सेकोद्देश

नारोप: सेकोद्देश

सेकोद्देशः

ओम् नमः कालचक्राय

सुचन्द्र आह - सेकः सप्तविधः शास्तस्त्रिविधो ऽनुत्तरस्तथा / लौकिकोत्तरसिद्ध्यर्थं संक्षेपात् कथयस्व मे // sekod_1 //

भगवानाह - शृणु सुचन्द्र सेकार्थं सप्तधा त्रिविधं परम् / नाडीसंचारमायाममुद्देशात् कथयामि ते // सेकोद्देश्a_2 //

उद्देशस्त्रिविधस्तन्त्रे निर्देशस्त्रिविधो भवेत् / प्रत्युद्देशो महोद्देशः प्रतिनिर्देशको ऽपरः // सेकोद्देश्a_3 //

उद्देश एव निर्देशस्तन्त्रसंगीतिरुच्यते / प्रत्युद्देशश्च निर्देशः पञ्जिका पदभञ्जिका // सेकोद्देश्a_4 //

महोद्देशश्च निर्देशष्टीका सर्वार्थसूचिका / अभिज्ञालाभिभिः सा तु कर्तव्या नैव पण्डितैः // सेकोद्देश्a_5 //

एवं षट्कोटिभिः शुद्धं वज्रयोगैश्चतुर्विधैः / चतुःसम्बोधिभिः स्कन्धधात्वायतनषट्कुलैः // सेकोद्देश्a_6 //

पटलैः पञ्चभिः शुद्धं लोकधात्वादिकैर्मतैः / सत्याभ्यामादिबुद्धं स्यात् कालचक्राभिधानकम् // सेकोद्देश्a_7 //

आदौ सप्ताभिषेको यो बालानामवतारणम् / त्रिविधो लोकसंवृत्या चतुर्थः परमार्थतः // सेकोद्देश्a_8 //

सत्यद्वयेन धर्माणां देशना वज्रिणो मम / लोकसंवृतिसत्येन सत्येन परमार्थतः // सेकोद्देश्a_9 //

उदकं मुकुटः पट्टो वज्रघण्टा महाव्रतम् / नामानुज्ञासमायुक्तः सेकः सप्तविधो नृप // सेकोद्देश्a_10 //

कायवाक्चित्तसंशुद्धिरभिषेकद्वयं द्वयम् / अनुज्ञा ज्ञानशुद्धिः स्यादन्या धात्वादिशुद्धितः // सेकोद्देश्a_11 //

उदकं धातुसंशुद्धिर्मौली स्कन्धविशोधनम् / पट्टः पारमिताशुद्धिर्वज्रघण्टा महाक्षरम् // सेकोद्देश्a_12 //

बुद्धभाषा न विच्छिन्ना अर्केन्द्वेकत्रशोधनम् / विषयेन्द्रियसंशुद्धिः स्याद्वज्रव्रतमच्युतम् // सेकोद्देश्a_13 //

नाम मैत्र्यादिशुद्धिः स्यादनुज्ञा बुद्धशोधनम् / एते सप्त सेका देया वर्तयित्वा तु मण्डलम् // सेकोद्देश्a_14 //

कुम्भो गुह्याभिषेकश्च प्रज्ञाज्ञानाभिधानकः / पुनरेव महाप्रज्ञा तस्या ज्ञानाभिधानकः // सेकोद्देश्a_15 //

क्षरः क्षरस्ततः स्पन्दो निःस्पन्दश्च ततो ऽपरः / कायवाक्चित्तसंशुद्ध्या अभिषेकत्रयं क्रमात् // सेकोद्देश्a_16 //

चतुर्थो ज्ञानसंशुद्धिः कायवाक्चित्तशोधकः / बालः प्रौढस्तथा वृद्धश्चतुर्थस्तु प्रजापतिः // सेकोद्देश्a_17 //

प्रज्ञास्तनाङ्गसंस्पर्शाद् बोधिचित्तच्युतं सुखम् / पयोधराभिषिक्तः स बालः प्राप्तं यतः सुखम् // सेकोद्देश्a_18 //

गुह्यास्फालाच्चिराज्जातं बोधिचित्तच्युतं सुखम् / प्रौढो गुह्याभिषिक्तः स गुह्यात् प्राप्तं यतः सुखम् // सेकोद्देश्a_19 //

गुह्यास्फालाच्चिराज्जातं वज्राग्रे स्पन्दतः सुखम् / प्रज्ञाज्ञानाभिषिक्तः स वृद्धः स्पन्दं गतो यतः // सेकोद्देश्a_20 //

महामुद्रानुरागाद्यज्जातं निःस्पन्दतः सुखम् / महाप्रज्ञाभिषिक्तः स यतो निःस्पन्दतां गतः // सेकोद्देश्a_21 //

प्रजापतिः स विज्ञेयो जनकः सर्वतायिनाम् / वज्रसत्त्वो महासत्त्वो बोधिसत्त्वो ऽद्वयो ऽक्षरः // सेकोद्देश्a_22 //

असौ समयसत्त्वः स्याद्वज्रयोगश्चतुर्विधः / कालचक्र इह ख्यातो योगिनां मुक्तिदायकः // सेकोद्देश्a_23 //

अस्यैव साधनं कुर्यात् प्रतिभासैरचिन्तितैः / धूमादिभिर्निमित्तैस्तैः प्रज्ञाबिम्बैर्नभःसमैः // सेकोद्देश्a_24 //

अस्तिनास्तिव्यतिक्रान्तैः प्रत्ययार्थैः स्वचेतसः / परमाणुरजःसंदोहैः सर्वतः परिवर्जितैः // सेकोद्देश्a_25 //

धूममरीचिखद्योतदीपज्वालेन्दुभास्करैः / तमः कला महाबिन्दुर्विश्वबिम्बं प्रभास्वरम् // सेकोद्देश्a_26 //

पिहितापिहितनेत्राभ्यां शून्ये यन्नानुकल्पितम् / दृश्यते स्वप्नवद् बिम्बं तद् बिम्बं भावयेत् सदा // सेकोद्देश्a_27 //

अभावे भावना बिम्बे योगिनां सा न भावना / भावो ऽभावो न चित्तस्य बिम्बे ऽकल्पितदर्शनात् // सेकोद्देश्a_28 //

प्रतिसेनां यथादर्शे कुमारी पश्येदवस्तुजाम् / अतीतानागतं धर्मं तत्त्वयोग्यम्बरे तथा // सेकोद्देश्a_29 //

अस्या भावो न भावः स्याद्वस्तुशून्यार्थदर्शनात् / वस्तुनो ऽभावतो ऽर्थो ऽस्ति मायास्वप्नेन्द्रजालवत् // सेकोद्देश्a_30 //

असति धर्मिणि ह्येष धर्मोत्पादः प्रदृश्यते / चिन्तामणिरिवानन्तसत्त्वाशापरिपूरकः // सेकोद्देश्a_31 //

अदृष्टं प्रतिसेनायां कुमारी चौरादि पश्यति / तत् प्रादेशिकनेत्राभ्यां गत्वा पश्यन्ति साधकाः // सेकोद्देश्a_32 //

यदि पश्यति सद्रूपं स्वमुखं किं न पश्यति / यदि पश्यत्यसद्रूपं शशशृङ्गं कथं न च // सेकोद्देश्a_33 //

न पश्यत्यन्यचक्षुर्भ्यां स्वचक्षुर्भ्यां न पश्यति / दृश्यमानमजातं तत् कुमार्या जातकं यथा // सेकोद्देश्a_34 //

दृष्टे बिम्बे ततः कुर्यात् प्राणायामं निरन्तरम् / उर्ध्वाधस्त्रिषु नाडीषु कायवाक्चित्तरोधनात् // सेकोद्देश्a_35 //

चन्द्रार्कराहुविण्मूत्रशुक्रमार्गप्रवाहिषु / तोयाग्निशून्यभूवायुज्ञानधातुकजातिषु // सेकोद्देश्a_36 //

चन्द्रसूर्यतमिन्यो याः कायवाक्चित्तनाडिकाः / विण्मूत्रशुक्रवाहिन्यः प्राणे ऽपाने क्रमेण ताः // सेकोद्देश्a_37 //

चन्द्रः काय उपायस्य प्रज्ञाया वाग्दिवाकरः / प्रज्ञाकायस्तु विण्नाडी विर्भोर्वाङ्मूत्रवाहिनी // सेकोद्देश्a_38 //

उर्ध्वाधश्चित्तनाड्यौ द्वे तमिनीशुक्रवाहिन्यौ / तमिनी चित्तमुपायस्य प्रज्ञायाः शुक्रवाहिनी // सेकोद्देश्a_39 //

ऊर्ध्वाधः षट्कुलं ह्येतत् कायवाक्चित्तयोगतः / प्रज्ञोपायाङ्गभावेन संस्थितं सर्वदेहिनाम् // सेकोद्देश्a_40 //

अरिष्टं कायवाङ्नाड्योरूर्ध्वाधो ऽधिकमारुतैः / तमिनीशुक्रवाहिन्योरुत्पत्तिमरणस्थितिः // सेकोद्देश्a_41 //

उत्पादे मृत्युकाले च मैथुने शुक्रवाहिनी / तमिनी च वहत्यूर्ध्वे संक्रान्तौ विषुवे रवेः // सेकोद्देश्a_42 //

लग्नोदयाभिसंधौ च विषुवं वहति मध्ये / षट्पञ्चाशत्सपादञ्च श्वासोच्छ्वासं नराधिप // सेकोद्देश्a_43 //

अधिकान् पञ्चसप्तत्या षट्शतांश्च दिवानिशम् / एकविंशत्सहस्रांश्च षट्शतैरधिकांश्च यान् // सेकोद्देश्a_44 //

वामा च दक्षिणा नाडी वहत्यूनाननेन तान् / सत्रिपक्षित्रिवर्षाणि शतवर्षे हि मध्यमा // सेकोद्देश्a_45 //

वामा सव्योर्ध्वे चन्द्रार्कौ ललनेडा पिङ्गलापरा / तोयतेजःस्वभाविन्यौ पद्मधृग्रत्नधृङ्मते // सेकोद्देश्a_46 //

अधो विण्मूत्रवाहिन्यौ पृथ्वीवायुस्वरूपके / मध्यनाडी च वामा चचक्रधृक् खड्गधृङ्मते // सेकोद्देश्a_47 //

ऊर्ध्वाधो मध्यमा सव्या राहुशुक्रप्रवाहिनी / शून्यज्ञानस्वभाविन्यौ वज्रधृग्वज्रधृङ्मते // सेकोद्देश्a_48 //

विण्नाडी चन्द्रमार्गेण रविणा मूत्रवाहिनी / जातौ मृत्यौ विषुवे रागे राहुणा शुक्रवाहिनी // सेकोद्देश्a_49 //

या नाभ्यूर्ध्वे ऽवधूती सा सुषुम्ना तमोवाहिनी / याधः खगमुखा सा च शङ्खिनी शुक्रवाहिनी // सेकोद्देश्a_50 //

नाभ्यब्जे हृदये कण्ठे ललाटोष्णीषपङ्कजे / भूतोयाग्निमरुच्छून्यं संहारेण प्रवाहिनी // सेकोद्देश्a_51 //

निर्गच्छन्ती विशन्तीसासृष्टिना विशति क्षितौ / कर्णिकात् कर्णिकामध्ये ऽवधूत्या गतिरागतिः // सेकोद्देश्a_52 //

नाभौ गुह्ये च मण्यब्जे कायवाक्चित्तवाहिनी / निर्गच्छन्ती विशन्ती सा संहारसृष्टिरूपिणी // सेकोद्देश्a_53 //

शङ्खिनी सर्वजन्तूनामपानानिलवाहिका / एषा स्त्रीणां सुखाच्छुक्रं ऋतौ रक्तप्रवाहिनी // सेकोद्देश्a_54 //

प्रज्ञोपायाङ्गभावेन ऊर्ध्वे सव्यावसव्ययोः / अधो विण्मूत्रवाहस्य रजःशुक्रप्रवाहयोः // सेकोद्देश्a_55 //

चण्डाली रजसो वाहात् खगमुखा शुक्रवाहतः / ऊध्वे ऋतौ स्मृता स्त्रीणां डोम्बी पुंसो ऽवधूतिका // सेकोद्देश्a_56 //

विज्ञानाद्यं सदा वामे नाड्यां मण्डलपञ्चकम् / भूम्यादिदक्षिणे नाड्यां मध्ये वहति षष्ठमम् // सेकोद्देश्a_57 //

नाभिपद्मदले षष्टि मण्डलानि यथाक्रमम् / वामे च दक्षिणे लग्ने मेषाद्ये वृषभादिके // सेकोद्देश्a_58 //

मूले वामे ततः सव्य ऊर्ध्वेमध्ये ऽनिलः क्रमात् / एकैकमण्डलं दण्डाद्भूम्याद्यं नासरन्ध्रयोः // सेकोद्देश्a_59 //

नाडिका वहति श्वासान् सषष्टित्रिशतान् क्रमात् / अष्टादशशतश्वासान्नाड्यः पञ्च वहन्ति तान् // सेकोद्देश्a_60 //

षष्टि नाड्यो दिवारात्रं मण्डलानीति देहतः / दलमध्ये ततः पूर्वे सव्ये वामे ऽपरे क्रमात् // सेकोद्देश्a_61 //

आकाशाद्यं सदा वामे भूम्याद्यं दक्षिणे ऽपरात् / विज्ञानादिभवो वामे संहारः क्ष्मादि दक्षिणे // सेकोद्देश्a_62 //

अपरे पूर्वे धरा वायुः प्रज्ञोपायः परस्परम् / अङ्गुष्ठानामिकाद्वाभ्यां यतो वक्त्रे ऽभिषिञ्चनम् // सेकोद्देश्a_63 //

सव्ये वामे हविस्तोयं प्रज्ञोपायः परस्परम् / मध्यमातर्जनीद्वाभ्यां यतः खड्गो भविष्यति // सेकोद्देश्a_64 //

अर्धचन्द्राकृतिर्मुद्रा दंष्ट्रा कर्ती कनीयसी / शून्यमक्षरमूर्ध्वाधः प्रज्ञोपायः परस्परम् // सेकोद्देश्a_65 //

दशमण्डलसंयोगे अङ्गुलीनां परस्परम् / करतले पुटिते मूर्ध्नि एकशूकं सकर्तिकम् // सेकोद्देश्a_66 //

विषुवत्तन्मध्ये नाड्यां सृष्टिसंहारकारकम् / स्कन्धधातुत्रिवज्राणामेकत्वं मध्यमागतौ // सेकोद्देश्a_67 //

चन्द्रार्कनाडिकारुद्धे रुद्धा विण्मूत्रनाडिकाः / राहुनाडीवि(नि)रुद्धे स्याद्रुद्धाधः शुक्रवाहिनी // सेकोद्देश्a_68 //

मुक्ते मुक्ता भवन्त्येताः सृष्टिसंहारकारिकाः / संचार एष नाडीनां प्राणापानत्रिमार्गतः // सेकोद्देश्a_69 //

वामायां दक्षिणायां वा प्रवहत्यधिको ऽनिलः / एकरात्रं तथा पञ्च त्रिवर्षैर्मरणंततः // सेकोद्देश्a_70 //

पञ्च दिक्तिथयो विंशति तत्त्वान्येकोत्तरं क्रमात् / त्रयस्त्रिंशद्दिनारोहः अरिष्टं दक्षिणे रवौ // सेकोद्देश्a_71 //

त्रिद्व्येकसमकैर्मासैः षट्त्रियुग्मेन्दुभिर्दिनैः / तिथिदिक्पञ्चगुणद्व्येकैरायुर्गच्छति देहिनाम् // सेकोद्देश्a_72 //

मूलादेकोत्तरेण स्याद्वामे चन्द्रस्य रोहणम् / दिनैर्मासैर्दिनैर्मासैस्त्रिदिनानि द्विमासकौ // सेकोद्देश्a_73 //

दिने ऽरिष्टं शुभे मासे वृद्धिहानिस्ततस्तयोः / मध्यमारोहणं मृत्योः शताब्दपरिपूर्णतः // सेकोद्देश्a_74 //

समविषमदिनैस्तस्य जन्मजातो ऽथ मण्डलैः / रोहणं सव्यवामे च पक्षद्वयविनाशनात् // सेकोद्देश्a_75 //

अन्यथा मरणं न स्यात् पक्षद्वयस्यसंस्थितेः / सव्यावसव्यसंचारात पञ्चमण्डलवाहतः // सेकोद्देश्a_76 //

अरिष्टलक्षणं ज्ञात्वा प्राणं बिन्दौ निवेशयेत् / अवधूतीपदमाश्रित्यभावयेत्परमाक्षरम् // सेकोद्देश्a_77 //

वज्रोत्थानं सदा कुर्याच्चन्द्रार्कगतिभञ्जनात् / अन्यथा नावधूत्यङ्गे विशति प्राणमारुतः // सेकोद्देश्a_78 //

अपानो ऽधश्च शङ्खिन्यां मरणं तदवेशतः / अरिष्टवञ्चनं ह्येतदानन्दैर्योगिनां भवेत् // सेकोद्देश्a_79 //

शुक्रागमनमानन्दमुष्णीषादूर्ण्णापङ्कजे / कण्ठे हृदि परमानन्दं विरमानन्दं ततो भवेत् // सेकोद्देश्a_80 //

विविधं रमणं नाभौ गुह्यपद्मे यदागतम् / गुह्याद्वज्रमणिं यावत् सहजानन्दमच्युतम् // सेकोद्देश्a_81 //

अप्रतिष्ठितनिर्वाणं महारागो ऽक्षरः प्रभुः / विरागाद्यच्च्युतं सौख्यं तन्निर्वाणं प्रतिष्ठितम् // सेकोद्देश्a_82 //

शुक्रेन्दूदय उष्णीषे पूर्णा गुह्ये सरोरुहे / कला षोडशमा या सा मणिपद्मे वज्रमूर्धगा // सेकोद्देश्a_83 //

तदूर्ध्वं च्युतिकालः स्यात् कृष्णप्रतिपदागमे / रविस्तूर्णापदं याति अमावस्यां विरागतः // सेकोद्देश्a_84 //

कला षोडशमा तस्य उष्णीषकमले गता / नष्टचन्द्र इहाख्यातो विरक्ती रागसौख्यतः // सेकोद्देश्a_85 //

अधश्चन्द्रामृतं याति मरणे सर्वदेहिनाम् / ऊर्ध्वे सूर्यरजो राहुविज्ञानं भावलक्षणे // सेकोद्देश्a_86 //

अतश्चन्द्रामृतस्योर्ध्वे कर्तव्यं गमनं नृप / अधो ऽर्करजसो राहुविज्ञानस्याक्षरे सुखे // सेकोद्देश्a_87 //

ऊर्ण्णाब्जे सर्वबुद्धानां चन्द्रामृतस्य पूर्णिमा / अमार्करजसो गुह्ये कलोष्णीषे मणौ तयोः // सेकोद्देश्a_88 //

इति वज्रपदं शास्तुर्विपरीतं सर्वदेहिनाम् / अप्रतिष्ठितनिर्वाणाद्विपरीतं यान्ति धातवः // सेकोद्देश्a_89 //

मणौ चित्तंचगुह्ये वाक्कायो नाभौ महासुखात् / धर्मसम्भोगनिर्माणाः शुद्धकायात् स्फरन्त्यमी // सेकोद्देश्a_90 //

अधोपायस्य राजेन्द्र प्रज्ञायाऊर्ध्वतो भवेत् / ललाटे कायवज्रमस्या ग्रीवहृन्नाभिपङ्कजे // सेकोद्देश्a_91 //

वाक्चित्तज्ञानवज्राणि निर्माणाद्यात् स्फरन्त्यमी / स्फरणं स्कन्धधातूनां निरावरणतः सुखात् // सेकोद्देश्a_92 //

कर्ममुद्रासमापत्त्या ज्ञानमुद्रावलम्बनैः / महामुद्रैकयोगेन वृद्धिं याति तदक्षरम् // सेकोद्देश्a_93 //

वृद्धस्य न च स्यात् वृद्धिः क्षीणस्य क्षीणता न च / अस्तंगतस्य नास्तमनमुदितस्योदयं न हि // सेकोद्देश्a_94 //

न प्रकाशः प्रकाशस्य पिहितं पिहितस्य न / जातस्यैव न जन्म स्यान् मृतस्य मरणं न च // सेकोद्देश्a_95 //

मुक्तस्य न च मुक्तिः स्यादस्थितस्य च चास्थितिः / अभावो न ह्यभावस्य भावो भावस्य नैव च // सेकोद्देश्a_96 //

क्षरस्यापि क्षरो न स्यादक्षरस्य न चाक्षरः / स्वभावाभावधर्माणां मायोत्पादः क्षयस्तथा // सेकोद्देश्a_97 //

न क्षयं यान्ति भूतानि न जायन्ते स्वभावतः / निःस्वभावमिदं विश्वं भावाभावैकलक्षणम् // सेकोद्देश्a_98 //

स्वप्रज्ञालिङ्गितं चित्तं पद्मे वज्रमणौ गतम् / तत्र चन्द्रगतस्पन्दो निःस्पन्दाक्षरभावना // सेकोद्देश्a_99 //

कायवाक्चित्तनाडीषु कायवाक्चित्तभावना / समाहारस्त्रिवज्राणां शङ्खिन्यां ज्ञानभावना // सेकोद्देश्a_100 //

प्रज्ञारागद्रुतानां च बिन्दूनां शिरसः क्रमात् / पूर्णापदं प्रविष्टानां बन्धनं परमार्थतः // सेकोद्देश्a_101 //

यथोदितः क्रमाच्चन्द्रः कलाभिर्याति पूर्णताम् / वासनाहरणं पूर्णानचन्द्रच्छेदो न पूरणम् // सेकोद्देश्a_102 //

तथोदितं क्रमाज्ज्ञानं भूमिभिर्याति पूर्णताम् / क्लेशाद्याहरणं पूर्णानज्ञानच्छेदो न पूरणम् // सेकोद्देश्a_103 //

यथा मध्यशशाङ्केन पूर्णायां न स्थिरः शशी / संसारवासनाङ्केन तथा चित्तं सुखे ऽक्षरे // सेकोद्देश्a_104 //

उत्पत्तिः प्रलयः पक्षःशुक्लःकृष्णः प्रतिष्ठितः / तयोर्मध्ये तु या पूर्णा सा पूर्णा न प्रतिष्ठिता // सेकोद्देश्a_105 //

एकक्षणाभिसम्बुद्धं पूर्णायां निश्चलं भवेत् / यदा वज्रमणौ चितं तत् सर्वक्षणपूरकम् // सेकोद्देश्a_106 //

न स्थितिः शुक्लपक्षे ऽस्य गमनं नासिते क्वचित् / पक्षद्वयस्य मध्यस्थं पूर्णायां गतमद्वयम् // सेकोद्देश्a_107 //

उष्णीषादुदयं तस्य पूर्णा वज्रमणौ भवेत् / सविरागात् कलाहानिर्वज्राद्धानेः प्रपूर्णता // सेकोद्देश्a_108 //

उष्णीसे ह्युदयो भूयः पूर्णा वज्रमणौ पुनः / सविरागात् कलाहानिर्ज्ञानहानिर्न देहिनाम् // सेकोद्देश्a_109 //

महासुखस्वभावो ऽस्य पूर्णाशब्देन गीयते / अन्यभावान्तरं सर्वं सृष्टिसंहारहेतुकम् // सेकोद्देश्a_110 //

भवाद्गच्छति निर्वाणं तस्मादेति पुनर्भवम् / स्वपक्षाभ्यां यथां चन्द्रो ऽयनाभ्यां भास्करो यथा // सेकोद्देश्a_111 //

पूर्णायां निश्चलस्यास्य भूमिभिः परिपूर्णता / द्व्ययुतद्व्यष्टशतैः श्वासैरक्षरक्षणभक्षितैः // सेकोद्देश्a_112 //

पक्षद्वयं व्यतिक्रम्य भूमिभिः परिपूरितम् / द्वादशाकारसत्यार्थं षोडशाकारमक्षरम् // सेकोद्देश्a_113 //

भूमिभिर्द्वादशाकारं पूरितं परमाद्वयम् / कलाभिः पूरितं चित्तं षोडशाकारमक्षरम् // सेकोद्देश्a_114 //

एकार्थमद्वयं धर्मं परमार्थमविनश्वरम् / पूर्णावस्थां गतं चित्तं आसमन्तात् प्रपूरितम् // सेकोद्देश्a_115 //

विरागादिमहारागं वज्रानङ्गं महाक्षरम् / परिपूर्णमसंक्लिष्टं पक्षद्वयस्यवासनैः // सेकोद्देश्a_116 //

यथा नद्युदकं विष्टं समुद्रे तत्पयःसमम् / तथा भावसमूहो ऽयमक्षरे तत्समो ऽक्षरः // सेकोद्देश्a_117 //

यथा धातुसमूहो ऽयं रसत्वं याति भक्षितः / बीजैर्बीजस्व भावं च फलकाले मानवर्जितम् // सेकोद्देश्a_118 //

एवं भावसमूहो ऽपि परमाक्षरभक्षितः / परमाक्षरतां याति सर्वाकारस्वरूपधृक् // सेकोद्देश्a_119 //

न दंशे वेदनां वेत्ति नान्यत्र चापि दष्टकः / न विषयानिन्द्रियद्वारैः पूर्णावस्थां विषे गते // सेकोद्देश्a_120 //

एवं न च मणौ योगी नान्यत्र वेत्ति सत्सुखम् / न विषयानिन्द्रियद्वारैश्चित्ते पूर्णकलां गते // सेकोद्देश्a_121 //

यथा लोहैकदेशे ऽपि संस्थितो हि महारसः / लोहं तीव्राग्निसंतप्तं वेधयेदासमन्ततः // सेकोद्देश्a_122 //

तेथैवैकप्रदेशे ऽपि संस्थितं सुखमक्षरम् / चित्तं कामाग्निसंतप्तं वेधयेदासमन्ततः // सेकोद्देश्a_123 //

यथा च विद्धलोहानां नैव मलो भवेत् क्वचित् / तथा च विद्धचित्तानां न वासना भवेत् क्वचित् // सेकोद्देश्a_124 //

हेमत्वं हि गतं लोहमग्निना निर्मलं भवेत् / भूयो भूयस्तथा चित्तं निर्मलं रागवह्निना // सेकोद्देश्a_125 //

यथा महामणिस्पर्शाद्याति शीला प्रदीप्तताम् / तथाक्षरसुखस्पर्शात् सुखतां चित्तमेति वै // सेकोद्देश्a_126 //

किमत्र बहुनोक्तेन लोकसंवृतिसत्यतः / अवितर्क्यो रससद्भावो लोहस्यावेधनं प्रति // सेकोद्देश्a_127 //

वितर्क्यो ज्ञानसद्भावः किं पुनः परमार्थतः / मलागन्तुकलिप्तस्य चित्तस्यावेधनं प्रति // सेकोद्देश्a_128 //

नागन्तुको मलश्चित्ते न चित्ताच्चिरकालिकः / न चित्तेन विना जातो न चित्ते संस्थितो ऽव्ययः // सेकोद्देश्a_129 //

यद्यागन्तुक एव स्याच्चित्तं प्रागमलं तदा / चिरकाली यदा चित्तात्तस्यैव सम्भवः कुतः // सेकोद्देश्a_130 //

यदि चित्तं विना जातस्तदा खकुसुमं यथा / यदि स्थितः सदा चित्ते न नश्येत् सर्वतस्तदा // सेकोद्देश्a_131 //

ताम्रस्य कालिमा यद्वद्रसयोगेन नश्यति / न तस्य सत्त्वता नश्येन्निर्मलत्वेन या स्थिता // सेकोद्देश्a_132 //

तद्वच्चित्तमलः शून्यतायोगेन प्रणश्यति / न तस्य ज्ञानता नश्येन्निर्मलत्वेन या स्थिता // सेकोद्देश्a_133 //

रसविद्धो यथा लोहो न पुनर्लोहतां व्रजेत् / सुखविद्धं तथा चित्तं न पुनर्दुःखतां व्रजेत् // सेकोद्देश्a_134 //

न विरागात् परं पापं न पुण्यं सुखतः परम् / अतो ऽक्षरसुखे चित्तं वेशनीयं सदा नृप // सेकोद्देश्a_135 //

वक्तुं न शक्यते सौख्यं कुमार्या सुरतं विना / यौवने सुरतं प्राप्य स्वतो वेत्ति महासुखम् // सेकोद्देश्a_136 //

एवं न शक्यते वक्तुं समाधिरहितैः सुखम् / समाधावक्षरं प्राप्य स्वतो विन्दन्ति योगिनः // सेकोद्देश्a_137 //

अक्षरजसुखज्ञाने सर्वज्ञैरपि शंक्यते / तथा क्वचिन्न कर्तव्यो विरागो मनसो ऽसुखात् // सेकोद्देश्a_138 //

च्युतेर्विरागसंभूतिर्विरागाद्दुःखसंभवः / दुःखाद्धातुक्षयः पुंसां क्षयान् मृत्युरिति स्मृतः // सेकोद्देश्a_139 //

मृत्योः पुनर्भवस्तेषां भवान् मृत्युश्च्युतिः पुनः / एवं विरागसंभूतेः सत्त्वानां नान्यथा भवः // सेकोद्देश्a_140 //

तस्मात् सर्वप्रयत्नेन च्युतिरागं विवर्जयेत् / येनाक्षरसुखं याति योगी संसारबन्धनात् // सेकोद्देश्a_141 //

कामुको ऽपि विरागान्न कामशास्त्रं समीहते / मयोक्ते किं पुनस्तन्त्रे योगी दुःखं समीहते // सेकोद्देश्a_142 //

शुक्राक्षरस्वभावेन साधयेत् परमाक्षरम् / आधारे च्युतिमापन्ने आधेयस्य विरागता // सेकोद्देश्a_143 //

आधाराधेयसंबन्धो यावन्नाक्षरतां व्रजेत् / चित्तमक्षरताप्राप्तं नाधाराधेयलक्षणम् // सेकोद्देश्a_144 //

अक्षरोद्भवकायस्य ऊर्ण्णाचक्रगतस्य तु / आलिकालिसमायोगो हूंकारो नेष्यते नृप // सेकोद्देश्a_145 //

बिम्बं शून्योद्भवं हेतुः फलमक्षरजं सुखम् / फलेन मुद्रितो हेतुर्हेतुना मुद्रितं फलम् // सेकोद्देश्a_146 //

शून्यता बिम्बधृग्घेतुः करुणाक्षरधृक् फलम् / शून्यताकरुणाभिन्नं बोधिचित्तं तदच्युतम् // सेकोद्देश्a_147 //

निर्वाणरहितं बिम्बं संसारातीतमक्षरम् / शाश्चतोच्छेदनिर्मुत्तस्ततोर्योगो ऽद्वयो ऽपरः // सेकोद्देश्a_148 //

अभावो नास्ति बिम्बस्य अभावोद्भूतलक्षणात् / भावो नास्त्यक्षरस्यापि भावसम्भूतलक्षणात् // सेकोद्देश्a_149 //

भावाभावसमायोगो वज्रयोगो ऽद्वयो ऽपरः / रूपारूपविनिर्मुक्तः प्रतिसेनेव दर्पणे // सेकोद्देश्a_150 //

बिम्बं न भवमायाति नापि निर्वाणमक्षरम् / अन्योन्यालिङ्गितं शान्तं नपुंसकपदं परम् // सेकोद्देश्a_151 //

प्रज्ञाहेतोरजातत्वात् प्रज्ञाहेतूद्भवं फलम् / प्रज्ञाहेतोरजातत्वात् प्रज्ञाजातं न हेतुजम् // सेकोद्देश्a_152 //

अतो न हेतुजं ज्ञानं प्रज्ञाज्ञानमनुत्तरम् / फलेन हेतुनान्योन्यं न परस्परमुद्रणम् // सेकोद्देश्a_153 //

हेतुः फलं च यत् सर्वं तत् प्रतीत्यसमुद्भवम् / अन्योन्यमुद्रितं बिम्बं नोत्पन्नं न च निर्वृतम् // सेकोद्देश्a_154 //

प्रज्ञा चात्यन्तनिर्वृता उत्पन्नश्च परो ऽक्षरः / हेतुफलविनिर्मुक्तिर्न परस्परमुद्रणम् // सेकोद्देश्a_155 //

अजातस्यानिरुद्धस्य यज्ज्ञेयस्येह दर्शनम् / तत् स्वचित्तस्य नान्यस्य बाह्यज्ञेयविभागतः // सेकोद्देश्a_156 //

अतो न चात्मनात्मानं मुद्रितुं शक्यते क्वचित् / किं छिनत्ति महाखड्ग आत्मानमात्मधारया // सेकोद्देश्a_157 //

बन्ध्यादुहितृसंगेन स्वप्ने सौख्यं यथा भवेत् / गगनोद्भवबिम्बेन सेवितेन तथात्मनः // सेकोद्देश्a_158 //

न प्रज्ञा नाप्युपायो ऽसौ सहजः प्रज्ञया सह / आपूर्णश्चैव सौख्येन सर्वावरणवर्जितः // सेकोद्देश्a_159 //

आकाशवन्निरावरणो विषयेन्द्रियवर्जितः / सर्वतः सर्वभूतस्थ अच्छेद्यो भेदवर्जितः // सेकोद्देश्a_160 //

स्वयम्भूर्वज्रसत्त्वो ऽसौ महार्थः परमाक्षरः / महारागो महासत्त्वः सर्वसत्त्वरतिंकरः // सेकोद्देश्a_161 //

बोधिसत्त्वो महाद्वेषः क्लेशक्षयी महारिपुः / समयसत्त्वो महामोहो मूढधीमोहसूदनः // सेकोद्देश्a_162 //

वज्रयोगो महाक्रोधः क्रुद्धमारमहारिपुः / कालचक्रो महालोभः क्षरलोभनिषूदनः // सेकोद्देश्a_163 //

वज्रमभेद्यमित्याह महार्थं भगवानिह / सत्त्वं त्रिभवस्यैकता तदुक्तं परमाक्षरम् // सेकोद्देश्a_164 //

परमाक्षरसुखापूर्णो भूमिभिः परिपूरितः / महारागो महासत्त्वः सर्वसत्त्वरतिंकरः // सेकोद्देश्a_165 //

बोधौ व्यवस्थितः सत्त्वो बोधिसत्त्वस्ततो ऽचलः / क्लेशादिद्वेषसंघानां महाद्वेषो महारिपुः // सेकोद्देश्a_166 //

समयश्चन्द्रामृतं शुक्रमच्युतिस्तस्य भक्षणम् / समयसत्त्वो ऽनया वृत्त्या मूढधीमोहसूदनः // सेकोद्देश्a_167 //

एकत्वं सर्ववज्राणां प्रज्ञाकायाक्षरैः सह / महाक्रोधो महाशत्रुर्माराणां क्रोधरूपिणाम् // सेकोद्देश्a_168 //

महाक्षरसुखोपायात् सत्त्वार्थं न त्यजेत् क्वचित् / सत्त्वान् मोक्तुं महालोभः क्षरलोभनिषूदनः // सेकोद्देश्a_169 //

एते ह्युक्ताः षडाकारा अक्षरज्ञानवेदना / विज्ञानरूपसंस्कारसंज्ञाः स्कन्धकुलानि ते // सेकोद्देश्a_170 //

ज्ञानाग्न्यम्बरपृथिवीवायूदका यथाक्रमम् / मनश्चक्षुःश्रुतिकायनासजिह्वास्तथैव च // सेकोद्देश्a_171 //

शब्दरसधर्मधातुकगन्धस्प्रष्टव्यरूपिणः / क्रोधराट् षण्मुखो भीमः षट्कुलैः परिशोधितः // सेकोद्देश्a_172 //

कायगुह्येन्द्रियचित्तं त्रिविधं मण्डलं सदा / प्रज्ञोपायत्रिवज्राणां जायते वज्रसत्त्वता // सेकोद्देश्a_173 //

इदं सेकस्य साधनं परमाक्षरसाधनम् / नाडीकुलसमायुक्तमुद्देशाच्चन्द्र भाषितम् // सेकोद्देश्a_174 //

इति श्रीसेकोद्देशः समाप्तः