Janapadakalyāṇīsutta (SN47.20)

Saṁyutta Nikāya 47.20

2. Nālandavagga

Janapadakalyāṇīsutta

Evaṁ me sutaṁ—

ekaṁ samayaṁ bhagavā sumbhesu viharati sedakaṁ nāma sumbhānaṁ nigamo.

Tatra kho bhagavā bhikkhū āmantesi:

“bhikkhavo”ti.

“Bhadante”ti te bhikkhū bhagavato paccassosuṁ.

Bhagavā etadavoca:

“Seyyathāpi, bhikkhave, ‘janapadakalyāṇī, janapadakalyāṇī’ti kho, bhikkhave, mahājanakāyo sannipateyya.

‘Sā kho panassa janapadakalyāṇī paramapāsāvinī nacce, paramapāsāvinī gīte.

Janapadakalyāṇī naccati gāyatī’ti kho, bhikkhave, bhiyyoso mattāya mahājanakāyo sannipateyya.

Atha puriso āgaccheyya jīvitukāmo amaritukāmo sukhakāmo dukkhappaṭikūlo.

Tamenaṁ evaṁ vadeyya:

‘ayaṁ te, ambho purisa, samatittiko telapatto antarena ca mahāsamajjaṁ antarena ca janapadakalyāṇiyā pariharitabbo.

Puriso ca te ukkhittāsiko piṭṭhito piṭṭhito anubandhissati.

Yattheva naṁ thokampi chaḍḍessati tattheva te siro pātessatī’ti.

Taṁ kiṁ maññatha, bhikkhave,

api nu so puriso amuṁ telapattaṁ amanasikaritvā bahiddhā pamādaṁ āhareyyā”ti?

“No hetaṁ, bhante”.

“Upamā kho myāyaṁ, bhikkhave, katā atthassa viññāpanāya.

Ayaṁ cevettha attho—

samatittiko telapattoti kho, bhikkhave, kāyagatāya etaṁ satiyā adhivacanaṁ.

Tasmātiha, bhikkhave, evaṁ sikkhitabbaṁ:

‘kāyagatā sati no bhāvitā bhavissati bahulīkatā yānīkatā vatthukatā anuṭṭhitā paricitā susamāraddhā’ti.

Evañhi kho, bhikkhave, sikkhitabban”ti.

Dasamaṁ.

Nālandavaggo dutiyo.

Tassuddānaṁ

Mahāpuriso nālandaṁ,

Cundo celañca bāhiyo;

Uttiyo ariyo brahmā,

Sedakaṁ janapadena cāti.