Dukkhapañhāsutta (SN38.14)

Saṁyutta Nikāya 38.14

1. Jambukhādakavagga

Dukkhapañhāsutta

“‘Dukkhaṁ, dukkhan’ti, āvuso sāriputta, vuccati.

Katamaṁ nu kho, āvuso, dukkhan”ti?

“Tisso imā, āvuso, dukkhatā.

Dukkhadukkhatā, saṅkhāradukkhatā, vipariṇāmadukkhatā—

imā kho, āvuso, tisso dukkhatā”ti.

“Atthi panāvuso maggo atthi paṭipadā, etāsaṁ dukkhatānaṁ pariññāyā”ti?

“Atthi kho, āvuso, maggo atthi paṭipadā, etāsaṁ dukkhatānaṁ pariññāyā”ti.

“Katamo panāvuso, maggo katamā paṭipadā, etāsaṁ dukkhatānaṁ pariññāyā”ti?

“Ayameva kho, āvuso, ariyo aṭṭhaṅgiko maggo, etāsaṁ dukkhatānaṁ pariññāya, seyyathidaṁ—

sammādiṭṭhi …pe… sammāsamādhi.

Ayaṁ kho, āvuso, maggo ayaṁ paṭipadā, etāsaṁ dukkhatānaṁ pariññāyā”ti.

“Bhaddako, āvuso, maggo bhaddikā paṭipadā, etāsaṁ dukkhatānaṁ pariññāya.

Alañca panāvuso sāriputta, appamādāyā”ti.

Cuddasamaṁ.