Paṇḍitavagga (DHP76-89)

Khuddakanikāya

Dhammapada

Paṇḍitavagga

Rādhattheravatthu

Nidhīnaṁva pavattāraṁ,

yaṁ passe vajjadassinaṁ;

Niggayhavādiṁ medhāviṁ,

tādisaṁ paṇḍitaṁ bhaje;

Tādisaṁ bhajamānassa,

seyyo hoti na pāpiyo.

Assajipunabbasukavatthu

Ovadeyyānusāseyya,

asabbhā ca nivāraye;

Satañhi so piyo hoti,

asataṁ hoti appiyo.

Channattheravatthu

Na bhaje pāpake mitte,

na bhaje purisādhame;

Bhajetha mitte kalyāṇe,

bhajetha purisuttame.

Mahākappinattheravatthu

Dhammapīti sukhaṁ seti,

vippasannena cetasā;

Ariyappavedite dhamme,

sadā ramati paṇḍito.

Paṇḍitasāmaṇeravatthu

Udakañhi nayanti nettikā,

Usukārā namayanti tejanaṁ;

Dāruṁ namayanti tacchakā,

Attānaṁ damayanti paṇḍitā.

Lakuṇḍakabhaddiyattheravatthu

Selo yathā ekaghano,

vātena na samīrati;

Evaṁ nindāpasaṁsāsu,

na samiñjanti paṇḍitā.

Kāṇamātāvatthu

Yathāpi rahado gambhīro,

vippasanno anāvilo;

Evaṁ dhammāni sutvāna,

vippasīdanti paṇḍitā.

Pañcasatabhikkhuvatthu

Sabbattha ve sappurisā cajanti,

Na kāmakāmā lapayanti santo;

Sukhena phuṭṭhā atha vā dukhena,

Na uccāvacaṁ paṇḍitā dassayanti.

Dhammikattheravatthu

Na attahetu na parassa hetu,

Na puttamicche na dhanaṁ na raṭṭhaṁ;

Na iccheyya adhammena samiddhimattano,

Sa sīlavā paññavā dhammiko siyā.

Dhammassavanattheravatthu

Appakā te manussesu,

ye janā pāragāmino;

Athāyaṁ itarā pajā,

tīramevānudhāvati.

Ye ca kho sammadakkhāte,

dhamme dhammānuvattino;

Te janā pāramessanti,

maccudheyyaṁ suduttaraṁ.

Pañcasataāgantukabhikkhuvatthu

Kaṇhaṁ dhammaṁ vippahāya,

Sukkaṁ bhāvetha paṇḍito;

Okā anokamāgamma,

Viveke yattha dūramaṁ.

Tatrābhiratimiccheyya,

hitvā kāme akiñcano;

Pariyodapeyya attānaṁ,

cittaklesehi paṇḍito.

Yesaṁ sambodhiyaṅgesu,

sammā cittaṁ subhāvitaṁ;

Ādānapaṭinissagge,

anupādāya ye ratā;

Khīṇāsavā jutimanto,

te loke parinibbutā.

Paṇḍitavaggo chaṭṭho.