108 Buddhist stotras

हैमालवालवलयान्तरत्नवेधी वज्रासनोल्लसितमूलमगेन्द्रबोधम् / यं प्राप्य मारविजयानुपदं प्रपेदे सर्वज्ञतां स भगवान् तमहं नमामि // BuSto_18.21

मूर्द्धन् बुद्धं नम त्वं श्रवण शृणु सदा धर्ममद्वैधवादि प्रोक्तं सर्वत्र रूपं नयन निरुपमं पश्य जिघ्राङघ्रिपद्मम् / घ्राण त्वं चार्कबन्धोः स्तुहि सखि रसने श्रीघनं पूजयेथाः सिद्धं पाणे व्रजाङ्घ्रे जिनसदनमदस्मद्गुणं चित्त चिन्त्य // BuSto_18.22

बुद्धो धर्मश्च संघस्त्रितयमिति महानर्घरत्नं मुमुक्षोरद्यारभ्याहमस्मै त्रिभवभयभिदे सन्ददाम्यात्मभाजम् / एषो ऽहं तत्परः स्याम्परमयनमितो नास्ति मे सत्यमेतत् स्यामस्याहन्तु शिष्यस्त्रिदशनुतमिदं कोटिकृत्वो नमामि // BuSto_18.23

नाहं लाभार्चनार्थी न च भयचकितो नापि सत्कीर्तिकामो न त्वं धर्मांशुवंशप्रभव इति मुने नापि विद्याशया ते / पारम्पर्यान्नच त्वां शरणमुपगतः किन्तु ते सार्वजन्यं सम्यग्ज्ञानं समीक्ष्य त्वयि भवजलधिं सन्तरीतुं प्रवृत्तः // BuSto_18.24

त्वद्वैराग्यसमस्तभूतकरुणा प्रज्ञादिनानागुणस्फूर्ज्जच्चन्दनपङ्कसिन्धुपतितो गन्तुं क्षमो नान्यतः / भूपा वा यदि दण्डयन्ति विबुधा निन्दन्ति वा बान्धवा मुञ्चन्ति क्षणमप्यहं जिन पितर्जीवामि न त्वां विना // BuSto_18.25

स्वर्गे वा वसतिर्ममास्तु निरये तिर्यक्षु किं वासुरे प्रेतानां नगरे ऽथवा नरपुरे क्वाप्यन्यतः कर्मणा / भो सर्वज्ञ ततस्ततस्तव गुणान् कर्णामृतस्यन्दिनो निष्पापानवलम्बतां मम मनो नान्या सुखप्रार्थना // BuSto_18.26

तवैवाहं दासो गुणपणगृहीतो ऽस्मि भवता तवैवाहं शिष्यः स्ववचनविनीतो ऽस्मि भवता / तवैवाहं पुत्रः स्मृतिकृतसुखस्तद्गतिगतो गुरो बुद्धस्वामिन् मम जनक मां पाहि भवतः // BuSto_18.27

पिता माता भ्राता त्वमसि भगिनी त्वं च विपदि स्थिरं मित्रं बन्धुः प्रभुरमृतदीक्षागुरुतमः / त्वमैश्वर्य्यं भोगो त्वमसि धनधान्यं च महिमा यशो विद्या प्राणस्त्वमसि मम सर्वज्ञ सकलम् // BuSto_18.28

वीतराज मुनीन्द्र दयाम्बुधे सुगत भग्नबृहद्भवपञ्जर / अधिगतामृत बुद्ध मनो ऽम्बुजं मम तवानघ गन्धकुटीयताम् // BuSto_18.29

अनात्मन्यनित्ये ऽशुभे दुःखदुःखे दुरन्ते ऽत्र संसारचक्रे भ्रमन्तम् / त्वमेकोसि मां त्रातुमीशो दयाब्धे प्रभो ऽतः प्रसीद प्रसीद प्रसीद // BuSto_18.30

प्रसीदेश देवेश लोकेश जिष्णो जगद्वन्द्य मद्वन्द्य सद्वन्द्य बुद्ध / अघोरे भवारे स्मरारे तमोरे तवैवास्मि भक्तो वपुर्वाङ्मनोभिः // BuSto_18.31

स तव कुलसुतः स एव भक्तः स भवति शासनधूर्वहः स शिष्यः / स च शरणगतः स एव दासः कथमपि यो न विलङ्घयेत् तवाज्ञाम् // BuSto_18.32

जगदुपकृतिरेव बुद्ध! पूजा तदपकृतिस्तव लोकनाथ! पीडा / जिन जगदपकृत् कथं न लज्जे गदितुमहं तव पादपद्मभक्तः // BuSto_18.33

धनजनविभवासुदेहराज्यं यदुपकृते शतधा त्वया प्रदत्तम् / तमहितमपकर्त्तुरस्य लोकं क्व मम कृपा मुदिता क्व वा च मैत्री // BuSto_18.34

उपपतिमसतीव चित्तवृत्तिर्व्रजति भवन्तमपास्य पञ्चकामम् / अपि च विषयिणो न मोक्षसिद्धिः किमु करवाणि मुनीन्द्र देहि दास्यम् // BuSto_18.35

प्रियतम पुरुषोत्तमाग्रबुद्ध श्रमहर सिद्ध जगत्प्रसिद्धकीर्ते / भव शरणमनुत्तरप्रसादिन् प्रतिपदमस्मि तवैव दासदासः // BuSto_18.36

दशबल कलिकालदुर्बलो ऽहं चिरदुरितार्णवतुङ्गभङ्गमग्नः / तव कथमनुयामि धर्मनावं जिन मम देहि कृपाकरावलम्बम् // BuSto_18.37

प्रणतिरियमनेकशस्तवाहं बहु भवदुःखमवेक्ष्य भीतिभीतः / धर गुरुतरतृष्णया पतन्तं जिन मम देहि कृपाकरावलम्बम् // BuSto_18.38

जगति तव कृपा हि निर्विशेषा प्रपवतया जिन मां च दोषदुष्टम् / अलमहमिअह नो सुखी भवेन्दुर्न समकरश्चरतीव साध्वसाध्वे(ध्वोः) // BuSto_18.39

उपचितबहुमोहजातमन्धं विगतदयं विगतात्मबन्धुगन्धम् / अपगतगुणविद्यमुद्गताघं जनमविवेकमवाशु दीनबन्धो // BuSto_18.40

अकरवमुरुदुष्कृतं पुरा यद् मम वपुषा मनसा च चेतसा च / अनुकलमखिलं प्रलीयतां तत् तव चरणस्मरणेन सर्ववेदिन् // BuSto_18.41

सुगत तव पुरः पुरः पृथिव्यां मधुरमते पतितो ऽस्मि दण्डनत्या / अकुशलमखिलं तवानुभावात् प्रपततु नोत्पततात् पुनः सहैव // BuSto_18.42

तव चरणसरोजमेव वन्दे तव पदपङ्कजमेव पूजयामि / तव पदयुगमेव भावये ऽहं तव पदमेव सदैव दैवतं मे // BuSto_18.43

कमपि न कथयामि नार्चयामि कमपि न नौमि न चिन्तयामि नेहे / कमपि न शरणं व्रजामि हित्वा तव चरणं पितरस्मि किङ्करस्ते // BuSto_18.44

सदसि सदसि वाचि सिद्धं पथि पथि सद्मनि सद्मनीह बुद्धम् / भुवि भुवि मम वारि वारि चेतः कलयतु नित्यमिमं हि लोकनाथम् // BuSto_18.45

अविरतमवलोकयामि बुद्धं गतरजसा मनसापि चक्षुषेव / स्वपिमि निशि निधाय यद्धृदि त्वां न मम समं विरहस्त्वया त एव // BuSto_18.46

मम तदिह दिनं हि दुर्दिनं स्याद् अशितघनस्थगितं न दुर्दिनं मे / यदमृतसमबुद्धरत्ननाम स्मृतिरहितं दिनमस्य मा तदस्तु // BuSto_18.47

अमृतद षडभिज्ञ धर्मराज त्रिभुवनवन्द्य मुनीन्द्र गोतमेति / अहरहरनुकीर्त्त्यते नृभिर्यैरहमहितानपि तान्नमामि धन्यान् // BuSto_18.48

दशबल जिन सिद्ध वज्रबुद्धे सुगत तथागत बुद्ध शाक्यसिंह / इति निगदति यः क्वचित् कदाचित् तमभिनमाम्यपि दासवंशजातम् // BuSto_18.49

मदनजित पराजितेभ्य शास्तर्विभव विनायक विश्वविद्वरेण्य / कविवर वदतांवरेश शुद्धोदनसुत शाक्यमुने मुने प्रसीद // BuSto_18.50

अमृतमपि निपीय निर्जरेन्द्र पुनरपि ते ऽपि शुनीस्तनं धयन्ति / सकृदपि तव वाक्सुधारसज्ञो न विशति जातु स मातुरेव गर्भम् // BuSto_18.51

अहमिह भगवन्नलं न सोढुं जननजरामरणा(म)यादिबाधाम् / कुरु मम करुणं दिशो न जाने गुरु तदवेक्ष्य च तिर्यगादिदुःखम् // BuSto_18.52

तदुपरि परिचिन्त्य वृद्धकाले करचरणादिदृगादिपारवश्यम् / अगतिकमतिवेपते मनो मे जिन किमहं करवै प्रभो प्रसीद // BuSto_18.53

श्रवणपथगते ऽप्यदृष्टपूर्वे सुखकृति वस्तुनि यत्तनोमि तृष्णाम् / अविरतमत एव शान्तिबीजे त्वयि वलते रमते ममात्र चेतः // BuSto_18.54

सविपदि रमते न मे मनो ऽतः सुरनरशर्मणि पूर्वपूर्वभुक्ते / अनुदिनमनुभूय शर्करायामपि विरतिं कुरुते हि दृष्टदोषः // BuSto_18.55

करतलगतमप्यमूल्यचिन्तामणिमवधीरयतीङ्गितेन मूर्खः / कथमहमपहाय बुद्धरत्नं जगति धनी गुणवांश्च पण्डितश्च // BuSto_18.56

स भवति मतिमान् स नाकुलीनः स च गुणवान् स च कीर्तिमान् स शूरः / स जगति महितः सुखी स एव त्वयि जिन यस्य सुनिश्चलास्ति भक्तिः // BuSto_18.57

अपि सकलमधीतमत्र तेन श्रुतमपि सर्वमनुष्ठितं च तेन / अपि जितमजितेन तेन विश्वं त्वयि जिन यस्य सुनिश्चलास्ति भक्तिः // BuSto_18.58

त्यजति निजपरम्परादरेणेतरसमयस्य जनो न दृष्ट दृष्टिम् / असुहरमपि गौरवेण मातुर्न खलु शिशुर्विषमोदकं तु मुञ्चेत् // BuSto_18.59

कविवरमहमस्मि पण्डितस्ते जिन न जहामि कथन्नु कुर्गृहीतम् / नुदति हि तमसन्ततिं प्रवृत्तां मिहिरमरीचिसहायिनी सुदृष्टिः // BuSto_18.60

सुगतपदपराङ्मुखस्य पुंसः किमु तपसा यशसा च किं किमन्यैः / सुगतपदपराङ्नुखस्य पुंसः किमु तपसा यशसा च किं किमन्यैः // BuSto_18.61

सुगतपदि न भक्तिरस्ति येषामजननिरेव महीतले ऽस्तु तेषाम् / कथितमिह कृतागसां नराणां निरयगतिर्नियतं न चान्यतो यत् // BuSto_18.62

विदितसकलशास्त्रमुन्नतानां कुलभवमुत्तमरुपयौवनाद्यम् / जिन भवदनुपासकं नृपासं त्यजतु मनो मल नीचवत्तु जात्या // BuSto_18.63

परिहृतमदमानमत्सरादिः सकरुणशीलसमाधिमान् विवेकी / तव पददृढभक्तिरन्त्यजो ऽपि प्रतिभवमस्तु नरोत्तमः सखा मे // BuSto_18.64

विहितजिनपदार्चनस्य भक्तुर्दशदिवसानपि जीवितं प्रशस्तम् / न तु नियुतसहस्रकल्पकोटीरकृतमुनीन्द्रपदाब्जपूजनस्य // BuSto_18.65

स भवति सुरसुन्दरीसखो ऽन्यैः कृतमभिनन्दति वार्चनं च भक्त्या / त्रिदशनरगुरो त्वदीयपूजामगतितया यदि कर्तुमक्षमः स्यात् // BuSto_18.66

सुरुचिरमतिचित्रचित्ररूपं नयनपथं नयतीह यस्तवार्चाम् / रहयति पुरुषं तमप्युदारं चिरतरसञ्चितदुष्कृतं कवीन्द्र // BuSto_18.67

मणिकनकशिलादिनिर्मितां यः प्रणमति ते प्रतिमां तयोश्च तुल्यम् / फलमिह मनसश्च सम्प्रसादादनुपरतं जिन यो ऽग्रतो नमेत् त्वाम् // BuSto_18.68

सकृदपि तव पादपद्मपूजा वनकुसुमैरपि यः करोति धीमान् / अवनतसुरसंघमौलिमालोज्ज्वलममलं श्रयते तमाधिपत्यम् // BuSto_18.69

यदि भवति सरूपमेकचित्तक्षणशरणोद्भवपुण्यवृन्दमुच्चैः / गणशरण समन्तभद्रसाधो ऽखिलनभसो ऽप्यतिरिच्यते तदा तत् // BuSto_18.70

तव गुणकथने तु यः प्रसन्नस्तमनुविशन्ति मुने गुणास्त्वदीयाः / उदयति शशिनि प्रसन्नमिन्दूपलमिव तत्किरणावलीतुषारः // BuSto_18.71

सकृदपि समदायि देव किञ्चिद् भवरतिमुत्सृजता जनेन तुभ्यम् / सुगत तदखिलान् लुनाति धारा वदसिरिव द्रुममाश्रवादिदोषान् // BuSto_18.72

कृतमिह सुकृतं मृषादृशा यज्जनयति तत् किल तस्य दुर्विपाकम् / क्षितिसलिलरसं स्वतिक्तभावं नयति यथा पिचुमर्दबीजमुप्तम् // BuSto_18.73

तव पदनलिने निपत्य भूयो निपतति नैव चतुर्ष्वपायकेषु / नहि कुशलकरो नरः कदापि क्वचिदपि दुर्गतिमेति नाथ कश्चित् // BuSto_18.74

इति भवदुपदेशतो विदित्वा तव पदपङ्कजपूजने रतो ऽस्मि / दृढयतु भगवान् युगे युगे मे कुमतिमुदस्य भवे भवे ऽर्यभक्तिम् // BuSto_18.75

स्थिरमपि भगवन् क्षणं तवोक्तौ करचरणानि दृगादि वैरिवर्गः / व्यथयति हृदयं बलाद्विचाल्य त्वमिदमनाथमनीश पाहि पाहि // BuSto_18.76

यदि नयनमयं वशे विधातुं यतति तदा द्रवति श्रवो यदा तत् / तदनु रसन-नासिकाशरीराण्यहह परस्परदुर्ग्रहाणि चैवम् // BuSto_18.77

गतिरतिचपलस्य चेतसः स्यादिह नभसीव नभस्वतो ऽसुरोधा / कभमपि भजते क्रमेण धैर्यं चिअरमिदमभ्यसनेन संविरक्त्या // BuSto_18.78

विशदमपि मनः स्वभावतो मे चिरकृतकिल्विषकालिमाहृतं स्यात् / कुशलजललवैः कथन्नु धौतं भवति मयेदृशचेतसार्जितैस्तैः // BuSto_18.79

शुचितरवचनामृतप्रवाहैः रघमलिनीकृतचित्तसन्ततिं माम् / अनधिवर नितान्तमाधितप्तं सपदि विशोधय दण्डवन्नमामि // BuSto_18.80

सति सकलगुरो मुने प्रसन्ने किमिह दुरापममुत्र किं दुरापम् / यदमलमनसस्त्वदीयदासाः सुरपतितां मनसापि नाद्रियन्ते // BuSto_18.81

विदधति भयमिन्द्रियाणि भूम्ना विषयविषग्रहणेषु दोषदृष्ट्या / नहि सुविदितभाविदाहदोषः शिशुरपि दीपशिखाग्रसङ्गृही स्यात् // BuSto_18.82

न भवति जिन यावदेष जीर्णो विषयपिशाचनिषेवणेन तावत् / झटिति सुकृतकर्मणि प्रयोज्य स्वव शरणागतवत्सलागतं माम् // BuSto_18.83

इअदमपि यदि वेद्मि पुत्रदारस्वतनुगृहादि मरीचिकाम्बुतुल्यम् / स्थगयति ममता च मामहन्ता तदपि हि मोहविजृम्भितं गरीयः // BuSto_18.84

अजनि च निजकारणेन सर्वं निरसति जीर्यति नश्यति स्वहेतोः / अहमपि हि तथैव धातुपुञ्जः कथमहमस्य कथं मुने ममेदम् // BuSto_18.85

आत्मबुद्धिरिह यस्य जायते सा च तस्य जनयेदहङ्कृतिम् / सा तनोति सुतरां भवस्पृहां सैव मोहजननी मुहुर्मुहुः // BuSto_18.86

तेन कर्म कुरुते शुभाशुभं तद्धि दुःखजनकं भवत्रये / दुःखमूलमत एव सात्मधीः तां लुनीहि जिन मे वचो ऽसिना // BuSto_18.87

अथ सकलविदं दयासमुद्रं त्रिभुवनकारणकारणं कुलीनम् / निखिलगतमनन्तमस्तिशान्तिं मुनिजनमानसहंसमीशमीडे // BuSto_18.88

स्नाने कर्मणि भोजने वितरणे घ्राणे तथाकर्णने ध्यानस्पर्शनदर्शनादिषु तथा सम्भाषणादावपि / प्रातः सायमथो दिवा च निशि च त्वत्पादपद्मे विभो चित्तं मे रमतां मुनीन्द्र सततं यूनां युवत्यामिव // BuSto_18.89

मत्स्वामिन् मदभीष्टकल्पविटपिन् मद्देवते मद्गुरो मन्मातर्मदुपास्य मत्प्रियसखे मत्सद्गते मत्पितः / मद्विद्ये मदशेषदुःखशमकृद् मद्भावने मन्निधे मन्मुक्ते मदुदारभाग्य मदसो मद्बुद्ध मां पालय // BuSto_18.90

ब्रह्मा जिह्माननो ऽभूद् गुरुरगुरुरहर्णायको ऽनायको ऽसौ विष्णुस्तृष्णां प्रपेदे कविरकविरभूदीश्वरो ऽनीश्वरो ऽपि / शेषः शेषानुभावस्तव सुगत नुतौ खण्डिताखण्डलोक्तिः को ऽहं मूढो वराकस्त्रिदशनरपते कीर्त्तने ते गुणानाम् // BuSto_18.91

दशद्वयधिकविंशतिस्फुरदशीत्यनुव्यञ्जनैः महापुरुषलक्षणं वपुषि यस्य देदीप्यते / कलामपि न षोडशीं भजति तस्य पुण्यात्मनश् चतुर्मुखमुखो गणो दिविषदां नृणां का कथा // BuSto_18.92

महेन्द्रनवचापवत् कनकपर्वते सर्वतः सदा तव मनोहरं स्फुरति सुप्रभामण्डलम् / दृशो भवति गोचरं तदिह यस्य तस्य त्वरान् तमस्ततिमनुत्तमां हरति दूरमन्तर्बहिः // BuSto_18.93

रूपं लोचनलोभनं श्रवणयोरानन्दसन्दोहदा वाणी विश्वविमोहकृत् तव कृपावेशो ऽतिशान्तस्तव / पाण्डित्यं प्रथितं जगत्सु भगवन् सर्वज्ञनाम्नैव ते साम्राज्यस्य च यौवने निरसनं वैराग्यसीमा स्फुटम् // BuSto_18.94

शौर्यं त्वद्विषमेषु दर्पदलनादङ्गीकृतं दैवतैः यद्वाणैः स सुरासुरः प्रविजितो लोको ऽयमोशत्करम् / वीर्यं ते प्रकटीचकार नितरां निर्वाणसाक्षात्कृतिः किं ब्रूमो बलवैभवं भगवतस्तत्ते जगद्दुर्वहम् // BuSto_18.95

यत्र च्छागतुरङ्गमारणविधिर्वेदे ऽपि तं निन्दसि प्रेम्णा प्राणभृतामतः सकरुणस्त्वत्तो महान्नापरः / एवं ते गुणसम्पदो न विषया बुद्धेरसूयात्मनां ते मूढाः प्रलपन्ति हन्त सुगतो मद्वेदनिन्दीत्ययम् // BuSto_18.96

निर्मज्जत्सुरसुन्दरीकुचचलन्निर्मन्दमन्दाकिनीफेणक्षीरसमुद्रकैरवसखी सत्कीर्तिलक्ष्मीस्तव / यन्नालिङ्गति मन्दभाग्यमधुना भूयान्न तेनापि मे सङ्गः सङ्गगदादिवैद्य भगवन्नेषापि मे प्रार्थना // BuSto_18.97

ये त्वां गच्छन्ति बुद्धं शरणमिति न ते दुर्गतिं यान्ति सन्तस् त्यक्त्वा कायान्मनुष्यान्निरतिशयसुखान् ते लभन्ते ऽथ दिव्यान् / दुःस्वप्नो दुर्निमित्तं दुरहिदुरहिता दुर्ग्रहा दुष्टसत्त्वा दुःखं दुर्व्याधयो ऽपि क्वचिदिह कुशलान् नोपसर्पन्ति चैवम् // BuSto_18.98

छत्रं ब्रह्मा व्यधात्ते मणिमयममलं चामरं चक्रपाणिस्तोतारो गद्यपद्यैर्हरगुरुफणिनः शाङ्खिको ऽभून्महेन्द्रः / अन्ये दीपोदकुम्भध्वजकुसुमलसत्पाणयो भक्तिनम्रास् तस्थुर्व्याख्याय धर्मं भुवमवरुहतः स्वर्गतस्ते मुनीन्द्र // BuSto_18.99

मातेवासीत् परस्त्री भवति परधने न स्पृहा यस्य पुंसो मिथ्यावादी न यः स्यान्न पिबति मदिरां प्राणिनो यो न हन्यात् / मर्यादाभङ्गभीरुः सकरुणहृदयस्त्यक्तसर्वाभिमानो धर्मात्मा ते स एव प्रभवति भगवन् पादपूजां विधातुम् // BuSto_18.100

सर्वप्राणातिपातात् परधनहरणात् सङ्गमादङ्गनाया मिथ्यावादाच्च मद्याद्भवति जगति यो ऽकालभुत्क्तेर्निवृत्तः / सङ्गीतस्रक्सुगन्धाभरणविलसितादुच्चशय्यासनाद् अप्यासीद्धीमान् स एव त्रिदशनरगुरो त्वत्सुतो नात्र शङ्का // BuSto_18.101

श्रोतापत्त्यादिमार्गाः सदवयवयुता घ्नन्ति रागादिदोषान् दोषास्ते छिन्नमूला हतभवगतयस्तत्फलैर्यान्ति शान्तिम् / मार्गाणां क्लेशहानिः सदमृतमजरं कारणं स्यान्नवानां धर्माणां हेतुरेषां तव जिन वचनं तस्य हेतुस्त्वमेव // BuSto_18.102

विंशत्सत्कायदृष्टिक्षितिधरममलज्ञानवज्रेण भित्त्वा रागद्वेषादिपापान्तदुदितमखिलं कर्म चोन्मूलयन्तः / चत्वारो लब्धमार्गास्तदनुगुणफलास्ते ऽपि चत्वार एवं त्वतश्चाष्टार्यसङ्घः पृथगिति न पुनश्चिन्तयामो मुनीन्द्र // BuSto_18.103

अपि गगणमनन्तं सर्वसत्त्वो ऽप्यनन्तः सकलमिदमनन्तं चक्रवालं विशालम् / वदसि जिन विदित्वानन्तया ज्ञानगत्या तव च गुणमनन्तं वेदसी बुद्ध चैवम् // BuSto_18.104

भगवति भवतीति ध्वंसकारिण्यमोघे भवतु भवतु भक्तिर्जन्मजन्मान्तरे ऽपि / भवतु भवतु धर्मः सर्वथा मे ऽनुशास्ता भवतु भवतु संघो ऽनुत्तरा पुण्यभूमिः // BuSto_18.105

त्रिभुवनमहनीयं त्वामभिष्टुत्य बुद्धं विशदतरमदभ्रं पुण्यमत्रार्जितं यत् / जगति सकलसत्त्वास्तेन सम्बुद्धबोधिं विधुतविविधपापा भावनाभिर्व्रजन्तु // BuSto_18.106

भास्वद्भानुकुलाम्बुजन्ममिहिरे राजाधिराजेश्वरे श्रीलङ्काधिपतौ पराक्रमभुजे नीत्या महीं शासति / सद्गौडः कविभारतिक्षितिसुरः श्रीरामचन्द्रः सुधीः श्रीतृणामकरोत् स भक्तिशतकं धर्मार्थमोक्षप्रदम् // BuSto_18.107

श्रीशाक्यमुनेर्भगवतः सर्वज्ञस्य परमोपासकेन गौडदेशीयश्रीबौद्धागमचक्रवर्त्तिना भूसुरेणाचार्येण महापण्डितेन

विरचितं भक्तिशतकं समाप्तम् /

नृपः पराक्रान्तिभुजो महीभुजो शिरोमणिः पण्डितमण्डलीसखः / स रामचन्द्रं कविभारतिद्विजं चकार बौद्धागमचक्रवर्तिनम् // BuSto_18.1

बुद्धो मे जयतां जिनः स भगवान् तद्देशना निर्मला स्थेयात् सत्त्वहिताय भातु भणिता सङ्घस्तदाधारकः / लङ्केशप्रमुखाश्चिअरं वसुमतीं रक्षन्तु नित्यं नृपा वर्षन्तु स्तनयित्नवश्च समये मैत्रीं लभन्तां प्रजाः // BuSto_18.2

तीर्थग्रामपतेर्यतेस्त्रिपिटकाचार्यस्य भूपान्वयाचार्यश्रेष्ठमुनीश्वरस्य सुगिरः श्रीराहुलस्वामिनः / शिष्यो यो ऽवरजः सुमङ्गलमुनिर्धीमान् स्वया भाषया कारुण्येन मुनीन्द्रभक्तिशतकव्याख्यानमाख्यातवान् // BuSto_18.3

नमो बुद्धाय गुरवे नमो धर्माय शासिने / नमः सङ्घाय महते त्रिभ्यो ऽपि सततं नमः // BuSto_18.4

सिद्धिः //

digital sanskrit buddhist canon, stotra section, text no. 19: buddhabhaṭṭārakastotram

ओम् नमो बुद्धाय

संबुद्धं पुण्डरीकाक्षं सर्वज्ञं करुणात्मकम् / समन्तभद्रं शास्तारं शाक्यसिंहं नमाम्यहम् // BuSto_19.1

श्रीघनं श्रीमतिं श्रेष्ठं शीतराशिं शिवंकरम् / श्रीमन्तं श्रीकरं शान्तं शान्तमूर्तिं नमाम्यहम् // BuSto_19.2

नैरात्म्यवादिनमिन्दुं निरवद्यं निराश्रयम् / श्रुतिज्ञं निर्मलात्मानं निस्थूलकं नमाम्यहम् // BuSto_19.3

निरोधकं नित्यज्ञानं निर्विकल्पं तथागतम् / नियतं निधिनाकेशं निष्प्रपञ्चं नमाम्यहम् // BuSto_19.4

विश्वेश्वरं विमुक्तिज्ञं विश्वरुपं विनायकम् / विश्वब्रह्म सुसम्पन्नं वीतरागं नमाम्यहम् // BuSto_19.5

विद्याचरणसंपन्नं विश्वेशं विमलप्रभम् / विनिमज्ञं सविष्टम्भं वीतमोहं नमाम्यहम् // BuSto_19.6

दुर्दान्तदमकं शान्तं शुद्धं शौद्धोदनिं मुनिम् / सुगतं सुगतिं सौम्यं शुभ्रकीर्तिं नमाम्यहम् // BuSto_19.7

योगेश्वरं दशबलं लोकज्ञं लोकपूजितम् / लोकाचार्यं लोकमूर्तिं लोकनाथं नमाम्यहम् // BuSto_19.8

कनकमूर्तिं कर्माब्धिमकलङ्कं कलाधरम् / कान्तमूर्तिं दयापात्रं कनकाभं नमाम्यहम् // BuSto_19.9

महामतिं महावीर्यं महाविज्ञं महाबलम् / महामहं महाधैर्यं महाबाहुं नमाम्यहम् // BuSto_19.10

आद्यं पवित्रं तद्ब्रह्ममपराजितमद्भुतम् / आर्यं परहितं नाथममिताभं नमाम्यहम् // BuSto_19.11

देवदेवं महादेवं दिव्यं वन्दितमव्ययम् / प्रमाणभूतं देवेशं दिव्यरूपं नमाम्यहम् // BuSto_19.12

परमार्थं परज्योतिं परमं परमेश्वरम् / भावाभावकरं श्रेष्ठं भगवन्तं नमाम्यहम् // BuSto_19.13

चतुर्मारादिविजितं तत्त्वज्ञं शंकरं शिवम् / तत्त्वसारं सदाचारं सार्थवाहं नमाम्यहम् // BuSto_19.14

जितेन्द्रियं जितक्लेशं जिनेन्द्रं पुरुषोत्तमम् / उत्तमं सत्पदं ब्रह्म पुण्यक्षेत्रं नमाम्यहम् // BuSto_19.15

एतैः स्तुत्वा मुनिश्रेष्ठं नरा विगतकल्मषाः / प्राप्नुवन्ति पदं मोक्षं दिव्यं त्वथ सनातनम् // BuSto_19.16

यस्त्विदं पठते नित्यं प्रातरूत्थाय पण्डितः / नाम्नामष्टोत्तरशतं पवित्रं पापनाशनम् // BuSto_19.17

लभते चेप्सितान् भोगान् सौमनस्येन वर्णितान् / व्याधयो ऽपि न बाध्यन्ते पातकं च विनश्यति // BuSto_19.18

आयुरारोग्यमैश्वर्यसर्वमोक्षसमन्वितः / मेधावी च तथा वाग्मी जायते जन्मजन्मनि // BuSto_19.19

बुद्धभट्टारकस्य ब्रह्माविरचितं स्तोत्रं समाप्तम् //

digital sanskrit buddhist canon, stotra section, text no. 20: buddhagaṇḍīstavaḥ ācārya-aśvaghoṣakṛtaḥ

यः पूर्वं बोधिमूले रविगमनपथे मारगान्नृत्यगीतान् गंगौ गंगौ गगंगौ घघनघनमृदुद्वन्द्वमन्त्रैरजस्रैः / यः स्त्रीभिर्दिव्यरूपैरुपरतरभितुं दूदुभिर्दुर्भिदूर्भिः क्षोभं नैवाभियातः सुरनरनमितः पातु वः शाक्यसिंहः // BuSto_20.1

यः कन्दर्पाङ्गनानां ककहकहकहा हाहहेति प्रहासैर्यः स्फीताडम्बराणां तटिति तटतटा तातटीति प्रलापैः / कुत्कुद् बुद्बुद् कुकूचित् कुकुहकुहकुहैः किङ्कराणां च वाग्भिर्नो त्रस्यः सो ऽस्तु सौम्यः श्रुतसकलमलः शान्तये वो मुनीन्द्रः // BuSto_20.2

भ्रूक्षेपापाङ्गभङ्गैः स्मरशरविलसत्पक्ष्मताराक्षिपातै प्रौढानङ्गाङ्गनानां ललितभुजलतालास्यलीलायिताङ्गैः / सव्रीडैः सस्मितोक्तैः कलमृदुमधुरामोदरम्यैर्वचोभिर्भ्रान्तिं चेतो न चित्रं स्मरबलजयिनो यस्य तस्मै नमो ऽस्तु // BuSto_20.3

उर्वीं सञ्चालयन्तः खरशरनिकरैश्छादयन्तोःन्तरीक्षं ज्वालाभिः क्रोधंवह्नेर्ज्वलितदशदिशः क्षोभयन्तो ऽम्बुराशिम् / हेलोत्खातासिचक्रक्रकचपटुरवाराविणो मारवीराः मैत्रीशस्त्रेण येन प्रसभमभिजिताः पातु वः सो मुनीन्द्रः // BuSto_20.4

विस्फूर्जज्जातकोपप्रकटितविकटाटोपनिर्घोषघोरं गर्जज्जीमूतजालप्रकटगजघटाटोपबद्धान्धकारम् / कन्दर्पोद्दामवह्निस्फुरदसिकिरणोद्भासिताशेषविश्वं पुष्पेषोः सैन्यमुच्चैर्झटिति विघटितं येन बुद्धः स वो ऽव्यात् // BuSto_20.5

दिव्यैराकणंपूरैः कमलदलनिभैः पक्ष्मलैर्लोलतारैर् भावस्निग्धैर्विदग्धैः प्रचलितललितैः सस्मितैर्भ्रूविलासैः / नेत्रैर्माराङ्गनानां परिगतवलयैर्लोहितान्तैरशान्तैर् नाकृष्टः सर्वथा यस्तमहमृषिवरं वान्तदोषं नमामि // BuSto_20.6

नोद्भ्रान्तं यस्य चित्तं स्फुटविकटसटान्तोत्कटैर्लोलजिह्वैर् मारैः शूलाग्रहस्तैर्गजतुरगमुखैः सिंहशार्दूलवक्त्रैः / प्रद्युम्नः कामदेवस्तृणवदगणितो येन संरम्भभीरुः संबुद्धः पातु युष्मान् व्यपगतकलुषो लोकनाथो मुनीन्द्रः // BuSto_20.7

अक्षोभ्या यस्य बुद्धिर्धरणिनगनदीसागराम्भोधरद्भिर् गर्जद्भिर्मारवीरैर्विविधमुखशतैर्घोररूपैरनन्तैः / येनासौ पुष्पकेतुस्तृणवदगणितः सर्वविद् वीतरागः स श्रीमान् बुद्धवीरः कलुषभयहरः पातु वो वीतरागः // BuSto_20.8

मारानीकैर्महोग्रैरसिपरशुधनुःशक्तिशूलाग्रहस्तैर् उल्कापातैरनेकैर्गहनपटुरवैर्भीषणैर्भीमनादैः / न क्षुब्धं यस्य चित्तं गिरिसममचलं गाढपर्यङ्कबन्धं तं वन्दे वन्दनीयं त्रिभवभयहरं बुद्धवीरं प्रवीरम् // BuSto_20.9

उच्चैरट्टाट्टहासैः प्रकटपटुभटाबद्धघण्टै रणद्भिः साटोपास्फोटटङ्कस्फुटजटिलजटैः किङ्करैः कोटराक्षैः / भग्नं कर्तु न शक्ताः पटुपटहपटस्फालनैर्यस्य बोधौ दृप्तानां गृध्रकूटे पटुपटहपटुः सो ऽस्तु वो बुद्धवीरः // BuSto_20.10

कोकण्डं रामकण्डं प्रतिभयकुहरं दर्पदर्पं रणाण्डं डिम्बं डिम्बं डडिम्बं डुह डुहक डुहं तृंखलस्तृंखलस्तृम् / झिम्बं झिम्बं झझिम्बं खमु खमु खमुखं मंखु मंखुः खुमंखुर् एभिर्ध्वानैर्न भीतः सुरवरनमितः पातु वः शाक्यसिंहः // BuSto_20.11

यं माराङ्गारधाराधरसमयसमारम्भसंरम्भयुक्तं नक्तं माराङ्गनानां मुखकमलवनश्रीविपक्षैकपक्षा / सम्यक्संबोधिलक्ष्मीः शशिनमिव शरत्कौमुदी संप्रपेदे तस्येयं धर्मदूती ध्वनति भगवतो धर्मराजस्य गण्डी // BuSto_20.12

निघ्नन्नप्राप्तदृष्टिः क्षणमपि च चिरादन्तको यद् दुरन्तं तस्मिन्निक्षिप्तचित्ताः कुरुत सुचरितेष्वादरं सर्वकाले / इत्थं रत्नत्रयाज्ञामिव वदति मुहुः प्राणिनां यस्य सैषाम् एषा शब्दायमाना प्रथितमुखरदिङ्मण्डला धर्मगण्डी // BuSto_20.13

मार्तण्डमण्डलमिवोडुगणं विजित्य भातीह तीर्थिकजनं जिनशासनं च / रंरम्यते धरणिमण्डलमण्डनस्य गण्डी यमस्य जयडिण्डिमवत्प्रचण्डा // BuSto_20.14

यस्यात्यन्तं दृढत्वं जमि जमि डुडुभं रञ्जितेनालिनालिं डिम्बं डिम्बं डिडिम्बं डुभडुभडुडुभं नाडिवन्नाडिभण्डम् / रुण्डं रुण्डं रुरुण्डं यरलव खखुमं मंखुमंखुः खुमंखुः पश्य त्वं जीवलोके दशबलबलिनः पीड्यते मारसैन्यम् // BuSto_20.15

भूकम्पोत्कम्पजाता प्रचलितवसुधा कम्पते मेरुराज उत्त्रस्ता देवसंघा ग्रहगणसहिता नागराजाः समस्ताः / श्रुत्वा गण्डीं प्रचण्डां विविधभयकरीं त्रासनीं तैर्थिकानां बौद्धानां शान्तिहेतोः प्रतिरणति महीं रावयन्तीव सद्यः // BuSto_20.16

एषा विहारशिखरे प्रविरौति गण्डी मेघस्वनेन कुरुते च मनोज्ञघोषान् / मातेव वत्सलतया सुबहिर्गतांश्च पुत्रान् समाह्वयति भोजनकालगण्डी // BuSto_20.17

संसारचक्रपरिवर्तनतत्परस्य बुद्धस्य सर्वगुणरत्नविभूषितस्य / नादं करोति सुरदुन्दुभितुल्यघोषा गण्डी समस्तदुरितानि निवारयन्ती // BuSto_20.18

एषा हि गण्डी रणते नराणां संबोधिनी देवनरासुराणाम् / भद्राः शृणुध्वं सुगतस्य गण्डीमापूरितां भिक्षुगणैः समग्रैः // BuSto_20.19

नागैः संवर्तकालक्षुभितजलधराकारवद् व्योम्नि कीर्णैः क्वास्मिन् विघ्वंसशङ्का भयचकितजनैस्तत्प्रतीकारहेतोः / कुर्वन्त्यद्यापि यस्या ध्वनिमुपशमिताशेषतीर्थ्यावलेपं सा गण्डी पातु युष्मान् सकलमुनिवरैः स्थापिता धर्मवृद्ध्यै // BuSto_20.20

एषा सुरासुरमहोरगसत्कृतस्य शान्तिं परामुपगतस्य तथागतस्य / गण्डी रणत्यमरदुन्दुभितुल्यघोषान् कृत्वान्यतीर्थ्यहृदयानि विदारयन्ती // BuSto_20.21

पुण्ये तत्परमानसा भवत भोः स्वर्गापवर्गप्रदे पापं दुर्गतिदायकं कुरुत मा लोकाश्चलं जीवितम् / इत्थं मध्यविलीनभृङ्गविरुतं यत्नान्निवार्यं मया मारारेश्चरणाब्जयोर्विनिहितः पुष्पाञ्जलिः पातु वः // BuSto_20.22

मुञ्जद्भिः कुसुमानि तूर्यरणितैरापूरयद्भिर्दिशो जोजोकारपुरःसरैः सुरगणैः शक्रादिभिः सादरैः / स्वर्गाद् यस्य भुवं किलावतरतो दत्तानुयात्रा चिरं तस्याव्यात् करुणानिधेर्भगवतो गण्डी प्रचण्डा जगत् // BuSto_20.23

गत्वा सप्त पदानि मातुरुदरान्निष्क्रान्तमात्रः स्वयं संसारश्रवसं ममेति वचनं प्रोवाच यो ऽनन्यधीः / यस्मिन्नात्मभुवे पुनस्त्रिभुवनं भ्राजिष्ण्वभिव्याहृतं कुर्याद्वः सुगतस्य तस्य जयिनो गण्डी तमःखण्डिनी // BuSto_20.24

जित्वा मारबलं महाभयकरं कृत्वा च दोषक्षयं सर्वज्ञं पदमाप यत् सुरुचिरं तत्रैव रात्रौ बहिः / तस्याशेषगुणाकरस्य सुधियो बुद्धस्य शुद्धात्मनो गण्डी खण्डितचण्डकिल्विषहरा भूयाद् विभूत्यै नृणाम् // BuSto_20.25

ब्रह्मा जिह्म इवाभवत् सुरगुरुर्गर्वं जहौ सर्वथा शर्वः खर्वमतिर्बभूव भगवान् विष्णुश्च तूष्णीं स्थितः / इत्थं यद्गुणकीर्तनेषु विबुधा याता ह्रिया मूकतां गण्डी तस्य मुनेरियं जयति वः पायादपायाज्जगत् // BuSto_20.26

ब्रह्मादित्यशशाङ्कशङ्करशताक्षोपेन्द्रयक्षादयो गन्धर्वोरगकिन्नरासुरसमीरप्रेतपीडाम्बराः / ये तिष्ठन्त्यमरा नरा क्षितितले पाताललोकेषु च श्रोतुं धर्ममिमं तथागतगुरोः सर्वे समायान्तु ते // BuSto_20.27

यस्या जन्मनि दीनहीनमतयः प्रापुः शुचं तीर्थिकाः हर्षोत्कर्षविशेषवर्धितधियो बौद्धा धृतिं लेभिरे / यामासाद्य गुणाः प्रयान्ति विततिं दोषा व्रजन्ति क्षयं सा गण्डी कलिकालकल्मषहरा भूयाद् भवद्भूतये // BuSto_20.28

यां नत्वा विधिवद् विशुद्धमतयो गच्छन्ति तुङ्गां गतिं यस्याः क्षिप्रतरं प्रयान्ति विवशाः सर्वे विपक्षाः क्षयम् / ध्वस्तव्यस्तसमस्तमोहपटला सा धर्मगण्डी मुनेः संभूयाद् भवभाविसाध्वसभिदे युष्माकमायुष्मताम् // BuSto_20.29

श्रुत्वा यां पतिता महीतलमलं ब्रह्मादयः स्वर्भुवः कम्पन्ते धरणीधराः क्षितिरपि क्षिप्रं गता क्ष्मातलम् / तीर्थ्यानां भयकारिणी परहितायारम्भशुद्धात्मनां बौद्धानामुपशान्तये सपदि सा संताड्यतां गण्डिका // BuSto_20.30

प्रौढालीढाभिरुढो गुरुतरचरणक्रान्तगौरीस्तनाग्रं सर्वज्ञस्योत्तराङ्गं स्फुटविकटशता गर्जयन् वज्रमुख्या / ज्वालामालोज्ज्वलाङ्गं त्रिभुवनविवरव्याप्तहुंकारभीमो बद्धव्याबद्धमौलिर्जयति सुरनरादित्यचन्द्रासुरेन्द्रः // BuSto_20.31

पीनोत्तुङ्गस्तनीनां हरिणदृशदृशां हंसलीलागतीनां दं दं दं दं द दं दं तनि तनि तनितस्तालिका कामिनीनाम् / तुं तुं तुं तुं ततुं तुं नकटिनमभितो गीतितो गीतवाद्यैः टुं टुं टुं टुं टुटुं टुं टुमिति मितनता हन्यते गण्डिकेयम् // BuSto_20.32

बुद्धगण्डी समाप्ता / कृतिरियमाचार्यश्री-अश्वघोषपादानाम् //

digital sanskrit buddhist canon, stotra section, text no. 21: buddhastotram

ओम् नमो बुद्धाय

नमो ऽस्तु बुद्धाय विशुद्धबोधये विशुद्धधर्मप्रतिभासबुद्धये / सद्धर्मपुण्योपगतानुबुद्धये भवाग्रशून्याय विशुद्धबुद्धये // BuSto_21.1

अहो अहो बुद्धमनन्ततेजसं अहो अहो सागरमेरुगुल्मम् / अहो अहो बुद्धमनन्तगोचरम् औदुम्बरं पुष्पमिवातिदुर्लभम् // BuSto_21.2

अहो महाकारुणिकस्तथागतः अहो अहो शाक्यकुलस्य केतुः / अहो प्रणम्यः स नरेन्द्रसूर्यो येनेदृशं भाषितसूत्रमुत्तमम् // BuSto_21.3

अनुग्रहार्थं स हि सर्वसत्त्वान् सद्धर्मचर्यामुपदिश्य नूनम् / शान्तेश्वरः शाक्यमुनिस्तथागतः सत्त्वोत्तमः शान्तपुरं प्रविष्टः // BuSto_21.4

गम्भीरशान्तं विरजासमाधिपदं प्रविष्टे जिनबुद्धगोचरे / शून्याश्च कायास्त्वथ श्रावकाणां शून्या विहारा द्विपदोत्तमानाम् // BuSto_21.5

ते सर्वधर्मा प्रकृतिश्च शून्या सत्त्वा हि शून्या नहि जातु विद्यते // BuSto_21.6

नित्यं च नित्यं च जिनं स्मरामि नित्यं च शोचामि जिनस्य दर्शनम् / नित्यं च नित्यं प्रणिधिं करोमि संबुद्धपूज्यस्य च दर्शनार्थम् // BuSto_21.7

स्थाप्येह नित्यं धरणीषु जानु शोकाभितप्तो जिनदर्शनाय / ओदन्तकारुण्यविनायकस्त्वमतीव तृष्णा सुगतस्य दर्शने // BuSto_21.8

सतां वरो यद्विजहार नित्यं ददाहि मे दर्शनतोयशीतलम् / सत्त्वाः सतृष्णास्तव रूपदर्शने प्रह्लादयैनान् करुणाजलेन // BuSto_21.9

कारुण्यभावं कुरु नाथ नायक ददाहि मे दर्शनं सौम्यरूपम् / त्वं पाहि त्रातर्जगदेकदेशिता शून्याश्च कायास्त्वथ श्रावकाणाम् // BuSto_21.10

आकाशतुल्या गगनस्वभावा मायामरीच्योदकचन्द्रकायाः / सर्वे च सत्त्वाः सुखितस्वभावा भवन्तु भो नायक त्वत्प्रसादात् // BuSto_21.11

बोधिसत्त्वसमुच्चयानाम कुलदेवताविरचितं

बुद्धस्तोत्रं समाप्तम् //

digital sanskrit buddhist canon, stotra section, text no. 22: caityavandanāstotram

जातिं बोधिं प्रबलमतुलं धर्मचक्रमरण्ये चैत्ये चार्यं त्रिभुवननमितं श्रीमतं प्रातिहार्यम् / स्थाने चैत्ये गिरिनगरनिभे देवदेवावतारं वन्दे भक्त्या प्रणमितशिरसा निर्वृता येन बुद्धाः // BuSto_22.1

वैशाल्यां धर्मचक्रे प्रथितजिनवरे पर्वते गृध्रकूटे श्रावस्त्यां लुम्बिकायां कुशिनगरवरे कापिलाख्ये च स्थाने / कौशल्यां स्थूलकूटे मधुरवरपुरे नन्दगोपासराते ये चान्ये धातुचैत्या दशबलबलिता तान् नमस्यामि बुद्धान् // BuSto_22.2

कैलाशे हेमकूटे हिमवति निलये मन्दरे मेरूशृङ्गे पाताले वैजयन्ते धनपतिनिलये सिद्धगन्धर्वलोके / ब्रह्माण्डे विष्णुभूम्यां पशुपतिनगरे चन्द्रसूर्यातिरेके ये चान्ये धातुचैत्या दशबलवलिता तान् नमस्यामि बुद्धान् // BuSto_22.3

काश्मीरे चीनदेशे खसतवरपुरे बल्कले सिंहले वा राताद्ये सिंहपोटे सततमविरतं वल्लखे कापिलाख्ये / नेपाले कामरूपे कुवसवरपुरे कान्तिशोभासराते ये चान्ये धातुचैत्या दशबलवलिता तान् नमस्यामि बुद्धान् // BuSto_22.4

ये च स्युर्धातुगर्भा दशबलतनुजाः कुम्भसंज्ञाश्च चैत्याः अङ्गाराः क्षारस्थाने हिमरजतनुमास्तूपरत्नप्रकाशम् / पाताले ये च भूम्यां गिरिशिखरगता ये च वित्ताः समन्ताद् बुद्धानां ये च विम्बाः प्रतिदिनसुकृतस्तान् नमस्यामि बुद्धान् // BuSto_22.5

श्री चैत्यवन्दना समाप्ता //

digital sanskrit buddhist canon, stotra section, text no. 23: cakrasaṃvarastutiḥ (herukaviśuddhistotraṃ vā)

ओम् नमः श्रीचक्रसंवराय

श्रीहेरुकं महावीरं चक्रसंवरसंवरम् / नमामि मारजेतारं डाकिनीजालमा(ना)यकम् // BuSto_23.1

वन्दे तां वज्रवाराहीं महारागानुरूपिणीम् / डाकिनीं च तथा लामां खण्डरोहां च रूपिणीम् // BuSto_23.2

चत्वारो(त्वरे ऽ)मृतभाण्डां च बोधिचित्तेन पूरिताम् / पुल्लीरमलयशिरसि प्रचण्डां वज्रडाकिनीम् // BuSto_23.3

जालन्धरशिखां चैव चण्डाक्षीं गतकिल्विषाम् / ओडियानाह्वये सर्वे श्रोत्रे देवीं प्रभावतीम् // BuSto_23.4

अर्बुदे पृष्ठवंशे तु महानासां नमाम्यहम् / गोदावरीं पुरे वामे कर्णे वीरमतीं शुभाम् // BuSto_23.5

रामेश्वरीं भ्रुवोर्मध्ये खर्वरीं वरवर्णिनीम् / देवीकोट्टे स्थितां मैत्रे श्रीमल्लङ्केश्वरीप्रभाम् // BuSto_23.6

मालवे स्कन्धदेशे तु द्रुमच्छायां नमाम्यहम् / कामरूपे कक्षद्वये देवीमैरावतीं शुभाम् // BuSto_23.7

ओड्रे स्तनद्वये वापि श्रीमहाभैरवां सतीम् / त्रिशकुन्याह्वये नाभौ वायुवेगां मनोरमाम् // BuSto_23.8

कोशले नासिकाग्रे वा सुराभक्षीं नमाम्यहम् / कलिङ्गे वदने रम्ये श्यामादेवीं सनातनीम् // BuSto_23.9

लम्पाके कण्ठदेशे तु सुभद्रां वरसुन्दरीम् / काञ्चीप्रेतहृदये हयकर्णां मनोरमाम् // BuSto_23.10

हिमालये पुरे मेढ्रे नमस्यामि खगाननाम् / प्रेतपुर्यां तथा लिङ्गे कौबेर्यां शस्यनीश्वरीम् // BuSto_23.11

गृहदेवता गुदे स्थाने खण्डरोहां मनोहराम् / सौराष्ट्रे ऊरुयुगले शौण्डिनो सुखदायिनीम् // BuSto_23.12

सुवर्णद्वीपे जंघायां संस्थितां चक्रवर्मिणीम् / नगरे चाङ्गुलीस्थाने सुवीरां वरयोगिनीम् // BuSto_23.13

सिन्धौ च पादयोः पृष्ठे स्थितां देवीं महाबलाम् / मरौ चाङ्गुष्ठयुगले च संस्थितां चक्रवर्तिनीम् // BuSto_23.14

कुलताजानुद्वये देवीं महावीर्या नमाम्यहम् / खण्डकपालवीराद्यां स्वप्रज्ञाशिष्टविग्रहाम् // BuSto_23.15

मम भक्त्या महावीरां कायवाकचित्तचक्रगाम् / काकतुण्डीमुलूकास्यां श्वानास्यां शूकराननाम् // BuSto_23.16

यमदाढीं यमदूतीं यमदंष्ट्रीं यमान्तिकाम् / एता देवीर्नमस्यामि दिग्विदिक्षु च संस्थिताः // BuSto_23.17

वीरवीरेश्वरीनाथं हेरुकं परमेश्वरम् / स्तुत्वेदं देवतीचक्रं यन्मयोपार्जितं शुभम् // तेन पुण्येन लोको ऽस्तु वज्रडाको जगद्गुरुः // BuSto_23.18

श्रीचक्रसंवरस्य स्तुतिः समाप्ता //

digital sanskrit buddhist canon, stotra section, text no. 24: caṇḍikādaṇḍakastotram

ओम् नमः श्रीचण्डिकायै ऊं ऊं ऊं उग्रचण्डं चचकितचकितं चंचरा(ला) दुर्गनेत्रं हूं हूं हूंकाररूपं प्रहसितवदनं खङ्गपाशान् धरन्तम् / दं दं दं दण्डपाणिं डमरुडिमिडिमां डण्डमानं भ्रमन्तं भ्रं भ्रं भ्रं भ्रान्तनेत्रं जयतु विजयते सिद्धिचण्डी नमस्ते // BuSto_24.1

घ्रं घ्रं घ्रं घोररूपं घुघुरितघुरितं घर्घरीनादघोषं हुं हुं हुं हास्यरूपं त्रिभुवनधरितं खेचरं क्षेत्रपालम् / भ्रूं भ्रूं भ्रूं भूतनाथं सकलजनहितं तस्य देहा (?) पिशाचं हूं हूं हूंकारनादैः सकलभयहरं सिद्धिचण्डी नमस्ते // BuSto_24.2

व्रं व्रं व्रं व्योमघोरं भ्रमति भुवनतः सप्तपातालतालं क्रं क्रं क्रं कामरूपं धधकितधकितं तस्य हस्ते त्रिशूलम् / द्रुं द्रुं द्रुं दुर्गरूपं भ्रमति च चरितं तस्य देहस्वरूपं मं मं मं मन्त्रसिद्धं सकलभयहरं सिद्धिचण्डी नमस्ते // BuSto_24.3

झं झं झंकाररूपं झमति झमझमा झंझमाना समन्तात् कं कं कंकालधारी धुधुरितधुरितं धुन्धुमारी कुमारी / धूं धूं धूं धूम्रवर्णा भ्रमति भुवनतः कालपास्त्रिशूलं तं तं तं तीव्ररूपं मम भयहरणं सिद्धिचण्डी नमस्ते // BuSto_24.4

रं रं रं रायरुद्रं रुरुधितरुधितं दीर्घजिह्वाकरालं पं पं पं प्रेतरूपं समयविजयिनं सुम्भदम्भे निसुम्भे / संग्रामे प्रीतियाते जयतु विजयते सृष्टिसंहारकारी ह्रीं ह्रीं ह्रींकारनादे भवभयहरणं सिद्धिचण्डी नमस्ते // BuSto_24.5

हूंकारी कालरुपी नरपिशितमुखा सान्द्ररौद्रारजिह्वे हूंकारी घोरनादे परमशिरशिखा हारती पिङ्गलाक्षे / पङ्के जाताभिजाते चुरु चुरु चुरुते कामिनी काण्डकण्ठे कङ्काली कालरात्री भगवति वरदे सिद्धिचण्डी नमस्ते // BuSto_24.6

ष्ट्रीं ष्ट्रीं ष्ट्रींकारनादे त्रिभुवननमिते घोरघोरातिघोरं कं कं कं कालरूपं घुघुरितघुरितं घुं घुमा बिन्दुरूपी / धूं धूं धूं धूम्रवर्णा भ्रमति भुवनतः कालपाशत्रिशूलं तं तं तं तीव्ररूपं मम भयहरणं सिद्धिचण्डी नमस्ते // BuSto_24.7

झ्रीं झ्रीं झ्रींकारवृन्दे प्रचरितमहसा वामहस्ते कप्ःलं खं खं खं खङ्गहस्ते डमरुडिमडिमां मुण्डमालासुशोभाम् / रुं रुं रुं रुद्रमालाभरणविभूषिता दिर्घजिह्वा कराला देवि श्री उग्रचण्डी भगवति वरदे सिद्धिचण्डी नमस्ते // BuSto_24.8

आरुणवर्णसङ्काशा खड्गफेटकबिन्दुका / कामरूपी महादेवी उग्रचण्डी नमो ऽस्तुते // BuSto_24.9

श्री चण्डिकादण्डकस्तोत्रं समाप्तम् //

digital sanskrit buddhist canon, stotra section, text no. 25: catuḥṣaṣṭisaṃvarastotram

श्रीहेरुकं महावीरं विशुद्धं कुलिशेश्वरम् / नमामि सर्वभावेन डाकिनीगणभूषितम् // BuSto_25.1

संवराय नमस्तुभ्यं द्वयाकाराय नमो नमः / चक्रस्थिताय देवाय चक्रसंवर ते नमः // BuSto_25.2

मेषवक्त्र नमस्ते ऽस्तु शिवशक्तिस्वरूपिणे / महाक्रोधस्वरूपाय मेषसंवर ते नमः // BuSto_25.3

अश्वाननाय देवाय रतिकर्मरताय च / भुक्तिमुक्तिप्रदात्रे च अश्वसंवर ते नमः // BuSto_25.4

व्याघ्रास्याय नमस्तुभ्यं शक्तियुक्ताय वै नमः / सुरामांसरतो नित्यं व्याघ्रसंवर ते नमः // BuSto_25.5

कूर्मास्याय नमस्तुभ्यं सुरते संरताय च / नमो देवाधिदेवाय कूर्मसंवर ते नमः // BuSto_25.6

नमामि मत्स्यवक्त्राय मानवानां हिताय वै / नमो नमस्ते देवेश मत्स्यसंवर ते नमः // BuSto_25.7

मकराकारवक्त्राय महाशक्तिधराय च / मनोवाञ्छाप्रदात्रे च मकरसंवर ते नमः // BuSto_25.8

संवरायोष्ट्रवक्त्राय शक्तिकालिङ्गणाय च / मैथुने तत्परायाथ उष्ट्रसंवर ते नमः // BuSto_25.9

नमामि गजवक्त्राय योनौ लिङ्गप्रदाय च / नमो भगवते तुभ्यं गजसंवर ते नमः // BuSto_25.10

मण्डूकानननाथाय त्रैलोक्येशाय ते नमः / नमो देवाधिदेवाय मण्डूकसंवराय च // BuSto_25.11

नमामि चाविवक्त्राय नित्यं रतिरताय च / नमस्ते देवदेवेश अहिसंवर ते नमः // BuSto_25.12

शुकाननाय देवाय द्वयाकाराकारशोभिने / नमो नमस्ते भीमाङ्ग शुकसंवर ते नमः // BuSto_25.13

संवराय नमस्ते ऽस्तु शक्तियुक्ताय वै नमः / सिंहाननाय वै नित्यं सिंहसंवर ते नमः // BuSto_25.14

मर्कटाननदेवाय शक्तिचुम्बनरताय च / नमस्ते ऽस्तु नमस्ते ऽस्तु हरिसंवर ते नमः // BuSto_25.15

श्वानवक्त्र नमस्ते ऽस्तु शक्तिचुम्बनकारिणे / नमस्ते भगवन् देव श्वानसंवर ते नमः // BuSto_25.16

वराहास्यवरेवान भगक्रीडनकारक / नमामि शक्तियुक्ताय घृष्टिसंवर ते नमः // BuSto_25.17

जम्बुकास्याय देवाय शक्तिकालिङ्गणाय च / सर्वपापहरायैव शिवासंवर ते नमः // BuSto_25.18

नमामि गृध्रवक्त्राय दुःखनाशाय ते नमः / द्वयाकारसिद्धिदेवाय गृध्रसंवर ते नमः // BuSto_25.19

काकाननाय शुद्धयक्ष शृङ्गाररूपधारिणे / नमो भगवते तुभ्यं काकसंवर ते नमः // BuSto_25.20

उलूकवक्त्रिणे तुभ्यं महासौख्यप्रदाय च / योनिमैथुनकृद्देवोलूकसंवर ते नमः // BuSto_25.21

तार्क्ष्याननाय देवाय तारिणे भवसागरात् / नमस्तुभ्यं नमस्तुभ्यं नमो गरुडसंवर // BuSto_25.22

गोवक्त्राय नमस्तुभ्यं गोहत्यापापहारिणे / गोत्रवृद्धिप्रदात्रे च धेनुसंवर ते नमः // BuSto_25.23

गर्दभाकारवक्त्राय गतागतक्षयाय ते / गणेश्वराय देवाय खरसंवर ते नमः // BuSto_25.24

महिषास्याय देवाय महाप्रलयकारिणे / शक्तियुक्ताय देवाय नमओ महिषसंवर // BuSto_25.25

विडालास्य नमस्तुभ्यं मूत्रकूण्डप्रक्रीडिने / श्रेष्ठाय परमेशाय नमो मार्जारसंवर // BuSto_25.26

नमामि शाल्ववक्त्राय द्वयङ्गमेकेव शोभितम् / नमामि देवदेवेश नमः शरभसंवर // BuSto_25.27

सिद्धाय सिद्धरूपाय गुणाय गुणवर्तिने / क्रौञ्चास्याय नमस्तुभ्यं क्रौञ्चसंवर ते नमः // BuSto_25.28

उल्काननाय शुद्धाय उत्तमाय नमो नमः / उग्राय भीमरूपाय उल्कसंवर ते नमः // BuSto_25.29

हंसवक्त्र नमस्ते ऽस्तु हंसस्वरस्वरूपिणे / हंसःसो ऽहंस्वरूपाय हंससंवर ते नमः // BuSto_25.30

मृगवक्त्राय देवाय नमामि परमेश्वर / ऋद्धिसिद्धिप्रदात्रे च मृगसंवर ते नमः // BuSto_25.31

शक्तियुक्त नमस्ते ऽस्तु चक्रवाकाननाय च / नमस्ते चकवाकाख्यसंवराय नमो नमः // BuSto_25.32

अजाननाय वीराय अविद्यानाशिने नमः / अपवर्गफलाप्त्यर्थमजसंवर ते नमः // BuSto_25.33

कुक्कुटास्याय देवाय कुलवृद्धिकराय च / नमस्ते कौटुकेशाय तुभ्यं कुक्कुटसंवर // BuSto_25.34

कृष्णसारसवक्त्राय नमस्ते कर्मसम्भव / कालनाशाय देवाय एणसंवर ते नमः // BuSto_25.35

मूषाननाय पूर्णाय ज्ञानदाय नमो नमः / सर्वदैत्यविनाशय मूषसंवर ते नमः // BuSto_25.36

सालूकास्य नमस्ते ऽस्तु मानादिवरदाय च / सिद्धिबुद्धिप्रदात्रे च नमः सालूकसंवर // BuSto_25.37

नमः कपोलवक्त्राय प्रज्ञोपायात्मरूपिणे / नमस्ते ऽस्तु महावीर कपोतसंवराय च // BuSto_25.38

नमामि ग्राहवक्त्राय भुक्तिमुक्तिप्रदाय च / नमो ऽस्तु सर्वभूतेश ग्राहसंवर ते नमः // BuSto_25.39

नमस्ते चिह्लवक्त्राय नमस्ते मैथुने रत / नमस्ते भगवन् देव चिह्लसंवर ते नमः // BuSto_25.40

चटकास्याय देवाय नमस्ते ऽस्तु जगद्गुरो / नमस्ते ऽस्तु गुणाधीश चटकसंवर ते नमः // BuSto_25.41

सारसास्य नमस्तुभ्यं नमस्ते गुणसागर / नमो भगवते तुभ्यं सारससंवराय च // BuSto_25.42

खञ्जनास्याय देवाय महादेवाय ते नमः / निर्वाणपददात्रे खञ्जरीटसंवराय च // BuSto_25.43

नमस्ते क्षेमकर्यास्य भुक्तिमुक्तिप्रदाय च / नमो भगवते देव क्षेमकरिसंवराय ते // BuSto_25.44

शशकास्य नमस्तुभ्यं नमस्ते भुवनेश्वर / कर्मप्रदाय ते नित्यं नमः शशकसंवर // BuSto_25.45

नमो भल्लूकवक्त्राय रतिक्रीडापराय च / कार्यसिद्धिप्रदात्रे च नमो भल्लूकसंवर // BuSto_25.46

पिकास्याय नमस्तुभ्यं मन्त्रसिद्धिकराय च / त्रिलोकेशाय सर्वाय पिकसंवर ते नमः // BuSto_25.47

नमामि वकवक्त्राय शक्तियुक्तगणाधिप / नमामि देवदेवेश वकसंवर ते नमः // BuSto_25.48

खङ्गिवक्त्राय देवाय सर्वदा शिरसा नमः / नमो ऽस्तु परमेशाय खङ्गिसंवर ते नमः // BuSto_25.49

कर्कटास्य नमस्तुभ्यं नमः संसारहेतवे / पापपुञ्जविनाशाय नमः कर्कटसंवर // BuSto_25.50

नमः शल्लकिवक्त्राय सर्वदोषनिवारिणे / संसारपाशनाशाय नमः शल्लकिसंवर // BuSto_25.51

वृश्चिकास्य नमस्तुभ्यं बलकल्याणदाय च / नमो नमस्ते देवाय नमो वृश्चिकसंवर // BuSto_25.52

अलिवक्त्राय देवाय अलिमोदाय ते नमः / अलिलोकविनाशाय अलिसंवर ते नमः // BuSto_25.53

जाहकास्य नमस्ते ऽस्तु जनमोहकृताय वै / जयकल्याणदात्रे च नमो जाहकसंवर // BuSto_25.54

चमरीवक्त्र ते नित्यं चातुर्यफलदायिने / चतुर्वर्गप्रदात्रे च नमश्चमरिसंवर // BuSto_25.55

सीम्निवक्त्रनमस्तुभ्यं सिद्धित्वफलदायिने / नमो भगवते नित्यं सीम्निसंवर ते नमः // BuSto_25.56

नमामि गोधवक्त्राय नमस्ते भीमविक्रम / नमस्ते दिव्यनेत्राय गोधासंवर ते नमः // BuSto_25.57

चकोरास्य नमस्तुभ्यं चाञ्चल्यदोषनाशक / नमो भगवते तुभ्यं चकोरसंवराय च // BuSto_25.58

गोधिकास्याय सततं सृष्टिसंहारकरिणे / नमस्ते परमानन्द गोधिकासंवराय च // BuSto_25.59

मधुमाक्षिकवक्त्राय नमस्ते मानदायक / सर्वज्ञाय परेशाय नमो माक्षिकसंवर // BuSto_25.60

पतङ्गवक्त्र ते नित्यं परमेश नमः सदा / दिव्याय दिवसेशाय नमः पतङ्गसंवर // BuSto_25.61

नरवक्त्राय देवाय नरकध्नाय ते नमः / नानारूपदधानाय नरसंवर ते नमः // BuSto_25.62

सृष्टिरूप जगद्धाम सृजते सर्वभूतकम् / नमो नमस्ते सततं सृष्टिसंवर ते नमः // BuSto_25.63

स्थितिरूपाय देवाय गुणाय गुणवर्तिने / नमः सारविनाशाय स्थितिसंवर ते नमः // BuSto_25.64

सर्वलोकस्य संहारकर्त्रे ते परमेश्वर / तस्मादहं नमस्यामि नमः प्रलयसंवर // BuSto_25.65

ज्योतिर्वक्त्र परं धाम नमस्ते जगदीश्वर / परात्परतरं सूक्ष्म ज्योतिःसंवर ते नमः // BuSto_25.66

इतीदं संवरस्तोत्रं त्रिषु लोकेषु दुर्लभम् / परात्परतरं स्तोत्रं चतुःषष्टिप्रमाणकम् // BuSto_25.67

चतुःषष्टिप्रमाणेषु आद्यमाद्यं तु वक्त्रितम् / भूयो ग्रन्थमयाच्चात्र आद्यमात्रं प्रचोदितम् // BuSto_25.68

कन्यार्थी लभते कन्यां धनार्थी लभते धनम् / विद्यार्थी लभते विद्यां मोक्षार्थी मोक्षमाप्नुयात् // BuSto_25.69

वशीकरणमुच्चाटं मारमोहनस्तम्भनम् / आकर्षणं च विद्वेषं धातुवादं रसायनम् // BuSto_25.70

गुटिकां पादुकासिद्धिं खङ्गसिद्धिं तथैव च / खेचरीसिद्धि वैद्याङ्गं मन्त्रसिद्धिं च वाक्पटुः // BuSto_25.71

परकायप्रवेशं च द्रव्याकर्षणमेव च / लभते स्तोत्रराजेन सत्यं सत्यं मयोदितम् // BuSto_25.72

दुर्भिक्षं चापदि पाठं कुरुते शुभमाप्नुयात् / अतिवृष्टावनावृष्टौ महामारीसमुद्भवे // BuSto_25.73

राज्यभ्रंशे ज्ञानभ्रंशे स्त्रीभ्रंशे च धनक्षये / कलहे च विवादे च पठते स्तोत्रमुत्तमम् // BuSto_25.74

भिक्षुकेभ्यः सहस्रेभ्यः तुल्यं दानकृतं फलम् / बहुनात्र किमुक्तेन ब्रह्माण्डदानजं फलम् // BuSto_25.75

श्रीसंवरागमे महातन्त्रे अमिताभवैरोचनसंवादे श्रीचक्रसंवरादिचतुःषष्टिसंवरस्तोत्रं समाप्तम् //

digital sanskrit buddhist canon, stotra section, text no. 26: daśabhūmīśvaro nāma mahāyānasūtraratnarājastotram

शमदमनिरतानां शान्तदान्ताशयानां खगपथसदृशानामन्तरीक्षसमानाम् / खिलमलविधुतनां मार्गज्ञानस्थितानां शृणुत वरविशेषं बोधिसत्त्वांश्च श्रेष्ठान् // BuSto_26.1

कुशलसतसहस्रं संचितं कल्पकोटया सुबुद्धशतसहस्रं पूजयित्वा गृहीतम् / प्रत्येकजिनवरान्वै पूजयित्वा त्वनन्तान् सकलजगहिताय जायते बोधिचित्तम् // BuSto_26.2

उत तपतपितानां क्षान्तिपारंगतानां हृतश्रितचरितानां पुण्यज्ञानोद्गतानाम् / विपुलगतिमतीनां पुण्यज्ञानाशयानां दशबलसमतुल्यं जायते बोधिचित्तम् // BuSto_26.3

प्रमुदितसुमतीनां दानधर्मे रतानां सकलजगहितार्थं नित्यमेवोद्यतानाम् / जिनगुणनिरतानां सत्त्वरक्षाव्रतानां त्रिभुवनहितकर्तृ जायते बोधिचित्तम् // BuSto_26.4

अकुशलविरतानां शुद्धमार्गे स्थितानां व्रतनियमरतानां शान्तसौम्येन्द्रियाणाम् / जिनशरणगतानां बोधिचर्याशयानां त्रिभुवनहितसाध्यं जायते बोधिचित्तम् // BuSto_26.5

अनुगतकुशलानां क्षान्तिस्वारस्यभाजां विदितगुणरसानां त्यक्तमानोत्सवानाम् / निहितशुभमतीनां दानसौम्याशयानां सकलहितविधानं जायते बोधिचित्तम् // BuSto_26.6

प्रचलति शुभकार्ये धीरवीर्याः सहाया निखिलजनहितार्थं प्रोद्यते मानसिंहः / अविरतगुणसाध्या निर्जितक्लेशसंधा झटिति मनसि तेषां जायते बोधिचित्तम् // BuSto_26.7

सुसमवहितचित्ता ध्वस्तमोहान्धकारा विगलितमदमाना त्यक्तसंक्लिष्टमार्गाः / समसुखनिरता ये त्यक्तसंसारसंगा झटिति मनसि तेषां जायते बोधिचित्तम् // BuSto_26.8

विमलखसमचित्ता ज्ञानविज्ञानविज्ञा निहतनमुचिमारा वान्तक्लेशाभिमानाः / जिनपदशरणस्था लब्धतत्त्वार्थकाये सपदि मनसि तेषां जायते बोधिचित्तम् // BuSto_26.9

त्रिभुवनशिवसाध्योपायविज्ञानधीराः करिबलपरिहारोपायविदृद्धिमन्तः / सुगतगुणसमीहा ये च पुण्यानुरागा सपदि मनसि तेषां जायते बोधिचित्तम् // BuSto_26.10

त्रिभुवनहितकामा बोधिसंभारपूर्त्यै प्रणिहितमनसा ये दुष्करे ऽपि चरन्ति / अविरतशुभकर्म प्रोद्यतां बोधिसत्त्वाः सपदि मनसि तेषां जायते बोधिचित्तम् // BuSto_26.11

दशबलगुणकामा बोधिचर्यानुरक्ता विजितकरिबलौघास्त्यक्तमानानुषङ्गाः / अनुगतशुभमार्गा लब्धधर्मार्थकामा झटिति मनसि तेषां जायते बोधिचित्तम् // BuSto_26.12

इति गणितगुणांशा बोधिचर्याश्चरन्तु जिनपदप्रणिधाना सत्समृद्धिं लभन्तु / त्रिभुवनपरिशुद्धा बोधिचित्तं लभन्तु त्रिशरणपरिशुद्धा बोधिसत्त्वा भवन्तु // BuSto_26.13

दशपारमिताः पूर्य दशभूमीश्वरो भवेत् / भूयो ऽपि कथ्यते ह्येतच्छृणुतैवं समासतः // BuSto_26.14

बोधिचित्तं यदासाद्य संप्रदानं करोति यः / तदा प्रमुदितां प्राप्तो जम्बूद्वीपेश्वरो भवेत् // BuSto_26.15

तत्रस्थः पालयेत् सत्त्वान् यथेच्छप्रतिपादनैः / स्वयं दाने प्रतिष्ठित्वा परांश्चापि नियोजयेत् // BuSto_26.16

सर्वान् बोधौ प्रतिष्ठाप्य संपूर्णदानपारगः / एतत्कर्मानुभावेन संवरं समुपाचरेत् // BuSto_26.17

सम्पच्छीलं समाधाय संवरं कुशली भवेत् / ततः स विमलां प्राप्तश्चातुर्द्वीपेश्वरो भवेत् // BuSto_26.18

तत्रस्थः पालयेत् सत्त्वानकुशलं निवारयेत् / स्वयं शीले प्रतिष्ठित्वा परांश्चापि नियोजयेत् // BuSto_26.19

सर्वान् बोधौ प्रतिष्ठाप्य सम्पूर्णकुशली भवेत् / एतद्धर्मविपाकेन क्षान्तिव्रतमुपाश्रयेत् // BuSto_26.20

सम्यक् क्षान्तिव्रतं धृत्वा क्षान्तिभृत् कुशली भवेत् / ततः प्राभाकरीं प्राप्तस्त्रयस्त्रिंशाधिपो भवेत् // BuSto_26.21

तत्रस्थः पालयेत् सत्वान् क्लेशमार्गनिवारणैः / स्वयं क्षान्तिव्रते स्थित्वा परांश्चापि नियोजयेत् // BuSto_26.22

सत्त्वान् बोधौ प्रतिष्ठाप्य शान्तिपारंगतो भवेत् / एतत्पुण्यविपाकेन वीर्यबलमुपाश्रयेत् // BuSto_26.23

सम्यग् वीर्यं समाधाय वीर्यभृत्कुशली भवेत् / ततश्चार्चिष्मतीं प्राप्य सुधामाधिपतिर्भवेत् // BuSto_26.24

तत्रस्थः पालयन् सर्वान् कुदृष्टीः संनिवारयेत् / सम्यग्दृष्टौ प्रतिष्ठाय बोधयित्वा प्रयत्नतः // BuSto_26.25

स्वयं ध्यानव्रते स्थित्वा परांश्चापि नियोजयेत् / सर्वान् बोधौ प्रतिष्ठाप्य ध्यानपारंगतो भवेत् // BuSto_26.26

एतत्पुण्यविपाकेन ध्यानपारं समारभेत् / सर्वक्लेशान् विनिर्जित्य समाधिसुस्थितो भवेत् // BuSto_26.27

सम्यग्ध्यानं समाधाय समाधिकुशली भवेत् / ततः सुदुर्जयां प्राप्तः स तुषिताधिपो भवेत् // BuSto_26.28

तत्रस्थः पालयेत्सत्त्वांस्तीर्थ्यमार्गनिवारणैः / सत्त्वधर्मं प्रतिष्ठाप्य बोधयित्वा प्रयत्नतः // BuSto_26.29

स्वयं ध्यानव्रते स्थित्वा परांश्चापि नियोजयेत् / सर्वान् बोधौ प्रतिष्ठाप्य ध्यानपारंगतो भवेत् // BuSto_26.30

एतत्पुण्यविपाकेन प्रज्ञाव्रतमुपाश्रयेत् / सर्वान्मारान् विनिर्जित्य प्रज्ञाभिज्ञासमृद्धिमान् // BuSto_26.31

सम्यक् प्रज्ञां समाधाय स्वाभिज्ञाकुशली भवेत् / ततश्चाभिमुखीं प्राप्तः सुनिर्मिताधिपो भवेत् // BuSto_26.32

तत्रस्थः पालयेत् सत्त्वानभिमाननिवारणैः / शून्यतां सुप्रतिष्ठाप्य बोधयित्वा प्रयत्नतः // BuSto_26.33

स्वयं प्रज्ञाव्रते स्थित्वा परांश्चापि नियोजयेत् / सर्वान् बोधौ प्रतिष्ठाप्य प्रज्ञापारंगतो भवेत् // BuSto_26.34

एतत्पुण्यविपाकैश्च समुपायव्रतं चरेत् / सर्वदुष्टान् विनिर्जित्य सद्धर्मकुशली सुधीः // BuSto_26.35

समुपायविधानेन सत्त्वान् बोधौ नियोजयेत् / ततो दूरङ्गमां प्राप्तो वशवर्तीश्वरो भवेत् // BuSto_26.36

तत्रस्थः पालयेत्सत्त्वानभिसमयबोधनैः / बोधिसत्त्वनियामेषु प्रतिष्ठाय प्रबोधयेत् // BuSto_26.37

तत्रोपाये स्वयं स्थित्वा परांश्चापि नियोजयेत् / सर्वान् बोधौ प्रतिष्ठाप्य उपायपारगो भवेत् // BuSto_26.38

एतत्पुण्यानुभावश्च सुप्रणिधीनुपाश्रयेत् / मिथ्यादृष्टिं विनिर्जित्य सम्यग्दृष्टिः कृतो बुधैः // BuSto_26.39

सुप्रतिष्ठितचित्तेन सम्यग्बोधौ प्रतिष्ठितः / ततश्चाप्यचलां प्राप्तो बुद्धया साहस्रिकाधिपः // BuSto_26.40

तत्रस्थः पालयेत्सत्त्वान् त्रिपानं संपिबेत् शनैः / लोकधातौ परिज्ञाने प्रतिष्ठाप्य प्रबोधयेत् // BuSto_26.41

सुप्रणिधौ स्वयं स्थित्वा परांश्चापि नियोजयेन् / सर्वान् बोधौ प्रतिष्ठाप्य प्राणिषु पारगो भवेत् // BuSto_26.42

एतत्पुण्यानुसारैश्च बलव्रतमुपाश्रयेत् / सर्वदुष्टान् विनिर्जित्य सम्बोधिकृतनिश्चयः // BuSto_26.43

सम्यग्यत्नसमुत्साहैः सर्वतीर्थ्यान् विनिर्जयेत् / ततः साधुमतीं प्राप्तो महाब्रह्मा भवेत् कृती // BuSto_26.44

तत्रस्थः पालयन् सत्त्वान् बुद्धयानोपदेशनैः / सत्त्वासमपरिज्ञाने सम्यग्बोधौ प्रबोधयेत् // BuSto_26.45

स्वयं बले प्रतिष्ठित्वा परांश्चापि नियोजयेत् / सर्वान् बोधौ प्रतिष्ठाप्य बलपारंगतो भवेत् // BuSto_26.46

एतत्पुण्यविपाकैश्च ज्ञानव्रतमुपाश्रयेत् / चतुर्मारान् विनिर्जित्य बोधिसत्त्वगुणाकरः // BuSto_26.47

सम्यग्ज्ञानं समाधाय सद्धर्मकुशलो भवेत् / धर्ममेघां ततः प्राप्तो महेश्वरो भवेत् कृती // BuSto_26.48

तत्रस्थः पालयन् सर्वान् सर्वाकारानुबोधनैः / सर्वाकारवरे ज्ञाने प्रतिष्ठाप्य प्रबोधयेत् // BuSto_26.49

स्वयं ज्ञाने प्रतिष्ठित्वा परांश्चापि नियोजयेत् / सर्वान् बोधौ प्रतिष्ठाप्य ज्ञानपारंगतो भवेत् // BuSto_26.50

एतत्पुण्यानुभावैश्च दशभूमीश्वरो जिनः / सर्वाकारगुणाधारः सर्वज्ञो धर्मलाभवित् // BuSto_26.51

इति मत्वा भुवभिश्च सम्बुद्धपदलब्धये / दशपारमितारूपे चरितव्यं समाहितैः // BuSto_26.52

तथा बोधिं शिवां प्राप्य चतुर्मारान् विनिर्जयेत् / सर्वान् बोधौ प्रतिष्ठाप्य निर्वृतिं समवाप्स्यथ // BuSto_26.53

एतज्ज्ञात्वा परिच्छायां चरध्वं बोधिशासने / निर्विध्नं बोधिमासाद्य लभध्वं सौगतं पदम् // BuSto_26.54

एतास्ता खल्वाह जिनपुत्रो दशबोधिसत्त्वभूमयः समासतो निर्दिष्टाः सर्वाकारवरोपेताः सर्वज्ञानानुगता द्रष्टव्याः / तस्यां वेलायामयं त्रिसाहस्रलोकधातुषड्विकारं प्राकम्पत विविधानि च पुण्यानि वियत्तो न्यपतन् / दिव्यमानुषकाणि च भूतानि संप्रवादितान्यभूवन्, अनुमोदनांशगेन च यावदकनिष्ठभुवनं विज्ञप्तमभूत् //

श्रीबोधिसत्त्वचर्याप्रस्थानाद् दशभूमीश्वरो नाम महायानसूत्ररत्नराजस्तोत्रं समाप्तम् //

digital sanskrit buddhist canon, stotra section, text no. 27: dharmadhātunāmastavaḥ

वं कारं वज्रसत्त्वं च वज्रासनसदास्थितम् / वारुणमण्डलव्यापि वैरोचन नमो ऽस्तु ते // BuSto_27.1

अकारमादिस्वभावमाकाशे व्यापितं तथा / अर्कनीलसमस्तेज अक्षोभ्यश्री नमो ऽस्तु ते // BuSto_27.2

रकारं लक्ष्मीस्वभावं नानारत्नमनेकधा / रं व्यापितं च पृथ्वीं रत्नसंभव नमो ऽस्तु ते // BuSto_27.3

अकारमस्थिरं भावं पद्मनागसमप्रभम् / अग्नितेजःसमाधिस्थं अमिताभ नमो ऽस्तु ते // BuSto_27.4

अकारं तत्स्वभावं च गन्धवाहसमप्रभम् / अकारविश्ववज्रं च अमोधसिद्धि नमो ऽस्तु ते // BuSto_27.5

धकारं धर्मस्वभावं धर्मसंघस्वरूपकम् / धात्वष्टकं कीर्तितं च धर्मधातु नमो ऽस्तु ते // BuSto_27.6

सकारं सर्वसम्पत्तिः सर्वमङ्गलमर्थनम् / सर्वसिद्धिस्त्वमेवाथ सिद्धिवज्र नमो ऽस्तु ते // BuSto_27.7

श्री धर्मधातुनामस्तवः समाप्तः //

digital sanskrit buddhist canon, stotra section, text no. 28: dharmadhātuvāgīśvaramaṇḍalastotram

मञ्जुश्रियं महावीरं सर्वमारविनाशनम् / सर्वसिद्धीश्वरं नाथं वागीश्वरं नमाम्यहम् // BuSto_28.1

मञ्जुघोषं महावीरं सर्वमारविनाशनम् / सर्वाकारप्रदातारं धर्मधातुं नमाम्यहम् // BuSto_28.2

महोष्णीषं सितच्छत्रं तेजोराशिं जयोदितम् / विकिरणोद्गतं चैव महोग्रतेजसं नमे // BuSto_28.3

अक्षोभ्यं च महाबोधिं वज्रसत्त्वं नमाम्यहम् / वज्रराजं वज्ररागं वज्रसाधुं नमाम्यहम् // BuSto_28.4

श्रीरत्नसम्भवं नाथं वज्ररत्नं नमाम्यहम् / वज्रसूर्यं वज्रकेतुं वज्रहासं नमे सदा // BuSto_28.5

अमिताभं महाराजं वज्रधर्मं नमाम्यहम् / वज्रतीक्ष्णं महाकेतुं वज्रभाषं नमे नमे // BuSto_28.6

अमोघसिद्धिं सिद्धेशं वज्रकर्म नमाम्यहम् / वज्ररक्षं वज्रयक्षं वज्रसन्धिं नमे सदा // BuSto_28.7

लोचनाख्यां महादेवीं पाण्डराख्यां नमाम्यहम् / मामकीं चैव देवीं तां तारादेवीं नमे नमे // BuSto_28.8

वज्राङ्कुशं महावीरं वज्रपाशं महत्प्रभम् / वज्रस्फोटः महानाथं वज्रावेशं नमे नमे // BuSto_28.9

अधिमुक्तीश्वरीं भूमिं प्रमुदितां नमाम्यहम् / विमलाख्यां महाभूमिं प्रभाकरीं नमे नमे // BuSto_28.10

अर्चिष्मतीं सुदुर्जयां चाभिमुखीं नमाम्यहम् / दूरङ्गमामचलाख्यां साधुमतीश्वरीं नमे // BuSto_28.11

धर्ममेघां महामेघां समताख्यां प्रभां नमे / रत्नपारमितां देवीं दानपारमितां नमे // BuSto_28.12

शीलपारमितां देवीं क्षान्तिपारमितां नमे / वीर्यपारमितां देवीं ध्यानपारमितां श्रये // BuSto_28.13

प्रज्ञापारमितां देवीम् उपायाख्यं नमाम्यहम् / प्रणिधानबलं चैव ज्ञानपारमितां सदा // BuSto_28.14

कर्मपारमितां देवीं नमामि सततं तथा / आयुश्चित्तपरिष्कारं कर्मोपपत्तिकां नमे // BuSto_28.15

ऋद्ध्याख्यामधिमुक्तिं च प्रणिधानां नमाम्यहम् / ज्ञानाख्यवशितां देवीं धर्माख्यवशितां नमे // BuSto_28.16

तथतां च महादेवीं बुद्धबोधिं नमाम्यहम् / वसुमतीं महालक्ष्मीं रत्नज्वालां नमे नमे // BuSto_28.17

उष्णीषविजयां देवीं मारीचीं पर्णशाबरीम् / जाङ्गुलिं धारणीं वन्दे अनन्तमुखधारणीम् // BuSto_28.18

चुन्दां प्रज्ञां च पद्मां च सर्वावरणशोधनीम् / अक्षयज्ञानकारण्डं धर्मकायवतीं नमे // BuSto_28.19

धर्मप्रतिविदं देवमर्थं च प्रतिसंविदम् / निरुक्तिसंविदं देवं प्रतिभानाख्यसंविदम् // BuSto_28.20

वज्रलास्यां वज्रमालां वज्रगीतां नमे सदा / वज्रनृत्यां महादेवीं नमामि सततं मुदा // BuSto_28.21

समन्तभद्रं बोधीशमक्षयतां मतिं नमे / क्षितिगर्भं खगर्भं च बोधिसत्त्वं नमाम्यहम् // BuSto_28.22

गगणगञ्जनाथेशं रत्नपाणिं नमे नमे / सागरमतिं बोधीशं वज्रगर्भं नमाम्यहम् // BuSto_28.23

लोकेश्वरं महासत्वं स्थानप्राप्तं नमाम्यहम् / चन्द्रप्रभं महातेजं वन्दे ऽहं जालिनीप्रभम् // BuSto_28.24

अमितप्रभबोधोशं श्रीपतिं भानुकूटकम् / सर्वशोकतमोद्घाटविष्कम्भिनं नमाम्यहम् // BuSto_28.25

यमान्तकं महावीरं प्रज्ञान्तकं नमे नमे / पद्मान्तकं महावीरं विघ्नान्तकं नमाम्यहम् // BuSto_28.26

त्रैलोक्यविजयं वीरं वज्रज्वालां नमाम्यहम् / हेरुकं वज्रवीरेशं परमेशं नमाम्यहम् // BuSto_28.27

चक्रवर्त्तीश्वरं वन्दे सुम्भराजं नमाम्यहम् / पुष्पां धूपां महादीपां गन्धां देवीं नमाम्यहम् // BuSto_28.28

वज्ररूपां वज्रशब्दां रसवज्रां नमाम्यहम् / वज्रस्पर्शां महादेवीं विश्ववर्णां नमे सदा // BuSto_28.29

इन्द्रयमजलेशांश्च कुबेरमीश्वरं नमः / अग्निं नैरृत्यनाथं च वायुराजं नमाम्यहम् // BuSto_28.30

ब्रह्माणं विष्णुदेवं च महेश्वरं कुमारकम् / ब्रह्माणीं च महादेवीं रुद्राणीं वैष्णवीं नमे // BuSto_28.31

कौमारीं रक्तवर्णां च महेन्द्राणीं नमाम्यहम् / वाराहीं कालिकां चण्डीं भृङ्गिणं गणनायकम् // BuSto_28.32

महाकालं महाभीमं नन्दिकेशं रविं नमे / चन्द्रं भौमं बुधं वन्दे गुरुं शुक्रं शनैश्चरम् // BuSto_28.33

राहुं केतुं बलभद्रं जयकरं नमे सदा / मधुकरं वसन्तं च अनन्तं वासुकिं नमे // BuSto_28.34

तक्षं कर्कोटकं पद्मं महापद्मं नमाम्यहम् / शङ्खपालं च कुलिकं वेमचित्रं वलिं नमे // BuSto_28.35

प्रह्लादं च महादैत्यं वैरोचनं नमे सदा / गुरुडेन्द्र सुम्भराजं पंचशिखं नमाम्यहम् // BuSto_28.36

सर्वार्थसिद्धिं विघ्नेशं पूर्णभद्रं नमाम्यहम् / मणिभद्रं महायक्षं धनदं च महेश्वरम् // BuSto_28.37

वैश्रवणं महावीरं चिविकुण्डलिनं नमाम्यहम् / केलिमालिं सुखेन्द्रं च चलेन्द्रं च नमाम्यहम् // BuSto_28.38

हारतीं यक्षिणीं देवीं बहुपुत्रवतीं नमे / अश्विनीं भरणीं तारां कृत्तिकां रोहणीं तथा // BuSto_28.39

मृगशीर्षां तथैवार्द्रां पुनर्वसुं नमाम्यहम् / पुष्यमाश्लेषकातारां मघां च पूर्वाफाल्गुनीम् // BuSto_28.40

उत्तराफाल्गुनीं हस्तं चित्रां स्वातिं विशाखकाम् / अनुराधां तथा ज्येष्ठां मूलतारां नमाम्यहम् // BuSto_28.41

पूर्वाषाढोत्तराषाढां श्रवणां च नमाम्यहम् / धनिष्ठां शतभिषां च पूर्वोत्तराभाद्रपदाम् // BuSto_28.42

रेवतीं च महाताराम् अभिजितं नमाम्यहम् / वज्राङ्कुशं महावीरं वज्रपाशं नमाम्यहम् // BuSto_28.43

वज्रस्फोटं महाभीमं वज्रांशं वै नमे नमे / वागीश्वरं महाबोधिं सर्वविघ्नविनाशकम् // BuSto_28.44

सर्वज्ञं ज्ञानदातारं धर्मधातुं नमाम्यहम् / मञ्जुश्रियं महाज्ञानं सर्वविद्याप्रदेश्वरम् / सर्वाकारस्वरूपं च वादिराजं नमाम्यहम् // BuSto_28.45

श्री धर्मधातुवागीश्वरमण्डलस्तोत्रं समाप्तम् //

digital sanskrit buddhist canon, stotra section, text no. 29: gaṇḍīstavaḥ ācārya-āryadevakṛtaḥ

आपातालान्तदेवाः सुरनरगरूडा दैत्यगन्धर्वयक्षाः सिद्धा विद्याधराद्या जलधितटगता नागसत्त्वाः समग्राः / गण्डीशब्दं समन्ताद् रभसितमनसः स्वासने ऽस्मिन् प्रसन्नाः श्रोतुं[साधो]रधीरा विमलगुणगणस्यास्य त्रैलोक्यबन्धोः // BuSto_29.1

लीलावासितचामरैश्चलदहो काञ्चीप्रपञ्चालस प्राञ्चत्काञ्चनकिङ्किणीभिररणत् स्वासीवहंसस्वनाः / तारुण्यामलनीलनीरजदल श्यामाङ्कमाराङ्गनाश्चक्रूर्यस्य न मानसस्य विकृतिं बुद्धाय तस्मै नमः // BuSto_29.2

येषामस्ति प्रसादो भगवति सुगते मारभिद्योगयुक्ते ये वा सद्यः प्रसन्नाः सुगतसुतकृते स्वस्ति येषां च भक्तिः / गण्डीमाहत्य चास्मिन् जगति शुभकरां शाक्यसिंहस्य शास्तुः कृत्वा शुद्धान्तसंस्थां सुविहितमनसः श्रोतुमायान्ति सर्वे // BuSto_29.3

बुद्धं त्रैलोक्यनाथं सुरनरनमितं पारसंसारतीरं धीरं गम्भीरवन्तं सकलगुणनिधिं धर्मराज्याभिषिक्तम् / तृष्णामारान्तकारं कलिकलुषहरं कामलोभान्तवन्तं तं वन्दे शाक्यसिंहं प्रणमितशिरसा सर्वकालं नमामि // BuSto_29.4

ऋम्पं ऋम्पं ऋऋम्पं टम टम टटमं तुन्दतुन्दं तुतुन्दं सं सं सं सं सं सं सं समसममसमं दुर्म दुर्म द्रुदुर्मम् / नागिर्नागिर्ननागिस्तखितखितखितस्तत्यजुर्ये रणे वै कैः कैः कैः कैश्च कैः कैर्जगति भयहरा कीर्त्यते धर्मगण्डी // BuSto_29.5

कुरुत कुरुत श्रीपं ध्यानसन्नाहमग्नं ग्रसति न खलु यावद् दुर्निवारः कृतान्तः / इति वदति जनौघे बोधिता भिक्षुसङ्घाः क्षपितदुरितपक्षाकीर्णनिःशेषदोषाः // BuSto_29.6

यस्मिन्नभ्युदिते ऽखिलं त्रिभुवनं यात्यस्तमस्तङ्गते येन ज्ञानगभस्तिहस्तविसरैर्हस्तं यतस्तन्यते / सद्धर्मामलमण्डलो दशबलः संसाररात्र्यन्तकः पायाद्वै मुनिभास्करः सुरगणान् बुद्धः प्रजाबान्धवः // BuSto_29.7

चित्तं येन जितं गजेन्द्रचपलं ज्ञानाक्षरैर्नाङ्कुशैर्नष्टं रागतमो ऽन्धकारपटलं ज्ञानाग्निना नाग्निना / ध्वस्तं मारबलं प्रशान्तमतिना क्षान्त्यायुधैर्नायुधैस्तं वन्दे प्रणतार्तिनाशनपटुं बुद्धं प्रबुद्धं मुनिम् // BuSto_29.8

तीर्थ्यानामाशु सैन्यं झटिति विघटयन् नाकनिष्ठप्रतिष्ठं भूयिष्ठाभिः प्रभाभिर्भुवनमवतरंस्त्रासयन् भासुराभिः / लक्ष्मीः पातालमूले स्थितकनकमहागर्भसिंहासनस्था गीतज्योतिः स्वयं वो दिशतु दशबलो दर्शितप्रातिहार्यः // BuSto_29.9

पादाङ्गुष्ठे निविष्टां क्षिपति पृथुशिलाद्यैः स राजातिगुर्वी चोग्रं ग्रीष्मप्रतापप्रशममुपगतो वल्गुना मन्त्रपूताम् / तामेव त्रास्यमानो विघटयति सुखं श्वासनिःश्वासवातान् लोकं सिद्धाः प्रणेमुः स दिशतु भगवान् सम्पदं सर्वदर्शी // BuSto_29.10

भग्ना मारादिरूपाः प्रलयभयकरा बद्धसन्नद्धकक्षा नाना तीक्ष्णाग्रहस्ताः करितुरगमुखाः सिंहनादं नदन्तः / बुद्धत्वं येन नीताः कुवलयदलदृशा[प्रेक्षिता] भिक्षुसङ्घाः धर्मं कान्तं[नितान्त]मघदलनपटुं तीर्थिकाणां शृणुध्वम् // BuSto_29.11

चित्तं यस्याङ्गनाया रतितरलदृशा ऽपाङ्गभङ्गैः सुभङ्गैः क्षोभं नैवाशु नीतं कुचकलशभरैर्हारलीढैः सुलीढैः / तस्यैषा धर्मगण्डी मधुरकलरवं रावते भिक्षुसङ्घं धर्मं कान्तं तदीयं परमभयकरं तीर्थिकाणां शृणुध्वम् // BuSto_29.12

यः श्रीमान् धर्मचक्रे प्रमुदितमनसा धर्मरत्नैकमौलिर्भूयांसं पूर्णदेहं विकसितवदनं धर्मरत्नोदगिरन्तम् / सिंहाक्रान्तासनस्थः कनकगिरिनिभो धर्मनादं नदन्तं तस्येयं धर्मगण्डी प्रणदति सततं संशृणुध्वं जिनस्य // BuSto_29.13

मा मा मा मीयकण्ठैर्डिमडिमगगता गागगागैर्गलन्तैः ना ना ना नोपनीतं ननु ननु ननु मा धुर्यमाधुर्यकान्तैः / गीतैः कामाङ्गनानां प्रचलितमभवद् यस्य चेतो न शर्मि तस्यैषा धर्मकेतोः पटुपटहरवा रारटीत्युग्रगण्डी // BuSto_29.14

किं संवर्तप्रदत्तप्रसववनचरा दीर्घसंरम्भनादाः किं वा निर्वाटघातः किमुत भगवती हुकृतिर्वज्रपाणेः / तत्सर्वं वै जनानां प्रवचनमतयो द्रष्टुमन्तःप्रवृत्ता बुद्धस्योदारमूर्तेस्त्रिदशभयकरो गण्डिवादः स एषः // BuSto_29.15

ऊर्जासंघातिमारा विकृतनखमुखा रौद्रसिंह[स्व]रूपाः पाताले रत्नदीपे प्रकटमणिगणाः शब्दिताः पर्वतेन्द्राः / देवेन्द्रैर्मौलिरत्नैः प्रणमितचरणस्यास्य विश्वैकबन्धो रौत्येषा हन्यमाना यतिषु शुभविदः शाक्यसिंहस्य गण्डी // BuSto_29.16

कीर्तिर्नाथ प्रमथकमनङ्गो ऽस्तु वा तत्त्वदीया दीनानाथोद्धरण पुरतो गीयते मारशत्रोः / खिन्दं खिन्दं खिखिन्दं खुद खुद सुखदं दत्तके दत्तुतुन्दं तुन्दं तुन्दं तुतुन्दं ध्वनिपटुपटहैः सिद्धगन्धर्वनागैः // BuSto_29.17

मारैर्नानाप्रकारैर्विकृतशतमुखैर्भूरिवक्त्रैर्ज्वलद्भिर्भीमैरट्टाट्टहासैः पललकवलितैः सिंहनादं नदद्भिः / कालाकारैरनेकैर्गहनभयकरैः सर्वतो भीषयद्भिर्व्याप्तं चेतो न यस्य क्षणमपि नियतं मारभङ्गः स वो ऽव्यात् // BuSto_29.18

राजा निष्कण्टराज्यो भवतु वसुमती सर्वसस्याभिपुर्ण् काले वर्षन्तु मेघा व्यपगतविपदः सन्तु लोकाः समस्ताः / वीहारे कर्मपूर्णं यदखिलनृणां सर्वविध्नोपशान्तिरन्योन्यप्रीतिभावाद् भवतु सुखमयो वीतरागार्यसङ्घः // BuSto_29.19

शास्तुः सद्धर्मरत्नं सुगतवरसुतान् प्रेरयन्ती विशुद्धयेद् रागद्वेषैर्विमूढान् विषमपथगतान् रावयन्ती जयन्ती / सत्त्वानुत्तारयन्ती प्रशमशरशतैर्विद्यमानार्थवन्तं शास्तुः संप्रीतिहार्यं विविधवररुतैः शान्तिकारी जनस्य // BuSto_29.20

स्फेटन्तं वारनार्या विकटगणघटाट्टाट्टहासं नदन्तं खेलन्तं विस्फुरन्तं ज्वलदनलशिखाकान्तलीलां ददन्तम् / भन्तं प्रेमप्रकामं स्फुटदुरुवचसं कामधात्वीश्वरत्वं तं वन्दे वन्दनीयं सकलभयहरं बुद्धवीरं सुवीरम् // BuSto_29.21

संपन्ने ऽङ्गुष्ठपद्मे झटिति हृदि तथा कण्ठ एवोपकण्ठे ढक्कासंकाशतालैःकलपटुपटहैः शङ्खनिर्घोषिघोषैः / हा हा हुं हूं कृता ये झटिति कटकटैर्भीमनादानुमोदैः क्षुद्रं चेतो न चैतत् सुरवरजयिनो यस्य तस्मै नमो ऽस्तु // BuSto_29.22

गर्जन्तं वाग्विशेषं प्रकटपटुरवैर्दिव्यगान्धर्वशब्दैर्नानानागेन्द्रयक्षैः स्तुतिचटुलशतैः पूज्यमाना महद्भिः / सांख्ये माहेश्वरीयानसुरगुरुतम्[…] […]मारभन्ती करकमलगता शान्तिमारारटीति // BuSto_29.23

दत्त्वा सर्वस्वदानी क्रतुकनकमयं वाराणानां शतं वा राज्यं पुत्रं कलत्रं स्वतनुमपि शिरश्चक्षुषां वा सहस्रम् / येना[…]भिरपि शतैर्वत्सराणां व्ययत्वात् सम्यक्सम्बोधिरग्रा स जयति सुगतः शान्तये सज्जनानाम् // BuSto_29.24

नानारूपविरूपदृश्यविकृतेर्भूयो ग्रसेद् भूतिभिर्बोधैर्योषिति रोधनप्रजनितज्योतिर्ज्वल[द्बन्ध]नैः / मारस्यानुचरैर्न यस्य सुधियः किञ्चिन्मनः कम्पितं नृत्यैर्वा सुगतस्य मारजयिनो गण्डी रणत्यद्भूतम् // BuSto_29.25

यस्या नादं निशम्य श्रवणसुखकरं यान्ति तृप्तिं समन्तात् प्रेता भूमीमुखाद्याः पृथुतरवपुषः क्षुत्पिपासाभिभूताः / सम्यगभक्त्या प्रसन्नैः सुरनरवपुषैः श्रूयते चातुरैर्या सा गण्डी पातु विश्वं दशबलबलिनस्तस्य माना मनोज्ञा // BuSto_29.26

नानावाद्यकरीन्द्रवाजिमहिषव्याघ्रादिशब्दैर्युतं चञ्चत्कुन्तसुबाणतोमरगदाचक्रादिशस्त्रोद्यतम् / भग्नं सैन्यमनेन योधसहितं मारस्य येन क्षणात् तस्येयं करुणानिधेर्भगवतः पायाज्जगद् गण्डिका // BuSto_29.27

धर्मे संरम्भचित्ताः प्रभवहतविधिः पापतः सर्वदैव दाने शीले क्षमायां पठति सकरुणे सज्जनाः संयताः स्युः / इत्येवं सर्वसत्त्वान् सुमधुररणितैर्बोधयन्ती विशुद्धा तन्नः पुण्यैर्वचोभिस्त्रिजगति सकलं बुद्धवीरस्य गण्डी // BuSto_29.28

शृण्वन्ती सावधाना प्रशमततशराभ्यासनैर्नैव शब्द सेन्द्रादानन्दवज्री स्वभुवननृपतेस्तुङ्गवेलेव देवान् / वन्दीभूतान् मुनीन्द्रान् प्रवचनपटुताकारसंरम्भशब्दैर्या गण्डी दण्डघातक्रममनुरणनाद् दुन्दुभीवद् धुनोति // BuSto_29.29

हुंकारी पद्मयोनिस्त्रिपुरविजयिनो वल्लभः शूलपाणिर्विष्णुर्यद् वज्रपाणिः सुरपतिरसुरध्वंसनश्चक्रपाणिः / ये वा चान्ये स्तुवन्ति प्रमतनिजरवे क्षोभभावे किमास्ते सर्वे तस्याङघ्रिमूले विनयमुपगता गेयमन्त्रं स्तुवामि // BuSto_29.30

अज्ञान् सर्वज्ञनाथान् मुनिपदसहितान् भ्रामयन्ती त्रिलोकं मारांश्चान्यप्रकारैर्विविधभयकरान् त्रासयन्ती समस्तान् / पापान् प्रोत्सारयन्ती विषयरतिधियः पण्डितान् बोधयन्ती प्रोच्चैः संरुद्धबोध्यान् प्रवदति भुवने शाक्यसिंहस्य गण्डी // BuSto_29.31

व्याघ्रयै दत्त्वा स्वदेहं गुणशतनिवहं पुण्यसम्भारलब्ध बुद्धत्वं यः प्रयातः प्रतिहतदुरितो मन्मथोन्मादनार्थी / शास्ता यश्चाद्वितीयो भवभयभिदुरो भिन्नपापाभिसन्धिस्तस्येयं वै विचित्रा स्तनति भगवतः शाक्यसिंहस्य गण्डी // BuSto_29.32

मायादेव्याश्च कुक्षौ जनितजिनवरः शाक्यसिंहो मुनीन्द्र् भूम्नि प्रायात्तु मध्ये प्रवरसुमुनिना लोकवृक्षस्य मूले / देवेन्द्रब्रह्मरुद्रासुरनरविबुधैः स्नापितो यः स देवस्तं वन्दे भक्तिरत्नैः शशधरकिरणाक्षोदिदेहं मुनीन्द्रम् // BuSto_29.33

मारैर्नानाप्रकारैरसिपरशुधनुर्बाणहस्तैर्ज्वलद्भिर्भीमास्यैर्दुष्टदंष्ट्रैर्गजभुजगमुखैः सिंहवक्त्रैः श्ववक्त्रैः / प्रत्यञ्चेनोनमस्य क्षणमपि शमितस्तस्य बुद्धस्य पादौ गन्तुं लोको ऽपि सर्वो ध्रुवमिति गतभीश्चैषु गण्डी निनाद्या // BuSto_29.34

श्री गण्डीस्तवः समाप्तः / कृतिरियम् आचार्य-आर्यदेवपादानाम् //

digital sanskrit buddhist canon, stotra section, text no. 30: gaṇeśastotram

खर्वं स्थूलतरं गजेन्द्रवदनं लम्बोदरं सुन्दरं विध्नेशं मधुगन्धलुब्धमधुपव्यालोलगण्डस्थलम् / दन्तोद्घाटविदारिताहितजनं सिन्दूरशोभाकरं वन्दे शैलसुतासुतं गणपतिं सिद्धिप्रदं कामदम् // BuSto_30.1

हेरम्बः परमो देवः कार्यसिद्धिविधायकः / सैभाग्यरुपसम्पन्नां देहि मे सुखसम्पदम् // BuSto_30.2

एकदन्तं महाकायं लम्बोदरं गजाननम् / सर्वसिद्धिप्रदातारं गङ्गापुत्रं नमाम्यहम् // BuSto_30.3

वन्दे तं गणनाथमार्यमनघं दारिद्रयदावानलं शुण्डादण्डविधूयमानशमलं संसारसिन्धोस्तरिम् / यं नत्वा सुरकोटयः प्रभुवरं सिद्धिं लभन्ते परां सिन्दूरारूणविग्रहं परिपतद्दानाम्बुधाराहृतम् // BuSto_30.4

उच्चैर्ब्रह्माण्डखण्डद्वितयसहचरं कुम्भयुग्मं दधान प्रेषन्नागारिपक्षप्रतिभटविकटश्रोत्रतालाभिरामः / देवः शम्भोरपत्यं भुजगपतितनुस्पर्द्धिवर्धिष्णुहस्तस्त्रैलोक्याश्चर्यमूर्तिर्जयति त्रिजगतामीश्वरः कुञ्जरास्यः // BuSto_30.5

गणपतिश्च हेरम्बो विध्नराजो विनायकः / देवीपुत्रो महातेजा महाबलपराक्रमः // BuSto_30.6

महोदरो महाकायश्चैकदन्तो गजाननः / श्वेतवस्त्रो महादीप्तस्त्रिनेत्रो गणनायकः // BuSto_30.7

अक्षमालां च दन्तं च गृह्णन् वै दक्षिणे करे / परशुं मोदकपात्रं च वामहस्ते विधारयन् // BuSto_30.8

नानापुष्परतो देवो नानागन्धानुलेपनः / नागयज्ञोपवीताङ्गो नानाविध्नविनाशनः // BuSto_30.9

देवासुरमनुष्याणां सिद्धगन्धर्ववन्दितम् / त्रैलोक्यविध्नहर्तारमाख्वारूढं नमाम्यहम् // BuSto_30.10

सुमुखश्चैकदन्तश्च कपिलो गजकर्णकः / लम्बोदरश्च विकटो विध्नराजो विनायकः // BuSto_30.11

धूम्रकेतुर्गणाध्यक्षो भालचन्द्रो गजाननः / वक्रतुण्डः शूर्पकर्णो हेरम्बः स्कन्दपूर्वजः // BuSto_30.12

षोडशैतानि नामानि यः पठेच्छुणुयादपि / विद्यारम्भे विवाहे च प्रवेशे निर्गमे तथा // BuSto_30.13

संग्रामे संकटे चैव विध्नस्तस्य न जायते / विध्नवल्लीकुठाराय गणाधिपतये नमः // BuSto_30.14

श्रीगणेशस्तोत्रं समाप्तम् //

digital sanskrit buddhist canon, stotra section, text no. 31: guhyeśvarīstotram

भगवति बहुरूपे निर्विकारे निरञ्जे निमितनिखिलरूपे निश्चयातीतरूपे / अखिलनिगमपारे नित्यनित्यस्वभावे चरणकमलयुग्मं नौमि देवि त्वदीयम् // BuSto_31.1

हसितमुखशशाङ्कं ज्योत्स्नया रात्रिभूतं दशशतकिरणोद्यद्वक्त्रमाध्यन्दिनं ते / अरुणवदनशोभा औदयी चास्तकाले चरणकमलयुग्मं नौमि देवि त्वदीयम् // BuSto_31.2

गलजठरपदेषु स्वर्गमर्त्याहिलोकाः सकलभगणदन्ता रोमराजी द्रुमास्ते / गिरय इव नितम्बा रक्तशुक्लाः समुद्राश् चरणकमलयुग्मं नौमि देवि त्वदीयम् // BuSto_31.3

पवनदहनवेगाः श्वासप्रश्वास एव प्रलयप्रभवकालो मीलनोन्मीलनाभ्याम् / द्विदशतपनभूता भीमवक्त्रास्त्वदीयाश् चरणकमलयुग्मं नौमि देवि त्वदीयम् // BuSto_31.4

अनुपमतनुदेहं व्याप्यमानं समन्तान् निखिलनिगमसारं दर्शयन् देवि दिव्यम् / त्रिभुवनमखिलं ते दर्शितुमेति बुद्धिश् चरणकमलयुग्मं नौमि देवि त्वदीयम् // BuSto_31.5

विधिमुखविबुधास्ते किंकराः पादसंस्था मुकुटविधृतबुद्धे सर्वमार्गा हि शुद्धे / किमु तव महिमानं वर्णये गुह्यदेवि चरणकमलयुग्मं नौमि देवि त्वदीयम् // BuSto_31.6

अनुपठति समाप्तौ पूजने भक्तिमान् यो नुतिमति वितगोति स्पष्टमेवास्य बुद्धिः / सकलजनजनन्या भक्तिसम्पत्तिमुच्चैः करतलवशगास्ताः सिद्धिपुष्टयौ लभन्ते // BuSto_31.7

श्री स्वयंभूपुराणोद्धृतं मञ्जुनाथकृतं गुह्येश्वरीस्तोत्रं समाप्तम् //

digital sanskrit buddhist canon, stotra section, text no. 32: gururatnatrayastotram

ओम् नमोरत्नत्रयाय

तृष्णाजिह्वमसद्विकल्पशिरसं प्रद्वेषचञ्चत्फलं कामक्रोधवितर्कदर्शनमथो रागप्रचण्डेक्षणम् / मोहास्यं स्वशरीरकोटिशतचिन्तातिगं दारुणं प्रज्ञामन्त्रबलेन यः शमितवान् बुद्धाय तस्मै नमः // BuSto_32.1

बुद्धं प्रबुद्धं वरधर्मराजं शान्तं विशुद्धं समकीर्तिदं तं / गुणाकरं सत्त्वमुनीन्द्रराजं श्रीमन्महाबोधिमहं नमामि // BuSto_32.2

इति बुद्धरत्नस्तोत्रम् /

यो जात्यादिकदुःखतप्तमहसां चक्षुः सतां प्राणिनां यस्त्रैधातुकपञ्जरादहरहः सत्त्वान् समाकर्षति / अत्राणं च जगत्समुद्धरति यः संक्लेशदुःखार्णवात् संबुद्धांश्च पुनश्च्युताच्च महते धर्माय तस्मै नमः // BuSto_32.3

या सर्वज्ञतया नयत्युपशमं शान्तैषिणः श्रावकान् या मार्गज्ञतया जगद्धितकृता लोकार्थसम्पादिका / सर्वाकारमिदं वदन्ति मुनयो विश्वस्य या संगता तस्यै श्रावकबोधिसत्त्वगणिनो बुद्धस्य मात्रे नमः // BuSto_32.4

इतिधर्मरत्नस्तोत्रम् /

चत्वारः प्रत्युत्पन्नगा भवसुखे सुस्वादविद्वेषिणश्चत्वारश्च फले स्थिताः शमरताः शान्ता महायोगिनः / इत्यष्टौ वरपुंगला भगवता यस्मिन् गणे व्याकृताः प्रज्ञाशीलसमाधितप्तवपुषा संघाय तस्मै नमः // BuSto_32.5

बुद्धं नमामि सततं वरपद्मपाणिं मैत्र्यात्मकं गगनगंजसमन्तभद्रम् / यक्षाधिपं परिहितोद्धृतमञ्जुघोषं विष्कम्भिणं क्षितिगर्भं प्रणमामि भक्त्या // BuSto_32.6

इति संघरत्नस्तोत्रम् /

गुरुर्बुद्धो गुरुर्धर्मो गुरुः संघस्तथैव च / गुरुर्वज्रधरः श्रीमान् तस्मै श्रीगुरवे नमः // BuSto_32.7

श्री गुरुरत्नत्रयस्तोत्रं समाप्तम् //

digital sanskrit buddhist canon, stotra section, text no. 33: hāratīstotram

श्री हारतीदेव्यैः नमः

कुन्दप्रसूनसदृशीं रुचिराङ्गरागां नानाविभूषणविभूषितवज्रदेहाम् / सव्येन हस्तकमलेन भयार्तिहन्त्रीं यक्षेश्वरीं बहुसुतां प्रणमामि भक्त्या // BuSto_33.1

आलिङ्गितां निजमसव्यभुजेन पुत्रान् नेत्रैस्त्रिभिश्च परिशोभितचारुदेहाम् / नानाविधैर्मणिगणै रचितं किरीटं यक्षेश्वरीं बहुसुतां प्रणमामि भक्त्या // BuSto_33.2

तां वह्निमण्डलगतां वसुपत्रपद्मे श्रीरत्नपीठ उपरिस्थितपादपद्माम् / यक्षादिभिः परिवृतां ललितासनस्थां यक्षेश्वरीं बहुसुतां प्रणमामि भक्त्या // BuSto_33.3

लोकत्रयार्तिशमनीं शिशुजीवदात्रीं श्रीहारतीं करुणया निजभक्तदक्षाम् / दुःखापहां जनमनोहरभोगभाजां यक्षेश्वरीं बहुसुतां प्रणमामि भक्त्या // BuSto_33.4

संत्रासिनीं पिशुनवृत्तिवतां जनानां विस्फोटकादिरुजराशिविनाशकर्त्रीम् / भक्तेषु धातृसदृशीं च सुशीतलाङ्गीं यक्षेश्वरीं बहुसुतां प्रणमामि भक्त्या // BuSto_33.5

बुद्धानुशासनरतामतिसूक्ष्मरूपां लोकत्रयार्चितपदां करुणार्चिभूताम् / गन्धर्वकिन्नरगणैः परिसेव्यमानां यक्षेश्वरीं बहुसुतां प्रणमामि भक्त्या // BuSto_33.6

केयूरकुण्डलसुकङ्कणनूपुराढ्यां नानाविचित्रवसनप्रदधानशीलाम् / संरक्षणीं शिशुगणान् परिपालयन्तीं यक्षेश्वरीं बहुसुतां प्रणमामि भक्त्या // BuSto_33.7

स्वर्भूरसातलमवस्थितभुक्तिदानसंसक्तपूर्णहृदयां त्रिगुणात्मरूपाम् / तां संस्मराम्यहरहः शरणं प्रपद्ये यक्षेश्वरीं बहुसुतां प्रणमामि भक्त्या // BuSto_33.8

रक्षाकरीं स्तुतिमिमां प्रपठेन्मनुष्यः श्रीहारतीं निजगृहे शिशुरक्षणाय / वाचं श्रियं सुविपुलं च सुखादि सर्वं दात्री त्रिकं पठति यः प्रयतः प्रभाते // BuSto_33.9

श्रीभवरत्नविनिर्गतं बालरक्षाकरं हारतीस्तोत्रं समाप्तम् //

digital sanskrit buddhist canon, stotra section, text no. 34: kalyāṇapañcaviṃśatistotram

श्रीमानाद्यः स्वयम्भूरमितरुचिरमोघाभिघो ऽक्षोभ्यबुद्धः श्रीमान् वैरोचनाख्यो मणिभवमुनिराड् वज्रसत्त्वः सुसत्त्वः / श्रीप्रजा वज्रधात्वी सकलशुभकरी आर्यतारादिकास्ताः कल्याणं वः क्रियासुः क्वचिदपि सरतां तिष्ठतां नौम्यहं ताः // BuSto_34.1

देवी सम्पत्प्रसादा गणपतिहृदया वज्रविद्राविणो सा उष्णीषापर्णदेवी किटिवरवदना मातृका खेचराणाम् / कोटोलक्षाक्षदेवो स्वगणपरिवृता पञ्चरक्षा सुरक्षा कल्याणं वः क्रियासुः क्वचिदपि सरतां तिष्ठतां नौम्यहं ताः // BuSto_34.2

रत्ने दीपङ्कराख्यो मणिकुसुमजिनः श्रीविपश्यी शिखी च विश्वम्भुः श्रीककुत्सः स च कनकमुनिः काश्यपः शाक्यसिंहः / प्रत्युत्पन्नाभ्यभूतः सकलदशबलो पारमाहात्म्यसिन्धुः कल्याणं वः क्रियासुः क्वचिदपि सरतां तिष्ठतां नौम्यहं ताः // BuSto_34.3

श्रीमानार्यावलोकेश्वरजिनजवरो मैत्रेयानन्तगञ्जो बुद्धः सामन्तभद्रः कुलिशवरधरो मञ्जुनाथो महेशः / सर्वाघोरी[…]क्षितिज खगर्भाभिधानौ महान्तौ कल्याणं वः क्रियासुः क्वचिदपि सरतां तिष्ठतां नौम्यहं ताः // BuSto_34.4

बुद्धाधिष्ठानकन्दोद्भववरकमलो नागदासाभिधानः सत्यां तां यौवनाथो निजवरभुवनाज्ज्योतिरेकं ससर्ज / एकांशं पञ्च भूत्वा विहरति सततं पञ्चबुद्धात्मको ऽसौ कल्याणं वः क्रियासुः क्वचिदपि सरतां तिष्ठतां नौम्यहं ताः // BuSto_34.5

या प्रज्ञा गुह्यरूपा त्रिदलकमलजा सन्तु देवप्रसादा नैरात्मा पीठरूपा बहुविहितहिता ब्रह्मविष्ण्वीशवन्द्या / दुर्गायां मार्गकृत्स्ने कृतनतिवरदा प्रादुरासीदगाधैः कल्याणं वः क्रियासुः क्वचिदपि सरतां तिष्ठतां नौम्यहं ताः // BuSto_34.6

मैत्रीयांशादभूद् यो वनमहदुपरे रत्नचूडास्यरत्नं ज्योतिः संगम्य भव्यं भवजलधितरी रत्नलिङ्गेश्वराख्यः / श्रीवत्सो वीतरागाष्टककृतमहिमा व्यक्तरूपाः(पः)स्वयम्भूः कल्याणं वः क्रियासुः क्वचिदपि सरतां तिष्ठतां नौम्यहं ताः // BuSto_34.7

त्रातुं गोकर्णदुष्टं जपसि धृतमतिं लोकनाथाज्ञया ऽभूत् पद्माकारं खगञ्जाभिधजिनतनयो वाग्मतीपूरतीरे / श्रीगोकर्णेश्वरः स पितृजनहतकृद् वाग्मतीसंगमे ऽस्मिन् कल्याणं वः क्रियासुः क्वचिदपि सरतां तिष्ठतां नौम्यहं ताः // BuSto_34.8

क्रुद्धं नागाधिराजं कुलिकसमविधं त्रासयन् कीलवद् यो लोकानां भद्रहेतोः गमनवदुपरि श्रीगिरौ वीतरागः / श्री सामन्ताद्यभद्रो ध्वजकृतिरभवत् कालिनामा महेशः कल्याणं वः क्रियासुः क्वचिदपि सरतां तिष्ठतां नौम्यहं ताः // BuSto_34.9