8. Cīvarakkhandhaka (PLI-TV-KD8)

18. Visākhāvatthu

Atha kho bhagavā bārāṇasiyaṁ yathābhirantaṁ viharitvā yena sāvatthi tena cārikaṁ pakkāmi.

Anupubbena cārikaṁ caramāno yena sāvatthi tadavasari.

Tatra sudaṁ bhagavā sāvatthiyaṁ viharati jetavane anāthapiṇḍikassa ārāme.

Atha kho visākhā migāramātā yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi.

Ekamantaṁ nisinnaṁ kho visākhaṁ migāramātaraṁ bhagavā dhammiyā kathāya sandassesi samādapesi samuttejesi sampahaṁsesi.

Atha kho visākhā migāramātā bhagavatā dhammiyā kathāya sandassitā samādapitā samuttejitā sampahaṁsitā bhagavantaṁ etadavoca—

“adhivāsetu me, bhante, bhagavā svātanāya bhattaṁ saddhiṁ bhikkhusaṅghenā”ti.

Adhivāsesi bhagavā tuṇhībhāvena.

Atha kho visākhā migāramātā bhagavato adhivāsanaṁ viditvā uṭṭhāyāsanā bhagavantaṁ abhivādetvā padakkhiṇaṁ katvā pakkāmi.

Tena kho pana samayena tassā rattiyā accayena cātuddīpiko mahāmegho pāvassi.

Atha kho bhagavā bhikkhū āmantesi—

“yathā, bhikkhave, jetavane vassati evaṁ catūsu dīpesu vassati.

Ovassāpetha, bhikkhave, kāyaṁ.

Ayaṁ pacchimako cātuddīpiko mahāmegho”ti.

“Evaṁ, bhante”ti kho te bhikkhū bhagavato paṭissuṇitvā nikkhittacīvarā kāyaṁ ovassāpenti.

Atha kho visākhā migāramātā paṇītaṁ khādanīyaṁ bhojanīyaṁ paṭiyādāpetvā dāsiṁ āṇāpesi—

“gaccha, je. Ārāmaṁ gantvā kālaṁ ārocehi—kālo, bhante, niṭṭhitaṁ bhattan”ti.

“Evaṁ, ayye”ti kho sā dāsī visākhāya migāramātuyā paṭissuṇitvā ārāmaṁ gantvā addasa bhikkhū nikkhittacīvare kāyaṁ ovassāpente, disvāna—

“natthi ārāme bhikkhū, ājīvakā kāyaṁ ovassāpentī”ti—

yena visākhā migāramātā tenupasaṅkami; upasaṅkamitvā visākhaṁ migāramātaraṁ etadavoca—

“natthayye, ārāme bhikkhū, ājīvakā kāyaṁ ovassāpentī”ti.

Atha kho visākhāya migāramātuyā paṇḍitāya viyattāya medhāviniyā etadahosi—“nissaṁsayaṁ kho ayyā nikkhittacīvarā kāyaṁ ovassāpenti.

Sāyaṁ bālā maññittha—natthi ārāme bhikkhū, ājīvakā kāyaṁ ovassāpentī”ti, puna dāsiṁ āṇāpesi—

“gaccha, je. Ārāmaṁ gantvā kālaṁ ārocehi—kālo, bhante, niṭṭhitaṁ bhattan”ti.

Atha kho te bhikkhū gattāni sītiṁ karitvā kallakāyā cīvarāni gahetvā yathāvihāraṁ pavisiṁsu.

Atha kho sā dāsī ārāmaṁ gantvā bhikkhū apassantī—

“natthi ārāme bhikkhū, suñño ārāmo”ti—

yena visākhā migāramātā tenupasaṅkami; upasaṅkamitvā visākhaṁ migāramātaraṁ etadavoca—

“natthayye, ārāme bhikkhū, suñño ārāmo”ti.

Atha kho visākhāya migāramātuyā paṇḍitāya viyattāya medhāviniyā etadahosi—

“nissaṁsayaṁ kho ayyā gattāni sītiṁ karitvā kallakāyā cīvarāni gahetvā yathāvihāraṁ paviṭṭhā.

Sāyaṁ bālā maññittha—natthi ārāme bhikkhū, suñño ārāmo”ti, puna dāsiṁ āṇāpesi—

“gaccha, je. Ārāmaṁ gantvā kālaṁ ārocehi—kālo, bhante, niṭṭhitaṁ bhattan”ti.

Atha kho bhagavā bhikkhū āmantesi—

“sandahatha, bhikkhave, pattacīvaraṁ; kālo bhattassā”ti.

“Evaṁ, bhante”ti kho te bhikkhū bhagavato paccassosuṁ.

Atha kho bhagavā pubbaṇhasamayaṁ nivāsetvā pattacīvaramādāya—

seyyathāpi nāma balavā puriso samiñjitaṁ vā bāhaṁ pasāreyya, pasāritaṁ vā bāhaṁ samiñjeyya; evameva—jetavane antarahito visākhāya migāramātuyā koṭṭhake pāturahosi.

Nisīdi bhagavā paññatte āsane saddhiṁ bhikkhusaṅghena.

Atha kho visākhā migāramātā—“acchariyaṁ vata bho, abbhutaṁ vata bho.

Tathāgatassa mahiddhikatā mahānubhāvatā, yatra hi nāma jaṇṇukamattesupi oghesu pavattamānesu, kaṭimattesupi oghesu pavattamānesu, na hi nāma ekabhikkhussapi pādā vā cīvarāni vā allāni bhavissantī”ti—

haṭṭhā udaggā buddhappamukhaṁ bhikkhusaṅghaṁ paṇītena khādanīyena bhojanīyena sahatthā santappetvā sampavāretvā bhagavantaṁ bhuttāviṁ onītapattapāṇiṁ ekamantaṁ nisīdi.

Ekamantaṁ nisinnā kho visākhā migāramātā bhagavantaṁ etadavoca—

“aṭṭhāhaṁ, bhante, bhagavantaṁ varāni yācāmī”ti.

“Atikkantavarā kho, visākhe, tathāgatā”ti.

“Yāni ca, bhante, kappiyāni yāni ca anavajjānī”ti.

“Vadehi, visākhe”ti.

“Icchāmahaṁ, bhante, saṅghassa yāvajīvaṁ vassikasāṭikaṁ dātuṁ, āgantukabhattaṁ dātuṁ, gamikabhattaṁ dātuṁ, gilānabhattaṁ dātuṁ, gilānupaṭṭhākabhattaṁ dātuṁ, gilānabhesajjaṁ dātuṁ, dhuvayāguṁ dātuṁ, bhikkhunisaṅghassa udakasāṭikaṁ dātun”ti.

“Kiṁ pana tvaṁ, visākhe, atthavasaṁ sampassamānā tathāgataṁ aṭṭha varāni yācasī”ti?

“Idhāhaṁ, bhante, dāsiṁ āṇāpesiṁ—

‘gaccha, je. Ārāmaṁ gantvā kālaṁ ārocehi—kālo, bhante, niṭṭhitaṁ bhattan’ti.

Atha kho sā, bhante, dāsī ārāmaṁ gantvā addasa bhikkhū nikkhittacīvare kāyaṁ ovassāpente, disvāna—

‘natthi ārāme bhikkhū, ājīvakā kāyaṁ ovassāpentī’ti—

yenāhaṁ tenupasaṅkami; upasaṅkamitvā maṁ etadavoca—

‘natthayye, ārāme bhikkhū, ājīvakā kāyaṁ ovassāpentī’ti.

Asuci, bhante, naggiyaṁ jegucchaṁ paṭikūlaṁ.

Imāhaṁ, bhante, atthavasaṁ sampassamānā icchāmi saṅghassa yāvajīvaṁ vassikasāṭikaṁ dātuṁ.

Puna caparaṁ, bhante, āgantuko bhikkhu na vīthikusalo na gocarakusalo kilanto piṇḍāya carati.

So me āgantukabhattaṁ bhuñjitvā vīthikusalo gocarakusalo akilanto piṇḍāya carissati.

Imāhaṁ, bhante, atthavasaṁ sampassamānā icchāmi saṅghassa yāvajīvaṁ āgantukabhattaṁ dātuṁ.

Puna caparaṁ, bhante, gamiko bhikkhu attano bhattaṁ pariyesamāno satthā vā vihāyissati, yattha vā vāsaṁ gantukāmo bhavissati tattha vikāle upagacchissati, kilanto addhānaṁ gamissati.

So me gamikabhattaṁ bhuñjitvā satthā na vihāyissati, yattha vāsaṁ gantukāmo bhavissati tattha kāle upagacchissati, akilanto addhānaṁ gamissati.

Imāhaṁ, bhante, atthavasaṁ sampassamānā icchāmi saṅghassa yāvajīvaṁ gamikabhattaṁ dātuṁ.

Puna caparaṁ, bhante, gilānassa bhikkhuno sappāyāni bhojanāni alabhantassa ābādho vā abhivaḍḍhissati, kālaṅkiriyā vā bhavissati.

Tassa me gilānabhattaṁ bhuttassa ābādho na abhivaḍḍhissati, kālaṅkiriyā na bhavissati.

Imāhaṁ, bhante, atthavasaṁ sampassamānā icchāmi saṅghassa yāvajīvaṁ gilānabhattaṁ dātuṁ.

Puna caparaṁ, bhante, gilānupaṭṭhāko bhikkhu attano bhattaṁ pariyesamāno gilānassa ussūre bhattaṁ nīharissati, bhattacchedaṁ karissati.

So me gilānupaṭṭhākabhattaṁ bhuñjitvā gilānassa kālena bhattaṁ nīharissati, bhattacchedaṁ na karissati.

Imāhaṁ, bhante, atthavasaṁ sampassamānā icchāmi saṅghassa yāvajīvaṁ gilānupaṭṭhākabhattaṁ dātuṁ.

Puna caparaṁ, bhante, gilānassa bhikkhuno sappāyāni bhesajjāni alabhantassa ābādho vā abhivaḍḍhissati, kālaṅkiriyā vā bhavissati.

Tassa me gilānabhesajjaṁ paribhuttassa ābādho na abhivaḍḍhissati, kālaṅkiriyā na bhavissati.

Imāhaṁ, bhante, atthavasaṁ sampassamānā icchāmi saṅghassa yāvajīvaṁ gilānabhesajjaṁ dātuṁ.

Puna caparaṁ, bhante, bhagavatā andhakavinde dasānisaṁse sampassamānena yāgu anuññātā.

Tyāhaṁ, bhante, ānisaṁse sampassamānā icchāmi saṅghassa yāvajīvaṁ dhuvayāguṁ dātuṁ.

Idha, bhante, bhikkhuniyo aciravatiyā nadiyā vesiyāhi saddhiṁ naggā ekatitthe nahāyanti.

Tā, bhante, vesiyā bhikkhuniyo uppaṇḍesuṁ—

‘kiṁ nu kho nāma tumhākaṁ, ayye, daharānaṁ brahmacariyaṁ ciṇṇena, nanu nāma kāmā paribhuñjitabbā;

yadā jiṇṇā bhavissatha tadā brahmacariyaṁ carissatha.

Evaṁ tumhākaṁ ubho atthā pariggahitā bhavissantī’ti.

Tā, bhante, bhikkhuniyo vesiyāhi uppaṇḍiyamānā maṅkū ahesuṁ.

Asuci, bhante, mātugāmassa naggiyaṁ jegucchaṁ paṭikūlaṁ.

Imāhaṁ, bhante, atthavasaṁ sampassamānā icchāmi bhikkhunisaṅghassa yāvajīvaṁ udakasāṭikaṁ dātun”ti.

“Kiṁ pana tvaṁ, visākhe, ānisaṁsaṁ sampassamānā tathāgataṁ aṭṭha varāni yācasī”ti?

“Idha, bhante, disāsu vassaṁvuṭṭhā bhikkhū sāvatthiṁ āgacchissanti bhagavantaṁ dassanāya.

Te bhagavantaṁ upasaṅkamitvā pucchissanti—

‘itthannāmo, bhante, bhikkhu kālaṅkato, tassa kā gati ko abhisamparāyo’ti?

Taṁ bhagavā byākarissati sotāpattiphale vā sakadāgāmiphale vā anāgāmiphale vā arahatte vā.

Tyāhaṁ upasaṅkamitvā pucchissāmi—

‘āgatapubbā nu kho, bhante, tena ayyena sāvatthī’ti?

Sace me vakkhanti—

‘āgatapubbā tena bhikkhunā sāvatthī’ti niṭṭhamettha gacchissāmi—

‘nissaṁsayaṁ me paribhuttaṁ tena ayyena vassikasāṭikā vā āgantukabhattaṁ vā gamikabhattaṁ vā gilānabhattaṁ vā gilānupaṭṭhākabhattaṁ vā gilānabhesajjaṁ vā dhuvayāgu vā’ti.

Tassā me tadanussarantiyā pāmujjaṁ jāyissati, pamuditāya pīti jāyissati, pītimanāya kāyo passambhissati, passaddhakāyā sukhaṁ vediyissāmi, sukhiniyā cittaṁ samādhiyissati.

Sā me bhavissati indriyabhāvanā balabhāvanā bojjhaṅgabhāvanā.

Imāhaṁ, bhante, ānisaṁsaṁ sampassamānā tathāgataṁ aṭṭha varāni yācāmī”ti.

“Sādhu sādhu, visākhe;

sādhu kho tvaṁ, visākhe, imaṁ ānisaṁsaṁ sampassamānā tathāgataṁ aṭṭha varāni yācasi.

Anujānāmi te, visākhe, aṭṭha varānī”ti.

Atha kho bhagavā visākhaṁ migāramātaraṁ imāhi gāthāhi anumodi—

“Yā annapānaṁ dadatippamoditā,

Sīlūpapannā sugatassa sāvikā;

Dadāti dānaṁ abhibhuyya maccharaṁ,

Sovaggikaṁ sokanudaṁ sukhāvahaṁ.

Dibbaṁ sā labhate āyuṁ,

Āgamma maggaṁ virajaṁ anaṅgaṇaṁ;

Sā puññakāmā sukhinī anāmayā,

Saggamhi kāyamhi ciraṁ pamodatī”ti.

Atha kho bhagavā visākhaṁ migāramātaraṁ imāhi gāthāhi anumoditvā uṭṭhāyāsanā pakkāmi.

Atha kho bhagavā etasmiṁ nidāne etasmiṁ pakaraṇe dhammiṁ kathaṁ katvā bhikkhū āmantesi—

“anujānāmi, bhikkhave, vassikasāṭikaṁ, āgantukabhattaṁ, gamikabhattaṁ, gilānabhattaṁ, gilānupaṭṭhākabhattaṁ, gilānabhesajjaṁ, dhuvayāguṁ, bhikkhunisaṅghassa udakasāṭikan”ti.

Visākhābhāṇavāro niṭṭhito.

19. Nisīdanādianujānana

Tena kho pana samayena bhikkhū paṇītāni bhojanāni bhuñjitvā muṭṭhassatī asampajānā niddaṁ okkamanti.

Tesaṁ muṭṭhassatīnaṁ asampajānānaṁ niddaṁ okkamantānaṁ supinantena asuci muccati, senāsanaṁ asucinā makkhiyati.

Atha kho bhagavā āyasmatā ānandena pacchāsamaṇena senāsanacārikaṁ āhiṇḍanto addasa senāsanaṁ asucinā makkhitaṁ, disvāna āyasmantaṁ ānandaṁ āmantesi—

“kiṁ etaṁ, ānanda, senāsanaṁ makkhitan”ti?

“Etarahi, bhante, bhikkhū paṇītāni bhojanāni bhuñjitvā muṭṭhassatī asampajānā niddaṁ okkamanti.

Tesaṁ muṭṭhassatīnaṁ asampajānānaṁ niddaṁ okkamantānaṁ supinantena asuci muccati;

tayidaṁ, bhagavā, senāsanaṁ asucinā makkhitan”ti.

“Evametaṁ, ānanda, evametaṁ, ānanda.

Muccati hi, ānanda, muṭṭhassatīnaṁ asampajānānaṁ niddaṁ okkamantānaṁ supinantena asuci.

Ye te, ānanda, bhikkhū upaṭṭhitassatī sampajānā niddaṁ okkamanti, tesaṁ asuci na muccati.

Yepi te, ānanda, puthujjanā kāmesu vītarāgā, tesampi asuci na muccati.

Aṭṭhānametaṁ, ānanda, anavakāso yaṁ arahato asuci mucceyyā”ti.

Atha kho bhagavā etasmiṁ nidāne etasmiṁ pakaraṇe dhammiṁ kathaṁ katvā bhikkhū āmantesi—

“idhāhaṁ, bhikkhave, ānandena pacchāsamaṇena senāsanacārikaṁ āhiṇḍanto addasaṁ senāsanaṁ asucinā makkhitaṁ, disvāna ānandaṁ āmantesiṁ—

‘kiṁ etaṁ, ānanda, senāsanaṁ makkhitan’ti?

‘Etarahi, bhante, bhikkhū paṇītāni bhojanāni bhuñjitvā muṭṭhassatī asampajānā niddaṁ okkamanti.

Tesaṁ muṭṭhassatīnaṁ asampajānānaṁ niddaṁ okkamantānaṁ supinantena asuci muccati;

tayidaṁ, bhagavā, senāsanaṁ asucinā makkhitan’ti.

‘Evametaṁ, ānanda, evametaṁ, ānanda, muccati hi, ānanda, muṭṭhassatīnaṁ asampajānānaṁ niddaṁ okkamantānaṁ supinantena asuci.

Ye te, ānanda, bhikkhū upaṭṭhitassatī sampajānā niddaṁ okkamanti, tesaṁ asuci na muccati.

Yepi te, ānanda, puthujjanā kāmesu vītarāgā tesampi asuci na muccati.

Aṭṭhānametaṁ, ānanda, anavakāso yaṁ arahato asuci mucceyyā’ti.

Pañcime, bhikkhave, ādīnavā muṭṭhassatissa asampajānassa niddaṁ okkamato—

dukkhaṁ supati, dukkhaṁ paṭibujjhati, pāpakaṁ supinaṁ passati, devatā na rakkhanti, asuci muccati.

Ime kho, bhikkhave, pañca ādīnavā muṭṭhassatissa asampajānassa niddaṁ okkamato.

Pañcime, bhikkhave, ānisaṁsā upaṭṭhitassatissa sampajānassa niddaṁ okkamato—

sukhaṁ supati, sukhaṁ paṭibujjhati, na pāpakaṁ supinaṁ passati, devatā rakkhanti, asuci na muccati.

Ime kho, bhikkhave, pañca ānisaṁsā upaṭṭhitassatissa sampajānassa niddaṁ okkamato.

Anujānāmi, bhikkhave, kāyaguttiyā cīvaraguttiyā senāsanaguttiyā nisīdanan”ti.

Tena kho pana samayena atikhuddakaṁ nisīdanaṁ na sabbaṁ senāsanaṁ saṅgopeti.

Bhagavato etamatthaṁ ārocesuṁ.

“Anujānāmi, bhikkhave, yāvamahantaṁ paccattharaṇaṁ ākaṅkhati tāvamahantaṁ paccattharaṇaṁ kātun”ti.

Tena kho pana samayena āyasmato ānandassa upajjhāyassa āyasmato belaṭṭhasīsassa thullakacchābādho hoti.

Tassa lasikāya cīvarāni kāye lagganti.

Tāni bhikkhū udakena temetvā temetvā apakaḍḍhanti.

Addasā kho bhagavā senāsanacārikaṁ āhiṇḍanto te bhikkhū tāni cīvarāni udakena temetvā temetvā apakaḍḍhante, disvāna yena te bhikkhū tenupasaṅkami, upasaṅkamitvā te bhikkhū etadavoca—

“kiṁ imassa, bhikkhave, bhikkhuno ābādho”ti?

“Imassa, bhante, āyasmato thullakacchābādho.

Lasikāya cīvarāni kāye lagganti.

Tāni mayaṁ udakena temetvā temetvā apakaḍḍhāmā”ti.

Atha kho bhagavā etasmiṁ nidāne etasmiṁ pakaraṇe dhammiṁ kathaṁ katvā bhikkhū āmantesi—

“anujānāmi, bhikkhave, yassa kaṇḍu vā piḷakā vā assāvo vā thullakacchu vā ābādho kaṇḍuppaṭicchādin”ti.

Atha kho visākhā migāramātā mukhapuñchanacoḷaṁ ādāya yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi.

Ekamantaṁ nisinnā kho visākhā migāramātā bhagavantaṁ etadavoca—

“paṭiggaṇhātu me, bhante, bhagavā mukhapuñchanacoḷaṁ, yaṁ mamassa dīgharattaṁ hitāya sukhāyā”ti.

Paṭiggahesi bhagavā mukhapuñchanacoḷaṁ.

Atha kho bhagavā visākhaṁ migāramātaraṁ dhammiyā kathāya sandassesi samādapesi samuttejesi sampahaṁsesi.

Atha kho visākhā migāramātā bhagavatā dhammiyā kathāya sandassitā samādapitā samuttejitā sampahaṁsitā uṭṭhāyāsanā bhagavantaṁ abhivādetvā padakkhiṇaṁ katvā pakkāmi.

Atha kho bhagavā etasmiṁ nidāne etasmiṁ pakaraṇe dhammiṁ kathaṁ katvā bhikkhū āmantesi—

“anujānāmi, bhikkhave, mukhapuñchanacoḷakan”ti.

Tena kho pana samayena rojo mallo āyasmato ānandassa sahāyo hoti.

Rojassa mallassa khomapilotikā āyasmato ānandassa hatthe nikkhittā hoti.

Āyasmato ca ānandassa khomapilotikāya attho hoti.

Bhagavato etamatthaṁ ārocesuṁ.

“Anujānāmi, bhikkhave, pañcahaṅgehi samannāgatassa vissāsaṁ gahetuṁ—

sandiṭṭho ca hoti, sambhatto ca, ālapito ca, jīvati ca, jānāti ca—gahite me attamano bhavissatīti.

Anujānāmi, bhikkhave, imehi pañcahaṅgehi samannāgatassa vissāsaṁ gahetun”ti.

Tena kho pana samayena bhikkhūnaṁ paripuṇṇaṁ hoti ticīvaraṁ.

Attho ca hoti parissāvanehipi thavikāhipi.

Bhagavato etamatthaṁ ārocesuṁ.

“Anujānāmi, bhikkhave, parikkhāracoḷakan”ti.

20. Pacchimavikappanupagacīvarādikathā

Atha kho bhikkhūnaṁ etadahosi—

“yāni tāni bhagavatā anuññātāni ticīvaranti vā vassikasāṭikāti vā nisīdananti vā paccattharaṇanti vā kaṇḍuppaṭicchādīti vā mukhapuñchanacoḷanti vā parikkhāracoḷanti vā, sabbāni tāni adhiṭṭhātabbāni nu kho, udāhu vikappetabbānī”ti?

Bhagavato etamatthaṁ ārocesuṁ.

“Anujānāmi, bhikkhave, ticīvaraṁ adhiṭṭhātuṁ na vikappetuṁ;

vassikasāṭikaṁ vassānaṁ cātumāsaṁ adhiṭṭhātuṁ, tato paraṁ vikappetuṁ;

nisīdanaṁ adhiṭṭhātuṁ na vikappetuṁ;

paccattharaṇaṁ adhiṭṭhātuṁ na vikappetuṁ;

kaṇḍuppaṭicchādiṁ yāva ābādhā adhiṭṭhātuṁ tato paraṁ vikappetuṁ;

mukhapuñchanacoḷaṁ adhiṭṭhātuṁ na vikappetuṁ;

parikkhāracoḷaṁ adhiṭṭhātuṁ na vikappetun”ti.

Atha kho bhikkhūnaṁ etadahosi—

“kittakaṁ pacchimaṁ nu kho cīvaraṁ vikappetabban”ti?

Bhagavato etamatthaṁ ārocesuṁ.

“Anujānāmi, bhikkhave, āyāmena aṭṭhaṅgulaṁ sugataṅgulena caturaṅgulavitthataṁ pacchimaṁ cīvaraṁ vikappetun”ti.

Tena kho pana samayena āyasmato mahākassapassa paṁsukūlakato garuko hoti.

Bhagavato etamatthaṁ ārocesuṁ.

“Anujānāmi, bhikkhave, suttalūkhaṁ kātun”ti.

Vikaṇṇo hoti.

Bhagavato etamatthaṁ ārocesuṁ.

“Anujānāmi, bhikkhave, vikaṇṇaṁ uddharitun”ti.

Suttā okiriyanti.

Bhagavato etamatthaṁ ārocesuṁ.

“Anujānāmi, bhikkhave, anuvātaṁ paribhaṇḍaṁ āropetun”ti.

Tena kho pana samayena saṅghāṭiyā pattā lujjanti.

Bhagavato etamatthaṁ ārocesuṁ.

“Anujānāmi, bhikkhave, aṭṭhapadakaṁ kātun”ti.

Tena kho pana samayena aññatarassa bhikkhuno ticīvare kayiramāne sabbaṁ chinnakaṁ nappahoti.

Bhagavato etamatthaṁ ārocesuṁ.

“Anujānāmi, bhikkhave, dve chinnakāni ekaṁ acchinnakan”ti.

Dve chinnakāni ekaṁ acchinnakaṁ nappahoti.

Bhagavato etamatthaṁ ārocesuṁ.

“Anujānāmi, bhikkhave, dve acchinnakāni ekaṁ chinnakan”ti.

Dve acchinnakāni ekaṁ chinnakaṁ nappahoti.

Bhagavato etamatthaṁ ārocesuṁ.

“Anujānāmi, bhikkhave, anvādhikampi āropetuṁ.

Na ca, bhikkhave, sabbaṁ acchinnakaṁ dhāretabbaṁ.

Yo dhāreyya, āpatti dukkaṭassā”ti.

Tena kho pana samayena aññatarassa bhikkhuno bahuṁ cīvaraṁ uppannaṁ hoti.

So ca taṁ cīvaraṁ mātāpitūnaṁ dātukāmo hoti.

Bhagavato etamatthaṁ ārocesuṁ.

“Mātāpitaroti kho, bhikkhave, dadamāne kiṁ vadeyyāma?

Anujānāmi, bhikkhave, mātāpitūnaṁ dātuṁ.

Na ca, bhikkhave, saddhādeyyaṁ vinipātetabbaṁ.

Yo vinipāteyya, āpatti dukkaṭassā”ti.

Tena kho pana samayena aññataro bhikkhu andhavane cīvaraṁ nikkhipitvā santaruttarena gāmaṁ piṇḍāya pāvisi.

Corā taṁ cīvaraṁ avahariṁsu.

So bhikkhu duccoḷo hoti lūkhacīvaro.

Bhikkhū evamāhaṁsu—

“kissa tvaṁ, āvuso, duccoḷo lūkhacīvarosī”ti?

“Idhāhaṁ, āvuso, andhavane cīvaraṁ nikkhipitvā santaruttarena gāmaṁ piṇḍāya pāvisiṁ.

Corā taṁ cīvaraṁ avahariṁsu.

Tenāhaṁ duccoḷo lūkhacīvaro”ti.

Bhagavato etamatthaṁ ārocesuṁ.

“Na, bhikkhave, santaruttarena gāmo pavisitabbo.

Yo paviseyya, āpatti dukkaṭassā”ti.

Tena kho pana samayena āyasmā ānando assatiyā santaruttarena gāmaṁ piṇḍāya pāvisi.

Bhikkhū āyasmantaṁ ānandaṁ etadavocuṁ—

“nanu, āvuso ānanda, bhagavatā paññattaṁ—

‘na santaruttarena gāmo pavisitabbo’ti?

Kissa tvaṁ, āvuso ānanda, santaruttarena gāmaṁ paviṭṭho”ti?

“Saccaṁ, āvuso, bhagavatā paññattaṁ—

‘na santaruttarena gāmo pavisitabbo’ti.

Api cāhaṁ assatiyā paviṭṭho”ti.

Bhagavato etamatthaṁ ārocesuṁ.

“Pañcime, bhikkhave, paccayā saṅghāṭiyā nikkhepāya—

gilāno vā hoti, vassikasaṅketaṁ vā hoti, nadīpāraṁ gantuṁ vā hoti, aggaḷaguttivihāro vā hoti, atthatakathinaṁ vā hoti.

Ime kho, bhikkhave, pañca paccayā saṅghāṭiyā nikkhepāya.

Pañcime, bhikkhave, paccayā uttarāsaṅgassa nikkhepāya …pe…

antaravāsakassa nikkhepāya—

gilāno vā hoti, vassikasaṅketaṁ vā hoti, nadīpāraṁ gantuṁ vā hoti, aggaḷaguttivihāro vā hoti, atthatakathinaṁ vā hoti.

Ime kho, bhikkhave, pañca paccayā uttarāsaṅgassa antaravāsakassa nikkhepāya.

Pañcime, bhikkhave, paccayā vassikasāṭikāya nikkhepāya—

gilāno vā hoti, nissīmaṁ gantuṁ vā hoti, nadīpāraṁ gantuṁ vā hoti, aggaḷaguttivihāro vā hoti, vassikasāṭikā akatā vā hoti vippakatā vā.

Ime kho, bhikkhave, pañca paccayā vassikasāṭikāya nikkhepāyā”ti.

21. Saṅghikacīvaruppādakathā

Tena kho pana samayena aññataro bhikkhu eko vassaṁ vasi.

Tattha manussā saṅghassa demāti cīvarāni adaṁsu.

Atha kho tassa bhikkhuno etadahosi—

“bhagavatā paññattaṁ—

‘catuvaggo pacchimo saṅgho’ti.

Ahañcamhi ekako.

Ime ca manussā saṅghassa demāti cīvarāni adaṁsu.

Yannūnāhaṁ imāni saṅghikāni cīvarāni sāvatthiṁ hareyyan”ti.

Atha kho so bhikkhu tāni cīvarāni ādāya sāvatthiṁ gantvā bhagavato etamatthaṁ ārocesi.

“Tuyheva, bhikkhu, tāni cīvarāni yāva kathinassa ubbhārāyā”ti.

“Idha pana, bhikkhave, bhikkhu eko vassaṁ vasati.

Tattha manussā—

‘saṅghassa demā’ti cīvarāni denti.

Anujānāmi, bhikkhave, tasseva tāni cīvarāni yāva kathinassa ubbhārāyā”ti.

Tena kho pana samayena aññataro bhikkhu utukālaṁ eko vasi.

Tattha manussā saṅghassa demāti cīvarāni adaṁsu.

Atha kho tassa bhikkhuno etadahosi—

“bhagavatā paññattaṁ—

‘catuvaggo pacchimo saṅgho’ti.

Ahañcamhi ekako.

Ime ca manussā—

‘saṅghassa demā’ti cīvarāni adaṁsu.

Yannūnāhaṁ imāni saṅghikāni cīvarāni sāvatthiṁ hareyyan”ti.

Atha kho so bhikkhu tāni cīvarāni ādāya sāvatthiṁ gantvā bhikkhūnaṁ etamatthaṁ ārocesi.

Bhikkhū bhagavato etamatthaṁ ārocesuṁ.

“Anujānāmi, bhikkhave, sammukhībhūtena saṅghena bhājetuṁ.

Idha pana, bhikkhave, bhikkhu utukālaṁ eko vasati. Tattha manussā—‘saṅghassa demā’ti cīvarāni denti.

Anujānāmi, bhikkhave, tena bhikkhunā tāni cīvarāni adhiṭṭhātuṁ—‘mayhimāni cīvarānī’ti.

Tassa ce, bhikkhave, bhikkhuno taṁ cīvaraṁ anadhiṭṭhite añño bhikkhu āgacchati, samako dātabbo bhāgo.

Tehi ce, bhikkhave, bhikkhūhi taṁ cīvaraṁ bhājiyamāne, apātite kuse, añño bhikkhu āgacchati, samako dātabbo bhāgo.

Tehi ce, bhikkhave, bhikkhūhi taṁ cīvaraṁ bhājiyamāne, pātite kuse, añño bhikkhu āgacchati, nākāmā dātabbo bhāgo”ti.

Tena kho pana samayena dve bhātikā therā, āyasmā ca isidāso āyasmā ca isibhaṭo, sāvatthiyaṁ vassaṁvuṭṭhā aññataraṁ gāmakāvāsaṁ agamaṁsu.

Manussā—“cirassāpi therā āgatā”ti—sacīvarāni bhattāni adaṁsu.

Āvāsikā bhikkhū there pucchiṁsu—“imāni, bhante, saṅghikāni cīvarāni there āgamma uppannāni, sādiyissanti therā bhāgan”ti.

Therā evamāhaṁsu—“yathā kho mayaṁ, āvuso, bhagavatā dhammaṁ desitaṁ ājānāma, tumhākaṁyeva tāni cīvarāni yāva kathinassa ubbhārāyā”ti.

Tena kho pana samayena tayo bhikkhū rājagahe vassaṁ vasanti.

Tattha manussā saṅghassa demāti cīvarāni denti.

Atha kho tesaṁ bhikkhūnaṁ etadahosi—“bhagavatā paññattaṁ—‘catuvaggo pacchimo saṅgho’ti. Mayañcamhā tayo janā.

Ime ca manussā saṅghassa demāti cīvarāni denti.

Kathaṁ nu kho amhehi paṭipajjitabban”ti?

Tena kho pana samayena sambahulā therā, āyasmā ca nilavāsī āyasmā ca sāṇavāsī āyasmā ca gotako āyasmā ca bhagu āyasmā ca phaḷikasantāno, pāṭaliputte viharanti kukkuṭārāme.

Atha kho te bhikkhū pāṭaliputtaṁ gantvā there pucchiṁsu.

Therā evamāhaṁsu—

“yathā kho mayaṁ āvuso bhagavatā dhammaṁ desitaṁ ājānāma, tumhākaṁyeva tāni cīvarāni yāva kathinassa ubbhārāyā”ti.

22. Upanandasakyaputtavatthu

Tena kho pana samayena āyasmā upanando sakyaputto sāvatthiyaṁ vassaṁvuṭṭho aññataraṁ gāmakāvāsaṁ agamāsi.

Tattha ca bhikkhū cīvaraṁ bhājetukāmā sannipatiṁsu.

Te evamāhaṁsu—“imāni kho, āvuso, saṅghikāni cīvarāni bhājiyissanti, sādiyissasi bhāgan”ti?

“Āmāvuso, sādiyissāmī”ti.

Tato cīvarabhāgaṁ gahetvā aññaṁ āvāsaṁ agamāsi.

Tatthapi bhikkhū cīvaraṁ bhājetukāmā sannipatiṁsu.

Tepi evamāhaṁsu—“imāni kho, āvuso, saṅghikāni cīvarāni bhājiyissanti, sādiyissasi bhāgan”ti?

“Āmāvuso, sādiyissāmī”ti.

Tatopi cīvarabhāgaṁ gahetvā aññaṁ āvāsaṁ agamāsi.

Tatthapi bhikkhū cīvaraṁ bhājetukāmā sannipatiṁsu.

Tepi evamāhaṁsu—“imāni kho, āvuso, saṅghikāni cīvarāni bhājiyissanti, sādiyissasi bhāgan”ti?

“Āmāvuso, sādiyissāmī”ti.

Tatopi cīvarabhāgaṁ gahetvā mahantaṁ cīvarabhaṇḍikaṁ ādāya punadeva sāvatthiṁ paccāgañchi.

Bhikkhū evamāhaṁsu—“mahāpuññosi tvaṁ, āvuso upananda, bahuṁ te cīvaraṁ uppannan”ti.

“Kuto me, āvuso, puññaṁ?

Idhāhaṁ, āvuso, sāvatthiyaṁ vassaṁvuṭṭho aññataraṁ gāmakāvāsaṁ agamāsiṁ.

Tattha bhikkhū cīvaraṁ bhājetukāmā sannipatiṁsu.

Te maṁ evamāhaṁsu—‘imāni kho, āvuso, saṅghikāni cīvarāni bhājiyissanti, sādiyissasi bhāgan’ti?

‘Āmāvuso, sādiyissāmī’ti.

Tato cīvarabhāgaṁ gahetvā aññaṁ āvāsaṁ agamāsiṁ.

Tatthapi bhikkhū cīvaraṁ bhājetukāmā sannipatiṁsu.

Tepi maṁ evamāhaṁsu—‘imāni kho, āvuso, saṅghikāni cīvarāni bhājiyissanti, sādiyissasi bhāgan’ti?

‘Āmāvuso, sādiyissāmī’ti.

Tatopi cīvarabhāgaṁ gahetvā aññaṁ āvāsaṁ agamāsiṁ.

Tatthapi bhikkhū cīvaraṁ bhājetukāmā sannipatiṁsu.

Tepi maṁ evamāhaṁsu—‘imāni kho, āvuso, saṅghikāni cīvarāni bhājiyissanti, sādiyissasi bhāgan’ti?

‘Āmāvuso, sādiyissāmī’ti.

Tatopi cīvarabhāgaṁ aggahesiṁ.

Evaṁ me bahuṁ cīvaraṁ uppannan”ti.

“Kiṁ pana tvaṁ, āvuso upananda, aññatra vassaṁvuṭṭho aññatra cīvarabhāgaṁ sādiyī”ti?

“Evamāvuso”ti.

Ye te bhikkhū appicchā …pe… te ujjhāyanti khiyyanti vipācenti—

“kathañhi nāma āyasmā upanando sakyaputto aññatra vassaṁvuṭṭho aññatra cīvarabhāgaṁ sādiyissatī”ti.

Bhagavato etamatthaṁ ārocesuṁ …pe…

“saccaṁ kira tvaṁ, upananda, aññatra vassaṁvuṭṭho aññatra cīvarabhāgaṁ sādiyī”ti?

“Saccaṁ, bhagavā”ti.

Vigarahi buddho bhagavā …pe…

kathañhi nāma tvaṁ, moghapurisa, aññatra vassaṁvuṭṭho aññatra cīvarabhāgaṁ sādiyissasi.

Netaṁ, moghapurisa, appasannānaṁ vā pasādāya …pe…

vigarahitvā …pe…

dhammiṁ kathaṁ katvā bhikkhū āmantesi—

“na, bhikkhave, aññatra vassaṁvuṭṭhena aññatra cīvarabhāgo sāditabbo.

Yo sādiyeyya, āpatti dukkaṭassā”ti.

Tena kho pana samayena āyasmā upanando sakyaputto eko dvīsu āvāsesu vassaṁ vasi—“evaṁ me bahuṁ cīvaraṁ uppajjissatī”ti.

Atha kho tesaṁ bhikkhūnaṁ etadahosi—“kathaṁ nu kho āyasmato upanandassa sakyaputtassa cīvarapaṭivīso dātabbo”ti?

Bhagavato etamatthaṁ ārocesuṁ.

“Detha, bhikkhave, moghapurisassa ekādhippāyaṁ.

Idha pana, bhikkhave, bhikkhu eko dvīsu āvāsesu vassaṁ vasati—‘evaṁ me bahuṁ cīvaraṁ uppajjissatī’ti.

Sace amutra upaḍḍhaṁ amutra upaḍḍhaṁ vasati, amutra upaḍḍho amutra upaḍḍho cīvarapaṭivīso dātabbo.

Yattha vā pana bahutaraṁ vasati, tato cīvarapaṭivīso dātabbo”ti.

23. Gilānavatthukathā

Tena kho pana samayena aññatarassa bhikkhuno kucchivikārābādho hoti.

So sake muttakarīse palipanno seti.

Atha kho bhagavā āyasmatā ānandena pacchāsamaṇena senāsanacārikaṁ āhiṇḍanto yena tassa bhikkhuno vihāro tenupasaṅkami.

Addasā kho bhagavā taṁ bhikkhuṁ sake muttakarīse palipannaṁ sayamānaṁ, disvāna yena so bhikkhu tenupasaṅkami, upasaṅkamitvā taṁ bhikkhuṁ etadavoca—

“kiṁ te, bhikkhu, ābādho”ti?

“Kucchivikāro me, bhagavā”ti.

“Atthi pana te, bhikkhu, upaṭṭhāko”ti?

“Natthi, bhagavā”ti.

“Kissa taṁ bhikkhū na upaṭṭhentī”ti?

“Ahaṁ kho, bhante, bhikkhūnaṁ akārako;

tena maṁ bhikkhū na upaṭṭhentī”ti.

Atha kho bhagavā āyasmantaṁ ānandaṁ āmantesi—

“gacchānanda, udakaṁ āhara, imaṁ bhikkhuṁ nahāpessāmā”ti.

“Evaṁ, bhante”ti kho āyasmā ānando bhagavato paṭissuṇitvā udakaṁ āhari.

Bhagavā udakaṁ āsiñci.

Āyasmā ānando paridhovi.

Bhagavā sīsato aggahesi.

Āyasmā ānando pādato uccāretvā mañcake nipātesuṁ.

Atha kho bhagavā etasmiṁ nidāne etasmiṁ pakaraṇe bhikkhusaṅghaṁ sannipātāpetvā bhikkhū paṭipucchi—

“atthi, bhikkhave, amukasmiṁ vihāre bhikkhu gilāno”ti?

“Atthi, bhagavā”ti.

“Kiṁ tassa, bhikkhave, bhikkhuno ābādho”ti?

“Tassa, bhante, āyasmato kucchivikārābādho”ti.

“Atthi pana, bhikkhave, tassa bhikkhuno upaṭṭhāko”ti?

“Natthi, bhagavā”ti.

“Kissa taṁ bhikkhū na upaṭṭhentī”ti?

“Eso, bhante, bhikkhu bhikkhūnaṁ akārako;

tena taṁ bhikkhū na upaṭṭhentī”ti.

“Natthi vo, bhikkhave, mātā, natthi pitā, ye vo upaṭṭhaheyyuṁ.

Tumhe ce, bhikkhave, aññamaññaṁ na upaṭṭhahissatha, atha ko carahi upaṭṭhahissati?

Yo, bhikkhave, maṁ upaṭṭhaheyya so gilānaṁ upaṭṭhaheyya.

Sace upajjhāyo hoti, upajjhāyena yāvajīvaṁ upaṭṭhātabbo;

vuṭṭhānamassa āgametabbaṁ.

Sace ācariyo hoti, ācariyena yāvajīvaṁ upaṭṭhātabbo;

vuṭṭhānamassa āgametabbaṁ.

Sace saddhivihāriko hoti, saddhivihārikena yāvajīvaṁ upaṭṭhātabbo;

vuṭṭhānamassa āgametabbaṁ.

Sace antevāsiko hoti, antevāsikena yāvajīvaṁ upaṭṭhātabbo;

vuṭṭhānamassa āgametabbaṁ.

Sace samānupajjhāyako hoti, samānupajjhāyakena yāvajīvaṁ upaṭṭhātabbo;

vuṭṭhānamassa āgametabbaṁ.

Sace samānācariyako hoti, samānācariyakena yāvajīvaṁ upaṭṭhātabbo;

vuṭṭhānamassa āgametabbaṁ.

Sace na hoti upajjhāyo vā ācariyo vā saddhivihāriko vā antevāsiko vā samānupajjhāyako vā samānācariyako vā saṅghena upaṭṭhātabbo.

No ce upaṭṭhaheyya, āpatti dukkaṭassa.

Pañcahi, bhikkhave, aṅgehi samannāgato gilāno dūpaṭṭho hoti—

asappāyakārī hoti, sappāye mattaṁ na jānāti, bhesajjaṁ na paṭisevitā hoti, atthakāmassa gilānupaṭṭhākassa yathābhūtaṁ ābādhaṁ nāvikattā hoti ‘abhikkamantaṁ vā abhikkamatīti, paṭikkamantaṁ vā paṭikkamatīti, ṭhitaṁ vā ṭhito’ti, uppannānaṁ sārīrikānaṁ vedanānaṁ dukkhānaṁ tibbānaṁ kharānaṁ kaṭukānaṁ asātānaṁ amanāpānaṁ pāṇaharānaṁ anadhivāsakajātiko hoti.

Imehi kho, bhikkhave, pañcahaṅgehi samannāgato gilāno dūpaṭṭho hoti.

Pañcahi, bhikkhave, aṅgehi samannāgato gilāno sūpaṭṭho hoti—

sappāyakārī hoti, sappāye mattaṁ jānāti, bhesajjaṁ paṭisevitā hoti, atthakāmassa gilānupaṭṭhākassa yathābhūtaṁ ābādhaṁ āvikattā hoti ‘abhikkamantaṁ vā abhikkamatīti, paṭikkamantaṁ vā paṭikkamatīti, ṭhitaṁ vā ṭhito’ti, uppannānaṁ sārīrikānaṁ vedanānaṁ dukkhānaṁ tibbānaṁ kharānaṁ kaṭukānaṁ asātānaṁ amanāpānaṁ pāṇaharānaṁ adhivāsakajātiko hoti.

Imehi kho, bhikkhave, pañcahaṅgehi samannāgato gilāno sūpaṭṭho hoti.

Pañcahi, bhikkhave, aṅgehi samannāgato gilānupaṭṭhāko nālaṁ gilānaṁ upaṭṭhātuṁ—

na paṭibalo hoti bhesajjaṁ saṁvidhātuṁ, sappāyāsappāyaṁ na jānāti, asappāyaṁ upanāmeti sappāyaṁ apanāmeti, āmisantaro gilānaṁ upaṭṭhāti no mettacitto, jegucchī hoti uccāraṁ vā passāvaṁ vā kheḷaṁ vā vantaṁ vā nīhātuṁ, na paṭibalo hoti gilānaṁ kālena kālaṁ dhammiyā kathāya sandassetuṁ samādapetuṁ samuttejetuṁ sampahaṁsetuṁ.

Imehi kho, bhikkhave, pañcahaṅgehi samannāgato gilānupaṭṭhāko nālaṁ gilānaṁ upaṭṭhātuṁ.

Pañcahi, bhikkhave, aṅgehi samannāgato gilānupaṭṭhāko alaṁ gilānaṁ upaṭṭhātuṁ—

paṭibalo hoti bhesajjaṁ saṁvidhātuṁ, sappāyāsappāyaṁ jānāti, asappāyaṁ apanāmeti sappāyaṁ upanāmeti, mettacitto gilānaṁ upaṭṭhāti no āmisantaro, ajegucchī hoti uccāraṁ vā passāvaṁ vā kheḷaṁ vā vantaṁ vā nīhātuṁ, paṭibalo hoti gilānaṁ kālena kālaṁ dhammiyā kathāya sandassetuṁ samādapetuṁ samuttejetuṁ sampahaṁsetuṁ.

Imehi kho, bhikkhave, pañcahaṅgehi samannāgato gilānupaṭṭhāko alaṁ gilānaṁ upaṭṭhātun”ti.

24. Matasantakakathā

Tena kho pana samayena dve bhikkhū kosalesu janapade addhānamaggappaṭipannā honti.

Te aññataraṁ āvāsaṁ upagacchiṁsu.

Tattha aññataro bhikkhu gilāno hoti.

Atha kho tesaṁ bhikkhūnaṁ etadahosi—

“bhagavatā kho, āvuso, gilānupaṭṭhānaṁ vaṇṇitaṁ.

Handa mayaṁ, āvuso, imaṁ bhikkhuṁ upaṭṭhahemā”ti.

Te taṁ upaṭṭhahiṁsu.

So tehi upaṭṭhahiyamāno kālamakāsi.

Atha kho te bhikkhū tassa bhikkhuno pattacīvaramādāya sāvatthiṁ gantvā bhagavato etamatthaṁ ārocesuṁ.

“Bhikkhussa, bhikkhave, kālaṅkate saṅgho sāmī pattacīvare,

api ca gilānupaṭṭhākā bahūpakārā.

Anujānāmi, bhikkhave, saṅghena ticīvarañca pattañca gilānupaṭṭhākānaṁ dātuṁ.

Evañca pana, bhikkhave, dātabbaṁ.

Tena gilānupaṭṭhākena bhikkhunā saṅghaṁ upasaṅkamitvā evamassa vacanīyo—

‘itthannāmo, bhante, bhikkhu kālaṅkato.

Idaṁ tassa ticīvarañca patto cā’ti.

Byattena bhikkhunā paṭibalena saṅgho ñāpetabbo—

‘Suṇātu me, bhante, saṅgho.

Itthannāmo bhikkhu kālaṅkato.

Idaṁ tassa ticīvarañca patto ca.

Yadi saṅghassa pattakallaṁ, saṅgho imaṁ ticīvarañca pattañca gilānupaṭṭhākānaṁ dadeyya.

Esā ñatti.

Suṇātu me, bhante, saṅgho.

Itthannāmo bhikkhu kālaṅkato.

Idaṁ tassa ticīvarañca patto ca.

Saṅgho imaṁ ticīvarañca pattañca gilānupaṭṭhākānaṁ deti.

Yassāyasmato khamati imassa ticīvarassa ca pattassa ca gilānupaṭṭhākānaṁ dānaṁ, so tuṇhassa;

yassa nakkhamati, so bhāseyya.

Dinnaṁ idaṁ saṅghena ticīvarañca patto ca gilānupaṭṭhākānaṁ.

Khamati saṅghassa, tasmā tuṇhī, evametaṁ dhārayāmī’”ti.

Tena kho pana samayena aññataro sāmaṇero kālaṅkato hoti.

Bhagavato etamatthaṁ ārocesuṁ.

“Sāmaṇerassa, bhikkhave, kālaṅkate saṅgho sāmī pattacīvare,

api ca gilānupaṭṭhākā bahūpakārā.

Anujānāmi, bhikkhave, saṅghena cīvarañca pattañca gilānupaṭṭhākānaṁ dātuṁ.

Evañca pana, bhikkhave, dātabbaṁ.

Tena gilānupaṭṭhākena bhikkhunā saṅghaṁ upasaṅkamitvā evamassa vacanīyo—

‘itthannāmo, bhante, sāmaṇero kālaṅkato, idaṁ tassa cīvarañca patto cā’ti.

Byattena bhikkhunā paṭibalena saṅgho ñāpetabbo—

‘Suṇātu me, bhante, saṅgho.

Itthannāmo sāmaṇero kālaṅkato.

Idaṁ tassa cīvarañca patto ca.

Yadi saṅghassa pattakallaṁ, saṅgho imaṁ cīvarañca pattañca gilānupaṭṭhākānaṁ dadeyya.

Esā ñatti.

Suṇātu me, bhante, saṅgho.

Itthannāmo sāmaṇero kālaṅkato.

Idaṁ tassa cīvarañca patto ca.

Saṅgho imaṁ cīvarañca pattañca gilānupaṭṭhākānaṁ deti.

Yassāyasmato khamati imassa cīvarassa ca pattassa ca gilānupaṭṭhākānaṁ dānaṁ, so tuṇhassa;

yassa nakkhamati, so bhāseyya.

Dinnaṁ idaṁ saṅghena cīvarañca patto ca gilānupaṭṭhākānaṁ.

Khamati saṅghassa, tasmā tuṇhī, evametaṁ dhārayāmī’”ti.

Tena kho pana samayena aññataro bhikkhu ca sāmaṇero ca gilānaṁ upaṭṭhahiṁsu.

So tehi upaṭṭhahiyamāno kālamakāsi.

Atha kho tassa gilānupaṭṭhākassa bhikkhuno etadahosi—

“kathaṁ nu kho gilānupaṭṭhākassa sāmaṇerassa cīvarapaṭivīso dātabbo”ti?

Bhagavato etamatthaṁ ārocesuṁ.

“Anujānāmi, bhikkhave, gilānupaṭṭhākassa sāmaṇerassa samakaṁ paṭivīsaṁ dātun”ti.

Tena kho pana samayena aññataro bhikkhu bahubhaṇḍo bahuparikkhāro kālaṅkato hoti.

Bhagavato etamatthaṁ ārocesuṁ.

“Bhikkhussa, bhikkhave, kālaṅkate saṅgho sāmī pattacīvare,

api ca gilānupaṭṭhākā bahūpakārā.

Anujānāmi, bhikkhave, saṅghena ticīvarañca pattañca gilānupaṭṭhākānaṁ dātuṁ.

Yaṁ tattha lahubhaṇḍaṁ lahuparikkhāraṁ taṁ sammukhībhūtena saṅghena bhājetuṁ.

Yaṁ tattha garubhaṇḍaṁ garuparikkhāraṁ taṁ āgatānāgatassa cātuddisassa saṅghassa avissajjikaṁ avebhaṅgikan”ti.

25. Naggiyapaṭikkhepakathā

Tena kho pana samayena aññataro bhikkhu naggo hutvā yena bhagavā tenupasaṅkami, upasaṅkamitvā bhagavantaṁ etadavoca—

“bhagavā, bhante, anekapariyāyena appicchassa santuṭṭhassa sallekhassa dhutassa pāsādikassa apacayassa vīriyārambhassa vaṇṇavādī.

Idaṁ, bhante, naggiyaṁ anekapariyāyena appicchatāya santuṭṭhitāya sallekhāya dhutatāya pāsādikatāya apacayāya vīriyārambhāya saṁvattati.

Sādhu, bhante, bhagavā bhikkhūnaṁ naggiyaṁ anujānātū”ti.

Vigarahi buddho bhagavā—

“ananucchavikaṁ, moghapurisa, ananulomikaṁ appatirūpaṁ assāmaṇakaṁ akappiyaṁ akaraṇīyaṁ.

Kathañhi nāma tvaṁ, moghapurisa, naggiyaṁ titthiyasamādānaṁ samādiyissasi.

Netaṁ, moghapurisa, appasannānaṁ vā pasādāya …pe…

vigarahitvā …pe…

dhammiṁ kathaṁ katvā bhikkhū āmantesi—

“na, bhikkhave, naggiyaṁ titthiyasamādānaṁ samādiyitabbaṁ.

Yo samādiyeyya, āpatti thullaccayassā”ti.

26. Kusacīrādipaṭikkhepakathā

Tena kho pana samayena aññataro bhikkhu kusacīraṁ nivāsetvā …pe…

vākacīraṁ nivāsetvā …pe…

phalakacīraṁ nivāsetvā …pe…

kesakambalaṁ nivāsetvā …pe…

vāḷakambalaṁ nivāsetvā …pe…

ulūkapakkhaṁ nivāsetvā …pe…

ajinakkhipaṁ nivāsetvā

yena bhagavā tenupasaṅkami; upasaṅkamitvā bhagavantaṁ etadavoca—

“bhagavā, bhante, anekapariyāyena appicchassa santuṭṭhassa sallekhassa dhutassa pāsādikassa apacayassa vīriyārambhassa vaṇṇavādī.

Idaṁ, bhante, ajinakkhipaṁ anekapariyāyena appicchatāya santuṭṭhitāya sallekhāya dhutatāya pāsādikatāya apacayāya vīriyārambhāya saṁvattati.

Sādhu, bhante, bhagavā bhikkhūnaṁ ajinakkhipaṁ anujānātū”ti.

Vigarahi buddho bhagavā—

“ananucchavikaṁ, moghapurisa, ananulomikaṁ appatirūpaṁ assāmaṇakaṁ akappiyaṁ akaraṇīyaṁ.

Kathañhi nāma tvaṁ, moghapurisa, ajinakkhipaṁ titthiyadhajaṁ dhāressasi.

Netaṁ, moghapurisa, appasannānaṁ vā pasādāya …pe…

vigarahitvā …pe…

dhammiṁ kathaṁ katvā bhikkhū āmantesi—

“na, bhikkhave, ajinakkhipaṁ titthiyadhajaṁ dhāretabbaṁ.

Yo dhāreyya, āpatti thullaccayassā”ti.

Tena kho pana samayena aññataro bhikkhu akkanāḷaṁ nivāsetvā …pe…

potthakaṁ nivāsetvā yena bhagavā tenupasaṅkami, upasaṅkamitvā bhagavantaṁ etadavoca—

“bhagavā, bhante, anekapariyāyena appicchassa santuṭṭhassa sallekhassa dhutassa pāsādikassa apacayassa vīriyārambhassa, vaṇṇavādī.

Ayaṁ, bhante, potthako anekapariyāyena appicchatāya santuṭṭhitāya sallekhāya dhutatāya pāsādikatāya apacayāya vīriyārambhāya saṁvattati.

Sādhu, bhante, bhagavā bhikkhūnaṁ potthakaṁ anujānātū”ti.

Vigarahi buddho bhagavā—

“ananucchavikaṁ, moghapurisa, ananulomikaṁ appatirūpaṁ assāmaṇakaṁ akappiyaṁ akaraṇīyaṁ.

Kathañhi nāma tvaṁ, moghapurisa, potthakaṁ nivāsessasi.

Netaṁ, moghapurisa, appasannānaṁ vā pasādāya …pe…

vigarahitvā …pe…

dhammiṁ kathaṁ katvā bhikkhū āmantesi—

“na, bhikkhave, potthako nivāsetabbo.

Yo nivāseyya, āpatti dukkaṭassā”ti.

27. Sabbanīlakādipaṭikkhepakathā

Tena kho pana samayena chabbaggiyā bhikkhū sabbanīlakāni cīvarāni dhārenti …pe…

sabbapītakāni cīvarāni dhārenti …pe…

sabbalohitakāni cīvarāni dhārenti …pe…

sabbamañjiṭṭhakāni cīvarāni dhārenti …pe…

sabbakaṇhāni cīvarāni dhārenti …pe…

sabbamahāraṅgarattāni cīvarāni dhārenti …pe…

sabbamahānāmarattāni cīvarāni dhārenti …pe…

acchinnadasāni cīvarāni dhārenti …pe…

dīghadasāni cīvarāni dhārenti …pe…

pupphadasāni cīvarāni dhārenti …pe…

phaṇadasāni cīvarāni dhārenti …pe…

kañcukaṁ dhārenti …pe…

tirīṭakaṁ dhārenti …pe…

veṭhanaṁ dhārenti.

Manussā ujjhāyanti khiyyanti vipācenti—

“kathañhi nāma samaṇā sakyaputtiyā veṭhanaṁ dhāressanti, seyyathāpi gihī kāmabhogino”ti.

Bhagavato etamatthaṁ ārocesuṁ.

“Na, bhikkhave, sabbanīlakāni cīvarāni dhāretabbāni, na sabbapītakāni cīvarāni dhāretabbāni, na sabbalohitakāni cīvarāni dhāretabbāni, na sabbamañjiṭṭhakāni cīvarāni dhāretabbāni, na sabbakaṇhāni cīvarāni dhāretabbāni, na sabbamahāraṅgarattāni cīvarāni dhāretabbāni, na sabbamahānāmarattāni cīvarāni dhāretabbāni, na acchinnadasāni cīvarāni dhāretabbāni, na dīghadasāni cīvarāni dhāretabbāni, na pupphadasāni cīvarāni dhāretabbāni, na phaṇadasāni cīvarāni dhāretabbāni, na kañcukaṁ dhāretabbaṁ, na tirīṭakaṁ dhāretabbaṁ, na veṭhanaṁ dhāretabbaṁ.

Yo dhāreyya, āpatti dukkaṭassā”ti.

28. Vassaṁvuṭṭhānaṁanuppannacīvarakathā

Tena kho pana samayena vassaṁvuṭṭhā bhikkhū anuppanne cīvare pakkamantipi, vibbhamantipi, kālampi karonti, sāmaṇerāpi paṭijānanti, sikkhaṁ paccakkhātakāpi paṭijānanti, antimavatthuṁ ajjhāpannakāpi paṭijānanti, ummattakāpi paṭijānanti, khittacittāpi paṭijānanti, vedanāṭṭāpi paṭijānanti, āpattiyā adassane ukkhittakāpi paṭijānanti, āpattiyā appaṭikamme ukkhittakāpi paṭijānanti, pāpikāya diṭṭhiyā appaṭinissagge ukkhittakāpi paṭijānanti, paṇḍakāpi paṭijānanti, theyyasaṁvāsakāpi paṭijānanti, titthiyapakkantakāpi paṭijānanti, tiracchānagatāpi paṭijānanti, mātughātakāpi paṭijānanti, pitughātakāpi paṭijānanti, arahantaghātakāpi paṭijānanti, bhikkhunidūsakāpi paṭijānanti, saṅghabhedakāpi paṭijānanti, lohituppādakāpi paṭijānanti, ubhatobyañjanakāpi paṭijānanti.

Bhagavato etamatthaṁ ārocesuṁ.

“Idha pana, bhikkhave, vassaṁvuṭṭho bhikkhu anuppanne cīvare pakkamati, sante patirūpe gāhake dātabbaṁ.

Idha pana, bhikkhave, vassaṁvuṭṭho bhikkhu anuppanne cīvare vibbhamati, kālaṁ karoti, sāmaṇero paṭijānāti, sikkhaṁ paccakkhātako paṭijānāti, antimavatthuṁ ajjhāpannako paṭijānāti, saṅgho sāmī.

Idha pana, bhikkhave, vassaṁvuṭṭho bhikkhu anuppanne cīvare ummattako paṭijānāti, khittacitto paṭijānāti, vedanāṭṭo paṭijānāti, āpattiyā adassane ukkhittako paṭijānāti, āpattiyā appaṭikamme ukkhittako paṭijānāti, pāpikāya diṭṭhiyā appaṭinissagge ukkhittako paṭijānāti, sante patirūpe gāhake dātabbaṁ.

Idha pana, bhikkhave, vassaṁvuṭṭho bhikkhu anuppanne cīvare paṇḍako paṭijānāti, theyyasaṁvāsako paṭijānāti, titthiyapakkantako paṭijānāti, tiracchānagato paṭijānāti, mātughātako paṭijānāti, pitughātako paṭijānāti, arahantaghātako paṭijānāti, bhikkhunidūsako paṭijānāti, saṅghabhedako paṭijānāti, lohituppādako paṭijānāti, ubhatobyañjanako paṭijānāti, saṅgho sāmī.

Idha pana, bhikkhave, vassaṁvuṭṭho bhikkhu uppanne cīvare abhājite pakkamati, sante patirūpe gāhake dātabbaṁ.

Idha pana, bhikkhave, vassaṁvuṭṭho bhikkhu uppanne cīvare abhājite vibbhamati, kālaṁ karoti, sāmaṇero paṭijānāti, sikkhaṁ paccakkhātako paṭijānāti, antimavatthuṁ ajjhāpannako paṭijānāti, saṅgho sāmī.

Idha pana, bhikkhave, vassaṁvuṭṭho bhikkhu uppanne cīvare abhājite ummattako paṭijānāti. Khittacitto paṭijānāti, vedanāṭṭo paṭijānāti, āpattiyā adassane ukkhittako paṭijānāti, āpattiyā appaṭikamme ukkhittako paṭijānāti, pāpikāya diṭṭhiyā appaṭinissagge ukkhittako paṭijānāti, sante patirūpe gāhake dātabbaṁ.

Idha pana, bhikkhave, vassaṁvuṭṭho bhikkhu uppanne cīvare abhājite paṇḍako paṭijānāti, theyyasaṁvāsako paṭijānāti, titthiyapakkantako paṭijānāti, tiracchānagato paṭijānāti, mātughātako paṭijānāti, pitughātako paṭijānāti, arahantaghātako paṭijānāti, bhikkhunidūsako paṭijānāti, saṅghabhedako paṭijānāti, lohituppādako paṭijānāti, ubhatobyañjanako paṭijānāti, saṅgho sāmī.

29. Saṅghebhinnecīvaruppādakathā

Idha pana, bhikkhave, vassaṁvuṭṭhānaṁ bhikkhūnaṁ anuppanne cīvare saṅgho bhijjati.

Tattha manussā ekasmiṁ pakkhe udakaṁ denti, ekasmiṁ pakkhe cīvaraṁ denti—

saṅghassa demāti.

Saṅghassevetaṁ.

Idha pana, bhikkhave, vassaṁvuṭṭhānaṁ bhikkhūnaṁ anuppanne cīvare saṅgho bhijjati.

Tattha manussā ekasmiṁ pakkhe udakaṁ denti, tasmiṁyeva pakkhe cīvaraṁ denti—

saṅghassa demāti.

Saṅghassevetaṁ.

Idha pana, bhikkhave, vassaṁvuṭṭhānaṁ bhikkhūnaṁ anuppanne cīvare saṅgho bhijjati.

Tattha manussā ekasmiṁ pakkhe udakaṁ denti, ekasmiṁ pakkhe cīvaraṁ denti—

pakkhassa demāti.

Pakkhassevetaṁ.

Idha pana, bhikkhave, vassaṁvuṭṭhānaṁ bhikkhūnaṁ anuppanne cīvare saṅgho bhijjati.

Tattha manussā ekasmiṁ pakkhe udakaṁ denti, tasmiṁyeva pakkhe cīvaraṁ denti—

pakkhassa demāti.

Pakkhassevetaṁ.

Idha pana, bhikkhave, vassaṁvuṭṭhānaṁ bhikkhūnaṁ uppanne cīvare abhājite saṅgho bhijjati.

Sabbesaṁ samakaṁ bhājetabban”ti.

30. Duggahitasuggahitādikathā

Tena kho pana samayena āyasmā revato aññatarassa bhikkhuno hatthe āyasmato sāriputtassa cīvaraṁ pāhesi—

“imaṁ cīvaraṁ therassa dehī”ti.

Atha kho so bhikkhu antarāmagge āyasmato revatassa vissāsā taṁ cīvaraṁ aggahesi.

Atha kho āyasmā revato āyasmatā sāriputtena samāgantvā pucchi—

“ahaṁ, bhante, therassa cīvaraṁ pāhesiṁ.

Sampattaṁ taṁ cīvaran”ti?

“Nāhaṁ taṁ, āvuso, cīvaraṁ passāmī”ti.

Atha kho āyasmā revato taṁ bhikkhuṁ etadavoca—

“ahaṁ, āvuso, āyasmato hatthe therassa cīvaraṁ pāhesiṁ.

Kahaṁ taṁ cīvaran”ti?

“Ahaṁ, bhante, āyasmato vissāsā taṁ cīvaraṁ aggahesin”ti.

Bhagavato etamatthaṁ ārocesuṁ.

“Idha pana, bhikkhave, bhikkhu bhikkhussa hatthe cīvaraṁ pahiṇati—

‘imaṁ cīvaraṁ itthannāmassa dehī’ti.

So antarāmagge yo pahiṇati tassa vissāsā gaṇhāti.

Suggahitaṁ.

Yassa pahiyyati tassa vissāsā gaṇhāti.

Duggahitaṁ.

Idha pana, bhikkhave, bhikkhu bhikkhussa hatthe cīvaraṁ pahiṇati—

‘imaṁ cīvaraṁ itthannāmassa dehī’ti.

So antarāmagge yassa pahiyyati tassa vissāsā gaṇhāti.

Duggahitaṁ.

Yo pahiṇati tassa vissāsā gaṇhāti.

Suggahitaṁ.

Idha pana, bhikkhave, bhikkhu bhikkhussa hatthe cīvaraṁ pahiṇati—

‘imaṁ cīvaraṁ itthannāmassa dehī’ti.

So antarāmagge suṇāti—

‘yo pahiṇati so kālaṅkato’ti.

Tassa matakacīvaraṁ adhiṭṭhāti.

Svādhiṭṭhitaṁ.

Yassa pahiyyati tassa vissāsā gaṇhāti.

Duggahitaṁ.

Idha pana, bhikkhave, bhikkhu bhikkhussa hatthe cīvaraṁ pahiṇati—

‘imaṁ cīvaraṁ itthannāmassa dehī’ti.

So antarāmagge suṇāti—

‘yassa pahiyyati so kālaṅkato’ti.

Tassa matakacīvaraṁ adhiṭṭhāti.

Dvādhiṭṭhitaṁ.

Yo pahiṇati tassa vissāsā gaṇhāti.

Suggahitaṁ.

Idha pana, bhikkhave, bhikkhu bhikkhussa hatthe cīvaraṁ pahiṇati—

‘imaṁ cīvaraṁ itthannāmassa dehī’ti.

So antarāmagge suṇāti—

‘ubho kālaṅkatā’ti.

Yo pahiṇati tassa matakacīvaraṁ adhiṭṭhāti.

Svādhiṭṭhitaṁ.

Yassa pahiyyati tassa matakacīvaraṁ adhiṭṭhāti.

Dvādhiṭṭhitaṁ.

Idha pana, bhikkhave, bhikkhu bhikkhussa hatthe cīvaraṁ pahiṇati—

‘imaṁ cīvaraṁ itthannāmassa dammī’ti.

So antarāmagge yo pahiṇati tassa vissāsā gaṇhāti.

Duggahitaṁ.

Yassa pahiyyati tassa vissāsā gaṇhāti.

Suggahitaṁ.

Idha pana, bhikkhave, bhikkhu bhikkhussa hatthe cīvaraṁ pahiṇati—

‘imaṁ cīvaraṁ itthannāmassa dammī’ti.

So antarāmagge yassa pahiyyati tassa vissāsā gaṇhāti.

Suggahitaṁ.

Yo pahiṇati tassa vissāsā gaṇhāti.

Duggahitaṁ.

Idha pana, bhikkhave, bhikkhu bhikkhussa hatthe cīvaraṁ pahiṇati—

‘imaṁ cīvaraṁ itthannāmassa dammī’ti.

So antarāmagge suṇāti—

‘yo pahiṇati so kālaṅkato’ti.

Tassa matakacīvaraṁ adhiṭṭhāti.

Dvādhiṭṭhitaṁ.

Yassa pahiyyati tassa vissāsā gaṇhāti.

Suggahitaṁ.

Idha pana, bhikkhave, bhikkhu bhikkhussa hatthe cīvaraṁ pahiṇati—

‘imaṁ cīvaraṁ itthannāmassa dammī’ti.

So antarāmagge suṇāti—

‘yassa pahiyyati so kālaṅkato’ti.

Tassa matakacīvaraṁ adhiṭṭhāti.

Svādhiṭṭhitaṁ.

Yo pahiṇati tassa vissāsā gaṇhāti.

Duggahitaṁ.

Idha pana, bhikkhave, bhikkhu bhikkhussa hatthe cīvaraṁ pahiṇati—

‘imaṁ cīvaraṁ itthannāmassa dammī’ti.

So antarāmagge suṇāti ‘ubho kālaṅkatā’ti.

Yo pahiṇati tassa matakacīvaraṁ adhiṭṭhāti.

Dvādhiṭṭhitaṁ.

Yassa pahiyyati tassa matakacīvaraṁ adhiṭṭhāti.

Svādhiṭṭhitaṁ.

31. Aṭṭhacīvaramātikā

Aṭṭhimā, bhikkhave, mātikā cīvarassa uppādāya—

sīmāya deti, katikāya deti, bhikkhāpaññattiyā deti, saṅghassa deti, ubhatosaṅghassa deti, vassaṁvuṭṭhasaṅghassa deti, ādissa deti, puggalassa deti.

Sīmāya deti—

yāvatikā bhikkhū antosīmagatā tehi bhājetabbaṁ.

Katikāya deti—

sambahulā āvāsā samānalābhā honti ekasmiṁ āvāse dinne sabbattha dinnaṁ hoti.

Bhikkhāpaññattiyā deti, yattha saṅghassa dhuvakārā kariyyanti, tattha deti.

Saṅghassa deti, sammukhībhūtena saṅghena bhājetabbaṁ.

Ubhatosaṅghassa deti, bahukāpi bhikkhū honti, ekā bhikkhunī hoti, upaḍḍhaṁ dātabbaṁ, bahukāpi bhikkhuniyo honti, eko bhikkhu hoti, upaḍḍhaṁ dātabbaṁ.

Vassaṁvuṭṭhasaṅghassa deti, yāvatikā bhikkhū tasmiṁ āvāse vassaṁvuṭṭhā, tehi bhājetabbaṁ.

Ādissa deti, yāguyā vā bhatte vā khādanīye vā cīvare vā senāsane vā bhesajje vā.

Puggalassa deti—

‘imaṁ cīvaraṁ itthannāmassa dammī’”ti.

Cīvarakkhandhako aṭṭhamo.

Tassuddānaṁ

Rājagahako negamo,

disvā vesāliyaṁ gaṇiṁ;

Puna rājagahaṁ gantvā,

rañño taṁ paṭivedayi.

Putto sālavatikāya,

abhayassa hi atrajo;

Jīvatīti kumārena,

saṅkhāto jīvako iti.

So hi takkasīlaṁ gantvā,

uggahetvā mahābhiso;

Sattavassikaābādhaṁ,

natthukammena nāsayi.

Rañño bhagandalābādhaṁ,

ālepena apākaḍḍhi;

Mamañca itthāgārañca,

buddhasaṅghaṁ cupaṭṭhahi.

Rājagahako ca seṭṭhi,

antagaṇṭhi tikicchitaṁ;

Pajjotassa mahārogaṁ,

ghatapānena nāsayi.

Adhikārañca siveyyaṁ,

abhisannaṁ sinehati;

Tīhi uppalahatthehi,

samattiṁsavirecanaṁ.

Pakatattaṁ varaṁ yāci,

siveyyañca paṭiggahi;

Cīvarañca gihidānaṁ,

anuññāsi tathāgato.

Rājagahe janapade,

bahuṁ uppajji cīvaraṁ;

Pāvāro kosiyañceva,

kojavo aḍḍhakāsikaṁ.

Uccāvacā ca santuṭṭhi,

nāgamesāgamesuṁ ca;

Paṭhamaṁ pacchā sadisā,

katikā ca paṭiharuṁ.

Bhaṇḍāgāraṁ aguttañca,

vuṭṭhāpenti tatheva ca;

Ussannaṁ kolāhalañca,

kathaṁ bhāje kathaṁ dade.

Sakātirekabhāgena,

paṭivīso kathaṁ dade;

Chakaṇena sītudakā,

uttaritu na jānare.

Oropentā bhājanañca,

pātiyā ca chamāya ca;

Upacikā majjhe jīranti,

ekato patthinnena ca.

Pharusācchinnacchibandhā,

addasāsi ubbhaṇḍite;

Vīmaṁsitvā sakyamuni,

anuññāsi ticīvaraṁ.

Aññena atirekena,

uppajji chiddameva ca;

Cātuddīpo varaṁ yāci,

dātuṁ vassikasāṭikaṁ.

Āgantugamigilānaṁ,

upaṭṭhākañca bhesajjaṁ;

Dhuvaṁ udakasāṭiñca,

paṇītaṁ atikhuddakaṁ.

Thullakacchumukhaṁ khomaṁ,

paripuṇṇaṁ adhiṭṭhānaṁ;

Pacchimaṁ kato garuko,

vikaṇṇo suttamokiri.

Lujjanti nappahonti,

ca anvādhikaṁ bahūni ca;

Andhavane assatiyā,

eko vassaṁ utumhi ca.

Dve bhātukā rājagahe,

upanando puna dvisu;

Kucchivikāro gilāno,

ubho ceva gilānakā.

Naggā kusā vākacīraṁ,

phalako kesakambalaṁ;

Vāḷaulūkapakkhañca,

ajinaṁ akkanāḷakaṁ.

Potthakaṁ nīlapītañca,

lohitaṁ mañjiṭṭhena ca;

Kaṇhā mahāraṅganāma,

acchinnadasikā tathā.

Dīghapupphaphaṇadasā,

kañcutirīṭaveṭhanaṁ;

Anuppanne pakkamati,

saṅgho bhijjati tāvade.

Pakkhe dadanti saṅghassa,

āyasmā revato pahi;

Vissāsagāhādhiṭṭhāti,

aṭṭha cīvaramātikāti.

Imamhi khandhake vatthū channavuti.

Cīvarakkhandhako niṭṭhito.