Ekavihāriyattheragāthā (THAG10.2)

Theragāthā 10.2

Dasakanipāta

Paṭhamavagga

Ekavihāriyattheragāthā

“Purato pacchato vāpi,

aparo ce na vijjati;

Atīva phāsu bhavati,

ekassa vasato vane.

Handa eko gamissāmi,

araññaṁ buddhavaṇṇitaṁ;

Phāsu ekavihārissa,

pahitattassa bhikkhuno.

Yogi-pītikaraṁ rammaṁ,

mattakuñjarasevitaṁ;

Eko attavasī khippaṁ,

pavisissāmi kānanaṁ.

Supupphite sītavane,

sītale girikandare;

Gattāni parisiñcitvā,

caṅkamissāmi ekako.

Ekākiyo adutiyo,

ramaṇīye mahāvane;

Kadāhaṁ viharissāmi,

katakicco anāsavo.

Evaṁ me kattukāmassa,

adhippāyo samijjhatu;

Sādhayissāmahaṁyeva,

nāñño aññassa kārako.

Esa bandhāmi sannāhaṁ,

pavisissāmi kānanaṁ;

Na tato nikkhamissāmi,

appatto āsavakkhayaṁ.

Mālute upavāyante,

sīte surabhigandhike;

Avijjaṁ dālayissāmi,

nisinno nagamuddhani.

Vane kusumasañchanne,

pabbhāre nūna sītale;

Vimuttisukhena sukhito,

ramissāmi giribbaje.

Sohaṁ paripuṇṇasaṅkappo,

cando pannaraso yathā;

Sabbāsavaparikkhīṇo,

natthi dāni punabbhavo”ti.

… Ekavihāriyo thero ….