64. Duṭṭhullasikkhāpada (PLI-TV-BU-VB-PC64)

Theravāda Vinaya

Mahāvibhaṅga

Pācittiyakaṇḍa

Sappāṇakavagga

64. Duṭṭhullasikkhāpada

Tena samayena buddho bhagavā sāvatthiyaṁ viharati jetavane anāthapiṇḍikassa ārāme.

Tena kho pana samayena āyasmā upanando sakyaputto sañcetanikaṁ sukkavissaṭṭhiṁ āpattiṁ āpajjitvā bhātuno saddhivihārikassa bhikkhuno ārocesi—

“ahaṁ, āvuso, sañcetanikaṁ sukkavissaṭṭhiṁ āpattiṁ āpanno.

Mā kassaci ārocehī”ti.

Tena kho pana samayena aññataro bhikkhu sañcetanikaṁ sukkavissaṭṭhiṁ āpattiṁ āpajjitvā saṅghaṁ tassā āpattiyā parivāsaṁ yāci.

Tassa saṅgho tassā āpattiyā parivāsaṁ adāsi.

So parivasanto taṁ bhikkhuṁ passitvā etadavoca—

“ahaṁ, āvuso, sañcetanikaṁ sukkavissaṭṭhiṁ āpattiṁ āpajjitvā saṅghaṁ tassā āpattiyā parivāsaṁ yāciṁ, tassa me saṅgho tassā āpattiyā parivāsaṁ adāsi, sohaṁ parivasāmi, vediyāmahaṁ, āvuso, vediyatīti maṁ āyasmā dhāretū”ti.

“Kiṁ nu kho, āvuso, yo aññopi imaṁ āpattiṁ āpajjati sopi evaṁ karotī”ti?

“Evamāvuso”ti.

“Ayaṁ, āvuso, āyasmā upanando sakyaputto sañcetanikaṁ sukkavissaṭṭhiṁ āpattiṁ āpajjitvā so me āroceti mā kassaci ārocehī”ti.

“Kiṁ pana tvaṁ, āvuso, paṭicchādesī”ti?

“Evamāvuso”ti.

Atha kho so bhikkhu bhikkhūnaṁ etamatthaṁ ārocesi.

Ye te bhikkhū appicchā …pe… te ujjhāyanti khiyyanti vipācenti—

“kathañhi nāma bhikkhu bhikkhussa jānaṁ duṭṭhullaṁ āpattiṁ paṭicchādessatī”ti …pe…

“saccaṁ kira tvaṁ, bhikkhu, bhikkhussa jānaṁ duṭṭhullaṁ āpattiṁ paṭicchādesī”ti.

“Saccaṁ, bhagavā”ti.

Vigarahi buddho bhagavā …pe…

kathañhi nāma tvaṁ, moghapurisa, bhikkhussa jānaṁ duṭṭhullaṁ āpattiṁ paṭicchādessasi.

Netaṁ, moghapurisa, appasannānaṁ vā pasādāya …pe…

evañca pana, bhikkhave, imaṁ sikkhāpadaṁ uddiseyyātha—

“Yo pana bhikkhu bhikkhussa jānaṁ duṭṭhullaṁ āpattiṁ paṭicchādeyya, pācittiyan”ti.

Yo panāti

yo yādiso …pe…

bhikkhūti

…pe… ayaṁ imasmiṁ atthe adhippeto bhikkhūti.

Bhikkhussāti

aññassa bhikkhussa.

Jānāti nāma

sāmaṁ vā jānāti aññe vā tassa ārocenti, so vā āroceti.

Duṭṭhullā nāma āpatti

cattāri ca pārājikāni terasa ca saṅghādisesā.

Paṭicchādeyyāti

“imaṁ jānitvā codessanti, sāressanti khuṁsessanti, vambhessanti, maṅkuṁ karissanti nārocessāmī”ti dhuraṁ nikkhittamatte, āpatti pācittiyassa.

Duṭṭhullāya āpattiyā duṭṭhullāpattisaññī paṭicchādeti, āpatti pācittiyassa.

Duṭṭhullāya āpattiyā vematiko paṭicchādeti, āpatti dukkaṭassa.

Duṭṭhullāya āpattiyā aduṭṭhullāpattisaññī paṭicchādeti, āpatti dukkaṭassa.

Aduṭṭhullaṁ āpattiṁ paṭicchādeti, āpatti dukkaṭassa.

Anupasampannassa duṭṭhullaṁ vā aduṭṭhullaṁ vā ajjhācāraṁ paṭicchādeti, āpatti dukkaṭassa.

Aduṭṭhullāya āpattiyā duṭṭhullāpattisaññī, āpatti dukkaṭassa.

Aduṭṭhullāya āpattiyā vematiko, āpatti dukkaṭassa.

Aduṭṭhullāya āpattiyā aduṭṭhullāpattisaññī, āpatti dukkaṭassa.

Anāpatti—

“saṅghassa bhaṇḍanaṁ vā kalaho vā viggaho vā vivādo vā bhavissatī”ti nāroceti,

“saṅghabhedo vā saṅgharāji vā bhavissatī”ti nāroceti,

“ayaṁ kakkhaḷo pharuso jīvitantarāyaṁ vā brahmacariyantarāyaṁ vā karissatī”ti nāroceti,

aññe patirūpe bhikkhū apassanto nāroceti,

nachādetukāmo nāroceti,

“paññāyissati sakena kammenā”ti nāroceti,

ummattakassa,

ādikammikassāti.

Duṭṭhullasikkhāpadaṁ niṭṭhitaṁ catutthaṁ.