20. Sedamocanagāthā (PLI-TV-PVR20)

Parivāra

20. Sedamocanagāthā

1. Avippavāsapañhā

Asaṁvāso bhikkhūhi ca bhikkhunīhi ca,

Sambhogo ekacco tahiṁ na labbhati;

Avippavāsena anāpatti,

Pañhā mesā kusalehi cintitā.

Avissajjiyaṁ avebhaṅgiyaṁ,

Pañca vuttā mahesinā;

Vissajjantassa paribhuñjantassa anāpatti,

Pañhā mesā kusalehi cintitā.

Dasa puggale na vadāmi,

Ekādasa vivajjiya;

Vuḍḍhaṁ vandantassa āpatti,

Pañhā mesā kusalehi cintitā.

Na ukkhittako na ca pana pārivāsiko,

Na saṅghabhinno na ca pana pakkhasaṅkanto;

Samānasaṁvāsakabhūmiyā ṭhito,

Kathaṁ nu sikkhāya asādhāraṇo siyā;

Pañhā mesā kusalehi cintitā.

Upeti dhammaṁ paripucchamāno,

Kusalaṁ atthūpasañhitaṁ;

Na jīvati na mato na nibbuto,

Taṁ puggalaṁ katamaṁ vadanti buddhā;

Pañhā mesā kusalehi cintitā.

Ubbhakkhake na vadāmi,

Adho nābhiṁ vivajjiya;

Methunadhammapaccayā,

Kathaṁ pārājiko siyā;

Pañhā mesā kusalehi cintitā.

Bhikkhu saññācikāya kuṭiṁ karoti,

Adesitavatthukaṁ pamāṇātikkantaṁ;

Sārambhaṁ aparikkamanaṁ anāpatti,

Pañhā mesā kusalehi cintitā.

Bhikkhu saññācikāya kuṭiṁ karoti,

Desitavatthukaṁ pamāṇikaṁ;

Anārambhaṁ saparikkamanaṁ āpatti,

Pañhā mesā kusalehi cintitā.

Na kāyikaṁ kiñci payogamācare,

Na cāpi vācāya pare bhaṇeyya;

Āpajjeyya garukaṁ chejjavatthuṁ,

Pañhā mesā kusalehi cintitā.

Na kāyikaṁ vācasikañca kiñci,

Manasāpi santo na kareyya pāpaṁ;

So nāsito kinti sunāsito bhave,

Pañhā mesā kusalehi cintitā.

Anālapanto manujena kenaci,

Vācāgiraṁ no ca pare bhaṇeyya;

Āpajjeyya vācasikaṁ na kāyikaṁ,

Pañhā mesā kusalehi cintitā.

Sikkhāpadā buddhavarena vaṇṇitā,

Saṅghādisesā caturo bhaveyyuṁ;

Āpajjeyya ekapayogena sabbe,

Pañhā mesā kusalehi cintitā.

Ubho ekato upasampannā,

Ubhinnaṁ hatthato cīvaraṁ paṭiggaṇheyya;

Siyā āpattiyo nānā,

Pañhā mesā kusalehi cintitā.

Caturo janā saṁvidhāya,

Garubhaṇḍaṁ avāharuṁ;

Tayo pārājikā eko na pārājiko,

Pañhā mesā kusalehi cintitā.

2. Pārājikādipañhā

Itthī ca abbhantare siyā,

Bhikkhu ca bahiddhā siyā;

Chiddaṁ tasmiṁ ghare natthi,

Methunadhammapaccayā;

Kathaṁ pārājiko siyā,

Pañhā mesā kusalehi cintitā.

Telaṁ madhuṁ phāṇitañcāpi sappiṁ,

Sāmaṁ gahetvāna nikkhipeyya;

Avītivatte sattāhe,

Sati paccaye paribhuñjantassa āpatti;

Pañhā mesā kusalehi cintitā.

Nissaggiyena āpatti,

Suddhakena pācittiyaṁ;

Āpajjantassa ekato,

Pañhā mesā kusalehi cintitā.

Bhikkhū siyā vīsatiyā samāgatā,

Kammaṁ kareyyuṁ samaggasaññino;

Bhikkhu siyā dvādasayojane ṭhito,

Kammañca taṁ kuppeyya vaggapaccayā;

Pañhā mesā kusalehi cintitā.

Padavītihāramattena vācāya bhaṇitena ca,

Sabbāni garukāni sappaṭikammāni;

Catusaṭṭhi āpattiyo āpajjeyya ekato,

Pañhā mesā kusalehi cintitā.

Nivattho antaravāsakena,

Diguṇaṁ saṅghāṭiṁ pāruto;

Sabbāni tāni nissaggiyāni honti,

Pañhā mesā kusalehi cintitā.

Na cāpi ñatti na ca pana kammavācā,

Na cehi bhikkhūti jino avoca;

Saraṇagamanampi na tassa atthi,

Upasampadā cassa akuppā;

Pañhā mesā kusalehi cintitā.

Itthiṁ hane na mātaraṁ,

Purisañca na pitaraṁ hane;

Haneyya anariyaṁ mando,

Tena cānantaraṁ phuse;

Pañhā mesā kusalehi cintitā.

Itthiṁ hane ca mātaraṁ,

Purisañca pitaraṁ hane;

Mātaraṁ pitaraṁ hantvā,

Na tenānantaraṁ phuse;

Pañhā mesā kusalehi cintitā.

Acodayitvā assārayitvā,

Asammukhībhūtassa kareyya kammaṁ;

Katañca kammaṁ sukataṁ bhaveyya,

Kārako ca saṅgho anāpattiko siyā;

Pañhā mesā kusalehi cintitā.

Codayitvā sārayitvā,

Sammukhībhūtassa kareyya kammaṁ;

Katañca kammaṁ akataṁ bhaveyya,

Kārako ca saṅgho sāpattiko siyā;

Pañhā mesā kusalehi cintitā.

Chindantassa āpatti,

Chindantassa anāpatti;

Chādentassa āpatti,

Chādentassa anāpatti;

Pañhā mesā kusalehi cintitā.

Saccaṁ bhaṇanto garukaṁ,

Musā ca lahu bhāsato;

Musā bhaṇanto garukaṁ,

Saccañca lahu bhāsato;

Pañhā mesā kusalehi cintitā.

3. Pācittiyādipañhā

Adhiṭṭhitaṁ rajanāya rattaṁ,

Kappakatampi santaṁ;

Paribhuñjantassa āpatti,

Pañhā mesā kusalehi cintitā.

Atthaṅgate sūriye bhikkhu maṁsāni khādati,

Na ummattako na ca pana khittacitto;

Na cāpi so vedanāṭṭo bhaveyya,

Na cassa hoti āpatti;

So ca dhammo sugatena desito,

Pañhā mesā kusalehi cintitā.

Na rattacitto na ca pana theyyacitto,

Na cāpi so paraṁ maraṇāya cetayi;

Salākaṁ dentassa hoti chejjaṁ,

Paṭiggaṇhantassa thullaccayaṁ;

Pañhā mesā kusalehi cintitā.

Na cāpi āraññakaṁ sāsaṅkasammataṁ,

Na cāpi saṅghena sammuti dinnā;

Na cassa kathinaṁ atthataṁ tattheva,

Cīvaraṁ nikkhipitvā gaccheyya aḍḍhayojanaṁ;

Tattheva aruṇaṁ uggacchantassa anāpatti,

Pañhā mesā kusalehi cintitā.

Kāyikāni na vācasikāni,

Sabbāni nānāvatthukāni;

Apubbaṁ acarimaṁ āpajjeyya ekato,

Pañhā mesā kusalehi cintitā.

Vācasikāni na kāyikāni,

Sabbāni nānāvatthukāni;

Apubbaṁ acarimaṁ āpajjeyya ekato,

Pañhā mesā kusalehi cintitā.

Tissitthiyo methunaṁ taṁ na seve,

Tayo purise tayo anariyapaṇḍake;

Na cācare methunaṁ byañjanasmiṁ,

Chejjaṁ siyā methunadhammapaccayā;

Pañhā mesā kusalehi cintitā.

Mātaraṁ cīvaraṁ yāce,

No ca saṅghe pariṇataṁ;

Kenassa hoti āpatti,

Anāpatti ca ñātake;

Pañhā mesā kusalehi cintitā.

Kuddho ārādhako hoti,

Kuddho hoti garahiyo;

Atha ko nāma so dhammo,

Yena kuddho pasaṁsiyo;

Pañhā mesā kusalehi cintitā.

Tuṭṭho ārādhako hoti,

Tuṭṭho hoti garahiyo;

Atha ko nāma so dhammo,

Yena tuṭṭho garahiyo;

Pañhā mesā kusalehi cintitā.

Saṅghādisesaṁ thullaccayaṁ,

Pācittiyaṁ pāṭidesanīyaṁ;

Dukkaṭaṁ āpajjeyya ekato,

Pañhā mesā kusalehi cintitā.

Ubho paripuṇṇavīsativassā,

Ubhinnaṁ ekupajjhāyo;

Ekācariyo ekā kammavācā,

Eko upasampanno eko anupasampanno;

Pañhā mesā kusalehi cintitā.

Akappakataṁ nāpi rajanāya rattaṁ,

Tena nivattho yena kāmaṁ vajeyya;

Na cassa hoti āpatti,

So ca dhammo sugatena desito;

Pañhā mesā kusalehi cintitā.

Na deti na paṭiggaṇhāti,

Paṭiggaho tena na vijjati;

Āpajjati garukaṁ na lahukaṁ,

Tañca paribhogapaccayā;

Pañhā mesā kusalehi cintitā.

Na deti na paṭiggaṇhāti,

Paṭiggaho tena na vijjati;

Āpajjati lahukaṁ na garukaṁ,

Tañca paribhogapaccayā;

Pañhā mesā kusalehi cintitā.

Āpajjati garukaṁ sāvasesaṁ,

Chādeti anādariyaṁ paṭicca;

Na bhikkhunī no ca phuseyya vajjaṁ,

Pañhā mesā kusalehi cintitā.

Sedamocanagāthā niṭṭhitā.

Tassuddānaṁ

Asaṁvāso avissajji,

Dasa ca anukkhittako;

Upeti dhammaṁ ubbhakkhakaṁ,

Tato saññācikā ca dve.

Na kāyikañca garukaṁ,

na kāyikaṁ na vācasikaṁ;

Anālapanto sikkhā ca,

ubho ca caturo janā.

Itthī telañca nissaggi,

bhikkhu ca padavītiyo;

Nivattho ca na ca ñatti,

na mātaraṁ pitaraṁ hane.

Acodayitvā codayitvā,

chindantaṁ saccameva ca;

Adhiṭṭhitañcatthaṅgate,

na rattaṁ na cāraññakaṁ.

Kāyikā vācasikā ca,

tissitthī cāpi mātaraṁ;

Kuddho ārādhako tuṭṭho,

saṅghādisesā ca ubho.

Akappakataṁ na deti,

Na detāpajjatī garuṁ;

Sedamocanikā gāthā,

Pañhā viññūhi vibhāvitāti.