Abhibhūtattheragāthā (THAG3.13)

Theragāthā 3.13

Tikanipāta

Paṭhamavagga

Abhibhūtattheragāthā

“Suṇātha ñātayo sabbe,

yāvantettha samāgatā;

Dhammaṁ vo desayissāmi,

dukkhā jāti punappunaṁ.

Ārambhatha nikkamatha,

Yuñjatha buddhasāsane;

Dhunātha maccuno senaṁ,

Naḷāgāraṁva kuñjaro.

Yo imasmiṁ dhammavinaye,

appamatto vihassati;

Pahāya jātisaṁsāraṁ,

dukkhassantaṁ karissatī”ti.

… Abhibhūto thero ….