Tam tạng Pāli · Tam tạng Pāli — nguyên bản Pāli (Mahāsaṅgīti) · Kinh tạng › Khuddaka Nikāya · Sutta Nipāta
Kappamāṇavapucchā (SNP5.11)
- Thông tin
- Mã SuttaCentral: SNP5.11
Sutta Nipāta 5.11
Kappamāṇavapucchā
“Majjhe sarasmiṁ tiṭṭhataṁ,
(iccāyasmā kappo)
Oghe jāte mahabbhaye;
Jarāmaccuparetānaṁ,
Dīpaṁ pabrūhi mārisa;
Tvañca me dīpamakkhāhi,
Yathāyidaṁ nāparaṁ siyā”.
“Majjhe sarasmiṁ tiṭṭhataṁ,
(kappāti bhagavā)
Oghe jāte mahabbhaye;
Jarāmaccuparetānaṁ,
Dīpaṁ pabrūmi kappa te.
Akiñcanaṁ anādānaṁ,
etaṁ dīpaṁ anāparaṁ;
Nibbānaṁ iti naṁ brūmi,
jarāmaccuparikkhayaṁ.
Etadaññāya ye satā,
Diṭṭhadhammābhinibbutā;
Na te māravasānugā,
Na te mārassa paddhagū”ti.
Kappamāṇavapucchā dasamā.
Nguồn: Nguyên bản Pāli: ấn bản Mahāsaṅgīti (SuttaCentral). Giấy phép: Nguyên bản Pāli và bản dịch trên Bilara: CC0 1.0.