Sukhavagga (DHP197-208)

Khuddakanikāya

Dhammapada

Sukhavagga

Ñātikalahavūpasamanavatthu

Susukhaṁ vata jīvāma,

verinesu averino;

Verinesu manussesu,

viharāma averino.

Susukhaṁ vata jīvāma,

āturesu anāturā;

Āturesu manussesu,

viharāma anāturā.

Susukhaṁ vata jīvāma,

ussukesu anussukā;

Ussukesu manussesu,

viharāma anussukā.

Māravatthu

Susukhaṁ vata jīvāma,

yesaṁ no natthi kiñcanaṁ;

Pītibhakkhā bhavissāma,

devā ābhassarā yathā.

Kosalaraññoparājayavatthu

Jayaṁ veraṁ pasavati,

dukkhaṁ seti parājito;

Upasanto sukhaṁ seti,

hitvā jayaparājayaṁ.

Aññatarakuladārikāvatthu

Natthi rāgasamo aggi,

Natthi dosasamo kali;

Natthi khandhasamā dukkhā,

Natthi santiparaṁ sukhaṁ.

Ekaupāsakavatthu

Jighacchāparamā rogā,

saṅkhāraparamā dukhā;

Etaṁ ñatvā yathābhūtaṁ,

nibbānaṁ paramaṁ sukhaṁ.

Pasenadikosalavatthu

Ārogyaparamā lābhā,

Santuṭṭhiparamaṁ dhanaṁ;

Vissāsaparamā ñāti,

Nibbānaṁ paramaṁ sukhaṁ.

Tissattheravatthu

Pavivekarasaṁ pitvā,

rasaṁ upasamassa ca;

Niddaro hoti nippāpo,

dhammapītirasaṁ pivaṁ.

Sakkavatthu

Sāhu dassanamariyānaṁ,

sannivāso sadā sukho;

Adassanena bālānaṁ,

niccameva sukhī siyā.

Bālasaṅgatacārī hi,

dīghamaddhāna socati;

Dukkho bālehi saṁvāso,

amitteneva sabbadā;

Dhīro ca sukhasaṁvāso,

ñātīnaṁva samāgamo.

Tasmā hi—

Dhīrañca paññañca bahussutañca,

Dhorayhasīlaṁ vatavantamariyaṁ;

Taṁ tādisaṁ sappurisaṁ sumedhaṁ,

Bhajetha nakkhattapathaṁva candimā.

Sukhavaggo pannarasamo.