गृह्य, यावद्दिशं क्षिपति; तत्र अशनं सङ्क्रामति / अग्निदाहेप्येष एव विधिः / उदकमवतरणमेवं कर्तव्यम् / नागानुत्सारयति / मृन्मयं सर्पं कृत्वा यमिच्छति तं दशापयति / अङ्गारसर्पस्य एष एव विधिः / पुनरपि मोक्षयति / सर्षपान् सप्तजप्तान् चतुर्दिशं क्षिपेत् / सर्पा आगच्छन्ति /

मण्डलबन्धः कार्यः / पानीयेनाभ्युक्ष्य विसर्जयेत् / उदकेन मोक्षणं लेष्टुना नागाकार्षणं पांसु परिजप्य उदके क्षिपेत्; निर्विष भवन्ति / धनुं गृह्य अलोहाश्चत्वारः शराः चतुर्दिशं क्षेप्तव्या / सर्पं शरचलितं गृह्य आगच्छन्ति / स च नागो वक्तव्यः / विषं प्रतिपिबेति / पिबति दष्टकोत्तिष्ठति / अथ सर्पाणि शल्लयितुं पानीये पानीयेनाभ्युक्ष्य तस्य तस्य शराः पतन्ति / सर्पश्चाक्षतो भवति / वल्मीकमृत्तिकया चत्त्वारो नकुला कर्तव्या / पानीयमभिमन्त्र्याभ्युक्षयेद्ः; गत्वा सर्पापहाया गच्छन्ति / आगता वक्तव्याः - विषं प्रतिपिबस्वेति / पिबन्ति मृतक उत्तिष्ठति / अङ्गारमभिमन्त्र्य, रेखां कृत्वा, अर्कलतया ताडयेत्; ततः सर्पो वध्यैराकृष्यमाणो आगच्छति / विषं प्रतिपिबेति पिबति / दष्टको निर्विषो भवति / ध्वजं छत्रं वाभिमन्त्रयेत् / यावन्तो मृतकाः विषपीतकाश्च सर्वे निरीक्ष्य निर्विषा भवन्ति वादित्रमभिमन्त्र्य वादयेत् / श्रुत्वा निर्विषा भवन्ति / पांसुना पञ्चरङ्गिकेण मण्डलमालिख्य तालशब्दं दातव्यम् / ततो नागाः सर्पाश्चतुर्दिशमागच्छन्ति / ते मण्डलं प्रविशन्ति / न भेतव्यम् / शिखाबन्धमात्मरक्षां च कारयेत् / अक्षिण्यभिमन्त्र्य क्रुद्धौ निरीक्ष्य वामाङ्गुष्ठं निपीडयेत् / तत्क्षणादेव पतति / सर्प (वैद्य 359) इव रूपेण कुरुते / मुक्ते मोक्षः / एवं वाचया दष्टमदष्टं वा वेशयति मोक्षयति / विष्णुनिर्माल्यमभिमन्त्र्य यत्र रथ्यायां गृहे वा क्षिपति, तत्क्षणादेव सर्पो मानुषं दशति / पानीयेनाभ्युक्षिता निर्विषा भवन्ति / हस्तोत्क्षेपेण षण्मासिकमुपस्तोभम् / आत्मान अभिमन्त्र्य सर्पैर्यथेष्टं दंशापयेत् / विषो ऽस्य न क्रमते /

कटककेयूरकुण्डलैरात्मान रलङ्करोति / पांसुमभिमन्त्र्य कर्णे जपेत् / उदकेनापि व्यजनेनापि मनसा सिद्धिर्मन्त्रमावर्त्य भूमौ पांसुं दद्यात् / मृतक उत्तिष्ठति / महामांस घृतेन सह धूपः पुष्टिकरणम् / मानुषास्थिचूर्णं काकोलूकपक्षाणि च धूपः मारणम् / मदनं तुषबीजानि उत्सादनो धूपः / सर्षपराजिकाधूपं ज्वरकरणं, कोद्रवबिडालविष्ठं विद्वेषणं, कपालचूर्णमधूकचूर्णं चैकतः कृत्वा मधुना सह धूपः उत्सादने / मोरङ्गी एरण्डनालं उत्सादने धूपः / गोपित्तं मानुषास्थि च घृतेन शत्रोर्मारणे धूपः /

मत्स्याण्डं प्रसन्ना च कर्पासास्थिसमन्वितम् / देशान्तरगतस्य धूपः शीघ्रमानयति नरम् // mmk_41.1 //

विदलानि मसूराणां मांसं कुक्कुटाण्डस्य तु / एष प्रविशतस्य धूपो देयः अकार्षणमतः परम् // mmk_41.2 //

भल्लातकस्य वीजानि तिलतैलेन योजयेत् / एषाकर्षणधूपः दद्यादाकर्षणस्य // mmk_41.3 //

घृतगुग्गुलुं दद्यात् / धूपो रोगनाशनम् / तिलसर्षपैर्धूपं दत्वा तान्येव जुहुयात् / सप्तरात्रं त्रिसन्ध्यं यस्य नाम्ना वशः / लवणं राजिकाहुतिमष्टसहस्रं जुहुयात् त्रिसन्ध्यं सप्तरात्रम् / महापुरुषवशीकरणम् / कपालचूर्णं सहस्राभिमन्त्रितं कृत्वा यमिच्छति तं चूर्णेन संस्पृश्य वशमानयति / श्मशानभस्मसहितेन यं चूर्णयति तं ज्वरेण गृह्णापयति मोक्षयति / नकुलरोमाणि सर्षपाणि च सर्पनिर्मोकं यस्य नाम्ना धूपो दहति स सर्वलोकविद्विष्टो भवति / तिलैर्वशीकरणं, अर्थोत्पादनानि च कुरुते / तिलतण्डुलैर्घृताक्तैर्नारी वशमानयति / यवतिमण्डूकवसां नागस्थाने त्रिरात्रं जुहुयात् / देवां वर्षापयति / मृण्मयं गरुडं कृत्वा करसम्पुटेन गृह्य अंसमात्रमुदकमवतीर्य अर्द्धरात्रं जपेत्, यस्य नाम्ना स वशो भवति / श्मशाने तण्डुनां प्रकीर्य देवहृदयं स्थाप्य प्रहरणं जपेत् वृत्तिं कल्पयति, सपरिवारस्य / नकुलमूषकरोमाणि कर्पासास्थिधूपः सर्वभूतवशङ्करः / विषं भल्लातकं मधुना सहधूपः वशीकरणम् / कुक्कुटाण्डकपालानि कटुतैलेन सह धूपं वशीकरणम् / पलाशं सुरसबीजामि मदनपुष्पाणि धूपो वशीकरणे / शतपुष्पा देवदारुं पुरीषं मण्डूकं चटकस्य धूपो वश्यार्थः / यवास्तिला दूर्वा च गोमूत्रेण धूपो वशीकरणे / हरितालं काकजिह्वा च शोणितेन धूपः मूकीकरणे / मानुषरोमाणि गोमांसेनैकतस्तैलेन संयुक्तो धूपो रोगकरणे / काकपक्षोलूकपक्षाणि च निम्बतैलेन उच्चाटने / गुग्गुलुघृतं सीधुसहितं धूपो ऽयं सर्वसत्त्वप्रियङ्करः / पत्रकं त्वचं तुरुष्के धूपं सर्वसत्त्वानुबन्धकरम् / आज्ञाकरो भवति /

तुरुष्कं (वैद्य 360) चन्दनं कर्पूरेण सह अञ्जनं राजवशीकरणम् / पूजाबलिविधानं कृत्वा विष्णुप्रतिमाया अग्रतः उपरिष्टान्महामांसाहुतीनष्टौ हुत्वाष्टसहस्रं जपेत् त्रिरात्रम्, द्रव्यं यमिच्छति / श्मशानभस्मना प्रतिकृतिं कृत्वा महामांसधूपं दत्त्वा कुशविण्डकोपविष्टः अष्टसहस्रं जपेत् रात्रौ श्मशाने, यमिच्छति तमानयति / आज्ञां करोति / उच्चाटने कर्पासातुषां जुहुयात् काकपक्षैः क्षणादुच्चाटनो भवति / श्मशान उदुम्बरसमिधाभिरग्निं प्रज्वाल्य कपालोपविष्टः सर्पकञ्चुकं जुहुयात् / अन्नमक्षयं भवति / श्मशानास्थिचूर्णं सर्षपसहितमष्टसहस्रं जुहुयात् यस्य नाम्ना, स योजनशतादागच्छति / सर्वकामेषु कर्तव्यः / देवो श्वेतचन्दनेन विततपक्ष सर्वनागाभरणं तीक्ष्णघोरं विकृताननं विकृतनखं पद्मोपविष्टं अधोदत्तदृष्टिं निम्नतरं काष्ठे कुट्ये भित्तौ वा पोषधिकेन कर्मकारेण कारापयेत् / वितस्तिमात्रं कृत्वा तस्याग्रतः सर्वकर्माणि कुर्यात् / पलाशे पुष्टिकामेन, बैल्वं वश्यार्थहेतुना, उदुम्बरं च पुत्रकामाय, गोकामः शिरीषमयं मधुकं वा द्रव्यकामः कारयेद् विधिवत् / सूकरमांसेन फलकामम् / अश्वमांसेनापत्यं भवति / कृष्णसारमांसेन श्रियार्थी, पृथुतमानुकीर्तिकामो वा स्त्रीकामः पृथिवीकामो वा, व्याघ्रमांसं व्यवहारदिविजयार्थी महामांसम् वस्त्रार्थी हस्तिबला राजवशिकरणे अतिबला राजामात्यवशीकरणे अश्वगन्धां जुहुयात् / उत्सादे हस्तिरोमाणि, पिचुमर्दमभिचारे तु एते काष्ठा प्रोक्ताः //

पटकरणं भवति / धातुसौवर्ण पौष्टिके प्रक्तिः / रजतादीं कीर्तिवृद्धये / काकपक्षहोमेनोत्सादयति / गृध्रपक्षैर्मारयति / कौशिकपक्षैर्विद्वेषयति / मयूरपक्षैर्विद्वेषयति / मयूरपक्षैर्धनानि दद्यात् / तित्तिरिपक्षैः स्त्रीं मगुलिपक्षैः पुत्रां, काकपक्षैः सुवर्णम्, टिट्टिभिपक्षैर्मोहनम् / श्वमांसेनोत्सादयति, महिषमांसेनाकर्षयति, आभिचारुके महामांसेन, शान्तिके मृगरोमाणि कन्यार्थी उलूकरोमाणि देशघातेच्छा गलरोमाणि विद्वेषणे मानुषरोमाणि आभिचारुके मानुष्यरोमाणि शत्रुनाशने सर्वेष्वेव तेषु त्रिसन्ध्यं सप्ताहिको होमः / स्मरणमात्रेणाहं सर्वविषकर्माणि करोमि / सततजपेन सर्वकर्माणि करोमि / यो मम भगवं अस्मिं कल्पराजे मन्त्रं साधयमानः त्रिसन्ध्यमुदीरयिष्यति, तस्याहं सर्वविषोपद्रवचिकित्सां करिष्यामि / पृष्ठतो ऽनुबद्धो भविष्यामि //

अथ तस्मिन् समये स्वरूपमुद्रां भावयति स्म / अङ्गुष्ठौ परस्परवेष्टितौ कृत्वा शेषाङ्गुल्यो पक्षवत् संस्थिता स्याद् / गरुडरूपमेव मम प्रोक्तं पिनाकिना मुद्रा //

अस्य सन्दर्शनान्नागा विद्रवन्ति भयार्दिता / अघोमुखास्तु अङ्गुल्यः मन्त्रेणानेन मन्त्रवित् // mmk_41.4 //

ओम् जः //

नागदमनीति विख्याता नागानां दर्पनाशनी / पद्मकोशप्रतीकाशौ अङ्गुल्यः पार्श्वतः स्थितौ // mmk_41.5 //

अङ्गुष्ठौ मध्यतः स्थाप्य निष्पीड्याङ्गुल्यं तु यत्नतः / नागदमनीति विख्याता दिव्या दिव्येषु कर्मसु // mmk_41.6 //

अनामिका तर्जनी चैव मध्यमेन सुसंस्थितम् / अङ्गुष्ठौ वक्त्रसंस्थानं शेषा पार्श्वतः स्थिताः // mmk_41.7 //

गरुडनादेति विख्याता सर्वनागानुत्रासिनी / यानि च मयोक्तानि सर्वमन्त्रेषु साधने // mmk_41.8 //

लौकिके गारुडे शास्त्रे + + + + + + + / सर्वे ते ऽनेनैव कर्तव्या सर्वसत्त्वानुकम्पया // mmk_41.9 //

किञ्चित्कार्या अशेषास्तु मूलकल्पार्थसाधका / अस्मिं कल्पवरे नित्यं सर्वसत्त्वानुवर्णिते // mmk_41.10 //

प्रसिद्धाः सर्वकर्मार्थाः सर्वसत्त्वार्थपुष्कलाः / ते वै मन्त्रमुख्ये तु प्रयोक्तव्याः कर्मविस्तरे // mmk_41.11 //

इह कल्पवरे मूले प्रतिष्ठा क्ष्मातलेन ते / समुषत्सर्वभूतानामिह मन्त्रसृतैर्गुणैः // mmk_41.12 //

विस्तरेज्ञः सर्वतो दृष्ट्या सर्वसत्त्वानुकम्पने / प्रसिद्धं सिद्धिकामानां हेतुयुक्तिसमाश्रिताम् // mmk_41.13 //

कुर्युः सर्वतः सिद्धिः सर्वमन्त्रेषु देहिनाम् / सर्वसत्त्वाश्च सान्निध्यं कल्पेषु मनसेप्सितम् // mmk_41.14 //

इतिहासपुरावृत्तं वर्तमानमनागतम् / कथयन्त्येष संयोगान्मन्त्रमुद्रसमीरणात् // mmk_41.15 //

आकृष्टा एष भूतानां मन्त्रो ऽयमपराजितः / ईशानः सर्वभूतानां रुद्रो ऽयं सुरपूजितः // mmk_41.16 //

तम्बको त्र्यक्षराज्ञेयो कल्पस्थो ऽथ महीतले / हिमाद्रिनिलयो नित्यं उमापतिमहेश्वरः // mmk_41.17 //

तृशूली खड्गधृग् ज्ञेयः पिनाकी वृषभध्वजः / गणाध्यक्षः शूलिनश्चैव महेशाख्यो ऽथ महर्द्धिकः // mmk_41.18 //

अक्षरो ऽक्षरमित्याहुः कपर्दी तु गदायुधः / एष मन्त्रो महार्थस्तु सर्वभूतार्थकम्पकः / कुर्यात् सर्वाणि कर्माणि सर्वकर्मेषु साधनम् // mmk_41.19 //

एष देवो महात्मा वै महादेवेति कीर्त्यते / प्रसिद्धः सर्वकर्मार्थे फलहेतुसदाप्रदे / तस्य मन्त्रं प्रवक्ष्यामि शृणुध्वं भूतिकांक्षिणः // mmk_41.20 //

ओम् स्थः नमः सर्वबुद्धानामप्रतिहतशासनानाम् / त्रैलोक्यगुरूणामचिन्त्याद्भुतरूपिणाम् / शिवोद्भवोद्भव भुवनत्रयपूजिताय हूं हूं फट् फट् //

एष मन्त्रो महामन्त्रः सर्वशत्रुभयप्रदः / आयुषत् सर्वभूतानां कर्म शान्तिकपौष्टिके / सर्वेष्वेव हि कर्मेषु प्रयोक्तव्यो मनसोद्भवै // mmk_41.21 //

सर्वभूतरुतज्ञानं अभिज्ञज्ञानचेष्टितम् / अभिज्ञवशिता चैवं सर्वशास्त्रज्ञतां समम् / प्राप्नुयात् पुष्कलां चार्थां फलहेतुसमुद्भवाम् // mmk_41.22 //

यावन्त्यो लौकिका मन्त्रा सर्वाश्च सुपुष्कला / तां सर्वां प्राप्नुयान्मन्त्री सिद्धमन्त्रस्तु बुद्धिमां // mmk_41.23 //

यावन्तो लौकिका मन्त्रा शैवाश्चापि सुपूजिता / मन्त्रा गुरुत्मने चापि सिद्धिहोमफलोन्मुखम् // mmk_41.24 //

सर्वलौकिकमन्त्रास्तु इन्द्ररुद्रोद्भवोद्भवा / ते स्युर्मन्त्रराट् सर्वे निबद्धा विधिहेतुतः // mmk_41.25 //

याम्याग्निवायुतोयानां कुबेरो मातरो दया / सङ्ख्या द्वादशका ह्येषा ब्रह्मेशानपूरकाः / सवितुः शक्रदेवानां पितामहसुपूजका // mmk_41.26 //

कामधात्वेश्वरा ख्याता ये मन्त्रामरचारिणाम् / सर्वे ते वशमायान्ति मन्त्रे नामीरिताधिप // mmk_41.27 //

+ + + स्वयाम्यदग्निनां दिवौकसजलौकसाम् / दिङ्मन्दिराश्रया ये च विदिक्षु श्चापि चारिणः // mmk_41.28 //

तदोर्ध्वं नभस्तले चापि अधः पातालधामकाः / पथोश्रयसमापन्ना फणिनो ये महर्द्धिका // mmk_41.29 //

हिमाद्रिकुक्षिसंविष्टा विन्ध्यकुक्षौ समाश्रिता / महाधातुवरे चित्रे महाशैले ऽथ विश्रुते // mmk_41.30 //

नानादेवगणाकीर्णे सिद्धचारणसेविते / अप्सरोगणसङ्गीते सुमेरो रविरिवोज्ज्वले // mmk_41.31 //

यत्रस्था ये ऽत्र नागा वै ये तु भूतगणाश्रया / विचित्ररूपिणो ये वा ततः स्था ये समागता / सर्वे ते वशमायान्ति मन्त्रेणानेन योजिता // mmk_41.32 //

ये च दिव्यगणा मन्त्रा सर्वभूतभयप्रदा / सर्वे ते वशमायान्ति मन्त्रेणानेन योजिता // mmk_41.33 //

गिरिगह्वरदुर्गेषु विचित्रैः कन्दरोदरैः / मन्दिरैर्हेमसङ्काशैर्निवसन्ति महीतले // mmk_41.34 //

सर्वभूतगणाध्यक्षा विविधा हारिणो जनाः / + + + + + + + + निवासेष्वभिकीर्तितैः // mmk_41.35 //

दिव्यभूतगणाध्यक्षा विचित्राश्चैव रूपिणः / सर्वभूतगणाश्चैव विचरन्ति महीतले // mmk_41.36 //

विविधाकारमुख्यास्तु विचित्रा रूपगताश्रया / विविधाकारविचारस्थौ विविधाम्बरभूषणा // mmk_41.37 //

ते सर्वे मन्त्रमुख्येन पथेवारपश्यता / अनेता सर्वमन्त्राणां लौकिकानां महर्द्धिकाम् // mmk_41.38 //

सर्वभूतवशं कर्ता प्रभ्रमन्तेश्वरो वरः / सर्वमन्त्रेश्वरां मुख्यां यमरुद्रेन्द्रवासवाम् // mmk_41.39 //

मन्त्रनाथो ऽथ मुख्यस्तु सर्वलौकिकमग्रजी / विभर्ति सर्वतो मन्त्रां कल्पांश्चैव सुपुष्कलाम् // mmk_41.40 //

एष मन्त्रेश्वरो देव अधिपतिः सर्वमन्त्रराट् / सर्वविघ्नेश्वरो मन्त्री स्मर्तव्यः सर्वजापिभिः / उग्रमुग्रे ऽथ मन्त्राणां प्रभुरेव प्रगीयते // mmk_41.41 //

सर्वस्मिं शैवतन्त्रे वै सर्वलौकिकचेष्टितैः / चरितं चापि भूतानां रुतं चापि जपेत् सदा / मन्त्रिभिः सर्वकालं वै प्रयोक्तव्यः सिद्धिकांक्षिभिः // mmk_41.42 //

वैनतेयस्तदा पक्षी प्रणम्य जिनवरात्मजाम् / मञ्जुश्रियं तथा नित्यं सर्वां बुद्धसुतान् तथा / उवाच मधुरां वाणीं पक्षिराट् स महाबलः // mmk_41.43 //

भाष भाष महासत्त्व गम्भीरार्थसुनिश्चित / धर्मनैरात्म्यतत्त्वस्य अग्रधर्मप्रतिष्ठित // mmk_41.44 //

मयोक्तं कल्पविस्तारं मूल्यमन्त्रार्थगोचरम् / अभिसंक्षेपतो ज्ञेयं सर्वमन्त्रेष्वराधिकम् // mmk_41.45 //

लौकिकेष्वेव मन्त्रेषु प्रयोज्यः सर्वसाधने / नाभ्यन्तरपदं मन्त्रं मयोक्तं यं प्रशस्यते // mmk_41.46 //

जिनपुत्रैस्तु महावीरैः सर्वश्रावकखड्गिभिः / नान्योत्कृष्टतमं मन्त्रं मयि बुद्धिः प्रयुज्यते // mmk_41.47 //

ईषिस्मितमुखो धीर मञ्जुघोषमथाब्रवीत् / अथाह मधुरं वाक्यं शब्दार्थास्पदभूषणम् // mmk_41.48 //

एष ते सुवर्णमाख्यातः धर्मस्वामी नरोत्तमः / विसृक्षुः सर्वमन्त्राणां धर्मनैरात्म्यदेशकः // mmk_41.49 //

जगद्गुरुर्महावाईरो बुद्ध आदित्यबान्धवः / प्रणेता सर्वमन्त्राणामग्रमन्त्रेश्वरो वरः // mmk_41.50 //

प्रभुरेकमनार्थो धर्मधात्वीश्वरो गुरुः / सर्वसत्त्वानुकम्पार्थ अस्माकं च सुखोदयः // mmk_41.51 //

धर्मकोटिगतो निष्ठो भूतकोटिमनालयः / एष ते सर्वमन्त्राणां कथयन्त्याशु महाद्युतिः // mmk_41.52 //

बोधिसत्त्वपिटकावतंसकान् महायानवैपुल्यसूत्राद् आर्यमञ्जुश्रियमूलकल्पाद् एकूनचत्वारिंशतिमो गरुडपटलपरिवर्तः / अथ द्विचत्वारिंशः पटलविसरः / अथ खलु भगवां शाक्यमुनिः पुनरपि शुद्धावासभवनमवलोक्य, मञ्जुश्रियं कुमारभूतमामन्त्रये स्म / अस्ति मञ्जुश्रीः त्वदीयसर्वसाधनोपयिकमण्डलविधाने सर्वमन्त्रतन्त्रेषु मुद्रापटलसमयरहस्यम् यैः सर्वसन्त्रासमयं नातिक्रमन्ति, समयसञ्चोदितमनुप्रविष्टा भवन्ति सर्वलौकिकलोकोत्तरमण्डलेषु सामान्यसाधनोपयिकसर्वमन्त्रतन्त्रेषु सर्वे सुदह्येते परमरहस्यतमा परमसौभाग्यतमा परमाश्चर्याद्भुततमाः / यैर्विना न शक्यन्ते सर्वमन्त्रा आराधयितुं साधयितुम् / पूर्वं सर्वतथागतैर्भाषितवन्तः / एतर्हि अहं च भाषिष्ये सर्वसत्त्वानामर्थाय हिताय सुखाय लोकानुकम्पायै महतो जनकायस्यार्थाय सर्वमन्त्रजापिनां महामन्त्रको शनित्यौत्सुक्यधर्मधात्वचिन्त्यमहायाननैरात्म्यधर्ममेघमनुप्रवेशनतायै कतमं च तत् भाषिष्ये ऽहम् //

शृणु मञ्जुरव सर्वगुह्यमुद्रासमोदिताम् / यथा तथा स्वयं वाच्यं पुरा गीतमृषिसत्तमैः // mmk_42.1 //

कृत्स्नमुद्रागणं ह्यग्रं गुह्यमन्त्रार्थिनां सदा / सर्वकालेषु योज्येदं सर्वकर्मेषु मण्डले // mmk_42.2 //

अथ मञ्जुरवः श्रीमां विहसन् पङ्कजेक्षणः / निरीक्ष सुगतं श्रेष्ठं सर्वधर्मीश्वरं प्रभुम् // mmk_42.3 //

कृताञ्जलिपुटो वीरः जिनपुत्रो महर्द्धिकः / उवाच मधुरां वाणीं दिव्यशब्दार्थभूषिताम् // mmk_42.4 //

साधु साधु महाप्राज्ञ धर्मचक्रानुबर्तकम् / धर्मतत्त्वार्थमन्त्रत्वं यस्त्वं भाषयसे विभोः // mmk_42.5 //

एवमुक्त्वा तु सुगतं शाक्यसिंहं नरोत्तमम् / अथ मञ्जुरवः श्रीमां तूष्णीं तस्थुस्तदन्तरे // mmk_42.6 //

इत्याह भगवां बुद्धो धर्मधात्वेश्वरस्तदा / शृणोथ भूतगणाः सर्वैः देवसङ्घा महर्द्धिका // mmk_42.7 //

मण्डले भुवि मर्त्यानां दरिद्रा वाथ दुःखिताम् / आलिखन्तानां भुवि मुद्राणां सान्निध्यं वो भविष्यथ // mmk_42.8 //

ये च वै सर्वबुद्धानां प्रत्येकार्हथखड्गिणाम् / श्रावकानां तु ये मुद्राः कथिता मुनिवरैः // mmk_42.9 //

सर्वलौकिकमुद्रास्तु जिनाब्जकुलवज्रिण / सर्वमुद्रास्तु सर्वत्र सर्वकर्मेषु योजिता / तानहमभिसंक्षेपाद् वक्ष्ये ऽहं सर्वमन्त्रिणाम् // mmk_42.10 //

यत् पूर्वं कथितं मन्त्रं सर्वं मण्डले च कर्मसु / स्थानं होमो जपः कर्म तं तथैव प्रयोजयेत् // mmk_42.11 //

मण्डले आदितो लेख्य मुद्रो ऽयं बुद्धनिर्मितः / सितं छत्रो ऽथ बुद्धानां समन्तज्वालो ऽथ भूषणम् // mmk_42.12 //

पञ्चरङ्गिकचूर्णैस्तु समन्तान्मणिराजितम् / विचित्ररङ्गोज्ज्वलं श्रेष्ठं इन्द्रायुधसमप्रभम् // mmk_42.13 //

एष मुद्रो महामुद्रो बुद्धानां मूर्द्धजो वरः / तस्य दक्षिणतः पात्रं समन्ताज्ज्योतिमालिनम् // mmk_42.14 //

तदनन्तरे खखवरकः दंष्ट्रा जीबरजो पर / श्रीवत्सस्वस्तिकश्चक्रकरकं चापि वर्णितम् // mmk_42.15 //

पुस्तको ध्वजमित्याहुः पताकं च तदन्तरे / घण्टा पश्चिमजो मुद्रः कथितं लोकपुङ्गवैः // mmk_42.16 //

छत्रे वामतः पद्मं मणिमुद्रो तदन्तरे / तदन्तरे वज्रमित्याहुस्त्रिसूच्याकारसम्भवम् // mmk_42.17 //

उत्पलं तु गतामुद्रः सलिलः सलिलाश्रितः / तोयश्च तदन्त्ये वै तोयधाराभिनिःश्रितः // mmk_42.18 //

तदन्ते कुण्डलौ ज्ञेयौ भूषालौ शोभनौ तथा / तदन्ते ऽथ महाशैलः चतुरत्नो ऽथ उज्ज्वलः // mmk_42.19 //

तदन्ते महोदधिर्लेख्यः विचित्रो रङ्गोज्ज्वलः / तदन्ते ऽथ महावृक्षः सफलो दलभूषितः // mmk_42.20 //

एष बृक्षो महामुद्रो वामपार्श्व जान्तजाम् / सितातपत्रो ऽथ बुद्धानां मुद्रोह्युक्तो वरोग्रजः // mmk_42.21 //

मन्त्रे ऽथ खड्गिनां ज्ञेयः प्रत्येकजिनयो वरः / चीवरं मुद्रवरो ह्युक्तः सर्वश्रावकसम्भवः // mmk_42.22 //

आर्याणामर्हतां लोके दंष्ट्रा चैव प्रगीयते / तत्फलोदधिगतां लोके श्रीवत्सो मुद्रमिष्यते // mmk_42.23 //

खखरकश्च महामुद्रः पत्येकजिनजो ऽपरः / धर्मचक्रो ऽथ मुद्रो वै सर्वदृष्टिविदालकः / कथितं धर्ममुद्रं तु कारकाक्षेपजः स्मृतः // mmk_42.24 //

प्रज्ञापारमितां लोके जिनधातुर्मुद्रो ऽथ पुस्तकः / ध्वजपताका महामुद्रौ विघुष्टौ लोकपूजितौ // mmk_42.25 //

सर्वाकृष्टौ महावीर्यौ सर्वमुष्णीषसम्भवौ / घण्टापश्चिमो मुद्रः प्रत्येकार्हमूर्धजः // mmk_42.26 //

बुद्धमुद्रे तु वामे वै पद्मो लोकेशसम्भवः / मुनिमुद्रस्तथा ज्ञेयः समन्तज्योतिलाभिने // mmk_42.27 //

वज्रं वज्रिणेमुद्रा बोधिसत्त्वस्य धीमतः / उत्पलं मञ्जुघोषस्य कुण्डलः क्षितिगर्भिण्ये // mmk_42.28 //

महातोयतो मुद्रः कथितो गगनालये / महाशैलो ऽथ मुद्रेयं सर्वदृष्टिविदालिने // mmk_42.29 //

महोदधि तथा मुद्र सुगतात्मज सागरे / महावृक्षस्तथा मुद्र उद्घुष्टो लोकविश्रुतः // mmk_42.30 //

सर्वांश्च जिनपुत्रांस्तु मुद्रो ऽयं त्रिभवालये / घण्टासमीपजे स्थाने आलिखेज्जिनवर्णितम् // mmk_42.31 //

मुद्रं सर्वमुद्राणां चतुरस्राकारसम्भवम् / विचित्रं रङ्गजोपेतं चारुवर्णं विराजकम् // mmk_42.32 //

+ + + + + समन्तान्मणिभूषितम् / ज्वालामालिनं दीप्तं पञ्चरङ्गोज्ज्वलं शुभम् // mmk_42.33 //

पिण्डिकाकारमुद्यन्तं इन्दुमर्कनिभं शुभम् / + + + + + विराजन्तं महाद्युतिम् / एष मुद्रो महावीर्यः सर्वमन्त्रालयः शुभः // mmk_42.34 //

त्रिविधानां तु मन्त्राणां ज्येष्ठमध्यमकन्यसाम् / स्थानो ऽयं मुद्रमुख्योक्तः सर्वकर्मार्थसाधकः / एतदभ्यन्तरं लेख्यो महामुद्रागर्भमण्डले // mmk_42.35 //

यो यस्य मण्डले मन्त्रः संयोक्ता लोकविश्रुते / तदेव मध्ये आलेख्यं छत्रस्येव महीतले // mmk_42.36 //

तन्मध्ये मण्डले चापि रूपकं मुद्रमेव वा / वरदा रूपका लेख्या मञ्जुघोषोदयस्तथा // mmk_42.37 //

सर्वे वै मन्त्रनाथास्तु सर्वमन्त्रार्थवा सदा / न चेद् भुवि मुद्राणामालिखेद् विधिचेष्टिताम् // mmk_42.38 //

तन्न्यस्तौ पूर्णकुम्भस्तु विजयेत्याहुर्मनीषिणः / बहिःस्था मण्डले चापि मुद्रामालिखेद् व्रती // mmk_42.39 //

यथोक्तैः पूर्वनिर्दिष्टैर्द्वितीये मण्डले जपी / स्थानेष्वेव सर्वत्र दिग्विदिशश्चापि सर्वतः // mmk_42.40 //

आलिखेत् सर्वदेवानामृषियक्षगरुत्मनाम् / मुद्रामालिखेद् धीमां पिशाचोरगराक्षसाम् // mmk_42.41 //

परतीर्थ्येमतां सिद्धां किन्नरा कटपूतनाम् / क्रव्यादव्यन्तरांश्चैव सकूष्माण्डं दूषको नारकोत्सहाम् / सर्वसत्त्वां भृवांश्चैव रूपारूप्यकामजाम् // mmk_42.42 //

द्वितीये मण्डले नित्यं आरूप्यं सुरजोद्भवम् / आलिखेन्मुद्रनित्याग्रं त्रिकोणाकारसम्भवम् // mmk_42.43 //

पूर्वायां दिशि मासृत्य रेखमाश्लिष्टमुज्ज्वल / एतत् सुरमुख्यानामारूप्यानां महर्द्धिकाम् / मुद्रा समाधिजेत्याहुरादिबुद्धैस्तु वर्णितम् // mmk_42.44 //

ततोत्तरे तु तथा रेखे ब्रह्मणः पद्मजोद्भव / रूपावचरमित्याहुर्मन्त्रं त्रिभुवनालये // mmk_42.45 //

तदेव दक्षिणा रेखा गर्भमण्डलतो बहिः / दक्षिणं दिशमाशृत्य मुद्रेः कामजो वरः // mmk_42.46 //

निर्दिष्टो मुनिमुख्यैस्तु कामधात्वेश्वरे परे / मुद्रो ऽयं निर्मितो लोके सर्वदेवसमन्दिरे // mmk_42.47 //

रुद्रेन्द्रवसुमुख्यानां विष्णुतीर्थ्यां दिगम्बराम् / अर्कवासवमौषध्यां विवश्वयमचिह्विताम् // mmk_42.48 //

लोकपालां बहिस्तां तां यथामन्दिरदिक्षु ताम् / तथाचालिखेत् सर्वांस्तथा मुद्रांस्तु योजयेत् // mmk_42.49 //

यो यस्य वाहनः ख्यातः प्रहरणावेषधारिणम् / तं तथैव तथा मुद्रो निर्दिष्टो लोकपूजितैः // mmk_42.50 //

एष मुद्रगणो ह्युक्तः सर्वलोकोत्तरः शुभः / लौकिकामथ सर्वत्र सर्वकर्मेषु साधकः // mmk_42.51 //

निर्दिष्टा मुद्रमुख्याश्च सर्वमुद्रो ऽथ मन्त्रिणाम् / आलेख्य तु भुवि मर्त्त्यैस्तु जापिभिः सिद्धिकामदैः // mmk_42.52 //

- बोधितत्त्वलिप्सुरिति //

बोधिसत्त्वपिटकावतंसकात् महायानवैपुल्यसूत्रात् आर्यमञ्जुश्रियमूलकल्पात् चत्वारिंशतिमः महाकल्पराजविसरात् सर्वकर्मसाधनोपयिकः परिसमाप्त इति / अथ त्रिचत्वारिंशः पटलविसरः / अथ भगवां शाक्यमुनिः पुनरपि शुद्धावासभवनमवलोक्य, मञ्जुश्रियं कुमारभूतमामन्त्रयते स्म / अस्ति मञ्जुश्रीः त्वदीये मण्डलविधाने सर्वकर्मेषु सर्वतन्त्रमन्त्रेषु आह्वानन विसर्जन जप नियम होम साधन रक्षाविधानादिषु सर्वकर्मेषु महामुद्रं एक एव महावीरमसङ्ख्येयेषु सबुद्धकोटिभाषितं चाभ्यनुमोदितं च कतमं च तत् //

शृणुस्व मञ्जुरव श्रीमां गम्भीरार्थसुतत्वधीः / यं बध्वा जापिनः सर्वे ......... // mmk_43.1 //

महामुद्रां महापुण्यां महामङ्गलसम्मतम् / महाब्रह्मसमं पुण्यं पवित्रं पापनाशनम् // mmk_43.2 //

महाक्षेमङ्गमं श्रेष्ठं निर्वाणपदमच्युतम् / शिवं शान्तं तथा ज्येष्ठं शीतीभूतं परायणम् // mmk_43.3 //

सर्वमुद्रेश्वरं ख्यातं सर्वमुद्रेषु मूर्धजम् / सर्वतन्त्रेश्वरं नाथं ख्यातं त्रिभवालये // mmk_43.4 //

ऊर्जितं च त्रिधा दिव्यं भौमदिव्या येष्वपि / साक्षाद् बुद्धमिव चिह्नं सर्वसत्त्वाश्रयं विभुम् // mmk_43.5 //

प्रपुष्टत्रिभवे नित्यं सर्वमुद्रैस्तु मुद्रराट् / रक्षार्थं जापिनां नित्यं सर्वकर्मेषु मन्त्रिणाम् // mmk_43.6 //

रक्षोघ्नमगदं ख्यातं मङ्गल्यमघनाशनम् / उत्कृष्टं सर्वकर्मेषु दुष्टसत्त्वनिवारणम् // mmk_43.7 //

दुर्दान्तदमको लोके महामुद्रो ऽयं प्रगीयते / सर्वमत्रेषु युक्तो वै त्रिजन्मगतमन्त्रिणाम् // mmk_43.8 //

हन्युर्विघ्नान् स सर्वत्र सर्वकर्मेषु मन्त्रिणाम् / त्रिधा योनिगतां मन्त्रामावाहयति तत्क्षणात् // mmk_43.9 //

पुनर्नयति तां लोकं पुनर्नाशयते हि ताम् / पातयत्येव सर्वत्र कृत्स्नां चैव महीतले // mmk_43.10 //

पुनः कीलयते मुद्रां बन्धनोरुन्धनादिभिः क्रियैः / पीडनोत्सादनो मुद्रः शोषणो विध्वंसनस्तथा / पुनर्जीवादनः ख्यातो मन्त्रिणां त्रिभुवनालये // mmk_43.11 //

शान्तिकेषु च कर्मेषु महामुद्रो ऽयं प्रयुज्यते / शुभो ऽथ सर्वमन्त्राणां शुद्धो निर्मलपापहा / सर्वार्थसाधनो लोके प्रसिद्धः सर्वमग्रतः // mmk_43.12 //

लौकिकानां च मन्त्राणामग्र्या लोकोत्तरास्तथा / श्रेष्ठाः सर्वकर्मार्थे तथा शान्तिकपौष्टिके // mmk_43.13 //

नित्यं क्षेमङ्गमो मुद्रः प्रयुक्तः सर्वमन्त्रिभिः / नित्यो ऽयमपराजितो ह्युक्तः ग्रः सर्वमन्त्रैस्तु योजितः // mmk_43.14 //

परम्परास्थो भूतकोटिस्थः धर्मधात्वेश्वरो निजौ / अनक्षरो ऽभिलाप्यश्च अक्षरो नित्यमक्षरो // mmk_43.15 //

धर्मनैरात्मभूतस्थः अभूतो भूतमुद्भवः / विरजस्को नेञ्ज्यश्च निष्ठो शून्यः स्वभावतः // mmk_43.16 //

अकनिष्ठस्तथा ज्येष्ठः शुभो निर्वाणगामिनः / पन्थानो ऽनुत्तरां बोधो प्रत्येकार्ह सम्भवो // mmk_43.17 //

धर्ममेघस्तथा शान्तः निःसृता सैन्यवारिजः / तत्त्वार्थपरमार्थज्ञ उभयार्थार्थपूरकः // mmk_43.18 //

महामुद्रो महौजस्कः सर्वबुद्धैः समुद्रितो / महार्थो महावीर्य एकवीरो महर्द्धिकः // mmk_43.19 //

+ + + + + + + + + सर्वकर्मार्थसाधकः / अनेकाकारवरोपेत अनेकाकारसम्भवम् // mmk_43.20 //

सर्वंज्ञपदविदं ज्ञेयमशेषो शेषनैष्ठिकम् / ज्ञानं ज्ञेयं महोच्छेयं विघुष्टं मुनिवराजितम् // mmk_43.21 //

सर्वभूतसुराभ्यर्च्य प्रत्येकार्हथ पूजितम् / महामुद्रोत्तमं धर्मं अच्युतं पदमुत्तमम् // mmk_43.22 //

आदौ तावच्छुचौ देशे एकवृक्षे महानगे / महोदधितटे रम्ये मेध्यस्थण्डिल्यमाश्रिते // mmk_43.23 //

सरित् कूपे पुलिने वा देवमन्दिरशोभने / मारारेर्भवने चापि विहारावसथ मन्दिरे // mmk_43.24 //

विजने सिक्तसंसृष्टे पुष्पप्रकरभूषिते / सुगन्धगन्धोदकासिक्ते सुधूपे धूपधूपिते // mmk_43.25 //

प्राङ्मुखः उदङ्मुखो वापि शान्तिकपौष्टिकयोश्चापि / दक्षिणे रौद्रकर्मार्थे तं जिनैर्वर्जितं सदा // mmk_43.26 //

श्रीसौभाग्यवश्यार्थमाजश्चाहेतुतः सदा / पश्चान्मुखं तु बध्नीयान्महामुद्रबरं परम् // mmk_43.27 //

उच्चदृष्टि यदा बुद्धे उत्तिष्ठं देहसिद्धये / अधः पातालं गच्छेदसुरेश्वरतां व्रती // mmk_43.28 //

शुचिदेहसमाचारः शुचिमन्त्रसमन्त्रवित् / तदा मुद्रवरं युञ्ज्य स्नातोपस्पृश्य जप्तधीः // mmk_43.29 //

उभौ च हस्तौ प्रक्षाल्यौ मृद्गोमयसुगन्धिनम् / शुचितोय सदा शुद्धे कृमिजन्तुविवर्जिते // mmk_43.30 //

नवारिस्रुते शुचे शौचे उभे हस्ते ऽथ पूजिते / सयोज्येथ मुष्टिस्थौ सम्पुटाकारचेष्टितौ // mmk_43.31 //

ईषिच्छुषिरौ समन्तात् षडङ्गुलौ उच्छ्रितौ / उभयाङ्गुष्ठमध्यस्थौ कन्यष्ठाङ्लिनामितौ // mmk_43.32 //

कृत्वाथ हृदयोद्देशे शुक्लवस्त्रावगुण्ठिते / दर्शयेत् सर्वकर्मेषुं साधने + + + + + // mmk_43.33 //

सर्वभूते वै क्षिप्रं कृष्टमात्रेण ईप्सितम् / एष मञ्जुरवो मुद्रः सर्वकर्मार्थसाधक इति // mmk_43.34 //

बोधिसत्त्वपिटकावतंसकान्महायानवैपुल्यसूत्राद् आर्यमञ्जुश्रियमूलकल्पात् एकचत्वारिंशत्तमः पटलविसरद् द्वितीयः सर्वकर्मोत्तमसाधनोपयिकः महामुद्रपटलविसरः परिसमाप्त इति // अथ चतुश्चत्वारिंशः पटलविसरः / अथ खलु भगवां शाक्यमुनिः पुनरपि शुद्धावासभवनमवलोक्य सर्वतथागतधर्मवरोत्वचिन्त्यगुणव्यूहालङ्कारभूतकोटिनिष्ठासङ्ख्येयजिनमुद्रामुद्रितं सर्वसत्त्वचिह्नभूतं मुद्रापटलपरमगुह्यतमं सर्वलौकिकलोकोत्तरश्रेयसमन्त्रतन्त्रकल्पविकल्पितं सर्वसत्त्वैः परमार्थदर्शनपथप्रवृत्तिभूतं सर्वमन्त्रसर्वसंज्ञासाधारणभूतमिहैव जन्मनि सर्वसत्त्वानां सर्वाशापारिपूरकं सर्वबुद्धबोधिसत्त्वानामाराधनपरसुखहेतुकबोधिसम्भारपरिपूरणनिमित्तम् आह्वाननविसर्जनगन्धपुष्पधूपसर्वमाल्योपहाराविद्याविद्यावेशनदर्शनसर्वकार्यार्थसाधनसर्वदेवनागयक्षगन्धर्वासुरगरुडकिन्नरमहोरगयक्षराक्षसपिशाचकूष्माण्डरौद्रसौम्यभावदमकाध्यक्षभूताधिपतिसर्वकार्यसन्दर्शनज्वलनाकाशगमनान्तर्द्धानवशीकरणबोधिसम्भारनिमित्ताश्चर्याद्भुतं सर्वमन्त्रतन्त्रार्त्थानुनीतं सर्वविद्याराजनमस्कृतं सर्वविद्यासाधकं सर्वबुद्धमात्रामन्त्रितं यथेप्सितार्त्थसत्त्वमनोरथापरिपूरकं सर्वासां सर्वमन्त्राणां दृष्टधार्मिकहेतुनिष्पादकं संक्षेपतो यथा यथा युज्यते, यथा यथा साध्यते तथा तथा साधयते / एषा मञ्जुश्रीः परमार्त्थपटलसर्वबुद्धानां परमार्त्थगुह्यतमं भाषिष्ये / पूर्वं भाषितवां सर्वबुद्धैः भाषिष्यन्ते ऽनागता बुद्धा भगवन्तः / एतर्ह्यहं भाषिष्ये, तच्छ्रूयतां महासत्त्व भाषिष्ये / तच्छ्रूयतां महासत्त्व भाषिष्ये / साधु च सुष्ठु च मनसि कुरु मञ्जुरव मनोज्ञप्रतिभानवां वक्ष्ये ऽहं वक्ष्ये ऽहमिति //

शाक्यसिंह नरश्रेष्ठो सम्बुद्धो ऋषिसत्तमः / सत्त्वमर्त्थमभिज्ञाय परमार्त्थार्त्थदर्शनम् // mmk_44.1 //

गुह्यमात्रार्त्थमुद्रा वै भाषसे मुनिपुङ्गव / शुद्धावासपुरे रम्ये शुद्धसत्त्वसमाश्रिते // mmk_44.2 //

समापर्षद्वरे श्रेष्ठे वीतरागालये तदा / भाषिते कल्पराजे तु मञ्जुभागीततत्त्विते // mmk_44.3 //

बुद्धपुत्रैस्तदामात्यैः परमार्त्थविदैर्विदैः / शाक्यसिंहस्तदा आह शृणुध्वं पर्षत् कथे // mmk_44.4 //

बुद्धपुत्रस्तथा ज्येष्ठ महायानाग्रधर्मिणः / नाम्ना समन्तभद्रो वै इत्युवाच गिरां वराम् // mmk_44.5 //

बालरूपी महारूपी कुमारस्त्वं वर्ण्यसे जिनैः / शाक्यस्य कुलजो दक्षः श्रीमां बुद्धो निरीक्ष्यते // mmk_44.6 //

त्वं हि विश्वमहाप्राज्ञो लोकानुग्रहकाम्यया / त्वदीयं कल्पविसरं मुद्रामुद्रितं त्विदम् // mmk_44.7 //

अध्येषय महावीरं बुद्धपुत्र महर्द्धिक / सारभूतं कल्पस्यास्य ... महर्द्धिकम् // mmk_44.8 //

एवमुक्तस्तु वीरेण बुद्धपुत्रेण धीमता / मञ्जुमां त्वरितो जात बालक्रीडाभिनिर्मित // mmk_44.9 //

प्रणम्य सुगतं नाथं जगदेकान्तचक्षुषम् / उवाच मधुरां वाणीं करुणार्द्रम्रेडितेन तु // mmk_44.10 //

कथयेयु भगवां बुद्धः प्रज्ञाबलतत्त्ववित् / कथं तु सर्वमन्त्रा वै सिद्ध्यन्ति जपिनां ध्रुवम् // mmk_44.11 //

कथं वै ह्यविकल्पेन अमोघान् गच्छन्ति प्राणिनाम् / सिद्ध्येयुः क्षिप्तजप्ताभिः सर्वार्त्थेषु न योजिता // mmk_44.12 //

आ भवाग्राच्च संसारादा वीच्यान्ताश्च नारकाः / एतेष्वाश्रिता ये च प्राणिनोर्धत्रिधातुका // mmk_44.13 //

आहूयन्ते निगृह्यन्ते आवेश्यन्ते च पश्यताम् / सर्वकर्मार्त्थयुक्ते च तुष्टिपुष्ट्यर्थकारणैः // mmk_44.14 //

दशभूम्याश्रिता ये च सौगते वर्त्मनि स्थिता / बोधिसत्त्वा विबुद्धाश्च प्रत्येकां वा बोधिमाश्रिताः // mmk_44.15 //

वीतराग महात्मन आहूयन्ते सुपूजिता / समयैर्मन्त्रिभिर्युक्ता इमैर्मुद्रैः समुद्रिता // mmk_44.16 //

कथयन्ति यथाभूतं स्वतन्त्रा चापि दर्शिनम् / पूर्ववृत्तमवृत्तं वा वर्तमाने च योगिनः // mmk_44.17 //

स्वर्गलोककथाचिन्त्या परदेहाश्रितापि वा / अनागतं च यथातत्थ्यं निदर्शनं चापि वर्णितम् // mmk_44.18 //

कथयन्ति यथान्यायं मन्त्रमुद्रसमीरिता / सिद्धिं चापि तथा क्षिप्रं दद्यान्मुद्रैश्च पूजिताः // mmk_44.19 //

मन्त्रिज्ञैः मन्त्रिभिर्युक्तः बलिहोमसुपूजिताः / कुर्यात् क्षिप्रतरं सिद्धिं बुद्धा बुद्धसुतास्तथा // mmk_44.20 //

अर्हन्तो ऽपि महात्मानः खड्गिणः सिद्धिदा सदा / लौकिका ये च मन्त्रा वै तथा लोकोत्तरा परे // mmk_44.21 //

ये च सिद्धास्तथा यक्षा गन्धर्वा मथ किन्नरा / असुरा सुरा सदा सत्त्वा सर्वसत्त्वा त्रिधा स्थिता // mmk_44.22 //

अपर्यन्तेषु दिक्ष्वेषु लोकधात्वन्तरेषु च / गतिपञ्चसु ये सत्त्वा युक्तायुक्ताश्च सर्वदा // mmk_44.23 //

सिद्धिं गच्छेयु तत् क्षिप्रं इमैर्मुद्रैः सुमुद्रिता / एष विख्यातः सुगतैर्मन्त्रज्ञैस्तु मुनिभिः विमलम् // mmk_44.24 //

विटकं विधिवद् ज्ञेयं विसरं पटलोत्तमम् / सर्वबुद्धैस्तथा लोके श्रेयसार्थमुदाहृता // mmk_44.25 //

मुद्रा पञ्चशिखेत्याहुः सर्वबुद्धैः प्रकाशिता / श्रेयसार्थं हि भूतानां मञ्जुघोषस्य धीमते // mmk_44.26 //

सर्वतः शिरजा ज्ञेया मूर्ध्नजास्तु तथागताम् / सा तु सर्वार्थदा ज्ञेया धर्मकोशप्रपूरणी // mmk_44.27 //

पूरणार्थं तु मन्त्राणां मुद्राणां च महर्द्धिकम् / सर्वेषां लोकोत्तरां श्रेष्ठां लौकिकानां च सर्वदा // mmk_44.28 //

मञ्जुघोषस्य तन्त्रे तु अग्रा ह्यग्रतमा मता / प्रभावतः सर्वकर्माणि क्षिप्रं कुर्यार्थनामतः // mmk_44.29 //

शुचिर्भूत्वा शुचौ देशे बध्नीयान्मुद्रवरं प्रभुम् / आदौ हस्तौ थ कृत्वा वै सुषिराकारसम्पुटौ // mmk_44.30 //

आकोशविरलाङ्गुष्ठौ न्यस्ताङ्गुष्ठौ थ सूचितौ / पञ्चसूचिकविन्यस्तौ मुद्रा पञ्चशिखा भवेत् // mmk_44.31 //

शिरःस्थाने सदा न्यस्ता एकसूच्याथ अङ्गुलैः / मुद्रा एवचीरा तु मूर्ध्नि स्थानेषु योजिता // mmk_44.32 //

कन्यसाङ्गुलिविन्यस्ता सुश्लिष्टा मध्यमौ तथा / ...... अङ्गुष्ठौ सूचितौ उभौ // mmk_44.33 //

त्रिसूच्याकारसमायोगात् तृशिखा मुद्रमुदाहृता / सर्वैरङ्गुलिभिर्युक्तैः आकोशा सुषिरसम्भवैः / शिरःस्थाने सदा न्यस्ता मुद्रा शिरवरा भवेत् // mmk_44.34 //

स एव उच्छ्रिताङ्गुल्यौ ईषित् सङ्कुचिताग्रकौ / महावीरा तु सा ज्ञेया महामुद्रा महर्द्धिका // mmk_44.35 //

एते पञ्च महामुद्रा पूर्वं जिनवरैस्तदा / निर्दिष्टा सर्वमुद्राणां कथयन्ति मनीषिणौ // mmk_44.36 //

ज्येष्ठा मुद्रमुख्यनां + + + + + + मुद्रिताम् / लोकोत्तरां तु सर्वा वै लौकिकानां च सर्वतः // mmk_44.37 //

एता पञ्च महामुद्राः प्रयोगा सिद्धिहेतवः / सुसिद्धा सिद्धतमा ह्येता अग्रा ज्येष्ठाश्च भाषिता / मञ्जुघोषस्य मूर्धजा प्रभावात्यद्भुतचेष्टिता // mmk_44.38 //

यावन्ति सौगता मुद्रा सर्वेषां सिद्धिहेतवः / मुद्रा मुद्रेति विख्याता श्रीमन्तं किसलयोद्भवम् // mmk_44.39 //

मञ्जुघोषस्य मूर्धजं महापुण्यतमं शिवम् / यं बध्वा महासत्त्वा नियतं बोधिमवाप्नुयात् // mmk_44.40 //

महामुख्यावतंसं तं श्राद्धम् अविकलेन्द्रियम् / सदा यज्ञं प्राज्ञयुक्तं च विधिवत् कर्ममाचरेत् // mmk_44.41 //

तादृशेन तु युक्तेन सत्त्वेनैव सुयोजिता / मुद्रेयं कुरुते ह्यर्थां यथेष्टा चापि पुष्कलाम् // mmk_44.42 //

उपदेशात्तु विद्वांसः मतिमन्तो ऽर्थसाधकाः / आचार्यसम्मता लोके शिष्या ग्राह्यास्तु सर्वदा // mmk_44.43 //

विधिवत् कर्मदृष्टेन पुरुषेणेह भक्तितः / महायानगतैर्नित्यं मुद्रेयं सम्प्रयुज्यते // mmk_44.44 //

सर्वेषां तु मुद्राणां त्रिधा मन्त्रेषु योजिताम् / अग्रा ह्यग्रतमा लोके एते मुद्रा प्रभावतः // mmk_44.45 //

सिद्ध्यर्त्थं सिद्धिकामानां तथा मन्त्रैः सुयोजिताम् / क्षिप्रमर्थकरा ह्येते सर्वसौख्यफलप्रदाः // mmk_44.46 //

मञ्जुघोषः स्वयं तिष्ठेन्मुद्रैरेतैः समाहित / यस्मिं स्थाने तु वश्चैताः स्वयं मञ्जुरवः सदा // mmk_44.47 //

रक्षा ह्यग्रां प्रकल्पीत जिनपुत्रो महर्द्धिकः / बालरूपी महात्मा वै विश्चरूपी महर्द्धिकः // mmk_44.48 //

बहुरूपी च सत्त्वानां मुद्रारूपी थ देहिनाम् / बालिशानां तु सत्त्वानां संसारार्णवचारिणाम् // mmk_44.49 //

तेषामर्थकरः क्षिप्रं मुद्रारूपेण तिष्ठते / मञ्जुघोषस्य शिरजाः सर्वमूर्ध्नि प्रतिष्ठिता // mmk_44.50 //

सर्वार्थसम्पदा ह्येते जप्तमात्रैस्तु योजिता / मूलमन्त्रेण संयुक्ता हृदयस्यानुगतेन वा // mmk_44.51 //

सर्वे सौगतिभिश्च मन्त्रैभिश्च सुयोजिता / ये तु अब्जकुले मन्त्रा वज्रिणे चापि कपर्दिने // mmk_44.52 //

सर्वैश्च लौकिकैश्चापि मुद्रैर्युक्तार्थफलप्रदा / एते पञ्च महामुद्रा मन्त्रयुक्तार्थफलप्रदा // mmk_44.53 //

विकल्प्या मन्त्रगतां त्यज्य मुद्रैर्वाथ फलप्रदा / महारक्षा महापुण्या बद्धमात्रेण देहिनाम् // mmk_44.54 //

स्मरितैह्येभिर्महामुद्रैर्महारक्षा विधीयते / कः पुनर्जप्तमात्रैस्तु मन्त्रमुद्रासमाश्रितैः // mmk_44.55 //

यावद् वा जापिनः सर्वे नियतं बोधिमाप्नुयात् / अपरे तु महामुद्राः शूलपट्टिशसम्भवाः // mmk_44.56 //

महाशूलो ऽथ मुद्राणां घोरदारुणमुच्यते / क्रोधराजेन मुख्येन यमान्तेनेह योजिता // mmk_44.57 //

करोति विविधां कर्मां दारुणां प्राणरोधिनाम् / महाभयप्रदां मुद्रां विपस्यस्यापि महात्मने // mmk_44.58 //

दुष्टसत्त्वां विनाशाय सृष्टास्तृभवालये / तैरेव योजिता मन्त्रा विविधां मुद्रमाशृता // mmk_44.59 //

तेषां विनाशनायैव सृष्टा जिनवरैः सदा / मन्त्रचर्यार्त्थयुक्तायाः शासनार्थाय कल्पिता // mmk_44.60 //

विहिता लोकनाथैस्तु मुद्रा तन्त्रार्त्थदर्शना / दुष्टसत्त्वप्रयुक्तानां गरकिल्बिषरोगदाम् // mmk_44.61 //

तेषां निर्नाशनार्थैव उक्तां सर्वाथकर्मिकाम् / यमशासननाशाय मृत्युपाशाय मोक्षणाः // mmk_44.62 //

नित्यं प्राणहरा मुद्रा प्रयुक्ता मन्त्रयोजिता / यमदूतहरा पुण्या मृत्युर्नाशनी स्मृता // mmk_44.63 //

यमशासननीतामानेता प्राणदा स्मृता / सर्वरोगनिवाशार्थं यमस्यापि भयप्रदा // mmk_44.64 //

मुनिमुख्यैस्तथा युक्ता प्राणसन्धारणी हिता / शासने ऽस्मिन् प्रसन्नानां हिता रक्षा विधीयते // mmk_44.65 //

सफला नाशनी दुष्टां गीता मञ्जुरवे हिता / सर्वार्थप्रापणी देवी महामुद्रा प्रगीयते // mmk_44.66 //

महाप्रहरणे त्वाहुः अपरा मुद्रपरावरा / तथैव हस्तौ संन्यस्य तर्जन्यौ पाशसम्भवौ // mmk_44.67 //

कन्यसौ सूचयेन्नित्यं मुष्टियोगेन योजितौ / हस्तौ सम्पुटितौ नित्यौ अङ्गुष्ठाबुच्छ्रितावुभौ // mmk_44.68 //

एष मुद्रा महापुण्या महाशूले समागता / विविधा लोकनाथैस्तु विचित्रप्रहरणोद्भवा // mmk_44.69 //

यो यस्य चिन्तयेज्जापी शत्रोः प्रहरणानि वै / तेनैव च्छिन्दयेद् गात्रं चित्तोत्पादाच्च तद् भवेत् // mmk_44.70 //

नियतं नाशयेच्छत्रुं मुद्रा मन्त्राश्च योजिता / निहन्याच्छत्रुगणां सर्वांमन्त्राश्चापि महर्द्धिकाम् // mmk_44.71 //

यमदूतगणां विघ्नां ग्रहांश्चापि समातराम् / पूतनास्कन्दरुद्रश्च प्रेतांश्चापि महर्द्धिकाम् // mmk_44.72 //

जप्ता वैवस्वतां लोकां कृत्स्नां चैव सवासवाम् / यमान्तकक्रोधराजेन नान्यं मन्त्रं प्रयोजयेत् // mmk_44.73 //

मुद्रैरेतैः प्रयुञ्जीत महाशूलसमैस्तदा / सद्यं वैवस्वतं हन्यात् कः पुनर्भुवि मानुषाम् // mmk_44.74 //

सर्वप्रहरणी मुद्रां सर्वदुष्टां विनाशिनीम् / विहिता लोकमुख्यैस्तु सम्बुद्धैर्द्विपदोत्तमैः // mmk_44.75 //

तथैव हस्तौ संन्यस्त मध्यमां शृत्य कारयेत् / तथैव हस्तौ कृत्वेह मुष्टियोगेन कारयेत् // mmk_44.76 //

........ अङ्गुष्ठाग्रौ तु पीडितौ / सुषिरावाङ्गुलिसंयुक्तौ मध्याङ्गुल्यसमुच्छ्रितौ // mmk_44.77 //

सूचिकाग्रौ तथा नित्यौ तर्जन्याङ्गुलिमाश्रितौ / एषा मुद्रा वरा घोरा शूलेत्याहुर्मुनिवराः // mmk_44.78 //

महाशूला भवेत् साधुः तर्जन्याकुञ्चितावुभौ / विसृतैः पट्टिशा ज्ञेया महामुद्रवरा परा // mmk_44.79 //

तदेव सङ्कुचाग्रौ तु अङ्गुल्यास्त्रिभिरुच्छ्रिता / एष सा त्रिशूलमुद्रेति प्रवदन्ति मनीषिणः // mmk_44.80 //

विचित्रप्रहरणा ज्ञेया अङ्गुष्ठावुभयोच्छ्रितौ / महाशूलसमा ह्येते महावीर्या भयानकाः // mmk_44.81 //

पापसत्त्वविनाशाय तन्त्रे ऽस्मिं मञ्जुरवे वरे / दुर्दान्तदमिता ह्येता महामुद्राद्भुतचेष्टिता // mmk_44.82 //

रौद्रप्राणहरा ते विकृताकारसम्भवा / महाघोरतमा रौद्रा महाक्रूरतमाहिता // mmk_44.83 //

महाघोरवरा ज्येष्ठा बहुरूपिण्यः प्रकाशिता / सर्वत्र जापिनो बुद्धा जराव्याधिविवर्जिता // mmk_44.84 //

विचरन्ति इमां लोकां संसिद्धा जापिनः सदा / विहिता मृत्युनाशाय सम्बुद्धैर्मुनिपुङ्गवैः // mmk_44.85 //

जराव्याधिविनाशिन्यः मृत्युनाशाय संसृजेत् / योजिता मन्त्रिभिः क्षिप्रं कृतान्तस्यापि भयानका // mmk_44.86 //

सृजेत् प्रभुवरः श्रीमां शुद्धावासपुरे वरे / मुनिसत्तमजे मुद्रा शाक्यसिंहे नरोत्तमे // mmk_44.87 //

न बुद्धा मन्त्र भाषन्ते न मुद्रा क्रूरकर्मिणाम् / सत्त्वकारणवात्सल्यात् सर्वज्ञार्थप्रपूरणा // mmk_44.88 //

ऋद्धिविक्रीडनार्त्था वा बोधिसम्भारकारणा / उपायसत्त्ववैनेया महायानाग्रनियोजना // mmk_44.89 //

महासंसारपूरणा ............. / अधिमुक्ति वसां सत्त्वां मन्त्रमुद्रामुदाहृताम् // mmk_44.90 //

आकाश चेति या बुद्धा न बुद्धा वाचाय कल्पिता / निःप्रपञ्चार्थयुक्तानां कुतः सङ्कल्पगोचरम् // mmk_44.91 //

धर्मधातुसमा निष्ठा भूतकोटिसमा च या / मन्त्रयुक्तानां निष्ठा मुद्रा समुद्रिता // mmk_44.92 //

कथयन्ति भवाङ्गानां मुक्त्यर्थं हेतवां सदा / सर्वज्ञमुद्रमाख्याता सर्वज्ञानार्थप्रपूरणा // mmk_44.93 //

युक्तियुक्तार्थपूजार्थं मुद्रामुद्रमुदाहृता / बुद्धैश्च बुद्धपुत्रैश्च अचिन्त्याचिन्त्यगोचरैः // mmk_44.94 //

सर्वज्ञदर्शिनो मुद्रा उष्णीषाद्याः प्रभाविताः / अवलोकितमुद्रा तु वज्रपाणे थ लौकिकाः // mmk_44.95 //

कथिताः कथयिष्यन्ति श्रेयसार्थं हि देहिनाम् / यावद् बुद्धसुतैर्मुद्रा मुनिश्रेष्ठैश्च भाषिताः // mmk_44.96 //

सर्वार्थपूरणा मुद्रा प्रभावाचिन्तचिन्तिता / विकल्पार्थं हि भूतानां त्रिधा मन्त्रास्तु भाषिता // mmk_44.97 //

एक एव भवेन्मन्त्रः यो बुद्धैस्तु भाषितः / सौगतार्थं तु मन्त्राणां मन्त्रो ह्येकः प्रगीयते // mmk_44.98 //

उष्णीषाधिपतिः श्रीमां एकवर्णौथ वि सदा / चक्रवर्ती भवेन्नित्यं तकारो रेफसंयुत // mmk_44.99 //

ऊकारसहितो नित्यं युक्तो ऽथ प्रगीयते / स भवेच्चक्रिणः श्रीमां बुद्धानां मूर्द्धजो वरः // mmk_44.100 //

भापरं मन्त्रमित्याहुर्बुद्धपुत्रस्य धीमतः / प्रभावात् तत्समो ज्ञेयः मकारो ऽन्त्यार्त्थ गीयते // mmk_44.101 //

मञ्जुघोषस्य विख्यातः हृदयो ऽयं बुद्धमूर्ध्नजः / प्रभावातिशयो ज्ञेयः महापुण्य महर्द्धिकः // mmk_44.102 //

सर्वार्थपूरणो मन्त्रः ........... / मुद्रा पञ्चशिखोपेतौ उभयार्थार्थपूरणौ // mmk_44.103 //

मुद्रा पञ्चशिखा वापि मकारे चापि योजितौ / परमार्थं बोधयेच्चार्थं इहैवार्थं तु भोगदौ // mmk_44.104 //

अपरं मन्त्रमित्याहुः .......... / जकारं रेफसंयुक्तं अवोष्मार्थपूजितम् // mmk_44.105 //

एष मन्त्रवरो ह्यग्रः अब्जकेतो ऽथ मूर्ध्नजः / मुद्रे पद्मवरे युक्तो आर्या पुष्ट्यार्थजन्मिनाम् // mmk_44.106 //

जापिनां कर्मसिद्धिं तु कुर्यात् सर्वार्थसम्पदाम् / अपरं वज्रिणे मन्त्रां ह्रंङ्कारं बाहुमूर्धजम् // mmk_44.107 //

एष मन्त्रवरो ह्यग्रः चण्डो ऽथ गीयते / प्रयुक्तो वज्रालये मुद्रे कुर्यात् प्रायार्थकर्मिणाम् // mmk_44.108 //

दुर्दान्तदमको घोरो मन्त्रो ऽयं नाशहेतवः / उक्तार्थं शासनार्थं च यथोक्तं विधिमाचरेत् // mmk_44.109 //

न कुर्यात् पापकर्माणि सत्त्वनिग्रहमादरात् / न योजयेन्मन्त्रवरं नित्यं सौम्यसत्त्वेषु नित्यश // mmk_44.110 //

नापराध्ये ऽल्पदोषेण सत्त्वनाशयतोत्सृजेत् / न कुर्यादादरान्मोहादल्पदोषेषु जन्तुषु // mmk_44.111 //