ताराभट्टारिकानामाष्टोत्तरशतकस्तोत्र

ताराभट्टारिकानामाष्टोत्तरशतकस्तोत्र

आर्यताराभट्टारिकानामाष्टोत्तरशतकस्तोत्र

ओं नमः श्रीमदार्यतारायै

श्रीमत्पोतलके रम्ये नानाधातुविराजिते / नानाद्रुमलताकीर्णे नानापक्षिनिकूजिते // tbh_1

नानानिर्झरझंकारे नानामृगसमाकुले / नानाकुसुमजातीभिः समन्ताद् अधिवासिते // tbh_2

नानाहृदयफलोपेते षट्पदोद्गीतनिस्वने / किन्नरैर् मधुरैर् गीतैर् मत्तवारणसंकुले // tbh_3

सिद्धविद्याधारगणैः गन्धर्वैश् च निनादिते / मुनिभिर् वीतरागैश् च सततं संनिषेविते // tbh_4

बोधिसत्वगणैश् चान्यैः दशभूमीश्वरैर् अपि / आयतारादिभिर् देवीविद्याराज्ञीसहस्रकैः // tbh_5

क्रोधराजगणैश् चान्यैः हयग्रीवादिभिर् वृते / सर्वसत्वहितोद्युक्तो भगवान् अवलोकितः // tbh_6

विजहार ततः श्रीमान् पद्मगर्भासने स्थितः / महता तपसा युक्तो मैत्र्या च कृपयान्वितः // tbh_7

धर्मं दिदेश तस्यां स महत्यां देवपर्षदि / तत्रोपविष्टम् आगम्य वज्रपाणिर् महाबलः // tbh_8

परमकृपया युक्तः पप्रच्छेत्य् अवलोकितम् / तस्करोरगसिंहाग्निगजव्याघ्राम्बुसंकटे // tbh_9

सीदन्त्य् अमी मुने सत्वा मग्नाः संसारसागरे / बद्धाः संसारकैः पाशै रागद्वेषतमोपहैः // tbh_10

मुच्यन्ते येन संसारात् तन् मे ब्रूहि महामुने / एवम् उक्ते जगन्नाथः स श्रीमान् अवलोकितः // tbh_10बिस्

उवाच मधुरां वाणीं वज्रपाणिं प्रबोधिनम् / शृणु गुह्यकराजेन्द्र अमिताभस्य तायिनः // tbh_11

प्रणिधानवशोत्पन्ना ममाज्ञा लोकमातरः / महाकरुणयोपेता जगदुद्धरणोद्धृताः // tbh_12

उदितादित्यसंकाशाः पूर्णेन्दुवदनप्रभाः / भासयन्ति द्रुमांस् ताराः सदेवासुरमानुषान् // tbh_13

कम्पयन्ति त्रयो लोकान् त्रास्यन्ती यक्षराक्षसान् / नीलोत्पलकरा देवी मा भैर् मा भैर् इति ब्रुवन् // tbh_14

जगत्संरक्षणार्थाय अहम् उत्पादिता जिनैः / कान्तारे शस्त्रसंपर्के नानाभयसमाकुले // tbh_15

स्मरणाद् एव नामानि सत्वान् रक्षाम्य् अहं सदा / तारयिष्याम्य् अहं नाथ नानाभयमहार्णवात् // tbh_16

तेन तारेति मं लोके गायन्ति मुनिपुंगवाः / कृताञ्जलिपुटा भूत्वा ततः सादरसाध्वसाः // tbh_17

ज्वलतीर्यन्तरीक्षेस्थ इदं वचनम् अब्रवीत् / नामाष्टशतकं ब्रूहि यत् पुरा कीर्तितं जिनैः // tbh_18

दाशभूमीश्वरैर् नाथैर् बोधिसत्वैर् महर्द्धिकैः / सर्वपापहरं पुण्यं माङ्गल्यं कीर्तिवर्धनम् // tbh_19

धनहान्यकरं चैव आरोग्यपुष्टिवर्धनम् / मैत्रीम् आलम्ब्य सत्वानां तत् कीर्तय महामुने // tbh_20

एवम् उक्ते ऽथ भगवान् प्रहसन्न् अवलोकितः / व्यवलोक्य दिशः सर्वा मैत्र्या स्फुरणया दृशा // tbh_21

दक्षिणकरम् उद्धृत्य पुण्यलक्षणमण्डितम् / तम् उवाच महाप्राज्ञः साधु साधु महातपः // tbh_22

नामानि शृणु महाभाग सर्वसत्वैकवत्सलः / यानि संकीर्त्य मनुजाः सम्यक् ते स्युर् धनेश्वराः // tbh_23

सर्वव्याधिविनिर्मुक्ताः सर्वैश्वर्यगुणान्विताः / अकालमृत्युनिर्दग्धाश् च्युता यान्ति सुखावतीम् // tbh_24

तान्य् अहं संप्रवक्ष्यामि देवसंघाः शृणुध्व मे अनुमोदेत सद्धर्मे भविष्यध्वं सुनिर्वृताः // tbh_25 ओं लोचने सुलोचने तारे तारोत्सवे सर्वसत्वानुकम्पिनि / सर्वसत्वोत्तारिणि सहस्रभुजे सहस्रनेत्रे // tbh_26 ओं नमो भगवते ऽवलोक्य आवलोक्या / सर्वसत्वानां चाहं फुट् स्वाहा // tbh_27 ओं शुद्धे विशुद्धे शोधनविशोधनि / सुगतात्मजे मैत्रीहृदये निर्मले श्यामे श्यामरूपिणि // tbh_28 महाप्राज्ञे प्रवरे प्रवरभूषिते पराजिते / महारौद्रि विश्वरूपि महायश // tbh_29 कल्पाग्निमहातेजा लोकधात्रीमहायशा / सरस्वती विशालाक्षी प्रज्ञाश्रीबुद्धिवर्धनी // tbh_30 ओं धृतिदा पुष्टिदा स्वाहा ओंकारा कामरूपिणी / सर्वसत्वहितोद्युक्ता संग्रामे तारणी जया // tbh_31 प्रज्ञापारमितादेवी आर्यातारा मनोरमा / दुन्दुभिसखिनी पूर्णविद्याराज्ञी प्रियंवदा // tbh_32 चन्द्रानना महागौरी अजिता पीतवाससा / महामाया महाश्वेता महाबलपराक्रमा // tbh_33 महारौद्री महाचण्डी दुष्टसत्वनिसूदनी / प्रशान्ता शान्तरूपा च विजया ज्वलनप्रभा // tbh_34 विद्युन्माली ध्वजी खड्गी चक्री चापयुतायुधा / जम्भनी स्तम्भनी काली कालरात्री निशाचरी // tbh_35 रक्षणी मोहिनी शान्ता कान्ता विभाविनी शुभा / ब्राह्मणी वेदमाता च गुहा च गुहवासिनी // tbh_36 माङ्गल्या शङ्करी सौम्या जातवेदा मनोजवा / कापालिनी महाभागा संध्या सत्यापराजिता // tbh_37 सार्थवाहा कृपदृष्टी नष्टमार्गप्रदर्शनी / वरदा शासनी शास्त्री स्त्रीरूपामितविक्रमा // tbh_38 शवली योगिनी सिद्धा चाण्डाली चामृता ध्रुवा / धन्या पुण्या महाभागा सुभागा प्रियदर्शनी //

tbh_39 कृतान्तत्रासनी भीमा उग्रा उग्रमहातपा / जगदेकहितोद्युक्ता शरण्य भक्तिवत्सला // tbh_40 वागीश्वरी शिवा सूक्ष्मा नित्या सर्वार्थमातृका / सर्वार्थसाधनी भद्रा गोप्त्री धात्री धनंजया // tbh_41 अभया गौतमी पुण्या श्रीमल्लोकेश्वरात्मजा / तारा नामगुणानन्ता सर्वाशापरिपूरणी // tbh_42 नामाष्टोत्तरशतकं तत् कीर्तितं हितेन वः / रहस्यम् अद्भुतं गुह्यं देवानाम् अपि दुर्लभम् / 43 सौभाग्यं भाग्यकरणं सर्वकील्बिषनाशनम् / सर्वव्याधिप्रशमनं सर्वसत्वसुखावहम् // tbh_44 त्रिकारं यः पठेद् धीमान् शुचिः स्नानसमाहितः / अचिरेणैव कालेन राज्यश्रियम् अवाप्नुयात् // tbh_45 दुःखितः स्यात् सुखी नित्यदरिद्रो धनवान् भवेत् / जडो भवेन् महाप्राज्ञो मेधावी च न संशयः // tbh_46 बन्धनान् मुच्यते बद्धो व्यवहारे जयो भवेत् / शत्रवो मित्रतां यान्ति शृङ्गिणश् चाथ दंष्ट्रिणः // tbh_47 संग्रामे संकटे दुर्गे नानाभयसमाकुले / स्मरणाद् एव नामानि सर्वपापान्य् अपोहति // tbh_48 नाकालमृत्युर् भवति प्राप्नोति विपुलां श्रियम् / मानुश्यं सफलं जन्म यस्य कस्य महात्मनः // tbh_49 यश् चेदं प्रातर् उत्थाय मानवः कीर्तयिष्यति / स दीर्घकालम् आयुष्मान् श्रियं च लभते नरः // tbh_50 देवा नागास् तथा यक्षा गन्धर्वाः कटपूतनाः / पिशाचराक्षसा भूता मातरो रौद्रतेजसः // tbh_51 क्षयापस्मारकारकश् चैव क्षतकाखोर्डकादयः / डाकिन्यास् तारका प्रेताः स्कन्दा मारा महाग्रहाः // tbh_52 छायाम् अपि न लङ्घन्ते किं पुनस् तस्य विग्रहः / दुष्टसत्वा न वाधन्ते व्याधयो नाक्रमन्ति च //

tbh_53 देवासुरम् अपि संग्रामम् अनुभवन्ति महर्द्धिकाः / सर्वैश्वर्यगुणैर् युक्तः पुत्रपौत्रैश् च वर्धते // tbh_54 जातिस्मरो भवेद् धीमान् कुलीनः प्रियदर्शनः // tbh_55 प्रीतिमांश् च महावाग्मी सर्वशास्त्रविशारदः // tbh_56 कल्याणमित्रसंसेवी बोधिचित्तविभूषितः / सदाविरहितो बुद्धैर् यत्र यत्रोपपद्यते // tbh_57

इत्य् आर्यताराभट्टारिकाया नामाष्टोत्तरशतकं बुद्धभाषितं समाप्तम् /

// शुभम् //