Phạn tạng · Phạn bản GRETIL — chữ Devanāgarī · Mật giáo
मृत्युवञ्चनोपदेशतारासाधन
- Thông tin
- GRETIL — Johannes Schneider: Vāgīśvarakīrtis Mṛtyuvañcanopadeśa, eine buddhistische Lehrschrift zur Abwehr des Todes. Wien : Verlag der Österreichischen Akademie der Wissenschaften 2010. (Beiträge zur Kultur- und Geistesgeschichte Asiens ; 66) (Denkschriften der philosophisch-historischen Klasse ; 394) ISBN 978-3-7001-6722-8, p. 235.chữ Devanāgarī do máy chuyển tự từ bản IAST của GRETILCC BY-NC-SA 4.0
मृत्युवञ्चनोपदेशतारासाधन
मृत्युवञ्चनोपदेशतारासाधन
उत्थाय पूर्वसंध्यायां भूप्रदेशे मनोहरे / मृद्वासनोपविष्टः सन् स्वहृदि चन्द्रमण्डले // mvupts_1 //
पञ्चमस्य प्रथमं तु द्वितीयस्वरयोजितम् / अर्धेन्दुबिन्दुसंयुक्तं सितरश्मिविभूषितम् // mvupts_2 //
तस्य शुक्लमयूखैस् तु ताराम् आकृष्य व्योमनि / द्विभुजां सितदेहां तु वरदोत्पलधारिणीम् // mvupts_3 //
पञ्चोपचारपूजाभिः पूजयित्वा तु भक्तितः / पापानां देशनां पश्चात् ततः पुण्यानुमोदनम् // mvupts_4 //
तत्परिणामनां चैव त्रिशरणगमनं तथा / ओं शून्यताज्ञानवज्रस्वभावात्मको ऽहम् इति पठेत् // mvupts_5 //
इति स्वपरशून्यं वै ध्यात्वा योगी विधानवित् / सितारविन्दमध्यस्थचन्द्रबिम्बासनोपरि // mvupts_6 //
पूर्वोक्तबीजनिष्पन्नां तारादेवीं मनोरमाम् / आबद्धवज्रपर्यङ्कां वरदोत्पलधारिणीम् // mvupts_7 //
शरच्चन्द्रकराकारां पृष्ठचन्द्रसमाश्रिताम् / सर्वालङ्कारसम्पूर्णां षोडशाब्दवपुष्मतीम् // mvupts_8 //
सर्वसंबुद्धतत्पुत्रमातरं कामरूपधाम् / ध्यात्वार्यतारां हृदये तस्याश् चक्रं सितद्युति // mvupts_9 //
अष्टकोष्ठकम् अष्टाभिर् अक्षरैः परिपूरितम् / ओंहाव्यञ्जनमध्यस्थसाध्यनामाद्यनाभिकम् // mvupts_10 //
ध्यायाद् एकाग्रचित्तः सन् षण् मासान् दृढनिश्चयः / जपेद् अखिन्नचित्तः सन् मन्त्रम् एनं दशाक्षरम् // mvupts_11 //
ओङ्कारम् आदितो दत्त्वा पश्चात् तारे प्रयोजयेत् / तुत्तारे स्यात् तुरे पश्चात् स्वाहान्तं सार्वकर्मिकः // mvupts_12 //
ब्रह्मेन्द्रविष्णुचन्द्रार्करुद्रदिक्पालमन्मथैः / अप्य् अखण्डितरोमाग्रो मृत्युं जयति मुक्तवत् // mvupts_13 //
वलीपलितदौर्भाग्यव्याधिदारिद्र्यसंक्षयः / सिंहाद्यष्टमहाभीतिदुःखसंदोहनाशनम् // mvupts_14 //
अयाचितान्नपानादिहर्म्यवस्त्रादिसंगमः / खड्गाञ्जनपादलेपभद्रकुम्भादिसिद्धयः // mvupts_15 //
कविता वक्तृता मेधा प्रज्ञा चैकान्तनिर्मला / अन्या च वाञ्छिता सिद्धिश् चक्राद् अस्मात् प्रजायते // mvupts_16 //
// मृत्युवञ्चनोपदेशतारासाधनं समाप्तम् //
Nguồn: Bản Phạn còn sót, từ GRETIL (ĐH Göttingen) — trọn phần Phật giáo: kinh Đại thừa · luận · luật · mật giáo · kinh A-hàm · thí dụ · tán ca · thi ca. Bản Devanāgarī là phép CHUYỂN TỰ TẠI MÁY từ bản IAST, không phải bản GRETIL phát hành. Giấy phép và ấn bản in gốc ghi ở từng bài, thuộc về người nhập liệu và nhà xuất bản đứng tên; phần lớn là CC BY-NC-SA. Gói này phát hành trên GitHub cho người dùng app, để nghiên cứu và đối chiếu, không nhằm mục đích thương mại. Ai muốn gỡ bài của mình khỏi gói xin báo, sẽ gỡ ngay.