तत्त्वज्ञानसंसिद्धि

शून्यसमाधिपाद: तत्त्वज्ञानसंसिद्धि

तत्वज्ञानसंसिद्धिः

ओम् नमः श्रीभगवत्यै वज्रवाराह्यै //

आनन्दाम्बुधिमण्डनादुपगता सम्बुद्धलक्ष्मीरसौ सर्वाकारगुणान्विता जगदघध्वान्तौघविध्वंसिनी / ज्योतिर्ज्ञाननिधेर्धृतिः स्मृतिनिधेः शान्तिर्मनीषानिधेः पायाद्वज्रविरासिनी भगवती लोकत्रयं दुर्गतेः // tjs_0.1 //

श्रीवज्रदेवीपदपद्मरेणु, राजिं नमस्कृत्य गुरोः पदं च / श्रीसम्बरं संवृतवोधिचित्तं, प्रज्ञाकृपाद्वैतपदं प्रशस्तम् // tjs_0.2 //

वज्रदेवीपदद्वंद्ववन्दनानन्दवर्त्तिना / भिक्षुणा ज्ञानन्द्रेण चन्द्रेवसुवशर्मणा // tjs_0.3 //

साधनं वज्रवाराह्याः स्वार्थंकिञ्जिद्विभज्यते / सुभाषितप्रदे नित्यं मतिः कल्पनसोत्सुका // tjs_0.4 //

ततःश्रद्वापरेणेदं मन्दस्वल्पधिया मया / कर्त्तव्य न मम दोषो वीक्षणीयो महाजनैः // tjs_0.5 //

ओम् नमः श्री वज्रवाराह्यै

उद्याता तलचक्रतो ऽनिलधुता विद्युच्छटाभास्वरा, दग्धालित्रितया त्रिलोकमहिता पीयूषधाराप्लुता / बुद्धज्ञानरसाविला विकलुषा स्वानन्दसन्दोहदा भावाभावविचारणाविरहिता वाराहिका पातु वः // tjs_1.1 //

निर्माणालिदिनेशमण्डलगता काद्यादिवर्णावृता, प्रज्बालज्वलनोज्वलामृतसवा सूक्ष्माजसूत्रोपमा विद्याबुद्धकदम्वकं दहति या चक्रत्रयोर्भेदिनी सानन्दा ललितोर्द्वगा स्फुरतु वो वाराहिका चेतसि // tjs_1.2 //

प्रणिपत्य वज्रपूर्वां वाराहीं वज्रयोगिनीम् / शिरसा स्वस्मृतये वक्ष्ये ऽहं तत्त्वज्ञानस्य संसिद्धिम् // tjs_1.3 //

विजनमनो ऽनुकूलस्थानं नाथांककः प्रविशेत्सुधीः / तत्र सुकुमारमासनमुपविश्य विभावयेच्छुद्धिं // tjs_1.4 //

तदनु च षष्ठजिनेन त्र्यक्षरजप्तेन वज्रधरहृदयं / संलिख्यानामिकया, लोहितकुसुमार्चितं कुर्यात् // tjs_1.5 //

तदनु परमाद्यपात्रे करकमलं दक्षिणेतरं क्षिप्त्वा / विदधीत सवनं यथोपदेशं शयस्पर्शात् // tjs_1.6 //

प्रविधाय करन्यासं बृद्धाङ्गुष्ठाङ्गुलिसमायोगात् / कुर्वीताङ्गन्यासं षड्भिर्वीरेश्वरीमन्त्रैः // tjs_1.7 //

तदनु चक्रवज्रवरोपरि रङ्गारुणोयोगजसमममन्त्रं / भुजगभवैः सुविशिष्टैः सिचयगतैरवकिरेच्छनकैः // tjs_1.8 //

तत्र जिनहृदयचक्रं शिखिकोटिकं समभिलिख्य / तद्गर्भे मन्त्रालीं गाङ्गेयशलाकया विलिखेत् // tjs_1.9 //

चक्रस्य वाह्यभागे पूर्वोत्तरपश्चिमार्किदिग्देशे / सत्स्वस्तिकानभिलिखेत्क्रमेण वामहस्तेन // tjs_1.10 //

आकृष्य वज्रदेवीम्प्रविश्य मन्त्राक्षरेषु बद्ध्वा परितोषयेत् / सुविधानात् जः हुं वं होरिति पठित्वा // tjs_1.11 //

तदनु सपर्या विविधास्तस्या विदधीत मंत्ररूपायाः / भक्ष्यैर्भोज्यैर्लेह्यैः पेयैश्चोष्यैः सकामगुणैः // tjs_1.12 //

विविधैर्वलैः समदनैरुपहारैः पञ्चभिरतिपरार्ध्यैः / गीतैवद्यैर्न्नृत्यैः प्रदक्षिणाप्रणतिनुतिभिश्च // tjs_1.13 //

प्रतिदिवसं प्रतिपक्षं प्रतिमासं वा तिथौ दशम्यां / कुर्याद्यथोक्तपूजाविधिमस्याः सिद्धिमाकांक्षणः // tjs_1.14 //

अथ कृतवाह्यार्चनविधिरुरुकरुणो निर्मितारिध्याव्जे // व्यसुहृयोष्णगुविम्वां ध्यायात्पूर्वोदितां देवीम् // tjs_2.1 // संध्यासिन्दूरवर्णां खरकरनिकरायास्तसप्तार्क्ककान्तीं / कर्त्त्रीं सर्वार्त्तिहंत्रीं स्फुरदमृतघृणीं विभ्रतीं सव्यदोष्णा //

विभ्राणां वामदोष्णा कमलमतिसितं रक्तपूर्णध्वजाढ्यां / काल्या दम्भोलिकाल्या परिगतशिरसं मुक्तमूर्द्धोखहस्तां // tjs_2.2 //

मुण्डालीमण्डिताङ्गीं मुखगलदसृजं स्वादगुं मुक्तनादां, सव्ये चोर्द्धंकिरास्यां वरशुभगमनां क्रोधमूलाननान्तां / सानन्दां सानुरागां विविधरसयुतामर्द्धपर्य्यङ्कनृत्यां मुद्राषण्मुद्रिताङ्गीं व्यपगतवसनां षोडशाव्दां वराङ्गीम् // tjs_2.3 //

ज्ञानाकर्षादिविधिः प्रागिव कृत्वा विधानविन्मंन्त्री / स्वस्तिकमलिकाभिमुखं भ्रमन्तमेकं द्रूतं ध्यायात् // tjs_2.4 //

तदनु वियद्वती धातौ त्रिकूटगिरिगह्वरे भ्रमच्चक्रं / प्रागुक्तमिव ध्यायाद्रक्तं जाज्यल्यमानं सत् // tjs_2.5 //

तत्र स्थिरमिवातिवेगान्निर्वातनिष्कम्पदीपमिव दीप्तं / द्रावयेदुरुसुखचक्रं श्रवदमृतसारकृतसवनम् // tjs_2.6अ //

कायत्रयस्वभावं परमं सहजात्मकं जगद्व्यापिनं / स्फुरदमितशान्तसन्ततिं पश्येत्पश्चात्सुखं पश्चात् // tjs_2.6ब् //

प्रतिदिवसं प्रतिसन्ध्यं यथाक्षणम्वा विभावयेदेतत् / यावत्सिद्धिनिमित्तं तावदिदमुच्यते व्यक्तम् // tjs_2.7 //

अयत्नजप्रीतिलयानुबन्धनात् यदा भवेद्व्यक्तमिदं विभावितम् // कशाचपेटादिह नैव वेदना तदा भवेत्सिद्धिरदूरवर्त्तिनी // tjs_2.8 // प्रताडितानां पणवादिकानां पटुध्वनिर्नश्रुतगोचरश्चेत् / यदाप्यते बोधिरनुत्तराग्रा स्वप्ने चिराद्ध्यानवताग्रसिद्धिः // tjs_2.9 //

दृष्ट्वा सिद्धिनिमित्तं पितृवनगिरिकुञ्जे वृक्षमूलादौ / निवसन्नुत्पन्नक्रमयोगमजस्रं सुधीः कुर्यात् // tjs_2.10 //

सिद्धौ वसुधादीनां भवती लयो ह्युत्तरोत्तरक्रमशः / ख्याति तदा गगनाभं प्रभास्वरं ज्ञानमात्रं सत् // tjs_2.11 //

जानीयात्तच्चिह्नैश्चिह्नानि तु पञ्चधा विदुस्तज्ज्ञाः / अत एव तानि योगी समाहितो लक्षयेन्मनसा // tjs_2.12 //

प्रथमं मृगतृष्णाभं धूमाकारं द्वितीयकं चिह्नं / खद्योतवत्तृतीयं चतुर्थं दीपोज्वलं स्पष्टं // tjs_2.13 //

विगताभ्रगगनसदृशं पञ्चमं चिह्नं प्रकाशमविकल्पं / एवं लव्धनिमित्तो मुद्रां महतीमवाप्नोति // tjs_2.14 //

उत्थातुकामः प्रणिपत्य योगिनीं नाथं च कस्थं समुदीर्य मूः कृतिं / उत्थाय कृत्यं विदधीत तत्वधीस्तिष्ठेत्सदा योगयुगेन योगवित् // tjs_2.15 // इति तत्त्वज्ञानसंसिद्धौ भावनाविधिः // 2 // अध्येषितश्च बहुशः शिष्यैः कृतमण्डलैः पदाव्जनतैः // मन्त्री तिथौ दशम्यां विदधीतानुग्रहन्तेषां // tjs_3.1 // संपूज्य मंत्ररूपां देवीं चक्रस्थितां विहितयोमः / आदाय मंत्रजप्तं परमाद्यं निष्क्रमेत्तस्मात् // tjs_3.2 //

अथ विहितपञ्चमण्डलमूर्द्धस्थां तदन्तदक्षिणंशिष्यं / कुसुमस्रजं दधानं ध्यातकेनाथं गुरुः पश्येत् // tjs_3.3अ //

तदनु च यथोक्तं देवीचक्रं प्रोद्यन्मरीचिकं रयवत् / ध्यात्वान्तबासिगात्रे वज्रभृत्तस्य संदद्यात् // tjs_3.3ब् //

एवं स्यादावेशस्तत्कलिका प्रकम्पनं वाष्पः / पातो ज्ञानोत्पादः स्वारूपञ्चापि परिपाद्याः // tjs_3.4 //

तदनु कथयेत्समाधिं पूजामंत्रं च वज्रयोगिन्याः / श्रद्धान्वितस्य गुणिनो गुरुबुद्धाभिन्नसद्भक्तेः // tjs_3.6 //

कथयेन्न योगमेनं सद्यः प्रत्ययकरं सुसिद्धंवा // श्रद्धाविरहितमनसो भक्तिविहीनशिष्यस्य // tjs_3.7 // विदधाति यस्तु पूजां देवीचक्रस्य मंत्रयुक्तस्य / तस्यापयान्ति भयान्यष्टौ पापानि च महान्ति // tjs_3.8 //

दुर्भगता दारिद्र्यं व्याधिजरादुःखदौर्मनस्यानि / भ्रमकलिकलुषक्लेशाः पीडा नानाविधाश्चापि // tjs_3.9 //

यो जपति चक्रमन्त्रं ध्यात्वा हृदये निरोधवाचासौ / प्राप्नोत्यष्टौ सिद्धीः पञ्चाभिज्ञांस्तथाष्टगुणान // tjs_3.10 // ध्यायति यः किरवक्त्रां प्रतिदवसं यत्नतश्चतुःसंध्यं हरिहरहिरण्यगर्भैर्जेतुमशक्यां मृतिं जयति // tjs_3.11 // वस्त्रान्नपानधनधान्यविशालभूमिः प्रासाददिव्यशयनासनसाधनानि / तस्योद्भवन्ति दयिता विविधाश्च विद्या, यो भावयत्यशनिकोलमुखीं सचक्रां // 12 //

इति तत्वज्ञानसंसिद्धौ सानुशंसा शिष्यानुग्रहविधिः //

मंत्रोद्धारमतः परमधिधास्ये वज्रयोगिनीहृदयं / कर्णात्कर्णमुपागतमास्यादास्यं तथाक्रमतः // tjs_4.1 //

पूर्वोदितमिव चक्र संलिख्यं मरुद्गणालयोपेतां / तत्र लिखेत्परिपाटित आलिकालिं तथैव कोणं // tjs_4.2 //

झाधरगं डाधरस्थं हाधरगविभूषितं समायुक्तं / त्रिकमादितो विलिख्यं सदक्षरं तत्वपरिदीपि // tjs_4.3 //

भोर्द्धगतं छोर्द्धस्थितसमेतटोर्द्धस्थितं तदनु लेख्यं / डाधरयुतं षाधारगं षोर्द्धस्थितयुक्तशोर्द्धगतं // tjs_4.4 //

ञाधरयुतऌतलस्थं टाधरयुतपोर्द्धसंस्थितं / तदनु ठाधरगान्वितफोर्द्धगं ऐवामयुतं हटान्तस्थं // tjs_4.5 //

चसमध्यगतं ठसव्यगसमेतं भाधरसुसंस्थितं / तदनु हथमध्यगतं तवामयुक्तं ठलमध्यग पश्चात् // tjs_4.6 //

सर्वकरान्तफमध्यगं तृतीयवर्गादिवामगसमेतं / णोर्द्धयुतं लाधरगं छोर्द्धस्थं भतलगं ठसव्ययुतं // tjs_4.7 //

तोर्द्धगयुतं षाधरगं थोर्द्धदसंयुक्तं णाधरगं पश्चात् / फाधरगं ठाधरसंयुक्तं फोर्द्धस्थं णोर्द्धयुक्तं लाधरगं // tjs_4.8 //

डाधरशून्यसमेतं त्रिवतलगं चोर्द्धस्थितं रतलं / थाधरयुतं शाधरगं ञाधरसमायुक्तं चापि // tjs_4.9 //

सयमध्यगं झवामगसमेतमुक्ताक्षरकृतो रहस्यः / मंत्रोयमशनीदेव्या लेख्यो जप्यो विभाव्यश्च // tjs_4.10 //

चिन्तामणिः कल्पकुठाग्रकुम्भः श्रीकामदुग्धेनुरपि प्रशस्ताः / ते साध्यमाना ददतीह वित्तान्ययन्तु सौख्यं सधनं ददाति // tjs_4.11 //

इति तत्वज्ञानसंसिद्धौ मन्त्रौद्धारविधिः //

यस्मिन्नयं पात्रगतेव्यलिख्य, पूजानिमित्तं विधिना विधिज्ञः / बालस्य रक्षा विधिवद्विधेया, वद्धेन दोकण्ठशिखासुवाहौ // 1 //

दृष्ट्वापयान्ति भुजगाः शिशुकं सरक्षं, भूता ग्रहा निशिचराः सपिशाचसंघाः / अन्ये च बालकभर्यार्त्तिकराः सुभीमाः सिंहं यथा वनचरा वलिनम्भयार्त्ताः // 2 //

संप्राप्य सदुपदेशं दृष्ट्वा संप्रत्ययं च योगस्य / सिद्धिरियं समभिलेखि स्फुरदमलज्ञानसवंसतिः // 3 //

तस्मात्तत्संप्राप्त्यै संसेव्यं सगुरोः पदाम्बुरुहं / सान्ना प्रदानबिधिना कायक्लेशैः प्रणामैश्च // 4 //

तत्वज्ञानाग्रसिद्धिर्वहुहितजननी या जनस्येव लोके सत्वानां यन्मयोसीत्कुशलमकलुषं पूर्वचद्रांशुशुभ्रं / भूयासुस्तेन लोकाः कलिमलविकला शुद्धासम्बोधिभाजो लब्ध्वा मुद्रामुदारां भवभयशमनीं सर्वसत्वार्थकर्त्रीं // 5 //

समाप्तोयं तत्वज्ञानसंसिद्धिर्नाम स्वाधिष्ठानश्चेति शुभम् सर्वदा