108 Buddhist stotras

भूताः प्रेताश्चतिर्यक् त्वममरमदितिमार्नवास्त्वं वयं च चातुर्योनिस्त्वमेव त्रिगुणवरतनुः पञ्चज्ञानैकमूर्तिः / वर्णास्त्वं कालमासा दिनमपि रजनी पञ्चभूतास्त्वमेव अन्नं रत्नं च सर्वं मतिरति महती नः सदा त्वां नताः स्मः // BuSto_90.3

पञ्चज्ञानेन बुद्धान् सृजसि स्वयमथो बोधिसत्त्वांश्च पञ्चभूतानेतान् गुणांस्त्रीनजहरिगिरिशान् स्थावराञ्जङ्गमांश्च / सर्वेषां चेतसि स्थो नटयसि सकलं सर्वतो रक्षको ऽसि त्वं बीजं चाङ्कुरस्त्वं फलमपि विटपी सर्वदा त्वां नताः स्मः // BuSto_90.4

श्रेष्ठं क्षत्रं त्वमस्मिन् प्रभवसि भगवान् सर्वतः सर्वदेवान् ग्रामांस्तीर्थानि देशान् नृपसहितनरान् नैगमांश्चापि सर्वान् / द्वीपेष्वन्येष्वपि त्वं विभजसि सकलं ज्योतिषां संविभागम् बीजीभूतैकदीपो ऽस्यखिलमपि जगद्वयापकस्त्वां नताः स्मः // BuSto_90.5

ज्योतिस्त्वदीयं परितो विसारि सितारुणश्यामकपीतरक्तं / दृष्टं ततः सर्वमिदं भवन्तं मन्यामहे त्वां प्रणताः स्म नित्यम् // BuSto_90.6

नुतिं महाराजकृतां ये पठिष्यन्ति मानवाः / चक्रवर्तिपदं प्राप्य ते हि मुक्तिमवाप्नुयुः // BuSto_90.7

श्रीचातुर्महाराजकृतं स्वयंभूस्तवं समाप्तम् //

digital sanskrit buddhist canon, stotra section, text no. 91: svayambhūstotram

जगत्कृते स्वयंभुवमनादिलीनमव्ययम् / तनोर्विपज्जरात्मकृत्स्वयंभुवं नमाम्यहम् // BuSto_91.1

सहस्रपत्रपङ्कजं लसत्सुकर्णिकोद्भवम् / समस्तकामनाप्रदं स्वयंभुवं नमाम्यहम् // BuSto_91.2

सहस्रभानुरञ्जनं नियुतचन्द्रनन्दनम् / सुरादिलोकवन्दनं स्वयंभुवं नमाम्यहम् // BuSto_91.3

त्वमेव राजसे गुणैर्भुवि स्थितो विराजसे / त्रिधातुक विभावसे स्वयंभुवं नमाम्यहम् // BuSto_91.4

अयं क इत्ययं हृदा मीमांसितुं न शक्तवान् / प्रघासमात्रमीक्षितः स्वयंभुवं नमाम्यहम् // BuSto_91.5

पठन्ति ये नरा मुदा स्वयंभुवः स्तुतिं सदा / त्रिवर्गसिद्धिमाप्य ते लभन्ति मुक्तिमेव ताम् // BuSto_91.6

श्रीबृहत्स्वयंभूपुराणोद्धृतं शिखिनिर्मितं स्वयम्भूस्तोत्रं समाप्तम् //

digital sanskrit buddhist canon, stotra section, text no. 92: vāgīśvaravarṇanāstotram

ब्रह्मादिदेवमनुजासुरपूजिताङ्गं ज्ञानादिसर्वनिलयं गुणराजवन्तम् / ज्ञानाधिपं गुणमयं गुणवृद्धिमन्तं वागीश्वरं सुरगुरुं सततं नमामि // BuSto_92.1

वेदादिशास्त्ररचनाखिलमन्त्रविज्ञं स्तोत्रैः कथादिभिरशेषसुगीतशब्दम् / यं कीर्ययन्ति मुनयो नरवाण्यभिज्ञं वागीश्वरं सुरगुरुं सततं नमामि // BuSto_92.2

ज्ञानप्रधानकशरीरमचिन्त्यबुद्धिं वाचस्पतिं दिवि भुवि स्तुतकीर्तिदं तम् / ज्ञानेश्वरं त्रिभुवनेशचराचरं तं वागीश्वरं सुरगुरुं सततं नमामि // BuSto_92.3

रत्नादिशिल्पपरिकल्पनपूर्णज्ञेयं चित्रं विचित्रितगुणं जनमाननीयम् / सर्वज्ञकारकधराद् हृदि ब्रह्मपुञ्जं वागीश्वरं सुरगुरुं सततं नमामि // BuSto_92.4

चर्याविधौ रतिपतिं स्थिरधैर्यबोधिं ध्यानाधिपं विविधिना सुखरञ्जनीयम् / विद्याप्रतिष्ठितगुरुं भुवनेतिपूर्णं वागीश्वरं सुरगुरुं सततं नमामि // BuSto_92.5

वाणीपतिं भुजचतुष्टयबाणचापं पुस्तं कृपाणमनिशं क्रमशो दधानम् / सर्वेष्टदं जगति यच्चणारविन्दं वागीश्वरं सुरगुरुं सततं नमामि // BuSto_92.6

श्रीवागीश्वरवर्णनास्तोत्रं समाप्तम् //

digital sanskrit buddhist canon, stotra section, text no. 93: vāgvāṇīstotram

सरस्वतीं नमस्यामि चेतनां हृदि संस्थिताम् / कण्ठस्थां पद्मयोनिं च ह्रींकारसुप्रियां सदा // BuSto_93.1

मतिदां वरदां चैव सर्वकामप्रदायिनीम् / केशवस्य प्रियां देवीं वीणाहस्तां वरप्रदाम् // BuSto_93.2

ऐं ह्रीं मन्त्रप्रियां चैव कुमतिध्वंसकारिणीम् / स्वप्रकाशां निरालम्बामज्ञानतिमिरापहाम् // BuSto_93.3

मोक्षप्रदां सुनित्यां सुवरदां शोधनप्रियाम् / आदित्यमण्डले लीनां प्रणमामि जिनप्रियाम् // BuSto_93.4

ज्ञानाकारां जगद्दीपां भक्तपाशविनाशिनीम् / इति सम्यक् स्तुता देवी वागीशेन महात्मना // BuSto_93.5

आत्मानं दर्शयामास शरदिन्दुसमप्रभा / सरस्वत्युवाच वरं वृणीष्व भदन्त यत्ते मनसि वर्तते // BuSto_93.6

बृहस्पतिरुवाच प्रसन्ना यदि मे देवी दिव्यं ज्ञानं प्रदीयताम् / सरस्वत्युवाच स्तोत्रेणानेन ये भक्त्या मां स्तुवन्ति सदा नराः // BuSto_93.7

लभन्ते परमं ज्ञानं मम तुल्यपराक्रमम् / कवित्वं मत्प्रसादेन तथा च विपुलं यशः // BuSto_93.8

त्रिसन्ध्यं प्रयतो भूत्वा यः स्तोत्रं पठते नरः / तस्य कण्ठे सदा वासं करिष्यामि न संशयः // BuSto_93.9

ओम् ऐं वाग्वादिनि मम जिह्वायां एएं ह्रीं मन्त्रसरस्वति स्वाहा / बृहस्पतिकृतं श्रीवाग्वाणीस्तोत्रं समाप्तम् //

digital sanskrit buddhist canon, stotra section, text no. 94: vajradevīstotram ācāryanāgārjunaviracitam

ओम् नमः श्रीयोगिनीदेव्यै

डाकी या सर्वबुद्धा सकलभयहरा व्यापिनी विश्वमाता एकास्या रक्तवर्णा त्रिनयनमुदिता खेचरी श्रेष्ठशोभा / प्रज्वाली दिव्यदेहा गगणकृतपदा द्विभुजा मुक्तकेशा खट्वाङ्गं वामपाणौ दहिनकरतिकाधारिणी स्वर्गरुपा // BuSto_94.1

नग्नाङ्गा ग्रीवमाल्या नरशिरसहिता भूषणं पञ्चमुद्र् सत्त्वानां मार्गमोक्षा ऽनुत्तरवरदा ज्ञानसिद्धिप्रदाता (त्री) / श्रीदेवी प्राणिरक्षाकृतजगतहिता योगिनी वज्रदीप्तिस्त्वत्पादौ पद्मरूपौ प्रणमितशिरसा नौमि विद्याधरीशे // BuSto_94.2

भगवती महादेवी भवत्याः शरणं वज्रे / वन्दे पादाम्बुजे नित्यं भजामि त्वां प्रसीद मे // BuSto_94.3

जननी सर्वबुद्धानां त्वमेव बोधिदायिनी / सर्वेषां बोधिसत्त्वानां माता हितानुपालिनी // BuSto_94.4

सर्वहितार्थसंभर्त्री सर्वपापविशोधिनी / दुष्टमारगणान् क्षोभ्य महानन्दसुखप्रदा // BuSto_94.5

सद्धर्मसाधनोत्साहे बलवीर्यगुणप्रदा / निःक्लेशस्तिमितध्यानसमाधिसुखदायिनी // BuSto_94.6

प्रज्ञागुणमहारत्नश्रीसमृद्धिप्रदायिनी / भगवत्याः पदाम्भोजे शरणस्थो भजाम्यहम् // BuSto_94.7

नमामि वज्रवाराहीं सर्वपापप्रमोचनीम् / मारविध्वंसिनीं देवीं बुद्धत्वफलदायिनीम् // BuSto_94.8

नौमि श्रीवज्रवाराहीं मन्त्रमूर्तिं जिनेश्वरीम् / अत्यन्तवरदां देवीं ऋद्धिसिद्धिवरप्रदाम् // BuSto_94.9

वैरोचनकुलोद्भूतां मुक्तकेशीं त्रिलोचनाम् / सन्ध्यासिन्दूरवर्णाभां वन्दे त्वां कुलिशेश्वरीम् // BuSto_94.10

पञ्चमुद्रशिरःशोभां स्कन्धे खट्वाङ्गधारिणीम् / करे वज्रकरोटस्थां वन्दे वज्रविलासिनीम् // BuSto_94.11

मुद्रापञ्चधरां देहे मुण्डमालाविभूषिताम् / लीलाहास्यमुखाम्भोजां वन्दे त्रैलोक्यसुन्दरीम् // BuSto_94.12

भैरवाद्यां त्रिमुखीं च विक्रान्तिकण्ठचर्चिकाम् / विद्वेषघनघोरां च वन्दे भीमभयङ्करीम् // BuSto_94.13

रागविरागयोर्मध्ये भावाभावविखण्डिताम् / समुद्भूतां सदा देवीं वन्दे तां ज्ञानडाकिनीम् // BuSto_94.14

पञ्चामृतसुरापानपञ्चशालिसुभोजिनीम् / गीतवाद्यरतां नित्यं वन्दे त्वां सुरवन्दिताम् // BuSto_94.15

सदैव सहजानन्दां नित्यभूतां सर्वालयाम् / रणच्चरणनूपुर्यां वन्दे नृत्यपरायणाम् // BuSto_94.16

त्वां देवीं सिद्धिदात्रीं च योगाचारसदारताम् / बुद्धनिर्वाणदात्रीं त्वां वन्दे बुद्धस्य मातरम् // BuSto_94.17

रक्ताङ्गीं वज्रवाराहीं दिव्यरूपस्वरूपिणीम् / क्रान्तिमूर्तिदयादेवीं नमामि वज्रयोगिनीम् // BuSto_94.18

बन्धूकपुष्पसङ्काशां शान्तरूपां जिनेश्वरीम् / ऋद्धिसिद्धिप्रदां देवीं नमामि वज्रयोगिनीम् // BuSto_94.19

द्वादशवर्षसम्पन्नां नवनृत्यस्वरूपिणीम् / त्रैलोक्यव्यापिनीं देवीं नमामि वज्रयोगिनीम् // BuSto_94.20

श्रीनागार्जुनपादाचार्यविरचितं वज्रदेवीस्तोत्रं समाप्तम् //

digital sanskrit buddhist canon, stotra section, text no. 95: vajramahākālastotram ācāryanāgārjunakṛtam

हां हां हांकारनादैः किलिकिलितरवैः भूतवेतालवृन्दैर् हु हुंकारैः समन्तान्नरपिशितमुखै रक्तमालाकुलाङ्गैः / खट्वाङ्गस्कन्नपाणिर्नरकरकधरः कामरूपी विरूपी पिङ्गाक्षः पिङ्गकेशः शवगणनलकः क्षेत्रपालो ऽवताद्वः // BuSto_95.1

फें फें फेंकारनादैः प्रतिजनितबृहद्वह्निगर्भाङ्गवक्त्रे मालां कण्ठे निधाय प्रकटभयवपुर्भूषिताङ्गोपशोभः / ईषद्रक्ताधरोष्ठो ऽसृकसकलवृतामालिना मुक्तपाणिः क्लीं डां क्लीं डां निनादैर्वरदहनभुवि क्षेत्रपः पातु युष्मान् // BuSto_95.2

क्षं क्षं क्षं क्षान्तिमूर्तिः कलकलकलकृत् क्षान्तिवृद्धिं प्रकुर्वन् / क्रान्ताक्रान्तैकविश्वः कहकहकथनो नीलजीमूतवर्णः / ह्रीं श्रीं क्लीं मन्त्रदेहः पच पच दहनैर्जातमन्त्रः समन्ताद् विघ्नानुत्सार्यमाणः शमयतु नियतं शात्रवान् क्षेत्रपालः // BuSto_95.3

हा हा हा हाट्टहासैरतिशयभयकृत् सर्वदा ऽसत्पशूनां पापानाम्, विघ्नहन्ता प्रतिदिवसमसौ प्राप्तसंबोधिलाभः / हुं फट् हुंफटनिनादैस्त्रिभुवनकुहरं पूरयन् पूर्णशक्तिः पायाच्छ्रीक्षेत्रपालः कपिलतरजटाजूटक्लेशाङ्गभारः // BuSto_95.4

खं खं खं खङ्गपाणिर्ललललललितो रूपतो रक्तपाणिः रं रं रं रक्तनेत्रो रु रु रुधिरकरश्चर्चितश्चण्डवेगः / क्रुं क्रुं क्रुं क्रोधदृष्टिः कुह कुह कुटिलः कुञ्चिताशेषदुष्टः डं डं डं डामराङ्गो डमरुकसहितो रक्षतात् क्षेत्रपालः // BuSto_95.5

यं यं यं याति विश्वं यमनियमयुतो यामिनो ऽयामिनो वा वं वं वं वातवेगो झटिति करकधृत् प्राप्तलोकोपचारः / भ्रूं भ्रूं भ्रूं भीषणाङ्गो भृकुटिकृतभयो मुक्तिवान् साधकानां क्षं क्षं क्षं क्षेमकारी क्षपयतु दुरितं रक्षतात् क्षेत्रपालः // BuSto_95.6

क्लां क्लां क्लां क्रान्तिमूर्तिस्त्रिभुवनमनिशं क्लेदयन् सर्वदा यः पं पं पं पाशहस्तः परशुधृतकरः पालयन् पालनीयान् / मुद्राणां मन्त्रमूर्तिस्त्वमभिमतफलदो मन्त्रिणां मन्त्रतुल्यः क्षेत्राणां पालको ऽसौ सकलजिततनुः पातु युष्मांश्चिरायुः // BuSto_95.7

क्लीं क्लीं क्लीं कृत्तिवासा कृतरिपुनियमः क्लेशितानां सदेशः कं कं कं कपालमाली कलिकलुषहरः कालवृन्दाभकायः / चं चं चं चण्डवेगः प्रचरितसमयाः कालभूतैकलोकः सं सं सं संयतात्मा समयशुभफलं लक्ष्यतां पातु युष्मान् // BuSto_95.8

मन्त्राणां मन्रकायो नियतयमद्युतिः सत्पथे शूद्धतीरे आचार्यः साधको वा जपति च नियतं पुण्यवान् जायते ऽसौ / आयुः श्रीः कीर्तिलक्ष्मीर्धृतिबलमतुलं शान्तिपुष्टी प्रभा च सर्वज्ञत्वं च नित्यं दिननिशमतुलं नश्यते विघ्नजातम् // BuSto_95.9

श्रीवज्रमहाकालस्तोत्रं समाप्तम् //

digital sanskrit buddhist canon, stotra section, text no. 96: vajrapāṇināmāṣṭottaraśatastotram

वज्रसत्त्व महासत्त्व महायान महात्मक / महाप्रभ महाशुद्ध महानाथ नमो ऽस्तु ते // BuSto_96.1

वज्रराज महावज्र वज्र सर्वतथागत / महासत्त्व महावीर्य महोपाय नमो ऽस्तु ते // BuSto_96.2

वज्रराग महाशुद्ध सर्वसौख्य महासुख / सुखाग्र्यानादिनिधन महाकाम नमो ऽस्तु ते // BuSto_96.3

वज्रसाधु महातुष्टि साधुकार प्रहर्षक / महाहर्ष महामोद सुप्रामोद्य नमो ऽस्तु ते // BuSto_96.4

वज्ररत्न महाराज स्वाभिषेक महामते / सर्वरत्न महाशोभविभूषण नमो ऽस्तु ते // BuSto_96.5

वज्रतेज महातेज वज्रप्रभ महाद्युते / जिनप्रभ महाज्वाल बुद्धप्रभ नमो ऽस्तु ते // BuSto_96.6

वज्रकेतु महाकेतु महाध्वज धनप्रद / आकाशकेतो महायष्टि त्यागध्वज नमो ऽस्तु ते // BuSto_96.7

वज्रहास महाहास महाप्रीतिप्रमोदन / प्रीतिवेग रतिप्रीते धर्मप्रीते नमो ऽस्तु ते // BuSto_96.8

वज्रधर्म महाधर्म सर्वधर्मसुशोधक / बुद्धधर्म सुधर्माग्र्य रागधर्म नमो ऽस्तु ते // BuSto_96.9

वज्रतीक्ष्ण महाकोश प्रज्ञाज्ञान महामते / पापच्छेदमहाखड्ग बुद्धशस्त्र नमो ऽस्तु ते // BuSto_96.10

वज्रहेतु महाचक्र बुद्धचक्र महानिधे / सर्वमण्डलधर्माग्र धर्मचक्र नमो ऽस्तु ते // BuSto_96.11

वज्रभाष महाभाष निष्प्रपञ्च महाक्षर / अनक्षर महाजाप बुद्धवाच नमो ऽस्तु ते // BuSto_96.12

वज्रकर्म सुकर्माग्र्य महाकर्म सुकर्मकृत् / गुह्यपूज महापूज बुद्धपूज नमो ऽस्तु ते // BuSto_96.13

वज्ररक्ष महावर्म कवचाग्र्य महादृढ / महारक्ष महासार बुद्धवीर्य नमो ऽस्तु ते // BuSto_96.14

वज्रयक्ष महाक्रोध सर्वदुष्टभयानक / सर्वबुद्धमहोपाय अग्रयक्ष नमो ऽस्तु ते // BuSto_96.15

महासन्धि महामुद्र महासमयबन्धक / महामुष्टे समुद्राग्र्य वज्रमुष्टे नमो ऽस्तु ते // BuSto_96.16

वन्द्यो मान्यश्च पूज्यश्च सत्कर्तव्यस्तथागतैः / यस्मादनादिनिधनं बोधिचित्तं त्वमुच्यसे // BuSto_96.17

त्वामासाद्य जिनाः सर्वे बोधिसत्त्वाश्च शौरिणः / संभूताः संभविष्यन्ति बुद्धबोध्यग्रहेतवः // BuSto_96.18

नमस्ते वज्रसत्त्वाय वज्ररत्नाय ते नमः / नमस्ते वज्रधर्माय नमस्ते वज्रकर्मणे // BuSto_96.19

त्वामभिष्टुत्य नामाग्रैः प्रणम्य च सुभावतः / यत्पुण्यं तेन सर्वो हि बुद्धबोधिमवाप्नुयात् // BuSto_96.20

इदमुच्चारयेत्सम्यग् नामाष्टशतमुत्तमम् / सकृद्वारं सुभक्तिस्थः सर्वबुद्धत्वमाप्नुयात् // BuSto_96.21

श्रीवज्रपाणिनामाष्टोत्तरशतस्तोत्रं समाप्तम् //

digital sanskrit buddhist canon, stotra section, text no. 97: vajrasattvastotram

वन्दे श्री

वज्रसत्त्वं भुवनवरगुरुं सर्वबुद्धं भवन्तं नानारूपं जिनेन्द्रं तिमिरभयहरं निर्मितं मेरुशान्तम् / धर्माधारं मुनीनां जिनगुणशुभदं मण्डलं वज्रधातुं सर्वानन्दैकरूपं परमसुखमयं देहिनां मोक्षहेतुम् // BuSto_97.1

अज्ञानगाढतिमिरार्णवमग्नसत्त्वमोहान्धकारतमवारणचन्द्ररश्मिः / ज्ञानं प्रकाश्य परिपूरितवीर्यध्यानं श्रीवज्रसत्त्वमसमं शिरसा नमामि // BuSto_97.2

यस्मिन् सुरासुरसुरेन्द्रनरेन्द्रवृन्दास्त्वत्पादपद्मपतिता भ्रमराः शिरोभिः / तत्सिद्धिसाधनपयोधिमहानिधानं श्रीलोकनाथचरणं शरणं प्रयामि // BuSto_97.3

बुद्धं त्रैलोक्यनाथं सुरवरनमितं पारसंसारतीर्णं धीरं गाम्भीर्यवन्तं सकलगुणनिधिं धर्मराजाभिषिक्तम् / तृष्णामोहान्धकारं कलिकलुषहरं कामलोभादवन्तं तं वन्दे शाक्यसिंहं प्रणमितशिरसा सर्वकालं नमामि // BuSto_97.4

ह्रींकारसंभवं नाथं करुणास्निग्धमानसम् / अमोघपाशनामानं लोकनाथं नमाम्यहम् // BuSto_97.5

मामकी लोचना तारा पद्मिनी जिनधातवे / सर्वबुद्धालयं चैत्यं धर्मधातुं नमामि तम् // BuSto_97.6

नमस्तारे तुरे वीरे तुत्तारे भयनाशिनि / तुरे सर्वातुरे काले स्वाहाकारं नमाम्यहम् // BuSto_97.7

सद्धर्मपुण्डरीकाक्षं सर्वज्ञगुणसागरम् / समन्तभद्रशास्तारं शाक्यसिंहं नमाम्यहम् // BuSto_97.8

श्रीवज्रसत्त्वस्तोत्रं समाप्तम् //

digital sanskrit buddhist canon, stotra section, text no. 98: vajrasattvastutiḥ

अथ खलु भगवन्तः सर्वतथागताः भगवन्तं महावज्रसत्त्वं स्तुवन्ति स्म-

मोहवज्रस्वभावस्त्वं यमारिरतिभीषणः / सर्वबुद्धमयः शान्तः कायवज्र नमो ऽस्तु ते // BuSto_98.1

पिशुनवज्रस्वभावस्त्वं यमारिरतिभीषणः / चित्तवज्रप्रतीकाशो रत्नवज्र नमो ऽस्तु ते // BuSto_98.2

रागवज्रस्वभावस्त्वं यमारिरतिभीषणः / सर्वघोषवराग्राग्र्य वाग्वज्र नमो ऽस्तु ते // BuSto_98.3

ईर्ष्यावज्रस्वभावस्त्वं यमारिरतिभीषणः / कायवज्रप्रतीकाश सङ्गपाणे नमो ऽस्तु ते // BuSto_98.4

सर्वबुद्धस्वभावस्त्वं सर्वबुद्धैकसंग्रहः / सर्वबुद्धवराग्राग्र्य मण्डलेश नमो ऽस्तु ते // BuSto_98.5

श्रीमहावज्रसत्त्वस्तुतिः समाप्ता //

digital sanskrit buddhist canon, stotra section, text no. 99: vajravilāsinīstotram mahāpaṇḍitavibhūticandrapādakṛtam

ओम् नमः श्रीवज्रयोगिन्यै

देवासुरनरवन्दितचरणे भवमग्नोद्धरणार्पितचरणे / त्वयि रोदिमि नुतिसव्यपदेशः किं पश्यसि पुनरनिशमशेषम् // BuSto_99.1

मातर्देवि किरसि कणमुष्टिं जनयद् यज्ञसुतः किमतुष्टिम् / वज्रवाराहि नराहिसुराणां त्वं शरणं तव नामपराणाम् // BuSto_99.2

हरिकर(रि)शिखिफणितस्करभीतिस्त्वत्परचित्ते नैव समेति / मातर्देवि निभालय मह्यं किं सहसे मम दुःखमसह्यम् // BuSto_99.3

तर्जनवज्रकरोट(वि)धारिणि दुष्टं तुष्टय मारनिवारिणि / अभिनवकोमलकरचरणाङ्गि त्रिवलिसमुच्छदसप्तविभङ्गि // BuSto_99.4

ग्राह्यग्राहकभावविशुद्धे पादकराङ्गुलिजालपिनद्धे / आयतपार्श्वाङ्गुलिकरचरणे ध्वस्तव्याधिजराजनिमरणे // BuSto_99.5

उद्गतरेणुरूर्ध्वगतरोमा वज्रयोगविवृतामृतधामा / बालमरीचिविलोकनरक्ते जगतां दुःखनिराकृतिशक्ते // BuSto_99.6

सुभ्रु तनूदरि मध्यकृशाङ्गि कर्णान्तायतलोचनभृङ्गि(भङ्गि) / डाकिन्ये (व हि) विश्वमशेषं लोको वेत्ति न ते बहुवेषम् // BuSto_99.7

यत्नमृते जगदर्थसमृद्धिश्चिन्तितमात्रजनेप्सितसिद्धिः / मूढो वेत्ति न दुष्कृतकर्म प्रावृषीव न शिलाङ्कुरजन्म // BuSto_99.8

अन्ध इवार्कशशाङ्कादर्शी पापजनो ह्यनुभावस्पर्शी / चिन्तामणिमज्ञा न विदन्ति प्रज्ञे त्वस्य फलानि फलन्ति // BuSto_99.9

चक्राङ्कितकरपादमनोज्ञे ज्ञानानलभस्मीकृतसङ्गे / कायवचनमनसा कृतदुरितं रागद्वेषमोहपरिकरि(लि)तम् // BuSto_99.10

तद्दिशामि तव देवि समक्षं यावद्यामि न दुर्गतिपक्षम् / मनः परमार्थं तनुस्तव वेदी स भवति नैव दुरितपरिखेदी // BuSto_99.11

लक्षणनिखिलालक्षितगात्रे सकलानुव्यञ्जनगतपात्रे / नवयौवनमदमन्थरपिण्डे चलकुण्डलयुगमण्डितगण्डे // BuSto_99.12

तुङ्गनितम्बघनस्तनभारे गलकालम्बिनिरंशुक(ङ्कुश)हारे / संवरमधुपविचुम्बिमुखाब्जे तद्भुजयुगपरिरब्धहृदब्जे // BuSto_99.13

निर्भरसुरतसुखाविकलाक्षि मुक्तशिरोरुहवसननिरपेक्षे / हेरुकराहुदष्टमुखचन्द्रे सस्मितरचित हूं हूं कृतमन्त्रे // BuSto_99.14

पतिमौलिस्थितविधुममृषन्ती किमु चन्द्रार्कौ वपु(र)मुषन्ती / मातस्ते जगदनुपमरूपं तद्विचारय परमार्थ स(स्व)रूपम् // BuSto_99.15

क्लेशदाहिं(ह)शमनामृतवचनं तद्विनेयजनशुद्धिविरचनम् / पद्मिनीति नलिनामलगन्धः करुणापरजगदर्थनिबन्धः // BuSto_99.16

दिव्यसुधाधर(गत)रसपानं तज्जगदद्वयबोधिनिधानम् / प्रत्यङ्गस्पर्शो ऽप्यनिमित्तं सहजाम्बुधिविप्लावितचित्तम् // BuSto_99.17

किं त्वं मातः करिष्यसि ताभिः षट्त्रिंशच्छतकोट्यबलाभिः / यद्यन्यां मनुते बहुतातस्तद्विहाय झगिति देहि नु मातः // BuSto_99.18

नाडीचक्रनिरोध […] महासुखसंवर / देवि त्वं शतभावविकल्पा शून्यसमाधिरपाकृततुल्या (तल्पा) // BuSto_99.19

शून्यकृपे सहजाद्वयमुक्तं वज्राय(ज्रया)नमिदमवधि(वि)भक्तम् / भावाभावसमस्ताकाशव्यापी भवति स तत्त्वविकाशः // BuSto_99.20

उद्भवन्ति तत एव विमोक्षा बोधिपक्षनिखिलप्रतिपक्षाः / बुद्धानामावेणिकधर्मः सत्त्वराशिपरिपाचितकर्मः // BuSto_99.21

यद्वा यानत्रयनिर्याणं धूमादिकमपि चापरिमाणम् / त्वद्भक्त्या यदलम्भि शुभं मे भवतु मनो भवतीपरमं मे / सकलकलुषरहितं गुणसिन्धुस्त्वत्परमं ह्यत एव न बन्धुः // BuSto_99.22

गुह्यसमयसाधनतन्त्रे श्रीवज्रविलासिनीस्तोत्रं समाप्तम् / कृतिरियं महापण्डितविभूतिचन्द्रपादानाम् //

digital sanskrit buddhist canon, stotra section, text no. 100: vajravilāsinīsādhanāstavaḥ

रविविकस्वरभास्वरसुन्दरीप्रबलकेशरसंवरकर्णिकात् / उदयमस्तकशृङ्गसमुल्लसन्नवसुपूर्णशशाङ्ककराङ्किताम् // BuSto_100.1

विविधपुष्परसासववेद्यपि द्रुतविलम्बितमध्यनदद्ध्वनिः / अलिरुपेत्य निशार्धमहोत्सवे धयति तद्गतधीरिति विस्मयः // BuSto_100.2

उदयते ऽस्तमुपैति निशाकरः पुनरतो ऽप्युदयाचलमौलिताम् / उभयकोटिकलापिनिरीक्षणे न च शशी न विभाति दिवाकरः // BuSto_100.3

रविरुदेति सरोजदलान्तरे शिखरतो ऽपि विधुः प्रविलीयते / व्रजति चोर्ध्वमसौ वडवानलो गिलति राहुरधः शशिभास्करौ // BuSto_100.4

कमलिनीकमलासनलोचनप्रकटगोचरगोचरमीलनम् / प्रथममङ्गमिदं कुलिशाम्बुजद्वयनिमीलनमत्र ततो ऽपरम् // BuSto_100.5

सपदि साधकबीजनिघर्षणात् त्रितयमम्बरमेति चतुर्थकम् / सहजमक्षयधामकलावलीकलितकालविलापनलेलिहम् // BuSto_100.6

यदि सुशिक्षितवज्रविलासिनीगुरुमुखाधिगमो ऽधिगतो भवेत् / भवति यस्य तदोत्तममध्यमाधमविनिश्चयमेति स तत्त्वदृक् // BuSto_100.7

श्रीवज्रविलासिनीसाधनास्तवः समाप्तः //

digital sanskrit buddhist canon, stotra section, text no. 101: vajrayoginīpraṇāmaikaviśikā

ओम् नमः श्रीवज्रयोगिन्यै

एवंकारसमासीना(ने) सहजानन्दरूपिणि / प्रज्ञा(वि)ज्ञानदेहस्था (स्थे) नमस्ते वज्रयोगिनि // BuSto_101.1

विचित्रादिप्रमो(भे)देन चतुरानन्ददेहदे / रागपारमिताप्राप्ते नमस्ते वज्रयोगिनि // BuSto_101.2

शरत्पूर्णेन्दुसंकाशे सत्त्वजाष्टकयोगजे / वर्णाग्रबीजसंभूते नमस्ते वज्रयोगिनि // BuSto_101.3

भावाभावद्वयातीते आद्यन्तमध्यवर्जिते / स्वपरत्वविनिर्मुक्ते नमस्ते वज्रयोगिनि // BuSto_101.4

रागारागयोर्मिश्रं(श्रे) संकल्पत्रयवर्जितं(ते) / महासुखसुखकारे नमस्ते वज्रयोगिनि // BuSto_101.5

सत्त्वार्थकरणैर्युक्ते जातसंभोगरूपिणि / करुणारक्तदेहस्ते(स्थे) नमस्ते वज्रयोगिनि // BuSto_101.6

भवनिर्वाणमारूढे रूपाकारविराजिते / कायवाकचित्तनेत्राय(द्ये) नमस्ते वज्रयोगिनि // BuSto_101.7

वामे कपालखट्वाङ्गे दक्षिणे कर्तिधारिणि / शून्यताकरुणावाहि नमस्ते वज्रयोगिनि // BuSto_101.8

जिनदुर्दान्तबीभत्सि(त्से) सर्वमारनिषूदिनि / निर्जिताशेषसेवाग्रे नमस्ते वज्रयोगिनि // BuSto_101.9

कला(कलाप)संयुक्ते श्मशानाष्टनिवासिनि / बुद्धनाटरसैर्युक्ते नमस्ते वज्रयोगिनि // BuSto_101.10

सत्त्वाशयवशेनैव निर्मितानेकरूपिणो (णि) / श्यामपीतसिताभासे नमस्ते वज्रयोगिनि // BuSto_101.11

पञ्चबुद्धजनोत्पन्ने पञ्चयोगिनितां गते / तथा परमाणुसंख्याते नमस्ते वज्रयोगिनि // BuSto_101.12

शैवे शक्तिरिति ख्याते तीर्थे चण्डीति कल्पिते / वेदे वेदेति प्रख्याते नमस्ते वज्रयोगिनि // BuSto_101.13

कुलाख्ये कुब्जिकाख्याते आत्मवेषवती मते / विश्वरूपे क्रियाकारे नमस्ते वज्रयोगिनि // BuSto_101.14

सत्त्वदृष्टिविरोधेन गता नैव विधायिनि / सर्वाकारवरोपेते नमस्ते वज्रयोगिनि // BuSto_101.15

नैरात्म्यधर्मगम्भीरयोगदृष्ट्यैकगोचरे / सदसत्कल्पनातीते नमस्ते वज्रयोगिनि // BuSto_101.16

श्यामपीतादिनिर्मुक्ते वर्णावर्णविवर्जिते / प्रज्ञापारमितामातर्नमस्ते वज्रयोगिनि // BuSto_101.17

निर्विकल्पे निरालम्बे निष्प्रपञ्चे निरालये / वियद्वयापि(नि) नैरात्म्ये नमस्ते वज्रयोगिनि // BuSto_101.18

सर्वरत्नविदां पात्रे जननि वज्रयोगिनि / नमस्ते वज्रवाराहि नमस्ते वज्रयोगिनि // BuSto_101.19

त्वं सद्गुरुमुखकमलान्निर्गता कामरूपिणी / महा ऽज्ञानविनाशाय नमस्ते वज्रयोगिनि // BuSto_101.20

इति गुणयुक्ताया मातुर्विधायैकविंशिकाम् / पुण्यं यदवाप्तं तेन जनाः सन्तु(लभन्तु) पूर्णत्वम् // BuSto_101.21

श्रीवज्रयोगिनीप्रणामैकविंशिका समाप्ता //

digital sanskrit buddhist canon, stotra section, text no. 102: vajrayoginyāḥ piṇḍārthastutiḥ siddhācāryavirūpādaviaracitā

ओम् नमो वज्रयोगिन्यै / ओम् नमो बुद्धधर्मसंघेभ्यः / ओम् नमो गुरुबुद्धबोधिसत्त्वेभ्यः / ओम् नमो लोचनादिदशवज्रविलासिनीभ्यः / नमो यमान्तकादिदशक्रोढ(ध) वीरेभ्यः / वाराही शौण्डिनी चैव चण्डाली डोम्बिनी तथा /

नटनी रजकी ब्राह्मी कपालिनी च सास(शाश्व) ता // BuSto_102.1

अमृता ऽमृतकुण्डली च ज्ञानज्योतिःप्रकाशिका / सर्वाशावीरदेवीनामियमेका महासुखा // BuSto_102.2

शून्यता गीयते चासौ पराशक्तिः परात्परा / अमृतोर्ध्वमना दिव्या उपाया नित्यवाहिनी // BuSto_102.3

खेचरी भूचरी चैव पातालवासिनी तथा / प्रवि(ति)ष्ठापूरणी नित्यं त्रैलोक्यक्षोभती(भिणी) तथा // BuSto_102.4

बिन्दुनादकला देवी चन्द्रसूर्यात्मिका हि सा / (नित्या) नैर्माणिकी चैव संभागी च महासुखा // BuSto_102.5

बिन्दुनादकलातीता प्रज्ञापारमिता मता / सर्वभावस्वभावा हि सर्वभावविवर्जिता // BuSto_102.6

प्रलयोत्पत्तिहीना च प्रलयोत्पत्तिकारिणी / शाश्वतत्वात् स्थिता प्रोक्ता शाश्वतेन च वर्जिता // BuSto_102.7

गम्भीरालिङ्गितोदारा महार्था स्वधिमुक्तिका / शून्यतात्रयहीना च प्रभास्वरस्वरूपिणी // BuSto_102.8

एकाराक्षररूपा च वंकाराक्षरसंगता / विचित्रादिक्षणैर्युक्ता चतुरानन्दरूपिणी // BuSto_102.9

बाह्यमण्डलचक्रे ऽपि स्फुरन्ती च त्रिकायतः / कायवाकचित्तभावेषु कायवाकचित्तभूषणी // BuSto_102.10

अतीत्य कायवाकचित्तैः समत्वेन च मध्यगा / नैरात्म्यरूपिणी देवी तथतायां प्रतिष्ठिता // BuSto_102.11

कमलकुलिशाक्रान्तशून्यतात्रयरूपिणी / ललनारसनायोगादवधूती महासुखा // BuSto_102.12

संसारतारणी चैषां तथा तासां प्रतीत्यजा / यां लब्ध्वा योगिनीं मुक्ता भवसंसारबन्धनात् // BuSto_102.13

इत्येषा ऋद्धिदा प्रोक्ता सिद्धिदा चैव योगिनी / मोक्षद्वारपरा चैव सतताभ्यासकारिणाम् // BuSto_102.14

वज्रवत् कुरुते देहं रससिद्धिं ददाति च / गुरुपादप्रसादेन लब्धेयं वज्रयोगिनी // BuSto_102.15

य(ए) तस्याः पाठमात्रेण पुण्यसंभारमादरात् / प्राप्नोति सततं योगी ज्ञानसंभारसंभृतः // BuSto_102.16

श्रीगुह्यसमयतन्त्रे पिण्डार्थाः षोडशश्लोकास्त्रिकायवज्रयोगिन्याः समाप्ताः / कृतिरियं सिद्धाचार्यश्रीविरुपादानामिति //

digital sanskrit buddhist canon, stotra section, text no. 103: vajrayoginyāḥ stutipraṇidhānam siddhācāryavirūpādaviracitam

ओम् नमः श्री वज्रयोगिन्यै, नमोबुद्धधर्मसंघेभ्यः, नमो गुरुबुद्धबोधिसत्त्वेभ्यः, नमो लोचनादिदशवज्रविलासिनीभ्यः, नमो यमान्तकादिदशक्रोधवीरेभ्यः सप्रज्ञेभ्यः / ओम् ओ आ हूं इति कायवाकचित इन्द्रियविज्ञानानि, वाकचित्तानि मनोविज्ञानानि, परचित्तज्ञानाभिज्ञा, परकायप्रवेशाभिज्ञा पुण्डरीकेषु नाभिस्थे रक्तसूर्य मण्डलः // BuSto_103.1

धर्मोदया पद्ममध्ये सिन्दूरारुणरूपिणी / त्रिशृङ्गा हि त्रिकोणा वा चतुःपीठसमन्विता // BuSto_103.2

ह्रींकारं मध्यभागे ऽस्याः पीतवर्णः प्रकीर्तितः / तद्भवा पीतवर्णा च अवधूत्या(ती) स्वयं स्थिता // BuSto_103.3

ललनायां तु सुश्यामा रसनायां च गौरिका / प्रत्यालीढपदा नाम्ना मध्ये पीता मनोरमा // BuSto_103.4

त्रिमार्गे संस्थिता देवी त्रिकायवज्रयोगिनी / सेयं नाम्ना भवेदेका सर्वसम्बुद्धडाकिनी // BuSto_103.5

त्रैलोक्ये दिव्यरूपा च सर्वाशापरिपूरिका / स्वकर्तिना कर्तितं च वामहस्ते स्वमस्तकम् // BuSto_103.6

दक्षिणे ऽस्या स्थिता कर्तिर्जगतो दुःखच्छेदिनी / अस्या वामे स्थिता श्यामा नाम्ना सा वरवर्णिनी // BuSto_103.7

कर्परः सव्यहस्ते च कर्तिर्वामे च संस्थिता / दक्षिणे चैव पीता वै वज्रवैरोचनी स्थिता // BuSto_103.8

कर्तिका दक्षिणे हस्ते वामे कपालधारिणी / प्रत्यालीढपदा देवी नग्निका तु विशेषतः // BuSto_103.9

करौ च द्वौ तयोः पादौ विपरीतौ तथा स्थितौ / बुद्धानां जननी मध्या सम्यक्सम्बुद्धरूपिणी // BuSto_103.10

अक्षया सुभगा नित्यं हन्त्री च मृत्युजन्मनोः / धर्मसंभोगनिर्माणमहासुखस्वरूपिणी // BuSto_103.11

सेयं त्रिभुवने देवी राजये चन्द्रवत्सदा / कबन्धादवधूत्याश्च प्रविशेत्स्वमुखेष्वसृक् // BuSto_103.12

ललनारसनाभ्यां च निःसृत्य शिरसि तथा / करूणारक्तरूपेण पिबन्ती सर्वशान्तये // BuSto_103.13

दुःखं संप्रेक्ष्य लोकानां चतुर्मारनिषूदिनी / दौर्मनस्यादि कर्त्या च कर्तन्ती सर्वमेव तत् // BuSto_103.14

स्तुता हि जिनमातस्त्वं सुप्रसीद भवार्णवे / स्वार्थं कर्तुं परार्थं च भवाम्यहं यथा क्षमः // BuSto_103.15

तत्त्वया देवी कर्तव्यमनुग्रहं मयि सृज / बालो ऽहमज्ञरूपी च कायवाकचित्तदोषतः // BuSto_103.16

गुरुभक्तिं न जाने ऽहं त्वद्भक्तिं च विशेषतः / इत्याकलय लोकेशि कृपा मयि विधीयताम् // BuSto_103.17

कायवाकचेतसां साम्यं कुरु मे त्वं प्रसादतः / येन मुञ्चामि संसारं षड्गतिं न विशाम्यहम् // BuSto_103.18

यथा च वज्रवद्देहो यावन्मुक्तो भवाम्यहम् / मारैः सर्वैः परित्यक्तो यथा कायो भवेन्मम // BuSto_103.19

लीलया सिद्धिभागाः स्युर्निर्विघ्नः सर्वसिद्धिभाक् / सर्वसाधनसिद्धि स्यात् कायश्चैवाजरामरः // BuSto_103.20

त्रासनं सर्वमाराणां सर्वाशापरिपूरणम् / देहि मे त्वं वरां सिद्धिं हित्वा चैव गमागमम् // BuSto_103.21

मनो विलीयतां देवि पञ्चेन्द्रियानुसंयुतम् / सिद्ध्येच्च वज्रसत्त्वायुर्यौवनारोग्यसत्सुखम् // BuSto_103.22

त्वत्प्रसादान्महामुद्रा सर्वेषामेव संभवेत् / देवासुरमनुष्याश्च यत्र यत्र च संस्थिताः / सुखिनस्ते च सर्वे स्युर्बुद्धत्वफललाभिनः // BuSto_103.23

श्रीगुह्यसमयतन्त्रे त्रिकायवज्रयोगिन्याः स्तुतिप्रणिधानं समाप्तम् / कृतिरियं सिद्धाचार्य श्रीविरूपादानाम् //

digital sanskrit buddhist canon, stotra section, text no. 104: vasantatilakāstutiḥ

पादगुह्यगुदनाभिहृच्छिरोधातुमण्डलगमेरुपृष्ठगम् / नाडिकासमयवज्रपद्मगं त्वां नमाम्युभयचित्तहेरुकम् // BuSto_104.1

गुह्यकोकनदकर्णिकान्तरव्योमपञ्चकमहानभःस्थितम् / धर्मधातुतिलकाद्वयाद्वयं त्वां नमामि सहजात्महेरुकम् // BuSto_104.2

कालमेघपटलान्तरोच्छलदविद्युदुग्रपटलाधिकत्विषम् / सत्त्वभाजनयुगप्रदाहिकां त्वां नमामि जगदम्ब हेरुकीम् // BuSto_104.3

नाभिचक्रकुहराम्बुराशितो वज्रवारिजसमाजसंभवाम् / सौधसाररसपानलम्पटां त्वां नमामि बडवानलत्विषम् // BuSto_104.4

श्रीवसन्ततिलकास्तुतिः समाप्ता //

digital sanskrit buddhist canon, stotra section, text no. 105: vasudhārānāmadhāraṇīstotram

ओम् नमो

भगवत्यै आर्यश्रीवसुधारायै दिव्यरूपी सुरूपी च सौम्यरूपी बलप्रदा / वसुधरी वसुधारणी वसुश्री श्रीकरी वरा // BuSto_105.1

धरणी धारणी धाता शरण्या भक्तवत्सला / प्रज्ञापारमिता देवी प्रज्ञा श्रीबुद्धिवर्धिनी // BuSto_105.2

विद्याधरी शिवा सूक्ष्मा शास्ता सर्वत्र मातृका / तरुणी तारु(र)णी देवी विद्यादानेश्वरेश्वरी // BuSto_105.3

भूषिता भूतमाता च सर्वाभरणभूषिता / दुर्दान्तत्रासनी भीता उग्रा उग्रपराक्रमा // BuSto_105.4

दानपारमिता देवी वर्षणी दिव्यरूपिणी / निधानं सर्वमाङ्गल्या कीर्तिर्लक्ष्मीर्यशःशुभा // BuSto_105.5

दहनी मालिनी चण्डी शबरी सर्वमात्रिका / कृतान्तशासनी रौद्री कौमारी विश्वरूपिणी // BuSto_105.6

वीर्यपारमिता देवी जगदानन्दरोचनी / तापसी उग्ररूपी च ऋद्धिसिद्धिबलप्रदा // BuSto_105.7

धन्या पुण्या महाभागा अजिता जितविक्रमा / जगदेकहिता विद्या संग्रामे तारणी शुभा // BuSto_105.8

क्षान्तिपारमिता देवी शीलिनी ध्यानध्यायिनो / पद्मिनी पद्मधारी च पद्मप्रिया पद्मासनी // BuSto_105.9

शुद्धरूपी महातेजा हेमवर्णा प्रभाकरी / चिन्तामणिमहादेवी प्रज्ञापुस्तकधारिणी // BuSto_105.10

निधानं कूटिमारुढिधन्यागारधनप्रिया / त्रैधातुकं महा आदि दिव्याभरणभूषिणी // BuSto_105.11

मातरी सर्वबुद्धानां रत्नधाते(त्वी)श्वरेश्वरी / शून्यता भावनी देवी भावाभावविवर्जिता // BuSto_105.12

वैन्ये(ने)य किं न विन्यस्ता दिव्यक्लेशनिछेदनी / भी(भे) दिनी सर्वमाराणां सप्तपातालक्षोभिनी (णी) // BuSto_105.13

ब्रह्माणी वेदमाता च गुह्या च गुह्यवासिनी / सरस्वती विशालाक्षी चतुर्ब्रह्मविहारिणी // BuSto_105.14

ताथागती महारम्या वज्रिणी धर्मधारिणी / कर्मधातेश्वरी विद्या विश्वज्वालाभमण्डली // BuSto_105.15

बोध(धि)नी सर्वसत्त्वानां बोध्यङ्गकृतशेखरी / ध्याना धीर्मुक्तिसंपन्ना अद्वयद्वयभाविनी // BuSto_105.16

सर्वार्थसाधनी भद्रा स्त्रीरूपामितविक्रमा / दर्शिनी बुद्धमार्गाणां नष्टमार्गप्रदर्शिनी // BuSto_105.17

वागीश्वरी महाशान्तिर्गोप्त्री धात्री धनप्रदा / स्त्रीरूपधारिणी सिद्धा योगिनी योगजेश्वरी // BuSto_105.18

मनोहरी महाक्रान्तिः सौभाग्यप्रियदर्शिनी / सार्थवाहकृपादृष्टिः सर्वताथागतात्मकी // BuSto_105.19

नमस्ते ऽस्तु महादेवी सर्वसत्त्वार्थदायिनी / नमस्ते दिव्यरूपी च वसुधारा नमो ऽस्तु ते // BuSto_105.20

अष्टोत्तरशतं नाम त्रिकालं यं पठेत् पुमान् / प्राप्नोति नियतं सिद्धिमीप्सितार्थमनोरथान् // BuSto_105.21

यदज्ञानकृतं पापम् आनन्तर्यसुदारुणम् / तत्सर्वं क्षपयत्याशु स्मरणात् स(र्व)भद्रकम् // BuSto_105.22

अथवा शीलसंपन्नः सप्तजातिस्मरो भवेत् / प्रियश्चादेयवाक्येन रूपवान् प्रियदर्शनः // BuSto_105.23

विप्रक्षत्रियकुलेषु आदेयमुपजायते / अन्ते भूमीश्वरं प्राप्तः पश्चात् प्राप्त(ः) सुखावतीम् // BuSto_105.24

श्रीवसुधारानामधारणीस्तोत्रं सम्यक्संबुद्धभाषितं समाप्तम् //

digital sanskrit buddhist canon, stotra section, text no. 106: vasudhārāstotram

या सम्यगुक्तविधिभिः परिपथ्यमाना लक्ष्मीं ददाति विपुलां सुगतोपभोगान् / तां धारणीं सकलसत्त्वहितैकचित्तां भक्त्या नमामि सततं वसुधारसंज्ञाम् // BuSto_106.1

या संस्मृता सुचिरसुस्थतरं प्रवृद्धं दारिद्रयदुःखदुरितं शमते नराणाम् / तां कल्पवृक्षसदृशीं वसुधारसंज्ञां नित्यं नमामि शिरसा जगतां हिताय // BuSto_106.2

रत्नाकरीं रत्ननिधानकोषां विचित्ररत्नां प्रतिभासवर्षाम् / रत्नावलीं रत्नमयीं विचित्रां नमामि चार्यां वसुधारधाराम् // BuSto_106.3

तां रत्नपाणिसफलामवभासया ते त्यागावतंसदयशेखरमुद्वहन्तीम् / हारार्धहारचलकुण्डलभूषिताङ्गीमार्यां नमामि वसुवृष्टिकरीं शरण्याम् // BuSto_106.4

श्रीवसुधाराकल्पोद्धृतं वसुधारास्तोत्रं समाप्तम् //

digital sanskrit buddhist canon, stotra section, text no. 107: vidyākṣarastotram

ओम्कारोत्पन्नशुक्लाभं मध्यसिंहासनस्थितम् / बोध्यं त्रिमुद्रया युक्तं वैरोचनमुनिं नुमः // BuSto_107.1

हूंकारोत्पन्ननीलाभं पूर्वे गजासनस्थितम् / भूस्पर्शमुद्रया युक्तम् अक्षोभ्यं श्रीघन नुमः // BuSto_107.2

त्रांकारोत्पन्नहेमाभं दक्षिणे ऽश्वमारूढम् / वरदमुद्रया युक्तं नमामि रत्नसंभवम् // BuSto_107.3

झिङ्कारोत्पन्नरक्ताभं पश्चिमे मयूरासनम् / ध्यानमूर्तिधरं नाथम् अमिताभमुनिं नुमः // BuSto_107.4

खङ्कारोत्पन्नश्यामाभम् उत्तरे गरुडासनम् / अभयमुद्रसंबद्धममोघसिद्धिं नमाम्यहम् // BuSto_107.5

रोचना मामकी चैव पाण्डरा तारणी तथा / ब्रह्मादिकोणसंस्थाश्च चतुर्देव्यो नमो नमः // BuSto_107.6

निरंजनं निराकारं प्रत्येकज्योतिरूपिणम् / चैत्यमध्यस्थितं देवं वज्रसत्त्वं नुमो वयम् // BuSto_107.7

श्री बुद्धभट्टारकस्य विद्याक्षरस्तोत्रं समाप्तम् //

digital sanskrit buddhist canon, stotra section, text no. 108: advayaparamārthā nāmasaṅgītiḥ

ओम् नमः श्रीमहामञ्जुनाथाय

अथ वज्रधरः श्रीमान् दुर्दान्तदमकः परः / त्रिलोकविजयी वीरो गुह्यराट् कुलिशेश्वरः // BuSto_108.1

विबुद्धपुण्डरीकाक्षः प्रोत्फुल्लकमलाननः / प्रोल्लालयन् वज्रवरं स्वकरेण मुहुर्मुहः // BuSto_108.2

भृकुटीतरङ्गप्रमुखैरनन्तैर्वज्रपाणिभिः / दुर्दान्तदमकैर्वीरैर्वीरवीभत्सरुपिभिः // BuSto_108.3

उल्लालयदिभिः स्वकरैः प्रस्फुरद्वज्रकोटिभिः / प्रज्ञोपायमहाकरुणाजगदर्थकरैः परैः // BuSto_108.4

हृष्टतुष्टाशयैर्मुदितैः क्रोधविग्रहरुपिभिः / बुद्धकृत्यकरैर्नाथैः सार्द्धं प्रणतविग्रहै // BuSto_108.5

प्रणम्य नाथं संबुद्धं भगवन्तं तथागतम् / कृताञ्जलिपुटो भूत्वा इदमाह स्थितो ऽग्रतः // BuSto_108.6

मद्धिताय ममार्थाय अनुकम्पाय मे विभो / मायाजालाभिसंबोधेर्यथालाभि भवाम्यहम् // BuSto_108.7

अज्ञानपङ्कमग्नानां क्लेशव्याकुलचेतसाम् / हिताय सर्वसत्त्वानामनुत्तरफलाप्तये // BuSto_108.8

प्रकाशयतु संबुद्धो भगवान् शास्ता जगद्गुरुः / महासमयतत्त्वज्ञ इन्द्रियाशयवित् परः // BuSto_108.9

भगवन्! ज्ञानकायस्य महोष्णीषस्य गीष्पतेः / मञ्जुश्रीज्ञानसत्त्वस्य ज्ञानमूर्तेः स्वयम्भुवः // BuSto_108.10

गम्भीरार्थामुदारार्थां महार्थामसमां शिवाम् / आदिमध्यान्तकल्याणीं नामसङ्गीतिमुत्तामाम् // BuSto_108.11

यातीतैर्भाषिता बुद्धैर्भाषिष्यन्ते ह्यानागताः / प्रत्युत्पन्नाश्च संबुद्धा यां भाषन्ते पुनः पुनः // BuSto_108.12

मायाजाले महातन्त्रे या चास्मिन् संप्रगीयते / महावज्रधरैर्हृष्टैरमेयैर्मन्त्रधारिभिः // BuSto_108.13

अहं चैनां धारयिष्याम्यानिर्याणाद् दृढाशयः / यथा भवाम्यहं नाथ सर्वसंबुद्धगुह्यधृक् // BuSto_108.14

प्रकाशयिष्ये सत्त्वानां यथाशयविशेषतः / अशेषक्लेशनाशाय अशेषाज्ञानहानये // BuSto_108.15

एवमध्येष्य गुह्येन्द्रो वज्रपाणिस्तथागतम् / कृताञ्जलिपुतो भूत्वा प्रह्वकायःस्थितो ऽग्रतः // BuSto_108.16

इति अध्येषणाज्ञानगाथाः षोडश /

अथ शाक्यमुनिर्भगवान् संबुद्धो द्विपदोत्तमः / निर्णमय्यायतां स्फीतां स्वजिह्वां स्वमुखाच्छुभाम् // BuSto_108.17

स्मितं संदश्र्य लोकानामपायत्रयशोधनम् / त्रिलोकाभासकरणं चतुर्मारारिशासनम् // BuSto_108.18

त्रिलोकमापूरयन्त्या ब्राह्म मधुरया गिरा / प्रत्यभाषत गुह्येन्द्रं वज्रपाणिं महाबलम् // BuSto_108.19

साधु वज्रधर श्रीमन् साधु ते वज्रपाणये / यस्त्वं जगद्धितार्थाय महाकरुणयान्वितः // BuSto_108.20

महार्थां नामसङ्गीतिं पवित्रामघनाशिनीम् / मञ्जुश्रीज्ञानकायस्य मत्तः श्रोतुं समुद्यतः // BuSto_108.21

तत्साधु देशयाम्येषः अहं ते गुह्यकाधिप / शृणु त्वमेकाग्रमनास्तत्साधु भगवन्निति // BuSto_108.22

इति प्रतिवचनज्ञानगाथाः षट् /

अथ शाक्यमुनिर्भगवान् सकलं मन्त्रकुलं महत् / मन्त्रविद्याधरकुलं व्यवलोक्य कुलत्रयम् // BuSto_108.23

लोकलोकोत्तरकुलं लोकालोककुलं महत् / महामुद्राकुलं चाग्र्यं महोष्णीषकुलं महत् // BuSto_108.24

इति षट्कुलावलोकनज्ञानगाथे द्वे /

इमां षण्मन्त्रराजानां संयुक्तामद्वयो दयाम् / अनुत्पादधर्मिणीं गाथां भाषते स्म गिरांपतेः // BuSto_108.25

अ आ इ ई उ ऊ ए ऐ ओ औ अं अः स्थितो हृदि / ज्ञानमूर्तिरहं बुद्धो बुद्धानां त्र्यध्ववर्तिनाम् // BuSto_108.26

ओम् वज्रतीक्ष्णदुःखच्छेदप्रज्ञाज्ञानमूर्तये / ज्ञानकायवागीश्वरारपचनाय ते नमः // BuSto_108.27

इति मायाजालाभिसंबोधिक्रमगाथास्तिस्रः /

तद्यथा भगवान् बुद्धः संबुद्धो ऽकारसम्भवः / अकारः सर्ववर्णाग्र्यो महार्थः परमाक्षरः // BuSto_108.28

महाप्राणो ह्यनुत्पादो वागदाहारवर्जितः / सर्वाभिलापहेत्व्ग्र्यः सर्ववाक्सुप्रभास्वरः // BuSto_108.29

महामहमहारागः सर्वसत्त्वरतिङ्करः / महामहमहाद्वेषः सर्वक्लेशमहारिपुः // BuSto_108.30

महामहमहामोहो मूढधीमोहसूदनः / महामहमहाक्रोधो महाक्रोधरिपुर्महान् // BuSto_108.31

महामहमहालोभः सर्वलोभनिषूदनः / महाकामो महासौख्यो महामोदो महारतिः // BuSto_108.32

महारुपो महाकायो महावर्णो महावपुः / महानामा महोदारो महाविपुलमण्डलः // BuSto_108.33

महाप्रज्ञायुधधरो महाक्लेशाङ्कुशो ऽग्रणीः / महायशा महाकीर्तिर्महाज्योतिर्महाद्युतिः // BuSto_108.34

महामायाधरो विद्वान् महामायार्थसाधकः / महामायारतिरतो महामायेन्द्रजालिकः // BuSto_108.35

महादानपतिः श्रेष्ठो महाशीलधरो ऽग्रणीः / महाक्षान्तिधरो धीरो महावीर्यपराक्रमः // BuSto_108.36

महाध्यानसमाधिस्थो महाप्रज्ञाशरीरधृक् / महाबलो महापायः प्रणिधिर्ज्ञानसागरः // BuSto_108.37

महामैत्रीमयो ऽमेयो महाकारुणिको ऽग्रधीः / महाप्रज्ञो महाधीमान् महोपायो महाकृतिः // BuSto_108.38

महाऋद्धिबलोपेतो महावेगो महाजवः / महर्द्धिको महेशाख्यो महाबलपराक्रमः // BuSto_108.39

महाभवाद्रिसंभेत्ता महावज्रधरो धनः / महाक्रूरो महारौद्रो महाभयभयङ्कर // BuSto_108.40

महाविद्योत्तमो नाथो महामन्त्रोत्तमो गुरुः / महायाननयारुढो महायाननयोत्तमः // BuSto_108.41

इति वज्रधातुमण्डलज्ञानगाथाश्चतुर्दश /

महावैरोचनो बुद्धो महामौनी महामुनिः / महामन्त्रनयोद्भूतो महामन्त्रनयात्मकः // BuSto_108.42

दशपारमिताप्राप्तो दशपारमिताश्रयः / दशपारमिताशुद्धिर्दशपारमितानयः // BuSto_108.43

दशभूमीश्वरो नाथो दशभूमिप्रतिष्ठितः / दशज्ञानविशुद्धात्मा दशज्ञानविशुद्धधृक् // BuSto_108.44

दशाकारो दशार्थार्थो मुनीन्द्रो दशबलो विभुः / अशेषविश्वार्थकरो दशाकारवशी महान् // BuSto_108.45

अनादिर्निष्प्रपञ्चात्मा शुद्धात्मा तथतात्मकः / भूतवादी यथावादी तथाकारी अनन्यवाक् // BuSto_108.46

अद्वयो द्वयवादी च भूतकोटिव्यवस्थितः / नैरात्म्यसिंहनिर्णादी कुतीथ्र्यमृगभीकरः // BuSto_108.47

सर्वत्रगो ऽमोघगतिस्तथागतमनोजवः / जिनो जितारिर्विजयो चक्रवर्ती महाबलः // BuSto_108.48

गणमुख्यो गणाचार्यो गणेशो गणपतिर्वशी / महानुभावो धौरेयो ऽनन्यनेयो महानयः // BuSto_108.49

वागिशो वाक्पतिर्वाग्मी वाचस्पतिरनन्तगोः / सत्यवाक् सत्यवादी च चतुःसत्योपदेशकः // BuSto_108.50

अवैवर्तिको ह्यनागामो खड्गः प्रत्येकनायकः / नानानिर्याणनिर्यातो महाभूतैककारणः // BuSto_108.51

अर्हन् क्षीणास्रवो भिक्षुर्वीतरागो जितेन्द्रियः / क्षेमप्राप्तो ऽभयप्राप्तः शीतीभूतो ह्यानाविलः // BuSto_108.52

विद्याचरणसंपन्नः सुगतो लोकवित्परः / निर्ममो निरहङ्कारः सत्यद्वयनयस्थितः // BuSto_108.53

संसारपारकोटिस्थः कृतकृत्यः स्थलस्थितः / कैवल्यज्ञाननिष्ठियुतः प्रज्ञाशस्त्रो विदारणः // BuSto_108.54

सद्धर्म्मो धर्मराड् भास्वान् लोकालोककरः परः / धर्मेश्वरो धर्मराजः श्रेयोमार्गोपदेशकः // BuSto_108.55

सिद्धार्थः सिद्धसंकल्पः सर्वसंकल्पवर्जितः / निर्विकल्पो ऽक्षयो धातुर्धर्मधातुः परो ऽव्ययः // BuSto_108.56

पुण्यवान् पुण्यसंभारो ज्ञानं ज्ञानाकरं महत् / ज्ञानवान् सदसज्ज्ञानी संभारद्वयसंभृतः // BuSto_108.57

शाश्वतो विश्वराड् योगी ध्यानं ध्येयो धियांपतिः / प्रत्यात्मवेद्यो ह्यचलः परमाद्यस्त्रिकायधृक् // BuSto_108.58

पञ्चकायात्मको बुद्धः पञ्चज्ञानात्मको विभुः / पञ्चबुद्धात्ममुकुटः पञ्चचक्षुरसङ्गधृक् // BuSto_108.59

जनकः सर्वबुद्धानां बुद्धपुत्रः परोवरः / प्रज्ञाभवोद्भवो योनिर्धर्मयोनिर्भवान्तकृत् // BuSto_108.60

घनैकसारो वज्रात्मा सद्योजातो जगत्पतिः / गगनोद्भवः स्वयम्भूः प्रज्ञाज्ञानानलो महान् // BuSto_108.61

वैरोचनो महादीप्तिर्ज्ञानज्योतिर्विरोचनः / जगत्प्रदीपो ज्ञानोल्को महातेजाः प्रभास्वरः // BuSto_108.62

विद्याराजो ऽग्रमन्त्रेशो मन्त्रराजो महार्थकृत् / महोष्णीषो ऽद्भुतोष्णीषो विश्वदर्शी वियत्पतिः // BuSto_108.63

सर्वबुद्धात्मभावाग्र्यो जगदानन्दलोचनः / विश्वरुपी विधाता च पूज्यो, मान्यो महाऋषिः // BuSto_108.64

कुलत्रयधरो मन्त्री महासमयमन्त्रधृक् / रत्नत्रयधरः श्रेष्ठस्त्रियानोत्तमदेशकः // BuSto_108.65

अमोघपाशो विजयी वज्रपाशो महाग्रहः / वज्राङ्कुशो महापाशः वज्रभैरवभीकरः // BuSto_108.66

इति सुविशुद्धधर्मधातुज्ञानगाथाः पादोनपञ्चविंशतिः /

क्रोधराट् षण्मुखो भीमः षण्णेत्रः षड्भुजो बली / दंष्ट्राकरालः कङ्कालो हलाहलः शताननः // BuSto_108.67

यमान्तको विघ्नराजो वज्रवेगो भयङ्करः / विघुष्टवज्रो हृद्वज्रो मायावज्रो महोदरः // BuSto_108.68

कुलिशेशो वज्रयोनिर्वज्रमण्डो नभोपमः / अचलैकजटाटोपो गजचर्मपटार्द्रधृक् // BuSto_108.69

हाहाकारो महाघोरो हीहीकारो भयानकः / अट्टहासो महाहासो वज्रहासो महारवः // BuSto_108.70

वज्रसत्त्वो महासत्त्वो वज्रराजो महासुखः / वज्रचण्डो महामोदो वज्रहूंकारहूंकृतिः // BuSto_108.71

वज्रबाणायुधधरो वज्रखड्गो निकृन्तनः / विश्ववज्रधरो बज्री एकवज्री रणञ्जहः // BuSto_108.72

वज्रज्वालाकरालाक्षो वज्रज्वालाशिरोरुहः / वज्रावेशो महावेशः शताक्षो वज्रलोचनः // BuSto_108.73

वज्ररोमाङ्कुरतनुर्वज्ररोमैकविग्रहः / वज्रकोटिनखारम्भो वज्रसारघनच्छवि // BuSto_108.74

वज्रमालाधरः श्रीमान् वज्राभरणभूषितः / हाहाट्टहासो निर्घोषो वज्रघोषः षडक्षरः // BuSto_108.75

मञ्जुघोषो महानादस्त्रैलोक्यैकरवो महान् / आकाशधातुपर्यन्तघोषो घोषवतां वरः // BuSto_108.76

इत्यादर्शज्ञानगाथाः पादेन सार्धं दश /

तथताभूतनैरात्म्यभूतकोटिरनक्षरः / शून्यतावादिवृषभो गम्भीरोदारगर्जनः // BuSto_108.77

धर्मशङ्खो महाशब्दो धर्मगण्डी महारणः / अप्रतिष्ठितनिर्वाणो दशदिग्धर्मदुन्दुभिः // BuSto_108.78

अरुपो रुपवानग्र्यो नानारुपो मनोमयः / सर्वरुपावभासश्रीरशेषप्रतिबिम्बधृक् // BuSto_108.79

अप्रधृष्यो महेशाख्यस्त्रैधातुकमहेश्वरः / समुच्छ्रितार्यमार्गस्थो धर्मकेतुर्महोदय // BuSto_108.80

त्रैलोक्यैककुमाराङ्गः स्थविरो वृद्धः प्रजापति / द्वात्रिंशल्लक्षणधरः कान्तस्त्रैलोक्यसुन्दरः // BuSto_108.81

लोकज्ञानगुणाचार्यो लोकाचार्यो विशारदः / नाथस्त्राता त्रिलोकाप्तः शरणं ताय्यनुत्तरः // BuSto_108.82

गगनाभोगसम्भोगः सर्वज्ञज्ञानसागरः / अविद्याण्डकोशसंभेत्ता भवपञ्जरदारणः // BuSto_108.83

शमिताशेषसंक्लेशः संसारार्णवपारगः / ज्ञानाभिषेकमुकुटः सम्यक्संबुद्धभूषणः // BuSto_108.84

त्रिदुःखदुःखशमनस्त्र्यन्तो ऽनन्तस्त्रिमुक्तिगः / सर्वावरणनिर्मुक्त आकाशसमतां गतः // BuSto_108.85

सर्वक्लेशमलातीतस्त्र्यध्वानध्वगतिं गतः / सर्वसत्त्वमहानागो गुणशेखरशेखरः // BuSto_108.86

सर्वोपधिविनिर्मुक्तो व्योमवत्र्मनि सुस्थितः / महाचिन्तामणिधरः सर्वरत्नोत्तमो विभुः // BuSto_108.87

महाकल्पतरुः स्फीतो महाभद्रघटोत्तमः / सर्वसत्त्वार्थकृत्कर्त्ता हितैषी सत्त्ववत्सलः // BuSto_108.88

शुभाशुभज्ञः कालज्ञः समयज्ञः समयो विभुः / सत्त्वेन्द्रियज्ञो वेलज्ञो विमुक्तित्रयकोविदः // BuSto_108.89

गुणी गुणज्ञो धर्मज्ञः प्रशस्तो मङ्गलोदयः / सर्वमङ्गलमाङ्गल्यः कीर्तिर्लक्ष्मीर्यशः शुभः // BuSto_108.90

महोत्सवो महाश्वासो महानन्दो महारतिः / सत्कारः सत्कृतिर्भूतिः प्रमोदः श्रीर्यशस्पतिः // BuSto_108.91

वरेण्यो वरदः श्रेष्ठः शरण्यः शरणोत्तमः / महाभयारिः प्रवरो निःशेषभयनाशनः // BuSto_108.92

शिखी शिखण्डी जटिलो जटी मौण्डी किरीटिमान् / पञ्चाननः पञ्चशिखः पञ्चचीरकशेखरः // BuSto_108.93

महाब्रतधरो मौञ्जी ब्रह्मचारी ब्रतोत्तमः / महातपास्तपोनिष्ठः स्नातको गौतमो ऽग्रणी // BuSto_108.94

ब्रह्मविद् ब्राह्मणो ब्रह्मा ब्रह्मनिर्वाणमाप्तवान् / मुक्तिर्मोक्षो विमोक्षाङ्गो विमुक्तिः शान्तता शिवः // BuSto_108.95

निर्वाणं निर्वृतिः शान्तिः श्रेयो निर्याणमन्तगः / सुखदुःखान्तकृन्निष्ठा वैराग्यमुपधिक्षयः // BuSto_108.96

अजयो ऽनुपमो ऽव्यक्तो निराभासो निरञ्जनः / निष्कलः सर्वगो व्यापी सूक्ष्मो बीजमनाश्रवः // BuSto_108.97

अरजो विरजो विमलो वान्तदोषो निरामयः / सुप्रबुद्धो विबुद्धात्मा सर्वज्ञः सर्ववित्परः // BuSto_108.98

विज्ञानधर्मतातीतो ज्ञानमद्वयरुपधृक् / निर्विकल्पो निराभोगस्त्र्यध्वसंबुद्धकार्यकृत् // BuSto_108.99

अनादिनिधनो बुद्ध आदिबुद्धो निरन्वयः / ज्ञानैकचक्षुरमलो ज्ञानमूर्तिस्तथागतः // BuSto_108.100

वागीश्वरो महावादी वादिराड् वादिपुङ्गवः / वदतांवरो वरिष्ठो वादिसिंहो ऽपराजितः // BuSto_108.101

समन्तदर्शी प्रामोद्यस्तेजोमाली सुदर्शनः / श्रीवत्सः सुप्रभो दीप्तिर्भाभासुरकरद्युतिः // BuSto_108.102

महाभिषग्वरः श्रेष्ठः शल्यहर्ता निरुत्तरः / अशेषभैषज्यतरुः क्लेशव्याधिर्महारिपुः // BuSto_108.103

त्रैलोक्यतिलकः कान्तः श्रीमान् नक्षत्रमण्डलः / दशदिग्व्योमपर्य्यन्तो धर्मध्वजमहोच्छ्रयः // BuSto_108.104

जगच्छत्रैकविपुलो मैत्रीकरुणमण्डलः / पद्मनृत्येश्वरः श्रीमान् रत्नच्छत्रो महाविभुः // BuSto_108.105

सर्वबुद्धमहाराजः सर्वबुद्धात्मभावधृक् / सर्वबुद्धमहायोगः सर्वबुद्धैकशासनः // BuSto_108.106

वज्ररत्नाभिषेकश्रीः सर्वरत्नाधिपेश्वरः / सर्वलोकेश्वरपतिः सर्ववज्रधराधिपः // BuSto_108.107

सर्वबुद्धमहाचित्तः सर्वबुद्धमनोगतिः / सर्वबुद्धमहाकायः सर्वबुद्धसरस्वती // BuSto_108.108

वज्रसूर्य्यमहालोको वज्रेन्दुविमलप्रभः / विरागादिमहारागो विश्ववर्णोज्ज्वलप्रभः // BuSto_108.109

सम्बुद्धवज्रपर्यङ्को बुद्धसङ्गीतिधर्मधृक् / बुद्धपद्मोद्भवः श्रीमान् सर्वज्ञज्ञानकोषधृक् // BuSto_108.110

विश्वमायाधरो राजा बुद्धविद्याधरो महान् / वज्रतीक्ष्णो महाखड्गो विशुद्धः परमाक्षरः // BuSto_108.111

दुःखच्छेदमहायानवज्रधर्ममहायुधः / जिनजिग् वज्रगाम्भीर्यो वज्रबुद्धिर्यथार्थवित् // BuSto_108.112

सर्वपारमितापूरी सर्वभूमिविभूषणः / विशुद्धधर्मनैरात्म्यः सम्यग्ज्ञानेन्दुहृत्प्रभः // BuSto_108.113

मायाजालमहोद्योगः सर्वतन्त्राधिपः परः / अशेषवज्रपर्यङ्को निःशेषज्ञानकायधृक् // BuSto_108.114

समन्तभद्रः सुमतिः क्षितिगर्भो जगद्धृतिः / सर्वबुद्धमहागर्भो विश्वनिर्माणचक्रदृक् // BuSto_108.115

सर्वभावस्वभावाग्य्रः सर्वभावस्वभावधृक् / अनुत्पादधर्मा विश्वार्थः सर्वधर्मस्वभावधृक् // BuSto_108.116

एकक्षणमहाप्राज्ञः सर्वधर्मावबोधधृक् / सर्वधर्माभिसमयो भूतान्तमुनिरग्रधीः // BuSto_108.117

स्तिमितः सुप्रसन्नात्मा सम्यक्संबुद्धबोधिधृक् / प्रत्यक्षः सर्वबुद्धानां ज्ञानार्चिः सुप्रभास्वरः // BuSto_108.118

इति प्रत्यवेक्षणज्ञानगाथाः द्वाचत्वारिंशत् /

इष्टार्थसाधकः परः सर्वापायविशोधकः / सर्वसत्त्वोत्तमो नाथः सर्वसत्त्वप्रमोचकः // BuSto_108.119

क्लेशसंग्रामशूरैकः अज्ञानरिपुदर्पहा / धीशृङ्गारधरः श्रीमान् वीरबीभत्सरुपधृक् // BuSto_108.120

बाहुदण्डशताक्षेपपदनिक्षेपनर्त्तनः / श्रीमच्छतभुजाभोगगगनाभोगनर्त्तनः // BuSto_108.121

एकपादतलाक्रान्तमहीमण्डतले स्थितः / ब्रह्माण्डशिखराक्रान्तपादाङ्गुष्ठनखे स्थितः // BuSto_108.122

एकार्थो ऽद्वयधर्मार्थः परमार्थो ऽविनश्वरः / नानाविज्ञप्तिरुपार्थश्चित्तविज्ञानसंततिः // BuSto_108.123

अशेषभावार्थरतिः शून्यतारतिरग्रधीः / भवरागाद्यतीतश्च भवत्रयमहारतिः // BuSto_108.124

शुद्धः शुभ्राभ्रधवलः शरच्चन्द्रांशुसुप्रभः / बालार्कमण्डलच्छायो महारागनखप्रभः // BuSto_108.125

इन्द्रनीलाग्रसच्चीरो महानीलकचाग्रधृक् / महामणिमयूखश्रीर्बुद्धनिर्वाणभूषणः // BuSto_108.126

लोकधातुशताकम्पी ऋद्धिपादमहाक्रमः / महास्मृतिधरस्तत्त्वश्चतुःस्मृतिसमाधिराट् // BuSto_108.127

बोध्यङ्गकुसुमामोदस्तथागतगुणोदधिः / अष्टाङ्गमार्गनयवित् सम्यक्संबुद्धमार्गवित् // BuSto_108.128

सर्वसत्त्वमहासङ्गो निःसङ्गो गगनोपमः / सर्वसत्त्वमनोजातः सर्वसत्त्वमनोजवः // BuSto_108.129

सर्वसत्त्वेत्द्रियार्थज्ञः सर्वसत्त्वमनोहरः / पञ्चस्कन्धार्थतत्त्वज्ञः पञ्चस्कन्धविशुद्धधृक् // BuSto_108.130

सर्वनिर्याणकोटिस्थः सर्वनिर्याणकोविदः / सर्वनिर्याणमार्गस्थः सर्वनिर्याणदेशकः // BuSto_108.131

द्वादशाङ्गभवोत्खातो द्वादशाकारशुद्धधृक् / चतुःसत्यनयाकारो अष्टज्ञानावबोधधृक् // BuSto_108.132

द्वादशाकारसत्यार्थः षोडशाकारतत्त्ववित् / विंशत्याकारसंबोधिर्विबुद्धः सर्ववित्परः // BuSto_108.133

अमेयबुद्धनिर्माणकायकोटिविभावकः / सर्वक्षणाभिसमयः सर्वचित्तक्षणार्थवित् // BuSto_108.134

नानायाननयोपायजगदर्थविभावकः / यानत्रितयनिर्यात एकयानफले स्थित // BuSto_108.135

क्लेशधातुविशुद्धात्मा कर्मधातुक्षयङ्करः / ओघोदधिसमुत्तीर्णो योगकान्तारनिसृतः // BuSto_108.136

क्लेशोपक्लेशसंक्लेशसुप्रहीणसवासनः / प्रज्ञोपायमहाकरुणा अमोघजगदर्थकृत् // BuSto_108.137

सर्वसंज्ञाप्रहोणार्थो विज्ञानार्थो निरोधकृत् / सर्वसत्त्वमनोविषयः सर्वसत्त्वमनोगतिः // BuSto_108.138

सर्वसत्त्वमनो ऽन्तस्थस्तच्चित्तसमताङ्गतः / सर्वसत्त्वमनोह्लादी सर्वसत्त्वमनोरतिः // BuSto_108.139

सिद्धान्तो विभ्रमापेतः सर्वभ्रान्तिविवर्जितः / निःसंदिग्धमतिस्त्र्यर्थः सर्वार्थस्त्रिगुणात्मकः // BuSto_108.140

पञ्चस्कन्धार्थस्त्रिकालः सर्वक्षणविभावकः / एकक्षणाभिसंबुद्धः सर्वबुद्धस्वभावधृक् // BuSto_108.141

अनङ्गकायः कायाग्य्रः कायकोटिविभावकः / अशेषरुपसन्दर्शी रत्नकेतुर्महामणिः // BuSto_108.142

इति समताज्ञानगाथाश्चतुर्विशतिः /

सर्वसंबुद्धबोद्धव्यो बुद्धबोधिरनुत्तरः / अनक्षरो मन्त्रयोनिर्महामन्त्र कुलत्रयः // BuSto_108.143

सर्वमन्त्रार्थजनको महाबिन्दुरनक्षरः / पञ्चाक्षरो महाशून्यो बिन्दुशून्यः षडक्षरः // BuSto_108.144

सर्वाकारो निराकारः षोडशार्धार्धबिन्दुधृक् / अकलः कलनातीश्चतुर्थध्यानकोटिधृक् // BuSto_108.145

सर्वध्यानकलाभिज्ञः समाधिकुलगोत्रवित् / समाधिकायः कायाग्य्रः सर्वसंभोगकायराट् // BuSto_108.146

निर्माणकायः कायाग्य्रो बुद्धनिर्माणवंशधृक् / दशदिग्विश्वनिर्माणो यथावज्जगदर्थकृत् // BuSto_108.147

देवातिदेवो देवेन्द्रः सुरेन्द्रो दानवाधिपः / अमरेन्द्रः सुरगुरुः प्रमथः प्रमथेश्वरः // BuSto_108.148

उत्तीर्णभवकान्तार एकः शास्ता जगद्गुरुः / प्रख्यातदशदिग्लोको धर्मदानपतिर्महान् // BuSto_108.149

मैत्रीसन्नाहसन्नद्धः करुणावर्मवर्मितः / प्रज्ञाखड्गो धनुर्बाणः क्लेशाज्ञानरणञ्जहः // BuSto_108.150

मारारिर्मारजिद्वीरश्चतुर्मारभयान्तकृत् / सर्वमारचमूजेता सम्बद्धो लोकनायकः // BuSto_108.151

वन्द्यः पूज्यो ऽभिवाद्यश्च माननीयश्च नित्यशः / अर्चनीयतमो मान्यो नमस्यः परमो गुरुः // BuSto_108.152

त्रैलोक्यैकक्रमगतिर्व्योमपर्य्यन्तविक्रमः / त्रैविद्यः श्रोत्रियः पूतः षडभिज्ञः षडनुस्मृतिः // BuSto_108.153

बोधिसत्त्वो महासत्त्वो लोकातीतो महर्द्धिकः / प्रज्ञापारमितानिष्ठः प्रज्ञातत्त्वत्वमागतः // BuSto_108.154

आत्मवित्परवित्सर्वः सर्वीयो ह्यग्रपुद्गलः / सर्वोपमामतिक्रान्तो ज्ञेयो ज्ञानाधिपः परः // BuSto_108.155

धर्मदानपतिः श्रेष्ठश्चतुर्मुद्रार्थदेशकः / पर्युपास्यतमो जगतां निर्याणत्रययायिनाम् // BuSto_108.156

परमार्थविशुद्धश्रीस्त्रैलोक्यसुभगो महान् / सर्वसम्पत्करः श्रीमान् मञ्जुश्रीः श्रीमतांवरः // BuSto_108.157

इति कृत्यानुष्ठानज्ञानगाथाः पञ्चदश /

नमस्ते वरदवज्राग्य्र भूतकोटे नमो ऽस्तु ते / नमस्ते शून्यतागर्भ बुद्धबोधे नमोस्तु ते // BuSto_108.158

बुद्धराग नमस्ते ऽस्तु बुद्धकाम नमो नमः / बुद्धप्रीते नमस्तुभ्यं बुद्धमोद नमो नमः // BuSto_108.159

बुद्धस्मित नमस्तुभ्यं बुद्धहास नमो नमः / बुद्धवाच नमस्तुभ्यं बुद्धभाव नमो नमः // BuSto_108.160

अभवोद्भव नमस्तुभ्यं नमस्ते बुद्धसंभव / गगनोद्भव नमस्तुभ्यं नमस्ते ज्ञानसंभव // BuSto_108.161

मायाजाल नमस्तुभ्यं नमस्ते बुद्धनाटक / नमस्ते सर्वसर्वेभ्यो ज्ञानकाय नमो ऽस्तु ते // BuSto_108.162