63. Ukkoṭanasikkhāpada (PLI-TV-BU-VB-PC63)

Theravāda Vinaya

Mahāvibhaṅga

Pācittiyakaṇḍa

Sappāṇakavagga

63. Ukkoṭanasikkhāpada

Tena samayena buddho bhagavā sāvatthiyaṁ viharati jetavane anāthapiṇḍikassa ārāme.

Tena kho pana samayena chabbaggiyā bhikkhū jānaṁ yathādhammaṁ nihatādhikaraṇaṁ punakammāya ukkoṭenti—

“akataṁ kammaṁ dukkaṭaṁ kammaṁ puna kātabbaṁ kammaṁ anihataṁ dunnihataṁ puna nihanitabban”ti.

Ye te bhikkhū appicchā …pe… te ujjhāyanti khiyyanti vipācenti—

“kathañhi nāma chabbaggiyā bhikkhū jānaṁ yathādhammaṁ nihatādhikaraṇaṁ punakammāya ukkoṭessantī”ti …pe…

“saccaṁ kira tumhe, bhikkhave, jānaṁ yathādhammaṁ nihatādhikaraṇaṁ punakammāya ukkoṭethā”ti?

“Saccaṁ, bhagavā”ti.

Vigarahi buddho bhagavā …pe…

kathañhi nāma tumhe, moghapurisā, jānaṁ yathādhammaṁ nihatādhikaraṇaṁ punakammāya ukkoṭessatha.

Netaṁ, moghapurisā, appasannānaṁ vā pasādāya …pe…

evañca pana, bhikkhave, imaṁ sikkhāpadaṁ uddiseyyātha—

“Yo pana bhikkhu jānaṁ yathādhammaṁ nihatādhikaraṇaṁ punakammāya ukkoṭeyya, pācittiyan”ti.

Yo panāti

yo yādiso …pe…

bhikkhūti

…pe… ayaṁ imasmiṁ atthe adhippeto bhikkhūti.

Jānāti nāma

sāmaṁ vā jānāti, aññe vā tassa ārocenti, so vā āroceti.

Yathādhammaṁ nāma

dhammena vinayena satthusāsanena kataṁ, etaṁ yathādhammaṁ nāma.

Adhikaraṇaṁ nāma

cattāri adhikaraṇāni— vivādādhikaraṇaṁ, anuvādādhikaraṇaṁ, āpattādhikaraṇaṁ, kiccādhikaraṇaṁ.

Punakammāya ukkoṭeyyāti

“akataṁ kammaṁ dukkaṭaṁ kammaṁ punakātabbaṁ kammaṁ anihataṁ dunnihataṁ puna nihanitabban”ti ukkoṭeti, āpatti pācittiyassa.

Dhammakamme dhammakammasaññī ukkoṭeti, āpatti pācittiyassa.

Dhammakamme vematiko ukkoṭeti, āpatti dukkaṭassa.

Dhammakamme adhammakammasaññī ukkoṭeti, anāpatti.

Adhammakamme dhammakammasaññī, āpatti dukkaṭassa.

Adhammakamme vematiko, āpatti dukkaṭassa.

Adhammakamme adhammakammasaññī, anāpatti.

Anāpatti—

“adhammena vā vaggena vā na kammārahassa vā kammaṁ katan”ti jānanto ukkoṭeti,

ummattakassa,

ādikammikassāti.

Ukkoṭanasikkhāpadaṁ niṭṭhitaṁ tatiyaṁ.