Dhammaṭṭhavagga (DHP256-272)

Khuddakanikāya

Dhammapada

Dhammaṭṭhavagga

Vinicchayamahāmattavatthu

Na tena hoti dhammaṭṭho,

yenatthaṁ sāhasā naye;

Yo ca atthaṁ anatthañca,

ubho niccheyya paṇḍito.

Asāhasena dhammena,

samena nayatī pare;

Dhammassa gutto medhāvī,

“dhammaṭṭho”ti pavuccati.

Chabbaggiyavatthu

Na tena paṇḍito hoti,

yāvatā bahu bhāsati;

Khemī averī abhayo,

“paṇḍito”ti pavuccati.

Ekudānakhīṇāsavavatthu

Na tāvatā dhammadharo,

yāvatā bahu bhāsati;

Yo ca appampi sutvāna,

dhammaṁ kāyena passati;

Sa ve dhammadharo hoti,

yo dhammaṁ nappamajjati.

Lakuṇḍakabhaddiyattheravatthu

Na tena thero so hoti,

yenassa palitaṁ siro;

Paripakko vayo tassa,

“moghajiṇṇo”ti vuccati.

Yamhi saccañca dhammo ca,

ahiṁsā saṁyamo damo;

Sa ve vantamalo dhīro,

“thero” iti pavuccati.

Sambahulabhikkhuvatthu

Na vākkaraṇamattena,

vaṇṇapokkharatāya vā;

Sādhurūpo naro hoti,

issukī maccharī saṭho.

Yassa cetaṁ samucchinnaṁ,

mūlaghaccaṁ samūhataṁ;

Sa vantadoso medhāvī,

“sādhurūpo”ti vuccati.

Hatthakavatthu

Na muṇḍakena samaṇo,

abbato alikaṁ bhaṇaṁ;

Icchālobhasamāpanno,

samaṇo kiṁ bhavissati.

Yo ca sameti pāpāni,

aṇuṁthūlāni sabbaso;

Samitattā hi pāpānaṁ,

“samaṇo”ti pavuccati.

Aññatarabrāhmaṇavatthu

Na tena bhikkhu so hoti,

yāvatā bhikkhate pare;

Vissaṁ dhammaṁ samādāya,

bhikkhu hoti na tāvatā.

Yodha puññañca pāpañca,

bāhetvā brahmacariyavā;

Saṅkhāya loke carati,

sa ve “bhikkhū”ti vuccati.

Titthiyavatthu

Na monena munī hoti,

mūḷharūpo aviddasu;

Yo ca tulaṁva paggayha,

varamādāya paṇḍito.

Pāpāni parivajjeti,

sa munī tena so muni;

Yo munāti ubho loke,

“muni” tena pavuccati.

Bālisikavatthu

Na tena ariyo hoti,

yena pāṇāni hiṁsati;

Ahiṁsā sabbapāṇānaṁ,

“ariyo”ti pavuccati.

Sambahulasīlādisampannabhikkhuvatthu

Na sīlabbatamattena,

bāhusaccena vā pana;

Atha vā samādhilābhena,

vivittasayanena vā.

Phusāmi nekkhammasukhaṁ,

aputhujjanasevitaṁ;

Bhikkhu vissāsamāpādi,

appatto āsavakkhayaṁ.

Dhammaṭṭhavaggo ekūnavīsatimo.