चित्तविशुद्धिप्रकरण

आर्यदेव: चित्तविशुद्धिप्रकरण

चित्तविशुद्धिप्रकरण (च्व्प्)

[अनादिनिधनं शान्तं भावाभावविवर्जितम् / निर्विकल्पं निरालम्बमनवस्थितमद्वयम् // cvp_1 //

अदृष्टान्तमनाख्यानमचिन्त्यमनिदर्शनम् / अनाश्रयाप्रतिष्ठानं निर्विकारमसंस्कृतम् // cvp_2 //

सर्वेषामाश्रयं बुद्धं करुणामयविग्रहम् / नानाधिमुक्तसत्त्वानां नानोपायप्रदर्शकम् // cvp_3 //

महारागं नमस्कृत्य पद्मनर्तेश्वरं प्रभुम् / इह स्तोकं प्रवक्ष्यामि स्वचित्तप्रत्यवेक्षणात् // cvp_4 //

योगाचारस्य नयतः सर्वमेव सुनिश्चितम् / तत्सर्वमिह वक्तव्यं तस्मादेवत्समाचरेत्] // cvp_5 //

येन येन हि बन्ध्यन्ते जन्तवो रौद्रकर्मणा / सोपायेन तु तेनैव मुच्यन्ते भवबन्धनात् // cvp_6 //

[विशुद्धेरेव सत्त्वस्य विशुद्धं जायते फलम्] / महायाने सुविस्पष्टमुक्तमेतत्सुविस्तरम् // cvp_7 //

धर्मपुद्गलनैरात्म्यं चित्तमात्रं जगौ मुनिः / ततो ऽपि सर्वमुत्पन्नमागमात्यनुकूलकम् // cvp_8 //

भावग्राहग्रहावेशगृहीतान्प्रतिचोदितः / आगमे ऽपि हि सुव्यक्तो विस्तरः करुणात्मना // cvp_9 //

मनःपूर्वङ्गमा धर्मा मनःश्रेष्ठा मनोजवाः / मनसा हि प्रसन्नेन भाषते वा करोति वा // cvp_10 //

स्वपिता भिक्षुणा वृद्धः शीघ्रं गच्छेति प्रेरितः / पतनाच्च मृते तस्मिन्नानन्तर्येण युज्यते // cvp_11 //

सुम्लानेनार्हतादिओष्टो मङ्गलं परिपीडय / उपस्थायकभिक्षुः स मृते तस्मिन्न दोषभाक् // cvp_12 //

अन्धसंज्ञया नान्धांस्तु मारयन्दोषमश्रुते / इत्युक्तं विनये व्यक्तं न दोषो ऽदुष्टचेतसाम् // cvp_13 //

न स्तूपखनने दोषस्तत्संस्कारधिया यतः / केवलं पुण्यराशिः स्यादुपानन्तर्यकारणात् // cvp_14 //

उपानद्युगलं दत्त्वा मुनेर्मूर्ध्नि शुभाशयात् / अपनीय तथा चान्धो राज्यं फलमवाप्नुतः // cvp_15 //

तस्मादाशयमूला हि पापपुण्यव्यवस्थितिः / इत्युक्तमागमे यस्मान्नापत्तिः शुभचेतसाम् // cvp_16 //

स्वाधिदैवतयोगात्मा जगदर्थक्वतोद्यमः / भुञ्जानो विषयान् योगी मुच्यते न च लिप्यते // cvp_17 //

यथैव विषतत्त्वज्ञो विषमालोक्य भक्षयन् / केवलं मुह्यते नासौ रोगमुक्तश्च जायते // cvp_18 //

मायामरीचिगन्धर्वनगरस्वप्रसन्निभम् / जगत्सर्वं समालोक्य किं कथं केन भुज्यते // cvp_19 //

बाला रज्यन्ति रूपेषु वैराग्यं यान्ति मध्यमाः / स्वभावज्ञा विमुच्यन्ते रूपस्योत्तमबुद्धयः // cvp_20 //

विचिन्त्य समयं सर्वं देवतापूजनाविधिम् / शुद्धमालोक्य निःशङ्कं भोक्तव्यं मन्त्रचोदितम् // cvp_21 //

शोध्यं बोध्यं तथा दीप्यमक्षरत्रययोगतः / अङ्गुष्ठानामिकाग्राभ्यां प्रीणयेच्च तथागतान् // cvp_22 //

यत्सत्यमिति बालानां तन्मिथ्या खलु योगिनाम् / गच्छन्नन्तमनेनैव न बद्धो न च मुच्यते // cvp_23 //

संसारं चैव निर्वाणं मन्यन्ते ऽतत्त्वदर्शिनः / न संसारं न निर्वाणं मन्यन्ते ऽतत्त्वदर्शिनः // cvp_24 //

विकल्पो हि महाग्राहः संसारोदधिपातकः / अविकल्पा महात्मानो मुच्यन्ते भवबन्धनात् // cvp_25 //

शङ्काविषेण बाध्यन्ते विषेणेव पृथग्जनाः / तामेवोत्खात्य निर्मूलं विचरेत्करुणात्मकः // cvp_26 //

यथैव स्फटिकः स्वच्छः पररागेण रज्यते / तथैव चित्तरत्नं तु कल्पनारागरञ्जितम् // cvp_27 //

प्रकृत्या कल्पनारागैर्विविक्तं चित्तरत्नकम् / आदिशुद्धमनुत्पन्नं निःस्वभावमनाविलम् // cvp_28 //

तत्तद्यत्नेन कर्तव्यं यद्यद्बालैर्विगर्हितम् / स्वाधिदैवतयोगेन चित्तनिर्मलकारणात् // cvp_29 //

रागाग्निविषसंमुग्धा योगिनां शुभचेतसा / कामिताः खलु कामिन्यः काममोक्षफलावहाः // cvp_30 //

यथा स्वगरूडं ध्यात्वा विषमाकृष्य संपिबन् / करोति निर्विषं साध्यं न विषेणाभिभूयते // cvp_31 //

द्वादशयोजनव्यासं चक्रं वै शिरसि भ्रमत् / बोधिचित्तं समुत्पाद्य अपनीतमिति श्रुतिः // cvp_32 //

बोधिचित्तं समुत्पाद्य सम्बोधौ कृतचेतसा / तत्रास्ति यन्न कर्तव्यं जगदुद्वरणाशया // cvp_33 //

आदिशुद्धमनुत्पन्नं निःस्वभावमनाविलम् / जगद्भावेन सम्पश्यन्न बद्धो न च मुच्यते // cvp_34 //

विचिन्त्य विधिवद्योगी देवतागुणविस्तरम् / रज्यते रागचित्तेन रागभोगेण मुच्यते // cvp_35 //

किं कुर्मः कुत्र वै लभ्या विचित्रा भावशक्तयः / विषाक्रान्तो यथा कश्चिद्विषेणैव तु निर्विषः // cvp_36 //

कर्णाज्जलं जलेनैव कण्टकेनैव कण्टकम् / रागेणैव तथारागमुद्वरन्ति मणीषिणः // cvp_37 //

यथैव रजको वस्त्रं मलेनैव तु निर्मलम् / कुर्याद्विज्ञस्तथात्मानं मलेनैव तु निर्मलम् // cvp_38 //

यथा भवति संशुद्धो रजोनिर्घृष्टदर्पणः / सेवितस्तु तथा विज्ञैर्दोषो दोषविनाशनः // cvp_39 //

लोहपिण्डो जले क्षिप्तो मज्जत्येव तु केवलम् / पात्रीकृतो स एवान्धं तारयेत्तरति स्वयम् // cvp_40 //

तव्दत्पात्रीकृतं चित्तं प्रज्ञोपायविधानतः / भुञ्जानो मुच्यते कामो मोचयत्यपरानपि // cvp_41 //

दुर्विज्ञैः सेवितः कामः कामो भवति बन्धनम् / स एव सेवितो विज्ञैः कामो मोक्षप्रसाधकः // cvp_42 //

प्रसिद्धं सकले लोके क्षीरं विषविनाशनम् / तदेव फणिभिः पीतं सुतरां विषवर्धनम् // cvp_43 //

जले क्षीरं यथाविष्टं हंसो पिबति पण्डितः / सविषान् विषायांस्तद्वद् भुक्त्वा मुक्तश्च पण्डितः // cvp_44 //

यथैव विधिवद्भुक्तं विषमप्यमृतायते / दुर्भुक्तं घृतपूरादि बालानान्तु विषायते // cvp_45 //

इदमेव हि यच्चित्तं शोधितं हेतुभिः शुभैः / निर्विकल्पं निरालम्बं भाति प्रकृतिनिर्मलम् // cvp_46 //

यथा वह्निः कृशोप्येष तैलवर्त्यादिसंस्कृतः / दीपो निर्मलनिष्कम्पः स्थिरस्तिमिरनाशनः // cvp_47 //

वटबीजं यथा सूक्ष्मं सहकारसमन्वितम् / शाखामूलफलोपेतं महावृक्षविधायकम् // cvp_48 //

हरिद्राचूर्णसंयोगाद्वर्णान्तरमिति स्मृतम् / प्रज्ञोपायसमायोगाद्धर्मधातुं तथा विदुः // cvp_49 //

घृतं च मधुसंयुक्तं समांशं विषतां व्रजेत् / तदेव विधिवद्भुइक्तमुत्कृष्टं तु रसायनम् // cvp_50 //

रसघृष्टं यथा ताम्रं निर्दोषं काञ्चनं भवेत् / ज्ञानशुद्ध्या तथा क्लेशाः सम्यक् कल्याणकारकाः // cvp_51 //

हीनयानाभिरूढानां मृत्युशङ्का पदे पदे / संग्रामजयचित्तस्तु दूर एव व्यवस्थितः // cvp_52 //

महायानाभिरूढस्तु करुणाधर्मवर्मितः / प्रज्ञातन्तुधनुर्बाणो जगदुड्वरणाशयः // cvp_53 //

महासत्त्वो महोपायः स्थिरबुद्विरतन्द्रितः / जित्वा दुस्तरसङ्ग्रामं तारयेदपरानपि // cvp_54 //

पशवो ऽपि हि क्लिश्यन्ते स्वार्थमात्रपरायणाः / जगदर्थविधातारो धन्यास्ते विरला जनाः // cvp_55 //

शीतवातादिदुःखानि सहन्ते स्वार्थलम्पटाः / जगदर्थप्रवृत्तास्ते न सहन्ते कथं नु ते // cvp_56 //

नारकाण्यपि दुःखानि सोढव्यानि कृपालुभिः / शीतवातादिदुःखानि कस्तान्यपि विचारयेत् // cvp_57 //

न कष्टकल्पनां कुर्यान्नोपवासेन च क्रियाम् / स्नानं शौचं न चैवात्र ग्रामधर्मं विवर्जयेत् // cvp_58 //

नखदन्तास्थिमज्जानः पितुः शुक्रविकारजाः / मांसशोणितकेशादि मातृशोणितसम्भवम् // cvp_59 //

इत्थमशुचिसम्भूतः पिण्डो यो ऽशुचिपूरितः / कथं संस्तादृशः कायो गङ्गास्नानेन शुध्यति // cvp_60 //

न ह्यशुचिर्घटस्तोयैः क्षालितो ऽपि पुनः पुनः / तद्वदशुचिसम्पूर्णः पिण्डो ऽपि न विशुध्यति // cvp_61 //

प्रतरन्नपि गङ्गायां नैव श्वा शुद्धिमर्हति / तद्दद्वर्मधियां पुंसां तीर्थस्नानं तु निष्फलम् // cvp_62 //

धर्मो यदि भवेत्स्नानात्कैवर्तानां कृतार्थता / नक्तन्दिवं जलस्थानां मत्स्यादीनां तु का कथा // cvp_63 //

पापक्षयो ऽपि स्नानेन नैव स्यादिति निश्चयः / यतो रागादिवृद्धिस्तु दृश्यते तीर्थसेविनाम् // cvp_64 //

रागो द्वेषश्च मोहश्च ईर्ष्या तृष्णा च सर्वदा / पापानां मूलमाख्यातं नैषां स्नानेन शोधनम् // cvp_65 //

आत्मात्मीयग्रहादेते सम्भवन्तीह जन्मिनः / अविद्याहेतुकः सो ऽपि साविद्या भ्रान्तिरिष्यते // cvp_66 //

रौप्यबुद्धिर्यथा शुक्तौ शुक्तिदृष्टौ निवर्तते / नैरात्म्यदर्शनात्सापि निर्मूलमवसीदति // cvp_67 //

सर्पबुद्धिर्यथा रज्जौ रज्जुदृष्टौ निवर्तते / सर्पबुद्धिः पुनस्तत्र नैव स्यादिह जन्मनि // cvp_68 //

सत्त्वबुद्धिस्तथात्रापि वज्रज्ञानान्निवर्तते / न भावः सम्भवेत्तत्र दग्धबीज इवाङ्कुरः // cvp_69 //

नैरात्म्यशुचिसङ्गातः पिण्डः प्रकृतिनिर्मलः / तस्य सन्तापने धर्मः कष्टं बालैर्विकल्पितः // cvp_70 //

चन्द्रोदयव्ययञ्जापि अपेक्ष्य तिथिकल्पना / सूर्योदयव्ययेनापि दिवारात्रिव्यवस्थितिः // cvp_71 //

पूर्वादिव्यवहारो ऽपि कल्पनापेक्षया कृतः / ग्रहनक्षत्रराश्यादि सर्वलोकैर्विकल्पितम् // cvp_72 //

शीतोष्णवर्षणापेक्षा तथैव ऋतुकल्पना / स्वकर्मफलभोगो ऽयं शुभाशुभग्रहोदितः // cvp_73 //

अविद्याकर्दमालिप्तं चित्तचिन्तामणिं पुमान् / प्रवृत्तः क्षालितुं विद्वान् को ऽविद्यां वृंहयेत्पुनः // cvp_74 //

न ग्रहतिथिनक्षत्रदेशकालाद्यपेक्षणम् / विहरेन्निर्विकल्पस्तु निर्निमित्तमशङ्कितः // cvp_75 //

यद्यदिन्द्रियमार्गत्वं यायात्तत्तत्स्वभावतः / सुसमाहितयोगेन सर्वं बुद्धमयं वदेत् // cvp_76 //

चक्षुर्वैरोचनो बुद्धः श्रवणं वज्रसूर्यकः / घ्राणं च परमाश्वस्तु पद्मनर्तेश्वरो मुखम् // cvp_77 //

कायः श्रीहेरुको राजा वज्रसत्त्वश्च मानसम् / एवं सम्यक् सदा योगी विचरेत्करुणात्मकः // cvp_78 //

सिद्धान्ती निर्विकल्पो ऽसौ स्थिरकल्पस्तु धीधनः / यथेष्टचेष्टाव्यापारः सर्वभुक् सर्वकृत्तथा // cvp_79 //

सर्वकामक्रियाकारी यथारुचितचेष्टितः / उत्थितो वा निषणो वा चङ्क्रमन्वा स्वपंस्तथा // cvp_80 //

अमण्डलप्रविष्टो वा सर्वावरणवानपि / स्वाधिदैवतयोगात्मा मन्दपुण्यो ऽपि सिध्यति // cvp_81 //

अनेन सर्वसौरित्वं सर्वबुद्धत्वमेव वा / जन्मनीहैव तत्त्वज्ञः सम्प्राप्नोति न संशयः // cvp_82 //

यथा प्राकृतलोकेन योगिलोको न बाध्यते / बाध्यन्ते धीविशेषेण योगिनो ऽप्युत्तरोत्तरैः // cvp_83 //

महाप्रज्ञामहोपायमहाकृपाधिमोक्षतः / महायानसमुद्दिष्टं महासत्त्वस्य गोचरम् // cvp_84 //

यत्कल्पानामसंख्येयैर्न प्राप्तं बहुभिर्मतम् / जन्मन्यत्रैव बुद्धत्वं प्राप्यते नात्र संशयः // cvp_85 //

महायानस्य माहात्म्यं पुण्यज्ञानेन सम्भृतम् / सर्वज्ञत्वं पदं रम्यं सद्यो जन्मनि लभ्यते // cvp_86 //

आगमश्रुतिचिन्ता तु महायाने न गृह्यते / आशयानुशयाभेदाद् यानाभेदः प्रकाश्यते // cvp_87 //

अन्य एवाधिमोक्षो ऽयं तथान्या बोधिचारिका / अन्या चित्तविशुद्धिश्च फलमन्धदिहोच्यते // cvp_88 //

समीपे निर्मलादर्शे रूपं निर्मलचक्षुषः / यथा भाति सुविस्पष्टं स्वच्छप्रकृतिनिर्मलम् // cvp_89 //

विधूतकल्पनाजालविष्प्रष्टशुद्धचेतसां / योगिनाञ्च तथा ज्ञानं प्रज्ञानिर्मलदर्पणैः // cvp_90 //

सूर्यकान्तिसमाश्लिष्टसूर्यकान्तमणौ यथा / सहसा प्रज्वलत्यग्निः समथः स्वार्थसाधने // cvp_91 //

अपास्तकल्पनाजालं सूर्यकान्तनिभं मनः / प्रज्ञासूर्यां शुसंश्लिष्टं तद्वज्ज्वलति योगिनाम् // cvp_92 //

काष्ठद्वयनिघर्षेण यथा ज्वलति पावकः / आदिमध्यान्तसंशुद्धः सर्ववस्तुप्रकाशकः / प्रज्ञोपायसमायोगाद्योगिज्ञानं तथा विदुः // cvp_93 //

यथैवैकः प्रदीपो ऽयं वर्त्त्यन्तरसमाश्रितः / यथास्वार्थं यथास्थानं करोत्युच्चैः प्रकाशनम् // cvp_94 //

स्फुरणानन्तमूर्तिस्तु प्रज्ञोपायविभावनैः / नानाधिमुक्तसत्त्वानां यथाकृत्यमनुष्ठयेत् // cvp_95 //

विधि ज्ञोहि यथा कश्चित्क्षीरादमृतमुद्धरेत् / निर्दोषं शीतलं हृद्यं सर्वव्याधिविनाशनम् // cvp_96 //

प्रज्ञाक्षीरमहोपायाद्विधिवन्मथनोत्थितः / विशुद्धधर्मधातुः स सुखासुखविनाशनः // cvp_97 //

यथा लता समुद्भूता फलपुष्पसमन्विता / तथैकक्षणसम्बोधिः सम्भारद्वयसंयुता // cvp_98 //

[वशद्वेषगतिस्तम्भ] वर्षणाकर्षणादिकम् / मद्यमांसरतो योगी कुर्वन्नाप्युपलिप्यते // cvp_99 //

[हस्तकङ्कणबिम्बाय कि]मादर्शः समीक्ष्यते / महायाने यतो ऽद्यापि मन्त्रसामर्थ्यदर्शनम् // cvp_100 //

मातृदुहितृसम्बन्ध[स्तत्त्वतो ऽत्र न कल्प्यते / भग्नायोधूपवर्त्तीव] जगदाह तथागतः // cvp_101 //

पञ्चभूतात्मकं शुक्रं शोणितञ्चापि तादृशम् / तन्मयः खलु पिण्डो ऽयं को विप्रः कश्च वान्त्यजः // cvp_102 //

[पञ्चस्कन्धात्मकं सर्वं]शरीरं खलु भिक्षवः / अनित्यं दुःखशून्यञ्च न जातिर्न च जातिमान् // cvp_103 //

कैवर्त्तीगर्भम्भूतः कश्चिञ्चा[ण्डालजातिमान् / तपसा ब्राह्मणो जातस्तस्माज्जातिरकारणम् // cvp_104 //

स्वसारं मातरं श्वश्रूं स्वपुत्रीं भागिनेयिकाम् / ब्राह्मणीं क्षत्रियां वैश्यां विधिज्ञानेन शूद्रिकाम्] // cvp_105 //

एकाङ्गविकलां हीनां गर्हीतामन्त्यजामपि / योषितं पूजयेन्नित्यं ज्ञानवज्रप्रभावनैः // cvp_106 //

[सर्वदा स्मितवक्रेण मन्त्रविस्तृतचक्षुषा / सम्बोधौ चित्तमुत्पाद्यस्वाधिदैवतभावतः // cvp_107 //

पश्येद्दृश्यं क्षणंकिञ्चिच्छोतव्यं शृणुयात्तथा / सत्यासत्यवियुक्तं तुवदेद्वाक्यमतन्द्रितः] // cvp_108 //

स्नानाभ्यञ्जनवस्त्रादिखानपानादियन्ततः / स्वाधिदैवतयोगेनचिन्तयेत्पूजनाविधिम् // cvp_109 //

[गीतंवाद्यं तथा नृत्यं सोपायेन व्रती भजेत् / अकुर्वन्निह भावेषुसर्वेष्वभिनिवेशनम् // cvp_110 //

स्वात्मभावप्रहाणेनतापयेन्न तपस्यया] / सुखाद्यथा सुखंध्यायेत्सम्बुद्धो ऽयमनागतः // cvp_111 //

सर्वकामोपभोगैस्तु रमथमुक्तितो ऽभयात् / मा भैष्ट नास्ति वः पापंसमयो दुरतिक्रमः // cvp_112 //

मन्त्रसंस्कृतकाष्ठादिदेवत्वमधिगच्छति / किं पुनः ज्ञानवान् कायःकष्टं मोहविचेष्टितम् // cvp_113 //

प्राकृतत्वमहङ्कारंपरित्यज्य समाहितः / प्रज्ञोपायविधानेनक्रियामिमां समाचरेत् // cvp_114 //

पङ्कजातं यथा पद्मंपङ्कदोषैर्न लिप्यते / विकल्पवासनादोषैस्तथायोगी न लिप्यते // cvp_115 //

[विकल्पोविम्बसङ्काशो दृष्टिदोषैर्न लिप्यते / अन्भसा लिप्यते नैवयद्वदुदकचन्द्रमाः] // cvp_116 //

अनादिवासनापङ्कैर्विलिप्तंचित्तरत्नकम् / प्रज्ञोपायजलेनैव[क्षालितंसम्प्रकाशते] // cvp_117 //

स्वाधिदेवतयोगस्यस्थिरचित्तस्य धीमतः / मुक्तः कुदृष्टिमेघैश्चभासते चित्तभास्करः // cvp_118 //

[प्रज्ञालक्ष्मपरिच्छेदेभूतार्थस्य विनिश्चयात् / धर्मधातुरुपादेयो ऽविद्याव्यत्ययवर्जनात् // cvp_119 //

प्रज्ञामुद्गरविध्वस्ते]सहसा कल्पनाघटे / प्रकृत्या निर्मलः स्वच्छोज्ञानदीपः प्रकाशते // cvp_120 //

सुप्रसिद्धानि भूतानिक्षित्यग्निजलवायवः / क्रियन्ते ह्यन्यथाविज्ञैर्मन्त्रसामर्थ्ययोगतः // cvp_121 //

सर्ववादं परित्यज्यमन्त्रवादं समाचरेत् / यस्य मन्त्रस्यसामर्थ्यात्सौख्यभावो ऽपि सिध्यति // cvp_122 //

त्रिरत्नं न परित्याज्यंबोधिचित्तं तथा गुरुः / न वध्याः प्राणिनः के ऽपिसमयान्यप्यधिष्ठयेत् // cvp_123 //

मधु रक्तं सकर्पूरंरक्तचन्दनयोजितम् / मुनिवज्रोदकं चैवपञ्चैतान्यप्यधिष्ठयेत् // cvp_124 //

अन्यैश्चसमयैर्दिव्यैश्चित्तस्योत्कर्षकारकैः / मारुतक्षोभशान्त्यर्थंप्रीणयेच्चित्तवज्रकम् // cvp_125 //

[नाशुचिभावआशङ्क्यो ऽविकल्प्ययोगलीलया / समायुक्तेन चित्तेन मन्त्रीसर्वं समाचरेत्] // cvp_126 //

मक्षिकापदमात्रेणविषेणाप्यभिभूयते / अणुमात्रा घृणा शङ्कामृत्युकष्टेन संयुता // cvp_127 //

सुयुद्धं वाचरेद्विज्ञःसुपलायनमेव वा / आन्तरालिकभावस्तु व्यर्थोवै पतनं भवेत् // cvp_128 //

गुरोराज्ञाञ्च मुद्राञ्चछायामपि न लङ्घयेत् / गुणास्तस्य परं ग्राह्या दोषानैव कदाचन // cvp_129 //

आचार्यः परमो देवःपूजनीयः प्रयत्नतः / स्वयं वज्रधरो राजासाक्षाद्रूपेण संस्थितः // cvp_130 //

यथोदकमणिः शुद्धःकलुषोदकशोधकः / श्रद्धामणिस्तथाप्रोक्तश्चित्तरत्नविशोधकः // cvp_131 //

श्रद्धावान्मुह्यते को ऽपिप्रज्ञाचक्षुर्विवर्जितः / उत्पादयेदतःप्रज्ञामागमाधिगमात्मिकाम् // cvp_132 //

श्राद्धो बहुश्रुतः प्राज्ञःप्रकृत्या करुणात्मकः / जगद्दुःखविनाशायसुखोपायं स विन्दति // cvp_133 //

चित्तविशुद्धिमाधाययन्मयोपार्जितं सुखम् / चित्तविशुद्धिमाधाय तेनास्तुसुखितो जनः // cvp_134 //

// कृतिरियमार्यदेवपादानामिति //