Kodhavagga (DHP221-234)

Khuddakanikāya

Dhammapada

Kodhavagga

Rohinīkhattiyakaññāvatthu

Kodhaṁ jahe vippajaheyya mānaṁ,

Saṁyojanaṁ sabbamatikkameyya;

Taṁ nāmarūpasmimasajjamānaṁ,

Akiñcanaṁ nānupatanti dukkhā.

Aññatarabhikkhuvatthu

Yo ve uppatitaṁ kodhaṁ,

rathaṁ bhantaṁva vāraye;

Tamahaṁ sārathiṁ brūmi,

rasmiggāho itaro jano.

Uttarāupāsikavatthu

Akkodhena jine kodhaṁ,

asādhuṁ sādhunā jine;

Jine kadariyaṁ dānena,

saccenālikavādinaṁ.

Mahāmoggallānapañhavatthu

Saccaṁ bhaṇe na kujjheyya,

dajjā appampi yācito;

Etehi tīhi ṭhānehi,

gacche devāna santike.

Buddhapitubrāhmaṇavatthu

Ahiṁsakā ye munayo,

niccaṁ kāyena saṁvutā;

Te yanti accutaṁ ṭhānaṁ,

yattha gantvā na socare.

Puṇṇadāsīvatthu

Sadā jāgaramānānaṁ,

ahorattānusikkhinaṁ;

Nibbānaṁ adhimuttānaṁ,

atthaṁ gacchanti āsavā.

Atulaupāsakavatthu

Porāṇametaṁ atula,

netaṁ ajjatanāmiva;

Nindanti tuṇhimāsīnaṁ,

nindanti bahubhāṇinaṁ;

Mitabhāṇimpi nindanti,

natthi loke anindito.

Na cāhu na ca bhavissati,

na cetarahi vijjati;

Ekantaṁ nindito poso,

ekantaṁ vā pasaṁsito.

Yañce viññū pasaṁsanti,

anuvicca suve suve;

Acchiddavuttiṁ medhāviṁ,

paññāsīlasamāhitaṁ.

Nikkhaṁ jambonadasseva,

ko taṁ ninditumarahati;

Devāpi naṁ pasaṁsanti,

brahmunāpi pasaṁsito.

Chabbaggiyavatthu

Kāyappakopaṁ rakkheyya,

kāyena saṁvuto siyā;

Kāyaduccaritaṁ hitvā,

kāyena sucaritaṁ care.

Vacīpakopaṁ rakkheyya,

vācāya saṁvuto siyā;

Vacīduccaritaṁ hitvā,

vācāya sucaritaṁ care.

Manopakopaṁ rakkheyya,

manasā saṁvuto siyā;

Manoduccaritaṁ hitvā,

manasā sucaritaṁ care.

Kāyena saṁvutā dhīrā,

atho vācāya saṁvutā;

Manasā saṁvutā dhīrā,

te ve suparisaṁvutā.

Kodhavaggo sattarasamo.