तत्त्वरत्नावलोक

तत्त्वरत्नावलोक

तत्त्वरत्नावलोकः (त्र)

ओम् नमः श्रीसद्गुरुपादेभ्यः /

अनुपमसुखरूपी श्रीनिवासो ऽनिवासो निरुपमदशदेवीरूपविद्यः सविद्यः / त्रिभुवनहितसौख्यप्राप्तिकारो ऽविकारो जयति कमलपाणिर्यावदाशाविकासाः // tra_1 //

श्रीमन्त्रनीतिगतचारुचतुर्थसेकरूपं विदन्ति नहि ये स्फुटशब्दशून्यम् / नानोपदेशगणसंकुलसप्तभेदैस् तेषां स्फुटावगतये क्रियते प्रयत्नः // tra_2 //

संभ्रान्तबोधा निखिला हि तीर्थ्यास् तत्त्वस्य साध्यस्य च रूपवित्तौ / तेभ्यः प्रकृष्टः किल तत्त्ववेत्ता वेदान्तवादीति[जन] प्रवादः // tra_3 //

आनन्दरूपं स्वविदप्रकम्प्यं वेदान्तिनः साध्यमुषन्ति सान्तम् / सश्रावकाखड्गजिनाश्च साध्यम् इच्छन्ति रूपाद्युपधेर्विरामम् // tra_4 //

आकारशून्यं गगनेन्दुरूपं प्रत्यात्मवेद्यं करुणारसं च / सल्लक्षणैर्भूषितमर्थकारि दानादिनिष्यन्दमपेतसौख्यम् // tra_5 //

सानन्दसल्लक्षणमण्डिताङ्गं संभुज्यमानं दशभूमिसंस्थैः / सत्त्वार्थकारि प्रवदन्ति साध्यं दानदिषट्पारमितानयस्था // tra_6 //

संपूर्य दानादिगुणानशेषान् संबुद्ध्य कृत्यं सकलं च कृत्वा / यभ्दूतकोटेः करणं च साक्षात् साध्यं तदप्यस्ति निरोधरूपम् // tra_7 //

स्वाभाङ्गणा(ना)श्लेषि तदर्थकारि दुःखैः सुखैश्चैव विमुक्तिरूपम् / अशीत्यनुव्यञ्जनभूषिताङ्गम् अपेतकल्पं प्रवदन्ति साध्यम् // tra_8 //

स्वदेवताकारविशेषशून्यं प्रागेव संभाव्य सुखं स्फुटं सत् / महासुखाख्यं जगदर्थकारि चिन्तामणिप्रख्यमुवाच कश्चित् // tra_9 //

कृत्वा साक्षात् स्वाधिपं सातरूपं पश्चात् त्यक्त्वा सातमात्रं फलं स्यात् / शुद्धं साक्षाच्छक्यते नैव कर्तुं तेनाकारो भावितः स्वाधिपस्य // tra_10 //

गगणसमशरीरं लक्षणैर्भूषिताङ्गं निरुपमसुखपूर्णं स्वाभया संगतं च / स्फुरदमितमुनीन्द्रः सर्वसत्त्वार्थकारि प्रवदति पुनरन्यः साध्यमुच्छेदशून्यम् // tra_11 //

कृत्वा साक्षात् स्वाधिपं सातरूपं भावोपेक्षाज्ञानमात्रं फलं स्यात् / आसंसारस्थायि सत्त्वार्थकारि चिन्तारत्नप्रख्यमेकान्तशान्तम् // tra_12 //

कृत्वा साक्षान्मण्डलं सातरूपं पश्चात्तस्य स्वेच्छया निर्वृतिं च / सत्त्वार्थस्याप्यस्त्यभावो न वास्मिन् प्रादुर्भावो निर्वृतादस्ति यस्मात् // tra_13 //

कृत्वा स्फुटं रूपमभीष्टमेषां पश्चान्निरोधं फलमाह कश्चित् / अभिन्नरूपश्च यतो निरोधो न पक्षभेदे ऽपि ततो ऽस्ति भेदः // tra_14 //

प्रज्ञाज्ञानादुत्तरं बोधिचित्तास्वादस्तुर्यं सेष(क)माहावरं तत् / यस्मात् सर्वो भावनासु प्रयासो व्यर्थः प्राप्तस्तत्फलस्य प्रसिद्धेः // tra_15 //

प्रज्ञाज्ञानादुत्तरं प्राप्तरामास्वादस्तुर्यं सेकमाहाधमं तत् / यस्मात् सर्वो भावनादौ प्रयत्नो बुद्धोद्दिष्टो निष्फलः संप्रसक्तः // tra_16 //

दम्भोलिबीजश्रुतिधौतशुद्धपाथोज्ञ(ज)भूताङ्कुरभूतपुष्टि / तुरीयशस्यं परिपाकमेत(ति) स्फुटं चतुर्थं विदुषो ऽपि गूढम् // tra_17 //

पञ्चप्रदीपामृतबिन्दुचन्द्रभ्रूमध्यबिन्दुद्भवमण्डलानि / वायोः स्वरूपं गलशुण्डिकाद्यम् अतत्त्वरूपं स्वयमूहनीयम् // tra_18 //

स्वप्नेन्द्रजालप्रतिबिम्बमायामरीचिगन्धर्वपुराम्बुचन्द्रैः / अन्यैश्च सर्वैरुपमाभिधेयैर् नैवास्ति साध्यं कथितादिहान्यत् // tra_19 //

गम्भीरशून्यप्रतिभासमात्रशान्तातिसूक्ष्मानभिलाप्यशब्दैः / निर्लेपनी[रू]पनिरञ्जनाद्यैर् भ्रान्तिर्न कार्यापरसाध्यसत्त्वे // tra_20 //

// तत्त्वरत्नावलोकः समाप्तः //

कृतिरियं पण्डितवागीश्वरकीर्तिपादानाम् //