108 Buddhist stotras

अक्षमालविभूषाङ्गीम् अकारबीजसम्भवाम् / नित्यं ध्यानरतां देवीं नमामि विश्वमातरीम् // BuSto_54.7

सर्वभूतप्रियां देवीं सर्वमन्त्रप्रबोधिनीम् / सर्वमन्त्रमयीं मातर्नैरात्मां त्वां नमाम्यहम् // BuSto_54.8

नैरात्माष्टकस्तोत्रं समाप्तम् //

digital sanskrit buddhist canon, stotra section, text no. 55: narakoddhārastotram

दारिद्रयपङ्कसंमग्नं संसाराख्यमहोदधौ / प्रतिज्ञातं समुत्पादे त्राहि मां हि तथागत // BuSto_55.1

तिमिरागारसंविष्टमनर्थदुःखवेदिनम् / बन्धुवर्गैः परित्यक्तं त्राहि मां हि तथागत // BuSto_55.2

मातापितृभगिन्यादि पुत्रदारसुहृज्जनाः / इन्द्रजालसमा दृष्टास्त्राहि मां हि तथागत // BuSto_55.3

मया अरिजनस्यार्थे सुकृतं कर्म दुष्कृतम् / एकाकी तं हि भोक्ष्यामि त्राहि मां हि तथागत // BuSto_55.4

जीर्णकूपे महाघोरे अनवगाहसागरे / अन्धीभूतो ऽस्म्यहं नाथ त्राहि मां हि तथागत // BuSto_55.5

जीर्णनौइकासमारूढो महासागरलंघने / दुर्लङ्घ्यं च मया दृष्टं त्राहि मां हि तथागत // BuSto_55.6

धर्माधर्म न विज्ञातं गम्यागम्यं न वेदितम् / अचेतनो ऽस्म्यहं नाथ त्राहि मां हि तथागत // BuSto_55.7

मातृघातादिकं पञ्चानन्तर्यं वा मया कृतम् / पच्यामि नरके घोरे त्राहि मां हि तथागत // BuSto_55.8

कृतं मया स्तूपभेदं संघकार्यं विनाशितम् / कृता मया सत्त्वहिंसा त्राहि मां हि तथागत // BuSto_55.9

इहलोके सुखैर्हीनं परलोके न वेदनम् / वेष्टितं कर्मसूत्रेण त्राहि मां हि तथागत // BuSto_55.10

काशपुष्पं यथाकाशे भ्रमते वायुना हतम् / ईदृशं जीवितं लोके त्राहि मां हि तथागत // BuSto_55.11

अटवी कंटकाच्छन्ना बहुवृक्षसमाकुला / पन्थानं नात्र पश्यामि त्राहि मां हि तथागत // BuSto_55.12

अनपराधाः कुपितेन मया ऽकाण्डे हता मृगाः / राजहत्यां तदा मन्ये त्राहि मां हि तथागत // BuSto_55.13

नरके पच्यमानस्य कश्चित् त्राता भविष्यति / गच्छामि शरणं कस्य त्राहि मां हि तथागत // BuSto_55.14

वैद्यानां वैद्यराजस्त्वं सर्वव्याधिचिकित्सकः / लोकनाथ भवत्राता त्रैलोक्ये सचराचरे // BuSto_55.15

नरकोद्धारस्तोत्रं समाप्तम् //

digital sanskrit buddhist canon, stotra section, text no. 56: niraupamyastavaḥ

निरौपम्य नमस्तुभ्यं निःस्वभावार्थवादिने / यस्त्वं दृष्टिविपन्नस्य लोकस्यैव हितोद्यतः // BuSto_56.1

न च नाम त्वया किञ्चिद् दृष्टं बौद्धेन चक्षुषा / अनुत्तरा च ते नाथ दृष्टिस्तत्त्वार्थदर्शिनी // BuSto_56.2

न बोद्धा न च बोद्धव्यमस्तीह परमार्थतः / अहो परमदुर्बोधां धर्मतां बुद्धवानसि // BuSto_56.3

न त्वयोत्पादितः कश्चिद् धर्मो नापि निरोधितः / समतादर्शनेनैव प्राप्तं पदमनुत्तमम् // BuSto_56.4

न संसारात्प्रकर्षेण त्वया निर्वाणमीप्सितम् / शान्तिस्ते ऽधिगता नाथ संसारानपराधितः // BuSto_56.5

त्वं विवेदैकरसतां संक्लेशव्यवदानयोः / धर्मधात्वविनिर्भेदाद् विशुद्धश्चासि सर्वतः // BuSto_56.6

नोदाहृतं त्वया किञ्चिदेकमप्यक्षरं विभो / कृत्स्नश्च वैनेयजनो धर्मवर्षेण तर्पितः // BuSto_56.7

न ते ऽस्ति सक्तिः स्कन्धेषु न धात्वायतनेषु च / आकाशसमचित्तस्त्वं सर्वधर्मेषु निश्रितः // BuSto_56.8

सत्त्वसंज्ञा च ते नाथ सर्वथा न प्रवर्तते / दुःखार्तेषु च सत्त्वेषु त्वमतीव कृपात्मकः // BuSto_56.9

सुखदुःखात्मनैरात्म्यनित्यानित्यादिषु प्रभो / इति नानाविकल्पेषु बुद्धिस्तव न सज्जते // BuSto_56.10

न गतिर्नागतिः काचिद्धर्माणामिति ते मति / न क्वचिद्राशितः प्रोक्तो धर्मार्थपरमार्थवित् // BuSto_56.11

सर्वत्रानुगतश्चासि न च यातो ऽसि कुत्रचित् / जन्मधर्मशरीराभ्यामचिन्त्यस्त्वं महामुने // BuSto_56.12

एकत्वान्यत्वरहितं प्रतिश्रुत्कोपमं जगत् / संक्रान्तिनाशाय गतं बुद्धवान् त्वमनिन्दित // BuSto_56.13

शाश्वतोच्छेदरहितं लक्ष्यलक्षणवर्जितम् / संसारमवबुद्धस्त्वं स्वप्नमायादिवत् प्रभो // BuSto_56.14

वासनामूलपर्यन्तक्लेशनद्यो विनिर्जिताः / क्लेशप्रकृतितश्चैव त्वयामृतमुपार्जितम् // BuSto_56.15

अलक्षणं त्वया धीरं दृष्टं रूपमरूपवत् / लक्षणोज्ज्वलगात्रश्च दृश्यसे रूपगोचरे // BuSto_56.16

न च रूपेण दृष्टेन दृष्ट इत्यभिधीयसे / धर्मदृष्ट्या सुदृष्टो ऽसि धर्मता न च दृश्यते // BuSto_56.17

शौषीर्यो नास्ति ते कायो मांसास्थिरुधिरो न च / इन्द्रायुधमिव कायं विना दर्शितवानसि // BuSto_56.18

नामयो नाशुचिः काये क्षुत्तृष्णासम्भवो न च / त्वया लोकानुवृत्त्यर्थं दर्शिता लौकिकी क्रिया // BuSto_56.19

कर्मावरणदोषश्च सर्वथा ऽनघ नास्ति ते / त्वया लोकानुकम्पायै कर्मप्लोतिः प्रदर्शिता // BuSto_56.20

धर्मधातोरसंभेदाद् यानभेदो ऽस्ति न प्रभो / यानत्रितयमाख्यातं त्वया सत्त्वावतारतः // BuSto_56.21

नित्यो ध्रुवः शिवः कायस्तव धर्ममयो जिन / विनेयजनहेतोश्च दर्शिता निर्वृतिस्त्वया // BuSto_56.22

लोकधातुष्वसंख्येषु त्वद्भक्तैः पुनरीक्षसे / च्युतिजन्माभिसंबोधिचक्रनिर्वृतिलालसैः // BuSto_56.23

न ते ऽस्ति मन्यना नाथ न विकल्पो न चेञ्जना / अनाभोगेन ते लोके बुद्धकृत्यं प्रवर्तते // BuSto_56.24

इति सुगतमचिन्त्यमप्रमेयं गुणकुसुमैरवकीर्य मया प्राप्तम् / कुशलमिह भवन्तु तेन सत्त्वाः परमगभीरमुनीन्द्रधर्मभाजनाः // BuSto_56.25

निरौपम्यस्तवः समाप्तः //

digital sanskrit buddhist canon, stotra section, text no. 57: pañcākṣarastotram

नमो बुद्धाय न जातो न मृतश्चैव न रूपो नापि रूपवान् / न संसारे न निर्वाणे न कारस्तेन सूच्यते // BuSto_57.1

मोहध्वंसकरो नित्यं मोक्षसौख्यप्रदायकः / मोहनं सर्वमाराणां मोकारस्तेन सूच्यते // BuSto_57.2

बुद्धानामुदितं ध्यानं बुद्धानां जनमेलकम् / बुद्धनिःक्लेश संबुद्ध बुकारस्तेन सूच्यते // BuSto_57.3

धार्यते बोधिसत्त्वैः स धर्मधातुगतिः सदा / धर्माणां परमो धर्मः धकारस्तेन सूच्यते // BuSto_57.4

यथा नास्ति तथा नास्ति यथा नास्ति तथास्ति यः / यथावादी तथाकार्ः यकारस्तेन सूच्यते // BuSto_57.5

पञ्चाक्षरमिदं पुण्यं पवित्रं पापनाशनम् / ये पठन्ति दिवारात्रौ ते यान्ति परमां गतिम् // BuSto_57.6

श्री पञ्चाक्षरस्तोत्रं समाप्तम् //

digital sanskrit buddhist canon, stotra section, text no. 58: pañcarakṣādevīstotrāṇi

1 महाप्रतिसरास्तोत्रम्

ओम् नमः श्रीमहाप्रतिसरायै

तथागताद्यास्तथतां तत्त्वमापुर्महत्तरम् / धारणीधारणाद्यस्याः प्रतिसरां नमामि ताम् // BuSto_58.1

रणे शक्रो ऽजयद्दैत्यान् धारणीध्वजधृग् बहून् / संग्रामजयदां भीमां प्रतिसरां नमामि ताम् // BuSto_58.2

यत्प्रभावाद् ब्रह्मदत्तो ऽलभद् राज्यमकण्टकम् / सार्वभौमप्रदां देवीं प्रतिसरां नमामि ताम् // BuSto_58.3

बह्वपराधो ऽपि यद्भक्तो राज्याधिकारमाप्तवान् / शस्त्रादिभीतिसंहत्रीं प्रतिसरां नमामि ताम् // BuSto_58.4

रत्नान्यवापुर्वणिजो यां स्मृत्वोदधिनिर्गताः / सर्वबाधाप्रशमनीं प्रतिसरां नमामि ताम् // BuSto_58.5

श्रीमहाप्रतिसरारक्षादेवीस्तोत्रं समाप्तम् /

2 महामन्त्रानुसारिणीस्तोत्रम्

ओम् नमः श्रीमहामन्त्रानुसारिण्यै

बुद्धाधिष्ठानतो बुद्धाभयदां भयनाशिनीम् / भवाम्बुधिनिमग्नानां नमो मन्त्रानुसारिणीम् // BuSto_58.1

यन्मन्त्रोच्चारणादेव षडीतयः सुदारुणाः / नाशं प्रयान्ति वरदां नमो मन्त्रामुसारिणीम् // BuSto_58.2

मन्त्रानुसारिणो लोकान् नान्ये मन्त्रादयो ग्रहाः / पीडयन्ति प्रियांश्चापि नमो मन्त्रानुसारिणीम् // BuSto_58.3

बुद्धो ऽभ्यभाषद् गाथास्ता यन्मन्त्रकथनान्तरम् / याभिः सर्वत्र स्वस्ति स्यान्नमो मन्त्रानुसारिणीम् // BuSto_58.4

कलौ बुद्धविहीने ऽस्मिन् लोकानां हितमाचरेत् / पापोत्पातप्रशमनीं नमो मन्त्रानुसारिणीम् // BuSto_58.5

श्रीमहामन्त्रानुसारिणीस्तोत्रं समाप्तम् /

3 महामायूरीस्तोत्रम्

ओम् नमः श्रीमहामायूरीर्यै

दुष्टं कृष्णभुजङ्गं च नरः स्वान्तिकं पालयेत् / यस्या मन्त्रानुभावेन मायूरीं प्रणमामि ताम् // BuSto_58.1

ब्रह्मादयो लोकपाला यद्धारण्या समाप्नुवन् / स्वानि स्वान्यधिकाराणि मायूरीं प्रणमामि ताम् // BuSto_58.2

स्वर्णावभासं शिखिनं नालभज्जपिनं कुधीः / अमोघेनापि पाशेन मायूरीं प्रणमामि ताम् // BuSto_58.3

यन्मन्त्रजपतो जीवाः प्राजीवञ्छुष्कपादपाः / मृतसंजीविनीं देवीं मायूरीं प्रणमामि ताम् // BuSto_58.4

यन्मन्त्रिसङ्गात् पवनो महोपद्रवशान्तिकृत् / बुद्धानां बोधिदां नित्यं मायूरीं प्रणमामि ताम् // BuSto_58.5

श्रीमहामायूरीरक्षादेवीस्तोत्रं समाप्तम् /

4 महाशीतवतीरक्षादेवीस्तोत्रम्

ओम् नमो महाशीतवत्यै

यद्धारणीमनुजपन् राहुलो भद्रमाप्तवान् / विहेठितो ग्रहैः सर्वैः शीतवतीं नमाम्यहम् // BuSto_58.1

पापतापे शीतकरीं शीतलाद्युपसर्गतः / शीतोष्णदुःखशमनीं शीतवतीं नमाम्यहम् // BuSto_58.2

मन्त्रग्रन्थितसूत्राणां धारणाल्लक्षयोजनम् / पथिकानां पालयित्रीं शीतवतीं नमाम्यहम् // BuSto_58.3

श्मशानस्थेन मुनिना या समुच्चारिता पुरा / ग्रहोपद्रवशान्त्यर्थं शीतवतीं नमाम्यहम् // BuSto_58.4

ग्रहाभिभूतवातानां ग्रन्थिपदविधारिणाम् / ग्रहभीतिप्रशमनीं शीतवतीं नमाम्यहम् // BuSto_58.5

श्री महाशीतवतीरक्षादेवीस्तोत्रं समाप्तम् /

5 महासाहस्रप्रमर्दिनीस्तोत्रम्

ओम् नमः श्रीमहासाहस्रप्रमर्दिन्ये

महासाहस्रिके लोके साहस्रहितकारिणाम् / सहस्रसत्त्वजननीं नौमि साहस्रमर्दिनीम् // BuSto_58.1

सोपद्रवायां वैशाल्यां महोत्सवो यतः सदा / महोपसर्गशमनीं नौमि साहस्रमर्दिनीम् // BuSto_58.2

यक्षराक्षसभूतानां दमनीं दुष्टचेतसाम् / दुरितोपद्रवहतां नौमि साहस्रमर्दिनीम् // BuSto_58.3

यद्धारणीपठनतो रक्षितः शाक्यकेशरी / विषतो विषदिग्धां तां नौमि साहस्रमर्दिनीम् // BuSto_58.4

मधुमिश्रितभैषज्यं सर्वरोगनिवारणम् / मृतसञ्जीवनं लोके नौमि साहस्रमर्दिनीम् // BuSto_58.5

श्रीमहासाहस्रमर्दिनीरक्षादेवीस्तोत्रं समाप्तम् //

digital sanskrit buddhist canon, stotra section, text no. 59: pañcatathāgatastotram

श्रीबुद्ध बुद्धाधिप बुद्धरूप बुद्धान्वितान् बोधयसे विबुद्धः / बुद्ध्या समस्तान् खलु बुद्धपुत्र सन्तोष्य योगेन तु बुद्धमेघाम् // BuSto_59.1

श्रीवज्र वज्रामल जातवज्र वज्रेण दीप्तेन प्रदीप्य लोकम् / ददन् योगेन तु वज्रसंवर्षं वज्रात्मभावं कुरुषे सुवज्र // BuSto_59.2

श्रीरत्न रत्नाकर रत्नमेघ रत्नेन रत्नं रमसे सुरत्न / विदार्य दारिद्रयघनं जनानां सुतेजसा रत्नमहाध्वजेन // BuSto_59.3

श्रीपद्म पद्मोत्तम पद्मसत्त्व पद्मान्समस्तान् खलुपद्मजालैः / विबोध्य पद्मोद्भव पद्मतोयैः पद्मे कुले स्थापयसे सुपद्म // BuSto_59.4

श्रीविश्व विश्वाविश विश्वज्ञानं विश्वेन विश्वविषयेन लिप्त / विश्वेन सत्त्वान् विनयेषु विश्वं विद्यां सुविद्य्ःं सुखप्ःचित्ःमिति // BuSto_59.5

श्रीपञ्चतथागतस्तोत्रं समाप्तम् //

digital sanskrit buddhist canon, stotra section, text no. 60: pañcatathāgatastutigāthā

ओम् नमः श्रीपञ्चभूतान्ताय /

नमस्ते वरदराजाग्र भूतकोटि नमोस्तु ते / नमस्ते शून्यतागर्भ बुद्धबोधि नमो ऽस्तु ते // BuSto_60.1

बुद्धराग नमस्ते ऽस्तु बुद्धकाम नमो ऽस्तु ते / बुद्धप्रीति नमस्ते ऽस्तु बुद्धमोद नमो नमः // BuSto_60.2

बुद्धस्मित नमस्तुभ्यं बुद्धहास नमो नमः / बुद्धवाच नमस्ते ऽस्तु बुद्धभाव नमो नमः // BuSto_60.3

अभवोद्भव नमस्ते ऽस्तु नमस्ते बुद्धसंभव / गगनोद्भव नमस्ते ऽस्तु नमस्ते ज्ञानसंभव // BuSto_60.4

मायाजाल नमस्तुभ्यं नमस्ते बुद्धनायक / नमस्ते सर्वसर्वेभ्यो ज्ञानकाय नमो ऽस्तु ते /

श्री पञ्चतथागतस्तुतिगाथा समाप्ता //

digital sanskrit buddhist canon, stotra section, text no. 61: paramārthastavaḥ

कथं स्तोष्यामि ते(तं) नाथमनुत्पन्नमनालयम् / लोकोपमामतिक्रान्तं वाक्पथातीतगोचरम् // BuSto_61.1

तथापि यादृशो वा ऽसि तथतार्थेषु गोचरः / लोकप्रज्ञप्तिमागम्य स्तोष्ये ऽहं भक्तितो गुरुम् // BuSto_61.2

अनुत्पन्नस्वभावेन उत्पादस्ते न विद्यते / न गतिर्नागतिर्नाथ अभावाय नमो ऽस्तु ते // BuSto_61.3

न भावो नाप्यभावो ऽसि नोच्छेदो नापि शाश्वतः / न नित्यो नाप्यनित्यस्त्वमद्वयाय नमो ऽस्तु ते // BuSto_61.4

न ह्येको हरितमाञ्जिष्ठो वर्णस्ते नोपलभ्यते / न पीतः शुक्लः कृष्णो वा अवर्णाय नमो ऽस्तु ते // BuSto_61.5

न महान् नापि ह्रस्वो ऽसि न दीर्घः परिमण्डलः / अप्रमाणगतिं प्राप्तो ऽप्रमाणाय नमो ऽस्तु ते // BuSto_61.6

न दूरे नापि वासन्ने नाकाशे नापि वा क्षितौ / न संसारे न निर्वाणे अस्थिताय नमो ऽस्तु ते // BuSto_61.7

अस्थितः सर्वधर्मेषु धर्मधातुगतिं गतः / परां गम्भीरतां प्राप्तो गम्भीराय नमो ऽस्तु ते // BuSto_61.8

एवं स्तुते स्तुतो भूयादथवा किं वत स्तुतः / शून्येषु सर्वधर्मेषु कः स्तुतः केन वा स्तुतः // BuSto_61.9

कस्त्वां शक्नोति संस्तोतुमुत्पादव्ययवर्जितम् / यस्य नान्तो न मध्यं वा ग्राह्यग्राहो न विद्यते // BuSto_61.10

न गतं नागतं स्तुत्वा सुगतं गतिवर्जितम् / तेन पुण्येन लोको ऽयं व्रजतां सौगतीं गतिम् // BuSto_61.11

श्री परमार्थस्तवः समाप्तः //

digital sanskrit buddhist canon, stotra section, text no. 62: pīṭhastavaḥ

ब्रह्माणी तत्त्वरूपा विविधघनरवा घोरचण्डी च रौद्री कौमारी कीर्तिकामा पिबति मधुमदं वैष्णवी गायमाना / वाराही वादयन्ती पटुतरपटहान् नृत्यमाना तथैन्द्री चामुण्डा चापि लक्ष्मीर्हरगणसहिता मातरो वः पुनन्तु // BuSto_62.1

गणपतिं च हेरम्बं विघ्नराजं विनायकम् / देवपुत्रं महावीर्यं महाबलपराक्रमम् // BuSto_62.2

महोदरं महाकायमेकदन्तं गजाननम् / श्वेतवर्णं महादीप्तिं त्रिनेत्रं गणनायकम् // BuSto_62.3

अक्षमाला(च) वरदं दक्षिणकरसंस्थितम् / परशुर्मुण्डपात्रं च वामहस्तविधारणम् // BuSto_62.4

नानापुष्परतं देवं नानागन्धावलेपनम् / नागयज्ञोपवीताङ्गं नानाविघ्नविनाशनम् // BuSto_62.5

देवासुरमनुष्यैश्च सिद्धगन्धर्वकिन्नरैः / पूजितं विघ्नहन्तारं मूषकाटं नमाम्यहम् // BuSto_62.6

ब्रह्माणी ब्रह्मसावित्री ब्रह्मतत्त्वविवेदिनी / चतुर्भुजा चतुर्वक्त्रा चतुर्देवपरायणा // BuSto_62.7

चतुर्देशे चिरं व्यापी चतुर्युगोपकारिणी / हंसयुक्तविमानस्था सौम्यरूपा पितामही // BuSto_62.8

पुस्तकं पुष्पमालां च वरदाभयधारिणी / पीतपुष्परता देवी पीताङ्गा पीतसन्निभा // BuSto_62.9

पीतोपहारसंयुक्ता पीतगन्धानुलेपिनी / उदुम्बरद्रुमस्था च प्रयागक्षेत्रवासिनी // BuSto_62.10

पूर्वपीठे स्थिता नित्यं ब्रह्मशक्तिर्नमो ऽस्तु ते / माहेश्वरी महादेवी मोहमायानिरंज(कृंत) नी // BuSto_62.11

महावृषसमारूढा महाहुंकारनादिनी / हेममुक्त(क्ता)निभदेहा कपालशशिशेखरा // BuSto_62.12

त्रिलोचना त्रिशुली च अक्षसूत्रकमण्डलू / नानालङ्कारसर्वाङ्गी दक्षिणेन वरप्रदा // BuSto_62.13

सृष्टिस्थितिविनाशानां सर्वथापीश्वरेश्वरी / श्वेतपुष्परता देवी श्वेतगन्धानुलेपिनी // BuSto_62.14

श्वेतवस्त्रपरीधाना मुद्राभरणभूषिता / वाराणस्यां महाक्षेत्रे तार(ल)वृक्षनिवासिनी // BuSto_62.15

उत्तरे संस्थिता पीठे माहेश्वरी नमो ऽस्तु ते / बालभावे महारौद्री कौमारी रक्तलोचनी // BuSto_62.16

रक्तवर्णधरा देवी सिन्दूरारूणविग्रहा / चतुर्भुजा शक्तिसूत्रसिद्धपात्रधरा शुभा // BuSto_62.17

कौमारी परमा शक्तिर्मयूरवरवाहिनी / रक्तवस्त्रपरीधाना रक्तमांसावसायिनी // BuSto_62.18

कोलापुरमहाक्षेत्रे वटवृक्षनिवासिनी / अग्निपीठस्थिता नित्यं कौमारी ते नमो नमः // BuSto_62.19

वैष्णवी विष्णुमाया च दैत्यदुर्दान्तनाशिनी / हरितश्यामवर्णाङ्गी गरुडोपरि संस्थिता // BuSto_62.20

शङ्खचक्रगदाहस्ता चतुर्बाहुविभूषिता / रक्तज्वाला महाक्रीडा नानाभरणभूषिता // BuSto_62.21

हरितपुष्पगन्धा च हरितवस्त्रधारिणी / अट्टहासे महाक्षेत्रे कदम्बवृक्षवासिनी // BuSto_62.22

स्वर्गे मर्त्ये च पाताले स्थितिरूपेण संस्थिता / तिष्ठन्ती पीठनैरॄत्ये नारायणी नमो ऽस्तु ते // BuSto_62.23

वाराही घोररक्ताङ्गी रक्तकेशी महोदरी / दंष्ट्रावादिनी गम्भीरा रक्तनेत्रा त्रिलोचनी // BuSto_62.24

कपालमालिका माला विचित्रपुष्पशोभिता / महाशूकसमारूढा ज्वलिताग्निसमप्रभा // BuSto_62.25

अङ्कुशकर्तिकादण्डहाडाभरणभूषिता / त्रिनेत्रा ज्वलितदेहा च दुष्टदर्पविनाशिनी // BuSto_62.26

जयन्तीक्षेत्रसंस्थाना निम्बवृक्षसमाश्रिता / याम्यपीठे स्थिता नित्यं कोलरूपी नमो ऽस्तु ते // BuSto_62.27

शक्रेश्वरी सहस्राक्षो कुङ्कुमारुणविग्रहा / सुरेश्वरी देवदेवी सर्वालङ्कारभूषिता // BuSto_62.28

चतुर्भुजा विशालाक्षी छत्रघण्टाविधारणी / महावज्रधरा देवी स्थिता चैरावते गजे // BuSto_62.29

नानापुष्परता देवी नानारत्नविभूषिणी / नानागन्धविलिप्ताङ्गी नानावस्त्रविराजिनी // BuSto_62.30

चीर(न)क्षेत्रे महाक्षेत्रे करञ्जवृक्षसंस्थिता / नागपीठस्थिता नित्यं शक्रेश्वरि नमो ऽस्तु ते // BuSto_62.31

चामुण्डा चण्डिका चण्डी प्रचण्डसुरसुन्दरी / चण्डाट्टहासा चण्डाक्षी प्रचण्डचण्डनाशिनी // BuSto_62.32

दंष्ट्राकराला रक्ताङ्गी कपिलकेशी महोदरी / कृषा(पा)णी भीषणी रौद्री जिह्वाललनभीषणा // BuSto_62.33

महाप्रेतासनारूढा भुजाष्टकसुशोभिनी / असिचर्मयुता हस्तैः डमरुखट्वाङ्गधारिणी // BuSto_62.34

कर्तिकपालहस्ता च वरदाभयभूषिता / हाडालङ्कारसर्वाङ्गी अरिप्रत्यसुदा प्रिया // BuSto_62.35

सहस्रसूर्यसंकाशा रोपकूपं प्रति प्रति / ज्वालामालाकुला देहे(सूर्य)कोटिसमप्रभा // BuSto_62.36

भूतवेतालडाकिन्यः परिवाराश्च राक्षसाः / एकमक्षमहाक्षेत्रे अश्वत्थवृक्षवासिनी / पीठे मरुतसंस्थाने चामुण्डायै नमो ऽस्तु ते // BuSto_62.37

महालक्ष्मीर्महादेवी भोगाढ्या गुणसुन्दरी / वैदूर्यपादुकारूढा सिंहासनस्थिता सुधीः // BuSto_62.38

चतुर्भुजा विशालाक्षी खड्गखेटकधारिणो / पात्रबिन्दुधरा देवी हार्धयुक्(हारार्धयुग)कुण्डली // BuSto_62.39

रत्नखचितसर्वाङ्गी चूडामणिविभूषिता / विचित्रपुष्परत्ना च वस्त्रगन्धानुलेपना // BuSto_62.40

त्रैलोक्यव्यापिनी देवी सर्वस्था सचराचरा / सिद्धगन्धर्वनमिता विद्याधरसुरार्चिता // BuSto_62.41

देवीकोटमहाक्षेत्रे प्लक्षसंस्था वरा बला / ईशानपीठसंस्थाना महालक्ष्मीः नमो ऽस्तु ते // BuSto_62.42

जननी सर्बबुद्धानां सर्वसन्तोषकारिणी / त्वमेव सर्वरूपा च त्वमेव विश्वरूपिणी // BuSto_62.43

भैरवं भीषणं रौद्रं घोरगम्भोररूपिणम् / निरञ्जननिभं देहं सर्वकाममहोत्सवम् // BuSto_62.44

नानाभुजसमाकीर्णा नानावस्त्रधरा शुभा / बभ्रुरर्धशिरोरूहा दावाग्निसमतेजसा // BuSto_62.45

त्रिलोचना महातेजा अग्निसूर्यसमप्रभा / त्रिशूलं मुण्डं खट्वाङ्गं डमरुं तर्जनीं ध्वजम् // BuSto_62.46

प्रज्ञां तत्पुस्तकं चैव खड्गचर्मधरा शुभा / पाशाङ्कुशधरं देवं वज्रसूचीमहाधरम् // BuSto_62.47

कपालकर्तिकं चक्रं गजचर्मावगुण्ठितम् / दंष्ट्राकरालवदनं व्याघ्रचर्मकटीवृतम् // BuSto_62.48

सालङ्कारेण सर्वाङ्गं नरास्थिपुष्पशोभितम् / शीर्षमालाधरा देवी कापालिकोटरं शुभम् // BuSto_62.49

चूडामणिं महातेजं कपालं चन्द्रभूषितम् / महाप्रेतासनं नित्यं नीयमाना सदा प्रिया // BuSto_62.50

सहस्रसूर्यसंकाशा छत्रबिन्दुसमन्विता / चतुष्पीठस्थिता नित्यम् अष्टक्षेत्रनिवासिनी // BuSto_62.51

अष्टमूर्तिस्थिता देवी अष्टकयोगिनीप्रिया / भद्रपीठे स्थिता नित्यं भद्रकालीसमावृता // BuSto_62.52

भद्रकारणकर्ता त्वं वीरभद्र नमो ऽस्तु ते / असिताङ्गो रुरुश्चैव चण्डो ऽथ क्रोधभैरवः // BuSto_62.53

उन्मत्तभैरवश्चैव कपाली भीषणस्तथा / संहारभैरवञ्चाष्टभैरवाय नमो ऽस्तु ते // BuSto_62.54

स्वस्थाना स्वाधिकारा च स्वस्वरूपा स्ववीरका / स्वस्वच्छवृक्षतानं न दिव्याक्षं चैव भूमिगाः // BuSto_62.55

दशदिक्क्षेत्रपालं च क्षेत्राणि च चतुर्दश / पञ्चाशक्षेत्रपालं च क्षेत्रपाल नमो ऽस्तु ते // BuSto_62.56

नाथनाथ महानाथ आदिनाथ महामते / श्रीनाथ सिद्धनाथ मीननाथ नमो ऽस्तु ते // BuSto_62.57

क्षेत्रनाथ पीठनाथ द्वीपनाथ महात्मने / प्रेतनाथ भूतनाथ बढनाथ नमो ऽस्तु ते // BuSto_62.58

त्रिनाथं नवनाथं च षोडशनाथमुत्तमम् / सप्तविंशतिपञ्चाशचतुरशीति नमो ऽस्तु ते // BuSto_62.59

सर्वेषां नाथसिद्धानां मतं चक्षुस्त्वमव्ययम् / पोतसद्म तथा वीरस्ततः सर्व नमो ऽस्तु ते // BuSto_62.60

एकवारं द्विवारं च त्रिवारं यः पठेन्नरः / शतमावर्तयेद् येन प्राप्नोति फलमुत्तमम् // BuSto_62.61

नाशयेच्छोकचिन्तादि नाशयेद् विघ्नमण्डलम् / नाशेयेद् रोगकलहान् नाशयेद् दुःखदुष्करम् // BuSto_62.62

नाशयेद् भयदारिद्रयं नाशयेद् रिपुजं भयम् / नाशयेदग्निचौरादि नाशयेद् राजकोपजम् // BuSto_62.63

नाशयेद् विग्रहं घोरं परकृताभिचारकम् / नाशयेद् द्वेषरागादि नाशयेत् सर्वपातकम् // BuSto_62.64

आयुरारोग्यमैश्वर्यधनधान्यप्रवर्धनम् / धर्मार्थकाममोक्षाणां यशःसौभाग्यवर्धनम् // BuSto_62.65

ऋद्धिं सिद्धिं श्रियं लक्ष्मीं विद्यां ज्ञानं सुतादि च / बुद्धिं प्रजां सुमित्राणि वर्धयेच्च दिने दिने // BuSto_62.66

नाकाले मरणं चैव उत्पातं नाशयेत् सदा / सर्वे रोगाः प्रशाम्यन्ति दीर्घमायुरवाप्यते // BuSto_62.67

श्रीपीठस्तवस्तोत्रं समाप्तम् //

digital sanskrit buddhist canon, stotra section, text no. 63: potalakāṣṭakam

जय सिद्धसुरासुरलोकगुरुं कमलासनसंस्थितपादयुगम् / दशपारमितादिकपद्मधरं प्रणमामि सदा वरकारुणिकम् // BuSto_63.1

बहुकोटिनराधिपलब्धवरं जय सुस्थितसुस्थितनाथमुनिम् / भवसागरपारगताधिकरं शरणागतसत्त्वहितार्थकरम् // BuSto_63.2

कमलासनचारुसुरुपधरं अमिताभतथागतमौलिधरम् / कमलोज्ज्वलभूषितगात्रवरं नवभास्करशोभनदीप्तिकरम् // BuSto_63.3

मृदुताम्रनखाङ्गुलिशोभमुखं शशिबिम्बसमप्रभसौम्यमुखम् / षडभिज्ञगुणाकरवन्द्यतनुं वरसुस्थितनूपुरहारयुतम् // BuSto_63.4

मणिकुण्डलमण्डितगण्डयुगं घनगर्जिततुल्यगभीररुतम् / गिरिगह्वरद्योतनिवासकृतं वृषवाहनहंसमृगायुशतम् // BuSto_63.5

ऋषिदेवगणाधिपसंस्तुतिकं जिनरूपधरात्मकबोधिपरम् / द्विपदोत्तमनाथसुराधिपतिं बहुसत्त्वविमोचनमुक्तिकरम् // BuSto_63.6

ध्वजछत्रसुशोभितवामकरं मलयागिरिचन्दनधूपरतिम् / कमलोत्पलपाटलिदामधरं प्रणमाम्यथ पाटलिवृद्धिकरम् // BuSto_63.7

ज्वररोगविवर्जितकुष्ठहरं बहुबोधिमनाघनभद्रकरम् / नवदुर्गतिनाशनमार्गप्रदं करुणातथताद्वयविश्वपतिम् // BuSto_63.8

श्रीआर्यावलोकितेश्वरस्य पोतलकाष्टकं समाप्तम् //

digital sanskrit buddhist canon, stotra section, text no. 64: prajñāpāramitāstotram lakṣā bhagavatīkṛtam

ओम् नमः श्रीप्रज्ञापारमितायै

निर्विकल्पे नमस्तुभ्यं प्रज्ञापारमिते ऽमिते / या त्वं सर्वानवद्याङ्गि निरवद्यैर्निरीक्ष्यसे // BuSto_64.1

आकाशमिव निर्लेपां निष्प्रपञ्चां निरक्षराम् / यस्त्वां पश्यति भावेन स पश्यति तथागतम् // BuSto_64.2

तव चार्ये गुणाढ्याया बुद्धस्य च जगद्गुरोः / न पश्यन्त्यन्तरं सन्तश्चन्द्रचन्द्रिकयोरिव // BuSto_64.3

कृपात्मकां प्रपद्य त्वां बुद्धधर्मपुरस्सराम् / सुखेनायान्ति माहात्म्यमतुलं भक्तवत्सले // BuSto_64.4

सकृदप्याशये शुद्धे यस्त्वां विधिवदीक्ष्यते / तेनापि नियतं सिद्धिः प्राप्यते ऽमोघदर्शने // BuSto_64.5

सर्वेषामपि वीराणां परार्थे नियतात्मनाम् / व्यापिका जगतीमेनां माता त्वमसि वत्सला // BuSto_64.6

ये बुद्धा लोकगुरवः पुत्रास्तव कृपालवः / तेन त्वमसि कल्याणि सर्वसत्त्वपितामही // BuSto_64.7

सर्वपारमिताभिस्त्वं निर्मलाभिरनिन्दिता / चन्द्रलेखेव ताराभिरनुप्रोता ऽसि सर्वतः // BuSto_64.8

विनेयजनमासाद्य तत्र तत्र तथागतैः / बहुरूपा त्वमेवैका नानानामभिरीक्ष्यसे // BuSto_64.9

प्रभां प्राप्येव दीप्तांशोरवश्यायोदविन्दवः / त्वां प्राप्य प्रलयं यान्ति दोषावादाश्च वादिनाम् // BuSto_64.10

त्वमेव त्रासजननी बालानां भीमदर्शना / आश्वासजननी चापि विदुषां सौम्यदर्शना // BuSto_64.11

यस्य त्वय्यप्यभिष्वङ्गस्त्वन्नाथस्य न विद्यते / तस्याम्ब! कथमन्यत्र रागद्वेषौ भविष्यतः // BuSto_64.12

नागच्छसि कुतश्चित्त्वं कुत्रचिन्न च गच्छसि / स्थानेष्वपि च सर्वेषु विद्वद्भिर्नोपलभ्यसे // BuSto_64.13

ये त्वामेव न पश्यन्ति प्रपद्यन्ते च भावतः / प्रपद्य च विमुच्यन्ते तदिदं महदद्भुतम् // BuSto_64.14

त्वामेव बध्यते पश्यन्नपश्यन्न विबध्यते / त्वामेव मुच्यते पश्यन्नपश्यन्न विमुच्यते // BuSto_64.15

अहो विस्मयनीयासि गम्भीरासि यशस्विनी / सुदुर्बोधासि मायेव दृश्यसे न च दृश्यसे // BuSto_64.16

बुद्धैः प्रत्येकबुद्धैश्च श्रावकैश्च निषेविते / मार्गस्त्वमेको मोक्षस्य नास्त्यन्य इति निश्चयः // BuSto_64.17

व्यवहारं पुरस्कृत्य प्रज्ञप्त्यर्थ शरीरिणाम् / कृपया लोकनाथैस्त्वमुच्यसे च न चोच्यसे // BuSto_64.18

शक्तः कस्त्वामिह स्तोतुं निर्निमित्तां निरञ्जनाम् / सर्वेषां विषयातीता या त्वं क्वचिदनिश्रिता // BuSto_64.19

सत्येवमपि संवृत्या वाक्यार्थैर्वयमीदृशैः / त्वामस्तुत्यामपि स्तुत्वा तुष्टुवन्तः सुनिर्वृताः // BuSto_64.20

प्रज्ञापारमितां स्तुत्वा यन्मयोपचितं शुभम् / तेनास्त्वाशु जगत् कृत्स्नं प्रज्ञापारपरायणम् // BuSto_64.21

श्रीलक्षाभगवती कृतं प्रज्ञापारमितास्तोत्रं समाप्तम् //

digital sanskrit buddhist canon, stotra section, text no. 65: prajñāpāramitāstutiḥ

ओम् नमः श्रीप्रज्ञापारमितायै

निर्विकल्पे निरालम्बे निरवद्ये निरंजने / नित्यानित्ये निर्विकारे प्रज्ञे देवि नमो ऽस्तु ते // BuSto_65.1

बुद्धानां जननीशानि बोधिसत्त्वपितामहि / प्रपितामहि सत्त्वानां प्रज्ञे देवि नमो ऽस्तु ते // BuSto_65.2

मातर्मातर्जगन्मातरिति संजपतां नृणाम् / मनोरथप्रदे शुद्धे प्रज्ञे देवि नमो ऽस्तु ते // BuSto_65.3

लक्ष्मीस्त्वमसि कल्याणि श्रीर्धीः श्रद्धा धृतिः स्मृतिः / सर्वस्वरूपे सर्वेशि प्रज्ञे देवि नमो ऽस्तु ते // BuSto_65.4

लोकोत्तरे लौकिके च प्रज्ञापारमिते ऽमिते / दश पारमिताकारे प्रज्ञे देवि नमो ऽस्तु ते // BuSto_65.5

श्रीप्रज्ञापारमितास्तुतिः समाप्ता //

digital sanskrit buddhist canon, stotra section, text no. 66: pratisarāstotram

ओम् नमः श्रीप्रतिसरायै प्रतिसरै!

अमरौघैः पूजितां त्वां नतो ऽस्मि प्रतिपदजनरक्षाकारिणीं सर्वकालम् / भृगुदहनसमुद्रापातदुःखे सुरक्षां रिपुविषभयहत्रीं राज्यभोगादिकर्त्रीम् // BuSto_66.1

परिवृतनिजवर्गान् भक्तदत्तापवर्गान् कलितदुरितवर्गान् मोक्षलाभैकमार्गान् / कृतनरसुरसर्गान् कारितानङ्गभङ्गान् स्तुतिकृतमुनिगर्गान् सर्वरक्षैकसङ्गान् // BuSto_66.2

प्रहृतसकलविघ्ने सर्वलोकैकमान्ये दशबलकृतधन्ये पञ्चदेवीवरेण्ये / विषमपदशरण्ये सर्वदा त्वां नमस्ये वसित इव अरण्ये दावदग्धे विरस्ये // BuSto_66.3

सकलजनसुवाञ्छापूरणे कामधेनुमभिलषितफलाप्त्यै कल्पवृक्षाग्रवल्लीम् / असुरसुरनराद्यैर्वन्दिताङ्घ्र्यब्जयुग्मामुरसि ललितानानारत्नमालादियुक्ताम् // BuSto_66.4

उडुपतिशतदीप्तां शङ्खकुन्दावदातां ग्रहभयपरिशान्तां वज्रसत्त्वात्मिकां ताम् / श्रवणललितलोले कुण्डले संवहन्तीं मुकुटमणिशिखाभिः काशितां तां नमामि // BuSto_66.5

जननि सकलदुःखात्तारणी त्वं प्रसीद सपदि विगतरक्षां रक्ष मे मातरं च / सकरुणरुदितं मां त्वद्दयास्वस्थभूतं कृतसरसिनिपातां त्वं गतिस्त्वं गतिर्नौ // BuSto_66.6

पठति प्रतिसरायाः स्तोत्रमेतत्सदा यो ज्वलनजलविषाणां चोरशार्दूलकानाम् / सगदनिधनकानां भीतया नाशयन्ती प्रतिपदमलभग्नं कामुना धैर्यलाभम् // BuSto_66.7

निजजनपरियुक्ता धर्मकामार्थवृद्धा रिपुगणपरिमुक्ता सौख्यमेव प्रभुक्ता / ददति विपुलभोग्यं कामदा सर्वदा ऽसौ निहतसकलपापं मोक्षमायान्ति चान्ते // BuSto_66.8

विगलितनयनाम्बुः साञ्जलिः संविलापी स्तुतिमिति प्रचकार त्रैभवानां जनन्याः / भवतु मम तु संपत् सर्वभावा कृशानो तनु कुशलसुरक्षा इत्थमेवं सुचित्तः // BuSto_66.9

विपचतु मयि सर्वं मादृशं कर्म भोग्यं ससुरनरचयानां भ्रातृमातृद्रुहाणाम् / कुरुत कुरुत धैर्यं येन मोक्षं सुलभ्यं जठरनिलयवासं मास्तु पापं कदाचित् // BuSto_66.10

उदरनरकवासं ये तदा सावतारं सततशुभसुचेताः साधयिष्यामि बोधिम् / कृतजगति सुरक्षां येन कैवल्यप्राप्तिः इति मुदितसुचेताः कर्मणा दिग्धचित्तः // BuSto_66.11

प्रतिसर अवतार्यां साम्बिकां मा विलम्ब अनिशमितिवदन् सो निन्दयन् वै स्वकर्म / प्रतिभयविषदिग्धस्तस्थिवानर्भकः सन् मुहुरिह हि शरण्यां तां स्मरन् सर्वरक्षाम् // BuSto_66.12

अहो सुधन्या जगदेकमाता प्रक्रान्तदैवा रिपुवर्गभीता / यस्याः प्रभावाद्विहितात्यपापात् प्रयाति वह्निर्जलशीतलत्वम् // BuSto_66.13

प्रभावताहो पुनरेव तस्याः वह्निं जलं चापि गिरिं स्थलं वै / यस्याः स्मृतेनैव सविस्मतीयान् वैश्वानरः प्राप द्विधाकृतिं ताम् // BuSto_66.14

गोपाशरीरं ह्रदपातशीतं शैतं त्वनाशार्थमिवाधिकोष्णाम् / दैवादिदत्ताभिजने समन्तान्नितान्तदूरादतिपापदत्ताम् // BuSto_66.15

श्रीभद्रकल्पावदानोद्धृतं यशोधरागर्भस्थबालकृतं प्रतिसरास्तोत्रं समाप्तम् //

digital sanskrit buddhist canon, stotra section, text no. 67: rakṣākāla(kara)stavaḥ

ओम् नमो लोकनाथाय

मया कृतानि पापानि कायवाकचित्तसंचयैः / तत्सर्वं हर मे नाथ रक्ष मां लोकनायक // BuSto_67.1

नेपाले द्वादशाब्देषु अनावृष्टिर्महाभयम् / नरेन्द्रदेवं संस्थाप्य रक्ष मां लोकनायक // BuSto_67.2

मर्त्यभूमौ च पाताले दुःखिनो बहुलौकिकाः / सुखवृद्धिकरस्तेषां रक्ष मां लोकनायक // BuSto_67.3

यत्र यत्र गतस्तत्र सर्वसत्त्वानुकम्पया / समुद्धरसि पापेभ्यो रक्ष मां लोकनायक // BuSto_67.4

संसारे व्यापितो ऽहं तु कथं पारं प्रयास्यते / त्वमेव शरणं तत्र रक्ष मां लोकनायक // BuSto_67.5

सर्वदेवमयस्त्वं हि सर्वबुद्धमयस्तथा / सर्वसिद्धिमयश्चैव रक्ष मां लोकनायक // BuSto_67.6

सदा कृपामयस्त्वं हि सदा रक्षामयो ऽसि च / सदा प्रज्ञामयस्त्वं हि रक्ष मां लोकनायक // BuSto_67.7

येन येन कृतं कर्म तेन तेनैव धारितम् / यद्यदिच्छां प्रदातासि रक्ष मां लोकनायक // BuSto_67.8

सुखावतीं न संप्राप्तं यावद्धि सर्वसत्त्वकम् / तावत्संसारगर्ते ऽस्मिन् रक्ष मां लोकनायक // BuSto_67.9

ज्ञानिनां ज्ञानरूपो ऽसि दुःखिनां दुःखहारकः / कामिनां कामरूपो ऽसि रक्ष मां लोकनायक // BuSto_67.10

पूजनीयो ऽसि लोकेश प्रणवस्य स्वरूपधृक् / वन्दनीयः सदा त्वं हि रक्ष मां लोकनायक // BuSto_67.11

भर्ति वा भर्तिको वापि मित्रं वा शत्रुको ऽपि वा / सर्वत्र च दयायुक्तो रक्ष मां लोकनायक // BuSto_67.12

लोकनाथ जगत्स्वामिन् सुभक्तिकृतचेतसा / त्वां नमामि पुनर्भूयो रक्ष मां लोकनायक // BuSto_67.13

अनेकदुःखभागस्मि भीष्मैर्वै कष्टसंकटैः / दयस्व चावलोकेश मोचयस्व च मां क्षणात् // BuSto_67.14

सर्वदेक्षासुसम्पातं वर्तयन् कुरु मे ऽक्षयम् / अस्तु ते करुणा मह्यं भक्तिं चैवाचलां कुरु // BuSto_67.15

श्रीमदार्यावलोकितेश्वरभट्टारकस्य रक्षाकाल(कर)स्तवः समाप्तः //

digital sanskrit buddhist canon, stotra section, text no. 68: ratnamālāstotram

आचार्यवनरत्नपादविरचितम् लोकेश्वरं

विमलशून्यकृपार्द्रचित्तं मार्गज्ञताप्रथितदेशनयार्थवाचम् / सर्वज्ञतादिपरिपूर्णविशुद्धदेहं ज्ञानाधिकारललितं शिरसा नमामि // BuSto_68.1

वैनेयभेदवशतो बहुधावभासैरेको ऽपि पात्रगजलेषु शशीव यस्मात् / संलक्षसे परहितानुगतैव तस्माद् बुद्धिस्त्वहो परमविस्मयनीयरूपा // BuSto_68.2

संपूर्णचन्द्रवदने ललितो ललाटदेशाद्विनिर्गतमहेश्वरदेवपुत्रः / वैनेयशाम्भवजनप्रतिबोधनार्थं देवाधिदेवप्रतिमानुज ईश्वरस्त्वम् // BuSto_68.3

वैनेयकोमलभवप्रतिबोधनाय किं धाम संभृत महाशुभलक्षणं ते / निर्यात एव हि पितामहदेवपूजां लोकेश्वरेश्वरपरं शिरसा नमामि // BuSto_68.4

वैनेयवैष्णवजनप्रतिबोधनाय राजीवपाणिहृदयात् प्रतिनिःसृतो ऽसौ / नारायणो ऽपि भुवनेश्वर एव तस्मात् पुंसां त्वमेव परमोत्तम एव नान्यः // BuSto_68.5

चन्द्रार्कसादरबलाहितभक्तिभाजां संदर्शनार्थमिभनीलसुलोचनाभ्याम् / यन्निःसृतौ शशिरवी भुवि लोचनाभ्यां ध्वस्तान्तरालतमसं तमहं नमामि // BuSto_68.6

सारस्वतीविनययोजितभक्तिभाजां बोधाय वै भगवतीह सरस्वतीयम् / दृष्टाग्रतस्तव जिनात्मजपप्रसूता प्रज्ञाभिलाषिफलदं तमहं नमामि // BuSto_68.7

वैनेयवायुजनिताक्षरमार्गसिद्ध्यै यो लोकनाथ सुगतो ऽथ विनिःसृतो ऽसौ / देवः समीरणवरो भुवि जन्मभाजामीर्यापथार्थफलदं तमहं नमामि // BuSto_68.8

वैनेयवारुणशिवायनमीप्सितानां संबोधनार्थमुदरात्सुगतात्मजानाम् / यन्निःसृतो वरुणदेववरो ऽप्यकस्मादैश्वर्यसिद्धि फलदं तमहं नमामि // BuSto_68.9

वैनेयसंमतफलाद्यभिलाषिणो वै संसिद्धये प्रवरलक्षणपादपद्मे / यन्निःसृता भगवती धरणी प्रसिद्धा त्रैलोक्यनाथमसमं सततं नमामि // BuSto_68.10

संसारमुक्तमपि सुस्थितमेव तत्र कारुण्यतश्च भवचारिणि सत्त्ववर्गे / भूयात् स्थितिर्मम सदास्थिरसा भवन्तमेवं महाशयवरं परमं नमामि // BuSto_68.11

एकेन पादतलकेन भवत्स्वकेन चक्रान्तसंवरमनन्तरलोकधातौ / कल्पान्तदग्धभुवने ज्वलितोग्रवह्निर्निःश्वासवायुबलतस्तव निर्वृतः स्यात् // BuSto_68.12

स्वां तर्जनीं मुखधृतो ऽहिततर्जनेन संचालिताश्च बहुमेरुगणा नखस्य / कोषोद्धृतं जलधितोयमशेषतः स्यात् सामर्थ्यमीदृशमहो भवतः कुतो ऽन्यत् // BuSto_68.13

क्वेदं च शैशवपरं ननु चारुरुपं संदर्शनीयवरकोमलबालचन्द्रम् / दुर्वारमारमथनं च मयैकसह्यं विक्रान्तदुःसहपरं क्व च चेष्टितं ते // BuSto_68.14

एषा बताञ्जननिभोरुजनावली सा कौटिल्यचारुविकटा स्वशिरोरुहाग्रे / क्लेशेन्धने ज्वलितविस्फुरितत्ववह्नेर्धूमावलीव विमला ननु लक्ष्यते ते // BuSto_68.15

त्वत्कान्तिलेशविमला दशदिक्प्रतानैः पक्षासितक्षयकृशा सकला सुशोभा / पर्यन्त इष्टशशिनो भवनेषु यत्ते मन्ये विराजि निखिलं तव कान्तिलेशात् // BuSto_68.16

बन्धुर्हि को मार्गिकसंमतं मतं नरो नरी सा स च सत्पथं पथम् / परार्थसंपादितसंवरं वरं नमामि भूमीश्वरराजिनं जिनम् // BuSto_68.17

अनित्यनिर्वाणपदे स्थितं स्थितं प्रभास्वराधिष्ठितसंहितं हितम् / शमीकृताशेषजनं शिवं शिवं नमामि भूमीश्वरराजिनं जिनम् // BuSto_68.18

गभस्तिमालामितसंकुलं कुलं तत्र स्वपाणौ धृतपङ्कजं कजम् / रतानुगाशोभितसंरतं रतं नमामि भूमीश्वरराजिनं जिनम् // BuSto_68.19

स्वधर्मधातुं करुणापरं परं शुभादिसंभारसुसंभृतं भृतम् / विकल्पहीनं ध्वनिदेशकं शकं नमामि भूमीश्वराजिनं जिनम् // BuSto_68.20

तथतातथताद्वयशातशतं सदसत्परिपूरितधर्मकथम् / कथनीयविराजितसत्यपरं प्रणमे धरणीश्वरराजवरम् // BuSto_68.21

वरवारिजरूपि जगत्प्रसरं सरसीरुहलोचनचारुतरम् / तरसापि रसत्वविशुद्धिपरं प्रणमे धरणीश्चराजवरम् // BuSto_68.22

वरनिर्मितभोगपरार्थरतं रतशून्यनिरञ्जनधर्मधरम् / धरणीन्द्रविभूषितसिद्धिपरं प्रणमे धरणीश्वरराजवरम् // BuSto_68.23

वरसत्सहजोदधिचन्द्रमुखं सुखभाषितसत्त्वविमुक्तिपदम् / पदभूषणलक्षणतानुपरं प्रणमे धरणीश्वरराजवरम् // BuSto_68.24

लोकेश्वरेयं(मां) तव रत्नमालामचीकरच्छ्रीवनरत्नपादः / अवापि यत्तेन शुभप्रविष्टं तेनैव लोको ऽस्तु समन्तभद्रः // BuSto_68.25

श्रीमदार्यावलोकितेश्वरभट्टारकस्य रत्नमालास्तोत्रं समाप्तम् //

digital sanskrit buddhist canon, stotra section, text no. 69: rūpastavaḥ

सर्वभूतमणिकम्पित तुभ्यं क्षान्तिमेव चरितं तव रूपम् / सर्वरूपवरदिव्यसुरूपं तं नमामि दशबलवररूपम् // BuSto_69.1

भृङ्गराजशिखिमूर्ध्नि सुकेशं कोकिलाभशिखिदिव्यसुकेशम् / स्निग्धनीलमृदुकुञ्चितकेशं तं नमामि दशबलवरकेशम् // BuSto_69.2

शङ्खकुन्दकुमुदं विमरोमं जन्मदुःखविगतं विमरोमम् / रोगशोकविमते विमरोमं तं नमामि दशबलवररोमम् // BuSto_69.3

पूर्णचन्द्रद्युतिशोभितवक्त्रं तुङ्गनासमणिभाशुभवक्त्रम् / बुद्धपङ्कजिनभामरवक्त्रं तं नमामि दशबलवरवक्त्रम् // BuSto_69.4

रश्मिसहस्रविचित्रसुमूर्ध्नि पुष्पवर्षशतपूजितमूर्ध्नि / रत्नवर्षशतपूजितमूर्ध्नि तं नमामि दशबलवरमूर्ध्नि // BuSto_69.5

नेत्रपताकविलम्बितशीर्षं काञ्चनछत्रवरोपितशीर्षम् / नेत्रवितानसुशोभितशीर्षं तं नमामि दशबलवरशीर्षम् // BuSto_69.6

दिव्याम्बरमुकुटं मणिमुकुटं चन्द्रप्रभामुकुटामणिमुकुटम् / आगतशीर्षमखण्डितमुकुटं तं नमामि दशबलवरमुकुटम् // BuSto_69.7

चारुदलायतपङ्कजनेत्रं दिव्यज्ञानविपुलायतनेत्रम् / ध्यानमोक्षशुभसंस्कृतनेत्रं तं नमामि दशबलवरनेत्रम् // BuSto_69.8

शुद्धकर्णशुभशुद्धसुकर्णं शुद्धप्रज्ञवरशोभितकर्णम् / शुद्धज्ञानवरशुद्धसुकर्णं तं नमामि दशबलवरकर्णम् // BuSto_69.9

शुभ्रकुन्दशशिपङ्कजदन्तं तीक्ष्णसुलक्षणनिर्मलदन्तम् / विश्वपञ्चदशपञ्चसुदन्तं तं नमामि दशबलवरदन्तम् // BuSto_69.10

उच्चवाक्यससुरासुरजिह्वां धर्मज्ञानकृतपापदजिह्वाम् / गन्धधूपससुरासुरजिह्वां तं नमामि दशबलवरजिह्वाम् // BuSto_69.11

मेघसुदुन्दुभिनादितघोषं सत्यधर्मनयसुविदितघोषम् / दिव्यवादिपरवादितघोषं तं नमामि दशबलवरघोषम् // BuSto_69.12

ग्रीवग्रीवदशग्रीवसुग्रीवं क्षान्तिवीर्यं तव ग्रीवसुग्रीवम् / हेमवर्णमणिग्रीवसुग्रीवं तं नमामि दशबलवरग्रीवम् // BuSto_69.13

सिंहकायहिमकुन्दसुकायं ध्यानकायगुणसागरकायम् / अष्टसुलक्षणनिर्मलकायं तं नमामि दशबलवरकायम् // BuSto_69.14

श्वेतरक्तशुभशोभितवस्त्रं नीलपीतहरितायितवस्त्रम् / हारधवलशुभशोभितवस्त्रं तं नमामि दशबलवरवस्त्रम् // BuSto_69.15

हेमनागकरसंस्कृतबाहू पुष्पदानकृतशोभितबाहू / धीरवीर्यसुमनोहरबाहू तं (तौ) नमामि दशबलवरबाहू // BuSto_69.16

चामरचक्रसुशोभितहस्तं विमलसुकोमलपङ्कजहस्तम् / भूतप्रेतशरणागतहस्तं तं नमामि दशबलवरहस्तम् // BuSto_69.17

रागद्वेषतनुवर्जितचित्तं कल्पकोटिसमभावितचित्तम् / शीलज्ञानसमभावितचित्तं तं नमामि दशबलवरचित्तम् // BuSto_69.18

पद्मनाभशुभशोभितनाभं पद्मयोनिशुभशोभितनाभम् / ब्रह्मज्योतिसुशोभितनाभं तं नमामि दशबलवरनाभम् // BuSto_69.19

चक्रसुलक्षणभूषितपादं अङ्कुशशक्तिविराजितपादम् / नागयक्षगणवन्दितपादं तं नमामि दशबलवरपादम् // BuSto_69.20

भास्करद्युतिराजितपादं देवदानवगणवन्दितपादम् / सर्वदेवगणवन्दितपादं तं नमामि दशबलवरपादम् // BuSto_69.21

सर्वदेवगणपूजितशीर्षं सूर्यकोटिसमभावितशीर्षम् / दिव्यज्वालज्वलितार्पितशीर्षं तं नमामि दशबलवरशीर्षम् // BuSto_69.22

पुष्पधूपशतपूजितशीर्षं दीपगन्धशतपूजितशीर्षम् / माल्यवस्त्रशतपूजितशीर्षं तं नमामि दशबलवरशीर्षम् // BuSto_69.23

त्रिभुवनधर्मकलाभ्युष्णीषरत्नछत्रमुकुटादिपूजितम् / ये पठन्ति सुगतस्तवमेनं ते लभन्ति शुभमोक्षपथाधिगमम् // BuSto_69.24

श्रीमदार्यावलोकितेश्वरभट्टारकस्य रूपस्तवं समाप्तम् //

digital sanskrit buddhist canon, stotra section, text no. 70: ṣaḍabhijñastotram

रूपलक्षणसंपूर्णो हीनोच्चसमसेवनः / सन्दर्शय सदा दानं नमस्ते दानपारग // BuSto_70.1

शब्दलक्षणसंपूर्णः सुशोभो गुणसागरः / संश्रावय सदा शीलं नमस्ते शीलपारग // BuSto_70.2

गन्धलक्षणसंपूर्णो दिव्यप्राणो विनायकः / संप्रापय जिन क्षान्तिं नमस्ते क्षान्तिपारग // BuSto_70.3

रसलक्षणसंपूर्णः सुजिह्वो धर्मदेशकः / भाषस्व सौगतं धर्मं नमस्ते वीर्यपारगः // BuSto_70.4

स्पर्शलक्षणसंपूर्णः अनिरुद्धो निरीहकः / संस्पर्शय जिन ध्यानं नमस्ते ध्यानपारग // BuSto_70.5

धर्मलक्षणसंपूर्णः सत्त्वेषु समचिन्तकः / प्रज्ञोपायमहाप्राप्त नमस्ते बुद्धिपारग // BuSto_70.6

षडभिज्ञस्तवं यो ऽयं त्रिसन्ध्यं भक्तिमान् पठेत् / संसारबन्धनं हित्वा स याति परमां गतिम् // BuSto_70.7

श्रीमहाबुद्धभट्टारकस्य षडभिज्ञस्तोत्रं समाप्तम् //

digital sanskrit buddhist canon, stotra section, text no. 71: ṣaḍgatistotram

पङ्केरुहस्थाय पदाम्बुजाय बन्धूकपुष्पारुणसुन्दराय / सरोजहस्ताय जटाधराय नमो ऽस्तु तस्मै करूणामयाय // BuSto_71.1

कापुत्रदेशोद्भवमङ्गलाय जिनेन्द्ररूपाय तथागताय / संसारदुःखार्णवपारगाय नमो ऽस्तु तस्मै करूणामयाय // BuSto_71.2

समन्तभद्राय सुरार्चिताय सुवर्णग्रैवेयकभूषिताय / चूडामणिशीर्षधराय तुभ्यं नमो ऽस्तु तस्मै करूणामयाय // BuSto_71.3

सौन्दर्यसान्द्राय वृषासनाय भक्तार्तिहन्त्रे च तथागताय / महार्हरत्नैः परिमण्डिताय नमो ऽस्तु तस्मै करूणामयाय // BuSto_71.4

सत्कण्ठकण्ठाय मनोहराय त्रैलोक्यसंपूजितसम्पदाय / कारुण्यसंपूर्णहृदम्बुजाय नमो ऽस्तु तस्मै करूणामयाय // BuSto_71.5

स्तोत्रं प्रचक्रे भुवि शंखकर्म पुण्यार्थतो यच्छतराजधीमान् / ये ये पठिष्यन्ति नराः प्रयत्नात् ते ते गताः श्रीसुरहर्म्यरम्यम् // BuSto_71.6

श्री आर्यावलोकितेश्वरस्य षड्गतिस्तोत्रं समाप्तम् //

digital sanskrit buddhist canon, stotra section, text no. 72: saptabuddhastotram

उत्पन्नो वन्धुमत्यां नृपतिवरकुले यो विपश्यीतिनाम्ना यस्याशीतिसहस्राण्यमरनरगुरोरायुरासीद् गतानाम् / येन प्राप्तं जिनत्वं दशबलबलिना पोतलावृक्षमूले तं वन्दे ज्ञानवारि प्रणमितसकलं क्लेशवह्निं जिनेन्द्रम् // BuSto_72.1

वंशे पृथ्वीश्वराणां महति पुरवरे यः प्रजातो ऽरूणाक्षो वर्षाणामायुरासीत् सकलगुणनिधेर्यस्य सप्तायुतानाम् / संप्राप्ता येन बोधिः परहितपटुना पुण्डरीकस्य मूले तं वन्दे ज्ञानराशिं शिखिनमृषिवरं प्राप्तसंसारपारम् // BuSto_72.2

यो जातो नोपमायां सुप्रथितयशसामन्वये पार्थिवानामायुः षष्टिसहस्रादभवदुरुमतेर्यस्य संवत्सराणाम् / जित्वा क्लेशानशेषानमृतमधिगतं येन शालस्य मूले तं वन्दे धर्मराजं भुवनहितकरं विश्वभूनामधेयम् // BuSto_72.3

क्षेमावत्यां प्रजातो मनुजपतिसमे यो वशी विप्रवंशे आयुर्वर्षायुतानि प्रवरगुणनिधेरष्टचत्वारि चैव / जैनेन्द्रं येन लब्धं त्रिभववधकरं ज्ञानखड्गेश्वरेण वन्दे ऽहं सिंहकायं सुगतमनुपमं ककुप्छन्दं मुनीन्द्रम् // BuSto_72.4

शोभावत्यां द्विजानां नरपतिमहिते यो ऽन्वये संप्रसूतस् तस्यामायुः सहस्राण्यतिशयवपुषस्त्रिंशदेवं बभूव / बुद्धत्वं येन रत्नाचलवरगुरुणौदुम्बरे प्राप्तमासीद् तं वन्दे शासितारं कनकमुनिमृषिं ध्वस्तमोहान्धकारम् // BuSto_72.5

वाराणस्यां कृषीशक्षितिपतिमहिते विप्रवंशे ऽभिजातो यस्यामायुः सहस्राण्यतिशयमहितं विंशतिर्वत्सराणाम् / येन न्यग्रोधमूले त्रिभवजलनिधिः पोषितो दिव्यगत्या तं वन्दे वन्दनीयं मुनिवरमनघं काश्यपं लोकनाथम् // BuSto_72.6

यो जातः श्रीविशाले कपिलपुरवरे शाक्यराजेन्द्रवंशे यस्यासीदायुरेकंशतमिह शरदां सर्वलोकैकबन्धोः / निर्गत्याश्वत्थमूले नमुचिमपि सता ऽनुत्तरा येन बोधिस् तं वन्दे शाक्यसिंहं सुरनरनमितं बुद्धमादित्यबन्धुम् // BuSto_72.7

जातिं विप्रेतिवंशे नृपवरमहिते केतुमत्यां गृहीत्वा बुद्धत्वं येन लब्धमतिगुणनिधिना नागवृक्षस्य मूले / अष्टावब्दायुतानि क्षपितभगवतो भावि यस्याग्रमायुर् वन्दे मैत्रेयनाथं तुषितपुरवरे भाविनं लोकनाथम् // BuSto_72.8

स्तुत्वा वै सप्तबुद्धान् सकलमुपगतान् सप्तसप्तार्कभासो मैत्रेयं च स्तुवन् वै तुषितपुरगतं भाविनं लोकनाथम् / यत्पुण्यं संप्रसूतं शुभगतिफलदं देहिनामेव सर्वं छित्वा संक्लेशपाशान् मुनय इव चरन् निर्वृतिं स प्रयातु // BuSto_72.9

श्रीसप्तबुद्धस्तोत्रं समाप्तम् //

digital sanskrit buddhist canon, stotra section, text no. 73: saptajinastavaḥ

जगद्गुरुं सुरनरलोकपूजितं कृपापटुं परहितमोक्षदेशकम् / विपश्यिनं त्रिभवमहौघसारगं नमामि तं सुगतगतिं तथागतम् // BuSto_73.1

अनन्तपारे भवसागरे ऽस्मिन् निमज्यमानं प्रसमीक्ष्य लोकम् / प्रकाशितो येन हिताय धर्मो नमो ऽस्तु तस्मै शिखिने जिनाय // BuSto_73.2

वन्दे विश्वभुवं बुद्धं चन्द्रार्काधिकतेजसम् / सागरौघमिवागाघं ज्ञानेन विनयेन च // BuSto_73.3

यस्येन्दुरश्मिप्रतिमैर्यशोभिरलंकृता भाति वसुन्धरेयम् / औदुम्बरं पुष्पमिवाद्भुतं तं वन्दे ककुप्छन्दमहामुनीन्द्रम् // BuSto_73.4

विसारिणा विगतमलेन चेतसा विरागिणा सततहितानुकारिणा / हतं तमो विगतमलेन येन तं सुरार्चितं कनकमुनिं नमाम्यहम् // BuSto_73.5

प्रतप्तचामीकररश्मिगौरं सहस्रसूर्याधिकदीप्ततेजसम् / लोकोत्तमं सर्वजनाभिवन्द्यं वन्दाम्यहं काश्यपनामधेयम् // BuSto_73.6

वाक्यांशुजालैः प्रतिबोध्य लोकं सूर्याशुजालैरिव पद्मषण्डम् / यो निर्वृतः शाक्यमुनिप्रदीपस्तस्मैः नमः परमकारुणिकाय शास्त्रे // BuSto_73.7

मैत्रेयनामा तुषितालयस्थो यस्यैकजन्मान्तरिता हि बोधिः / उत्पत्स्यते यः सुगतः पृथिव्यां सर्वात्मना ऽहं प्रणतो ऽस्मि तस्मै // BuSto_73.8

स्तुत्वा मया सप्तजिनानतीताननागतं चाष्टमबोधिसत्त्वम् / यत्पुण्यमासादितप्रमेयं निरामयास्तेन भवन्तु सत्त्वाः // BuSto_73.9

श्रीसप्तजिनस्तवः समाप्तः //

digital sanskrit buddhist canon, stotra section, text no. 74: saptākṣarastotram

ओम् नमो लोकनाथाय मत्स्येन्द्राय विष्णवे

नमामि जिननाथाय नित्यानित्यविधायिने / निरम्बरविलासाय निर्विकल्पाय ते नमः // BuSto_74.1

मोक्षदाता कृतमोक्षो मोक्षसौख्यप्रदायकः / मेरुमण्डलमध्यस्थमोक्षदाय नमो ऽस्तु ते // BuSto_74.2

लोलकन्दर्पपाशाय लोकेशाय महात्मने / लोकरक्षाय देवाय लोकनाथाय ते नमः // BuSto_74.3

कनकाचलमध्यस्थकिन्नरैरुपपद्यते / कीर्तिहेतोः समाध्येषा कान्तिदं त्वामुपास्महे // BuSto_74.4

नाथमन्त्रसमुज्ज्वालनागाभरणधारिणे / निरवद्याय बुद्धाय बोधिदाय नमो ऽस्तु ते // BuSto_74.5

स्थानरक्षाकृता धीर स्थानभ्रष्टप्रपालक / लोचना-मामकी-तारा-पाण्डराभ्यो नमो नमः // BuSto_74.6

यक्षराक्षसवेतालभुजङ्गभयहारिणे / अमिताभकिरीटाय सिद्धिदाय नमो ऽस्तु ते // BuSto_74.7

भिक्षुरोमसहस्राणि भिक्षुरक्षाय ते नमः / श्लोकाष्टकमिदं पुण्यं कीर्तितं ते समाधिप // BuSto_74.8

श्रीमदार्यावलोकितेश्वरस्य सप्ताक्षरस्तोत्रं समाप्तम् //

digital sanskrit buddhist canon, stotra section, text no. 75: saptavidhānuttarastotram

नमः श्रीलोकनाथाय

अमितरुचिशिरःस्थं पद्मपत्रायताक्षं दुरितकृतविनाशं मोहमाया ऽहिताक्षम् / करधृतकनकाब्जं लोकपालैकदक्षं प्रणमितशिरसा ऽहं नौमि तं लोकनाथम् // BuSto_75.1

अरुणवरुणशोभाबोधिविज्ञानहेतुं मणिमयमुकुटं संसारकाम्भोधिसेतुम् / कृतमनसिजनाशं बोधिसत्त्वादिकेतुं प्रणमितशिरसा ऽहं नौमि तं लोकनाथम् // BuSto_75.2

सरसिजकृतवासं दूरकन्दर्पपाशं सुरनरदनुजाशं पूर्णचन्द्रप्रकाशम् / सुकृतजनविलासं कोटिसूर्यावभासं प्रणमितशिरसा ऽहं नौमि तं लोकनाथम् // BuSto_75.3

उरसि विहितनागं मोचिताशेषरागं भवजलधिविभागं मोक्षसौख्यैकमार्गम् / प्रतपितकनकाङ्गं बोधिबोधैकरागं प्रणमितशिरसा ऽहं नौमि तं लोकनाथम् // BuSto_75.4

जिनवरसुतराजं मुक्तिमालाविराजं सुललितफणिराजं कीर्णिताचाभिराजम् / प्रमुदितवलिराजं पालितामर्त्यराजं प्रणमितशिरसा ऽहं नौमि तं लोकनाथम् // BuSto_75.5

धृतमधुकररूपं क्षुप्तिपासान्तकूपं सुचरितहयरूपं सिंहलादन्तभूपम् / अगुरुसुरभिधूपं धारिताशेषरूपं प्रणमितशिरसा ऽहं नौमि तं लोकनाथम् // BuSto_75.6

त्रिविधविधृतपापं मे हरन्तं त्रितापं प्रतिदिनमितिजापं देवचक्रे विलापम् / निरयभयकलापं भेदकाज्ञानचापं प्रणमितशिरसा ऽहं नौमि तं लोकनाथम् // BuSto_75.7

विहितशुभजनानां मुक्तितापोद्यतानां विगलितकलुषाणां भक्तिपूजारतानाम् / वरकुशलसमूहं संप्रपेदे स्वभक्त्या प्रणमितशिरसा ऽहं नौमि तं लोकनाथम् // BuSto_75.8

दशबलकृतसिद्धिं संवधे बुद्धबोधिं जननमरणभीतं मारपाशाभिनीतम् / मनसि मलिनवृत्ते पूरिताज्ञानवित्ते प्रणमितशिरसा ऽहं नौमि तं लोकनाथम् // BuSto_75.9

प्रवरसुगतरत्नं धर्मकायं संसंघं क्षरणमिह प्रयामि कारितानङ्गभङ्गम् / प्रमुदितमनसाप्तं बोधिलाभैकयत्नं प्रणमितशिरसा ऽहं नौमि तं लोकनाथम् // BuSto_75.10

श्रीलोकनाथचरणाम्बुजभक्तिपद्मपीयूषनन्दरचितानतिविस्तराढ्यम् / यत्सप्तधार्चनयुतं सरसातिहृद्यं सौख्यावतीगमनमार्गकरं तु सद्यः // BuSto_75.11

स्तुत्वा लोकगुरुं मुनीश्वरमिमं सर्वार्थसिद्धिप्रदं यत्पुण्यं समुपार्जितं व्रजतु तत्पुण्येन सौख्यावतीम् / श्रीलोकेश्वरपादपङ्कजरसोल्लासैकहर्षोदितं लोकक्लेशहरं सुदुर्जयवरं जित्वा प्रमुक्तामलम् // BuSto_75.12

श्रीमदार्यावलोकितेश्वरस्य सप्तविधानुत्तररस्तोत्रं समाप्तम् //

digital sanskrit buddhist canon, stotra section, text no. 76: ṣaṭpāramitāstotram

दानबलेन समुद्गतबुद्धो दानबलाधिपता नरसिंहे / दानबलेक्षक श्रूयति शब्दः कारुणिकेन पुरे प्रविशन्तम् // BuSto_76.1

शीलबलेन समुद्गतबुद्धो शीलबलाधिपता नरसिंहे / शीलबलेक्षक श्रूयति शब्दः कारुणिकेन पुरे प्रविशन्तम् // BuSto_76.2

क्षान्तिबलेन समुद्गतबुद्धो क्षान्तिबलाधिपता नरसिंहे / क्षान्तिबलेक्षक श्रूयति शब्दः कारुणिकेन पुरे प्रविशन्तम् // BuSto_76.3

वीर्यबलेन समुद्गतबुद्धो वीर्यबलाधिपता नरसिंहे / वीर्यबलेक्षक श्रुयति शब्दः कारुणिकेन पुरे प्रविशन्तम् // BuSto_76.4

ध्यानबलेन समुद्गतबुद्धो ध्यानबलाधिपता नरसिंहे / ध्यानबलेक्षक श्रुयति शब्दः कारुणिकेन पुरे प्रविशन्तम् // BuSto_76.5

प्रज्ञबलेन समुद्गतबुद्धः प्रज्ञबलाधिपता नरसिंहे / प्रज्ञबलेक्षक श्रूयति शब्दः कारुणिकेन पुरे प्रविशन्तम् // BuSto_76.6

श्रीषट्पारमितास्तोत्रं समाप्तम् //

digital sanskrit buddhist canon, stotra section, text no. 77: ṣaṭtriṃśatsaṃvarastutiḥ

श्रीसंवरं महावीरं वाराहीं चापि योगिनीम् / नमामि सर्वभावेन योगिनीजालनायकम् // BuSto_77.1

डाकिनीं च तथा लामां खण्डरोहां च रूपिणीम् / चतुरो ऽमृतभाण्डांश्च बोधिचित्तेन पूरितान् // BuSto_77.2

पुल्लीरमलयोद्भूतं खण्डकपालसंवरम् / प्रचण्डालिङ्गणं वीरं नमामि शिरसि स्थितम् // BuSto_77.3

जालन्धरात्समुत्पन्नं महाकंकालसंवरम् / चण्डाल्यालिङ्गणं वीरं शिखादेशे स्थितं नमे // BuSto_77.4

ओडियानात्समुद्भूतं कंकालनाम संवरम् / प्रभावतीसमापन्नं सव्यकर्णस्थितं नमे // BuSto_77.5

अर्बुदपीठमध्यस्थं संवरं विकटदंष्ट्रिणम् / महानासासमापन्नं पृष्ठदेशे स्थितं नमे // BuSto_77.6

गोदावरीसमुद्भूतं सुरावीरिणसंवरम् / संपुटं वीरमत्याख्या वामकर्णस्थितं नमे // BuSto_77.7

रामेश्वरोद्भवं वीरं अमिताभाख्यसंवरम् / खर्वरोसंपुटं नाथं भ्रुवोर्मध्यस्थितं नमे // BuSto_77.8

देवीकोटोद्भवं नाथं वज्रप्रभाख्यसंवरम् / लङ्केश्वरीसमापन्नं नमामि नेत्रकोणगम् // BuSto_77.9

मारवाख्यात्समुत्पन्नं वज्रदेहाख्यसंवरम् / द्रुमच्छायासमापन्नं नमामि स्कन्धदेशगम् // BuSto_77.10

कामरूपोद्भवं वीरं अङ्गुलिकाख्यसंवरम् / ऐरावतीसमापन्नं नमामि कक्षदेशगम् // BuSto_77.11

ओकारस्थानसंजातं वज्रजटिलसंवरम् / भैरवालिङ्गणं वीरं तनुयुगोद्भवं नमे // BuSto_77.12

त्रिशकुन्यद्भवं नाथं महावीराख्यसंवरम् / वायुवेगासमापन्नं नाभिदेशस्थितं नमे // BuSto_77.13

कौशलायां समुद्भूतं वज्रहूंकारसंवरम् / सुराभक्षीसमापन्नं नमामि नासिकाग्रजम् // BuSto_77.14

कलिङ्गपीठसंजातं सुप्रभानाम संवरम् / श्यामादेवी समापन्नं नमामि मुखभागजम् // BuSto_77.15

लम्पाकस्थानसंभूतं वज्रप्रभाख्यसंवरम् / सुभद्रालिङ्गणं वीरं कण्ठदेशोद्भवं नमे // BuSto_77.16

काञ्च्याख्यपीठसंजातं महाभैरवसंवरम् / हयकर्णासमापन्नं नमामि हृदिमध्यगम् // BuSto_77.17

हिमालयोद्भवं वीरं विरूपाक्षाख्यसंवरम् / खगाननासमापन्नं मेढ्रस्थानगतं नमे // BuSto_77.18

प्रेतपुर्यां समुद्भूतं महाबलाख्यसंवरम् / चक्रवेगासमापन्नं लिङ्गस्थानगतं नमे // BuSto_77.19

गुहदेशात्समुद्भूतं रत्नवज्राख्यसंवरम् / खण्डरोहासमापन्नं नमामि गुदमध्यगम् // BuSto_77.20

सौराष्ट्रदेशसंभूतं हयग्रीवाख्यसंवरम् / शौण्डिन्यालिङ्गणं वीरं नमामि उरुमध्यगम् // BuSto_77.21

सुवर्णद्वीपसंजातम् आकाशगर्भसंवरम् / चक्रवर्मिणीसमापन्नं जङ्घामध्यगतं नमे // BuSto_77.22

नगरपीठमध्यस्थं श्रीहेरुकाख्यसंवरम् / सुवीरालिङ्गणं वीरं नमाम्यङ्गुलिवर्तिनम् // BuSto_77.23

सिन्धुदेशसमुद्भूतं पद्मनृत्याख्यसंवरम् / महाबलासमापन्नं पादपृष्ठगतं नमे // BuSto_77.24

मरुतीपीठसंजातं वैरोचनाख्यसंवरम् / चक्रवर्तिनीसमापन्नं नमाम्यङ्गुष्ठमध्यगम् // BuSto_77.25

कुलतायाः समुद्भूतं वज्रसत्त्वाख्यसंवरम् / महावीर्यासमापन्नं जानुद्वयगत नमे // BuSto_77.26

पूर्वद्वारे स्थितं वीरं वज्रचण्डाख्यसंवरम् / काकास्यालिङ्गणं वीरं नमामि सुरनायकम् // BuSto_77.27

उत्तरद्वारमध्यस्थं वज्रानलाख्यसंवरम् / उलूकास्यासमापन्नं नमामि यक्षनायकम् // BuSto_77.28

पश्चिमद्वारमध्यस्थं वज्रोष्णीषाख्यसंवरम् / श्वानास्यासम्पुटं वीरं नमामि पन्नगाधिपम् // BuSto_77.29

दक्षिणद्वारमध्यस्थं वज्रकुण्डलिसंवरम् / शूकरास्यासमापन्नं नमामि यमनायकम् // BuSto_77.30

आग्नेयदिग्विमात्रस्थं वज्रयक्षाख्यसंवरम् / यमदाढीसमापन्नं नमामि वह्निनायकम् // BuSto_77.31

नैरृत्यदिग्विभाषस्थं वज्रकीलाख्यसंवरम् / यमदूतीसमापन्नं नमामि राक्षसाधिपम् // BuSto_77.32

वायव्यदिग्विभागस्थं वज्रमहाबलाह्वयम् / यमदंष्ट्रीसमापन्नं नमामि पवनाधिपम् // BuSto_77.33

ईशानदिग्विभागस्थं वज्रभीषणसंवरम् / यममथनीसमापन्नं नमामि भूतनायकम् // BuSto_77.34

एतान्देवान् नमस्यामि दिग्विदिक्षु सुसंस्थितान् / वीरान् वीरेश्वरीः सर्वा हेरुकं परमेश्वरम् // BuSto_77.35

सहजानन्दात्मकं देवं विशुद्धं ताण्डवान्वितम् / डाकिनीजालमध्यस्थं प्रत्यात्मवेद्यगोचरम् // BuSto_77.36

स्तुत्वेदं देवतीचक्रं यन्मयोपार्जितं शुभम् / तेन पुण्येन लोको ऽस्तु वज्रडाकपरायणः // BuSto_77.37

श्री षट्त्रिंशत्संवरगणचक्रमण्डलस्तुतिः समाप्ताः //

digital sanskrit buddhist canon, stotra section, text no. 78: sattvārādhanagāthā ārya nāgārjunakṛtā

सत्त्वार्थमेव मयि तिष्ठति सत्त्वश्रद्धा नान्यत्र सा, ह्यहमहो ऽधिगृहीतसत्त्वः / चर्या ऽधमा करुणया रहिता भवेद् या संभाव्यते करुणयैव प्रहाणमस्याः // BuSto_78.1

सत्त्वेषु यस्य नितरां करुणाप्रवृत्तिराराधकः स मम शासनमर्मवेत्ता / शीलं श्रुतिश्च करुणा च सुधोश्च यस्य नित्यं स एव सुगतार्चनकृन्निगद्यते // BuSto_78.2

कल्याणकारमधिकृत्य गतो ऽस्मि सिद्धिं सत्त्वार्थमेव तनुमेष समुद्वहामि / नैवं क्रियेत यदि सत्त्वहितं मया चेद् व्यर्थं करोमि तनुपोषणमन्नपानैः // BuSto_78.3

सत्त्वान् हिनस्ति मनसापि हि यः स कस्मान्मामेव संश्रयति यो मयि निर्व्यपेक्षः / पूजा तु सा भवति सत्त्वहितेक्षणापि पूज्यस्य या मनसि तुष्टिमुपाददाति // BuSto_78.4

हिंसात्मिका परविहेठनसम्भवा वा पूजा न पूज्यमनुगच्छति संस्कृतापि / दाराः सुताश्च विभवश्च महत्त्व(च्च) राज्यं मांसं च शोणितवसे नयते शरीरम् // BuSto_78.5

येषां प्रियत्वमधिकृत्य मयोज्झितं यत् यस्तान् विहेठयति तेन विहेठितो ऽहम् / सत्त्वोपकारपरमा हि ममाग्रपूजा सत्त्वापकारपरया च पराभवः स्यात् // BuSto_78.6

सत्त्वान् प्राप्य मया कृतानि कुशलान्याराधितास्तायिनः प्राप्ताः पारमिताश्च सत्त्वसमितेरेवार्थमातिष्ठता / सत्त्वार्थेन समुद्यतेन मनसा मारस्य भग्नं बलं सत्त्वैरेव तथा तथा विरचितं येनास्मि बुद्धः कृतः // BuSto_78.7

कस्मिन् वस्तुनि सिद्ध्यतामिह कृपा मैत्री च क्वालम्बतां क्वोपेक्षामुदितादिवस्तुविषयः कस्मिन् विमोक्षादयः / कस्यार्थे करुणापरेण मनसः क्षान्तिश्चिरं भाविता न स्युर्जन्मनि जन्म(नि) प्रियविधौ मित्रं यदि प्राणिनः // BuSto_78.8

सत्त्वा एव गजादिभावगतयो दत्ता मया ऽनेकशः सत्त्वा एव च पात्रतामुपगतं देयं मया ग्राहिताः / सत्त्वैरेव विचित्रभावगमनादस्मत्कृपा वर्धिता सत्त्वानेव न पालयामि यदि चेत् कस्यार्थमर्थः कृतः // BuSto_78.9

संसारे व्यसनाभिघातबहुले न स्युर्यदि प्राणिनो जन्मावर्तविडम्बनेन यमलोकं प्राप्य सात्मीकृताः / संसारात्तरणं च सौगतमिदं महात्म्यमत्यद्भुतं कस्यार्थेन समीहितं यदि न मे सत्त्वा भवेयुः प्रियाः // BuSto_78.10

यावच्चेदं ज्वलति जगतः शासनं शासनं मे तावत् स्थेयं परहितपरैरात्मवद्भिर्भवद्भिः / श्रुत्वा श्रुत्वा मम विरचितं सत्त्वहेतोरखिन्नैः खेदः कार्यो न च तनुमिमं मुक्तसारं भवद्भिः // BuSto_78.11

सम्यक्सम्बुद्धभाषिता सत्त्वाराधनगाथा समाप्ता //

digital sanskrit buddhist canon, stotra section, text no. 79: śākyasiṃhastotram brahmaṇā kṛtam

नमः शाक्येन्द्राय /

नमो ऽस्तु लोकाधिप शाक्यराज सद्धर्मपङ्केरुहभास्कराय / क्लेशारिवर्गाभिहताय तुभ्यं संबोधिदीपैर्हतमोहजाल // BuSto_79.1

ब्रह्मर्षिराजर्षिसुरर्षिसङ्घैः प्राप्तुं न यच्छक्यमनेकरत्नैः / प्राप्तं त्वया ज्ञानमनन्तधर्मं येनाकरिष्यः सकलस्य हैत्यम् // BuSto_79.2

प्रवर्तितं येन सुधर्मचक्रं यस्मिन् मही सोदधिशैलराजा / आनन्दितेव चलिता ह्यजस्रं नमो ऽस्तु तुभ्यं त्रिभवाधिपाय // BuSto_79.3

यस्मिंश्च वातास्त्रिगुणेन युक्ता ववुर्नभस्तो निपतन्ति वस्त्राः(र्षाः) / विचित्रपुष्पाणि सुगन्धि वारि नमो ऽस्तु तुभ्यं जगदेकनाथ // BuSto_79.4

अनन्यजेयो नमुचिर्वरिष्ठैः सैन्यैर्वृतः कोटिशतप्रमाणैः / जितं त्वयैकेन निरायुधेन नमो ऽस्तु तुभ्यं बलवर्तनाय // BuSto_79.5

येन त्रिलोकीं प्रतिपालितुं तन्मायासुकज्जाज्वलयन्(?) प्रजातम् / स्वभावतो जन्मजरान्तकारिणे नमो ऽस्तु तुभ्यं जगदेकनाथ // BuSto_79.6

त्रैधातुलोकेषु विकासितुं तां संबोधिचर्यामपवर्गसेतुम् / तुषितायुतो जन्म चकार मर्त्ये नमो ऽस्तु तुभ्यं वरबोधिराज // BuSto_79.7

सम्यक् प्रतिज्ञां प्रतिकृत्य येन संप्रेष्यते मोक्षपुरे जनौघः / तदर्थमायासि च मर्त्यलोके नमो ऽस्तु तुभ्यं सुमहत्प्रतिज्ञ // BuSto_79.8

यश्चाष्टकं ब्रह्मकृतं सुपुण्यं पठिष्यति शाक्यवराग्रतः स्थः / दुःखं महापापभयं च हित्वा श्रीश्रीघने यास्यति पत्तने मुदा // BuSto_79.9

ब्रह्मणा कृतं श्रीशाक्यसिंहस्तोत्रं समाप्तम् //

digital sanskrit buddhist canon, stotra section, text no. 80: śākyasiṃhastotram

छन्दो ऽमृतोद्धृतम्

नमामि तं भिक्षुगणैरूपेतं तथागतैर्वृक्षतले निषण्णम् / अनन्तरोदीरितलक्ष्मभाजौ पादौ यदीयावुपजातयस्ताः // BuSto_80.1

शाक्येन्द्रवंशाललितावतंसमंशाधिकाभं कनकाधिकाभम् / नमामि बुद्धं ह्युपजातिसिद्धं सर्वार्थसिद्धाख्यकुमारवर्यम् // BuSto_80.2

नमामि नित्यं निरवद्यवृत्तं निरंजनं निर्मलदेहरूपम् / निःशेषसत्त्वोद्धरणैकचित्तं चन्द्राननं शुभ्रपदारविन्दम् // BuSto_80.3

शौद्धोदनिं गौतमिपालनीयं मायासुतं मारजितं महान्तम् / महेश्वराद्यैर्महनीयमूर्तिममेयमाहात्म्यममेयधर्मम् // BuSto_80.4

भवोदधेस्तीर्णमनन्तपुण्यं भवादिदेवैरभिवन्द्यपादम् / अनन्तभव्याकृतिभावनीयं तं नौमि भव्योज्ज्वलभूषिताङ्गम् // BuSto_80.5

बभाण वंशस्थविरो नृपाधिपो जनान् प्रतीत्याह्वयतात्मजं मम / कृतारिभङ्गं जिनराजमीश्वरं गतं षडब्दं च वियोगभावयोः // BuSto_80.6

भजस्व वंशस्थविरं मुनीश्वरं महावने वृक्षतले शुचिस्थले / जगद्धितं यज्जनन जरान्तकं जगज्जनन्या वरदक्षपार्श्वजम् // BuSto_80.7

शाक्येन्द्रवंशोदधिचन्द्रमुद्गतं श्रीशाक्यसिंहं चतुराननैः स्तुवन् / प्राशिष्ट ब्रह्मा चतुराननं स्वकं चतुर्गुणं पुण्यमवाप्तमित्यहो // BuSto_80.8

दैत्येन्द्रवंशाग्निरसौ जनार्दनो द्वाभ्यां विधायाञ्जलिमम्बुजासनम् / दोष्णाममंसच्चतुरश्चतुर्भुजाद् द्वैगुण्यमाप्तं सुकृतं मयेति // BuSto_80.9

छन्दो ऽमृतोद्धृतं श्रीशाक्यसिंहस्तोत्रं समाप्तम् //

digital sanskrit buddhist canon, stotra section, text no. 81: śākyasiṃhastotram durgatipariśodhanoddhṛtam

ओम् नमः शाक्यसिंहाय

नमस्ते शाक्यसिंहाय धर्मचक्रप्रवर्तक / त्रैधातुकं जगत्सर्वं शोधयेत् सर्वदुर्गतिम् // BuSto_81.1

नमस्ते वज्रोष्णीषाय धर्मधातुस्वभावक / सर्वसत्त्वहितार्थाय आत्मतत्त्वप्रदेशक // BuSto_81.2

नमस्ते रत्नोष्णीषाय समन्तात्तत्त्वभावनैः / त्रैधातुकं स्थितं सर्वमभिषेकप्रदायक // BuSto_81.3

नमस्ते पद्मोष्णीषाय स्वभावप्रत्यभाषक / आश्वासयन्यः सत्त्वेषु धर्मामृतं प्रवर्तयेत् // BuSto_81.4

नमस्ते विश्वोष्णीषाय स्वभावकृतमनुस्थित / विश्वकर्मकरो ह्येष सत्त्वानां दुःखशान्तये // BuSto_81.5

नमस्ते तेजोष्णीषाय त्रैधातुकमभाषक / सर्वसत्त्व उपायेषु सत्त्वदृष्टं करिष्यते // BuSto_81.6

नमस्ते ध्वजोष्णीषाय चिन्तामणिध्वजाधर / दानेन सर्वसत्त्वानां सर्वाशापरिपूरक // BuSto_81.7

नमस्ते तृष्णोष्णीषाय क्लेशोपक्लेशछेदन / चतुर्मारबलं भग्नं सत्त्वानां बोधिप्राप्तये // BuSto_81.8

नमस्ते छत्रोष्णीषाय आतपत्रं सुशोभनम् / त्रैधातुक जगत्सर्वं धर्मराजत्वप्रापकम् // BuSto_81.9

लास्या माला तथा गीता नृत्या देवीचतुष्टयम् / पुष्पा धूपा च दीपा च गन्धादेवी नमो ऽस्तु ते // BuSto_81.10

द्वारमध्यस्थिता ये च अंकुशपाशफोटकाः / श्रद्धाभावविनिर्ज्ञातं द्वारपाल नमो ऽस्तु ते // BuSto_81.11

वेदिकादौ स्थिता ये च चतस्रो द्वारपालिकाः / मुदितादौ दश स्थित्वा बोधिसत्त्व नमोस्तु ते // BuSto_81.12

ब्रह्मेन्द्ररुद्रचन्द्रार्का लोकपालाश्चतुर्दिशम् / अग्नी राक्षसवायुश्च भूताधिपते नमोस्तु ते // BuSto_81.13

अनेन स्तोत्रराजेन संस्थितो मण्डलाग्रतः / वज्रघण्टाघरो मन्त्री इदं स्तोत्रमुदाहरेत् // BuSto_81.14

दुर्गतिपरिशोधनोद्धृतं श्रीशाक्यसिंहस्तोत्रं समाप्तम् //

digital sanskrit buddhist canon, stotra section, text no. 82: śākyasiṃhastotram navagrahakṛtam

प्रणमामि जिनं सुगतं सततं तपनीयहिरण्यशरीरच्छविम् / वरचक्रविभूषितपाणितलं ससुरासुरमानुषपापहरम् // BuSto_82.1

प्रणमामि मुनीन्द्रगुरुं ललितं सतताकुलनिर्जितमारबलम् / दशपारमिताप्रतिबोधकरं चतुर्रार्यविबोधकरं सुकरम् // BuSto_82.2

प्रणमामि हितङ्करदेवनरं सनरामरपूजितदेववरम् / अमरादिकषड्गतिहैत्यकरं सजराजनिमृत्युभयादिहरम् // BuSto_82.3

प्रणमामि सुखाकरबोधिभरं स्वसुखं प्रददौ करुणाशयतः / परदुःखमसह्य चकार जनुर्गतदोषनिराकुलशाक्यकुले // BuSto_82.4

प्रणमामि च लोकहिताय गृहं विजहौ पितरं रमणीसहितम् / हयकण्ठकछन्दकदेववृतो मुदितो ऽभ्यगमत् सुवने विजने // BuSto_82.5

प्रणमामि तपोवनसुभ्रमितं प्रचकार च यस्तु महर्षिगणान् / चतुरार्यकब्रह्मविहारपरान् सुगतस्मरणैकतपोव्रतिकान् // BuSto_82.6

प्रणमामि महाद्रुममूलवरे सुतृणासनसंश्रितवज्रधरम् / शतकोटिसुमारबलास्त्रहरं शतसंख्यतथागतपुत्रवृतम् // BuSto_82.7

प्रणमामि च मल्लिकपञ्चशता वणिजः प्रतिपालनमेव कृताः / वणिजार्पितपञ्चसुधानयकं शुभपायसभोजनभक्षकृतम् // BuSto_82.8

प्रणमामि सुवर्तितधर्मवरं मृगदाववने चतुरासनके / विधिशक्रसुरासुरलोकवृतं सुशरीरमहोज्ज्वलसर्वदिशम् // BuSto_82.9

गुरुनिर्मितकं सुगतस्तवकं पठनं कुरुते किल यो मनुजः / ग्रहरोगभयं नहि तस्य सदा स तु यास्यति मोक्षपुरे सुपुरे // BuSto_82.10

आदित्यादिनवग्रहकृतं श्रीशाक्यसिंहस्तोत्रं समाप्तम् //

digital sanskrit buddhist canon, stotra section, text no. 83: śākyasiṃhastotram śaṅkarakṛtam

नमामि सौगतं जिनं लसद्वितानभासुरं सहस्रसूर्यरोचिषं शशाङ्ककोटिनिर्मलम् / सरोमकूपमण्डलाद् गलत्सुसूक्ष्मतेजसं सहस्रनेमिचक्रिताङघ्रिपद्मपाणिशोभितम् // BuSto_83.1

भजामि लोकनायकं सशोकरोगनाशकं जराविपद्भयान्तकं भवार्णवप्रतारकम् / प्रबुद्धपङ्कजासनं विबुद्धबोधिकाननं त्रिलोकलोकभावनं जगत्त्रयैकपावनम् // BuSto_83.2

नमो ऽस्तु पालभुं जगच्चकार जन्म मानवं विशुद्धशाक्यसागरे पयोनिधौ शशी यथा / कथासुधामयो ऽधुना विनोदयिष्यते भवान् त्रिजालमोहतामसं विनाशयिष्यसे ज्वलन् // BuSto_83.3

स्थिताय बोधिमण्डपे हिताय लोकसंचय जिताय मारसैन्यकं श्रिताय सत्तृणासनम् / सुजातशाक्यभूपतेर्युताय पारमार्थकैर्वृताय बोधिसंवरैर्नमो ऽस्तु धर्मराज ते // BuSto_83.4

भजामि भव्यभावुकं भवस्य भावभेदकं सुबोधिवैभवोद्भवं सुभाद्रिकं शुभांशिकम् / भवौघभारभेदितुं बभार बोधिभारकं सुभद्रभानुभास्वरं सुभावितं शुभावहम् // BuSto_83.5

जिनेन्द्रमूलमण्डपे लसद्वितानविस्तृते सहस्रकल्पपादपे प्रपूर्णवत्प्रशोभिते / हिरण्यरत्नवेदिकाकुशासनस्थितं विभुं नमामि शाक्यसौगतं तथागतं वरं सदा // BuSto_83.6

पठन्ति ये जिनाग्रतो विनिर्मितं हरेण तत् सुपञ्चपञ्चचामरं त्रिकालमेव मङ्गलम् / सुकीर्तिधर्मसंयुतं लसन्ति सप्त वृद्धयो व्रजन्ति ते सुखावतीं सुखेन सत्सुखावतीम् // BuSto_83.7

शङ्करकृतं श्रीशाक्यसिंहस्तोत्रं समाप्तम् //

digital sanskrit buddhist canon, stotra section, text no. 84: śākyasiṃhastotram surapatikṛtam

नौभि श्रीशाक्यसिंहं सकलहितकरं धर्मराजं महेशं सर्वज्ञं ज्ञानकायं त्रिमलविरहितं सौगतं बोधिराजम् / धर्माधारं मुनीन्द्रं दशबलबलिनं श्रीघनं विश्वरूपं संबुद्धं लोकनाथं सकलभयहरं संस्थितं मर्त्यलोके // BuSto_84.1

यस्त्वं धर्माधिमेशं(पेशः) सकलजिनसुतैः संश्रितः श्वेतकेतुरित्याख्यां बोधिहेतुस्तदनु च तुषिता चागता बोधिराज / मैत्रेयं स्थापयित्वा प्रमुदितमनसं स्वासने चाभिषिञ्च्य मायागर्भे पवित्रे ऽशुचिमलरहिते रत्नव्यूहे निवेश // BuSto_84.2

गर्भे स्थित्वा ऽपि यस्त्वं सकलहितकरीं धर्मव्याख्यां करोषि काले मातुः सुकक्षात्सकलनिजकरैः काशयत् संप्रजातः / लोकाचारं च कृत्वा विहितदशविधिं वै विवाहादि तत्तत् त्यक्त्वा सर्वांश्च राज्यं सकलजनहिते निर्गतं त्वां नमे ऽहम् // BuSto_84.3

ऊर्णाकोशाच्च यस्य प्रतिदिनमसकृत् दक्षिणावर्तरोचिः प्रोद्यद्देदीप्यमानत्रिभुवनकुहरध्वस्तमोहान्धकारम् / चत्वारिंशत्सुदन्तोद्गलितकरचयैर्भापयन्नारकीयान् प्रोद्धृत्वा स्वर्गलोके सुरतरुकलिते स्थापिता येन वन्दे // BuSto_84.4

यत्पाणी चक्रचिह्नावभिमतफलदौ दानपारंगतत्वोद्यत्कान्ता भूमिदेवी स्वगणपरिवृता भेदयित्वा ऽवनिं ताम् / स्थित्वाग्रे पूजयित्वा नमुचिमभिगतं भर्त्सयित्वा द्विषन्तं साक्षीभूता निलीना प्रणमितशिरसा त्वां नमे ऽहं जिनेन्द्रम् // BuSto_84.5

यस्योद्ग्रीवस्य चाग्रे विधिहरमधुहृल्लोकसंस्थैः प्रवीणैर् द्रष्टुं नैवाभिशक्त्या किमु मनुजपुरे वासितैर्मादृशैश्च / ब्रह्माण्डं लङ्घयित्वा तरणिशशधरौ द्यौश्च नक्षत्रलोकं ऊर्ध्वं लोकोत्तराख्ये निजभुवनवरे भासितं त्वां नमे ऽहम् // BuSto_84.6

यद्वक्त्रं पङ्कजाभं सुरदनवसनाकर्णिकाकेसराढ्यं ब्रह्माण्डं जूम्भते ऽस्मिन् भुवनगणवृत्तं संश्रितं कर्णिकावत् / दृष्ट्वा संमूर्च्छितो ऽभून्नमुचिरनुचरैस्त्रासि सर्वज्ञनाथ कृत्वा केचित्प्रयाताः शरणमभिमतं श्रीघनं त्वां नमे ऽहम् // BuSto_84.7

संख्याज्ञानप्रवीणास्त्रिभुवनसदने पण्डिता ये वसन्ति तैः सर्वैर्मीलयित्वा यदि तव महिमा वर्ण्यते कल्पकालम् / पारं गन्तुं समर्था नहि निखिलगुणक्षीरसिन्धोः कथञ्चिद् एकाकी किं समर्थास्तदपि मम मनो बोधनार्थं नमे त्वाम् // BuSto_84.8

पठ्यन्ते स्तोत्रमेतत्सुरपतिरचितं स्रग्धरावृत्तसंज्ञं शक्राद्या लोकपालाः प्रतिपदनुचराः संकरिष्यन्ति रक्षाम् / सौख्यं भुक्त्वेह लोके तदनु सुरपतेः कल्पवृक्षाभिकीर्णे स्थित्वा गच्छन्ति चान्ते सुगतसुतमहीं सर्वलौकैकगम्याम् // BuSto_84.9

सुरपतिकृतं श्रीशाक्यसिंहस्तोत्रं समाप्तम् //

digital sanskrit buddhist canon, stotra section, text no. 85: śākyasiṃhastotram viṣṇukṛtam

ओम् नमः सर्वज्ञाय

नमे श्रीघन त्वां सदाभावभक्तो भवाम्भोधिसेतुं लसन्मोक्षहेतुम् / त्रिधातुं विधातुं सुरक्षां विरक्षां सुदक्षं सुकक्षां सुजातं सुदान्तम् // BuSto_85.

नमे दानशीलक्षमाध्यानवीर्यं महज्ज्ञानपारंगतं सौगतत्वम् / चतुर्ब्रह्मवैहारलोकोद्धरन्तं चतुःसत्यधर्मोपदेशं सुवेशम् // BuSto_85.2

नमे बोधिराजं सुगम्ये विराजंसुरम्ये वने देवराजादिगम्यम् / चतुर्थासनस्थं हितार्थं दिशन्तं कृतानेकसुस्थं जगद्रक्षणस्थम् // BuSto_85.3

चतुर्मारलोकं महद्वीर्यवन्तं जयन्तं हसन्तं त्रिजालं च कालम् / क्षमानद्धदेहं नमे मुक्तगेहं त्रिलोक्यैकनाथं तथा शाक्यनाथम् // BuSto_85.4

नमे मारसैन्यं जितं येन सर्वं निरस्त्रेण साहाय्यमुक्तेन नूनम् / क्षमावर्म मैत्रीधनुर्धारिणा च जगत्पालितुं बोधिवृक्षस्थितेन // BuSto_85.5

नमे शीतव्यञ्जैर्लसद्देहगेहं जने स्नेहवन्तं वने गेहवन्तम् / युतं द्वाधिकैस्त्रिंशकैर्लक्षणाख्यैर्महादुर्लभं त्रैभवे लोकपूज्यम् // BuSto_85.6

नमे धर्ममेघास्थितं सुप्रतिष्ठं कलौ नाथहीने भवेयं सनाथः / तथा पालितुं स्वां प्रतिज्ञां चकार जनिं शाक्यवंशे महीपावतंसे // BuSto_85.7

नमे भाग्यतो लभ्यते दर्शनं ते तथा भाग्यभाजो स्वयमेति बुद्धिः / स्थितो धर्ममेघे कथं दर्शनं स्याद् विहीना न तत्राभिगन्तुं प्रशक्ताः // BuSto_85.8

इदानीं भवत्पादपद्मोत्थितेन रजःपुञ्जकेन त्रिलोकं पवित्रम् / तथास्माच्छिरांसि पवित्राणि सत्यं चरिष्यामि बोधिं भवच्छासनेन // BuSto_85.9

भुजङ्गप्रयातं कृतं माधवेन पठेद् यो जिनस्याग्रतस्थो हि नित्यम् / सदा मङ्गलं तस्य गेहे सुदेहे प्रसन्नाश्च रक्षां करिष्यन्ति बुद्धाः // BuSto_85.10

त्रिजालं च छित्वा सुखानि प्रभुक्त्वा तथा दानशीलादिपारंगताश्च / महाबोधिलब्धा जगत्पालक्षोदं गमिष्यन्ति चान्ते सुखावत्युपाख्याम् // BuSto_85.11

श्रीशाक्यसिंहस्य विष्णुकृतं भुजङ्गप्रयातस्तोत्रं समाप्तम् //

digital sanskrit buddhist canon, stotra section, text no. 86: śākyasiṃhastotram yaśodharākṛtam

एषो हि भवतस्तातो जन्ममृत्युजरान्तकः / सर्वार्थसिद्धनाम्नेति शाक्यसिंहो ऽधुना सुत // BuSto_86.1

यस्य छायामुपाश्रित्य दिव्यातिसुन्दरो भवेः / द्वात्रिंशल्लक्षणधरं पितरं दर्शयाधुना // BuSto_86.2

चतुरशीतिसाहस्रं स्त्रीणां विहाय निर्मदः / तपोवनमगाद् यो ऽसौ वन्दयैनं महर्द्धिकम् // BuSto_86.3

सप्तरत्नानि राज्यं च महैश्वर्यपदं वरम् / हित्वा प्रव्रजितो यो ऽसौ तं दर्शय जगद्गुरुम् // BuSto_86.4

मायाख्यायाः पितामह्या यो ऽजनद्दक्षकुक्षितः / लुम्बिन्यामुदयात् सूर्य इव तं पितरं नम // BuSto_86.5

अभयायाः कुलेश्वर्या येन पादाम्बुजे नतम् / त्रैधातुकाधिपं देवं पितरं त्वं सदा नम // BuSto_86.6

विश्वामित्रमुपाध्यायं यो ऽयोजयत् सुसंवरे / बालक्रीडाभिरक्तात्मा तातमेनं सदा नम // BuSto_86.7

जम्बूतरुसमासीनं पञ्चर्षयो हतत्विषः / निर्मानिनः प्राभजन् यमेनं तातं सदा नम // BuSto_86.8

पितरं बोधयित्वा यो ऽत्याजयत्तु षडंशकम् / दयाकरं जगद्वन्द्यं जनकं प्रणमात्मज // BuSto_86.9

यो ऽजयद्देवदत्तादीन् मानिनः सर्ववित् सुधीः / सर्वफलादिदं विज्ञं सुधियं जनकं भज // BuSto_86.10

यात्रायामातुरं जीर्णं मृतं दृष्टिविवर्जितम् / स्वयं विज्ञो ऽपि पप्रच्छ सदा तं जनकं भज // BuSto_86.11

कामाग्निर्नाहरद्यस्य चित्तं प्रमदवासिनः / निरञ्जनं निर्विकल्पं सुत तं जनकं भज // BuSto_86.12

कनकाश्वं समारुह्य छन्दकेन बहिर्ययौ / देशान्निशीथे त्रिदशैः स्तूयमानं मुदा भज // BuSto_86.13

हयं निवर्तयामास छन्दकं च तपोवनात् / सुकण्ठाभरणं दत्त्वा भणैनं वनचारिणम् // BuSto_86.14

नैरञ्जनामुपासृत्य प्राकरोद् यस्तपोव्रतम् / जगद्धितार्थं षड्वर्षमेनं भज तपःपरम् // BuSto_86.15

बोधिद्रुमसमासीनो जित्वा मारं सुदुःसहम् / प्रालभद्बोधिरत्नं यो दर्शयैनं तथागतम् // BuSto_86.16

मृगदावस्थितः काश्यां धर्मचर्क्र प्रवर्तयन् / ब्रह्मादिभिर्वृतो यो ऽसौ दर्शयैनं गुरुं सुत // BuSto_86.17

इति मात्रोदितं श्रुत्वा राहुलः सो ऽतिविस्मितः / प्रणम्य पितरं पश्यन् मुदमाप स्मिताननः // BuSto_86.18

श्रीशाक्यसिंहस्तोत्रं यशोधराकृतं समाप्तम् //

digital sanskrit buddhist canon, stotra section, text no. 87: śāradāṣṭakastotram

शङ्खेन्दुकुन्दहिमसन्निभचारुदेहां हंसस्थितां कमलपत्रसुरोचनीयाम् / दिव्याम्बराभरणभूषितसौम्यरूपां श्रीशारदां भगवतीं सततं नमामि // BuSto_87.1

संसारसागरमहोदधिमग्नसत्त्वसन्तारिणीं सुरनरार्चितपादपद्माम् / हारार्द्धहारमणिकुण्डलमण्डिताङ्गीं श्रीशारदां भगवतीं सततं नमामि // BuSto_87.2

या भारतीति कथिता जननी च लोके मोहान्धकारभरभग्नकृतां जनानाम् / संकीर्तिता मुनिभिरस्तसमस्तदोषैः श्रीशारदां भगवतीं सततं नमामि // BuSto_87.3

वीणानुवादनरतां स्फटिकाक्षमालासंधारिणीं कनकपुस्तकधारिणीं च / रत्नैः शुभैः सुरुचिरां कृतहस्तपद्मां श्रीशारदां भगवतीं सततं नमामि // BuSto_87.4

पूज्या सदैव जननी परिवन्दनीया देव्या गणा मनसि संपरिमोदनीयाः / जीवार्थिनः फलभृतो गुणवर्णना च श्रीशारदां भगवतीं सततं नमामि // BuSto_87.5

नत्वा भजेज्जगति यो जननीं प्रसिद्धां कुर्यात्सदा भगवती किलपञ्चसौख्यम् / सौन्दर्यरूपगुणवित्तसुभोगभाजं श्री शारदां भगवतीं सततं नमामि // BuSto_87.6

पूजोपहारवलिभिः परिपूजनीया देव्या गणादिकमनोज्ञसुवक्त्रपद्माः / यैः पूजिता भगवती किल जाड्यहन्त्री श्रीशारदां भगवतीं सततं नमामि // BuSto_87.7

यस्याः प्रसादमवगम्य सुखप्रदायास्त्रैलोक्यनाथौदितार्कसमप्रभः स्यात् / धर्मार्थकामफलदामथ मोक्षदां च श्रीशारदां भगवतीं सततं नमामि // BuSto_87.8

श्रीशारदाष्टकस्तोत्रं समाप्तम् //

digital sanskrit buddhist canon, stotra section, text no. 88: sragdharāpañcakastotram

वन्दे ऽहं तत्त्वरूपं ततविततभवं भव्यहव्यस्वभावं बुद्धानामादिबुद्धं कृतविविधहितं तेजसां सन्निधानम् / सम्यक्संबोधिमूर्ति त्रिगुणविलसितं पञ्चज्ञानैकहेतुं नैराकारं निरञ्जं गगनवदनिशं निर्मलं चित्तचैत्यम् // BuSto_88.1

ज्योतीरूपे त्वदीये विनिलयतपसा दानशीलक्षमासु वीर्यध्यानाख्यप्रज्ञोदधिकृततरणो माणिवृन्दे सुजातौ / बोधिं प्राप्तो ऽस्मि चास्मिन् सकलपूरवरे चाकनिष्ठे महिम्नि वन्दे त्वां विश्वरूपं स्फटिकमणिरिवोपात्तनानाप्रभेदम् // BuSto_88.2

नाना वैध्यं सुपूज्योपकरणमनिशं ढौकितं सर्वलोकै किं चाहं ढौकयिष्ये त्वदनुनयमनास्त्यक्तराज्यादिद्रव्यः / जातौ जातौ च जातौ कृतसुकृतचयं कायवाङ्मानसैस्तैस्तत्सर्वं ढौकयिष्ये निजतनुसहितं संगृहाण सुबुद्धे // BuSto_88.3

एकं युग्मं तृतीयं युगलयुगमथो पञ्चमं षष्ठसंज्ञं सप्ताष्टौ वै नवाख्यं दशममथ तथैकादशं द्वादशाख्यम् / त्रायोदश्यं चतुर्दश्यमथ शरकमठं चैकतः संप्रसूतम् आनन्त्यं स्वं तदैवं जगदखिलमभूत् त्वां नमे चैकरूपम् // BuSto_88.4

एको वैरोचनाख्यस्तदपरजिनो बुद्ध अक्षोभ्यसंज्ञः रत्नाद्यः संभवो ऽसौ त्रितय अमृतरुक्संज्ञकस्तुर्यसंख्यः / पञ्चाख्यो ऽमोघसिद्धिस्तदनु च जगति ख्यातसंख्याद्यसंख्या देवा दैत्याश्च मर्त्या भवदवयवजाः सर्वदा ऽहं नतो ऽस्मि // BuSto_88.5

श्रीशाक्यसिंहबुद्धकृतं स्रग्धरापञ्चकं समाप्तम् //

digital sanskrit buddhist canon, stotra section, text no. 89: suprabhātastotram śrīharṣadevabhūpativiracitam

स्तुतमपि सुरसङ्घैः सिद्धगन्धर्वयक्षैर् दिवि भुवि सुविचित्रैः स्तोत्रवाग्भिर्यतीशैः / अहमपि कृतशक्तिर्नौमि संबुद्धमार्यं नभसि गरुडयाते किं न यान्ति द्विरेफाः // BuSto_89.1

क्षपितदुरितपक्षः क्षीणनिःशेषदोषो द्रवितकनकवर्णः फुल्लपद्मायताक्षः / सुरुचिरपरिवेषः सुप्रभामण्डलश्रीः दशबल तव नित्यं सुप्रभातं प्रभातम् // BuSto_89.2

मदनबलविजेतुः कापथोच्छेदकर्तुस् त्रिभुवनहितकर्तुः स्त्रीलताजालहर्तुः / समसुखफलदातुर्भेत्तुरज्ञानशैलं दशबल तव नित्यं सुप्रभातं प्रभातम् // BuSto_89.3

असुरसुरनराणां यो ऽग्रजन्माग्रदेवः सकलभुवनधातौ लोकसृष्ट्यैकशब्दः / स्वपिति मनुजधाता अब्जयोनिः स्वयम्भूर् दशबल तव नित्यं सुप्रभातं प्रभातम् // BuSto_89.4

उदयगिरितटस्थो विद्रुमच्छेदताम्रस् तिमिरनिकरहन्ता चक्षुरेकं प्रजानाम् / रविरपि मदलोलः सर्वथा सो ऽपि सुप्तो दशबल तव नित्यं सुप्रभातं प्रभातम् // BuSto_89.5

द्विरददशनपाण्डुः शीतरश्मिः शशाङ्कस् तिलक इव रजन्याः सर्वचूडामणिर्यः / अविगतमदरागः सर्वथा सो ऽपि सुप्तो दशबल तव नित्यं सुप्रभातं प्रभातम् // BuSto_89.6

प्रबलभुजचतुष्कः षोडशार्धार्धवक्त्रो जपनियमविधिज्ञः सामवेदप्रवक्ता / अमलकमलयोनिः सो ऽपि ब्रह्मा प्रसुप्तो दशबल तव नित्यं सुप्रभातं प्रभातम् // BuSto_89.7

हिमगिरिशिखरस्थः सर्पयज्ञोपवीती त्रिपुरदहनदक्षो व्याघ्रचर्मोत्तरीयः / सह गिरिवरपुत्र्या सो ऽपि सुप्तस्त्रिशूली दशबल तव नित्यं सुप्रभातं प्रभातम् // BuSto_89.8

ज्वलितकुलिशपाणिर्दुर्जयो दानवानां सुरपतिरपि शच्या विभ्रमे मूढचेताः / अनिशिनिशिप्रसुप्तः कामपङ्के निमग्नो दशबल तव नित्यं सुप्रभातं प्रभातम् // BuSto_89.9

कुवलयदलनीलः पुण्डरीकायताक्षः सुररिपुबलहन्ता विश्वकृद्विश्वरूपी / हरिरपि चिरसुप्तो गर्भवासैरमुक्तो दशबल तव नित्यं सुप्रभातं प्रभातम् // BuSto_89.10

कपिलजटकलापो रक्तताम्रारुणाक्षः पशुपतिरतिकाले सङ्गभङ्गैकदक्षः / स्मरशरदलिताङ्गः सो ऽपि सुप्तो हुताशो दशबल तव नित्यं सुप्रभातं प्रभातम् // BuSto_89.11

हुमशशिकुमुदाभो मद्यपानारुणाक्षो दृढकठिनभुजाङ्गो लाङ्गली शक्तिहस्तः / बल इह शयितो ऽसौ रेवतीकण्ठलग्नो दशबल तव नित्यं सुप्रभातं प्रभातम् // BuSto_89.12

गजमुखदशनैकः सर्वतो विघ्नहन्ता विगलितमदवारिः षट्पदाकीर्णगण्डः / गणपतिरपि सुप्तो वारुणीपानमत्तो दशबल तव नित्यं सुप्रभातं प्रभातम् // BuSto_89.13

अतसिकुसुमनीलो यस्य शक्तिः कराग्रे नवकमलवपुष्मान् षण्मुखः क्रौञ्चहन्ता / त्रिनयनतनयो ऽसौ नित्यसुप्तः कुमारो दशबल तव नित्यं सुप्रभातं प्रभातम् // BuSto_89.14

अशनवसनहीना भाव्यमाना विरूपा अलमखिलविघातैः प्रेतवद्दग्धदेहाः / उभयगतिविहीनास्ते ऽपि नग्नाः प्रसुप्ता दशबल तव नित्यं सुप्रभातं प्रभातम् // BuSto_89.15

ऋषय इह महान्तो वत्सभृग्वङ्गिराद्याः क्रतुपुलहवसिष्ठा व्यासवाल्मीकिगर्गाः / परयुवतिविलासैर्मोहितास्ते ऽपि सुप्ताः दशबल तव नित्यं सुप्रभातं प्रभातम् // BuSto_89.16

यमवरुणकुबेरा यक्षदैत्योरगेन्द्राः दिवि भुवि गगने वा लोकपालास्तथान्ये / युवतिमदकटाक्षैर्वींक्षितास्ते ऽपि सुप्ता दशबल तव नित्यं सुप्रभातं प्रभातम् // BuSto_89.17

भवजलनिधिमग्ना मोहजालावृताङ्गा मनुकपिलकणादा भ्रामिता मूढचित्ताः / समसुखपरिहीना वालिशास्ते ऽपि सुप्ता दशबल तव नित्यं सुप्रभातं प्रभातम् // BuSto_89.18

अज्ञाननिद्ररजनीतमसि प्रसुप्ता तृष्णाविशालशयने विषयोपधाने / काले शुभाशुभफलं परिकीर्यमाणे जागर्ति यः सततमेव नमो ऽस्तु तस्मै // BuSto_89.19

तीर्थेषु गोकुलशतानि पिबन्ति तोयं तृप्तिं व्रजन्ति न च तत्क्षयमभ्युपैति / तद्वन्मुने कविशतैरपि संस्तुतस्य न क्षीयते गुणनिधिर्गुणसागरस्य // BuSto_89.20

सुप्रभातं तवैकस्य ज्ञानोन्मीलितचक्षुषः / अज्ञानतिमिरान्धानां नित्यमस्तमितो रविः // BuSto_89.21

पुनः प्रभातं पुनरुत्थितो रविः पुनः शशाङ्कः पुनरेव शर्वरी / मृत्युर्जरा जन्म तथैव हे मुने गतागतं मूढजनो न बुद्ध्यते // BuSto_89.22

सुप्रभातं सुनक्षत्रं श्रिया प्रत्यभिनन्दितम् / बुद्धं धर्मं च सङ्घं व प्रणमामि दिने दिने // BuSto_89.23

स्तुत्वा लोकगुरुं महामुनिवरं सद्धर्मपुण्योद्गमं निर्द्वन्द्वं हतरागद्वेषतिमिरं शान्तेन्द्रियं निस्पृहम् / यत्पुण्यं समुपार्जितं खलु मया तेनैव लोको ऽखिलं प्रत्यूषस्तुतिहर्षितो दशबले श्रद्धां परां विन्दताम् // BuSto_89.24

श्रीहर्षदेवभूपतिविरचितं दशबलस्य सुप्रभातस्तोत्रं समाप्तम् //

digital sanskrit buddhist canon, stotra section, text no. 90: svayaṃbhūstavaḥ

नमस्ते विश्वरूपाय ज्योतीरूपाय ते नमः / नमः स्वयंभवे नित्यं जगदुद्धारहेतवे // BuSto_90.1

त्वं बुद्धस्त्वं च धर्मो दशबलतनयस्त्वं तथा बोधिसत्त्वस्त्वं भिक्षुः श्रावकस्त्वं कुलिशवरधरस्त्वं तथा धर्मधातुः / त्वं ब्रह्मा त्वं च विष्णुः प्रमथगणपतिस्त्वं महेन्द्रो यमस्त्वं त्वं पाशी त्वं धनेशस्त्वमनलपवनौ नैरृतस्त्वं महेशः // BuSto_90.2