19. Dutiyagāthāsaṅgaṇika (PLI-TV-PVR19)

Parivāra

19. Dutiyagāthāsaṅgaṇika

1. Kāyikādiāpatti

Kati āpattiyo kāyikā,

Kati vācasikā katā;

Chādentassa kati āpattiyo,

Kati saṁsaggapaccayā.

Chāpattiyo kāyikā,

Cha vācasikā katā;

Chādentassa tisso āpattiyo,

Pañca saṁsaggapaccayā.

Aruṇugge kati āpattiyo,

Kati yāvatatiyakā;

Katettha aṭṭha vatthukā,

Katihi sabbasaṅgaho.

Aruṇugge tisso āpattiyo,

Dve yāvatatiyakā;

Ekettha aṭṭha vatthukā,

Ekena sabbasaṅgaho.

Vinayassa kati mūlāni,

Yāni buddhena paññattā;

Vinayagarukā kati vuttā,

Duṭṭhullacchādanā kati.

Vinayassa dve mūlāni,

yāni buddhena paññattā;

Vinayagarukā dve vuttā,

dve duṭṭhullacchādanā.

Gāmantare kati āpattiyo,

Kati nadipārapaccayā;

Katimaṁsesu thullaccayaṁ,

Katimaṁsesu dukkaṭaṁ.

Gāmantare catasso āpattiyo,

Catasso nadipārapaccayā;

Ekamaṁse thullaccayaṁ,

Navamaṁsesu dukkaṭaṁ.

Kati vācasikā rattiṁ,

Kati vācasikā divā;

Dadamānassa kati āpattiyo,

Paṭiggaṇhantassa kittakā.

Dve vācasikā rattiṁ,

Dve vācasikā divā;

Dadamānassa tisso āpattiyo,

Cattāro ca paṭiggahe.

2. Desanāgāminiyādiāpatti

Kati desanāgāminiyo,

Kati sappaṭikammā katā;

Katettha appaṭikammā vuttā,

Buddhenādiccabandhunā.

Pañca desanāgāminiyo,

Cha sappaṭikammā katā;

Ekettha appaṭikammā vuttā,

Buddhenādiccabandhunā.

Vinayagarukā kati vuttā,

Kāyavācasikāni ca;

Kati vikāle dhaññaraso,

Kati ñatticatutthena sammuti.

Vinayagarukā dve vuttā,

Kāyavācasikāni ca;

Eko vikāle dhaññaraso,

Ekā ñatticatutthena sammuti.

Pārājikā kāyikā kati,

kati saṁvāsakabhūmiyo;

Katinaṁ ratticchedo,

paññattā dvaṅgulā kati.

Pārājikā kāyikā dve,

dve saṁvāsakabhūmiyo;

Dvinnaṁ ratticchedo,

paññattā dvaṅgulā duve.

Katattānaṁ vadhitvāna,

katihi saṅgho bhijjati;

Katettha paṭhamāpattikā,

ñattiyā karaṇā kati.

Dve attānaṁ vadhitvāna,

dvīhi saṅgho bhijjati;

Dvettha paṭhamāpattikā,

ñattiyā karaṇā duve.

Pāṇātipāte kati āpattiyo,

Vācā pārājikā kati;

Obhāsanā kati vuttā,

Sañcarittena vā kati.

Pāṇātipāte tisso āpattiyo,

Vācā pārājikā tayo;

Obhāsanā tayo vuttā,

Sañcarittena vā tayo.

Kati puggalā na upasampādetabbā,

Kati kammānaṁ saṅgahā;

Nāsitakā kati vuttā,

Katinaṁ ekavācikā.

Tayo puggalā na upasampādetabbā,

Tayo kammānaṁ saṅgahā;

Nāsitakā tayo vuttā,

Tiṇṇannaṁ ekavācikā.

Adinnādāne kati āpattiyo,

Kati methunapaccayā;

Chindantassa kati āpattiyo,

Kati chaḍḍitapaccayā.

Adinnādāne tisso āpattiyo,

Catasso methunapaccayā;

Chindantassa tisso āpattiyo,

Pañca chaḍḍitapaccayā.

Bhikkhunovādakavaggasmiṁ,

pācittiyena dukkaṭā;

Katettha navakā vuttā,

katinaṁ cīvarena ca.

Bhikkhunovādakavaggasmiṁ,

Pācittiyena dukkaṭā katā;

Caturettha navakā vuttā,

Dvinnaṁ cīvarena ca.

Bhikkhunīnañca akkhātā,

Pāṭidesaniyā kati;

Bhuñjantāmakadhaññena,

Pācittiyena dukkaṭā kati.

Bhikkhunīnañca akkhātā,

Aṭṭha pāṭidesanīyā katā;

Bhuñjantāmakadhaññena,

Pācittiyena dukkaṭā katā.

Gacchantassa kati āpattiyo,

Ṭhitassa cāpi kittakā;

Nisinnassa kati āpattiyo,

Nipannassāpi kittakā.

Gacchantassa catasso āpattiyo,

Ṭhitassa cāpi tattakā;

Nisinnassa catasso āpattiyo,

Nipannassāpi tattakā.

3. Pācittiya

Kati pācittiyāni,

sabbāni nānāvatthukāni;

Apubbaṁ acarimaṁ,

āpajjeyya ekato.

Pañca pācittiyāni,

sabbāni nānāvatthukāni;

Apubbaṁ acarimaṁ,

āpajjeyya ekato.

Kati pācittiyāni,

sabbāni nānāvatthukāni;

Apubbaṁ acarimaṁ,

āpajjeyya ekato.

Nava pācittiyāni,

sabbāni nānāvatthukāni;

Apubbaṁ acarimaṁ,

āpajjeyya ekato.

Kati pācittiyāni,

sabbāni nānāvatthukāni;

Kati vācāya deseyya,

vuttā ādiccabandhunā.

Pañca pācittiyāni,

sabbāni nānāvatthukāni;

Ekavācāya deseyya,

vuttā ādiccabandhunā.

Kati pācittiyāni,

sabbāni nānāvatthukāni;

Kati vācāya deseyya,

vuttā ādiccabandhunā.

Nava pācittiyāni,

sabbāni nānāvatthukāni;

Ekavācāya deseyya,

vuttā ādiccabandhunā.

Kati pācittiyāni,

sabbāni nānāvatthukāni;

Kiñca kittetvā deseyya,

vuttā ādiccabandhunā.

Pañca pācittiyāni,

sabbāni nānāvatthukāni;

Vatthuṁ kittetvā deseyya,

vuttā ādiccabandhunā.

Kati pācittiyāni,

sabbāni nānāvatthukāni;

Kiñca kittetvā deseyya,

vuttā ādiccabandhunā.

Nava pācittiyāni,

sabbāni nānāvatthukāni;

Vatthuṁ kittetvā deseyya,

vuttā ādiccabandhunā.

Yāvatatiyake kati āpattiyo,

Kati vohārapaccayā;

Khādantassa kati āpattiyo,

Kati bhojanapaccayā.

Yāvatatiyake tisso āpattiyo,

Cha vohārapaccayā;

Khādantassa tisso āpattiyo,

Pañca bhojanapaccayā.

Sabbā yāvatatiyakā,

Kati ṭhānāni gacchanti;

Katinañceva āpatti,

Katinaṁ adhikaraṇena ca.

Sabbā yāvatatiyakā,

Pañca ṭhānāni gacchanti;

Pañcannañceva āpatti,

Pañcannaṁ adhikaraṇena ca.

Katinaṁ vinicchayo hoti,

katinaṁ vūpasamena ca;

Katinañceva anāpatti,

katihi ṭhānehi sobhati.

Pañcannaṁ vinicchayo hoti,

pañcannaṁ vūpasamena ca;

Pañcannañceva anāpatti,

tīhi ṭhānehi sobhati.

Kati kāyikā rattiṁ,

Kati kāyikā divā;

Nijjhāyantassa kati āpatti,

Kati piṇḍapātapaccayā.

Dve kāyikā rattiṁ,

Dve kāyikā divā;

Nijjhāyantassa ekā āpatti,

Ekā piṇḍapātapaccayā.

Katānisaṁse sampassaṁ,

paresaṁ saddhāya desaye;

Ukkhittakā kati vuttā,

kati sammāvattanā.

Aṭṭhānisaṁse sampassaṁ,

Paresaṁ saddhāya desaye;

Ukkhittakā tayo vuttā,

Tecattālīsa sammāvattanā.

Kati ṭhāne musāvādo,

kati paramanti vuccati;

Kati pāṭidesanīyā,

katinaṁ desanāya ca.

Pañca ṭhāne musāvādo,

Cuddasa paramanti vuccati;

Dvādasa pāṭidesanīyā,

Catunnaṁ desanāya ca.

Kataṅgiko musāvādo,

kati uposathaṅgāni;

Kati dūteyyaṅgāni,

kati titthiyavattanā.

Aṭṭhaṅgiko musāvādo,

aṭṭha uposathaṅgāni;

Aṭṭha dūteyyaṅgāni,

aṭṭha titthiyavattanā.

Kativācikā upasampadā,

Katinaṁ paccuṭṭhātabbaṁ;

Katinaṁ āsanaṁ dātabbaṁ,

Bhikkhunovādako katihi.

Aṭṭhavācikā upasampadā,

Aṭṭhannaṁ paccuṭṭhātabbaṁ;

Aṭṭhannaṁ āsanaṁ dātabbaṁ,

Bhikkhunovādako aṭṭhahi.

Katinaṁ chejjaṁ hoti,

katinaṁ thullaccayaṁ;

Katinañceva anāpatti,

sabbesaṁ ekavatthukā.

Ekassa chejjaṁ hoti,

catunnaṁ thullaccayaṁ;

Catunnañceva anāpatti,

sabbesaṁ ekavatthukā.

Kati āghātavatthūni,

katihi saṅgho bhijjati;

Katettha paṭhamāpattikā,

ñattiyā karaṇā kati.

Nava āghātavatthūni,

navahi saṅgho bhijjati;

Navettha paṭhamāpattikā,

ñattiyā karaṇā nava.

4. Avandanīyapuggalādi

Kati puggalā nābhivādetabbā,

Añjalisāmicena ca;

Katinaṁ dukkaṭaṁ hoti,

Kati cīvaradhāraṇā.

Dasa puggalā nābhivādetabbā,

Añjalisāmicena ca;

Dasannaṁ dukkaṭaṁ hoti,

Dasa cīvaradhāraṇā.

Katinaṁ vassaṁvuṭṭhānaṁ,

dātabbaṁ idha cīvaraṁ;

Katinaṁ sante dātabbaṁ,

katinañceva na dātabbaṁ.

Pañcannaṁ vassaṁvuṭṭhānaṁ,

dātabbaṁ idha cīvaraṁ;

Sattannaṁ sante dātabbaṁ,

soḷasannaṁ na dātabbaṁ.

Katisataṁ rattisataṁ,

āpattiyo chādayitvāna;

Kati rattiyo vasitvāna,

mucceyya pārivāsiko.

Dasasataṁ rattisataṁ,

āpattiyo chādayitvāna;

Dasa rattiyo vasitvāna,

mucceyya pārivāsiko.

Kati kammadosā vuttā,

buddhenādiccabandhunā;

Campāyaṁ vinayavatthusmiṁ,

sabbeva adhammikā kati.

Dvādasa kammadosā vuttā,

buddhenādiccabandhunā;

Campāyaṁ vinayavatthusmiṁ,

sabbeva adhammikā katā.

Kati kammasampattiyo vuttā,

Buddhenādiccabandhunā;

Campāyaṁ vinayavatthusmiṁ,

Sabbeva dhammikā kati.

Catasso kammasampattiyo vuttā,

Buddhenādiccabandhunā;

Campāyaṁ vinayavatthusmiṁ,

Sabbeva dhammikā katā.

Kati kammāni vuttāni,

buddhenādiccabandhunā;

Campāyaṁ vinayavatthusmiṁ,

dhammikā adhammikā kati.

Cha kammāni vuttāni,

buddhenādiccabandhunā;

Campāyaṁ vinayavatthusmiṁ,

ekettha dhammikā katā;

Pañca adhammikā vuttā,

buddhenādiccabandhunā.

Kati kammāni vuttāni,

buddhenādiccabandhunā;

Campāyaṁ vinayavatthusmiṁ,

dhammikā adhammikā kati.

Cattāri kammāni vuttāni,

buddhenādiccabandhunā;

Campāyaṁ vinayavatthusmiṁ,

ekettha dhammikā katā;

Tayo adhammikā vuttā,

buddhenādiccabandhunā.

Yaṁ desitaṁnantajinena tādinā,

Āpattikkhandhāni vivekadassinā;

Katettha sammanti vinā samathehi,

Pucchāmi taṁ brūhi vibhaṅgakovida.

Yaṁ desitaṁnantajinena tādinā,

Āpattikkhandhāni vivekadassinā;

Ekettha sammati vinā samathehi,

Etaṁ te akkhāmi vibhaṅgakovida.

Kati āpāyikā vuttā,

buddhenādiccabandhunā;

Vinayaṁ paṭijānantassa,

vinayāni suṇoma te.

Chaūnadiyaḍḍhasatā vuttā,

Buddhenādiccabandhunā;

Āpāyikā nerayikā,

Kappaṭṭhā saṅghabhedakā;

Vinayaṁ paṭijānantassa,

Vinayāni suṇohi me.

Kati nāpāyikā vuttā,

buddhenādiccabandhunā;

Vinayaṁ paṭijānantassa,

vinayāni suṇoma te.

Aṭṭhārasa nāpāyikā vuttā,

Buddhenādiccabandhunā;

Vinayaṁ paṭijānantassa,

Vinayāni suṇohi me.

Kati aṭṭhakā vuttā,

buddhenādiccabandhunā;

Vinayaṁ paṭijānantassa,

vinayāni suṇoma te.

Aṭṭhārasa aṭṭhakā vuttā,

buddhenādiccabandhunā;

Vinayaṁ paṭijānantassa,

vinayāni suṇohi me.

5. Soḷasakammādi

Kati kammāni vuttāni,

buddhenādiccabandhunā;

Vinayaṁ paṭijānantassa,

vinayāni suṇoma te.

Soḷasa kammāni vuttāni,

buddhenādiccabandhunā;

Vinayaṁ paṭijānantassa,

vinayāni suṇohi me.

Kati kammadosā vuttā,

buddhenādiccabandhunā;

Vinayaṁ paṭijānantassa,

vinayāni suṇoma te.

Dvādasa kammadosā vuttā,

buddhenādiccabandhunā;

Vinayaṁ paṭijānantassa,

vinayāni suṇohi me.

Kati kammasampattiyo vuttā,

Buddhenādiccabandhunā;

Vinayaṁ paṭijānantassa,

Vinayāni suṇoma te.

Catasso kammasampattiyo vuttā,

Buddhenādiccabandhunā;

Vinayaṁ paṭijānantassa,

Vinayāni suṇohi me.

Kati kammāni vuttāni,

buddhenādiccabandhunā;

Vinayaṁ paṭijānantassa,

vinayāni suṇoma te.

Cha kammāni vuttāni,

buddhenādiccabandhunā;

Vinayaṁ paṭijānantassa,

vinayāni suṇohi me.

Kati kammāni vuttāni,

buddhenādiccabandhunā;

Vinayaṁ paṭijānantassa,

vinayāni suṇoma te.

Cattāri kammāni vuttāni,

buddhenādiccabandhunā;

Vinayaṁ paṭijānantassa,

vinayāni suṇohi me.

Kati pārājikā vuttā,

buddhenādiccabandhunā;

Vinayaṁ paṭijānantassa,

vinayāni suṇoma te.

Aṭṭha pārājikā vuttā,

buddhenādiccabandhunā;

Vinayaṁ paṭijānantassa,

vinayāni suṇohi me.

Kati saṅghādisesā vuttā,

buddhenādiccabandhunā;

Vinayaṁ paṭijānantassa,

vinayāni suṇoma te.

Tevīsa saṅghādisesā vuttā,

Buddhenādiccabandhunā;

Vinayaṁ paṭijānantassa,

Vinayāni suṇohi me.

Kati aniyatā vuttā,

buddhenādiccabandhunā;

Vinayaṁ paṭijānantassa,

vinayāni suṇoma te.

Dve aniyatā vuttā,

buddhenādiccabandhunā;

Vinayaṁ paṭijānantassa,

vinayāni suṇohi me.

Kati nissaggiyā vuttā,

buddhenādiccabandhunā;

Vinayaṁ paṭijānantassa,

vinayāni suṇoma te.

Dvecattālīsa nissaggiyā vuttā,

Buddhenādiccabandhunā;

Vinayaṁ paṭijānantassa,

Vinayāni suṇohi me.

Kati pācittiyā vuttā,

buddhenādiccabandhunā;

Vinayaṁ paṭijānantassa,

vinayāni suṇoma te.

Aṭṭhāsītisataṁ pācittiyā vuttā,

Buddhenādiccabandhunā;

Vinayaṁ paṭijānantassa,

Vinayāni suṇohi me.

Kati pāṭidesanīyā vuttā,

Buddhenādiccabandhunā;

Vinayaṁ paṭijānantassa,

Vinayāni suṇoma te.

Dvādasa pāṭidesanīyā vuttā,

Buddhenādiccabandhunā;

Vinayaṁ paṭijānantassa,

Vinayāni suṇohi me.

Kati sekhiyā vuttā,

buddhenādiccabandhunā;

Vinayaṁ paṭijānantassa,

vinayāni suṇoma te.

Pañcasattati sekhiyā vuttā,

Buddhenādiccabandhunā;

Vinayaṁ paṭijānantassa,

Vinayāni suṇohi me.

Yāva supucchitaṁ tayā,

yāva suvissajjitaṁ mayā;

Pucchāvissajjanāya vā,

natthi kiñci asuttakanti.

Dutiyagāthāsaṅgaṇikaṁ niṭṭhitaṁ.