Pabbajjāsutta (SNP3.1)

Sutta Nipāta 3.1

Pabbajjāsutta

“Pabbajjaṁ kittayissāmi,

yathā pabbaji cakkhumā;

Yathā vīmaṁsamāno so,

pabbajjaṁ samarocayi.

Sambādhoyaṁ gharāvāso,

rajassāyatanaṁ iti;

Abbhokāsova pabbajjā,

iti disvāna pabbaji.

Pabbajitvāna kāyena,

pāpakammaṁ vivajjayi;

Vacīduccaritaṁ hitvā,

ājīvaṁ parisodhayi.

Agamā rājagahaṁ buddho,

magadhānaṁ giribbajaṁ;

Piṇḍāya abhihāresi,

ākiṇṇavaralakkhaṇo”.

Tamaddasā bimbisāro,

pāsādasmiṁ patiṭṭhito;

Disvā lakkhaṇasampannaṁ,

imamatthaṁ abhāsatha.

“Imaṁ bhonto nisāmetha,

abhirūpo brahā suci;

Caraṇena ca sampanno,

yugamattañca pekkhati.

Okkhittacakkhu satimā,

nāyaṁ nīcakulāmiva;

Rājadūtābhidhāvantu,

kuhiṁ bhikkhu gamissati”.

Te pesitā rājadūtā,

piṭṭhito anubandhisuṁ;

Kuhiṁ gamissati bhikkhu,

kattha vāso bhavissati.

Sapadānaṁ caramāno,

guttadvāro susaṁvuto;

Khippaṁ pattaṁ apūresi,

sampajāno paṭissato.

Piṇḍacāraṁ caritvāna,

Nikkhamma nagarā muni;

Paṇḍavaṁ abhihāresi,

Ettha vāso bhavissati.

Disvāna vāsūpagataṁ,

Tayo dūtā upāvisuṁ;

Tesu ekova āgantvā,

Rājino paṭivedayi.

“Esa bhikkhu mahārāja,

Paṇḍavassa puratthato;

Nisinno byagghusabhova,

Sīhova girigabbhare”.

Sutvāna dūtavacanaṁ,

Bhaddayānena khattiyo;

Taramānarūpo niyyāsi,

Yena paṇḍavapabbato.

Sa yānabhūmiṁ yāyitvā,

Yānā oruyha khattiyo;

Pattiko upasaṅkamma,

Āsajja naṁ upāvisi.

Nisajja rājā sammodi,

Kathaṁ sāraṇīyaṁ tato;

Kathaṁ so vītisāretvā,

Imamatthaṁ abhāsatha.

“Yuvā ca daharo cāsi,

Paṭhamuppattiko susu;

Vaṇṇārohena sampanno,

Jātimā viya khattiyo.

Sobhayanto anīkaggaṁ,

Nāgasaṅghapurakkhato;

Dadāmi bhoge bhuñjassu,

Jātiṁ akkhāhi pucchito”.

“Ujuṁ janapado rāja,

Himavantassa passato;

Dhanaviriyena sampanno,

Kosalesu niketino.

Ādiccā nāma gottena,

Sākiyā nāma jātiyā;

Tamhā kulā pabbajitomhi,

Na kāme abhipatthayaṁ.

Kāmesvādīnavaṁ disvā,

Nekkhammaṁ daṭṭhu khemato;

Padhānāya gamissāmi,

Ettha me rañjatī mano”ti.

Pabbajjāsuttaṁ paṭhamaṁ.