मैत्रेयव्याकरण

मैत्रेयव्याकरण

(दश मासांश् च) निखिलान् धारयित्वा महाद्युतिम् सुपुष्पिते ऽस्मिन् उद्याने मैत्रेयजननी ततः // MvyG_31

न निषण्णा निपन्ना वा स्थिता सा धर्मचारिणी द्रुमस्य शाखाम् आलम्ब्य मैत्रेयं जनयिष्यति // MvyG_32

अलिप्तो गर्भपङ्केन कुशेशयम् इवाम्बुना त्रैधातुकम् इदं सर्वं प्रभया पूरयिष्यति // MvyG_33

प्रीतो ऽथ तं सहस्राक्षो देवराजा शचीपतिः जायमानं ग्रहीता स मैत्रेयं द्विपदोत्तमम् // MvyG_34

पदानि जातमात्रश् च सप्तासौ प्रक्रमिष्यति पदे पदे निधनं च पद्मं पद्मं भविष्यति // MvyG_35

दिशश् चतस्रश् चोद्वीक्ष्य वाचं प्रव्याहरिष्यति इयं मे पश्चिमा जातिर् नास्ति भूयः पुनर्भवः न पुनर् अभ्यागमिष्यामि निर्वास्यामि निरास्रवः // MvyG_36

संसारार्णवमग्नानां सत्त्वानां दुःखभागिनाम् तृष्णाबन्धनबद्धानां करिष्यामि विमोचनम् // MvyG_37

श्वेतं चास्य सुराश् छत्त्रं धारयिष्यन्ति मूर्धनि शीतोष्णवारिधाराभ्यां नागेन्द्रौ स्नापयिष्यतः // MvyG_38

प्रतिगृह्य च तं धात्री द्वात्रिंशद्वरलक्षणम् श्रिया ज्वलन्तं मैत्रेयं मात्रे समुपनेष्यति // MvyG_39

मनोरमां च शिविकां नानारत्नविभुषिताम् आरूढां पुत्रसहितां वहिष्यन्ति च देवता // MvyG_40

ततस् तूर्यसहस्रेषु वाद्यमानेषु तत्पुरम् प्रविष्टमात्रे मैत्रेये पुष्पवर्षं पतिष्यति // MvyG_41

दृष्ट्वैवं पुत्रं सुब्रह्मा द्वात्रिंशद्वरलक्षणम् प्रत्यवीक्षाथ मन्त्रेषु तदा प्रीतो भविष्यति // MvyG_42

गतिद्वयं कुमारस्य यथा मन्त्रेषु दृश्यते नराधिपश् चक्रवर्ती बुद्धो वा द्वीपदोत्तमः // MvyG_43

स च यौवनसंप्राप्तो मैत्रेयाः पुरुषोत्तमः चिन्तयिष्यति धर्मात्मा दुःखिता खल्व् इयां प्रजाः // MvyG_44

ब्रह्मस्वरो महाघोषो हेमवर्णो महाद्युतिः विशालवक्षाः पीनाङ्सः पद्मपत्त्रनिभेक्षणः // MvyG_45

हस्तः पञ्चाशद् उच्छ्राय तस्य कायो भविष्यति विसृतश् च ततो ऽर्द्धेन शुभवर्णसमुच्छ्रयः // MvyG_46

अशीतिभिश् चतुर्भिश् च सहस्रैः संपुरस्कृतः माणवानां स मैत्रेयो मन्त्रान् अध्यापयिष्यति // MvyG_47

अथ शङ्खो नरपतिः यूपम् उच्छ्रापयिष्यति तिर्यञ् च षोडशव्यामम् ऊर्ध्वं व्यामसहस्रकम् // MvyG_48

स तं यूपं नरपतिर् नानारत्नविभूषितम् प्रदास्यति द्विजातिभ्यो यज्ञं कृत्वा पुरःसरम् सप्तरत्नमयं यूपं ब्राह्मणेभ्यः प्रदास्यति // MvyG_49

तं च रत्नमयं यूपं दत्तमात्रं मनोरमम् ब्राह्मणानां सहस्राणि विकिरिष्यन्ति तत्क्षणात् // MvyG_50

यूपस्य तस्य मैत्रेयो दृष्ट्वा चैताम् अनित्यताम् कृत्स्नं विचिन्त्य संसारं प्रव्रज्यां रोचयिष्यति // MvyG_51

यत्व् अहं प्रव्रजित्वेह स्पृशेयम् अमृतं पदम् विमोचयेयं जनतां व्याधिमृत्युजराभयात् // MvyG_52

अशीतिभिः सहस्रैः स चतुर्भिश् च पुरस्कृतः निष्क्रमिष्यति मैत्रेयः प्रव्रज्याम् अग्रपुद्गलः // MvyG_53

नागवृक्षस् तदा तस्य बोधिवृक्षो भविष्यति पञ्चाशद्योजनान्य् अस्य शाखा ऊर्ध्वं समुच्छ्रिताः // MvyG_54

निषद्य तस्य चाधस्तान् मैत्रेयो पुरुषोत्तमः अनुत्तरां शिवां बोधिं समवाप्स्यति नायकः // MvyG_55

यस्याम् एव च रात्रौ स प्रव्रज्यां निष्क्रमिष्यति तस्याम् एव च रात्रौ हि परां बोधिम् अवाप्स्यति // MvyG_56

अष्टाङ्गोपेतया वाचा ततः स पुरुषोत्तमः देशयिष्यति सद्धर्मं सर्वदुःखापहं शिवम् // MvyG_57

प्रसन्नां जनतां दृष्ट्वा सत्यानि कथयिष्यति दुःखं दुःखसमुत्पादं दुःखस्य समतिक्रमम् // MvyG_58

आर्यं चाष्टाङ्गिकं मार्गं क्षेमं निर्वाणगामिनम् तं चापि धर्मं संश्रुत्य प्रतिपत्स्यन्ति शासने // MvyG_59

उद्याने पुष्पसंच्छन्ने सन्निपातो भविष्यति पूर्णं च योजनशतं पर्षत् तस्य भविष्यति // MvyG_60

श्रुत्वा नरपति राजा शङ्खो नाम महायशाः दत्त्वा दानम् असंख्येयं प्रव्रज्यां निष्क्रमिष्यति // MvyG_61

अशीतिभिश् चतुर्भिश् च सहस्रैः परिवारितः नराधिपो विनिष्क्रम्य प्रव्रज्याम् उपयास्यति // MvyG_62

अनेनैव प्रमाणेन मानवानां पुरस्कृतः मैत्रेयस्य पिता तत्र प्रव्रज्याम् निष्क्रमिष्यति // MvyG_63

ततो गृहपतिस् तत्र सुधनो नाम विश्रुतः प्रव्रजिष्यति शुद्धात्मा मैत्रेयस्यानुशसने // MvyG_64

स्त्रीरत्नम् अथ शङ्खस्य विशाखा नाम विश्रुता अशीतिभिश् चतुर्भिश् च सहस्रैः संपुरस्कृता नारीणां अभिनिष्क्रम्य प्रव्रज्याम् रोचयिष्यति // MvyG_65

प्राणिनः तत्र समये सहस्राणि शतानि च प्रव्रज्याम् उपयास्यन्ति मैत्रेयस्यानुशासने // MvyG_66

सुपुष्पिते ऽस्मिन् उद्याने सन्निपातो भविष्यति समन्ततो योजनशतं पर्षत् तस्य भविष्यति // MvyG_67

ततः कारुणिकः शास्ता मैत्रेयः पुरुषोत्तमः समितिं व्यवलोक्याथ इदम् अर्थं प्रवक्ष्यति // MvyG_68

सर्वे ते शाक्यसिंहेन गुणिश्रेष्ठेन त्रायिना अर्थतो लोकनाथेन दृष्ट्वा सद्धर्मधातुना रोपिता मोक्षमार्गेण विक्षिप्ता मम शासने // MvyG_69

छत्त्रध्वजपताकाभिर् गन्धमाल्यविलेपनैः कृत्वा स्तूपेषु सत्कारम् आगता हि ममान्तिकम् // MvyG_70

सङ्घे दत्त्वा च दानानि चीवरं पानभोजनम् विविधं ग्लानभैषज्यम् आगता हि ममान्तिकम् // MvyG_71

कुङ्कुमोदकसेकं च चन्दनेनानुलेपनम् दत्त्वा शाक्यमुनेः स्तूपेष्व् आगता हि ममान्तिकम् // MvyG_72

शिक्षापदानि चादाय शाक्यसिंहस्य शासने परिपाल्य यथाभूतम् आगता हि ममान्तिकम् // MvyG_73

उपोषधम् उपोष्येह आर्यम् अष्टाङ्गिकं शुभम् चतुर्दशीं पञ्चदशीं पक्षस्येहाष्टमीं तथा प्रातिहारिकपक्षं चाप्य् अष्टाङ्गं सुसमाहितम् // MvyG_74

शीलानि च समादाय संप्राप्तानि च शासनम् बुद्धं धर्मं च सङ्घं च सत्त्वास् ते शासनं गताः कृत्वा च कुशलं कर्म मच्छासनम् उपागताः // MvyG_75

तेनैते प्रेषिताः सत्त्वाः प्रतीष्टाश् च मयाप्य् अमी गणिश्रेष्ठेण मुनिना परीता भूरिमेधसा // MvyG_76

प्रसन्नां जनतां दृष्ट्वा सत्यानि कथयिष्यति श्रुत्वा च ते ततो धर्मं प्राप्स्यन्ति पदम् उत्तमम् // MvyG_77

प्रातिहार्यत्रयेणासौ श्रावकान् विनयिष्यति सर्वे ते अस्रवास् तत्र क्षिपयिष्यन्ति सुरताः // MvyG_78

प्रथमः सन्निपातो ऽस्य श्रावकाणां भविष्यति पूर्णाः षण्नवतिकोट्यः श्रावकाणां भवच्छिदाम् // MvyG_79

द्वितीयः सन्निपातो ऽस्य श्रावकाणां भविष्यति पूर्णाश् चतुर्नवतिः कोट्यः शान्तानां भूरिमेधसाम् // MvyG_80

तृतीयः सन्निपातो ऽस्य श्रावकाणां भविष्यति पूर्णा द्वाविंशतिः कोट्यः शान्तानां शान्तचेतसाम् // MvyG_81

धर्मचक्रं प्रवर्त्याथ विनीय सुरमानुषान् सार्धं श्रावकसङ्घेन पुरे पिण्डं चरिष्यति // MvyG_82

ततः प्रविशतस् तस्यां रम्यां केतुमतीं पुरीम् मान्दारकाणि पुष्पानि पतिष्यन्ति पुरोत्तमे देवताः प्रकरिष्यन्ति तस्मिन् पुरगते मुनौ // MvyG_83

चत्वारश् च महाराजाः शक्रश् च त्रिदशाधिपः ब्रह्मा देवगणैः सार्धं पूजां तस्य करिष्यति // MvyG_84

उत्पलं कुमुदं पद्मं पुण्डरीकं सुगन्धिकम् अगुरुं चन्दनं चापि दिव्यं माल्यं पतिष्यति // MvyG_85

चैलक्षेपं करिष्यन्ति देवपुत्रा महर्द्धिकाः तं लोकनाथम् उद्वीक्ष्य प्रविशन्तं पुरोत्तमम् // MvyG_86

दिव्यश् च तूर्यनिर्घोषो दिव्यं माल्यं पतिष्यति देवता प्रकरिष्यन्ति तस्मिन् पुरगते मुनौ // MvyG_87

ये तु केतुमतीं के चिद् वासयिष्यन्ति मानुषाः ते पि तं पूजयिष्यन्ति प्रविशन्तं पुरोत्तमम् // MvyG_88

पथि भूम्यास्तरं तत्र मृदुतूलपिचोपमम् विचित्रं च शुभं माल्यं विकिरिष्यन्ति ते तदा // MvyG_89

छत्त्रध्वजपताकाभिर् अर्चयिष्यन्ति मानुषाः शुभैश् च तूर्यनिर्घोषैः प्रसन्नमनसो नराः // MvyG_90

तं च शक्रः सहस्राक्षो देवराजः शचीपतिः प्रहृष्टः प्राञ्जलिर्भूत्वा मैत्रेयं स्तोष्यते जिनम् // MvyG_91

नमस् ते पुरुषाजन्य नमस् ते पुरुषोत्तम अनुकम्पस्व जनतां भगवन्न् अग्रपुद्गल // MvyG_92

महर्द्धिको देवपुत्रस् तस्य मारो भविष्यति स चापि प्राञ्जलिर्भूत्वा स्तोष्यते लोकनायकम् // MvyG_93

शुद्धावाससहस्रैश् च बहुभिः परिवारितः प्रवेक्ष्यते च मैत्रेयो लोकनाथो विनायकः // MvyG_94

ब्राह्मणपरिवारेण ब्रह्मा चापि गिरास्फुटम् कथयिष्यति सद्धर्मं ब्रह्मं घोषम् उदीरयन् // MvyG_95

आकीर्णा पृथिवी सर्वा अर्हद्भिश् च भविष्यति क्षीणास्रवैर् वान्तदोषैः प्रहीणभवबन्धनैः // MvyG_96

हृष्टा देवमनुष्याश् च गन्धर्वा यक्षराक्षसाः शास्तुः पूजां करिष्यन्ति नागाश् चापि महर्द्धिकाः // MvyG_97

ते वै नूनं भविष्यन्ति च्यानघाश् (?) छिन्नसंचयाः उत्क्षिप्तपरिखाः धीरा अनादाना निरुत्सकाः ब्रह्मचर्यं चरिष्यन्ति मैत्रेयस्यानुशसने // MvyG_98

ते ऽपि नूनं भविष्यन्ति अममा अपरिग्रहाः अजातरूपरजता अनिकेता असंस्तवाः ब्रह्मचर्यं चरिष्यन्ति ये मैत्रेयानुशसने // MvyG_99

ते वै पानं गमिष्यन्ति छित्वा जालम् एव भुजात् ध्यानानि चोपसंपद्य प्रीतिसौख्यसमन्विताः ब्रह्मचर्यं चरिष्यन्ति मैत्रेयस्यानुशसने // MvyG_100

षष्टिं वर्षसहस्राणि मैत्रेयो द्विपदोत्तमः देशयिष्यति सद्धर्मं शास्ता लोकानुकम्पया // MvyG_101

शतानि च सहस्राणि प्राणिनं स विनायकः विनीय धर्मकायेन ततो निर्वाणम् एष्यति // MvyG_102

तस्मिंश् च निर्वृते धीरे मैत्रेये द्विपदोत्तमे दशवर्षसहस्राणि सद्धर्मः स्थास्यति क्षितौ // MvyG_103

प्रसादयति चित्तानि तस्माच् छाक्यमुनौ जिने ततो दृक्षथ मैत्रेयं संबुद्धं द्विपदोत्तमम् // MvyG_104

तस्माद् धर्मे च बुद्धे च सङ्घे चापि गणोत्तमे प्रसादयति चित्तानि भविष्यति महर्द्धिकम् // MvyG_105

तं तादृशं कारुणिकं मैत्रेयं द्विपदोत्तमम् आराधयित्वा कालेन ततो निर्वाणम् एष्यथ // MvyG_106

इदम् आश्चर्यकं श्रुत्वा दृष्ट्वा च विभवानल्पिकाम् को विद्वान् न प्रसीदेत अपि कृष्णासु जातिषु // MvyG_107

तस्माद् इहात्मकामेन माहात्म्यम् अभिकाङ्क्षताः सद्धर्मो गुरुकर्तव्यः स्मरता बुद्धशासनम् // MvyG_108

मैत्रेयव्याकरणं समाप्तम् //

एलापत्त्रश् च गान्धारे शङ्खो वाराणसीपुरे // MvyC_25

चतुर्भिर् एभिर् निधिभिः स राजा सुसमन्वितः भविष्यति महावीरश् शतपुण्यबलोदितः // MvyC_26

ब्राह्मणस् तस्य राज्ञश् च सुब्राह्मणः पुरोहितः बहुश्रुतश् चतुर्वेदस् तस्योपध्यायो भविष्यति // MvyC_27

अध्यापको मन्त्रधरः स्मृतिमान् वेदपारगः कैटाभे स निर्घण्टे च पदव्याकरणे तथा // MvyC_28

तदा ब्रह्मावती नाम तस्य भार्या भविष्यति दर्शनीया प्रासादिका अभिरूपा यशस्विनी // MvyC_29

तुषितेभ्यश् च्यवित्वा तु मैत्रेयो ह्य् अग्रपुद्गलः तस्याः कुक्षौ स नियतं प्रतिसन्धिं ग्रहीष्यति // MvyC_30

दश मासांश् च निखिलान् धारयित्वा महाद्युतिः सुपुष्पिते च उद्याने गत्वा मैत्रेयमातरा // MvyC_31

न निषण्णा न सुप्तासौ स्थिता सा धर्मचारिणी द्रुमस्य शाखाम् आलम्ब्य मैत्रेयं जनयिष्यति // MvyC_32

निष्क्रमिष्यति पार्श्वेन दक्षिणेन नरोत्तमः अभ्रकूटाद् यथा सूर्यो निर्गतश् च प्रभासते // MvyC_33

अलिप्तो गर्भपङ्केन पद्मं चैव यथाम्भसा त्रैधातुकम् इदं सर्वं प्रभया पूरयिष्यति // MvyC_34

अथ प्रीतस् सहस्राक्षो देवराजश् शचीपतिः ग्रहीष्यति कुमारं तं जायमानं नरोत्तमम् // MvyC_35

श्रिया ज्वलन्तं मैत्रेयं द्वात्रिंशद्वरलक्षणम् मुञ्च मुञ्च सहस्राक्ष जातमात्रो वदिष्यति // MvyC_36

पदानि जातमात्रस् तु सप्तासौ प्रक्रमिष्यति पदे पदे निधनं च पद्मं पद्मं भविष्यति // MvyC_37

दिशश् चतस्रश् चोद्वीक्ष्य वाचं प्रव्याहरिष्यति इयं मे पश्चिमा जातिर् नास्ति भूयः पुनर्भवः // MvyC_38

न पुनर् आगमिष्यामि निर्वास्यामि निराश्रवः शीतोष्णवारिधाराभिस् स्नापयिष्यन्ति पन्नगाः // MvyC_39

दिव्याम्बराणि पुष्पाणि पतिष्यन्ति नभस्तलात् श्वेतं तस्य सुराश् छत्त्रं धारयिष्यन्ति मूर्धनि // MvyC_40

हृष्टश् चैव सहस्राक्षो देवराजो शचीपतिः ग्रहीष्यति तं कुमारं द्वात्रिंशद्वरलक्षणम् श्रिया ज्वलन्तं मैत्रेयं मातुर् हस्ते प्रदास्यति // MvyC_41

मनोरमां च शिविकां नानारत्नविभुषिताम् आरूढा पुत्रसहिता वहिष्यते च देववत् // MvyC_42

ततस् तूर्यसहस्रेषु वाद्यमानेषु तत्पुरम् प्रविष्टमात्रे मैत्रेये पुष्पवर्षं पतिष्यति // MvyC_43

तस्मिंश् च दिवसे भार्या गुर्विण्यः प्रसविष्यन्ति सर्वास् ता जनयिष्यन्ति पुत्रान् क्षेमेण स्वस्तिना // MvyC_44

दृष्ट्वा च पुत्रं सुब्रह्मा द्वात्रिंशद्वरलक्षणम् प्रत्यवेक्ष्य च मन्त्रेषु ततः प्रीतो भविष्यति // MvyC_45

गतिद्वयं कुमारस्य यथा मन्त्रेषु दृश्यते नराधिपश् चक्रवर्ती बुद्धो वा द्वीपदोत्तमः // MvyC_46

स च यौवनसंप्राप्तो मैत्रेयो ह्य् अग्रपुद्गलः चिन्तयिष्यति धर्मात्मा दुःखिताह् खल्व् इमाः प्रजाः // MvyC_47

ब्रह्मस्वरो महाघोषो हेमवर्णो महाद्युतिः विशालवक्षाः पीनाङ्गः पद्मपत्त्रनिभेक्षणः // MvyC_48

समुच्छ्रयेण हस्ताशीतिस् तस्य कायो भविष्यति विस्तारं विंशहस्तानि ततो ऽर्धम् मुखमण्डलम् // MvyC_49

अशीतिभिश् चतुर्भिश् च सहस्रैः स पुरस्कृतः माणवानां च मैत्रेयो मंत्रान् अध्यापयिष्यति // MvyC_50

ततः शङ्खो महाराजो यूपम् उच्छ्रापयिष्यति षोडशव्यामविस्तारम् ऊर्ध्वं व्यामसहस्रकम् // MvyC_51

स तं यूपं नरपतिर् नानारत्नविभूषितम् प्रदास्यति द्विजातिभ्यो यज्ञं कृत्वा पुरस्सरम् सप्तरत्नमयं यूपं ब्राह्मणेभ्यः प्रदास्यति // MvyC_52

तं च रत्नमयं यूपं दत्तमात्रं मनोरमम् ब्राह्मणानां सहस्राणि विकरिष्यन्ति तत्क्षणात् // MvyC_53

तस्य यूपस्य मैत्रेयो दृष्ट्वा चैनाम् अनित्यताम् कृत्स्नं विचिन्त्य संसारं प्रव्रज्यां रोचयिष्यति // MvyC_54

यत्राहं प्रव्रजित्वेह स्पृशेयम् अमृतं पदम् विमोचयेयं जनतां व्याधिमृत्युजराभयात् // MvyC_55

अशीतिभिश् चतुर्भिश् च सहस्रैः स पुरस्कृतः निष्क्रमिष्यति मैत्रेयः प्रव्रज्याम् अग्रपुद्गलः // MvyC_56

नागवृक्षस् तदा तस्य बोधिवृक्षो भविष्यति पञ्चाशद्योजनास् तस्य ऊर्ध्वं शाखाः समुद्गताः षट्क्रोशविटपाण्य् अस्य विवृतानि समन्ततः // MvyC_57

तस्य मूले निषण्णो ऽसौ मैत्रेयो द्विपदोत्तमः अनुत्तरां च संबोधिं प्राप्स्यति नात्र संशयः // MvyC_58

अष्टाङ्गोपेतया वाचा ततः स मुनिसत्तमः देशयिष्यति सद्धर्मं सर्वदुःखापहं शिवम् // MvyC_59

दुःखं दुःखसमुत्पादं दुःखस्य समतिक्रमम् आर्यं चाष्टाङ्गिकं मार्गं क्षेमं निर्वाणगामिनम् // MvyC_60

प्रसन्नान् जनतां दृष्ट्वा सत्यानि कथयिष्यति तं चास्य धर्मं संश्रुत्य प्रतिपद्यन्ति शासने // MvyC_61

सुपुष्पिते च उद्याने सन्निपातो भविष्यति पूर्णं च योजनं शतं पर्षत् तस्य भविष्यति // MvyC_62

ततः श्रुत्वा नरपतिः शङ्खो राजा महायशाः दत्त्वा दानम् असंख्येयं प्रव्रज्यां रोचयिष्यति // MvyC_63

अशीतिभिश् चतुर्भिश् च सहस्रैः स पुरस्कृतः नराधिपो विनिष्क्रम्य प्रव्रज्याम् उपयास्यति // MvyC_64

तेनैव च प्रमाणेन मानवानां पुरस्कृतः मैत्रेयस्य पिता चैव प्रव्रज्याम् उपयास्यति // MvyC_65

ततो गृहपतिः x x सुधनो नाम विश्रुतः प्रव्रजिष्यति धर्मात्मा सहस्रैः परिवारितः // MvyC_66

स्त्रीरत्नम् अथ शङ्खस्य विशाखा नाम विश्रुता अशीतिभिश् चतुर्भिश् च सहस्रैः सा पुरस्कृता नारीणां सह निष्क्रम्य प्रव्रज्याम् उपयास्यति // MvyC_67

प्राणिनां तत्र समये सहस्राणि शतानि च प्रव्रज्याम् उपयास्यन्ति मैत्रेयस्यानुशासने // MvyC_68

ततः कारुणिकः शास्ता मैत्रेयो द्विपदोत्तमः समितिं व्यवलोक्याथ इदम् अर्थं प्रवक्ष्यति // MvyC_69

सर्वे ते शाक्यमुनिना मुनिश्रेष्ठेन तायिना अर्थतो लोकनाथेन दृष्टाः सद्धर्मधातुना रोपिता मोक्षमार्गणे विक्षिप्ता मम शासने // MvyC_70

छत्त्रध्वजपताकाभिर् गन्धमाल्यानुलेपनैः कृत्वा शाक्यमुनेः पूजां ह्य् आगता मम शासने // MvyC_71

कुङ्कुमोदकरसेन चन्दनेनानुलेपनम् दत्त्वा शाक्यमुनेः स्तूपे ह्य् आगता मम शासने // MvyC_72

बुद्धं धर्मं च सङ्घं च गत्वा तु शरणं सदा कृत्वा तु कुशलं कर्म आगता मम शासने // MvyC_73

śikṣāpadāni samādāya x śākyamuniśāsane प्रतिपाल्य यथाभूतं ह्य् आगता मम शासने // MvyC_74

दत्त्वा सङ्घे च दानानि चीवरपानभोजनम् विचित्रं ग्लानभैषज्यं ह्य् आगता मम शासने // MvyC_75

चतुर्दशीं पञ्चदशीं पक्षस्येहाष्टमीं तथा प्रातिहारकपक्षं च अष्टाङ्गं सुसमाहितम् उपवासम् उपोषित्वा ह्य् आगता मम शासने // MvyC_76

प्रातिहार्यत्रयेणासौ श्रावकान् वेदयिष्यति सर्वे ते ह्य् अस्रवान् धर्मान् क्षपयिष्यन्ति x x x // MvyC_77

प्रथमः सन्निपातो ऽस्य श्रावकाणां भविष्यति पूर्णाः षण्नवतिः कोट्यः श्रावकाणां भवच्छिदाम् // MvyC_78

द्वितीयः सन्निपातो ऽस्य श्रावकाणां भविष्यति पूर्णाश् चतुर्नवतिः कोट्यो मुक्तानां क्लेशबन्धनात् // MvyC_79

तृतीयः सन्निपातो ऽस्य श्रावकाणां भविष्यति पूर्णा द्वानवतिः कोट्यो मुक्तानां शान्तचेतसाम् // MvyC_80

धर्मचक्रं प्रवर्त्याथ विनीय सुरमानुषान् सार्धं श्रावकसङ्घेन पुरे पिण्डं चरिष्यति // MvyC_81

ततः प्रविशतस् तस्य रम्यां केतुमतीपुरीम् मान्दारवाणि पुष्पानि पतिष्यन्ति नरोत्तमे देवताः प्रकरिष्यन्ति तस्मिन् पुरगते मुनौ // MvyC_82

चत्वारश् च महाराजाः शक्रश् च त्रिदशाधिपः ब्रह्मदेवगणैः सार्धं पूजां तस्य करिष्यति // MvyC_83

उत्पलकुमुदपद्मपुण्डरीकसुगन्धिकम् अगुरुं चन्दनं चैव दिव्यमालास् तथैव च // MvyC_84

चैलक्षेपं करिष्यन्ति देवपुत्रा महर्द्धिकाः तं लोकनाथम् उद्वीक्ष्य प्रविशन्तं पुरोत्तमम् // MvyC_85

पथि भूमिः स्थिता तत्र मृदुतूलपिचूपमा विचित्रं च श्रुतं माल्यं विस्तरिष्यन्ति ते पथि // MvyC_86

छत्त्रध्वजपताकानि गन्धमाल्यानुलेपनैः श्रुतैश् च तूर्यनिर्घोषैः प्रसन्नमनसो नराः शास्तुः पूजां करिष्यन्ति देवपुत्रा महर्द्धिकाः // MvyC_87

स च शक्रः सहस्राक्षो देवराजो महाद्युतिः प्रहृष्टः प्राञ्जलिं कृत्वा स्तोष्यते लोकनायकम् // MvyC_88

नमस् ते पुरुषाजन्य नमस् ते पुरुषोत्तम अनुकम्पस्व जनतां भगवन्न् अग्रपुद्गल // MvyC_89

महर्द्धिको देवपुत्रस् तस्य मारो भविष्यति स चैव प्राञ्जलिं कृत्वा स्तोष्यते लोकनायकम् // MvyC_90

ब्राह्मणपरिवारेण ब्रह्मा चैव पुरस्कृतः कथयिष्यति सद्धर्मं ब्रह्मघोषम् उदीरयन् // MvyC_91

आकीर्णा पृथिवी सर्वा अर्हद्भिश् च भविष्यति क्षीणास्रवैर् वान्तदोषैः प्रहीणभवबन्धनैः // MvyC_92

हृष्टा देवा मनुष्याश् च गन्धर्वा यक्षराक्षसाः शास्तुः पूजां करिष्यन्ति नागाश् चापि महर्द्धिकाः // MvyC_93

ते च नूनं भविष्यन्ति अखिलाश् छिन्नसंचयाः छिन्नस्रोता अनादीना उत्तीर्नाभवसागराः ब्रह्मचर्यं चरिष्यन्ति मैत्रेयस्यानुशसने // MvyC_94

ते वै नूनं भविष्यन्ति अममा अपरिग्रहाः अजातरूपरजता अनिकेता असंस्तवाः ब्रह्मचर्यं चरिष्यन्ति मैत्रेयस्यानुशसने // MvyC_95

ते वै नूनं भविष्यन्ति छिन्नजालविशक्तिकाः ध्यानानि चोपसंपद्य प्रीतिसौख्यसमन्विताः ब्रह्मचर्यं चरिष्यन्ति मैत्रेयस्यानुशसने // MvyC_96

षष्टिवर्षसहस्राणि मैत्रेयो द्विपदोत्तमः देशयिष्यति सद्धर्मं सर्वभूतानुकम्पकम् // MvyC_97

शतलक्षसहस्राणि प्राणिनं स विनायकः विनयित्वा च सद्धर्मं ततो निर्वाणम् एष्यति // MvyC_98

parinirvṛtasya x x tasyaiva x mahāmuneḥ दशवर्षसहस्राणि सद्धर्मः स्थास्यते तदा // MvyC_99

प्रसादयित्वा चित्तानि तस्मिन् शाक्यमुनौ जिने ततो द्रक्ष्यथ मैत्रेयं संबुद्धं द्विपदोत्तमम् // MvyC_100

इदम् आश्चर्यकं श्रुत्वा इमाम् ऋद्धिम् अनुत्तमाम् को विद्वान् न प्रसीदेत अतिकृष्णाभिजातिकः // MvyC_101

तस्माद् इहात्मकामेन माहात्म्यम् अभिकाङ्क्षिणा सद्धर्मो गुरुकर्तव्यः स्मरता बुद्धशासनम् // MvyC_102

मैत्रेयव्याकरणं समाप्तम् // ये धर्मा (एत्च्.) // चीनदेशीविनिर्गतः भिक्षु पुण्यकीर्तिर् यद् अत्र पुण्यं तद् भवत्व् आचार्योपाध्यायमातापितृपूर्वङ्गमं क्र्त्वा सकलसत्त्वराशेर् अनुत्तरज्ञानफलाप्तय इति // श्रीमद् गोपालदेवराज्यसंवत् 57 फाल्गुन दिने 9 घोसलीग्रामे लिखति / ओं हारीती महायक्षिणी हर हर मम सर्वपापानि स्वाहा //

ओं नमो मैत्रेयनाथाय //

एवं मया श्रुतम् एकस्मिं समये भगवान् राजगृहे विहरति स्म / वेणुवने कलन्दकनिवासे महता भिक्षुसंघेन सार्धम् अर्धत्रयोदशभिर् भिक्षुशतैः //

अथ खल्व् आयुष्माञ्

छारिपुत्र महाप्रज्ञो धर्मसेनापतिर् विभुः लोकस्य अनुकम्पार्थं शास्तारं परिपृच्छति // MvyK_1

यो ऽसाव् अनागतो बुद्धो निर्दिष्टो लोकनायकः मैत्रेय इति नाम्ना ऽसौ सूत्रपूर्वापरान्तिके // MvyK_2

तस्याहं विस्तरञ् चैवं श्रोतुम् इच्छामि नायक ऋद्धिञ् चास्यानुभावञ् च तन् मे ब्रूहि नरोत्तम // MvyK_3

अथैनम् अवदच् छास्ता व्याकरिष्याम्य् अहं तव विस्तरन् तस्य बुद्धस्य मैत्रेयस्य शृणोहि मे // MvyK_4

उदधिस् तेन कालेन द्वात्रिंशत्शतयोजनः शोषम् आयास्यते यस्माच् चक्रवर्ती यथा ह्य् असौ // MvyK_5

दशयोजनसाहस्रा जम्बुद्वीपो भवैष्यति आलयः सर्वभूतानां विस्तरेण समन्ततः // MvyK_6

ऋद्धिस्फीता जनपदा अदण्डा अनुपद्रवाः तत्र काले भविष्यन्ति नरास् ते शुभकर्मिनः // MvyK_7

अकण्टका वसुमती समाहरितशाद्वला उन्नमन्ती नमन्ती च मृदुतूलपिचूपमा // MvyK_8

अकृष्टोत्पद्यते शालिमधुनाश् च सुगन्धि च चैलवृक्षा भविष्यन्ति नानारङ्गोपशोभिताः // MvyK_9

पुष्पपत्रफलोत्पता वृक्षाश् च क्रोशम् उच्छ्रिताः अशीतिवर्षसहस्राणि आयुस् तेषां भविष्यति // MvyK_10

निरामयाश् च ते सत्वा वीतशोका महोत्सवाः वर्णवन्तो महाशख्या महानागबलाच् चिताः // MvyK_11

त्रया रोगा भविष्यन्ति इच्छा अनशनं जरा पञ्चवर्षशता कन्या स्वामिनम् वरयिष्यति // MvyK_12

तदा केतुमती नाम राजधानी भविष्यति आवासः शुद्धसत्वानां प्राणिनां शुभकर्मिणम् // MvyK_13

योजनद्वादशायामं सप्तयोजनविस्तरम् नगरं कृतपुण्यानां भविष्यति मनोरमम् // MvyK_14

सप्तरत्नमयाश् चैव प्रकाराः क्रोशम् उच्चिताः इष्टका द्वारखण्डानां नानारत्नविभूषिताः // MvyK_15

परिषाश् च भविष्यन्ति रत्न इष्टकसंचिताः पद्मोत्पलसमान् कीर्णाश् चक्रवाकोपशोभिताः // MvyK_16

समन्ततः परिवृताः सप्तभिस् तलापङ्क्तिभिः चतूरत्नमयास् तालाः किंकिणी जालशोभिताः // MvyK_17

वातेनेरिततालेभ्यस् तदा श्रुति मनोहराः भविष्यन्ति शुभा शब्दा तूर्यास् पञ्चाङ्गिका इव // MvyK_18

ये च तस्मिन् पुरे मर्त्याः क्रीडारतिसुखान्विताः तेनैव तालशब्देन क्रीडिष्यन्ति प्रमोदिताः // MvyK_19

पुष्करिणो भविष्यन्ति कुमुदोत्पलसंचेताः उद्यानवनसंपन्नं भविष्यति च तत् पुरम् // MvyK_20

भविष्यति तदा राजा शम्खो नाम महाद्युतिः महाबलचक्रवर्ती चतुर्द्वीपेश्वरः प्रभुः // MvyK_21

चतुरङ्गबलोपेतः सप्तरत्नसमन्वितः पूर्णसहस्रपुत्राणां तस्य राज्ञो भविष्यति // MvyK_22

इमां समुद्रपर्यन्ताम् अदण्डेन वसुन्धराम् पालयिष्यति धर्मेण समेन स नराधिपः // MvyK_23

महानिधानाश् चत्वारो नयुतशतलक्षिताः भविष्यन्ति तदा तस्य राज्ञः शंखस्य भूपतेः // MvyK_24

पिङ्गलश् च कलिङ्गेषु मिथिलायाम् च पाण्डुकः एलापत्रश् च गान्धारे शंखो वाराणसीपुरे // MvyK_25

चतुर्भिर् एभिर् निधिभिः स राजा सुसमन्वितः भविष्यति महावीरः शतपुण्यफलार्पितः // MvyK_26

ब्राह्मणस् तस्य राज्ञो ऽथ सुब्रह्मा नाम्ना पुरोहितः बहुश्रुतश् चतुर्वेदी उपध्यायो भविष्यति // MvyK_27

अध्यापको मन्त्रधरः स्मृतिवान् वेदपारगः कैटाभे च स निर्घण्टे पदव्याकरणे तथा // MvyK_28

तस्य ब्रह्मवती नाम तदा भार्या भविष्यति दर्शनीया प्रासादिका अभिरूपा यशस्विनी // MvyK_29

तुषितेभ्यस् ततश् च्युत्वा मैत्रेयो ह्य् अग्रपुद्गलः तस्याः कुक्षौ स नियतं प्रतिसन्धिं ग्रहिष्यति // MvyK_30

दश मासांश् च निखिलान् धारयित्वा महाद्युतिम् सुपुष्पिते च उद्याने गत्वा मैत्रेयमातरः // MvyK_31

न निषण्णा निपन्ना वा स्थिता सा ब्रह्मचारिणी द्रुमस्य शाखाम् आलम्ब्य मैत्रेयं जनयिष्यति // MvyK_32

निष्क्रमिष्यति पार्श्वेन दक्षिणाङ्गे नरोत्तमः अभ्रकूटाद् यथा सूर्यो निर्गतश् च प्रभायते // MvyK_33

करिष्यते समालोकं सनरामरवन्दितः अलिप्तो गर्भपङ्केन पद्मं चैव यथाम्भुवा त्रैधातुकम् इदं सर्वं प्रभया पूरयिष्यति // MvyK_34

पदे पदे निधानं च पद्मं पद्मं भविष्यति दिशश् चतस्रो उद्वीक्ष्य वाचं प्रव्याहरिष्यति इयं मे पश्चिमा जातिर् नास्ति भूयः पुनर्भवः // MvyK_35

न पुनर् आगमिष्यामि निर्वास्यामि निराश्रवः शीतोष्णवारिधाराभिः स्नापयिष्यन्ति पुन्नगाः // MvyK_36

दिव्यासुराणि पुष्पाणि पतिष्यन्ति नभस्तलात् श्वेतं तस्य सुराश् छत्त्रं धारयिष्यन्ति मूर्धनि // MvyK_37

हृष्टश् चैव सहस्राक्षो देवराजः शचीपतिः प्रग्रहीष्यति कुमारं तं द्वात्रिंशलक्ष्णान्वितम् श्रिया ज्वलन्तं मैत्रेयं मातुर् हस्ते प्रदास्यति // MvyK_38

मनोरमां च शिविकां नानारत्नविभुषिताम् आरूढां पुत्रसहितां वहिष्यन्ति च देवताः // MvyK_39

ततस् तूर्यसहस्रेषु वाद्यमानेषु तत्पुरम् प्रविष्टमात्रे मैत्रेये पुष्पवर्षं पतिष्यति // MvyK_40

तस्मिंश् च दिवसे नार्यो गुर्विण्यः प्रसविष्यन्ति सर्वास् ता जनयिष्यन्ति पुत्रान् क्षेमेण स्वस्तिना // MvyK_41

दृष्ट्वैवं पुत्रं सुब्रह्मा द्वात्रिंशद्वरलक्षणम् प्रत्यवेक्ष्य सुमन्त्रेण ततः प्रीतो भविष्यति // MvyK_42

गतिद्वयं कुमारस्य यथा मन्त्रेषु दृश्यते नराधिपश् चक्रवर्ती बुद्धो वा द्वीपदोत्तमः // MvyK_43

स च यौवनसंप्राप्तो मैत्रेयो ह्य् अग्रपुद्गलः चिन्तयिष्यति धर्मात्मा दुःखिता खल्व् इयं प्रजा // MvyK_44

ब्रह्मस्वरो महावेगो हेमवर्णो महाद्युतिः विशालचक्षुः पीनाङ्गः पद्मपत्त्रनिभेदेक्षणः // MvyK_45

उच्छ्रयेण हस्ताशीतिः कायस् तस्य भविष्यति विस्तारं विंशतिर् हस्ता ततो ऽर्धम् मुखमण्डलम् // MvyK_46

अशीतिभिश् चतुर्भिश् च सहस्रैः स पुरस्कृतः माणवानां स मैत्रेयो मन्त्रान् अध्यापयिष्यति // MvyK_47

ततः शङ्खो महाराजो यूपम् उच्छ्रापयिष्यति षोडशव्यामविस्तारम् ऊर्ध्वव्यामसहस्रकम् // MvyK_48

स तं यूपं नरपतिर् नानारत्नविभूषितम् सप्तरत्नसमाकीर्णं ब्राह्मणेभ्यः प्रदास्यति // MvyK_49

तच् च रत्नमयं यूपं दत्तमात्रं मनोरमम् ब्राह्मणानां सहस्राणि विकरिष्यन्ति तत्क्षणात् // MvyK_50

तस्य यूपस्य मैत्रेयो दृष्ट्वा चैनाम् अनित्यताम् कृत्स्नं विचिन्त्य संसारं प्रव्रज्यां रोचयिष्यति // MvyK_51

यत्व् अहं प्रव्रजित्वेह स्पृशेयम् अमृतं पदम् विमोचयेयं जनतां व्याधिमृत्युजराभयात् // MvyK_52

अशीतिभिश् चतुर्भिश् च सहस्रैः संपुरस्कृतः निःक्रमिष्यति मैत्रेयः प्रव्रज्यार्थम् अग्रपुद्गलः // MvyK_53

नागवृक्षस् तदा तस्य बोधिवृक्षो भविष्यति पञ्चाशद्योजनास् तस्य ऊर्ध्वं शाखाः भविष्यन्ति षट्क्रोशविटपाद्यानि विधूतानि समन्ततः // MvyK_54

तस्य मूले निषण्णो ऽसौ मैत्रेयो द्विपदोत्तमः अनुत्तरां च संबोधिं प्राप्स्यते नात्र संशयः // MvyK_55

अष्टाङ्गोपेतया वाचा ततः स पुरुषोत्तमः देशयिष्यति सद्धर्मं सर्वदुःखापहं शिवम् // MvyK_56

दुःखं दुःखसमुत्पादं दुःखस्य समतिक्रमम् आर्याष्टाङ्गिकं मार्गं क्षेमं निर्वाणगामिनम् // MvyK_57

प्रसन्नां जनतां दृष्ट्वा सत्यानि कथयिष्यति तथास्य धर्मं संश्रुत्वा प्रतिपद्यन्ति शासने // MvyK_58

सुपुष्पिते च उद्याने सन्निपातो भविष्यति संपूर्णं योजनशतं पर्षत् तस्य भविष्यति // MvyK_59

ततः श्रुत्वा नरपतिः शंखो नाम महायशाः दत्त्वा दानम् असंख्येयं प्रव्रज्यां रोचयिष्यति // MvyK_60

अशीतिभिश् चतुर्भिश् च सहस्रैः स पुरस्कृतः नराधिपो ऽपि निष्क्रम्य प्रव्रज्याम् उपयास्यति // MvyK_61

तेनैव च प्रमाणेन मानवानां पुरस्कृतः मैत्रेयस्य पिता चैव प्रव्रज्याम् उपयास्यति // MvyK_62

ततो गृहपतिस् तत्र सुधनो नाम विश्रुतः प्रव्रजिष्यति धर्मात्मा सहस्रैः परिवारितः // MvyK_63

स्त्रीरत्नम् अथ शंखस्य विशाखा नाम विश्रुता अशीतिभिश् चतुर्भिश् च सहस्रैः सा पुरस्कृता नारीणां सह निष्क्रम्य प्रव्रज्याम् उपयास्यति // MvyK_64

प्राणिनां तत्र समये सहस्राणि शतानि च प्रव्रज्याम् उपयास्यन्ति मैत्रेयस्यानुशासने // MvyK_65

ततः कारुणिकः शास्ता मैत्रेयो द्विपदोत्तमः समितिं व्यवलोक्याथ इदम् अर्थं प्रवक्ष्यते // MvyK_66

सर्वे ते शाक्यमुनिना मुनिश्रेष्ठेन तायिना अर्थतो लोकनाथेन दृष्टाः सद्धर्मधातुना आरोपिता मोक्षमार्गे निक्षिप्ता मम शासने // MvyK_67

छत्रध्वजपताकाभिर् गन्धमाल्यानुलेपनैः कृत्वा शाक्यमुनेः पूजां ह्य् आगता मम शासने // MvyK_68

कुंकुमोदकसेकेन चन्दनेनानुलेपनम् दत्त्वा शाक्यमुनेः स्तूपे ह्य् आगता मम शासने // MvyK_69

बुद्धं धर्मं च संघं च गत्वा तु शरणं सदा कृत्वा तु कुशलं कर्म ह्य् आगता मम शासने // MvyK_70

शिक्षापदान् समादाय शाक्यसिंहस्य शासने प्रतिपाद्य यथाभूतं ह्य् आगता मम शासने // MvyK_71

दत्त्वा संघे च दानानि चीवरं पानभोजनम् विचित्रं ग्लानभैषज्यं ह्य् आगता मम शासने // MvyK_72

चतुर्दशीं पञ्चदशीं पक्षस्येहाष्टमीं तथा प्रातिहारकपक्षं च अष्टाङ्गं सुसमाहितः उपवासम् उपोष्येह ह्य् आगता मम शासने // MvyK_73

प्रातिहार्यत्रयेणासौ श्रावकान् विनयिष्यति सर्वे ते सास्रवान् धर्मान् क्षययिष्यन्ति सुरताः // MvyK_74

प्रथमः सन्निपातो ऽस्य श्रावकाणां भविष्यति पूर्णाः षण्नवति कोट्यः श्रावकाणां भविष्यति // MvyK_75

द्वितीयः सन्निपातो ऽस्य श्रावकाणां भविष्यति पूर्णाश् चतुर्नवति कोट्यः क्लेशमुक्ता क्षणाट् // MvyK_76

तृतीयः सन्निपातो ऽस्य श्रावकाणां भविष्यति पूर्णा द्वानवति कोट्यो मुक्तानां शान्तचेतसाम् // MvyK_77

धर्मचक्रं प्रवर्त्याथ विनीय सुरमानुषान् सार्धं श्रावकसंघेन पुरे पिण्डं चरिष्यति // MvyK_78

ततः प्रवेशतस् तस्य रम्यां केतुमतीपुरीम् मान्दारवाणि पुष्पानि पतिष्यन्ति पुरोत्तमे देवताः प्रक्रमिष्यन्ति तस्मिन् पुरे गते मुनौ // MvyK_79

चत्वारश् च महाराजानः शक्रश् च त्रिदशाधिपः ब्रह्म देवगणैः सार्धं पूजां तस्य विधास्यति // MvyK_80

उत्पलं कुमुदं पद्मं पुण्डरीकं सुगन्धिकम् अगुरुं चन्दनं चैव दिव्यमाल्यं तथैव च // MvyK_81

चैलक्षेपं विधास्यन्ति देवपुत्रा महर्द्धिकाः तं लोकनाथम् उद्वीक्ष्य प्रविशन्तं पुरोत्तमम् // MvyK_82

पथि तत्र स्थिता भूमिर् मृदुस् तूलपिचूपमा विचित्रं च ततो माल्यं विकरिष्यन्ति ते पथि // MvyK_83

छत्त्रध्वजपताकाभिर् गन्धमाल्यानुलेपनैः शुभैश् च तूर्यनिर्घोषैः प्रसन्नमनसो नराः शास्तुः पूजां करिष्यन्ति देवपुत्रा महर्द्धिकाः // MvyK_84

स च शक्रः सहस्राक्षो देवराजो महाद्युतिः प्रहृष्टः प्राञ्जलिं कृत्वा स्तोष्यते लोकनायकम् // MvyK_85

नमस् ते पुरुषसिंह नमस् ते पुरुषोत्तम अनुकम्पस्व जनतां भगवन्न् अग्रपुद्गल // MvyK_86

महर्द्धिको देवपुत्रस् तस्य मारो भविष्यति स चैव प्राञ्जलिं भूत्वा स्तोष्यते लोकनायकम् // MvyK_87

शुद्धावाससहस्रैश् च बहुभिः परिवारितः प्रवेक्षते केतुमतीं मैत्रेयो लोकनन्दनः // MvyK_88

ब्राह्मणपरिवारेण ब्रह्मा चैव पुरस्कृतः कथयिष्यति सद्धर्मं ब्रह्मघोषम् उदीरयन् // MvyK_89

आकीर्णा पृथिवी सर्वा अर्हद्भिश् च भविष्यति क्षीणास्रवैर् वान्तदोषैः प्रहीणभवबन्धनैः // MvyK_90

हृष्टा देवमनुष्याश् च गन्धर्वा यक्षराक्षसाः शास्तुः पूजां करिष्यन्ति नागाश् चापि महर्द्धिकाः // MvyK_91

ते वै नूनं भविष्यन्ति अखिलाश् छिन्नसंशयाः छिन्नस्रोता अनादाता उत्तीर्ना भवसागरात् ब्रह्मचर्यं चरिष्यन्ति मैत्रेयस्यानुशसने // MvyK_92

ते वै नूनं भविष्यन्ति अममा अपरिग्रहाः अजातरूपरजता अनिकेता असंभवाः ब्रह्मचर्यं चरिष्यन्ति मैत्रेयस्यानुशसने // MvyK_93

ते वै नूनं भविष्यन्ति छिन्नजालम् अशक्तिकाः ध्यानान्य् उपसंपाद्य प्रीतिसौख्यसमन्विताः ब्रह्मचर्यं चरिष्यन्ति मैत्रेयस्यानुशसने // MvyK_94

षष्टिवर्षसहस्राणि मैत्रेयो द्विपदोत्तमः देशयिष्यति सद्धर्मं सर्वभूतानुकम्पकः // MvyK_95

शतलक्षसहस्राणि प्राणिनं स विनायकः विनयित्वा च सद्धर्मे ततो निर्वाणम् एष्यति // MvyK_96

परिनिर्वृतस्य तस्यैव मैत्रेयस्य महामुनेः दशवर्षसहस्राणि सद्धर्मः स्थास्यते तदा // MvyK_97

प्रसादयिष्यथ चित्तानि तस्मिं शाक्यमुनौ जिने ततो द्रक्ष्यथ मैत्रेयं संबुद्धं द्विपदोत्तमम् // MvyK_98

इदम् आश्चर्यकं श्रुत्वा इमाम् ऋद्धिम् अनुत्तमाम् को विद्वान् न प्रसीदेत अपि कृष्णाभिजातिकः // MvyK_99

तस्माद् इहात्मकामेन माहात्म्यम् अभिकांक्षता सद्धर्मो गुरुकर्तव्यः स्मरतां बुद्धशासनम् // MvyK_100

इति मैत्रेयव्याकरणं नाम महायानसूत्रं समाप्तम् । ये धर्मा हेतुप्रभवा हेतु तेषां तथागतो ह्य् अवदत् । तेषां च यो निरोध एवंवादी महाश्रमणः ॥ शुभम् अस्तु ॥ अब्देग्लावग्निद्विरदे शित माघे गुहानने । पूषायां पूष्णदिवसे सर्व्वानन्द समाप्त कृत् ॥