मञ्जुश्रीमूलकल्प

तं ग्रन्थेन्मन्त्रतत्त्वज्ञो फलां सूक्ष्मां सुवर्तुलाम् / अच्छिद्रां प्राणकैर्नित्यं अव्यङ्गां वाप्यकुत्सिताम् // mmk_12.25 //

शोभनां चारुवर्णांस्तु अच्छिद्रामस्फुटितां तथा / रुद्राक्षं सुतजीवं वा इन्द्राक्षफलमेव तु // mmk_12.26 //

अरिष्टां शोभनां नित्यं अव्यङ्गां फलसम्मताम् / ग्रथेन्मन्त्री सदा ह्युक्तो अक्षमालां तु यत्नतः // mmk_12.27 //

सौवर्णमथ रूप्यं वा माणिक्यं स्फाटिकं समम् / शङ्खं सुसारं चैव मौक्तं वापि विधीयते // mmk_12.28 //

प्रवालैर्विविधा माला कुर्यादक्षमालिकाम् / अन्यरत्नांश्च वै दिव्यान् कुर्यात् शुभमालिकाम् // mmk_12.29 //

पार्थिवैर्वर्तुलैर्गुलिकैर्ग्रथेत् सूत्रे समाहितः / अन्यं वा गुलिकां किञ्चित् फलैर्वा धातुसम्भवैः // mmk_12.30 //

कुशाग्रग्रथिकां चैव कुर्याद् यत्नानुजापिनः / शताष्टं पञ्चविंशं वा पञ्चाशं चैव मध्यमाम् // mmk_12.31 //

एतत्प्रमाणमालां तु ग्रथेन्मन्त्री समाहितः / सहस्रं साष्टकं चैव कुर्यान्मालां तु ज्येष्ठिकाम् // mmk_12.32 //

एतच्चतुर्विधां मालां ग्रथितं नित्यमन्त्रिभिः / ततो ग्रथितुमाला वै त्रिमात्रां द्विक एव वा // mmk_12.33 //

पुष्पलोहमयैः कटकैः सौवर्णैः रजतैस्तथा / ततो ताम्रमयैर्वापि ग्रथेन्माला समासतः // mmk_12.34 //

ततो ऽन्ते पाशकं कृत्वा न्यसेत् तदानुपूर्वतः / वेष्टयेत् तं तृसन्ध्यन्ताद् यथा बद्धो ऽवतिष्ठति // mmk_12.35 //

परिस्फुटं तु ततो कृत्वा मण्डलाकारदर्शनम् / सर्वभोगतथाकारं परिवेष्ट्याभिभूषितम् // mmk_12.36 //

मुक्ताहारसमाकारो कण्ठिकाकारनिर्मितः / स्नात्वा शुभे अम्भे सरिते वापि निर्मले // mmk_12.37 //

स्नात्वा च यथापूर्वं उत्तिष्ठे सलिलालयात् / उपस्पृश्य यथायुक्त्या गृह्यमक्षाणुसूत्रितम् // mmk_12.38 //

प्रक्षाल्य पञ्चगव्यैस्तु तथा मृत्तिकचूर्णिकैः / प्रक्षाल्य शुभे अम्भे सुगन्धैश्चानुलेपनैः // mmk_12.39 //

प्रशस्तैर्वर्णकैश्चापि श्वेतचन्दनकुङ्कुमैः / प्रक्षाल्य यत्नतो तस्मात् ततो गच्छेदुडयं तथा // mmk_12.40 //

यथास्थानं तु गत्वा वै यत्रासौ पटमध्यमः / जिनश्रेष्ठो मुनिर्मुख्यो शाक्यसिंहो नरोत्तमः // mmk_12.41 //

शास्तुबिम्बे तथा नित्यं भुवि धातुवरे जिने / त + + + + + + + + + + + + + + + + + + समीपतः // mmk_12.42 //

संस्थाप्य पटे तस्मिं अग्रते समुपस्थिते / सहस्राष्टशतं जप्तं शतं चैकत्र साष्टकम् // mmk_12.43 //

अहोरात्रोषितो भूत्वा ददौ मालां मुनिसत्तमे / कृतजापी तथा पूर्वं प्रमाणेनैव तत्समः // mmk_12.44 //

परिजप्य ततो मालां रात्रौ तत्रैव संन्यसेत् / स्वपेत् तत्रैव मन्त्रज्ञः कुशसंस्तरणे भुवि // mmk_12.45 //

स्वप्ने यद्यसौ पश्य शोभनां स्वप्नदर्शनाम् / सफलां स्वप्ननिर्दिष्टां सिद्धिस्तस्य विधीयते // mmk_12.46 //

बुद्धश्रावकखड्गीणां स्वप्ने यद्य दृश्यते / सफलं सिद्ध्यंते मन्त्री ध्रुवं तस्य विधिक्रिया // mmk_12.47 //

कुमाररूपिणं बालं विचित्रं चारुदर्शनम् / स्वप्ने यद्यसौ दृष्ट्वा मालां दद्या तथैव च / अमोघं तस्य सिद्ध्यन्ते मन्त्रा सर्वार्थसाधका // mmk_12.48 //

इति /

बोधिसत्त्वपिटकावतंसकान्महायानवैपुल्यसूत्राद् आर्यमञ्जुश्रियमूलकल्पाद् मध्यमपटविधानविसराद् द्वादशमः अक्षसूत्रविधिपटलविसरः परिसमाप्त इति // अथ त्रयोदशः पटलविसरः / अथ खलु भगवां शाक्यमुनिः पुनरपि पुनरपि शुद्धावासभवनमवलोक्य मञ्जुश्रियं कुमारभूतमामन्त्रयतेस्म / अस्ति मञ्जुश्रीः त्वदीयं मन्त्रपटलसमस्तविन्यस्तविशेषविधिना होमकर्मणि प्रयुक्तस्य विद्यासाधकस्य अग्न्योपचर्याविशेषविधानतः / यत्र प्रतिष्ठिता सर्वविद्याचर्यानियुक्ता सत्त्वा प्रयुज्यन्ते / कतमं च तत् / रहस्यविद्यामन्त्रपदानि / तद्यथा - ओम् उत्तिष्ठ हरिपिङ्गल लाहिताक्ष देहि ददापय / हूं फट् फट् सर्वविघ्नां विनाशय स्वाहा / एष सः मञ्जुश्रीः परमाग्निहृदयं सर्वकर्मकरं सर्वकामदम् //

आदौ तावत् साधकेन अनेनाग्निहृदयेन सकृज्जप्तं घृताहुतित्रयं अग्नौ होतव्यम् / अग्निराह्वानितो भवति / अथाप्रयुक्तस्य शान्तिकपौष्टिकरौद्रकर्मेषु त्रिधा समिधाकाष्ठानि भवन्ति //

अशोककाष्ठं शान्त्यर्थे सार्द्रं चैव विशिष्यते / वितस्तिहस्तमात्रं वा त्र्यङ्गुलं वापि चोच्छृतम् // mmk_13.1 //

स्निग्धाकारप्रशस्तं तु विधिरेषा विधीयते / अकोटरं असुषिरं वापि शुकपत्रनिभं तथा // mmk_13.2 //

हरितं शुक्लवर्णं वा कृष्णवर्णं विवर्जयेत् / कृमिभिर्न च भक्षितं वर्ज्यमकोटरं वापि सन्दधेत् // mmk_13.3 //

अन्यवर्णो प्रकृष्टास्तु अधर्मश्चैव वर्जिता / नातिशुष्का न चार्द्रापि न च दग्धं समारभे // mmk_13.4 //

अपूतिं अवक्रं चैव अत्युच्चं चापि वर्जयेत् / अग्निकुण्डं तथा कृत्वा चतुःकोणं समन्ततः // mmk_13.5 //

अधश्चेव खनेद्यत्नाच्चतुर्हस्तं प्रमाणतः / त्रिहस्तं द्वे तु हस्तानि एकहस्तं तथैव च // mmk_13.6 //

प्राणिभिर्विवर्जितं नित्यं सिंहतासंस्थितं च तत् / पद्माकारं ततो वेदिः समन्तान्मण्डलाकृतिः // mmk_13.7 //

चतुरश्रं चापि यत्नेन कुर्याच्चापाकृतिं तथा / वज्राकारसङ्काशं उभयाग्रं त्रिसूचिकम् // mmk_13.8 //

कुर्यादग्निकुण्डे ऽस्मिं द्विहस्ता तियंञ्च तत् / शुचौ देशे परामृष्टे नदीकूले तथा वरे // mmk_13.9 //

एकस्थावरदेशे च श्मशाने शून्यवेश्मनि / कुर्याद्धोमं सुसंरब्धो पर्वताग्रे तथैव च // mmk_13.10 //

शून्यदेवकुले नित्यं महारण्ये तथैव च / यानि साधनदेशानि कथितान्यग्रपुड्गलैः // mmk_13.11 //

एतानि स्थानान्युक्तानि होमकर्मिति सर्वतः / कुशविण्डकोपविष्टेन स्थित्वा हस्तमात्रं ततः // mmk_13.12 //

कुर्यात् तत्र मन्त्रज्ञो होमकर्म विशेषतः / क्षिप्रमेभिः स्थितं सिद्धिः स्थानेष्वेव न संशयः // mmk_13.13 //

प्राङ्मुखो उदङ्मुखो वापि कुर्यात् शान्तिकपौष्टिके / दक्षिणेन तु रौद्राणि तानि मन्त्री तु वर्जयेत् // mmk_13.14 //

प्राङ्मुखे शान्तिका सिद्धिः पौष्टिके चापि उदङ्मुखा / एभिर्मन्त्री सदाकालं मन्त्रजापं तु मारभेत् // mmk_13.15 //

विल्वाम्रप्लक्षन्यग्रोधैः कुर्यात् कर्मणि पौष्टिकम् / आभिचारुककाष्ठानि शुष्ककट्वाम्लतीक्ष्णकाः // mmk_13.16 //

तानि सर्वाणि वर्जीत निषिद्धा मुनिभिः सदा / शान्तिके पौष्टिके कर्मे सार्द्रकाष्ठा प्रशस्यते // mmk_13.17 //

रौद्रकर्मे तथा कर्मा वर्जिता मुनिभिः सदा / तेषामभावे समिधानां काष्ठं तेषां तु कल्पयेत् // mmk_13.18 //

समन्ता कुशसंस्तीर्णं उभयाग्रं तु कल्पयेत् / हरितैः स्निग्धसङ्काशैर्मयूरग्रीवसन्निभैः // mmk_13.19 //

तथाविधैः कुशैर्नित्यं कुर्यात् शान्तिकपौष्टिकम् / मरकताकाशसङ्काशैस्तथा शुष्कैः त्रिणैः सदा // mmk_13.20 //

कुर्यात् पावककर्माणि निषिद्धा जिनवरैरिह / निर्मले चाम्भसो शुद्धे कृमिभिर्वर्जिते सदा // mmk_13.21 //

ततो ऽभ्युक्ष्य समन्ता वै कुर्याच्चापि प्रदक्षिणम् / ज्वालयेद् वह्नि युक्तात्मा उपस्पृश्य यथाविधि // mmk_13.22 //

शुचिना तृणमूलेन कुर्यादुल्का प्रमाणतः / मुष्टिमात्रं ततो कृत्वा ज्वालयेद् वह्नि यत्नतः // mmk_13.23 //

न चापि मुखवातेन वस्त्रान्तेन वा सदा / निवासनप्रावरणाभ्यां वर्जिता नान्यमम्वरे // mmk_13.24 //

न चापि हस्तवातेन उपहन्याभिरतेन वा / शुचिव्यजनेन तथा वस्त्रे पर्णे चापि प्रवातये // mmk_13.25 //

समीरिते कृते वह्नौ एभिरुद्भूतमारुते / ज्वालयेदधिमन्त्रज्ञो होमार्थी सुसमाहितः // mmk_13.26 //

त्रीन्वारां ततो ऽभ्युक्षे कृत्वा वा अपसव्यकम् / आहुतित्रयं ततो दद्या आज्ये गव्ये तु तत्र वै // mmk_13.27 //

ततो कुर्यात् प्रणामं वै सर्वबुद्धानतायिनाम् / स्वमन्त्रमन्त्रनाथं च ततो वन्दे यथेष्टतः // mmk_13.28 //

अग्निहृदये ततो मन्त्रे जप्ते जप्तेन वै सदा / आह्वयेद् वह्नियुक्तात्मा पुष्पैरेव सुगन्धिभिः // mmk_13.29 //

आह्वयति नित्यं मन्त्रज्ञो स्थानं दद्याद् विचक्षणः / आसनं स्थानं दत्वा तु तेन मन्त्रेण नान्यवै // mmk_13.30 //

दधिप्लुतमाज्यमिश्रं तु मध्वाक्तं समिधां त्रयम् / जुहुयादग्निपूजार्थं मन्त्रकर्मेण सर्वतः // mmk_13.31 //

उभयस्थं तदा कुर्यात् समिधानां द्रव्यमिश्रितम् / आज्यमध्वक्तसंयुक्तां दध्यमिश्रे तथैव च // mmk_13.32 //

सहस्रं लक्षमात्रं वा शताष्टं चापि कल्पयेत् / गुह्यमन्त्री तथा मन्त्रं सकृज्जप्त्वा क्षिपेत् शिखौ // mmk_13.33 //

ज्वालामालिने वह्नौ एकज्वाले तथैव च / शान्तिकर्मणि जुह्वीत निर्धूमे चापि पौष्टिकम् // mmk_13.34 //

सधूमे रौद्रकर्माणि गर्हिते जिनवर्णिते / होमकर्मप्रयुक्तस्तु अग्नौ वर्णो भवेद्यदि // mmk_13.35 //

शान्तिके सितवर्णस्तु शस्तं जिनवरैः सदा / सिद्ध्यन्ति तत्र मन्त्रा वै सिते ऽग्नौ जुह्वतो यदि // mmk_13.36 //

रक्तवर्णं तथा नित्यं पौष्टिकात् सिद्धिमिष्यते / कृष्णे वा धूमवर्णे च कपिले चापि पायिकम् // mmk_13.37 //

इत्येषा त्रिविधा सिद्धिः त्रिधा वर्णप्रवर्तिता / अन्यवर्णाभ्रवर्णा वा विविधाकारवर्णिता // mmk_13.38 //

न सिद्धिस्तेषु मन्त्राणां पुनरस्तीह महीतले / तादृशं वर्णसङ्काशं विविधाकारवर्णितम् // mmk_13.39 //

शिखिं ज्वलन्तं दृष्ट्वा तु पुनः कर्मं समारभेत् / भूयो ऽपि कृतजापस्तु मन्त्रसिद्धिर्भवेद् यदि // mmk_13.40 //

पुनर्होमं प्रवर्तीत विधिदृष्टेन कर्मणा / विसर्ज्याह्वानना चैव वह्निं मन्त्रमुदीरयेत् // mmk_13.41 //

पूर्वप्रकल्पितेनापि मण्डले ऽस्मिं यथाविधि / तेनैव कुर्याद्धोमं वै विसर्जनाह्वाननकर्मणाम् // mmk_13.42 //

सर्वकर्माणि तेनैव कुअर्यात् तत्रैव कर्मणि / अग्निचर्या तथारूपं पटस्याग्रत मारभेत् // mmk_13.43 //

सिद्ध्यन्ति तत्र मन्त्रा वै पूर्वमुक्तं तथागतैः / जिनवर्णितकर्माणि कुर्यान्न च तत्र वै सर्वतः // mmk_13.44 //

नान्यकर्माणि कुर्वीत पापकानि विशेषतः / गर्हीता जिनवरैर्यद्व विरुद्धां लोककुत्सिताम् // mmk_13.45 //

उत्तिष्ठ चक्रवर्तिर्वा बोधिसत्त्वो ऽथ भूमिपः / पञ्चाभिज्ञं तथा लाभे देवत्वं वाथ सिद्ध्यति // mmk_13.46 //

पटे ऽस्मिन् नित्ययुक्तज्ञो होमकर्मविशारदः / पातालांधिपत्यं वा अन्तरीक्षचरामथ // mmk_13.47 //

भौम्यदेवयक्षत्वं यक्षीमाकर्षणे सदा / राज्ये आधिपत्ये वा विषये ऽस्मिं ग्राम एव वा // mmk_13.48 //

विद्याधरमसुरत्वं सर्वसत्त्ववशानुगे / आकर्षणे च भूतानां महासत्त्वां महात्मनाम् // mmk_13.49 //

बोधिसत्त्वां महासत्त्वां दशभूमिसमाश्रिताम् / आनयेद्धोमकर्मेण किं पुनर्मानुषं भुवि // mmk_13.50 //

मिं सेनापत्यं तथा लोके ऐश्वर्ये च विशेषतः / सर्वभूतसमावश्यं नृपतत्वं तथापि च // mmk_13.51 //

वश्यार्थं सर्वभूतानां नृपतेर्वापि समं भुवि / सर्वकर्मान् तथा नित्यं कुर्याद्धोमेन सर्वतः // mmk_13.52 //

सर्वतो सर्वयुक्तात्मा सर्वकर्म समाश्रयेत् / नियतं सिद्ध्यते तस्य कर्म श्रेयो ऽर्थमुत्तमम् // mmk_13.53 //

मध्यमाश्चैव सिध्यन्ते कर्मा कन्यसा एव वा / सर्वद्रव्याणि तत्रैव सिद्धिमुक्ता त्रिधा पुनः // mmk_13.54 //

दृश्यते सफला सिद्धिः होमकर्मे प्रवर्तिते / मुद्रा पञ्चशिखां बध्वा मन्त्रां चैव केशिनीम् // mmk_13.55 //

कुर्यात् सर्वकर्माणि आत्मरक्षावानुधीः / होमकर्मे प्रवृत्तस्तु पठेन्मन्त्रमिमं ततः / सप्तजप्ताष्टजप्तं वा कर्मे ऽस्मिं इदं सदा // mmk_13.56 //

नमः सर्वबुद्धबोधिसत्त्वानामप्रतिहतशासनानाम् //

तद्यथा - ओम् ज्वल तिष्ठ हूं रु रु विश्वसम्भव सम्भवे स्वाहा /

अनेन मन्त्रप्रयोगेण जपे काष्ठं पुनः पुनः / द्विजप्तं सप्तजप्तं वा जुह्यादग्नौ स मन्त्रवित् // mmk_13.57 //

पुष्पधूपगन्ध वा सर्वं चैव समन्ततः / वारिणा मन्त्रजप्तेन अनेनैव तु प्रोक्षयेत् // mmk_13.58 //

ततो सर्वकर्माणि आरभेद् विधिहेतुना / पूर्वप्रयोगेणैव कर्त्तव्यो सर्वकर्मसु // mmk_13.59 //

पूर्वपञ्चशिखां बध्वा महामुद्रां यशस्विनीम् / कृतरक्षी ततो भूत्वा केशिन्या चैव सदा जपी // mmk_13.60 //

आरभेत् सर्वकर्माणि सिद्धिहेतो विशारदाः / शकुना यदि दृश्यन्ते शब्दा चैव शुभा सदा // mmk_13.61 //

सफलास्तस्य मन्त्रा वै वरदाने यथेप्सतः / आदिकर्मेषु प्रयुक्तस्तु प्रवृत्ता मन्त्रहेतुना // mmk_13.62 //

सफला सकला चैव सिद्धिस्तेषु विधीयते / जयशब्द पटहो वा दुन्दुभीनां च निस्वनम् // mmk_13.63 //

सिद्धिः सर्वत्र ह्युक्ता होमकर्मे समाश्रितः / अन्या वा शकुना श्रेष्ठा पक्षिणानां वा शुभा रुताः // mmk_13.64 //

विविधाकारनिर्घोषा शब्दार्था जिनवर्णिताः / प्रशस्ता दिव्या मङ्गल्या दिव्या मनोज्ञा विविधा रुताः // mmk_13.65 //

छत्रध्वजपताकांश्च योषिताचाप्यलङ्कृताः / पूर्णकुम्भं तथा अर्धदर्शनं सिद्धिहेतवः // mmk_13.66 //

अनेकाकारवर्णा वा प्रशस्ता लोकपूजिता / तेषां दर्शन सिध्यन्ते मन्त्रा विविधगोचरा // mmk_13.67 //

इति /

बोधिसत्त्वपिटकावतंसकान्महायानवैपुल्यसूत्राद् आर्यमञ्जुश्रीमूलकल्पात् त्रयोदशमपटलविसरः परिसमाप्तमिति // अथ चतुर्दशः पटलविसरः / अथ खलु भगवान् शाक्यमुनिः पुनरपि शुद्धावासभवनमवलोक्य मञ्जुश्रियं कुमारभूतमामन्त्रयते स्म / अस्ति मञ्जुश्रीः त्वदीयविद्यारहस्यसाधनोपयिकसर्वमन्त्राणां समनुज्ञः तथागतधर्मकोशविसृतधर्ममेघानुप्रविष्टगगनस्वभावसर्वमन्त्राणां लौकिकलोकोत्तराणां प्रभुः ज्येष्ठतमः, यथा कुमारः सर्वसत्त्वानाम् / तथागतो अत्र आख्यायते ज्येष्ठतमः श्रेष्ठो देवमनुष्याणां पुरुषऋषभः बुद्धो भगवां / एवं हि कुमार सर्वमन्त्राणामयं विद्याराजा अग्रमाख्यायते श्रेष्ठतमः पूर्वनिर्दिष्टं तथागतैः अनभिलाप्यैर्गङ्गानदीसिकतपुण्यैर्बुद्धिअर्भगवद्भिः रत्नकेतोस्तथागतस्य परमहृदयं परमगुह्यं सर्वमङ्गलसम्मतसर्वबुद्धसंस्तुतप्रशस्तं सर्वबुद्धसत्त्वसमाश्वासकं सर्वपापप्रणाशकं सर्वकामदं सर्वाशापरिपूरकम् / कतमं च तत् / अत्रान्तरे भगवतः शाक्यमुनेः ऊर्णाकोशात् सर्वबुद्धसञ्चोदनी नाम रश्मिः निश्चरति स्म / येयं दशदिक्षूर्ध्वमधः सर्वावन्तं बुद्धक्षेत्राण्यवभास्य सर्वसत्त्वां मनांसि चाह्लाद्य उपरि भगवतः शाक्यमुनिः उष्णीषा अन्तर्धीयते स्म / उष्णीषाच्च भगवतः समन्तज्वालार्चितमूर्तिः अनवलोकनीयो सर्वसत्त्वैः दुर्धर्षः महाप्रभावसमुद्गतः प्रभामण्डलालङ्कृतदेहः विविधाकाररूपी महाचक्रवर्तिरूपी विद्याराजा एकाक्षरो नाम निश्चरति स्म / निश्चरित्त्वा सर्वं गगनतलमवभास्य सर्वविद्याराजपरिवृतः अनेकविद्याकोटीनयुतशतसहस्रपुरस्कृतः पूज्यमानो सर्वलोकोत्तरैः विद्याचक्रवर्त्तिराजानैः अभिष्टूयमानो सर्वमन्त्रैः प्रभाव्यमानो सर्वबुद्धबोधिसत्त्वैः दशभूमिप्रतिलब्धैः महात्मभिः सर्वगगनतलमापूर्य दिव्यरत्नोपशोभितमहामणिरत्नालङ्कृतदेहः चारुरूपी प्रभास्वरतरः विविधरूपनिर्माणकोटीनयुतशतसहस्रमुत्सृजमानः एकाक्षरं शब्दमुदीरयमानः महारश्मिजालं प्रमुञ्चमानः अन्तरिक्षे स्थितो ऽभूत् भगवतः शाक्यमुनिरुपरिष्टात् सम्मुखमवलोकयमानः सर्वावन्तं शुद्धावासभवनं महापर्षन्मण्डलञ्चावभास्यमानः //

अथ भगवान् शाक्यमुनिः एकाक्षरं विद्याचक्रवर्त्तिनं सर्वतथागतहृदयं रत्नकेतुर्नाम तथागतस्य परमहृदयपरमगुह्यतमं सर्वतथागतैर्भगवतः रत्नकेतोः सन्निविष्टं सालेन्द्रराज अमिताभ दुःप्रसह सुनेत्र सुकेतु पुष्पेन्द्र सुपिनान्तलोकमुनिः कनकाद्यैस्तथागतैर्भाषितं चानुभ्यमोदितं च सर्वैश्चातीतैः सम्यक् सम्बुद्धैः लपितं चानुमन्यं च / कतमं च तत् / तद्यथा - भ्रूं /

एष स मञ्जुश्रीः परमहृदयः सर्वतथागतानां असर्वगुणां विद्याचक्रवर्तिनः एकाक्षरं नाम महापवित्रम् / अनेन साध्यमानः सर्वमन्त्रा सिद्ध्यन्ते / त्वदीयं ये कुमारकल्पराजवरे सर्वमन्त्रानुकूलं परमरहस्य अग्रः समनुज्ञः सर्वकर्मावरणविशोधकः अवश्यं तावत् साध + + + + + + + + + + + + + कर्माणि सर्वमन्त्रेषु अस्मिं कुमार त्वदीयकल्पराजे सर्वलौकिकलोकोत्तराणि च मन्त्रतन्त्राणि साधयितव्यानि / अनेन कृतरक्षः, अधृष्यो भवति सर्वभूतानामिति / सर्वविघ्नैश्च लौकिकलोकोत्तरैर्नाभिभूयत इति //

समन्तरत्नभापिते च भगवता शाक्यमुनिना सर्वो ऽपि त्रिसाहस्रमहासाहस्रो लोकधातुः षड्विकारं प्रकम्पिता अभूवं / सर्वाणि च बुद्धक्षेत्राणि अवभासितानि सर्वश्च बुद्धा भगवन्तः (वैद्य 96) सन्निपतिता भवेयुः / तस्मिं पर्षन्मण्डले शुद्धावासभवनोपनिषण्ण सर्वे च बोधिसत्त्वा दशभूमिप्रतिलब्धा अवैवर्तिका ह्यनुत्तरायां सम्यक् सम्बोधौ सर्वश्रावकप्रत्येकबुद्धाश्च सर्वसत्त्वा महर्द्धिका विद्याराजरश्मिसञ्चोदिता आगच्छेयुर्वशीभूताः / अन्ये च सत्त्वा वहवः अनन्तापर्यन्तलोकधातुव्यवस्थिता नरकतिर्यकप्रेतदुःखगतिसन्निश्रिताः तेन महता रश्म्यवभासेन स्पृष्टा अवभासिता दुःखप्रतिप्रबुद्धवेदनासन्नस्थः सुखह्लादितमनसः नियतं त्रिधायानसन्निश्रिता भवेयुरिति //

अथ भगवान् शाक्यमुनिः तं महापर्षन्मण्डलमलोक्य मञ्जुश्रियं कुमारभूतमामन्त्रयते स्म - शृणु मञ्जुश्रीः इमं विद्याराजं महर्द्धिकमेकवीरं सर्वकर्मिकं सर्वविद्याराजचक्रवर्त्तिनं सर्वसत्त्वानामाशापारिपूरकं सर्वकल्पविस्तरे त्वदीयमन्त्रतन्त्रकल्पविस्तरसमनुप्रविष्टं सर्वमन्त्राणां साधकः साधारणभूतं महेशाख्य महोत्साहसत्त्वसाधकविशेषप्रज्ञोपायकौशलसर्वबोधिमार्गसंशोधकनिर्वाणप्रतिष्ठापनाक्रमणबोधिमण्डनिषदनाक्रमणकुशलसम्भारभूतं अस्यैवं समासतः कल्पविस्तरं पटविधानमण्डलं संसाधनोपयिकं पूर्वमन्त्रचर्यानुचरितं यत्र प्रतिष्ठिताः सत्त्वाः साधयिष्यन्ति महाचक्रवर्तिनं विद्याराजं महद्भूतं सर्वमन्त्राणां परमेश्वरं प्रभङ्करं सर्वाशापारिपूरकं विनायकं सर्वजगद्धितं बुद्धमिव साक्षात् प्रत्युपस्थितं स्वयम्भुवं उत्तमोत्तिष्ठमध्यमकन्यससर्वकर्मिकम् /

क्षेमङ्गमं शिवं शान्तं सर्वपापप्रनाशनम् / देवानामपि तं देवं मुनीनां मुनिपुङ्गवम् // mmk_14.1 //

बुद्धमादित्यतं बद्धं विशुद्धं लोकविश्रुतम् / सर्वकर्मस्वभावज्ञं भूतकोटिरनाविलम् / वक्ष्ये कल्पवरं तस्य शृणुध्वं भूतिकांक्षिणाम् // mmk_14.2 //

आदौ तावत् पटो दिव्ये विकेशे श्लेषवर्जिते / नवे शुक्ले विशेषेण सदशे चैवमालिखेत् / द्विहस्तमात्रप्रमाणेन हस्तमात्रं च तिर्यक् // mmk_14.3 //

तथाविधे शुभे चैव निर्मले चारुदर्शने / सिते दौम्ये तथा शुक्ले सुव्रते पिचिवर्जिते // mmk_14.4 //

शङ्कारापकरे शुक्लं पटे चैव दुकूलके / आतस्ये वाल्कलै चैव शुद्धे तन्तुविवर्जिते // mmk_14.5 //

क्रिमानिलअसम्भूते जन्तूनां चानुपापने / अकौशेये तथा चान्ये यत्किञ्चित् साधुवर्णिते // mmk_14.6 //

तादृशे च पटे श्रेष्ठे कुर्यादालेख्यमालयम् / शास्तुबिम्बमालिख्य प्रभामण्डलमालिनम् // mmk_14.7 //

हेमवर्णं तदालिख्य ज्वालामालिनं विदुम् / एकाकिनं गुह्यलीनं पर्वतस्थं महायसम् // mmk_14.8 //

रत्नमालावनद्धं वै कुर्यात्पट्टवितानकम् / उपरिष्टादुभौ देवौ धार्यमाणौ नु मालिखेत् // mmk_14.9 //

पर्वतस्योपरिष्टा वै कुर्याद् रत्नमालकाम् / समन्ततश्च वितानस्य मुक्ताहारार्द्धभूषितम् // mmk_14.10 //

उपरिष्टाच्छैलराजस्य सर्वमालिख्य यत्नतः / अधश्चैव तथा शैले महोदधिसमप्लुतम् // mmk_14.11 //

पटान्ते चैव पुष्पाणि समन्ताच्चैवमालिखेत् / नागकेसरपुन्नागवकुलं चैव यूथिकाम् // mmk_14.12 //

मालतीकुसुमं चैव प्रियङ्गुकुरबकं सदा / इन्दीवरं च सौगन्धी पुण्डरीकमतःपरम् // mmk_14.13 //

विविधानि पुष्पजातीनि तथान्यां गन्धमाश्रिताम् / एतेषामेव पुष्पाणि + + + + + + + + + + // mmk_14.14 //

+ + चैव पूजार्थं दद्युः शास्तुर्मनोरमम् / पूर्वनिर्दिष्टविधिना पटे ज्येष्ठे तथा पटे // mmk_14.15 //

सूत्रं तन्तुवायं च तथा चित्रकरं मतम् / प्रातिहारकपक्षे च आलिखेच्छुद्धतमे ऽहनि // mmk_14.16 //

तथाप्रवृत्ते च काले च जापे चैव विधीयते / सर्वं सर्वमेवास्य पूर्वमुक्तं समाचरेत् // mmk_14.17 //

रङ्गोज्ज्वलं विचित्राढ्यं शास्तुविश्व समालिखेत् / अनेकाकारसम्पन्नं कर्णिकारसमप्रभम् // mmk_14.18 //

चम्पकाभासमाभासं आलिखेद्धेमवर्णितम् / एभिराकारसम्पन्नं मुनिंमालिख्य रत्नजम् // mmk_14.19 //

रत्नकेतुं महाभागं श्रेष्ठं वै मुनिपुङ्गवम् / सर्वधर्मवशिप्राप्तं बुद्धरत्नं तमालिखेत् // mmk_14.20 //

रत्नपर्वतमासीनं गुहारत्नोपशोभितम् / पर्यङ्कोपरिविष्टं तु दत्तधर्मानुदेशनम् // mmk_14.21 //

ईषिस्मितमुखं वीरं ध्यानालम्बनचेतसः / गुहाबहिः समालिख्य अधश्चैव समन्ततः // mmk_14.22 //

पटान्तकोणे सन्निविष्टं साधकं जानुकर्पूरम् / धूपव्यग्रकरं चैव ईषित्कायावनामितम् // mmk_14.23 //

उत्तरासङ्गिनं कुर्याद् यथावेषानुलिङ्गिनम् / दक्षिणे भगवतस्याधः महोदधितलादपि // mmk_14.24 //

आलिखेन्नित्ययुक्तात्मा मन्त्रिणं श्रेयसार्थिनम् / एतत् पटविधानं तु कथितं लोकपूजितैः // mmk_14.25 //

मण्डलं तस्य देवस्य साम्प्रतं तु प्रवक्ष्यते / युक्तमन्त्रस्तदा मन्त्री तस्मिन् काले सुमन्त्रवित् // mmk_14.26 //

कृतसेवः सदामन्त्रे अभ्यस्ता जापसम्पदे / अभिषिक्तस्तदा मन्त्रे कल्पे ऽस्मिन् मञ्जुभाणिते // mmk_14.27 //

मण्डलाचारसम्पन्ने नित्यं चाभिषेचिते / अभिषिक्तः सर्वमन्त्राणां मण्डले ऽस्मिं विशारदः // mmk_14.28 //

युक्तिमन्तः सदा तन्त्रे आत्मरक्षे हिते मतः / सहायांश्चैव रक्षघ्नैः सुपरीक्ष्य महाद्युतिः // mmk_14.29 //

आचार्यः सुसंरब्धः आरब्धाव्रतसेविनः / महाप्रज्ञो ऽथ सुस्निग्धः श्रीमान् कारुणिकः सदा // mmk_14.30 //

सहायानां च सर्वेषां तथा लक्षणमादिशेत् / एकद्वौ त्रयो वापि तथाचाष्टमथापराम् // mmk_14.31 //

कुर्याच्छिष्यां सुसम्पन्नां प्रभूतांश्चापि वर्जयेत् / पूर्वदृष्टविधानं तु मण्डले ऽस्मिं सदा चरेत् // mmk_14.32 //

प्रथमा ये तु निर्दिष्टा मण्डला दशवलोदिता / मञ्जुघोषस्य नान्यं तु आलिग्वे नान्यकर्मणा // mmk_14.33 //

प्रमाणं तु प्रवक्ष्यामि मण्डलस्य महाद्युतेः / चतुर्हस्तं द्विहस्तं वा तथाचाष्टमतःपराम् // mmk_14.34 //

शुचौ देशे नदीकूले पर्वताग्रे विशेषतः / पञ्चरङ्गिकचूर्णेन पूर्वदृष्टेन कर्मणा // mmk_14.35 //

चतुरश्रं चतुर्द्वारं चतुस्तोरणभूपितम् / चतुःकोणं समं दिव्यं दिव्याचारसमप्रभम् // mmk_14.36 //

रङ्गोज्ज्वलं विचित्रं च चारुवर्णं सुशोभनम् / ससुगन्धं सरूपं च सुसहायः समारभेत् // mmk_14.37 //

मौनी व्रतसमाचारः अष्टङ्गोपसेविनः / अक्लिष्टचिअत्तो मात्रज्ञः धार्मिको ऽथ जपी सदा // mmk_14.38 //

अपापकर्मसमारब्धः शान्तिकपौष्टिक / मध्यस्था ते ततो विश्य आलिखेत् शास्तु वर्णिभिः // mmk_14.39 //

प्रथमं सर्वं तं लेख्यं नानारत्नविभूषितम् / गुहासीनं महातेजं रत्नकेतुं तथागतम् // mmk_14.40 //

पर्यङ्कोपविष्टं तु धर्मचक्रानुवर्तकम् / पटे यथैव तत् सर्वं आलिखेच्छास्तुपूजितम् // mmk_14.41 //

त्रिपङ्क्तिभिस्तथा रेखैः मुद्रैश्चाप्यलङ्कृतम् / कुर्यात् सञ्छादितां सर्वां पङ्क्तिश्चैव समन्ततः // mmk_14.42 //

अव्यस्तां समस्तां च अनाकुलिततद्भताम् / तेषां तु मध्ये कुर्वीत चक्रवर्ती महाप्रभुम् // mmk_14.43 //

उदितादित्यसङ्काशं कुमाराकारमर्चिषम् / आलिखेद् यत्नमास्थाय महाचक्रानुवर्तिनम् // mmk_14.44 //

महाराजसमाकारं मुकुटालङ्कारभूषितम् / किरीटिनं महासत्त्वं सर्वालङ्कारभूषितम् // mmk_14.45 //

चारुपट्टार्द्धसंवीतं चित्रपट्टनिवासिनम् / स्रग्मिणं सौम्यवर्णाभं माल्याम्बरविभूषितम् // mmk_14.46 //

जिघ्रन्तो दक्षिणेनैव करेण वकुलमालकम् / ईषिस्मितमुखं देवं महावीर्यं प्रभविष्णुवम् // mmk_14.47 //

सुरूपं चारुरूपं वै बालवृद्धविवर्जितम् / वामहस्तसदाचक्रं दीप्तमालिन परामृष्यन्तम् // mmk_14.48 //

तदालेख्यं अर्द्धपर्यङ्क सुनिविष्टमर्द्धेन भुजसंनिश्रितम् / आलिखेद् दिव्यवर्णाभं सुरूपं रूपमाश्रितम् // mmk_14.49 //

निषण्णं रत्नखण्डे ऽस्मिन् सर्वतानो महाद्युतेः / श्रेयसः सर्वमन्त्राणां प्रवृत्तो वरदः सदा // mmk_14.50 //

ज्वलन्तं वह्निराकारं + + + मण्डलशोभिनम् / समन्तज्वालामालोपज्य ज्वलते वायुमीरितः // mmk_14.51 //

एवं मन्त्रप्रयोगैस्तु ज्वाल्यन्ते मानुषं भुवि / तथाविधं महावीर्यं सर्वमन्त्रप्रसाधकम् // mmk_14.52 //

पश्येद् यो हि स धर्मात्मा मुच्यते सर्वकिल्विषात् / पञ्चानन्तर्यकारीपि दुःशीलो मन्दमेधसः // mmk_14.53 //

सर्वपापप्रशान्ता वै मुच्यते दर्शनाद् विभोः / मण्डलं दृष्टमात्रं तु देवदेवस्य चक्रिणे // mmk_14.54 //

तत्क्षणा मुच्यते पापा ये ऽन्ये परिकीर्तिताः / ततः पूर्वद्वारं संशोध्य मन्त्रेणैव समं विभोः // mmk_14.55 //

परिक्षिप्तं तोरणैः सर्वं कदल्याभिश्चोपशोभितम् / परिस्फुटं मण्डलं कृत्वा अशेषं चारुरूपिणम् // mmk_14.56 //

बलिं धूपं प्रदीपं च गन्धमाल्यं सदाशुभम् / पूर्वेणैव विधानेन कुर्यात् सर्वमादरात् // mmk_14.57 //

मध्यस्थं पूर्णकुम्भं तु चक्रिणस्याग्रतो न्यसेत् / तत्कुम्भं विजयेत्वाख्या मन्त्रज्ञस्तं न चालयेत् // mmk_14.58 //

तथाग्निकुण्डं पूर्वं तु विधिदृष्टेन कर्मणा / होमकर्मसमारम्भो विभुमन्त्रेण नान्य वै // mmk_14.59 //

होमं चाष्टसहस्रं तु खदिरेन्धनवह्निना / पालाशं चापि श्रीकण्ठं बिल्वोदुम्वरचाक्षकम् // mmk_14.60 //

अपामार्गं तथा जुहुयात् सर्वकर्मेषु यत्नतः / तिलं वा आज्यसंपृक्तं दग्धगन्धसमप्लुतम् // mmk_14.61 //

जुहुयात् सर्वकर्मेषु सहस्रं साष्टकं सदा / त्रिसन्ध्यं पूर्वनिर्दिष्टं स्नानं चेलावधारणम् // mmk_14.62 //

त्रिशूलं शुभनक्षत्रं कथितं च मनीषिभिः / पूर्वनिर्दिष्टकर्माणि जापं होमं तथापरम् // mmk_14.63 //

कुर्यान्मन्त्रयुक्तेन चक्रवर्तिकुलेन वा / एकाक्षरेणेव सर्वाणि कुर्यात् सर्वकर्मसु // mmk_14.64 //

महाप्रभावार्थयुक्तो ऽसौ एकवीर सदापरम् / आचरेत् सर्वमन्त्राणां कल्पं तेषु सदा जपी // mmk_14.65 //

सिद्ध्यन्ते सर्वकल्पानि लौकिका लोकसम्मता / लोकोत्तराश्च महावीर्या विद्याराजाश्च महातपाः // mmk_14.66 //

सिद्ध्यन्ते सर्वमन्त्रा वै अस्मिन् कल्पे तु तान्यतः / मुनिभिः कथितं ये वै मन्त्रं तथा दशबलात्मजैः // mmk_14.67 //

शक्राद्यैर्लोकपालैस्तु विष्णुरीशानब्रह्मणैः / चन्द्रसूर्यैस्तथान्यैर्वा यक्षेन्द्रैराक्षसैस्तथा // mmk_14.68 //

महोरगैः किन्नरैश्चापि तथा ऋषिवरैर्भुवि / गरुडैर्मातरैर्लोकैः तथान्यैः सत्त्वसंज्ञिभिः // mmk_14.69 //

भाषिता ये तु मन्त्रा वै सिद्धिं गच्छन्ति ते इह / आकृष्टाः सर्वमन्त्राणां प्रणेता सर्वकर्मणाम् // mmk_14.70 //

वशिता सर्वमन्त्राणां प्रणेता सर्वकर्मणाम् / वशिता सर्वभूतानां तन्त्रमन्त्रसविस्तराम् // mmk_14.71 //

एष एकाक्षरो मन्त्रः करोति सर्वमन्त्रिणाम् / सफलं जप्तमात्रस्तु आकृष्टा सर्वदेवताम् // mmk_14.72 //

वशिता सर्वकल्पानांश्चमी एकाक्षरो महाम् / करोति विविधाकारां विचित्रां साधुवर्णिताम् // mmk_14.73 //

लौकिकां लोकमन्त्रा तु साधयेत्सम्यक् प्रयोजितः / परिस्फुटं तु पटं कृत्वा अशेषं चारुदर्शनम् // mmk_14.74 //

शुचौ देशे नदीकूले पर्वताग्रे च तं न्यसेत् / पूर्वकर्मप्रयोगेण कुर्यात् पश्चान्मुखं सदा // mmk_14.75 //

साधकः प्राङ्मुखो भूत्वा विधिदृष्टेन कर्मणा / दर्भविण्डोपविष्टस्तु कुर्याज्जपमनाकुलम् // mmk_14.76 //

नोच्चशब्दो न मृदुः नापि चित्तपरस्य तु / दूषयं सर्वभूतानां क्षिप्रसिद्धिर्भवेदिह // mmk_14.77 //

मैत्रचित्तः सदा लोके दुःखितां कृपणां सदा / अनाथां दीनमनसां व्यसनार्त्तां सुदुर्बलाम् // mmk_14.78 //

पतितां संसारघोरे ऽस्मिं कृपाविष्टो ऽथ सिद्ध्यति / पटस्याग्रत यत्नेन महापूजां न्यसेत् सदा // mmk_14.79 //

मानसी मानुषींश्चापि दिव्यां हृदयमुद्भवाम् / चिन्तयेत् कुर्याद्वापि जिनेन्द्रविश्वपटस्य तु // mmk_14.80 //

तत्रैवाग्निकुण्डं कुर्या तत्त्वविधानतः / सुसमृद्धं साधको ह्यग्नि जुहुयात्तत्र माहुतिः // mmk_14.81 //

श्वेतचन्दनकर्पूरं कुङ्कुमं मिश्रपूजितः / शताष्टं आहुतिं जुह्वं षड्भौ दीप्तितुमन्त्रवितु // mmk_14.82 //

खदिरे प्लक्ष्यन्यग्रोधे पालाशे चापि नित्यतः / एषा समुद्भवे काष्ठे ज्वालयेद् वह्निमूर्जितः // mmk_14.83 //

एषामभावे काष्ठानामन्यं काष्ठं समाहरेत् / पिचुमर्दं कद्वमम्लं च तथैव मदनोद्भवम् // mmk_14.84 //

सर्वकण्टकिनः वर्ज्याः पापकर्मेषु कीर्त्तिताः / एकाक्षरेणैव मन्त्रेण कुर्याच्छान्तिकपौष्टिकम् / आशु सिद्धिर्भवेत् तस्य पापं कर्म समाचरेत् // mmk_14.85 //

सर्वमन्त्रधरा ह्यत्र सकर्मा कल्पविस्तरा / प्रयोक्तव्या निर्विकल्पेन सिद्धिं गच्छन्ति ते सदा / आकृष्यन्ते तदा मन्त्रा वरदा चैव भवन्ति ह // mmk_14.86 //

पलाशोदुम्बरसमिधानां प्लक्षन्यग्रोध एव वा / घृताक्तानां दध्नसंयुक्तां मध्वोपेतां समाहिताम् // mmk_14.87 //

जुहुयात् सर्वतो मन्त्री राज्यकामो महीतले / देवीं राज्यमाकांक्षं जुहुयात् कुङ्कुमचन्दनम् // mmk_14.88 //

विद्याधराणां देवानां अधिपत्यमकांक्षयम् / जुहुयात् पद्मलक्षाणि षट्त्रिंशत् सकेसराम् // mmk_14.89 //

होमान्ते वै तत्र कुर्वीत अर्घ्यं शास्तुनिवेदनम् / समन्ता ज्वलते तत्र पटश्रेष्ठो जिनाङ्कितः // mmk_14.90 //

तं च स्पृष्टमात्रं तु उत्पतेद् ब्रह्ममालयम् / अकनिष्ठा यावदेवास्तु यावाच्चापातालसञ्चयम् // mmk_14.91 //

अत्रान्तरे सर्वसिद्धानां राजासौ भवते सदा / विद्रापयति भूतानि महावीर्यो दृढव्रतः // mmk_14.92 //

क्रमः विद्याधराणां सदा राजा भविता कर्मसाधने / पुनश्च कल्पमात्रं तु स जीवेद् दीर्घमध्वनम् // mmk_14.93 //

च्युतस्तस्मिं महाकाले नियतो बोधिपरायणः / अपरं कर्मनित्येष कथितं संक्षेपविस्तरम् // mmk_14.94 //

श्वेतपद्मां समाहृत्य श्वेतचन्दनसंयुताम् / जुहुयाच्छतलक्षाणि रत्नकेतुं स पश्यति // mmk_14.95 //

दृष्ट्वा तं जिनं श्रेष्ठं पञ्चाभिज्ञो भवेत् तदा / महाकल्पं चिरं जीवेद् बुद्धस्यानुचरो भवेत् // mmk_14.96 //

पश्यते च तदा बुद्धां अनन्तां दिशि संस्थिताम् / तेषां पूजयेन्नित्यं तयैरेव च संवसेत् // mmk_14.97 //

रत्नावती नाम धात्वैक यत्रासौ भगवां वसेत् / मुनिः श्रेष्ठो वरः अग्रो रत्नकेतुस्तथागतः // mmk_14.98 //

तत्रासौ वसते नित्यं मन्त्रपूतो न संशयः / अपरं कर्ममिष्टं च कथितं ह्यग्रपुद्गलैः // mmk_14.99 //

नागकेसरकर्पूरं चन्दनं कुङ्कुमं समम् / एकीकृत्य तदा मन्त्री जुहुयाल्लक्षाष्टसप्तति // mmk_14.100 //

होमावसाने तदा देव आयातीह सचक्रिणः / तुष्टो वरदो नित्यं मूर्ध्नि स्पृशति साधकम् // mmk_14.101 //

स्पृष्टमात्रस्तदा मन्त्री सप्तभूम्याधिपो भवेत् / जिनानामौरसः पुत्रो बोधिसत्त्वः स उच्यते // mmk_14.102 //

नियतं बोधिनिष्टस्तु व्याकृतो ऽसौ भविष्यति / ततः प्रभृति यत्किञ्चिद् ज्ञानं ज्ञेयं जिनात्मजम् // mmk_14.103 //

जानामि सर्वमन्त्राणां गतिमाहात्ममूर्जितम् / पञ्चाभिज्ञो भवेत् तस्मिन् दृष्टमात्रेण मन्त्रराट् // mmk_14.104 //

करोति विविधाकारामात्मभावं सदा यदा / सर्वाकारवरोपेतां पूजाकर्मि सदा रतः // mmk_14.105 //

भवते तत्क्षणादेव उद्युक्तो बोधिकर्मणि / क्षणमात्रे तदा लोकां बुद्धक्षेलां स गच्छति // mmk_14.106 //

लोकधातुसहस्राणि अण्डा हिण्डन्ति सर्वतः / बुद्धानां बोधिसत्त्वानां पश्यन्ते चरितां तदा // mmk_14.107 //

धर्मं शृणोति तत्तेषां पूजां कर्मे समुद्यतः / अपरं कर्ममस्तीह चक्रवर्तिजिनोद्भवे // mmk_14.108 //

प्रदीपलक्षणं दद्याच्छुचिवर्तिर्घृतः समे / सौवर्णे भाजने रौप्ये ताम्रे मृत्तिकमे ऽपि वा // mmk_14.109 //

ते तु प्रज्वलिते दीपे पुरुषैर्लक्षप्रमाणिभिः / गणमात्रसंन्यस्ते शतसाहस्रनाविकैः // mmk_14.110 //

स्त्रीवर्जैः पुरुषैश्चापि प्रदीपहस्तैः समन्ततः / पटं शास्तु विम्वाख्ये दद्यात् पूजा च कर्मणि // mmk_14.111 //

समं सर्वप्रवृत्तास्तु मन्त्रे कैकसमन्त्रिते / दद्याच्छास्तुनो मन्त्रैस्तत्क्षणात् सिद्धिमादिशेत् // mmk_14.112 //

समन्ताद् गर्जितनिर्घोषं दुन्दुभीनां च निःस्वनम् / देवसङ्घा ह्यनेका वै साधुकारं प्रमुञ्चयेत् // mmk_14.113 //

बुद्धा बोधिसत्त्वाश्च गगनस्थं तस्थुरे तदा / साधु साधु त्वया प्राज्ञ सुकृतं कर्म कारितम् // mmk_14.114 //

न पश्यसि पुनर्दुःखं संसारार्णवसंप्लुतम् / क्षेमे शिवे च निर्वाणे अभये बुद्धत्वमाश्रितः // mmk_14.115 //

मार्गे शुभे च विमले अष्टाङ्गे साधुचेष्टिते / प्रपन्नस्त्वं मन्त्ररूपेणम् चक्रिमेकाक्षराक्षिते // mmk_14.116 //

अपरं कर्ममेवास्ति उत्तमां गतिनिश्रितः / महाप्रभावार्थविज्ञातं सर्वबुद्धैः सम्प्रकाशितम् // mmk_14.117 //

गृह्य निम्बमयं काष्ठं कुर्याद् वज्रं त्रिशूचिकम् / उभयाग्रं मध्यपार्श्वं तु कुर्यात् कुलिशसम्भवम् // mmk_14.118 //

मन्त्रपूतं ततः कृत्वा पटस्याग्रतः कन्यसे / परामृश्य ततो मन्त्री जपेन्मन्त्रां समाहितः // mmk_14.119 //

लक्षषोडशकाष्ठं च समाप्ते सिद्धिरिष्यते / एकज्वाली ततो वज्रः समन्तात् प्रज्वलते हि सः // mmk_14.120 //

उज्जहार ततो ऽचिन्त्यमूर्ध्वसंक्रमते हि सः / ब्रह्मलोकं ततो याति अन्यां वा देवसम्मितिम् // mmk_14.121 //

आकाशेन ततो गच्छे सर्वसिद्धेषु अग्रणीः / कुरुते आधिपत्यं वै सिद्धविद्याधरादिषु // mmk_14.122 //

चक्रवर्त्तिस्ततो राजा भवते देवसन्निधौ / करोति विविधाकारं आत्मभावविचेष्टितम् // mmk_14.123 //

दश चान्तरकल्पानि चिरं तिष्ठन्न चालयेत् / सौख्यभागी सदा पूज्यः सुरूपो रूपवां सदा // mmk_14.124 //

बोधिचित्तो समाचारो जन्मदुःखविवर्जितः / भवते सुरसिद्धस्तु सर्वपापविवर्जितः // mmk_14.125 //

च्युतस्तस्माद् भवेन्मर्त्यो बहुसौख्यपरायणः / गतिं सर्वां विचेरुस्थः भवते बोधिपरायणः // mmk_14.126 //

अनन्ता विविधा कर्मा बहुलोकार्थपूजितम् / पठ्यन्ते मन्त्रराजे ऽस्मिं सकल्पाकल्पविस्तरात् // mmk_14.127 //

भौम्याधिपत्यं शक्रत्वं चक्रवर्तित्वं च वा पुनः / विद्याधराणां तथा देवां कुरुते चाधिचेष्टितम् // mmk_14.128 //

अनेकाकाररूपं वा + + + यदिहोच्यते / सर्वसिद्धिमवाप्नोति सुप्रयुक्तस्तु मन्त्रिणा // mmk_14.129 //

रात्रौ पर्यङ्कमारुह्य + + अचिन्त्यं जपतो व्रती / प्रभाते सिद्धिमायाति पञ्चाभिज्ञो भवेज्जपी // mmk_14.130 //

श्मशाने शवमाक्रम्य निश्चलो तं जपेद् व्रती / एकाक्षरं महार्थं तु प्रभाते सिद्धिमिष्यते // mmk_14.131 //

श्मशानस्थो यदि यप्येत विद्याराजमहर्द्धिकः / षण्मासैः सिद्धिमायाति यथेष्टं कुरुते फलम् // mmk_14.132 //

यत्र वा तत्र वा स्थाने जप्यमानो महर्द्धिकः / तत्रस्थः सिधिमायाति सुप्रयुक्तस्तु मन्त्रिभिः // mmk_14.133 //

सितं छत्रं तथा खड्गं मणिपादुककुण्डलम् / हारकेयूर पटकं + + + चाङ्गुलीयकम् // mmk_14.134 //

कटिसूत्रं तथा वस्त्रं दण्डकाष्ठकमण्डलुम् / यज्ञोपवीतमुष्णीषं कवचं चापि चर्मिणम् // mmk_14.135 //

अजिनं कमलं चैव अक्षसूत्रं च पादुके / सर्वे ते भूषणाश्रेष्ठा लोके ऽस्मिं समतावुभौ // mmk_14.136 //

सुरैर्मर्त्यैस्तथा चान्यैः + + + भूषणानि ह / सर्वे सिद्धिमायान्ति पटस्याग्रत जापिने // mmk_14.137 //

सर्वद्रव्यं तथा धातुं भूषणं मणयो ऽपि च / अनेकप्रहरणाः सर्वे विन्यस्ता पटमग्रते // mmk_14.138 //

सकृज्जप्ताथ संशुद्धा लक्षमष्टौ भिमन्त्रिता / ज्वलते सर्वसंयुक्ता उत्तिष्ठे स्पृशनाज्जपी // mmk_14.139 //

सत्त्वप्रकृतयो वापि विविधाकाररूपिणः / भूषणाः प्रहरणाश्चापि मृन्मया वा स्वभाविका // mmk_14.140 //

सुरूपचेष्टप्रकृतयः नानापक्षिगणादपि / सर्वभूतास्तु ये ख्याता कृत्रिमा वा ह्यकृत्रिमा // mmk_14.141 //

सत्त्वसंज्ञाथ निःसंज्ञा सिद्ध्यन्ते मन्त्रपूजिता / विविधद्रव्यविन्यस्ता विविधा धातुकारिता // mmk_14.142 //

+ + + + + + + वापि गतियोनिसुपूजिता / विन्यस्ता पटमग्रे ऽस्मिं पूर्वदृष्टविधानतः // mmk_14.143 //

आमृष्य तं जपेन्मन्त्री षड् लक्षाणि च सप्त च / जपान्ते ज्वलिते तेषु सिद्धिं प्राप्नोति पुष्कलाम् // mmk_14.144 //

स्पृष्टमात्रेषु तत्तेषां उत्पतेत्तु चतुर्दिशम् / चिरं जीवेच्चिरं सौख्यं प्राप्नोतीह दिवौकसाम् // mmk_14.145 //

यथा यथा प्रयुज्येते विद्याराजमहर्द्धिकः / तथा तथा च तुष्येत वरदो च भवेत् सदा // mmk_14.146 //

अन्यकर्मप्रवृत्तास्तु कर्मभिः कल्पविस्तरैः / तैरेव सिद्ध्यन्ते क्षिप्रं विद्याराजमहर्द्धिकः // mmk_14.147 //

शुचिना शुचिचित्तेन शुचिकर्मसदारतः / शुचौ देशे ऽथ मन्त्रज्ञः शुचिसिद्धि समृच्छति // mmk_14.148 //

तत्कर्म तत्फलं विन्द्यादधिकादधिकं भवेत् / मध्ये मध्यमकर्मे तु कन्यसं तु मतः परम् // mmk_14.149 //

कर्मा प्रभूतमर्थ दत्वा करोति भूतचेष्टितम् / असाधितः कर्मसिद्धिस्तु फलं दद्याल्पमात्रकम् // mmk_14.150 //

नित्यं च जापमात्रेण महाभोगो ऽथ महाबलः / राज्ञा प्रियत्वमन्त्रित्वं करोति जपिनः सदा // mmk_14.151 //

पापं प्रणश्यते तस्य सकृज्जप्तस्तु मन्त्रराट् / द्विजप्तः सप्तजप्तो वा आत्मरक्षा भवेन्महां // mmk_14.152 //

सहायानां सर्वतो रक्षा अष्टजप्तः करोति सः / वस्त्राणामभिमन्त्रीत उभौ मन्त्री तदा पुनः // mmk_14.153 //

मुच्यते सर्वरोगाणां उभौ वस्त्राभिमन्त्रितौ / स्पर्शनं तेषु मन्त्रेषु ज्वरं नश्यति देहिनाम् // mmk_14.154 //

सुखं चाभिमन्त्रितः अक्ष्णी वा चापि यत्नतः / क्रुद्धस्य नश्यते क्रुद्धो दृष्टमात्रस्तु मन्त्रिभिः // mmk_14.155 //

ये च भूतगणा दुष्टा हिंसका पापकर्मिणः / मुखं तेषु निरीक्षेत त्रिंशज्जप्तेन मन्त्रराट् // mmk_14.156 //

हस्तं चाभिमन्त्रीत स्वकं चैव पुनः पुनः / तेषां प्रहारमावर्ज्यामुच्यते सर्वदेहिनाम् // mmk_14.157 //

बालानां नित्यकुर्वीत स्नपनं पानभोजनम् / षष्टिजप्तवरे मन्त्रे उत्कृष्टे देवपूजिते // mmk_14.158 //

त्यजन्ते सर्वदुष्टास्तु क्रव्यादा मातरा ग्रहाः / मन्त्रभीतास्तु नश्यन्ते त्यजन्ते बालिशान् सदा // mmk_14.159 //

एवंप्रकारान्यनेकानि कर्मां चैव महीतले / मानुषाणां तथा चक्रे क्षिप्रं चैव सदा न्यसेत् // mmk_14.160 //

सरिसृता ये तु भूता वै विविधा स्थावरजङ्गमाः / सविषा निर्विषाश्चैव नश्यन्ते मन्त्रदीरिता // mmk_14.161 //

ये केचिद् विविधा दुःखा या काचित् सत्त्ववेदना / विन्यस्ता मन्त्रराजेन शान्तिमाशु प्रयच्छति // mmk_14.162 //

विविधायासदुःखानि महामार्योपुसर्गिणः / नश्यन्ते क्षिप्रमेवं तु मन्त्रजप्तेन षट्छतम् // mmk_14.163 //

कुर्याद्धोमकर्माणि मध्वमध्वाज्यमिश्रितम् / नीलोत्पलं सुगन्धं वै सहस्रं चाष्ट पूजितम् // mmk_14.164 //

शान्तिं तिलेन भूतानि प्रजग्मुः स्वस्थतां जनः / एवंप्रकारान्यनेकानि बहुकल्पसमुद्भवाम् // mmk_14.165 //

सर्वां करोति क्षिप्रं वै सुप्रयुक्तस्तु मन्त्रिभिः / जपमात्रेण कुर्वीत अरीणां क्रोधनाशनम् // mmk_14.166 //

अनेकमन्त्रार्थयुक्तानां कल्पानां बहुविस्तराम् / विधिदृष्टा भवेत् तेषां तेषु सिद्धिरिहोच्यते // mmk_14.167 //

अवश्यं क्षुद्रकर्माणि मन्त्रजप्तो करोति ह / सर्वान्येव तु जप्तेन क्षिप्रमर्थकरः सदा // mmk_14.168 //

वश्यार्थं सर्वभूतानां त्रिसन्ध्यं जपमिष्यते / होमकर्मं च कुर्वीत मालत्याः कुसुमैः सदा // mmk_14.169 //

श्वेतचन्दनकर्पूरकुङ्कुमाच्च विधीयते / वरजापिने मन्त्रः सफलां कुरुते सदा // mmk_14.170 //

मनीषितान्साधयेदर्था नित्यहोमेन जापिनम् / कर्पूरादिभि युक्तैस्तु नित्यहोमं प्रकल्पितम् // mmk_14.171 //

साधयेद् विविधां कर्मां यथेष्टपरिकल्पिताम् / अल्पादल्पतरं कर्म प्रभूता भूतिमुद्भवम् // mmk_14.172 //

मध्ये मध्यकर्माणि सदा सिद्धिरुदाहृता / तस्मात् सर्वेषु कर्मेषु कुर्याद्धोमं विशेषतः // mmk_14.173 //

इति //

बोधिसत्त्वपिटकावतंसकान्महायानवैपुल्यसूत्रात् आर्यमञ्जुश्रियमूलकल्पात् चतुर्दशमः चक्रवर्त्तिपटलविधानमण्डलसाधनोपयिकविसरः परिसमाप्त इति // अथ पञ्चदशः पटलविसरः / अथ खलु वज्रपाणिर्बोधिसत्त्वो महासत्त्वस्तत्रैव पर्षन्मध्ये सन्निपतितो ऽभूत् / सन्निषण्णः स उत्थायाअसनाद् भगवन्तं त्रिः प्रदक्षिणीकृत्य, भगवतश्चरणयोर्निपत्य, भगवन्तमेतदवोचत् - साधु साधु भगवन् सुदेशितं, सुप्रकाशितं परमसुभाषितं विद्यामन्त्रप्रयोगमहाधर्ममेघविनिसृतं सर्वतथागतहृदयं महाविद्याराजचक्रवर्तिनमहाकल्पविस्तरसर्वथापारिपूरकं सफलं सम्पादकबोधिमार्गनिरुत्तरं क्रियाभेदसंध्यजपहोमविद्यचर्यानुवर्त्तिनां मार्गं दृष्टफलकर्मप्रत्ययजनितहेतुनिमित्तमहाद्भुतदशबलाक्रमणकुशलबोधिमण्डमाक्रमणनियतपरायणम् / तत् साधु भगवां वदतु शास्ता मन्त्रसाधनानुकूलानि स्वप्नसन्दर्शनकालनिमित्तम्; येन विद्यासाधकानुवर्त्तिनः सत्त्वाः सिद्धिनिमित्तं कर्म आरभेयुः, सफलाश्च सर्वविद्याः कर्मनिमित्तानि भवन्ति रिति //

एवमुक्ते भगवां शाक्यमुनिः वज्रपाणिं बोधिसत्त्वमेतदवोचत् - साधु साधुस्त्वं यक्षेश बहुजनहिताय त्व प्रतिपन्नः बहुजनसुखाय लोकानुकम्पायै महतो जनकायस्यार्थाय हिताय सुखाय सर्वविद्यासाधकानामर्थाय / तं शृणु, साधु च सुष्ठु च मनसि कुरु, भाषिष्ये ऽहं ते //

आदौ तावत् पूर्वकर्मारम्भं सर्वकर्मेषु निःसङ्गं स्थान गत्वा, पर्वताग्रे नदीकूले वा गुहाचत्वरकेषु वा, शुचौ देशे उडयं कृत्वा, पटे प्रतिष्ठाप्य महती पूजां कृत्वा, तेनैव विधिना पूर्ववत् सर्वकर्मेषु शुक्लपक्षे प्रातिहारपक्षे वा अवश्यं शुभे ऽहनि रात्रौ प्रथमे यामे श्वेतचन्दनकर्पूरकुङ्कुमं चेकीकृत्य, खदिरकाष्ठैरग्निं प्रज्वाल्य, पटस्याग्रतश्चतुर्हस्तप्रमाणमाग्रथितः आहुतिं सहस्राष्टं जुहुयान्निर्धूमे विगतज्वाले चाङ्गारे तद होमान्ते पद्मपुष्पाष्टसहस्रं जुहुयात् / श्वेतचन्दनाभ्यक्ताम् / होमान्ते च भद्रपीठं मुद्रां बध्वा आसनं दद्यात् स्वमन्त्रस्य स्वमन्त्रेणैव / अनेन मन्त्रेण तु होमं कुर्यात् - नमः समन्तबुद्धानामप्रतिहतशासनानाम् / तद्यथा - ओम् कुमाररूपिण दर्शय दर्शयमात्मनो भूति समुद्भावय स्वप्नं मे निवेद यथाभूतम् / हूं हूं फट् फट् स्वाहा /

अनेन मन्त्रेण कृतरक्षो होमकर्मणि सर्वान्यस्मिं कर्म कुर्यात् / ततो भयाग्रां कुशां संस्तीर्य कुशविण्डकशिरोपधानपूर्वशिरः पटस्याग्रतो नातिदूरे नात्यासन्ने स्वपेत् प्रथमं यामं जागरिकायोगमनुयुक्तः सर्वबुद्धबोधिसत्त्वानां प्रणम्य पापं च प्रतिदेश्य आत्मानं निर्यातयेत् सर्वबुद्धानाम् / ततो निद्रां वशमागच्छेत् यथा सुखमिति //

प्रथमे यामे तु ये स्वप्ना तां विदुः श्लेष्मसम्भवाम् / द्वितीये पिअत्तमुत्थानाद् गर्हिता लोकसम्भवा // mmk_15.1 //

तृतीये वातिकं विन्द्याच्चतुर्थे सत्यसम्भवाम् / श्लेष्मिके स्वप्नमुख्ये तु ईदृशां पश्य वै सदा // mmk_15.2 //

मणिकूटां मुक्ताहारांश्च समन्ततः प्रभूताम् / अम्भराशिं तृप्लुतं चात्मानं स पश्यति // mmk_15.3 //

समन्तात् सरिता कीर्णं महोदधिसमप्लुतम् / तत्रस्थो मात्मदेहस्थो पश्ये चैव यत्र वै // mmk_15.4 //

तत्र तं देशमाकीर्णं पुष्करिण्यो समन्ततः / प्लवं चोद्पानं च पानागारं च वेश्मनम् // mmk_15.5 //

उदकोघैरुह्यमानं तु पश्यैच्चैव समन्ततः / हिमालयं तथाद्रिं वा स्फटिकस्थं महानदम् // mmk_15.6 //

नगं शैलं च राजं च स्फटीकाभिः समं चितम् / मुक्ताजालसंछन्नं मुक्ताराशिं च पश्यति // mmk_15.7 //

महावर्षं जलौघं च पश्यते ऽसौ कहावहः / श्वेतं सितं छत्रं पाण्डरं वापि भूषणम् // mmk_15.8 //

कुञ्जरं शुक्लरूपं वा कफिने स्वप्नमुच्यते / सितं चामरपुरुषं वा अम्बरं वापि दर्शनम् // mmk_15.9 //

स्पर्शनं सैन्धवादीनां लवणानां च सर्वतः / कर्पासं क्षौमपट्टं वा लोहरूप्यं तथागुरुम् // mmk_15.10 //

स्पर्शने ग्रसने चैव श्लेष्मिके स्वप्नमिष्यते / माषाध्मातकाश्चैव तिलपिष्टा गुडोदना // mmk_15.11 //

विविधा माषभक्षास्तु कफिने स्वप्नमिष्यते / स्वस्तिकापूपिका चान्ये कृसरा पायसा परे // mmk_15.12 //

तेषां भक्षणा स्वप्ने श्लेष्मिकस्य विधीयते / शङ्कुल्या पर्पटा खाद्या विविधा सूपजातयः // mmk_15.13 //

स्पर्शनाद् भक्षणाश्चैव स्वप्ने श्लेष्माघबृंहणम् / अनेकप्रकारपूर्वास्तु खाद्यभोज्यानुसम्मता // mmk_15.14 //

भक्षणास्पर्शनात्तेषां कफिने स्वप्नचेष्टितम् / आशनं सयनं यानं वाहनं सत्त्वसम्भवम् // mmk_15.15 //

स्पर्शनारोहणाचैव प्रथमे यामे तु दर्शनम् / स्वप्ना यदि दृश्येरं कफिने सर्वमुच्यते // mmk_15.16 //

एवंप्रकारा ये स्वप्ना जलसम्भवचेष्टिता / विविधा वा खाद्यभोज्यानां श्लेष्मिकानां च दर्शनम् // mmk_15.17 //

तेषां स्वप्ने दृष्ट्वा वै श्लेष्मिकानां तु चेष्टितम् / अचिन्त्यो ह्यन्येका कथिता स्वप्ना लोकनायकैः // mmk_15.18 //

पैत्तिकस्य तु स्वप्नानि द्वितीययामे हि देहिनाम् / ज्वलन्तमग्निरूपं वा नानारत्नसमुद्भवाम् // mmk_15.19 //

अग्निदाहं महोल्कं वा ज्वलन्तं सर्वतो दिशः / स्वप्ने पश्यते जन्तुः पित्तसम्मूर्च्छितो ह्यसौ // mmk_15.20 //

पद्मराग तथा रत्नं अन्यं वा रत्नसम्भवम् / स्वप्ने दर्शनं विन्द्या पैत्तिकस्य तु देहिनः // mmk_15.21 //

अग्निसंसेवनादाघा स्पर्शनाद् भक्षणादपि / विविधां पीतवर्णानां स्वप्ने पित्तमूर्च्छितैः // mmk_15.22 //

तपन्तं नित्यमादित्यं आतपं कटुकं सदा / स्वप्ने यानि पश्येत पित्तान्तदेहमूर्च्छितः // mmk_15.23 //

हेमवर्णं तदाकाशं पीतवर्णं महीतलम् / स्वप्ने यो ऽभिपश्येत पित्तग्लान्यसम्भवा // mmk_15.24 //

समन्ताज्ज्वलितं बह्निं द्योतमानं नभस्तलम् / पश्यते स्वप्नकाले ऽस्मिं पित्ताक्रान्तो हि देहिनः // mmk_15.25 //

हेमवर्णं तदा भूमिं पर्वतं वा शिलोच्चयम् / महानागं तथा यानं सर्वं हेममयं सदा // mmk_15.26 //

पश्यते नित्यस्वप्नस्थो पित्तचेष्टाभिमूर्च्छितः / सर्वं हेममयं भाण्डं यानं भूषणवाहनम् // mmk_15.27 //

आसनं शयनं चापि जातरूपसमुद्भवम् / स्पर्शनारोहणाच्चैव पैत्तिकं स्वप्नदर्शनम् // mmk_15.28 //

पीतमाल्याम्बरसंवीतः पीतवस्त्रोपशोभितः / पीतनिर्भासगन्धाढ्यो पीतयज्ञोपवीतिनः // mmk_15.29 //

पीताकारं च आत्मानं स्वप्ने यो ऽभिपश्यति / पित्तमूर्च्छासमुत्थानाद् द्वितीये यामे तु दर्शनात् // mmk_15.30 //

एवंप्रकारा विविधा वा येभ्यः स्वप्नानुवर्णिताः / विविधा पीतनिर्भासा स्वप्ना पित्तसमुद्भवा // mmk_15.31 //

मध्यमे यामनिर्दिष्टा पित्तकान्तानु देहिनाम् / अनेकाकाररूपास्तु पीताभाससमुद्भवाः // mmk_15.32 //

कथिता लोकमग्रैस्तु स्वप्नाः पित्तसमुद्भवाः / वातिका ये तु स्वप्ना वै तृतीये यामे नु कथ्यते / प्रभास्वरा समन्ताद्वै दिशः सर्वा नु दृश्यते / आकाशगमनं चापि तिर्यं चापि नभस्तले // mmk_15.33 //

समन्ता ह्यटते नित्यं आकाशे च नभस्तलम् / वातिकं स्वप्नमित्युक्तं ईदृशं तु विधीयते // mmk_15.34 //

प्लवनं लङ्घनं चैव तरूणां चाभिरोहणम् / पठनं सर्वशास्त्राणां मन्त्राणां च विशेषतः // mmk_15.35 //

भाषणं जल्पनं चापि प्रभूतं चापि वातिके / रोहणं कण्टकवृक्षाणां भक्षणं वातितिक्तकम् // mmk_15.36 //

कट्वम्लं सर्वखाद्यानां भक्षणं चापि वातिके / वातसङ्कधमुख्यानां फलानां वातिकोपिताम् // mmk_15.37 //

तेषां तु भक्षणे स्वप्ने निर्दिष्टा वातसम्भवा / भक्षाहारविशेषाणां द्रव्याणां च वातलम् // mmk_15.38 //

क्षिप्तचित्ता तथा जन्तु स्पर्शनाद् भक्षणादपि / भृत्यता सर्वभूतानां दर्शनाच्चापि आत्मनाम् // mmk_15.39 //

स्वप्ने यो हि पश्येत् तादृशं वातिकं विदुः / विविधाकारचेष्टां तु विविधलिङ्गनभाषिता // mmk_15.40 //

विविधाघोरभाषास्तु वातिके स्वप्नदर्शने / एवमादीनि स्वप्नानि कथिता लोकपुङ्गवैः // mmk_15.41 //

त्रिधा प्रयोगाद्यु युक्तानि रागद्वेषमोहिनाम् / रागिणां विन्द्याच्छलेष्मजं पैत्तिकं द्वेषमुद्भवम् // mmk_15.42 //

मोहजं वातिकं चापि व्यतिमिश्रं विमिश्रितः / स्वप्नोपघातं रागाख्यं ग्राम्यधर्मं तु दर्शनम् // mmk_15.43 //

स्त्रीषु सङ्ख्या भवेत् तत्र स्वप्ने श्लेष्मसमुद्भवे / द्वेषिणां कलहशीलाख्यं स्वप्ने पित्तसमुद्भवे // mmk_15.44 //

मोहजं स्तिमिताकारं स्मृतिनष्टोपदर्शने / व्यतिमिश्रेण संयुक्तोस्तु स्वप्ना दृश्यन्ति वै सदा // mmk_15.45 //

तस्मात् सर्वप्रकारेण स्वप्नाख्यं सत्त्ववर्जितम् / क्रियाकालसमश्चैव निर्दिष्टस्तत्त्वदर्शिभिः // mmk_15.46 //

श्लेष्मिकाणां कथिता सत्त्वा वर्णवन्तः प्रियंवदा / दीर्घायुषो ऽथ दुर्मेधा स्निग्धवर्णा विशारदा // mmk_15.47 //

गौराः प्रांशुवृत्ताश्च स्त्रीषु सङ्गे सदा रताः / धर्मिष्ठा नित्यशूराश्च बहुमानाभिरताः सदा // mmk_15.48 //

नक्षत्रे जातिनिर्दिष्टः मत्सरास्यादचिह्निते / महीपाला तथा चान्ये सेनापत्यार्थसंस्थिते / जायते भोगवत्याश्च यथाकर्मोपजीविनः // mmk_15.49 //

स्वकर्मफलनिर्दिष्टं न मन्त्रं कर्मवर्जितम् / न कर्मं मन्त्रमुख्यं तु कथितं लोकनायकैः / तस्मात् श्लेष्मिके सत्त्वे सिद्धिरुक्ता महीतले // mmk_15.50 //

भूम्याधिपत्यं महाभोगे सिद्धिमायातु तस्य तु / आहारां श्लेष्मिकां सर्वां नातिसेवी भवेज्जपी // mmk_15.51 //

अत्यर्थं सेविता ह्येते स्वप्ना शुद्ध्यार्थसम्भवा / ता न सेवे तदा मन्त्री भिद्यर्था तु वर्णितः // mmk_15.52 //

नापि स्वपे तदा काले युक्तिमन्तो विचक्षणः / पैत्तिकस्या तु सत्त्वस्य कथ्यते चरितं सदा // mmk_15.53 //

द्वेषाकारक्रुद्धं तु कृष्णवर्णो ऽथ दुर्बलः / क्रूरः क्रूरकर्मा तु सदा वक्रो विधीयते // mmk_15.54 //

शूरः साहसिको नित्यं बलबुद्धिसमन्वितः / वह्वभाष्ये बहुमित्रा बहुशास्त्रसमाधिगः // mmk_15.55 //

धार्मिकः स्थिरकर्मान्तः द्वेषमुत्थानवर्णितः / मनस्वी बहुशक्रश्च जायते द्वेषलक्षितः // mmk_15.56 //

शूर द्वेषी च बह्वार्थो लोकज्ञो प्रियदर्शनः / निर्मुक्तो निःस्पृहश्चापि धीरो दुःसहः सदा // mmk_15.57 //

मानी मत्सरः क्रुद्धः स्त्रीषु कान्तो सदा भवेत् / महोत्साही दृढमन्त्री च महाभोगो ऽथ जायते // mmk_15.58 //

आक्रम्य चरते सत्त्वां यथाकर्मानुलब्धिनाम् / नित्यं तस्य सिद्ध्यन्ते मन्त्राः प्राणोपरोधिनः // mmk_15.59 //

क्षिप्रं साधयते ह्यर्थां दारुणां मुनिरूर्जिताम् / सत्त्वोपघाताः यः कर्माः सिद्ध्यन्ते तस्य देहिनः // mmk_15.60 //

विविधप्रयोगास्तु ये कर्माः प्रयुक्ता सर्वमन्त्रिणाम् / आदरा ते तु सिद्ध्यन्ते नान्यसत्त्वेषु कर्मसु // mmk_15.61 //

द्वेषिका ये तु मन्त्रा वै परसत्त्वानुपीडिनः / परमन्त्रा तथा च्छिन्दे क्रोधसत्त्वस्य सिद्ध्यति // mmk_15.62 //

परद्रव्यापहारार्थं परप्राणोपरोधिनः / सिद्ध्यन्ते क्रोधमन्त्रास्तु नान्यमन्त्रेषु योजयेत् // mmk_15.63 //

कुरुते चाधिपत्यं वै एष सत्त्वो ऽथ द्वेषजः / कृष्णवर्णो ऽथ श्यामो वा गौरो वाथ विमिश्रितः // mmk_15.64 //

जायते क्रोधनो मर्त्यो हेमवर्णविवर्जितः / रूक्षवर्णो ऽथ धूम्रो वा कपिलो वा जायते नरः // mmk_15.65 //

शूरः क्रूरः तथा लुब्धः वृश्चिकाराशिमुद्भवः / अङ्गारग्रहक्षेत्रस्थः श्लेष्मणाय बृहस्पतेः // mmk_15.66 //

जायते ह्यल्पभोजी स्यात् कट्वंम्लरससेविनः / आयुष्यं तस्य दीर्घं तु स्मृतिमन्त्रो ऽथ जायते // mmk_15.67 //

वातिकस्य तु वक्ष्ये ऽहं चरितं सत्त्वचेष्टितम् / विवर्णो रूक्षवर्णस्तु प्रमाणो नातिदुर्वलः // mmk_15.68 //

नष्टबुद्धिः सदा प्राज्ञो हृत्स्थिरो ह्यनवस्थितः / गात्रकम्पं भ्रमिश्चापि छर्दि प्रश्रवनं बहुः // mmk_15.69 //

बह्वासी नित्यभोजी च बह्वावाचो भवे हि सः / विरुद्धः सर्वलोकानां बह्वमित्रो ऽथ जायते // mmk_15.70 //

दुःशीलो दुःखितश्चापि जायतो ऽसौ महीतले / अन्तर्द्धानिकमन्त्रा वै तस्य सिद्धिमुदाहृतम् // mmk_15.71 //

वातप्रकोपना ये भक्षास्ते तस्यानुवर्तिनः / तं न सेवेत् सदा जापी कर्मसिद्धिमकांक्षयम् // mmk_15.72 //

मोहामुद्भवमेषां तु सत्त्वानां वातकोपिनाम् / मोहजा कथिता ह्येते मूढमन्त्रप्रसाधिता // mmk_15.73 //

नित्यं तेषु मूढानां मोहानां सिद्धिरिष्यते / नक्षत्रे जलजाराशौ ग्रहसत्यार्थमीक्षिते // mmk_15.74 //

नाचरेच्छुभकर्माणि वातिके सत्त्वमुर्च्छिते / वश्याकर्षणभूतानां मोहनं जम्भनं तथा // mmk_15.75 //

वातिकेष्वपि सत्त्वेषु मोहजैः पापमुद्भवैः / कथिता लक्षणा ह्येते स्वप्नानां सत्यदर्शना // mmk_15.76 //

मुनिभिर्वर्णिता ह्येते पुरा सर्वार्थसाधका / मेषो वृषो मिथुनश्च कर्कटः सिंह एव तु // mmk_15.77 //

तुला कन्या तथा वृश्चीश्च धनुर्मकर एव तु / कुम्भमीना गजः दिव्यं वानरमसुर एव तु // mmk_15.78 //

सिद्धगन्धर्वयक्षाद्या मनुजानां ये प्रकीर्तिता / राशयो बहुसत्त्वानां कथिता ह्यग्रपुङ्गवैः // mmk_15.79 //

बहुप्रकारा विचित्रार्था विविधा कर्मवर्णिता / तेषु सर्वेषु कर्मे च फलन्ति गुणविस्तराः // mmk_15.80 //

न कर्मगुणनिर्मुक्तं पठ्यते खलु देहिनाम् / गुणे च कर्मसंयुक्तः करोति पुनरुद्भवम् // mmk_15.81 //

गुणं धमार्थसंयुक्तं सिद्धिमन्त्रेषु जायते / जापी गुणतत्त्वज्ञः कर्मबन्धगुणागुणम् // mmk_15.82 //

न हितां कुरुते कर्म यद् गुणेष्वपि सत्क्रियाम् / क्रिया हि कुरुते कर्म न क्रिया गुणवर्जिता // mmk_15.83 //

क्रियाकर्मगुणां चैव संयुक्तः साधयिष्यति / विधिपूर्वं क्रिया कर्म उक्तं दशबलैः पुरा // mmk_15.84 //

क्रिया कर्मगुणा ह्येते द्रष्टा सत्त्वोपचेष्टिता / विविधा स्वप्नरूपास्तु दृश्यन्ते कर्ममुद्भवाः // mmk_15.85 //

तस्मात् स्वप्ननिमित्तेन प्रयोज्याः कर्मविस्तराः / विधाकारचित्राश्च मनोज्ञाः प्रियदर्शनाः // mmk_15.86 //

विघ्नरूपाः अरूपाश्च दृश्यन्ते स्वप्नहेतवः / महोत्साहा महावीर्या सिद्धिमाकांक्षिणो नराः // mmk_15.87 //

उत्तमाधममध्येषु सिद्धिस्तेषु प्रकल्प्यते / रौद्राः क्रूरकर्मास्तु स्वप्ना सद्यफला सदा // mmk_15.88 //

उत्तमा ध्रुवकर्मासु चिरकालेषु सिद्धये / लौकिका लोकमुख्यानां गुणोत्पादनसम्भवाः // mmk_15.89 //

दृश्यन्ते विविधाः स्वप्ना जापिनां मन्त्रसिद्धये / असिद्ध्यर्थं तु मन्त्राणां निद्रा तन्द्री प्रकल्प्यते // mmk_15.90 //

विघ्नघातनमन्त्रं तु तस्मिं काले प्रकल्प्यते / युक्तिरूपा तदा मन्त्रा जापिनां तं प्रयोजयेत् // mmk_15.91 //

षड्भुजो ऽथ महाक्रोधः षण्मुखश्चैव प्रकल्पिते / चतुरक्षरो महामन्त्रः कुमारे मूर्त्तिनिसृतः // mmk_15.92 //

घोररूपो महाघोरो वराहाकारसम्भवः / सर्वविघ्नविनाशार्थं कालरात्रं तदेव राट् // mmk_15.93 //

व्याघ्रचर्मनिवस्तस्तु सर्पाभोगविलम्बितः / असिहस्तो महासत्त्वः कृतान्तरूपी महौजसः // mmk_15.94 //

निर्घृणः सर्वविघ्नेषु विनायकानां प्राणहन्तकृत् / शृण्वन्तु सर्वभूता वै मन्त्रं तन्त्रे सुदारुणम् // mmk_15.95 //

नाशको दृष्टसत्त्वानां सर्वविघ्नोपहारिकः / साधकः सर्वमन्त्राणां देवसङ्घा शृणोथ मे // mmk_15.96 //

नमः समन्तबुद्धानामप्रतिहतशासनानाम् / तद्यथा - हे हे महाक्रोध षण्मुख षट्चरण सर्वविघ्नघातक हूं हूं / किं चिरायसि विनायक जीवितान्तकर दुःस्वप्नं मे नाशय / लङ्घ लङ्घ / समयमनुस्मर फट् फट् स्वाहा //

समनन्तरभाषितो ऽयं महाक्रोधराजा सर्वविघ्नविनायकाः आर्ताः भीताः भिन्नहृदयाः त्रस्तमनसो भगवन्तं शाक्यमुनिं, मञ्जुश्रियं कुमारभूतं नमस्कारं कुर्वते स्म / समये च तस्थुः //

अथ भगवान् शाक्यमुनिः सर्वं तं शुद्धावासभवनमवलोक्य, त च महापर्षन्मण्डलं, एवमाह - भो भो देवसङ्घाः अयं क्रोधराजा सर्वलौकिकलोकोत्तराणां मन्त्राणां साध्यमानानां यो हि दुष्टसत्त्वः जापिनं विहेठयेत्, तस्यायं क्रोधराजा सकुलं दमयिष्यति / शोषयिष्यति / न च प्राणोपरोधं करिष्यति / परिताप्य परिशोष्य व्यवस्थायां स्थापयिष्यति / जापिनस्य रक्षाधरणगुप्तये स्थास्यति / अनुबृंहयिष्यति / यो ह्येवं समयमतिक्रमेत् क्रोधराजेन कृतरक्षं साधकं विहेठयेत् //

सप्तधास्य स्फुटेन्मूर्धा अर्जकस्येव मञ्जरी / इत्येवमुक्त्वा मुनिश्रेष्ठो मञ्जुघोषं तदाब्रवीत् // mmk_15.97 //

कुमार त्वदीयमन्त्राणां सकलार्थार्थविस्तराम् / मन्त्रतन्त्रार्थमुक्तानां साधकानां विशेषतः // mmk_15.98 //

क्रोधराट् कथितं तन्त्रे सर्वविघ्नप्रनाशनम् / लोकनाथै पुरा ह्येतत् तथैव सन्नियोजितम् // mmk_15.99 //

दुष्टविघ्नविनाशाय अरीणां क्रोधनाशनम् / जापिनां सततं ह्येतन्निशासु पठयेत्सदा // mmk_15.100 //

एष रक्षार्थसत्त्वानां दुःस्वप्नानां च नाशनम् / कथितं लोकमुख्यैस्तु सर्वमन्त्रार्थसाधने // mmk_15.101 //

अतः परं प्रवक्ष्यामि पुरुषाणां लक्षणं शुभम् / येषु मन्त्राणि सिद्ध्यन्ते उत्तमाधममध्यमा // mmk_15.102 //

तेजस्वी च मनस्वी च कनकाभो महोदरः / विशालाक्षो ऽथ सुस्निग्धो मन्दरागी क्रोधवर्जितः // mmk_15.103 //

रक्तान्तनयन प्रियाभाषी उत्तमं तस्य सिद्ध्यति / तनुत्वचो ऽथ श्यामाभो तन्वङ्गो नातिदीर्घकः // mmk_15.104 //

महोत्साही महोजस्कः सन्तुष्टो सर्वतः शुभः / उत्कृष्टो योनितः शुद्धः अल्पेच्छेथ दुर्बलः // mmk_15.105 //

तस्य सिद्धिर्ध्रुवा श्रेष्ठा दृश्यते सर्वकर्मसु / अहीनाङ्गो ऽथ सर्वत्र पूर्वश्यामो महौजसः // mmk_15.106 //

अक्लिष्टचित्तो मनस्वी च ब्रह्मचारी सदा शुचि / + वासाभिरतो नित्यं लोकज्ञो धर्मशीली च // mmk_15.107 //

बहुमित्रो सदा त्यागी मात्रा च चरतो सदा / शुचिनः दक्षशीलश्च शौचाचाररतः सदा // mmk_15.108 //

सत्यवादी घृणी चैव उत्तमा तस्य सिध्यति / अव्यङ्गगुणविस्तारः कुलीनो धार्मिकः सदा // mmk_15.109 //

मातृपितृभक्तश्च ब्राह्मणातिथिपूजकः / अतिकारुणिको धीरस्तस्यापि सिद्धिरुत्तमा // mmk_15.110 //

श्यामावदातः स्निग्धश्च अल्पभाषी सदा शुचिः / मृष्टान्नभोजनाकांक्षी शुचिदाराभिगामिनः // mmk_15.111 //

लोकज्ञो बहुमतः सत्त्वस्तस्यापि सिद्धिरुत्तमा / नातिहस्वो न चोत्कृष्टः भिन्नाञ्जनमूर्धजः // mmk_15.112 //

स्निग्धलोचनवर्णश्च शुचिः स्नानाभिरतः सदा / रत्नत्रये च प्रसन्नो ऽभूत् तस्यापि सिद्धिरुत्तमा // mmk_15.113 //

उत्कृष्टकर्मप्रयुक्ता च सत्त्वानामाशयतद्विदः / सहिष्णुः प्रियवाक्यश्च प्रसन्नो जिनसूनुना / लोकोत्तरी तदा सिद्धिः सफला तस्य शिष्यते // mmk_15.114 //

महासत्त्वो महावीर्यः महौजस्को महाव्रती / महाभोगी च मन्त्रज्ञः सर्वतन्त्रेषु तत्त्ववित् // mmk_15.115 //

वर्णतः क्षत्रियो ह्यग्रो ब्राह्मणो वा मनस्विनः / स्त्रीषु सेवी सदा रागी कनकाभो ऽथ वर्णतः // mmk_15.116 //

दृश्यते प्रांशुगौरश्च तुङ्गनासो महाभुज / प्रलम्बबाहु शूरश्च महाराज्याभिकांक्षिणः // mmk_15.117 //

प्रसन्नो जिनपुत्राणां स्त्र्याख्यादेविपूजकः / रत्नत्रये च भक्तश्च बोधिचित्तविभूषितः / अतिकारुणिको धीरः क्वचिद् रोषो महोजः क्वचित् // mmk_15.118 //

महाभोगी महात्यागी महोजस्को दुरासदः / स्त्रीषु वल्लभशूरश्च तस्यापिं सिद्धिरुतमा // mmk_15.119 //

अतिमानरतः शूरः स्त्रीषु सङ्गी सदा पुनः / कनकाभः स्वल्पभोजश्च विस्तीर्णः कठिनः शुचिः // mmk_15.120 //

घृणी कारुणिकः दक्षो लोकज्ञः बहुमतो गुणैः / मन्त्रजापी सदा भक्तः जिनेन्द्राणां प्रभङ्करम् // mmk_15.121 //

तेषु श्रावकपुत्राणां खड्गिनां च सदा पुनः / प्रभविष्णुलोकमुख्यश्च वर्णतः द्वितीये शुभे // mmk_15.122 //

अव्यङ्गः सर्वतः अङ्गैः क्रूरः साहसिकः सदा / त्यागशीली जितामित्रो धर्माधर्मविचारकः // mmk_15.123 //

नातिस्थूलो नातिकृशो नातिदीर्घो न ह्रस्वकः / मध्यमो मनुजः श्रेष्ठः सिद्धिस्तस्यापि उत्तमा // mmk_15.124 //

आताम्रनखसुस्निग्धः रक्तपाणितलः शुचिः / चरणान्तं रक्ततः स्निग्धश्चक्रस्वस्तिकभूषितः // mmk_15.125 //

ध्वजतोरणमत्स्याश्च पताका पद्ममुत्पलाः / दृश्यन्ते पाणिचरणयोः मनुजो लक्षलक्षणै // mmk_15.126 //

तादृशः पुरुषः श्रेष्ठः अग्रसिद्धिस्तु कल्प्यते / शुक्लदंष्ट्रो असुषिरस्तुङ्गः सिखरिणः समाः // mmk_15.127 //

तुङ्गनासो विशालाख्यः संहतभ्रूचिबुके शुभाः / गोपक्ष्मलोकचिह्नस्तु कृष्णदृक् तारकाञ्चितः // mmk_15.128 //

ललाटं यस्य विस्तीर्णं छत्राकारशिरः शुभः / उष्णीषाकारशिरश्चैव कर्णौ शोभनतः शुभौ // mmk_15.129 //

सिंहाकारहनुः सदा अघरौ पक्वबिम्भसमप्रभौ / पद्मपत्ररक्ताभा जिह्वा यस्य दृश्यते तालुकाचाभिरक्तिका // mmk_15.130 //

ग्रीवा कम्बुसदृशा पीनस्कन्धा समुद्भवा / कक्षवक्षः शुभः श्रेष्ठः विस्तीर्णोरस्तथैव च // mmk_15.131 //

स्वल्पतो नाभिदेशश्च विस्तीर्णकठिनः शुभः / गम्भीरप्रदक्षिणा नाभी सिराजाले अकुर्वता // mmk_15.132 //

प्रलम्बबाहुर्महाभुजः कटिसिंहोरचिह्नितः / ऊरू चास्य वर्तुलकौ कौर्परौ खर्तवर्जितौ // mmk_15.133 //

एणेयजङ्घः सुसम्पन्नवर्तुलाश्च प्रकीर्तिताः / चरणौ मांसलौपेतौ अङ्गुलीभिः समुन्नतौ // mmk_15.134 //

रक्तौ रक्तनखौ स्निग्धौ उन्नतौ मांसशोभितौ / अथ शिरो महीतलावर्णौ शोभनौ प्रियदर्शनौ / अश्लिष्टौ वर्णतः शुद्धौ प्रशस्तौ लोकचिह्नितौ // mmk_15.135 // उपरिष्टात्तु तेषां वै शिराजाल अनुन्नतौ // mmk_15.136 // पुरीषप्रस्रवणौ मार्गौ गम्भीरावर्तदक्षिणौ / प्रशस्तौ स्वल्पतरौ नित्यं वृषणौ वर्तुलौ शुभौ // mmk_15.137 //

अवधौ अखण्डौ च अनेकश्चैव कीर्त्यते / अङ्गजाते यदा शुद्ध्या रागान्ते च समाश्रितः // mmk_15.138 //

स्वप्नकाले चाहारे वृष्याणां खाद्यभोजनैः / प्रश्रुतो वर्णतो नीलो रक्तो वा यदि दृश्यते // mmk_15.139 //

प्रभूतस्रावी स्निग्धश्च शुभलक्षणलक्षितैः / तथाविधेये सत्त्वाख्ये उत्तमा सिद्धिरिष्यते // mmk_15.140 //

तृपुरीपी पुण्मूत्री च शौचाचाररतः शुचिः / शयते यो हि यामान्ते प्रातरुत्थाति जन्तवः // mmk_15.141 //

तस्य शुद्धि सदा श्रेष्ठा दृश्यते सर्वकर्मिका / फलां विविधाकारां सम्पदा बहु वा पुनः // mmk_15.142 //

अनुभोक्ता भवेन्मध्यैर्लक्षणैरभिलक्षितः / नक्षत्रैश्च तथा जातः पुष्यै रेवतिफल्गुनैः // mmk_15.143 //

मघासु अनुराधायां चित्रारोहिणिकृत्तिकैः / जनकः तेपु दृश्यस्थः समर्थो ग्रहचिह्नितः // mmk_15.144 //

प्रभातकाले यो जातः सिद्धिस्तेषु प्रदृश्यते / मध्याह्ने प्रातरश्चापि अत्रान्ते च शुचिग्रहाः // mmk_15.145 //

शुक्ला सोमशुक्लाश्च पीतको बुधः बृहस्पति / सामर्थ्यकार्यसिद्ध्यर्थं निरीक्ष्यन्ते सर्वजन्तूनाम् // mmk_15.146 //

अत्रान्तरे च ये जाता मनुजः शुभकर्मिणः / तेषां सिद्ध्यन्त्ययत्नेन मन्त्राः सर्वार्थसाधने // mmk_15.147 //

मध्याह्नापरतेनैव रवावास्तमने सदा / अत्रान्तरे सदा क्रूराः ग्रहाः पश्यन्ति देहिनाम् // mmk_15.148 //

आदित्याङ्गारकः क्रूराः केतुराहुशनिश्चरः / ये च ग्रहमुख्यास्तु कम्पनिर्घातौल्किनः // mmk_15.149 //

तारा घोरतमश्चैव कृष्णारिष्टसमस्तथा / कालमारकुरुः रौद्रो दृश्यते तस्मि कालतः // mmk_15.150 //

आदित्योदयकाले च बुधः पश्यति मेदिनीम् / युगमात्रे रथत्युच्चे पश्यते ऽसौ बृहस्पतिः // mmk_15.151 //

शुक्रः परेण धनाध्यक्षो पश्यते ऽसौ युगे रवौ / मध्याह्नादापूर्यते चन्द्रः दर्शनं चन्द्रदेहिनाम् // mmk_15.152 //

बुधकाले भवेद् राज्यं बृहस्पतो अर्थभोगकृत् / शुक्रे धननिष्पत्तिः महाराज्यं भोगसम्पदम् // mmk_15.153 //

दीर्घायुष्मं तथा चन्द्रे ऐश्वर्यं चापि साफलम् / मध्यंदिने तथा भानो मध्यदृष्टिसमोदिता // mmk_15.154 //

मध्याह्ने विगते नित्यं आदित्यो दिशमीक्षते / युगमात्रे ह्नासिता नोच्चे केतुरेवमुदाहृताः // mmk_15.155 //

राहुः शनैश्चरश्चैव तमकालयुगान्तकः / ततः परेणा ह्रस्यायां निष्टरिष्टोल्ककम्पकः // mmk_15.156 //

आताम्रे ऽस्तं गते भानौ सिन्दूरपुञ्जवर्णिते / यो ऽसौ ग्रहमुख्यस्तु बालदारकवर्णिनः रूपिणः // mmk_15.157 //

शक्तिहस्तो महाक्रूरः अङ्गारस्येव दर्शने / ततो युगान्तार्पिते भानो शुभानां ग्रहयोनयः // mmk_15.158 //

आदित्यदर्शनाज्जातः क्रूरः साहसिको भवेत् / सत्यकाङ्गारके जातः क्रुद्धलुब्धो ऽभिमानिनः // mmk_15.159 //

केतुरिष्टातिधूम्राणां जनयन्ते व्याधिसम्भवा / दरिद्रा व्याधिनो लुब्धा मूर्ध्वाश्चैव जना सदा // mmk_15.160 //

कालस्तमकम्पानां उल्किकां ग्रहकुत्सिताम् / कम्पनिर्घातताराणामशनिश्चैव प्रतापिन // mmk_15.161 //

वज्रोरिष्टतथाचान्यां ऋक्षादीनां प्रकल्पते / राहुदर्शनघोरस्तु दृश्यते सर्वजन्तुनाम् // mmk_15.162 //

दरिद्रानाथदुःशीला पापचौरनरा सदा / जायन्ते दुःखिता मर्त्या जना व्याधिमाणया / कुष्ठिनो बहुरोगाश्च काणखञ्जसदजुला // mmk_15.163 //

षण्डपण्डे ऽनपत्याश्च दुर्भगाः स्त्रीषु कुत्सिता / नरा नार्यस्तथा चान्ये दर्शनाग्रहकुत्सिताम् // mmk_15.164 //

जायन्ते बहुधा लोकां जातकेष्वेव जातका / शुक्लपीतग्रहाः श्रेष्ठा तेषु जातिशुभोदयाः // mmk_15.165 //

वर्णतः शुक्लपीताभाः प्रशस्ता जिनवर्णिताः / चत्वारो ग्रहमुख्यास्तु शुक्रचन्द्रगुरुर्बुधः // mmk_15.166 //

तेषां दएर्शनसिद्ध्यर्थं जापिना सर्वकर्मसु / बालिशानां च सत्त्वानां जातिरेव सदा शुभा // mmk_15.167 //

सर्वसम्पत्सदा मिष्टाः कथिता लोकपुङ्गवैः / क्षणमात्रं तथोन्मेषनिमेषं चापि अच्छटम् // mmk_15.168 //

एषां संक्षेपते जाति कथिता लोकपुङ्गवैः / एतन्मात्रं प्रमाणं तु ग्रहाणां लोकचिन्तिनाम् // mmk_15.169 //

उदयन्ते तथा नित्यं एतत्कालं तु तत्त्वतः / श्रेयसा पापका ह्येते भ्रमन्ते चक्रवत् सदा // mmk_15.170 //

शुभाशुभकरा ते ऽत्र मन्त्रं एकवत् सदा / ते देवलोकसमासृता नु + + + + + + + + + + // mmk_15.171 //

एतेषां क्वचित् किञ्चित् पापबुद्धिस्तु जायते / शुभाशुभफलासत्त्वाज्जायन्ते बहुधा पुनः // mmk_15.172 //

स एषां दर्शनमित्याहुर्ग्रहाणां कर्मभोजिनाम् / सत्त्वानां सत्त्वरमायान्ति शीघ्रगामित्वसत्वराः // mmk_15.173 //

दृश्यादृश्यं क्षणान्मेषमच्छटां त्वरिता गतिः / ततः कालं प्रकल्प्येते + + + + + + + + + + + / एतत्कालप्रमाणं तु दर्शितमग्रबुद्धिभिः // mmk_15.174 //

अतः परं प्रवक्ष्यामि नियते जातके सदा / मुहूर्त्ता द्वादशाश्चैव कालं कालं यानुहेतवः / अपात्रं चैव वक्ष्यन्ते सिद्धिहेतुर्न वा पुनः // mmk_15.175 //

शकुनं चैव लोकानां दृष्ट्यादृष्ट्य पुनः पुनः / राष्ट्रभङ्गं च दुर्भिक्षं + + + नृपतेः शुभम् // mmk_15.176 //

कालाकालं तदा मार्यः शिवं चक्रे सदा जन / केतुकम्पो ऽथ निर्घातमुल्कं चैव सधूभिनम् // mmk_15.177 //

नक्षत्रवारताराणां चरितं च शुभाशुभम् / चरितं सर्वभूतानां शिवशिवविचेष्टितम् // mmk_15.178 //

क्रव्यादां मातरांश्चैव रौद्रसत्त्वोपघातिनाम् / दुष्टसत्त्वां तथा वक्ष्ये चरितं पिशिताशिनाम् // mmk_15.179 //

प्रसन्नाना देवता यत्र रत्नधर्माग्रबुद्धिनाम् / शुभकर्मसदायुक्तां मैत्रचित्तदयालवाम् // mmk_15.180 //

साधुचेष्टार्थबुद्धीनां परपूर्त्तिसमाश्रिताम् / आकृष्टा मन्त्रमुक्तीभिः ओपध्याहारहेतुनाम् // mmk_15.181 //

विस्तरं चरितं वक्ष्ये लक्षणं यत्र आश्रिताः / परदेह समाश्रित्य तिष्ठन्ते मानुषा सृता // mmk_15.182 //

देवा पुनस्तमित्याहुरसुरा मानहेतुना / द्विविधा ते ऽपि तत्रस्था पार्षद्या सुरासुरा // mmk_15.183 //

ते ऽपि तत्र द्विधा यान्ति क्रूर साधारणा पुनः / ते ऽपि तत्र द्विधा यान्ति शुभाशुभगतिपञ्चकम् // mmk_15.184 //

तत्रस्था त्रिविधा यान्ति विंशत्रिंशदसङ्ख्यकम् / अकनिष्ठा यावदेवेन्द्रा यामासङ्ख्यमभूपकाः // mmk_15.185 //

अपर्यन्तं याव धातूनां लोकानां च शुभाशुभम् / या वां संसारिका सत्त्वा यावां चार्यश्रावकाः // mmk_15.186 //

बुद्धप्रत्येकबुद्धानां तदौरसां च सूनुनाम् / बोधिसत्त्वां महासत्त्वां दशभूमिप्रतिष्ठिताम् // mmk_15.187 //

सर्वसत्त्वा तथा नित्यं सत्त्वयोनिसमाश्रिताम् / सर्वबालिसजन्तूनां गतियोनिसमाश्रिताम् / विनिर्मुक्तानां संसाराहे बुद्धानां सर्वार्याम् // mmk_15.188 //

सर्वतो नित्यं लक्षणं चरितं सदा / वाचामिङ्गिततत्वं तु तेषां वक्ष्ये सविस्तरम् // mmk_15.189 //

आकृष्टा सर्वभूतास्तु मन्त्रतन्त्रसयुक्तिभिः / आविष्टाकृष्टमन्त्रज्ञो परदेहसमाश्रिताम् // mmk_15.190 //

कुशलैः कुशलकर्मज्ञैरप्रमत्तैः सजापिभिः / अमूढचरितैः सर्वैर्निग्रहानुग्रहक्षमैः / आकृष्टा भूतला ले के मानुष्ये मन्त्रजापिभिः // mmk_15.191 //

तेषां सिद्धिनिमित्तं तु सर्वं वक्ष्ये तु तत्त्वतः / तेषां देहानुरोधार्थं मानुषाणां सदारुजाम् // mmk_15.192 //

नित्यमत्यन्तधर्मार्थं मोक्षार्थं तु प्रकल्प्यते / निग्रहं तेषु दुष्टानां विशुद्धानां तु पूजना // mmk_15.193 //

निग्रहानुग्रहं चैवं मन्त्रतन्त्रं प्रकल्प्यते / वातः श्लेष्मपित्तानां त्रिविधात्र त्रिधा क्रिया // mmk_15.194 //

तेषां तु प्रकल्पयेच्छान्ति त्रिविधैव क्रमो मतः / तत्र मन्त्रैः सदा कुर्यान्मानुषाणां चिकित्सितम् // mmk_15.195 //

महाभूतविकल्पस्तु भूतो भूताधिकः स्मृतः / अभिभूतं तथाभूतैरधिभूतः स उच्यते // mmk_15.196 //

अधिभूतो यदा जन्तुरस्वास्थ्यं जनयेत् तदा / भूतं भूतप्रकारं तु द्विविधं तु प्रकल्प्यते // mmk_15.197 //

सत्त्वभूतस्तथा नित्यमसत्त्वश्चैव प्रकल्प्यते / पित्तश्लेष्म तथा चायुर्ये चान्ये + + + + + + + // mmk_15.198 //

चत्वारश्च महाभूताः पञ्चममाकाशमिष्यते / आपस्तेजो समायुक्तं पृथिवी वायुसमायुता // mmk_15.199 //

असत्त्वसङ्ख्यमित्याहुर्बुद्धिमन्तः सदा पुनः / लोकाग्राधिपति ह्यग्रः इत्युवाच महाद्युतिः // mmk_15.200 //

असत्त्वसङ्ख्यं ह्यमानुष्यं + + + + + + + + / मानुषं सत्त्वमित्याहुरग्रधीर्वदतां वरः // mmk_15.201 //

अमानुषं मानुषं वापि सत्त्वसङ्ख्यं सदैवतम् / सत्त्वानां श्रेयसार्थं तु सार्वज्ञं वचनं पुनः // mmk_15.202 //

अतीतानागतैर्बुद्धैः प्रत्युत्पन्नैस्तथैव च / भाषितं कर्ममेवं तु शुभाशुभफलोदयम् // mmk_15.203 //

केवलं वचनं बुद्धानामवश्यं कर्म करोति / तन्निमित्तं गोत्रसामान्यात् सिद्धिरेव प्रदृश्यते // mmk_15.204 //

सर्वज्ञं ज्ञानमित्याहुः क्षेमं शान्तं सदा शुचिम् / निष्ठं शुद्धनैरात्म्यं परमार्थं मोक्षमिष्यते // mmk_15.205 //

तदेव वर्त्म सत्त्वेषु इदं सूत्रमुदाहृतम् / तत्र मन्त्रसदोषध्या अशेषं वचनं जगे // mmk_15.206 //

भूतं भविष्यमत्यन्तं सर्वशास्त्रसुपूजितम् / लोकाग्र्यं धर्मनैरात्म्यं सदाशान्तशिवं पदम् // mmk_15.207 //

एतत् सार्वज्ञवचनं निष्ठं तस्य परं पदम् / केवलं तु प्रकल्प्येते सर्वज्ञज्ञानमुद्भवम् // mmk_15.208 //

प्रभावं सर्वबुद्धानां बोधिसत्त्वानां च धीमताम् / मन्त्राणां सर्वकर्मेषु सिद्धिः सर्वत्र दर्शिता / अत एव मुनीन्द्रेण कल्पराजः प्रभाषितः // mmk_15.209 //

अनेन वर्त्मना गच्छन्मन्त्ररूपेण देहिनाम् / निर्वाणपुरमाप्नोति शान्तनिर्जरसम्पदम् / अशोकं विरजं क्षेमं बोधिनिष्ठं सदाशिवम् // mmk_15.210 //

य एष सर्वबुद्धानां शासनं मन्त्रजापिनाम् / कथिते भूतले तन्त्रमशेषं मन्त्रजापिनाम् // mmk_15.211 //

सर्वं ज्ञानज्ञेयं च कर्महेतुनिबन्धनम् / सर्वमेतं तु मन्त्रार्थं त्रिविधा बोधिनिम्नगा // mmk_15.212 //

अशेषज्ञानं तु बुद्धानामिह कल्पे प्रदर्शितम् / सत्त्वानां च हितार्थाय सर्वलोकेषु प्रवर्तितम् // mmk_15.213 //

ये हास्ति कल्पराजे ऽस्मिन्नान्यकल्पेषु दृश्यते / यो ऽन्यकल्पेषु कथितं मुनिपुत्रैस्तु मुनिवरैः // mmk_15.214 //

ते हास्ति सर्वमन्त्राणां कल्पं विस्तरमेव तु / अत एव जिनेन्द्रेण कथितं सर्वदेहिनाम् // mmk_15.215 //

महीतले च त्रिलोके ऽस्मिं न सौ वि + + + + / यो ऽस्मिन् कल्पराजेन्द्रे नानीतो न वशीकृतः // mmk_15.216 //

अस्तंगते मुनिचन्द्रे शून्ये भूतलमण्डले / इह कल्पे स्थिते लोके शासनार्थं करिष्यति // mmk_15.217 //

कुमारः सर्वभूतानां मञ्जुघोषः सदा शुभः / बुद्धकृत्यं तथा लोके शासने ऽस्मिन् करिष्यति // mmk_15.218 //

प्रभावं कल्पराजस्य चिरकालाभिलाषिणाम् / श्रुत्वा सकृदधिमुच्यन्ते तेषु सिद्धिः सदा भवेत् // mmk_15.219 //

अवन्ध्यं सर्वभूतानां वचनेदं सदा शुभम् / मन्त्रिणां सर्वभूतेषु जापहोम सदा रताम् // mmk_15.220 //

त्र्यद्विकेषु ज्ञानेषु ज्ञानं यत्र प्रवर्तते / स एव प्रवर्तते अस्मिं कल्पराजे वरोत्तमे // mmk_15.221 //

मन्त्रप्रतिष्ठा बुद्धानां शासनं स इहोदितम् / निर्विकल्पस्तु तं मन्त्रं विकल्पे ऽस्मिं तदिहोच्यते // mmk_15.222 //

करोति सर्वसत्त्वानामर्थानर्थं शुभाशुभम् / गतिबुद्धिस्तथा सत्त्वं लोकानां च शिवाशिवम् // mmk_15.223 //

स एष प्रपञ्च्यते कल्पे निःप्रपञ्चास्तथागता / लोकातीता स्वसम्बुद्धा लोकहेतोरिहोच्यते // mmk_15.224 //

अधिकं सर्वधर्माणां लोकधर्मा ह्यतिक्रमा / करोति विविधां कर्मी विचित्रां लोकपूजिताम् // mmk_15.225 //

मन्त्रराट् कर्मसूद्युक्तः सत्त्वराशेस्तथा हितः / कुमारो मञ्जुघोषस्तु बुद्धकृत्यं करोति सः // mmk_15.226 //

तस्यार्थं गुणनिष्पत्तिलोकाधानं शुभाशुभम् / अध्येष्टाहं प्रवक्ता वै नाध्येष्टा धर्ममुच्यते // mmk_15.227 //

केवलं सर्वसत्त्वानां हितार्थं बुद्धभाषितम् / अतीतैः सर्वबुद्धैस्तु भाषितं तुं प्रवक्ष्यते // mmk_15.228 //

बुद्धवंशमविच्छिन्नं भविष्यत्यधिमुच्यते / ते सर्वज्ञज्ञानमुद्भवमन्त्रिणां सर्वकर्मसु // mmk_15.229 //

सर्वज्ञज्ञानप्रवृत्तं तु कर्ममेकं प्रशस्यते / पूर्वकर्म स्वकं लोके तदधुना परिभुज्यते // mmk_15.230 //

तस्मात् कर्म प्रकुर्वीत इह जन्मसु दुष्करम् / मन्त्राः सिद्ध्यन्त्ययत्नेन कर्मबन्ध इहापि तम् // mmk_15.231 //

जन्मे सिद्धिः स्यादिह कर्मे ऽपि दृश्यते / तस्मात् सर्वबुद्धैस्तु कर्ममेकं प्रशंसितम् // mmk_15.232 //

विधियुक्तं तु तत् कर्म क्षिप्रं सिद्धि इहापि तत् / भ्रमन्ति सत्त्वा विधिहीना बालिशास्तु प्रमोहित्ताः // mmk_15.233 //

तस्मात् सर्वप्रकारेण कर्म एकं प्रशंसितम् / विधिं कर्मसमायुक्तं संयुक्तः साधयिष्यति / विधिहीनं तथा कर्म सुचिरेणापि न सिद्ध्यति // mmk_15.234 //

न हि ध्यानैर्विना मोक्षं न मोक्षं ध्यानवर्जितम् / तस्माद्ध्यानं च मोक्षं च संयुक्ते बोधिमुच्यते // mmk_15.235 //

इति //

आर्यमञ्जुश्रियमूलकल्पाद् बोधिसत्त्वपिटकावतंसकान्महायानवैपुल्यसूत्रात् त्रयोदशमः सर्वकर्मक्रियार्थः पटलविसरः परिसमाप्त इति / अथ षोडशः पटलविसरः / अथ खलु भगवान् शाक्यमुनिः पुनरपि शुद्धावासभवनमलोक्य, मञ्जुश्रियं कुमारभूतमामन्त्रयते स्म / शृणु मञ्जुश्रीः त्वदीये सर्वार्थक्रियाकर्मपटलविसरं पूर्वनिर्दिष्टं पर्षन्मण्डलमध्ये सविस्तरं वक्ष्ये ऽहम् /

पृष्टो ऽयं यक्षराजेन वज्रहस्तेन धीमता / सर्वमन्त्रार्थयुक्तानां स्वप्नानां च शुभाशुभम् // mmk_16.1 //

अत प्रसङ्गेन सर्वेदं कथितं मन्त्रजापिनाम् / यक्षराट् स्तुष्टमनसो मूर्ध्नि कृत्वा तु अञ्जलिम् // mmk_16.2 //

प्रणम्य शिरसा शास्तुरभ्युवाच गिरां मुदा / अनुग्रहार्थं तु लोकानां कथितं ह्यग्रबुद्धिना // mmk_16.3 //

ममैवमनुकम्पार्थं सत्त्वानां च सुखोदया / जापिनां सर्वमन्त्राणां स्वप्नानां च शुभाशुभम् // mmk_16.4 //

चरितं गुणविस्तारं सत्त्वाधिष्टनिकृष्टिनाम् / उत्तमा गति योनिभ्यो हेतुज्ञानविचेष्टितम् // mmk_16.5 //

अतीतानागतं ज्ञानं वर्तमानं शुभाशुभम् / सर्वं सर्वगतं ज्ञानं सर्वज्ञज्ञानचेष्टितम् // mmk_16.6 //

अनाभास्यमनालम्ब्यं निःप्रपञ्चं प्रपञ्चितम् / मन्त्राकारवरोपेतं शिवं शान्तिमुदीरितम् // mmk_16.7 //

प्रभावं सर्वबुद्धानां वर्णितं ह्यग्रबुद्धिना / सर्वमन्त्रार्थयुक्तानां जापिनां च विशेषतः // mmk_16.8 //

कर्म कर्मफलं सर्वं क्रियाकालं तथैव च / पात्रं स्थानं तथा वेषं स्वप्नप्रसङ्गे प्रचोदितम् // mmk_16.9 //

यक्षराण्मुनिवरं श्रेष्ठं सप्तमन्त्रतथागतम् / भद्रकल्पे तु ये बुद्धाः सप्तमो ऽयं शाक्यपुङ्गवः // mmk_16.10 //

शाक्यसिंहो जितामित्रः सप्तमो ऽयं प्रकल्पितः / युगाधमे ऽभिसंबुद्धो लोकनाथो प्रभङ्करः // mmk_16.11 //

महावीर्यो महाप्राज्ञो महास्थामोदितो मुनिः / वज्रपाणिस्तु तं यक्षो बोधिसत्त्वो नमस्य तम् // mmk_16.12 //

स्वकेषु आसने तस्थुस्तूष्णीम्भूतो ऽथ बुद्धिमान् / मञ्जुश्रियो ऽथ महाप्राज्ञः पृष्टो ऽसौ मुनिना तदा // mmk_16.13 //

अध्येषयति तं बुद्धं कन्यसं मुनिसत्तमम् / साधु भगवां सम्बुद्धः कर्मज्ञान सविस्तरम् // mmk_16.14 //

जातकं + + + + + + + + + + + + + + + + सदा शुभम् / चरितं बहुसत्त्वानां कर्मज्ञानसहेतुकम् // mmk_16.15 //

निविष्टाविष्टचेष्टानां श्रेयसार्थार्थयुक्तिनाम् / जापिनां सिद्धिनिमित्तानि साध्यसाध्यविकल्पिताम् // mmk_16.16 //

भूतिकामा तथा लोके ऐश्वर्याभोगकाङ्क्षिणाम् / राज्यहेतुप्रकृष्टानां सिद्धिधारणकामिनाम् // mmk_16.17 //

सर्वं सर्वगतं ज्ञानं संक्षेपेण प्रकाशतु / इत्युवाच मुनिः श्रेष्ठो अध्येष्टो जिनसूनुना // mmk_16.18 //

कलविङ्करुतो धीमान् दिव्यदुन्दुभिनादिनः / ब्रह्मस्वरो महावीर्यपर्जन्यो घोषनिःस्वनः // mmk_16.19 //

बुद्धवाचोदितः शुद्धो वाचे गाथां सप्तमो मुनिः / एष कुमार परार्थगतानां सिद्धिमजायत लोकहितानाम् / श्रेयसि सर्वहिते जगति प्रणितारो शुद्ध्यतु तिष्ठतु मोक्षविहूनाम् // mmk_16.20 //

सत्ययाक्षयवीर्यवां हि तच्चित्ता मदमैत्ररता स तदानरता ये / सिद्धिभवे सद तेषु जनेषु नान्य कथञ्चन सिद्धिमुपेष्ये // mmk_16.21 //

मन्त्रवरे सद तुष्टिरता ये शासनि चक्रधरे तथा मञ्जुधरे वा / धर्षयिमार प्रवर्त्तयि चक्रं सो ऽपि ह चक्रधरो इह युक्तः // mmk_16.22 //

वाचा दिव्यमनोरम यस्या बालिशजन्तु विवर्जितनित्या / दिव्यमनोरमकर्णसुखा च प्रेमणीया मधुरा अनुकूला // mmk_16.23 //

चित्तप्रह्लादनसौख्यप्रदा च मञ्जुरिति समुदीरय बुद्धा / यस्य न शक्यमभावमजानं ते ऽपि तथागतज्ञानविशेषैः // mmk_16.24 //

तेषु सुताथ च भूमिप्रविष्टा दिव्यप्रकृष्टदशतथागतसङ्ख्या / ते ऽपि सुरेश्वरलोकविशिष्टा दिव्यप्रभावमजानमशक्या // mmk_16.25 //

रूप्यः अरूप्या तथा अभूमा कामिकदिव्यं नृजा मनुजा वा / योगिन सिद्धिं गता अथ लोके सर्वविशिष्ट तथा नरमुख्या // mmk_16.26 //

सत्त्वमसौ न स विद्यति कश्चिद् यो प्रतिजानि तु तस्य श्रिया मे / एष सिरिपरिकल्पिततुल्यं मञ्जुसिरीति प्रतिजानि तु बुद्धाः // mmk_16.27 //

मञ्जुश्रियं परिकल्पिततुल्यं नाममियं तथ पूर्वजिनेभिः / एष कृता तव संज्ञितकल्पे दिव्य अनागतबुद्धमतीतैः // mmk_16.28 //

नामश्रुणि पर्यस्तव शुद्धो नास्य मनो भवि एकमनो वा / तस्य मिमं शिवशान्ति भवेयं बोधिवरा भवि अग्रविशिष्टा // mmk_16.29 //

मन्त्र अशेष तु सिद्ध भवेया उत्तमयोनि गति लेभे / उत्तमिधर्मि समाश्रयि नित्य विघ्नविवर्जित सिद्धि भवेया // mmk_16.30 //

ईप्सितमन्त्र प्रसाधयि सर्वां क्षिप्र स गच्छति बोधि ह मञ्जुम् / लप्स्यति बोधिगतो मुनिमुख्यः गत्व निषीदति सत्त्वहितार्थम् // mmk_16.31 //

बुद्धयि बोधिप्रवर्तयि चक्रं एष गुणो कथितो जिनमुख्यैः / मञ्जुरिति शिरीं त्वयि संस्मरि नामं अचिन्त्यगुणाः कथिता जिनमुख्यैः // mmk_16.32 //

दर्शतु नित्यप्रभाव त्वदीयं पूर्वकसर्वगतैर्जिनमुख्यैः / कल्पभणे या न शक्यमसङ्ख्यैः मन्त्रशता तव शुद्धकुमार // mmk_16.33 //

मञ्जुश्रियं तव मन्त्रचर्यं भाषित सर्वमशेषकबुद्धैः / एषं कुमार थ सर्वगता वै शासन तुभ्य रतोत्तम वीराः // mmk_16.34 //

शुद्धावासनिषण्णजना वै सत्त्वमशेषत ईहय सत्ता / न क्रमिमन्त्र त्मदीय कदाचिं नापि कथञ्चिह ये तव मन्त्रम् // mmk_16.35 //

इति //