नमस्कारैकविंशतिस्तोत्र

नमस्कारैकविंशतिस्तोत्र

एकविंशतिस्तोत्र

नमस् तारे तुरे वीरे क्षणद्युतिनिभेक्षणे / त्रैलोक्यनाथवक्त्राब्जविकसत्केसरोद्भवे // nevs_1

नमस् शान्तसरच्चन्द्रसंपूर्णपटलानने / तारे सहस्रविकल्पप्रहसत्किरणोज्ज्वले // nevs_2

नमः कनकनीलाब्जपाणिपद्मविभूषिते / दानवीर्यतपःक्षान्तितितिक्षाध्यानगोचरे // nevs_3

नमस् तथागतोष्णीषविजयानन्तचारिणि / अशेषपारमिताप्राप्तजिनपुत्रनिषेविते // nevs_4

नमस् तुत्तारहूंकारपूरिताशादिगन्तरे / सप्तलोकक्रमाक्रान्ता अशेषाकर्षणक्षणे // nevs_5

नमः शक्रनरब्रह्ममरुद्विश्वेश्वरार्चिते / भूतवेतालगन्धर्वगणपुरस्कृते // nevs_6

नमस् त्रत्रित्रिफट्कारे परमन्त्रप्रमर्दनि / प्रत्यालीढपादन्यासे शिखिज्वालाकुलोज्ज्वले // nevs_7

नमस् तुरे महाघोरे मारवीरविनाशनि / भृकुटीकृतवक्त्राब्जसर्वदुष्टनिसूदनि // nevs_8

नमस् त्रिरत्नमुद्राङ्के हृद्याङ्गुलिविभूषिते / भूषिताशेषदिक्चक्रनिकरे सुकुलाकुले // nevs_9

नमः प्रमुदिताटोपमुकुटाक्षिप्तसारिणि / हसत्प्रहसत्तुत्तारे मारलोकभयंकरि // nevs_10

नमः समन्तभूपालापातालाकर्षणक्षणे / भृकुटिकृतहूंकारे सर्वापदविमोचनि // nevs_11

नमः शिखण्डखण्डेन्दुमुकुटाभरणोज्ज्वले / अमिताभतथाभारे भास्वरे किरणध्रुवे // nevs_12

नमः करतलाघातचरणाहतभूतले / भृकुटिकृतहूंकारसप्तपातालनाशिनि // nevs_13

नमः कल्पान्तहुतभुग्ज्वालामालान्तरे स्थिते / आलीढमुदिताबद्धरिपुचक्रविनाशिनि // nevs_14

नमः शिवे शुभे शान्ते शान्तनिर्वाणगोचरे / स्वाहा प्रणम्य संयुक्ते महापातकनाशिनि // nevs_15

नमः प्रमुदिताबद्धरिपुगात्रप्रभेदनि / दशाक्षरपादन्यासे विद्याहुंकारदीपिते // nevs_16

नमस् तुरे पादाघाते हुंकारकारजीविते / मेरुमण्डलकैलाशभूवनत्रयचारणि // nevs_17

नमः सुरासराकारहरिणीककरे स्थिते / हरद्विरुक्तफट्कार अशेषविशनाशिनि // nevs_18

नमः सुरगणयक्षासुरकिन्नरसेविते / आबद्धमुदिताभोगकरि दुःस्वप्ननाशिनि // nevs_19

नमश् चन्द्रार्कसंपूर्ण नयनद्युतिस्वभास्वरे / तार द्विरुक्तोत्तारे विषमज्वलनाशिनि // nevs_20

नमस् त्रितलविन्यासे शिवशक्तिसमन्विते / ग्रहवेतालयक्षाद्यनाशनि प्रवरे तुरे // nevs_21

मन्त्रमूलम् इदं स्तोत्रं नमस्कारैकविंशति / यः पठेत् प्रायशो धीमान् देव्या भक्तिसमन्वितः // 1

सो ऽयं वा प्रातर् उत्थाय स्मरेत् सर्वाभयप्रदं / सर्वपापप्रशमनं सर्वदुर्गतिनाशनम् // 2

अभिषिक्तोभय तूर्णं अस्मिन् महत्ताम् आसाद्य / विषं तस्य महाघोरं स्मरणात् प्रलयं यान्ति // 3

ग्रहज्वलविषार्तानाम् अन्येषां चैव सत्वानाम् / पुत्रकामो लभेत् पुत्रं सर्वकामान् अवाप्नोति // 4

सप्ताभिर् जिनकोटिभिः सो ऽन्ते बौद्धपदं व्रजेत् / स्थावरं वाथ जङ्गमं साड् इदं पीडम् एव च // 5

परमार्तिविनाशनं द्वित्रिसप्ताभिवर्तिनाम् / धनकामो लभेद् धनं न विघ्नैः प्रतिहन्यते // 6

इति श्रीसंयक्संबुद्धवैरोचनभाषितं भगवत्यार्यतारदेव्या नमस्कारैकविंशतिस्तोत्रं संपूर्णं समाप्तं // शुभम् //