61. Gabbhinisikkhāpada (PLI-TV-BI-VB-PC61)

Theravāda Vinaya

Bhikkhunivibhaṅga

Pācittiyakaṇḍa

Gabbhinivagga

61. Gabbhinisikkhāpada

Tena samayena buddho bhagavā sāvatthiyaṁ viharati jetavane anāthapiṇḍikassa ārāme.

Tena kho pana samayena bhikkhuniyo gabbhiniṁ vuṭṭhāpenti.

Sā piṇḍāya carati.

Manussā evamāhaṁsu—

“dethāyyāya bhikkhaṁ, garubhārā ayyā”ti.

Manussā ujjhāyanti khiyyanti vipācenti—

“kathañhi nāma bhikkhuniyo gabbhiniṁ vuṭṭhāpessantī”ti.

Assosuṁ kho bhikkhuniyo tesaṁ manussānaṁ ujjhāyantānaṁ khiyyantānaṁ vipācentānaṁ.

Yā tā bhikkhuniyo appicchā …pe… tā ujjhāyanti khiyyanti vipācenti—

“kathañhi nāma bhikkhuniyo gabbhiniṁ vuṭṭhāpessantī”ti …pe…

“saccaṁ kira, bhikkhave, bhikkhuniyo gabbhiniṁ vuṭṭhāpentī”ti?

“Saccaṁ, bhagavā”ti.

Vigarahi buddho bhagavā …pe…

kathañhi nāma, bhikkhave, bhikkhuniyo gabbhiniṁ vuṭṭhāpessanti.

Netaṁ, bhikkhave, appasannānaṁ vā pasādāya …pe…

evañca pana, bhikkhave, bhikkhuniyo imaṁ sikkhāpadaṁ uddisantu—

“Yā pana bhikkhunī gabbhiniṁ vuṭṭhāpeyya, pācittiyan”ti.

Yā panāti

yā yādisā …pe…

bhikkhunīti

…pe… ayaṁ imasmiṁ atthe adhippetā bhikkhunīti.

Gabbhinī nāma

āpannasattā vuccati.

Vuṭṭhāpeyyāti

upasampādeyya.

“Vuṭṭhāpessāmī”ti gaṇaṁ vā ācariniṁ vā pattaṁ vā cīvaraṁ vā pariyesati, sīmaṁ vā sammannati, āpatti dukkaṭassa.

Ñattiyā dukkaṭaṁ.

Dvīhi kammavācāhi dukkaṭā.

Kammavācāpariyosāne upajjhāyāya āpatti pācittiyassa.

Gaṇassa ca ācariniyā ca āpatti dukkaṭassa.

Gabbhiniyā gabbhinisaññā vuṭṭhāpeti, āpatti pācittiyassa.

Gabbhiniyā vematikā vuṭṭhāpeti, āpatti dukkaṭassa.

Gabbhiniyā agabbhinisaññā vuṭṭhāpeti, anāpatti.

Agabbhiniyā gabbhinisaññā, āpatti dukkaṭassa.

Agabbhiniyā vematikā, āpatti dukkaṭassa.

Agabbhiniyā agabbhinisaññā, anāpatti.

Anāpatti—

gabbhiniṁ agabbhinisaññā vuṭṭhāpeti,

agabbhiniṁ agabbhinisaññā vuṭṭhāpeti,

ummattikāya,

ādikammikāyāti.

Paṭhamasikkhāpadaṁ niṭṭhitaṁ.