Tam tạng Pāli · Tam tạng Pāli — nguyên bản Pāli (Mahāsaṅgīti) · Kinh tạng › Khuddaka Nikāya · Milindapañha
8. Kammaphalaatthibhāvapañha (MIL3.5.8)
- Thông tin
- Mã SuttaCentral: MIL3.5.8
Milindapañha
Buddhavagga
8. Kammaphalaatthibhāvapañha
Rājā āha—
“bhante nāgasena, iminā nāmarūpena kammaṁ kataṁ kusalaṁ vā akusalaṁ vā, kuhiṁ tāni kammāni tiṭṭhantī”ti?
“Anubandheyyuṁ kho, mahārāja, tāni kammāni chāyāva anapāyinī”ti.
“Sakkā pana, bhante, tāni kammāni dassetuṁ ‘idha vā idha vā tāni kammāni tiṭṭhantī’”ti?
“Na sakkā, mahārāja, tāni kammāni dassetuṁ ‘idha vā idha vā tāni kammāni tiṭṭhantī’”ti.
“Opammaṁ karohī”ti.
“Taṁ kiṁ maññasi, mahārāja, yānimāni rukkhāni anibbattaphalāni, sakkā tesaṁ phalāni dassetuṁ ‘idha vā idha vā tāni phalāni tiṭṭhantī’”ti.
“Na hi, bhante”ti.
“Evameva kho, mahārāja, abbocchinnāya santatiyā na sakkā tāni kammāni dassetuṁ ‘idha vā idha vā tāni kammāni tiṭṭhantī’”ti.
“Kallosi, bhante nāgasenā”ti.
Kammaphalaatthibhāvapañho aṭṭhamo.
Nguồn: Nguyên bản Pāli: ấn bản Mahāsaṅgīti (SuttaCentral). Giấy phép: Nguyên bản Pāli và bản dịch trên Bilara: CC0 1.0.