Malavagga (DHP235-255)

Khuddakanikāya

Dhammapada

Malavagga

Goghātakaputtavatthu

Paṇḍupalāsova dānisi,

Yamapurisāpi ca te upaṭṭhitā;

Uyyogamukhe ca tiṭṭhasi,

Pātheyyampi ca te na vijjati.

So karohi dīpamattano,

Khippaṁ vāyama paṇḍito bhava;

Niddhantamalo anaṅgaṇo,

Dibbaṁ ariyabhūmiṁ upehisi.

Upanītavayo ca dānisi,

Sampayātosi yamassa santikaṁ;

Vāso te natthi antarā,

Pātheyyampi ca te na vijjati.

So karohi dīpamattano,

Khippaṁ vāyama paṇḍito bhava;

Niddhantamalo anaṅgaṇo,

Na punaṁ jātijaraṁ upehisi.

Aññatarabrāhmaṇavatthu

Anupubbena medhāvī,

thokaṁ thokaṁ khaṇe khaṇe;

Kammāro rajatasseva,

niddhame malamattano.

Tissattheravatthu

Ayasāva malaṁ samuṭṭhitaṁ,

Tatuṭṭhāya tameva khādati;

Evaṁ atidhonacārinaṁ,

Sāni kammāni nayanti duggatiṁ.

Lāḷudāyīvatthu

Asajjhāyamalā mantā,

anuṭṭhānamalā gharā;

Malaṁ vaṇṇassa kosajjaṁ,

pamādo rakkhato malaṁ.

Aññatarakulaputtavatthu

Malitthiyā duccaritaṁ,

maccheraṁ dadato malaṁ;

Malā ve pāpakā dhammā,

asmiṁ loke paramhi ca.

Tato malā malataraṁ,

avijjā paramaṁ malaṁ;

Etaṁ malaṁ pahantvāna,

nimmalā hotha bhikkhavo.

Cūḷasāribhikkhuvatthu

Sujīvaṁ ahirikena,

kākasūrena dhaṁsinā;

Pakkhandinā pagabbhena,

saṅkiliṭṭhena jīvitaṁ.

Hirīmatā ca dujjīvaṁ,

niccaṁ sucigavesinā;

Alīnenāppagabbhena,

suddhājīvena passatā.

Pañcaupāsakavatthu

Yo pāṇamatipāteti,

musāvādañca bhāsati;

Loke adinnamādiyati,

paradārañca gacchati.

Surāmerayapānañca,

yo naro anuyuñjati;

Idheva meso lokasmiṁ,

mūlaṁ khaṇati attano.

Evaṁ bho purisa jānāhi,

pāpadhammā asaññatā;

Mā taṁ lobho adhammo ca,

ciraṁ dukkhāya randhayuṁ.

Tissadaharavatthu

Dadāti ve yathāsaddhaṁ,

yathāpasādanaṁ jano;

Tattha yo ca maṅku bhavati,

paresaṁ pānabhojane;

Na so divā vā rattiṁ vā,

samādhimadhigacchati.

Yassa cetaṁ samucchinnaṁ,

mūlaghaccaṁ samūhataṁ;

Sa ve divā vā rattiṁ vā,

samādhimadhigacchati.

Pañcaupāsakavatthu

Natthi rāgasamo aggi,

natthi dosasamo gaho;

Natthi mohasamaṁ jālaṁ,

natthi taṇhāsamā nadī.

Meṇḍakaseṭṭhivatthu

Sudassaṁ vajjamaññesaṁ,

attano pana duddasaṁ;

Paresaṁ hi so vajjāni,

opunāti yathā bhusaṁ;

Attano pana chādeti,

kaliṁva kitavā saṭho.

Ujjhānasaññittheravatthu

Paravajjānupassissa,

niccaṁ ujjhānasaññino;

Āsavā tassa vaḍḍhanti,

ārā so āsavakkhayā.

Subhaddaparibbājakavatthu

Ākāseva padaṁ natthi,

samaṇo natthi bāhire;

Papañcābhiratā pajā,

nippapañcā tathāgatā.

Ākāseva padaṁ natthi,

samaṇo natthi bāhire;

Saṅkhārā sassatā natthi,

natthi buddhānamiñjitaṁ.

Malavaggo aṭṭhārasamo.