60. Pasākhejātasikkhāpada (PLI-TV-BI-VB-PC60)

Theravāda Vinaya

Bhikkhunivibhaṅga

Pācittiyakaṇḍa

Ārāmavagga

60. Pasākhejātasikkhāpada

Tena samayena buddho bhagavā sāvatthiyaṁ viharati jetavane anāthapiṇḍikassa ārāme.

Tena kho pana samayena aññatarā bhikkhunī pasākhe jātaṁ gaṇḍaṁ purisena saddhiṁ ekenekā bhedāpesi.

Atha kho so puriso taṁ bhikkhuniṁ dūsetuṁ upakkami.

Sā vissaramakāsi.

Bhikkhuniyo upadhāvitvā taṁ bhikkhuniṁ etadavocuṁ—

“kissa tvaṁ, ayye, vissaramakāsī”ti?

Atha kho sā bhikkhunī bhikkhunīnaṁ etamatthaṁ ārocesi.

Yā tā bhikkhuniyo appicchā …pe… tā ujjhāyanti khiyyanti vipācenti—

“kathañhi nāma bhikkhunī pasākhe jātaṁ gaṇḍaṁ purisena saddhiṁ ekenekā bhedāpessatī”ti …pe…

“saccaṁ kira, bhikkhave, bhikkhunī pasākhe jātaṁ gaṇḍaṁ purisena saddhiṁ ekenekā bhedāpetī”ti?

“Saccaṁ, bhagavā”ti.

Vigarahi buddho bhagavā …pe…

kathañhi nāma, bhikkhave, bhikkhunī pasākhe jātaṁ gaṇḍaṁ purisena saddhiṁ ekenekā bhedāpessati.

Netaṁ, bhikkhave, appasannānaṁ vā pasādāya …pe…

evañca pana, bhikkhave, bhikkhuniyo imaṁ sikkhāpadaṁ uddisantu—

“Yā pana bhikkhunī pasākhe jātaṁ gaṇḍaṁ vā rudhitaṁ vā anapaloketvā saṅghaṁ vā gaṇaṁ vā purisena saddhiṁ ekenekā bhedāpeyya vā phālāpeyya vā dhovāpeyya vā ālimpāpeyya vā bandhāpeyya vā mocāpeyya vā, pācittiyan”ti.

Yā panāti

yā yādisā …pe…

bhikkhunīti

…pe… ayaṁ imasmiṁ atthe adhippetā bhikkhunīti.

Pasākhaṁ nāma

adhonābhi ubbhajāṇumaṇḍalaṁ.

Jātanti

tattha jātaṁ.

Gaṇḍo nāma

yo koci gaṇḍo.

Rudhitaṁ nāma

yaṁ kiñci vaṇaṁ.

Anapaloketvāti

anāpucchā.

Saṅgho nāma

bhikkhunisaṅgho vuccati.

Gaṇo nāma

sambahulā bhikkhuniyo vuccanti.

Puriso nāma

manussapuriso, na yakkho, na peto, na tiracchānagato, viññū paṭibalo dūsetuṁ.

Saddhinti

ekato.

Ekenekāti

puriso ceva hoti bhikkhunī ca.

“Bhindā”ti āṇāpeti, āpatti dukkaṭassa.

Bhinne āpatti pācittiyassa.

“Phālehī”ti āṇāpeti, āpatti dukkaṭassa.

Phālite āpatti pācittiyassa.

“Dhovā”ti āṇāpeti, āpatti dukkaṭassa.

Dhovite āpatti pācittiyassa.

“Ālimpā”ti āṇāpeti, āpatti dukkaṭassa.

Litte āpatti pācittiyassa.

“Bandhāhī”ti āṇāpeti, āpatti dukkaṭassa.

Baddhe āpatti pācittiyassa.

“Mocehī”ti āṇāpeti, āpatti dukkaṭassa.

Mutte āpatti pācittiyassa.

Anāpatti—

apaloketvā bhedāpeti vā phālāpeti vā dhovāpeti vā ālimpāpeti vā bandhāpeti vā mocāpeti vā,

yā kāci viññū dutiyikā hoti,

ummattikāya,

ādikammikāyāti.

Dasamasikkhāpadaṁ niṭṭhitaṁ.

Ārāmavaggo chaṭṭho.