Bhikkhuvagga (DHP360-382)

Khuddakanikāya

Dhammapada

Bhikkhuvagga

Pañcabhikkhuvatthu

Cakkhunā saṁvaro sādhu,

sādhu sotena saṁvaro;

Ghānena saṁvaro sādhu,

sādhu jivhāya saṁvaro.

Kāyena saṁvaro sādhu,

sādhu vācāya saṁvaro;

Manasā saṁvaro sādhu,

sādhu sabbattha saṁvaro;

Sabbattha saṁvuto bhikkhu,

sabbadukkhā pamuccati.

Haṁsaghātakabhikkhuvatthu

Hatthasaṁyato pādasaṁyato,

Vācāsaṁyato saṁyatuttamo;

Ajjhattarato samāhito,

Eko santusito tamāhu bhikkhuṁ.

Kokālikavatthu

Yo mukhasaṁyato bhikkhu,

mantabhāṇī anuddhato;

Atthaṁ dhammañca dīpeti,

madhuraṁ tassa bhāsitaṁ.

Dhammārāmattheravatthu

Dhammārāmo dhammarato,

dhammaṁ anuvicintayaṁ;

Dhammaṁ anussaraṁ bhikkhu,

saddhammā na parihāyati.

Vipakkhasevakabhikkhuvatthu

Salābhaṁ nātimaññeyya,

nāññesaṁ pihayaṁ care;

Aññesaṁ pihayaṁ bhikkhu,

samādhiṁ nādhigacchati.

Appalābhopi ce bhikkhu,

salābhaṁ nātimaññati;

Taṁ ve devā pasaṁsanti,

suddhājīviṁ atanditaṁ.

Pañcaggadāyakabrāhmaṇavatthu

Sabbaso nāmarūpasmiṁ,

yassa natthi mamāyitaṁ;

Asatā ca na socati,

sa ve “bhikkhū”ti vuccati.

Sambahulabhikkhuvatthu

Mettāvihārī yo bhikkhu,

pasanno buddhasāsane;

Adhigacche padaṁ santaṁ,

saṅkhārūpasamaṁ sukhaṁ.

Siñca bhikkhu imaṁ nāvaṁ,

sittā te lahumessati;

Chetvā rāgañca dosañca,

tato nibbānamehisi.

Pañca chinde pañca jahe,

pañca cuttari bhāvaye;

Pañca saṅgātigo bhikkhu,

“oghatiṇṇo”ti vuccati.

Jhāya bhikkhu mā pamādo,

Mā te kāmaguṇe ramessu cittaṁ;

Mā lohaguḷaṁ gilī pamatto,

Mā kandi “dukkhamidan”ti dayhamāno.

Natthi jhānaṁ apaññassa,

paññā natthi ajhāyato;

Yamhi jhānañca paññā ca,

sa ve nibbānasantike.

Suññāgāraṁ paviṭṭhassa,

santacittassa bhikkhuno;

Amānusī rati hoti,

sammā dhammaṁ vipassato.

Yato yato sammasati,

khandhānaṁ udayabbayaṁ;

Labhatī pītipāmojjaṁ,

amataṁ taṁ vijānataṁ.

Tatrāyamādi bhavati,

idha paññassa bhikkhuno;

Indriyagutti santuṭṭhi,

pātimokkhe ca saṁvaro.

Mitte bhajassu kalyāṇe,

suddhājīve atandite;

Paṭisanthāravutyassa,

ācārakusalo siyā;

Tato pāmojjabahulo,

dukkhassantaṁ karissati.

Pañcasatabhikkhuvatthu

Vassikā viya pupphāni,

maddavāni pamuñcati;

Evaṁ rāgañca dosañca,

vippamuñcetha bhikkhavo.

Santakāyattheravatthu

Santakāyo santavāco,

santavā susamāhito;

Vantalokāmiso bhikkhu,

“upasanto”ti vuccati.

Naṅgalakulattheravatthu

Attanā codayattānaṁ,

paṭimaṁsetha attanā;

So attagutto satimā,

sukhaṁ bhikkhu vihāhisi.

Attā hi attano nātho,

ko hi nātho paro siyā;

Attā hi attano gati,

tasmā saṁyamamattānaṁ;

Assaṁ bhadraṁva vāṇijo.

Vakkalittheravatthu

Pāmojjabahulo bhikkhu,

pasanno buddhasāsane;

Adhigacche padaṁ santaṁ,

saṅkhārūpasamaṁ sukhaṁ.

Sumanasāmaṇeravatthu

Yo have daharo bhikkhu,

yuñjati buddhasāsane;

Somaṁ lokaṁ pabhāseti,

abbhā muttova candimā.

Bhikkhuvaggo pañcavīsatimo.