(Apara) Gotamattheragāthā (THAG10.7)

Theragāthā 10.7

Dasakanipāta

Paṭhamavagga

(Apara) Gotamattheragāthā

“Vijāneyya sakaṁ atthaṁ,

Avalokeyyātha pāvacanaṁ;

Yañcettha assa patirūpaṁ,

Sāmaññaṁ ajjhupagatassa.

Mittaṁ idha ca kalyāṇaṁ,

Sikkhā vipulaṁ samādānaṁ;

Sussūsā ca garūnaṁ,

Etaṁ samaṇassa patirūpaṁ.

Buddhesu sagāravatā,

Dhamme apaciti yathābhūtaṁ;

Saṅghe ca cittikāro,

Etaṁ samaṇassa patirūpaṁ.

Ācāragocare yutto,

Ājīvo sodhito agārayho;

Cittassa ca saṇṭhapanaṁ,

Etaṁ samaṇassa patirūpaṁ.

Cārittaṁ atha vārittaṁ,

Iriyāpathiyaṁ pasādaniyaṁ;

Adhicitte ca āyogo,

Etaṁ samaṇassa patirūpaṁ.

Āraññakāni senāsanāni,

Pantāni appasaddāni;

Bhajitabbāni muninā,

Etaṁ samaṇassa patirūpaṁ.

Sīlañca bāhusaccañca,

Dhammānaṁ pavicayo yathābhūtaṁ;

Saccānaṁ abhisamayo,

Etaṁ samaṇassa patirūpaṁ.

Bhāveyya ca aniccanti,

Anattasaññaṁ asubhasaññañca;

Lokamhi ca anabhiratiṁ,

Etaṁ samaṇassa patirūpaṁ.

Bhāveyya ca bojjhaṅge,

Iddhipādāni indriyāni balāni;

Aṭṭhaṅgamaggamariyaṁ,

Etaṁ samaṇassa patirūpaṁ.

Taṇhaṁ pajaheyya muni,

Samūlake āsave padāleyya;

Vihareyya vippamutto,

Etaṁ samaṇassa patirūpan”ti.

… Gotamo thero …

Dasakanipāto niṭṭhito.

Tatruddānaṁ

Kāḷudāyī ca so thero,

ekavihārī ca kappino;

Cūḷapanthako kappo ca,

upaseno ca gotamo;

Sattime dasake therā,

gāthāyo cettha sattatīti.