चर्यासंग्रहप्रदीप

दीपंकर: चर्यासंग्रहप्रदीप

चर्यासङ्ग्रहप्रदीपः (च्स्प्)

नमो लोकेश्वराय

मदाद्यशेषमूढानां यस्य वचनरश्मिभिः / फुल्लतामेति हृत्पद्मं तं वन्दे पुरुषोत्तमम् // csp_1 //

पारमिं गुह्यमन्त्रं च श्रित्वा बोधिः प्रसिध्यति / गुरुबुद्धोक्तितस्त्वेवं तदर्थो लिख्यते मया // csp_2 //

गुह्यमन्त्रो ऽत्र नो वाच्यः पारमीनयचारिकाः / बोधिसत्त्वस्य चर्यास्तु समासेन लिखाम्यहम् // csp_3 //

धीमतः संवरो ग्राह्यो बोधिचित्तपुरः सरः / आलोक्याशेषसूत्राणि शास्त्रं श्रव्यं समस्तकम् // csp_4 //

कायेन मनसा वाचा यथोक्तान् संवरान् त्रिभिः / रक्षेदक्षुण्णशुद्धांश्च शीलांश्च परिशोधयेत् // csp_5 //

भक्तमात्रां विजानीयाद् इन्द्रियद्वारमावरेत् / रात्रेः पूर्वे ऽपरे भागे न सुप्त्वा योगमाचरेत् // csp_6 //

अणुमात्रेष्ववद्येषु ह्यतिमात्रं बिभेति च / रात्रेर्भागत्रयं कृत्वा ह्यन्त्ये भागे तु जागृयात् // csp_7 //

प्रक्षालयेन्मुखादीन् वाक्षालनं वापि युज्यते / सुखासनं समाश्रित्य धर्माणां धर्मतां स्मरेत् // csp_8 //

निमित्तैः क्षोभतो ऽशक्ये तूत्त्थायाभासवस्तुषु / मायावत्त्वेन सम्प्रेक्ष्य पुण्ययोगांस्तदन्तरे // csp_9 //

पूरयेच्चापि सप्ताङ्गान् विपुलां प्रणिधिं चरेत् / भावयेद् भावनां पूर्वा काले ऽथ भोजनस्य च // csp_10 //

एतन्निः सारकायेन परं सारं गवेषयन् / कायं नौकाधिया रक्षेद् न भुङ्क्तां स्थूलताकृते // csp_11 //

रसासक्त्या न भुञ्जीत चतुर्धान्नं विभज्य च / देवेभ्यो विनिवेद्यादिं धर्मपालाय तत्परम् // csp_12 //

बलिं सुविपुलां दद्यात् शेषं स्वभुक्तपीततः / दद्याच्च सर्वभूतेभ्यः कथातन्त्रं तदन्तरे // csp_13 //

कुर्यादद्भुतवार्त्ता च किञ्चिदुत्थाय सञ्चरेत् / परिक्रामेदधिष्ठानं जपं वा ग्रन्थवाचनम् // csp_14 //

सुगतप्रतिमां कुर्याद् यावत् स्वेदो न जायते / कुर्यात्, प्रदक्षिणां तावद् अक्षुब्धः प्रणिधिं बहुम् // csp_15 //

धर्मचर्या दशप्रोक्ताः मैत्रेयेण, समासतः / चरेदक्षिप्तचित्तेन मायौपम्यं च संस्मरन् // csp_16 //

यदि स्यात् पूजयेत् सङ्घं कुर्याद् वा बालकोत्सवम् / अनाथेभ्यः सुदानं तु योगिने पुण्यसञ्चयः // csp_17 //

पूर्णेषु दिनकृत्येषु भागे च प्रथमे निशः / धर्मता निष्प्रपञ्चापि तथा चित्तं च योजयेत् // csp_18 //

प्राप्तायां मध्यरात्रौ च उत्थानाभाससञ्ज्ञया / सिंहनिद्रा यथा तद्वत् शुभनिद्रां समाश्रयेत् // csp_19 //

प्रायो ध्यानदृढे चित्ते कायवाक्पुण्यगौणता / असंस्पृष्टे समाधौ वा लोककल्पप्रवृत्तये // csp_20 //

कायपुण्यं यथाशक्ति, लोकचित्ते ऽसमे सति / धर्मो नायं ममैवेति सुसदाशयपूर्वकम् // csp_21

धर्माश्च लौकिकान् पृच्छेद्, निजमित्रसमीरितः / नेपालविषये कृतवान्, रतिर्मन्त्रनये न चेद् // csp_22 // एवं स्थविर ! कर्त्तव्यम् /23, अ / चर्यासङ्ग्रहप्रदीपो महापण्डिताचार्य - दीपङ्कर - श्रीज्ञानकृतः समाप्तः /