Dutiyadevapadasutta (SN55.35)

Saṁyutta Nikāya 55.35

4. Puññābhisandavagga

Dutiyadevapadasutta

“Cattārimāni, bhikkhave, devānaṁ devapadāni avisuddhānaṁ sattānaṁ visuddhiyā apariyodātānaṁ sattānaṁ pariyodapanāya.

Katamāni cattāri?

Idha, bhikkhave, ariyasāvako buddhe aveccappasādena samannāgato hoti—

itipi so bhagavā …pe… satthā devamanussānaṁ buddho bhagavāti.

So iti paṭisañcikkhati:

‘kiṁ nu kho devānaṁ devapadan’ti?

So evaṁ pajānāti:

‘abyābajjhaparame khvāhaṁ etarahi deve suṇāmi.

Na ca kho panāhaṁ kiñci byābādhemi tasaṁ vā thāvaraṁ vā.

Addhāhaṁ devapadadhammasamannāgato viharāmī’ti.

Idaṁ paṭhamaṁ devānaṁ devapadaṁ avisuddhānaṁ sattānaṁ visuddhiyā apariyodātānaṁ sattānaṁ pariyodapanāya.

Puna caparaṁ, bhikkhave, ariyasāvako dhamme …pe…

saṅghe …pe….

Puna caparaṁ, bhikkhave, ariyasāvako ariyakantehi sīlehi samannāgato hoti akhaṇḍehi …pe… samādhisaṁvattanikehi.

So iti paṭisañcikkhati:

‘kiṁ nu kho devānaṁ devapadan’ti?

So evaṁ pajānāti:

‘abyābajjhaparame khvāhaṁ etarahi deve suṇāmi.

Na kho panāhaṁ kiñci byābādhemi tasaṁ vā thāvaraṁ vā.

Addhāhaṁ devapadadhammasamannāgato viharāmī’ti.

Idaṁ catutthaṁ devānaṁ devapadaṁ avisuddhānaṁ sattānaṁ visuddhiyā apariyodātānaṁ sattānaṁ pariyodapanāya.

Imāni kho, bhikkhave, cattāri devānaṁ devapadāni avisuddhānaṁ sattānaṁ visuddhiyā apariyodātānaṁ sattānaṁ pariyodapanāyā”ti.

Pañcamaṁ.