108 Buddhist stotras

108 Buddhist stotras

digital sanskrit buddhist canon, stotra section, text no. 1: adhyardhaśatakaṃ nāma stotram ācāryamātṛceṭaviracitam (prasādapratibhodhava = śatapañcāśatka of mātṛceṭa)

1 उपोद्घातः

नमो बुद्धाय

सर्वदा सर्वथा सर्वे यस्य दोषा न सन्ति ह / सर्वे सर्वाभिसारेण यत्र चावस्थिता गुणाः // BuSto_1.1

तमेव शरणं गन्तुं तं स्तोतुं तमुपासितुम् / तस्यैव शासने स्थातुं न्याय्यं यद्यस्ति चेतना // BuSto_1.2

सवासनाश्च ते दोषा न सन्त्येकस्य तायिनः / सर्वे सर्वविदः सन्ति गुणास्ते चानपायिनः // BuSto_1.3

न हि प्रतिनिविष्टो ऽपि मनोवाक्कायकर्मसु / सह धर्मेण लभते कश्चिद्भगवतो ऽन्तरम् // BuSto_1.4

सो ऽहं प्राप्य मनुष्यत्वं ससद्धर्ममहोत्सवम् / महार्णवयुगच्छिद्रकूर्मग्रीवार्पणोपमम् // BuSto_1.5

अनित्यताव्यनुसृतां कर्मच्छिद्रससंशयाम् / आत्तसारां करिष्यामि कथं नेमां सरस्वतीम् // BuSto_1.6

इत्यसंख्येयविषयानवेत्यापि गुणान्मुनेः / तदेकदेशप्रणयः क्रियते स्वार्थगौरवात् // BuSto_1.7

स्वयम्भुवे नमस्ते ऽस्तु प्रभूताद्भुतकर्मणे / यस्य संख्याप्रभावाभ्यां न गुणेष्वस्ति निश्चयः // BuSto_1.8

इयन्त इति नास्त्यन्त ईदृशा इति का कथा / पुण्या इत्येव तु गुणान्प्रति ते मुखरा वयम् // BuSto_1.9

उपोद्घातस्तवो नाम प्रथमः परिच्छेदः /

हेतुस्तवः

विषह्यमविषह्यं वेत्यवधूय विचारणाम् / स्वयमभ्युपपन्नं ते निराक्रन्दमिदं जगत् // BuSto_1.10

अव्यापारितसाधुस्त्वं त्वमकारणवत्सलः / असंस्तुतसखाश्च त्वमनवस्कृतबान्धवः // BuSto_1.11

स्वमांसान्यपि दत्तानि वस्तुष्वन्येषु का कथा / प्राणैरपि त्वया साधो मानितः प्रणयी जनः // BuSto_1.12

स्वैः शरीरैःशरीराणि प्राणैःप्राणाः शरीरिणाम् / जिघांसुभिरुपात्तानां क्रीतानि शतशस्त्वया // BuSto_1.13

न दुर्गतिभ्यां नेष्टा[भ्या] मभिप्रार्थयता गतिम् / केवलाशयशुद्धयैव शोलं सात्मीकृतं त्वया // BuSto_1.14

जिह्माअनां नित्यविक्षेपादृजूनां नित्यसेवनात् / कर्मणां परिशुद्धानां त्वमेकायनतां गतः // BuSto_1.15

पीडयमानेन बहुशस्त्वया कल्याणचेतसा / क्लेशेषु विवृतं तेजो जनः क्लिष्टो ऽनुकम्पितः // BuSto_1.16

परार्थे त्यजतः प्राणान् या प्रीतिरभवत् तव / न सा नष्टोपलब्धेषु प्राणेषु प्राणिनां भवेत् // BuSto_1.17

यद्रुजा निरपेक्षस्य च्छिद्यमानस्य ते ऽसकृत् / वधकेष्वपि सत्त्वेषु कारुण्यमभवत् प्रभो // BuSto_1.18

सम्यक्सम्बोधिबीजस्य चित्तरत्नस्य तस्य ते / त्वमेव वीर सारज्ञो दूरे तस्येतरो जनः // BuSto_1.19

नाकृत्वा दुष्करं कर्म दुर्लभं लभ्यते पदम् / इत्यात्मनिरपेक्षेण वीर्यं संवर्धितं त्वया // BuSto_1.20

विशेषोत्कर्षनियमो न कदाचिदभूत् तव / अतस्त्वयि विशेषाणां छिन्नस्तरतमक्रमः // BuSto_1.21

सुसुखेष्वपि सङ्गो ऽभूत् सफलेषु समाधिषु / न ते नित्यानुबद्धस्य महाकरुणया हृदि // BuSto_1.22

त्वादृशान् पीडयत्येव नानुगृह्णाति तत् सुखम् / प्रणीतमपि सद्वृत्त यदसाधारणं परैः // BuSto_1.23

विमिश्रात् सारमादत्तं सर्वं पीतमकल्मषम् / त्वया सूक्तं दुरुक्तं तु विषवत् परिवर्जितम् // BuSto_1.24

क्रीणता रत्नसारज्ञ प्राणैरपि सुभाषितम् / पराक्रान्तं त्वया बोधौ तासु तासूपपत्तिषु // BuSto_1.25

इति त्रिभिरसंख्येयैरेवमुद्यच्छता त्वया / व्यवसायद्वितीयेन प्राप्तं पदमनुत्तरम् // BuSto_1.26

हेतुस्तवो नाम द्वितीयः परिच्छेदः /

3 निरुपमस्तवः

अकृत्वेर्ष्यां विशिष्टेषु हीनाननवमत्य च / अगत्वा सदृशैः स्पर्धां त्वं लोके श्रेष्ठतां गतः // BuSto_1.27

हेतुष्वभिनिवेशो ऽभूद् गुणानां न फलेषु ते / तेन सम्यक्प्रतिपदा त्वयि निष्ठां गुणा गताः // BuSto_1.28

तथात्मा प्रचयं नीतस्त्वया सुचरितैर्यथा / पुण्यायतनतां प्राप्तान्यपि पादरजांसि ते // BuSto_1.29

कर्शयित्वोद्धृता दोषा वर्धयित्वा विशोधिताः / गुणास्तेन सुनीतेन परां सिद्धिं त्वमध्यगाः // BuSto_1.30

तथा सर्वाभिसारेण दोषेषु प्रहृतं त्वया / यथैषामात्मसन्ताने वासनापि न शेषिता // BuSto_1.31

तथा संभृत्य संभृत्य त्वयात्मन्याहिता गुअणाः / प्रतिरुपकमप्येषां यथा नान्यत्र दृश्यते // BuSto_1.32

उपघातावरणवन्मितकालं प्रदेशि च / सुलभातिशयं सर्वमुपमावस्तु लौकिकम् // BuSto_1.33

अद्वन्द्विनामगम्यानां ध्रुवाणामनिवर्तिनाम् / अनुत्तराणां का तर्हि गुणानामुपमा ऽस्तु ते // BuSto_1.34

गोष्पदोत्तानतां याति गाम्भीर्यं लवणाम्भसः / यदा ते बुद्धिगाम्भीर्यमगाधापारमीक्ष्यते // BuSto_1.35

शिरीषपक्ष्माग्रलघु स्थैर्यं भवति पार्थिवम् / अकम्प्ये सर्वधर्माणां त्वत्स्थैर्ये ऽभिमुखीकृते // BuSto_1.36

अज्ञानतिमिरघ्नस्य ज्ञानालोकस्य ते मुने / न रविर्विषये भूमिं खाद्योतिमपि विन्दति // BuSto_1.37

मलिनत्वमिवायान्ति शरच्चन्द्राम्बराम्भसाम् / तव वाग्बुद्धिचेष्टानां शुद्धिं प्रति विशुद्धयः // BuSto_1.38

अनेन सर्वं व्याख्यातं यत् किञ्चित्साधु लौकिकम् / दूरे हि बुद्धधर्माणां लोकधर्मास्तपस्विनः // BuSto_1.39

यस्यैव धर्मरत्नस्य प्राप्त्या प्राप्तस्त्वमग्रताम् / तेनैव केवलं साधो साम्यं ते तस्य च त्वया // BuSto_1.40

आत्मेच्छाच्छलमात्रं तु सामान्योपांशु किंचन / यत्रोपक्षिप्य कथ्येत सा वक्तुरतिलोलता // BuSto_1.41

निरुपमस्तवो नाम तृतीयः परिच्छेदः /

4 अद्भुतस्तवः

प्रतन्विव हि पश्यामि धर्मतामनुचिन्तयन् / सर्वं चावर्जितं मारविजयं प्रति ते जगत् // BuSto_1.42

महतो ऽपि हि संरम्भात् प्रतिहन्तुं समुद्यताः / क्षमाया नातिभारो ऽस्ति पात्रस्थाया विशेषतः // BuSto_1.43

यत्तु मारजयान्वक्षं सुमहत्क्लेशवैशसम् / तस्यामेव कृतं रात्रौ तदेव परमाद्भुतम् // BuSto_1.44

तमोविधमने भानोर्यः सहस्रांशुमालिनः / वीर विस्मयमागच्छेत् स तीर्थ्यविजये तव // BuSto_1.45

सरागो वीतरागेण जितरोषेण रोषणः / मूढो विगतमोहेन त्रिभिर्नित्यं जितास्त्रयः // BuSto_1.46

प्रशंससि च सद्धर्मानसद्धर्मान् विगर्हसि / अनुरोधविरोधौ च न स्तः सदसतोस्तव // BuSto_1.47

नैवार्हत्सु न तीर्थ्येषु प्रतिघानुनयं प्रति / यस्य ते चेतसो ऽन्यत्वं तस्य ते का स्तुतिर्भवेत् // BuSto_1.48

गुणेष्वपि न संगो ऽभूत् तृष्णा न गुणवत्स्वपि / अहो ते सुप्रसन्नस्य सत्त्वस्य परिशुद्धता // BuSto_1.49

इन्द्रियाणां प्रसादेन नित्यकालानपायिना / मनो नित्यप्रसन्नं ते प्रत्यक्षमिव दृश्यते // BuSto_1.50

आबालेभ्यः प्रसिद्धास्ते मतिस्मृतिविशुद्धयः / गमिता भावपिशुनैः सुव्याहृतसुचेष्टितैः // BuSto_1.51

अद्भुतस्तवो नाम चतुर्थः परिच्छेदः /

5 रुपस्तवः

उपशान्तं च कान्तं च दीप्तमप्रतिघाति च / निभृतं चोर्जितं चेदं रुपं कमिव नाक्षिपेत् // BuSto_1.52

येनापि शतशो दृष्टं यो ऽपि तत्पूर्वमीक्षते / रुपं प्रीणाति ते चक्षुः समं तदुभयोरपि // BuSto_1.53

असेचनकभावाद्धि सौम्यभावाच्च ते वपुः / दर्शने दर्शने प्रीतिं विदधाति नवां नवाम् // BuSto_1.54

अधिष्ठानगुणैर्गात्रमधिष्ठातृगुणैर्गुणः / परया संपदोपेतास्तवान्योन्यानुरुपया // BuSto_1.55

क्वान्यत्र सुनिविष्टाः स्युरिमे ताथागता गुणाः / ऋते रुपात्तवैवास्माल्लक्षणव्यञ्जनोज्ज्वलात् // BuSto_1.56

धन्यमस्मीति ते रुपं वदतीवाश्रितान् गुणान् / सुनिक्षिप्ता वयमिति प्रत्याहुरिव तद्गुणाः // BuSto_1.57

रुपस्तवो नाम पञ्चमः परिच्छेदः /

6 करुणास्तवः

सर्वमेवाविशेषेण क्लेशैर्बद्धमिदं जगत् / त्वं जगत्क्लेशमोक्षार्थं बद्धः करुणया चिरम् // BuSto_1.58

कं नु प्रथमतो वन्दे त्वां महाकरुणामुत / ययैवमपि दोषज्ञस्त्वं संसारे धृतश्चिरम् // BuSto_1.59

विवेकसुखसात्म्यस्य यदाकीर्णस्य ते गताः / काला लब्धप्रसरया तत् ते करुणया कृतम् // BuSto_1.60

शान्तादरण्याद् ग्रामान्तं त्वं हि नाग इव ह्रदात् / विनेयार्थं करुणया विधयेवावकृष्यसे // BuSto_1.61

परमोपशमस्थो ऽपि करुणापरवत्तया / कारितस्त्वं पदन्यासं कुशीलवकलास्वपि // BuSto_1.62

ऋद्धिर्या सिंहनादा ये स्वगुणोद्भावनाश्च याः / वान्तेच्छोपविचारस्य कारुण्यनिकषः स ते // BuSto_1.63

परार्थैकान्तकल्याणी कामं स्वाश्रयनिष्ठुरा / त्वय्येव केवलं नाथ करुणा करुणाभवत् // BuSto_1.64

तथा हि कृत्वा शतधा धीरा बलिमिव क्वचित् / परेषामर्थसिद्धयर्थं त्वां विक्षिप्तवती दिशः // BuSto_1.65

त्वदिच्छयैव तु व्यक्तमनुकूला प्रवर्तते / तथा हि बाधमानापि त्वां सती नापराध्यते // BuSto_1.66

करुणास्तवो नाम षष्ठःपरिच्छेदः /

7 वचनस्तवः

सुपदानि महार्थानि तथ्यानि मधुराणि च / गूढोत्तानोभयार्थानि समासव्यासवन्ति च // BuSto_1.67

कस्य न स्यादुपश्रुत्य वाक्यान्येवंविधानि ते / त्वयि प्रतिहतस्यापि सर्वज्ञ इति निश्चयः // BuSto_1.68

प्रायेण मधुरं सर्वमगत्या किञ्चिदन्यथा / वाक्यं तवार्थसिद्धया तु सर्वमेव सुभाषितम् // BuSto_1.69

यच्छ्लक्षणं यच्च परुषं यद्वा तदुभयान्वितम् / सर्वमैवैकरसतां विमर्दे याति ते वचः // BuSto_1.70

अहो सुपरिशुद्धानां कर्मणां नैपुणं परम् / यैरिदं वाक्यरत्नानामीदृशं भाजनं कृतम् // BuSto_1.71

अस्मद्धि नेत्रसुभगादिदं श्रुतिमनोहरम् / मुखात् क्षरति ते वाक्यं चन्द्राद्द्रवमिवामृतम् // BuSto_1.72

रागरेणुं प्रशमयद्वाक्यं ते जलदातये / वैनतेयायते द्वेषभुजङ्गोद्धरणं प्रति // BuSto_1.73

दिवाकरायते भूयो ऽप्यज्ञानतिमिरं नुदत् / शक्रायुधायते मानगिरीनभिविदारयत् // BuSto_1.74

दृष्टार्थत्वादवितथं निष्क्लेशत्वादनाकुलम् / गमकं सुप्रयुक्तत्वात् त्रिकल्याणं हि ते वचः // BuSto_1.75

मनांसि तावच्छ्रोतॄणां हरन्त्यादौ वचांसि ते / ततो विमृश्यमानानि रजांसि च तमांसि च // BuSto_1.76

आश्वासनं व्यसनिनां त्रासनं च प्रमादिनाम् / संवेजनं च सुखिनां योगवाहि वचस्तव // BuSto_1.77

विदुषां प्रीतिजननं मध्यानां बुद्धिवर्धनम् / तिमिरघ्नं च मन्दानां सार्वजन्यमिदं वचः // BuSto_1.78

अपकर्षति दृष्टिभ्यो निर्वाणमुपकर्षति / दोषान् निष्कर्षति गुणान् वाक्यं ते ऽभिप्रवर्षति // BuSto_1.79

सर्वत्राव्याहता बुद्धिः सर्वत्रोपस्थिता स्मृतिः / अवन्ध्यं तेन सर्वत्र सर्वं व्याकरणं तव // BuSto_1.80

यन्नादेशे न चाकाले नैवापात्रे प्रवर्तसे / वीर्यं सम्यगिवारब्धं तेनामोघं वचस्तव // BuSto_1.81

वचनस्तवो नाम सप्तमः परिच्छेदः /

8 शासनस्तवः

एकायनं सुखोपायं स्वनुवन्धि निरत्ययम् / आदिमध्यान्तकल्याणं तव नान्यस्य शासनम् // BuSto_1.82

एवमेकान्तकान्तं ते दृष्टिरागेण बालिशाः / मतं यदि विगर्हन्ति नास्ति दृष्टिसमो रिपुः // BuSto_1.83

अनवभुङ्क्था यदस्यार्थे जगतो व्यसनं बहु / तत् संस्मृत्य विरुपे ऽपि स्थेयं ते शासने भवेत् // BuSto_1.84

प्रागेव हितकर्तुश्च हितवक्तुश्च शासनम् / कथं न नाम कार्यं स्यादादीप्तशिरसापि ते // BuSto_1.85

भुजिष्यता बोधिसुखं त्वद्गुणापचितिः शमः / प्राप्यते त्वन्मतात् सर्वमिदं भद्रचतुष्टयम् // BuSto_1.86

त्रासनं सर्वतीर्थ्यानां नमुचेरुपतापनम् / आश्वासनं नृदेवानां तवेदं वीर शासनम् // BuSto_1.87

त्रैधातुकमहाभौममसङ्गमनवग्रहम् / शासनेन तवाक्रान्तमन्तकस्यापि शासनम् // BuSto_1.88

त्वच्छासननयज्ञो हि तिष्ठेत् कल्पमपीच्छया / प्रयाति तत्र तु स्वैरी यत्र मृत्योरगोचरः // BuSto_1.89

आगमस्यार्थचिन्ताया भावनोपासनस्य च / कालत्रयविभागो ऽस्ति नान्यत्र तव शासनात् // BuSto_1.90

एवं कल्याणकलितं तदेवमृषिपुङ्गव / शासनं नाद्रियन्ते यत् किं वैशसतरं ततः // BuSto_1.91

शासनस्तवो नामाष्टमः परिच्छेदः /

9 प्रणिधिस्तवः

श्रवणं तर्पयति ते प्रसादयति दर्शनम् / वचनं ह्लादयति ते विमोचयति शासनम् // BuSto_1.92

प्रसूतिर्हर्षयति ते वृद्धिर्नन्दयति प्रज्ञाः / प्रवृत्तिरनुगृह्णाति निवृत्तिरुपहन्ति च // BuSto_1.93

कीर्तनं किल्बिषहरं स्मरणं ते प्रमोदनम् / अन्वेषणं मतिकरं परिज्ञानं विशोधनम् // BuSto_1.94

श्रीकरं ते ऽभिगमनं सेवनं धीकरं परम् / भजनं निर्भयकरं शंकरं पर्युपासनम् // BuSto_1.95

शीलोपसम्पदा शुद्धः प्रसन्नो ध्यानसम्पदा / त्वं प्रज्ञासम्पदा ऽक्षोभ्यो ह्रदः पुण्यमयो महान् // BuSto_1.96

रुपं द्रष्टव्यरत्नं ते श्रव्यरत्नं सुभाषितम् / धर्मो विचारणारत्नं गुणरत्नाकरो ह्यसि // BuSto_1.97

त्वमोघैरुह्यमानानां द्वीपस्त्राणं क्षतात्मनाम् / शरणं भवभीरुणां मुमुक्षूणां परायणम् // BuSto_1.98

सत्पात्रं शुद्धवृत्तत्वात् सत्क्षेत्रं फलसम्पदा / सन्मित्रं हितकारित्वात् सर्वप्राणभृतामसि // BuSto_1.99

प्रियस्त्वमुपकारित्वात् सुरतत्वान्मनोहरः / एकान्तकान्तः सौम्यत्वात् सर्वैर्बहुमतो गुणैः // BuSto_1.100

हृद्यो ऽसि निरवद्यत्वाद्रम्यो वागरुपसौष्ठवात् / धन्यः सर्वार्थसिद्धत्वान्माङ्गल्यो गुणसंश्रयात् // BuSto_1.101

प्रणिधिस्तवो नाम नवमः परिच्छेदः /

10 मार्गावतारस्तवः

स्थायिनां त्वं परिक्षेप्ता विनियन्तापहरिणाम् / समाधाता विजिह्मानां प्रेरको मन्दगामिनाम् // BuSto_1.102

नियोक्ता धुरि दान्तानां खटुङ्कानामुपेक्षकः / अतो ऽसि नरदम्यानां सत्सारथिरनुत्तरः // BuSto_1.103

आपन्नेष्वनुकम्पा ते प्रस्वस्थेष्वर्थकामता / व्यसनस्थेषु कारुण्यं सर्वेषु हितकामता // BuSto_1.104

विरुद्धेष्वपि वात्सल्यं प्रवृत्तिः पतितेष्वपि / रौद्रेष्वपि कृपालुत्वं का नामेयं तवार्यता // BuSto_1.105

गुरुत्वमुपकारित्वान्मातापित्रोर्यदीष्यते / केदानीमस्तु गुरुता त्वय्यत्यन्तोपकारिणि // BuSto_1.106

स्वकार्यनिरपेक्षाणां विरुद्धानामिवात्मनाम् / त्वं प्रपाततटस्थानां प्राकारत्वमुपागतः // BuSto_1.107

लोकद्वयोपकाराय लोकातिक्रमणाय च / तमोभूतेषु लोकेषु प्रज्ञालोकः कृतस्त्वया // BuSto_1.108

भिन्ना देवमनुष्याणामुपभोगेषु वृत्तयः / धर्मसम्भोगसामान्यात्त्वय्यसम्भेदमागताः // BuSto_1.109

उपपत्तिवयोवर्णदेशकालनिरत्ययम् / त्वया हि भगवन् धर्मसर्वातिथ्यमिदं कृतम् // BuSto_1.110

अविस्मितान् विस्मितवत्स्पृहयन्तो गतस्पृहान् / उपासते प्राञ्जलयः श्रावकानपि ते सुराः // BuSto_1.111

अहो संसारमण्डस्य बुद्धोत्पादस्य दीप्तता / मानुष्यं यत्र देवानां स्पृहणीयत्वमागतम् // BuSto_1.112

मार्गावतारस्तवो नाम दशमः परिच्छेदः /

11 दुष्करस्तवः

खेदः शमसुखज्यानिरसज्जनसमागमः / द्वन्द्वान्याकीर्णता चेति दोषान् गुणवदुद्वहन् // BuSto_1.113

जगद्धितार्थं घटसे यदसङ्गेत चेतसा / का नामासौ भगवति बुद्धानां बुद्धधर्मता // BuSto_1.114

कदन्नान्यपि भुक्तानि क्वचित्क्षुदधिवासिता / पन्थानो विषमाः क्षुण्णाः सुप्तं गोकण्टकेष्वपि // BuSto_1.115

प्राप्ताः क्षेपावृताः सेवा वेषभाषान्तरं कृतम् / नाथ वैनेयवात्सल्यात् प्रभुणापि सता त्वया // BuSto_1.116

प्रभूतमपि ते नाथ सदा नात्मनि विद्यते / वक्तव्य इव सर्वैर्हि स्वैरं स्वार्थे नियुज्यसे // BuSto_1.117

येन केन चिदेव त्वं यत्र तत्र यथा तथा / चोदितः स्वां प्रतिपदं कल्याणीं नातिवर्तसे // BuSto_1.118

नोपकारपरे ऽप्येवमुपकारपरो जनः / अपकारपरे ऽपि त्वमुपकारपरो यथा // BuSto_1.119

अहितावहिते शत्रौ त्वं हितावहितः सुहृत् / दोषान्वेषणनित्ये ऽपि गुणान्वेषणतत्परः // BuSto_1.120

यतो निमन्त्रणं ते ऽभूत् सविषं सहुताशनम् / तत्राभूदभिसंयानं सदयं सामृतं च ते // BuSto_1.121

अक्रोष्टारो जिताः क्षान्त्या द्रुग्धाः स्वस्त्ययनेन च / सत्येन चापवक्तारस्त्वया मैत्र्या जिघांसवः // BuSto_1.122

अनादिकालप्रहता बहृयः प्रकृतयो नृणाम् / त्वया विभावितापायाः क्षणेन परिवर्तिताः // BuSto_1.123

दुष्करस्तवो नामैकादशः परिच्छेदः /

12 कौशलस्तवः

यत्सौरत्यं गतास्तीक्ष्णाः कदर्याश्च वदान्यताम् / क्रुराः पेशलतां यातास्तत् तवोपायकौशलम् // BuSto_1.124

इन्द्रियोपशमो नन्दे मानस्तब्धे च संनतिः / क्षमित्वं चाङ्गुलीमाले कं न विस्मयमानयेत् // BuSto_1.125

बहवस्तृणशय्यासु हित्वा शय्यां हिरण्मयीम् / अशेरत सुखं धीरास्तृप्ता धर्मरसस्य ते // BuSto_1.126

पृष्टेनापि क्वचिन्नोक्तमुपेत्यापि कथा कृता / तर्षयित्वा परत्रोक्तं कालाशयविदा त्वया // BuSto_1.127

पूर्वं दानकथाद्याभिश्चेतस्युत्पाद्य सौष्ठवम् / ततो धर्मो गतमले वस्त्रे रङ्ग इवार्पितः // BuSto_1.128

न सो ऽस्त्युपायः शक्तिर्वा येन न व्यायतं तव / घोरात् संसारपातालादुद्धर्तृं कृपणं जगत् // BuSto_1.129

बहूनि बहुरुपाणि वचांसि चरितानि च / विनेयाशयभेदेन तत्र तत्र गतानि ते // BuSto_1.130

विशुद्धान्यविरुद्धानि पूजितान्यर्चितानि च / सर्वाण्येव नृदेवानां हितानि महितानि च // BuSto_1.131

न हि वक्तुं च कर्तुं च बहु साधु च शक्यते / अन्यथानन्यथावादिन् दृष्टं तदुभयं त्वयि // BuSto_1.132

केवलात्मविशुद्धयैव त्वया पूतं जगद्भवेत् / यस्मान्नैवंविधं क्षेत्रं त्रिषु लोकेषु विद्यते // BuSto_1.133

प्रागेवात्यन्तनष्टानामनादौ भवसंकटे / हिताय सर्वसत्त्वानां यस्त्वमेवं समुद्यतः // BuSto_1.134

कौशलस्तवो नाम द्वादशः परिच्छेदः /

13 आनृण्यस्तवः

न तां प्रतिपदं वेद्मि स्याद्ययापचितिस्तव / अपि ये परिनिर्वान्ति ते ऽपि ते नानृणा जनाः // BuSto_1.135

तव ते ऽवस्थिता धर्मे स्वार्थमेव तु कुर्वते / यः श्रमस्तन्निमित्तं तु तव का तस्य निष्कृतिः // BuSto_1.136

त्वं हि जागर्षि सुप्तानां संतानान्यवलोकयन् / अप्रमत्तः प्रमत्तानां सत्त्वानां भद्रबान्धवः // BuSto_1.137

क्लेशानां वध आख्यातो मारमाया विघाटिता / उक्तं संसारदौरात्म्यमभया दिग्विदर्शिता // BuSto_1.138

किमन्यदर्थकामेन सत्त्वानां करुणायता / करणीयं भवेद् यत्र न दत्तानुनयो भवान् // BuSto_1.139

यदि संचारिणो धर्माः स्युरिमे नियतं त्वया / देवदत्तमुपादाय सर्वत्र स्युर्निवेशिताः // BuSto_1.140

अत एव जगन्नाथ नेहान्यो ऽन्यस्य कारकः / इति त्वमुक्तवान् भूतं जगत् संज्ञापयन्निव // BuSto_1.141

चिराय भुवि सद्धर्मं प्रेर्य लोकानुकम्पया / बहूनुत्पाद्य सच्छिष्यांस्त्रैलोक्यानुग्रहक्षमान् // BuSto_1.142

साक्षाद्विनेयवर्गीयान् सुभद्रान्तान् विनीय च / ऋणशेषं किमद्यापि सत्त्वेषु यदभूत् तव // BuSto_1.143

यस्त्वं समाधिवज्रेण तिलशो ऽस्थीनि चूर्णयन् / अतिदुष्करकारित्वमन्ते ऽपि न विमुक्तवान् // BuSto_1.144

परार्थावेव मे धर्मरुपकायाविति त्वया / दुष्कुहस्यास्य लोकस्य निर्वाणे ऽपि निदर्शितम् // BuSto_1.145

तथाहि सत्सु संक्राम्य धर्मकायमशेषतः / तिलशो रुपकायं च भित्त्वासि परिनिर्वृतः // BuSto_1.146

अहो स्थितिरहो वृत्तमहो रुपमहो गुणाः / न नाम बुद्धधर्माणामस्ति किञ्चिदनद्भुतम् // BuSto_1.147

उपकारिणि चक्षुष्ये शान्तवाक्कायकर्मणि / त्वय्यपि प्रतिहन्यन्ते पश्य मोहस्य रौद्रताम् // BuSto_1.148

पुण्योदधिं रत्ननिधिं धर्मराशिं गुणाकरम् / ये त्वां सत्त्वा नमस्यन्ति तेभ्यो ऽपि सुकृतं नमः // BuSto_1.149

अक्षयास्ते गुणा नाथ शक्तिस्तु क्षयिणी मम / अतः प्रसङ्गभीरुत्वात् स्थीयते न वितृप्तितः // BuSto_1.150

अप्रमेयमसंख्येयमचिन्त्यमनिदर्शनम् / स्वयमेवात्मनात्मानं त्वमेव ज्ञातुमर्हसि // BuSto_1.151

न ते गुणांशावयवो ऽपि कीर्तितः परा च नस्तुष्टिरवस्थिता हृदि / अकर्शनेनैव महाह्रदाम्भसां जनस्य तर्षाः प्रशमं व्रजन्ति ह // BuSto_1.152

फलोदयेनास्य शुभस्य कर्मणो मुनिप्रसादप्रतिभोद्भवस्य मे / असद्वितर्काकुलमारुतेरितं प्रयातु चित्तं जगतां विधेयताम् // BuSto_1.153

आनृण्यस्तवो नाम त्रयोदशमः परिच्छेदः /

अध्यर्धशतकं समाप्तम् / कृतिराचार्यमातृचेटस्य //

digital sanskrit buddhist canon, stotra section, text no. 2: ādibuddhadvādaśakastotram

ओम् नम आदिबुद्धाय

नमस्ते बुद्धरूपाय धर्मरूपाय ते नमः / नमस्ते संघरूपाय पञ्चबुद्धात्मने नमः // BuSto_2.1

पृथ्वीरूपायाब्रूपाय तेजोरूपाय ते नमः / नमस्ते वायुरूपायाकाशरूपाय ते नमः // BuSto_2.2

ब्रह्मणेसत्त्वरूपाय रजोरूपाय विष्णवे / तमोरूपमहेशाय ज्ञानरूपाय ते नमः // BuSto_2.3

प्रज्ञोपायात्मरूपाय गुह्यरूपाय ते नमः / दिग्रूपलोकपालाय विश्वरूपाय ते नमः // BuSto_2.4

चक्षूरूपाय कर्णाय घ्राणरूपाय जिह्वके / कायरूपाय श्रीधर्मरूपाय मनसे नमः // BuSto_2.5

नमस्ते रूपरूपाय रसरूपाय ते नमः / गन्धरूपशब्दरूपस्पर्शरूपाय ते नमः // BuSto_2.6

धर्मरूपधारकाय षडिन्द्रियात्मने नमः / मांसास्थिमेदमज्जानां संघातरूपिणे नमः // BuSto_2.7

रूपाय जङ्गमानां ते स्थावराणां च मुर्तये / तिरश्चां मोहरूपाय रूपायाश्चर्यमूर्तये // BuSto_2.8

सृष्टिकर्त्रे जन्मरूप कालरूपाय मृत्यवे / भव्याय वृद्धरूपाय बालाय ते नमो नमः // BuSto_2.9

प्राणापानसमानोदानव्यानमूर्तये नमः / वर्णापवर्णरूपाय भोक्त्रे तन्मूर्तये नमः // BuSto_2.10

दिनरूपाय सूर्याय चन्द्राय रात्रिरूपिणे / तिथिरूपाय नक्षत्रयोगवारादिमुर्तये // BuSto_2.11

बाह्याभ्यन्तररूपाय लौकिकाय नमोनमः / नैर्वाणाय नमस्तुभ्यं बहुरूपाय ते नमः // BuSto_2.12

आदिबुद्धद्वादशकं पुण्यं प्रातः पठिष्यति / यदिच्छति लभेन्नूनं मनुजो नित्यनिश्चयः // BuSto_2.13

श्रीमञ्जुश्रीकृतमादिबुद्धद्वादशकस्तोत्रं समाप्तम् //

digital sanskrit buddhist canon, stotra section, text no. 3: ākāśagarbhanāmāṣṭottaraśatastotram

ओम् नमो बुद्धाय

आकाशगर्भ सत्त्वार्थ महासत्त्व महाद्युते / महारत्न सुरत्नाग्र्य वज्ररत्न नमो ऽस्तु ते // BuSto_3.1

अभिषेकमहारत्न महाशुद्ध महाशुभ / बुद्धरत्न विशुद्धाङ्ग रत्नरत्न नमो ऽस्तु ते // BuSto_3.2

आकाशाकाशसंभूत सर्वाकाश महानभ / आकाशधातुसर्वाश सर्वाशाग्र्य नमो ऽस्तु ते // BuSto_3.3

रत्नसंभव रत्नोर्ण बुद्धोर्ण सुतथागत / सर्वरत्न सुसर्वाग्र्य रत्नकार्य नमो ऽस्तु ते // BuSto_3.4

रत्नरत्नाग्र्य रत्नोग्र रत्नसर्व तथागत / रत्नोत्तम महाकाश समाकाश नमो ऽस्तु ते // BuSto_3.5

अलङ्कारमहाशोभ शोभाकर सुशोभक / शुद्धसर्वार्थ शुद्धार्थ दानचर्य नमो ऽस्तु ते // BuSto_3.6

धर्मरत्न विशुद्धाग्र्य सङ्घरत्न तथागत / महाभिषेक लोकार्थ प्रमोदार्थ नमो ऽस्तु ते // BuSto_3.7

दान प्रदान दानाग्र्य त्याग त्यागाग्र्य दायक / सर्वसत्त्वार्थ तत्त्वार्थ महार्थार्थ नमो ऽस्तु ते // BuSto_3.8

चिन्ताराज महातेज दानपारमितानय / तथागत महासत्त्व सर्वबुद्ध नमो ऽस्तु ते // BuSto_3.9

तथागत महारत्न तथागत महाप्रभ / तथागत महाकेतो महाहास नमो ऽस्तु ते // BuSto_3.10

तथागताभिषेकाज्ञ महाभिषेक महाविभो / लोकनाथ त्रिलोकाग्र्य लोकसूर्य नमो ऽस्तु ते // BuSto_3.11

रत्नाधिकाधिकतर रत्नभूषण रत्नधृक् / रत्नालोक महालोक रत्नकीर्ते नमो ऽस्तु ते // BuSto_3.12

रत्नोत्कर सुरत्नोत्थ मणे वज्रमणे गुण / रत्नाकर सुदीप्ताङ्ग सर्वरत्न नमो ऽस्तु ते // BuSto_3.13

महात्मयष्टि रत्नेश सर्वाशापरिपूरक / सर्वाभिप्रायसंप्राप्तिरत्नराशि नमो ऽस्तु ते // BuSto_3.14

अभ्वग्र्य व्यापि सर्वात्म वरप्रद महावर / विभूते सर्वसंपत्ते वज्रगर्भं नमो ऽस्तु ते // BuSto_3.15

यः कश्चिद् धारयेन् नाम्नामिदन्ते ऽष्टशतं शिवम् / सर्वबुद्धाभिषेकं तु स प्राप्नोत्यनघः क्षणात् // BuSto_3.16

श्री आकाशगर्भनामाष्टशताध्येषणास्तोत्रं संपूर्णम् //

digital sanskrit buddhist canon, stotra section, text no. 4: (ārya)mañjuśrīnāmāṣṭottaraśatakastotram

प्रणिपत्य मुनिं मूर्ध्ना सुप्रसन्नेन चेतसा / वक्ष्याम्यद्य च नामानि संबुद्धैरनुवर्णितम् // BuSto_4.1

सुरुपो रूपधारी च सर्वरूपो ह्यनुत्तरः / सर्वलक्षणसम्पूर्णो मञ्जुश्रीरुत्तमः श्रिया // BuSto_4.2

अचिन्त्यश्चिन्त्यविगतो ऽचिन्त्यो ऽद्भुतविक्रमः / अचिन्त्यः सर्वधर्माणामचिन्त्यो मनसस्तथा // BuSto_4.3

शून्यताभावितात्माकः शून्यधर्मसमन्वितः / शून्यस्त्वमधिमुक्तिश्च शून्यत्रिभवदेशकः // BuSto_4.4

सर्वज्ञः सर्वदर्शी च सर्वभूमिपतिर्विभुः / मञ्जुश्रीवशवर्ती च पद्माक्षः पद्मसंभवः // BuSto_4.5

पद्मकिञ्जल्कवर्णश्च पद्मपर्यङ्कवासनः / नीलोत्पलधरः पूतः पवित्रः शान्तमानसः // BuSto_4.6

प्रत्येकबुद्धो बुद्धस्त्वमादिबुद्धो निरुच्यसे / ऋद्धिमान् वशिताप्राप्तश्चतुःसत्योपदेशकः // BuSto_4.7

लोकपालः सहस्राक्ष ईश्वरस्त्वं प्रजापतिः / शिवस्त्वं सर्वभूतानां त्वं विभुर्गुणसागरः // BuSto_4.8

ऋषिस्त्वं पुण्यः श्रेष्ठश्च ज्येष्ठो जातिस्मरस्तथा / विनायको विनेता च जिनपुत्रो जिनात्मजः // BuSto_4.9

भानुः सहस्ररश्मिमस्त्वं सोमस्त्वं च बृहस्पतिः / धनदो वरुणश्चैव त्वं विष्णुस्त्वं महेश्वरः // BuSto_4.10

अनन्तो नागराजस्त्वं स्कन्दः सेनापतिस्तथा / वेमचित्रासुरेन्द्रस्त्वं भौमः शुक्रो बुधस्तथा // BuSto_4.11

सर्वदेवमयो वीरः सर्वदेवैर्नमस्कृतः / लोकधर्ममलातीतस्त्वं लोके चाग्रपुद्गलः // BuSto_4.12

लोकज्ञो लोकविज्ञातो ज्ञानिनां प्रवरो वरः / वरदो लयनं त्राणमधृष्यो मारकर्मिणाम् // BuSto_4.13

गम्भीरश्चानवद्यश्च कल्याणमित्रसंपदः / वैद्यस्त्वं शल्यहर्ता न नरदम्यः सुसारथिः // BuSto_4.14

मतिमान् गतिमांश्चैव बुद्धिमांश्च विचक्षणः / पुण्यवान् कल्पवृक्षश्च बोध्यङ्गपुष्पमण्डितः // BuSto_4.15

विमुक्तिफलसंपन्न आश्रयः सर्वदेहिनाम् / मनोहरो मनोज्ञश्च अनघो ब्रह्मचारिणाम् // BuSto_4.16

केतुस्त्वं ग्रहश्रेष्ठश्च ऋषिभिर्मुनिपुङ्गवः / युवराज्ञाभिषिक्तस्त्त्वं दशभूमीश्वरः प्रभुः // BuSto_4.17

सार्थवाहो गणश्रेष्ठो निर्वाणोत्तमदेशकः / खसमो मध्यकल्पस्त्वं त्वं तेजो वायुरेव च // BuSto_4.18

चिन्तामणिस्त्वं सत्त्वानां सर्वाशापरिपूरकः / नमो ऽस्तु ते महाविद्य सर्वभूतनमस्कृत // BuSto_4.19

श्रीआर्यमञ्जुश्रीनामाष्टोत्तरशतकस्तोत्रं समाप्तम् //

digital sanskrit buddhist canon, stotra section, text no. 5: (ārya)tārānamaskāraikaviṃśatistotram

ओम् नमो भगवत्यै आर्यश्री-एकविंशतितारायै

नमस्तारे तुरे वीरे क्षणद्युतिनिभेक्षणे / त्रैलोक्यनाथवक्त्राब्जविकसत्कमलोद्भवे // BuSto_5.1

नमः शतशरच्चन्द्रसंपूर्णेव वरानने / तारासहस्रकिरणैः प्रहसत्किरणोज्ज्वले // BuSto_5.2

नमः कनकनीलाब्जपाणिपद्मविभूषिते / दानवीर्यतपःशा(क्षा)न्तितितिक्षाध्यानगोचरे // BuSto_5.3

नमस्तथागतोष्णीषविजयानन्तचारिणि / शेषपारमिताप्राप्तजिनपुत्रनिषेविते // BuSto_5.4

नमस्तुतारहुंकारपूरिताशादिगन्तरे / सप्तलोकक्रमाक्रा[न्ते] अशेषकरुणा(णे)क्षणे // BuSto_5.5

नमः शक्रानलब्रह्ममरुद्विश्वेश्वरार्चिते / भूतवेतालगन्धर्वगणयक्षपुरस्कृते // BuSto_5.6

नमः स्त्रदिति फट्कार परजत्र(यन्त्र)प्रमर्दिनि / प्रत्यालीढपदन्यासे शिखी(खि)ज्वालाकुलोज्ज्वले // BuSto_5.7

नमस्तुरे महाघोरे मालवीरविनाशिनि / भृकुटीकृतवक्त्राब्जसर्वशत्रुनिसुन्दनी(षूदिनि) // BuSto_5.8

नमः स्त्रीरत्नमुद्राङ्कहृदयाङ्गुलिभूषिते / भूषिताशेषदिक्चक्रनिकरस्वकराकुले // BuSto_5.9

नमः प्रमुदिताशेषमुक्ताक्षीरप्रसारिणि / हसत्प्रहसतुत्तारे मारलोलवशङ्करि // BuSto_5.10

नमः समन्तभूपालपत(ट)लाकर्षण(णे)क्षणे / चरभृकुटिहूंकारसर्वापदविमोचनी(चिनि) // BuSto_5.11

नमः श्रीखण्डखण्डेन्दु[सु]मुक्ताभरण(णो)ज्ज्वले / अमिताभजिताभारभासुरे किरणोद्ध्रुवे(द्धुरे) // BuSto_5.12

नमः कल्पान्तहुतभुगज्वालामालान्तरे(र)स्थिते / आलीढमुदि(द्रि)ताबद्धरिपुचक्रविनाशिनी(नि) // BuSto_5.13

नमः करतरा(ला)घाट(त)चरणाहतभूतले / भृकुटीकृतहुंकारसप्तपातालभेदिनी(नि) // BuSto_5.14

नमः शिवे शुभे शान्ते शान्तनिर्वाणगोचरे / स्वाहाप्रणवसंयुक्ते महापातकनाशनी(शिनि) // BuSto_5.15

नमः प्रमुदिताबद्धरिगात्रप्रभेदिनि / दशाक्षरपदन्यासे विद्याहुंकारदीपिते // BuSto_5.16

नम[स्तारे] तुरे पादघातहुंकारवीजिते / मेरुमण्डलकैलाशभुवनत्रयचारिणी(णि) // BuSto_5.17

नमः सुरे स(श)राकारहरिणाङ्ककरे(र)स्थिते / हरिद्विरुक्तफट्कार(रे) अशेषविषनाशिणी(नि) // BuSto_5.18

नमः सुरासुरगणयक्षकिन्नरसेविते / अबुद्धमुदिताभोगकरी(रि) दुःस्वप्ननाशिनी(नि) // BuSto_5.19

नमश्चन्द्रार्कसम्पूर्णनयनद्युतिभास्वरे / ताराद्विरुक्ततुत्तारे विषमज्वल(र)नाशिनि // BuSto_5.20

नमः स्त्रीतत्त्वविन्यासे शिवशक्तिसमन्विते / ग्रहवेतार(ल)यक्षोष्मनाशिनि प्रवरे तुरे // BuSto_5.21

मन्त्रमूलमिदं स्तोत्रं नमस्कारैकविंशतिः(ति) / यः पठेत्प्रातः(पठेत् प्रयतः) धीमान् देव्याभक्तिसमन्विते(तः) // BuSto_5.22

सायं वा प्रातरुत्थाय स्मरेत् सर्वाभयप्रदम् / सर्वपापप्रशमनं सर्वदुर्गतिनाशनम् // BuSto_5.23

अभिषिक्तो भवेत् तूर्णं सप्तभिर्जिनकोटिभिः / मासमात्रेण चैवासौ सुखं बौद्धपदं व्रजेत् // BuSto_5.24

विषं तस्य महाघोरं स्थावरं चाथ जङ्गमम् / स्मरणान्न पदं याति खादितं पि(पी)तमेव वा // BuSto_5.25

ग्रहजो(जा)लविषार्तानां परस्त्रीविषनाशनम् / अन्येषां चैव सत्त्वानां द्विसप्तमभिवर्तितम् // BuSto_5.26

पुत्रकामो लभेत् पुत्रं घनकामो लभेद्धनम् / सर्वकामानवाप्नोति न विघ्नैः प्रतिहन्यते // BuSto_5.27

इति श्रीसम्यक्संबुद्धवैलो(रो)चनभाषितं भगवत्यार्यतारादेव्या नमस्कारैकविंशतिनामाष्टोत्तरशतकं बुद्धभाषितं परिसमाप्तम् //

digital sanskrit buddhist canon, stotra section, text no. 6: (ārya)tārāsragdharāstotram ācārya sarvajñamitraviracitam

नमस्तारायै बालार्कालोकताम्रप्रवरसुरशिरश्चारुचूडामणिश्रीसम्पत्संपर्करागानतिचिररचितालक्तकव्यक्त भक्ती / भक्त्या पादौ तवार्ये करपुटमुकुटाटोपभुग्नोत्तमाङ्गस्तारिण्यापच्छरण्ये नवनुतिकुसुमस्रग्भिरभ्यर्चयामि // BuSto_6.1

दुर्लङ्ध्ये दुःखवह्नौ विनिपतिततनुर्दुर्भगः कांदिशीक किं किं मूढः करोमीत्यसकृदपि कृतारम्भवैयर्थ्यखिन्नः / श्रुत्वा भूयः परेभ्यः क्षतनयन इव व्योम्नि चन्द्रार्कलक्ष्मीमालोकाशानिबद्धः परगतिगमनस्त्वां श्रये पापहन्त्रीम् // BuSto_6.2

सर्वस्मिन् सत्त्वमार्गे ननु तव करुणा निर्विशेषं प्रवृत्ता तन्मध्ये तद्ग्रहेण ग्रहणमुपगतं मादृशस्याप्यवश्यम् / सामर्थ्यं च द्वितीयं सकलजगदघध्वान्ततिग्मांशुबिम्बं दुःख्येवाहं तथापि प्रतपति धिगहो दुष्कृतं दुर्विदग्धम् // BuSto_6.3

धिग्धिङ् मां मन्दभाग्यं दिवसकररुचाप्यप्रणूतान्धकारं तृष्यन्तं कूलकच्छे हिमशकलशिलाशीतले हैमवत्याः / रत्नद्वीपप्रतोल्या विपुलमणिगुहागेहगर्भे दरिद्रं नाथीकृत्याप्यनाथं भगवति भवतीं सर्वलोकैकधात्रीम् // BuSto_6.4

मातापि स्तन्यहेतोर्विरुवति तनये खेदमायाति पुत्रे क्रोधं धत्ते पितापि प्रतिदिवसमसत्प्रार्थनासु प्रयुक्तः / त्वं तु त्रैलोक्यवाञ्छाविपुलफलमहाकल्पवृक्षाग्रवल्ली सर्वेभ्यो ऽभ्यर्थितार्थान् विसृजसि न च ते विक्रिया जातु काचित् // BuSto_6.5

यो यः क्लैशौघवह्निज्वलिततनुरहं तारिणी तस्य तस्येत्यात्मोपज्ञं प्रतिज्ञां कुरु मयि सफलां दुःखपातालमग्ने / वर्धन्ते यावदेते परुषपरिभवाः प्राणिनां दुखवेगाः सम्यक्संबुद्धयाने प्रणिधिधृतधियां तावदेवानुकम्पा // BuSto_6.6

इत्युच्चैरुर्ध्ववाहौ नदति नुतिपदव्याजमाक्रन्दनादं नार्हत्यन्यो ऽप्युपेक्षां जननि जनयितुं किं पुनर्यादृशी त्वम् / त्वत्तः पश्यन् परेषामभिमतविभवप्रार्थनाः प्राप्तकामा दह्ये सह्येन भूयस्तरमरतिभुवा सन्ततान्तर्ज्वरेण // BuSto_6.7

पापी यद्यस्मि कस्मात्त्वयि मम महती बर्द्धते भक्तिरेषा श्रुत्या स्मृत्या च नाम्नाप्यपहरसि हठात्पापमेका त्वमेव / त्यक्तव्यापारभारा तदसि मयि कथं कथ्यतां तथ्यकथ्ये पथ्यं ग्लाने मरिष्यत्यपि विपुलकृपः किं भिषग् रोरुधीति // BuSto_6.8

मायामात्सर्यमानप्रभृतिभिरधमैस्तुल्यकालक्रमाच्च् स्वैर्दोषैर्वाह्यमानो मठकरभ इवानेकसाधारणांशः / युष्मत्पादाब्जपूजां न क्षणमपि लभे यत्तदर्थे विशेषादेषा कार्पण्यदीनाक्षरपदरचना स्यान्ममावन्ध्यकामा // BuSto_6.9

कल्पान्तोद्भ्रान्तवातभ्रमितजलचलल्लोलकल्लोलहेलासंक्षोभोत्क्षिप्तवेलातटविकटचटत्स्फोटमोट्टाट्टहासात् / मज्जद्भिर्भिन्ननौकैः सकरुणरुदिताक्रन्दनिष्पन्दमन्दैः स्वच्छन्दं देवि सद्यस्त्वदभिनुतिपरैस्तीरमुत्तीर्यते ऽब्धेः // BuSto_6.10

धूमभ्रान्ताभ्रगर्भोद्भवगगनगृहोत्सङ्गरिङ्गत्स्फुलिङ्गस्फूर्जज्ज्वालाकरालज्वलनजवविशद्वेश्मविश्रान्तशय्याः / त्वय्याबद्धप्रणामाञ्जलिपुटमुकुटा गद्गदोद्गीतयाच्षाः प्रोद्यद्विद्युद्विलासोज्ज्वलजलदजवैराध्रियन्ते क्षणेन // BuSto_6.11

दानाम्भःपूर्यमाणोभयकटकटकालम्बिरोलम्बमालाहूङ्काराहूयमानप्रतिगजजनितद्वेषवह्नेर्द्विपस्य / दन्तान्तोत्तुङ्गदोलातलतुलिततनुस्त्वामनुस्मृत्य मृत्युं प्रत्याचष्टे प्रहृष्टः पृथुशिखरशिरःकोटिकोट्टोपविष्टः // BuSto_6.12

प्रौढप्रासप्रहारप्रहतनरशिरःशूलवल्ल्युत्सवाया शून्याटव्यां कराग्रग्रहविलसदसिस्फेटकस्फीतदर्पान् / दस्यून् दास्ये नियुङ्क्ते सभृकुटिकुटिलभ्रूकटाक्षेक्षिताक्षांश्चिन्तालेखन्यखिन्नस्फुटलिखितपदं नामधाम श्रियां ते // BuSto_6.13

वज्रकूरप्रहारप्रखरनखमुखोत्खातमत्तेभकुम्भश्च्योतत्सान्द्रास्रधौतस्फूटविकटसटासङ्कटस्कन्धसन्धिः / क्रुध्यन्नापित्सुरारादुपरि मृगरिपुस्तीक्ष्णदंष्ट्रोत्कटास्यस्त्रस्यन्नावृत्य याति त्वदुचितरचितस्तोत्रदिग्धार्थवाचः // BuSto_6.14

धूमावर्तान्धकाराकृतिविकृतफणिस्फारफूत्कारपूरव्यापारव्याप्तवक्त्रस्फुरदुरुरसनारज्जुकोनाशपाशैः / पापात्सम्भूय भूयस्तवगुणगणनातत्परस्त्वत्परात्मा धत्ते मत्तालिमालावलयकुवलस्रगविभूषां विभूतिम् // BuSto_6.15

भर्तृभ्रूभेदभीतोद्भटकटकभटाकृष्टदुःश्लिष्टकेशश्चञ्चद्वाचाटचेटोत्कटरटितकटुग्रन्थिपाशोपगूढः / क्षुत्तृट्क्षामोपकण्ठस्त्यजति स सपदि व्यापदं तां दुरन्तां यो यायादार्यताराचरणशरणतां स्निग्धबन्धूज्झितो ऽपि // BuSto_6.16

मायानिर्माणकर्मक्रमकृतविकृतानेकनेपथ्यमिथ्यारूपारम्भानुरूपप्रहरणकिरणाडम्बरोड्डामराणि / त्वत्तन्त्रोद्धार्यमन्त्रस्मृतिहृतदुरितस्यावहन्त्यप्रधृष्यां प्रेतप्रोतान्त्रतन्त्रीनिचयविरचितस्रञ्जि रक्षांसि रक्षाम् // BuSto_6.17

गर्जज्जीमूतमूर्तित्रिमदमदनदीबद्धधारान्धकार् विधुद्द्योतायमानप्रहरणकिरणे निष्पतद्बाणवर्षे / रुद्धः सङ्ग्रामकाले प्रबलभुजबलैर्विद्विषद्भिर्द्विषद्भिस्त्वद्दत्तोत्साहपुष्टिः प्रसभमरिमहीमेकवीरः पिनष्टि // BuSto_6.18

पापाचारानुबन्धोद्धृतगदविगलत्पूतिपूयास्रविस्रत्वङ्मांसासक्तनाडीमुखकुहरगलज्जन्तुजग्धक्षताङ्गाः / युष्मत्पादोपसेवागदवरगुटिकाभ्यासभक्तिप्रसक्ता जायन्ते जातरूपप्रतिनिधिवपुषः पुण्डरीकायताक्षाः // BuSto_6.19

विश्रान्तं श्रौतपात्रे गुरुभिरुपहृतं यस्य नाम्नायभैक्ष्यं विद्वद्गोष्ठीषु यश्च श्रुतधनविरहान्मूकतामभ्युपेतः / सर्वालङ्कारभूषाविभवसमुदितं प्राप्य वागीश्वरत्वं सो ऽपि त्वद्भक्तिशक्त्या हरति नृपसभे वादिसिंहासनानि // BuSto_6.20

भूशय्याधूलिधूम्रः स्फुटितकटितटीकर्पटोद्द्योतिताङ्ग् यूकायूंषि प्रपिंषन् परपुटपुरतः कर्परे तर्पणार्थी / त्वामाराध्याध्यवस्यन् वरयुवतिवहच्चामरस्मेरचार्वीमूर्वी धत्ते मदान्धद्विपदशनघनामुद्धृत्तैकातपत्राम् // BuSto_6.21

सेवाकर्मान्तशिल्पप्रणयविनिमयोपायपर्यायखिन्नाः प्राग्जन्मोपात्तपुण्योपचितशुभफलं वित्तमप्राप्नुवन्तः / दैवातिक्रामणीं त्वां कृपणजनजनन्यर्थमभ्यर्थ्य भूमेर् भूयो निर्वान्तचामीकरनिकरनिधीन् निर्धनाः प्राप्नुवन्ति // BuSto_6.22

वृत्तिच्छेदे विलक्षः क्षतनिवसनया भार्यया भर्त्स्यमानो दूरादात्मम्भरित्वात् स्वजनसुतसुहृद्बन्धुभिर्वर्ज्यमानः / त्वय्यावेद्य स्वदुःखं तुरगखुरमुखोत्खातसीम्नां गृहाणाम् ईष्टे स्वान्तःपुरस्त्रीवलयझणझणाजातनिद्राप्रबोधः // BuSto_6.23

चङ्क्रद्दिक्चक्रचुम्बिस्फुरदुरुकिरणा लक्षणालङ्कृता स्त्रीषट्दन्तो दन्तिमुख्यः शिखिगलकरुचिश्यामरोमा वराश्वः / भास्वद्भास्वन्मयूखो मणिरमलगुणः कोषभृत् स्वर्णकोषः सेनानीर्वीरसैन्यो भवति भगवति त्वत्प्रसादांशलेशात् // BuSto_6.24

स्वच्छन्दं चन्दनाम्भःसुरभिमणिशिलादत्तसङ्केतकान्तः कान्ताक्रीडानुरागादभिनवरचितातिथ्यतथ्योपचारः / त्वद्विद्यालब्धसिद्धिर्मलयमधुवनं याति विद्याधरेन्द्रः खङ्गांशुश्यामपीनोन्नतभुजपरिघप्रोल्लसत्पारिहार्यः // BuSto_6.25

हाराक्रान्तस्तनान्ताः श्रवणकुवलयस्पर्द्धमानायताक्ष्यो मन्दारोदारवेणीतरुणपरिमलामोदमाद्यद्द्विरेफाः / काञ्चीनादानुबन्धोद्धततरचरणोदारमञ्जीरतूर्यास् त्वन्नाथान् प्रार्थयन्ते स्मरमदमुदिताः सादरा देवकन्याः // BuSto_6.26

रत्नच्छन्नान्तवापीकनककमलिनीवज्रकिञ्जल्कमालाम् उन्मज्जत्पारिजातद्रुममधुपवधूद्धूतधूलीवितानाम् / वीणावेणुप्रवीणामरपुररमणीदत्तमाधुर्यतूर्यां कृत्वा युष्मत्सपर्यामनुभवति चिरं नन्दनोद्यानयात्राम् // BuSto_6.27

कर्पूरैलालवङ्गत्वगगुरुनलदक्षोदगन्धोदकायां / कान्ताकन्दर्पदर्पोत्कटकुचकुहरावर्तविश्रान्तवीच्याम् / मन्दाकिन्याममन्दच्छटसलिलसरित्क्रीडया सुन्दरीभिः क्रीडन्ति त्वद्गतान्तःकरणपरिणतोत्तप्तपुण्यप्रभावाः // BuSto_6.28

गीर्वाणग्रामणीभिर्विनयभरनमन्मौलिभिर्वन्दिताज्ञः स्वर्गोत्सङ्गे ऽधिरूढः सुरकरिणि झणद्भूषणोद्भासिताङ्गे / शच्या दोर्दामदोलाविरलवलयितोद्दामरोमाञ्चमूर्तिः पूतस्त्वद्दृष्टिपातैरवति सुरमहीं हीरभिन्नप्रकोष्ठः // BuSto_6.29

चूडारत्नावतंसासनगतसुगतव्योमलक्ष्मीवितानं प्रोद्यद्बालार्ककोटीपटुतरकिरणापूर्यमाणत्रिलोकम् / प्रौढालीढैकपादक्रमभरविनमद्ब्रह्मरुद्रेन्द्रविष्णुं त्वद्रूपं भाव्यमानं भवति भवभयच्छित्त्ये जन्मभाजाम् // BuSto_6.30

पश्यन्त्येके सकोपं प्रहरणकिरणोद्गीर्णदोर्दण्डखण्डव्याप्तव्योमान्तरालं वलयफणिफणादारुणाहार्यचर्यम् / द्विष्टव्यत्रासिहासोड्डमरडमरुकोड्डामरास्फालवेलावेतालोत्तालतालप्रमदमदमहाकेलिकोलाहलोग्रम् // BuSto_6.31

केचित्त्वेकैकरोमोद्गमगतगगनाभोगभूभूतलस्थस्वस्थब्रह्मेन्द्ररुद्रप्रभृतिनरमरुत्सिद्धगन्धर्वनागम् / दिक्चक्राक्रामिधामस्थितसुगतशतानान्तनिर्माणचित्तं चित्रं त्रैलोक्यवन्दयं स्थिरचररचिताशेषभावस्वभावम् // BuSto_6.32

लाक्षासिन्दूररागारुणतरकिरणादित्यलौहित्यमेके श्रीमत्सान्द्रेन्द्रनीलोपलदलितदलक्षोदनीलं तथान्ये / क्षीराब्धिक्षुब्धदुग्धाधिकतरधवलं काञ्चनाभं च केचित् त्वद्रूपं विश्वरूपं स्फटिकवदुपधायुक्तिभेदाद् विभिन्नम् // BuSto_6.33

सार्वज्ञज्ञानदीपप्रकटितसकलज्ञेयतत्त्वैकसाक्षी साक्षाद्वेत्ति त्वदीयां गुणगणगणनां सर्ववित् तत्सुतो वा / यस्तु व्यादाय वक्त्रं वलिभुजरटितं मादृशो रारटीति व्यापत् सा तीव्रदुःखज्वरजनितरुजश्चेतसो हास्यहेतुः // BuSto_6.34

यन्मे विज्ञाप्यमानं प्रथमतरमदस्त्वं विशेषेण वेत्त्री तद्वयाहारातिरेकश्रमविधिरबुधस्वान्तसन्तोषहेतुः / किन्तु स्निग्धस्य बन्धोर्विषमिव पुरतो दुःखमुद्गीर्य वाचां ज्ञातार्थस्यापि दुःखी हृदयलघुतया स्वस्थतां विन्दतीव // BuSto_6.35

कल्याणानन्दसिन्धुप्रकटशशिकले शीतलां देहि दृष्टिं पुष्टिं ज्ञानोपदेशैः कुरु धनकरुणे ध्वंसय ध्वान्तमन्तः / त्वत्स्तोत्राम्भःपवित्रीकृतमनसि मयि श्रेयसः स्थानमेकं दृष्टं यस्मादमोघं जगति तवगुणस्तोत्रमात्रं प्रजानाम् // BuSto_6.36

संस्तुत्य त्वद्गुणौघावयवमनियतेयत्तमाप्तं मया य पुण्यं पुण्यार्द्रवाञ्छाफलमधुररसास्वादमामुक्तिभोग्यम् / लोकस्तेनार्यलोकेश्वरचरणतलस्वस्तिकस्वस्तिचिह्नामह्नायायं प्रयायात् सुगतसुतमहीं तां सुखावत्युपाख्याम् // BuSto_6.37

श्री सर्वज्ञमित्रविरचितमार्यतारास्रग्धरास्तोत्रं समाप्तम् //

digital sanskrit buddhist canon, stotra section, text no. 7: (ārya)tārāṣṭottaraśatanāmastotram

ओम् नमः श्री आर्यतारायै /

श्रीमत्पोतलके रम्ये नानाधातुविराजिते / नानाद्रुमलताकीर्णे नानापक्षिनिकूजिते // BuSto_7.1

नानानिर्झरभाङ्कारैर्नानामृगसमाकुले / नानाकुसुमजातीभिः समन्तादधिवासिते // BuSto_7.2

नानाहृद्यफलोपेतषट्पदोद्गीतनिःस्वनैः / किन्नरैर्मधुरोद्गीतैर्मत्तरवारणसंकुलैः // BuSto_7.3

सिद्धविद्याधरगणैर्गन्धर्वैश्च निनादिते / मुनिभिर्वीतरागैश्च सततं सुनिषेविते // BuSto_7.4

बोधिसत्त्वगणैश्चान्यैर्दशभूमीश्वरैरपि / आर्यतारादिभिर्देवैर्विद्याराज्ञीसहस्रकैः // BuSto_7.5

क्रोधराजगणैश्चान्यैर्हयग्रीवादिभिर्वृते / सर्वसत्त्वहिते युक्तो भगवानवलोकितः // BuSto_7.6

व्याजहार ततः श्रीमान् पद्मगर्भासने स्थितः / महता तपसा युक्तो मैत्र्या च कृपयान्वितः // BuSto_7.7

धर्मं दिदेश तस्यां च महत्यां देवपर्षदि / तत्रापविद्धमागम्य वज्रपाणिर्महाबलः // BuSto_7.8

परया कृपया युक्तः पप्रच्छ चावलोकितम् / तस्करोरगसिंहोग्रगजव्याघ्रादिसंकुले // BuSto_7.9

सीदन्त्यमी मुने सत्त्वा मग्नाः संसारसागरे / बद्धाः सांसारिकैः पाशै रागद्वेषतमोमयैः // BuSto_7.10

मुच्यन्ते येन सत्त्वास्ते तन्मे ब्रूहि महामुने / एवमुक्तो जगन्नाथः स श्रीमानवलोकितः // BuSto_7.11

उवाच मधुरां वाणीं वज्रपाणिं प्रबोधिनीम् / शृणु गुह्यकराजेन्द्र अमिताभस्य तायणीः(णीम्) // BuSto_7.12

प्रणिधानवशोत्पन्नां ममाज्ञां लोकमातरम् / महाकरुणयोपेतां जगदुद्धरणोद्धृताम् // BuSto_7.13

उदितादित्यसंकाशां पुर्णेन्दुवदनप्रभाम् / भाषयन्तीमिमां तारां सदेवासुरमानुषान् // BuSto_7.14

कम्पयन्तीं च त्रीन् लोकान् त्रासयन्तीं यक्षराक्षसान् / नीलोत्पलकरां देवीं मा भैर्मा भैरिति ब्रुवन् // BuSto_7.15

जगत्संरक्षणार्थयाहमुत्पादिता जिनैः / कान्तारे शस्त्रसंपाते नानाभयसमाकुले // BuSto_7.16

स्मरणादेव नामानि सत्त्वान् रक्षाम्यहं सदा / तारयिष्याम्यहं सत्त्वान् नानाभयमहार्णवात् // BuSto_7.17

तेन तारेति मां लोके गायन्ति मुनिपुंगवाः / कृताञ्जलिपुटो भूत्वा ततः सादरसाध्वसः // BuSto_7.18

ज्वलयत्यन्तरिक्षे तामिदं वचनमब्रवीत् / नामाष्टशतकं ब्रूहि यत्पुरा कीर्तितं जनैः // BuSto_7.19

दशभूमीश्वरैर्नाथैर्बोधिसत्त्वैर्महर्द्धिकैः / सर्वपापहरं पुण्यं माङ्गल्यं कीर्तिवर्द्धनम् // BuSto_7.20

धनधान्यकरं चैव आरोग्यं पुष्टिवर्धनम् / आयुरारोग्यजनकं सर्वसत्त्वसुखावहम् // BuSto_7.21

लक्ष्म्याः श्रियः स्थापकं च सर्वसत्त्वविवर्द्धनम् / मैत्रीमालम्ब्य सत्त्वानां तत्कीर्तय महामुने // BuSto_7.22

एवमुक्ते जगन्नाथः प्रहसन्नवलोकितः / व्यवलोक्य दिशः सर्वा मैत्रीस्फरणया दृशा // BuSto_7.23

दक्षिणं करमुद्धृत्य पुण्यलक्षणमण्डितम् / तमुवाच महाप्राज्ञः साधु साधु महातप // BuSto_7.24

नामानि शृणु महाभाग सर्वसत्त्वैकवत्सरे / यानि संकीर्त्य मनुजा सम्पदा स्युर्धनेश्वराः // BuSto_7.25

सर्वव्याधिविनिर्मुक्ताः सर्वैश्वर्यगुणान्विताः / अकालमृत्युनिर्दग्धाश्च्युता यान्ति सुखावतीम् // BuSto_7.26

तान्यहं सम्प्रवक्ष्यामि देवसंघाः शृणुत मे / अनुमोदध्वमेतद्वा भविष्यध्वं सुनिर्वृताः // BuSto_7.27

ओम् लोचने सुलोचने तारे तारोद्भवे सर्वसत्त्वानुकम्पिनि सर्वसत्त्वतारिणि सहस्रभुजे सहस्रनेत्रे / ओम् नमो भगवते अवलोकय अवलोकय मां सर्वसत्त्वांश्च हुं हुं फट् फट् स्वाहा / ओम् शुद्धे विशुद्धे सुगतात्मजे

मैत्रीहृदये निर्मले श्यामे श्यामरूपि महाप्राज्ञे प्रबलवरभूषिते / अपराजिता महारौद्री विश्वरूपी महाबला / ओम् सुश्रिये // BuSto_7.28

ओम् कल्याणी महातेजा लोकधात्री महायशाः / सरस्वती विशालाक्षी प्रज्ञा श्रीर्बुद्धिवर्धिनी // BuSto_7.29

धृतिदा पुष्टिदा स्वाहा ओम्कारा कामरूपिणी / सर्वसत्त्वहितोद्युक्ता संग्रामोत्तारिणी जया // BuSto_7.30

प्रज्ञापारमिता देवी आर्यतारा मनोरमा / दुन्दुभी शङ्खिनी पूर्णा विद्याराज्ञी प्रियम्वदा // BuSto_7.31

चन्द्रानना महागौरी अजिता पीतवाससा / महामाया महाश्वेता महाबलपराक्रमा // BuSto_7.32

महारौद्री महाचण्डी दुष्टसत्त्वनिषूदिनी / प्रशान्ता शान्तरूपा च विजया ज्वलनप्रभा // BuSto_7.33

विद्युन्मारी ध्वजी खङ्गी चक्री चापोद्यतायुधा / जम्भनो स्तम्भनी काली कालरात्रिर्निशाचरी // BuSto_7.34

रक्षणी मोहनी शान्ता कान्तारी द्रावणी शुभा / ब्रह्माणी वेदमाता च गुह्या च गुह्यवासिनी // BuSto_7.35

माङ्गल्या शाङ्करी सौम्या जातवेदा मनोजवा / कपालिनी महावेगा सन्ध्या सत्या ऽपराजिता // BuSto_7.36

सार्थवाहकृपादृष्टिर्नष्टमार्गप्रदर्शिनी / वरदा शासनी शास्त्री सुरूपा ऽमृतविक्रमा // BuSto_7.37

शर्वरी योगिनी सिद्धा चण्डारी(ली)अमृता ध्रुवा / धन्या पुण्या महाभागा शुभगा प्रियदर्शना // BuSto_7.38

कृतान्तत्रासिनी भीमा उग्रा उग्रमहातपा / जगद्धिते सदोद्युक्ता शरण्या भक्तवत्सला // BuSto_7.39

वागीश्वरी शिवा सूक्ष्मा नित्या सर्वक्रमानुगा / सर्वार्थसाधनी भद्रा गोप्त्री धात्री धनप्रदा // BuSto_7.40

अभया गौतमी पुण्या श्रीमल्लोकेश्वरात्मजा / तारानामगुणानन्ता सर्वाशापरिपूरका // BuSto_7.41

ओम् तारे कृपावरे श्रीक्लेशश्रवणीये स्वाहा / नाम्नामष्टोत्तरशतं ह्येतद्यत्कीर्तितं मया / रहस्यभूतं गुह्यं च देवानामपि दुर्लभम् // BuSto_7.42

सौभाग्यभोगकरणं सर्वकिल्विषनाशनम् / सर्वव्याधिप्रशमनं सर्वसत्त्वसुखावहम् // BuSto_7.43

त्रिकालं यः पठेद्धीमान् शुचिस्थाने समाहितः / सो ऽचिरेणैव कालेन राज्यश्रियमवाप्नुयात् // BuSto_7.44

दुःखी स्यात्तु सुखी नित्यं दरिद्रो धनवान् भवेत् / पुत्रो भवेन्महाप्राज्ञो मेधावी च न संशयः // BuSto_7.45

बन्धनान्मुच्यते बद्धो व्यवहारे जयोअ भवेत् / शत्रवो मित्रतां यान्ति शृङ्गिणः शुनका अपि // BuSto_7.46

संग्रामे संकटे दुर्गे नानाभयसमुच्छ्रिते / स्मरणादेव नामानि सर्वान्भयानपोहति // BuSto_7.47

नाकालमृत्युर्भवति प्राप्नोति विपुलाशयम् / मानुष्ये सफलं जन्म तस्यैकस्य महात्मनः // BuSto_7.48

यश्चेदं प्रातरुत्थाय मानवः कीर्तयिष्यति / स दीर्घकालमायुष्मान् श्रियं च लभते नरः // BuSto_7.49

देवा नागास्तथा यक्षा गन्धर्वा कठपूतनाः / पिशाचा राक्षसा भूता मातरो रौद्रतेजसाः // BuSto_7.50

डाकिन्यस्तारकाः प्रेताः स्कन्दोमाद्या महाग्रहाः / छायापस्मारकाश्चैव खेटका खार्दकादयः // BuSto_7.51

वेतालाश्चिंचका प्रेष्या ये चान्ये दुष्टचेतसः / छायामपि न लङ्घन्ति किं पुनस्तस्य विग्रहम् // BuSto_7.52

दुष्टसत्त्वा न बाधन्ते व्याधयो नाक्रमन्ति च / सर्वैश्वर्यगुणैर्युक्तो वंशवृद्धिश्च जायते // BuSto_7.53

जातिस्मरो भवेद् धीमान् कुलीनः प्रियदर्शनः / प्रीतिमांश्च महावाग्मी सर्वशास्त्रविशारदः // BuSto_7.54

कल्याणमित्रसंसेवी बोधिचित्तविभूषितः / सदा ऽविरहितो बुद्धैर्यत्र यत्रोपपद्यते // BuSto_7.55

श्रीआर्यताराभट्टारिकाया नामाष्टोत्तरशतं बुद्धपरिभाषितं परिसमाप्तम् //

digital sanskrit buddhist canon, stotra section, text no. 8: (ārya)tārāstutiḥ ācārya candradāsakṛtā

नमस्तारायै

सुखदचक्रचारुचूडामणिरुचिरमरीचिसंचयप्रचुरशिखाप्रचारपरिचुम्बितचर्चितचरणचन्द्रके / जगति चराचरे ऽपि साचीकृतचकितकृपालुलोचने स्तुतिवचनोपचारमुचिताचरतिं रचयामि देवि ते // BuSto_8.1

नखरकठोरकोटिकुट्टितकरिकटतटपाटनोत्कटाः प्रविकटरुधिरपटलपटपालिता अटवीविलुण्ठकाः / विकटसटाट्टहासघटितावटतटघटानोद्भटास्त्वज्जुषि झटिति यान्ति सटिनः कुण्ठादपि कुण्ठशक्तिताम् // BuSto_8.2

मलिनमहाकपोलतलविगलितमदजलमलनविह्वलाः स्खलदलिजालबहलकोलाहललितविलासलासिनः / विचलितकर्णतालपवनाहतललितविलेपधूलयः पथि न गजाश्चलन्ति कुलशैलतुलास्तव ला(ना)मलालिताः // BuSto_8.3

मारुतघातजातरभसोच्छलदनलशिखाकदम्बकप्रतिहतपुरपुरन्ध्रिहाहारवत्वरितदिगन्तभैरवः / उद्धतधूम्रधूमधूलिधुतबद्धघनान्धकारकं त्वन्नतिनीतिगतिरेति शमं बहुशो हुताशनः // BuSto_8.4

चलितलतावितानकुटिलोद्गमदुर्गमगहनवर्तिन सपदि पुरो नरस्य तारेति मनागपि नामधारिणः / स्फीतफणौघघोरफूत्कारपरिस्फुरतानलस्फुटस्फुरदुरुविस्फुलिङ्गविस्फारिणि फणिनि विषं विनश्यति // BuSto_8.5

क्षणकृतकोपकम्पकरकर्षितखरकरवालनिर्मलव्यतिकरकरकरवालविकरालमहाबलभुजार्गलः / प्रस्थितपथिकनिकटकटविघटनपटुरतिनिष्ठुराशयो भगवति भक्तिवन्तुमुपसर्पति तव न वने ऽपि तस्करः // BuSto_8.6

यो ऽपि नरेन्द्रवीरहुङ्कारकचग्रहनिग्रह् ग्रहग्रस्त इव रज्जुहिञ्जीरवजर्जरिताङ्गपञ्जरः / प्रतिपदखनखनायमानमुखरीकृतखरखरशृङ्खलावलिस्त्वच्चरणारविन्दमभिवन्द्य स नन्दति मुक्तबन्धनः // BuSto_8.7

कलकलकलिललोलकल्लोलजलोल्ललत्कालिकानिलास्फालितविपुलबहलवेलाकुलकूलतमालपल्लवात् / सरभसमकरनिकरखरनखरसुदुस्तरतो ऽपि सागरात् तारिणि तरलतारतरतारकमातुरमेत्य रक्षसि // BuSto_8.8

सूक्ष्मविरावसारसरघोत्करनिर्भरघोरघर्घरघ्राणा घृणाङघ्रिपाण्यस्रविस्रीकृतक्वथितशरीरपञ्जरा / यत्क्षणमहाप्रसादावेशत्वत्प्रणता तारिणि कामरूपिणा तत्क्षणलब्धलोलकिरणमणिकुण्डलमण्डितगण्डमण्डला // BuSto_8.9

यूकविकीर्णशीर्णपटकर्पटकटितटवेष्टनोद्भटः संकटपेट्टपूरमात्रार्जनपरपुरपिण्डतर्कणः / यदि तव नामकं हृदि करोति हि राक्षसैककः प्रौढवधूविधूतचामीकरखचितविचित्रचामरम् // BuSto_8.10

श्रीचन्द्रदासविरचितार्यतारास्तुतिः समाप्ता //

digital sanskrit buddhist canon, stotra section, text no. 9: aṣṭamātṛkāstotram

ओम् नमः श्रीविघ्नेश्वराष्टमातृकाभ्यः /

विघ्नेश्वर महावीर सिद्धिरूपाय वृद्धये / विघ्ननाशाय देवाय गणेशाय नमाम्यहम् // BuSto_9.1

पूर्वे ब्रह्माणी देवी हंसमारुह्य संस्थिता / पीतवर्णप्रभा देवी श्रीब्रह्माणि नमो ऽस्तु ते // BuSto_9.2

दक्षिणे श्रीवाराही महिषासनसंस्थिता / रक्तवर्णा ऽङ्कुशहस्ता श्रीवाराहि नमो ऽस्तु ते // BuSto_9.3

पश्चिमे चेन्द्राणी देवी गजमारुह्य संस्थिता / कुङ्कुमाभा वज्रहस्ता श्रीइन्द्राणि नमो ऽस्तु ते // BuSto_9.4

उत्तरे माहेश्वरी देवी वृषमारुह्य संस्थिता / श्वेतवर्णप्रभा देवी माहेश्वरि नमो ऽस्तु ते // BuSto_9.5

आग्नेये बालकौमारी मयूरकान्तिपूरणी / रक्तवर्णा शक्तिहस्ता श्रीकौमारि नमो ऽस्तु ते // BuSto_9.6

नैरृत्ये वैष्णवी देवी श्यामाभा गरुडासना / शङ्खचक्रधरा देवी नारायणि नमो ऽस्तु ते // BuSto_9.7

वायव्ये चामुण्डा देवी सिंहमारुह्य संस्थिता / ककारमूर्तिधारी च खड्गहस्तां नमाम्यहम् // BuSto_9.8

ईशाने चण्डिका देवी धूम्रवर्णा प्रज्वालिनी / कर्तिमुण्डधरा देवी महालक्ष्मि नमो ऽस्तु ते // BuSto_9.9

अष्टपीठस्थिता देवीरष्टवृक्षनिवासिनीः / अष्टभैरवसंयुक्ता अष्टमातृका नमाम्यहम् // BuSto_9.10

सूर्यः सोमो महीपुत्रो बुधो देवासुरगुरू / शनिश्च राहुः केतुश्च यमाय च नमो नमः // BuSto_9.11

श्री अष्टमातृकास्तोत्रं समाप्तम् //

digital sanskrit buddhist canon, stotra section, text no. 10: avadhānastotram (vandanāstavaṃ vā)

ओम् नमो लोकनाथाय

आराधितो ऽसि भुजगासुरलोकसंघैर्गन्धर्वयक्षमुनिभिः परिवन्दिताय / द्वात्रिंशदादिवरलक्षणभूषिताय नित्यं नमामि शिरसा करुणामयाय // BuSto_10.1

बालार्ककोटिसमतेजकलेवराय आलोकिते सुगतशेखरधारिताय / शुभ्रांशुमौलितिलकाय जटधराय नित्यं नमामि शिरसा करुणामयाय // BuSto_10.2

अम्भोजपाणिकमलासनसंस्थिताय यज्ञोपवीतफणिराजसुमण्डिताय / रत्नादिहारकनकोज्ज्वलभूषिताय नित्यं नमामि शिरसा करुणामयाय // BuSto_10.3

उत्पादभङ्गभवसागरतारकाय दुर्ग्राहदुर्गतिभुवां परिमोचकाय / रागादिदोषपरिमुक्त सुनिर्मलाय नित्यं नमामि शिरसा करुणामयाय // BuSto_10.4

मैत्र्यादिभिश्चतुरब्रह्मविहारणाय धारामृतैः सकलसत्त्वसुपोषणाय / मोहान्धकारकृतदोषविदारणाय नित्यं नमामि शिरसा करुणामयाय // BuSto_10.5

दैत्येन्द्रवंशवलितारणमोक्षदाय सत्त्वोपकारत्वरितकृतनिश्चयाय / सर्वज्ञज्ञानपरिपूरितदेशनाय नित्यं नमामि शिरसा करुणामयाय // BuSto_10.6

अष्टादशनरकमार्गविशोधनाय अज्ञानगाढतिमिरपरिध्वंसनाय / ज्ञानैकदृष्टिव्यवलोकितमोक्षदाय नित्यं नमामि शिरसा करुणामयाय // BuSto_10.7

त्वं लोकनाथ भुवनेश्वर सुप्रदाय दारिद्रयदुःखमयपञ्जरदारणाय / त्वत्पादपङ्कजयुगप्रतिवन्दिताय नित्यं नमामि शिरसा करुणामयाय // BuSto_10.8

मार्तण्डमण्डलरुचिस्तथतास्वभावं त्वां नौम्यहः सुफलदः विमलप्रभावम् / चिन्तामणिं सुसदृशं त्वतिदुर्भगो ऽहं नित्यं नमामि शिरसा करुणामयाय // BuSto_10.9

यद्भक्तितो दशनखाञ्जलिसोत्तमाङ्गमष्टाङ्गकैः प्रणमितं तव पादपद्म / दुःखार्णवे पतितमुद्धर मां कृपालो नित्यं नमामि शिरसा करुणामयाय // BuSto_10.10

सप्ताष्टभूतगतमाधवशुक्लपक्षे तारापुनर्वसु सहे भृगुसूनुवारे / श्रीक्रौंचदारणतिथौ च स्तुतिं करोमि मे देहि वाञ्छितफलं भुवनैकनाथ // BuSto_10.11

ये पठन्ति महापुण्यं पवित्रं पापनाशनम् / सर्वकामार्थसिद्धिं च गमिष्यन्ति सुखावतीम् // BuSto_10.12

श्रीमदार्यावलोकितेश्वरभट्टारकस्यावधानस्तोत्रं समाप्तम् //

digital sanskrit buddhist canon, stotra section, text no. 11: avalokiteśvarahayagrīvadhāraṇī

नमो रत्नत्रयाय / नम आर्यावलोकितेश्वराय बोधिसत्त्वाय महासत्त्वाय महाकारुणिकाय / नमः सर्वसत्त्वव्यसनघातिने / नमः सर्वसत्त्वव्यसनावहारिणे / नमः सर्वसत्त्वभयोत्तारणाय / नमः सर्वभवप्रशमनकराय / नमः सर्वसत्त्वबोधिचिकित्संकराय / नमः सर्वबन्धनच्छेदनपराय / नमः सर्वदुःखप्रमोक्षणकराय / नमः सर्वान्धकारविधमनकराय / नमः सर्वविद्याराजवशप्राप्तये महायोगयोगीश्वराय /

तस्मै नमस्कृत्वा इदमार्यावलोकितेश्वरमुखोद्गीर्णम् / ऋषिविददादेवनागयक्षराक्षसशक्रब्रह्मलोकपालविष्णुमहेश्वरनारायणस्कन्दकुबेरासुरेन्द्रमातृगण नमस्कृतं वज्रक्षुरमहीयं हयग्रीवब्रह्मपरमहृदयमावर्तयिष्यामि / अप्रमेयार्थसाधकम् असह्यं सर्वभूतानां सर्वविघ्नविनाशकम् / अमोघं सर्वकर्मणां विषाणाञ्च विनायनम् / तद् यथा

ओम् तरुल तरुल वितरुल वितरुल सर्वविषघातक सर्वभूतविद्रावक ज्वलितानलविस्फुलिङ्गाट्टहास केसरातोपाप्रवितकाय वज्रक्षुरनिर्गतित चलितवसुधातल बज्रोदश्वसत हासितमरुतक्षतिप्रशमनकर परदुष्टविघ्नान् संभक्षणकर स्वविद्योपदेशकर परमशान्तिकर बुद्ध बुद्ध बोधयामिति /

भगवन् हयग्रीव सर्वविद्याहृदयमावर्तयिष्यामि / खाद खाद महारौद्रमन्त्रेण / रक्ष रक्ष आत्मस्वहितान् मन्त्रेण / सिध्य सिध्य सर्वकर्मसु मे सिद्धे देहि देहि / आवेश आवेश प्रवेश प्रवेश सर्वग्रहेषु अप्रतिहत / धुन धुन विधुन विधुन मथ मथ प्रमथ प्रमथ सर्ववरोपग्रम / कृतकखोर्दो / दुर्लङ्घित मूषिक / विषकर विषद्रंष्ट्र विषचूर्णयो अभिचारविषकरण / सिध्य अञ्जन चक्षुर्मोहन / चित्तविक्षोभणकर / नित्यापरप्रेक्षण त्रासय त्रासय महाबोधिसत्त्व ऋद्धदंष्ट्रणेन सर्वभयेभ्यः सत्त्वानां रक्ष रक्ष / मम बुद्धधर्मसंघानुज्ञातं मे कर्म शीघ्रं कुरु कुरु फट् / हयग्रीवाय फट् / बज्रक्षुराय फट् / वज्रदंष्ट्रोत्कटभयभैरवाय फट् / परमन्त्रणनाशनकराय फट् / परदुष्टविघ्नान् संभक्षणकराय फट् / सर्वग्रहोत्सादनकराय फट् / सर्वग्रहेषु

अप्रतिहताय फट् / पटलमुखाय फट् / ये केचित् मम अहितेषिणः काये क्रमन्ति मन्त्रयण यमन्ति जुह्वानति काखोर्दं कुर्वन्ति / तेन सर्वेणाभिमुखेन वाक्रीहाय फट् / नमः सर्वदुष्टग्रहोत्सादनाय हयग्रीवाय सिध्यन्तु मन्त्रपदैः स्वाहा / ओम् अमितोद्भवाय हुं फट् फट् स्वाहा / ओम् नमो हयाय स्वाहा / ओम् नमो विश्वमूर्तये स्वाहा / नमः सर्वसत्त्वानां सिध्यन्तु मन्त्रपदाय स्वाहा // (BuSto_11)

digital sanskrit buddhist canon, stotra section, text no. 12: avalokiteśvarāṣṭakastotram

ओम् नमो ऽवलोकितेश्वराय

स्तुत्वा गुणैरनुपमैरनुबिन्दुपात्रं स्तोत्रं मया कृतमिदं जडवालिशेन / लोकेश्वरं गुणनिधिं गुणसागरं च नित्यं नमामि शिरसाञ्जलिसंपुटेन // BuSto_12.1

प्राणेषु यन् स्रवति येन रसाम्बुपारान् क्षुत्तृष्णदुःखपरिपीडितसर्वसत्त्वान् / एवंविधं जगदिदं परिपालनाय तस्मै नमो ऽस्तु सततं हि यथार्थनाम्ने // BuSto_12.2

सत्कुङ्कुमात्तमरुणाङ्कसमानवर्णं द्वात्रिंशलक्षणविभूषितगात्रशोभम् / सर्वेषु यस्य करुणामयवत्सलत्वं तस्मै नमामि भवते करुणामयाय // BuSto_12.3

संसारसागरमहालयनाशदक्ष एकस्त्वमेव शरणं भुवि नैकनाथ / केनापि त्वद्गुणगणा गणने न शक्यास्तं लोकनाथमवलोकितनामसंज्ञम् // BuSto_12.4

नानाविधाभरणमण्डितदिव्यरुपं बालेन्दुलग्नजटभूषितलोकनाथम् / वामे च मण्डलधरं वरदं च सव्ये त्वां लोकनाथ शरणं प्रव्रजामि नित्यम् // BuSto_12.5

ब्रह्मादिभिः परिवृतं सुरसिद्धसंघैर्गन्धर्वकिन्नरमहोरगनागयक्षैः / नाथस्य यस्य भवतश्चरणाम्बुजं च तं लोकनाथचरणं शरणं व्रजामि // BuSto_12.6

भूतैः पिशाचगरुडोरगराक्षसीभिः कुम्भाण्डपूतनमहल्लकराजराजैः / वैश्वानरासुरशतैः परिवारभूतं तं लोकनाथचरणं शरणं गतो ऽस्मि // BuSto_12.7

अब्धिर्दिवाकरकरैर्नहि शोषमेति तद्वत्कवीश्वरशतैर्गुणसागरस्ते / लोकेश्वर प्रथितकीर्तिनिधानभूतो न क्षीयते गुणनिधिर्गुणसागरस्य // BuSto_12.8

श्लोकाष्टकं प्रतिदिनं खलु ये पठन्ति ते प्राप्नुवन्ति सहसा धनपुत्रमोक्षान् / कुष्ठादिरोगनिकरं क्षमतां प्रयाति वन्दामहे च नितरां तव पादयुग्मे // BuSto_12.9

श्री आर्यावलोकितेश्वरस्य श्लोकाष्टकं समाप्तम् //

digital sanskrit buddhist canon, stotra section, text no. 13: avalokiteśvarastavaḥ candrakāntābhikṣuṇīkṛtaḥ

ओम् नमो ऽवलोकितेश्वराय

भुवनत्रयवन्दितलोकगुरुम् अमराधिपतिस्तुतब्रह्मवरम् / मुनिराजवरं द्युतिसिद्धिकरं प्रणमाम्यवलोकितनामधरम् // BuSto_13.1

सुगतात्मजरुपसुरुपधरं बहुलक्षणभूषितदेहवरम् / अमिताभतथागतमौलिधरं कनकाब्जविभूषितवामकरम् // BuSto_13.2

कुटिलामलपिङ्गलधूम्रजटं शशिबिम्बसमुज्ज्वलपूर्णमुखम् / कमलायतलोचनचारुवरं हिमखण्डविपाण्डुरगण्डयुगम् // BuSto_13.3

अधरं जितपङ्कजनाभिसमं शरदम्बुदगर्जितमेघरुतम् / बहुरत्नविभूषितबाहुयुगं तनुकोमलशाद्वलपाणितलम् // BuSto_13.4

मृगचर्मविवेष्टितवामतनुं शुभकुण्डलमण्डितलोलधरम् / विमलं कमलोदरनाभितलं मणिमण्डितमेखलहेमवरम् // BuSto_13.5

कटिवेष्टितचित्रसुवस्त्रधरं जिनबोधिमहोदधिपारगतम् / बहुपुण्यमुपार्जितलब्धवरं ज्वरव्याधिहरं बहुसौख्यकरम् // BuSto_13.6

शुभशान्तिकरं त्रिभवास्यकरं सचरं खचरं स्तुतिदेहधरम् / विविधाकुलनिर्जितमारबलं दशपारमितापरमार्थकरम् // BuSto_13.7

चतुरस्रविहारविवेकपरं तथताद्वयबोधविबोधकरम् / मणिनूपुरगर्जितपादयुगं गजमन्दविलम्बितहंसगतिम् // BuSto_13.8

परिपूर्णमहामृतलब्धधृतिं क्षीरोदजलार्णवनित्यगतिम् / श्रीपोतलकाभिनिवासरतिं करुणामयनिर्मलचारुदृशम् // BuSto_13.9

श्रीमदार्यावलोकितेश्वरभट्टारकस्य चन्द्रकान्ताभिक्षुणीविरचितः स्तवः समाप्तः //

digital sanskrit buddhist canon, stotra section, text no. 14: avalokiteśvarastotram carapatipādaviracitam

ओम् नमो ऽवलोकितेश्वराय

देवमनुष्यासुरनुतचरणः प्रतिहतजन्मजरारुजमरणः / लोकेश त्वं मामशरण्यं रक्ष कृपालो कुरु कारुण्यम् // BuSto_14.1

संसारोदधिमध्यनिमग्नं क्लेशमहोर्मिसमाहितभग्नम् / मामवधारय मा विरुवन्तं त्राहि महाकृप नौमि भवन्तम् // BuSto_14.2

तृष्णातिमिरोपद्रुतनेत्रं मरणमहाभयविह्वलगात्रम् / पालय भगवन्नवलोकय मां यावदवीचिं यामि न विषमाम् // BuSto_14.3

कृतमन्यस्त्रीग्रहणमजस्रं हतमज्ञेयं प्राणिसहस्रम् / नाथ मया कृतपापमशेषं नाशय संप्रति कायिकदोषम् // BuSto_14.4

यज्जोवितसत्कारनिमित्तं लोकान् नित्यं भणितमसत्यम् / तल्लोकेश्वर शमय समस्तं वाचिकनरकं चिरमभ्यस्तम् // BuSto_14.5

सत्त्वानामिह चिन्तितमहितं स्वयमनुमोदितमपि नरविहितम् / अधुना तन्मम मानसपापं स्फोटय नाथ करोमि विलापम् // BuSto_14.6

देवमनुष्यासुरजातीनां तिर्यःनारकप्रेतगतीनाम् / सत्त्वा ये निवसन्ति सदार्ता रक्षसि तानिति तव मयि वार्ता // BuSto_14.7

तेन ममोपरि सृज कारुण्यं वीक्ष्य शरीरगतं तारुण्यम् / इति शृणु भगवन् भवति भणामि यावन्नरकं नैव विशामि // BuSto_14.8

किं चोपेत्य करोषि परार्थं मुञ्चसि भगवन् मामकृतार्थम् / अथवा प्रेक्ष्य कृपा तव पुण्यं जनयसि दृष्टं कथमविपन्नम् // BuSto_14.9

स्मरणेनापि भवसि परितुष्टः क्षिपसि च कलुषं किमिति न दृष्टः / यस्माद् भगवन् परहितदक्ष क्षेपं मा कुरु मामिह रक्ष // BuSto_14.10

दन्तितुरङ्गमपुत्रकलत्रं राज्यमकण्टकवेश्मविचित्रम् / अस्थिशिरो ऽसृङ्मांसपर्यन्तं भवतार्थिभ्यो दत्तमनन्तम् // BuSto_14.11

अञ्जनगुटिकापादुकसिद्धिः सिद्धौषधिमणिमन्त्रविशुद्धिः / सिद्धयति यक्षस्त्रीपुरवेशः तुष्यसि यस्य त्वं लोकेश // BuSto_14.12

ये करचरणविलोचनहीना विविधव्याधिमहाभयदीनाः / ते त्वयि तुष्टे पुष्टशरीरा विलसन्त्यरुजो गुणगम्भीराः // BuSto_14.13

गरलं व्याधिर्ग्रहडाकिन्यः शान्तिं यान्ति सदा योगिन्यः / सरति न तस्य पुरो यमदूतः प्रोतो यस्य च त्वं जिनभूतः // BuSto_14.14

इति लोकेश्वर किं क्रियमाणं मुञ्चसि भगवन् मामत्राणम् / रौम्यहमनुदिनमुद्यतपाणिर्नाशय त्राससमाकुलवाणिः // BuSto_14.15

यद्विषयेन्द्रियचञ्चलमनसा कृतबहुपापं व्याकुलमनसा / नीतं जन्म मया ऽस्मिन् सकलं जठरनिमित्तं भ्रमता विकलम् // BuSto_14.16

तत्कुरु संप्रति मम लोकेश प्रणतो विविधाञ्जलिरहमेषः / येनाभुक्त्वापायिकदोषं सुगतिं भवतो यामि न मोक्षम् // BuSto_14.17

मोहद्वेषविनाशनहेतुस्त्वं संसारमहोदधिसेतुः / पतितस्त्रस्तोत्थापितबाहुस्त्वं गुरुदुरितनिशाकरराहुः // BuSto_14.18

देशितसुगतानुत्तरतत्त्वस्त्वं पालितबहुदुःखितसत्त्वः / निर्जितदुर्जयमन्मथमारस्त्वं संतीर्णभवार्णवपारः // BuSto_14.19

सकलालाननिकृन्तनदेहस्त्वं परिभावितजगतसुदेहः / भगवन्ननुपमकरुणासिन्धुस्त्वं जनविदितो ऽकारणबन्धुः // BuSto_14.20

लीलाविदलितकर्मविभङ्गस्त्वं परहितविषयव्यासङ्गः / दिव्यध्यानसमाहितचित्तस्त्वं याचकसाधारणचित्तः // BuSto_14.21

परमपकुर्वंन्नपि करुणावान् मयि परितोषं न करोषि भवान् / कथमिह मोहमहोरगदष्टं विषयशरीरमकुशलं भ्रष्टम् // BuSto_14.22

सकलजनार्थं प्रति या करुणा सा किं भवतो नियतस्फरणा / येन न रक्षसि किल्विषवन्तं भवतः पुरतो मां विरुवन्तम् // BuSto_14.23

नाथ कृपा ते व्योमविशाला सत्त्वेषु हि यथाम्बुदधारा / स्थलजलनिम्नोन्नतबहुदेशे सरति निरन्तरमनिशमशेषे // BuSto_14.24

इति भगवत्स्मरणाद्यत्पुण्यं मम तेनेदं जगदक्षुण्णम् / लभतां श्रीपोतलकाचलवासं जनयतु सुन्दरविविधविलासम् // BuSto_14.25

श्रीमदार्यावलोकितेश्वरभट्टारकस्य चरपतिपादविरचितं स्तोत्रं समाप्तम् //

digital sanskrit buddhist canon, stotra section, text no. 15: avalokiteśvarastotram vāsukināgarājakṛtam

ओम् नमो ऽवलोकितेश्वराय

जटाधरं सौम्यविशाललोचनं सदाप्रसन्नाननचन्द्रमण्डलम् / सुरासुरैर्वन्दितपादपङ्कजं नमामि नाथं मणिपद्मसंभवम् // BuSto_15.1

सरोजपत्रायतदिव्यलोचनं कुदृष्टिसंशोधितशुद्धलोचनम् / कृपामृतार्द्रं जगदेकलोचनं नमामि नाथं मणिपद्मसंभवम् // BuSto_15.2

हारेन्दुहारार्धहिमाधिकोज्जवलं निघृष्टगण्डामललोलकुण्डलम् / गभस्तिमालाकुलकोटिसंकुलं नमामि नाथं मणिपद्मसंभवम् // BuSto_15.3

प्रबुद्धधर्माध्वनि धर्मधातुकं सहस्रबाहुं द्विचतुश्च षड्भुजम् / खधातुना तुल्यमनन्तबाहुकं नमामि नाथं मणिपद्मसंभवम् // BuSto_15.4

उपायप्रज्ञोदधिमन्थनोद्भवं त्रिधातुसंरक्षणहेतुसंभवम् / जिनेन्द्रमौलिं जिनधातुसंभवं नमामि नाथं मणिपद्मसंभवम् // BuSto_15.5

पद्मोपरि गतं नाथं पद्महस्तं जटाधरम् / आर्यावलोकितं वन्दे सर्वसत्त्वानुकम्पकम् // BuSto_15.6

श्रीवासुकिनागराजकृतमार्यावलोकितेश्वरस्तोत्रं समाप्तम् //

digital sanskrit buddhist canon, stotra section, text no. 16: avalokiteśvarāṣṭottaraśatanāmastotram

ओम् नमो ऽवलोकितेश्वराय

पद्मसत्त्व महापद्म लोकेश्वर महेश्वर / अवलोकितेश धीराग्र्य वज्रधर्म नमो ऽस्तु ते // BuSto_16.1

धर्मराज महाशुद्ध सत्त्वराज महामते / पद्मात्मक महापद्म पद्मनाथ नमो ऽस्तु ते // BuSto_16.2

पद्मोद्भव सुपद्माभ पद्मशुद्ध सुशोधक / वज्रपद्म सुपद्माङ्क पद्मपद्म नमो ऽस्तु ते // BuSto_16.3

महाविश्व महालोक महाकाय महोपम / महाधीर महावीर महाशौरे नमो ऽस्तु ते // BuSto_16.4

सत्त्वाशय महायान महायोग पितामह / शम्भु शङ्कर शुद्धार्थ बुद्धपद्म नमो ऽस्तु ते // BuSto_16.5

धर्मतत्त्वार्थ सद्धर्म शुद्धद्धर्मं सुधर्मकृत् / महाधर्म सुधर्माग्र्य धर्मचक्र नमो ऽस्तु ते // BuSto_16.6

बुद्धसत्त्व सुसत्त्वाग्र्य धर्मसत्त्व सुसत्त्वधृक् / सत्त्वोत्तम सुसत्त्वज्ञ सत्त्वसत्त्व नमो ऽस्तु ते // BuSto_16.7

अवलोकितेश नाथाग्र्य महानाथ विलोकित / आलोकलोक लोकार्थ लोकनाथ नमो ऽस्तु ते // BuSto_16.8

लोकाक्षराक्षर महा अक्षराग्र्याक्षरोपम / अक्षराक्षर सर्वाक्ष चक्राक्षर नमो ऽस्तु ते // BuSto_16.9

पद्महस्त महाहस्त समाश्वासक दायक / बुद्धधर्म महाबुद्ध बुद्धात्मक नमो ऽस्तु ते // BuSto_16.10

बुद्धरूप महारूप वज्ररूप सुरुपवित् / धर्मालोक सुतेजाग्र्य लोकालोक नमो ऽस्तु ते // BuSto_16.11

पद्मश्रीनाथ नाथाग्र्य धर्मश्रीनाथ नाथवान् / ब्रह्यनाथ महाब्रह्म ब्रह्मपुत्र नमो ऽस्तु ते // BuSto_16.12

दीप दीपाग्र्य दीपोग्र दीपालोक सुदीपक / दीपनाथ महादिप बुद्धदीप नमो ऽस्तु ते // BuSto_16.13

बुद्धाभिषिक्त बुद्धाग्र्य बुद्धपुत्र महाबुध / बुद्धाभिषेकमुर्द्धाग्र्य बुद्धबुद्ध नमो ऽस्तु ते // BuSto_16.14

बुद्धचक्षो महाचक्षो धर्मचक्षो महेक्षण / समाधिज्ञानसर्वस्व वज्रनेत्र नमो ऽस्तु ते // BuSto_16.15

एवं सर्वात्मना गौणं नाम्नामष्टशतं तव / भावयेत् स्तुनुयाद्वापि लोकैश्वर्यमवाप्नुयात् // BuSto_16.16

आर्यावलोकितेश्वरनामाष्टोत्तरशताध्येषणास्तोत्रं समाप्तम् //

digital sanskrit buddhist canon, stotra section, text no. 17: bhadracarīpraṇidhānastotram

अथ खलु समन्तभद्रो बोधिसत्त्वो महासत्त्वः एवमेव लोकधातुपरम्परानभिलाप्यानभिलाप्य बुद्धक्षेत्रपरमाणुरजःसमान् कल्पान् कल्पप्रसरानभिद्योत्यमानो भूयस्या मात्रया गाथाभिगीतेन प्रणिधानमकार्षीत् -

यावत केचि दशद्दिशि लोके सर्वत्रियध्वगता नरसिंहाः / तानहु वन्दमि सर्वि अशेषान् कायतु वाच मनेन प्रसन्नः // BuSto_17.1

क्षेत्ररजोपमकायप्रमाणैः सर्वजिनान करोमि प्रणामम् / सर्वजिनाभिमुखेन मनेन भद्रचरीप्रणिधानबलेन // BuSto_17.2

एकरजाग्रि रजोपमबुद्धा बुद्धसुतान निषण्णकु मध्ये / एवमशेषत धर्मतधातुं सर्वधिमुच्यमि पूर्णजिनेभि // BuSto_17.3

तेषु च अक्षयवर्णसमुद्रान् सर्वस्वराङ्गसमुद्ररुतेभिः / सर्वजिनान गुणान् भणमानस्तान् सुगतान् स्तवमी अहु सर्वान् // BuSto_17.4

पुष्पवरेभि च माल्यवरेभिर्वाद्यविलेपनछत्रवरेभिः / दीपवरेभि च धूपवरेभिः पूजन तेष जिनान करोमि // BuSto_17.5

वस्त्रवरेभि च गन्धवरेभिश्चूर्णपुटेभि च मेरुसमेभिः / सर्वविशिष्टवियूहवरेभिः पूजन तेष जिनान करोमि // BuSto_17.6

या च अनुत्तरपूज उदारा तानधिमुच्यमि सर्वजिनानाम् / भद्रचरी अधिमुक्तिबलेन वन्दमि पूजयमी जिनसर्वान् // BuSto_17.7

यच्च कृतं मयि पापु भवेय्या रागतु द्वेषतु मोहवशेन / कायतु वाच मनेन तथैव तं प्रतिदेशयमी अहु सर्वम् // BuSto_17.8

यच्च दशद्दिशि पुण्य जगस्य शैक्ष अशैक्षप्रत्येकजिनानाम् / बुद्धसुतानथ सर्वजिनानां तं अनुमोदयमी अहु सर्वम् // BuSto_17.9

ये च दशद्दिशि लोकप्रदीपा बोधिविबुद्ध असंगतप्राप्ताः / तानहु सर्वि अध्येषमि नाथान् चक्रु अनुत्तरु वर्तनतायै // BuSto_17.10

ये ऽपि च निर्वृति दर्शितुकामास्तानभियाचमि प्राञ्जलिभूतः / क्षेत्ररजोपमकल्प निहन्तु सर्वजगस्य हिताय सुखाय // BuSto_17.11

वन्दनपूजनदेशनताय मोदनध्येषणयाचनताय / यच्च शुभं मयि संचितु किंचिद्बोधयि नामयमी अहु सर्वम् // BuSto_17.12

पूजित भोन्तु अतीतक बुद्धा ये च ध्रियन्ति दशद्दिशि लोके / ये च अनागत ते लघु भोन्तु पूर्णमनोरथ बोधिविबुद्धाः // BuSto_17.13

यावत केचि दशद्दिशि क्षेत्रास्ते परिशुद्ध भवन्तु उदाराः / बोधिद्रुमेन्द्रगतेभि जिनेभिर्बुद्धसुतेभि च भोन्तु प्रपूर्णाः // BuSto_17.14

यावत केचि दशद्दिशि सत्त्वास्ते सुखिता सद भोन्तु अरोगाः / सर्वजगस्य च धर्मिकु अर्थो भोन्तु प्रदक्षिणु ऋध्यतु आशाः // BuSto_17.15

बोधिचरिं च अहं चरमाणो भवि जातिस्मरु सर्वगतीषु / सर्वसु जन्मसु च्युत्युपपत्ती प्रव्रजितो अहु नित्यु भवेय्या // BuSto_17.16

सर्वजिनानुशिक्षयमाणो भद्रचरिं परिपूरयमाणः / शीलचरिं विमलां परिशुद्धां नित्यमखण्डमछिद्र चरेयम् // BuSto_17.17

देवरुतेभि च नागरुतेभिर्यक्षकुम्भाण्डमनुष्यरुतेभिः / यानि च सर्वरुतानि जगस्य सर्वरुतेष्वहु देशयि धर्मम् // BuSto_17.18

ये खलु पारमितास्वभियुक्तो बोधियि चित्तु न जातु विमुह्येत् / ये ऽपि च पापक आवरणायास्तेषु परिक्षयु भोतु अशेषम् // BuSto_17.19

कर्मतु क्लेशतु मारपथातो लोकगतीषु विमुक्तु चरेयम् / पद्म यथा सलिलेन अलिप्तः सूर्यशशी गगनेव असक्तः // BuSto_17.20

सर्वि अपायदुखां प्रशमन्तो सर्वजगत् सुखि स्थापयमानः / सर्वजगस्य हिताय चरेयं यावत क्षेत्रपथा दिशतासु // BuSto_17.21

सत्त्वचरिं अनुवर्तयमानोइ बोधिचरिं परिपूरयमाणः / भद्रचरिं च प्रभावयमानः सर्वि अनागतकल्प चरेयम् // BuSto_17.22

ये च सभागत मम चर्याये तेभि समागमु नित्यु भवेय्या / कायतु वाचतु चेतनतो चा एकचरि प्रणिधान चरेयम् // BuSto_17.23

ये ऽपि च मित्रा मम हितकामा भद्रचरीय निदर्शयितारः / तेभि समागमु नित्यु भवेय्या तांश्च अहं न विरागयि जातु // BuSto_17.24

संमुख नित्यमहं जिन पश्ये बुद्धसुतेभि परीवृतु नाथान् / तेषु च पूज करेयु उदारां सर्वि अनागतकल्पमखिन्नः // BuSto_17.25

धारयमाणु जिनान सद्धर्मं बोधिचरिं परिदीपयमानः / भद्रचरिं च विशोधयमानः सर्वि अनागतकल्प चरेयम् // BuSto_17.26

सर्वभवेषु च संचरमाणः पुण्यतु ज्ञानतु अक्षयप्राप्तः / प्रज्ञौपायसमाधिविमोक्षैः सर्वगुणैर्भवि अक्षयकोशः // BuSto_17.27

एकरजाग्रि रजोपमक्षेत्रा तत्र च क्षेत्रि अचिन्तियबुद्धान् / बुद्धसुतान निषण्णकु मध्ये पश्यिय बोधिचरिं चरमाणः // BuSto_17.28

एवमशेषत सर्वदिशासु बालपथेषु त्रियध्वप्रमाणान् / बुद्धसमुद्र थ क्षेत्रसमुद्रानोतरि चारिककल्पसमुद्रान् // BuSto_17.29

एकस्वराङ्गसमुद्ररुतेभिः सर्वजिनान स्वराङ्गविशुद्धिम् / सर्वजिनान यथाशयघोषान् बुद्धसरस्वतिमोतरि नित्यम् // BuSto_17.30

तेषु च अक्षयघोषरुतेषु सर्वत्रियध्वगतान जिनानाम् / चक्रनयं परिवर्तयमानो बुद्धिबलेन अहं प्रविशेयम् // BuSto_17.31

एकक्षणेन अनागतसर्वान् कल्पप्रवेश अहं प्रविशेयम् / ये ऽपि च कल्प त्रियध्वप्रमाणास्तान् क्षणकोटिप्रविष्ट चरेयम् // BuSto_17.32

ये च त्रियध्वगता नरसिंहास्तानहु पश्यिय एकक्षणेन / तेषु च गोचरिमोतरि नित्यं मायगतेन विमोक्षबलेन // BuSto_17.33

ये च त्रियध्वसुक्षेत्रवियूहास्तानभिनिर्हरि एकरजाग्रे / एवमशेषत सर्वदिशासु ओतरि क्षेत्रवियूह जिनानाम् // BuSto_17.34

ये च अनागत लोकप्रदीपास्तेषु विबुध्यन चक्रप्रवृत्तिम् / निर्वृतिदर्शननिष्ठ प्रशान्तिं सर्वि अहं उपसंक्रमि नाथान् // BuSto_17.35

ऋद्धिबलेन समन्तजवेन ज्ञानबलेन समन्तमुखेन / चर्यबलेन समन्तगुणेन मैत्रबलेन समन्तगतेन // BuSto_17.36

पुण्यबलेन समन्तशुभेन ज्ञानबलेन असङ्गगतेन / प्रज्ञौपायसमाधिबलेन बोधिबलं समुदानयमानः // BuSto_17.37

कर्मबलं परिशोधयमानः क्लेशबलं परिमर्दयमानः / मारबलं अबलं करमाणः पूरयि भद्रचरीबल सर्वान् // BuSto_17.38

क्षेत्रसमुद्र विशोधयमानः सत्त्वसमुद्र विमोचयमानः / धर्मसमुद्र विपश्ययमानो ज्ञानसमुद्र विगाहयमानः // BuSto_17.39

चर्यसमुद्र विशोधयमानः प्रणिधिसमुद्र प्रपूरयमाणः / बुद्धसमुद्र प्रपूजयमानः कल्पसमुद्र चरेयमखिन्नः // BuSto_17.40

ये च त्रियध्वगतान जिनानां बोधिचरिप्रणिधानविशेषाः / तानहु पूरयि सर्वि अशेषात् भद्रचरीय बिबुध्यिय बोधिम् // BuSto_17.41

ज्येष्ठकु यः सुतु सर्वजिनानां यस्य च नाम समन्ततभद्रः / तस्य विदुस्य सभागचरीये नामयमी कुशलं इमु सर्वम् // BuSto_17.42

कायतु वाच मनस्य विशुद्धिश्चर्यविशुद्ध्यथ क्षेत्रविशुद्धिः / यादृशनामन भद्रविदुस्य तादृश भोतु समं मम तेन // BuSto_17.43

भद्रचरीय समन्तशुभाये मञ्जुशिरिप्रणिधान चरेयम् / सर्वि अनागत कल्पमखिन्नः पूरयि तां क्रिय सर्वि अशेषाम् // BuSto_17.44

नो च प्रमाणु भवेय्य चरीये नो च प्रमाणु भवेय्य गुणानाम् / अप्रमाणु चरियाय स्थिहित्वा जानमि सर्वि विकुर्वितु तेषाम् // BuSto_17.45

यावत निष्ठ नभस्य भवेय्या सत्त्व अशेषत निष्ठ तथैव / कर्मतु क्लेशतु यावत निष्ठा तावत निष्ठ मम प्रणिधानम् // BuSto_17.46

ये च दशद्दिशि क्षेत्र अनन्ता रत्नअलंकृतु दद्यु जिनानाम् / दिव्य च मानुष सौख्यविशिष्टां क्षेत्ररजोपम कल्प ददेयम् // BuSto_17.47

यश्च इमं परिणामनराजं श्रुत्व सकृज्जनयेदधिमुक्तिम् / बोधिवरामनुप्रार्थयमानो अग्रु विशिष्ट भवेदिमु पुण्यम् // BuSto_17.48

वर्जित तेन भवन्ति अपाया वर्जित तेन भवन्ति कुमित्राः / क्षिप्रु स पश्यति तं अमिताभं यस्यिमु भद्रचरि प्रणिधानम् // BuSto_17.49

लाभ सुलब्ध सजीवितु तेषां स्वागत ते इमु मानुषजन्म / यादृशु सो हि समन्ततभद्रस्ते ऽपि तथा नचिरेण भवन्ति // BuSto_17.50

पापक पञ्च अनन्तरियाणि येन अज्ञानवशेन कृतानि / सो इमु भद्रचरिं भणमानः क्षिप्रु परिक्षयु नेति अशेषम् // BuSto_17.51

ज्ञानतु रूपतु लक्षणतश्च वर्णतु गोत्रतु भोतिरूपेतः / तीर्थिकमारगणेभिरधृष्यः पूजितु भोति स सर्वत्रिलोके // BuSto_17.52

क्षिप्रु स गच्छति बोधिद्रुमेन्द्रं गत्व निषीदति सत्त्वहिताय / बुद्ध्यति बोधि प्रवर्तयि चक्रं धर्षति मारु ससैन्यकु सर्वम् // BuSto_17.53

यो इमु भद्रचरिप्रणिधानं धारयि वाचयि देशयितो वा / बुद्धविजानति यो ऽत्र विपाको बोधि विशिष्ट म काङ्क्ष जनेथ // BuSto_17.54

मञ्जुशिरी यथ जानति शूरः सो च समन्ततभद्र तथैव / तेषु अहं अनुशिक्षयमाणो नामयमी कुशलं इमु सर्वम् // BuSto_17.55

सर्वत्रियध्वगतेभि जिनेभिर्या परिणामन वर्णित अग्रा / ताय अहं कुशलं इमु सर्वं नामयमी वर भद्रचरीये // BuSto_17.56

कालक्रियां च अहं करमाणो आवरणान् विनिवर्तिय सर्वान् / संमुख पश्यिय तं अमिताभं तं च सुखावतिक्षेत्र व्रजेयम् // BuSto_17.57

तत्र गतस्य इमि प्रणिधाना आमुखि सर्वि भवेय्यु समग्रा / तांश्च अहं परिपूर्य अशेषान् सत्त्वहितं करियावत लोके // BuSto_17.58

तहि जिनमंडलि शोभनिरम्ये पद्मवरे रूचिरे उपपन्नः / व्याकरणं अहु तत्र लभेय्या संमुखतो अमिताभजिनस्य // BuSto_17.59

व्याकरणं प्रतिलभ्य च तस्मिन् निर्मित कोटिशतेभिरनेकैः / सत्त्वहितानि बहून्यहु कुर्यां दिक्षु दशस्वपि बुद्धिबलेन // BuSto_17.60

भद्रचरिप्रणिधान पठित्वा यत्कुशलं मयि संचितु किंचित् / एकक्षणेन समृध्यतु सर्वं तेन जगस्य शुभं प्रणिधानम् // BuSto_17.61

भद्रचरिं परिणाम्य यदाप्तं पुण्यमनन्तमतीव विशिष्टम् / तेन जगद्वयसनौघनिमग्नं यात्वमिताभपुरिं वरमेव // BuSto_17.62

श्री भद्रचरीप्राणिधानस्तोत्रं समाप्तम् //

digital sanskrit buddhist canon, stotra section, text no. 18: bhaktiśatakam mahāpaṇḍita-rāmacandrabhāratīviracitam

नमस्तस्मै भगवते ऽर्हते सम्यक्संबुद्धाय

ज्ञानं यस्य समस्तवस्तुविषयं यस्यानवद्यं वचो यस्मिन् रागलवो ऽपि नैव न पुनर्द्वेषो न मोहस्तथा / यस्याहेतुरनन्तसत्त्वसुखदा ऽनल्पा कृपामाधुरी बुद्धो वा गिरिशो ऽथवा स भगवान् तस्मै नमस्कुर्महे // BuSto_18.1

देवः शम्भुर्न वैरी हरिरपि न रिपुः केवली नो सपत्नो नोदासीनः स्वयम्भुर्न च पुनरपरे ते परे वासवाद्याः / शास्ता बुद्धो न बन्धुर्जगति न जनको नैकगोत्रैकजातिः किन्त्वेषां वीतरागो भवति सकलविद् यः सुधीभिः स सेव्यः // BuSto_18.2

ब्रह्मा विद्याभिभूतो दुरधिगममहामाययालिङ्गितो ऽसौ विष्णू रागातिरेकान्निजवपुषि धृता पार्वतौ शङ्करेण / वीताविद्यो विमायो जगति स भगवान् वीतरागो मुनीन्द्रः कः सेव्यो बुद्धिमद्भिर्वदत वदत मे भ्रातरस्तेषु मुक्त्यै // BuSto_18.3

ब्राह्मं वैष्णवमैश्वरञ्च बहुधा लब्ध्वा पदं हेतुतैः (तः) संसारे वत संसरन्ति पुनरप्येकान्तदुःखास्पदे / किन्तैर्देहभृतामपायबहलैराद्यन्तवद्भिः पदैस् तस्मान्नित्यमनादिमध्यनिधनं बौद्धं पदं प्रार्थ्यताम् // BuSto_18.4

चिदाकारं सूक्ष्मं विभुविशदमाकाररहितं निरीहं नीरूपं निरवधिकृपाबीजमजरम् / समस्तज्ञं सर्वोपधिरहितमैश्यादमृतदं जितानङ्गैः सेव्यं भवतु मम तद्वस्तु शरणम् // BuSto_18.5

अणीयो ऽणोः क्लेशाप्रतिहतमनन्तं च महतो महीयो माहात्म्यप्रविजितजगद्भूरिकरुणम् / द्विबाहुं निर्बाहुं द्विपदमपदं सत्रिवदानम् द्विनेत्रं निर्नेत्रं सगुणमगुणं तत्तु शरणम् // BuSto_18.6

सदानन्दं तथ्यं सरसहृदयं सूक्तिसदनं सतां सेव्यं सम्यक्समधिगततत्त्वं सममनः / स्वतः सिद्धं साध्यं सकलफलदं सौम्यवदनं सदीयं सर्वीयं भवतु मम तद् वस्तु शरणम् // BuSto_18.7

स्वयम्भूताभिज्ञं भवभयहरं भीतिरहितं स्फुरद्भाग्यो भोगोज्झितमहतवीर्यं मदनजित् / चतुर्मार्गं शुद्धप्रकृति च तथाकर्तृकमिदं मुदं लोकोत्कृष्टामतनु तनुतां वस्तु जगताम् // BuSto_18.8

क्वचिन्नीलं पीतं क्वचिदपि च रक्तं क्वचिदप् क्वचिच्चन्द्रच्छायं क्वचिदपि च माञ्जिष्ठरुचिरम् / क्वचित् प्राभास्वर्य्यं यदयति च वर्णव्यतिकराच्छिखाषट्कं तैस्तैर्दधदुपरि तद्वस्तु शरणम् // BuSto_18.9

पराभेद्यं जाम्बूनदरूचिरवर्णं त्रिशरणं त्रियानं त्रिप्रज्ञं त्रिभुवनशरण्यं त्रिवचनम् / कृपापात्रं मन्दस्मितमरुणसच्चीवरधरं कृतध्यानं सिद्धासनघटितपाद् वस्तु शरणम् // BuSto_18.10

प्रसन्नं फुल्लेन्दीवरनयनयुग्मं त्रिपिटकं मुहुर्व्याकुर्वाणं सुरनरगणेभ्यः करुणया / परं शान्तं स्वर्णोपलरजतलोष्ट्रेषु च समं दृशां नव्यातिथ्यं भवतु मम तद् वस्तु शरणम् // BuSto_18.11

शरणमिति सदग्रं साधु गच्छामि बुद्धं शरणमिति विरागाग्रीयमन्वेमि धर्मम् / शरणमिति गणानामग्रियं यामि संघं शरणमिति पुनस्त्रिं द्वित्रिवारं व्रजामि // BuSto_18.12

पुनरपि शरणं व्रजामि बुद्धं पुनरपि लोकगुरुं गुरुं करोमि / पुनरपि कथयामि नौमि वन्दे, त्वयि मम गौतम नैव तृप्तिरास्ते // BuSto_18.13

त्रिभुवनमसकृन्निरूप्य युष्मत्पदसरसीरुहरेणुमाश्रितो ऽहम् / शरणमयमयञ्च दैवतम्मे गतिरपरा मम नास्ति नास्ति नास्ति // BuSto_18.14

अनित्यमखिलं दुःखमनात्मेति प्रवादिने / नमो बुद्धाय धर्माय सङ्घाय च नमो नमः // BuSto_18.15

भो वीतराग भगवंस्तव पादमेव वन्दे मुनीन्द्र मुहुरेवमिमं प्रवन्दे / भूयः पुनः पुनरिमं परतः परस्तात् पार्श्वद्वयोरुपरि दिक्षु विदिक्षु वन्दे // BuSto_18.16

गतमिह भवता पथा च येन स्थितमपि यत्र च यत्र वा निषण्णम् / शयितमपि मुनीन्द्र यत्र योगात् तदपि शतं प्रणमामि पुण्यतीर्थम् // BuSto_18.17

समजनि भगवान् स्वयं स्म यस्मिन् सकलमबोधि च यत्र धर्मचक्रम् / विशदतरमदीपि यत्र यस्मिन्नमृतमपूरि तदप्यहं नमामि // BuSto_18.18

सर्वज्ञचक्रसरसीरुहराजहंस कुन्देन्दुसुन्दररुचिं सुरवृन्दवन्द्यम् / सद्धर्मचक्रसहजं जनपारिजातं श्रीदन्तधातुममलं प्रणमामि भक्त्या // BuSto_18.19

नागालयोपरि धरालयचक्रवालमूर्ध्नि त्रिकूटगतकाञ्चनशैलशृङ्गे / बोधिद्रुमूलनिहिताक्षयधातुबिम्बं विभ्रन्नमामि शिरसा जिनचैत्यमग्रम् // BuSto_18.20