1.1. Ñāṇakathā (PS1.1)

1.1.70. Yamakapāṭihīrañāṇaniddesa

Katamaṁ tathāgatassa yamakapāṭihīre ñāṇaṁ?

Idha tathāgato yamakapāṭihīraṁ karoti asādhāraṇaṁ sāvakehi.

Uparimakāyato aggikkhandho pavattati, heṭṭhimakāyato udakadhārā pavattati;

heṭṭhimakāyato aggikkhandho pavattati, uparimakāyato udakadhārā pavattati;

puratthimakāyato aggikkhandho pavattati, pacchimakāyato udakadhārā pavattati;

pacchimakāyato aggikkhandho pavattati, puratthimakāyato udakadhārā pavattati;

dakkhiṇaakkhito aggikkhandho pavattati, vāmaakkhito udakadhārā pavattati;

vāmaakkhito aggikkhandho pavattati, dakkhiṇaakkhito udakadhārā pavattati;

dakkhiṇakaṇṇasotato aggikkhandho pavattati, vāmakaṇṇasotato udakadhārā pavattati;

vāmakaṇṇasotato aggikkhandho pavattati, dakkhiṇakaṇṇasotato udakadhārā pavattati;

dakkhiṇanāsikāsotato aggikkhandho pavattati, vāmanāsikāsotato udakadhārā pavattati;

vāmanāsikāsotato aggikkhandho pavattati, dakkhiṇanāsikāsotato udakadhārā pavattati;

dakkhiṇaaṁsakūṭato aggikkhandho pavattati, vāmaaṁsakūṭato udakadhārā pavattati;

vāmaaṁsakūṭato aggikkhandho pavattati, dakkhiṇaaṁsakūṭato udakadhārā pavattati;

dakkhiṇahatthato aggikkhandho pavattati, vāmahatthato udakadhārā pavattati;

vāmahatthato aggikkhandho pavattati, dakkhiṇahatthato udakadhārā pavattati;

dakkhiṇapassato aggikkhandho pavattati, vāmapassato udakadhārā pavattati;

vāmapassato aggikkhandho pavattati, dakkhiṇapassato udakadhārā pavattati;

dakkhiṇapādato aggikkhandho pavattati, vāmapādato udakadhārā pavattati;

vāmapādato aggikkhandho pavattati, dakkhiṇapādato udakadhārā pavattati;

aṅgulaṅgulehi aggikkhandho pavattati, aṅgulantarikāhi udakadhārā pavattati;

aṅgulantarikāhi aggikkhandho pavattati, aṅgulaṅgulehi udakadhārā pavattati;

ekekalomato aggikkhandho pavattati, ekekalomato udakadhārā pavattati;

lomakūpato lomakūpato aggikkhandho pavattati, lomakūpato lomakūpato udakadhārā pavattati.

Channaṁ vaṇṇānaṁ—

nīlānaṁ, pītakānaṁ, lohitakānaṁ, odātānaṁ, mañjiṭṭhānaṁ, pabhassarānaṁ bhagavā caṅkamati, nimmito tiṭṭhati vā nisīdati vā seyyaṁ vā kappeti.

Bhagavā tiṭṭhati, nimmito caṅkamati vā nisīdati vā seyyaṁ vā kappeti.

Bhagavā nisīdati, nimmito caṅkamati vā tiṭṭhati vā seyyaṁ vā kappeti.

Bhagavā seyyaṁ kappeti, nimmito caṅkamati vā tiṭṭhati vā nisīdati vā.

Nimmito caṅkamati, bhagavā tiṭṭhati vā nisīdati vā seyyaṁ vā kappeti.

Nimmito tiṭṭhati, bhagavā caṅkamati vā nisīdati vā seyyaṁ vā kappeti.

Nimmito nisīdati, bhagavā caṅkamati vā tiṭṭhati vā seyyaṁ vā kappeti.

Nimmito seyyaṁ kappeti, bhagavā caṅkamati vā tiṭṭhati vā nisīdati vā.

Idaṁ tathāgatassa yamakapāṭihīre ñāṇaṁ.

Yamakapāṭihīrañāṇaniddeso sattatimo.

1.1.71. Mahākaruṇāñāṇaniddesa

Katamaṁ tathāgatassa mahākaruṇāsamāpattiyā ñāṇaṁ?

Bahukehi ākārehi passantānaṁ buddhānaṁ bhagavantānaṁ sattesu mahākaruṇā okkamati.

Āditto lokasannivāsoti—

passantānaṁ buddhānaṁ bhagavantānaṁ sattesu mahākaruṇā okkamati.

Uyyutto lokasannivāsoti—

passantānaṁ buddhānaṁ bhagavantānaṁ sattesu mahākaruṇā okkamati.

Payāto lokasannivāsoti—

passantānaṁ buddhānaṁ bhagavantānaṁ sattesu mahākaruṇā okkamati.

Kummaggappaṭipanno lokasannivāsoti—

passantānaṁ buddhānaṁ bhagavantānaṁ sattesu mahākaruṇā okkamati.

Upanīyati loko addhuvoti—

passantānaṁ buddhānaṁ bhagavantānaṁ sattesu mahākaruṇā okkamati.

Atāṇo loko anabhissaroti—

passantānaṁ buddhānaṁ bhagavantānaṁ sattesu mahākaruṇā okkamati.

Assako loko, sabbaṁ pahāya gamanīyanti—

passantānaṁ buddhānaṁ bhagavantānaṁ sattesu mahākaruṇā okkamati.

Ūno loko atitto taṇhādāsoti—

passantānaṁ buddhānaṁ bhagavantānaṁ sattesu mahākaruṇā okkamati.

Atāyano lokasannivāsoti—

passantānaṁ …pe…

aleṇo lokasannivāsoti—

passantānaṁ …pe…

asaraṇo lokasannivāsoti—

passantānaṁ …pe…

asaraṇībhūto lokasannivāsoti—

passantānaṁ …pe….

Uddhato loko avūpasantoti—

passantānaṁ …pe…

sasallo lokasannivāso, viddho puthusallehi;

tassa natthañño koci sallānaṁ uddhatā, aññatra mayāti—

passantānaṁ …pe…

avijjandhakārāvaraṇo lokasannivāso aṇḍabhūto kilesapañjarapakkhitto;

tassa natthañño koci ālokaṁ dassetā, aññatra mayāti—

passantānaṁ …pe…

avijjāgato lokasannivāso aṇḍabhūto pariyonaddho tantākulakajāto kulāgaṇḍikajāto muñjapabbajabhūto apāyaṁ duggatiṁ vinipātaṁ saṁsāraṁ nātivattatīti—

passantānaṁ …pe…

avijjāvisadosasaṁlitto lokasannivāso kilesakalalībhūtoti—

passantānaṁ …pe…

rāgadosamohajaṭājaṭito lokasannivāso;

tassa natthañño koci jaṭaṁ vijaṭetā, aññatra mayāti—

passantānaṁ …pe….

Taṇhāsaṅghāṭapaṭimukko lokasannivāsoti—

passantānaṁ …pe…

taṇhājālena otthaṭo lokasannivāsoti—

passantānaṁ …pe…

taṇhāsotena vuyhati lokasannivāsoti—

passantānaṁ …pe…

taṇhāsaññojanena saññutto lokasannivāsoti—

passantānaṁ …pe…

taṇhānusayena anusaṭo lokasannivāsoti—

passantānaṁ …pe…

taṇhāsantāpena santappati lokasannivāsoti—

passantānaṁ …pe…

taṇhāpariḷāhena pariḍayhati lokasannivāsoti—

passantānaṁ …pe….

Diṭṭhisaṅghāṭapaṭimukko lokasannivāsoti—

passantānaṁ …pe…

diṭṭhijālena otthaṭo lokasannivāsoti—

passantānaṁ …pe…

diṭṭhisotena vuyhati lokasannivāsoti—

passantānaṁ …pe…

diṭṭhisaññojanena saññutto lokasannivāsoti—

passantānaṁ …pe…

diṭṭhānusayena anusaṭo lokasannivāsoti—

passantānaṁ …pe…

diṭṭhisantāpena santappati lokasannivāsoti—

passantānaṁ …pe…

diṭṭhipariḷāhena pariḍayhati lokasannivāsoti—

passantānaṁ …pe….

Jātiyā anugato lokasannivāsoti—

passantānaṁ …pe…

jarāya anusaṭo lokasannivāsoti—

passantānaṁ …pe…

byādhinā abhibhūto lokasannivāsoti—

passantānaṁ …pe…

maraṇena abbhāhato lokasannivāsoti—

passantānaṁ …pe…

dukkhe patiṭṭhito lokasannivāsoti—

passantānaṁ …pe….

Taṇhāya uḍḍito lokasannivāsoti—

passantānaṁ …pe…

jarāpākāraparikkhitto lokasannivāsoti—

passantānaṁ …pe…

maccupāsena parikkhitto lokasannivāsoti—

passantānaṁ …pe…

mahābandhanabaddho lokasannivāso—

rāgabandhanena dosabandhanena mohabandhanena mānabandhanena diṭṭhibandhanena kilesabandhanena duccaritabandhanena;

tassa natthañño koci bandhanaṁ mocetā, aññatra mayāti—

passantānaṁ …pe…

mahāsambādhappaṭipanno lokasannivāso;

tassa natthañño koci okāsaṁ dassetā, aññatra mayāti—

passantānaṁ …

mahāpalibodhena palibuddho lokasannivāso;

tassa natthañño koci palibodhaṁ chetā, aññatra mayāti—

passantānaṁ …pe…

mahāpapāte patito lokasannivāso;

tassa natthañño koci papātā uddhatā, aññatra mayāti—

passantānaṁ …pe…

mahākantārappaṭipanno lokasannivāso;

tassa natthañño koci kantāraṁ tāretā, aññatra mayāti—

passantānaṁ …pe…

mahāsaṁsārappaṭipanno lokasannivāso;

tassa natthañño koci saṁsārā mocetā, aññatra mayāti—

passantānaṁ …pe…

mahāvidugge samparivattati lokasannivāso;

tassa natthañño koci viduggā uddhatā, aññatra mayāti—

passantānaṁ …pe…

mahāpalipe palipanno lokasannivāso;

tassa natthañño koci palipā uddhatā, aññatra mayāti—

passantānaṁ …pe….

Abbhāhato lokasannivāsoti—

passantānaṁ …pe…

āditto lokasannivāso—

rāgagginā dosagginā mohagginā jātiyā jarāya maraṇena sokehi paridevehi dukkhehi domanassehi upāyāsehi;

tassa natthañño koci nibbāpetā, aññatra mayāti—

passantānaṁ …pe…

unnītako lokasannivāso haññati niccamatāṇo pattadaṇḍo takkaroti—

passantānaṁ …pe…

vajjabandhanabaddho lokasannivāso āghātanapaccupaṭṭhito;

tassa natthañño koci bandhanaṁ mocetā, aññatra mayāti—

passantānaṁ …pe…

anātho lokasannivāso paramakāruññappatto;

tassa natthañño koci tāyetā, aññatra mayāti—

passantānaṁ …pe…

dukkhābhitunno lokasannivāso cirarattaṁ pīḷitoti—

passantānaṁ …pe…

gadhito lokasannivāso niccaṁ pipāsitoti—

passantānaṁ …pe….

Andho lokasannivāso acakkhukoti—

passantānaṁ …pe…

hatanetto lokasannivāso apariṇāyakoti—

passantānaṁ …pe…

vipathapakkhando lokasannivāso añjasāparaddho;

tassa natthañño koci ariyapathaṁ ānetā, aññatra mayāti—

passantānaṁ …pe…

mahoghapakkhando lokasannivāso;

tassa natthañño koci oghā uddhatā, aññatra mayāti—

passantānaṁ …pe….

Dvīhi diṭṭhigatehi pariyuṭṭhito lokasannivāsoti—

passantānaṁ …pe…

tīhi duccaritehi vippaṭipanno lokasannivāsoti—

passantānaṁ …pe…

catūhi yogehi yutto lokasannivāso catuyogayojitoti—

passantānaṁ …pe…

catūhi ganthehi ganthito lokasannivāsoti—

passantānaṁ …pe…

catūhi upādānehi upādīyati lokasannivāsoti—

passantānaṁ …pe…

pañcagatisamāruḷho lokasannivāsoti—

passantānaṁ …pe…

pañcahi kāmaguṇehi rajjati lokasannivāsoti—

passantānaṁ …pe…

pañcahi nīvaraṇehi otthaṭo lokasannivāsoti—

passantānaṁ …pe…

chahi vivādamūlehi vivadati lokasannivāsoti—

passantānaṁ …pe…

chahi taṇhākāyehi rajjati lokasannivāsoti—

passantānaṁ …pe…

chahi diṭṭhigatehi pariyuṭṭhito lokasannivāsoti—

passantānaṁ …pe…

sattahi anusayehi anusaṭo lokasannivāsoti—

passantānaṁ …pe…

sattahi saññojanehi saññutto lokasannivāsoti—

passantānaṁ …pe…

sattahi mānehi unnato lokasannivāsoti—

passantānaṁ …pe…

aṭṭhahi lokadhammehi samparivattati lokasannivāsoti—

passantānaṁ …pe…

aṭṭhahi micchattehi niyyāto lokasannivāsoti—

passantānaṁ …pe…

aṭṭhahi purisadosehi dussati lokasannivāsoti—

passantānaṁ …pe…

navahi āghātavatthūhi āghātito lokasannivāsoti—

passantānaṁ …pe…

navavidhamānehi unnato lokasannivāsoti—

passantānaṁ …pe…

navahi taṇhāmūlakehi dhammehi rajjati lokasannivāsoti—

passantānaṁ …pe…

dasahi kilesavatthūhi kilissati lokasannivāsoti—

passantānaṁ …pe…

dasahi āghātavatthūhi āghātito lokasannivāsoti—

passantānaṁ …pe…

dasahi akusalakammapathehi samannāgato lokasannivāsoti—

passantānaṁ …pe…

dasahi saññojanehi saññutto lokasannivāsoti—

passantānaṁ …pe…

dasahi micchattehi niyyāto lokasannivāsoti—

passantānaṁ …pe…

dasavatthukāya micchādiṭṭhiyā samannāgato lokasannivāsoti—

passantānaṁ …pe…

dasavatthukāya antaggāhikāya diṭṭhiyā samannāgato lokasannivāsoti—

passantānaṁ …pe…

aṭṭhasatataṇhāpapañcasatehi papañcito lokasannivāsoti—

passantānaṁ buddhānaṁ bhagavantānaṁ sattesu mahākaruṇā okkamati.

Dvāsaṭṭhiyā diṭṭhigatehi pariyuṭṭhito lokasannivāsoti—

passantānaṁ buddhānaṁ bhagavantānaṁ sattesu mahākaruṇā okkamati.

Ahañcamhi tiṇṇo, loko ca atiṇṇo ahañcamhi mutto, loko ca amutto;

ahañcamhi danto, loko ca adanto;

ahañcamhi santo, loko ca asanto;

ahañcamhi assattho, loko ca anassattho;

ahañcamhi parinibbuto, loko ca aparinibbuto;

pahomi khvāhaṁ tiṇṇo tāretuṁ, mutto mocetuṁ, danto dametuṁ, santo sametuṁ, assattho assāsetuṁ, parinibbuto pare ca parinibbāpetunti—

passantānaṁ buddhānaṁ bhagavantānaṁ sattesu mahākaruṇā okkamati.

Idaṁ tathāgatassa mahākaruṇāsamāpattiyā ñāṇaṁ.

Mahākaruṇāñāṇaniddeso ekasattatimo.

1.1.72–73 Sabbaññutañāṇaniddesa

Katamaṁ tathāgatassa sabbaññutaññāṇaṁ?

Sabbaṁ saṅkhatamasaṅkhataṁ anavasesaṁ jānātīti—

sabbaññutaññāṇaṁ.

Tattha āvaraṇaṁ natthīti—

anāvaraṇañāṇaṁ.

Atītaṁ sabbaṁ jānātīti—

sabbaññutaññāṇaṁ.

Tattha āvaraṇaṁ natthīti—

anāvaraṇañāṇaṁ.

Anāgataṁ sabbaṁ jānātīti—

sabbaññutaññāṇaṁ.

Tattha āvaraṇaṁ natthīti—

anāvaraṇañāṇaṁ.

Paccuppannaṁ sabbaṁ jānātīti—

sabbaññutaññāṇaṁ.

Tattha āvaraṇaṁ natthīti—

anāvaraṇañāṇaṁ.

Cakkhu ceva rūpā ca, evaṁ taṁ sabbaṁ jānātīti—

sabbaññutaññāṇaṁ.

Tattha āvaraṇaṁ natthīti—

anāvaraṇañāṇaṁ.

Sotañceva saddā ca …pe…

ghānañceva gandhā ca …

jivhā ceva rasā ca …

kāyo ceva phoṭṭhabbā ca …

mano ceva dhammā ca, evaṁ taṁ sabbaṁ jānātīti—

sabbaññutaññāṇaṁ.

Tattha āvaraṇaṁ natthīti—

anāvaraṇañāṇaṁ.

Yāvatā aniccaṭṭhaṁ dukkhaṭṭhaṁ anattaṭṭhaṁ, taṁ sabbaṁ jānātīti—

sabbaññutaññāṇaṁ.

Tattha āvaraṇaṁ natthīti—

anāvaraṇañāṇaṁ.

Yāvatā rūpassa aniccaṭṭhaṁ dukkhaṭṭhaṁ anattaṭṭhaṁ, taṁ sabbaṁ jānātīti—

sabbaññutaññāṇaṁ.

Tattha āvaraṇaṁ natthīti—

anāvaraṇañāṇaṁ.

Yāvatā vedanāya …pe…

yāvatā saññāya …pe…

yāvatā saṅkhārānaṁ …pe…

yāvatā viññāṇassa …pe…

yāvatā cakkhussa …pe…

jarāmaraṇassa aniccaṭṭhaṁ dukkhaṭṭhaṁ anattaṭṭhaṁ, taṁ sabbaṁ jānātīti—

sabbaññutaññāṇaṁ.

Tattha āvaraṇaṁ natthīti—

anāvaraṇañāṇaṁ.

Yāvatā abhiññāya abhiññaṭṭhaṁ, taṁ sabbaṁ jānātīti—

sabbaññutaññāṇaṁ.

Tattha āvaraṇaṁ natthīti—

anāvaraṇañāṇaṁ.

Yāvatā pariññāya pariññaṭṭhaṁ …pe…

yāvatā pahānassa pahānaṭṭhaṁ …pe…

yāvatā bhāvanāya bhāvanaṭṭhaṁ …pe…

yāvatā sacchikiriyāya sacchikiriyaṭṭhaṁ, taṁ sabbaṁ jānātīti—

sabbaññutaññāṇaṁ.

Tattha āvaraṇaṁ natthīti—

anāvaraṇañāṇaṁ.

Yāvatā khandhānaṁ khandhaṭṭhaṁ, taṁ sabbaṁ jānātīti—

sabbaññutaññāṇaṁ.

Tattha āvaraṇaṁ natthīti—

anāvaraṇañāṇaṁ.

Yāvatā dhātūnaṁ dhātuṭṭhaṁ …pe…

yāvatā āyatanānaṁ āyatanaṭṭhaṁ …pe…

yāvatā saṅkhatānaṁ saṅkhataṭṭhaṁ …pe…

yāvatā asaṅkhatassa asaṅkhataṭṭhaṁ, taṁ sabbaṁ jānātīti—

sabbaññutaññāṇaṁ.

Tattha āvaraṇaṁ natthīti—

anāvaraṇañāṇaṁ.

Yāvatā kusale dhamme, sabbaṁ jānātīti—

sabbaññutaññāṇaṁ.

Tattha āvaraṇaṁ natthīti—

anāvaraṇañāṇaṁ.

Yāvatā akusale dhamme …pe…

yāvatā abyākate dhamme …

yāvatā kāmāvacare dhamme …

yāvatā rūpāvacare dhamme …

yāvatā arūpāvacare dhamme …

yāvatā apariyāpanne dhamme, sabbaṁ jānātīti—

sabbaññutaññāṇaṁ.

Tattha āvaraṇaṁ natthīti—

anāvaraṇañāṇaṁ.

Yāvatā dukkhassa dukkhaṭṭhaṁ, taṁ sabbaṁ jānātīti—

sabbaññutaññāṇaṁ.

Tattha āvaraṇaṁ natthīti—

anāvaraṇañāṇaṁ.

Yāvatā samudayassa samudayaṭṭhaṁ …pe…

yāvatā nirodhassa nirodhaṭṭhaṁ …pe…

yāvatā maggassa maggaṭṭhaṁ, taṁ sabbaṁ jānātīti—

sabbaññutaññāṇaṁ.

Tattha āvaraṇaṁ natthīti—

anāvaraṇañāṇaṁ.

Yāvatā atthapaṭisambhidāya atthapaṭisambhidaṭṭhaṁ, taṁ sabbaṁ jānātīti—

sabbaññutaññāṇaṁ.

Tattha āvaraṇaṁ natthīti—

anāvaraṇañāṇaṁ.

Yāvatā dhammapaṭisambhidāya dhammapaṭisambhidaṭṭhaṁ …pe…

yāvatā niruttipaṭisambhidāya niruttipaṭisambhidaṭṭhaṁ …pe…

yāvatā paṭibhānapaṭisambhidāya paṭibhānapaṭisambhidaṭṭhaṁ, taṁ sabbaṁ jānātīti—

sabbaññutaññāṇaṁ.

Tattha āvaraṇaṁ natthīti—

anāvaraṇañāṇaṁ.

Yāvatā indriyaparopariyattañāṇaṁ, taṁ sabbaṁ jānātīti—

sabbaññutaññāṇaṁ.

Tattha āvaraṇaṁ natthīti—

anāvaraṇañāṇaṁ.

Yāvatā sattānaṁ āsayānusaye ñāṇaṁ …pe…

yāvatā yamakapāṭihīre ñāṇaṁ …pe…

yāvatā mahākaruṇāsamāpattiyā ñāṇaṁ, taṁ sabbaṁ jānātīti—

sabbaññutaññāṇaṁ.

Tattha āvaraṇaṁ natthīti—

anāvaraṇañāṇaṁ.

Yāvatā sadevakassa lokassa samārakassa sabrahmakassa sassamaṇabrāhmaṇiyā pajāya sadevamanussāya diṭṭhaṁ sutaṁ mutaṁ viññātaṁ pattaṁ pariyesitaṁ anuvicaritaṁ manasā, taṁ sabbaṁ jānātīti—

sabbaññutaññāṇaṁ.

Tattha āvaraṇaṁ natthīti—

anāvaraṇañāṇaṁ.

Na tassa addiṭṭhamidhatthi kiñci,

Atho aviññātamajānitabbaṁ;

Sabbaṁ abhiññāsi yadatthi neyyaṁ,

Tathāgato tena samantacakkhūti.

Samantacakkhūti kenaṭṭhena samantacakkhu?

Cuddasa buddhañāṇāni.

Dukkhe ñāṇaṁ buddhañāṇaṁ, dukkhasamudaye ñāṇaṁ buddhañāṇaṁ, dukkhanirodhe ñāṇaṁ buddhañāṇaṁ, dukkhanirodhagāminiyā paṭipadāya ñāṇaṁ buddhañāṇaṁ, atthapaṭisambhide ñāṇaṁ buddhañāṇaṁ, dhammapaṭisambhide ñāṇaṁ buddhañāṇaṁ, niruttipaṭisambhide ñāṇaṁ buddhañāṇaṁ, paṭibhānapaṭisambhide ñāṇaṁ buddhañāṇaṁ, indriyaparopariyattañāṇaṁ buddhañāṇaṁ, sattānaṁ āsayānusaye ñāṇaṁ buddhañāṇaṁ, yamakapāṭihīre ñāṇaṁ buddhañāṇaṁ, mahākaruṇāsamāpattiyā ñāṇaṁ buddhañāṇaṁ, sabbaññutaññāṇaṁ buddhañāṇaṁ, anāvaraṇañāṇaṁ buddhañāṇaṁ—

imāni cuddasa buddhañāṇāni.

Imesaṁ cuddasannaṁ buddhañāṇānaṁ aṭṭha ñāṇāni sāvakasādhāraṇāni;

cha ñāṇāni asādhāraṇāni sāvakehi.

Yāvatā dukkhassa dukkhaṭṭho, sabbo ñāto;

aññāto dukkhaṭṭho natthīti—

sabbaññutaññāṇaṁ.

Tattha āvaraṇaṁ natthīti—

anāvaraṇañāṇaṁ.

Yāvatā dukkhassa dukkhaṭṭho, sabbo ñāto, sabbo diṭṭho, sabbo vidito, sabbo sacchikato, sabbo phassito paññāya;

aphassito paññāya dukkhaṭṭho natthīti—

sabbaññutaññāṇaṁ.

Tattha āvaraṇaṁ natthīti—

anāvaraṇañāṇaṁ.

Yāvatā samudayassa samudayaṭṭho …

yāvatā nirodhassa nirodhaṭṭho …

yāvatā maggassa maggaṭṭho …pe…

yāvatā atthapaṭisambhidāya atthapaṭisambhidaṭṭho …

yāvatā dhammapaṭisambhidāya dhammapaṭisambhidaṭṭho …

yāvatā niruttipaṭisambhidāya niruttipaṭisambhidaṭṭho …

yāvatā paṭibhānapaṭisambhidāya paṭibhānapaṭisambhidaṭṭho, sabbo ñāto, sabbo diṭṭho, sabbo vidito, sabbo sacchikato, sabbo phassito paññāya;

aphassito paññāya paṭibhānapaṭisambhidaṭṭho natthīti—

sabbaññutaññāṇaṁ.

Tattha āvaraṇaṁ natthīti—

anāvaraṇañāṇaṁ.

Yāvatā indriyaparopariyattañāṇaṁ …

yāvatā sattānaṁ āsayānusaye ñāṇaṁ …

yāvatā yamakapāṭihīre ñāṇaṁ …

yāvatā mahākaruṇāsamāpattiyā ñāṇaṁ;

sabbaṁ ñātaṁ, sabbaṁ diṭṭhaṁ, sabbaṁ viditaṁ, sabbaṁ sacchikataṁ, sabbaṁ phassitaṁ paññāya;

aphassitaṁ paññāya mahākaruṇāsamāpattiyā ñāṇaṁ natthīti—

sabbaññutaññāṇaṁ.

Tattha āvaraṇaṁ natthīti—

anāvaraṇañāṇaṁ.

Yāvatā sadevakassa lokassa samārakassa sabrahmakassa sassamaṇabrāhmaṇiyā pajāya sadevamanussāya diṭṭhaṁ sutaṁ mutaṁ viññātaṁ pattaṁ pariyesitaṁ anuvicaritaṁ manasā, sabbaṁ ñātaṁ, sabbaṁ diṭṭhaṁ, sabbaṁ viditaṁ, sabbaṁ sacchikataṁ, sabbaṁ phassitaṁ paññāya;

aphassitaṁ paññāya natthīti—

sabbaññutaññāṇaṁ.

Tattha āvaraṇaṁ natthīti—

anāvaraṇañāṇaṁ.

Na tassa addiṭṭhamidhatthi kiñci,

Atho aviññātamajānitabbaṁ;

Sabbaṁ abhiññāsi yadatthi neyyaṁ,

Tathāgato tena samantacakkhūti.

Ñāṇakathā niṭṭhitā.