Tam tạng Pāli · Tam tạng Pāli — nguyên bản Pāli (Mahāsaṅgīti) · Kinh tạng › Saṁyutta Nikāya
Oghapañhāsutta (SN38.11)
- Thông tin
- Mã SuttaCentral: SN38.11
Saṁyutta Nikāya 38.11
1. Jambukhādakavagga
Oghapañhāsutta
“‘Ogho, ogho’ti, āvuso sāriputta, vuccati.
Katamo nu kho, āvuso, ogho”ti?
“Cattārome, āvuso, oghā.
Kāmogho, bhavogho, diṭṭhogho, avijjogho—
ime kho, āvuso, cattāro oghā”ti.
“Atthi panāvuso, maggo atthi paṭipadā, etesaṁ oghānaṁ pahānāyā”ti?
“Atthi kho, āvuso, maggo atthi paṭipadā, etesaṁ oghānaṁ pahānāyā”ti.
“Katamo panāvuso, maggo katamā paṭipadā, etesaṁ oghānaṁ pahānāyā”ti?
“Ayameva kho, āvuso, ariyo aṭṭhaṅgiko maggo, etesaṁ oghānaṁ pahānāya, seyyathidaṁ—
sammādiṭṭhi …pe… sammāsamādhi.
Ayaṁ kho, āvuso, maggo ayaṁ paṭipadā, etesaṁ oghānaṁ pahānāyā”ti.
“Bhaddako, āvuso, maggo bhaddikā paṭipadā, etesaṁ oghānaṁ pahānāya.
Alañca panāvuso sāriputta, appamādāyā”ti.
Ekādasamaṁ.
Nguồn: Nguyên bản Pāli: ấn bản Mahāsaṅgīti (SuttaCentral). Giấy phép: Nguyên bản Pāli và bản dịch trên Bilara: CC0 1.0.