विंशिकावृत्ति

विंशिकावृत्ति

विंशिकावृत्तिः (व्वृ)

विज्ञप्तिमात्रमेवेदमसदर्थावभासनात् / यद्वत् तैमिरिकस्यासत्केशोण्ड्रकादिदर्शनं // व्वृ_1 //

न देशकालनियमः सन्तानानियमो न च / न च कृत्यक्रिया युक्ता विज्ञप्तिर्यदि नार्थतः // व्वृ_2 //

देशादिनियमः सिद्धः स्वप्नवत् प्रेतवत्पुनः / सन्तानानियमः सर्वैः पूयनद्यादिदर्शने // व्वृ_3 //

स्वप्नोपघातवत्कृत्यक्रिया नरकवत्पुनः / सर्वं नरकपालादिदर्शने तैश्च बाधने // व्वृ_4 //

तिरश्चां सम्भवः स्वर्गे यथा च नरके तथा / न प्रेतानां यतस्तज्जं दुःखं नानुभवन्ति ते // व्वृ_5 //

यदि तत्कर्मभिस्तत्र भूतानां सम्भवस्तथा इष्यते परिणामश्च किं विज्ञानस्य नेष्यते // व्वृ_6 //

कर्मणो वासनान्यत्र फलमन्यत्र कल्प्यते / तत्रैव नेष्यते यत्र वासना किं नु कारणं // व्वृ_7 //

रूपाद्यायतनास्तित्वं तद्विनेयजनं प्रति / अभिप्रायवशादुक्तमुपपादुकसत्त्ववत् // व्वृ_8 //

नास्तीह सत्व आत्मा वा धर्मास्त्वेते सहेतुकाः यतः स्वबीजाद्विज्ञप्तिर्यदाभासा प्रवर्तते / द्विविधायतनत्वेन ते तस्या मुनिरब्रवीत् // व्वृ_9 //

तथा पुद्गलनैरात्म्यप्रवेशो हि अन्यथा पुनः / देशना धर्मनैरात्म्यप्रवेशः कल्पितात्मना // व्वृ_10 //

न तदेकं न चानेकं विषयः परमाणुशः / न च ते संहता यस्मात्परमाणुर्न सिध्यति // व्वृ_11 //

षट्केन युगपद्योगात्परमाणोः षडंशता / षण्णां समानदेशत्वात्पिण्डः स्यादणुमात्रकः // व्वृ_12 //

परमाणोरसंयोगे तत्सङ्घाते ऽस्ति कस्य सः / न चानवयवत्वेन तत्संयोगाद् न सिध्यति // व्वृ_13 //

दिभागभेदो यस्यास्ति तस्यैकत्वं न युज्यते / छायावृती कथं वा अन्यो न पिण्डश्चेन्न तस्य ते // व्वृ_14 //

एकत्वे न क्रमेणेतिर्युगपन्न ग्रहाग्रहौ / विच्छिन्नानेकवृत्तिश्च सूक्ष्मानीक्षा च नो भवेत् // व्वृ_15 //

प्रत्यक्षबुद्धिः स्वप्नादौ यथा स च यदा तदा / न सो ऽर्थो दृश्यते तस्य प्रत्यक्षत्वं कथं मतं // व्वृ_16 //

उक्तं यथा तदाभासा विज्ञप्तिः स्मरणं ततः / स्वप्नदृग्विषयाभावं नाप्रबुद्धो ऽवगच्छति // व्वृ_17 //

अन्योन्याधिपतित्वेन विज्ञप्तिनियमो मिथः / मिद्धेनोपहतं चित्तं स्वप्ने तेनासमं फलं // व्वृ_18 //

मरणं परविज्ञप्तिविशेषाद्विक्रिया यथा / स्मृतिलोपादिकान्येषां पिशाचादिमनोवशात् // व्वृ_19 //

कथं वा दण्डकारण्यशून्यत्वमृषिकोपतः / मनोदण्डो महावद्यः कथं वा तेन सिध्यति // व्वृ_20 //

परचित्तविदां ज्ञानमयथार्थं कथं यथा स्वचित्तज्ञानम् अज्ञानाद्यथा बुद्धस्य गोचरः // व्वृ_21 //

विज्ञप्तिमात्रतासिद्धिः स्वशक्तिसदृशी मया / कृतेयं सर्वथा सा तु न चिन्त्या बुद्धगोचरः // व्वृ_22 //

विंशतिका विज्ञप्तिमात्रतासिद्धिः / कृतिरियमाचार्यवसुबन्धोः /