Paramaṭṭhakasutta (SNP4.5)

Sutta Nipāta 4.5

Paramaṭṭhakasutta

Paramanti diṭṭhīsu paribbasāno,

Yaduttari kurute jantu loke;

Hīnāti aññe tato sabbamāha,

Tasmā vivādāni avītivatto.

Yadattanī passati ānisaṁsaṁ,

Diṭṭhe sute sīlavate mute vā;

Tadeva so tattha samuggahāya,

Nihīnato passati sabbamaññaṁ.

Taṁ vāpi ganthaṁ kusalā vadanti,

Yaṁ nissito passati hīnamaññaṁ;

Tasmā hi diṭṭhaṁ va sutaṁ mutaṁ vā,

Sīlabbataṁ bhikkhu na nissayeyya.

Diṭṭhimpi lokasmiṁ na kappayeyya,

Ñāṇena vā sīlavatena vāpi;

Samoti attānamanūpaneyya,

Hīno na maññetha visesi vāpi.

Attaṁ pahāya anupādiyāno,

Ñāṇepi so nissayaṁ no karoti;

Sa ve viyattesu na vaggasārī,

Diṭṭhimpi so na pacceti kiñci.

Yassūbhayante paṇidhīdha natthi,

Bhavābhavāya idha vā huraṁ vā;

Nivesanā tassa na santi keci,

Dhammesu niccheyya samuggahītaṁ.

Tassīdha diṭṭhe va sute mute vā,

Pakappitā natthi aṇūpi saññā;

Taṁ brāhmaṇaṁ diṭṭhimanādiyānaṁ,

Kenīdha lokasmiṁ vikappayeyya.

Na kappayanti na purekkharonti,

Dhammāpi tesaṁ na paṭicchitāse;

Na brāhmaṇo sīlavatena neyyo,

Pāraṅgato na pacceti tādīti.

Paramaṭṭhakasuttaṁ pañcamaṁ.