अहोरत्रव्रतकथा

अहोरत्रव्रतकथा

अहोरात्रव्रतकथा

ओं नमः श्रीधर्मधातवे /

आकाशनिर्मलो भूतो निष्प्रपञ्चगुणाश्रयः / पञ्चस्कन्धात्मकः शान्तस् तस्मै स्तूपात्मने नमः // avk_1 //

एवं मया श्रुतम् एकस्मिन् समये बुद्धो भगवाञ् छ्रावस्त्यां विहरति स्म जेतवने ऽनाथपिण्डदस्यारामे महता भिक्षुसंघेन सार्धम् अनेकैर् देवनागयक्षगन्धर्वासुरगरुडकिन्नरमहोरगैः स्थविरभिक्षुवीतरागसंघैर् बोधिसत्त्वशतसहस्रैः संबहुलैश् च श्रावकैर् दशभिर् लोकपालैश् चतुर्महाराजकायिकैर् अनेकैश् चतुर्वर्णकैर् मनुष्यैर् अनेकशतसहस्रैः परिवारैः परिवृतैः / तस्मिन् सभामण्डले सर्वे धर्मश्रवणिका लोका भगवन्तम् अभिवीक्ष्य चैत्यव्रतकथाम् अनुध्यायन्तः समास्थिताः / अथ खलु सुभूतिः स्थविरः स्वासनात् समुत्थायैकांसम् उत्तरासङ्गं कृत्वा त्रिः प्रदक्षिणीकृत्य सव्यजानुबिम्बं भुवि स्थाप्य भगवन्तं प्रणम्यैतद् अवोचत् /

अहोरात्रव्रतं नाथ कस्मिन् काले प्रवर्तते / तद्विधिं च कथं ब्रूहि तत् सर्वं जगतां प्रभो // avk_2 //

भगवान् आह /

साधु साधु सुभूते त्वं शृणु सत्त्वानुकम्पक / अहोरात्रव्रतं नित्यं तद्विधिं कथितं मया // avk_3 //

आसीत् पूर्वविदेहेषु नाम्ना गन्धवती पुरी / तस्यां राजा महातेजा इन्द्रपृष्टो महाप्रभुः // avk_4 //

सो ऽन्तःपुरे सभां कृत्वा वसुबन्धुं जगद्गुरुम् / प्रणम्य सहसोत्थाय पप्रच्छ विधिवन् मुदा // avk_5 //

श्रोतुम् इच्छामि तत् सर्वं यद् व्रतानां समुत्तमम् / यस्य पुण्यप्रभावेन सत्त्वा यान्ति सुनिर्वृतिम् // avk_6 //

तत् सर्वं गदतां धीर सर्वसत्त्वानुकम्पक / भवता चानुपाल्यो ऽयं लोकश् च दुष्कृताकुलः // avk_7 //

वसुबन्धुर् उवाच /

शृणु राजन् मया ख्यातं व्रतानां व्रतम् उत्तमम् / अहोरात्रव्रतं पूर्वं विपश्यिना प्रभाषितम् // avk_8 //

अश्विनीपूर्णमास्यां तु व्रतं कुर्याद् महोदयम् / चैत्यं संपूजयेच् छुद्धः षोडशैर् विधिभिस् तथा // avk_9 //

भोजनान्ते त्रयोदश्यां कुर्याद् दन्तादिशोधनम् / चतुर्दश्यां विशेषेण क्षुरकर्माणि कारयेत् // avk_10 //

स्नानं कृत्वा च तीर्थेषु शुचिवस्त्रावृतः सुधीः / मध्याह्ने पूजयेच् चैत्यं प्रदीपं च प्रदापयेत् // avk_11 //

सूर्ये षष्ठगते भागे प्राशयेच् च क्षीरोदनम् / पुनर् शौचादिकं कृत्वा धर्मं च श्रुणुयान् मुदा // avk_12 //

प्रत्यूषे पूर्णमास्यां तु स्नात्वा व्रतं समारभेत् / आदौ भूमितलं शोध्य धर्मशालां प्रकारयेत् // avk_13 //

गन्धोदकैः सुशीतैश् च चैत्यपुंगवं स्नापयेत् / गोक्षीरैः पञ्चरत्नैश् च शिलाभस्माभिलेपयेत् // avk_14 //

चत्वारश् च ध्वजाः स्थाप्या वितानं सह चामरैः / दिग्माला विविधैः पुष्पैर् लम्बयेच् च जिनालये // avk_15 //

तदनु व्रतम् आरभ्य गुरुं वज्रधरं नमेत् / त्रिरत्नशरणं कृत्वा ध्यापयेद् धर्मधातुकम् // avk_16 //

धर्मधातुमयं चैत्यं जिनानां गृहम् उत्तमम् / अनादिबुद्ध-म्-आख्यातं सर्वतथागतालयम् / सर्वदेवालयं चैत्यम् आराध्य व्रतम् आचरेत् // avk_17 //

सहस्रदलपद्मस्थं चन्द्रबिम्बप्रभास्वरम् / रक्तं भोःकारसंभूतं चतुर्मुखं विराजितम् // avk_18 //

रक्तगौरमुखं मूलं दक्षिणे कुङ्कुमारुणम् / पश्चिमे पद्मरक्तं च [!] उत्तरे पीतरक्तकम् // avk_19 //

अष्टभुजं विराजन्तं वागीश्वरं जगद्गुरुम् / धनुर्बाणधरं द्वाभ्यां पाशाङ्कुशधरं तथा / प्रज्ञापुस्तं तथा खड्गं वज्रघण्टां तथापरैः // avk_20 //

सर्वरससमायुक्तं ललितासनसंस्थितम् / दिव्याभरणभूषाङ्गं पञ्चबुद्धमुकूटिनम् // avk_21 //

वागीश्वरं महाशुक्लं सर्वधर्मप्रतिष्ठितम् / एवं स्वहृदि संभाव्य पुरः स्थाप्य प्रपूजयेत् // avk_22 //

पाद्याचमनम् अर्घं च दत्त्वा भक्तिसमन्वितः / जलजैः स्थलजैः पुष्पैः सुगन्धैः पञ्चगन्धकैः // avk_23 //

सांयोजिकैः सुगन्धैश् च सुधूपैर् धूपनैस् तथा / घृतप्रयुक्तदीपैश् च नैवेद्यैर् दिव्यभोजनैः // avk_24 //

छत्त्रध्वजपताकाभिर् नृत्यगीतसुवादनैः / फलमूलादिभिः पत्त्रैः पूगताम्बूलकैस् तथा // avk_25 //

नानौषधिसमायुक्तैर् दिव्यैर् मानुष्यकैस् तथा / कुन्दपुष्पाक्षतैर् दूर्वैर् लाजया पञ्चरत्नकैः // avk_26 //

क्षीरैः शंखसुपुष्पार्घं प्रदद्याच् चैत्यपुंगवे / धारणीं चैव स्तोत्रं च पठेद् गीतं च गाययेत् // avk_27 //

प्रदक्षिणासहस्रं च यावत् कुर्यात् प्रमोदितः / रात्रिं दिवा सुसंपूर्णं प्रचरेच् च प्रदक्षिणाम् // avk_28 //

यत्र देवालये तीर्थे सर्वान् देवान् प्रपूजयेत् / हीनजातिप्रसङ्गं च स्पर्शनं नैव कारयेत् // avk_29 / स्पर्शिते संचरेत् स्नात्वा पञ्चगव्येन शोधयेत् / अस्पर्शे ऽपि चरेत् स्नानं त्रिसंध्यं संचरेद् व्रती // avk_30 //

{cd add the following after 'śodhayet' : śucikrama tathā dharmam uttamam ahorātravrataṃ //

वारवृद्धौ न कर्तव्यं समर्थेनापि कारयेत् //

निद्रासेवितं निद्रां कृत्वा विश्रामसेवितं विश्रामं कृत्वा राजन् तथा व्रतं कारयेद् दोषकम् ऽस्ति तस्मान् न कारयेत् // avk_30* //}

अहोरात्रं सुसंपूर्णं न निद्रां कारयेद् व्रती / चैत्यध्यानसमायुक्तः जपन् स्तोत्रं पठंश् चरेत् // avk_31 //

नानागीतमहोत्साहैर् नृत्यैर् वाद्यैः सुघोषकैः / हाहाकारैः समुल्लासैः कारयेत् संप्रदक्षिणाम् // avk_32 //

विश्रामं वा न कुर्याच् च खेदं वा व्रतमानसः / अहोरात्रे सुसंपूर्णे प्रातः स्नात्वा व्रतं चरेत् // avk_33 //

चैत्यपूजां यथा कृत्वा गुरुपूजां समाचरेत् / अन्नं वस्त्रं सुवर्णं च व्रीहिरत्नानि भूषितान् // avk_34 //

आचार्याय प्रदातव्या यथाशक्ति सुभक्तितः / यज्ञं कुर्यात् ततो वज्री व्रतं पूर्णं प्रपूरयेत् // avk_35 //

अभिषेकं ततो दत्त्वा पञ्चसूत्रं घटं तथा / प्रत्येकं व्रतिनां दत्त्वा आशीर्वाद्यं प्रदापयेत् // avk_36 //

कौमारीपूजनं कृत्वा शेषान्नं च प्रभुञ्जयेत् / दधिशर्करसंयुक्तं पञ्चामृतं सुभोजनम् // avk_37 //

गणचक्रं ततः कुर्याद् विधिज्ञस् तद्विधिं यथा / इत्य् एवं व्रतराजं तद् यः कुर्याच् छुद्धमानसः // avk_38 //

विपुलं भोगम् आभुज्य सर्वसुखसमन्वितः / परत्र सुखम् आप्नोति धर्मलोके महीपते // avk_39 //

इन्द्रपृष्ट उवाच /

भगवन् सर्वविन् नाथ पुनर् वक्तुं त्वम् अर्हसि / संसारे बहुधा जातिस् तेषां प्रचारणं कथम् // avk_40 //

व्रतपूजाफलं सर्वं कालं च समयं दिनम् / कुत्र स्थाने व्रतं कार्यं तत् सर्वं वद सांप्रतम् // avk_41 //

वसुबन्धुर् उवाच /

शृणु राजन् महाभाग संक्षेपाद् गदितं मया / स्वयंभुवो विशेषेण स्थाने पुण्यं महोत्तमम् // avk_42 //

तदभावे स्वदेशेषु स्थावरे चैत्यपुंगवे / तदभावे स्वयं कृत्वा कारयित्वापरैस् तथा // avk_43 //

सुवर्णेन कृते वापि रत्नैश् चान्यैश् च धातुभिः / पाषाणेन तथा काष्ठैर् इष्टिकामृन्मयैस् तथा // avk_44 //

वालुकौदनपिण्डेन कृते पट्टे च चित्रिते / देवालये नदीतीरे तीर्थे पुण्ये महीतले // avk_45 //

धर्मशालां विशोध्यादौ यथाविधि व्रतं चरेत् / पुष्पाक्षतसुगन्धैश् च वारिणा चैत्यपुंगवे // avk_46 //

अर्घं दद्याद् रवेः पूर्वं पुष्पं क्षिपेत् सलाजकम् / मण्डलं पञ्चदेवानां लिखेद् गोमयवारिणा // avk_47 //

अवन्ध्याक्षरयुक्तेन अद्भिर् व्रतीन् सुसिञ्चयेत् / हवर्गान्ताक्षरैर् मन्त्रैर् व्रतिमूर्ध्नि प्रतिष्ठितम् // avk_48 //

ओं आः हूम् इति मन्त्रेण दिशोबन्धं सतर्जितम् / अङ्गन्यासं करन्यासं कृत्वा गुरुं च वन्दयेत् // avk_49 //

पुष्पाक्षतं करे धृत्वा क्षिपेत् पुष्पाञ्जलित्रयम् / पञ्चभूतसमुत्पन्नं पद्मकर्णिकसंस्थितम् // avk_50 //

आवाहयेद् धर्मधातुं वागीश्वरं समुज्ज्वलम् / ज्ञानरूपं समाकृष्य संस्थाप्य समये ऽर्चयेत् // avk_51 //

आवाहयामि त्वं नाथ तिष्ठ तत्र मनोहरे / स्थिरो भव सदा मा गाः सांनिध्यं कुरु स्थावरे // avk_52 //

दुग्धाक्षताम्बुसंयुक्तं नवरत्नानि हाटकैः / शङ्खस्थं प्रतिगृह्णातु अर्घं दत्तं मया मुदा // avk_53 //

पट्टवस्त्राणि दिव्यानि चीवराणि महाप्रभो / नानारङ्गविचित्राणि प्रतिगृह्णातु मोदताम् // avk_54 //

चन्दनं मलयोद्भूतं कस्तूरिकुङ्कुमादिकम् / शैलेयं घनसारं च गृह्यताम् अनुमोदताम् // avk_55 //

जलजान् स्थलजान् दिव्यान् पञ्चवर्णेन ग्रन्थितान् / सुमोदवासनायुक्तान् पुष्पान् गृह्य प्रमोदताम् // avk_56 //

धूपो ऽयं घ्राणसंतर्पो दिव्यगन्धसुयोजितः / प्रदत्तस् तव तोषार्थं गृह्यतां भक्तवत्सल // avk_57 //

दीपो ऽयं हरति ध्वान्तं सर्वतिमिरनाशकः / घृततैलसमुज्ज्वालो मया दत्तः प्रगृह्यताम् // avk_58 //

अन्नं चतुर्विधं नाथ रसानां षड्विधं तथा / घृताद्यान् शर्कराहारान् भुञ्जतां च सुखं मम // avk_59 //

नानाफलसुमोद्यं च कोषकारण्डवादिकम् / स्कन्धमूलादिकं पत्त्रं गृहाण प्रतिमोदताम् // avk_60 //

ताम्बूलपूगसंयुक्तं कर्पूरनिर्मलानि च / दिव्यौषधिगणादीनि गृह्यतां हितकाङ्क्षया // avk_61 //

लाजाक्षतफलार्चैव दूर्वाकुन्दानि भक्तितः / प्रक्षिप्तानि मया तुभ्यं गृहाण हितमानसः // avk_62 //

सौवर्णादिकृतं छत्त्रं ध्वजानि विविधानि च / पताकादीनि सर्वाणि प्रगृह्य जिन मोदताम् // avk_63 //

धीमान् पुजां तथा कृत्व स्तोत्रम् एवं च कारयेत् / जिनेन्द्रतोषणार्थाय कारयेच् च प्रदक्षिणाम् // avk_64 //

धर्मधातुमयं चैत्यं सर्वलोकस्वरूपिणम् / आलयं सर्वबुद्धानां जिनधातुं नमाम्य् अहम् // avk_65 //

नमस् ते जिनधातूनां प्रत्यक्षं समलीलया / त्रियानसमयानन्दं सततं त्वां समाश्रये // avk_66 //

जिनजं सकलस्थं च पुण्यक्षेत्रं नमाम्य् अहम् / पवित्रजनसुखार्थं सेवितार्थप्रदायकम् // avk_67 //

प्रणमामि मुनिश्रेष्ठं मङ्गलार्थप्रदायकम् / जनानां भयहन्तारं लोकनाथं महेश्वरम् // avk_68 //

देवताः सर्वलोकस्थाः संभूता जिनमण्डले / दद्यात् तेभ्यो बलिं तुष्ट्या पूजाभक्त्यर्चनैर् अतः // avk_69 //

{cd add the following after vs. 69 śaucasobhanādikaṃ kṛtvā vratinaḥ maurikuṇḍalasarvābharaṇagāṃgopayādivastra śobhayen mālāpuṣpa lohayen maṇḍalī prajvālayen vistareṇopaḍoṣita gandhāya te 'grata dhūpayet sarvapāpaprasamanaṃ bhavati}

बहुमङ्गलवाद्यैस् च छत्त्रसिन्दूरपात्रया / आचार्यः स्वस्तिवाक्यैश् च कारयेच् च महोत्सवम् // avk_70 //

अश्विनीपूर्णमास्यां तु (...) रविवासरे / आयुष्मतीयुते योगे प्रशस्तश् च विशेषतः // avk_71 //

यः प्रकुर्याद् व्रतं तस्मिन् विपुलं भोगम् आप्नुयात् / परत्र सुखसंप्राप्तो जिनलोके महीपते // avk_72 //

शृणु राजन् महाभाग वक्ष्ये पूजाफलं पुनः / येन संस्थापितं चैत्यं वीतशोको भवेद् असौ / मायामोहविनिर्मुक्तस् त्रिमलेनाविलिप्तितः // avk_73 //

पञ्चामृतैश् चन्दनगन्धगर्भैर् ये स्नापयन्ती जिनचैत्यबिम्बम् / मन्दाकिनीतोयसुगन्धगन्धैस् ते चाप्सरोभी रतिम् आवहन्ति // avk_74 //

ये धूपयन्ति क्षणम् अत्र लोकाः शोका न तेषां प्रभवन्ति जातु / सुरासुरैः पूजितपादपद्माः सुगन्धमाल्याम्बरभूषिताङ्गाः // avk_75 //

सुगन्धम् अस्मा उपढौकयन्ति प्रसन्नचित्ता मनुजा अजस्रम् / सुगन्धिदेहा रविभानुदीप्ता भवन्ति लोकाः परमार्थलोकाः // avk_76 //

ये कुङ्कुमाद्यै रचितं सुवस्त्रं ददन्ति ये चैत्यतथागतेभ्यः / शीतार्तिदुःखं न हि जातु तेषां तद्धेतुतः कोषविशालसारम् // avk_77 //

अशेषपुष्पं जलजं भवन्तं श्वेतारुणश्यामसुपीतकृष्णम् / समन्तभद्राय विशालवंशम् आरोग्यसौख्यं प्रभवन्ति दानात् // avk_78 //

श्रद्धारता ये मनुजा उदारैर् मालासुगन्धैर् बहुपुष्पयुक्तैः / चरन्ति पूजां बहुभक्तितस् ते समस्तसौख्यानि लभन्ति लोके // avk_79 //

नेत्राभिरामा बहुरत्नकोषा नराधिपैर् अर्चितपादपद्माः / ज्ञानप्रदीपाहतमोहजाला ये दीपमाला रचयन्ति बुद्धे // avk_80 //

नैवेद्यम् अस्मै प्रददाति लोके यो भक्तियुक्तः सुरसं सुगन्धिम् / बली विशिष्टो नरचक्रचूडामण्यर्चिताङ्घ्री नृपसेव्यमानः // avk_81 //

फलमूलादिकं दत्त्वा चैत्येषु भक्तिमानसः / यथेष्टं फलम् आप्नोति निरोगी सुखवान् सदा // avk_82 //

रोगादिभिः प्रबलदुःखकरैर् विमुक्ताः स्निग्धाननाः कनकतुल्यमनोज्ञवर्णाः / राज्यं हि यद् विगतकण्टकम् आप्नुवन्ति भैषज्यदानविधिना तद् उशन्ति चैत्ये // avk_83 //

ताम्बूलादिगणं दत्त्वा रूपवान् सुखवाञ् छुचिः / दिव्याङ्गना मनोहारी राजलक्ष्मीम् अवाप्नुयात् // avk_84 //

वितानम् उच्चैर् वितनोति चैत्ये धन्यस् त्रिलोके परिपूजनीयः / विशालवंशो गुणरक्षणीयो जातो महादीप्तशरीरभासः // avk_85 //

ध्वजान् पताकान् अभिरोपयन्ति ये चैत्यबिम्बे खलु भक्तियुक्ताः / महीश्वरास् ते जितदुष्टसंघा भवन्ति नाथा दिवि भूतले च // avk_86 //

छत्त्राणि नानामणिभिर् महार्हैः संपादयन्त्य् आत्तमना ददन्ति / चैत्येषु भूमीश्वरवृन्दवन्द्याः श्रीसंयुता धर्मरता भवन्ति // avk_87 //

वीणादिभिर् घण्टमृदङ्गवाद्यैः शृङ्गैश् च शङ्खादिसुदिव्यघोषैः / संघोषणां ये वितरन्ति चैत्ये ते ऽभिज्ञया पञ्चभिर् आश्रयन्ते // avk_88 //

महोत्साहकरैर् गीतैः सुमनोज्ञस्वरैर् जिने / नृत्यं च कारयेन् नित्यं कुर्याच् च दिव्यघोषणाम् // avk_89 //

ते नराः सुस्वरा भोन्ति सुन्दरा दिवि भूतले / दिव्यश्रोत्रा महाविज्ञाः सुशब्दं शृणुयुः सदा // avk_90 //

नृत्यगीतादिकं कृत्वा चैत्यबिम्बे जिनालये / वन्द्यमानाः सुगोत्राश् च निष्पापाश् च बहुश्रुताः // avk_91 //

दीर्घायुष्काः सहस्राक्षा निरापदाः गुणाश्रयाः / ग्रहव्याधिविमुक्ताङ्गा भवन्ति ते शुभाकराः // avk_92 //

त्रासाय दुष्टसत्त्वानां रक्षार्थं च जिनालये / शस्त्रहस्ताः स्थिता ये च जिनभक्तिसमन्विताः // avk_93 //

आयुष्मन्तो निरोगाश् च पुत्रपौत्रीसमन्विताः / भाग्यवन्तो धनाढ्याश् च गच्छन्त्य् अन्ते जिनालयम् // avk_94 //

दूर्वाकुन्दाक्षतान् पुष्पान् लाजया सह भक्तिमान् / प्रक्षिपेज् जिनचैत्येषु स्वस्तिवाक्यम् उदाहरन् // avk_95 //

दुर्गतिं नाभिजानाति सुकुली लोकनन्दनः / सर्वविद्यागुरुर् वन्द्यश् चान्ते मोक्षम् अवाप्नुयात् // avk_96 //

ये रममुक्तामणिवज्रहेमं रूप्यं सुवर्णादिकधातुदानात् / विनष्टशोकाः सुभगाः सुवंशाः पूर्णेन्द्रियाः पूर्णमनोरथाः स्युः // avk_97 //

ये शुद्धचित्ताः स्तुतिम् आचरन्ति गद्यात्मिकां पद्यमयीं विचित्राम् / ते शब्दसंघान् बहुवाद्यजातान् शृण्वन्ति गीतान् सुरभामिनीनाम् // avk_98 //

यावती भूमिर् आक्रान्ता ह्य् अधः काञ्चनचक्रतः / योजनानां सहस्राणि राशिभ्यः परिकीर्तिताः // avk_99 //

यावत्यो वालुकास् तत्र तावत्यः परिसंख्यया / राजा भवति वीरेशश् चक्रवर्ती महीतले // avk_100 //

ये जातमात्राः प्रभुतां प्रयान्ति श्रेष्ठीकुले जन्म सदैव येषाम् / हस्त्यश्वयानैश् च परिभ्रमन्ति कृत्वात्र ते चैत्यवरप्रणामम् // avk_101 //

अकार-म्-आद्यक्षरमन्त्रराजैर् बल्यूपहारं खलु यो हि दद्यात् / तस्मै सुदेवाः सगणाः सुतृप्ता दास्यन्ति सत्कर्मफलाभिलाषम् // avk_102 //

यस्मिन् सुधालेपम् उदाचरन्ति ते रोगशोकादिविमुक्तदेहाः / धनेश्वरा दीर्घतरायुषस् ते नरामराणां सुभगा भवन्ति // avk_103 //

ये बुद्धम् उद्दिश्य महान्ति नित्यं कुर्वन्ति मृद्गोमयलेपनानि / भक्त्या सुशुद्धा जलमण्डलं वा लभन्ति ते राजबलं सुभाग्याः // avk_104 //

स्तूपाङ्गणं धातुवरं विहारं ये शोधयन्तीह नराः प्रयत्नैः / निर्माल्यम् एभ्यश् च समुद्धरन्ति ते हेमवर्णाः सुदृशो भवन्ति // avk_105 //

प्रदक्षिणां ये वितरन्ति तस्मिन् भवन्ति जातिस्मरलाभिनस् ते / सुवर्णवर्णा बहुपुत्रपौत्राः पूज्या मनुष्यामरनाथसंग्ःऐः // avk_106

आलस्येनापि यः कुर्याज् जिनालयप्रदक्षिणाम् / पदे पदे सुवर्णैककर्षदानफलं लभेत् // avk_107 //

ब्रह्मक्षत्रियवैश्यानां सच्छूद्राणां प्रपूजनम् / तेभ्यो विहीनजातीनाम् अधिकारो न पूजने // avk_108 //

गन्धपुष्पद्विजातीनां ... च पूजयेत् / गन्धपुष्पद्विजातीनां विशेषेण प्रकथ्यते // avk_109 //

छत्त्रावरोहणं राज्ञां वैश्यानां त्व् अन्नढौकने / ध्वजपाताकवस्त्रेषु शुद्राणां च प्रचक्ष्यते // avk_110 //

स्वर्णकारा लोहकाराः कांस्यकृत्कृषिकादयः / एतेषां चेह हस्तेन चैत्यपुंगवपूजनम् // avk_111 //

तण्डुली व्यञ्जनी चापि क्रयविक्रयकारिणः / एतैः स्ववृत्तिवस्तूनि ढौकनीयानि भक्तितः // avk_112 //

शौलिनी ध्वननवर्ती मांसवर्ती तथा सुरी / एतैर् दीपः प्रदातव्यः कुलधर्मप्रमाणतः // avk_113 //

चर्मकारश् च मातङ्गो नियोगी रजको ध्वजी / एतैश् च दूरतः स्थित्वा वन्दनीयो जिनालयः // avk_114 //

षट्त्रिंशज्जातिभिर् एवं स्वकुलवृत्तिचारणैः / अन्यैश् च विविधैर् नित्यं पूज्यो मान्यो जिनालयः // avk_115 //

येषां व्रतविकारो न पूजने जिनपुंगवे / एतैः प्रदक्षिणां कृत्वा वन्दनीयः स्वभक्तितः // avk_116 //

एवं भूयश् चरेद् धर्मी व्रतराजम् अहर्निशम् / तस्य पुण्यं यथा प्रोक्तं कुष्ठव्याधिक्षयं व्रजेत् // avk_117 //

पञ्चानन्तर्यपापानि यास्यन्त्य् अपि न संशयः / किं पुनश् चान्यपापानि जन्मान्तरकृतान्य् अपि // avk_118 //

न ही स विद्यते राजन् सर्वत्र भुवनेष्व् अपि / अहोरात्रव्रतं पुण्यं यो ऽन्यथात्वं करिष्यति // avk_119 //

श्रवाद् अपि हरेत् पापं दर्शनात् पुण्यम् आप्नुयात् / अनुमोदात् तथा चैवं व्रतिनां तु किम् उच्यते // avk_120 //

व्रतिनां सप्तभागानि कृत्वा पुण्यं विशारदः / एकभागं लभेद् राजा चैकं तु सारथीजनः / सर्वसत्त्वस्य चैकं हि तच् छेषं लभते व्रती // avk_121 //

इति श्रुत्वा गुरोर् वाक्यम् इन्द्रपृष्टो महाप्रभुः // ततः सत्त्वहितार्थाय व्रतं कर्तुं समुद्यतः // avk_122 // वाराणसीपुरं गत्वा वसुबन्धुवचो यथा / विहारं च प्रतिष्ठाप्य चैत्यराजं जिनालयम् / संघभोज्यं ततः कृत्वा ययौ स्वर्गं जनैः सुधीः // avk_123 //

ततो भिक्षवो भगवन्तम् एतद् ऊचुः /

भगवन् मुनिशार्दूल पुनर् वक्तुं त्वम् अर्हसि / केन केन पुरा नाथ व्रतराजम् इदं कृतम् // avk_124 //

भगवान् आह /

पुरा स्वर्गेषु शक्रेण अहोरात्रव्रतं कृतम् / स षट्पारमितां धार्य चैत्यराजम् अपूजयत् / प्रदक्षिणां सदा कृत्वा यथाविधि महोत्सवैः // avk_125 //

पाताले च पुरा वीरो दैत्येन्द्रो बलवान् अभूत् / निर्घोषदमनो नाम देवासुरप्रमर्दकः // avk_126 //

इन्द्रं स्वर्गे निराकृत्य पृथिवीम् अवधारितम् / तेनासुरसहायेन त्रैलोक्यं स्ववशे कृतम् // avk_127 //

पृथिवीमण्डलं गत्वा गतो ऽसौ मघवत्पुरिम् / इन्द्रपृष्टमहास्थाने देवताप्रतिमां स्थिताम् / पञ्चप्रदक्षिणां कृत्वा प्रज्ञापारस्थितो ऽभवत् // avk_128 //

पातालेषु पुनर् गत्वा सो ऽचरत् तद् व्रतोत्तमम् / नागिन्यो नागराजाश् च पातालेष्व् अचरंस् तथा // avk_129 //

नागैः फणविभूषाभिर् देवनागेन्द्रकल्पितम् / पूजितं सततं भक्त्या चैत्यराजं विधानतः // avk_130 //

ऋषयश् च पुरा सप्त जलाश्रयप्रतिष्ठितम् / पुपूजुः जिनधातुस्थं विधिभिश् च विशारदाः // avk_131 //

नागिन्यो विषदर्पान्धाः पूज्यमानाञ् जिनालयम् / तापितान् कारयाम् आसुर् विषाङ्गारैः प्रदाहनैः // avk_132 //

ततस् तैः शापिता एवं नागिन्यः शम्बुकाः खलु / भवध्वं सप्तजन्मानि पुनश् चैत्यस्य सेवकाः // avk_133 //

ततश् चान्ते पुनः प्राप्य मानुष्यं पुण्यभावतः / एषा सा नायका या तु धर्मदक्षं पतिं लभेत् // avk_134 //

ततस् त वञ्चिताः सर्वाः शम्बुका धर्ममानसाः / धान्यां प्रदक्षिणां चक्रुर् भावयन्त्यो जिनालयम् // avk_135 //

ततः पुण्यानुभावेन देव्यः सप्तकुमारिकाः / भूता राजसुता धन्याः प्रालभन् परमं पदम् // avk_136 //

तासाम् एका व्रती नाम्ना धर्मदक्षपतिव्रता / तस्याः पुण्यप्रभावेन धर्मदक्षो ऽलभद् व्रतम् // avk_137 //

धर्मदक्षो महाराजा यथाविधि व्रतं चरन् / भार्यया सह धर्मात्मा सुखावत्यां महीपतिः // avk_138 //

इत्य् एवं भिक्षवो ज्ञात्वा व्रतानां व्रतम् उत्तमम् / चैत्यसेवा सदा कार्या व्रतपुण्यप्रचारणैः // avk_139 //

चैत्यव्रतसमं पुण्यं नास्ति सत्यं त्रिभूवने / तस्माच् चैत्यः सदा वन्द्यः पूजनीयः प्रयत्नतः // avk_140 //

इत्य् अहोरत्रव्रतकथा