Patirūpasutta (SN4.14)

Saṁyutta Nikāya 4.14

2. Dutiyavagga

Patirūpasutta

Ekaṁ samayaṁ bhagavā kosalesu viharati ekasālāyaṁ brāhmaṇagāme.

Tena kho pana samayena bhagavā mahatiyā gihiparisāya parivuto dhammaṁ deseti.

Atha kho mārassa pāpimato etadahosi:

“ayaṁ kho samaṇo gotamo mahatiyā gihiparisāya parivuto dhammaṁ deseti.

Yannūnāhaṁ yena samaṇo gotamo tenupasaṅkameyyaṁ vicakkhukammāyā”ti.

Atha kho māro pāpimā yena bhagavā tenupasaṅkami; upasaṅkamitvā bhagavantaṁ gāthāya ajjhabhāsi:

“Netaṁ tava patirūpaṁ,

yadaññamanusāsasi;

Anurodhavirodhesu,

mā sajjittho tadācaran”ti.

“Hitānukampī sambuddho,

yadaññamanusāsati;

Anurodhavirodhehi,

vippamutto tathāgato”ti.

Atha kho māro pāpimā “jānāti maṁ bhagavā, jānāti maṁ sugato”ti dukkhī dummano tatthevantaradhāyīti.