नित्यकर्मपूजाविधि

नित्यकर्मपूजाविधि

नित्यकर्मपूजाविधिः ओं नमः श्रीवज्रसत्त्वाय ।

अथ नित्यकर्मपूजाविधिः प्रारभ्यते । तत्रादौ ओं ह्रीं स्वाहा 3 कायविशोधने स्वाहा । इति मन्त्रेण त्रिधा आचम्य पूजाभाण्डसंकल्पं कुर्यात् । तद्यथा - ओं अद्य श्रीमच्छ्रीत्यादिना संकल्पोच्चारणानन्तरमिदं मन्त्रं पठेत् । ओं नमो भगवते पुष्पकेतुराजाय तथागतायार्हते सम्यक्संबुद्धाय । तद्यथा - ओं पुष्पे 2 महापुष्पे सुपुष्पे पुष्पोद्भवे पुष्पसंभवे पुष्पावकिरणे स्वाहा । इदं सपुष्पधूपदीप गन्धरसनैवेद्यादियुक्तं सुवर्णपुष्पभाजनं संकल्पयाम्यहम् । ततो प्राणायामादि न्यासयोगादि कृत्वा गुरुं च नमस्कृत्य शङ्खं पूजयेत् ॥ ओं गुरुभ्यो नमः 3 समस्त गुरु आज्ञा । ओं आ हूं वं वज्रोदके हूं स्वाहा ॥ शिरसि शङ्खोदकेनाभिषिञ्चेत् -

यथा हि जातमात्रेण स्नापिताः सर्वतथागताः । तथाहं स्नापयिष्यामि शुद्धदिव्येन वारिणा ॥

ओं सर्वतथागताभिषेकसमश्रिये हूं । पुनः । ओम्ह्री स्वाहेति मन्त्रेणाचम्य पूर्वोक्तमन्त्रेण पूजाभाण्डमधिष्ठाय पुष्पैकं त्रिकायाधिष्ठानं कृत्वा भूमौ न्यसेत् । ओं आः हुं 3 तिष्ठ वज्रासने हुं । पार्श्वाभ्यां क्षिपेत् द्वौ पुष्पौ । ओं सर्वपापानपनय हुं । एकं शिरसि न्यसेदनेन मन्त्रेण - ओं मणिधरि वज्रिणि महाप्रतिसरे रक्ष 2 मां सर्वसत्त्वानां च हुं 2 फट् स्वाहा । मण्डले तिलकं कृत्वात्मानं च भूषयेत् । ओं वज्रतिलकभूषणे स्वाहा । सजलपुष्पाक्षतवासमण्डले पातयेदनेन मन्त्रेण, ओं वज्रोदके हूं । ओं वज्रगोमये हुं । ओं वज्रभूमौ सुरेखे सर्वतथागताधिष्ठानाधितिष्ठन्तु स्वाहा । एतच्च पठेत् ।

दानं गोमयम्बुना च सहितं शीलं च सम्मार्जनं क्षान्तिं क्षुद्रपिपीलिकापनयनं वीर्यं क्रियास्थापनम् । ध्यानं तत्क्षणमेकचित्तकरणं प्रज्ञासुरेखोज्वला एताः पारमिता षडेव लभते कृत्वा मुनेर्मण्डलम् ॥

भवति कनकवर्णः सर्वरोगौर्विमुक्तः सुरमनुजविशिष्टश्चन्द्रवद्दीप्तकान्तिः । धनकनकसमृद्धिर्जायते राजवंशे सुगतवरगृहे ऽस्मिन् कायकर्माणि कृत्वा ॥

ओं सुले(रे)खे सर्वतथागताधिष्ठानाधितिष्ठन्तु स्वाहा । पुष्पैकं हस्तस्योपरि न्यस्य न्युब्जहस्तं कृत्वा मण्डले क्षिपेत् । ओं चन्द्रार्कविमले स्वाहा । मण्डलं प्रदक्षिणीकृत्य पुष्पैकं बलिभाण्डे क्षिपेत् । ओं वज्रसत्त्व सर्वविघ्नानुत्सादय हुं । पूर्वादिक्रमेण द्विपरिवर्तनं कृत्वा एकविंशतिपुष्पपातनं कुर्यात् मण्डले । ओं हः महामध्ये मेरवे नमः । ओं ह्रीं मध्ये मेरवे नमः । ओं सूं सूक्ष्ममध्ये मेरवे नमः । इति मध्ये । ओं यं पूर्वविदेहाय नमः । पू । ओं रं जम्बूद्वीपाय नमः । द । ओं लं अपरगोदानीये नमः । प। ओं वं उत्तरकुरवे नमः । उ । ओं या उपद्वीपाय नमः । अ । ओं रा उपद्वीपाय नमः । नै । ओं ला उपद्वीपाय नमः । वा । ओं वा उपद्वीपाय नमः । ई । तथैव । ईं यः गजरत्नाय नमः । ईं रः अश्वरत्नाय नमः । ओं लः पुरुषरत्नाय नमः । ओं वः स्त्रीरत्नाय नमः । ओं या खड्गरत्नाय नमः । ओं रा चक्ररत्नाय नमः । ओं ला मणिरत्नाय नमः । ओं वा सर्वनिधानेभ्यो नमः । ई । ओं चं चन्द्राय नमः । द। ओं सूं सूर्याय नमः । उ । ओं आः हुं श्रीवज्रसत्त्वगुरवे नमः । मध्ये । पञ्चोपचारपूजा । ओं वज्रगन्धे स्वाहा । गन्धः । ओं वज्रपुष्पे स्वाहा । पुष्पं । ओं वज्रधूपे स्वाहा । धूपं । ओं वज्रनैवेद्ये स्वाहा । नैवेद्यं । ओं वज्रदीपे स्वाहा । दीपं । ओं वज्रलाजाय स्वाहा । लाजां । पुष्पाक्षतसहितजलधारां मण्डले पातयेत् -

ओं चतूरत्नमयं मेरुमष्टद्वीपोपशोभितम् । नानारत्नसमाकीर्णं तद्ये ऽनुत्तरदायिनः ॥

गुरुभ्यो बुद्धधर्मेभ्यः संघेभ्यश्च तथैव च । निर्यातयामि भावेन सम्पूर्णं रत्नमण्डलम् ॥

स्तुतिः । ओं आः हुं (हूं) श्रीमद्वज्रसत्त्वसगुरुवरचरणकमलाय सम्यग्ज्ञानावभासनकराय नमो ऽहं नमस्ते ऽस्तु नमो नमः भक्त्याहं त्वां नमस्यामि गुरुनाथ प्रसीद मे । कृताञ्जलिना तिष्ठेत् ।

यस्य प्रसादकिरणैः स्फुरितात्मतत्त्व रत्नप्रभापरिकरैः प्रहतान्धकाराः । पश्यन्त्यनाविलदृशैः सविलासमुच्चै स्तस्मै नमस्कृतिरियं गुरुभास्कराय ॥

नमो बुद्धाय गुरुवे नमो धर्माय तायिने । नमः संघाय महते त्रिभ्यो ऽपि सततं नमः ॥

सर्वबुद्धं नमस्यामि धर्मं च जिनभाषितम् । संघं च शीलसम्पन्नं रत्नत्रय नमो ऽस्तु ते ॥

रत्नत्रये मे शरणं सर्वं प्रतिदेशयाम्यहम् । अनुमोदे जगत्पुण्यैः बुद्धबोधौ दधे मनः ॥

आबोधौ शरणं यामि बुद्धधर्मगणोत्तमे । बोधिचित्तं करोम्येष स्वपरार्थप्रसिद्धये ॥

उत्पादयामि वरबोधिचित्तं निमन्त्रयाम्यहं सर्वसत्त्वान् । इष्टां चरिष्ये वरबोधिचर्यां बुद्धो भवेयं जगतो हिताय ॥

देशनां सर्वपापानां पुण्यानां चानुमोदनाम् । कृतोपवासं चरिष्यामि आर्याष्टाङ्गमुपोषधम् ॥

मया बालेन मूढेन यत्किञ्चित्पापमागतम् । प्रकृत्यावद्यसावद्यप्रज्ञप्त्यावद्यमेव च ॥

तदत्ययं देशयाम्येष नाथानामग्रतः स्थितः । कृताञ्जलिर्दुःखभीतः प्रणिपत्य पुनः पुनः ॥

अत्ययमत्ययं तेन प्रतिगृह्णन्तु नायकाः । न भद्रकमिदं चाथ न कर्तव्यं पुनर्मया ॥

यथा ते तथागता आर्यार्हन्तः सम्यक्संबुद्धा बुद्धज्ञानेन बुद्धचक्षुषा जानन्ति पश्यन्ति यत् कुशलमूलं यज्जातिकं यन्निकायं यादृशं यत्स्वभावं यल्लक्षणं (nkpv_160) यथाधर्मतया संविद्यते । तत्कुशलमूलं नित्यमनुत्तरायां सम्यक्संबोधौ परिणामितं तथाहं परिणामयामि ।

तथा ममानेन समानकालं लोकस्य दुःखं च सुखोदयं च । हर्तुं च कर्तुं च सदास्तु शक्तिस्तमःप्रकाशं च यथैव भानोः ॥

दृष्टः श्रुतो ऽनुस्मृतिमागतो वा पृथक्कथायोगमुपागतो वा । सर्वप्रकारं जगतो हिताय कुर्यामजस्त्रं सुखसंहिताय ॥ इति ॥

अत्रावसरे जापयोगं कुर्यात् । तदावसाने ऽमृतकुण्डलिवलिभाण्डे शङ्खोदकचुलुकं दद्यादनेन ओं ह्रीं आचमनं [प्रोक्षणं] प्रतिच्छ स्वाहा । भावना । ततो यङ्कारेण वायुमण्डलं रङ्कारेणाग्निमण्डलं तदुपरि त्रिमुण्डकृतचूडिकोपरि सितपद्मभाजनं तत्र भक्तादिपरिपूरितं तत्रोपरि ब्रुं आं जिं खं हुं लां मां पां तां वङ्कारजातः पञ्चामृतपञ्चप्रदीपरुपं निष्पाद्य ततो गरुडमुद्रां दर्शयेत् । फ्रें 3 । पुनः शङ्खोदकचुलुकं दद्यादनेन - ओं इन्द्रादिलोकपालेभ्यः पाद्याचमनं [नार्घं] प्रोक्षणं प्रतिच्छ स्वाहा । जः हुं वं होरिति मुद्रां प्रदर्श्य इन्द्रादिदशदिक्पाललोकपालमुद्रां च प्रदर्श्य पूर्वादिक्रमेण बलिभाण्डे पुष्पं पातयेदेभिर्मन्त्रैः । ओं इन्द्राय स्वाहा । ओं वरुणाय स्वाहा । ओं कुवेराय स्वाहा । ओं अग्नये स्वाहा । ओं नैरृत्ये स्वाहा । ओं वायवे स्वाहा । ओं ईशानाय स्वाहा । ओं ऊर्ध्वं ब्रह्मणे स्वाहा । ओं अधः पृथिवीभ्यः स्वाहा । ओं सूर्याय ग्रहाधिपतये स्वाहा । ओं चन्द्रादि(य)नक्षत्राधिपतये स्वाहा । ओं नागेभ्यः स्वाहा । ओं असुरेभ्यः स्वाहा । ओं यक्षेभ्यः स्वाहा । ओं सर्वदिग्विदिग्लोकपालेभ्यः स्वाहा । पञ्चोपचारपूजा पूर्ववत् स्तुतिः ।

इन्द्रादयो महावीरा लोकपाला महर्द्धिकाः । कीलयन्तु दशक्रोधा विघ्नहर्ता नमो ऽस्तु ते ॥

तर्पणम् -

बिभ्राणं बुद्धबिम्बं दिवसकरधर राशि या बिन्दुलेखम् । मैत्रीयं चारुरूपं शिरसि वरतनुं मञ्जुघोषं च गात्रम् ॥

पद्मस्थं दण्डरूपं कुलिशवरतनुं वज्रिणं भीमनादम् । विज्ञानं ज्ञानरूपं निहितभवभयं पञ्चमूर्ति प्रणम्य ॥

साक्षतपुष्पजलधारां बलिभाण्डे पातयेत् ।

इन्द्रादिवज्री सह देवसंघैरिमं च गृह्णन्तु बलिं विशिष्टम् । अग्निर्यमो नैरृतिभूपतिश्च अपांपतिर्वायुधनाधिपश्च ॥

ईशानभूताधिपतिश्च देवा ऊर्ध्वश्च चन्द्रार्कपितामहश्च । देवाः समस्ता भुवि ये च नागाः धराधरा गुह्यगणैः समेताः ॥

प्रतिप्रतित्वेक निवेदयन्तु स्वकस्वकाश्चैव दिशासु भूताः । गृह्णन्तु तुष्टाः सगणैः समेताः स पुत्रदाराः सह भृत्यसंघैः ॥

हृष्टाः प्रसन्नाः स्रग्गन्धामाल्यं पुष्पं बलिर्धूपविलेपनं च । गृह्णन्तु भुञ्जन्तु पिबन्तु चेदं इदं च कर्मं सफलं भवेन्मे ॥

हुं हुं फट् फट् स्वाहा पुनस्तथैव च । ओं नमो रत्नत्रयाय ओं चण्डवज्रपाणये महाक्रोधाय दंष्ट्रोत्कटभैरवाय असिमुशलपाशगृहीतहस्ताय । ओं अमृतकुण्डलि ख ख खाहि 2 तिष्ठ 2 बन्ध 2 हन 2 दह 2 पच 2 गर्जय 2 तर्जय 2 विस्फोटय 2 महागणपतये जीवितान्तकराय हुं हुं फट् 2 स्वाहा । तत्र पुष्पादि पूजा । तद्विधिं देवतापूजायां दर्शद्दीपान्ते लाजाभिरेतद्गाथया पूजयेत् ।

ये धर्मा हेतुप्रभवा हेतुस्तेषां तथागतो ह्यवदत् । तेषां च यो निरोध एवंवादी महाश्रमणं ॥

पूष्पाक्षतजलैः पूजयेदनेन । ओं अकारो मुखः सर्वधर्माणामाद्यनुत्पन्नत्वात् । ओं आः हुं (हूं) फट् स्वाहा । दक्षिणा । ओं मञ्जुश्रिये कुमारभूताय बोधिसत्त्वाय महासत्त्वाय महाकारुणिकाय तण्डुलदक्षिणा संप्रढो(तो)षयाम्यहम् । साक्षताञ्जलेना तिष्ठेत् । ओं वज्रसत्त्वसमयमनुपालय वज्रसत्त्वत्त्वेनोपतिष्ठ दृढो मे भव सुतोष्यो मे भव सुपोष्यो मे भव अनुरक्तो मे भव सर्वसिद्धिं मे प्रयच्छ सर्वकर्मसु च मे चित्तश्रियं कुरु हुं ह ह ह ह हो भगवन् सर्वतथागत वज्रं मा मे मुञ्च वज्रीभव महासमयसत्त्व आः । इति गुरुमण्डलक्रिया ।

ततो देवतापूजार्थं देवताया शिरःप्रदेशे पुष्पमारोप्य एतद्भावनावाक्यं पठेत् । ओं स्वभावशुद्धाः सर्वधर्माः स्वभावशुद्धो ऽहम् । ओं शून्यताज्ञानवज्रस्वभावात्मको ऽहम् । धूपवाक्यम् । ओं भगवन् श्री अमुकवज्रविद्याराज नमो ऽस्तु ते ।

कर्तुमिच्छामि ते नाथ मण्डलं करुणात्मक । शिष्याणामनुकम्पाय युष्माकं पूजनाय च ॥

तन्मे भक्तस्य भगवन् प्रसादं कर्तुमर्हसि । समन्वाहरन्तु मां बुद्धा जगच्चक्रक्रियार्थदाः ॥

फलस्था बोधिसत्त्वाश्च या चान्या मन्त्रदेवताः । देवता लोकपालाश्च भूताः संबोधिसाधिताः ॥

शासनाभिरताः सत्त्वा ये केचिद्वज्रचक्षुषः । अनुकम्पामुपादाय सशिष्यस्य च तन्मम ॥

अमुकदेवतानामाचार्यम् अर्चयिष्यामि । तत्र वज्रधूपं निर्यातयामि तत्र वज्रधूपं प्रतिच्छ स्वाहा । ततः साक्षात् पुष्पाञ्जलिं धृत्वैतदध्येषणावाक्यं पठेत् -

अद्य मे सफलं जन्म सफलं जीवितं च मे । समयं सर्वदेवानां भावितो ऽहं न संशयः ॥

अवैवर्ती भविष्यामि बोधिचित्तैकचेतसा । तथागतकुलोत्पत्तिर्ममाद्य स्यान्न संशयः ॥

अग्रो मे दिवसो ह्यद्य यज्ञो मे ऽद्य ह्यनुत्तरः । सन्निपातो भवो ह्यद्य सर्वबुद्धनिमन्त्रणात् ॥

ओं कुसुमाञ्जलिनाथ होरिति मन्त्रं पठन् देवतासन्निधौ प्रकिरेत् ।

तदनु स्नानविधिः ॥ तत्रादौ सुवर्णादिभाजने शुभ्रस्वच्छसुनिर्मलकांस्यदर्पणं धृत्वा तत्र प्रणवमेकं सुवर्णशलाकया विलिख्य तस्मिन्नेव जलधारां पातयेदनया गाथया -

ओं यन्मङ्गलं सकलसत्त्वहृदि स्थितस्य सर्वात्मकस्य वरधर्मकुलाधिपस्य । निःशेषदोषरहितस्य महासुखस्य तन्मङ्गलं भवतु ते परमाभिषेकः ॥

पुनः पञ्चामृतैः स्नापयेत् । ओं सर्वतथागत ब्रुं आं जिं हुं । ततः प्रतिबिम्बं दर्शयेदनेन ।

प्रतिबिम्बसमा धर्मा अच्छा शुद्धा ह्यनाविलाः । अग्राह्या अनुलिप्याश्च हेतुकर्मसमुद्भवाः ॥

स्नानोदकमात्मनः शिरप्रदेशे ऽभिषेचयेत् । ओं सर्वतथागताभिषेकं समाश्रिये हुं । इति स्नानकर्मान्ते जलधारया मण्डं कारयेद्देवतासमीपे । ओं वज्रभूमौ सुरेखे सर्वतथागताधिष्ठानाधितिष्ठन्तु स्वाहा । ओं वज्रसुवर्णजलधारे स्वाहा । सिन्दूरेणाभूषयेत् ।

इदं ते परमं गन्धं पवित्रं घ्राणतत्परम् । ददामि परमं भक्त्या प्रतिगृह्ण यथासुखम् ।

ओं वज्रगन्धे स्वाहा । ओं वज्रतिलकभूषणे स्वाहा । यज्ञोपवीतम् । ओं वज्रवस्त्रालङ्कारपूजामेघसमुद्रस्फुरणयज्ञोपवीत वज्रबोध्यङ्ग दृढकवच वज्रवस्त्रं स्वाहा । ततो देवतामूलमन्त्रेणाष्टोत्तरशतवारं पुष्पमभिमन्त्र्य (देवताया शिरसि) तत्पुष्पं देवताभ्यः समर्पयेत् ।

स्वस्ति वः कुरुतां बुद्धाः स्वस्ति देवाः सशत्रुकाः । स्वस्ति सर्वाणि भूतानि सर्वकालं दिशन्तु वः ॥

बुद्धपुण्यानुभावेन देवतानां मतेन च । यो यो ऽर्थः समभिप्रेतः सर्वो ऽर्थो ऽद्य समृद्धयताम् ॥

स्वस्ति वो द्विपदे भोन्तु स्वस्ति वो ऽस्तु चतुष्पदे । स्वस्ति वो व्रजतां मार्गे स्वस्ति प्रत्यागतेषु च ॥

स्वस्ति रात्रौ स्वस्ति दिवा स्वस्ति मध्ये दिने स्थिते । सर्वत्र स्वस्ति वो भोन्तु मा चैषां पापमागमत् ॥

सर्वे सत्त्वाः सर्वे प्राणाः सर्वेभूताश्च केवलाः । सर्वे वै सिखिनः सन्तु सर्वे सन्तु निरामयाः ॥

सर्वे भद्राणि पश्यन्तु मा कश्चित्पापमागमत् । यानीह भूतानि समागतानि, स्थितानि भूमावथवान्तरिक्षे । कुर्वन्तु मैत्रीं सततं प्रजासु, दिवा च रात्रौ च चरन्तु धर्मम् ॥

ओं वज्रपुष्पे स्वाहा । नैवेद्यसमर्पणम् । ओं वज्रनैवेद्य स्वाहा ।

ओं वज्रसमयाचारं खाद्यभोज्यादिकं प्रभो । वर्णगन्धरसोपेतं प्रतिगृह्ण यथासुखम् ॥

अथ तर्पणम् -

ओं नमो भगवते वीरवीरेशाय हुं फट् । ओं नमो महाकल्पाग्निसन्निभाय हुं फट् । ओं नमो जटामकुटोत्कटाय हुं हुं फट् । ओं नमो द्रंष्टाकरालोग्रभीषणमुखाय हुं हुं फट् । ओं नमो सहस्रभुजप्रभास्वराय हुं हुं फट् । ओं नमो परशुपाशत्रिशूलखट्वाङ्गधारिणे हुं हुं फट् । ओं नमो व्याघ्रचर्माम्बरधराय हुं हुं फट् । ओं नमो महाधूम्रान्धकारवपुषे हुं हुं फट् स्वाहा ।

गोदुग्धसमर्पणम् ।

ओं सर्वतथागत चिन्तामृतधारे स्वाहा । दीपार्पणम् ।

नेत्राभिरामा बहुरत्नकोषा नराधिपैरर्चितपादपद्मा । ज्ञानप्रदीपाहतमोहजाला ये दीपमालार्च्चयन्ति तत्र ॥

ओं वज्रदीपे ह्रीं स्वाहा । ततो मूलमन्त्रेणाष्टोत्तरशतवारमन्त्रितलाजाभिर्ये धर्मेति गाथां पठित्वा देवतां प्रकिरेत् । अकारमुखेत्यादिना बलिं दत्त्वा । मञ्जुश्रियेत्यादिना दक्षिणां च समर्प्य साक्षताञ्जलिना शताक्षरधारणीं पठेत् । (nkpv_165) ततो ऽक्षतार्पणार्थे जलेन मण्डलं कृत्वा तत्र दशपुष्पाणि पातयेदेभिर्मन्त्रैः । ओं पीठाय स्वाहा । ओं उपपीठाय स्वाहा । ओं क्षेत्राय स्वाहा । ओं उपक्षेत्राय स्वाहा । ओं छन्दाय स्वाहा । ओं उपछन्दाय स्वाहा । ओं मेलापकाय स्वाहा । ओं उपमेलापकाय स्वाहा । ओं श्मशानाय स्वाहा । ओं उपश्मशानाय स्वाहा । तत्र पञ्चोपचारपूजां कृत्वा बलिं दद्यात् ॥ ओं पीठोपपीठक्षेत्रोपक्षेत्रछन्दोपछन्द- मेलापकोपमेलापकश्मशानोपश्मशानाधिवासिनो वीरवीरेश्वरीः सर्वान् भक्तितः प्रणमाम्यहम् । ततो ऽक्षतार्पणसमये वक्ष्यमाणस्तोत्राणि पठेत् । ओं आः हुं (हूं) श्रीमद्वज्रसत्त्वेत्यादिना ।

सर्वज्ञज्ञानसंदोहं जगदर्थप्रसाधकम् । चिन्तामणिरिवोद्भूतं श्रीसंवर नमो ऽस्तु ते ॥

व्याप्तं विश्वमहाज्ञानं सर्वात्मनि सदा स्थितम् । कृपाक्रोधं महारौद्रं श्रीसंवर नमो ऽस्तु ते ॥

इत्यादि पठित्वा क्षमार्पणं कुर्यादिति । तत्र क्षमापनम् । शताक्षरमन्त्रोच्चारणानन्तरं दानपतीत्यादिना मनोभीप्सितसंकल्पवाक्यानन्तरमेवं क्षमार्पणं कुर्यात् ।

अप्राप्तेन च प्रज्ञानमशक्तं च मया विभो । यन्न्यूनमधिकं नाथ तत्सर्वं क्षन्तुमर्हसि ॥

क्षन्तुमर्हन्तु संबुद्धा देवता तद् व्रताश्च ये । ब्रह्माद्या लोकपालाश्च याश्च भूतविधिक्रियाः ॥

शान्तिं स्वस्तिं च पुष्टिं च भक्तस्यानुग्रहाय च । यत्कृतं दुष्कृतं किञ्चित् मया मूढधिया पुनः ॥

क्षन्तव्यं च त्वया नाथ यदि त्रातासि देहिनाम् । कुरु दानपतेः शान्तिं स्वस्तिं पुष्टिं च सर्वदा ॥

यत्कृतं कायजं पापं वाग्जं पापं च यत्कृतम् । यत्कृतं चित्तजं पापं तत्सर्व देशयाम्यहम् ॥

नमो ऽस्तु ते बुद्ध अनन्तगोचरे नमो ऽस्तु ते सत्यप्रकाशक मुने । सत्यप्रतिष्ठाय प्रजाय मे च सर्वे च कार्याः सफला भवन्तु ॥

मन्त्रहीनं क्रियाहीनं भावनावाक्यहीनकम् । प्रसीद परमेश्वर परमेश्वरि रक्ष 2 मां कोटि अपराधं क्षमस्व । इति क्षमाप्य आवाहितदेवान् विसर्जयेत् ।

कृतो वः सर्वसत्त्वार्थसिद्धिं दत्त्वा यथानुगाः । गच्छध्वं बुद्धविषये पुनरागमनाय च ॥

स्वस्वस्थाने गच्छध्वं । ओं आः हुं (हूं) वज्रमण्डलं मूरिति विसर्जना ।

इति नित्यकर्मपूजाविधिः समाप्तः ।

सर्वसत्त्वार्थसिद्धिर्भवन्तु ॥