108 Buddhist stotras

पातुं तं सर्वपादं कमलधरगिरा वज्रपाणिर्जिहीते लोकानां रक्षणार्थं पुनरपि कलशाकारतांशादभूत् सः / श्रीमान् सर्वेश्वराख्यो जिनवरतनयो दण्डशूलौ दधानः कल्याणं वः क्रियासुः क्वचिदपि सरतां तिष्ठतां नौम्यहं ताः // BuSto_34.10

दुर्बोधं मञ्जुगर्तव्यजनसुखरतं कमिनीसुप्रबोधं कृत्वा प्राज्ञं महान्तं कविवरमकरोन्मञ्जुदेवस्ततो ऽपि / श्वासं संधाय भव्यं सकलगुणपदं प्राप्य गर्तेशसंज्ञाः कल्याणं वः क्रियासुः क्वचिदपि सरतां तिष्ठतां नौम्यहं ताः // BuSto_34.11

मत्स्याकाराभिरासीत् सकलवरणविष्कम्भिनामा सुसत्त्वः सालङ्कारः फणीन्द्रैरदददखिलकात् योडियाख्यो ययासौ / निष्काश्याशं फणीन्द्रेश्वर इति समभूद् वीतरागो ऽप्यरागः कल्याणं वः क्रियासुः क्वचिदपि सरतां तिष्ठतां नौम्यहं ताः // BuSto_34.12

स श्रीमानोडियाने व्यततपतपसा सातपत्रः सुतीरे पृथ्वीगर्भाख्यबौद्धो[…]झटिति तं स्थापयामास वासम् / गन्धेशो वीतरागो ऽभवदखिलसुहृल्लोकनाथाग्रतस्थः कल्याणं वः क्रियासुः क्वचिदपि सरतां तिष्ठतां नौम्यहं ताः // BuSto_34.13

शंखं दध्मौ सहर्षः स्मरदमितसुतं विक्रमात् प्राप्तसिद्धिः यस्माल्लोकेश्वराज्ञाविनिहितहरयः प्रादुरासीत् खगर्भः / यः स्वाशं स्थापयित्वा निजपुरमगमद् विक्रमेशाभिधानं कल्याणं वः क्रियासुः क्वचिदपि सरतां तिष्ठतां नौम्यहं ताः // BuSto_34.14

नागस्तार्क्ष्येण यस्मादलभदनुसुखं पुण्यनामा सुतीर्थः पार्वत्या यत्र तेपे कलहनिवसने शान्ततीर्थः प्रशान्तः / तप्तं रुद्रेण दुर्गाभिलषितमनसा शङ्कराख्यस्त्रिवेणः कल्याणं वः क्रियासुः क्वचिदपि सरतां तिष्ठतां नौम्यहं ताः // BuSto_34.15

तीर्थो राजाभिधानो यदलभदवनीपालराज्यं विरूपो व्याधश्चैतश्च यस्मात् सुरपतिसदनं प्रागमत् कामतीर्थः / वज्राचार्येण पश्यं यदभिषवकृतः संगमो निर्मलाख्यः कल्याणं वः क्रियासुः क्वचिदपि सरतां तिष्ठतां नौम्यहं ताः // BuSto_34.16

दीनैराप्तं निधानं यदपचितिपरैराकराख्यो हि तीर्थो ज्ञैर्लब्धं ज्ञानमस्माद् यदुदकमतिभिर्ज्ञानसंज्ञैकतीर्थः / चिन्तामण्याख्यतीर्थाभिधवदभिषवैर्यत्र प्राप्तो ऽभिलाषः कल्याणं वः क्रियासुः क्वचिदपि सरतां तिष्ठतां नौम्यहं ताः // BuSto_34.17

यत्र स्नातैर्मुदाप्तेतिसमभिधमभूद् यश्च प्रामोदतीर्थः प्रादात् सल्लक्षणं यः स्वपयसि सरतां तीर्थसल्लक्षणाख्यः / यत्र स्नात्वा बलाख्यः सुरपतिरजयद् द्वीपमाख्यंभतीर्थः कल्याणं वः क्रियासुः क्वचिदपि सरतां तिष्ठातां नौम्यहं ताः // BuSto_34.18

विद्याधर्याख्यदेवी गगनपथगता योगिनी वज्रपूर्वा हारीतः श्रीहनूमान् सगणपतिमहाकालचूडाख्यवन्द्याः / ब्रह्माण्याद्याश्च देव्यः सहरिसुखवरक्षारनास्कन्दयुक्ताः कल्याणं वः क्रियासुः क्वचिदपि सरतां तिष्ठतां नौम्यहं ताः // BuSto_34.19

वाग्मत्या मूलपुच्छप्रभृतय उपतीर्थास्तथा केशचैत्याः शङ्खोच्चस्थाश्च जातोच्चयगिरिललितश्चैत्यभट्टारको ऽसौ / फुल्लोच्चो द्रष्टदेवी तदनु भगवतीध्यानप्रोच्चादिसंस्थाः कल्याणं वः क्रियासुः क्वचिदपि सरतां तिष्ठतां नौम्यहं ताः // BuSto_34.20

मञ्जुश्रीपर्वतस्थो ऽनुचरविरचितो मञ्जुशोभाख्यचैत्यः शान्तश्रीनिर्मितेषु प्रकृतवसतयः पञ्चदेवापुरेषु / पुच्छाग्रश्चैत्यवर्यो ऽभ्यकथदनुपमं यत्र शाकेत्पुराशं कल्याणं वः क्रियासुः क्वचिदपि सरतां तिष्ठतां नौम्यहं ताः // BuSto_34.21

आधाराख्यो हृदिस्थः सगणफणिपतिर्विध्नराजान्तकश्च नागश्चानन्दलोके हरिहरिहरिवाहाख्यत्रैलोक्यवंशे / लोकेशायाक्षमत्वस्तदनु सफलयाशाभिलोकैकनाथः कल्याणं वः क्रियासुः क्वचिदपि सरतां तिष्ठतां नौम्यहं ताः // BuSto_34.22

हेवज्रः संवरो ऽसौ सपरिजनगणश्चण्डवीरस्त्रिलोकी वीरो योगाम्बरो ऽसौ यमनिधनकराद्या दशक्रोढ(ध)राजाः / गुह्या बाह्याश्च सर्वे परिमितप्रमुखा नामसंगीतिव्याख्या कल्याणं वः क्रियासुः क्वचिदपि सरतां तिष्ठतां नौम्यहं ताः // BuSto_34.23

शीर्षे प्रागात् पयो ऽसौ सहितपरिजनश्चन्द्रसाहोसिताद्रिः छित्वा शोषे ह्रदे ऽस्मिन् पुरवरकमलो लोकवासाः परस्य / स्वस्थीभूताम्बुसंस्थः सकलजिनवरं प्राभजन्मञ्जुनाथः कल्याणं वः क्रियासुः क्वचिदपि सरतां तिष्ठतां नौम्यहं ताः // BuSto_34.24

सौखावत्याश्च वङ्गं तदनु जनहिते पोतले प्रागमद् यः शान्तो ऽवग्राहदोषे ललितपुरवरं प्राविशन् देवहूतः / स श्रीमान् वज्रपाणिः सजटधरहयग्रीवपार्षद्गणेशः कल्याणं वः क्रियासुः क्वचिदपि सरतां तिष्ठतां नौम्यहं ताः // BuSto_34.25

श्री स्वयम्भुपुराणोद्धृता कल्याणपञ्चविंशतिस्तुतिः समाप्ता //

digital sanskrit buddhist canon, stotra section, text no. 35: kalyāṇatriṃśatikāstotram

एवंकारसमापन्ना कायवाकचित्तबुद्धितः / करोमि सततं तस्या नुतिं पूजां प्रदक्षिणाम् // BuSto_35.1

या देवी सर्वसत्त्वानां सृष्टिसंहारकारिणी / नमस्तस्यै नमस्तस्यै नमस्तस्यै नमो नमः // BuSto_35.2

या देवी सर्वभूतानां प्रतिपाले प्रतिष्ठिता / नमस्तस्यै नमस्तस्यै नमस्तस्यै नमो नमः // BuSto_35.3

या देवी देवदेवीनां देवतारूपिणी स्थिता / नमस्तस्यै नमस्तस्यै नमस्तस्यै नमो नमः // BuSto_35.4

या देवी दैत्यदुर्दान्तदाहरूपा भयानका / नमस्तस्यै नमस्तस्यै नमस्तस्यै नमो नमः // BuSto_35.5

या देवी सर्वनागानां सहस्रमुखनागिनी / नमस्तस्यै नमस्तस्यै नमस्तस्यै नमो नमः // BuSto_35.6

या देवी सप्तपाताले शान्तरूपेण संस्थिता / नमस्तस्यै नमस्तस्यै नमस्तस्यै नमो नमः // BuSto_35.7

या देवी नरनारीणां वेदमाता चिदम्बिका / नमस्तस्यै नमस्तस्यै नमस्तस्यै नमो नमः // BuSto_35.8

या देवी क्षत्रिणीवैश्याशूद्रीजातिप्रपूजिता / नमस्तस्यै नमस्तस्यै नमस्तस्यै नमो नमः // BuSto_35.9

या देवी प्रेतलोकानां पालनाय महर्द्धिका / नमस्तस्यै नमस्तस्यै नमस्तस्यै नमो नमः // BuSto_35.10

या देवी सर्वतिर्यक्षु तारिणी तापनाशिनी / नमस्तस्यै नमस्तस्यै नमस्तस्यै नमो नमः // BuSto_35.11

या देवी नारकीयाणां दुःखभाजां च मातृका / नमस्तस्यै नमस्तस्यै नमस्तस्यै नमो नमः // BuSto_35.12

या देवी षोडशसंख्यनरकाणां विनाशिनी / नमस्तस्यै नमस्तस्यै नमस्तस्यै नमो नमः // BuSto_35.13

या देवी द्वेषिरागीणां मोहिनां दुर्दुरीकृता / नमस्तस्यै नमस्तस्यै नमस्तस्यै नमो नमः // BuSto_35.14

या देवी कामक्रोधाभ्यां क्रोधरूपेण संस्थिता / नमस्तस्यै नमस्तस्यै नमस्तस्यै नमो नमः // BuSto_35.15

या देवी लोभलाभानां लङ्घनाय विलम्बिता / नमस्तस्यै नमस्तस्यै नमस्तस्यै नमो नमः // BuSto_35.16

या देवी मायाया माता मातॄणां वज्रयोगिणी / नमस्तस्यै नमस्तस्यै नमस्तस्यै नमो नमः // BuSto_35.17

या देवी राजचौराग्निसिंहशत्रुविनाशिनी / नमस्तस्यै नमस्तस्यै नमस्तस्यै नमो नमः // BuSto_35.18

या देवी जलनागाहिदुर्भिक्षभयतारिणी / नमस्तस्यै नमस्तस्यै नमस्तस्यै नमो नमः // BuSto_35.19

या देवी पञ्चभूतानां चन्द्रे सूर्ये प्रतिष्ठिता / नमस्तस्यै नमस्तस्यै नमस्तस्यै नमो नमः // BuSto_35.20

या देवी भौतिकी वेला आलिकालिविचारिणी / नमस्तस्यै नमस्तस्यै नमस्तस्यै नमो नमः // BuSto_35.21

या देवी सर्वपीठेशी क्षेत्ररूपोपछन्दिका / नमस्तस्यै नमस्तस्यै नमस्तस्यै नमो नमः // BuSto_35.22

या देवी पीलवाख्याता उपपीलवमीलिता / नमस्तस्यै नमस्तस्यै नमस्तस्यै नमो नमः // BuSto_35.23

या देवी द्वादशे चक्रे राशिलग्नविभूषिणी / नमस्तस्यै नमस्तस्यै नमस्तस्यै नमो नमः // BuSto_35.24

या देवी षडंगे देशे प्रोद्बुद्धमुखचन्द्रिका / नमस्तस्यै नमस्तस्यै नमस्तस्यै नमो नमः // BuSto_35.25

या देवी चण्डचक्रेषु गामिनी परमेश्वरी / नमस्तस्यै नमस्तस्यै नमस्तस्यै नमो नमः // BuSto_35.26

या देवी कायवाकचित्ते मन्त्ररूपेण गामिनी / नमस्तस्यै नमस्तस्यै नमस्तस्यै नमो नमः // BuSto_35.27

या देवी निर्मलात्मा श्रीरृद्धिसिद्धिबलप्रदा / नमस्तस्यै नमस्तस्यै नमस्तस्यै नमो नमः // BuSto_35.28

या देवो सर्वजन्तूनां सदा मङ्गलकारिणी / नमस्तस्यै नमस्तस्यै नमस्तस्यै नमो नमः // BuSto_35.29

य इदं पठते धीमान् देव्या भक्तिसमन्वितः / बुद्धत्वं लभते शीघ्रं कल्याणं मङ्गलं शिवम् // BuSto_35.30

श्री त्रिकायनिवासिनीवज्रदेव्याः कल्याणत्रिंशतिकास्तोत्रं समाप्तम् //

digital sanskrit buddhist canon, stotra section, text no. 36: kamalākarasarvatathāgatastotram

अथ खलु कमलवने सर्वतथागतस्तवेनातीतानागतप्रत्युत्पन्नानां बुद्धानां भगवतो ऽत्यस्तावीत्

ये जिनपूर्वकाये भवन्ति ये च ध्रियन्ति दशदिशि लोके / तान् हि जिनांश्च करोमि प्रणामं तं जिनसंघमहं प्रभिजष्ये // BuSto_36.1

शान्तप्रशान्तविशुद्धमुनीन्द्रं स्वर्णसुवर्णप्रभासितगात्रम् / सर्वसुरासुरसुस्वरघोषं ब्रह्मरुतस्वरगर्जितघोषम् // BuSto_36.2

षट्पदभौंरमहीरुहकेशं नीलसुकुञ्चितकाशनिकाशम् / शङ्खतुषारसुपाण्डरदन्तं हेमविराजितभाषितनाभम् // BuSto_36.3

नीलविशालविशुद्धसुनेत्रं नीलमिवोत्पलफुल्लितक्षेत्रम् / पद्मसुवर्णविभान्तसुजिह्वं पद्मप्रभाषितपद्मसुखाभम् // BuSto_36.4

शङ्खमृणालनिभं सुखतार्णं दक्षिणवर्तितवेडुलितर्णम् / सूक्ष्मनिशाकरक्षीणशशीव मात्रसुमन्त्रसरोजसुनाभम् // BuSto_36.5

काञ्चनकोटिसुवर्णसुनासमुन्नतमृदुतरपादपपत्रम् / अग्रधराग्रविशिष्टनासाग्रं मृदुकरसर्वजिनं सततं तम् // BuSto_36.6

एकसमेकतरोममुखाग्रं बालसुरोमप्रदक्षिणवर्तम् / नीलनिभोज्ज्वलकुण्डलजातं नीलविराजितमौलसुग्रीवम् // BuSto_36.7

जातसमानप्रभाषितगात्रं पूजितसर्वदशदिशि लोके / दुःखमनन्तं प्रशमितलोकं सर्वसुखेन च तर्पितलोकम् // BuSto_36.8

नरकस्थासु च तिर्यग्गतिषु प्रेतसुरासुरमनुजगतीषु / सर्वपिशाचसुखार्पितसत्त्वं सर्वप्रशान्तमपायगतीषु // BuSto_36.9

वर्णसुवर्णं कनकनिभासं काञ्चनतप्तप्रभासितगात्रम् / सौम्यशशाङ्कसुविमलवक्त्रं विकसितराजितसुविमलवदनम् // BuSto_36.10

तरुणरुहाग्रककोमलगात्रं सिंहविवादकविक्रमनादम् / लम्बितहस्तप्रलम्बितबाहुं मारुतप्रेरितसाललजिह्वम् // BuSto_36.11

व्योमप्रभोज्ज्वलमुंचितरश्मिं सूर्यमिव प्रभया प्रतपन्तम् / निर्मलगात्रवरेभि मुनीन्द्रं सर्वप्रभासितक्षेत्रमनन्तम् // BuSto_36.12

चन्द्रनिशाकरभास्करजालं क्षेत्रमनन्तसहस्रगतेषु / ते ऽपि च निश्चितसर्वि बभूव बुद्धप्रभासविरोचनतायै // BuSto_36.13

बुद्धदिवाकरलोकप्रदीपं बुद्धदिवाकररश्मिसहस्रम् / क्षेत्रमनन्तसहस्रगतेषु पश्यतु लोकतथागतसूर्यम् // BuSto_36.14

पुण्यशतानि सहस्र च कृत्वा सर्वगुणेभिरलंकृतगात्रम् / सौरगजेन्द्रनिभं जितबाहुं विमलरक्षितमण्डितबाहुम् // BuSto_36.15

भूमितलोपम शालिततुल्यं सूक्ष्मरजोपममागतबुद्धाः / सूक्ष्मरजोपम ये च भवन्ति सूक्ष्मरजोपम ये तिष्ठन्ति // BuSto_36.16

तांश्च जिनान् प्रकरोमि प्रणामं कायेन वाचा मनसा प्रसन्ना / पुष्पप्रदान सुगन्धप्रदानैर्वर्णशतेन शुचिश्च स्मरामि // BuSto_36.17

जिह्वशतैरपि बुद्धगुणानां कल्पसहस्रशतेन हि वक्तुम् / ये च सुनिर्वृतसाधुजिनानां सा च ललाट विचित्र अनेकैः // BuSto_36.18

एकजिनस्य गुणान् नहि शक्यो जिह्वसहस्रेण भाषितु किंचित् / काममशक्ति हि सर्वजिनानां एकगुणस्य हि विस्तरवक्तुम् // BuSto_36.19

सर्व सदेवकुलोक्तसमूहः सर्वभवाग्र भवजलपूर्णान् / ये जलग्रहणतु शक्यप्रमाणं नैव तु एकगुणा सुगतान्तम् // BuSto_36.20

वर्णितु सुस्तुतमज्जिनसर्वं कायतु वाच प्रसन्नमनेन / प्रमेय संचित पुण्यफलाग्रं तेन च सत्त्व प्रभोतु जिनत्वम् // BuSto_36.21

एव तु विश्वं नरपतिबुद्धं एव करोमि नृपःप्रणिधानम् / यत्र च कुत्र चि मभ्यभवेत जाति अनागत कल्पमनन्ता // BuSto_36.22

ईदृशभेरी पश्यमि स्वप्ने ईदृशनादं तत्र शृणोमि / ईदृश जिनस्तुति कमलाकरेण जाति जरास्मर तत्र लभेयम् // BuSto_36.23

बुद्धगुणानि अनन्तमतुल्यं ये ऽपि च दुर्लभ कल्पसहस्रम् / अनुश्रुत ये च स्वप्नगते ऽपि तेषु च देशयि दिवसगतो ऽपि // BuSto_36.24

दुःखसमुद्र विमोचयि सत्त्वा पूरयि षडभिः पारमिताभिः / बोधिमनुत्तर पुण्य लभेयं क्षत्रभवेत्तमभासमपत्थ्या // BuSto_36.25

भेरिप्रदानविपाकफलेन सर्वजिनान च संस्तुतिहेतोः / संमुखपश्यमि शाक्यमुनीन्द्रं व्याकरणं ह्यहु तत्र लभेयम् // BuSto_36.26

यौ इम दारकद्वौ मम पुत्रौ कनकेन्द्र कनकप्रभाश्वरौ / तौ उभि दारक तत्र लभेयं बोधिमनुत्तरव्याकरणं च // BuSto_36.27

ये पि च सत्त्व अनेकमनन्ता शरणविहीना व्यसनगताश्च / तेषु भवेय अनागत सर्वत्राणपरायण शरणप्रदश्च // BuSto_36.28

दुःखसमुद्भव संक्षयकर्ता सर्वसुखस्य च आकरभंत / कल्प अनागत बोधि चरेयं यत्तहु पूर्वं कोटि गताश्च // BuSto_36.29

स्वर्णप्रभासोत्तमदेशनताय पापसमुद्रं शोषतु मह्यम् / कर्मसमुद्र विकीर्यतु मह्यं क्लेशसमुद्र विछिद्यतु मह्यम् // BuSto_36.30

पुण्यसमुद्रं पूर्यतु मह्यं ज्ञानसमुद्र विशोध्यतु मह्यम् / विमलज्ञान प्रभासवरेण काम प्रभा च भविष्यतु मह्यम् // BuSto_36.31

पुण्यप्रभास विलोचनता च सर्वत्रिलोकि विशिष्ट भवेयम् / पुण्यवरेण समन्वित नित्यं दुःखसमुद्र उत्तारयिता च // BuSto_36.32

सर्वसुखस्य च सागरकल्पं कल्पमनागत बोधि चरेयम् / यत्नत पूर्वक कोटिगताया ईदृशक्षत्रविशिष्ट त्रिलोके // BuSto_36.33

श्रीसुवर्णप्रभोक्तं कमलाकरसर्वतथागतस्तोत्रं समाप्तम् //

digital sanskrit buddhist canon, stotra section, text no. 37: lokanāthastotram

कल्पादिके भवसि को हि ममागभाव सर्वस्वसार करुणामय विश्वमूर्ते / कार्यादिके प्रणमतीति समन्तकं त्वां श्रीलोकनाथ तव पादयुगं नमे ऽहम् // BuSto_37.1

आकृष्णकेन रजसा विनिवर्तमानश्चायासि सौम्य सकलः प्रतिवासरे च / हेमस्वरूपरथकेन समुज्ज्वलेन श्रीलोकनाथ तव पादयुगं नमे ऽहम् // BuSto_37.2

ब्रह्मा त्वमेव हि स विप्रकुलप्रसिद्धो विष्णुश्च वैष्णवमते वरधर्मकेतुः / सर्वज्ञको ऽसि विमते प्रभवो ऽव्ययश्च श्रीलोकनाथ तव पादयुगं नमे ऽहम् // BuSto_37.3

बौद्धान्वये भवसि वज्रकसूर्यरूपो योगेश्वरो हि शुभयोगकमार्गकेषु / गङ्गाधरो भवभयस्य विनाशकारि श्रीलोकनाथ तव पादयुगं नमे ऽहम् // BuSto_37.4

कारुण्यभावहृदयः सहजः सरोचिर्विच्छिन्नकल्मषचयो गुणसागरश्च / चिन्तामणिस्त्वमसि लोकगुरुः कृपेश श्रीलोकनाथ तव पादयुगं नमे ऽहम् // BuSto_37.5

बन्धूकवर्ण बहुरूप विशालनेत्र सर्वप्रसूतिकृतनिष्कृतिकः सुदन्त / त्वं पद्मपाणि विमलोत्तम मित्ररूपः श्रीलोकनाथ तव पादयुगं नमे ऽहम् // BuSto_37.6

तव बहुलचरित्रं कः समर्थो ऽस्ति वक्तुं तदपि मुखरभावैः स्तूयसे त्वं मयात्र / यदपि पदमशुद्धं सर्वमेतत् क्षमस्व स्तुतिरिति कुसुमस्रक् भक्तिमात्रार्चनं स्यात् // BuSto_37.7

श्रीमदार्यावलोकितेश्वरभट्टारकस्य स्तोत्रं समाप्तम् //

digital sanskrit buddhist canon, stotra section, text no. 38: lokātītastavaḥ

लोकातीत नमस्तुभ्यं विविक्तज्ञानवेदिने / यस्त्वं जगद्धितायैव खिन्नः करुणया चिरम् // BuSto_38.1

स्कन्धमात्रविनिर्मुक्तो न सत्त्वो ऽस्तीति तेन तम् / सत्त्वार्थं च परिखेदमगमस्त्वं महामुने // BuSto_38.2

ते ऽपि स्कन्धास्त्वया धीमन् धीमद्भयः संप्रकाशिताः / मायामरीचिगन्धर्वनगरस्वप्नसन्निभाः // BuSto_38.3

हेतुतः संभवो येषां तदभावान्न सन्ति ये / कथं नाम न तत्स्पष्टं प्रतिबिम्बसमागताः // BuSto_38.4

भूतान्यचक्षुर्ग्राह्याणि तन्मयं चाक्षुषं कथम् / रूपं त्वयैवं ब्रुवता रूपग्राहो निवारितः // BuSto_38.5

वेदनीयं विना नास्ति वेदना ऽतो निरात्मिका / तच्च वेद्यं स्वभावेन नास्तीत्यभिमतं तव // BuSto_38.6

संज्ञार्थयोरनन्यत्वे मुखं दह्येत वह्निना / अन्यत्वे ऽधिगमाभावस्त्वयोक्तो भूतवादिना // BuSto_38.7

कर्ता स्वतन्त्रः कर्मा ऽपि त्वयोक्तं व्यवहारतः / परस्परापेक्षिकी तु सिद्धिस्ते ऽभिमता ऽनयोः // BuSto_38.8

न कर्ता ऽस्ति न भोक्ता ऽस्ति पुण्यापुण्यं प्रतीत्यजम् / यत्प्रतीत्य न तज्जातं प्रोक्तं वाचस्पते त्वया // BuSto_38.9

अज्ञाप्यमानं न ज्ञेयं विज्ञानं तद्विना न च / तस्मात् स्वभावतो न स्तो ज्ञानज्ञेये त्वमूचिवान् // BuSto_38.10

लक्ष्याल्लक्षणमन्यच्चेत् स्यात्तल्लक्ष्यमलक्षणम् / तयोरभावो ऽनन्यत्वे विस्पष्टं कथितं त्वया // BuSto_38.11

लक्ष्यलक्षणनिर्मुक्तं वागुदाहारवर्जितम् / शान्तं जगदिदं दृष्टं भवता ज्ञानचक्षुषा // BuSto_38.12

न सन्नुत्पद्यते भावो नाप्यसन् सदसन्न च / न स्वतो नापि परतो न द्वाभ्यां जायते कथम् // BuSto_38.13

न सतः स्थितियुक्तस्य विनाश उपपद्यते / नासतो ऽश्वविषाणेन समस्य समता कथम् // BuSto_38.14

भावान्नार्थान्तरं नाशो नाप्यनर्थान्तरं मतम् / अर्थान्तरे भवेन्नित्यो नाप्यनर्थान्तरे भवेत् // BuSto_38.15

एकत्वे नहि भावस्य विनाश उपपद्यते / पृथक्त्वेन हि भावस्य विनाश उपपद्यते // BuSto_38.16

विनष्टात् कारणात्तावत् कार्योत्पत्तिर्न युज्यते / न वा ऽविनष्टात् स्वप्नेन तुल्योत्पत्तिर्मता तव // BuSto_38.17

निरुद्धाद्वा ऽनिरुद्धाद्वा बीजादङ्कुरसंभवः / मायोत्पादवदुत्पादः सर्व एव त्वयोच्यते // BuSto_38.18

अतस्त्वया जगदिदं परिकल्पसमुद्भवम् / परिज्ञातमसद्भूतमनुत्पन्नं न नश्यति // BuSto_38.19

नित्यस्य संसृतिर्नास्ति नैवानित्यस्य संसृतिः / स्वप्नवत् संसृतिः प्रोक्ता त्वया तत्त्वविदांवर // BuSto_38.20

स्वयं कृतं परकृतं द्वाभ्यां कृतमहेतुकम् / तार्किकैरिष्यते दुःखं त्वयातूक्तं प्रतीत्यजम् // BuSto_38.21

यः प्रतीत्यसमुत्पादः शून्यता सैव ते मता / भावः स्वतन्त्रो नास्तीति सिंहनादस्तवातुलः // BuSto_38.22

सर्वसङ्कल्पहानाय शून्यतामृतदेशना / यस्य तस्यामपि ग्राहस्त्वया ऽसाववसादितः // BuSto_38.23

निरीहावशिकाः शून्या मायावत् प्रत्ययोद्भवाः / सर्वधर्मास्त्वया नाथ निःस्वभावाः प्रकाशिताः // BuSto_38.24

न त्वयोत्पादितं किञ्चिन्न किञ्चिच्च निरोधितम् / यथा पूर्वं तथा पश्चात् तथतां बुद्धवानसि // BuSto_38.25

आर्यैर्निषेवितामेतामनागम्य हि भावनाम् / अनिमित्तस्य विज्ञानं भवतीह कथंचन // BuSto_38.26

अनिमित्तमनागम्य मोक्षो नास्ति त्वमुक्तवान् / अतस्त्वया महायाने तत् साकल्येन दर्शितम् // BuSto_38.27

यदवाप्तं मया पुण्यं स्तुत्वा त्वां स्तुतिभाजनम् / निमित्तबन्धनापेतं भूयात् तेनाखिलं जगत् // BuSto_38.28

श्रीलोकातीतस्तवः समाप्तः //

digital sanskrit buddhist canon, stotra section, text no. 39: lokeśvaraśatakam vajradattācāryaviracitam

ओम् नमो लोकनाथाय /

भास्वन्माणिक्यभासो मुकुटभृति नमन्नाकनाथोत्तमाङ्गे भक्तिप्रह्वे सरोजासनशिरसि हसन्मालतीमालिकाभः / मौलौ मीलन्मृगाङ्गामकृशकपिशतां शाम्भवे शातयन्त्यो लोके लोकेशपादामलनखशशभृत्कान्तयः सन्तु शान्त्यै // BuSto_39.1

निर्धूता धूर्जटीन्दोर्न खलु पटु जटापिङ्गमासङ्गशारैः सारैरारान्मयूखैर्न च हरिमुकुटामन्दमाणिक्यभाभिः / कालिम्नो नापि लीना विबुधगणललत्कुन्तलालीनलीनाल् लोकेश्वर्यो ऽनिवार्याश्चरणनखरुचः सन्तु वो ध्वान्तशान्त्यै // BuSto_39.2

पर्याप्तोदारकोषस्फुटतरकमलाभोगसंपत्तिहेतुर् दूरीभूतप्रियाणामपहृतविषमातङ्कशङ्का जनानाम् / न क्षिप्तालङ्घनैरप्युपशमिततमोदुर्ग्रहोद्भूतभीतिर् लोकेशाङ्घ्र्योरपूर्वा नखशिशिररूचां चन्द्रिका वः पुनातु // BuSto_39.3

निःशेषं क्लेशराशीन्धनदहनमहापावकोच्चैः शिखा वो लीलालोकास्त्रिलोक्यामपहृतगहनाबद्धमोहान्धकाराः / वह्निस्कन्धेष्वबन्ध्या नरकभुवि सुधावारिविस्तारधाराः संसारीं संहरन्तां नखनिवहरुचः पद्मभृत्पादजाताः // BuSto_39.4

स्वच्छन्दच्छेदिवाञ्च्छावितरणचतुराचिन्त्यचिन्तामणीनाम् उद्गाढातङ्कशङ्कोद्गमशमनमनोहारिणी हारभासाम् / स्पष्टाविर्भूतनानागुणनिवहधृतादर्शबिम्बच्छवीनां छाया वः पातु लोकेश्वरचरणभुवामुन्मयूउखा नखानाम् // BuSto_39.5

नाथस्योदञ्चदुच्चामितरुचिरुचिभी रोचमानोरुचूडारोचिष्णोरुच्चकासच्चरणनखरुचां संचयो ऽसौ चिरं वः / अत्युच्चीयात् तदर्चाचतुरसुरशिरश्चारुरत्नोच्चयोच्चैर् नानानिश्चारिरोचिश्चयरचितशचीरुच्यचापोपचारः // BuSto_39.6

श्रीमद्भोगोन्नतीनामभिमतविषयप्राप्तिदानादहीनां सेवाभाजां समन्तादविचलितरुचः प्रीतिमुत्पादयन्तः / वैमल्यातुल्यबिम्बोपहसितशशिनः शातितध्वान्तदोषास् तोषं माणिक्यदीपा इव ददतु नखाः पद्मपाणेः पदोर्वः // BuSto_39.7

राजद्राजीवपाणेर्नखनिवहरुचां पादपद्मोद्भवानाम् उद्भेदो भेदको ऽसौ भवतु भवभियां निर्भराणां भरं वः / जातस्तद्देहभूमेचविरतकरुणावारिदत्तोपकारो यो ऽनल्पः कल्पवृक्षाङ्कुरनिकर इवोपात्तविज्ञानबीजः // BuSto_39.8

लोकेशस्याङ्घ्रिपद्मप्रभवनखरुचो दत्तमारारिसेनासंत्रासाः शोणतूणोन्मुखनिहितफलामोघबाणांशुशोभाः / शश्वत्संसारघोरावटपतितजनोत्तारणासज्जरज्जुप्रारोहा रोहयन्तां दुरधिगममहासंपदुच्चैः पदं वः // BuSto_39.9

भास्वन्तः क्लेशकर्मश्रमविवशजगत्तापविच्छेदशूरां दूराद्दोषोपलब्धेः पटुबुधगुरवस्तारका ये जनस्य / सान्द्रानन्दं ददानाः सकलशशधरश्रीभृतो निष्कलङ्कास् ते वश्चिन्तामचिन्त्याः कमलकरनखाः पादजाता जयन्तु // BuSto_39.10

भास्वत्खण्डेन्दुखण्डैरपचितिरचना किं कृता शम्भुनेयं न्यस्ता रत्नावली वा किमु निरतिशयोत्कण्ठया बोधिलक्ष्म्या / देवैर्दिव्याद्भुतानामसमसुमनसां लम्बिता मालिका नु प्रीयात्पङ्क्तिर्नखानामिति जनितमतिर्लोकनाथाङ्घ्रिजा वः // BuSto_39.11

क्वायं राजीवजन्मा नमदमरशिरस्तुङ्गमाणिक्यशय्याशश्वत्सुप्ताङ्घ्रिरेणुः क्व च धरणितलालम्बमौलिप्रणामः / इत्थं संजातहासा इव रुचिनिचयैर्दन्तुरा ये दुरन्ता ध्वान्तच्छेदाय लोकेश्वरचरणभवास्ते नखा वो भवन्तु // BuSto_39.12

शूरास्तापापहारे शिशिरतरसुधाशीकरासारकाराः प्राकाराः क्रूरदूरप्रसरदुरुशरासारमारापकारे / संसाराकारकारागृहबृहदुदरोदारदुःखप्रकारं घोरं वः संहरन्तां चरणनखरुचः श्रीकराः पद्मपाणेः // BuSto_39.13

भासो लोकेशपादप्रभवनखभुवां दूरदुर्वारमारव्यामुक्तव्यापिबाणावरणजवनिकाभ्रान्तिमुत्पादयन्त्यः / संक्लेशानीकनाशस्फुटपिशुनमहाकेतुसंघातकल्पास् त्रैलोक्याशक्यशक्तित्रिभवजयबृहद्वैजयन्त्यो जयन्ति // BuSto_39.14

सम्यक्संबोधिचेतः शशिन इव समुद्भासिभासां समूहो निर्दग्धक्लेशभूतिप्रचय इव बृहन्मुक्तिमार्गानिलास्तः / विन्यस्तादभ्रशुभ्रोपलफलक इव क्रूरमारैरभेद्यः पायादुत्प्रेक्षितो वो नखरुचिनिकरः पादजः पद्मपाणेः // BuSto_39.15

वैलक्ष्येणेक्षणीयाः क्षणमसमतमःक्षेपदक्षाः क्षपाणा नाथेनाक्षुण्णपक्षक्षतिनिजविपदा निष्कलङ्काक्षया ये / अक्षीणारातिपक्षक्षपणपटुजगद्रक्षणाक्षुण्णदीक्षारक्षा रक्षन्तु लोकेश्वरचरणनखास्ते ऽक्षणक्षेपतो वः // BuSto_39.16

सत्संपत्साधनस्य प्रवरकमलभृत्पाददुर्गाश्रयस्य त्रैलोक्यश्रीजिगीषोर्नखरुचिनिवहस्यातुलो ऽभ्युच्चयो वः / मित्रेणाप्तोदयेन स्फुटमनुवलतालम्भितात्यन्तवृद्धेः पायात् सापायसर्वव्यसनरिपुमहायानसंसिद्धिहेतुः // BuSto_39.17

अव्रीडश्चूडया ऽसौ वहति पशुपतिः काममर्धेन्दुभूषां शौरेः शोभाभिलाषः कथमपि कृतिनः कौस्तुभेनास्तमेति / दृष्टे ऽस्मिन् सो ऽपि मोघो मघवमणिमहामौलिरित्याप्तचित्तैर् यत्कान्त्याचिन्ति लोकैश्चरणनखगणः पद्मपाणेः स जीयात् // BuSto_39.18

आरादुच्चैरुदञ्चत्कृतविततिरधस्तारको नारकाणाम् / उद्यन्नीहाररोचिः शुचिररिवदनश्यामतापातहेतुः / दुर्विज्ञेयानुभावो निखिलजगदतिस्पष्टदृष्टिप्रकाशः पादाम्भोजावलम्बी नखकिरणचयः पातु वो बुद्धमौलेः // BuSto_39.19

दृष्टो हृष्टामरेशार्चनचतुरवधूमुक्तकर्पूरपांशुप्रोद्भासो भक्तिभारप्रवणहरजटाभूतिविभ्रान्तभूमिः / पूजाविक्षिप्तलक्ष्मीकरकमलगलत्केशराग्राणुरेणुच्छायः पायादपायान्नखकरविसरः पद्महस्ताङ्घ्रिजो वः // BuSto_39.20

मेरौ निष्पीतपीतद्युतिरमरकरिस्फारसिन्दूरधूलीशोणश्रीशान्तशूरो हरितहरिहयाहीनहारित्यहारी / मीलन्नीलावभासो नखरुचिविसरः पद्मभृत्पादपद्माद् उद्यद्दुग्धाब्धिवृद्धित्रसदमरवधूवीक्षितो रक्षताद् वः // BuSto_39.21

शोभा संभाव्यते ऽस्मिन् हिमकरधवलैर्नामरैश्चामरैर्वा भक्त्यारम्भेण रम्भे परिकिरसि मुधा किं नु कर्पूरधूलीः / किं ते पुष्पैः प्रकीर्णैः शचिशुचिभिरिति स्वामिना स्वर्भुवां वः पूजायामब्जपाणेर्नखरुचिनिवहः पादजो वर्णितो ऽव्यात् // BuSto_39.22

कैलासोद्भासिविन्ध्ये कवलितबलिजित्कायकालिम्नि कालीलीलालावण्यलेपे विहतहरितिमश्वेतपूषाश्वरश्मौ / लोकेशाङ्घ्रेर्नखानामुरुकरनिकरे किं मयेतीव शीर्णं शीतांशोः पातु पूजाचतुरसुरजनाकीर्णकुण्डच्छलाद् वः // BuSto_39.23

पादाः पादोद्भवानामतिविततिभृतां बुद्धमौलेर्नखाना पारे संसारयादःपतिगमनमहासेतुबन्धायमानाः / उद्यद्दुर्वारदुःखानलशमनमहापुण्यसंभारवारिस्वच्छन्दाच्छच्छटाभा झटिति विघटनं कुर्वतां वो भवस्य // BuSto_39.24

कालीकान्तेन्दुकान्तेः परिभवविधृतिर्भूरिकैलासभूभृद्भासां हासावगीतिर्हतिरपि हिमवद्गौरतागौरवस्य / क्षीराकूपारपूरप्लुतिरपि ककुभां नाकनागीयदन्तच्छेदच्छायाक्षतिर्वो नखरुचिविततिः पातु लोकेश्वराङ्घ्र्योः // BuSto_39.25

यत्पूजापारिजाते वलितमलिकुलं मीलति श्रीसरोजे सेवासक्तः स्वयंभूर्मुकुलितनलिनाद् दुःस्थितो यत्र तस्थौ / येनाश्यामा दिनश्रीः शमितसुरवधूक्लान्तिदोषा निशा ऽभूत् पादो ऽसौ पद्मपाणेर्नखविधुविलसच्चन्द्रिकः पातु युष्मान् // BuSto_39.26

कान्तो विभ्रान्तकान्तामरयुवतिजनैरर्चितो दृष्टिपातैः शुभ्रं विभ्राण्मृणालीनिकरमिव नखोद्योतनोद्भूतशोभः / कामीवानल्पकामप्रसरपरवशानेकचर्याप्रवृत्तः पादो वः पद्मपाणेरवतु सुरपुरीचन्दनामन्दचर्चः // BuSto_39.27

आनन्दामन्दभारोल्लसदमरकरैः पारिजाते विकीर्णे कालीयः कालकूटोत्कटपटल इव प्रोल्लसद्भृङ्गसार्थे / श्रेयो वः श्रीर्विधत्तामलममलनखद्योतदुग्धाब्धिमध्याद् उद्यन्ती पद्मपाणेश्चरणसरसिजस्याच्युतप्रीतिहेतोः // BuSto_39.28

वाञ्छाविच्छित्तिखेदोच्छलदनलशिखाछेदकच्छोच्छ्र्यो वः पद्मच्छायानुकारच्छलितमधुकराच्छादनाच्छादितश्रीः / स्वच्छन्दानच्छमूर्छच्छुचिनखकिरणोच्छूनगुच्छैरतुच्छो देयात् पादो ऽब्जकान्तिच्छुरितकररूचो ऽच्छिन्नमिच्छामकृच्छ्रात् // BuSto_39.29

उद्भूतोद्भासिचक्रद्युतिरमलनखैरद्वितीयोदितश्रीर् बिभ्राणो लक्षणानां गणमतुलगुणागण्यपुण्योपनीतम् / निःशेषद्वीपदीपप्रभवदतिमहद्वैभवो बुद्धमौलेः पायात् पादो नमस्यद्भुवनपतिशिरश्चक्रवर्ती चिरं वः // BuSto_39.30

कीर्णैराकाशगङ्गाकनककमलिनीकुड्मलैः को गुणो ऽस्मिन् किं गीतैर्गीतमेव स्फुटसरसिरूहभ्रान्तिभृङ्गावलीभिः / शक्यं माणिक्यदाम्नामिह रूचिरनखे शोभितुं नेत्यवादीद् यत्पूजायां सुरेशः स जयति चरणो वारिजव्यग्रपाणेः // BuSto_39.31

यो नाथस्यैव नासीदपि खलु सुगतेः कारणं जन्मभाजां यस्मिन् पद्माभिलाषी न मधुपनिवहः पक्षपाती जनो ऽपि / येनोर्वी नातिगुर्वी नतिमतिगुरुणा लम्भितापि त्रिलोकी लोकं पादः स पायात् सुगतशशधरद्योतविद्योतमौलेः // BuSto_39.32

यो ऽलीनां पानदानादकृत धृतमुदं संहतिं सेवकानां यस्मिन्नालं विहीनं न खलु हरिततात्यन्तशोभोपधानम् / देयाद्वो लौकनाथिश्चिरममरशिरःशायिरेणूत्करो ऽसौ श्रेयः श्रीवासभूमिर्नखकिरणहसत्केशरः पादपद्मः // BuSto_39.33

देहद्रोहावहोग्राहितहतिविहितो देहिनां हेतिरीहासिद्धेराहूतिराहो हृतिरतिमहतो बृंहतांहोमहिम्नः / क्लेशव्यूहाहितेहाहुतिविहितबृहद्द्रोहिदुःखाग्निदाहव्यापोहा वाहिनी स्ताद्वहुविहितहिता पद्महस्ताङघ्रिभावः // BuSto_39.34

बुद्धालंकारमौलेरविकलकमलभ्रान्तिभृद्भृङ्गमाला वाचाला निर्विचारा रचयतु चरणोत्सर्पिणी संपदं वः / सत्त्वत्राणैककार्या स्थिरतरसुचिरावस्थितिस्थापनार्थं विन्यस्ता शृङ्खलेव प्रचुरकरुणया स्थूलकालायसस्य // BuSto_39.35

राजीवान्तःपलाशावलिरुचिरमृदुर्वज्रसारो विसारो क्रुध्यद्वैरिप्रमुक्तप्रहरणनिवहस्योद्भवद्भङ्गभूमिः / रक्तो रागोपशान्तेरतिशयबलवत्कारणं तारणायां संसाराम्भोनिधेर्वः सुगतशशिभृतो ऽपास्तखेदो ऽस्तु पादः // BuSto_39.36

जम्भारेर्जृम्भिताम्भोरुहरुचिरचये चापलेनाप्यलीन् नालं लोलापि लोला हरकरविहितानन्दकुन्दोत्करे ऽपि / भ्राजिष्णौ विष्णुकीर्णे परिमलिनि पुरः पारिजाते ऽप्यजातप्रीतिर्यत्रालिमाला रमति जिनभृतः सो ऽङघ्रिपद्मो ऽवताद् वः // BuSto_39.37

भूयादुद्भूतभूरिद्युतिनिवहलसत्केशरोद्भासुरो वो रक्तच्छायानुविद्धोन्मुखनखदशनोद्भासिकान्त्या करालः / त्रस्यद्दुर्वृत्तवैरिद्विपतरलचलल्लोचनालोकनीयो लोकेशस्याङघ्रिसिंहः कमलभवजटारण्यशायी शिवाय // BuSto_39.38

अच्छीयानप्यनच्छो लघुरपि न लघुर्लङ्घने दिङ्मुखानां त्रैलोक्यानन्दनो ऽपि प्रबलपरपुरव्यापिसन्तापहेतुः / लावण्यालेपलिप्तो ऽप्यतिशयमधुरो वैधुराधेर्निरोद्धा पादोद्द्योतः क्रियाद् वो जिनरूचिविकसन्मालिकाशेखरस्य // BuSto_39.39

राजीवै राजराजो हरिरपि हरितैर्हारिभिः पारिजातैः कुन्दैः सानन्दमिन्दुर्बहुवसुविसरैर्वासवो भासमानैः / प्रीतः पाशी पलाशैरिति विबुधजनः प्राज्यपूजाविशेषं यत्रानुप्रासकाव्यायितमतत स वः पातु पादो ऽब्जपाणेः // BuSto_39.40

भानुर्भासां विकाशे नुतिमकृत नखेषून्मुखो नाकनाथः शर्वः शाखाग्रपर्वण्यविचलनयनो ऽप्यन्तकः प्रान्तकान्तौ / यस्यासामान्यशोभाविषयमतिशयं द्रष्टुमासीदनीशो निःशेषं दिव्यलोकः स जयति चरणो बुद्धबिम्बाङ्कमौलेः // BuSto_39.41

सम्यक्संबुद्धभानुस्फुटविकटजटापुञ्जकुञ्जोरुमूर्तेः संसाराम्भोधिमज्जद्गुरुतरजनतामेदिनीस्तम्भनस्य / भूयाद् भद्राय पादः कमलधरगिरेः सेवितः सिद्धसार्थैः पर्यन्तोद्वान्तकान्तिस्रवदरुणमहाधातुमन्निर्झरो वः // BuSto_39.42

संसाराध्वप्रबन्धश्रमसकलजगत्क्लान्तिसंशान्तिहेतुच्छायस्येच्छाफलस्य स्फुटनखकुसुमोद्भासिशाखाभृतो वः / लोकेशाङघ्रिद्रुमस्य प्रणतसुरजनैर्मौलिमालालवाले मूले संपादितो ऽव्यान्मणिकलशभृतः स्वच्छधामाम्बुसेकः // BuSto_39.43

संमूलक्लेशजालप्रबलरिपुबलोन्मूलनस्थूललाभाल्लब्धोल्लासो विलासी बलविजयिलसन्मौलिलीलालयो वः / पाद पायादतुल्यामलकमलभृतो ऽलीकफुल्लाब्जलोभव्यालोलानल्पलापोल्लसदलिपटलाल्लुप्तसंगीतिलोलः // BuSto_39.44

त्रैलोक्यैश्वर्यलक्ष्मीचपलकरिवधूसंयमालानदण्डः कष्टक्लेशाहिदष्टस्खलदखिलजगत्पालने दक्षतर्क्षः / दुर्वारान्तःप्रवेशाकृशनरकपुरे द्वारगाढार्गलो वो भूत्यै लोकेशपादो भवजलधिसमुल्लङ्घनैकप्लवो ऽस्तु // BuSto_39.45

इति पादुकादेशना वृत्तो नृत्तप्रकारः सपदि विघटिता वाद्यविद्यानवद्या नो गीतं नावगीतं कृतरसरचनैर्नैव भावैरभावि / इत्यन्तः स्मेरशाक्रे सदसि न शकिता यत्र पूजाप्सरोभिः कर्तुं भावातुराभिः स जयति जनितातृप्तिरूपः सरोजी // BuSto_39.46

उद्दामस्थामवामक्रमविषममिलन्मारमानप्रमाथी मध्यादुन्माथिमोहोद्गमममितमहोमौलिरायामभीमम् / श्रीमन्निःसीमभूमासममहिममहाकामधामातिभूमौ सत्त्वप्रेमप्रकामप्रथितमृदुमना निर्विरामाश्रयो वः // BuSto_39.47

सारप्राकारघोरावरणनिवरणो बन्धनक्रूरदूरस्फारावारातिरौद्रे नरकनगरिकाकारधारिण्यरीणाम् / कारागारोदरे यः स्मरणशरणतां कारणाकातराणां यातः सत्कारकारी गुरुतरकरुणः पातु लोकेश्वरो वः // BuSto_39.48

कल्पान्तोल्लासिहेलाचलदनिलचलोल्लोलकल्लोलमालावाचाले नक्रजालाकुलकलिलजले वारिधावुल्ललन्तः / आलम्बे यस्य नीलोत्पलविमलमहाकुट्टिमालीनलीलाम् आलीयन्ते लधीयः स जगति कमली पालनायाल मस्तु // BuSto_39.49

धूमौघोबन्धबन्धीकृतविधुरविधुब्रध्ननिर्बन्धधामा नीरोधोद्भेदबाधाबुधविबुधवधूधीरतोद्धारधुर्यः / यन्नामाधीतिधाराधरविधृतिकृतामेति धूमध्वजो ऽपि प्रध्वंसं साधु धेयान्निरवधि स विधिं बुद्धधारो धृतेर्वः // BuSto_39.50

क्रोधादुत्क्षिप्तकालायुधकरनिकरः क्रूरसूत्कारकारी दानक्लिद्यत्कपोलाकुलमधुपकुलाकाण्डकालोरुकायः / क्रान्तो यन्नामकष्टाङ्कुशहतिकृपणः कातरेण करीन्द्रो लोकेशः स प्रकामोपकरणकरुणः कामकृत्यं क्रियाद् वः // BuSto_39.51

सूत्कारिश्वासपोषाकृशविषवमथुप्लोषिरोषाश्रयाशा दंशाशादर्शितास्या भृशततशिरसो नाशने दन्दशूकाः / यन्नामाशीविषेशद्विषि विशति विषां धीषु नश्यन्त्यनीशा लोकेशः सो ऽस्तु विश्वश्रयदतिविषमक्लेशराशेः शमाय // BuSto_39.52

गन्धोद्गारोरुगर्वग्रहणगजगणग्रासगीतोग्रवेगः सावेगोदग्रगामी गलगहनगुहागाढगम्भीरगर्जः / योगैर्युग्योपयोगानगमि मृगपतिर्यद्गणोद्गीतियोगाद् दुर्योगं वः स योगी स्थगयतु सुगतासङ्गितुङ्गोत्तमाङ्गः // BuSto_39.53

भूयो ऽपायानुमेयः क्षतदयहृदयो भीविधायी विहाय स्थेयान् शैलोपमेयः श्रयदलिगवयच्छायकायो निकायः / सद्योगोपायमायामय इव विलयं यातवान् यातवीर्यो यत्पादध्यायिनेयः स सुगतनिलयो जायतां वो जयाय // BuSto_39.54

संत्रासावासभूमिं कलिविसरसरद्यादसं भास्वरासिप्रासप्रोल्लासिभङ्गं प्रसृतसितलसत्केतुसत्फेनहास्याम् / यत्सेवासाधुनावा द्विषदसमसमित्सारसेनास्रवन्तीं सोत्साहाः संचरन्ते सुखमसुखमसौ संह्रियाद् वः सरोजी // BuSto_39.55

भूभृत्संभारभेदप्रभुकरविभवो भूरिभूभोगभीमं बिभ्राणश्चित्रभानुं भवदतिभरभीसंभ्रमोद्भ्रान्तिभूतः / दम्भोलिर्भीतिभाजामभवदभिपतन्नाशुनाभावभूमिर् भक्तेर्यस्य प्रभावात् स भवतु भवभिद्वो भृताम्भोजशोभी // BuSto_39.56

आबाधाधूतधैर्यश्च्युतिविधिसविधो दुर्विधक्रोधवेध् बाधादुःसाधरोधोद्धुरबहुविविधव्याधिसंबाधदेहः / यस्य ध्यानावधानादधिकधृतिसुधाधानसंधारितासुर्धीमान्नाधेर्विधेयो धियमवतु स वो बोधये बुद्धमूर्धा // BuSto_39.57

आरादाहूतियातृक्षितिपतिरतुलारातिशातिप्रतापप्रोद्गीतिर्दण्डनीतिप्रथितपितृपतिख्यातिजिद्दण्डनीतिः / यत्पादाधीतिशक्तेः कुपितमतिरतिप्रीतिमायाति भूतेर् व्याघातोद्भूतिहेतुर्जिनवृषवसतिः संह्रियाद् वः स भीतिम् // BuSto_39.58

ब्रह्मा जिह्मायितो ऽभूदगुरुरपि गुरुः खण्डिताखण्डलोक्तिर् विष्णुस्तूष्णीमधृष्टो वचनविरचने वीतगर्वो ऽपि शर्वः / तुष्टास्तुष्टूषवो ऽपि स्फुटमिति विबुधा नो बुधा यद्गुणोक्तौ स श्रीमानब्जपाणिर्जयति जिनमनोगोचरान्तर्गुणौघः // BuSto_39.59

धात्रा चित्रं चरित्रं सुररिपुरिपुणा सत्रिनेत्रेण नेत्र् गोत्रामित्रेण गोत्रं गतिरपि गुरुणा रात्रिपेणापि गात्रम् / मैत्रं मित्रेण पुत्रीयितसकलजगत्प्रेम पुत्रेण चात्रेर्यत्रेदं स्तोत्रपात्रं स्तुतमवतु स वो ऽमात्रसत्तो ऽब्जपाणिः // BuSto_39.60

यस्मिन् ब्रह्मा बहुत्वं बहुबहुमतवानाननानां निजाना स्कन्दो ऽप्यानन्दगर्भं नुतिषु नतिकृतौ नागनाथो ऽपि मूर्ध्नः / शक्रः श्लाघ्यामनैषीन्नयनदशशतां यं विलोक्य त्रिलोकीलोकेशो निर्विरामानतिनयनरतिस्तोत्रपात्रं स पायात् // BuSto_39.61

खेदी खे दीप्तरश्मिः किल विफलमसावध्वनीनोध्वनीनो लोकालोकार्थमास्ते ननु कमलभृतो दीप्ततापः प्रतापः / धीरैर्धीरैरकारि स्तुतिरिति विहितोल्लासभासां सभासां यस्यार्यस्यास्तु तस्माज्जगति कृतरिपुक्षिप्रसादः प्रसादः // BuSto_39.62

न्यस्ता यस्मिन्नमस्ये नतिरपि नितरामुन्नतिः पुण्यधाम्नां निःसामान्यैकमान्ये ऽपचितिरुपचितिर्भूयसी भक्तिभाजाम् / ध्यानस्थानस्य यस्य स्मृतिरपि सहसा विस्मृतिर्भूतभीतेः सो ऽनन्ताचिन्त्यलोके विहितहितपथो लोकनाथो ऽवताद्वः // BuSto_39.63

दम्भो दम्भोलिरैन्द्रः क्वचिदकृत सुरारातिशातो ऽतिशात् हारी हारीरणासौ बलवति विफलाभीषु राजीषु राजी / चक्रे चक्रेण नार्थं हरिरिति जनता नूनमाहेति हेतिव्यासव्यासक्तिमुक्तान् जयति रिपुजनोल्लासरोजी सरोजी // BuSto_39.64

लोकातोतं दधानः सुखमपि जगतां तीव्रदुःखेन दुःखी नित्यं नित्यानुरक्तो ऽप्यशरणकृपणप्राणभृद्योगयुक्तः / त्रैलोक्यस्यैकनाथो ऽप्यसमरुचिजनाराधनाबन्धुरो यः सो ऽव्यात् संबुद्धमौलिर्विहितविसदृशाचिन्त्यचर्यश्चिरं वः // BuSto_39.65

निर्विच्छेदत्रिलोकीनिहितनिरुपमस्नेहयोगानुयोगा निर्वाणो न प्रकम्प्यो बलवदलघुभिस्तीर्थिकोन्मत्तवातैः / जीयाल्लोकेशदीपः स भुवनभवनोद्भूतमोहान्धकारध्वंसो ऽविध्वंसधामा परहितकरणोद्योगसंवृत्तवर्त्तिः // BuSto_39.66

क्वासौ सर्वत्र मैत्री क्व विषमबहलक्लेशविद्वेषिदाहः क्व प्रौढा मुक्तिशक्तिः क्व च दृढकरुणापाशनिष्पन्दबन्धः / क्वोपेक्षापक्षपातः क्वपरहितकृतिव्यग्रता तद्विचित्रं चित्रं राजीवपाणेश्चरितमतिजगज्जायतां ज्योतिजिद्वः // BuSto_39.67

सर्वाग्रः सर्वरूपप्रथनपृथुनयः सर्वदा सर्वनाथः सर्वेषां सर्वथा यो विनयविधिमहासर्वगुर्वर्थसिद्ध्यै / सर्वैः सातोतगर्वैर्गुरुमहिमगुणैः खर्वयन् सर्वगर्वान् सर्वः सर्वप्रदो वः सफलयतु रूचीः सर्वविन्मौलिरुर्वीः // BuSto_39.68

ईशः स्वामी प्रजानां पतिरमरगुरुर्लोकपालो महेन्द्रो भास्वान् दत्तारिदण्डः परजयबलिजिद् वित्तदो जैत्रपाशः / इत्यन्तर्हासगर्भं भणति परिजने ऽन्वर्थनाम्नां निजानां पात्रे यत्रानुलज्जैर्नतममरगणैरब्जपाणिः स जीयात् // BuSto_39.69

वर्यार्याणां वरेण्यो वरपरविधुरोत्सारणा संवरो व् दुर्वारैः सारमारैरमितकरधरो दुर्धरो वैरिवीरैः / वीरो वीरारिवारी प्रचुरतरवरोदारसंभारवारिस्फारासारोरुधाराविसरवितरणाधीरधाराधरः स्यात् // BuSto_39.70

नित्योद्युक्ते ऽतिशक्ते प्रभवति नलिनोद्भासि हस्ते समस्तो नाथी संसारयादःपतिपथपथको लोक इत्याकलय्य / यस्मिन् विन्यस्य भारं लघुरलघुकृपो विश्वदीपं प्रपेदे बुद्धो ऽवन्ध्यप्रतिज्ञाकृतधृतिविधृतिर्निर्वृतिं सो ऽवताद्वः // BuSto_39.71

उच्चैरूढो गरीयान् सुगत इव जगत्कार्यसंभारभारो न्यस्ता हस्ते प्रशस्ता निज इव कमलालंकृतिर्भक्तिभाजाम् / निर्वाणं नारकाग्नेर्निचय इव चिरं प्रापितः सत्त्वसार्थः तीव्रक्लेशप्रबन्धो जन इव शमितो येन पायात् स युष्मान् // BuSto_39.72

यो नानानन्तरूपप्रकटनपटिमख्यातमायो ऽप्यमायः संशान्ताशेषभीरप्यतिकरुणतया कातराचारकारी / वीतक्रोधो ऽपि दुष्टाशयदमनबुधक्रोधनित्यानुबन्धः संबुद्धोद्भासिमौलिः स जयति महतां चिन्तनीयो ऽप्यचिन्त्यः // BuSto_39.73

धत्ते नैवोत्तमाङ्गं परमपितु वपुर्यो ऽमिताभाभिरामं सन्नालं नारविन्दं गुरुभयविधुरा वैरिसेनापि यस्य / येनाबद्धा जटा नो जगदहितहतिव्यापृतेनापि कक्षा दक्षो ऽसौ रक्षताद्वः कुपितयममुखालोकनाल्लोकनाथः // BuSto_39.74

शेषाशङ्की चकम्पे भवसलिलनिधिः क्लेशसार्थैः प्रलीन विश्रान्तं बोधिसत्त्वैर्मुनिरपि शुशुभे श्लाघ्यनिर्वाणलीलः / यस्मिन्नाबद्धकक्षे प्रसरति परितो ऽशेषसत्त्वार्थकार्यव्यायामे स प्रकामं शमयतु सुगतावासमौलिर्मलं वः // BuSto_39.75

इति भगवद्वर्णना /

प्रत्यूहव्यूहबाधाविघटनविषमे मानसस्याप्यभूमौ कर्मण्येकान्तशर्मच्छिदि जगदहितोच्छित्तये पद्मपाणिः / निघ्नः क्रीतो ऽथ भीतो बलवदिव यया निर्विकारो नियुक्तः सा नाथस्यातिगुर्वी प्रभुरवतु कृपा निष्कृपादन्तकाद्वः // BuSto_39.76

भूमिर्नैवाभिभूतेर्मृदुतरमपि यल्लोकधातूननन्तान् अत्यन्तावीर्यवीर्यं युगपदपि भृशं भासयंस्त्रासशान्त्यै / खद्योतोद्योतलेशानुकृतिविलिसिताशेषतेजस्वितेजस् तेजो लोकेश्वरं वो हरतु हृदि भवद्भूरिमोहान्धकारम् // BuSto_39.77

निःशेषाकाशधातुर्जन इव जनितापूरिताशः समन्तात् प्रारब्धः सर्वभासामिव निरतिशयापायराशेर्विलोपः / सार्धं सान्द्रान्धकारैः शममगमि महानृद्धिमान्मानिमारो येनोद्भासः स भूयात् सरसिरूहभृतो भूतये जायतां वः // BuSto_39.78

ईशो ऽन्यद्योतनाशो बलभिदितरभादुःशमध्वान्तराशेः सत्त्वद्रोहाशयानामनुपमतपनो यो ऽच्युतश्चित्रभानुः / नानानन्ताचलादिव्यवहितविषयोद्भासने शक्तिधारी लोकेशोद्भास एकोप्यमरगणनिभो भीभिदे वः स भूयात् // BuSto_39.79

संपन्नाशेषसत्त्वप्रचुरजलचरेच्छासुखं यत्र दूरं दुर्लङ्घये यान्त्यधस्ताद् गिरय इव जनानर्थदुस्तीर्थ्यसार्थाः / दुर्वारो ऽसौ समन्तात् पृथुभवभुवनाभावसंरम्भजृम्भी भीदावाग्निप्रशान्त्यै करकमलविभाम्भोनिधिर्जृम्भताद्वः // BuSto_39.80

निर्वाणो नारकाग्निः किमिति यदि विनेयेषु धर्मामृतौघोराशिर्बद्धो जटानां यदि गतिरहितः किं समहो रिपूणाम् / मर्धागारे गरीयान् यदि वसति जिनो बन्धुरा किं त्रिलोकी नाथस्येत्थं विचित्रा व्यवहृतिरहितं हन्तु वो लोकबन्धोः // BuSto_39.81

मूर्च्छत्येकापि सत्त्वाशयवशविहिताकारभेदाभिराम् दुर्भेदाभूतकल्पा चलदचलमहारम्भदम्भोलिकोटिः / लौकेशी सन्मनीषाकुमुदशशिरुचिस्तीर्थिकानर्थकोटिध्वान्तान्तर्धानभानुर्भवतु भवभिदे देशना शासनी वः // BuSto_39.82

दुर्वादोन्मादनादिप्रचुरमदकणादाक्षपादादिवादिप्रोद्यन्नानाविवादास्पदमदसदसां सापवादो विवादः / उत्सादः सप्रमादोन्मदजनविपदां कोविदानां प्रसादो भावानुत्पादवादो जयति जिनवपुः पादसंपादमौलेः // BuSto_39.83

त्रस्तव्यस्तारिशस्त्रं त्रयि जगति चकास्ति स्तुतो यद्गभस्तिस्तोमो विस्तीर्णतोयं मरुनिलयसदां विस्तरध्वस्ततापः / स स्तादस्ताहितास्त्रो बलिवलिकुलिशः पद्महस्तस्य हस्तोऽनापास्त्यैः वं समस्तत्रिभुवनविकसत्साध्वसापास्तिशस्तः // BuSto_39.84

संवर्तोद्वृत्तवातव्यतिकरविषयोत्तुङ्गशैलद्रुमालीनिर्मूलोन्मूलनाय प्रभुररिकरिणां शातितानल्पदर्पः / भद्रो लोकेश्वरस्य प्रणयिमधुकराकर्षदानौघवर्षी हस्तस्तम्बेरमो वो भवरिपुनगरीभञ्जनायालमस्तु // BuSto_39.85

सत्कोषं सन्निधानं घनरुचिजिनतावाञ्छिताच्छेदसिद्धौ यद्यातं शातकोटिमनुकृतिमहितत्रासिसत्पत्रकोटि / सम्यक्संबोधिलक्ष्मीकृतवसतिगुणश्लाघयैवाविमुक्तं मुक्तेस्तत्कारणं वः करकमलमलं लोकनाथस्य भूयात् // BuSto_39.86

शश्वद्वर्धिष्णुतृष्णाविकलगलदरीविह्वलप्रेतराशेर् आह्लादोत्पादि सत्यं कमलमधिवसद्बोधिलक्ष्मीकमब्जम् / सत्पद्मं भूतिवाञ्च्छाविनिहितमनसां साधुसेवापदं यत् तल्लोकेशस्य युष्मान् पटुरुचिपटलीराजिराजीवमव्यात् // BuSto_39.87

नानादुःखप्रतानां तनुकिरणघनोत्तापनक्लेशभानुम्लानं दीनाननं यज्जनमनुजनयत्यातपत्रोपमानम् / ग्लानिं मा गादहीनं तदखिलभुवनान्यूनभानूद्वितानं लीनं लोकेशपाणौ नलिनममलिनं म्लानिमेनो नयेद्वः // BuSto_39.88

स्थाम्नः स्थानं महिम्नो महदुदयपदं धामधाम्नां प्रथिम्नस् त्रासावासो रिपूणां दुरभिभवभवाद्भीभिदोद्भूतिभूमिः / कान्तं शोभानिशान्तं वसतिरतिजगद्वीर्यविस्तारिराशेर् लोकेशस्यास्तु बाहुर्बहुजगदहितोच्छेदनाचण्डदण्डः // BuSto_39.89

यल्लावण्यामृतौघं क्षरदपि जनितातङ्कमेवाहितानां तृप्तिं नैव प्रयच्छत्यथ पुनरतनुप्रीणनं लोचनानाम् / शोभागारं विशोभीकृतसकलजगद्भूषणं भूषणानां तद्भुयादेकचीरं सुखमसुखनुदे भास्वदम्भोजिनो वः // BuSto_39.90

म्लानं रूपाभिमानैर्जगति सफलतां लोचनैः पुण्यभाजां यातं घातं तु तृष्णाततितरलतरैर्यत्र लावण्यसिन्धौ / मन्ये ऽसंख्यैः शशाङ्कप्रभृतिभिरतुलं कान्तिमद्भिः कृतं स्याद् एकं यद्यास्यमस्याप्यतिजयि जयतां तन्मुखं पद्मपाणेः // BuSto_39.91

यस्मिन् विद्वेषभाजामविरतविलसत्कान्तितोयौघमेघैः संवृत्तं दाहदायि स्फुटतरमसकृद्दुर्दिनं देहिनां तु / धौता ध्वस्तानुबन्धा बहुलमलमषीपङ्कलेपप्रबन्धाः तद्बुद्धागारमूर्द्धामुखमतिसुखदं स्ताद्विचित्रक्रियं वं // BuSto_39.92

इष्टाब्जाक्लिष्टपाणेः स्फुटविकटकुटीकुट्टिमान्तोपविष्टस्पष्टश्लिष्टामिताभद्युतिपटुपटलापाटलाभापटिम्नः / शोभाविष्टैरदृष्टोपरिघनघटनस्योत्कटाटोपबन्धः कूटस्याव्याज्जटानां कटुरकटसुहृत्संकटात्कङ्कटो वः // BuSto_39.93

अत्यन्ताह्लादहेतोरविरतविस्तृतस्यामिताभप्रभाम्भ संभारस्यैव सेकान् निरतिशयमृजासुन्दरो लब्धवृद्धिः / उद्दामामोदिदिव्याद्भुतकुसुमचयैरर्चितश्चिन्तितार्थप्राप्तेः संपत्तये स्तान्नलिनधरजटाकल्पवल्लीचयो वः // BuSto_39.94

यासां बद्धो विमुक्तिं गमयति नियतामुज्झितान्याधिवासो निःसामान्यां विभूषां जनयति वपुषा यासु नाथो ऽमिताभः / सर्वामोदच्छिदो या निरुपमवहलामोदलिप्ताखिलाशा लौकेश्यो ऽवश्यलभ्यां मृतिमतिविकटास्ता जटा वो हरन्तु // BuSto_39.95

संघातो नो जटानामखिलजनमनोबन्धने पाशराशिर् लावण्यं नापि दुःखानलविकलजगज्जीवनीयो ऽमृतौघः / नाम्भोजं दुष्टदम्यान्तकतुरगकशाक्लेशदोषातिमोषः प्रत्याशा पोषसिद्धिं दिशतु जिनशशिश्लेषिकेशः श्रियो वः // BuSto_39.96

उद्दामापिङ्गतेजःप्रसरविरचिताशेषदिग्दाहमोहत्रस्तात्राणात्रिलोकीकवलनरभसोल्लासिकालाग्निकल्पम् / दष्टौष्ठं दुष्टदृष्टिज्वलितमनुहयग्रीवमाबद्धलक्ष्म्या जाता लोकेश्वरी वः क्षणमतुलकृपाकातरा दृष्टिरव्यात् // BuSto_39.97

लोपं लोकः प्रयाति स्फुटमखिलमहाभूभृतामद्य तूर्ण चूर्णीभावो धराणामपि जलनिधयः शोषमायान्त्यनन्ताः / इत्थं यस्यान्तकोपभ्रुकुटिभरभवद्भङ्गभीमाल्ललाटान्निर्यान्तीं वीक्ष्य देवीमतुलभुजबलैस्त्रस्तमब्जी स जीयात् // BuSto_39.98

स्तुत्यैः स्तुत्या गुरूणामपि जगति गुरुर्वन्दिता वन्दनीयैर् मूर्तेवानल्पकल्पार्जितसकलजगत्त्राणनिर्व्याजशक्तिः / लोकस्यार्तिच्छिदा यैः स्वयमतुलकृपैवाब्जिनो निर्गता स्तात् तारा संसारकारोदरगुरुविलसत्कारणाहारिणी वः // BuSto_39.99

गीर्वाणग्रामगीतो गुरुगणनगुणो गीष्पतेरग्रगाभिर् ग्राह्योनुद्गाढवर्गस्फुटगतिगहनो हंसगाम्युग्रगाभिः / गम्भीरोद्गारिणीभिर्निगदितगरिमागेयपूगाल्पभागः सम्यग्गम्यः समग्रो ऽवतु सुगतगिरामब्जिनो वो गुणौघः // BuSto_39.100

कविरपि जन्मनि जन्मनि भक्तश्चरणे ऽवलोकितेश्वरस्य / प्रकृतिशरणगोत्तरधीः परहितगुरुकार्यकार्यः स्याम् // BuSto_39.101

महाक्षपटलिकश्रीवज्रदत्तकविविरचितं श्रीलोकेश्वरशतकं समाप्तम् //

digital sanskrit buddhist canon, stotra section, text no. 40: lokeśvarastotram

नानाकृतिं सुकृतिनं जगतः शरण्यं लोकेशकेशवहरात्मधरैरवश्यम् / संसारसागरतरं कमलायताक्षं श्रीलोकनाथविबुधं शुभदं भजामि // BuSto_40.1

रक्षाकरं सकलभीतिवतां जनानां वामाननं कनककुण्डलचारुकर्णम् / ग्रैवेयकादिमणिकाभरणेन शोभं श्रीलोकनाथविबुधं शुभदं भजामि // BuSto_40.2

भक्त्या नतस्य मनुजस्य विपद्विरामं स्वर्गापवर्गफलदं वरदं दयालुम् / देवाधिदेवममरं जिनसंघवन्तं श्रीलोकनाथविबुधं शुभदं भजामि // BuSto_40.3

सन्तप्तरूपतिलकं तिलकं सुराणां रत्नाकरं कनककुन्तकशोभहस्तम् / भ्राजिष्णुमाभरणधारणदिक्प्रदं तं श्रीलोकनाथविबुधं शुभदं भजामि // BuSto_40.4

दुर्गन्धदुर्गतिहरं दुरितापहारं दुर्भिक्षनाशकरणं करुणाकरं तम् / विद्याप्रदं गुणनिधिं शुभशुद्धदेहं श्रीलोकनाथविबुधं शुभदं भजामि // BuSto_40.5

इत्थं वरं सकलभूतगणाधिनाथं त्रैलोक्यनाथममरैरपि वन्द्यमानम् / एवं क्वचिद् रथवरे सुखसंप्रविष्टं श्रीलोकनाथविबुधं शुभदं भजामि // BuSto_40.6

यक्षादिकिन्नरनरैर्मुनिभिश्च नागैर्विद्याधरैः सुरगणैर्दनुजैः पिशाचैः / सर्वोपकारनमितं पुटिता ग्रहस्तैः श्रीलोकनाथविबुधं शुभदं भजामि // BuSto_40.7

गन्धादिचन्दनयुतं मृगनाभिभिश्च कर्पूरकुङ्कुमवरैर्हरिचन्दनैश्च / तस्यानुलेपनकृतेन सुशोभिताङ्गं श्रीलोकनाथविबुधं शुभदं भजामि // BuSto_40.8

रोगादिनाशनकरं भजतां सुनाम शोकादिदुःखहरणं सुखचिन्तनीयम् / पीयूषतुल्यवचनं मृदुजातगात्रं श्रीलोकनाथविबुधं शुभदं भजामि // BuSto_40.9

आजानुलम्बितकरं गजराजमध्यं सौन्दर्यकुण्डशिखरं स्फटिकाभदन्तम् / अत्यन्तसुन्दरतनुं शुभलक्षणाङ्गं श्रीलोकनाथविबुधं शुभदं भजामि // BuSto_40.10

ये लोकनाथस्य सदा सुरभ्यं स्तोत्रं पठिष्यन्ति जना सभावाः / श्रीलोकनाथो ऽपि तदीप्सितार्थं स्वहस्तग्रस्तस्त्वरितं ददाति // BuSto_40.11

श्रीलोकेश्वरस्तोत्रं समाप्तम् //

digital sanskrit buddhist canon, stotra section, text no. 41: madhyamakaśāstrastutiḥ ācārya-candrakīrtikṛtā

यद्बुद्धैरिह शासनं नवविधं सूत्रादि संकीर्तितं लोकानां चरितानुरोधनिपुणं सत्यद्वयापाश्रयम् / तस्मिन् रागनिराकृतौ नहि कथा द्वेषक्षये जायते द्वेषस्यापि निराकृतौ नहि कथा रागक्षये जायते // BuSto_41.1

मानादेरपि यत् क्षयाय वचनं नान्यं मलं हन्ति तत् तस्माद्वयापितरं न तत्र च पुनस्तास्ता महार्थाः कथाः / मा मोहस्य परिक्षयाय तु कथा क्लेशानशेषानसौ हन्यान्मोहसमाश्रिता हि सकलाः क्लेशा जिनैर्भाषिताः // BuSto_41.2

मोहस्यास्य परिक्षयाय च यतो दृष्टाः प्रतीत्यादयस्तत्त्वं तत् प्रतिपच्च सैव सुगतैः संकीर्तिता मध्यमा / कायो धर्ममयो मुनेः स च यतः सा शून्यतेत्युच्यते बुद्धानां हृदयं स चापि महती विद्येति संकीर्त्यते // BuSto_41.3

यस्मात्सर्वगुणाकरो ऽयमुदितो बुद्धैरतस्तत्कथा शास्त्रे मध्यमके ऽथ विस्तरतरा मुख्यात्मना वर्णिता / कारुण्यद्रुतचेतसा प्रवचनं बुद्ध्वा यथावस्थितं बुद्धानां तनयेन तेन सुधिया नागार्जुनेनादरात् // BuSto_41.4

गम्भीरं जिनशासनं न हि जनो यो वेत्ति तत्संविदे मौनीन्द्राद् वचसः पृथङ्निगदितुं वाञ्छन्ति तत्त्वं च ये / अन्ये ये ऽपि कुबुद्धयः प्रवचनं व्याचक्षते चान्यथा तेषां चापि निराकृतौ कृतमिदं शास्त्रं हतान्तर्द्वयम् // BuSto_41.5

स्पष्टं राहुलभद्रपादसहितो नागार्जुनो तन्मत देवेनाप्यनुगम्यमानवचनः कालं चिरं दिष्टवान् / तच्छास्त्रप्रविवेकनिश्चितधियस्तीर्थ्यान् विजित्याखिलांस्तच्छिष्या अपि शासनं मुनिवरस्यादिष्टवन्तश्चिरम् // BuSto_41.6

आयाताय शिरो ऽर्थिंने करुणया प्रोत्कृत्य दत्त्वा शिरः संयाते तु सुखावतीं जिनसुते नागार्जुने तत्कृताः / ग्रन्थाः शिष्यगणाश्च ते ऽपि बहुना कालेन नाशं गताः तत्त्वार्के ऽस्तमिते ऽधुना न हि मतं स्पष्टं तदस्ति क्वचित् // BuSto_41.7

उत्प्रेक्षा रचितार्थमात्रनिपुणे दुरंगते सत्पथाद् उन्मत्ते ऽथ निपीय तर्कमदिरां लोके ऽधुना भूयसा / सर्वज्ञोदिततत्त्वबोधरहिते बौद्धे मते व्याकुले धन्यो ऽसौ क्षणमप्यपास्य विमतिं यः शून्यतां गाहते // BuSto_41.8

भीत्या वस्तुनिबन्धनोपरचितैर्यः शास्त्रपाशैर्वृतश्चित्त्वोत्प्लुत्य च याति वस्तुपरिखां चैको मृगो ऽसौ महान् / तं प्रत्यद्य न चिन्तया मम गुणश्चैकस्तु यो नाधुना तं प्रत्येव तदन्यशास्त्रमथनी वृत्तिः कृतेयं मया // BuSto_41.9

दृष्ट्वा सूत्रसमुच्चयं परिकथां रत्नावलीं संस्तुतीरभ्यस्यातिचिरं च शास्त्रगदितास्ताः कारिका यत्नतः / युक्त्याख्यामथ षष्टिकां सविडलां तां शून्यतासप्ततिं या चासावथ विग्रहस्य रचिता व्यावर्तिनी तामपि // BuSto_41.10

दृष्ट्वा तच्छतकादिकं बहुविधं सूत्रं गभीरं तथा वृत्तिं चाप्यथ बुद्धपालितकृतां सूक्ष्मां च यद्भाविना / पारम्पर्यसमागतं प्रविचयाच्चासादितं यन्मया पिण्डीकृत्य तदेतदुन्नतधियां तुष्टौ समावेदितम् // BuSto_41.11

चिन्तामण्डल एष तर्कमथनः साक्षादिहावस्थितान् अर्थान् सम्यगनाकुलान् पटुधियां वागांशुभिर्भासयन् / वृत्तिं स्पष्टतरामिमां च विदधच्चन्द्रो ऽधुना कीर्तिमान् लोकानामुदितो निहन्ति विमतीः सान्द्रान्धकारैः सह // BuSto_41.12

कृत्वा वृत्तिमिमामनाकुलपदां सत्प्रक्रियामादरा श्राद्धानां सुधियां न निश्चयविधौ युक्त्यागमापाश्रयाम् / यत्पुण्यं मम शून्यतेव विपुलं तेनैव लोको ऽखिलस्त्यक्त्वा दृष्टिगणं प्रयातु पदवीं सर्वप्रपञ्चच्छिदाम् // BuSto_41.13

शास्तारं प्रणिपत्य गौतममहं तद्धर्मतावस्थितान् सम्बुद्धान् सकलं जिनात्मजगणं धर्मं च तैर्भाषितम् / चक्षुर्भूतमनन्तबुद्धवचनस्यालोचने देहिनाम् यो ऽमुं मध्यमकं चकार कृपया नागार्जुनस्तं नमे // BuSto_41.14

श्री चन्द्रकीर्तिकृता मध्यमकशास्त्रस्तुतिः समाप्ता //

digital sanskrit buddhist canon, stotra section, text no. 42: mahābodhibhaṭṭārakastotram

ओम् नमः शाक्यसिंहाय

सिद्धं प्रसिद्धं विजितामरं च शान्तं विरागं सुविशुद्धशीलम् / विश्वेश्वरं सर्वगुणाकरं वै श्रीशाक्यसिंहं प्रणमामि नित्यम् // BuSto_42.1

छत्राभशीर्षं वरनीलकेशं चोर्णासुशोभं हि महाललाटम् / नीलोत्पलाभं नयनं विशालं श्रीशाक्यसिंहं प्रणमामि नित्यम् // BuSto_42.2

उत्तुङ्गनासं भरपीनगण्डं बिम्बौष्ठकल्पं मृगराजवक्षसम् / उत्तप्तहेमाभसुवर्णवर्णं श्रीशाक्यसिंहं प्रणमामि नित्यम् // BuSto_42.3

पायोधकोषं शुभकर्णशोभं गण्डस्त्रिरेखावरचैलभूषम् / प्राजानुबाहुं द्विपनासकल्पं श्रीशाक्यसिंहं प्रणमामि नित्यम् // BuSto_42.4

विचित्रपुष्पैर्नरयाक्षमानं श्रीवत्सभद्रद्विगणोपयुक्तम् / अशीतिसुव्यञ्जनगात्रशोभं श्रीशाक्यसिंहं प्रणमामि नित्यम् // BuSto_42.5

शास्तारमग्र्यं नरवीरवीरं मायासुतं कारुणिकं जिनेन्द्रम् / शौद्धोदनिं लोकविदं मुनीन्द्रं श्रीशाक्यसिंहं प्रणमामि नित्यम् // BuSto_42.6

चक्राङ्कपाणिं नवपल्लवाभं मत्तेभलीलागमनं विराजम् / देवासुरैर्वन्दितपादयुग्मं श्रीशाक्यसिंहं प्रणमामि नित्यम् // BuSto_42.7

त्रैदुःखदुःखाद् भयवेदिलोकान् त्राणं च नीतुं वरबोधिमात्रैः / जिह्वा च मत्तेहि सुचक्षु सर्वं श्रीशाक्यसिंहं प्रणमामि नित्यम् // BuSto_42.8

महाबोधिभट्टारकस्तोत्रं समाप्तम् //

digital sanskrit buddhist canon, stotra section, text no. 43: mahābodhivandanāṣṭakam

ओम् नमो बुद्धाय

सौवर्णवर्णं कलविङ्कघोषं ब्रह्मस्वरं कारुणिकं सुसेव्यम् / नरोत्तमं शीलविशुद्धदेहं श्रीमन्महाबोधिमहं नमामि // BuSto_43.1

शाक्येन्द्रवंशोद्भवदिव्यदेहं तृष्णाच्छिदं मारभिदं जिनेशम् / ज्ञानास्पदं क्लेशभिदं दिनेशं श्रीमन्महाबोधिमहं नमामि // BuSto_43.2

समन्तभद्रं वरलक्षणाङ्गं सत्त्वार्थसिद्धिं सुकृतैः प्रणम्यम् / श्रेयस्करं सत्त्वहितैकचित्तं श्रीमन्महाबोधिमहं नमामि // BuSto_43.3

धर्मोदकं यः कृपयोत्ससर्ज रागाग्निसन्दीपितपुद्गलानाम् / सुखाय संबोधिपयोमुचं तं श्रीमन्महाबोधिमहं नमामि // BuSto_43.4

भवाब्धिनिस्तारणसेतुभूतं तथागतं तत्त्वविदं नृसिंहम् / त्रैलोक्यनाथं वरबोधिरत्नं श्रीमन्महाबोधिमहं नमामि // BuSto_43.5

पदार्थसम्पादनसुव्रतस्थं मायासुतं मारभिदं जितारिम् / शास्तारमग्र्यं वरबोधिसत्त्वं श्रीमन्महाबोधिमहं नमामि // BuSto_43.6

लोकेशनाथं हरिनाथनाथं भूतेशनाथं सुरनाथनाथम् / कृतान्तनाथं नरनाथनाथं श्रीमन्महाबोधिमहं नमामि // BuSto_43.7

स बुद्धरूपः स हि धर्मरूपः स एव संघो ऽपि विनेयकानाम् / अभूच्छरण्यः शरणागतानां श्रीमन्महाबोधिमहं नमामि // BuSto_43.8

श्रीमन्महाबोधिवन्दनाष्टकं समाप्तम् //

digital sanskrit buddhist canon, stotra section, text no. 44: mahācakravartināmāṣṭottaraśatastotram

वज्रसत्त्व महावज्र वज्रनाथ सुसाधक / वज्राभिषेक वज्राभ वज्रकेतु(तो) नमो ऽस्तु ते // BuSto_44.1

हासवज्र महाधर्म वज्रकोश महावर / सर्वमण्डलराजाग्र्य निष्प्रपञ्च नमो ऽस्तु ते // BuSto_44.2

वज्रकर्म महारक्ष चण्डयक्ष महाग्रह / वज्रमुष्टि महामुद्र सर्वमुद्र नमो ऽस्तु ते // BuSto_44.3

बोधिचित्त महाबोधे बुद्ध सर्वतथागत / वज्रयान महाज्ञान महायान नमो ऽस्तु ते // BuSto_44.4

सर्वार्थ सर्वतत्त्वार्थ महासत्त्वार्थ सर्ववित् / सर्वज्ञ सर्वकृत् सर्व सर्वदर्शि नमो ऽस्तु ते // BuSto_44.5

वज्रात्मक सुवज्राग्र्य वज्रवीर्य सुवज्रधृक् / महासमय तत्त्वार्थ महासत्य नमो ऽस्तु ते // BuSto_44.6

वज्राङ्कुश महाकाम सुरते सुमहाप्रभ / वज्रप्रभ प्रभोद्योत बुद्धप्रभ नमो ऽस्तु ते // BuSto_44.7

वज्रराजाग्र्य वज्राग्र्य विद्याग्र्याग्र्य नरोत्तम / वज्रोत्तम महाग्र्याग्र्य विद्योत्तम नमो ऽस्तु ते // BuSto_44.8

वज्रधातो महागुह्य वज्रगुह्य सुगुह्यधृक् / वज्रसूक्ष्म महाध्यान वज्रकार्य नमो ऽस्तु ते // BuSto_44.9

बुद्धाग्र्य बुद्धवज्राग्र्य बुद्धबोधे महाबुध / बुद्धज्ञान महाबुद्ध बुद्धबुद्ध नमो ऽस्तु ते // BuSto_44.10

बुद्धपूजा-महापूजा-सत्त्वपूजासुपूजक / महोपाय महासिद्धे वज्रसिद्धि नमो ऽस्तु ते // BuSto_44.11

तथागत महाकाय तथागतसरस्वते / तथागतमहाचित्त वज्रचित्त नमो ऽस्तु ते // BuSto_44.12

बुद्धाधिप जिनाज्ञाकृद् बुद्धमित्र जिनाग्रज / महावैरोचन विभो शान्तरौद्र नमो ऽस्तु ते // BuSto_44.13

तथागतमहातत्त्व भूतकोटे महानय / सर्वपारमिताज्ञान परमार्थ नमो ऽस्तु ते // BuSto_44.14

समन्तभद्र चर्याग्र्य मार मारप्रमदर्क / सर्वाग्र्य समताज्ञान सर्वत्रग नमो ऽस्तु ते // BuSto_44.15

बुद्धहुंकर हुंकार वज्रहुंकर दामक / विश्ववज्राड्ग वज्रोग्र वज्रपाणे नमो ऽस्तु ते // BuSto_44.16

वन्दयः पूज्यश्च मान्यश्च सत्कर्तव्यस्तथागतैः / यस्माद् वज्रदृढं चित्तं वज्रसत्त्वस्त्वमुच्यसे // BuSto_44.17

त्वदधीना हि संबोधिः पिता त्वं सर्वदर्शिनाम् / संभूताः संभविष्यन्ति त्वामासाद्य तथागताः // BuSto_44.18

अनेन स्तोत्रराजेन यः स्तुयाद्बै सुभक्तितः / यो गायंस्तु स्तुयात् सो ऽपि भवेद्वज्रधरोपमः // BuSto_44.19

अध्येषयामस्त्वां नाथ सर्वबुद्धवशंकरम् / सर्वसत्त्वार्थकार्यार्थमुत्पादय स्वकं कुलम् // BuSto_44.20

महाचक्रवर्तिनामाष्टोत्तरशताध्येषणास्तोत्रं सम्पूर्णम् //

digital sanskrit buddhist canon, stotra section, text no. 45: mahākālastotram

नमस्यामि महाकालं सर्वसम्पत्तिदायकम् / खर्वं लम्बोदरं नीलमष्टनागविभूषितम् // BuSto_45.1

द्विभुजैकमुखं वीरं कपालकृतशेखरम् / व्याघ्रचर्मकटीवेष्टं शतार्धमुण्डमालिनम् // BuSto_45.2

भावाभावपरिच्छिन्नं जगत्संबोधकारकम् / सर्वभावात्मकं नाथं जगन्नाथ नमो ऽस्तु ते // BuSto_45.3

कृष्णवर्णं महातेजं सिद्धसाधकरक्षकम् / कर्तिकपालिनं नाथं महाकाल नमो ऽस्तु ते // BuSto_45.4

व्याघ्रचर्माम्बरधरं महाक्रोधस्वरूपिणम् / द्वादशादित्यसंकाशं महाकाल नमो ऽस्तु ते // BuSto_45.5

महादंष्ट्राकरालास्यं ललज्जिह्वं सभैरवम् / महारक्ताभनयनं महाकाल नमो ऽस्तु ते // BuSto_45.6

विभ्रन्नरशिरोमालां नागराजविभूषितम् / श्मश्रुतुन्दिलकं वन्द्यं महाकाल नमो ऽस्तु ते // BuSto_45.7

सभ्रूभङ्गं त्रिनेत्रं चैवोर्ध्वपिङ्गोर्ध्वकेसरम् / युगान्तानलपुञ्जाभं महाकाल नमो ऽस्तु ते // BuSto_45.8

त्रासकं सर्वदैत्याना(मस्थ्य)सृङ्मांसभक्षकम् / रक्षितारं भक्तिमतां महाकाल नमो ऽस्तु ते // BuSto_45.9

सिद्धिसाधनमन्त्रस्य विहेठीज्यनराशनम् / युग्मस्याश्वासदातारं महाकाल नमो ऽस्तु ते // BuSto_45.10

संसारजलधेः पारं नौका यानैकगामिनी / नौकायाने स्वतेजास्त्वं महाकाल नमो ऽस्तु ते // BuSto_45.11

महाकालस्तवं चैतद् यः पठेद् भक्तिमान् नरः / भयार्तो मुच्यते भीतेररिचिन्ता निवर्तते // BuSto_45.12

महाकालं नमस्कृत्य यथोक्तकुलजन्मतः / तेन सुजन्मा भवति सर्वसिद्धिपरायणः // BuSto_45.13

श्रीमहाकालस्तोत्रं सम्पूर्णम् //

digital sanskrit buddhist canon, stotra section, text no. 46: mahāpratisarāstotram

ओम् नमः श्रीमहाप्रतिसरायै

यस्याः स्मरणमात्रेण सर्वे पापाः क्षयं गताः / यया युक्तो वज्रकायो नमस्तस्यै नमो नमः // BuSto_46.1

यां स्मरन् राक्षसः क्रूरो माठरं कुक्षिसंस्थितम् / प्राक्षिपद् गोविषं नद्यां नमस्तस्यै नमो नमः // BuSto_46.2

या ऽरक्षत् वणिजः पुत्रं क्रूरसर्पाद् वधोद्यतात् / विषदाहमुमूर्षुं च नमस्तस्यै नमो नमः // BuSto_46.3

ब्रह्मदत्तो महाराजो यया रक्षितमस्तकः / रिपुं जित्वा विराजो ऽभून्नमस्तस्यै नमो नमः // BuSto_46.4

भिक्षुर्दुःशीलको रोगी यया कण्ठे प्रबन्धितः / प्राणान्मुक्त्वा ययौ स्वर्गं नमस्तस्यै नमो नमः // BuSto_46.5

समुद्रे पोतसंक्षुब्धे वणिजां प्राणरक्षकः / यां स्मरन् सार्थवाहो ऽभून्नमस्तस्यै नमो नमः // BuSto_46.6

यस्यां च प्रतिबद्धायां भार्यायां सुतमाप्तवान् / प्रसारितभुजो राजा नमस्तस्यै नमो नमः // BuSto_46.7

दरिद्रो यां प्रति स्मृत्वा दीनारान् प्रददौ जिने / राजा ऽभीष्टप्रदाता ऽभून्नमस्तस्यै नमो नमः // BuSto_46.8

यां प्रबद्ध्वा ऽसुरैर्युद्धं शक्रश्चूडामणौ प्रभुः / लब्धवान् विजयं वज्री नमस्तस्यै नमो नमः // BuSto_46.9

यस्या मन्त्रबलेनैव पूर्य पारमिताश्च षट् / मारा जिता जिनैर्बुद्धैर्नमस्तस्यै नमो नमः // BuSto_46.10

अपधीरो वधार्हो ऽपि प्रक्षिप्तः सर्वसङ्कटे / यां स्मृत्वा परिमुक्तो ऽभून्नमस्तस्यै नमो नमः // BuSto_46.11

यया बन्धितकण्ठश्च मुक्तो ऽभूत् पापसङ्कटात् / नगरे नायको ऽभूच्च नमस्तस्यै नमो नमः // BuSto_46.12

या चा ऽपराजिता विद्या सर्वबुद्धैश्च धारिता / मुद्रिता भाषिता नित्यं पठिता परिदेशिता // BuSto_46.13

लिखिता मोदिता सत्त्वहिताय पूजिता सदा / स्मृता कायगता कृत्वा नमस्तस्यै नमो नमः // BuSto_46.14

यस्याः स्मरणमात्रान्न दुर्लभं भुवनत्रये / पाठस्वाध्यायनाद्वापि नमस्तस्यै नमो नमः // BuSto_46.15

या विद्या दुर्लभा बुद्धैर्व्याकृता सुप्तशंसिता / महती धारणी ख्याता सर्वपापक्षयङ्करी // BuSto_46.16

महाबला महावीर्या महातेजा महत्प्रभा / महागुणवती विद्या सर्वभारविदारणी // BuSto_46.17

पापसन्धिसमुद्घाती मारबन्धप्रमोचनी / जननी बोधिसत्त्वानां सर्वदुष्टविनाशिनी // BuSto_46.18

रक्षणी पोषणी धात्री परमन्त्रविघातिनी / कार्खोदविषयोगानां विध्वंसनकरी शिवा // BuSto_46.19

महाध्यानरतानां च गृह्णतां लिखतां सदा / पाठाध्ययनकृतां नित्यं दधतां शृण्वतां तथा // BuSto_46.20

परेभ्यो देशिता चैव नित्यं मनसि भाविता / सा पुस्तकगतां कृत्वा पूज्यमाना नमस्कृता // BuSto_46.21

सर्वपापहरी भद्रा बोधिसंभारपूरिणी / नमस्तस्यै नमस्तस्यै नमस्तस्यै नमो नमः // BuSto_46.22

यस्या मन्त्रप्रभावेण सर्वभयान्युपद्रवाः / दुष्टाः सुरमनुष्याश्च दैत्यगन्धर्वराक्षसाः // BuSto_46.23

ग्रहाः स्कन्दा अपस्माराः पिशाचा यक्षकिन्नराः / डाकिन्यः शाकिनीसंघा नागा कार्खोदव्याधयः // BuSto_46.24

ज्वराश्च विविधा रोगाः परकर्मकृतास्तथा / विषाग्निशस्त्रमन्त्राणि विद्युतः कालवायवः // BuSto_46.25

अतिवृष्टिरनावृष्टिः सर्वशत्रुभयानि च / तथान्ये पापसर्गा वा विनश्यन्ति न संशयः // BuSto_46.26

सर्वकार्याणि सिद्ध्यन्ति नमस्तस्यै नमो नमः / यश्चैतां धारयेद्विद्यां कण्ठे बाहौ च मस्तके // BuSto_46.27

नित्यं रक्षन्ति देवास्तं दैत्या नागाश्च मानुषाः / गन्धर्वाः किन्नरा यक्षा भूतप्रेतपिशाचकाः // BuSto_46.28

डाकिन्यो राक्षसा दूत्यः कूष्माण्डाः कठपूतनाः / त्रिसन्ध्यं यः पठेन्नित्यं बुद्धा रक्षन्ति तं सदा // BuSto_46.29

प्रत्येकाः श्रावकाश्चैव बोधिसत्त्वा महर्धिकाः / योगिनः सिद्धमन्त्राश्च महावीर्या महर्षयः // BuSto_46.30

वज्रपाणिश्च यक्षेन्द्रः शक्रश्च त्रिदशैः सह / चत्वारश्च महाराजा ब्रह्मविष्णुमहेश्वराः // BuSto_46.31

नन्दिकृष्णो महाकालः कार्तिकेयो गणेश्वरः / भैरवा मातृका दुर्गास्तथा ऽन्ये मारकायिकाः // BuSto_46.32

विद्यादेव्यो महावीर्या महाबलपराक्रमाः / मामकी भृकुटी तारा चाङ्कुशी वज्रशृङ्खला // BuSto_46.33

महाश्वेता महाकाली वज्रदूती सुपाशिका / वज्रमाला महाविद्या सुवीर्या ऽमृतकुण्डली // BuSto_46.34

वज्रा ऽपराजिता चण्डी कालकर्णी महाबला / तथा धन्या महाभागा पद्मकुण्डलिरेव च // BuSto_46.35

मणिचूडा पुष्पदन्ती स्वर्णकेशी च पिङ्गला / एकजटा महादेवी धन्या विद्युन्मालिनी // BuSto_46.36

कपालिनी च लङ्केशी ब्रह्मक्षितिकनायिका / हारीती पाञ्चिकाश्चैव शङ्खिनी कूटदन्तिनी // BuSto_46.37

श्रीः सरस्वती लक्ष्मीः सिद्धेश्वरी सदानुगा / तमेवा ऽन्ये ऽपि रक्षन्ति यस्य विद्या करे स्थिता // BuSto_46.38

स भवेत् सर्वसत्त्वानां मोक्षार्थं च समुद्यतः / नमस्तस्यै नमस्तस्यै नमस्तस्यै नमो नमः // BuSto_46.39

श्रीमहाप्रतिसरास्तोत्रं समाप्तम् //

digital sanskrit buddhist canon, stotra section, text no. 47: mahogratārāṣṭakastotram

मातर्नीलसरस्वति प्रणमतां सौभाग्यसम्पत्प्रदे प्रत्यालीढपदस्थिते शवहृदि स्मेराननाम्भोरुहे / फुल्लेन्दीवरलोचनत्रययुते कर्तीकपालोत्पले खड्गं चादधती त्वमेव शरणं त्वामीश्वरीमाश्रये // BuSto_47.1

वाचामीश्वरि भक्तकल्पलतिके सर्वार्थसिद्धीश्वरि सद्यः प्राकृतगद्यपद्यरचनासर्वार्थसिद्धिप्रदे / नीलेन्दीवरलोचनत्रययुते कारुण्यवारांनिधे सौभाग्यामृतवर्षणेन कृपया सिञ्च त्वमस्मादृशम् // BuSto_47.2

खर्वे गर्वसमहपूरिततनो सर्पादिभूषोज्ज्वल् व्याघ्रत्वक्परिवीतसुन्दरकटिव्याधूतघण्टाङ्किते / सद्यःकृत्तगलद्रजःपरिलसन्मुण्डद्वयीमूर्धजग्रन्थिश्रेणिनृमुण्डदामललिते भीमे भयं नाशय // BuSto_47.3

मायानङ्गविकाररूपललनाबिन्द्वर्धचन्द्रात्मिके हुंफट्कारमयि त्वमेव शरणं मन्त्रात्मिके मादृशः / मूर्तिस्ते जननि त्रिधामघटिता स्थूलातिसूक्ष्मा परा वेदनां नहि गोचरा कथमपि प्राप्तां नु तामाश्रये // BuSto_47.4

त्वत्पादाम्बुजसेवया सुकृतिनो गच्छन्ति सायुज्यतां तस्य श्रीपरमेश्वरी त्रिनयनब्रह्मादिसौम्यात्मनः / संसाराम्बुधिमज्जने पटुतनून् देवेन्द्रमुख्यान् सुरान् मातस्त्वत्पदसेवने हि विमुखान् को मन्दधीः सेवते // BuSto_47.5

मातस्त्वत्पदपङ्कजद्वयरजोमुद्राङ्ककोटीरिणस्ते देवासुरसंगरे विजयिनो निःशङ्कमङ्के गताः / देवो ऽहं भुवने न मे सम इति स्पर्द्धां वहन्तः परे तत्तुल्या नियतं तथा चिरममी नाशं व्रजन्ति स्वयम् // BuSto_47.6

त्वन्नामस्मरणात् पलायनपरा द्रष्टुं च शक्ता न ते भूतप्रेतपिशाचराक्षसगणा यक्षाश्च नागाधिपाः / दैत्या दानवपुङ्गवाश्च खचरा व्याघ्रादिका जन्तवो डाकिन्यः कुपितान्तकाश्च मनुजा मातः क्षणं भूतले // BuSto_47.7

लक्ष्मीः सिद्धगणाश्च पादुकमुखाः सिद्धास्तथा वारिणां स्तम्भश्चापि रणाङ्गणे गजघटास्तम्भस्तथा मोहनम् / मातस्त्वत्पदसेवया खलु नृणां सिद्ध्यन्ति ते ते गुणाः कान्तिः कान्ततरा भवेच्च महती मूढो ऽपि वाचस्पतिः // BuSto_47.8

ताराष्टकमिदं रम्यं भक्तिमान् यः पठेन्नरः / प्रातर्मध्याह्नकाले च सायाह्ने नियतः शुचिः // BuSto_47.9

लभते कवितां दिव्यां सर्वशास्त्रार्थविद् भवेत् / लक्ष्मीमनश्वरां प्राप्य भुक्त्वा भोगान् यथेप्सितान् // BuSto_47.10

कीर्ति कान्तिं च नैरुज्यं सर्वेषां प्रियतां व्रजेत् / विख्यातिं चैव लोकेषु प्राप्यान्ते मोक्षमाप्नुयात् // BuSto_47.11

श्रीमहोग्रताराष्टकस्तोत्रं समाप्तम् //

digital sanskrit buddhist canon, stotra section, text no. 48: mahogratārāstutiḥ

ओम् नमः श्री उग्रतारायै

प्रकटविकटदंष्ट्रा घोररुद्राट्टहासा नरशिरकृतमाला मेघगम्भीररावा / त्रिभुवनजनधात्री खड्गविन्यस्तहस्ता करकरतिकपाला पातु व उग्रतारा //

घोररूपे महारावे सर्वशत्रुक्षयङ्करि / भक्तेभ्यो वरदे देवि त्राहि मां शरणागतम् // BuSto_48.1

सुरासुरार्चिते देवि सिद्धगन्धर्वसेविते / जाड्यपापहरे देवि त्राहि मां शरणागतम् // BuSto_48.2

सर्वमण्डल(मध्यस्थे) सर्वसत्त्वहिते ऽनघे / सिद्धानां पूजिते देवि त्राहि मां शरणागतम् // BuSto_48.3

घोररूपस्थिते देवि सर्वप्राणहरे स्तुते / उग्रतारे नमो नित्यं त्राहि मां शरणागतम् // BuSto_48.4

जटाजूटसमायुक्ते ललज्जिह्वोर्ध्वकारिणि / द्रुतबुद्धिप्रदे देवि त्राहि मां शरणागतम् // BuSto_48.5

सोमरूपे कोट्टरूपे चन्द्ररूपे नमो ऽस्तु ते / शक्तिरूपे नमस्तुभ्यं त्राहि मां शरणागतम् // BuSto_48.6

जडो ऽहं शक्तिहीनो ऽहं न तवाधिगमे क्षमः / मन्दो मन्दमतिश्चाहं त्राहि मां शरणागतम् // BuSto_48.7

स्नाने दाने तथा जाप्ये बलिदाने तथा क्रतौ / प्रस्थाने च न शक्तो ऽहं त्राहि मां शरणागतम् // BuSto_48.8

शक्तिहीनमनाथं च सर्वपापसमन्वितम् / त्वां विना न गतिर्यस्य त्राहि मां शरणागतम् // BuSto_48.9

गौरी लक्ष्मीर्महामाया उमा देवी सरस्वती / सर्वास्त्वमेव हे मातस्त्राहि मां शरणागतम् // BuSto_48.10

गन्धपुष्पादिद्रव्यैश्च वन्धनादिभिरेव च / देवीं सम्पूज्य यत्नेन लभते वाञ्छितं फलम् // BuSto_48.11

अष्टम्यां च चतुर्दश्यां नवम्यां यः पठेन्नरः / परमां सिद्धिमाप्नोति नात्र कार्या विचारणा // BuSto_48.12

मोक्षार्थी लभते मोक्षं धनार्थी लभते धनम् / विद्यार्थी लभते विद्यां तर्कव्याकरणादिकाम् // BuSto_48.13

इदं स्तोत्रं पठित्वा तु संग्रामे प्रविशेन्नरः / तस्य शत्रुः क्षयं याति सदा प्रज्ञा प्रजायते // BuSto_48.14

पीडायामथ संधाने विपदायां तथा भये / य इदं पठते स्तोत्रं शुभं तस्य न संशयः // BuSto_48.15

श्रीमहोग्रतारास्तुतिः समाप्ता //

digital sanskrit buddhist canon, stotra section, text no. 49: maṅgalaṣoḍaśastutiḥ

ओम् नमः समन्तभद्राय

येन पुण्याटवीस्थेनानेके शासनवर्तिनः / दिवोदासादयो भूपाः स नो रक्षतु मारजित् // BuSto_49.1

लोकानां ग्रहबद्धानां रक्षार्थं पुण्यकानने / ग्रहानदमयद् यो वै स नो रक्षतु तद्भयात् // BuSto_49.2

काश्यपाद्यान् महर्षींस्तान् आनन्दाद्यांश्च ब्राह्मणान् / प्राव्राजयत् सुमुक्त्यर्थं स नो रक्षतु मुक्तिदः // BuSto_49.3

सौवर्णधान्यदानेन दीनं विप्रमपालयत् / दुर्भिक्षभयतो नित्यं स नो रक्षतु शाक्यराट् // BuSto_49.4

यो मैत्रकन्यको भूत्वा मातृद्रोहिणमत्यगात् / चक्रं दूरीकृतं येन स नो रक्षतु मातृवान् // BuSto_49.5

सुप्रियो बदरद्वीपयात्राप्तमणिवृष्टिभिः / काशीयान् प्राकरोदाढ्यान् स नो रक्षतु काञ्चनैः // BuSto_49.6

भूत्वा यः सुधनो नाम निधानं समदर्शयत् / दारिद्रयदुःखतो नित्यं स नो रक्षतु सर्ववित् // BuSto_49.7

कुष्ठादिरोगहरणे राजगृहमुपाविशत् / तत्तद्रोगभयान्नित्यं स नो रक्षतु धर्मराट् // BuSto_49.8

यः कुशो भूपतिर्भूत्वा ऽष्टमीमाहात्म्यमुत्तमम् / प्रकाशयन्निजे देहे स नो रक्षतु धर्मवित् // BuSto_49.9

सौदासं सत्यवचसा काश्यामस्थापयन्नृपान् / बन्धनान्मोचयामास स नो रक्षतु सर्ववित् // BuSto_49.10

गोपान् ररक्ष यो देव्याः प्रभावं संप्रकाशयन् / वह्निदाहारिभयतः स नो रक्षतु भीतिहा // BuSto_49.11

यो ऽन्धीभूतां मातरं स्वां चूडारत्नं जले व्यधात् / दिव्यनेत्रान् जनान् कृत्वा स नो रक्षतु नेत्रदः // BuSto_49.12

विरूपं प्राकरोत् पुत्रं छायासीनं सुसुन्दरम् / सर्वलक्षणसम्पन्नं स नो रक्षतु सर्वदः // BuSto_49.13

सकलानन्दनामानं राज्ये यः प्राभ्यषेचयत् / सन्ततिस्थितिकुर्वाणः स नो रक्षतु स्थैर्यकृत् // BuSto_49.14

विषदं भ्रातरं यश्चाक्षमद् भिक्षुन् विषाशिनः / ररक्ष धारणीविज्ञः स नो रक्षतु निर्विषः // BuSto_49.15

श्रीस्वयंभुदर्शनाय नैपालीयान् प्रयासितुम् / कपिलान् प्रस्थितो यो ऽसौ स नो रक्षतु सन्ततम् // BuSto_49.16

भद्रकल्पावदानोद्धृता शाक्यसिंहस्य मङ्गलषोडशस्तुतिः समाप्ता //

digital sanskrit buddhist canon, stotra section, text no. 50: maṅgalāṣṭakam

मञ्जुश्रीर्लोकनाथो जिनवरमकुटो जम्भलो वज्रसत्त्व मैत्रेयो वज्रपाणिः सुखकरकमलो राहुलो भद्रपालः / बुद्धो वैरोचनाद्यस्त्रिभुवननमितः क्षीणनिःशेषदोषस्तुष्टाः सर्वार्थसिद्धिं ददतु समरसा मङ्गलं बोधिसत्त्वाः // BuSto_50.1

हृष्टो हूंकारवज्रः पशुपतिदमको वज्रघण्टा च हृष्ट् पीतो हालाहलास्यो रिपुगणमथनो टक्किराजो महात्मा / अक्षोभ्यो रत्नकेतुः प्रतिदिनमचलो गण्डहस्तिर्यमारिस्तुष्टाः सर्वार्थसिद्धिं ददतु समरसा मङ्गलं बोधिसत्त्वाः // BuSto_50.2

संघस्त्रैलोक्यबन्धुर्गुणगणनिलयो बोधिचित्तः सुचित्तः बोधिश्चानन्दसिद्धो विजितकलिमलो हेरुको नीलदण्डः / बुद्धः सारङ्गराजो विजितजिनगुणो सर्वसत्त्वानुकम्पी तुष्टाः सर्वार्थसिद्धिं ददतु समरसा मङ्गलं बोधिसत्त्वाः // BuSto_50.3

प्रज्ञा चन्द्रावतारा तदनुजभृकुटी ज्ञानसंभारभार् मारीची मारमारा सकलभयहरा पीतवर्णा त्रिवक्त्रा / मायूरी मामकी च क्षपितरिपुगणा पाण्डरा रोचनाद्यास्तुष्टाः सर्वार्थसिद्धिं ददतु समरसा मङ्गलं बोधिसत्त्वाः // BuSto_50.4

गान्धारी जाङ्गुली च भुजगहृतफणा खड्गपाशाङ्कुशोग्रा वाराही वज्रहस्ता असिपरशुधरा धर्मधात्वीश्वरी च / केयूरी ज्ञानसारा ध्वजनिहितकरा षट्करा शाबरी च तुष्टाः सर्वार्थसिद्धिं ददतु समरसा मङ्गलं बोधिसत्त्वाः // BuSto_50.5

वैण्या माल्या सुगीता प्रथितजिनवरे शाबरी धूपवज्रा वैताली गन्धवज्रा प्रहसितवदना स्वर्गतिरार्यतारा / लक्ष्मीर्बुद्धस्य बोधिः सकलभयहरा शारदा दीपवज्रा तुष्टाः सर्वार्थसिद्धिं ददतु समरसा मङ्गलं बोधिसत्त्वाः // BuSto_50.6

वैशाल्यां धर्मचक्रे प्रथितनिजबले पर्वते गृध्रकूटे श्रावस्त्यां लुम्बिनीके क्षितिनिहितकरा कोंकणे बोधिवृक्षा / श्रीवत्साश्वत्थपत्रं सुरवरनमितं श्रीफलं शङ्खचक्रं तुष्टाः सर्वार्थसिद्धिं ददतु समरसा मङ्गलं बोधिसत्त्वाः // BuSto_50.7

छत्रं दूर्वा च पद्मं ध्वजमपि निहितं लो(रो)चना मत्स्यकूर्म वाराहः पूर्णकुम्भो मुनिवरवचनं वज्रघण्टानिनादः / बुद्धानां प्रातिहार्यं सुरवरनमितं हास्यलास्ये विलासास्तुष्टाः सर्वार्थसिद्धिं ददतु समरसा मङ्गलं बोधिसत्त्वाः // BuSto_50.8

मङ्गलाष्टकं समाप्तम् //

digital sanskrit buddhist canon, stotra section, text no. 51: mañjuśrīstotram

श्रीमञ्जुनाथकमलासनरत्नमौलिर्विद्याधिपो भुवनमण्डलचक्रवर्ती / ध्यानाधिपोचितविराजितसौम्यरूपो वन्दामहे सुरनरासुरवन्दितार्यम् // BuSto_51.1

बालाकृतिः कुवलयोज्ज्वललोलहस्तः केयूरहारमणिकुण्डलघृष्टगण्डः / खादंश्च षोडशरदं सुकुमाररूपं वन्दामहे सुरवरार्चितमञ्जुघोषम् // BuSto_51.2

रोमाग्रकूपविवरे परिवर्तमानं विश्वप्रपञ्चकरणं सुगतात्मजस्य / त्रैविद्यमन्त्र तव नाथ गुणार्णवेण सूक्ष्माय बुद्धतनयाय नमो ऽस्तु तस्मै // BuSto_51.3

गम्भीरधर्मनयमार्गसुखप्रतिष्ठं ज्ञानोदधिं निखिलसत्त्वकृतार्थकारम् / प्रज्ञानिधानगुणसागरमप्रमेयं मञ्जुश्रियं जिनसुतं सततं नमामि // BuSto_51.4

विदितसकलतत्त्वः क्षिप्तसन्तापसत्त्वस्त्रिभुवन उपकारी सर्वदुःखापहारी / मदनमथनवीरश्चारुरूपः सुचीरस्त्रिभुवनजनतोषः पातु मां मञ्जुघोषः // BuSto_51.5

बालेन्दुरुचिराभासं वराभरणभूषितम् / प्रज्ञाब्जामलपत्राक्षं वन्दे मञ्जुश्रियं सदा // BuSto_51.6

पात्रं वामकरे यस्य भ्रमन्नञ्जलिसंनिभम् / नाम्ना ते सर्वतो लक्ष्मीर्मञ्जुघोषं नमाम्यहम् // BuSto_51.7

खड्गपुस्तकहस्ताय चन्द्रमण्डलवर्तिने / अज्ञानध्वान्तसूर्याय मञ्जुघोषाय ते नमः // BuSto_51.8

ज्ञानोत्तरप्रभाकेतुं प्रणिधानमतिं तथा / शान्तेन्द्रियं मञ्जुघोषं भक्तितः प्रणमाम्यहम् // BuSto_51.9

श्री मञ्जुश्रीस्तवस्तोत्रं समाप्तम् //

digital sanskrit buddhist canon, stotra section, text no. 52: mañjuvajrastotram

मञ्जुगर्भकृतम् नमः श्रीमञ्जुवज्राय

शशधरमिव शुभ्रं खड्गपुस्ताकपाणिं सुरुचिरमलिशान्तं पञ्चचीरं कुमारम् / पृथुतरवरमोक्षं पद्मपत्रायताक्षं कुमतिदहनदक्षं मञ्जुघोषं नमामि // BuSto_52.1

कृतमृगरिपुयानं दत्तभक्तप्रदानं सुरदनुजनृयानं बोधिसत्त्वप्रधानम् / अखिलगुणनिधानं सर्वविद्यावितानं करसरसिजबाणं मञ्जुघोषं नमामि // BuSto_52.2

विभृतसकलकोषं क्षालिताज्ञानदोषं स्मरणभजनतोषं दूररागादिदोषम् / विहितससुरपोषं सिद्धिदाख्यानयोषं कृतजडपरिशोषं मञ्जुघोषं नमामि // BuSto_52.3

गणपतिशरजन्मश्रीमहाकालसिंहैः परिवृतमिव चन्द्राभाभमिन्दीवराक्षम् / असिशरजपमालापुस्तकं संवहन्तम् उरसि ललितमालं मञ्जुघोषं नमामि // BuSto_52.4

सुरपतिशमनायाप्येष मित्राग्निरक्षःपवनप्रमथपालैः संवृतं स्मेरवक्त्रम् / खगपतिरथगात्रं ब्रह्मवन्द्यं रमोमाविहितचरणभक्तं मञ्जुघोषं नमामि // BuSto_52.5

यदसिकठिनधाराच्छेदमार्गाभिवाहा(हः) सकलसलिलधारापातिताङ्गाङ्गमन्त्रः / बहुपरिचयस्थल्यां भूमिनद्यापि रेजे बहुतरमहिमानं मञ्जुघोषं नमामि // BuSto_52.6

भवदभिनवनुत्या तोषिता गुह्यदेवी निखिलनिगमसारा सुप्रकाशा ऽतिरेजे / भवजलनिधिपारं दानकल्पद्रुमाग्रं गलितबहुमहोग्रं मञ्जुघोषं नमामि // BuSto_52.7

विभजति जनलोको धर्मधातुं महेशं दशशतदलपद्मे संस्थितं ज्योतिरैशम् / तदपि तव प्रशस्तं देवमाहात्म्यमीशं विभजति भुजगेशं मञ्जुघोषं नमामि // BuSto_52.8

पठति यदिदमिष्टं मालिनीपद्यबन्धं स भवति कविराजो वादिसिंहासनस्थः / सकलविसभासु प्रोज्ज्वलद्वाक्सुधारः कलितसकलविद्यो भूषणो भव्यदक्षः // BuSto_52.9

स्वयम्भूपुराणोद्धृतं मञ्जुगर्भविरचित्तं मञ्जुवज्रस्तोत्रं समाप्तम् //

digital sanskrit buddhist canon, stotra section, text no. 53: māravijayastotram

जितमारकलिं जगदेकगुरुं सुरयक्षमहोरगदैत्यनतम् / चतुसत्यसुदेशितमार्गमिमं गुणमेघमहं प्रणमामि सदा // BuSto_53.1

भवभीममहोदधिमध्यगतं कृपणार्तरवं समवेक्ष्य जनम् / परिमोचयितुं य इह प्रणिधिं प्रचकार विभुं तमहं प्रणतः // BuSto_53.2

गिरिराजनिभं शरदिन्दुधियं सुमुखं सुभुजं वररूपधरम् / सुगतं गतमप्रतिमं सुगतं प्रणतो ऽस्मि सदा जगदर्थकरम् // BuSto_53.3

कनकप्रभया परिपीततनुं वरदुन्दुभितोयदवल्गुरुतम् / गजहंसविलम्बितधीरगतं शिरसा ऽभिनतो ऽस्मि गुणैकनिधिम् // BuSto_53.4

तरुणार्कसमैरचलैर्नयनैः स्फुरदुग्रमहाशनिभीमरवैः / नमुचिप्रहरैरसिशक्तिधरैश्चलितो ऽसि विभो न हि त्वं विकृतैः // BuSto_53.5

लवलीफलपाण्डुरकर्णपुटाः कुचभारविनामितगात्रलताः / नहि त्वामशकन् खलु नागसुताः श्वसितैः स्खलितैरपि कम्पयितुम् // BuSto_53.6

तरवः कुसुमस्तबकाभरणा बहुरत्नसहस्रचिताश्च नगाः / न तथाभिरतिं जनयन्ति सतां जनयन्ति यथा तव वीरगुणाः // BuSto_53.7

स्फुटचित्रपदं बहुयुक्तियुतं गमकं वचनं तव कर्णसुखम् / शुभमार्गफलं प्रसमीक्ष्यजना न गृणन्ति पुनस्त्वदृते ऽन्यवचः // BuSto_53.8

इति वः शरणं समवेक्ष्य जना न पतन्त्यपि कल्पशतैर्निरये / विनिहत्य च दोषरिपून् बहुलान् परियन्ति शुभं वरमोक्षपुरम् // BuSto_53.9

तव सौम्यतया ऽप्यभिभूततमो न विराजति शीतकरो गगने / तव काञ्चनकुङ्कुमसप्रभया प्रभया ऽभिहतो न विभाति रविः // BuSto_53.10

तव नाथ शुभे वदनाम्बुरूहे नयनभ्रमरा निपतन्ति नृणाम् / प्रतिबुद्धदले कमले विमले भ्रमरा इव पुष्पशताकुलिताः // BuSto_53.11

इति तोटकमन्त्रवरैरतुलैः परिकीर्त्य मया तव वर्णलवान् / यदुपार्जितमद्य शुभं विपुलं शिवमस्तु ततो भुवि देवनृणाम् // BuSto_53.12

श्रीमारविजयस्तोत्रं समाप्तम् //

digital sanskrit buddhist canon, stotra section, text no. 54: nairātmāṣṭakastotram

निरालम्बनिराकारनिर्विकल्पस्वरूपिणी / नैरात्मा वरदा देवी नित्यमेव नमो ऽस्तु ते // BuSto_54.1

एकवक्त्रां त्रिनेत्रां च ऊर्ध्वपिङ्गलमूर्धजाम् / करे कर्तिकपालां च नमामि विश्वमातरीम् // BuSto_54.2

नवनृत्यभूषितां च सहस्रमुखरूपिणीम् / योगेश्वरीं योगगम्यां नमामि ज्ञानरूपिणीम् // BuSto_54.3

शवारूढां महातेजां सर्वदुष्टनिकृन्तनीम् / सर्वपापहरां देवीं नमामि जगदीश्वरीम् // BuSto_54.4

गौरीं चौरीं च वेतालीं घस्मरीं पुक्कसीं तथा / शबरीं चाण्डालीं डोम्बीं नमामि चाष्टयोगिनीम् // BuSto_54.5

ब्रह्माविष्णुशिवशक्रचतुर्मारविनाशिनीम् / त्रैलोक्यमोहिनीं देवीं नमामि सुरसुन्दरीम् // BuSto_54.6