अहोरात्रव्रतचैत्यसेवानुशंसावदान

अहोरात्रव्रतचैत्यसेवानुशंसावदान

अहोरात्रव्रतचैत्यसेवानुशंसावदान

ओं नमो रत्नत्रयाय /

श्रीमद् रत्नत्रयं नत्वा त्रिधातुभुवनाधिपम् / अहोरात्रव्रतकथां वक्ष्ये गुरूपदेशतः // avc_1 //

कुक्कुटारामम् आसीनम् उपगुप्तं यतीश्वरम् / कृताञ्जलिपुटो ऽशोकः प्रार्थयद् एवम् आदरात् // avc_2 //

{a different verse in bcde as follows: athāśoko mahīpāla upaguptaṃ yatiṃ ca tam / kṛtāñjalipuṭo natvā prārthayad evam ādarāt // avc_2* //}

भदन्त श्रोतुम् इच्छामि चैत्यव्रतविधिं पुनः / अहोरात्रव्रतस्यापि विधिं पुण्यानि सद्गुरो // avc_3 //

तद् भवान् सद्गुरुः शास्ता लोकपुण्यप्रवृद्धये / अहोरात्रव्रतस्यात्र विधिम् आदेष्टुम् अर्हति // avc_4 //

इति तेन नरेन्द्रेण प्रार्थितं स सुधीर् यतिः / श्रुत्वा तं नृपम् आलोक्य पुनर् एवम् उपादिशत् // avc_5 //

शृणु साधु महाराज यथा मे गुरुणोदितम् / तथाहं ते प्रवक्ष्यामि श्रुत्वा चैवं समाचर // avc_6 //

पुरा स भगवाञ् छास्ता शाक्यसिंहो जगद्गुरुः / श्रावकैर् भिक्षुभिः सार्धं चैलकैश् चाप्य् उपासकैः // avc_7 //

भिक्षुणीभिः सुशीलाभिर् बोधिसत्त्वगणैर् अपि / विहारे जेतकारण्ये व्यहरत् सौगताश्रमे // avc_8 //

तदा स भगवान् बुद्धो लोकानां पुण्यवृद्धये / सभामध्ये समासीनो धर्मम् आदेष्टुम् आरभत् // avc_9 //

तदा सर्वे ऽमरेन्द्रादिलोकपाला महर्द्धिकाः / तत् सद्धर्मामृतं पातुं श्रद्धया समुपागताः // avc_10 //

ब्रह्मादिब्राह्मणाश् चापि महर्षयस् तपस्विनः / चत्वारश् च महाराजाः ससैन्यपरिचारकाः // avc_11 //

दैत्येन्द्रा नागराजाश् च यक्षगन्धर्वकिन्नराः / सिद्धा विद्याधराः साध्या ग्रहाश् च वसवस् तथा // avc_12 //

राक्षसाश् च महाविरा गरुडाश् च महोरगाः / योगिनो यतयश् चापि राजानः क्षात्रिया अपि // avc_13 //

अमात्या मन्त्रिणश् चापि वैश्या राजकुमारकाः / श्रेष्ठिनो धनिनः शूद्राः सार्थवाहा माहाजनाः // avc_14 //

वणिजः शिल्पिनश् चापि पौरा जनपदास् तथा / ग्राम्याः कार्वटिकाश् चापि तथान्यदेशवासिनः // avc_15 //

सर्वे ते समुपागत्य बुद्धं तं शृईघनं मुदा / सत्कृत्य श्रद्धयाभ्यर्च्य कृत्वा प्रदक्षिणान्य् अपि // avc_16 //

कृताञ्जलिपुटा नत्वा निऋईक्ष्य संप्रमोदिताः / तत् सद्धर्मामृतं पातुम् उपतस्थुः समाहिताः // avc_17 //

तदासनात् समुत्थाय सुभूतिः स्थविरो यतिः / उद्वहन्न् उत्तरासङ्गं जानुभ्यां भुवि संस्थितः // avc_18 //

कृताञ्जलिपुटो नत्वा भगवन्तं जगद्गुरुम् / श्रीघनं तं समालोक्य प्रार्थयद् एवम् आदरात् // avc_19 //

भगवन् नाथ सर्वज्ञ विजानीयाद् भवान् गुरुः / सर्वलोका इमे शास्तुर् धर्मं श्रोतुं समास्थिताः // avc_20 //

तद् अत्र भुवने ख्यातम् अहोरात्रव्रतं कदा / प्रवर्तते तद् आख्याहि तद्विधिं च कथं प्रभो // avc_21 //

इति तेनार्हता पृष्टे भगवान् स मुनीश्वरः / तां सभां तं सुभूतिं च समालोक्यैवम् अब्रवीत् // avc_22 //

साधु शृणु सुभूते त्वं सर्वसत्त्वहितार्थभृत् / अहोरात्रव्रतं पुण्यं विधिं च कथ्यते मया // avc_23 //

पुरा पूर्वविदेहे ऽभूत् ख्याता गन्धवती पुरी / तस्यां राजा महाविज्ञ इन्द्रप्ष्टाभिधः प्रभुः // avc_24 //

सो ऽन्तःपुरे समानीय वसुबन्धुं जिनात्मजम् / सभायां स्वासने स्थाप्य सत्कृत्य श्रद्धयार्चयत् // avc_25 //

ततः स भूपती राजा उत्थाय समुपाश्रितः / कृताञ्जलिः प्रणत्वैनं प्रार्थयद् एवम् आदरात् // avc_26 //

भदन्त यद् इमे लोका असद्धर्माभिमानिनः / तद् एषां मानघाताय सद्धर्मं समुपादिश // avc_27 //

यच् छ्रुत्वैव त्व् इमे सर्वे सद्धर्मप्रतिबोधिताः / सर्वपापविनिर्मुक्ता भवेयुर् बोधिलाभिनः // avc_28 //

इति राज्ञार्थितं श्रुत्वा वसुबन्धुः स आत्मवित् / इन्द्रपृष्टं महीन्द्रं तं समालोक्यैवम् अब्रवीत् // avc_29 //

शृणु साधु महाराजा तव पुण्यप्रवृद्धये / सर्वसत्त्वहितार्थं तद् अहोरात्रमहाव्रतम् // avc_30 //

यथा मया श्रुतं पूर्वं विपश्यिना प्रभाषितम् / महत्पुण्यानुशंसा च तद्विधिश् च प्रचक्ष्यते // avc_31 //

संसारे ऽत्र महत् पुण्यं प्राप्तुम् इच्छन्ति ये नराः / चरितव्यम् अहोरात्रव्रतं तैः श्रद्धया मुदा // avc_32 //

भक्त्या चरन्ति ये मर्त्या अहोरात्रव्रतं मुदा / ते सर्वे विमलात्मानः परिशुद्धत्रिमण्डलाः // avc_33 //

बोधिचित्तं समासाद्य चरित्वा बोधिचारिकाम् / सर्वसत्त्वहितं कृत्वा पूर्य पारमिताः क्रमात् // avc_34 //

सर्वक्लेशगणाञ् जित्वा सर्वमारगणान् अपि / सम्यग्बोधिं समासाद्य भवेयुः सुगता ध्रुवम् // avc_35 //

अतीतैश् च जिनैः सर्वैः कृत्वैतद् व्रतम् उत्तमम् / सर्वमारगणाञ् जित्वा संबोधिः साधिता खलु // avc_36 //

वर्तमानैश् च संबुद्धैः सर्वैर् एतद् व्रतं कृतम् / एतत्पुण्यानुभावैर् हि संबोधिः साधिता द्रुतम् // avc_37 //

तथा चानागतैः सर्वैः कृत्वा चैतद् व्रतं वरम् / एतत्पुण्यविपाकैस् तु प्राप्स्यते बोधिर् उत्तमा // avc_38 //

तथान्ये बोधिसत्त्वाश् च संबोधिव्रतचारकाः / एतद् व्रतवरं धृत्वा चरन्ति बोधिसंवरम् // avc_39 //

तथा सर्वे ऽमरेन्द्राश् च कृत्वा चैतद् व्रतं मुदा / देवलोकाधिनाथास् ते भवन्ति बोधिभागिनः // avc_40 //

एवं सर्वे महासत्त्वा ऋषयो मुनयो ऽपि च / एतद् व्रतवरं कृत्वा भवन्ति ब्रह्मचारिणः // avc_41 //

एवं ये ये नराश् चापि चरन्त्य् एतद् व्रतं मुदा / ते ते सर्वे ऽपि तत्पुण्यैर् भवन्ति बोधिभागिनः // avc_42 //

ये चाप्य् एतद् व्रतं दृष्ट्वा श्रुत्वापि चानुमोदिताः / प्रसीदन्ति तथा ते ऽपि तत्पुण्यं प्राप्नुवन्ति हि // avc_43 //

एतत्पुण्यानुभावेन नैव गच्छन्ति दुर्गतिम् / सर्वदा सशुभं सौख्यं भुक्त्वा यान्ति जिनालयम् // avc_44 //

तस्मात् सर्वप्रयत्नेन सद्धर्मसुखवाञ्छिभिः / अहोरात्रव्रतं भक्त्या चरितव्यं नरैः सदा // avc_45 / अहोरात्रव्रतोत्पन्नपुण्यसंख्या न विद्यते / अप्रमेयम् असंख्येयम् इति बुद्धैः प्रकथ्यते // avc_46 //

सर्वैर् अपि मुनीन्द्रैस् तत् संख्यां कर्तुं न शक्यते / मयात्र शक्यम् एकेन तत्पुण्यं गणितुं कथम् // avc_47 //

यस्य पुण्यानुभावेन महान्ति पातकान्य् अपि / निर्दह्य परिशुद्धात्मा तत्क्षणाद् याति सद्गतिम् // avc_48 //

यथाभिलषितं कार्यं साधयित्वा ह्य् अविघ्नतः / सर्वदा सत्सुखं भुक्त्वा संयान्त्य् अन्ते जिनालयम् // avc_49 //

इति मत्वा महत्पुण्यम् अहोरात्रव्रतं वरम् / धर्मार्थकाममोक्षाप्त्यै चरितव्यं सदा नरैः // avc_50 //

तथा चेत् ते महत्पुण्यम् इहामुत्र शुभं सदा / क्रमाद् बोधिव्रतं प्राप्य बोधिसत्त्वो भवेद् ध्रुवम् // avc_51 //

क्रमात् क्लेशान् विनिर्जित्य संसारसुखनन्दिनः / जित्वा मारगणान् सर्वान् संबुद्धपदम् आप्नुयाः // avc_52 //

इति तेन समाख्यातं धीमता वसुबन्धुना / श्रुत्वैवं सुमहत् पुण्यम् इन्द्रपृष्टो मुमोद सः // avc_53 //

ततः स इन्द्रपृष्टाख्यो महाराजो ऽनुमोदितः / अहोरात्रव्रतं कर्तुं चारयितुं समैच्छत // avc_54 //

ततः स नृप उत्थाय साञ्जलिः समुपाचरन् / वसुबन्धुं तम् आनत्वा प्रार्थयद् एवम् आदरात् // avc_55 //

भदन्त भवतादिष्टम् अहोरात्रव्रतोद्भवम् / महत् पुण्यं निशम्याहं कर्तुम् इच्छामि सांप्रतम् // avc_56 //

तस्मात् तद्विधिम् आदेष्टुम् अर्हसि मे जगद्धिते / सर्वथाहं चरिष्यामि चरिष्यन्ति प्रजा अपि // avc_57 //

तद् अत्र सर्वसत्त्वानां हिताय पुण्यसिद्धये / अहोरात्रव्रतस्यैवं विधिम् आदेष्टुम् अर्हसि // avc_58 //

इति तेन नरेन्द्रेण प्रार्थितं स महामतिः / वसुबन्धुर् निशम्यैवं इन्द्रपृष्टं तम् अब्रवीत् // avc_59 //

शृणु राजन् यथाख्यातं मुनीन्द्रेण विपश्यिना / तथाहं ते प्रवक्ष्यामि व्रतराजविधिं क्रमात् // avc_60 //

स्वयंभूचैत्यभूक्षेत्रे विहारे सुगताश्रमे / पुण्यक्षेत्रे नदीतीरे संगमे सरितां तथा // avc_61 //

तीर्थे समुद्रतीरे च ह्रदतीरे सरस्तटे / उद्याने पर्वते ऽरण्ये विविक्ते वन-आश्रमे // avc_62 //

चैत्यालये शुभे स्थाने प्रासादे मन्दिरे गृहे / एवम् अन्यत्र भूदेशे शुद्धस्थाने मनोरमे // avc_63 //

एतेषु परिशुद्धेषु यत्रेप्सिते विशोधिते / धर्मशालां विधायादौ मृद्गोमयैर् विलेपयेत् // avc_64 //

चतुर्ध्वजान् प्रतिष्ठाप्य वितनुयाद् वितानकम् / पुष्पमालादिभिश् चित्रैर् दुष्यैः पट्टैश् च मण्डयेत् // avc_65 //

{e adds a verse in the margin as follows: gokśīraiḥ paṃcaratnaiś ca śilācūrṇair vilepayet / digmālā digpratāpaiś (sic) ca lambayec ca jinālayaṃ // avc_65* //}

तत्र वज्री शुभाचारः परिशुद्धत्रिमण्डलः / मण्डलं वर्तयेद् रम्यं धर्मधातोर् यथाविधि // avc_66 //

ततस् तन् मण्डलं वज्री प्रतिष्ठाप्य यथाविधि / व्रतिनां संग्रहं कृत्वा व्रतारम्भं प्रकारयेत् // avc_67 //

शुक्लपक्षे त्रयोदश्यां भोजनान्ते दिनात्यये / दन्तादिधावनं कृत्वा मुखादिं परिशोधयेत् // avc_68 //

चतुर्दश्यां प्रभाते च तीर्थे स्नात्वा व्रती सुधीः / शुचिवस्त्रावृतो भद्रशीलः श्रद्धासमन्वितः // avc_69 //

मध्याह्ने मण्डलं चैत्यं पञ्चभिर् उपहारकैः / यथाविधि समभ्यर्च्य प्रणामं संप्रकारयेत् // avc_70 //

ततो यामे तृईये ऽह्नः कारयेद् व्रतपालणम् / निरामिषैर् विशुद्धान्नैः स्नानं च कारयेत् ततः // avc_71 ///

ततो रात्रिमुखे चैत्यं मण्डलं च समर्चयेत् / दीपमालाः समुज्ज्वाल्य धर्मं च श्रावयेद् व्रतीन् // avc_72 //

पूर्णमास्यां प्रभाते तु स्नात्वा शुद्धाम्बरावृताः / शोधितपञ्चगव्येन कुर्युश् चाङ्गविशोधनम् // avc_73 //

ततो दत्त्वार्घम् आदौ ते सूर्याय व्रतिनस् तथा / गुरवे च प्रदायार्घं स्थित्वा स्वस्वासने क्रमात् // avc_74 //

पूजाङ्गानि च सर्वाणि शोधयेयुर् यथाविधि / तत्रादौ व्रतिसंघः स वज्रसत्त्वं समर्चयेत् // avc_75 //

ततो रत्नत्रयं चैव संपूजयेद् यथाविधि / तेषां च शरणं गत्वा प्रणमेद् रचिताञ्जलिः // avc_76 //

त्रिसमाधिं ततः कृत्वा ध्यात्वात्मनि जिनेश्वरम् / आवाहयेत् पुरः श्रीमद्धर्मधातुं महेश्वरम् // avc_77 //

तत्पादार्घं ततो दद्यात् ततश् चाचमनार्घकम् / प्रोक्षणार्घं ततो दत्त्वा मण्डले संनिवेशयेत् // avc_78 //

ततः पूजोपहारैस् तं मण्डलं सगणं मुदा / यथाविधि समभ्यर्च्य तद्धृन्मन्त्रं सुधीर् जपेत् // avc_79 //

{ए अद्द्स् हेरे: ततः स्तोत्रं पठेत् / धर्मधातुमयं चैत्यं सर्वाकारस्वरूपिणम् / आलयं सर्वबुद्धानां वागीश्वरं नमाम्य् अहम् //

जिनजसकलधातुं पुण्यक्षेत्रे कृतार्थम् / प्रविणजनसुखार्थं सेवितार्थं प्रदत्तम् //

प्रणमतं मुनिराजं अंजलिष्ठं प्रधानम् / जितसकलभयार्थं लोकनाथं महेशम् //}

ततः स्तोत्रं पठित्वा तु तोषयेद् रचिताञ्जलिः / पापानां देशनां कुर्यात् थता पुण्यानुमोदनाम् // avc_80 //

प्रदक्षिणान्य् अतः कुर्यात् संगीतैश् च महोत्सवम् / अष्टाङ्गप्रणतिं कृत्वा प्रार्थयेद् बोधिसंवरम् / ततः क्षमार्थनां कृत्वा तन्मण्डलं विसर्जयेत् // avc_81 //

यथा पूजा कृता तत्र मण्डले विधिवत् तथा / चैत्यबिम्बं समभ्यर्च्य प्रार्थयेद् एवम् आदरात् // avc_82 //

तथा सर्वत्र चैत्येषु कुर्यात् पूजादिकं मुदा / संगीतिसहितैः स्तोत्रैः कुर्याद् एवं महोत्सवम् // avc_83 //

कृत्वा प्रदक्षिणान्य् एव निद्रालास्यं विहाय च / मुदा जागरणं कुर्वन्न् अहोरात्रं व्रतं चरेत् // avc_84 //

चतुःसंध्यं तथा स्नात्वा चैत्यसेवां समाचरेत् / दुष्टजातिर् न च स्पृश्या स्पर्शिते स्नानम् आचरेत् // avc_85 //

विश्रामं नैव कुर्याच् च खेदं चित्तेन वा व्रती / चैत्यध्यानसमाधानो जपन् स्तोत्रं पठंश् चरेत् // avc_86 //

नृत्यगीतमहोत्साहैर् नानावाद्यैः सनृत्यकैः / हाहाकारैः समुल्लासैः प्रचारयेन् महोत्सवम् // avc_87 //

एवं पूर्णम् अहोरात्रम् अविश्रान्तं व्रतं चरेत् / ततः प्रातस् तथा स्नात्वा मण्डलं चैत्यम् अर्चयेत् // avc_88 //

ततश् छत्रं पताकाश् च सिन्दूरपात्रया सह / सलाजाक्षतपुष्पांश् च प्रारोहयेत् महोत्सवैः // avc_89 //

यज्ञं कुर्यात् तथा वज्री बलिं दद्याद् यथाविधि / अभिषेकं ततो दत्त्वा पञ्चसूत्रघटं क्रमात् // avc_90 //

साशीर्वादं व्रतिभ्यो ऽपि दद्याद् वज्री समाहितः / ततः क्षमार्थनां कृत्वा मण्डलं तद् विसर्जयेत् // avc_91 //

ततस् ते व्रतिनः सर्वे वज्राचार्यं गुरुं यतीन् / अभ्यर्च्य दक्षिणां दत्त्वा तोषयेयुः प्रणम्य च // avc_92 //

ततस् तद्रज आदाय तीर्थे नागान् समर्च्य च / प्रवाहयेत् ततो गेहं प्रायायान् मङ्गलोत्सवैः // avc_93 //

तत्र तन्मण्डलस्थानं तीर्थाम्बुनाभिषिञ्चयेत् / ततस् ते व्रतिनः सर्वे कुर्युस् तद्व्रतपालणम् // avc_94 //

ततस् तन्मण्डलस्थाने वज्राचार्यो यथाविधि / कुमारीं पूजयित्वा तां देवीं भोज्यैः प्रतोषयेत् // avc_95 //

गणचक्रं ततो ऽभ्यर्च्य भोजनैः संप्रतोषयेत् / व्रतिनः साधकांश् चापि जनान् सर्वांश् च तोषयेत् // avc_96 //

एवं चरन्ति ये मर्त्या अहोरात्रव्रतं मुदा / ते भवन्ति महासत्त्वा बोधिसत्त्वाः शुभाशयाः // avc_97 //

दुर्गतिं ते न गच्छन्ति सदा गच्छन्ति सद्गतिम् / भुक्त्वा धर्मसुखोत्साहं संप्रयान्ति जिनालयम् // avc_98 //

एवं विपश्यिना शास्त्रा समाख्यातं श्रुतं मया / भूयः शृणु महाराज तत्फलानि विशेषतः // avc_99 //

पञ्चामृतैः पञ्चसुगन्धितोयैर् ये स्नापयन्तीह जिनेन्द्रचैत्यम् / मन्दाकिनीदिव्यसुगन्धितोये स्नात्वामरैस् ते सततं रमन्ते // avc_100 //

{b has the following additional verse here, pañcāmṛtaiḥ pañcasugandhiratnair durvākṣataiḥ kūsumalājatoyaiḥ / ye cārghadānaṃ vitaranti caitye te prāpnuvantīha mahānidhānam // avc_100* //}

कुर्वन्ति चैत्ये जलमण्डलं ये सुपिष्टवासेन तथा मनुष्याः / ते हेमवर्णा नृपवंशजाताः समृद्धिमन्तः सुभगा भवन्ति // avc_101 //

सुगन्धधूपं जिनचैत्यबिम्बे ये धूपयन्ति प्रतिमोदयन्तः / सुगन्धदेहाः सुरसंघवन्द्यास् ते शुद्धचित्ता मनुजा भवन्ति // avc_102 //

ये पञ्चगन्धैर् अनुलेपयन्ति संबुद्धचैत्यं मनुजाः प्रसन्नाः / सौगन्धिताङ्गा बलदीप्तिमन्तस् ते संभवन्ते परमार्थलोकाः // avc_103 //

यज्ञोपवीतं वररङ्गितं च सुचीवराणि प्रददन्ति चैत्ये / ते दिव्यवस्त्रावृतसौम्यदेहाः सर्वार्थसंपद्भरिता भवन्ति // avc_104 //

ये सर्वपुष्पैर् वरगन्धवद्भिर् अभ्यर्चयन्ति प्रतिनम्य चैत्यम् / नैरोगिणस् ते सुचिरायुषः स्युः सौभाग्यवन्तः सुविशालवंशाः // avc_105 //

ये चापि चैत्यं परिमण्डयन्ति स्रग्भिः सुपुष्पै रचिताभिर् एवम् / ते भाग्यवन्तः परिभूषिताङ्गा देवा भवन्ति प्रथिता नृपाश् च // avc_106 //

ये दीपमाला रचयन्ति चैत्ये ते रत्नसंपत्परिपूर्णकोषाः / नेत्राभिरामाः सुदृशो भवन्ति ते ज्ञानदीपाहतमोहजालाः // avc_107 //

{a has two additional verses here मैत्र्या यः सह किंकरैः स्मररिपुं निर्जित्य वज्रासने क्लेशारीन् अपि यो दुरन्तविषयान् अन्तश्चरान् दुर्जनान् / स्कन्धारातिम् अपि प्रसह्य सुगतो मृत्युं च निःस्वो ऽवशः प्राप्तः सर्वरसाग्रभोगवशितां क्षीरोदनाढौकनात् // avc_107* //

सौवर्णरौप्यविधधातुजमृन्मयं वा शाल्योदनैः सुपरिपूर्णसुपिण्डपात्रम् / भक्त्या ददाति सुगतालयचैत्यबिम्बे स्यात् तस्य पुण्यम् असमं फलम् अप्रमेयम् // avc_107** //}

ये चैत्यबिम्बे सुरसं प्रणीतं नैवेद्यम् अग्रं प्रददन्ति भोग्यम् / ते लोकश्रेष्ठा बलकीर्तियुक्ता नृपा भवन्ति प्रथितानुभावाः // avc_108 //

ये चापि चैत्ये फलपत्त्रमूलस्कन्धादिकं वा प्रददन्ति भक्त्या / नीरोगिणस् ते सुसमृद्धिमन्तो यथेष्टभोग्याः सुखिनो भवन्ति // avc_109 //

भैषज्यम् एवं प्रददन्ति ये च संबुद्धचैत्ये मनुजाः प्रसन्नाः / स्निग्धाननास् ते नृपतीश्वराश् च सौवंअवर्णा निरुजो भवन्ति // avc_110 //

{b, which had vs. ii noted above here, adds another verse, māhiṣyagorasavaraṃ ghṛtayā sametam ....................................................... ye / tasmai dadanti satataṃ jinapuṃgavāya te prāpnuvanty ............. sarājalakṣmīm // avc_110* //}

ताम्बूलपूगादिरसायनानि ये चैत्यबिम्बे परिढौकयन्ति / ते भूमिपालाः सुभगा भवन्ति दिव्याङ्गनानेत्रमनोहरास्याः // avc_111 //

{a and b have the following additional verse here. kāntāpāṇisarojapattravidhṛtāṃ sadvarṇagandhojjvalāṃ svādusparśasukhāṃ surāsurapure yad devavṛndārakaiḥ / bhāsvatkāñcanabhājaneṣu nihitām aśnanti divyāṃ sudhāṃ tad buddhapramukhāryasaṃghaviṣaye nyastānnadānāt phalam // avc_111* //}

ये चैत्यबिम्बे परिशुद्धरङ्गान् ध्वजान् विचित्रान् अधिरोपयन्ति / महीश्वरास् ते जितदुष्टसंघा धन्या भवन्ति प्रथितप्रतापाः // avc_112 //

उच्चैर् वितन्वन्ति वितानम् आराद् ये चैत्यबिम्बे मनुजाः प्रसन्नाः / देवाधिपास् ते मनुजाधिपाश् च धन्या भवन्ति प्रथितर्द्धिमन्तः // avc_113 //

ये चापि चैत्ये मनुजा विचित्राः शुद्धाः पताका अवलम्बयन्ति / ते श्रीसमेता दिवि भूतले च नाथा भवन्ति त्रिदशाभिमान्याः // avc_114 //

छत्त्रं सुवर्णं मणिभिर् विचित्रं पट्टैश् च सिक्तैः कुसुमैः कृतं च / ये चैत्यबिम्बे मनुजाः प्रसन्ना माङ्गल्यवाद्यैर् अधिरोहयन्ति // avc_115 //

ते धर्मपालाः शुभकीर्तियुक्ता लक्ष्म्यालयाः श्रीगुणसौख्यवन्तः / देवाधिराजा मनुजाधिपाश् च संबोधिचर्याभिरता भवन्ति // avc_116 //

संगीतवाद्यैः सुमनोज्ञशब्दैः शङ्खादिमाङ्गल्यमहानुरावैः / वीणादिभिर् वंशमनोज्ञघोषैर् महोत्सवं ये वितरन्ति चैत्ये // avc_117 //

ते दिव्यकर्णाः सुमनोज्ञवाक्याः सौन्दर्यरूपाः परिशुद्धचित्ताः / महर्द्धिमन्तः सुगताभिभक्ता मर्त्यामरेन्द्राः सततं भवन्ति // avc_118 //

नृत्यैः सुलास्यैः सुमनोज्ञभावैर् ये चैत्यबिम्बं सरसा भजन्ति / ते पापदुष्टग्रहरोगमुक्ताः पुण्या गुणार्थानुगता भवन्ति // avc_119 //

ये चापि दुष्टान् अभिखेटयन्तो रक्षन्ति चैत्यं सततं मनुष्याः / ते भाग्यवन्तो निरुजाः सुवंशाः सौख्यं प्रभुक्त्वा प्रसरन्ति स्वर्गम् // avc_120 //

सदूर्वकुन्दाक्षतलाजकादि प्राक्षिप्य चैत्यं प्रणमन्ति ये च / विद्याधिपास् ते सुसमृद्धिमन्तो गच्छन्ति चान्ते सुगतालये ऽपि // avc_121 //

ये वज्रमुक्तादिविशुद्धरत्नं हेमादिसद्द्रव्यवराष्टधातून् / ये चैत्यबिम्बे सरसा मनुष्याः श्रद्धानुरक्ता उपढौकयन्ति // avc_122 //

पूर्णेन्द्रियाः पूर्णमनोरथास् ते निर्नष्टशोकाः सुभगाः सुवंशः / धर्मार्थकामाः सुगुणाभिरामाः संबुद्धमार्गाभिगता भवन्ति // avc_123 //

ये शुद्धचित्ताः स्तुतिभिः सुगीतैर् भजन्ति चैत्यं मनुजाः प्रसन्नाः / धर्मार्थकामाभिमतर्द्धिमन्तो भवन्ति नाथा दिवि भूतले ते // avc_124 //

ये ऽष्टाभिर् अङ्गैः प्रणमन्ति चैत्यं श्रद्धाप्रसन्नाः शरणं प्रयाताः / भूपाधिपास् ते वरसप्तरत्नैर् युक्ताः सुधीराः कृतिनो भवन्ति // avc_125 //

प्रदक्षिणीकृत्य मुदा प्रसन्ना ये चैत्यबिम्बं प्रणता भ्रमन्ति / सुवर्णवर्णाः सुविशालवंशाः पूज्या नृपाणाम् अपि ते भवन्ति // avc_126 //

शुद्धाश्मसंक्षारसुगन्धितोयैश् चैत्यं मुदा ये ऽभ्यनुलेपयन्ति / नीरोगशोकाः सुसमृद्धिमन्तो दीर्घायुषस् ते सुभगा भवन्ति // avc_127 //

चैत्याङ्गनं ये परिशोधयन्ति निर्माल्यम् उद्धृत्य च मार्जयन्ति / ते हेमवर्णाः परिशुद्धचित्ता धर्माभिरक्ताः सुदृशो भवन्ति // avc_128 //

आलस्येनापि च स्तूपे करोति यः प्रदक्षिणाम् / पदे पदे सुवर्णैककर्षदानफलं लभेत् // avc_129 //

गन्धपुष्पादिभिर् विप्रैर् अर्चनीयं जिनालयम् / छत्त्रावरोहणं चैत्ये कर्तव्यं क्षत्रियैर् अपि // avc_130 //

ध्वजावरोपणं वैश्यैः कृत्यं पताकया सह / नैवेद्यम् एव शूद्रैस् तु दातव्यं चैत्यपुंगवे // avc_131 //

अन्यैर् विहीनजातीभिर् नार्चनीयो जिनालयः / धूपदीपादिभिर् नैव पूजनीयो न चान्यथा // avc_132 //

मूलस्कन्धपत्त्रफलस्तम्बशस्यादिभिस् तथा / धान्यादिव्रीहिभिश् चैवम् औषधीभी रसायनैः // avc_133 //

तथा वाद्यैः सुगीतैश् च नृत्यैश् चापि महोत्सवैः / हाहाकारैः समुल्लासैर् अर्चनीयो जिनालयः // avc_134 //

चर्मकारप्लवम्लेच्छनियोगिलुब्धकादिभिः / दूरात् प्रदक्षिणीकृत्य वन्द्य एव जिनालयः // avc_135 //

एवं सर्वैस् तथा लोकैर् द्विजादिसर्वजातिभिः / स्वस्वजात्यर्हपूजाभिः पूजनीयो जिनालयः // avc_136 //

एवं चरन्ति ये लोका अहोरात्रव्रतं मुदा / ते सर्वपापनिर्मुक्ताः संप्रयायुर् जिनालयम् // avc_137 //

एवं मत्वा महाराज मासे मासे सदापि च / पूर्णमास्याम् अहोरात्रव्रतं चरितुम् अर्हसि // avc_138 //

विशेषाद् अश्विनीमासे संपूर्णे चन्द्रमण्डले / अश्विनीभे तथा पुष्ययोगयुक्ते रवेर् दिने // avc_139 //

एतद्योगसमायुक्ते महापर्वदिने शुभे / अहोरात्रव्रतं कुर्याद् यथाविधि समाहितः // avc_140 //

यः करोति दिने तस्मिन्न् अहोरात्रव्रतं तथा / तत्सहस्रगुणं पुण्यम् आप्नुयात् स पुमान् ध्रुवम् // avc_141 //

एवं राजन्न् अहोरात्रव्रतपुण्यं महत्तरम् / अप्रमेयम् असंख्येयम् इति बुद्धैर् निगद्यते // avc_142 //

न हि स विद्यते राजन् सर्वत्र भुवनेष्व् अपि / अहोरात्रव्रतोत्पन्नं पुण्यं यः कुरुते ऽन्यथा // avc_143 //

यस्य श्रवणमात्रेण विमुक्तः सर्वपातकात् / दर्शनात् पुण्यम् आप्नोति तथानुमोदनाद् अपि // avc_144 //

ये चरन्ति महाराज व्रतराजम् इदं तथा / तेषां पुण्यप्रमाणानि संख्यातुं को हि शक्नुयात् // avc_145 //

तत्पुण्यसप्तभागैकं भागं राजा समाप्नुयात् / तथैकं सर्वसत्त्वाश् च तथैकं साधका जनाः // avc_146 //

व्रतिनस् तच्चतुर्भागान् सर्वान् ते प्राप्नुवन्ति हि / एतत्पुण्यानुभावैस् तु सर्वत्र मङ्गलं सदा // avc_147 //

सर्वे सत्त्वाः सुखाढ्याश् च भवन्ति बोधिचारिणः / एवं विज्ञाय राजेन्द्र लोकानां हितसाधनम् / अहोरात्रव्रतं यूयं कर्तुम् अर्हथ सर्वथा // avc_148 //

इति तेन समाख्यातं धीमता वसुबन्धुना / श्रुत्वा स इन्द्रपृष्टस् तद् व्रतं कर्तुं समैच्छत // avc_149 //

अथ स भूपतिः श्रीमान् इन्द्रपृष्टो नराधिपः / साञ्जलिस् तं पुनर् नत्वा वसुबन्धुं तथार्थयत् // avc_150 //

भदन्त सर्वविच् छास्तर् भवदाज्ञां शिरोवहन् / अहोरात्रव्रतं कर्तुम् इच्छामि सांप्रतं खलु // avc_151 //

भवाञ् छास्ता महाविज्ञः सर्वसत्त्वहिताशयः / सर्वहितार्थसिद्ध्यै तद् अनुज्ञां प्रददातु मे // avc_152 //

इति तेन नृपेन्द्रेण प्रार्थितं स महामतिः / वसुबन्धुः समाकर्ण्य तं भूपम् एवम् अब्रवीत् // avc_153 //

साधु साधु महाराज यद्य् एवं त्वं समिच्छसि / तत् कुरुष्व महत्पुण्यम् अहोरात्रव्रतं मुदा // avc_154 //

तत्कृते ते महत् पुण्यं सर्वत्रापि भवेच् छुभम् / एतत्पुण्यविपाकेन संबोधिं प्राप्नुया अपि // avc_155 //

इति शास्त्रा समादिष्टम् इन्द्रपृष्टः स भूपतिः / श्रुत्वा तं साञ्जलिर् नत्वा पुनर् एवं समब्रवीत् // avc_156 //

भदन्त कर्तुम् इच्छामि पुण्यक्षेत्रे जिनालयम् / कुत्र पुण्यतमं क्षेत्रं तत् समादेष्टुम् अर्हति /1151 //

इति तेन नरेन्द्रेण पृष्टे स सर्ववित् सुधीः / वसुबन्धुर् नरेन्द्रं तं पुनर् एवम् उपादिशत् // avc_158 //

शृणु साधो महाराज यथा ख्यातं मुनीश्वरैः / तथाहं ते प्रवक्ष्यामि श्रुत्वैवं कर्तुम् अर्हसि // avc_159 //

वाराणसीति विख्याता सर्वभूमी महत्तरी / पुण्यक्षेत्रं महापीठं सर्वबुद्धैः प्रशंसितम् // avc_160 //

तत्र यत् प्रणिधानेन प्रकृतं कर्म कारितम् / तत् तथेह परत्रापि सिध्यते नान्यथा खलु // avc_161 //

इति विज्ञाय राजेन्द्र तत्र गत्वा यथाविधि / प्रतिष्ठाप्य तथा चैत्यम् अहोरात्रव्रतं चरेः // avc_162 //

तथा चेत् ते सदा भद्रम् इहामुत्र भवेद् ध्रुवम् / क्रमाद् बोधिचरीः पूर्य संबुद्धपदम् आप्स्यसि // avc_163 //

इति तेन समादिष्टं गुरुणा वसुबन्धुना / श्रुत्वा स भूपतिः श्रीमांस् तथेति चान्वमोदत // avc_164 //

ततः स इन्द्रपृष्टस् तं वसुबन्धुं गुरुं पुरः / कृत्वा ततः समागत्य वाराणसीम् उपाचरत् // avc_165 //

तत्र प्राप्य स भूमीन्द्रो निरीक्ष्य शुभभूतले / आदौ भूशोधनं कृत्वा वास्तुनागं परीक्ष्य च // avc_166 //

विहारं विधिवत् कृत्वा तथा चैत्यं जिनालयम् / त्रिरत्नं च प्रतिष्ठाप्य यथाविधि सदाभजत् // avc_167 //

तत्र तेन यथादिष्टं गुरुणा वसुबन्धुना / तथा स नरराजेन्द्रस् तद् व्रतं कर्तुम् आरभत् // avc_168 //

ततश् च विधिवद् धृत्वा सभार्यः स नृपाधिपः / अहोरात्रव्रतं कृत्वा तच् चैत्यं विधिनार्चयत् // avc_169 //

तत् समाप्य पुनस् तत्र दीपंकरं ससांघिकम् / संनिमन्त्र्य यथार्हेन भोजनेन समार्चयत् // avc_170 //

ततः स पृथिवीपालश् चिरं तच् चैत्यम् आदरात् / सेवित्वा सत्सुखं भुक्त्वा ययौ चान्ते जिनालयम् // avc_171 //

इत्य् एवं तन् महत् पुण्यम् अहोरात्रव्रतोद्भवम् / अप्रमेयम् असंख्येयं सर्वबुद्धैः प्रचक्ष्यते // avc_172 //

तथा युष्माभिर् अप्य् अत्र तद् अहोरात्रसंवरम् / धृत्वा चैत्यं समभ्यर्च्य सेवितव्यं सदादरात् // avc_173 //

तथा वो मङ्गलं नित्यम् इहामुत्र भवेद् ध्रुवम् / क्रमाद् बोधिं समासाद्य निर्वृतीपदम् आप्स्यथ // avc_174 //

इत्य् आदिष्टं मुनीन्द्रेण श्रुत्वा ते भिक्षवो मुदा / तथेत्य् अभ्यनुमोदित्वा तद् व्रतं कर्तुम् ईषिरे // avc_175 //

ततस् ते भिक्षवो भूयः शास्तारं तं मुनीश्वरम् / कृताञ्जलिपुटा नत्वा पप्रच्छुर् एवम् आदरात् // avc_176 //

भगवन् भवतादिष्टम् इन्द्रपृष्टेन यत् कृतम् / तत् सर्वं श्रुतम् अस्माभिः पुनः श्रोतुं समिष्यते // avc_177 //

केन केन तथा पूर्वं कृतम् एतद् व्रतोत्तमम् / अहोरात्रं महत्पुण्यं तत् समादेष्टुम् अर्हति // avc_178 //

इति तैर् भिक्षुभिः पृष्टे भगवान् स मुनीश्वरः / तान् भिक्षून् सांघिकान् सर्वान् समालोक्यैवम् अब्रवीत् // avc_179 //

शृणुध्वं भिक्षवः सर्वे तथान्यैश् च कृतं पुरा / तत् सर्वं कथयिष्यामि युष्माकं परिबोधने // avc_180 //

पुरा स्वर्गे तथेन्द्रेण प्रतिष्ठाप्य जिनालयम् / अहोरात्रव्रतं कृत्वा विधिवच् चैत्यम् आर्चयत् // avc_181 //

एतत्पुण्यानुभावैः स सर्वपारमिताः क्रमात् / पूरयित्वा महासत्त्वो बोधिसत्त्वो ऽभवत् सुधीः // avc_182 //

{ए अद्द्स्: ततो ऽन्यः देवराजो ऽभुत् कालेन समयेन स / देवराजसुखं भुक्त्वा चरत्य् अस्मिन् यथेच्छया // avc_182* //}

पाताले च महावीरो दैत्येन्द्रो ऽभून् महर्द्धिमान् / निर्घोषदमनो नाम देवलोकभयंकरः // avc_183 //

तेन जित्वा बलेनापि त्रैलोक्यं स्ववशीकृतम् / सर्वे ऽपि लोकपालाश् च पराजित्य वशीकृताः // avc_184 //

तदा स पृथिवीं गत्वा वाराणसीम् उपाचरत् / इन्द्रपृष्टविहारस्थं चैत्यं दृष्ट्वान्वमोदत // avc_185 //

ततः प्रदक्षिणीकृत्य तं चैत्यं विधिनार्चयत् / कृताञ्जलिपुटो भुत्वा प्रार्थयद् एवम् आनतः // avc_186 //

यावज्जीवं सुखं भुक्त्वा संस्थाप्य स्ववशे जगत् / संबुद्धशरणं गत्वा प्रान्ते यायां जिनालयम् // avc_187 //

इत्य् एवं प्रणिधिं धृत्वा नत्वा तं च जिनालयम् / तत एव ययौ स्वर्गं दैत्येन्द्रः स महर्द्धिकः // avc_188 //

तत्रापि चैत्यम् आलोक्य शक्रेण स्थापितं पुरा / नत्वा प्रदक्षिणीकृत्य विधिना च समार्चयत् // avc_189 //

तथैव प्रणिधिं कृत्वा नत्वा च साञ्जलिर् मुदा / ततश् च स समागत्य पाताले स्वं गृहं ययौ // avc_190 //

{e has the following addition after 190 b on folio 13. एतत्पुण्यानुभावेन दैत्येन्द्रो ऽसौ महर्द्धिकः / शक्रासनं तदा तत्र लब्धवान् विग्रहैर् बलैः // avc_190* //

तदास देवराजेन्द्रः संज्ञात्वाहो तम् आगतम् / इदानीं किंप्रकारेण विजयिष्यामि दानवं / ममाश्रमेषु निर्घोषदमनो नामासौ स्थितः // avc_190** //

इति ध्यात्वा स शक्रः भुवने त्रायस्त्रिंशके / प्राक्तनैर् देवराजेन्द्रैः पूजार्थं चैत्यं स्थापितः // avc_190*** //

तस्मिन् चैत्ये अहोरात्रव्रतं कुर्यां यथाविधिः / तदुपायेन धर्मेण विजयिष्ये सुरद्विषं // avc_190**** //

श्रुतं मयास्ति सद्धर्मं तद् एषो ऽपि च तद्व्रतैः / स्वर्गे सुरसहायेन गतो ऽसौ मघवंउइईं // avc_190***** //

तदनन्तरे च देवेन्द्रः महार्हेण व्रतार्चनं / अतीव सुसमुदायेन कृतवाञ् च जिनालये // avc_190****** //

तदनन्तरे ऽपि निर्घोषदमनो ऽसुरनिर्जितः / विना युद्धेन निर्जित्यासुरं भूम्यवतारितः // avc_190******* //}

तत्र स दैत्यराजेन्द्रो यथाविधि जिनालयम् / महच् चैत्यं प्रतिष्ठाप्य सत्कृत्य विधिनार्चयत् // avc_191 //

ततश् चापि स दैत्येन्द्रो यथाविधि समारभन् / अहोरात्रव्रतं धृत्वा तच् चैत्यं समपूजयत् // avc_192 //

तत्रैवं प्रणिधिं कृत्वा सो ऽसुरेन्द्रो महामतिः / सर्वदा विधिनाभ्यर्च्य भेजे नित्यं महोत्सवैः // avc_193 //

तथा स सुचिरं भुक्त्वा यावज्जीवं महासुखम् / तच् चैत्यं शरणं कृत्वा ययौ तथा जिनालयम् // avc_194 //

तथान्ये नागराजाश् च तच् चैत्यं समुपाश्रिताः / अहोरात्रव्रतं धृत्वा सत्कृत्य विधिनार्चयन् // avc_195 //

तथा सर्वे ऽपि ते नागा यावज्जीवं महत् सुखम् / भुक्त्वा पुण्यानुभावैश् च प्रान्ते ययुर् जिनालयम् // avc_196 //

तथाभून् मगधे देशे चैत्यगर्भं महत् सरः / शुद्धाम्बुपूरितं पद्मकुमुदादिप्रशोभितम् // avc_197 //

तत्रर्षयः सरोमध्ये प्रतिष्ठिते जिनालये / अहोरात्रव्रतं धृत्वा सत्कृत्य विधिनार्चयन् // avc_198 / तथा तैर् ऋषिभिश् चैत्यं पूजितं तत्सरःस्थिताः / नागकन्याः समीक्ष्याष्टौ तदन्तिकम् उपाश्रयन् // avc_199 //

तत्र त ऋसयस् तासां सविषश्वासवायुभिः / प्रहता विषसंदिग्धाः क्षणमात्रं मुमूर्छिरे // avc_200 //

ततस् त ऋषयः सर्वे क्षणात् प्राप्तसुचेतनाः / दृष्ट्वा ताः समुपासीना नागकन्या रुषाशपन् // avc_201 //

अरे दुष्टाः सुपापिन्यो यद् युष्माकं विषानलैः / तापिताः स्मस् तदपुण्यैर् यूयं भवत शम्बुकाः // avc_202 //

इति तैर् ऋषिभिः सर्वैः शापितास् त भयान्विताः / सर्वान् ऋषिवरान् नत्वा प्रार्थयन्न् एवम् आदरात् // avc_203 //

नमो वो ऽस्तु महाविज्ञाः क्षमध्वं नो ऽपराधताम् / तच्छापमोचनोपायं समुपदेष्टुम् अर्हथ // avc_204 //

इति संप्रार्थितं ताभिर् निशम्य ते महर्षयः / करुणाक्रान्तचित्तास् ताः समालोक्यैवम् अब्रुवन् // avc_205 //

शृणुध्वं शम्बुका यूयम् उपायं शापमुक्तये / अस्माभिर् देशितं श्रुत्वा तथा चरत सादरम् // avc_206 //

चैत्यबिम्बं समालम्ब्य तद् अनुस्मृत्य चेतसा / सदा प्रदक्षिणां कृत्वा भ्रमित्वा भजतादृताः // avc_207 //

तदा तत्पुण्यभावेन सर्वपापविमोचिताः / परिशुद्धाशया भद्रा भविष्यथ नृपात्मजाः // avc_208 //

तदापि हि तथा यूयं चैत्यसेवासमाहिताः / सद्धर्मसाधनं कृत्वा प्रयास्यथ जिनालयम् // avc_209 //

इति तैर् ऋषिभिः सत्यं समादिष्टं निशम्य ताः / शम्बुकास् तान् ऋषीन् नत्वा ततो ऽगच्छन् निजालयम् // avc_210 //

ततस् ताः शम्बुकाः सर्वाः शालिक्षेत्रम् उपासृताः / चैत्यबिम्बम् अनुस्मृत्य प्रविचेरुः समन्ततः // avc_211 //

तत्र विच्छिन्नशेषांशं शालिस्तम्बं विलोक्य ताः / चैत्याकारं समालम्ब्य संस्मृत्वा सुगतालयम् // avc_212 //

सदा प्रदक्षिणीकृत्य प्रणत्वा च मुहुर् मुहुः / चैत्यानुस्मृतिम् आधाय भ्रमित्वा संप्रभेजिरे // avc_213 //

तत्र ताः शम्बुकाः सर्वास् तत्पुण्यपरिशोधिताः / तच्छापपरिमुक्त्यर्थं चैत्यं स्मृत्वा प्रचेरिरे // avc_214 //

कदा चित् तत्र मत्स्यार्थी धीवरः क्रूरमानसः / तत्सरसि स्थितान् मीनान् समाहर्तुम् उपाचरत् // avc_215 //

तत्र स धीवरो दृष्ट्वा मीनाहरणलालसः / तीरस्थो जालम् उत्क्षिप्य मीनान् आहर्तुम् उद्ययौ // avc_216 //

तत्र जाले प्रतिक्षिप्ते शम्बुका दैवयोगतः / सर्वा अपि प्रविष्टास् ता न तु मत्स्यो हि कश् चन // avc_217 //

ततः स जालम् आकृष्य प्रविसार्य विलोकयन् / ददर्श शम्बुका एव तत्र मत्स्यं न कं चन // avc_218 //

अथ सो ऽप्राप्तमत्स्यस् ताः शम्बुका एव लुब्धकः / आदाय परिखिन्नात्मा स्वगृहं शनकैर् ययौ // avc_219 //

तत्र स स्वगृहप्राप्तो विषन्नास्यो निराशितः / पत्न्याः सुन्दरिकायास् ताः शम्बुकाः पुरतो ऽर्पयत् // avc_220 //

ततः स धीवरो ऽन्यत्र मीनान् आहर्तुम् उद्यतः / भुक्त्वाहारं यथाप्राप्तं जालम् आदाय निर्ययौ // avc_221 //

ततः सा धीवरी दृष्ट्वा शम्बुकास् ताः पुरो ऽर्पिताः / बुभुक्षितानुपश्यन्ती निःश्वसन्त्य् एवम् आलपत् // avc_222 //

हा कष्टं किं करोम्य् अद्य भोज्यं किं चिन् न मे गृहे / कः क्रीणीयाद् इमाः शुक्तीर् जीवेयं कथम् अत्र हि // avc_223 //

तद् इमाः शम्बुकाः सर्वाः पक्त्वा भुञ्ज्याम् इहाधुना / एतदाहारमात्रेण यापयेयं न चान्यथा // avc_224 //

इति निश्चित्य सा नारी सर्वास् ताः शम्बुका अपि / रसैर् युताः स्वयं पक्त्वा बुभुजे जीवितार्थिनी // avc_225 //

ततस् ताः शम्बुकाः सर्वा दैवयोगानुचारिणः / तस्या एवोदरे याता बभूवुर् एकपिण्डिताः // avc_226 //

ततः सापन्नसत्त्वाभूत् प्रवृद्धगर्भभारिणी / दिने दिने ऽभिरुष्टाङ्गी स्वल्पाहाररता कृशा // avc_227 //

ततः सा समये ऽसूत कन्यका ह्य् अष्ट सुन्दरीः / एकनाडीसमुद्भूताः समाकाराः शुभांशिकाः // avc_228 //

तत्र सा जननी दृष्ट्वा ह्य् अष्ट ताः सुन्दरीः शिशूः / समाकाराः सुभद्राङ्गीः पश्यन्ती विस्मयं ययौ // avc_229 //

ततः स जनकः श्रुत्वा जाता ह्य् अष्ट सुता इति / विस्मितः सहसोपेत्य पश्यंस् तस्थौ सुनिश्चलः // avc_230 //

ततस् ता दारिकाः सर्वास् तया मात्राभिपालिताः / प्रवर्धिताः प्रपुष्टाङ्गा रुरुचुः पङ्कजा इव // avc_231 //

ततस् ताः कन्यकाः सर्वाः पूर्वपुण्यानुभाविकाः / प्रीतिविश्रम्भसंबुद्धा धर्मार्थाभिरताशयाः // avc_232 //

स्वकुलवृत्तिसंत्रस्ता दयार्द्राः करुणान्विताः / त्रिरत्नदर्शनोत्साहसमन्विताः प्रचेरिरे // avc_233 //

अथ माता समाहूय ताः सर्वाः कन्यका अपि / मत्स्यानां विक्रयार्थेन प्रैरयत् पण्यवीथिकाम् // avc_234 //

ततस् ताः कन्यकाः सर्वा आदाय मत्स्यभाजनम् / विक्रेतुं संचरन्त्यस् तत्पुरमार्गम् उपाचरन् // avc_235 //

तत्र ताः क्रमतो गत्वा मार्गादूरसरित्तटे / क्षणं विश्रम्य सर्वास् तद् आलोक्यैव समाश्रयन् // avc_236 //

तत्र तासां प्रधान या ज्येष्ठा सा भगिनी सुधीः / ताः सर्वा भगिनीर् दृष्ट्वा समामन्त्र्यैतद् अब्रवीत् // avc_237 //

भगिन्यो यत् पुरास्माभिः पातकं दारुणं कृतम् / तेनात्र साम्प्रतं जाताश् चण्डालस्य कुले वयम् // avc_238 //

इति सत्यं परिज्ञाय विरम्य पापकर्मतः / धर्मार्थसाधने रन्तुम् अर्हामहे वयं सदा // avc_239 //

इहापि चेत् तथास्माभिः क्रियते पापसाधनम् / भूयो ऽपि नरके लग्ना दुःखं भुक्त्वा चरेमहि // avc_240 //

कदा वयं ततो मुक्ताः सुखं लप्स्यामहे कथम् / सदैवं दुर्गतौ जाताः पापेष्व् एव चरेमहि // avc_241 //

पुण्यैर् विना न मानुष्ये जन्म संप्रप्स्यते क्व चित् / मानुष्ये ऽलभ्यमाने तु कुत्र धर्मे मतिश् चरेत् // avc_242 //

विना धर्ममतिं भद्रे चरितुम् उत्सहेत् कथम् / विना भद्रचरिं लोके सद्गतिं कथम् आप्नुयात् // avc_243 //

सुगतौ च सदा सौख्यं विना धर्मैर् न लप्स्यते / तस्माद् धर्मे मतिं धृत्वा चरितव्यं शुभे सदा // avc_244 //

शुभेन सद्गतिं याताः पापेन दुर्गतिं गताः / सुखदुःखानि संभुक्त्व भ्रमन्ति जन्तवो भवे / तद् इतः सद्गतिं प्राप्तुं चरेमहि शुभे सदा // avc_245 //

किं चाप्य् एता वयं सर्वाश् चण्डालकुलसंभवाः / तत् कथं कुलवृत्तिं नु त्यक्त्वा चरेमहि शुभे // avc_246 //

यद् वयं प्रेरिता मात्रा मत्स्यान् विक्रयितुं खलु / तस्मान् मातुर् वचो ऽश्रुत्वा चरेमह्य् अन्यथा कथम् // avc_247 //

यद्य् अत्रैतान् अविक्रीय प्रक्षिप्त्वा च जलाशये / रिक्तहस्ताः कथं गेहे मातुः पुरो व्रजेमहि // avc_248 //

यद् भोग्यं नो गृहे नास्त्य् एतद् एव हि जीवनम् / तत् किं सा जननी भुञ्ज्याद् विनाहारं न जीवति // avc_249 //

तद् अत्र किं करिष्यामो धिग् जन्म मानुषे ऽपि नः / वरं प्राणपरित्यागं न तु पापार्थसाधनम् // avc_250 //

सर्वेषाम् अपि जन्तूनाम् अवश्यं मरणं भवे / इति मत्वात्र सम्सारे वर्तयेम शुभे सदा // avc_251 //

तद् अत्र जीविनो मत्स्यान् प्रक्षिप्यैताञ् जलाश्रये / निर्जीवान् एव विक्रीय मूल्यं मातुर् ददीमहि // avc_252 //

यद्य् एवं क्रियते ऽस्माभिः पपं नो विद्यते न हि / किं चित् पुण्यं तु विद्येत तस्मात् कुर्यामहे तथा // avc_253 //

इत्य् अत्र मे वचः श्रुत्वा तत् कर्तुम् अनुमोदत / मात्र शरिकाविषादत्वं कर्तुम् अर्हामहे खलु // avc_254 //

एतत् तया समाख्यातं श्रुत्वा ताः परिबोधिताः / तथेत्य् अभ्यनुमोदित्वा तद् अनुकर्तुम् ईषिरे // avc_255 //

ततस् ताः कन्यकः सर्वास् तेषां ये जीविनो झषाः / तान् सर्वान् सहसादाय प्राक्षिपंस् तत्सरिज्जले // avc_256 //

यावन्तो निर्गतप्राणास् तान् एव सकलान् अपि / आदाय ताः पुरे गत्वा व्यक्रीणन्त यथोचितम् // avc_257 //

ततस् तत् पणम् आदाय सर्वास् ताः कन्यका मुदा / गृहम् आगत्य तन् मूल्यं सर्वं मातुः समर्पयन् // avc_258 //

एवं तया जनन्या ताः कन्यकाः प्रेरितास् तथा / सजीवांस् ताञ् जले क्षिप्त्वा निर्जीवैः पणम् आददुः // avc_259 //

एवं ताः सर्वदा नित्यं कृत्वा भुक्त्वा विनोदिताः / तद्वृत्तिसंपरित्रस्ताः पापशङ्का विषेदिरे // avc_260 //

कस्मिंश् चिद् दिवसे सर्वा मात्रा ताः प्रेरितास् तथा / मीनान् विक्रेतुम् आदाय निगमे समुपाचरन् // avc_261 //

तत्रासन् दैवयोगात् ते मीनाः सर्वे सजीविताः / तान् सर्वाञ् जीवितान् दृष्ट्वा सर्वास् ता विस्मयं ययुः // avc_262 //

तत्र ताः कन्यकाः सर्वाः समालोक्य परस्परम् / कथम् अद्यात्र कुर्याम इत्य् उक्त्वैवावतस्थिरे // avc_263 //

तत्र तासां प्रधाना सा कन्या शुद्धाशया सुधीः / ताः सर्वा भगिनीर् दृष्ट्वा समाश्वास्यैवम् अब्रवीत् // avc_264 //

भगिन्यो यद् इमे मीनाः सर्वे ऽपि जीविनः खलु / तत् कथं जीविनो ऽप्य् अत्र विक्रीणीमहि सांप्रतम् // avc_265 //

तस्मात् सर्वान् इमान् मत्स्यान् प्रक्षिप्त्वात्र सरिज्जले / त्रिरत्नस्मरणं कृत्वा तिष्ठेमात्रैकवासरम् // avc_266 //

यदि गृहे गमिष्यामो रिक्तहस्ता विना पणम् / माता रुष्टा परिक्रुश्य सर्वा नस् ताडयेत् खलु // avc_267 //

यच् चाप्य् अद्य गृहे किं चिद् भोज्यं न विद्यते क्व चित् / तत् किं मातान्नम् अश्नीयाद् बुभुक्षिता चरेत् क्रुधा // avc_268 //

अस्मभ्यं चापि किं दद्याद् अन्नं पानं च कोपिता / परिभाष्य मुहुर् बाला अपि निष्कासयेद् गृहात् // avc_269 //

तद् अद्य किं गृहे गत्वा सर्वा अपीह संगताः / त्रिरत्नस्मरणं कृत्व तिष्ठेमहि दिनान्ततः // avc_270 //

एतत् तयोदितं श्रुत्वा सर्वास् ता दारिका अपि / तथेति संमतं कृत्वा सर्वान् मीनाञ् जले ऽक्षिपन् // avc_271 //

तत्र ताः कन्यकाः सर्वः सरित्तटसमाश्रिताः / त्रिरत्नस्मरणं कृत्वा ध्यात्वा तस्थुः समाहिताः // avc_272 //

केन चित् कथितं तासाम् एतद्वृत्तिं निशम्य सा / माता क्रोधाग्निसंतप्ता वेगात् तत्र रुषाचरत् // avc_273 //

तत्र ता दारिकाः सर्वास् तथा स्थिता निरीक्ष्य सा / जननी सहसोपेत्य परिभाष्यैवम् अब्रवीत् // avc_274 //

अरे रे दुर्भगा बालाः किम् एवम् इह संस्थिताः / प्रदोषे ऽपि गृहे केन हेतुना न समागताः // avc_275 //

किम् एतान् सकलान् मीनान् अविक्रीय विमुञ्चथ / किं चिद् अन्नं गृहे नास्ति तत् किं भोक्ष्यामहे ऽधुना // avc_276 //

कस्योपदेशम् आकर्ण्य कुलधर्मनिरादराः / पित्रोर् अपि वचो ऽश्रुत्वा क्रीडथैवं तद् उच्यताम् // avc_277 //

एवम् उक्ते तया मात्रा सर्वास् ताः कन्यका अपि / अधोमुखस्थिताः किं चिद् अपि नोचुर् विषादिताः // avc_278 //

तथा स्थिताः स्वपुत्रीस् ता दृष्ट्वा सा जननी रुषा / सहसा समुपाक्रम्य लगुडेनाभ्यताडयत् // avc_279 //

ततः सा जननी दृष्ट्वा सर्वास् तास् त्रसिताननाः / बोधयित्वा प्रयत्नेन निनाय स्वगृहे निशि // avc_280 //

तत्र ताः कन्यकाः सर्वाः स्वगृहे संस्थिताः निशि / अभुक्त्वैकान्तम् आश्रित्य तस्थुः स्मृत्वा मुनीश्वरम् // avc_281 //

तत् परेद्युश् च सा माता हत्वापि जीविनो झषान् / दत्त्वा तान् दारिकास् ताश् च विक्रयायैरयत् पुरे // avc_282 //

मात्रा तथा कृतं मत्वा सर्वास् ताः कन्यका अपि / तत् कुकर्म इति ध्यात्वा तस्थुः पापविषादिताः // avc_283 //

तथा स्थिताश् च ताः सर्वा दृष्ट्वा सा जननी रुषा / बहुशः परिभाषित्वा प्रताड्य प्रैरयत् पुरे // avc_284 //

ततस् ता दारिकाः सर्वास् तत्ताडनरुजान्विताः / विषण्णास् ताञ् झषान् धृत्वा विक्रेतुं निर्ययुः शनैः // avc_285 //

ततस् ता निर्गताः सर्वास् तन्मार्गसरसीतटे / मातृताडनदुःखार्ता विश्रम्य क्षणम् आश्रयन् // avc_286 //

तत्र ताः कन्यकाः सर्वास् तत्पापपरिशोधने / त्रिरत्नस्मरणं कृत्वा तस्थुर् ध्यानसमाहिताः // avc_287 //

तत्पुण्यपरिशुद्धास् ता वालुकाभिः पृथक् पृथक् / चैत्यं निर्माय सत्कृत्य प्रतिष्ठाप्य प्रमोदिताः // avc_288 //

तत्रोत्पन्नानि पुष्पाणि फलानि च समन्ततः / आदाय तैः फलैः पुष्पैः स्वस्वचैत्यं समर्चयन् // avc_289 //

ततस् ताः प्राञ्जलिं धृत्वा कृत्वा प्रदक्षिणानि च / अष्टाङ्गप्रणतिं कृत्वा तस्थुर् ध्यानसमाहिताः // avc_290 //

तद्दिनान्ते ऽपि ताः सर्वा गृहे नैवागता इति / माता विचिन्त्य भर्तारं सहसा चैवम् अब्रवीत् // avc_291 //

स्वामिंस् ता दारिकाः सर्वा अद्यापि नागता गृहे / कुत्र गता इति द्रष्टुं गच्छ त्वं सहसानय // avc_292 //

एतत् पत्न्योदितं श्रुत्वा स चण्डालः प्रकोपितः / सहसा तत्सरस्तीरे गच्छन् सर्वा ददर्श ताः // avc_293 //

तत्र ताश् चैत्यम् अभ्यर्च्य स्थिताः सर्वा विलोक्य सः / पितातिकोपसंतप्तः सहसा संमुखो ऽचरत् // avc_294 //

तत्र ताः कन्यकाः सर्वा दृष्ट्वा तं संमुखागतम् / क्रोधसंतप्तरक्ताक्षं तस्थुर् ध्यानसमाहिताः // avc_295 //

तथा स्थिताः स आलोक्य सर्वास् ताः स्वात्मजा अपि / निर्दयो बहुधा भर्त्स्य लगुडेनाप्य् अताडयत् // avc_296 //

तथातिताडिताः सर्वा अपि ता न विचेरिरे / तत्पापत्रसिता एव तस्थुर् ध्यानसमाहिताः // avc_297 //

ततः स जनकः क्रूरः संताड्य परिभाष्य च / सर्वा आदाय तान् मीनान् सहसा तत्पुरे ऽचरत् // avc_298 //

तत्र विक्रीय तान् मीनान् अन्नम् आदाय सत्वरः / गृहे पत्न्याः पुरो गत्वा तच् चरित्रं न्यवेदयत् // avc_299 //

तत्र तत्ताडनोद्भूतदुःसहवेदनातुराः / भुव्य् आवर्त्य रुदन्त्यस् ताः सर्वास् तस्थुर् विमूर्छिताः // avc_300 //

तदन्तिकगिरेः सानौ निषण्णः करुणानिधिः / प्रत्येकबुद्ध आत्मज्ञः शुश्राव तद्विलापितम् // avc_301 //

तत्र स कृपया दृष्ट्या विलोकयन् समन्ततः / ताः सर्वा वेदनाक्रान्ताः समैक्षत विमूर्छिताः // avc_302 //

ततः प्रत्येकबुद्धः स कारुण्यचोदितः कृती / तद्देशं सहसोपेत्य तस्थौ सुधाकरोत्सृजन् // avc_303 //

सर्वास् तास् तत्सुधारश्मिपरिस्पृष्टाः सुखान्विताः / संप्राप्तचेतनाः सर्वाः प्राद्राक्षुस् तं यतीश्वरम् // avc_304 //

ततस् तास् तं मुनिं दृष्ट्वा विस्मयाक्रान्तमानसाः / को ऽयं मुनिर् इति ध्यात्वा सर्वास् तस्थुः प्रमोदिताः // avc_305 //

ततस् तासां प्रधाना या भगिनी सा विचक्षणा / ताः सर्वा भगिनीर् दृष्ट्वा समामन्त्र्यैवम् अब्रवीत् // avc_306 //

धन्या वयं तद् अद्य स्मो यद् अयं सौगतो मुनिः / कृपयास्मान् समुद्धर्तुं स्वयम् एव समागतः // avc_307 //

यद्य् अयं नागतो बुद्धः सुधारश्मिर् दयानिधिः / निस्त्राणा वयम् अत्रैव सर्वा मृत्युं व्रजेमहि // avc_308 //

धन्यो ऽयं सुगतो नाथः सर्वसत्त्वानुकम्पकः / को ह्य् अस्ति त्रिजगल्लोके बुद्धाद् अन्यो हितंकरः // avc_309 //

बुद्ध एव जगच्छास्ता सर्वभद्रार्थसाधकः / दुर्गतित्रायको नाथः सद्गतेर् मार्गदर्शकः // avc_310 //

तद् एतस्य वयं सर्वाः सर्वदा शरणं गताः / सत्कृत्य श्रद्धया भक्त्य यथाशक्ति भजेमहि // avc_311 //

ततो नूनं वयं सर्वाः सर्वपापविमोचिताः / परिशुद्धत्रिकाया हि सद्गतिं च व्रजेमहि // avc_312 //

एतत् तया समाख्यातं श्रुत्वा ताः परिबोधिताः / सर्वा अपि मुनेस् तस्य तथा भक्तुं समीषिरे // avc_313 //

ततस् ताः कन्यकाः सर्वाः श्रद्धाभक्तिसमन्विताः / यथाशक्ति मुनेस् तस्य सत्कारैः प्राभजन् मुदा // avc_314 //

ततस् ताः शरणं गत्वा कृताञ्जलिपुटा मुदा / त्रिधा प्रदक्षिणीकृत्य नत्वैवं प्रार्थयंस् तथा // avc_315 //

भगवन् नाथ सर्वज्ञ भवतां सर्वदा वयम् / शरणस्था यथादेशम् इच्छामश् चरितुं तथा // avc_316 //

तद् भवान् कृपया दृष्ट्या पश्यन्न् अस्मान् सुदुःखिताः / सर्वदापि तथा सर्वाः परित्रातुं समर्हति // avc_317 //

नान्यो नो विद्यते त्राता नाथो मित्रं सुहृद् गुरुः / भवान् एव गुरुः शास्ता सद्धर्मदेशकः प्रभुः // avc_318 //

तद् अस्मान् दुःखिनीः सर्वाः संपश्यन् करुणादृशा / बोधिमार्गे प्रतिष्ठाप्य सदैवं त्रातुम् अर्हति // avc_319 //

एतत् संप्रार्थितं ताभिः श्रुत्वा सो ऽर्हन् महामतिः / प्रत्येकसुगतो ज्ञात्वा तासां कर्मविपाकताम् // avc_320 //

तत आकाश उत्प्लुत्य स्थित्वा वह्निर् इवोज्ज्वलन् / तच्चित्तसंविनोदार्थं प्रातिहार्यम् अदर्शयत् // avc_321 //

तस्यैतत् प्रातिहार्यं ताः सर्वा दृष्ट्वा सविस्मयाः / सुप्रसन्नमुखाम्भोजाः सुलब्धबोधिमानसाः // avc_322 //

तत्र प्रदक्षिणीकृत्य कृताञ्जलिपुटा मुदा / अष्टाङ्गप्रणतिं कृत्वा बोधिप्रणिधिम् आदधुः // avc_323 //

यद् अस्माभिर् मुनेर् अस्य सत्कृतिः प्रकृता मुदा / एतत्पुण्यविपाकेन लब्ध्वा च जन्म सद्गतौ // avc_324 //

स्वपरात्महितं कृत्वा सर्वत्रापि शुभानि च / ईदृक्प्रत्येकसंबोधिं लब्ध्वा व्रजेम निर्वृतिम् // avc_325 //

एवं ताः कन्यकाः सर्वाः प्रणिधाय प्रसादिताः / तम् एव सुगतं नत्वा तस्थुर् ध्यानसमाहिताः // avc_326 //

एवं हृद्भावितं तासां मत्वा स सुगतस् ततः / आकाशात् सहसोपेत्य ता एवं समुपादिशत् // avc_327 //

भगिन्यः संप्रसीदध्वं यद् इतः सप्तमे ऽहनि / सर्वा यूयं सुभाविन्यः समं कालं गमिष्यथ // avc_328 //

ततो राजकुले जन्म वाराणस्यां शुभांशिकाः / लब्ध्वा यूयं समाचाराः सर्वाः शुभे चरिष्यथ // avc_329 //

तत्र यूयं समालोक्य संसारं क्लेशसंकुलम् / सर्वान् परिग्रहांस् त्यक्त्वा तपोवने रमिष्यथ // avc_330 //

तत्रापि च त्रिरत्नानि स्मृत्वा सदा समाहिताः / प्रत्येकां बोधिम् आसाद्य निर्वृतिपदम् आप्स्यथ // avc_331 //

एतन् मत्वा भगिन्यो ऽत्र सर्वा यूयं समाहिताः / त्रिरत्नभजनं कृत्वा चरत सर्वदा शुभे // avc_332 //

एतद् एवम् उपादिश्य स प्रत्येकजिनस् ततः / भासयन् खं समुत्प्लुत्य स्वाश्रमं सहसा ययौ // avc_333 //

तम् आकाशगतं दृष्ट्वा सर्वास् ताः कन्यका मुदा / प्रणत्वा सुप्रसादिन्यश् चिरेण स्वालये ऽचरन् // avc_334 //

तत्र ताश् चैत्यम् अभ्यर्च्य स्थिताः सप्तदिने मृताः / वाराणस्यां कृके रज्ञः सुता आसन् समानिकाः // avc_335 //

तासं या भगिनी ज्येष्ठा व्रतीति प्रतिश्रुता / द्वितीया धर्मवती ख्याता तृतीया शुभमञ्जरी // avc_336 //

चतुर्थी धीमती नाम्ना पञ्चमी नेत्रमञ्जरी / षष्ठी च श्रिमती ख्याता सप्तमी च मदंजहा // avc_337 //

अष्टमी रत्नमालाख्या इत्य् एता अष्टकन्यकाः / सुजाता नृपतेः पुत्र्यः समाचाराः समाशयाः // avc_338 //

{e adds the following after vs. 338 and continues from 339 तत्र ताः धर्मवत्यादि सप्तकन्या शुभेचराः / क्लेशव्याकुलसंसारम् इत्य् आलोक्य परिग्रहान् / स्वान् स्वान् सर्वान् परित्यक्त्वा सर्वाः तपोवनं ययुः // avc_338* //

तत्रापि च त्रिरत्नानि सदा स्मृत्वा समाहिताः / प्रत्येकां बोधिम् आसाद्य निर्वृतिं ताः समाययुः // avc_338** //

तासं ज्येष्ठा स्वसा या तत् व्रतं प्रतिजन्म प्रचारिका / एतत्पुण्यानुभावेन सा कन्या रतिसंनिभा // avc_338*** //

धर्मशीला व्रती नाम्नी धर्मपत्तने पुरे वरे /}

तासां ज्येष्ठा प्रधाना या सा कन्या रतिसंनिभा / धर्मदक्षस्य भूपस्य भार्याभूद् धर्मचारिणी // avc_339 //

तदापि सा व्रती कन्या चैत्यसेवानुरागिणी / संबोधिचरणारागा संबुद्धगुणभाविनी // avc_340 //

तत्र सा कन्यका साध्वी कर्तुं चैत्यार्चनं मुदा / धर्मदक्षं पतिं नत्वा प्रार्थयद् एवम् आदरात् // avc_341 //

स्वामिन्न् इच्छाम्य् अहं कर्तुं चैत्यबिम्बार्चनं सदा / अहोरात्रव्रतं चापि तद् अनुज्ञां प्रदेहि मे // avc_342 //

इति तया सुभाविन्या भार्यया प्रार्थितं मुदा / श्रुत्वा स नृपतिर् दृष्ट्वा तां भार्याम् एवम् अब्रवीत् // avc_343 //

भद्रे साधुः समिच्छा ते यत् त्वयाहं प्रबोधितः / अहं चापि चरिष्यामि तथाहोरात्रसद्व्रतम् // avc_344 //

इत्य् उक्त्वा स महीपालो धर्मदक्षः प्रमोदितः / भार्यया सहसैच्छत् तद् अहोरात्रव्रतं वरम् // avc_345 //

ततः स नृपतिश् चैत्यं प्रतिष्ठाप्य यथाविधि / अहोरात्रव्रतं कृत्वा सभार्यस् तं समार्चयत् // avc_346 //

एवं तया सुभाविन्या भार्यया सह सर्वदा / धर्मदक्षो नरेन्द्रो ऽसौ चैत्यसेवारतो ऽभवत् // avc_347 //

ततस् तौ दम्पती चापि यावज्जीवं जिनार्चनम् / कृत्वा सौख्यं प्रभुक्त्वान्ते संजग्माते जिनालयम् // avc_348 //

एवं मत्वात्र यूयं च श्रद्धया सद्व्रतं मुदा / अहोरात्रव्रतं धृत्वा भजत चैत्यम् आदरात् // avc_349 //

एवं कृते हि वो भद्रम् इहामुत्र सदा भवेत् / क्रमाद् बोधिपदं प्राप्य गमिष्यथ जिनालयम् // avc_350 //

इति शास्त्रा मुनीन्द्रेण समादिष्टं निशम्य ते / भिक्षवो ऽपि तथा चैत्यं व्रतं धृत्वा प्रभेजिरे // avc_351 //

एवं मे गुरुणाख्यातं श्रुतं मया नराधिप / सर्वलोकहितार्थाय तवापि च प्रचक्ष्यते // avc_352 //

तथा त्वं च महाराज संबोधिपदलब्धये / अहोरात्रव्रतं धृत्वा चैत्यसेवारतो भव // avc_353 //

एतत्पुण्यानुभावैस् ते सर्वत्र मन्गलं भवेत् / सर्वदा सत्सुखं भुक्त्वा यायाश् चान्ते जिनालयम् // avc_354 //

{e adds the following between vss. 354 and 355. पुनस् च महरज धर्मं विना न मोक्षं च दानं विना न भुक्तवान् / श्रोतुं विना न सत्ज्ञानं तस्माद् धर्मादिकं चर //

सप्तजन्मकृतं पापं तेनैव नश्यते खलु / कुक्षेत्रे च कुगोत्रे च जननं न भविष्यति // avc_354* //}

इति तेनोपगुप्तेन शास्त्राख्यातं निशम्य सः / अशोकः सप्रजालोकस् तथेति प्राभ्यनन्दत // avc_355 //

ये चेदं शुद्धचित्ता जिनवरकथितं चैत्यसेवानुभावम् / शृण्वन्ति श्रावयन्ति प्रमुदितहृदयाः श्रद्धयाभिप्रसन्नाः / ते सर्वक्लेशमुक्ता जिनगुणनिरताः प्राप्तसंबोधिचित्ताः / शुद्धात्मानः सुधीराः सकलशुभकरा बुद्धलोके प्रयान्ति // avc_356 //

इत्य् अहोरात्रव्रतचैत्यसेवानुशंसावदानम् //

{श्वदानं अशोकपृच्छितं समाप्तं. शुभन् अस्तु जगतां. संवत् 32 आश्विने मासे ?कृष्णपक्षे लिख एतत् पम्. मुदा ए}