Arahantavagga (DHP90-99)

Khuddakanikāya

Dhammapada

Arahantavagga

Jīvakapañhavatthu

Gataddhino visokassa,

vippamuttassa sabbadhi;

Sabbaganthappahīnassa,

pariḷāho na vijjati.

Mahākassapattheravatthu

Uyyuñjanti satīmanto,

na nikete ramanti te;

Haṁsāva pallalaṁ hitvā,

okamokaṁ jahanti te.

Belaṭṭhasīsattheravatthu

Yesaṁ sannicayo natthi,

ye pariññātabhojanā;

Suññato animitto ca,

vimokkho yesaṁ gocaro;

Ākāseva sakuntānaṁ,

gati tesaṁ durannayā.

Anuruddhattheravatthu

Yassāsavā parikkhīṇā,

āhāre ca anissito;

Suññato animitto ca,

vimokkho yassa gocaro;

Ākāseva sakuntānaṁ,

padaṁ tassa durannayaṁ.

Mahākaccāyanattheravatthu

Yassindriyāni samathaṅgatāni,

Assā yathā sārathinā sudantā;

Pahīnamānassa anāsavassa,

Devāpi tassa pihayanti tādino.

Sāriputtattheravatthu

Pathavisamo no virujjhati,

Indakhilupamo tādi subbato;

Rahadova apetakaddamo,

Saṁsārā na bhavanti tādino.

Kosambivāsitissattherasāmaṇeravatthu

Santaṁ tassa manaṁ hoti,

santā vācā ca kamma ca;

Sammadaññāvimuttassa,

upasantassa tādino.

Sāriputtattheravatthu

Assaddho akataññū ca,

sandhicchedo ca yo naro;

Hatāvakāso vantāso,

sa ve uttamaporiso.

Khadiravaniyarevatattheravatthu

Gāme vā yadi vāraññe,

Ninne vā yadi vā thale;

Yattha arahanto viharanti,

Taṁ bhūmirāmaṇeyyakaṁ.

Aññataraitthivatthu

Ramaṇīyāni araññāni,

yattha na ramatī jano;

Vītarāgā ramissanti,

na te kāmagavesino.

Arahantavaggo sattamo.