Bodhicaryāvatārapañjikā

Prajñākaramati: Bodhicaryāvatārapañjikā

śāntidevaviracitaḥ bodhicaryāvatāraḥ / prajñākaramativiracitayā pañjikākhyavyākhyayā saṃvalitaḥ /

// om namo buddhāya /

1. bodhicittānuśaṃso nāma prathamaḥ paricchedaḥ /

sugatān sasutān sadharmakāyān praṇipatyādarato 'khilāṃśca bandyān / sugatātmajasaṃvarāvatāraṃ kathayiṣyāmi yathāgamaṃ samāsāt // bca_1.1 //

............ akhilāṃśca bandyāniti kalyāṇamitraprabhṛtīnām / sugatātmajasaṃvarāvatāramiti abhidheyakathanam / kathayiṣyāmīti prayojanābhidhānam / saṃbandhapratipādanapadaṃ tu na vidyate, sāmarthyādeva tu sa pratipattavyaḥ / yathāgamamiti svātantryaparihārapadam / samāsāditi punaruktatāparihāravacanam / iti samudāyārthaḥ / avayavārthastu ucyate / sugatānityatra gataśabdena sarvapṛthagjanebhyo bhagavatāṃ vyavacchedaṃ darśayati, teṣāṃ saṃsārāntargatatvāt, bhagavatāṃ tu saṃsāravinirgatatvāt / suśabdastu praśastādyarthatrayavṛttiviśiṣṭaṃ suga.......... / tenāyamarthaḥ- praśastaṃ yathā bhavati evaṃ madhyamapratipadā kleśādyāvaraṇaprahāṇaṃ gatāḥ sugatāḥ / anena prahāṇasaṃpattiruktā / yadi vā / praśastaṃ sarvadharmaniḥsvabhāvatātattvaṃ gatā adhigatāḥ sugatāḥ / anena adhigamasaṃpadupadarśitā / ya[di vā]..............tīrthikaśāstṛbhyo bhagavatāṃ viśeṣaścopadarśito bhavati / teṣāmātmādibhāvābhiniveśavaśāt praśastagamanābhāvāt / ātmādīnāṃ ca pramāṇabādhitatvāt / saṃsārāpratipakṣatvācca apraśastaṃ gamanam / apunarāvṛttyā vā gatāḥ, punarjanmano rāgādinā ......... haṃkāraśuddhayā ahaṃkārabījasya avidyāyāḥ sarvathā prahāṇāt sugatāḥ / anena strotaāpannasakṛdāgāmibodhisattvebhyo 'pi bhagavatāṃ viśeṣo darśitaḥ / teṣāṃ praśastagamane 'pi sarvadhātvaprahāṇāt punarāvṛttisaṃbhavāt / niḥśeṣaṃ vā ..........sarvavāsanāyā api kāyabāgbuddhivaiguṇyalakṣaṇāyāḥ svayamadhigatamārgoktāvapāṭavasya vā sarvathā prahāṇāt sugatāḥ / etāvatā saṃpūrṇagāmitvaṃ bhagavatāṃ pratipāditam /

anenāpi anāgāmiśrāvakapratyekabuddhebhyo bhagavatāmasādhāraṇaguṇatvamāveditam / teṣāṃ..........kāyavāgbuddhivaiguṇyasya svādhigatamārgoktayapāṭavasya ca saṃbhavāt / evaṃ ca buddhatvamaśeṣaguṇasarasamasādhāraṇamaparayogibhiḥ sugataśabdena khyāpitam / tānevaṃbhūtān sugatānādarataḥ paramaprasādena praṇipatyeti (bcp 2) namaskṛtya sugatātmajasaṃvarāvatāraṃ kathayiṣyāmiti saṃbandhaḥ / kiṃbhūtān? sasutāniti / sutāśca munīnāmiha labdhapramuditādibhūmayo bodhisattvā eva gṛhyante / teṣāmeva atra adhikṛtatvāt / taiḥ saha / anena viśeṣaṇena āryasaṃghasya namaskāro 'ntarbhāvitaḥ / aparaṃ viśeṣaṇamāhasadharmakāyāniti / sarvāpa [dvimu]kto bhagavatāṃ svābhāviko dharmakāyaḥ / sa eva ca adhigamasvabhāvo dharmaḥ / samūhārtho vā kāyaśabdaḥ janakāyo balakāya iti yathā / tena pravacanasyāpi grahaṇam / tena saha / anenāpi dharmasya namaskāro 'ntarbhāvitaḥ iti / ratnatrayanamaskāro 'yamityu[ktaṃ bhavati] //

nanu buddhāddharmo dharmataśca āryasaṃgha iti kramaḥ / tat kimiti buddhānantaramāryasaṃghaḥ, tadanu dharma iti vyatikramanirdeśaḥ? satyam / iha ślokabandhānurodhād vyatikramanirdeśo veditavyaḥ / yojanāttu sugatān sadharmakāyān sasutān praṇipatya, iti anukrameṇaiva / na kaścidatra doṣaḥ / athavā / bodhisattvānāmapi adhigatadharmatvādānurūpyeṇa dharmakāyo vidyata eva / teṣāmapi saha dharmakāyena namaskaraṇaṃ pratipādanīyam / te 'pi hi samadhigatadharmatayā sugatatvaniyatāḥ sugataprāyāḥ / iti dharmāt pūrvaṃ nirdeśaḥ / iti na kiṃcidayuktam / kimetāneva? netyāha- akhilāṃśca bandyāniti / aparānapi samastān vandanīyān ācāryopādhyāyaprabhṛtīnapi / ādarataḥ praṇipatyeti / iti pūrvārdhena sugatādīnāṃ namaskṛtimabhidhāya aparārdhena abhidheyādīni pratipādayannāha- sugatātmajetyādi / ātmano jātāḥ ātmajāḥ / sugatānāmātmajāḥ jinaputrāḥ, bodhisattvā ityarthaḥ / teṣāṃ saṃvarāvatāram / saṃvaraṇaṃ saṃvriyate vā aneneti saṃvaraḥ, bodhicittagrahaṇapūrvakaṃ bodhisattvaśikṣāsamādānam / tacca yathāvasaraṃ vakṣyāmaḥ / tasya avataraṇam / avatīryate tasmin vā anenetyavatāro mārgaḥ, yena bodhisattvapadaprāptau sugatatvamavāpyate / taṃ kathayiṣyāmi pratipādayiṣyāmi / anena granthenetyarthaḥ / evamanena pratipādyamānatvāt saṃvarāvatāraḥ abhidheyamasya, ayamabhidhānaṃ saṃvarāvatārasya, iti abhidhānābhidheyalakṣaṇaḥ saṃbandho 'pyarthāt kathitaḥ / tatkathanaṃ ca abhidhānaprayojanam / paramārthatastu abhidheyasvarūpavyutpattireva tatprayojanam / abhidheyasya punaḥ śrutamayyādiprajñotpādanakrameṇa sarvāvaraṇavigamād buddhatvameva prayojanamiti prayojananiṣṭhā / idaṃ ca sugatātmajasaṃvarāvatāraśabde eva antarbhāvitam / tadanantaramevokteḥ / yadanuśaṃsakathanena ca sūcayiṣyati /

aśucipratimāmimāṃ gṛhītvā jinaratnapratimāṃ karotyanardhām / [bodhi 1.10]

iti saṃbandhābhidheyaprayojanāni pravṛttyaṅgatayā pratipāditāni / anyathā anabhidheyādiśaṅkayā prekṣāvatāmatra pravṛttirna syāt / nanu tvayā svātantrayeṇa kathitaṃ kathanaṃ kathaṃ grahīṣyantītyāha- yathāgamamiti / āgamānatikrameṇa / yathaiva pravacane bhagavadbhiḥ pratipāditaḥ, (bcp 3) tathā mayāpi tadarthānativṛttyā pratipādayitavyaḥ / anena āgamāt svātantryaṃ parihṛtaṃ bhavati / utsūtramidaṃ na bhavatītyarthaḥ / pravacanārthāvagāhanamapi ca avakratayā anena ātmano darśitam / idamapi pravṛttyaṅgameva / nanu yadi yathāgamaṃ kathayitavyaḥ, tarhi āgame eva tadabhilāṣiṇaḥ pravartiṣyante, tatkimanenetyāha- samāsāditi / saṃkṣepāt / yadi nāma āgame 'pi kathitaḥ, tathāpi tatra ativistareṇa nānāsūtrānteṣu pratipādanāt / ahaṃ tu piṇḍīkṛtya saṃkṣepeṇa kathayiṣyāmīti viśeṣaḥ / anena punaruktamidaṃ bhavatīti parihṛtam / ayamapi ca apravṛttyaṅgatāparihāraḥ / tasmāt pravṛttyaṅgattvādabhidheyādikathanamasaṃgataṃ na bhavati- tarhi praṇāmakaraṇamapārthakam / tadapi śreyolābhādyarthamabhidhīyamānaṃ kathamapārthakam? ayamasyābhiprāyaḥsugatādipraṇāmasamudbhūtapuṇyasaṃbhārasamākrāntacittasaṃtānasya pratanutarapurākṛtapāpavṛtterūpaśāntavighnasya ārabdhārthaparisamāptirupajāyate / samastasādhujanagatamārgānugamanamapi ca anena ātmanaḥ prakāśitaṃ bhavet / iṣṭadevatādinamaskṛtiśravaṇādāstikatvasaṃbhāvanayā śrotṛṇāmātmagranthe ca gauravamāpāditaṃ syāt / atra ca sugataśabdena udbhāvitabhagavanduṇamāhātmyaśravaṇāt tadabhilāṣiṇaḥ tadupārjanapravaṇamānasāḥ sugatātmajasaṃvarāvatāraparijñānāya yatnavantaḥ asmin pravartante / idamabhimatadevatādipraṇāmaphalam / etena idamapi- yena yadabhimatamabhipretaṃ kartum, sa tadeva karotu nānyat / anyakaraṇe aprastutābhidhānamatiprasaṅgaśca syāt / tadayamapi saṃvarāvatārakathane kṛtābhiprāyaḥ kimaprastutamiṣṭadevatādipraṇāmaṃ karoti? prāguktadoṣadvayaprasaṅgāditi yaducyate, tadapi nirākṛtaṃ bhavati, tadupayogasya varṇitatvāt nāprastutābhidhānam / yat prakṛtopayogi tadvaktavyaṃ nānyat, ityatiprasaṅgo nāstīti sarvaṃ sustham //

nanu āgamānatiriktaṃ saṃkṣepeṇābhidhīyamānamapi kathamarthaviśeṣādyabhāvādviśeṣeṇa pravṛttyaṅgatayā kasyacidupādeyaṃ syāt? tasmādāgamādadhikamapi kiṃcidatra vaktavyamityāśaṅkayāha-

na hi kiṃcidapūrvamatra vācyaṃ na ca saṃgrathanakauśalaṃ mamāsti / ata eva na me parārthacintā svamano vāsayituṃ kṛtaṃ mayedam // bca_1.2 //

naiva kiṃcidapūrvamaparamāgamādatiriktamasmin vaktavyamasti mama / yasmādarthe vā hiśabdaḥ / tarhi tadadhikaprameyānabhidhāne 'pi padārtharacanāviśeṣo bhaviṣyati / tasmādapi viśeṣeṇa pravṛttiḥ syāditi / atrāha- na ceti / nāpi saṃgrathanamarthapadavinyāsaviśeṣaḥ, tatra kauśalaṃ naipuṇyaṃ mamāsti / avadhāraṇe vā cakāraḥ / yadyevam, kathamasya parārthopayogitvamiti / (bcp 4) āha- ata eveti / paraprasañjitameva abhyupagacchati / yasmādapūrvaṃ vaktuṃ mama śaktirnāsti / nāpi saṃgrathanakauśalamasti / na ca parārthacintāpi / parārthopayuktamidaṃ bhavatīti vikalpo 'pi me nāsti, tatra śktivaiguṇyāt / kimarthaṃ karaṇāya yatna iti cedāha- khamana iti / ātmacittaṃ sugatātmajasaṃvarāvatārābhyāsarasena adhikādhikaṃ vāsayituṃ kṛtaṃ praṇitaṃ mayā prakaraṇamidam / saṃvarāvatārakathanaṃ vā / atītakālanirdeśaḥ antastattvaniṣpannaṃ manasi nidhāyeti //

nanu nātmārthaṃ granthapraṇayanaṃ dṛṣṭam, na ca svayaṃkṛtenaiva ātmani viśeṣādhānam, tāvataḥ saṃskāraviśeṣasya prāgevātmani vidyamānatvāditi / atrāha-

mama tāvadanena yāti vṛddhiṃ kuśalaṃ bhāvayituṃ prasādavegaḥ / atha matsamadhātureva paśyedaparo 'pyenamato 'pi sārthako 'yam // bca_1.3 //

anena granthena vā / kuśalaṃ śubhamanaskāraṃ bhāvayitumārādhayitum / vṛddhiṃ yāti prasādavegaḥ / uttarottaravardhamānasya prasannacittasaṃtānasya pravāhavāhitayā pravṛttiḥ / anena svārthakāritvamanubhavasiddhamasya nidarśayati / parārthakāritvamapi leśataḥ saṃbhavati iti darśayannāha- atha matsametyādi / atheti prakārāntaropanyāse / svārthakāritvamasya tāvadanubhavasiddham / yadi punarmama samānaprakṛtireva kaścidanyaḥ paśyedīkṣeta, enaṃ granthamarthaṃ vā, ato 'pi parārthopayuktatvādapi sārthakaḥ saprayojano 'yam / parārthopayogasyāpi kathaṃcit saṃbhavāt / anena ślokena nirabhimānatāmātmano darśayati //

idānīṃ saṃvarāvatārakathāṃ grāhayitumupoddhātaṃ racayannāha-

kṣaṇasaṃpadiyaṃ sudurlabhā pratilabdhā puruṣārthasādhanī / yadi nātra vicintyate hitaṃ punarapyeṣa samāgamaḥ kutaḥ // bca_1.4 //

aṣṭākṣaṇavinirmuktasya kṣaṇasya saṃpattiḥ samagratā / iyaṃ sudurlabhā suṣṭhu duḥkhena labhyata iti kathaṃcitprāpyā /

mahārṇavayugacchidrakurmagrīvārpaṇopamā /

pratilabdhā prāptā, sā ca puruṣārthasādhanī / puruṣasya arthaḥ abhyudayaniḥśreyasalakṣaṇaḥ, tasya sādhanī niṣpādanī / tadaṅgatvāt tatra samartheti yāvat / yadi ca evaṃbhūtāyāmapi asyāṃ (bcp 5) na hitaṃ vicintyate, svaparasukhahetuḥ svargāpavargasādhanaṃ nopādīyate, tadā punarapi bhūyo 'pi eṣa tathāgatotpādaḥ śraddhākśaṇavimukto manuṣyabhāvaḥ ityayaṃ samāgamaḥ samāveśo milanamiti yāvat / kutaḥ katham? na kathaṃcidbhaviṣyati sudurlabhatvāt / akṣaṇāvasthāyāṃ dharmapravicayasya kartumaśakyatvāt, ityabhiprāyaḥ / yathoktamāryagaṇḍavyūhasūtre āryajayoṣmāyatanavimokṣe-

durlabhā aṣṭākṣaṇavinivṛttiḥ / durlabho manuṣyabhāvapratilambhaḥ / durlabhā kṣaṇasaṃpadviśuddhiḥ / durlabho buddhotpādaḥ / durlabhā avikalendriyatā / durlabho buddhadharmaśravaṇaḥ / durlabhaṃ satpuruṣasamavadhānam / durlabhāni bhūtakalyāṇamitrāṇi / durlabho bhūtanayānuśāsanyupasaṃhāraḥ / durlabhaṃ samyagjīvitaṃ manuṣyaloke iti // [gaṇḍavyūhasūtra 116]

idamevābhisaṃdhāyoktam-

mānuṣyaṃ durlabhaṃ loke buddhotpādo 'tidurlabhaḥ / tato 'pi śraddhāpravrajyāpratipattiḥ sudurlabhā //

bodhau cittaṃ dṛḍhaṃ sarvasattvānāmanukampayā / sarvaduḥkhapraśāntyarthaṃ durlabhānāṃ paraṃparā //

iti //

akṣaṇāḥ punarime-

narakapretatiryañco mlecchā dīrghāyuṣo 'marāḥ / mithyādṛgbuddhakāntārau mūkatāṣṭāvihākṣaṇāḥ //

iti //

tasmādidānīmeva udyogaḥ kartavya iti //

sāṃprataṃ bodhicittagrahaṇāya tatrābhilāṣamutpādayitumanuśaṃsāmavatārayannāha-

rātrau yathā meghaghanāndhakāre vidyut kṣaṇaṃ darśayati prakāśam / buddhānubhāvena tathā kadācillokasya puṇyeṣu matiḥ kṣaṇaṃ syāt // bca_1.5 //

niśāyāṃ yathā jaladāgamasamaye meghairbahule tamasi sati saudāmanī kṣaṇalavamātramālokayati kiṃcidvastujātaṃ prakāśayati / saivopamā atrāpi ityāha- buddhānubhāvenetyādi / buddhā eva hi bhagavanto hitasukhopasaṃhārāya sadā bhavyābhavyatayā sarvasattvasaṃtānamavalokayantastiṣṭhanti / yadā yatra yenopāyena yasmai yaṃ bhavyaṃ paśyanti tadā tatra tenopāyena tasmai tamadhitiṣṭhanti / abhavyāvasthāyāmupekṣya viharanti / iti tathāgatādhiṣṭhānena kathaṃciddurlabhotpattikatvāt / lokasya janasya puṇyeṣu hitasukhahetuṣu kuśaleṣu karmasu buddhirmuhūrtamekaṃ bhavet / tatra tasyā asthiratvāt / anādisaṃsāre lokena akuśalapakṣasyaiva abhyastatvāt //

(bcp 6) yadi nāma evam, tataḥ kimityāha-

tasmācchubhaṃ durbalameva nityaṃ balaṃ tu pāpasya mahatsughoram / tajjīyate 'nyena śubhena kena saṃbodhicittaṃ yadi nāma na syāt // bca_1.6 //

yata evam, tasmācchubhaṃ puṇyaṃ durbalaṃ sāmarthyavikalameva, vidyudunmeṣaprāyatvāt ati kṛśam / nityaṃ sarvakālam / kasya tarhi atiśayavad balamastītyāha- balaṃ tviti / sāmarthyaṃ punaraśubhasya mahat, meghaghanāndhakārasadṛśattvāttasya / sughoramatibhayaṃkaraṃ narakādiduḥkhadāyakatvāt, sudurjayatvācca / bhavatu nāma mahat sāmarthyamasya, tathāpi tadapareṇa balavatā puṇyena jeṣyate, tathā ca na kācit kṣatiriti, āha- tadityādi / tat tādṛśaṃ mahāsāmarthyaṃ jīyate abhibhūyate / anyena itareṇa / kena? na kenāpītyarthaḥ / kutaḥ punarevamucyate? saṃbodhītyādi / samyaksaṃbodhau buddhatve yaccittaṃ sarvasattvasamuddharaṇābhiprāyeṇa tatprāptyarthamadhyāśayena manasikāraḥ / tadyadi nāma na bhavet, mahāsāmarthyaṃ hi tadapareṇa mahīyasā parājīyate sūryeṇeva niśāndhakāraḥ / na ca saṃbodhicittāt pratipakṣo mahīyānaparaḥ saṃbhavati / tasmāt tatpratighātāya saṃbodhicittameva upādeyaṃ nānyadityabhiprāyaḥ //

ito 'pi saṃbodhicittamupādeyamityāha-

kalpānanalpān pravicintayadbhirdṛṣṭaṃ munīndrairhitametadeva / yataḥ sukhenaiva sukhaṃ pravṛddhamutplāvayatyapramitāñjanaughān // bca_1.7 //

eko 'ntarakalpaḥ kalpaḥ / viṃśatirantarakalpāḥ kalpaḥ / aśītirantarakalpāḥ kalpaḥ / sa ca mahākalpa ityabhidhīyate / tadiha mahākalpasyaiva grahaṇam / analpān bahūn prathamāsaṃkhyeyāntargatān / pravicintayadbhiḥ tātparyeṇa paribhāvayadbhiḥ / dṛṣṭamadhigatam / munīndraiḥ buddhairbhagavadbhirbodhisattvāvasthāyām / hitaṃ sarvārthasādhanayogyam, tadbījabhūtatvāt / etadeva saṃbodhicittameva / kathaṃ punaridameva hitamityāha- yata ityādi / yasmāt sukhaṃ pravṛddhaṃ prakarṣagataṃ buddhatvalakṣaṇam / apramitān aprameyān / janaughān sattvasamūhān / utplāvayati uttārayati saṃsāraduḥkhamahārṇavāt / tasmādidameva hitam //

athavā / yasmāt sukhaṃ devamanuṣyasaṃpattilakṣaṇam / pravṛddhaṃ vṛddhiṃ gatam / arthāt saṃbodhicittādeva / utplāvayati atiśayena saṃtarpayati / saukaryādadhikataraṃ yadbhavati tadutplāvanamucyate / yathā dadhnā vayamutplāvitā iti saukaryādadhikataraṃ dadhi bhūtamityarthaḥ //

(bcp 7) yadi vā / yataḥ saṃbodhicittāt sukhaṃ pravṛddhamiti yojanīyam //

kathaṃ pravṛddhamityāha- sukhenaiveti / na akṛcchreṇa / na śiroluñcanādinā mahatā kaṣṭena / tathā hi bodhicittasaṃvarādeva bodhisattvo 'mitapuṇyajñānasaṃbhārāt pravardhamāno devamanuṣyasaṃpattīḥ sukhamadhigacchan sattvāneva adhikataraṃ tābhiḥ saṃtarpayatīti / yadvakṣyati-

evaṃ sukhātsukhaṃ gacchan ko viṣīdetsacetanaḥ / bodhicittarathaṃ prāpya sarvakhedaśramāpaham // iti // [bodhi. 7.30] nanu bhagavatāmapi maitrībalādijātakeṣu [jātakamālā-8] mahadduṣkaraṃ śrūyate / tat kathaṃ sukhenaiva sukhaṃ pravṛddhamiti? naiṣa doṣaḥ / yataḥ utpādyameva parahitasukhādhāyakaṃ duḥkhaṃ svaparayoḥ / kṛpātmabhiḥ / sukhameva tādṛśaṃ duḥkhaṃ paraduḥkhaduḥkhināṃ dhimatāmiti pratipādayiṣyate //

asmādapi svaparahitahetutvādbodhicittaṃ na parityājyameveti darśayannāha-

bhavaduḥkhaśatāni tartukāmairapi sattvavyasanāni hartukāmaiḥ / bahusaukhyaśatāni bhoktukāmairna vimocyaṃ hi sadaiva bodhicittam // bca_1.8 //

saṃsāraduḥkhaśatāni narakādigatiduḥkhānāmasātaveditānāṃ śatāni aparyantasamūhāṃ startukāmaiḥ parityaktumicchadbhiḥ śrāvakapratyekabuddhagotraiḥ / na kevalamātmīyāni, lokānāṃ jātyādiduḥkhānyapi hartukāmairapanetukāmairbodhisattvagotraiḥ / na kevalaṃ svaparaduḥkhāni hartukāmaiḥ, api ca, bahūni sukhānyeva saukhyāni teṣāṃ śatāni devamanuṣyopapattilabhyāni anubhavitukāmaiḥ saṃsārasukhābhilāṣukairapi / sadaiva sarvakālaṃ na vimocyamaparityājyaṃ bodhicittam / svīkartavyamityarthaḥ / athavā saṃbodhikāṅkṣiṇāmeva viśeṣaṇāni //

asmādapi guṇaviśeṣādbodhicittaṃ grāhyamityāha-

bhavacārakabandhano varākaḥ sugatānāṃ suta ucyate kṣaṇena / sanarāmaralokavandanīyo bhavati smodita eva bodhicitte // bca_1.9 //

saṃsāra eva bandhanāgāram, tatra bandhanaṃ bandho rāgādaya eva yasyeti vigrahaḥ / tādṛśo varākastapasvī san / udite eva bodhicitte prathamataraṃ bodhicittasaṃvaragrahaṇasamaye / sugatānāṃ suta ucyate, buddhaputra ityabhidhīyate / kṣaṇena tatkṣaṇameva / na kevalamevamityāha- (bcp 8) sanarāmaretyādi / saha narāmaraiḥ manuṣyadevairvartante ye asurādayo lokāḥ, tesāmapi vandanīyo namaskaraṇīyaḥ stavanīyaśca bhavati sma / smaśabdena atītakālābhidyotanādbodhicittodayasamaye eva bhūtaḥ //

asmādapi guṇānuśaṃsadarśanādbodhicittagrahaṇe yatnaḥ karaṇīya ityāha-

aśucipratimāmimāṃ gṛhītvā jinaratnapratimāṃ karotyanarghām / rasajātamatīva vedhanīyaṃ sudṛḍhaṃ gṛhṇata bodhicittasaṃjñam // bca_1.10 //

amedhyapratimāmimāṃ manuṣyādikalevarasvabhāvāṃ taddhātukāṃ tatsvabhāvām / tena saṃvardhitāmityarthaḥ / tāṃ gṛhītvā ādāya / jina eva ratnam, durlabhapratilambhādiguṇayogāt / tasya pratimāṃ karoti niṣpādayati bodhicittam / tathāgatavigrahaṃ nirvartayatītyarthaḥ / kiṃ bhūtām? anarghām / na vidyate argho mūlyaṃ yasyāḥ / sarvatraidhātukātiśāyiguṇatvād guṇaparyantāparijñānācca / tathoktāṃ tām / ata eva rasajātaṃ rasaprakāram / atyuccavedhakāritvādatīva vedhanīyam / kartari anīyaḥ karaṇe vā / tat tādṛśam / bodhicittaṃ saṃjñā asya rasajātasya / bodhicittāparavyapadeśam / sudṛḍhaṃ gṛhṇata yathā gṛhītaṃ punarna calati gṛhṇīteti prāpte gṛhṇateti yathāgamapāṭhāt / tasmājjinaratnamātmānaṃ kartukāmairbodhicittamahārasaḥ sudṛḍhaṃ grahītavyaḥ / uktaṃ ca āryamaitreyavimokṣe [gaṇḍavyūhasūtra 502]

tadyathā kulaputra asti hāṭakaprabhāsaṃ nāma rasajātam / tasyaikaṃ palaṃ lohapalasahasraṃ suvarṇīkaroti / na ca tadrasapalaṃ śakyate tena lohapalasahasreṇa paryādātuṃ lohīkartuṃ vā / evameva ekaḥ sarvajñatācittotpādarasadhātuḥ kuśalamūlapariṇāmanājñānasaṃgṛhītaḥ sarvakarmakleśāvaraṇalohāni paryādāya sarvadharmān sarvajñatāsuvarṇān karoti / na ca sarvajñatācittotpādarasadhātuḥ śakyate sarvakarmakleśāvaraṇalohādibhiḥ paryādātuṃ tatkartuṃ veti //

bhavagatiṣu vibhūtikāmairapi nātra saṃśayo viparyāso vā kartavyaḥ ityupadarśayannāha-

suparīkṣitamaprameyadhībhirbahumūlyaṃ jagadekasārthavāhaiḥ / gatipattanavipravāsaśīlāḥ sudṛḍhaṃ gṛhṇ ata bodhicittaratnam // bca_1.11 //

gataya eva pattanāni paṇyadravyakrayavikrayanagarāṇi iha pattanāni / tadvat śubhāśubhakarmapaṇyadravyakrayavikrayasthānāni gatipattanāni / teṣu vipravāso vipravasanameva śīlaṃ svabhāvo yeṣāṃ te tathoktāḥ / teṣāṃ saṃbodhanam / he gatipattanavipravāsaśīlāḥ, sudṛḍhaṃ gṛhṇata bodhicittaratnam / bodhicittameva ratnaṃ ratnamiva / yathā cintāmaṇimahāratnaṃ sarvadāridyadurgatipraśamanahetuḥ, (bcp 9) tathā idamapi bodhicittaratnam / ayamabhiprāyaḥ- vaṇija eva sukhasaṃpattilābhārthino yūyam / ataḥ idameva mahāratnaṃ mahatādareṇa gṛhṇata / kutaḥ? bahumūlyamiti hetupadametat / yasmādanarghamidaṃ sarvātiśāyi laukikalokottarasaṃpattinidānabhūtatvāt, tasmādidameva grāhyamityarthaḥ / kathamidaṃ jñāyata iti cedāha- suparīkṣitamiti / suṣṭhu nirūpitaṃ samyaṅ nirṇītamityarthaḥ / kairityāha- aprameyadhībhiḥ / aprameyā pramātumaśakyā dhīrbuddhiryeṣāṃ taiḥ mahāprājñaiḥ buddhabodhisattvaiḥ / etāvatā parīkṣāyāṃ skhalitamapi nāsti iti suparīkśitamucyate / punarapi kiṃbhūtaiḥ? jagadekasārthavāhaiḥ / sārthaṃ vāhayantītyaṇ / jagatāmeka eva sārthavāhāḥ karuṇāvaśavartino buddhā bhagavanto bodhisattvāśca, taiḥ / yathā khalu vaṇijāṃ hitāhitaprāptiparihārayorhitaiṣiṇo jñānavantaśca sārthavāhā netāro bhavanti, iti na tatra visaṃvādasaṃbhāvanā, tathā atrāpītyabhiprāyaḥ / tasmādidameva bodhicittaratnamanarghaṃ sudṛḍhaṃ grāhyamiti / etacca tatraivoktam-

tadyathā kulaputra yāvaccandrasūryau manḍalaprabhayā avabhāsete / atrāntare ye keciddhana dhānyaratnajātarūparajatapuṣpadhūpagandhamālyavilepanaparibhogāḥ, te sarve vaśirājamahāmaṇiratnasya mūlyaṃ na kṣamante, evameva yāvat triṣvapi adhvasu sarvajñajñānaṃ dharmadhātuviṣayamavabhāsayati / atrāntare yāni kāni cit sarvadevamanuṣyasarvasattvasarvaśrāvakapratyekabuddhakuśalamūlāni sāsravānāsravāṇi sarvāṇi tāni bodhicittotpādavaśirājamahāmaṇiratnasya mūlyaṃ na kṣamante / [gaṇḍavyūhasūtra-500] iti //

idamaparamasādhāraṇamatiśayavat kalpataroriva māhātmyamasya upadarśayannāha-

kadalīva phalaṃ vihāya yāti kṣayamanyat kuśalaṃ hi sarvameva / satataṃ phalati kṣayaṃ na yāti prasavatyeva tu bodhicittavṛkṣaḥ // bca_1.12 //

kadalī yathā palamekavāraṃ datvā na punaḥ phalati, tathā bodhicittādanyadapi kuśalaṃ sarvameva kiṃcideva vipāke paripakve na punaḥ phaladānasamarthaṃ bhavati / tāvataivāsya parikṣayāt, vipākasya ca avyākṛtatayā punaḥ phalānubandhābhāvāt / bodhicittasya punarayaṃ viśeṣaḥ ityāha- satatamityādi / sarvakālaṃ phalati devamanuṣyopapattiṣu sukhasaṃpattipradānāt kṣayaṃ na yāti tadanyakuśalavat, sthirasvabhāvatvāt / pratikṣaṇamanekaprakāraiḥ śubhameghapravāhairāpūryamāṇatvācca prasavatyeva tu bodhicittavṛkṣaḥ, avicchinnasukhasaṃpattiphalaprasavanāt, uttarottaramaparā paraguṇaviśeṣajananācca / bodhicittaṃ vṛkśa iva / upamitaṃ vyāghrādibhiḥ iti samāsaḥ / yasmādevam, tasmādanuparatamatiśayavatsarvasukhasaṃpadaḥ prāptukāmaiḥ prekṣāvadbhiridameva grāhyam / kathitaṃ caitadāryākṣayamatinirdeśe-

(bcp 10) tadyathāpi nāma bhadanta śāradvatīputra mahāsamudrapatitasyodakabindornāstyantarā parikṣayaḥ paryādānaṃ yāvanna kalpaparyantaḥ iti, evameva bodhipariṇāmitasya kuśalamūlasya nāstyantarā parikṣayaḥ paryādānaṃ yāvanna bodhimaṇḍaniṣadanam // iti //

na kevalaṃ sarvaśubhasaṃcayakāraṇam, akuśalapakṣakṣayaheturapi bodhicittamiti sārdhaślokenāha-

kṛtvāpi pāpāni sudāruṇāni yadāśrayāduttarati kṣaṇena / śūrāśrayeṇeva mahābhayāni nāśrīyate tatkathamajñasattvaiḥ // bca_1.13 //

bodhicittagrahaṇātpūrvaṃ kṛtvāpi pāpāni akuśalakarmāṇi narakādiṣu duḥsahaduḥkhadāyakatvāt sudāruṇāni atibhayaṃkarāṇi mahānti vā yasya bodhicittasyāśrayādāśrayaṇāt tadutpādanarakṣaṇavardhanasevanalakṣaṇāt uttarati nistarati / tatsāmarthyābhibhavena atikrāmatītyarthaḥ / kṣaṇena ekasminneva kṣaṇe mahataḥ puṇyarāśeḥ samupārjanāt / tadutpādanamātreṇa / kathamivottarati? śūrāśrayeṇeva mahābhayāni balavatpuruṣāśrayeṇa yathā mahāparādhaṃ kṛtvāpi kaściduttarati tadaparādhaphalānnirbhayo bhavati, tathā prakṛte 'pi / tadevaṃbhūtaṃ bodhicittaṃ kathaṃ kimiti nāśrīyate na sevyate? ajñasattvaiḥ prajñāvikalairmūḍhajanairityarthaḥ / āśrayaṇīyameva tadbhavediti bhāvaḥ / idamapi tatraivoktam-

tadyathā kulaputra śūrasaṃniśritaḥ puruṣaḥ sarvaśatrubhyo na bibheti, evameva bodhicittotpādaśūrasaṃniśrito bodhisattvaḥ sarvaduścaritaśatrubhyo na bibhetīti //

aparamapi bodhicittātpāpakṣayadṛṣṭāntamāha-

yugāntakālānalavanmahānti pāpāni yannirdahati kṣaṇena /

yugāntakāle pralayasamaye analo bahniḥ saptasūryodayasamudbhūtaḥ yathā sarvaṃ kāmādhātuṃ saprathamadhyānaṃ nirdahati, niḥśeṣaṃ dahati yathā bhasmāpi nāvaśiṣyate, tadvat pāpāni / kiṃbhūtāni? mahānti sumeruprakhyāni mahārauravādiduḥkhavipākāni yad bodhicittaṃ nirdahati tadvipākopaghātānnirmūlayati / kṣaṇena nacireṇa / nāśrīyate tatkathamajñasattvairiti saṃbandhaḥ kāryaḥ // etadapi tatraivoktam- kalpoddāhāgnibhūtaṃ sarvaduṣkṛtanirdahanatayā / pātālabhūtaṃ sarvākuśaladharmaparyādānakaraṇatayā iti //

nanu kṛtakarmāvipraṇāśavādī bhagavān, tat kathamidamabhidhīyate? satyamucyate / bodhicittaprasūte pratikṣaṇamākāśadhātuvyāpake mahati puṇyaughe 'ntarbhūtatayā lavaṇapalopamanyāyena aprajñāyamānatvāt, balavatā pratipakṣeṇa abhībhūtatvācca, phaladānāsamarthaṃ dagdhameva tadityadoṣaḥ / yadi vā nirupāyābhisaṃdhinā taduktam- nābhuktaṃ kṣīyate karmeti / idaṃ tu sarvapāpanirmūlane (bcp 11) mahānupāyaḥ / tathā hi- yadā bodhisattvaḥ sarvasattvānākāśadhātuvyāpinaḥ sarvaduḥkhāt samuddhṛtya sarvasukhasaṃpannān kariṣyāmītyadhyāśayena vicintayati / pūrvakṛtaṃ ca pāpaṃ vidūṣaṇāsamudācārādibhiḥ kṣapayati, tadā bodhicittabalādeva tatsaṃtāne pāpasya kaḥ sadbhāvaḥ, yena codyasyāvakāśaḥ syāditi sarvaṃ nirākulam / etāvatā yaduktam- tajjīyate 'nyena śubhena kena iti, tadapi vispaṣṭīkṛtam / anye punaḥ- aniyatavipākāpekṣayā sarvametaducyate, niyatavipākasya tu karmaṇaḥ kenacitpratiṣeddhumaśakyatvādityāhuḥ //

itthamapi bodhicittamupādeyamityāha- yasyānuśaṃsānamitānuvāca maitreyanāthaḥ sudhanāya dhīmān // bca_1.14 // yasya bodhicittasya anuśaṃsān svābhāvikān guṇān amitān apramāṇān maitreyanāthaḥ bhagavānajitaḥ / kiṃbhūtaḥ? dhīmān bodhisattvaḥ / uvāca uktavān / sudhanāya sudhananāmne bodhisattvāya / tathā ca āryagaṇḍavyūhasūtre [varṇitam-

bodhicittaṃ hi kulaputra bījabhūtaṃ sarvabuddhadharmāṇām / kṣetrabhūtaṃ sarvajagacchukladharmavirohaṇatayā / dharaṇibhūtaṃ sarvalokapratiśaraṇatayā / yāvat pitṛbhūtaṃ sarvabodhisattvārakṣaṇatayā / pe......... / vaiśravaṇabhūtaṃ sarvadāridyasaṃchedanatayā / cintāmaṇirājabhūtaṃ sarvārthasaṃsādhanatayā / bhadraghaṭabhūtaṃ sarvābhiprāyaparipūraṇatayā / śaktibhūtaṃ kleśaśatruvijayāya // ityādi vistaraḥ //

nāśrīyate tat kathamajñasattvaiḥ iti atrāpi yojanīyam //

idānīṃ bodhicittasya prabhedaṃ darśayannāha-

tadbodhicittaṃ dvividhaṃ vijñātavyaṃ samāsataḥ / bodhipraṇidhicittaṃ ca bodhiprasthānameva ca // bca_1.15 //

tat samanantarapradarśitānuśaṃsaṃ bodhicittaṃ dvividhaṃ dviprakāraṃ vijñātavyaṃ veditavyam / gotrabhūmyādigatānekaprakārasaṃbhave 'pi kathaṃ dvividhamityāha- samāsataḥ / aparaprakārasaṃbhave 'pi saṃkṣepataḥ idaṃ dvividhamucyate / dvividhamapi katham? bodhipraṇidhicittamityekam, bodhiprasthānamiti dvitīyam / bodhau praṇidhiḥ, tadeva cittaṃ tatra vā cittam / yaccittaṃ praṇidhānādutpannaṃ bhavati dānādipravṛttivikalaṃ ca, tat praṇidhicittam / tadyathā- sarvajagatparitrāṇāya buddho bhaveyamiti prathamataraṃ prārthanākārā cetanā / prasthāne cittaṃ prasthānameva vā cittam / cittasya tatsvabhāvatvāt / pūrvakamanaskārapuraḥsarameva yataḥ prabhṛti saṃvaragrahaṇapūrvakaṃ saṃbhāreṣu pravartate, tat prasthānacittam / iti uktakrameṇa dvaividhyam / iyāneva bhedaḥ iti evakāreṇa pratipādayati / cakāradvayaṃ parasparasamuccaye / dvayorapi bodhicittatvaṃ darśayati / tena pūrvakaṃ bodhicittaṃ na bhavatīti śaṅkāṃ nirasyati / śūraṃgamasūtre ādyotpāditasyāpi bodhicittasya buddhatvahetutvābhidhānāt / tathā āryagaṇḍavyūhe coktam-

(bcp 12) durlabhāḥ kulaputra te sattvāḥ sattvaloke ye anuttarasyāṃ samyaksaṃbodhau cittaṃ praṇidadhati / tato 'pi durlabhatamāste sattvāḥ ye anuttarāṃ samyaksaṃbodhimanuprasthitāḥ // iti //

idānīmuktameva prabhedamudāharaṇena vyaktīkurvannāha-

gantukāmasya gantuśca yathā bhedaḥ pratīyate / tathā bhedo 'nayorjñeyo yāthāsaṃkhyena paṇḍitaiḥ // bca_1.16 //

yathā kaścit puruṣaḥ abhimatadeśaprāptaye gantukāmaḥ gamanābhiprāyaḥ, na tu punargacchatyeva, anyaḥ punastatprāptaye prasthito gacchatyeva / yadvadyathā / tayorbhedo viśeṣaḥ pratīyate avagamyate, tadvattathā bhedo nānātvamanayorbodhipraṇidhiprasthānacetasorjñeyaḥ avaboddhavyaḥ paṇḍitairvicakṣaṇaiḥ / katham? yāthāsaṃkhyena / svārthe 'pyaṇ / prāktanaṃ praṇidhicittasya nidarśanaṃ paścāttanaṃ prasthānacetasaḥ iti saṃkhyārthaḥ //

tadetat praṇidhicittaṃ pratipattivikalamapi saṃsāre mahāphalaṃ bhagavatā varṇitamityāha-

bodhipraṇidhicittasya saṃsāre 'pi phalaṃ mahat /

yadi nāma tat pratipattivikalam, tathāpi tasya āstāṃ tāvad buddhatvam, saṃsāre 'pi devamanuṣyopapattisvabhāvaṃ sukhasaṃpattilakṣaṇaṃ phalaṃ mahat, anyasmāt kuśalād bṛhat / satataṃ phalatītyādiviśeṣaṇaviśiṣṭatvāt / tathā coktamāryamaitreyavimokṣe [=gaṇḍavyūhasūtra-508]-

tadyathāpi nāma kulaputra bhinnamapi vajraratnaṃ sarvaprativiśiṣṭaṃ suvarṇālaṃkāramabhibhavati, vajraratnanāma ca na vijahāti, sarvadāridyaṃ ca vinivartayati, evameva kulaputra pratipattibhinnamapi sarvajñatācittotpādavajraratnaṃ sarvaśrāvakapratyekabuddhaguṇasuvarṇālaṃkāramabhibhavati, bodhicittanāma ca na vijahāti, saṃsāradāridyaṃ ca vinivartayatīti //

tasmād yo 'pi pāramitāsu sarveṇa sarvaṃ sarvathā śikṣitumasamarthaḥ, tenāpi bodhicittamutpādanīyam / evamupāyaparigraheṇa mahāphalatvāt / yathoktamāryāpararājāvavādakasūtre-

yasmāt tvaṃ mahārāja bahukṛtyo bahukaraṇīyaḥ, asahaḥ sarveṇa sarvaṃ sarvathā sarvadā dānapāramitāyāṃ śikṣitum, yāvat prajñāpāramitāyāṃ śikṣitum / tasmāttarhi tvaṃ mahārāja evameva saṃbodhicchandaṃ śraddhāṃ prārthanāṃ praṇidhiṃ ca, gacchannapi tiṣṭhannapi niṣaṇṇo 'pi śayāno 'pi jāgradapi bhuñjāno 'pi pibannapi, satatamamitamanusmara, manasi kuru, bhāvaya / sarvabuddhabodhisattvapratyekabuddhāryaśrāvakapṛthagjanānāmātmanaśca atītānāgatapratyutpannāni kuśalamūlānipiṇḍayitvā tulayitvā anumodayasva agrayā anumodanayā / anumodya ca sarvabuddhabodhisattvapratyekabuddhāryaśrāvakāṇāṃ pūjākarmāṇi niryātaya / niryātya ca sarvasattvasādhāraṇāni kuru / tataḥ sarvasattvānāṃ yāvat sarvajñatāpratilambhāya sarvabuddhadharmaparipūraṇāya dine dine traikālyamanuttarāyāṃ samyaksaṃbodhau pariṇāmaya / evaṃ khalu tvaṃ mahārāja pratipannaḥ san rājyaṃ ca kārayiṣyasi, rājyakṛtyāni ca na hāpayiṣyasi, bodhisaṃbhārāṃśca paripūrayiṣyasi // ityādikamuktvāha- (bcp 13) sa khalu punastvaṃ mahārāja samyaksaṃbodhicittakuśalamūlavipākena anekakṛtvo deveṣu upapanno 'bhūḥ / anekakṛtvo manuṣyeṣu upapanno 'bhūḥ / sarvāsu ca devamanuṣyopapattiṣu ādhipatyaṃ kārayiṣyasi / iti vistaraḥ //

iti caryāvikale 'pi bodhicitte nāvamanyanā kāryā / tasyāpi anantasaṃsāre sukhaprasavanāt / yat punaḥ pratipattisāraṃ bodhicittaṃ tadatitarāṃ vipulaphalameveti siddhamityāha- na tvavicchinnapuṇyatvaṃ yathā prasthānacetasaḥ // bca_1.17 // na tu na punaḥ / yathā prasthānacittasya avicchinnapuṇyatvaṃ nirantaraśubhapravāha vāhitvam, na tathā asyeti bhāvaḥ //

idameva avicchinnapuṇyatvaṃ vṛttadvayena prasādhayannāha-

yataḥ prabhṛtyaparyantasattvadhātupramokṣaṇe / samādadāti taccittamanivartyena cetasā // bca_1.18 //

tataḥprabhṛti suptasya pramattasyāpyanekaśaḥ / avicchinnāḥ puṇyadhārāḥ pravartante nabhaḥsamāḥ // bca_1.19 //

yataḥprabhṛtiḥ yasmādārabhya / na vidyate paryantaḥ iyattā asyeti aparyantasya ākāśadhātuvyāpinaḥ sattvadhātoḥ / pramokṣaṇe pramokṣe sarvaduḥkhopaśamanimitte / samādadāti taccittam, samyaksaṃbodhicittaṃ samādāya vartate / katham? anivartyena cetasā apravṛttibhraṣṭena manasā / tataḥprabhṛti tadādiṃ kṛtvā / suptasya middhākrāntacittasya pramattasya vikṣiptacittasyāpi / ubhayatrāpi saṃbadhyate / upalakṣaṇaṃ caitat / gacchato 'pi tiṣṭhato 'pi niṣaṇṇasyāpi bhuñjānasyāpi mūrcchādyavasthāyāmapītyādi draṣṭavyam / anekaśa iti / pratikṣaṇamanekavāram / avicchinnāḥ puṇyadhārāḥ nirantarasaṃtatayaḥ śubhavegāḥ pravartante / nabhaḥsamāḥ pratikṣaṇamākāśadhātupramāṇāḥ / tasmāt pratipattisāreṇa bodhisattvena bhavitavyam / āryasamādhirāje coktam- tasmāt pratipattisāro bhaviṣyāmi, ityevaṃ kumāra śikṣitavyam / tat kasya hetoḥ? pratipattisārasya kumāra na durlabhā bhavati anuttarā samyaksaṃbodhiriti [samādhi-10] // avicchinnapuṇyaṃtvamasya bhagavataivoktamityupadarśayannāha-

idaṃ subāhupṛcchāyāṃ sopapattikamuktavān / hīnādhimuktisattvārthaṃ svayameva tathāgataḥ // bca_1.20 //

idameva aprameyapuṇyatvaṃ svayameva ātmanaiva tathāgato buddho bhagavānuktavān kathitavān / kva? subāhupṛcchāyāṃ subāhupṛcchānāmni sūtre / katham? sopapattikaṃ sayuktikam / kimartham? hīnādhimuktisattvārtham / hīne śrāvakapratyekabuddhayāne adhimuktiḥ śraddhā chando vā (bcp 14) yeṣāṃ te / te sattvāśca / tebhya idaṃ tadartham / tat prayojanamuddiśyetyarthaḥ / tathā hi- ye aniyatagotrāściratarakālena bahutarasaṃbhāropārjanabhītā mahāyānāccittaṃ vyāvartya laghutarakālena alpatarasaṃbhārasādhye śrāvakapratyekabuddhayāne cittamutpādayanti, tadvayāvartanārthaṃ bhagavānupapattimāha //

tāmevopapattiṃ vṛttadvayena kathayannāha-

śiraḥśūlāni sattvānāṃ nāśayāmīti cintayan / aprameyeṇa puṇyena gṛhyate sma hitāśayaḥ // bca_1.21 //

kimutāpratimaṃ śūlamekaikasya jihīrṣataḥ / aprameyaguṇaṃ sattvamekaikaṃ ca cikīrṣataḥ // bca_1.22 //

katipayajanānāṃ mastakapīḍāṃ nāśayāmi mantreṇa agadena vā, ityevaṃ manasi kurvan apramāṇena sukṛtena asau kalyāṇābhiprāyo gṛhīto draṣṭavyaḥ / kiṃ punarapramāṇaṃ saṃsāraduḥkhaṃ pratisattvamapramāṇasya jagato hartumicchataḥ / api ca tacchūlamapanīya sarvasattvān sarvaguṇasamaṅginaḥ kartumicchataḥ kimaprameyaṃ puṇyaṃ na bhavati? iti vibhaktivipariṇāmena yojanīyam / avicchinnāḥ puṇyadhārāḥ kimuta tasya na pravartante nabhaḥsamā iti / tasmād yathā saṃbhārabāhulyasādhyaṃ buddhatvam, yathā saṃbhāravaipulye 'pi pratikṣaṇamiti hetuviśeṣādatraiva mahāyāne mahānlābhaḥ / ato nāsmaccittamabhayasthāne kātaratayā vinivartanīyamityupadarśitaṃ bhavati / yadvakṣyati-

kṣapayan pūrvapāpāni pratīcchan puṇyasāgarān / bodhicittabalādeva śrāvakebhyo 'pi śīghragaḥ // iti // [bodhi. 7.29] yaścaivaṃ sarvasattvānāṃ hitasukhārthamudyujyate, sa devādibhyo 'pyasādhāraṇaguṇātvāt praśasya ityupadarśayannāha-

kasya mātuḥ piturvāpi hitāśaṃseyamīdṛśī / devatānāmṛṣīṇāṃ vā brahmaṇāṃ vā bhaviṣyati // bca_1.23 //

kasya sattvasya / māturjananyāḥ / kasya piturvā janakasya / devatānāṃ somavaruṇādīnām / ṛṣīṇāṃ vā vasiṣṭhagotamādīnām / brahmaṇāṃ vā vedhasām / iyamīdṛśī hītāśaṃsā hitopasaṃhāramatiḥ yādṛśī samanantaraṃ pratipāditā bodhisattvasya bhaviṣyati iti / āstāṃ tāvat bhūtā bhavati vā, bhaviṣyatyapi naiva kasyacidbodhisattvamantareṇānyasya //

kutaḥ punaretadityāha-

teṣāmeva ca sattvānāṃ svārthe 'pyeṣa manorathaḥ / notpannapūrvaḥ svapne 'pi parārthe saṃbhavaḥ kutaḥ // bca_1.24 //

(bcp 15) teṣāṃ mātrādīnāṃ svārthe 'pi ātmanaḥ kṛte 'pi eṣa manorathaḥ sarvaduḥkhamapahartum, apramāṇaguṇānādhātuṃ notpannapūrvaḥ abhūtapūrvaḥ svapne 'pi / āstāṃ tāvajjāgradavasthāyāṃ buddhipūrvakamutpannaḥ / parārthe kadācidutpadyeta ityāha- parārthe saṃbhavaḥ kutaḥ / ātmā hi vallabho lokasya parasmāt / tatraiva cennāsti, parārthe saṃbhāvanāpi kutaḥ? athavā / svapne 'pi parārthe saṃbhavaḥ kutaḥ iti yojyam //

tadevamasādhāraṇatvaṃ bodhisattvasya pratipādya upasaṃharannāha-

sattvaratnaviśeṣo 'yamapūrvo jāyate katham / yatparārthāśayo 'nyeṣāṃ na svārthe 'pyupajāyate // bca_1.25 //

evamatyadbhutakarmakāritayā durlabhotpādāt sattva eva ratnaviśeṣaḥ apūrvaḥ anupalabdhapūrvaḥ / ayamiti yādṛśaguṇo 'tra kathitaḥ / jāyate katham / kathamityadbhute / kasmāt punarevamucyate? āha- yatparārtheti / yasya mahātmanaḥ parārthāśayaḥ anyeṣāṃ sattvānāmuktakrameṇa na svārthe 'pyupajāyate ityasmāt //

atra ca anye 'pi bodhicittotpādakasya guṇā vaktavyāḥ / yathā āryagaṇḍavyūhe bhagavatā āryamaitreyeṇa sudhanamadhikṛtya udbhāvitāḥ / te ca ativistareṇa śāstrakṛtā śikṣāsamuccaye darśitāśca, tatraiva avadhārayitavyā //

punarapi bodhicittānuśaṃsādvāreṇa bodhisattvasyāprameyapuṇyatvamāha-

jagadānandabījasya jagadduḥkhauṣadhasya ca / cittaratnasya yatpuṇyaṃ tatkathaṃ hi pramīyatām // bca_1.26 //

sarvasattvānāṃ sarvaprāmodyakāraṇasya devādisarvasaṃpattinidānabhūtatvāt / cittaratnasya bodhicittasya yat puṇyaṃ tat kathaṃ hi pramīyatām, kena prakāreṇa nāma saṃkhyeyatām / ativipulatayā pramātumaśakyatvāt / etaduktamāryavīradattaparipṛcchāyām-

bodhicittāddhi yatpuṇyaṃ tacca rūpi bhavedyadi / ākāśadhātuṃ saṃpūrya bhūyaścottari tadbhavet //

iti //

yadi nāma sāmānyena nirdeśaḥ, tathāpi prasthānacittasyeti draṣṭavyam, tasyaiva prakṛtatvāt / punarapi tasyaiva viśeṣaṇamāha- jagadduḥkhauṣadhasya ceti / sarvaprāṇabhṛtāṃ kāyikacaitasikasarvaduḥkhanivartanatayā sarvavyādhiharaṇamahāgadasvabhāvatvāt / tadanena abhyudayaniḥśreyasahetutvaṃ bodhicittasya pratipāditaṃ bhavati / ato yuktameva asya asaṃkhyeyapuṇyatvamityuktaṃ bhavati //

kathaṃ punaretadyuktamityāśaṅkaya pratipādayannāha-

hitāśaṃsanamātreṇa buddhapūjā viśiṣyate / kiṃ punaḥ sarvasattvānāṃ sarvāsaukhyārthamudyamāt // bca_1.27 //

(bcp 16) sarvajagatparitrāṇāya buddho bhaveyamityadhyāśayena āśaṃsanāt prārthanāt kevalāt pratipattivikalādbodhicittādityarthaḥ / yatpuṇyaṃ bhavati tadbuddhapūjāmatiśete ityāgamādbhavatyeva puṇyaskandhaprasavahetuḥ / iti prathamasya bodhicittasya māhātmyamuktam / etadapi tatraivoktam-

gaṅgāvālikasaṃkhyāni buddhakṣetrāṇi yo naraḥ / dadyātsadratnapūrṇāni lokanāthebhya eva hi //

yaścaikaḥ prāñjalirbhūtvā cittaṃ bodhāya nāmayet / iyaṃ viśiṣyate pūjā yasyānto 'pi na vidyate //

iti //

kiṃ punaḥ sarvaduḥkhitajanānāṃ sarvaduḥkhamapanīya sarvasukhasaṃpannān kariṣyāmītyudyogakaraṇādatiśayavat puṇyaṃ na bhavati //

nanu hitāhitaprāptiparihārayoḥ svayameva sattvā vicakṣaṇāḥ / tat kutrodyamasyopayoga iti vṛttatritayena pariharannāha-

duḥkhamevābhidhāvanti duḥkhaniḥsaraṇāśayā / sukhecchayaiva saṃmohāt svasukhaṃ ghnanti śatruvat // bca_1.28 //

yasteṣāṃ sukharaṅkāṇāṃ pīḍitānāmanekaśaḥ / tṛptiṃ sarvasukhaiḥ kuryātsarvāḥ pīḍāścchinatti ca // bca_1.29 //

nāśayatyapi saṃmohaṃ sādhustena samaḥ kutaḥ / kuto vā tādṛśaṃ mitraṃ puṇyaṃ vā tādṛśaṃ kutaḥ // bca_1.30 //

duḥkhānniḥsaraṇābhiprāyāḥ prāṇātipātādibhirakuśalaiḥ karmabhiḥ kṣudhādiduḥkhapratīkāramicchantaḥ / duḥkhameva narakādiprapātavedanāsvabhāvam / abhidhāvanti tadabhimukhāḥ pravartante / duḥkhameva praviśantītyarthaḥ / śalabhā iva dīpaśikhāmiti / ata eva sukhecchayaiva sukhābhilāṣeṇaiva svasukhaṃ ghnanti śatruvat / ātmasukhaghātāya kathamātmanaiva śatravo bhavantīti cet, saṃmohād viparyāsavaśāt hitāhitaprāptiparihārayoḥ parijñānābhāvāt //

ato yaḥ puṇyātmā akāraṇavatsalaḥ teṣāṃ viparyastānāṃ sukharaṅkāṇāṃ sukhabhilāṣukāṇāṃ sarvaśo 'labdhasukhānāṃ pīḍitānāṃ duḥkhitānām / anekaśa iti anekairduḥkhaśatairbahudhā bādhitānāṃ tṛptimāpyāyanaṃ sarvasukhaiḥ kuryāt kāyikacaitasikaiḥ / yadi vā / anekaśaḥ anekaprakāraṃ tṛptiṃ sarvasukhaiḥ kuryāt iti yojanīyam / na sukhatṛptimātraṃ janayati, kiṃ tarhi sarvāḥ pīḍāḥ samastā duḥkhā vedanāścchinatti ca śamayati ca //

na kevalaṃ duḥkhapraśāntiṃ sukhatṛptiṃ ca karoti, nāśayatyapi saṃmoham, aparijñānamapi nivartayati /

apathamidameṣa panthā bhayamata ita eta gāta māsādam /

iti heyopādeyamārgaprakāśanāt / yaścaivaṃ paravyasananivartanaparatanno hitasukhavidhānatatparaśca (bcp 17) sarvabhūtānām / sādhustena samaḥ kutaḥ, tena mahātmanā tulyaḥ sādhuḥ kutaḥ? naiva kutaścidvidyate akāraṇaparamavatsalasvabhāvatvāt / kuto vā tādṛśaṃ mitram, hitasukhopasaṃhārapravaṇamānasaṃ paramaviśvāsasthānaṃ tādṛśaṃ tatsamaṃ mitram, suhṛt kutaḥ? naiva saṃbhavati / puṇyaṃ vā tādṛśaṃ kutaḥ? evaṃ viharato bodhisattvasya yat puṇyamupajāyate, tadapi na kenacitpuṇyena samānam //

kṛte yaḥ pratikurvīta so 'pi tāvatpraśasyate / avyāpāritasādhustu bodhisattvaḥ kimucyatām // bca_1.31 //

pūrvaṃ bhayasaṃkaṭavyasaneṣu upakṛtamanena ityupakṛte sati pratyupakāraṃ karoti yaḥ, so 'pi tāvat praśasyate lokena stūyate sādhurayamiti / yaḥ punaravyāpāritasādhuḥ anabhyarthitakalyāṇopanetā bodhisattvaḥ, kimucyatāṃ kimaparamabhidhīyatām? tasya praśaṃsā kartumaśakyetyarthaḥ //

dṛṣṭavyavahāramapekṣyāpi bodhisattvasya puṇyamāhātmyamudbhāvayannāha-

katipayajanasattradāyakaḥ kuśalakṛdityabhipūjyate janaiḥ / kṣaṇamaśanakamātradānataḥ saparibhavaṃ divasārdhayāpanāt // bca_1.32 //

parimitasattvānāmāhārapānamātradānasamādānamādiśan puṇyakarmā ayamiti pūjyate satkriyate janaiḥ satkarmaratairlokaiḥ / tadapi dānaṃ kṣaṇam, na sakalamahaḥ, tadardhaṃ vā, api tu muhūrtamekam / aśanakamātradānata iti / kutsitamaśanamaśanakam, apraṇītaṃ bhojanam, tadeva kevalaṃ tanmātram, tathāvidhavyañjanarahitam / tasya dānataḥ parityāgataḥ / katham? saparibhavam / kriyāviśeṣaṇametat / satiraskāraṃ namaskārāpuraḥsaram / haṭhātsatrāgāraṃ praviśataḥ khaṭacapeṭādinā prahṛtyeti yāvat / punaḥ kiṃbhūtāt? divasārdhayāpanāt praharadvayopastambhanāt / madhyānhe bhuktvā sāyaṃ punarāhārānveṣaṇāt //

bodhisattvasya punaretadviparītaṃ dānamiti pratipādayannāha-

kimu niravadhisattvasaṃkhyayā niravadhikālamanuprayacchataḥ / gaganajanaparikṣayākṣayaṃ sakalamanorathasaṃprapūraṇam // bca_1.33 //

na vidyate avadhiriyattā / iyadbhayaḥ śatasahasralakṣakoṭisaṃkhyebhyo dāsyāmi, tataḥ paraṃ neti na sattvānāṃ gaṇanayā dadāti, kiṃ tu niravadhisattvasaṃkhyayā / nāpi niyatakālam, (bcp 18) api tu niravadhikālam / kalpaśatasahasralakṣakoṭiśataṃ yāvaddāsyāmi, tataḥ paraṃ neti sāvadhikaṃ na dadāti / gaganeti / gaganamiva janāḥ gaganajanāḥ / yathā ākāśamaparyantaṃ tathā jano 'pītyarthaḥ / yadi vā / gaganaṃ ca janāśca te gaganajanāḥ / teṣāṃ parikṣayaḥ paryavadānam / yāvadākāśadhāturyāvacca sattvā na parinirvṛtāḥ tāvadavadhikam / yadvakṣyati-

ākāśasya sthitiryāvadyāvacca jagataḥ sthitiḥ / tāvanmama sthitirbhūyāt iti / [bodhi. 10.55]

tasmādakṣayam, na vidyate kṣayaḥ paryanto 'syeti kṛtvā / ayamabhiprāyaḥ- gaganajanaparikṣayāvadhi yaddānaṃ tadvastuto 'kṣayameva, teṣāṃ parikṣayābhāvāt / nāpi pratiniyataṃ vastu, api tu sakalamanorathasaṃprapūraṇam / yadyasyābhimataṃ tat sarvamanavadyamabhiprāyālhādanakaraṃ paramapremagauravasatkārapriyavacanapuraḥsaraṃ pramuditamanasā anuprayacchato bodhisattvasya kiṃ punaḥ pūjā na yujyate? tasya sutarāṃ yujyate iti yojyam / yaduktaṃ nārāyaṇaparipṛcchāyām-

na tadvastu upādātavyaṃ yasmin vastuni nāsya tyāgacittamutpadyate / na tyāgabuddhiḥ krameta / yāvat ayaṃ mamātmabhāvaḥ sarvasattvebhya utsṛṣṭaḥ parityaktaḥ, prāgeva bāhyāni vastūni / yasya yasya sattvasya yena yena yadyat kāryaṃ bhaviṣyati, tasmai tasmai tattaddāsyāmi / tatsaṃvidyamānaṃ hastaṃ hastārthikebhyo dāsyāmi, yāvat śiraḥ śirorthikebhyaḥ parityakṣyāmi, kaḥ punarvādo bāhyeṣu vastuṣu / yaduta dhanadhānyajātaruparajataratnābharaṇahayarathagajavāhanagrāmanagaranigamajanapadarājyarāṣṭrarājadhānīpattanadāsīdāsakarmakarapauruṣeyaputraduhitṛparivāreṣu / iti vistaraḥ //

evaṃ ca guṇaratnasamuccayasthāne parahitasukhavidhānaikaparamamahāvrate bodhisattve svātmahitakāmaiḥ svacittaṃ rakṣitavyaṃ prayatnataḥ ityupadarśayannāha-

iti sattrapatau jinasya putre kaluṣaṃ sve hṛdaye karoti yaśca / kaluṣodayasaṃkhyayā sa kalpān narakeṣvāvasatīti nātha āha // bca_1.34 //

ityevamuktakrameṇa sattrapattau sarvadā sukhadānapatau jinasya putre sugatasya sute / bodhisattve ityarthaḥ / kaluṣaṃ pāpacittaṃ sve hṛdaye ātmacittasaṃtāne karoti utpādayati durātmā yaḥ, sa narakeṣvāvasati iti nātho buddho bhagavānāha brūte / upānvadhyāḍvasaḥ iti karmatve prāpte adhikaraṇavivakṣā / kiyad yāvat kaluṣodayasaṃkhyayā kalpān / yāvataḥ kṣaṇāṃstatsaṃtāne kaluṣacittamutpadyate, tāvataḥ kalpān kaluṣacittakṣaṇasaṃkhyān narakeṣu tiṣṭhatīti bhāvaḥ / yaduktaṃ praśāntaviniścayaprātihāryasūtre-

(bcp 19) yāvanti mañjuśrīrbodhisattvo bodhisattvasyāntike pratighacittānyutpādayati avamanyanācittāni vā, tāvataḥ kalpāṃstena saṃnāhaḥ saṃnaddhavyaḥ- vastavyaṃ mayā mahānarakeṣu iti //

nanu tathāgatasya duṣṭacittena rudhiramutpādayato nāvīcau cittotpādanakṣaṇasaṃkhyayā kalpān avasthitiruktā / na tathāgatāt kaścidadhikataraḥ saṃbhavati trailokye / tat kathamidamatidurghaṭaṃ nīyate? satyam / na khalu yathābhūtamasmin naye vastutattvavyavasthā / sarvasya pravacanasya neyanītārthatayā vyavasthāpanāt / na hi kaścit tathāgate sadevako 'pi loko duṣṭacittamutpādayituṃ kṣamate / analpakalpasaṃkhyayā abhyāsena sarvasattveṣu maitracittasya sātmībhāvāt, nāsya kāye śastraṃ kramatīti maitracittasyānuśaṃsakathanāt / na ca karmaplutiriha vastuto darśitā / karmāvaraṇasya buddhānāṃ prahīṇatvāt / tasmādvaineyajanābhisaṃdhinā tadupadarśitaṃ na paramārthataḥ / bodhisattvāpakāre tu buddhatvameva samūlopaghātamupahataṃ bhavet / tathā ca sadevakasya lokasya arthaḥ upahato bhavet / yathāgamamidamuktam / paramārthamiha bhagavāneva jānāti / idamuktaṃ ca śraddhābalādhānāvatāramudrāsūtre-

yaḥ kaścinmañjuśrīḥ kulaputro vā kuladuhitā vā gaṅgānadīvālukāsamān stūpān vinipātayeddahedvā, yaścānyaḥ kulaputro vā kuladuhitā vā mahāyānādhimuktasya bodhisattvasya mahāsattvasya vyāpādakhilakrodhacittamutpādya ākrośayet paribhāṣayet, ayaṃ tato 'saṃkhyeyataraṃ pāpaṃ praviśati / tat kasmāddhetoḥ? bodhisattvanirjātā hi buddhā bhagavantaḥ, buddhanirjātāśca stūpāḥ sarvasukhopadhānāni ca sarvadevanikāyāśca / bodhisattvamasatkṛtya sarvabuddhā asatkṛtā bhavanti / bodhisattvaṃ satkṛtya sarvabuddhāḥ satkṛtā bhavanti / ityādi //

yasya punastatra prasannaṃ cittamutpadyate, tasya kiyat puṇyaphalamupajāyate, ityāha-

atha yasya manaḥ prasādameti prasavettasya tato 'dhikaṃ phalam / mahatā hi balena pāpakaṃ jinaputreṣu śubhaṃ tvayatnataḥ // bca_1.35 //

yasya punaḥ puṇyātmano manaḥ prasādamupayāti bodhisattve, prasavettasya tato 'dhikaṃ phalam, tasya prasannacittasya prasavedupajāyeta tato 'dhikaṃ phalaṃ tasmātpūrvakapāpaphalād bahutaraṃ puṇyakarmaphalaṃ vipākaviśeṣāt prasavedutpadyeta / yadi vā / tatsamadhikavipākaphalādhāyakaṃ karmaiva phalamucyate / adhikataraphalajanakaṃ karma upajāyate iti yāvat / uktaṃ ca niyatāniyatāvatāramudrāsūtre-

sacenmañjuśrīḥ daśasu dikṣu sarvalokadhātuṣu sarvasattvā utpāṭitākṣā bhaveyuḥ parikalpamupādāya / (bcp 20) atha kaścideva kulaputro vā kuladuhitā vā teṣāṃ sarvasattvānāṃ maitracittastānyakṣīṇi janayet parikalpamupādāya / yo 'nyo vā mañjuśrīḥ kulaputro vā kuladuhitā vā mahāyānādhimuktaṃ bodhisattvaṃ prasannacittaḥ paśyet, ayaṃ tato 'saṃkhyeyataraṃ puṇyaṃ prasavati / iti //

tasmādasmin mahati puṇyakṣetre śubhacittameva karaṇīyamātmajñaiḥ //

api ca / ito 'pi śubhacittameva kartumucitam / yasmānmahatā balena paramakṛcchreṇa pāpakaṃ pāpameva pāpakaṃ kutsitatvādvā duṣkṛtaṃ karma bodhisattveṣu kriyate, teṣāṃ sakalakāyavāṅyanaḥpracārasya prasādajanakatvāt / bodhicittaprabhāvācca na bodhisattveṣu kasyacidapakāracittamutpadyate / etaduktamāryamañjuśrīvimokṣe-

tadyathā kulaputra cintāmaṇiratnarājamukuṭāvabaddhānāṃ mahānāgarājñāṃ nāsti paropakramabhayam, evameva bodhicittamahākaruṇācintāmaṇiratnarājamukuṭāvabaddhānāṃ bodhisattvānāṃ nāsti durgatyapāyaparopakramabhayam / iti //

ataḥ kimarthamanarthopārjanaṃ kaṭukaphalaṃ teṣu prayatnataḥ prārabhyate? ata eva śubhaṃ tvayatnataḥ, saṃgrahavastvādibhiḥ sarvasattvahitasukhakarmakāritvāt pariśuddhakarmakāritayā, kvacidapi skhalitābhāvācca / aprayatnata eva prītiprasādaprāmodyamupajāyate teṣu / ataḥ kuśalaṃ punarayatnata eva prasūyate //

sāṃpratamutpāditabodhicitteṣu atiśayavatā ātmanā manaḥprasādamāviṣkurvan śāstrakārastān namasyannāha-

teṣāṃ śarīrāṇi namaskaromi yatroditaṃ tadvaracittaratnam / yatrāpakāro 'pi sukhānubandhī sukhākarāṃstān śaraṇaṃ prayāmi // bca_1.36 //

teṣāṃ puruṣakuñjarāṇāṃ śarīrāṇi ātmabhāvān namaskaromi praṇipatya vande / yatra yeṣu (yeṣāṃ?) saṃtāneṣu uditamutpannaṃ taduktānuśaṃsaṃ varacittaratnam / cittameva ratnaṃ cintāmaṇisadṛśam / varaṃ śreṣṭhaṃ sarvadāridyaduḥkhāpahāritvāt / tacca tadvaracittaratnaṃ ceti vigrahaḥ / taditi bhinnaṃ vā / iyaṃ ca adhikaguṇādhārasya satkṛtiḥ / aparamapi tadviśeṣaṇamāha- yatrāpakāro 'pīti / yeṣu paramakalyāṇahṛdayeṣu bodhisattveṣu apakāro 'pi parābhavo 'pi kṛtaḥ tatkartuḥ sukhānubandhī paraṃparayā sukhamāvahatīti / ayamabhiprāyaḥ- tatrāpakāraḥ kartumaśakyaḥ / saṃbhave vā kathaṃcit tadapakārameva nimittaṃ kṛtvā pravṛttānāṃ duṣṭābhiprāyāṇāṃ punaḥ kenacinnimittena tatprasādasamutpādanāt / tatra apakāro nirvāṇe sukhamanubandhāti / tadyathā maitrībalajātake [jātakamālā-8] pañcakānadhikṛtyoktam / bodhisattvapraṇidhānādvā apakāro 'pi sukhānubandhītyucyate / yadvakṣyati-

(bcp 21) abhyākhyāsyanti māṃ ye ca ye cānye 'pyapakāriṇaḥ / utprāsakāstathānye 'pi sarve syurbodhibhāginaḥ // iti // [bodhi. 3.16] athavā / yatrāpakāro 'pi yeṣāmapakāro 'pi mahākaruṇādhyāśayāt priyaputreṇa kṛta iva duḥkhaheturapi sukhameva janayati, yathā kṣāntiparicchede kathayiṣyāmaḥ / evaṃ sarvathā sukhahetutvāt sukhārthināṃ ratnākara iva ratnārthināmāśryaṇīyā bodhisattvā ityupadarśayati / sukhākarāṃstān śaraṇaṃ prayāmi / sukhasya ākarāḥ sarvasukhaikaprabhavatvāt / tān uktakrameṇa apakāre 'pi sukhahetūn / śaraṇaṃ prayāmi / te mama trāṇaṃ bhavantu iti bhāvaḥ //

iti prajñākaramativiracitāyāṃ bodhicaryāvatārapañjikāyāṃ bodhicittānuśaṃsāvivaraṇaṃ nāma prathamaḥ paricchedaḥ //

2. pāpadeśanā nāma dvitīyaḥ paricchedaḥ /

sāṃpratamevaṃ kṣaṇasaṃpatsamāgamaṃ durlabhamadhigamya viditabodhicittānuśaṃsaḥ bodhicittagrahaṇārthaṃ buddhabodhisattvānāmukhīkṛtya vandanapūjanaśaraṇagamanapāpadeśanāpuṇyānumodanabuddhādhyeṣaṇāyācanābodhipariṇāmanāṃ ca kurvannāha-

taccittaratnagrahaṇāya samyak pūjāṃ karomyeṣa tathāgatānām / saddharmaratnasya ca nirmalasya buddhātmajānāṃ ca guṇodadhīnām // bca_2.1 //

tasya samanantarapratipāditānuśaṃsasya cittaratnasya grahaṇāya svīkārāya / tadutpādayitumityarthaḥ / tathāgatānāṃ buddhānāṃ bhagavatāṃ pūjāṃ karomi / eṣo 'hamiti bodhicittagrāhako 'yamātmānaṃ nidarśayati / ayaṃ buddharatnasya nirdeśaḥ / saddharmaratnasya ceti āgamādhigamalakṣaṇasya / nirmalasyeti trikalyāṇatayā trikoṭiśuddhasya prakṛtiprabhāsvarasya ca / sarvadā sarvamalānāmasthānatvāt, kleśānāmāgantukatvāt, samastamalāpaharaṇapaṭutvācca / ayaṃ ca dharmaratnasya nirdeśaḥ / tadātmajānāṃ ca buddhasutānām / guṇodadhīnāṃ guṇaratnasamudrāṇām āryāvalokitamañjughoṣaprabhṛtīnām / ayaṃ tu saṃgharatnasya nirdeśaḥ / ityādau ratnatrayapūjāvidhiḥ / pūjāṃ karomīti sarvatra saṃbandhanīyam / samyagiti pūjāyā eva viśeṣaṇam / samyagaviparītaṃ yathā bhavati / tīvracittaprasādena vā grahaṇasya vā viśeṣaṇam / samyaggrahaṇāya atiśayaprasannacittena na parānurodhādinā / yathā gṛhītaṃ na punarbhraśyati iti //

pūjāmeva kathayannāha-

yāvanti puṣpāṇi phalāni caiva bhaiṣajyajātāni ca yāni santi / ratnāni yāvanti ca santi loke jalāni ca svacchamanoramāṇi // bca_2.2 //

yat parimāṇameṣāmiti yāvanti niravaśeṣāṇi / puṣpāṇi phalāni caiva / ākāśadhātuprasarāvadhīni sarvāṇyapīmāni aparigrahāṇi / ādāya buddhayā munipuṃgavebhyo niryātayāmyeṣa saputrakebhyaḥ iti sarvatra pūrveṣu yojanīyam / bhaiṣajyajātāni auṣadhaprakārāḥ / svacchamanoramāṇīti ratnānāmapi viśeṣaṇam //

mahīdharā ratnamayāstathānye vanapradeśāśca vivekaramyāḥ / latāḥ sapuṣpābharaṇojjvalāśca drumāśca ye satphalanamraśākhāḥ // bca_2.3 //

(bcp 23) devādilokeṣu ca gandhadhūpāḥ kalpadrumā ratnamayāśca vṛkṣāḥ / sarāṃsi cāmbhoruhabhūṣaṇāni haṃsasvanātyantamanoharāṇi // bca_2.4 //

mahīdharāḥ parvatāḥ / ratnamayā ratnasvabhāvāḥ / vivekaramyā iti vivekoparamyā manoharāḥ / vivekānukūlā iti yāvat / supuṣpābharaṇojjvalāśceti śobhanapuṣpāṇyevābharaṇāni maṇḍanāni tairujjvalā atibhrājiṣṇavaḥ / satphalanamraśākhā iti santi ca śobhanāni varṇagandharasasaṃpannāni tāni phalāni ceti tairnamrā avanatā bhūmilagnā iva śākhā yeṣāṃ te kalpadrumāḥ kalpavṛkṣāḥ / ambhoruhabhūṣaṇāni padmānyeva bhūṣaṇāni yeṣāṃ tāni tathā / haṃsasvanātyantamanoharāṇi haṃsānāṃ svanai rūtairatyantamanoharāṇi ramaṇīyāni tāni tathā //

akṛṣṭajātāni ca śasyajātānyanyāni vā pūjyavibhūṣaṇāni / ākāśadhātuprasarāvadhīni sarvāṇyapīmānyaparigrahāṇi // bca_2.5 //

akṛṣṭānyeva halavilekhanamantareṇaiva jātāni prādurbhūtāni / śasyajātāni vrīhiviśeṣāḥ / anyāni vā pūjyavibhūṣaṇāni pūjyānāmārādhyānāṃ vibhūṣaṇāni śobhākarāṇi / anyāni aparāṇi ākāśadhātuprasarāvadhīni ākāśadhātoḥ prasaro 'vakāśaḥ vistāro vā, tāvadavadhīni tatparyantāni / sarvāṇyapīmāni uktāni uktasadṛśāni aparigrahāṇi amamāni na kenacit svīkṛtānītyarthaḥ //

ādāya buddhyā munipuṃgavebhyo niryātayāmyeṣa saputrakebhyaḥ / gṛhṇantu tanme varadakṣiṇīyā mahākṛpā māmanukampamānāḥ // bca_2.6 //

ādāya buddhayā gṛhītvā manovijñānena / munipuṃgavebhyo munivṛṣabhebhyo niryātayāmi prayacchāmi / saputrakebhyaḥ sabodhisattvagaṇebhyaḥ / gṛhṇantu tanme svīkurvantu tadetat sarvaṃ mama pūjopahāravastu / varadakṣiṇīyā anuttaradakṣiṇāpātrāṇi buddhabodhisattvāḥ / mahākṛpāḥ sarvasattvahitasukhavidhānaikamanasaḥ / māṃ dīnaduḥkhitasattvamanukampamānāḥ karuṇāyamānāḥ / mamānugrahāyeti yāvat //

syādetat- kiṃ punarevaṃ manomayapūjāmātraṃ vidhīyate yāvatā tattadvastu manoharaṃ sākṣādeva kasmānnopanīyate ityāśaṅkayāha-

(bcp 24) apuṇyavānasmi mahādaridraḥ pūjārthamanyanmama nāsti kiṃcit / ato mamārthāya parārthacittā gṛhṇantu nāthā idamātmaśaktyā // bca_2.7 //

akṛtapuṇyo 'smi, ata eva mahādaridraḥ / puṇye sarvopakaraṇasaṃpattibhirbhavati / tadabhāvāt pūjārthamanyadupakaraṇaṃ mama nāsti kiṃcit / ato mamārthāya mama puṇyakāmatayā bhagavantaśca parārthacittāḥ parahitasukhābhilāṣiṇo mahākāruṇikatvāt / ato gṛhṇantu nāthā idamuktaṃ pūjopakaraṇaṃ mayā niryātitam / ātmaśaktyeti svasāmarthyena //

ayaṃ punarātmabhāvo mamāyatto 'sti / taṃ niryātayāmītyāha-

dadāmi cātmānamahaṃ jinebhyaḥ sarveṇa sarvaṃ ca tadātmajebhyaḥ / parigrahaṃ me kurutāgrasattvā yuṣmāsu dāsatvamupaimi bhaktyā // bca_2.8 //

ātmānaṃ ca prayacchāmi jinebhyaḥ / sarveṇa sarvaṃ ca sarvaprakāreṇa / ātmasvīkāraṃ parityajya tadātmajebhyo 'pi / māṃ pratigṛhṇīta naravṛṣabhāḥ / yuṣmāsu dāsatvaṃ dāsabhāvaṃ svīkaromi / na jīvikādilobhāt, api tu bhaktyā paramagauraveṇa / śraddhāvilena cetasetyarthaḥ //

nanu kaḥ punaratra guṇo 'stītyāha-

parigraheṇāsmi bhavatkṛtena nirbhīrbhave sattvahitaṃ karomi / pūrvaṃ ca pāpaṃ samatikramāmi nānyacca pāpaṃ prakaromi bhūyaḥ // bca_2.9 //

bhavatkṛtena yuṣmadīyena mahadāśrayeṇa vigatabhayaḥ saṃsāre lokānāṃ hitamarthaṃ saṃpādayāmi / mahadāśraye 'pi nākuśalakarmāvṛtasya svahitakaraṇe 'pi sāmarthyamastītyāha- pūrvaṃ cetyādi / pūrvamaparijñānāt kṛtamakuśalakarma samatikramāmi, vidūṣaṇāsamudācārādibhirnirharāmi / samatikrāmatītyukte samatikramāmītyuktaṃ śābdavyavahāreṣvanādarāt, arthapratiśaraṇatādhātupradhānatvācca / aparaṃ ca pāpaṃ na punaḥ karomi / āyatyāṃ punarakaraṇasaṃvaraṃ vidadhe //

iti sarvamātmaniryātanāprabhṛtipūjopahāraṃ niryātya punarviśeṣeṇa pūjāṃ vidhātumāha-

ratnojjvalastambhamanorameṣu muktāmayodbhāsivitānakeṣu / svacchojjvalasphāṭikakuṭṭimeṣu sugandhiṣu snānagṛheṣu teṣu // bca_2.10 //

(bcp 25) ratnairindranīlādibhirujjvalāḥ prabhāsvarā ye stambhāḥ tairmanoharāḥ kamanīyāḥ / teṣu snānagṛheṣu snānaṃ karomīti yojyam / punaḥ kiṃbhūteṣu? muktāmayā mauktikaracanākhacitā udbhāsinaḥ udbhāsvarāḥ vitānā iva vitānakāḥ yeṣu te tathā, teṣu / svacchāḥ sunirmalāḥ , ujjvalā dīptimantaḥ, sphaṭikasyeme sphāṭikāḥ, kuṭṭimāḥ bhūmiracanāviśeṣā yeṣu, teṣu / sugandhiṣu kṛṣṇāgurucandanādidhūpitavāsiteṣu / snānāya gṛhāḥ teṣu //

manojñagandhodakapuṣpapūrṇaiḥ kumbhairmahāratnamathairanekaiḥ / snānaṃ karomyeṣa tathāgatānāṃ tadātmajānāṃ ca sagītivādyam // bca_2.11 //

udakaṃ ca puṣpāṇi ca manojñagandhāni ca tāni / taiḥ pūrṇāḥ kumbhā ghaṭāḥ, taiḥ / mahāratnamayaiḥ mahānti vaidūryā(dī)ni ca ratnāni ca tāni, tatsvabhāvaiḥ / anekaiḥ śatasahasrakoṭibhiḥ / sagītavādyaṃ saha manoharagītanṛttamurajādivādyaiḥ //

pradhūpitairdhautamalairatulyairvastraiśca teṣāṃ tanumunmṛṣāmi / tataḥ suraktāni sudhūpitāni dadāmi tebhyo varacīvarāṇi // bca_2.12 //

pradhūpitairaguruprabhṛtidhūpaiḥ / dhautamalaiḥ prakṣālitakalmaṣaiḥ / nirmalairityarthaḥ / atulyairapratisamaiḥ / vastrairdukūlaiḥ / teṣāṃ tathāgatānāṃ tadātmajānāṃ ca / tanuṃ śarīram / unmṛṣāmi saṃmārjayāmi / tatastasmādunmarṣaṇānantaram / suraktāni śobhanarāgaiḥ suṣṭhu vā raktāni / śobhanadhūpena dhūpitāni / dadāmi tebhyo jinebhyaḥ / varacīvarāṇi anuttarāṇyācchādanāni //

divyairmṛduślakṣṇavicitraśobhairvastrairalaṃkāravaraiśca taistaiḥ / samantabhadrājitamañjughoṣalokeśvarādīnapi maṇḍayāmi // bca_2.13 //

divyairdivibhavairdevārhaiḥ / mṛdūni ca sukumārasparśāni, ślakṣṇāni ca sūkśmāṇi / vicitrā nānāvarṇakṛtā śobhā yeṣāṃ tairvastraiḥ / alaṃkāravaraiśca vibhūṣaṇapradhānaiḥ / taistairiti mukuṭakaṭakakeyūrahāranūpurādibhiḥ / samantabhadrājitamañjughoṣalokeśvarādīnapi bodhisattvān maṇḍayāmi alaṃkaromi //

sarvatrisāhasravisārigandhairgandhottamaistānanulepayāmi / sūttaptasūnmṛṣṭasudhautahemaprabhojjvalān sarvamunīndrakāyān // bca_2.14 //

(bcp 26) sahasraṃ caturdvīpikānāṃ tathā candrasūryamerūṇāṃ pratyekaṃ kāmadevānāṃ brahmalokānāṃ ca / sāhasraścūliko mataḥ / sa eva sahasraguṇite dvisāhasra / tatsahasraṃ trisāhasraḥ / śatakoṭiḥ cāturdvīpikānāmityarthaḥ / evaṃ sarvāsu dikṣu lokadhāturananto 'paryantaśca / sarvatrisāhastrāṇi / visartuṃ śīlaṃ yeṣāṃ te tathā / tathāvidhā gandhāḥ parimalā yeṣāṃ te tathā / tairgandhottamairyakṣakardamaharicandanādibhiḥ / tān munīndrakāyānanulepayāmi samālabhe / kiṃbhūtān? sūttaptaṃ puṭapākādinā pariśodhitāntarmalam / sūnmṛṣṭaṃ roṣāṇādimaṇisaṃmārjitam / sudhautaṃ kṣārāmlalavaṇādiprakṣālitabahirmalam / tathābhūtaṃ ca taddhema ceti / tasya prabhā, dyutirityarthaḥ / tadvadujjvalān dyutimataḥ / etacca yathālokaprasiddhitaḥ kathitam / na tu tathāgatakāyaśobhāyā laukikaṃ kiṃcidupamānamasti //

sāṃprataṃ mālyapūjāmupakṣipati- māndāravendīvaramallikādyaiḥ sarvaiḥ sugandhaiḥ kusumairmanojñaiḥ / abhyarcayābhyarcyatamān munīndrān stragbhiśca saṃsthānamanoramābhiḥ // bca_2.15 //

māndāravaṃ deveṣu puṣpaviśeṣaḥ / indīvaramutpalam / mallikā vārṣikī / etatpramukhaiḥ sarvaiḥ śobhanagandhaiḥ puṣpairmanohāribhiḥ pūjyatamān munīndrān pūjayāmi / stragbhiśca mālābhiśca grathanaracanāviśeṣakamanīyābhiḥ //

dhūpapūjāmāha-

sphītasphuradgandhamanoramaiśca tān dhūpameghairupadhūpayāmi /

sphītā māṃsalāḥ / sphurantaśca digantavyāpinaḥ bahulagandhodgāriṇo vā / tādṛśā gandhā yeṣāṃ dhūpameghānāṃ te tathā, taiḥ / dhūpā meghā iva ambaratalāvalambibimbāḥ / upamitaṃ vyāghrādibhiḥ iti samāsaḥ / dhūpānāṃ vā meghāḥ, taiḥ, meghavadudgacchadbhirityarthaḥ / tāniti munīndrān upadhūpayāmi //

naivedyapūjāmāha- bhojyaiśca khādyairvividhaiśca peyaistebhyo nivedyaṃ ca nivedayāmi // bca_2.16 // bhojyaṃ yanmukhamāpūrya bhujyate / khādyaṃ yat kavalaśaḥ / chedyaṃ dhṛtapūrādi / peyaṃ yat pīyate eva pānakādi / ebhirvividhairnānāprakāropasaṃskṛtaiḥ / tebhyo munīndrebhyo nivedyaṃ ca nivedayāmi //

dīpapūjāmāha-

ratnapradīpāṃśca nivedayāmi suvarṇapadmeṣu niviṣṭapaṅktin / (bcp 27) gandhopalipteṣu ca kuṭṭimeṣu kirāmi puṣpaprakarān manojñān // bca_2.17 //

ratnamayāḥ pradīpāḥ tān / niviṣṭā paṅktirmālā yeṣāṃ te tathā / kveti? suvarṇapadmeṣu / sāpekṣatve 'pi gamakatvāt samāsaḥ / gandhopalipteṣu candanakuṅkumādigandhaiścarciteṣu //

pralambamuktāmaṇihāraśobhānābhāsvarān diṅmukhamaṇḍanāṃstān / vimānameghān stutigītaramyān maitrīmayebhyo 'pi nivedayāmi // bca_2.18 //

pralambairmuktāmaṇihāraiḥ śobhā yeṣāṃ tān vimānameghān vimānasamūhān ālokakāriṇaḥ sarvadikūśobhākarān //

suvarṇadaṇḍaiḥ kamanīyarūpaiḥ saṃsaktamuktāni samucchritāni / pradhārayāmyeṣa mahāmunīnāṃ ratnātapatrāṇyatiśobhanāni // bca_2.19 //

kanakamayadaṇḍaiḥ kāntimatsaṃsthānaiḥ / muktākhacitāni ratnamayāni chatrāṇi / samucchritānīti uddaṇḍitāni //

idānīṃ pūjopahāramupasaṃharannāha-

ataḥ paraṃ pratiṣṭhantāṃ pūjāmeghā manoramāḥ / tūryasaṃgītimeghāśca sarvasattvapraharṣaṇāḥ // bca_2.20 //

itaḥ prabhṛti ete pūjāmeghā mayā niryātitāḥ, anye vā devādibhirupanītāḥ kalpaṃ vā kalpāvaśeṣaṃ vā pratiṣṭhantām prakarṣavṛttisthitā bhavantu / tūryasaṃgītimeghāśca tūryāṇi murajādivādyāni / saṃgītayaḥ sametya gītayaḥ / samudāyagītānītyarthaḥ / athavā / saṃgītakāni nuttagītavāditāni samuditānyucyante / teṣāṃ meghāḥ anekasamudāyāḥ / te ca sarvasattvapraharṣaṇāḥ sarvasattvānāṃ pramodakāriṇaḥ, na punaraśakyaśravaṇāḥ / pratiṣṭhantāmiti saṃbandhaḥ //

sāmānyenābhisaṃkṣipya saddharmādiṣu pūjāmāha-

sarvasaddharmaratneṣu caityeṣu pratimāsu ca / puṣparatnādivarṣāśca pravartantāṃ nirantaram // bca_2.21 //

dvādaśāṅgapravacanātmakeṣu sarvasaddharmaratneṣu / ratnamiva ratnaṃ vastutattvālokakāritvāt, paramanirvṛtihetutvācca / stūpeṣu bhagavaccaityeṣu / pratimāsu ceti buddhabodhisattvavigrahapratikṛtiṣu / puṣpavṛṣṭayo ratnavṛṣṭayaśca / ādiśabdāccandanacūrṇavastrādivarṣāḥ / nirantaramiti āsaṃsāramanavacchinnam //

(bcp 28) anuttarapūjāmatidiśannāha-

mañjughoṣaprabhṛtayaḥ pūjayanti yathā jinān / tathā tathāgatānnāthān saputrān pūjayāmyaham // bca_2.22 //

mañjughoṣasamantabhadrājitalokanāthapramukhā daśabhūmīśvarā bodhisattvāḥ yathā yena adhyāśayena tathāgatān pūjayanti, tathā tena adhimokṣeṇa ahamapi tathāgatān saha putraiḥ bodhisattvagaṇaiḥ pūjayāmi //

stutipūjāmāha-

svarāṅgasāgaraiḥ stotraiḥ staumi cāhaṃ guṇodadhīn / stutisaṃgītimeghāśca saṃbhavantveṣvananyathā // bca_2.23 //

svarāḥ sapta gāndhārādayaḥ / teṣāmaṅgāni prabhedāḥ kāmodādayaḥ / teṣāṃ sāgaravadatibāhulyāt sāgarāḥ, taiḥ stotraiḥ / stutaya eva saṃgītayaḥ, stutīnāṃ vā saṃgītayaḥ samudāyāḥ / tāsāṃ meghāḥ saṃbhavantu upatiṣṭhantām / eṣu buddhabodhisattveṣu / ananyathā aviparītā yathā mayopakalpitāstathaivetyarthaḥ //

buddhadharmasaṃgharatneṣu praṇāmapūjāmāha-

sarvakṣetrāṇusaṃkhyaiśca praṇāmaiḥ praṇamāmyaham / sarvatryadhvagatān buddhān sahadharmagaṇottamān // bca_2.24 //

yāvanti daśasu dikṣu buddhakṣetrāṇi, teṣu yāvanto 'ṇavaḥ, tatsaṃkhyaiḥ praṇāmaiḥ / sarvatryadhvagatāniti atītapratyutpannānāgatān tathāgatān / kiṃbhūtān? sahadharmagaṇottamān gaṇānāmuttamo 'grabhūto bodhisattvagaṇaḥ / dharmaśca gaṇottamaśca tābhyāṃ saha //

tathāgatastūpeṣu praṇāmamāha-

sarvacaityāni vande 'haṃ bodhisattvāśrayāṃstathā / namaḥ karomyupādhyāyānabhivandyān yatīṃstathā // bca_2.25 //

ūrdhvatiryagadhastanāsu diśāsu vidiśāsu ca / saśarīrāśarīreṣu stūpeṣu praṇamāmyahamityarthaḥ / bodhisattvāśrayānapīti jātakāvadānajanmādisthānāni / abhivandyāniti vṛddhān vandanārhān / tadanena pūjāvandanāvidhiruktaḥ //

ayaṃ ca pūjāvidhistrisamayarāje kathitaḥ / yathoktam- sthalajā ratnaparvatāḥ / jalajā ratnaparvatāḥ / sthalajajalajāni ratnāni daśadigavasthitāni / amamānyaparigrahāṇi / deyānītyuktam / anayā ca diśā sarvabhaiṣajyāni sarvarasāyanāni sarvasalilāni / anavadyāni āmaṇḍalāni (?) sarvakāñcanamaṇḍalāni / vivṛtteṣu vā lokadhātuṣu paramarasasparśasaṃpannā bhūparpaṭakā amṛtalatā / akṛṣṭoptāḥ śālayaḥ / sarvottarakurudvīpeṣu ca pariśuddheṣu ca lokadhātuṣu ye ramaṇīyāḥ paribhogāḥ /

yathā āryaratnameghe cāha-

sa yānīmāni sūtrānteṣu udārāṇi pūjopasthānāni śṛṇoti, tānyāśayatastīvreṇādhyāśayena (bcp 29) buddhabodhisattvebhyaḥ pariṇāmayati / tathā sa vividhāni pūjopasthānānyanuvicintayati iti //

sāṃprataṃ ratnatrayaśaraṇagamanapūrvakaṃ pāpadeśanāmāha-

buddhaṃ gacchāmi śaraṇaṃ yāvadā bodhimaṇḍataḥ / dharmaṃ gacchāmi śaraṇaṃ bodhisattvagaṇaṃ tathā // bca_2.26 //

trāṇārthaṃ śaraṇārtham / gamanaṃ tadājñāparipālanam / yo hi yaṃ śaraṇaṃ gacchati, sa tadājñāṃ nātikramatīti bhāvaḥ / bodhimaṇḍata iti / maṇḍaśabdo 'yaṃ sāravacanam, ghṛtamaṇḍa iti yathā / tathā ca sati bodhipradhānaṃ yāvat / yāvat samyaksaṃbodhiṃ nādhigacchāmi ityarthaḥ //

vijñāpayāmi saṃbuddhān sarvadikṣu vyavasthitān / mahākāruṇikāṃścāpi bodhisattvān kṛtāñjaliḥ // bca_2.27 //

vijñāpayāmītyanena buddhabodhisattvānāmagragatamātmānaṃ dhyātvā adhyāśayenaitadvaktavyamityupadarśitam / kṛtāñjaliriti kāyavijñaptiruktā / añjaliḥ karadvayena saṃpuṭaṃ kṛtvetyarthaḥ //

anādimati saṃsāre janmanyatraiva vā punaḥ / yanmayā paśunā pāpaṃ kṛtaṃ kāritameva vā // bca_2.28 //

yaccānumoditaṃ kiṃcidātmaghātāya mohataḥ / tadatyayaṃ deśayāmi paścāttāpena tāpitaḥ // bca_2.29 //

anādimatīti pūrvajanmaparaṃparāsu / janmanyatraiveti asminnapi janmani, na kevalaṃ pūrvatra / paśuneti mohabahulatāmātmano darśayati / trividhaṃ karma kāyavāṅmanobhistatra kṛtam / tribhirapi kāritamiti / vāṅmanobhyāmanumoditamityapi / ātmaghātāyeti tatpāpakarmaphalasya mama ātmanyeva vipākāt / tadatyayamiti tadāpattim / deśayāmi prakāśayāmi uttānīkaromi, na pracchādayāmi / paścāttāpeneti akuśalakarmaṇo narakādau duḥkhavipākaśravaṇāt //

adhunā yathāpradhānamatyayadeśanāmāha-

ratnatraye 'pakāro yo mātapitṛṣu vā mayā / guruṣvanyeṣu vā kṣepāt kāyavāgbuddhibhiḥ kṛtaḥ // bca_2.30 //

ratnatraye iti anuttaraguṇakṣetre / mātetyādinā upakārikṣetre / tatrāpakārasya vistaratīvraduḥkhavipākatvāt //

anekadoṣaduṣṭena mayā pāpena nāyakāḥ / yatkṛtaṃ dāruṇaṃ pāpaṃ tatsarvaṃ deśayāmyaham // bca_2.31 //

anekadoṣaduṣṭeneti rāgādikleśadūṣitena, na svatantreṇetyarthaḥ //

*** [added:] *** kathaṃ ca niḥsarāmyasmān nityodvego 'smi nāyakāḥ / mā bhūnme mṛtyuracirād akṣīṇe pāpasaṃcaye // bca_2.32 //

(bcp 30) pāpakarmaṇi saṃvegamāha-

kathaṃ ca niḥsarāmyasmāt paritrāyata satvaram /

kathaṃ kena prakāreṇa / asmādaśubhāt / satvaraṃ śīghram / keyaṃ tvarā bhavata ityāha- mā mamākṣīṇapāpasya maraṇaṃ śīghrameṣyati // bca_2.33 // yāvat pāpakṣayaṃ na karomi, tāvanmama mṛtyurbhaviṣyati na / anyathā durgati gamanabhayāt //

nanu ca akṛtapāpaparikṣayasya bhavato mṛtyoḥ ko 'vakāśa ityāha-

kṛtākṛtāparīkṣo 'yaṃ mṛtyurviśrambhaghātakaḥ / svasthāsvasthairaviśvāsya ākasmikamahāśaniḥ // bca_2.34 //

idaṃ kṛtamidamakṛtaṃ tāvaditi na parīkṣate mṛtyuḥ / viśrambho viśvāsaḥ / tena ghātakaḥ / nāpi nīrogo 'haṃ yuvā balavatkāyo veti viśvasanīyam / kutaḥ? ākasmikamahāśaniriti acintitavajrapātasadṛśaḥ //

yadyevaṃ pāpād bhayam, kimarthaṃ tarhi tat kṛtamityāha-

priyāpriyanimittena pāpaṃ kṛtamanekadhā / sarvamutsṛjya gantavyamiti na jñātamīdṛśam // bca_2.35 //

priya ātmā ātmīyaśca, apriyastadapakārī / priyasya hitasukhamapriyasya ca tadviparītamicchatā kṛtaṃ pāpamanekadhā prāṇātipātādattādānādibhedenānekaprakāram / nanu sarvametannacireṇa parityajya gantavyam, tat kimiti nirarthakaṃ pāpakamupacīyate ityāha- sarvamityādi / sarvaṃ priyamapriyaṃ vā utsṛjya vihāya gantavyam / etattu na mayā mugdhena paribhāvitam //

apriyā na bhaviṣyanti priyo me na bhaviṣyati / ahaṃ ca na bhaviṣyāmi sarvaṃ ca na bhaviṣyati // bca_2.36 //

kimidānīṃ pariśiṣṭamavasthitamityāha-

tattatsmaraṇatāṃ yāti yadyadvastvanubhūyate / svapnānubhūtavatsarvaṃ gataṃ na punarīkṣyate // bca_2.37 //

yadyadvastviti sukhaheturduḥkhaheturvā / anubhūyate saṃvedyate / kathaṃ punarevamityāhasvapnānubhūtavaditi / yathā svapnāvasthāyāmupalabdhaṃ vinaṣṭaṃ na punarīkṣyate, tatra smaraṇamātrameva avaśiṣyate //

tathā anyadapi sarvaṃ priyādisaṃgatamasthiramasminneva janmanītyupadarśayannāha-

ihaiva tiṣṭhatastāvadgatā naike priyāpriyāḥ / tannimittaṃ tu yatpāpaṃ tatsthitaṃ ghoramagrataḥ // bca_2.38 //

(bcp 31) tiṣṭhataḥ āsīnasyaiva mama paśyataḥ / gatā anityatayā grasitāḥ / yadyevaṃ tarhi tadarthaṃ kṛtaṃ pāpamapi taiḥ saha yāsyatītyāha- tannimittamityādi / teṣāṃ priyādīnāṃ nimittaṃ tadarthaṃ yatkṛtaṃ pāpaṃ tatpunaragrata eva sthitaṃ me / tanmayā saha yāsyatītyarthaḥ //

nanvevaṃ paśyannapi kathaṃ mūrcchito 'sītyāha-

evamāgantuko 'smīti na mayā pratyavekṣitam / mohānunayavidveṣaiḥ kṛtaṃ pāpamanekadhā // bca_2.39 //

nāhaṃ kasyacit paritaḥ, na me kaścit, ityevaṃ na mayā pratyavekṣitaṃ vicāritam / tena kāraṇena / anunaya āsaṅgaḥ ātmani ātmīye ca / vidveṣaḥ pratighaḥ / tat pratikūlamācarati //

cirataramatidīrghāyuṣo bhavataḥ kā maraṇāśaṅkā? tat kimevaṃ bibheṣītyāha-

rātriṃdivamaviśrāmamāyuṣo vardhate vyayaḥ / āyasya cāgamo nāsti na mariṣyāmi kiṃ nvaham // bca_2.40 //

aharniśam / āyuṣo vardhate vyayaḥ, āyuḥsaṃskārāḥ kṣīyante / aviśrāmamiti kṣaṇamapi na vyayavicchittirasti / āgamanamāgamaḥ anupraveśaḥ / sa ca āyasya upacayasya leśato 'pi na saṃvidyate tadahamevaṃ kiṃ nu na mariṣyāmi? api tu ciramapi sthitvā jīvitaṃ maraṇaparyavasānamiti //

syādetat / yannimittaṃ kṛtaṃ pāpaṃ te 'pi na narakādiṣu tatphaladuḥkhānubhavakāle saṃvibhāgino bhaviṣyanti / tat kimiti kātarabhāvamavalambase ityatrāha / āstāṃ tāvatparaloke-

iha śayyāgatenāpi bandhumadhye 'pi tiṣṭhatā / mayaivekena soḍhavyā marmacchedādivedanā // bca_2.41 //

iha asminneva bhave maraṇāntikādiduḥkhabādhāyāṃ svajanaparijanamadhyagatenāpi / marmacchedādivedaneti pipāsāgātrasaṃtāpādiduḥkhaṃ mayaivaikena soḍhavyam / na tatra alpīyānapi bhāgo 'nyasya saṃbhavati //

kiṃ punarnarakādāvityāha-

yamadūtairgṛhītasya kuto bandhuḥ kutaḥ suhṛt / puṇyamekaṃ tadā trāṇaṃ mayā tacca na sevitam // bca_2.42 //

kāladūtairgṛhītasya adhiṣṭhitasya galapāśena baddhasya mudgarairākoṭyamānasya aṭavīkāntāragahanakaṇṭakaviṣamaśilāśakalairvitudyamānacaraṇasya asahāyasya karmānubhavabhūmiṃ nīyamānasya / kuto bandhuḥ kutaḥ suhṛt iti na tatra kecit sahāyāsrāṇaṃ saṃbhavanti / puṇyamevaikaṃ tadā trāṇaṃ syāt / mayā tacca na sevitam, tacca puṇyaṃ trāṇabhūtaṃ mayā nopārjitam //

(bcp 32) punarapi pāpāt saṃvegamāha-

anityajīvitāsaṅgādidaṃ bhayamajānatā / pramattena mayā nāthā bahu pāpamupārjitam // bca_2.43 //

asthāyini jīvite / āsaṅgādāgrahāt / idamāgāmi narakādiduḥkhabhayamajānatā apaśyata / pramatteneti yauvanarūpadhanādhipatyādimadamattena //

kiṃ punarevaṃ saṃvegabahulo bhavānityāha-

aṅgacchedārthamapyadya nīyamāno viśuṣyati / pipāsito dīnadṛṣṭiranyadevekṣate jagat // bca_2.44 //

atyalpamidaṃ karacaraṇādicchedanaṃ duḥkhaṃ narakaduḥkhāt / tathāpi tatreyamavasthā bhavati / viśuṣyati sarvātmanā śoṣamupayāti / pipāsitastṛṣṇārtaḥ / dīnadṛṣṭiriti kṛpaṇadṛṣṭiḥ / anyadeveti viparītam //

narakaduḥkhasyātiśayamāha-

kiṃ punarbhairavākārairyamadūtairadhiṣṭhitaḥ / mahātrāsajvaragrastaḥ purīṣotsargaveṣṭitaḥ // bca_2.45 //

kātarairdṛṣṭipātaiśca trāṇānveṣī caturdiśam /

bhairavākārairiti bhayaṃkararūpaiḥ / adhiṣṭhitaḥ ātmasātkṛtaḥ / mahātrāsanajvarastena grasto gṛhītaḥ / purīṣamuccāraḥ, tasyotsargo vinirgamaḥ, tena veṣṭito viliptaḥ / kātarairiti dīnaiḥ / caturdiśaṃ trāṇānveṣī / kathamityāha- ko me mahābhayādasmātsādhustrāṇaṃ bhaviṣyati // bca_2.46 // sādhurakāraṇavatsalaḥ / trāṇaṃ paritrātā //

trāṇaśūnyā diśo dṛṣṭvā punaḥ saṃmohamāgataḥ / tadāhaṃ kiṃ kariṣyāmi tasmin sthāne mahābhaye // bca_2.47 //

evamapi yadā kutracidapi trāṇaṃ na paśyati, tadā trāṇābhāvāt punaḥ saṃmohamāgataḥ / tadā tasmin kāle kiṃ kariṣyāmi? sarvakriyāsu asamarthaḥ san / tasmin sthāne pratāpanādinarakabhūmau //

tasmādidānīmeva pratīkārānuṣṭhānaṃ yuktamityāha-

adyaiva śaraṇaṃ yāmi jagannāthān mahābalān / jagadrakṣārthamudyuktān sarvatrāsaharān jinān // bca_2.48 //

jagatāṃ nāthān sarvāśvāsanirvṛtisthānabhūtān nāyakān / mahābalāniti sarvatrāpratihatasāmarthyān / jagadrakṣārthamudyuktāniti sarvasattvaparitrāṇārthamudyuktān / evamapi (bcp 33) trāṇānāśritya bhayopaśamo na syāt, tadā kiṃ śaraṇagamanenetyatrāha- sarvatrāsaharāniti sarvavyasanāpahartṝn //

dharmasaṃghaśaraṇagamanamāha-

taiścāpyadhigataṃ dharmaṃ saṃsārabhayanāśanam / śaraṇaṃ yāmi bhāvena bodhisattvagaṇaṃ tathā // bca_2.49 //

tairbuddhairbhagavadbhiḥ / adhigataṃ sākṣātkṛtam / dharmaṃ nirvāṇamityarthaḥ / saṃsārabhayanāśanaṃ sarvakleśapratipakṣatvāt / bhāveneti paramaprasādena na māyāśāṭhyena vicikitsayā vā / bodhisattvagaṇamiti saṃgham / tatheti bhāvena //

idānīṃ yathāpradhānaṃ bodhisattvebhya ātmaniryātanaṃ kurvannāha-

samantabhadrāyātmānaṃ dadāmi bhayavihvalaḥ / punaśca mañjughoṣāya dadāmyātmānamātmanā // bca_2.50 //

samantabhadrāya bodhisattvāya / ātmānaṃ dadāmi niryātayāmi / bhayavihvalo narakādibhayavyākulaḥ / punaśca mañjughoṣāya mañjunāthāya / ātmaneti na parapreraṇayā / svayameva prasannacitta ityarthaḥ //

taṃ cāvalokitaṃ nāthaṃ kṛpāvyākulacāriṇam / viraumyārtaravaṃ bhītaḥ sa māṃ rakṣatu pāpinam // bca_2.51 //

āryāvalokiteśvaram / kṛpayā vyākulaṃ caritaṃ śīlamasyeti kṛpāvyākulacāriṇamiti tasyaiva viśeṣaṇam / viraumi āravaṃ karomi / ārtaravamiti kriyāviśeṣaṇam / duḥkhadīnakātarasvaram / bhītaḥ trastaḥ pāpakarmaphalāt / sa bhagavānavalokitaḥ māṃ rakṣatu pāpinaṃ kṛtapāpaṃ māṃ trāyatām //

āryamākāśagarbhaṃ ca kṣitigarbhaṃ ca bhāvataḥ / sarvān mahākṛpāṃścāpi trāṇānveṣī viraumyaham // bca_2.52 //

āryamākāśagarbhaṃ ca bodhisattvam / kṣitigarbhaṃ ca bodhisattvam / viraumīti pareṇa saṃbandhaḥ / sarvān mahākṛpāṃścāpi, ye 'pi na nāmagrahaṇenodāhṛtāḥ, tānapi paramakāruṇikān paraduḥkhaduḥkhinaḥ //

yaṃ dṛṣṭvaiva ca saṃtrastāḥ palāyante caturdiśam / yamadūtādayo duṣṭāstaṃ namasyāmi vajriṇam // bca_2.53 //

yasya darśanamātreṇa yamadūtādayaḥ / ādiśabdādanye 'pi yakṣarākṣasādayo duṣṭā bhītāḥ santaḥ palāyante, dūramapagacchanti / taṃ namasyāmi namaskaromi / vajriṇamiti vajramasyāstīti vajrapāṇiṃ bodhisattvam / tadanena śaraṇagamanādinā pāpakṣayārthamāśrayabalamupadarśitam / yaduktaṃ caturdharmakasūtre-

(bcp 34) tatrāśrayabalaṃ buddhadharmasaṃghaśaraṇagamanamanutsṛṣṭabodhicittatā ca / sa balavatsaṃniśrayeṇa na śakyate pāpenābhibhavitum / iti //

punaranyathātvaśaṃkāṃ nirākartumāha-

atītya yuṣmadvacanaṃ sāṃprataṃ bhayadarśanāt / śaraṇaṃ yāmi vo bhīto bhayaṃ nāśayata drutam // bca_2.54 //

atikramya yuṣmadājñām / sāṃpratamidānīm / bhayadarśanāt, tadatikrame yasmādaniṣṭaphalasaṃbhavadarśanāt, vo yuṣmān śaraṇaṃ yāmi bhītaḥ aniṣṭaphalāduttrastaḥ / tasmātpunaranyathāśaṅkā na kartavyā / ato bhayaṃ nāśavata, pūrvakṛtapāpād bhayamapanayata / drutaṃ śīghram / mametyadhyāhāryam //

nanu evamapi kaḥ pratyeṣyati / tvadvacanādityāśaṅkaya punaratrārthe dṛḍhatāmāha-

itvaravyādhibhīto 'pi vaidyavākyaṃ na laṅghayet / kimu vyādhiśatairgrastaścaturbhiścaturuttaraiḥ // bca_2.55 //

itvaro gatvaro naśvaro 'cirasthāyītyarthaḥ / laghurvā / sa cāsau vyādhiśceti, tasmād bhayena / vaidyavākyaṃ na laṅghayet vaidyopadeśaṃ nātikramet / mā ayaṃ vyādhirmama vṛddhimupagacchet / kimu kiṃ punaḥ / vyādhiśatairgrasto laṅghayet / caturbhiścaturuttarairiti caturadhikaiścaturbhiḥ śatairityarthaḥ / śatamakālamṛtyūnām, ekaṃ kālamaraṇamityekottaraṃ śataṃ mṛtyūnām / te ca pratyekaṃ vātapittaśleṣmakṛtāḥ tatsaṃnipātakṛtāśceti caturuttarāṇi catvāri śatāni bhavanti / iti kāraṇabhedātkāryabhedaḥ, kāryabhedācca kāraṇabhedavyavasthā //

nanu tathāpi kimatra bhayakāraṇaṃ yannāstītyāha-

ekenāpi yataḥ sarve jambudvīpagatā narāḥ / naśyanti yeṣāṃ bhaiṣajyaṃ sarvadikṣu na labhyate // bca_2.56 //

ekenāpi vyādhinā kupitena yasmātsarve jambudvīpagatā narāḥ prāṇino naśyanti mriyante / anyacca / yeṣāṃ vyādhīnāṃ bhaiṣajyaṃ auṣadhaṃ cikitsārthaṃ kvacidapi na prāpyate / atra kāśirājapadmakajātakamupaneyam / tadyathānuśrūyate- bodhicaryāṃ carannayameva bhagavānatīte 'dhvani padmo nāma kāśirājo babhūva / tasmin samaye sarve jambudvīpakā manuṣyā mahatā rogeṇa vikalībhūtā mriyante ca / tairidamālocitam- ayameva asmākaṃ svāmī rājā paramakāruṇikaḥ pratīkāraṃ vidhāsyatīti asyaiva ātmaduḥkhaṃ nivedayāmaḥ / te ca evamavadhārya militvā, bho mahārāja, bhavati svāmini paramahitaiṣiṇi saṃvidyamāne 'pi iyamasmākamavasthā, iti tasmin rājani duḥkhamāviṣkṛtavantaḥ / sa ca rājā karuṇāparavaśahṛdayaḥ teṣāṃ duḥkhamasahamānaḥ śīghramamīṣāṃ rogapīḍāmapanayata iti vaidyānājñāpayāmāsa / te 'pi tatheti pratiśrutya (bcp 35) cikitsāśāstrāṇi vyavalokya sadyorohitamatsyamāṃsādanyad bhaiṣajyamalabhamānāḥ tathaiva rājñaḥ pratyuktavantaḥ / iti vistaraḥ / idameva jātakaṃ bhavopalakṣaṇaṃ darśitam //

tatra sarvajñavaidyasya sarvaśalyāpahāriṇaḥ / vākyamullaṅghayāmīti dhiṅ māmatyantamohitam // bca_2.57 //

kāyikamānasikānekaśalyoddhāriṇaḥ / ātmānaṃ jugupsate / dhiṅ māmatyantamohitamiti / evaṃ jānannapi yadi tathāgatājñāyā vaimukhyamāseve, tadā mama mohasya paryanto nāsti / kutsanīyo 'smītyarthaḥ //

kiṃ punarevamityāha-

atyapramattastiṣṭhāmi prapāteṣvitareṣvapi / kimu yojanasāhasre prapāte dīrghakālike // bca_2.58 //

parvatādiprapāteṣu alpatareṣu yatrāsthibhaṅgamātraṃ maraṇamātraṃ vā duḥkhaṃ syāt / kimu yojanasāhasra iti / yojanasahasraṃ parimāṇamasya ityaṇ / anekayojanasahasraparimāṇe avīcyādikaprapāte ityarthaḥ / dīrghakālika iti / yatrāntarakalpādibhirāyuṣaḥ kṣayaḥ //

sadyo maraṇamadṛṣṭvaiva kimakāṇḍe kātaratayā sukhāsikāṃ jahāsītyāha-

adyaiva maraṇaṃ naiti na yuktā me sukhāsikā / avaśyameti sā velā na bhaviṣyāmyahaṃ yadā // bca_2.59 //

avaśyamiti niścitametat //

tathāpi bhayamayuktamityāha-

abhayaṃ kena me dattaṃ niḥsariṣyāmi vā katham / avaśyaṃ na bhaviṣyāmi kasmānme susthitaṃ manaḥ // bca_2.60 //

abhayaṃ mā bhairiti kena satpuruṣeṇa mama dattaṃ yena nirbhayo vihariṣyāmīti bhāvaḥ / yadi vā niḥsaraṇopāyo 'pi yadi bhavet, tathāpi bhayamayuktam / tadapi nāsti / niḥsariṣyāmi vā kathaṃ tato duḥkhāt / avaśyaṃ na bhaviṣyāmīti / sarvajīvitaṃ maraṇaparyavasānamityuktaṃ bhagavatā //

itthamapi na yuktā me sukhāsiketyāha- pūrvānubhūtanaṣṭebhyaḥ kiṃ me sāramavasthitam / yeṣu me 'bhiniviṣṭena gurūṇāṃ laṅghitaṃ vacaḥ // bca_2.61 //

abhiniviṣṭeneti āsaktena / gurūṇāmiti buddhabodhisattvakalyāṇamitrāṇām //

tasmādidamaharniśaṃ mama manasi kartumucitamityāha-

jīvalokamimaṃ tyaktvā bandhūn paricitāṃstathā / ekākī kvāpi yāsyāmi kiṃ me sarvaiḥ priyāpriyaiḥ // bca_2.62 //

(bcp 36) jīvalokaṃ sattvalokam, imaṃ manuṣyādiasabhāgatālakṣaṇam / ekākītyasahāyaḥ / kvāpītyaniścitasthānam //

iyameva tu me cintā yuktā rātriṃdivaṃ tadā / aśubhānniyataṃ duḥkhaṃ niḥsareyaṃ tataḥ katham // bca_2.63 //

aśubhāditi akuśalāt karmaṇaḥ / tata ityaśubhāt //

sāṃprataṃ kṛtakarmaphalasaṃbandhaniścayo mahatābhiniveśena punaratyayadeśanāmārabhata ityāha-

mayā bālena mūḍhena yatkiṃcitpāpamācitam / prakṛtyā yacca sāvadyaṃ prajñaptyāvadyameva ca // bca_2.64 //

tatsarvaṃ deśayāmyeṣa nāthānāmagrataḥ sthitaḥ / kṛtāñjalirduḥkhabhītaḥ praṇipatya punaḥ punaḥ // bca_2.65 //

atyayamatyayatvena pratigṛhṇantu nāyakāḥ /

bāleneti ajānatā / mūḍheneti mohāndhena / yatkiṃciditi kāyena vācā manasā vā / prakṛtisāvadyaṃ prāṇātipātādidaśākuśalasvabhāvam / prajñaptisāvadyaṃ yad bhagavatā gṛhītasaṃvarāṇāmeva prajñaptamakālabhojanādirūpam / deśayāmīti vāgvijñaptimutthāpayati / kṛtāñjaliriti kāyavijñaptiḥ / praṇipatya punaḥpunariti atiśayavaccittasaṃvegamupadarśayati / ati yatatyanena narakādiṣu iti atyayaḥ, aśubhaṃ karma / tamatyayatvena doṣatvena pratigṛhṇantu jānantu paśyantu vidantu vyaktīkṛtaṃ mayā / anāvaraṇacittena, pracchādanā atra mamāstīti bhāvaḥ //

punaḥ skhalitaśaṅkāmapākartuṃ punarakaraṇasaṃvaraṃ kurvannāha- na bhadrakamityādi / na bhadrakamidaṃ nāthā na kartavyaṃ punarmayā // bca_2.66 // yadāryakāntaṃ vijñapraśastaṃ na bhavati tadabhadrakaṃ garhitam anāryaṃ karmetyucyate / tadadyaprabhṛti jānatā paśyatā buddhipūrvakaṃ saṃcintya punarmayā na kartavyam / āyatyāṃ punarakaraṇasaṃvaramāpatsye ityarthaḥ / etacca triskandhapravartanaprastāve [bodhe, 5.98-99] vyaktīkariṣyate //

iti prajñākaramativiracitāyāṃ bodhicaryāvatārapañjikāyāṃ pāpadeśanā nāma dvitīyaḥ paricchedaḥ //

3. bodhicittaparigraho nāma tṛtīyaḥ paricchedaḥ /

adhunā pāpadeśanānantaraṃ puṇyānumodanāmāha-

apāyaduḥkhaviśrāmaṃ sarvasattvaiḥ kṛtaṃ śubham / anumode pramodena sukhaṃ tiṣṭhantu duḥkhitāḥ // bca_3.1 //

narakādigatau duḥkhamanubhavanto hi pariśrāntāḥ sukṛtavipākamadhigamya pratilabdhasukhā viśrāmyanti kiyatkālam / anumode prasādena iti saṃpraharṣayāmi prasannacittaḥ / anumodanāpi trividhāmanasā kāyena vācā ca / tatra prasannacittaḥ saṃpraharṣayati manasā, kāyena romaharṣaśrupātagātrakampādikamanubhavan, vācā ca saṃprahṛṣṭacetanaḥ tathāvidhāmeva vācamuccārayan, sādhu kṛtaṃ bhadrakaṃ kṛtamiti / sukhaṃ tiṣṭhantu duḥkhitā iti yadarthaṃ taistatkarma kṛtam, tadapi teṣāṃ samṛdhyatu iti bhāvaḥ //

laukikaṃ karmānumodya lokottaramanumodamānaḥ prāha-

saṃsāraduḥkhanirmokṣamanumode śarīriṇām / bodhisattvatvabuddhatvamanumode ca tāyinām // bca_3.2 //

duḥkhanirmokṣamiti śrāvakabodhiḥ pratyekabuddhabodhirvā / cittaṃ vā tadarthamutpāditaṃ tathocyate / tadā bodhitrayamapi tadgāhaḥ / śarīriṇāmiti prāṇinām / bodhisattvatvabuddhatvamiti bodhisattvatvaṃ bhagavatāṃ hetvavasthām, buddhatvaṃ phalāvasthāmiti / tāyināmiti svādhigatamārgadeśakānām / yaduktam- tāyaḥ svadṛṣṭamārgoktiḥ iti / tadvidyate yeṣāmiti / athavā- tāyaḥ saṃtānārthaḥ āsaṃsāramapratiṣṭhitanirvāṇatayāvasthāyinām //

bodhisattvānāṃ puṇyānumodanāṃ kurvannāha-

cittotpādasamudrāṃśca sarvasattvasukhāvahān / sarvasattvahitādhānānanumode ca śāsinām // bca_3.3 //

cittotpādāḥ pratikṣaṇabhāvino 'paryantāgādhatayā samudrā iva samudrāḥ tān / kiṃbhūtān? sarvasattvasukhāvahān sarvasattvānāṃ sukhamāvahantīti tadrasaikanimnasvabhāvānityarthaḥ / sarvasattvahitādhānāniti hitavidhāyakān / śāsināmiti śāsanaṃ śāsaḥ buddhatvopāyābhyāsaḥ, tadarthatvādupacārāt / tadvidyate yeṣāmiti śāsino bodhisattvāḥ / taduktam-

upāyābhyāsa evāyaṃ tādarthyācchāsanaṃ matam / iti //

athavā- śāsituṃ śīlaṃ yeṣāmiti śāsinaḥ / bodhisattvā hi dānādibhiḥ saṃgrahavastubhiḥ sattvān saṃgṛhya sanmārge 'vatārayanti //

etāvatā anumodanā kathitā / adhyeṣaṇāṃ kathayannāha-

sarvāsu dikṣu saṃbuddhān prārthayāmi kṛtāñjaliḥ / dharmapradīpaṃ kurvantu mohādduḥkhaprapātinām // bca_3.4 //

(bcp 38) dharmapradīpaṃ kurvantviti ajñānatamovṛtānāṃ sattvānāṃ mārgāmārgaviśeṣaparijñānavikalānāṃ dharmadeśanātmakamālokaṃ kurvantu //

etāvatā adhyeṣaṇā kathitā / yācanāmupadarśayannāha-

nirvātukāmāṃśca jinān yācayāmi kṛtāñjaliḥ / kalpānanantāṃstiṣṭhantu mā bhudandhamidaṃ jagat // bca_3.5 //

kṛtakṛtyatayā parinirvāṇaṃ gantumanasaḥ / aparyantakalpān sthitaye yācayāmi / mā bhūdandhamiti pūrvavanmārgājñānaniścetanaṃ mā bhūt / anenāpi yācanā proktā //

yācanānāntaramidānīṃ pariṇāmanāmāha-

evaṃ sarvamidaṃ kṛtvā yanmayāsāditaṃ śubham / tena syāṃ sarvasattvānāṃ sarvaduḥkhapraśāntikṛt // bca_3.6 //

evamuktakrameṇa sarvamidaṃ pūjāpāpadeśanāpuṇyānumodanādi kṛtvā vidhāya yanmayā āsāditaṃ prāptaṃ śubhaṃ sukṛtaṃ tena śubhena syāṃ bhaveyaṃ sarvasattvānāṃ samastaprāṇabhṛtāṃ sarvaduḥkhapraśāntikṛditi niḥśeṣavyasanapraśamanasamartho bhaveyam //

iti sāmānyena pariṇamayya punarviśeṣeṇāha-

glānānāmasmi bhaiṣajyaṃ bhaveyaṃ vaidya eva ca / tadupasthāyakaścaiva yāvadrogāpunarbhavaḥ // bca_3.7 //

teneti sarvatra yathāyogaṃ saṃbandhanīyam / glānānāmiti vyādhipīḍitānām / bhaiṣajyamiti auṣadham / vaidyaścikitsakaḥ / tadupasthāyakaḥ tasya glānasya paricārakaḥ / rogāpunarbhava iti yāvad vyādhinivṛttiḥ syāt //

kṣutpipāsāvyathāṃ hanyāmannapānapravarṣaṇaiḥ / durbhikṣāntarakalpeṣu bhaveyaṃ pānabhojanam // bca_3.8 //

kṣud bubhukṣā / pipāsā tṛṣṇā / tayorvyathā, tābhyāṃ vā vyathā / tāṃ hanyāṃ nivarteyam / annapānapravarṣaṇaiḥ prabandhāhārapānasaṃpādanaiḥ / durbhikṣāntarakalpeṣviti-

kalpasya śastrarogābhyāṃ durbhikṣeṇa ca nirgamaḥ / iti //

tatra daśavarṣāyuṣi prajāyāmantarakalpaparyante durbhikṣeṇa saṃvartaḥ prādurbhavati varṣān sapta, māsān sapta, divasānapi saptaiva / yaduktam-

kalpasya śastrarogābhyāṃ durbhikṣeṇa vinirgamaḥ / divasān sapta māsāṃśca varṣāścaiva yathākramam //

iti /

tatra annapānābhāvādanyonyamāṃsāsthibhakṣaṇameva āhāraḥ / tadapi kecidalabhamānā āhāravaikalyācca mriyante / tatra bhaveyaṃ pānabhojanam //

daridrāṇāṃ ca sattvānāṃ nidhiḥ syāmahamakṣayaḥ / nānopakaraṇākārairupatiṣṭheyamagrataḥ // bca_3.9 //

(bcp 39) daridrāṇāmiti dhanavikalānām / akṣaya iti ākṛṣyamāṇadhano 'pi yo na kṣīyate / nānopakaraṇākārairiti śayanāsanavasanabhojanābharaṇavilepanaprabhṛti yadyadabhilaṣanti sattvāḥ, taistairupakaraṇaviśeṣākāraiḥ ahameva upatiṣṭheyaṃ pratyupasthito bhaveyam / teṣāṃ daridrāṇāṃ sattvānāmagrataḥ purataḥ / idaṃ ca pariṇāmanamāryavajradhvajasūtre vistareṇa pratipāditam / tatredamuktam-

sa tāni kuśalamūlāni pariṇāmayan evaṃ pariṇāmayati- anenāhaṃ kuśalamūlena sarvasattvānāṃ layanaṃ bhaveyaṃ sarvaduḥkhaskandhavinivartanatayā / sarvasattvānāṃ trāṇaṃ bhaveyaṃ sarvakleśaparimocanatayā / sarvasattvānāṃ śaraṇaṃ bhaveyaṃ sarvabhayārakṣaṇatayā / sarvasattvānāṃ gatirbhaveyaṃ sarvabhūmyanugamanatayā / sarvasattvānāṃ parāyaṇaṃ bhaveyamatyantayogakṣemapratilambhanatayā / sarvasattvānāmāloko bhaveyaṃ vitimirajñānasaṃdarśanatayā / sarvasattvānāmulkā bhaveyamavidyātamondhakāravinivartanatayā / ityādi vistaraḥ / idamuktvā punaridamāha- tatrādhyāśayataḥ pariṇamayatio na vacanamātreṇa / taccodagracittaḥ pariṇamayati / hṛṣṭacittaḥ pariṇamayati / prasannacittaḥ pariṇamayati / pramuditacittaḥ strigdhacittaḥ pariṇamayati / maitracittaḥ premacitto 'nugrahacitto hitacittaḥ sukhacittaḥ pariṇamayati / iti vistaraḥ //

idānīmātmabhāvādiparityāgaṃ kurvannāha-

ātmabhāvāṃstathā bhogān sarvatryadhvagataṃ śubham / nirapekṣastyajāmyeṣa sarvasattvārthasiddhaye // bca_3.10 //

ātmabhāvāniti sarvagaticyutyupapattiṣu sarvakāyān / nirapekṣaḥ sarvaprakāreṇa nirāsaṅga ityarthaḥ / tyajāmi utsṛjāmi / dadāmītyarthaḥ / bhogāniti upabhogyavastūni hayagajarathaprāsādādyāśrayastrakcandanavastrābharaṇakanyādīni / sarvatryadhvagataṃ śubhamiti sarvatraidhātukasaṃgṛhītaṃ puṇyāneñjayasvabhāvam / yadi vā dānaśīlādiprasūtaṃ bhāvanāmayaṃ ca / tryadhvagatam atītānāgatapratyutpannam / syādetat- anāgatasya asatsvabhāvasya ko 'yamutsargo nāma? satyam / kiṃ tu tatsaṃbhavakāle tatrāsaṅganivāraṇārthamevamucyate, idānīmeva tatparityāgāt, āśayasya viśuddhivardhanārthaṃ ca / etadevāha- nirapekṣa iti / tadvipākasya svārthe 'napekṣaḥ / kimarthamevamanuṣṭhīyate ityāha- sarvasattvārthasiddhaye iti / sarvasattvānāṃ traidhātukavartināmabhyudayaniḥśreyasalakṣaṇārthaniṣpattaye / atītānāgataśubhotsargastu āryākṣayamatisūtre 'bhihitaḥ / yaduktam-

kuśalānāṃ ca cittacaitasikānāmanusmṛtiḥ, anusmṛtya ca bodhipariṇāmanā, ida matītakauśalyam / yā anāgatānāṃ kuśalamūlānāṃ nidhyaptirbodherāmukhīkarmasamanvāhāraḥ, ye ye utpatsyante kuśalāścittotpādāḥ, tānanuttarāyāṃ samyaksaṃbodhau pariṇāmayiṣyāmi / idamanāgatakauśalyam / iti vistaraḥ / sarvatyāgādhimuktiṃ paripūrye parityāgacittavegāt tena kāyaprayogeṇa utsṛṣṭasarvaparigrahaḥ / sarvaparigrahamūlādbhavaduḥkhādvimukto mukta ityucyate / iti vistaraḥ //

(bcp 40) nanu ca ātmārthamapi kiṃcidrakṣitumucitamiti mātsaryaṃ nirākurvannāha-

sarvatyāgaśca nirvāṇaṃ nirvāṇārthi ca me manaḥ / tyaktavyaṃ cenmayā sarva varaṃ sattveṣu dīyatām // bca_3.11 //

sarveṣāṃ sāsravātmabhāvādīnāṃ nirvāṇaṃ mokṣaḥ / tadarthi ca me manaḥ, tadarthi ca mama cittam / tyaktavyaṃ cediti / nirvāṇasamaye yadi sarvamātmabhāvādi avaśyaṃ parityajya yātavyaṃ mayā, tadā varaṃ sattveṣu dīyatām, kimanena mātsaryahetunā vidhṛteneti bhāvaḥ //

tasmādidamihānurūpamityāha-

yaścāsukhīkṛtaścātmā mayāyaṃ sarvadehinām /

yathākāmaṃgamakāritāyāṃ niyukto mayāyamātmā kāyaḥ / sarvadehināṃ sarvasattvānāṃ kṛte / etadeva darśayannāha- ghrantu nindantu vā nityamākirantu ca pāṃsubhiḥ // bca_3.12 // krīḍantu mama kāyena hasantu vilasantu ca / dattastebhyo mayā kāyaścintayā kiṃ mamānayā // bca_3.13 //

kārayantu ca karmāṇi yāni teṣāṃ sukhāvaham /

daṇḍādibhistāḍayantu vā, avarṇavādairjugupsantu, ākirantu ca pāṃsubhiḥ, dhūlibhiravakirantu / dattastebhyo mayā kāya iti, sarvaḥ sarveṇa mayā teṣāṃ parityaktaḥ, kiṃ mama samaviṣamacintayā? kārayantu karmāṇīti anavadyāni / etadevāha- anarthaḥ kasyacinmā bhūnmāmālambya kadācana // bca_3.14 // aniṣṭaṃ kasyacitprāṇino mā bhūt, māmāśritya kadācana, iha paratra vā //

yeṣāṃ kruddhāprasannā vā māmālambya matirbhavet / teṣāṃ sa eva hetuḥ syānnityaṃ sarvārthasiddhaye // bca_3.15 //

yeṣāṃ kruddhā yeṣāmaprasannā vā matiścittaṃ bhavet, teṣāṃ kruddhāprasannamatīnāṃ sa eva hetuḥ syāt, kruddhā aprasannā matireva / puṃstvaṃ tu tacchabdasya hetusamānādhikaraṇatayā / sarvārthasiddhaya iti ātmaparābhyudayaniḥśreyasaniṣpattaye //

abhyākhyāsyanti māṃ ye ca ye cānye 'pyapakāriṇaḥ / utprāsakāstathānye 'pi sarve syurbodhibhāginaḥ // bca_3.16 //

abhyākhyāsyanti iti mithyāropitadoṣeṇa dūṣayiṣyanti / anye 'pi ye kāyikaṃ mānasikaṃ vā apakāraṃ kariṣyanti / utprāsakā iti upahāsakāḥ, viḍambakāriṇo vā / tathā anye 'pi udāsīnāḥ prasannāśca / sarve bhaveyurbuddhatvalābhinaḥ //

anāthānāmahaṃ nāthaḥ sārthabāhaśca yāyinām / pārepsūnāṃ ca naubhūtaḥ setuḥ saṃkrama eva ca // bca_3.17 //

(bcp 41) anāthānāmiti sāṃnāyyānveṣiṇām / sārthavāhaśca yāyināmiti sārthamukhyo mārgaprapannānām / pārepsūnāmiti nadyādīnāṃ pārimakūlaṃ gantukāmānām //

dīpārthināmahaṃ dīpaḥ śayyā śayyārthināmaham / dāsārthināmahaṃ dāso bhaveyaṃ sarvadehinām // bca_3.18 //

dīpārthināmiti andhakārāvasthitānām / śayyārthināmiti śayanābhilāṣiṇām / dāsārthināmiti upasthānārthaṃ ye bhṛtyakarmakarādīnicchanti //

cintāmaṇirbhadraghaṭaḥ siddhavidyā mahauṣadhiḥ / bhaveyaṃ kalpavṛkṣaśca kāmadhenuśca dehinām // bca_3.19 //

cintāmaṇiriti cintitaphaladātā ratnaviśeṣaḥ / bhadraghaṭa iti yadyadvastu abhilaṣitamabhisaṃdhāya asmin hastaṃ prakṣipet, tatsarvaṃ saṃpadyate / siddhavidyeti siddhamantraḥ yadyatkarma tayā kriyate, tatsarvaṃ sidhyati / mahauṣadhiriti yadekaiva sarvopadravapīḍāpraśamanahetuḥ / kalpavṛkṣaśceti kalpitārthasaṃpādako vṛkṣaviśeṣaḥ / kāmadhenuśceti yā vāñchitadohaṃ duhyate //

pṛthivyādīni bhūtāni niḥśeṣākāśavāsinām / sattvānāmaprameyāṇāṃ yathābhogānyanekadhā // bca_3.20 //

evamākāśaniṣṭhasya sattvadhātoranekadhā / bhaveyamupajīvyo 'haṃ yāvatsarve na nirvṛtāḥ // bca_3.21 //

pṛthivyādīnīti pṛthivī vasaṃdharā / ādiśabdādāpastejo vāyuriti catvāri mahābhūtāni / tāni yathā śayanāśanasasyaphalamūlādyādhāratayā , tathā yānāvagāhanādihetutayā / evamanyatrāpi yojyam / anantākāśadhatuvyāpināmasaṃkhyānāṃ sattvānāṃ paribhogamupayānti, evameva ahamapi sarvasattvānāmanekaprakāreṇa upabhogyo bhaveyam / yāvatsarve na nirvṛtā iti yāvat sarve na saṃsāraduḥkhavinirmuktāḥ //

tasmādeṣāmātmabhāvādīnāmutsargaḥ kāryo bodhyarthinā / etacca dānamativistareṇa śikṣāsamuccaye pradarśitam / tadyathā tatraiva bodhisattvaprātimokṣe kathitam-

punaraparaṃ śāriputra bodhisattvaḥ sarvadharmeṣu parakīyasaṃjñāmutpādayati, na kaṃcidbhāvamupādatte / tatkasya hetoḥ? upādānaṃ hi bhayamiti /

idamuktvā tatraiva punaridamuktam-

tathā cittaśūrāḥ khalu punaḥ śāriputra bodhisattvā bhavanti / yāvat svahastaparityāgī bhavati, pādaparityāgī nāsāparityāgī śīrṣaparityāgī aṅgapratyaṅgaparityāgī, yāvat sarvasvaparityāgīti //

evaṃ nārāyaṇaparipṛcchāyāmapyabhihitam-

na taddhastu upādātavyaṃ yasmin vastuni nāsya tyāgacittamutpadyeta, na tyāgabuddhiḥ krameta, (bcp 42) iti yāvat, api tu khalu punaḥ kulaputra bodhisattvena mahāsattvena evaṃ cittamutpādayitavyam- ayaṃ mamātmabhāvaḥ sarvasattvebhya utsṛṣṭaḥ parityaktaḥ, prāgeva bāhyāni vastūni / iti vistaraḥ //

tathā āryākṣayamatisūtre 'pi deśitam-

ayaṃ mayā kāyaḥ sarvasattvānāṃ kiṃkaraṇīyeṣu kṣapitavyaḥ / tadyathā imāni catvāri mahābhūtāni pṛthivīdhāturabdhātustejodhāturvāyudhātuśca nānāsukhaiḥ nānāparyāyaiḥ nānārambaṇaiḥ nānopakaraṇaiḥ nānāparibhogaiḥ sattvānāmupabhogaṃ gacchanti, evameva ahamimaṃ caturmahābhūtasamucchrayaṃ kāyaṃ nānāsukhaiḥ nānāparyāyaiḥ nānārambaṇaiḥ nānopakaraṇaiḥ nānāparibhogairvistareṇa sarvasattvānāmupajīvyaṃ kariṣyāmīti vistaraḥ //

taccittaratnentyārabhya sarvamidaṃ pūrvakaṃ bodhicittasaṃvaragrahaṇāya prayogo veditavyaḥ / tadevaṃ pūjādi vidhāya ātmabhāvādidānamutsṛjya pratipannabodhicittānuśaṃsaḥ kṣaṇasaṃpadaṃ paramadurlabhāmavetya śraddhāmūlaṃ dṛḍhamupasthāpya sattvānatrāṇānaparāyaṇān karuṇāyamānaḥ svasukhanirapekṣaḥ paraduḥkhaduḥkhī tatsamuddharaṇāśayābhiprāyo buddhatvameva tadupāyaṃ samutpaśyan tatra baddhasaṃnāhaḥ-

yadātmanaḥ pareṣāṃ ca bhayaṃ duḥkhaṃ ca na priyam / tadātmanaḥ ko viśeṣo yattaṃ rakṣāmi netaram // iti / [śikṣa.sa.kārikā-1] tena ātmanaḥ sattvadhātośca-

duḥkhāntaṃ kartukāmena sukhāntaṃ gantumicchatā / śraddhāmūlaṃ dṛḍhīkṛtya bodhau kāryā matirdṛḍhā // iti // [śikṣa.sa.kārikā-2] samyaksaṃbodhicittamutpādayitumupakramate-

yathā gṛhītaṃ sugatairbodhicittaṃ purātanaiḥ / te bodhisattvaśikṣāyāmānupūrvyā yathā sthitāḥ // bca_3.22 //

yenāśayena sarvasattvānāṃ sarvaduḥkhaprahāṇārtham / yadi vā yathā gṛhītaṃ tadeva bhagavanto jānanti / bodhicittamiti bodhirbuddhatvaṃ sarvāvaraṇaprahāṇāt sarvadharmaniḥsvabhāvatādhigamaḥ / etacca sapracayaṃ prajñāparicchede vakṣyāmaḥ / tatra cittamadhyāśayena tatprāptaye manasikāraḥ buddho bhaveyaṃ sarvasattvahitasukhasaṃpādanāyetyarthaḥ // iti pūrvārdhena bodhicittotpādaṃ pratipādya śikṣāsaṃvaragrahaṇaṃ pratipādayannāha- te bodhisattvetyādi / bodhisattvaśikṣā yadutpāditabodhicittena bodhisattvena sadā karaṇīyam, tatretyarthaḥ / ānupūrvīti anu..........

(bcp 43) tadvadutpādayāmyeṣa bodhicittaṃ jagaddhite / tadvadeva ca tāḥ śikṣāḥ śikṣiṣyāmi yathākramam // bca_3.23 //

evaṃ gṛhītvā matimān bodhicittaṃ prasādataḥ / punaḥ puṣṭasya puṣṭayarthaṃ cittamevaṃ praharṣayet // bca_3.24 //

adya me saphalaṃ janma sulabdho mānuṣo bhavaḥ / adya buddhakule jāto buddhaputro 'smi sāṃpratam // bca_3.25 //

tathādhunā mayā kāryaṃ svakulocitakāriṇām / nirmalasya kulasyāsya kalaṅko na bhavedyathā // bca_3.26 //

andhaḥ saṃkārakūṭebhyo yathā ratnamavāpnuyāt / tathā kathaṃcidapyetad bodhicittaṃ mamoditam // bca_3.27 //

jaganmṛtyuvināśāya jātametadrasāyanam / jagaddāridyaśamanaṃ nidhānamidamakṣayam // bca_3.28 //

jagadvayādhipraśamanaṃ bhaiṣajyamidamuttamam / bhavādhvabhramaṇaśrāntajagadviśrāmapādapaḥ // bca_3.29 //

durgatyuttaraṇe setuḥ sāmānyaḥ sarvayāyinām / jagatkleśopaśamana uditaścittacandramāḥ // bca_3.30 //

jagadajñānatimiraprotsāraṇamahāraviḥ / saddharmakṣīramathanānnavanītaṃ samutthitam // bca_3.31 //

sukhabhogabubhukṣitasya vā janasārthasya bhavādhvacāriṇaḥ / sukhasatramidaṃ hyupasthitaṃ sakalā bhyāgatasattvatarpaṇam // bca_3.32 //

jagadadya nimantritaṃ mayā sugatatvena sukhena cāntarā / purataḥ khalu sarvatāyināmabhinandantu surāsurādayaḥ // bca_3.33 //

iti prajñākaramativiracitāyāṃ bodhicaryāvatārapañjikāyāṃ bodhicittaparigraho nāma tṛtīyaḥ paricchedaḥ //

4. bodhicittāpramādo nāma caturthaḥ paricchedaḥ /

evaṃ gṛhītvā sudṛḍhaṃ bodhicittaṃ jinātmajaḥ / śikṣānatikrame yatnaṃ kuryānnityamatandritaḥ // bca_4.1 //

sahasā yatsamārabdhaṃ samyag yadavicāritam / tatra kuryānna vetyevaṃ pratijñāyāpi yujyate // bca_4.2 //

vicāritaṃ tu yadbuddhairmahāprājñaiśca tatsutaiḥ / mayāpi ca yathāśakti tatra kiṃ parilambyate // bca_4.3 //

yadi caivaṃ pratijñāya sādhayeyaṃ na karmaṇā / etāṃ sarvāṃ visaṃvādya kā gatirme bhaviṣyati // bca_4.4 //

manasā cintayitvāpi yo na dadyātpunarnaraḥ / sa preto bhavatītyuktamalpamātre 'pi vastuni // bca_4.5 //

kimutānuttaraṃ saukhyamuccairuddhuṣya bhāvataḥ / jagatsarvaṃ visaṃvādya kā gatirme bhaviṣyati // bca_4.6 //

vetti sarvajña evaitāmacintyāṃ karmaṇo gatim / yadbodhicittatyāge 'pi mocayatyeva tāṃ narān // bca_4.7 //

bodhisattvasya tenaivaṃ sarvāpattirgarīyasī / yasmādāpadyamāno 'sau sarvasattvārthahānikṛt // bca_4.8 //

yo 'pyanyaḥ kṣaṇamapyasya puṇyavighnaṃ kariṣyati / tasya durgatiparyanto nāsti sattvārthaghātinaḥ // bca_4.9 //

ekasyāpi hi sattvasya hitaṃ hatvā hato bhavet / aśeṣākāśaparyantavāsināṃ kimu dehinām // bca_4.10 //

evamāpattibalato bodhicittabalena ca / dolāyamānaḥ saṃsāre bhūmiprāptau cirāyate // bca_4.11 //

tasmādyathāpratijñātaṃ sādhanīyaṃ mayādarāt / nādya cetkriyate yatnastalenāsmi talaṃ gataḥ // bca_4.12 //

aprameyā gatā buddhāḥ sarvasattvagaveṣakāḥ / naiṣāmahaṃ svadoṣeṇa cikitsāgocaraṃ gataḥ // bca_4.13 //

adyāpi cettathaiva syāṃ yathaivāhaṃ punaḥ punaḥ / durgativyādhimaraṇacchedabhedādyavāpnuyām // bca_4.14 //

kadā tathāgatotpādaṃ śraddhāṃ mānuṣyameva ca / kuśalābhyāsayogyatvamevaṃ lapsye 'tidurlabham // bca_4.15 //

(bcp 45) ārogyaṃ divasaṃ cedaṃ sabhaktaṃ nirupadravam / āyuḥkṣaṇaṃ visaṃvādi kāyopācitakopamaḥ // bca_4.16 //

na hīdṛśairmaccaritairmānuṣyaṃ labhyate punaḥ / alabhyamāne mānuṣye pāpameva kutaḥ śubham // bca_4.17 //

yadā kuśalayogyo 'pi kuśalaṃ na karomyaham / apāyaduḥkhaiḥ saṃmūḍhaḥ kiṃ kariṣyāmyahaṃ tadā // bca_4.18 //

akurvataśca kuśalaṃ pāpaṃ cāpyupacinvataḥ / hataḥ sugatiśabdo 'pi kalpakoṭiśatairapi // bca_4.19 //

ata evāha bhagavānmānuṣyamatidurlabham / mahārṇavayugacchidrakūrmagrīvārpaṇopamam // bca_4.20 //

ekakṣaṇakṛtāt pāpādavīcau kalpamāsyate / anādikālopacitāt pāpāt kā sugatau kathā // bca_4.21 //

na ca tanmātramevāsau vedayitvā vimucyate / tasmāttadvedayanneva pāpamanyat prasūyate // bca_4.22 //

nātaḥ parā vañcanāsti na ca moho 'styataḥ paraḥ / yadīdṛśaṃ kṣaṇaṃ prāpya nābhyastaṃ kuśalaṃ mayā // bca_4.23 //

yadi caivaṃ vimṛṣyāmi punaḥ sīdāmi mohitaḥ / śociṣyāmi ciraṃ bhūyo yamadūtaiḥ pracoditaḥ // bca_4.24 //

ciraṃ dhakṣyati me kāyaṃ nārakāgniḥ suduḥsahaḥ / paścāttāpānalaścittaṃ ciraṃ dhakṣyatyaśikṣitam // bca_4.25 //

kathaṃcidapi saṃprāpto hitabhūmiṃ sudurlabhām / jānannapi ca nīye 'haṃ tāneva narakān punaḥ // bca_4.26 //

atra me cetanā nāsti mantrairiva vimohitaḥ / na jāne kena muhyāmi ko 'trāntarmama tiṣṭhati // bca_4.27 //

hastapādādirahitāstṛṣṇādveṣādiśatravaḥ / na śūrā na ca te prājñāḥ kathaṃ dāsīkṛto 'smi taiḥ // bca_4.28 //

maccittāvasthitā eva ghnanti māmeva susthitāḥ / tatrāpyahaṃ na kupyāmi dhigasthānasahiṣṇutām // bca_4.29 //

sarve devā manuṣyāśca yadi syurmama śatravaḥ / te 'pi nāvīcikaṃ banhiṃ samudānayituṃ kṣamāḥ // bca_4.30 //

(bcp 46) merorapi yadāsaṅgānna bhasmāpyupalabhyate / kṣaṇāt kṣipanti māṃ tatra balinaḥ kleśaśatravaḥ // bca_4.31 //

na hi sarvānyaśatrūṇāṃ dīrghamāyurapīdṛśam / anādyantaṃ mahādīrghaṃ yanmama kleśavairiṇām // bca_4.32 //

sarve hitāya kalpante ānukūlyena sevitāḥ / sevyamānāstvamī kleśāḥ sutarāṃ duḥkhakārakāḥ // bca_4.33 //

iti saṃtatadīrghavairiṣu vyasanaughaprasavaikahetuṣu / hṛdaye nivasatsu nirbhayaṃ mama saṃsāraratiḥ kathaṃ bhavet // bca_4.34 //

bhavacārakapālakā ime narakādiṣvapi vadhyaghātakāḥ / mativeśmani lobhapañjare yadi tiṣṭhanti kutaḥ sukhaṃ mama // bca_4.35 //

tasmānna tāvadahamatra dhuraṃ kṣipāmi yāvanna śatrava ime nihatāḥ samakṣam / svalpe 'pi tāvadapakāriṇi baddharoṣā mānonnatāstamanihatya na yānti nidrām // bca_4.36 //

prakṛtimaraṇaduḥkhitāndhakārān / raṇaśirasi prasabhaṃ nihantumugrāḥ / agaṇitaśaraśaktighātaduḥkhā na vimukhatāmupayāntyasādhayitvā // bca_4.37 //

kimuta satatasarvaduḥkhahetūn prakṛtiripūnupahantumudyatasya / bhavati mama viṣādadainyamadya vyasanaśatairapi kena hetunā vai // bca_4.38 //

akāraṇenaiva ripukṣatāni gātreṣvalaṃkāravadudvahanti / mahārthasiddhyai tu samudyatasya duḥkhāni kasmānmama bādhakāni // bca_4.39 //

svajīvikāmātranibaddhacittāḥ kaivartacaṇḍālakṛṣīvalādyāḥ / śītātapādivyasanaṃ sahante jagaddhitārthaṃ na kathaṃ sahe 'ham // bca_4.40 //

daśadigvyomaparyantajagatkleśavimokṣaṇe / pratijñāya madātmāpi na kleśebhyo vimocitaḥ // bca_4.41 //

ātmapramāṇamajñātvā bruvannunmattakastadā / anivartī bhaviṣyāmi tasmātkleśavadhe sadā // bca_4.42 //

atra grahī bhaviṣyāmi baddhavairaśca vigrahī / anyatra tadvidhātkleśāt kleśaghātānubandhinaḥ // bca_4.43 //

galantvantrāṇi me kāmaṃ śiraḥ patatu nāma me / na tvevāvanatiṃ yāmi sarvathā kleśavairiṇām // bca_4.44 //

nirvāsitasyāpi tu nāma śatrordeśāntare sthānaparigrahaḥ syāt / yataḥ punaḥ saṃbhṛtaśaktireti na kleśaśatrorgatirīdṛśī tu // bca_4.45 //

(bcp 47) nāya, na tu kleśaśatroḥ / na tasya itaraśatruvatsamācāro dṛśyate / kutaḥ punarevamicchayā labhyata ityāha-

kvāsau yāyānmanmanaḥstho nirastaḥ sthitvā yasmin madvadhārthaṃ yateta / nodyogo me kevalaṃ mandabuddheḥ kleśāḥ prajñādṛṣṭisādhyā varākāḥ // bca_4.46 //

mama cittānnirvāsitaḥ asau kleśaripuḥ kutra gatvā avasthānaṃ kuryāt, yatrāvasthitiṃ kṛtvā mama vadhāya yateta? naiva tatsthānamutpaśyāmi, nirmūlitasya punarutthānāyogāditi bhāvaḥ / ahameva tu kevalamanutsāhī, apaṭubuddhipracāratvāt / kleśāḥ punarime nirmūlatvāt paramārthatattvadarśanamātrapraheyāstapasvinaḥ //

etadeva prasādhayannāha-

na kleśā viṣayeṣu nendriyagaṇe nāpyantarāle sthitā nāto 'nyatra kuha sthitāḥ punaramī mathnanti kṛtsnaṃ jagat /

manojñādiviṣayadarśane 'pi keṣāṃcitsaṃvṛtendriyāṇāṃ kleśānutpatteḥ paramāṇuśo vicāre 'pi tatrādarśanāt / na viṣayeṣu, nāpi cakṣurādīndriyagaṇe pūrvavat, dharmacintādyavasthāyāmindriyasadbhāve 'pyanupalabdheḥ / nāpi viṣayendriyayorantarāle madhye tiṣṭhanti, dṛśyānāmanupalabdhereva / na ca etebhyo 'nyasmin sthāne kvacidavasthitā niścitāḥ / ato nirmūlatayā tattvaśūnyā āgantukā eva, abhūtaparikalpamātraprasūtatvāt / tathābhūtā api jagadaśeṣaṃ mathnanti / tathā ca kimatra samucitamasti? āha-

māyaiveyamato vimuñca hṛdayaṃ trāsaṃ bhajasvodyamaṃ prajñārthaṃ kimakāṇḍa eva narakeṣvātmānamābādhase // bca_4.47 //

yathā hi māyā hastyākāratayā tadākāraśūnyāpi mantrauṣadhaprabhāvādidaṃpratyayatayā mantreṇa tattvarahitāpi pratibhāsate, tathā amī api kleśā viparyāsanimittā ayoniśomanasikārasamudbhūtā idaṃpratītyatāmātrato nistattvā eva prakāśante / ato vijahīhi hṛdaya trāsaṃ kleśebhyaḥ / ke nāma amī varākāḥ paramārthato vicāryamāṇāḥ? ato bhajasva udyamam, utsāhaṃ kuruṣva prajñārthaṃ tattvapravicayādhigamāya / kimakāṇḍa eva niṣprayojanameva narakeṣu saṃghātādiṣu kleśavaśagatayā ātmānamābādhase, pīḍayasi?

idānīṃ prāktanamarthamaśeṣamupasaṃharannāha-

evaṃ viniścitya karomi yatnaṃ yathoktaśikṣāpratipattihetoḥ / vaidyopadeśāccalataḥ kuto 'sti bhaiṣajyasādhyasya nirāmayatvam // bca_4.48 //

(bcp 48) evaṃ samanantarasakalaparicchedapratipāditamarthaṃ viniścitya dṛḍhīkṛtya anantaramāyāsvabhāvatāṃ vā, karomi yatnam / kimartham? yathoktaśikṣāpratipattihetoḥ, yathoktaśikṣā bodhisattvasya teṣu teṣu sūtrānteṣu yāḥ karaṇīyatayā pratipāditāḥ, ihaiva vā śāstre saṃkṣepeṇa tatra tatropadarśitāḥ, tāsāṃ śikṣaṇārtham //

uktāni ca bhagavatā sūtrānteṣu bodhisattvaśikṣāpadāni / yathoktamāryaratnameghe-

kathaṃ ca kulaputra bodhisattvo bodhisattvaśikṣāsaṃvarasaṃvṛto bhavati? iha bodhisattva evaṃ vicārayati- na prātimokṣasaṃvaramātrakeṇa mayā śakyamanuttarāṃ samyaksaṃbodhimabhisaṃboddhum / kiṃ tarhi yānīmāni tathāgatena teṣu teṣu sūtrānteṣu bodhisattvasamudācārā bodhisattvaśikṣāpadāni prajñaptāni, teṣu mayā śikṣitavyam / iti vistaraḥ //

tasmādasmādvidhena mandabuddhinā

durvijñeyo vistaroktatvād bodhisattvasya saṃvaraḥ / tataḥ kiṃ yuktam? marmasthānānyato vidyādyenānāpattiko bhavet / [śikśā. sa. kārikā-3]

katamāni ca tāni marmasthānāni? yaduta-

ātmabhāvasya bhogānāṃ tryadhvavṛtteḥ śubhasya ca / utsargaḥ sarvasattvebhyastadrakṣāśuddhivardhanam //

[śikśā. sa. kārikā-4]

ityuktam / eṣa bodhisattvasaṃgraho yatra bodhisattvānāmabhyāsaviśrāme 'pi āpattayo vyavasthāpyante / yathoktaṃ bodhisattvaprātimokśasūtre-

yo bodhisattvena mārgaḥ parigṛhītaḥ sarvasattvānāṃ kṛte duḥkhakṣayagāmī, sacedbodhisattvasya taṃ mārgaṃ parigṛhyāvasthitasya api kalpakoṭeratyayena ekaṃ sukhacittamutpadyeta, antaśo niṣadyācittamapi, tatra bodhisattvena evaṃ cittamutpādayitavyam- sarvasattvānāmātyayikaṃ parigṛhya etadapi me bahu yanniṣīdāmīti //

ata evāha- vaidyopadeśāditi / yathā vaidyopadeśamakurvāṇasya bhaiṣajyasādhyaṃ karaṇīyaṃ yasya bhaiṣajyena vā sādhyasya rogiṇaḥ kuto 'sti nirāmayatvaṃ nīrogatā? tathā sarvajñamahāvaidyopadiṣṭaśikṣāpratipattimakurvataḥ kuto nirāmayatvaṃ karmakleśopajanitajātyādiduḥdukhamahābhayādvimuktiḥ?

tadevaṃ samāttasaṃvarasya sāmānyamāpattilakṣaṇamucyate yena āpattilakṣaṇena yuktaṃ vastu svayamapyutprekṣya pariharet / na ca āpattipratirūpakeṣu anāpattipratirūpakeṣu ca saṃmuhyet / bodhisattvaḥ sarvasattvānāṃ vartamānānāgatasarvaduḥkhadaurmanasyopaśamāya vartamānānāgatasarvasukhasaumanasyotpādāya ca niḥśāṭhyataḥ kāyavāṅmanaḥparākramaiḥ prayatnaṃ na karoti, tatpratyayasāmagrīṃ (bcp 49) nānveṣate, tadantarāyapratīkārāya na ghaṭate, alpaduḥkhadaurmanasyaṃ bahuduḥkhadaurmanasyapratīkārabhūtaṃ notpādayati, mahārthasiddhayarthaṃ vā alpahāniṃ na karoti, kṣaṇamapyupekṣate, sāpattiko bhavati / saṃkṣepato 'nāpattiḥ svaśaktyaviṣayeṣu kāryeṣu, tatra niṣphalatayā śikṣāprajñaptyabhāvāt / prakṛtisāvadyatayā vā anyad gṛhyat eva / yatra tu svaśaktyagocare 'pi yogasāmarthyādāpattiḥ syāt, tanna cintyam, sāmānyapāpadeśanāntarbhāvāttato muktiḥ / etat samāsato bodhisattvaśikṣāśarīram / vistaratastu aprameyakalpaparyavasānanirdeśyam //

athavā saṃkṣepato dve bodhisattvasyāpattī / yathāśaktyā yuktāyuktamasamīkṣyārabhate, na nivartate upekṣate vā, sāpattiko bhavati / nirūpya yathārhamatikrāmati antaśaścaṇḍāladāsenāpi coditaḥ, sāpattiko bhavati / yaḥ punaretadabhyāsārthaṃ vyutpādamicchati, tena śikṣāsamuccaye tāvaccaryāmukhamātraśikṣaṇārthamabhiyogaḥ karaṇīyaḥ, śikṣaṇārambhasyaiva mahāphalatvāt / yathopavarṇitaṃ praśāntaviniścayaprātihāryasūtre-

iti bodhisattvaśikṣā samāsato yathopadeśataḥ kathiteti //

iti prajñākaramativiracitāyāṃ bodhicaryāvatārapañjikāyāṃ bodhicittāpramādaścaturthaḥ paricchedaḥ //

5. saṃprajanyarakṣaṇaṃ nāma pañcamaḥ paricchedaḥ /

evamātmabhāvādīnāmutsargaṃ rakṣāṃ ca pratipādya punarvistareṇa rakṣāśodhanavardhanāni pratipādayitumupakramate / utpāditabodhicittena hi bodhisattvena utsṛṣṭasyāpi cātmabhāvasya rakṣāśodhanavardhanāni kāryāṇi / yasmāt-

paribhogāya sattvānāmātmabhāvādi dīyate / arakṣite kuto bhogaḥ kiṃ dattaṃ yanna bhujyate //

tasmātsattvopabhogārthamātmabhāvādi pālayet / kalyāṇamitrānutsargātsūtrāṇāṃ ca sadekṣaṇāt //

[śikśā. sa. kārikā 5-6]

tacca ātmabhāvādiparipālanādi śikṣārakṣaṇādeva syāt / anyathā narakādivinipātagamanāt tanna syāt / ata idamabhidhīyate-

śikṣāṃ rakṣitukāmena cittaṃ rakṣyaṃ prayatnataḥ / na śikṣā rakṣituṃ śakyā calaṃ cittamarakṣatā // bca_5.1 //

śikṣyate upādīyate gṛhītasaṃvaraṇeneti vihiteṣu karaṇīyatā, pratiṣiddheṣvakaraṇaṃ śikṣā, tāṃ rakṣituṃ paripālayituṃ kāmena icchatā bodhisattvena ātmacittaṃ rakṣitavyaṃ prayatnata iti kathayiṣyamāṇāt / atha śikṣārakṣaṇādhikāre kimiti cittaṃ rakṣyata ityāha- na śikṣeti / anyathā śikṣaiva rakṣitumaśakyā calamanāyattaṃ cittamarakṣatā / cittasya calatāyāṃ śikṣāyāḥ sthairyāyogāt //

ito 'pi cittameva rakṣaṇīyamityāha-

adāntā mattamātaṅgā na kurvantīha tāṃ vyathām / karoti yāmavīcyādau muktaścittamataṅgajaḥ // bca_5.2 //

aparikarmitā mattavaravāraṇā na janayanti tāṃ pīḍāmihaloke / paraloke avīcyādau yāṃ karoti svacchandatayāvasthitaṃ cittameva mataṅgaja eva / tathāgatājñāṅkuśena kathaṃcid vaśīkriyamāṇatvāt /

tasyāyattīkaraṇe guṇamāha-

baddhaśceccittamātaṅgaḥ smṛtirajjvā samantataḥ / bhayamastaṃgataṃ sarvaṃ kṛtsnaṃ kalyāṇamāgatam // bca_5.3 //

yadi baddhaḥ kathaṃcid bhavet / smṛtirvakṣyamāṇalakṣaṇā / saiva rajjurbandhanopāyatvāt / samantataḥ sarvathā asatpakṣe pracāranirodhāt / tadā bhayamastaṃgataṃ pratyastamitaṃ sarvamaśeṣam / sarvaṃ kalyāṇamabhyudayaniḥśreyasalakṣaṇam / āgataṃ saṃprāptam / devaśced vṛṣṭo niṣpannāḥ śālaya iti yathā //

(bcp 51) nanu bahavaśca mṛgavyālādayo 'pyupadravakāriṇaḥ santi, tebhyaḥ kathaṃ cittasya vaśīkaraṇād bhayaṃ na bhaviṣyatītyāha-

vyāghrāḥ siṃhā gajā ṛkṣāḥ sarpāḥ sarve ca śatravaḥ / sarve narakapālāśca ḍākinyo rākṣasāstathā // bca_5.4 //

sarve baddhā bhavantyete cittasyaikasya bandhanāt / cittasyaikasya damanāt sarve dāntā bhavanti ca // bca_5.5 //

subodham //

kutaḥ punarevamityāha-

yasmādbhayāni sarvāṇi duḥkhānyapramitāni ca / cittādeva bhavantīti kathitaṃ tattvavādinā // bca_5.6 //

sarve hyete karmākṣepavaśādaniṣṭadāyakā bhavanti / karma ca cittameva / cetanā karmeti vacanāt / vākkāyakarmaṇorapi cittameva samutthāpakam / tadantareṇa tayoranutpatteḥ / cetayitvā karmeti vacanāt / tasmāt sarvamiha karmanirmitameva / tacca cittānnānyat / tadāha-

karmajaṃ lokavaicitryaṃ cetanā tatkṛtaṃ ca tat / cetanā mānasaṃ karma tajje vākkāyakarmaṇī / iti / [abhi. koṣa-4.1]

na ca anapakāracittasya kecidapakāriṇo nāma / yasmāt-

nivṛttapāpacittasya nāsti loke bhayaṃ dviṣaḥ / sukhahānirna tasyāsti yasya cittaṃ vaśe sthitam //

ata idamuktam-

cittasya damanaṃ sādhu cittaṃ dāntaṃ sukhāvaham / iti / [=dhammapada-25]

tattvavādī bhagavān vastutattvakathanaśīlatvāt / tenedaṃ tattvaṃ kathitaṃ prakāśitam- sarvaṃ cittaprasūtamiti / ataḥ sarvatra cittameva pradhānam //

itthamevaitannānyathā iti prasādhayannāha-

śastrāṇi kena narake ghaṭitāni prayatnataḥ / taptāyaḥkuṭṭimaṃ kena kuto jātāśca tāḥ striyaḥ // bca_5.7 //

narakapālānāṃ kuntāsimusalādīni, asipatravanasamudbhūtāni vā kena kṛtāni? na tatra kaścit kartāsti īśvarādiḥ, tatkartṛtvasya anyatra niṣiddhatvāt, ihāpi niṣetsyamānatvāt / (bcp 52) taptalohamayī ca bhūmiḥ kena ghaṭitā? tāśca striyaḥ kutaḥ kāraṇasāmagrīto jātāḥ, yāḥ pāradārikaiḥ śālmalīvṛkṣasya adhastādupari ca dṛśyante? sa ca śālmalirvā ? ato nānyat kāraṇamatra cittādupakalpanīyam / yaduktam-

sattvalokamatha bhājanalokaṃ cittameva racayatyaticitram / karmajaṃ hi jagaduktamaśeṣaṃ karma cittamavadhūya ca nāsti //

iti //

[madhyamakāvatāra-6.89]

tasmāccittamevātra kāraṇaṃ nānyadityata āha-

pāpacittasamudbhūtaṃ tattatsarvaṃ jagau muniḥ / tasmānna kaścit trailokye cittādanyo bhayānakaḥ // bca_5.8 //

pāpakarmopaskṛtaṃ cittameva teṣāṃ kāraṇaṃ bhagavān kathitavāt / nāparaṃ kiṃcit / yata evam, tasmānna trijagati pāpacittādaparaḥ kaścid bhayaheturasti / tasmāccittameva vaśīkartavyam / yaduktamāryaratnameghe-

cittapūrvagamāḥ sarvadharmāḥ / citte parijñāte sarvadharmāḥ parijñātā bhavanti //

api ca-

cittena nīyate lokaścittaṃ cittaṃ na paśyati / cittena cīyate karma śubhaṃ vā yadi vāśubham //

cittaṃ bhramate alātavat / cittaṃ vibhramate taraṃgavat / cittaṃ dahate davāgnivat / cittaṃ rohayate (harate) mahāmbuvat / iti ca //

evaṃ byupaparīkṣamāṇaścitte sūpasthitasmṛtirviharati, na ca cittasya vaśaṃ gacchati / api tu cittamevāsya vaśaṃ gacchati / cittenāsya vaśībhūtena sarve dharmā vaśībhavantīti //

syādetat- dānapāramitādiṣu kathamiva cittaṃ pradhānam? sā hi sarvasattvānāṃ dāridyāpanayanalakṣaṇetyāha-

adaridraṃ jagatkṛtvā dānapāramitā yadi / jagaddaridramadyāpi sā kathaṃ pūrvatāyinām // bca_5.9 //

dāridyaṃ hi nāma sāsravasukhabhogabubhukṣayā cittakārpaṇyam upakaraṇavaikalyaṃ vā / tadapanīya jagato yadi dānapāramitāparipūrirbhavatītyucyate, tadā sā katham? na kathaṃcidapi pūrvatāyināṃ pūrvamabhisaṃbuddhānāṃ bhagavatāṃ yujyate / kutaḥ? jagaddaridramadyāpi, nādyāpi yāvajjagaddāridyamupaśāmyati //

(bcp 53) yadyevaṃ neṣyate, kathaṃ sā bhavatītyāha-

phalena saha sarvasvatyāgacittājjane 'khile / dānapāramitā proktā tasmātsā cittameva tu // bca_5.10 //

sarvasvaṃ bāhyādhyātmikaṃ sarvaṃ vastu dānaṃ dānaphalaṃ ca sarvasattvebhyaḥ parityajato 'bhyāsena prakarṣagamanād yadā apagatamātsaryamalaṃ nirāsaṅgatayā cittamutpadyate, tadā dānapāramitāniṣpannetyucyate / tasmāt sā cittameva nānyā dānapāramitā //

śīlapāramitā tu sutarāṃ cittamevetyata āha-

matsyādayaḥ kva nīyantāṃ mārayeyaṃ yato na tān / labdhe viraticitte tu śīlapāramitā matā // bca_5.11 //

prāṇātipātādisarvāvadyaviraticittameva hi śīlam, na punastadāśrayabhūtabāhyaviṣayanivṛttisvabhāvam / yadi punarvadhādiviṣayavastvabhāvena tadvadhādyabhāvācchīlaṃ syāt, tadā te matsyādayaḥ kva nīyantāṃ yatra teṣāṃ darśanaṃ na syāt? anyathā tadvadhādyupakrame śīlaṃ na syāt / na caivam / tasmātteṣu vidyamāneṣvapi labdhe viraticitte nivṛttimanasikāre śīlapāramitā matā saṃmatā tatsvabhāvavidām / tasmāt sā cittameva //

kṣāntipāramitāpi na cittādbhinnetyāha-

kiyato mārayiṣyāmi durjanān gaganopamān / mārite krodhacitte tu māritāḥ sarvaśatravaḥ // bca_5.12 //

parāpakārādisaṃbhave 'pi cittasyākopanatā kṣāntiḥ / anyathā yadi sarvaśatrūṇāṃ tadvinipātanena vairaniryātanaṃ kṛtavataḥ kenacidvairābhāvādupaśāntavairasya na kaścidapakārī syāt / iti marṣaṇaṃ kṣāntiḥ / tadā etadaśakyānuṣṭhānam / śatravo hi gaganasamatvādaparyantāḥ / teṣāṃ māraṇamaśakyam / tasmāt krodhādinivṛtticittameva teṣāmupāyena māraṇamiva, tatkṛtāpakārasyāgaṇanāt, janmāntaravairāsaṃbhavācca māritaprāyāste //

atra aśakyatāyāmapyupāyena pravṛttau dṛṣṭāntopadarśanena śakyatāmāha-

bhūmiṃ chādayituṃ sarvāṃ kutaścarma bhaviṣyati / upānaccarmamātreṇa channā bhavati medinī // bca_5.13 //

kaṇṭakādyupaghātarakṣaṇārthaṃ pṛthvī chādayitumucitā / na caitacchakyam, tāvataścarmaṇo 'bhāvāt, bhāve 'pi chādanasyāśakyatvāt / upāyena punaḥ śakyam / upānahaścarmaṇā kevalena sarvā bhūmiśchāditā bhavati //

dṛṣṭāntoktamarthaṃ prakṛte yojayannāha-

bāhyā bhāvā mayā tadvacchakyā vārayituṃ na hi / svacittaṃ vārayiṣyāmi kiṃ mamānyairnivāritaiḥ // bca_5.14 //

(bcp 54) śatruprabhṛtayo bhāvā mayā vārayitumaśakyāḥ / tadvat medinīcarmacchādanavat apakārakriyāyāḥ / ataḥ svacittameva śakyaṃ vārayiṣyāmi / anyavāraṇasyāpārthakatvāt, svacittavāraṇādeva tatsiddheḥ / tasmāt sā cittameva //

vīryapāramitā tu kuśalotsāhasvabhāvā ativispaṣṭaṃ cittamevetyāha- sahāpi vākśarīrābhyāṃ mandavṛtterna tatphalam / yatpaṭorekakasyāpi cittasya brahmatādikam // bca_5.15 //

vacanakāyasahitasyāpi cittasya kuśalapakṣe mandapracārasya na tādṛśaṃ phalamupajāyate, yādṛśaṃ dhyānādiviṣaye paṭupravṛtterekākino 'pi cittasya phalaṃ brahmabhūyādikam / tasmāt sā cittameva //

dhyānaṃ tu cittaikāgratālakṣaṇaṃ cittādanyathā vaktumaśakyamityāha-

japāstapāṃsi sarvāṇi dīrghakālakṛtānyapi / anyacittena mandena vṛthaivetyāha sarvavit // bca_5.16 //

mantrādyāvartanalakṣaṇā vacanavyāpārā japāḥ / tapāṃsi ca indriyadamanalakṣaṇāḥ kāyikāḥ / tāni atibahukālamabhyastānyapi anyatra saktacittena middhādyupahatacittena vā / samānapāṭavavikalenetyarthaḥ / vṛthaiva niṣphalameva, atyarthakṛśaphalatvāt, abhimatārthe 'nupayogādvā / putro 'pyaputra eva, putrakāryākaraṇādyathā / ityāha bhagavān sarvajñaḥ / tasmād dhyānapāramitāpi cittameva //

prajñā tu nirvivādā cittamevetyāha-

duḥkhaṃ hantuṃ sukhaṃ prāptuṃ te bhramanti mudhāmbare / yairetaddharmasarvasvaṃ cittaṃ guhyaṃ na bhāvitam // bca_5.17 //

pañcagatisaṃsārajātyādiduḥkhaṃ prahātuṃ tatprahāṇe nirvāṇasukhamadhigantuṃ te sattvā mudhā nirarthakā eva bhramanti ambare kāsīpuṣpamiva niṣphalaṃ saṃsāre / yadanuṣṭhitaṃ kvacidapi na lagnamiti tadevamamidhīyate pañcāgnisevāśiroluñcanādivratam / ke punarevaṃ bhramanti? yaiḥ saṃsārabhayabhīrubhiḥ sukhārthibhiśca dharmasarvasvaṃ sarvalaukikalokottarakarmanidānabhūtaṃ cittaṃ bālānāmagocarasvabhāvatayā guhyaṃ na bhāvitaṃ tattvacittatayā punaḥ punaḥ sthirīkṛtam / tasmādiyamatitarāṃ cittameva / yathopavarṇitamāryagaṇḍabyūhe-

svacittādhiṣṭhānaṃ sarvabodhisattvacaryā / svacittādhiṣṭhānaṃ sarvasattvaparipākavinayaḥ / peyālaṃ / tasya mama kulaputra evaṃ bhavati- svacittamevopastambhayitavyaṃ sarvakuśalamūlaiḥ / svacittameva parisyandayitavyaṃ dharmameghaiḥ / svacittameva pariśodhayitavyamāvaraṇīyadharmebhyaḥ / svacittameva dṛḍhīkartavyaṃ vīryeṇa / ityādi //

(bcp 55) iti cittasvabhāvatāṃ sarvatra pratipādya upasaṃharannāha-

tasmātsvadhiṣṭhitaṃ cittaṃ mayā kāryaṃ surakṣitam / cittarakṣāvrataṃ mukttvā bahubhiḥ kiṃ mama vrataiḥ // bca_5.18 //

evamutpāditabodhicittena śikṣārakṣaṇe yatnavatā manasi kartavyam- svadhiṣṭhitaṃ smṛtyā surakṣitaṃ saṃprajanyena vakṣyamāṇarītyā mayā svacittaṃ kartavyaṃ tadekāgramānasena / atraiva sarveṣāmantarbhāvāt / ataścittarakṣaṇameva pradhānaṃ vratam / tadvihāya kimanyairvratairbahubhirapi mama prayojanam? na kiṃcit / tadrahitasya niṣphalatvāt / etāvatī ceyaṃ bodhisattvaśikṣā yaduta cittaparikarma / etanmūlatvāt sarvasattvārthānām / tadyathā dharmasaṃgītisūtre kīrtitam-

mativikramabodhisattva āha- yo 'yaṃ dharmo dharma ityucyate, nāyaṃ dharmo deśastho na pradeśastho 'nyatra svacittādhīno dharmaḥ / tasmānmayā svacittaṃ svārādhitaṃ svadhiṣṭhitaṃ suparijitaṃ susamārabdhaṃ sunigṛhītaṃ kartavyam / tatkasya hetoḥ? yatra cittaṃ tatra guṇadoṣāḥ / tadbodhisattvo doṣebhyaścittaṃ nivārya guṇeṣu pravartayati / taducyate- cittādhīno dharmaḥ, dharmādhīnā bodhiriti //

evaṃ cittāyattatāṃ sarvatra niścitya cittadṛḍhatāyāmudāharaṇamāha-

yathā capalamadhyastho rakṣati vraṇamādarāt / evaṃ durjanamadhyastho rakṣeccittavraṇaṃ sadā // bca_5.19 //

asamāhitajanamadhye punarupaghātabhayāttadgatamanasā yathā vraṇaṃ rakṣati kaścidapramattaḥ, evaṃ tathā śikṣārakṣaṇakāmaḥ akāraṇavairibālajanamadhye saṃvasan tatparaścittaṃ vraṇamiva rakṣet sarvakālam //

yathāprasiddhita idamudāharaṇam / na tu punarmanāgapi sādṛśyamastītyāha-

vraṇaduḥkhalavādbhīto rakṣāmi vraṇamādarāt / saṃghātaparvatāghātādbhītaścittavraṇaṃ na kim // bca_5.20 //

īṣanmātraṃ duḥkhaṃ duḥkhalavo vraṇakṛtaḥ / tasmādbhīto rakṣāmi vraṇam / prakṛtānurodhe rakṣatīti pāṭho yuktaḥ / ādarāt tātparyeṇa / saṃghātanarakaprabhavādanekavarṣasahasrānubhūyamānaduḥkhāt parvatāghātātsarvato vyāptiprahārāt bhītaḥ cittavraṇaṃ na kiṃ rakṣediti prakṛtena saṃbandhaḥ / yadi vā / ahaṃ tu kiṃ na rakṣāmīti pariṇāmena yojanīyam / athavā / evamutpāditabodhicittena manasā cintayitavyamityavatāryate / tadā rakṣāmīti //

kaḥ punarevaṃ sati guṇaḥ syādityāha-

anena hi vihāreṇa viharan durjaneṣvapi / pramadājanamadhye 'pi yatirdhīro na khaṇḍayate // bca_5.21 //

(bcp 56) yasmādevaṃmanasikāreṇa vicaran vanitājanamadhye 'pi prāsādapṛṣṭhe ayamanivāryo 'tiśayena kāmarāgeṣu / tenedamuktaṃ yatirdhīra iti / asmin manasikāre nidhyaptacittaḥ / na khaṇḍayate śikṣārakṣaṇamanasikārānna skhalati //

punarevaṃ karaṇīyamityatrārthe dṛḍhamabhiniveśaṃ darśayannāha-

lābhā naśyantu me kāmaṃ satkāraḥ kāyajīvitam / naśyatvanyacca kuśalaṃ mā tu cittaṃ kadācana // bca_5.22 //

civarapiṇḍapātādayo naśyantu, vilayaṃ yāntu mama kāmaṃ yatheṣṭam / satkāro gauraveṇa āsanadānapādavandanādipūjā / kāyo jīvitaṃ ca sarvametannaśyatu / anyadapi yatkiṃcit sukhasaumanasyanimittaṃ tadapi naśyatu / kuśalaṃ punarmama cittaṃ mā kasmiṃścidapi kāle naṅkṣīditi //

atra punarādaramutpādayituṃ śāstrakāra āha-

cittaṃ rakṣitukāmānāṃ mayaiṣa kriyate 'ñjaliḥ / smṛtiṃ ca saṃprajanyaṃ ca sarvayatnena rakṣata // bca_5.23 //

añjaliṃ kṛtvā prārthayāmi / kimartham? smṛtiṃ ca saṃprajanyaṃ ca / na kevalāṃ smṛtim, nāpi kevalaṃ saṃprajanyamiti parasparāpekṣayā cakāradvayam / tatra smṛtirāryaratnacūḍasūtre 'bhihitā-

yayā smṛtyā sarvakleśānāṃ prādurbhāvo na bhavati / yayā smṛtyā sarvamārakarmaṇāmavatāraṃ na dadāti / yayā smṛtyā utpathe kumārge vā na patati / yayā smṛtyā dauvārikabhūtayā sarveṣāmakuśalānāṃ cittacaitasikānāṃ dharmāṇāmavakāśaṃ na dadāti, iyamucyate samyaksmṛtiriti //

saṃkṣepataḥ punariyaṃ smṛtirucyate- vihitapratiṣiddhayoryathāyogaṃ smaraṇaṃ smṛtiḥ / yaccāhasmṛtirālambanāsaṃpramoṣa iti //

saṃprajanyaṃ tu prajñāpāramitāyāmuktam-

caraṃścarāmīti prajānāti / sthitaḥ sthito 'smīti prajānāti / niṣaṇṇo niṣaṇṇo 'smīti prajānāti / śayānaḥ śayito 'smīti prajānāti / yathā yathāsya kāyaḥ sthito bhavati tathā tathainaṃ prajānāti / peyālaṃ / so 'tikrāman vā pratikrāman vā saṃprajānacārī bhavati / ālokite vilokite saṃmiñjite prasārite saṃghāṭīpaṭapātracīvaradhāraṇe aśite pīte khādite nidrāklamaprativinodane āgate gate sthite niṣaṇṇe supte jāgarite bhāṣite tūṣṇībhāve pratisaṃlayane saṃprajānacārī bhavatīti //

idameva vakṣyati-

etadeva samāsena saṃprajanyasya lakṣaṇam / yatkāyacittovakṣāyāḥ pratyavekṣā muhurmuhuḥ // iti // [bodhi. 5.108] (bcp 57) kaḥ punaranayorvyatireke doṣaḥ, yenaite yatnena rakṣaṇīye kathite ityāha-

vyādhyākulo naro yadvanna kṣamaḥ sarvakarmasu / tathābhyāṃ vikalaṃ cittaṃ na kṣamaṃ sarvakarmasu // bca_5.24 //

rogopahatasāmarthyo yathā puruṣaḥ sarvakarmasu gamanabhojanādiṣu akarmaṇyo bhavati, tathā smṛtisaṃprajanyābhyāṃ vikalaṃ cittaṃ sarvakarmasu dhyānādhyayanādilakṣaṇeṣu //

anayoḥ samudāyābhāve doṣamuktvā pratyekamabhāve kathayitumāha-

asaṃprajanyacittasya śrutacintitabhāvitam / sacchidrakumbhajalavanna smṛtāvavatiṣṭhate // bca_5.25 //

na vidyate saṃprajanyaṃ yasmiṃstadasaṃprajanyam / taccittaṃ yasya tasya / śrutacintābhāvanāmayaprajñāpariniṣṭhitaṃ vastu na smaraṇamadhivasati / tanmūlaṃ ca sarvaṃ kalyāṇam / kimiva? yathā sacchidrakumbhe mukhanikśiptamudakamadhastādgacchati nāvatiṣṭhate //

idamaparaṃ tadvayatireke dūṣaṇamāha-

aneke śrutavanto 'pi śrāddhā yatnaparā api / asaṃprajanyadoṣeṇa bhavantyāpattikaśmalāḥ // bca_5.26 //

bahavo 'pi bahuśrutāḥ tathā śraddhāvanto yatnaparāḥ śikṣāyāmādarakāriṇaḥ asaṃprajanyadoṣeṇa āpattikaluṣitā bhavanti kāyacittapracārāpratyavekṣaṇāt //

aparamapi tadabhāve dūṣaṇamāha-

asaṃprajanyacaureṇa smṛtimoṣānusāriṇā / upacityāpi puṇyāni muṣitā yānti durgatim // bca_5.27 //

asaṃprajanyameva saṃprajanyābhāvaḥ kleśasvabhāvaścauraḥ kuśaladhanāpaharaṇāt / tena smṛtimoṣānusāriṇā rakṣapālabhūtāyāḥ smṛteḥ pramoṣamabhāvamanusṛtya muṣitā viluptakuśaladhanāḥ santaḥ upacityāpi puṇyāni, kuśaladhanānāṃ saṃcayaṃ kṛtvāpi, durgatiparāyaṇā bhavanti //

kutaḥ punarevamiti uktamevārthaṃ spaṣṭayannāha-

kleśataskarasaṃgho 'yamavatāragaveṣakaḥ / prāpyāvatāraṃ muṣṇāti hanti sadgatijīvitam // bca_5.28 //

taskarāścaurāḥ teṣāṃ saṃghātaḥ avatāragaveṣakaḥ piśācavadavatāramārgaprekṣī / chidrānveṣaṇatatpara ityarthaḥ / prāpyāvatāraṃ praveśamārgamāsādya muṣṇāti / tato hanti śobhanagataye jīvitapratilambhaṃ kuśalapātheyābhāvāt //

smṛtimadhikṛtyādhunā prāha-

tasmātsmṛtirmanodvārānnāpaneyā kadācana / gatāpi pratyupasthāpyā saṃsmṛtyāpāyikīṃ vyathām // bca_5.29 //

(bcp 58) yataḥ smṛterabhāve dūṣaṇamevaṃ syāt, tasmādidamatra doṣaṃ paśyatā smṛtirālabamnāsaṃpramoṣalakṣaṇā manodvārāt manogṛhapraveśamārgāt nāpaneyā nāpasāryā / sadā avasthāpayitavyetyarthaḥ / atha kadācit pramādatastato 'pagacchet, tadā gatāpi punarnirvartyopasthāpyā tatraivāropayitavyā / katham? saṃsmṛtya manasi nidhāya āpāyikīṃ narakādidurgativyathām //

tatra dvādaśemāḥ smṛtayo niṣphalaspandavarjanārthaṃ tathāgatājñānatikramānupālanavipākagauravasmṛtiprabhṛtayaḥ śikṣāsamuccaye pradarśitāḥ, tata eva vivekenāvadhāryāḥ //

sāpi smṛtistībrādarātsamutpadyate / ādaro 'pi śamathamāhātmyamavagamya ātāpena jāyate / etacca yathāvasaraṃ vakṣyāmaḥ //

keṣāṃcit punaranyathāpi smṛtirutpadyate / tadupadarśayannāha-

upādhyāyānuśāsanyā bhītyāpyādarakāriṇām / dhanyānāṃ gurusaṃvāsātsukaraṃ jāyate smṛtiḥ // bca_5.30 //

ācāryopādhyāyasaṃnidhau tadanyatamārādhyabrahmacārisaṃnidhau vā saṃvasatāṃ tadanuśāsanyā, bhītya tadbhayenāpi ādaraḥ kāryeṣu sarvabhāvenābhimukhyam, avajñāpratipakṣo dharmaḥ / tatkāriṇāṃ yatnavatāṃ sukṛtināṃ tadanuśāsanīṃ hitāhitavidhipratiṣedhaniyamamanugṛhṇatāmakṛcchreṇaiva smṛtirutpadyate //

itthamapi viharan smṛtimanasikārabahulavihārī bhavatīti kārikādvayena darśayannāha-

buddhāśca bodhisattvāśca sarvatrāvyāhatekṣaṇāḥ / sarvamevāgratasteṣāṃ teṣāmasmi puraḥ sthitaḥ // bca_5.31 //

iti dhyātvā tathā tiṣṭhet trapādarabhayānvitaḥ / buddhānusmṛtirapyevaṃ bhavettasya muhurmuhuḥ // bca_5.32 //

sarvadā buddhabodhisattvānāṃ samastavastuviṣayāpratihatajñānacakṣuṣāṃ sarvameva vastujātaṃ purato 'vasthitameva / ahamapi teṣāṃ puro 'vasthita eva, sarvavastuvat / iti manasi nidhāya tathaiva saṃyatātmā tiṣṭhet / trapādarabhayānvitaḥ / apratirūpe karmaṇi trapā lajjā / śikṣāyāmādaraḥ, tadatikrame bhayam / buddhabodhisattveṣveva vā trapādayaḥ / evaṃ sati aparo 'pi viśeṣaḥ syādityāha- buddhetyādi / tadevaṃ viharatastasya pratikṣaṇamakāmata eva buddhānusmṛtiḥ syāt //

saṃprajanyasya utpattisthairyayoḥ smṛtireva kāraṇamiti kathayannāha-

saṃprajanyaṃ tadāyāti na ca yātyāgataṃ punaḥ / smṛtiryadā manodvāre rakṣārthamavatiṣṭhate // bca_5.33 //

yadā smṛtirmanogṛhadvāri kleśataskarasaṃghātānupraveśanivāriṇī dauvārikavadavasthitā bhavati, tadā saṃprajanyamayatnata evotpadyate, utpannaṃ ca sat sthirībhavati //

evaṃ tāvadanayoranvayavyatirekābhyāṃ guṇadoṣāvabhidhāya anarthavivarjanārthaṃ niṣphalaspandavarjanamāha-

(bcp 59) pūrvaṃ tāvadidaṃ cittaṃ sadopasthāpyamīdṛśam / nirindriyeṇeva mayā sthātavyaṃ kāṣṭhavatsadā // bca_5.34 //

prathamaṃ tāvat idaṃ cittamityadhyātmani cintayati- sarvakālamīdṛśamuktakramayuktamupasthāpayitavyam / tataḥ paraṃ niṣphalaspandavarjanārthamapagatakaraṇagrāmeṇeva niṣphalarūpādiviṣayagrahaṇasarvavikalpopasaṃhārāt mayā sthātavyam / kimiva? kāṣṭhavat, cakṣurādivyāpāraśūnyatvāt //

idameva vyanakti-

niṣphalā netravikṣepā na kartavyāḥ kadācana / nidhyāyantīva satataṃ kāryā dṛṣṭiradhogatā // bca_5.35 //

īṣanmukulitapakṣmayugalā nāsāgraviniveśitā yugamātravyavalokinī vā kāryā dṛṣṭiḥ //

prathamārambhiṇaḥ saṃtatābhyāsena kleśasya parihārārthamāha-

dṛṣṭiviśrāmahetostu diśaḥ paśyetkadācana / ābhāsamātraṃ dṛṣṭvā ca svāgatārthaṃ vilokayet // bca_5.36 //

dṛṣṭicittaparikhedaparityāgāya kadācit karhicit diśo vyavalokayet / atha kadācit kaścit tatsamīpamāgacchet, tadā tasya praticchāyāmātraṃ viditvā svāgatavādena saṃtoṣaṇārthaṃ vilokayet / anyathā tatra tasya avadhyānena akuśalaṃ prasavet //

mārge 'pi tathādṛṣṭergacchata upaghātaparihārārthamāha-

mārgādau bhayabodhārthaṃ muhuḥ paśyeccaturdiśam / diśo viśramya vīkṣeta parāvṛtyaiva pṛṣṭhataḥ // bca_5.37 //

bhayahetucaurādipratipattyarthaṃ caturdiśamiti krameṇa / anyathā ātmabhāvasya rakṣā kṛtā na syāt / sarvadigvyavalokanaṃ tu kriyamāṇamauddhatyopaghātaparihārārthaṃ sthitvā kartavyam / pṛṣṭhato vyavalokanaṃ parāvṛtya paścānmukhībhūya //

asamādhānasya ca rakṣaṇāmāha-

saredapasaredvāpi puraḥ paścānnirūpya ca / evaṃ sarvāsvavasthāsu kāryaṃ buddhvā samācaret // bca_5.38 //

saretpuraḥ apasaretpaścāt / prapātādyupaghātaṃ nirīkṣya ca / evamityuktakramadiśā svaparahitaprayojanamavagamya pratipattisāro bhavet //

idānīṃ saṃprajanyakāritāṃ śikṣayitumāha-

kāyenaivamavastheyamityākṣipya kriyāṃ punaḥ / kathaṃ kāyaḥ sthita iti draṣṭavyaṃ punarantarā // bca_5.39 //

caturṇāmīryāpathānāmanyatamasminnīryāpathe / kāyenaivamiti sthitena niṣaṇṇena vā avastheyamiti / tadanantaraṃ svādhyāyādikriyāmārabhya punarantarāle vyavalokitavyaṃ kathaṃ kāyaḥ sthita iti tasminneveryāpathe, uta bhinne īryāpathe / bhinne punaḥ pūrvavadavasthāpyaḥ //

(bcp 60) kāyapratyavekṣāmabhidhāya cittapratyavekṣaṇāmāha-

nirūpyaḥ sarvayatnena cittamattadvipastathā / dharmacintāmahāstambhe yathā vaddho na mucyate // bca_5.40 //

dharmasya svaparahitalakṣaṇasya cintaiva mahāstambho vandhanāyattīkaraṇahetutvāt //

tasmin baddho 'pi punaḥ punarnirūpaṇīya ityāha-

kutra me vartata iti pratyavekṣyaṃ tathā manaḥ / samādhānadhuraṃ naiva kṣaṇamapyutsṛjedyathā // bca_5.41 //

kva punaridaṃ mano mama vartate, pūrvasminnālambane anyatra vā gatam / gatamavagamya tato nirvatya tatraiva yojayitavyam / svarasavāhitāyāmupekṣaṇīyam / iti śamathadhuramekamapi kṣaṇaṃ yathā na parityajati tathā dhārayitavyam / etāvatā śīlaṃ hi samādhisaṃvartanīmamityuktaṃ bhavati / yathoktaṃ candrapradīpasūtre-

kṣipraṃ samādhiṃ labhate niraṅgaṇaṃ viśuddhaśīlasyimi ānuśaṃsāḥ //

iti / [samādhi. 27.6]

ato 'vagamyate- ye kecit samādhihetavaḥ prayogāḥ, te śīle 'nugatā iti / tasmāt samādhyarthinā smṛtisaṃprajanyaśīlena bhavitavyam / tathā śīlārthināpi samādhau yatnaḥ kārya iti //

samādhānaparityāgāvakāśamāha-

bhayotsavādisaṃbandhe yadyaśakto yathāsukham / dānakāle tu śīlasya yasmāduktamupekṣaṇam // bca_5.42 //

agnidāhādi bhayam / tathā ratnatrayapūjādikṛta utsavaḥ / samadhikataraḥ sattvārthādirvā / tatsaṃbhave yadi sthātumaśaktaḥ, tadā kāmacāra ityanujñātam / sāpattiko na bhavatītyarthaḥ / kutaḥ punarayamaniyamo labhyata ityāha- dānetyādi / śīlaṃ yadyapi dānātprakṛṣṭam, tathāpi avaraśikṣāyāṃ śikṣamāṇasya tadanantarameva uttaraśikṣāvasthitasya abhyāsapāṭavābhāvāt kathaṃcit tāvatkālaṃ tato nivartamānasyāpi nāpattiḥ / dānasyāsau kālo na śīlasya / ata evoktam- yadyaśakta iti / etāvanmātreṇedamudāharaṇam / yathoktam- tatraikasyāṃ śikṣāyāṃ niṣpādyamānāyāmaśaktasya itaraśikṣānabhyāsādanāpattiḥ / āryākṣayamatisūtre 'pyevamavocat-

dānakāle śīlopasaṃhārasyopekṣā / iti / na cātaḥ śithilena bhavitavyam //

yatra kuśalapakṣasaṃcāre 'pi kvacit samādhānavighātaḥ syāt, tannopādeyamityāha-

yad buddhvā kartumārabdhaṃ tato 'nyanna vicintayet / tadeva tāvanniṣpādyaṃ tadgatenāntarātmanā // bca_5.43 //

(bcp 61) svayameva tu yuktyāgamābhyāṃ kalyāṇamitravacanādvā yathābalamavadhārya yatkiṃcitkarma kartumārabdhaṃ dhyānādhyayanādikam, prathamatastadeva tāvanniṣpattiṃ neyaṃ tannimnena cetasā, na punastadaniṣpannameva parityajya paramārambhaṇīyam //

kiṃ punarevaṃ syādyadi na syādityāha-

evaṃ hi sukṛtaṃ sarvamanyathā nobhayaṃ bhavet / asaṃprajanyakleśo 'pi vṛddhiṃ caivaṃ gamiṣyati // bca_5.44 //

yasmādevamanutiṣṭhataḥ sarvaṃ suśliṣṭaṃ kṛtaṃ syāt / tadviparyaye punarduḥśliṣṭamubhayaṃ pūrvaṃ cāttaṃ paścāt svīkṛtaṃ ca syāt / calapravṛtterasaṃprajanyaṃ syāt / praveśe vṛddhiḥ syāt //

itthamapi niṣphalaṃ varjayedityāha-

nānāvidhapralāpeṣu vartamāneṣvanekadhā / kautūhaleṣu sarveṣu hanyādautsukyamāgatam // bca_5.45 //

anekaprakāre 'saṃbaddhābhidhāne 'paropādhike pravartamāne āścaryavastuṣu ca samasteṣu svayamapi tatkriyāyāṃ darśanaśravaṇāya vākūcittasya tāratamyaṃ nivārayet //

aparamapi niṣphalavarjanāya prātimokṣoddiṣṭamācaret ityāha-

mṛnmardanatṝṇacchedarekhādyaphalamāgatam / smṛtvā tāthāgatīṃ śikṣāṃ bhītastatkṣaṇamutsṛjet // bca_5.46 //

bhūmiphalakādiṣu nakhadaṇḍādinā rekhākarṣaṇalekhanādi niṣprayojanamāgatamāpatitaṃ vivarjayet bhagavatā atra nivṛttirājñapteti saṃsmṛtya, tadatikramavipākaphalabhayāt / tatkṣaṇamiti na tatra kālaparilambhaṃ kuryāt //

saṃkleśasamudācāre saṃprajanyakāritāṃ yadetyādibhiḥ saptabhiḥ ślokaiḥ śikṣayitumāha-

yadā calitukāmaḥ syādvaktukāmo 'pi vā bhavet / svacittaṃ pratyavekṣyādau kuryāddhairyeṇa yuktimat // bca_5.47 //

prathamata eva svacittaṃ nirūpya / uktam (?) asaṃkliṣṭāvasthāyāṃ karaṇīyamuktam //

etadeva darśayati-

anunītaṃ pratihataṃ yadā paśyetsvakaṃ manaḥ / na kartavyaṃ na vaktavyaṃ sthātavyaṃ kāṣṭhavattadā // bca_5.48 //

raktaṃ dviṣṭaṃ vā svacittaṃ yadā paśyet, tadā hastapādādicalanamātramapi na kartavyam, nāpi vacanodīraṇam / anyathā tadutthāpite kāyavāgvijñaptī api saṃkliṣṭe syātām / ato bahirindriyavyāpāravikalpāvupasaṃhṛtya sthātavyaṃ kāṣṭhavattadā / sarvavyāpāravirahānnirvyāpārāḥ sarvadharmā iti manasi nidhāya //

(bcp 62) aparamāha-

uddhataṃ sopahāsaṃ vā yadā mānamadānvitam / sotprāsātiśayaṃ vakraṃ vañcakaṃ ca mano bhavet // bca_5.49 //

uddhatamiti / saddharmādiśravaṇapramādādapi uddhatam / vikṣepabahulamityarthaḥ / sopahāsaṃ vāgviheṭhanārambhakam, tayā yuktaṃ vā / mānaścittasyonnatiḥ / madaḥ svadharme (?) cittasyābhiniveśaḥ / tābhyāmanvitaṃ tatsaṃprayuktam / utprāsaḥ kāyikī viheṭhanā, tena sahotkaṭam / vakraṃ kuṭilaṃ śaṭhaṃ vā / vañcakaṃ pratārakaṃ māyāvi vā / yadi mano bhavet, sthātavyaṃ kāṣṭhavattadeti saṃbandhaḥ //

yadātmotkarṣaṇābhāsaṃ parapaṃsanameva vā / sādhikṣepaṃ sasaṃrambhaṃ sthātavyaṃ kāṣṭhavattadā // bca_5.50 //

ātmotkarṣaṇaṃ svaguṇātiśayaprakāśanam / tadābhāsaṃ tatpratibhāsaṃ tadvikalpanāt / parapaṃsanaṃ paravigrahaḥ doṣāviṣkaraṇaṃ vā, tadyuktam / adhikṣepaḥ parasya vacanatiraskāraḥ / saṃrambhaḥ sadākalivivādanimittacittapradoṣaḥ / ubhayatra saha tena vartata iti vigrahaḥ / evaṃ yadā paśyetsvakaṃ manaḥ, sthātavyaṃ kāṣṭhavat tadeti sāmānyoktamabhisaṃbadhyate //

lābhasatkārakīrtyarthi parivārārthi vā punaḥ / upasthānārthi me cittaṃ tasmāttiṣṭhāmi kāṣṭhavat // bca_5.51 //

kīrtiryaśaḥ / parivāraḥ dāsīdāsakarmakarādiḥ / upasthānaṃ pādadhāvanamardanādi / ebhirarthi tadabhilāṣaṃ mama cittam / tasmāttiṣṭhāmi kāṣṭhavat //

parārtharūkṣaṃ svārthārthi pariṣatkāmameva vā / vaktumicchati me cittaṃ tasmāttiṣṭhāmi kāṣṭhavat // bca_5.52 //

parārtharūkṣaṃ parārthavimukham / svārthārthi svārthābhiniviṣṭam / pariṣat śiṣyāntevāsiprabhṛtijanasamājaḥ / tadabhilāṣi tatparivārārthi //

asahiṣṇvalasaṃ bhītaṃ pragalbhaṃ mukharaṃ tathā / svapakṣābhiniviṣṭaṃ ca tasmāttiṣṭhāmi kāṣṭhavat // bca_5.53 //

asahiṣṇu asahanaśīlam / alasaṃ kriyāsu akarmaṇyam / kusīdamityarthaḥ / bhītaṃ kāyajīvitabhīru bhayahetubhyo vā / pragalbhaṃ dhṛṣṭam / mukharaṃ durvacaskam, yuktāyuktamanapekṣya abhidhāyakaṃ vā / svapakṣeḥ śiṣyāntevāsijñātisālohitādau abhiniviṣṭaṃ pakṣapātātiśayavat //

sāṃprataṃ pratikāranirdeśamāha-

evaṃ saṃkliṣṭamālokya niṣphalārambhi vā manaḥ / nigṛhṇīyād dṛḍhaṃ śūraḥ pratipakṣeṇa tatsadā // bca_5.54 //

upadarśitakrameṇa saṃkliṣṭaṃ saṃkleśasaṃprayuktaṃ niṣphalavyāpāraṃ vā jñātvā svacittaṃ sarvapravṛttinigedhena prabhāvamandatāṃ vidhāya nigṛhṇīyādabhibhavet / dṛḍhaṃ yathā punarapi samudācāradharmakaṃ (bcp 63) na bhavati / kleśādisaṃgrāme vijayāya kṛtaparikaraḥ śuro bodhisattvaḥ / pratipakṣeṇa yo yasmin pratipakṣa uktaḥ yathā rāgādāvaśubhādi, tena tadviparītavidhānenetyarthaḥ / sadā sarvakālam, yadā yadā saṃkliṣṭaṃ pratīyate / ugraparipṛcchāyāṃ gṛhiṇaṃ bodhisattvamadhikṛtyoktam-

tena surāmaireyamadyapramādasthānāt prativiratena bhavitavyam, amattena anunmattena acapalena acañcalena abhrāntena amukhareṇa anunnatena upasthitasmṛtināsasaṃprajanyena / iti //

atraiva ca pravrajitaṃ bodhisattvamadhikṛtyoktam- smṛti saṃprajanyasyāvikṣepaḥ / iti //

tathā āryatathāgataguhyasūtre darśitam-

na khalu punaḥ kulaputra bodhisattvasya vāg raktā vā duṣṭā vā mūḍhā vā kliṣṭā vā kṣaṇavyākaraṇī vā svapakṣotkarṣaṇavacanā vā parapakṣanigrahavacanā vā ātmavarṇānunayavacanā vā paravarṇapratighātavacanā vā pratijñottāraṇavacanā vā ābhimānikavyākaraṇavacanā veti //

evaṃ niṣphalaspandavarjanena anarthādātmabhāvasya rakṣā pratipāditā bhavati / tasmānmayā śīlasusthitena aprakampena aśithilena bhavitavyamiti //

etacca samāhitacittasya sidhyati / ata idaṃ śamathamāhātmyamavagamya tātparyeṇa bhāvayitavyam / anena tīvra ādaro bhavati śikśāsu / tenāpi smṛtirupatiṣṭhate / upasthitasmṛtirniṣphalaṃ varjayati / tasya anarthā na saṃbhavanti / tasmādātmabhāvaṃ rakṣitukāmena smṛtimūlamanviṣya nityamupasthitasmṛtinā bhavitavyam / etadevāha-

tatrātmabhāve kā rakṣā yadanarthavivarjanam / kena tallabhyate sarve niṣphalaspandavarjanāt //

etatsidhyetsadā smṛtyā smṛtistīvrādarādbhavet / ādaraḥ śamamāhātmyaṃ jñātvātāpena jāyate //

iti / [śikṣā. sa. kārikā-7-8]

śamathamāhātmyaṃ tu yathāvasaramihaiva kathayiṣyate //

ayamatra piṇḍārthaḥ anarthavivarjanārthamavadhārayitavya iti vṛttatritayenopadarśayannāha-

suniścitaṃ suprasannaṃ dhīraṃ sādaragauravam / salajjaṃ sabhayaṃ śāntaṃ parārādhanatatparam // bca_5.55 //

parasparaviruddhābhirbālecchābhirakheditam / kleśotpādādidaṃ hyetadeṣāmiti dayānvitam // bca_5.56 //

ātmasattvavaśaṃ nityamanavadyeṣu vastuṣu / nirmāṇamiva nirmānaṃ dhārayāmyeṣa mānasam // bca_5.57 //

(bcp 64) suniścitaṃ saṃdehaviparyāsarahitam / suprasannaṃ sadā prītisaumanasyabahulam / dhīramacañcalam / ādaraḥ kathita eva / gauravaṃ ārādhyeṣu cittasya namratā / tābhyāṃ saha vartate / salajjaṃ pūrvavat / sabhayaṃ skhalita[mālokya] bhītam / śāntaṃ saṃyatendriyam / sattvārādhanayatnavat //

yadekasya rucijanakaṃ tadanyasya viparītam / anyonyaviruddhābhiḥ pṛthagjanecchābhirakheditamavipratisāri / katham? dayānvitam / hetupadametat / kutaḥ? yasmāt kleśotpādānna svātantryādidametat parasparaviruddhacaritameṣāṃ bālānāmiti matvā //

ātmasattvavaśaṃ svaparāyattaṃ sarvakālam / kiṃ sarvatra? na / anavadyeṣu vastuṣu ubhayasāvadyaśūnyeṣu / kiṃvat? nirmāṇamiva nirmitavat / vigatamānaṃ mānasaṃ dhārayāmi / eṣo 'hamiti bodhisattvo manasi niveśayet //

asmādapi saṃvegamanasikārāccittasyānarthavivarjanena rakṣā vidhātavyetyāha-

cirātprāptaṃ kṣaṇavaraṃ smṛtvā smṛtvā muhurmuhuḥ / dhārayāmīdṛśaṃ cittamaprakampyaṃ sumeruvat // bca_5.58 //

aticireṇa kālena labdham uktaṃ kṣaṇavaraṃ smaraṇena cetasi kṛtvā punaḥ punarantaraṃ sthirīkaromi īdṛśamuktasvabhāvam / aprakampyaṃ kampayitumaśakyaṃ kāmādivitarkapavanaiḥ parvatarājavat //

evametābhyāṃ śīlasamādhibhyāmanyonyasaṃvardhakābhyāṃ cittakarmapariniṣpattiḥ / tasmādavasthitametat- cittaparikarmaiva bodhisattvaśikṣā iti / tena yaduktam-

cittarakṣāvrataṃ muktvā bahubhiḥ kiṃ mama vrataiḥ / [bodhi. 5.18]

iti, tat pariniṣṭhitam //

punastadekāntamavadhārayituṃ kāyapratyavekṣāmāha-

gṛdhrairāmiṣasaṃgṛddhaiḥ kṛṣyamāṇa itastataḥ / na karotyanyathā kāyaḥ kasmādatra pratikriyām // bca_5.59 //

kāyasya sarvathā kvacidapi vyāpāro nāsti, svātmanyapi sāmarthyābhāvāt / anyathā cittarahito mṛtasya kāyaḥ / gṛdhrādibhirvipralujyamāna itastataḥ pratikāramātmarakṣaṇārthaṃ kimiti na karotīti pṛcchati sarvasāmarthyavikalatvāt / ata eva cittaparikarmaiva sādhyam / tasmin parikarmite kāyasya ayatnata eva parikarmasiddheḥ, tatparatantratvāttasyetyuktaṃ bhavati //

evaṃ sarvathānupayogini kāye sāpekṣatāṃ nirasyannāha-

rakṣasīmaṃ manaḥ kasmādātmīkṛtya samucchrayam / tvattaścetpṛthagevāyaṃ tenātra tava ko vyayaḥ // bca_5.60 //

(bcp 65) he manaḥ, anātmakameva ātmatvena svīkṛtya māṃsāsthipuñjaṃ kāyasaṃjñakaṃ kasmātkāraṇāt tvaṃ rakṣasi? kimevamiti cet, bhavato yadi bhinna evāyaṃ kāyaḥ, tena asyāpacaye tava kimapacīyate?

pūrvameva ciraṃ svīkṛta iti cedāha-

na svīkaroṣi he mūḍha kāṣṭhaputtalakaṃ śucim / amedhyaghaṭitaṃ yantraṃ kasmādrakṣasi pūtikam // bca_5.61 //

he mūḍha, mohavijṛmbhitametad bhavataḥ / śuciṃ pavitram / ayaṃ ca aśuciḥ / idamevāha- amedhyeti / pūtikaṃ śatanadharmakam //

syādetat- kimanyasminnasannapi doṣa ucyate ityatrāha-

imaṃ carmapuṭaṃ tāvatsvabuddhayaiva pṛthakkuru / asthipañjarato māṃsaṃ prajñāśastreṇa mocaya // bca_5.62 //

asthīnyapi pṛthakkṛtvā paśya majjānamantataḥ / kimatra sāramastīti svayameva vicāraya // bca_5.63 //

carmamayaṃ puṭam / svamativiśeṣeṇa pṛthak kuru svakāyādapasāraya / asthighaṭitapañjarād yantrāt prajñātmakena śastreṇa māṃsakartanena / tadanantaramasthīnyapi khaṇḍaśaḥ pṛthag bhinnāni kṛtvā majjānaṃ paśya avalokaya / yadi antaraṃ kāyaḥ caturmahābhūtikaḥ mātapitraśucikalalasaṃbhūtaḥ duḥkhamayaḥ kṛtaghnaśceti vistareṇa pratipādayiṣyatīti kimatra sāramasti vijñapraśastaṃ nyāyyaṃ vā, ityātmanaiva vicāraya //

evamanviṣya yatnena na dṛṣṭaṃ sāramatra te / adhunā vada kasmāttvaṃ kāyamadyāpi rakṣasi // bca_5.64 //

evaṃ kathitanayena / sādhūktamiti cet, adhunā vada kasmāt tvamadyāpi sarvaguṇavikalamapi kāyaṃ rakṣasi? evaṃ vidvānapi //

tathāpi asti kiṃcidatropādeyamiti cedāha-

na khāditavyamaśuci tvayā peyaṃ na śoṇitam / nāntrāṇi cūṣitavyāni kiṃ kāyena kariṣyasi // bca_5.65 //

yadasti, na tadupayuktamiti saṃkṣepārthaḥ / ataḥ kimanupayoginā kāyena kariṣyasi? atra āsaṅgo na yukta ityarthaḥ //

anyaprayojanābhāvādidamevocitamutpaśyāmaḥ ityāha-

yuktaṃ gṛdhraśṛgālāderāhārārthaṃ tu rakṣitum / karmopakaraṇaṃ tvetanmanuṣyāṇāṃ śarīrakam // bca_5.66 //

(bcp 66) yasmāt karmaṇi kenacit sahakāribhāvenopayujyate iti rakṣyate //

tathāpi nātrābhiniveśaḥ kārya ityāha-

evaṃ te rakṣataścāpi mṛtyurācchidya nirdayaḥ / kāyaṃ dāsyati gṛdhrebhyastadā tvaṃ kiṃ kariṣyasi // bca_5.67 //

ācchidyeti balāt / bhavato gṛhītvā niṣkṛpo mṛtyustava kāyaṃ gṛdhrebhyo dāsyati, tadāpi na kaścitpratikāro bhaviṣyati ityabhiprāyaḥ //

syādetat- yadyapi evam, tathāpi bhaktācchādanamātreṇāpi paripālanīya ityatrāha- na

sthāsyatīti bhṛtyāya na vastrādi pradīyate / kāyo yāsyati khāditvā kasmāttvaṃ kuruṣe vyayam // bca_5.68 //

yadi nāma bhṛtyakarmakaraṇaṃ tathāpi tatrānavasthāyisvabhāve vicakṣaṇo jñātvaiva pravartate, evaṃ prakṛte 'pi taddharmiṇi kenābhiprāyeṇa he manaḥ, tvaṃ kuruṣe vyayamupakaraṇopakṣayam?

tat kiṃ sarvathaiva niravakāśo 'yaṃ kartavyaḥ? netyāha-

datvāsmai vetanaṃ tasmātsvārthaṃ kuru mano 'dhunā / na hi vaitanikopāttaṃ sarvaṃ tasmai pradīyate // bca_5.69 //

vetanaṃ karmamūlyam / tāvanmātraṃ datvā asmai gatvaraśarīrāya, karmopakaraṇatvāt, svaprayojanamanuvidheyaṃ he manaḥ / anenaivopārjitaṃ kasmādasmai na dīyate iti cet, na hi yasmāt yatkiṃcit karmakareṇopāttaṃ sarvaṃ tasmai karmakarāya pradīyate iti nyāyo 'sti //

tasmādevamupastambhamātraṃ datvā-

kāye naubuddhimādhāya gatyāgamananiśrayāt / yathākāmaṃgamaṃ kāyaṃ kuru sattvārthasiddhaye // bca_5.70 //

kāye naubuddhiṃ kṛtvā pravṛttinivṛttihetoḥ icchāyattaṃ kāyaṃ kuru sattvārthānuṣṭhānāya niṣpattaye vā / he manaḥ iti prakṛtamabhisaṃbadhyate //

iti kāyapratyavekṣayā tatsvabhāvamupayogaṃ ca vicārya pariniścitakāyaprayojanamupasaṃharannāha-

evaṃ vaśīkṛtasvātmā nityaṃ smitamukho bhavet / tyajed bhṛkuṭisaṃkocaṃ pūrvābhāṣī jagatsuhṛt // bca_5.71 //

uktanītyā āyattīkṛtaḥ ātmā cittakāyalakṣaṇaḥ / sarvadā prasannavadano bhavet / bhrūlalāṭasaṃkocaṃ ca prasādahānikaraṃ tyajet / pūrvameva asaṃcodita eva pareṇa svāgatādivādaiḥ saṃtoṣaṇaśīlo bhavet / sarvasattvānāmakāraṇabāndhavaśca //

ityapi śikṣā anarthavarjanāya kāryetyāha-

saśabdapātaṃ sahasā na pīṭhādīn vinikṣipet / nāsphālayetkapāṭaṃ ca syānniḥśabdaruciḥ sadā // bca_5.72 //

(bcp 67) sahasā tvaritameva niṣprayojanaṃ hastadaṇḍādinā kapāṭaṃ ca nākoṭayet / saṃkṣepataḥ niḥśabdābhiratirbhavet //

kaḥ evaṃ sati guṇaḥ syādityāha-

bako biḍālaścauraśca niḥśabdo nibhṛtaścaran / prāpnotyabhimataṃ kāryamevaṃ nityaṃ yatiścaret // bca_5.73 //

ete sarve niḥśabdā anuddhatāśca viharanto vivakṣitamarthaṃ labhante / vratināpi tathaiva samādhānakaṇṭakaparihāreṇa vihartavyam //

ityapi śikṣitavyamityāha-

paracodanadakṣāṇāmanadhīṣṭopakāriṇām / pratīcchecchirasā vākyaṃ sarvaśiṣyaḥ sadā bhavet // bca_5.74 //

kaukṛtyavinodanāvavādānuśāsanīsamarthānāṃ vinayādikovidānām aprārthitahitaiṣiṇāṃ hitavidhāyakaṃ vacanaṃ mūrdhnā gṛhṇīyāt / na teṣu svacittaṃ dūṣayitavyam, nāpyavamānanā kāryeti bhāvaḥ / sarvasattveṣu gurugauravadhiyā samācaritavyamiti sarvaṃ sarvebhyaḥ śikṣet //

īrṣyāmalaprakṣālanāmāha-

subhāṣiteṣu sarveṣu sādhukāramudīrayet / puṇyakāriṇamālokya stutibhiḥ saṃpraharṣayet // bca_5.75 //

parakīyaguṇavardhanavacaneṣu tatparitoṣaṇāya sādhu sādhu, bhadrakamidam, iti śabdamadhyāśayenoccārayet / kuśalakarmakāriṇamapi dṛṣṭvā sādhu kṛtam, dhanyo bhavān sukṛtakarmakārī, ityādibhiḥ stutivacanaiḥ protsāhayet //

lapanāśaṅkāṃ nirasyannāha-