Piyavagga (DHP209-220)

Khuddakanikāya

Dhammapada

Piyavagga

Tayojanapabbajitavatthu

Ayoge yuñjamattānaṁ,

yogasmiñca ayojayaṁ;

Atthaṁ hitvā piyaggāhī,

pihetattānuyoginaṁ.

Mā piyehi samāgañchi,

appiyehi kudācanaṁ;

Piyānaṁ adassanaṁ dukkhaṁ,

appiyānañca dassanaṁ.

Tasmā piyaṁ na kayirātha,

piyāpāyo hi pāpako;

Ganthā tesaṁ na vijjanti,

yesaṁ natthi piyāppiyaṁ.

Aññatarakuṭumbikavatthu

Piyato jāyatī soko,

piyato jāyatī bhayaṁ;

Piyato vippamuttassa,

natthi soko kuto bhayaṁ.

Visākhāvatthu

Pemato jāyatī soko,

pemato jāyatī bhayaṁ;

Pemato vippamuttassa,

natthi soko kuto bhayaṁ.

Licchavīvatthu

Ratiyā jāyatī soko,

ratiyā jāyatī bhayaṁ;

Ratiyā vippamuttassa,

natthi soko kuto bhayaṁ.

Anitthigandhakumāravatthu

Kāmato jāyatī soko,

kāmato jāyatī bhayaṁ;

Kāmato vippamuttassa,

natthi soko kuto bhayaṁ.

Aññatarabrāhmaṇavatthu

Taṇhāya jāyatī soko,

taṇhāya jāyatī bhayaṁ;

Taṇhāya vippamuttassa,

natthi soko kuto bhayaṁ.

Pañcasatadārakavatthu

Sīladassanasampannaṁ,

dhammaṭṭhaṁ saccavedinaṁ;

Attano kamma kubbānaṁ,

taṁ jano kurute piyaṁ.

Ekaanāgāmittheravatthu

Chandajāto anakkhāte,

Manasā ca phuṭo siyā;

Kāmesu ca appaṭibaddhacitto,

Uddhaṁsototi vuccati.

Nandiyavatthu

Cirappavāsiṁ purisaṁ,

dūrato sotthimāgataṁ;

Ñātimittā suhajjā ca,

abhinandanti āgataṁ.

Tatheva katapuññampi,

asmā lokā paraṁ gataṁ;

Puññāni paṭigaṇhanti,

piyaṁ ñātīva āgataṁ.

Piyavaggo soḷasamo.